MAHABHARTHA PART - 24 ( Konkani Bhashentu )
KEECHAKA SENAANI - 2
ಕೀಚಕ : " ಯೆದೊಳ್ ತಾಯ್ ತುಗ್ಗೆಲ್ ಭಾವು ಜಾವ್ನು ... ಮಿಗೆಲೆ ಮನಾ ಅಶಿಲೆ ಆಶಾ ಸಾಂಗ್ತಶಿಲೋ .. ಮಾಲಿನಿಲೆ ಚಂದಾಯಿ ಪೊಳೊನ್ ಮನಾ ಸಂಕಟ ಪರಿಹಾರಾ ಖತೀರಿ ತುಗೆಲೇ ಸಾಂಗ್ತಶಿಲೋ ... ಸುಧೇಷ್ಣಾ .. !! ಕಾನು ದೀವ್ನು ಆಯಿಕ .. ಯೆದೊಳ್ ತಾಯ್ .. ತೂ .. ಮಹಾರಾಣಿ ಜಾವ್ನು ಸುಖಾರಿ ಅಸೂಚ್ಯಾ ಕಾರಣ ಹಾಂವ ..! ರಾಣಿ ಸುಧೆಷ್ಣಾ ದೇವಿ .. ! ಫಲ್ಲೇ ತೀ ಸುಂದರಿ ಮಿಗೆಲೆ ಮಂದಿರಾಂತು ಅಸ್ಸುಕಾ ... ನಾ .. ಝಲ್ಲೇರಿ , .. ತೂ ಮತ್ಸ್ಯ ದೇಶಾ ರಾಣಿ ಜಾವ್ನು ಅಸ್ಸನಾ ಜಾಗ್ರತಾ .. " ಮೋಣು ಕೋಪಾರಿ ಸಂಘುನ್ ತಗೆಲೆ ಮಂದಿರಾಕ ಸರ್ - ಸಟಿ ಗೆಲ್ಲೊ .
ತ್ಯೇ ರಾತ್ರಿ ಸುಧೇಷ್ಣಾ ದೇವಿಕ , ಸಮ್ಮ ನೀದ ಪೋಣಿ . ಕೀಚಕು ಮಹಾ ಹಠ ಮಾರಿ .. ಅನಿ ಫಲ್ಲೆ ಕಸಲೆ ಉಪದ್ರವ ಕರ್ತಾ ಕೀ .. ಮ್ಹಳ್ಳೆಲೆ ಯಚ್ಛನಾ ಶುರು ಝಲ್ಲಿ . ರಾತ್ರಿ ಪೂರಾ ಯಚ್ಚನ ಕಾಣು , ಹೆರ್-ದಿವಸು ಉಟೈತಾನ ಸುಧೇಷ್ಣಾ ದೇವಿಕ ತಾಪು ಅನಿ ಮತ್ತೆ ದೂಕಿ , ಪರಿಚಾರಿಕೆ ಲೋಕು , ಯೇವ್ನು ಉಪಚಾರು ಕೆಲ್ಲೊ . ದ್ರೌಪದಿನ ಮತ್ತೇಕ ಸುಗಂಧ ಮಿಶ್ರಿತ ಪಲ್ಲೇ ಲೇಪು ಘಾಲ್ನು ಉಪಚಾರು ಕೆಲ್ಲೊ . ರಾಣಿಕ ದ್ರೌಪದಿಲಗ್ಗಿ ಯೇಕಾಂತ ಜಾವ್ನು ಉಲ್ಲೋಕಾ ಮೋಣು ದಿಸ್ಲೆ . ಪರಿಚಾರಿಕೆ ಲೋಕಾಂಕ ಸರ್ವಾಂಕ ಭಾಯಿರಿ ವಸ ಮೋಣು ಸಾಂಗ್ಲೆ .
ಸುಧೇಷ್ಣ : " ಮಾಲಿನಿ .. ! ಮಿಗೆ ಲೆ ಮತ್ತೆ ದೂಕಿ ಊಣೆ ಜಾಯ್ನಿ , ಮಿಗೆಲೆ ಭಾವಾಲೆ ಮಂದಿರಾಂತು ಮದಿರಾಪಾನ ಅಸ್ಸ .. ಮಕ್ಕಾ ಮೋಣು ಸಂಘುನ್ ಹಾಡಿ ಹಂಗಾ "
ದ್ರೌಪದಿ : " ಮಹಾರಾಣಿ ..! ಅಸಲೆ ಕಾಮಾಕ ಮಕ್ಕಾ ನಿಯೋಜಿತ ಕೊರ್ಚೆ ಸಮ್ಮ್ ನಯ್ . ದಯಾ ದವೋರ್ನು ಅನಿ ಕೋಣಾಕಾಯ್ ಪುಣಿ ಪೇಟಯ್ಯಾ "
ಸುಧೇಷ್ಣ : " ಹಾಂವ ದುಸ್ರೆಲೆ ಹತ್ತಾ೦ತು ಚಿ೦ಮಟಿ ಉದ್ದಾಕ ತಾಯ್ ಪೀನಾ ... ! ದುಸ್ರೆ .. ಹಾಂವ , ಸುರಾ ವ್ಯಸನಿ ಮೋಣು ಅಪಪ್ರಚಾರು ಕರ್ತಾತಿ . ತೂ ಮಿಗೆಲೆ ಆಪ್ತ ಸಖಿ ... ತೂಚಿ ವೊಚ್ಚುನ್ ಹಾಡ್ಕಾ ! ವಸ .. ಮಾಲಿನಿ ,,! " ಮೋಣು ಮಸ್ತ ವೊತ್ತಾಯ ಕೆಲ್ಲೊ . ವಿಂಗಡ ಉಪಾಯು ನಾಶಿ ದ್ರೌಪದಿ , ಕೀಚಕಾಲೆ ಮಂದಿರಾ ಅಯಿಲಿ . ಕೀಚಕ ಮದ್ಯ ಪಾನ ಕರ್ತಾಚಿ ... ದ್ರೌಪದಿಲೆ ಉಡ್ಘಾಸು ಕಾಣು ... ಮಾನಾಂತು ಖತ್ - ಖತಾಶಿಲೋ . ಕೀಚಕಾಲೆ ನರ್-ನರಾಂತು ರಗತ ಕಾಮ ಕೇಳಿಕ ತಯ್ಯಾರ್ ಝತ್ತಶಿಲೆ . ಉದ್ವಿಗ್ನ , ಉನ್ಮಾದ ಜಾವ್ನು ತಹ- ತಹನಿ ದ್ರೌಪದಿಲೆ ಸಮಾಗಮಾಕ ಮನ ಉಬ್ತಶಿಲೆ . ಯೇಕ್- ಯೇಕ್ ಮಿನುಟ್ ... ಯೇ ಕ್ - ಯೇಕ್ ಯುಗಶೇ ದಿಸ್ಲೆ . ದೂರ ದುಕುನ್
ದ್ರೌಪದಿನ ಯೇವ್ಚೆ ಪೊಳಯಿಲೆ . ಮನಾಂತು ಸಂತೋಷು ಉಕ್ಕುನ್ ಅಯಿಲೆ . ಅಕ್ಕಾ ಸುಧೆಷ್ಣಾ ದೇವಿಕ ಕೃತಜ್ಞತಾ ವಂದನ ಕೆಲ್ಲಿ . ವಾಗಾ ಗುಯ್ಯಾಂತು ಚಿತ್ತಲಾ ಪೀಲ ಅಯಿಲಾ ಮ್ಹಣ್ಕೆ ... ದ್ರೌಪದಿ ... ಭೀವ್ನ್ - ಭೀವ್ನ್ ಉದ್ವಿಗ್ನ ಜಾವ್ನ್ ಮಂದಿರಾ ಪ್ರವೇಶ ಕೆಲ್ಲೆ .
