MAHABHARATH PART -26 ( konkani Bhashentu )
KEECHAKA VADHA ಕೀಚಕ ವಧಾ
ತ್ಯೆ ಕಾಲಾಂತು ಅಮಾಸ ಅನಿ ಪುನ್ನವೇ ದಿವಸು 'ರಜಾ ದಿವಸು ' ಮೋಣು ಮಾನ್ಯತಾ ಅಶಿಲಿ . ಕಾರ್ಮಿಕ ಲೋಕು , ವ್ಯಾಪಾರಿ .. ರಜೆ ದಿವಸು ಕಾಮ ಊಣೆ ಕೋರ್ನು ಕುಟುಂಬೆ ವೊಟ್ಟು ವೇಳು ಕಾಡ್ತಾಶಿಲೀಂತಿ . ವಿರಾಟ ರಾಯಾಲೆ ಅಂತಃಪುರ ಲೋಕಾಂಕ ಸ್ವಲ್ಪ ಜನಾಂಕ ಅಮಾವಾಸ್ಯೆ ದಿವಸು ; ಸ್ವಲ್ಪ ಜನಾಂಕ ಪುನ್ನವೇ ದಿವಸು ಸಂಭೋಳು ದೀವ್ನ್ ರಜಾ ದಿತ್ತಾಶೀಲೀಂತಿ . ಆಜಿ ಅಂತಃಪುರಾ ಪರಿಚಾರಿಕೆ ಲೋಕಾಂಕ ರಜೆ ದಿವಸು . ಕೀಚಕು ತಗೆಲ್ ಮಂದಿರಾಂತು ಅಸ್ಸುನ್ ಭಾಯಿರಿ ಭಿತರಿ ವೊಚ್ಚುನ್ ಯೇವ್ನ್ ವೇಳು ಲಕಯಿತಾ ಅಶಿಲೋ . ಸೂರ್ಯ ಪೊಳೋನ್ , ಕೆದನಾ ಸಾಂಜ ಝತ್ತಲಿ ... ಮೋಣು ರಕ್ಕುನ್ ಅಸ್ಸ .ಸಾಂಜ್ವಾಳಾ ವೇಳು ಲಗ್ಗಿ ಯೆತ್ತಾನಾ ವಗ್ಗಿ ವಗ್ಗಿ ನಾವ್ನ್ , ಸುಗಂಧ ದ್ರವ್ಯ ಅಂಗಾ ಲಾವ್ನ್ ಘೆವ್ನ್ .. ಶ್ವೇತ ವಸ್ತ್ರ ಧಾರಿ ಜಾವ್ನ್ , ಗಳೇಕ ಹತ್ತಾಕ ಕನ್ನಾಕ ಭಾಂಗ್ರಾ ಹಾರ ಕಂಕಣ ಕುಂಡಲ ಘಾಲ್ನ್ ದ್ರೌಪದಿಲೆ ಆಲಿಂಗನಾಕ ಉತ್ಸುಕ ಝಲ್ಲೋ . ಮನಾ ಕಾಮನಾ ವಡ್ಡತ್ ಗೆಲ್ಲೆಲಿ ತೆದ್ನಾ ಮೀಶೆ ವೈರಿ ಹಾತು ದವೋರ್ನು ಮೀಶೆ ತುದಿ ಕೊಂಬು ತೀರ್ಪೂನ್ ಆತ್ಮ ವಿಶ್ವಾಸ ವಾಡ್ಡೋನ್ ಘೆತ್ತಶಿಲೋ . ಏಕ ಬದಿನ ತರುಣ ಹುಮ್ಮಸ್ಸ .. ಆನ್ನೇಕ ಬದಿನ ಕಾಮ ಆನಂದ ! ವಿಪರೀತ ಜಲ್ಲಿ ... ರಾತ್ರಿ ಝಲ್ಲಿ ..ದ್ರೌಪದಿನ ಭೀಮ ಸೇನಾಕ ತಯ್ಯಾರ್ ಕೆಲ್ಲೊ . ಭೀಮ ಸೇನಾಕ ಕಪ್ಪಡ ನೆಸ್ಸೋನ್ ನರ್ತನ ಶಾಲೆಕ ಅಪ್ಪೋನ್ ವೆಲ್ಲೇ . ಭೀಮ ಸೇನಾನ ಸೂಕ್ಷ್ಮ ಜಾವ್ನು ಯೆವ್ಚೆ ವಾಟ ... ನರ್ತನ ಶಾಲೆಚೆ ಖಂಬೇ ಸಾಲ .. ಕಳೊಕ್ ಉಜ್ವಾಡಾ ಜಾಗ್ರತಾ ಸ್ಥಾನ .. ಪೂರಾ ಪೊಳೊನ್ ಘೆತಲೆ . ಸುಖಾಸನ ಏಕ ಬದಿನ ಕಾಳ್ಕಾಕ ತಂಡೂನ್ ದವರ್ಲೆ ... ಮೌನ ಜಾವ್ನ್ ದ್ರೌಪದಿಕ ಸನ್ನಿ ಕೊರ್ನ್ ಕೀಚಕಾಕ ಕಶಿ ಖಂಚೆ ಬದಿನ ಅಪ್ಪೋನ್ ಹಾಡಕಾ ಮ್ಹಳ್ಳೆಲೆ ನಿರ್ದೇಶನ ದಿಲ್ಲೆ . ನರ್ತನ ಶಾಲೆಂತು ಆಚಾರ್ಯ ಜಾವ್ನ್ ಆಶಿಲೋ ಬ್ರಹನ್ನಳಾ .. ಅರ್ಜುನಾಕ ಸೂಕ್ಷ್ಮ ಜಾವ್ನು ವಿಷಯು ಸಂಘಲೊ ದ್ರೌಪದಿನ . ಸ್ತ್ರೀ ರೂಪಾರಿ ಅಶಿಲೆ ಭೀಮ ಸೇನಾಕ ಪೊಳೊನ್ ಅರ್ಜುನಾ ಕ ಹಾಸು ಅಯಿಲೋ . ಭೀಮಾ ಕ ಫೊಟೊನ್ ಧೋರ್ನ್ ಧೈರ್ಯ ಸಾಂಗ್ಲೆ . ದ್ರೌಪದಿಲೆ ಸಾವ್ಳಿ ಜಾವ್ನ್ ರಾಬತಾ ಮೊಣು ಆಶ್ವಾಸನ ದಿಲ್ಲೆ . ಘಡಿ- ಫುಡೇಕಚಿ ... ನರ್ತನ ಶಾಲೆಕ ಯೇವ್ನ್ ಕೋಣ್ - ಕೋಣೆ , ಖಂಯ್ -ಖಂಯ್ ಅಸ್ಸುಕಾ ಮ್ಹಳ್ಳೆಲೆ ನಿರ್ಧಾರ್ ಕೆಲ್ಲೆ . ಅರ್ಜುನಾನ ನಾಟ್ಯ ಸಭಾ ಗ್ರಹಾಂತು ಯೇವ್ನ್ ಮೃದಂಗ ಅಭ್ಯಾಸು ಕೊರ್ಚೆ ಮೋಣು ನಿರ್ಧಾರ್ ಕೆಲ್ಲಾ . ಕಾರಣ ಕಸಲೆ ಮ್ಹಳ್ಳೆರಿ ... ವಿಂಗಡ ಕೊಣಯ್ ಭಿತರಿ ಯೇನಾಶಿ ... ದೊನ್ನಿಚೆ , ಭಿತರಿ ಮಲ್ಲ ಯುದ್ಧ ಝತ್ತಾನಾ ಜಾವ್ಚೆ ಚೀತ್ಕಾರ ಶಬ್ಧ .. ಭಾಯಿರಿ ಕೋಣಾಕಯ್ ಐಕನಾಶಿ . ನರ್ತನ ಶಾಲೆಂತು ಪಲ್ಲಂಗ ತಯ್ಯಾರ್ ಕೊರ್ನ್ , ಚಿತ್ರ ವಿಚಿತ್ರ ಪೊರಂಬೋಳಾ ಫುಲ್ಲಾ೦ , ಸುಗಂಧ ದ್ರವ್ಯ , ಪಲ್ಲಂಗಾ ಸುತ್ತು ಘಾಲ್ನ್ ... ದ್ರೌಪದಿ ಆನಿ ಭೀಮಸೇನ .. ಕೀಚಕಾ ಲೆ ವಾಟ ಪೊಳೈತ ಬೊಸ್ಲಿ೦ತಿ .
ಕೀಚಕು ಚೋರು ಸೋ ... ಕೋಣಾಕಯ್ ಕಳ್ನಾಶಿ ... ಮಾಜ್ರಾ ಹೆಜ್ಜೆ ಘಾಲ್ತಾಚಿ .. ನರ್ತನ ಶಾಲೆ ಕ ಯೇವ್ನ್ ಪಾವಲೋ . ಸುತ್ತು ಕಾಳೊಕ್ ತೇಕಡೆ -ಹೆಕಡೆ ಮಾರ್ಜಾಲ ದೃಷ್ಟಿ ಸೋಣು ... ಸಾಲು ಖಂಭೆ ಯೆಕ್ಕಾ ನಂತರ ಆನ್ನೇಕ ಅಪ್ಪಡ್ತಾ ವಾಟಸೊದ್ದುನ್ ಯೆತ್ತಾಅಸ್ಸ . ಕೀಚಕಾ ನ ಅಂಗಾ ಲಾಯ್ಯಿಲೆ ವಿಶೇಷ ಸುಗಂಧ ದ್ರವ್ಯಾ ಪೊರೊಂಬೊಳು .. ನಾ೦ಕಾ ಲಗ್ಗಲೆ ಸತಾನ ದ್ರೌಪದಿಕ ಕಳ್ಳೆ . ಕೀಚಕು ಯೇವ್ನು ಪಾವಲೋ ಮ್ಹಳ್ಳೆಲೆ ಖಾತ್ರಿ ಝಲ್ಲೆ . ಆಪ್ಣೇನ ಆಸ್ಸುಚೆ ಜಾಗೊ ತ್ಯೆ ಕಾಳ್ಕಾ ಮಧ್ಯೆ ಕೀಚಕಾ ಕೊಳ್ಚೆ ತಶಿ ... ಹತ್ತಾ ಕಂಕಣ೦ ಹಲ್ಲೋನ್ ಕಿಣಿ-ಕಿಣಿ , ಪಯ್ಯಾ ಗೆಜ್ಜೇ ಝಲ್ ಝಲ್ ಹಳೂ ಉನ್ಮಾದ ಜಾವ್ಚೆ ಶಬ್ಧ ಕೆಲ್ಲೆ. ಮನಾಂತು ಮಧುರ ಪ್ರೇಮ ಭಾವ ... " ಮಾಲಿನಿ ... ! ತು ಖಂಯ್ ಅಸ್ಸ .. ? " ದ್ರೌಪದಿ ಕಿಲ ಕಿಲನಿ ಹಾಸ್ಲಿ . ತ್ಯೋ ಹಾಸು ಕೀಚಕಾಕ ಸ್ವಾಗತ ಹಾಸು ಕೀ ... ! ಕೀಚಕಾ ಮರಣಾ ರೌದ್ರ ಹಾಸು ಕೀ ... ! ಕಾಮಾಂಧ ಜಾವ್ನ್ ದ್ರೌಪದಿಲೆ ಏಕಾಂತ ವೆಳ್ಯೇರಿ ಅಂಗಾರಿ ಹಾತು ಘಲ್ಲೆಲೆಕ ಶಿಕ್ಷಾ ಕೀ ... ! ಕೀಚಕಾಕ ಕಳ್ನಿ.