ಕೀಚಕ : " ಯೋ .. ಯೋ ..! ಆಯಿಲಿವೇ ... ! ಯೋ ಮಾಲಿನಿ .. ಸುಂದರೀ ಮಿಗೇಲ್ ರಾಣಿ ..! ಯೋ "
ದ್ರೌಪದಿ : " ಮಾಹಾರಾಣಿಕ ... ಮಾದಿರ ಜಾವ್ಕಾ ಮೋಣು ನಿಮ್ಗಿಲಾ ! "
ಕೀಚಕ : " ಮಹಾರಾಣಿಕ ... ಮದಿರಾ ಜಾಯ್ .... ಮಕ್ಕಾ ಮಾಲಿನಿ ಜಾಯ್ .. ! ಮಕ್ಕಾ ಜಾವ್ಕಾ ಜಲ್ಲೆಲೆ ದೀವ್ನು .. ತುಕ್ಕ ಜಾಯ್ ಝಲ್ಲೆಲೆ ವ್ಹರಿ . ಮಾಲಿನಿ .. ! ತುಗೆಲೆ ಪ್ರೀತಿ ಅಮೃತ ಪಾನ ಕೋರ್ಕಾ ಮೋಣು ಮಿಗೆಲೆ ಅಂತರಾತ್ಮ ಆರಾಟ ಪಾವ್ತಾ ಅಸ್ಸ . ತುಗೆಲೆ ಪ್ರೀತಿ ಬಾಹು ಬಂಧನಾಂತು ಮಕ್ಕ ಧರಿ ... ತುಗೆಲೆ ಅನುಗ್ರಹ ದೃಷ್ಟಿರಿ ಮಕ್ಕಾ ಪೊಳೆ ... ! ಭೀವ್ನುಕಾ ಮಾಲಿನಿ ..! ಅಂಬೆ ರುಕ್ಕಾಕ ಮೊಗಾರೆ ವಾಲಿ .. ಸುರುಳಿ ಸುತ್ತ್ವಾನ್ ಧರ್ಲೆ ಮ್ಹಣ್ಕೆ ... ಮಕ್ಕಾ ತುಗೆಲೆ ಬಾಹೇಂತು ಬಿಗೀ ಜಾವ್ನ್ ಧರಿ .. ಮಾಲಿನಿ .. ! ಅಮರ ಲೊಕಾಚೆ ಸುಖಾನುಭೂತಿ ಮೇಳ್ಚೆ ತಶಿ ಕರಿ .. ತುಕ್ಕಾ ಮಹಾರಾಣಿ ಕರ್ತಾ " . ಪೆಟ್ಟು ಪೊಳ್ಳೇಲೆ ನಾಗಸರ್ಪಿಣಿ ಶೀ ಜಲ್ಲಿ ದ್ರೌಪದಿ .... ತೀಕ್ಷಣಜಾವ್ನು ಕೀಚಕಾಕ ಪೊಳೈಲೆ .
ದ್ರೌಪದಿ : " ಪ್ರಭೂ ..! ಹಾಂವ ವಿವಾಹಿತ ಮಹಿಳಾ .. ಮಕ್ಕಾ ಪಾಂಚ ಜನ ಬಮ್ಮಣ೦ ಆಸ್ಸತಿ . ತನ್ನಿ ಮಹಾಬಲ . ತಾಂಗೆಲೆ ಯೆದ್ರಾಕ ರಬ್ಬು೦ಕ ಚತುರ್ ದಿಕ್ಪಾಲಕ ಭಿತ್ತಾತಿ . ಅದ್ರಶ್ಯ ರೂಪಾರಿ ಮಕ್ಕಾ ಕೆದನಾಯ್ ರಾಕ್ತಾತಿ . ಮಿಗೆಲೆ ಅಂಗಾ ಅಪ್ಪಳ್ಳೆಲೆ ಧರ್ಲೆ ಮನ್ಶ್ಯಕ ಪೀಳ್ನ್ , ಮುದ್ದೊ ಕೊರ್ನ್ ಸಂಹಾರು ಕರ್ತಾತಿ ... ತಗೆಲ್ ಶವ ಸಂಸ್ಕಾರು ಕೊರುಂಕ ತಾಯ್ ಜಾಯ್ನಾಶಿ ಕರ್ತಾತಿ ... ಜಾಗ್ರತಾ .. ! " ರೋಷ ಪೂರ್ಣ .. ಕೋಪಾನ್ ಸಾಂಗ್ಲೆ ದ್ರೌಪದಿನ .
ಕೀಚಕ : " ಆ .. ಹಾ.. ಹಾ.. ಹಾ.. ಹಾ.. !, ಕಿತ್ಯೇ ಮಾಲಿನಿ ... ? ತುಂವೆ ಕಸಲೆ ಮೋಣು ಲೇಕ್ಲಾ .. ? ಓ ... ನಿಷ್ಪಾಪ ಸ್ತ್ರೀ ... ! ತುಕ್ಕಾ ರಕ್ಷಣ ಕೊರುಂಕ ಪಾಂಚ ಗಂಧರ್ವ ನಯ್ .. ಪನ್ನಾಸ ಗಂಧರ್ವ ಲೋಕು ಆಯಿಲ್ಯಾರಿಯ್ ಮಕ್ಕಾ ಕಸಲೇಯಿ ಕೋರು೦ ಜಾಯ್ ನಾ . ಹಾಂವ ಕಾಯರ್ ನಯ್ . ಮಾಲಿನಿ ..! ಮಿಗೆಲ್ ಪ್ರೀತಿ ಖತಿರ್ ... ಮಿಲನಾ ಖತಿರ್ ... ಕಿತ್ಲೆಕೀ ಬಾಯ್ಲ್ ಮನಷ್ಯ೦ ರಕ್ಕುನ್ ಆಸ್ಸತಿ . ಹಾಂವೆ ಖಂಚೇಯ್ ಬಾಯ್ಲ್ ಮನಷೇ ಯೆದುರ ... ಪ್ರೀತ್ಯೆ ಖತಿರಿ , ಮಿಲನಾ ಖತಿರಿ ... ಹೇ ರೀತೀರಿ ಮರ್ಯಾದೇರಿ ... ಬಿನ್ನತಿ ಕೆಲ್ಲೆಲಿ ನಾ . ಆಜಿ ಹ್ಯೋ ಸಿಂಹ ಬಲ ... ತುಗ್ಗೆಲ್ ಖತಿರಿ ... ತೂಗೇಲ್ ದಾಸ ಜಾವ್ಚ್ಯಾ ತಯ್ಯಾರ್ ಅಸ್ಸ . ಮಾಲಿನಿ ..! ಹಾಂವೆ ಆಶಿ ಕಳ್ಳೆಲೆ ... ಮಕ್ಕ ಕೆದನಾಯ್ ಮೆಳ್ತಾ ... ಮೇಳ್ ನಾಶಿ ವೋಚ್ಚಾ ಸೋಣಾ ... ಹಾಂವ ಯೇಕ ಹಠವಾದಿ ... ಹಾಂವೆ ಆಶಿ ಕಳ್ಳೆಲೆ ವಸ್ತು , ಮೋಲ ದೀವ್ನು ಕೀ , ಬಲಾತ್ಕಾರ ಕೋರ್ನು ಕೀ , ಪಾಪ ಕೀ , ಪುಣ್ಯಕೀ ಶ್ರಾಪಾನ್ ಕೀ , ಯುದ್ಧ ಕೋರ್ನು ಕೀ .. ಭೀನಾಶಿ ಘೆತ್ತಾ ತ್ಯೇಚಿ ಮಿಗ್ಗೆಲೆ ಲಕ್ಷ್ಯ "
ದ್ರೌಪದಿ : " ತೂ .. ಕಾಮಾಂಧ ಝಲ್ಲಾ ..! ತುಂವೇ ಆಶಾ ಕಾಡ್ಚೆ ಮಕ್ಕ ನಯ್ ... ತುಗೆಲೆ ಮೃತ್ಯು ದೇವತೆಕ ... ಅಪ್ಪಯಿತಾ . ಜೀವಾ ವೈರಿ ಆಶಾ ಅಸ್ಲೆರಿ ಮಿಗೆಲಗ್ಗಿ
ಯೇವ್ನುಕ್ಕಾ . ಪರ ಸ್ತ್ರೀಕ ಇಚ್ಚಾ ಪಾವ್ಚೆ ... ಅಗ್ನಿ೦ತು ಹಾತು ಘಾಲ್ನು ವಿನಾಶ ಅಪ್ಪೋನ್ ಘೆತ್ಲೆ ಮ್ಹಣ್ಕೆ .. ! ಪ್ರಜಾ ಪಾಲಕ ಜಾವ್ನು ಅಶಿಲೆ , ತೂಗೇ ಲ್ ತಸಲೆ ಮನುಷ್ಯಾ ಕ ಶೋಭ ದೀನಾ . ಅನಿ ಪುಣಿ ಪ್ರಜಾ ಸಖ್ಯ್ ಲೆಕ್ಕುನ್ ಚಾಂಗ ಕೊರುಂಕ ಪ್ರಯತ್ನ ಕರಿ " ಮೋಣು ಸಂಘುನ್ ಧಾವನು ಭಾಯಿರಿ ಅಯ್ಲಿ . ಧಾಂವ್ತಾಲೆ ದ್ರೌಪದಿಕ ಧೊರುಂಕ
ತಿಗೆಲ್ ಮಾಕ್ಷಿ ಪೊಳ್ಳೋ ಕೀಚಕು . ಥ೦ಯಿ ಹಂಗಾ ಧಾಂವ್ತಾಚಿ ... ವಿರಾಟ ರಾಜ ಸಭೆಕ ಆಯಿಲಿ . " ಮಹಾರಾಜ ..! ಮಹಾರಾಜಾ ... ರಕ್ಷಾ .. ರಕ್ಷಾ .. ರಕ್ಷಾ ಕಾರ್ಯಾತಿ .. !
" ಕೋಣ ಅಮ್ಮಾ ತೂ ... ?" ನಿಮ್ಗಿಲೆ ರಾಯಾ ನ
" ಹಾಂವ ಮಹಾರಾಣಿ ಲೆ ಅಂತಃಪುರಾ ಸಖಿ ಸೈರಂಧ್ರಿ .. "
" ತುಕ್ಕಾ ಪೀಡಾ ದಿಲ್ಲೆಲೋ ನೀಚ ಮನುಷ್ಯ ಕೋಣ .. ? "
" ತುಮ್ಗೆಲೋ ಸೇನಾನಿ ಪ್ರಭು .. "
" ಕೋಣ .. ಆಮ್ಗೆಲೆ ಕೀಚಕ ಸೇನಾನಿ ವೇ .. ? "
" ವಯ್ ಪ್ರಭು !ಮಿಗೆಲೆ ಮಾನ ಭಂಗ ಕೋರು ಪ್ರಯತ್ನ ಕರ್ತಾ "
" ಕೀಚಕ ...ಇತ್ಲೆ ನೀಚ ಝಲ್ಲೋವೆ ? " ಮನಾ ಭಿತರಿಚಿ ದುಃಖ ಪಾವಲೋ . ಕೀಚಕ ಅತ್ತ ಸಭೆ ಯೆದ್ರಾ ಅಯಿಲೊ . ಕೀಚಕಾಕ ಪೊಳೈಲೇ ಸತಾನ .. ಪಟ್ಟೇ ವಾಗಾಕ ಪೋಳ ಯಿಲೆ ಕೊಲ್ಲೊ ಶೀ ಝಲ್ಲೊ ರಾಯು . ಮತ್ಸ್ಯ ದೇಶಾ ರಕ್ಷಣ , ರಾಜ್ಯಹಿತ , ಕುಟುಂಬೆ ಮರ್ಯಾದಿ .. ಕೀಚಕಾ ಭುಜಾರಿ ಅಸ್ಸ ನವೆ .. ? ಕೀಚಕ ನಾತ್ಲೆರಿ ಮತ್ಸ್ಯ ದೇಶ ನಾ . ರಾಯು ಮೌನ ಝಲ್ಲೊ . ದೂರ ಕೀಚಕ .. ಮೀಶೆ ವೈರಿ ಹಾತು ಘಾಲ್ನ್ .. ಮಂದ ಹಾಸಾರಿ ರಬಲಾ ನಿರ್ಭಯ ಜಾವ್ನ್ . ಮಹಾರಾಜಾ ಲೆ ಮೌನ ಪೊಳೊನ್ .. ದ್ರೌಪದಿಕ ಅಂಗಾ ಉಜ್ಜೋ ಲಾಗ್ಲೆ ಮ್ಹಣ್ಕೆ ಝಲ್ಲೆ .