ಕೀಚಕ : " ಮಾಲಿನಿ ... ! ಹ್ಯೇ ಸುಸಂಧರ್ಭಾಕ ಹಾಂವೆ ಕಿತ್ಲೆ ರಾಕ್ಲೇ .. ? ಕಿತ್ಲೆ ತಪಸ್ಯ ಕೆಲ್ಲೆ .. ? ಯೋ ಮಾಲಿನಿ ಮಿಗೆಲೆ ಹಾತು ಧರಿ ... ಹಾವ್ ಏಕ ಪೋಟಿ ತುಕ್ಕಾ ಪೊಟೋನ್ ಧರ್ತಾ ... ತೂ ಮಕ್ಕ ಫೊಟೊನ್ ಧರಿ .. ಹ್ಯೇ ಆಲಿಂಗನಾಂತು .. ಹ್ಯೇ ಸಮಾಗಮಾಂತು ... ವಿರಹಾಗ್ನಿ ತಂಪು ಕೋರ್ಯಾ . ಪ್ರೇಮಾಗ್ನಿ ಮಿಗೆಲೆ ಮನ ಹೃದಯ ಅಂಗಾಂಗ ಲಾಸ್ಸುನ್ ಯೆತ್ತಾ ಅಸ್ಸ ... ದೂರ ಕಸಲೆಕ ರಭ್ಲ್ಯಾ ಹ್ಯೇ ಕಾಳ್ಕಾಂತು ... ? ಯೋ .. ಲಗ್ಗಿ ಯೋ .. ಎಕ್ಲೇಲೇ ಹತ್ತಾ೦ತು ... ಹಾತು ಧೋರ್ನ್ ಬಾಹು ಬಂಧನಾಂತ್ ಅಮ್ಮಿ ವೊಟ್ಟು ಜಾವ್ಯಾ . ತುಗ್ಗೆಲ್ ಮಧುರ ಚುಂಬನಾಂತ್ ಅಮ್ಮಿ ಸ್ವರ್ಘ ಸುಖ ಆನಂದ ಪಾವ್ಯಾ ... ಯೋ .. !" ಮೊಣು ಸಾಂಗ್ತಾಚಿ ಮಾಲಿನಿ ಮೊಣು ಭ್ರಮೆರಿ , ಭೀಮ ಸೇನಾಕ ಫೊಟೊನ್ ಧರ್ಲೆ ... !!!
" ವಯ್ ... ಅಮರ ಲೋಕಾಚೆ ಮದುರ ಸ್ವರ್ಘ ... ತುಕ್ಕಾ ಸ್ವರ್ಘ ಸುಖ ದಕ್ಕೋಚೆ ಖತೀರಿ ... ಹಾಂವ ಆಯಿಲಾ .. ತೂಗೇಲ್ ಹಡ್ಡ೦ ಪುಡ್ಡಿ ಕೊರ್ನ್ , ಅಂತಾ ನರ ನರ ಭಾಯಿರಿ ಕಾಣು , ಗಾಂಟಿ ಬಾಂಧುನ್ , ಮತ್ಸ್ಯ ರಾಜ್ಯಾ ಮಹಾ ಜನಾಂಕ ಉಡ್ಗಿರೆ ಕೋರ್ಚ್ಯಾಕ ಗಂಧರ್ವ ಲೋಕಾ ದುಕೂನ್ ಅಯಿಲಾ ... ಯೋ " ... ಮ್ಹಳ್ಳಲೋ ಭೀಮು
" ಕೋಣ ... ಕೋಣ ತೂ ... ಕೋಣ ತೂ .... ಆಆಹ್ .. ಕೋಣ ತೂ ... !! ? "
" ಹಾಂವ ವಾಯು ಪುತ್ರ ಗಂಧರ್ವ ! "
" ಒ .. ಹೋ ... ! ಇತ್ಲೆ ದಿವಸ ಮಾಲಿನಿ ನ ಸಂಘಿಲ್ ಗಂಧರ್ವ ತೂಚಿವೇ ... ? ತಶಿ ಝಲ್ಲೆರಿ ತುಕ್ಕಾ ಸುರ್ವೇಕ ಪೊಳೋನ್ ಘೆತ್ತಾ ... " ಮೊಣು ಭೀಮಾಲೆ ವೊಟ್ಟು ಯುದ್ಧಾಕ ತಯ್ಯಾರ್ ಝಲ್ಲೋ .ದೊಗ್ಗ ಜನಾನಿ ನೆಶಿಲೆ ಅಂಗ ವಸ್ತ್ರ ವೀರ ಕಾಸು ಮಾರ್ನ್ , ಮುಷ್ಟಿ ಧೋರ್ನ್ ಪ್ರಹಾರು ಶುರು ಕೆಲ್ಲೊ . ಕುಸ್ತಿ ಪಟ್ಟು ಧೋರ್ನ್ ನೆಲಾರಿ ಆಡ ಘಾಲುಂಕ ಪ್ರಯತ್ನ ಕೆಲ್ಲೆ . ಗಳೋ ಖಕ್ಕೆಂತ್ ಧೋರ್ನ್ ನಿಷ್ಕ್ರಿಯ ಕೊರುಂಕ ಪೊಳೈಲೆ ... ತಂಗೆಲೆ ಮುಷ್ಟಿ ಯುದ್ಧ .. ದೋನಿ ಸಿಂಹಾನಿ ಮಾರ್ನ್ ಘೆತ್ಲೆ ಮ್ಹಣ್ಕೆ ಅಶಿಲೆ . ರನ್ನಾ೦ತುಲ್ ದೋನಿ ಹಸ್ತಿ ಕೋಪಾನ ಸೋಂಡಾಳಿ ಧೋರ್ನ್ , ಭು೦ಯಿಂಚೆರಿ ಪಾಡೋಚ್ಯಾಕ ಪೊಳೈಲೆ ಮ್ಹಣ್ಕೆ ಅಶಿಲೆ . ಭುಜ ಬಲಾಂತ್ ದೊಗ್ಗಯ್ಯ ಸಮಾ ಸಮ್ . ಕೊಣಾಯ್ ಕೋಣಾಕಾಯಿ ಊಣೆ ನಾತಿ . ಕಾಳ್ಕಾಂತ್ ದೊಗ್ಗಾನಿ ಯುದ್ಧ ಕರ್ತಾನಾ ಕೋಣೆ ಮಸ್ತ ಶಕ್ತಿ ಪ್ರದರ್ಶನ ಕೆಲ್ಲೆ ಮ್ಹಳ್ಳೆಲೆ ದ್ರೌಪದಿಕ ಕಳ್ನಿ . ತ್ಯೆ ಯೆಕ ನಿಶಬ್ಧ ಯುದ್ಧ .. ! ಗಂಧರ್ವಾಲೆ ವೊಟ್ಟು ಯುದ್ಧ ಕೊರ್ಚೆ ಕೀಚಕಾಕ ಯೇಕು ಹೋಡು ಸವಾಲು . ಭಾಯಿರಿ ಕೋಣಾಕಯಿ ಕೊಳುನಜ್ಜ ... ಕೀಚಕಾಕ ಮರ್ಯಾದೆ ಪ್ರಶ್ನೋ ... ಭೀಮಾಕ ಅಜ್ಞಾತ ವಾಸಾ ಜವಾಬ್ದಾರಿ ... ಹಾ ... ಹೂ .. ದುಕ್ಕೇಚೆ ಭಾವ ದಕ್ಕೋಚೆ ತಶಿನಾ . ದೂಕಿ ತಡಸೂನ್ ಘೇವ್ನ್ .. ಗೀಳ್ನ್ ನುತಚಿ ಯುದ್ಧ ಕೆಲ್ಲೆ .
ದೊಗ್ಗಯಿ .. ವಿಂಗಡ ವಿಂಗಡ ಉದ್ದೇಶ ದವೋರ್ನ್ ಯುದ್ಧ ಕರ್ತಾತಿ . ಯೆಕ್ಲೊ ಸ್ತ್ರೀ ಲಾಲಸೆ ಖತೀರಿ ಝಲ್ಲೆರಿ , ಅನ್ನೇಕ್ಲೋ ಸ್ತ್ರೀ ಮರ್ಯಾದೆ ಖತೀರಿ . ! ಕಾಳ್ ಕಾಂತ್ ಝಲ್ಲೇರಿಯಿ ಭೀಮಾಕ , ಕೀಚಕ ಸ್ಪಷ್ಠ್ ದಿಸ್ತಾಶಿಲೋ . ಝಲ್ಲೆರಿ ಕೀಚಕಾಕ ಭೀಮು ದಿಸ್ಸನಿ . ಮನಾಂತ್ ಸ್ತ್ರೀ ಕಾಮ ಬೋರ್ನ್ ಆಸ್ತಾನಾ ... ಮಾಕ್ಷಿ ಚಿ ಭ೦ಯ್ಯ .. ಲಜ್ಜಾ .. ಮರ್ಯಾದಿ .. ಕೀಚಕಾ ದೋಳೆ ಆಯೋ ಮಯ ಝಲ್ಲೆ . ಭೀಮಾಕ ಕಿತ್ಲೆ ಪೋಟಿ ಧೊರುಂಕ ಪ್ರಯತ್ನ ಕೆಲ್ಲೆರಿಯಿ , ಹತ್ತಾಕ ಮೇಳ್ನಿ . ಮನುಷ್ಯಾಕ ಪಾಪ ಕರ್ತಾ ಮೋಣು ಗೊತ್ತಸ್ಸುನ್ ಗೊತ್ತಸ್ಸುನ್ ಮುಕಾರಿ ವತ್ತನಾ ... ಅಶಿಲೆ ದೋಳೆ ತಾಯ್ ದಿಸ್ಸನಾತಿ . ಧರ್ಮಾಕ ಸಮ್ಮ್ ಜಾವ್ನ್ ಚಲ್ತಾಲೆಕ ದೇವು ಫಟೀ ಬಲಾಕ ರಾಬತಾ ಮ್ಹಳ್ಳೆಲೇಕ ಹ್ಯೇ ಯೆಕ ನಿದರ್ಶನ . ಭೀಮಾನ ಕೀಚಕಾಲೆ ಮತ್ತೆಕೆಷ್ಠ ಧೋರ್ನ್ ಖ೦ಬೆ ದಿಕಾನ ಲಕೈಲೆ . ಖಂಬೋ ಮತ್ತೆ ಲಗ್ಗುನ್ ಗಿರ್ರ್ ಮೊಣು ಮತ್ತೆ ಘು೦ವಲೆ ... ಕೂರ್ಟ್ ಧೋರ್ನ್ ಪಯ್ಯಾ ಗಂಟೀನ್ ಮರ್ಮ ಸ್ಥಾನಾಕ ಯೇಕು ಪ್ರಹಾರು ಕೆಲ್ಲೊ . ತಿತ್ಲೆಚಿ ... ಕೀಚಕು .. ಗಿರಿ ... ಗಿರಿ.. ಗಿರಿಗಿಟ್ಲಿ ಜಾವ್ನ್ ಸಕಲ ಪೊಳ್ಳೋ . ಮತ್ತೆ ಕೇಷ್ಟ ಧೋರ್ನ್ , ಗಳೇ ವೈರಿ , ಭುಝಾ ವೈರಿ , ಫಟೀ ಭೇ೦ಡಾ ವೈರಿ .. ಮುಷ್ಠಿ ಘು೦ವಡಾನ್- ಘು೦ವಡಾನ್ ಪ್ರಹಾರು ಕೆಲ್ಲೆ . ಕೋಪು ಉದ್ರೇಕ ಆವೇಶ ಉನ್ಮಾದ ಚಡ- ಚಡ ಝತ್ತ ಗೆಲ್ಲೆ ಭೀಮಾಕ . ಘು೦ವ್ನ್- ಘು೦ವ್ನ್ , ಉಡ್ಡುನ್- ಉಡ್ಡುನ್ ಕಾಳ ಭೈರವ ಮ್ಹಣ್ಕೆ ಕೀಚಕಾಕ ಮಸ್ತುನ್ - ಮಸ್ತುನ್ ಮಾರ್ಲೆ . ಕೀಚಕಾಲೆ ತೊಂಡಾ ದುಕೂನ್ , ಕನ್ನಾ ದುಕೂನ್ , ನಾಂಕಾ ದುಕೂನ್ .. ರಕ್ತಾ ಧಾರಾ ದೆ೦ವ್ಲಿ . ದೊನ್ನಿ ಹಾಥ ಧೋರ್ನ್ ... ನಾರ್ಲು ಭೇತ್ಲೆ ಮಣ್ಕೆ ಕೀಚಕಾಲೆ ಮತ್
ಭೀಮ : " ಪಾಂಚಾಲಿ ... ! ಯೋ ... ! ಯೇವ್ನ್ ಪೊಳೆ ... ಕೀಚಕು ಮೋರ್ನ್ ಪಳ್ಳಾ ಪೊಳೆ ... ತುಕ್ಕಾ ಲಗ್ಗಿಲೆ ಗ್ರಹಣ ಆಜಿ ಸಂಪನ್ನ ಝಲ್ಲೆ " ಮ್ಹಳ್ಳಲೊ .
ದ್ರೌಪದಿನ ಧಾವ್ನ್ ಯೇವ್ನ್ ಪೊಳೈಲೆ ... ಅಂಗಾ ಹಡ್ಡ೦ ಪುಡ್ಡಿ ಜಾವ್ನ್ ... ಮಾಂಸಾ ಮುದ್ದೋ ಶಿ ಜಾವ್ನು ಪೊಳ್ಳಾ ಆಜಾನು ಬಾಹು ಕೀಚಕ ಸೇನಾನಿ ... ರಕ್ತ ಮಯ ಜಾವ್ನ್ ಅನಾಥ ಜಾವ್ನ್ ಪೊಳ್ಳಾ ... !! ದ್ರೌಪದಿಲೆ ತೊಂಡಾರಿ ಚಿರು ಹಾಸು ಅಯಿಲೊ . ಭೀಮ ಸೇನಾಕ ಫೊಟೊನ್ ಧರ್ಲೆ ಕೃತಜ್ಞತಾ ಭಾವೇನ .
ಭಾಯಿರಿ ಅರ್ಜುನಾಲೆ ಮೃದಂಗ ತಾಳ ಅವಿರತ ಜಾವ್ನು ...." ಧಗಿಣ ಧಗಿಣ ತಕ , ಧಗಿಣ ಧಗಿಣ ತಕ ತೊಂ ... ತಕ ತೊಂ , ಧಗಿಣ ಧಗಿಣ ತಕ , ಧಗಿಣ ಧಗಿಣ ತಕ ತೊಂ .... ತರಿಕಿಟ ತೊಂ ತಕ ತಕ ತೊಂ ತಕ ತಕ ತೊಂ ತಕ ತಕ ತೊಂ ತ ನ ನ ನ ನ ನ ತರಿಕಿಟ ತೊಂ ತಕ ತಕ ತೊಂ ತಕ ತಕ ತೊಂ ತಕ ತಕ ತೊಂ ಧಗಿಣ ಧಗಿಣ ತಕ , ಧಗಿಣ ಧಗಿಣ ತಕ ತೊಂ .... " ಮಲ್ಲ ಯುದ್ಧಾ ಸನ್ನ ಸನ್ನ ಶಬ್ದ .. ಚೀತ್ಕಾರ .. ಬೊಬ .. ಹುಂಕಾರ... ಚಟ .. ಪಟ ಶಬ್ದ ಭಾಯಿರಿ ಯೇನಿ . ಅರ್ಜುನಾನ ಮೃದಂಗ ತಾಳ ರಬ್ಬಯಿಲೆ ... ಸ್ಮಶಾನ ಮೌನ ಕಾಳೊಕು ಸುತ್ತು ಮುತ್ತು ಅಂಧಕಾರು .. ಖಂಭೇ ಕ ಲಾಯ್ಯಿಲೆ ದೀವಟಿಗೆ ಧೊ೦ದೋ ಏಕೆಕಚಿ ವಾಡ್ವಾನ್ ಅಂತಃಪುರಾಕ ವೊಚ್ಚುನ್ ನಿದ್ದಲೊ .