ದ್ರೌಪದಿ : " ಮೌನ ಜಾವ್ನು ಕಸಲೇ ಬೊಸ್ಲಾ ಮಹಾರಾಜಾ ... ! ತುಮ್ಗೆಲ್ ರಾಜ್ಯಾ೦ತು ಸ್ತ್ರೀ ರಕ್ಷಣ ನಾವೇ .. ? ಪ್ರಜಾ ಲೋಕಾಲೆ ಮಾನ ರಕ್ಷಣ ಕೊರ್ಚೆ .. ಪ್ರಭುನ , ... ಮಾನ ಕಂಟಕ ಝಲ್ಲೇರಿ ... ಧರ್ಮ ರಕ್ಷಣ ಕರ್ತಾಲೆ ಕೋಣ ಅಸ್ಸ .. ? ರಕ್ಷಕ ಜಾವ್ನ್ ಅಶಿಲೆ ಲೋಕು ... ರಾಕ್ಷಸ ಝಲ್ಲೇರಿ , ದೇಶ ಪ್ರಜೆಕ ಕೋಣ ಗತಿ .. ? ತುಮ್ಗೆಲೆ ದೊಳೆ ಯೆದ್ರಾಕ ಹ್ಯೇ ರೀತ್ಯೇರಿ ಮಾನ ಹರಣ ಝತ್ತಾನಾ .. ಪೊಳೊನ್ ಮೌನ ಜಾವ್ನ್ ಆಸ್ಸುಚೆ .. ರಾಜ ಧರ್ಮ ವೇ ಮಹಾರಾಜಾ .. ? "
ವಿರಾಟ ರಾಯಾಲೆ ಲಗ್ಗಿ ಬಯ್ಸೂನ್ ಅಶಿಲೆ ಧರ್ಮರಾಯಾಕ ಮನಾ ಮಹಾ ಸಂಕಟ ಝತ್ತಾ ಅಸ್ಸ . ಬರೀ ಯೆಕು ಮಹಿನೊ ಅಜ್ಞಾತ ವಾಸ ಕಾಲು ಅಸ್ಸ . ತೆದೊಳ್ ಭಿತರಿ ಅಜ್ಞಾತ ವಾಸ ಸಂಪನ್ನ ಝತ್ತಾ . ದ್ರೌಪದಿಲೆ ಆವೇಶಾ ನಿಮಿತ್ಯ .. ತಾಂಗೆಲೆ ಘುಟ್ಟು ಭಾಯಿರಿ ಪೊಡ್ತಾಲೆಮೂ ಮೋಣು ಮನಾ ಸಂಕಟ ಝತ್ತ ಅಸ್ಸ . ವಿಷಯು ಕಳ್ಳೇರಿ .. ಅನ್ನೇಕ ಬಾರ ವರುಷ ವನವಾಸ ಕೋರ್ಕಾ ಪೊಡ್ತಾ . ಧರ್ಮಜ : " ಮಾಲಿನಿ ..! ತೂ ಕೋಣ .. ,ಕಸಲೆ ಮ್ಹಳ್ಳೆಲೆ ವಿಷಯು ಮಕ್ಕ ಗೊತ್ತಸ್ಸ . ತೂಗೇಲ್ ಗಂಧರ್ವ ಬಮ್ಮಣಾಂಕ ತೂಗೇ ಲ್ ರಕ್ಷಣ ಕೊರುಂಕ ಗೊತ್ತನಾ ಕೀ .. ? ತನ್ನಿ ಖಂಯ್ ಅಸ್ಲೆರಿಚಿ ತುಗೆಲ್ ರಕ್ಷಣಾ ಕರ್ತಾತಿ . ಅಶೀ ಭರ್ಲೆಲೆ ರಾಜ ಸಭೆಕ ಯೇವ್ನು .. ಅಶಿ ನಾಟಕ ಕೋರ್ಚ್ಯೇ ರಬ್ಬಯಿ .. ! ವಸ " ಮ್ಹಳ್ಳಲೋ ಧರ್ಮರಾಯು ಕೋಪಾನ .
ದ್ರೌಪದಿ : " ಕಂಕು ಭಟ್ಟಾ ... ! ಹಾಂವ ಕೋಣ ಮೋಣು ತುಮಕಾ ಗೊತ್ತಸ್ಸ ನವೆ .. ? ಝಲ್ಲೆರಿ ತುಂಕಾ ಕಳ್ನ ನಾತ್ತಿಲೊ ಯೇಕು ವಿಷಯು ಅಸ್ಸ . ಮಿಗೆಲೆ ಪಾಂಚ ಗಂಧರ್ವ ಬಮ್ಮಣಾ೦ತು ಯೆಕ್ಲೊ ಜುಗಾರಿ ... ಯೆಕ್ಲೊ ನೃತ್ಯ ಶಿಕ್ಷಕ .. ತಶಿ ಜಾವ್ನು ಹೇ ಸಭೆ೦ತು ನಾಟಕ ಕರ್ತಾ ಅಸ್ಸ . " ದೋಳೆ ಉದ್ದಾಕ ಕಾಡ್ತಾಚಿ ಥಂಯ್ ದುಕೂನ್ ಗೆಲ್ಲಿ . ವಿರಾಟ ರಾಯಾನ ಸಭಾ ಸಮಾಪ್ತ ಕೆಲ್ಲಿ .
ಉಮಾಪತಿ
No comments:
Post a Comment