ಭೀಮ ಸೇನ , ಕೊಣಯ್ ತಕ್ಕಾ ಪೊಳೈನಾಶಿ ಜಾಗ್ರತ ಕೋರ್ನು ... ತಗೆಲೆ ರನ್ಪಾ ಕುಡಾ ಕ ಯೇವ್ನು ಹೂನ ಉತ್ಕಾನ ನಾವ್ನ್ .. ಕಸಲೆಯ್ ಜಾಯ್ನೀ ನಾತ್ತಿಲೆಮ್ಹಣ್ಕೆ ಯೇವ್ನ್ ನಿದ್ದಲೊ . ಭೀಮ ಸೇನಾನ ತೆಕಡೆ ಗೆಲ್ಲೆ ಲೇ ಪೊಳೋನ್ ... ದ್ರೌಪದಿನ ... " ರಕ್ಷಣ ಕರ್ಯಾತಿ ... ಕೊಣಾಯ್ ಪುಣಿ ರಕ್ಷಣ ಕರ್ಯಾತಿ ... " ಮೋಣು ಬೋಬ ಘಲ್ಲಿ . ಅಂತಃಪುರಾಕ ಯೇವ್ನ್ ಥ೦ಯ್ ಅಶಿಲೆ ಸಿಪಾಯಿ ಲೋಕಾಂಕ ನರ್ತನ ಶಾಲೆಕ ದೀವ್ನ್ ಪೇಟಯ್ಲೆ . ತನ್ನಿ ಹತ್ತಾ ದೀವಟಿಕಾ ಘೆವ್ನ್ .. ದೋ೦ಧೇ ಉಜ್ವಾಡಾಕ ... ಕಸಲೆ ಜಲ್ಲೆ ಮೋಣು ಪೋಳೋಚ್ಯಾ ಶುರು ಕೆಲ್ಲೆ . ತ್ಯೆ ಕಳ್ಕಾಕ .. ನೇಲ , ಖಂಭೆ ರಕ್ತ ಮಯ ಜಾವ್ನು ಭೀಭತ್ಸ ಜಾವ್ನು ದಿಸ್ಲೆ . ಮಾಂಮ್ಸಾ ಮುದ್ದೋ ಶೀ .. ಹತ್ಯಾ ಜಾವ್ನು ಪೊಳ್ಳೆಲೆ ಕೀಚಕಾಕ ಪೊಳೈಲೆ .. ! ಆಮ್ಗೆಲೆ ಸೇನಾನಿ ಕ ಅಶಿ ಜಾವ್ಕಾ ವೇ ..? ಮೋಣು ಲೆಕ್ಕುನ್ ಭಂಯ್ಯ್ ಭೀತ ಝಲ್ಲೆ.
ವಿರಾಟ ರಾಯು , ಸುಧೆಷ್ಣಾ ದೇವಿ , ಆನಿ ಕೀಚಕಾಲೆ ಭಂವ್ಢ ( ಉಪಕೀಚಕ ತನ್ನಿ ಸುಮಾರ ೧೦೫ ಜನ ಆಸ್ಸತಿ ) ಸರ್ವ ಬಂಧು ಮಿತ್ರ ಲೋಕ ಯೇವ್ನ್ ಹರ್ದೇರಿ ಮಾರ್ನ್ ಘೇವ್ನ್ ತಂಗ್-ತಂಗೆಲೆ ದುಃಖ ವ್ಯಕ್ತ ಕೆಲ್ಲೆ . ಕೀಚಕಾಲೆ ಅಪಮಾನೀಯ ಮರಣ ಪೊಳೊನ್ ಯೇಕ್ ಪೋಟಿ ಭಿಲ್ಲಿಂತಿ . .. ಹರ್ದೆ ಝಲ್ ಮ್ಹಳ್ಳೆ .. ಆನ್ನೇಕ ಕಡೆ ಮನಾಂತುಚಿ ಸಂತೋಷು ಬೋಗ್ಲೆ . ಲೋಕು ಯೆಕ್ - ಯೆಕ್ಲೆ ... , ಯೆಕ್ - ಯೇಕ ರೀತ್ಯೇರಿ , ಉಲ್ಲೋಚ್ಯಾ ಶುರು ಕೆಲ್ಲೆ . ' ಮಾಲಿನೀಲೆ ಗಂಧರ್ವ ಬಮ್ಮಣಾ ವೊಟ್ಟು ಯುದ್ಧ ಕೊರ್ನ್ ಮೆಲ್ಲೊ ' ' ಪರ ಸ್ತ್ರೀಕ ಆಶಿ ಕೊರ್ನ್ ... ಮಕ್ಷಿ ಪೊಳ್ಳೆಲ್ಯಾಕ ... ಸಮಾ ಶಿಕ್ಷ ಮೆಳ್ಳಿ ' ತಕ್ಕ ತಶೀ ಜಾವ್ಕಾ ' ತೊಡೆಸೇ ಲೋಕಾಂಕ , ತಗೆಲೆ ಹಿಂಸಾ ಪವ್ವಿಲೆ ಸಂತೋಷು ಭೋಗ್ಲೀಂತಿ .
ಹೇರದಿವಸು ಕೀಚಕಾಲೆ ಅಂತ್ಯ ಸಂಸ್ಕಾರು ಕೋರ್ಚ್ಯಾಕ ಸರ್ವ ಸಜ್ಜಾ ಕೆಲ್ಲಿ . ಕೀಚಕ ಸೇನಾನಿಕ ರಾಜ ಮರ್ಯಾದೇರಿ ರಥಾರಿ ಸೈನಿಕ ಮರ್ಯಾದಿ ದೀವ್ನ್ .. ಮೆರವಣಿಗೆರಿ ಸ್ಮಶಾನ ಯಾತ್ರಾ ಸಿದ್ಧ ಕೆಲ್ಲಿ . ಕೀಚಕಾ ಮರಣಾಕ ಕಾರಣ ಝಲ್ಲೆಲಿ ಮಾಲಿನಿಕ ತಾಯ್ ಚಿತೆರಿ ದೊವೊರ್ನ್ ಅಗ್ನಿ ಸ್ಪರ್ಶ ಕೊರ್ನ್ ದಿವಿಶಿ ಮಾರ್ಚ್ಯಾಕ ಆಲೋಚನಾ ಕೆಲ್ಲಿ ಉಪ ಕೀಚಕಾನಿ . ಅಂತಃ ಪುರಾ ಅಶಿಲಿ ದ್ರೌಪದಿ ತಂಡುನ್ ಹಾಣು , ರಥಾಕ ಬಾಂಧುನ್ ಸ್ಮಶಾನ ಮೆರವಣಿಗ ಆರಂಭ ಕೆಲ್ಲಿ .
" ಓ .. ಮಿಗೆಲೆ ಗಂಧರ್ವ ಪತಿ ದೇವಾಂ .. ಮಿಗೆಲೆ ರಕ್ಷಣ ಕರ್ಯಾ ... ಮಕ್ಕಾ ರಾಕ್ಯಾತಿ " ಮೋಣು ದೊಳೆ ಉದ್ದಾಕ ಕಾಣು ದೇವಾಲಗ್ಗಿ ಮಾಗ್ಚ್ಯಾ ಶುರು ಕೆಲ್ಲೆ. ಬ್ರಹನ್ನಳಾ ರೂಪಾರಿ ಅಶಿಲೆ ಅರ್ಜುನಾನ .. ಹ್ಯೋ ವಿಷಯು ಸಾಂಗ್ಲೊ ಭೀಮಾಕ . ತಕ್ಷಣ್ ಭೀಮು ವಿಚಿತ್ರ ವೇಸು ಘಾಲ್ನ್ ಸ್ಮಶಾನಾಕ ಯೇವ್ನುಮೆರವಣಿಗ ಯೆವ್ಚೆ ರಕ್ಕುನ್ ಬೋಸ್ಲೊ . ಮೆರವಣಿಗ ಲಗ್ಗಿ ಆಯಿಲ್ ಸತಾನ್ .. ಯೇಕು ಹೋಡು ರೂಕು ಪಾಳ ಸಮೇತ ಹುಂಮ್ಟಾನ್ .. ಕೀಚಕಾ ಭಂವ್ಡಾ೦ಕ ಮುಯ್ಯೇಕ ದಿವಿಶಿ ಮಾರ್ಲೆ ಮ್ಹಣ್ಕೆ ... ಉಪ ಕೀಚಕಾ೦ಕ ದಿವಿಶಿ ಮಾರ್ಲೆ . ತೊಂಡಾಕ ಕಾಳೆ ಅಂವ್ಗಾಲೆ ಬಾಂಧುನ್ .. ಸಗಳೊ ರೂಕ್ ಉಬ್ಬಾರ್ನ್ ರಾಕ್ಷಸುಸೊ ಆರ್ಭಟ ಕೊರ್ನ್ ಯೆವ್ಚೆನಮುನೊ
ಪೊಳೊನ್ ಸೈನಿಕ ಭೀವ್ನ್ ಗೆಲ್ಲೆ . ಯೆಕ್ - ಎಕ್ಲೆ .. ಯೇಕ್ - ಯೇಕ್ ದಿಕಾನ ಧಾಂವ್ನ್ ಗೆಲ್ಲೆ . ಭೀಮಾನ ದ್ರೌಪದಿ ಬಂಧನಾ ದುಕುನ್ ಸೊಡ್ವಾನ್ ಅಂತಃಪುರಾಕ ಪೆಟಯಿಲೆ ಅನಿ ವಿಂಗಡ ವಾಟ್ಟೆನ ತಗೆಲೆ ರಾನ್ಪಾ ಕೂಡಾಕ ಪಾವಲೊ . ಕೀಚಕಾ ಲೆ ವೊಟ್ಟು ತಗೆಲೆ .. ಉಪಕೀಚಕ ಭ೦ವಡ ಸ್ವರ್ಘಾ ಪಾವಲೆ .
ಅತ್ತ ... ಮಾಲಿನಿ ನಾ೦ವ ಉಚ್ಚಾರು ಕೊರ್ಚ್ಯಾ ತಾಯ್ ಭೀತ್ತಾತಿ . ಮತ್ಸ್ಯ ದೇಶಾಕ ಕೀಚಕ ಸೇನಾನಿ ನಾಶಿ .. ರಾಜ್ಯ ಅತಂತ್ರ ಝಲ್ಲಾ . ವಿರಾಟ ರಾಯಾಕ ಮಸ್ತ ದುಃಖ ಝಲ್ಲಾ .. ಜೀವಂತಿ ಅಸ್ತಾನಾ ತಾಣೆ ನಿರಂಕುಶ ಪ್ರಭುಸೊ ಮರ್ಯಾದಿ ದೀನಾ ನಾತ್ಲೆರಿಯೀ ... ರಾಜ್ಯ ರಕ್ಷಣೆ ತ್ಯೋ ಕರ್ತಾಶಿಲೋ . ರಾಯು ಪ್ರಜಾ ನಿಶ್ಚಿಂತ ಜಾವ್ನ್ ಅಶಿಲೆ . ಅತ್ತ ವಿರಾಟ ದೇಶಾಕ ಚಿ ರಕ್ಷಣ ನಾ . ಲಗ್ಗಿ ರಾಯಾಂಕ ಭೀವ್ನ್ ಬೋಸ್ಚೆ ಕಾಲು ಅಯಿಲಾ . ಇತ್ಲೆಕಯ್ ಕಾರಣ ಮಾಲಿನಿ .. ತಿಕ್ಕಾ ಅಂತಃಪುರಾ ದುಕೂನ್ ಭಾಯಿರಿ ವೊಚ್ಚುಕಾ ಮೋಣು ರಾಯಾನ ಆಜ್ನಾ ಕೆಲ್ಲಿ . " ಮಾಲಿನಿ .. ! ತುಕ್ಕಾ ಆಶ್ರಯು ದೀವ್ನ್ .. ಸಿಂಹಾ ಮ್ಹಣ್ಕೆ ಅಶಿಲೋ ಮಿಗೆಲೆ ಭಾವಾಕ ಕಾಣ್ ಘೆತ್ಲೆ ... ರಾಯಾಲೆ ಆಜ್ಞ ಝಲ್ಲಾ ... ಆನಿ ಹೇ ಅಂತಃಪುರಾ ದುಕುನ್ ವಸ " ದುಃಖಾರಿ , ಕೋಪಾ ವೊಟ್ಟು ಮಹಾರಾಣಿ ಸುಧೇಷ್ಣಾ ನ ಸಂಘಲೆ . " ಮಹಾರಾಣಿ .. ! ಕೀಚಕ ಸೇನಾನಿ ನ ತಗೆಲೆ ಮರಣ ತಾಣೆಚಿ ಹಾಡೊನ್ ಘೆತ್ತಿಲೆ . ಹಾಂವ ತಕ್ಕ ಜವಾಬ್ದಾರಿ ನಯ್ . ಅಮ್ಮಾ ಅನಿ ಧಾಹ ದಿವಸಾನಿ ಮಿಗೆಲೆ ವೃತ ಸಂಪನ್ನ ಝತ್ತಾ . ತುಮ್ಮಿ ನಕ್ಕ ಮೋಣು ಸಾಂಗ್ಲೆರಿಯೀ .. ಹಾಂವ ಮಿಗೆಲೆ ವಾಟ ಸೊದ್ದುನ್ ವತ್ತಾ ... ಮಿಗೆಲೆ ಬಮ್ಮಣಾ೦ಗೆಲೆ ನಿಮಿತ್ಯ ಹ್ಯೇ ರಾಜ್ಯಾಕ ಚಾಂಗ ಜಾವಚೆ ತಶಿ ಕರ್ತಾ . ಆನಿ ಸ್ವಲ್ಪ ದಿವಸಾಕ ಮಕ್ಕಾ ದಿಲ್ಲೆಲೋ ಆಶ್ರಯು ರಾಬ್ಬೊನುಕ್ಕಾತಿ . ಮಿಗೆಲೆ ವೈರಿ ದಯಾ ದವರ್ಯಾತಿ ... " ಮ್ಹಳ್ಳಲಿ
ಕೋಪಾನ ತಿಕ್ಕಾ ಭಾಯಿರಿ ಪೇಟಯ್ಲ್ಯರೀ .. ಅನಿ ಕಸಲೆಯ್ ಪುಣಿ ಸಮಸ್ಯೆ ಹಾಣು ದವರ್ತಾಲಿ ... ಅನಿ ಧಾಹ್ ದಿವಸ ನವೇ ... ! ಮೋಣು ಮನಾ ಲೆಕ್ಕುನ್ ...
" ಜಾಯ್ತ .. ಅನಿ ಧಾಹ್ ದಿವಸಾನಿ ತೂ೦ವೆ ಅಂತಃ ಪುರ ಸೋಣು ವೊಚ್ಚುಕಾ " ಮೋಣು ತಾಕೀತ ಕೆಲ್ಲಿ ಮಹಾರಾಣಿ ಸುಧೇಷ್ಣಾ ದೇವಿ ನ
ಉಮಾಪತಿ
No comments:
Post a Comment