MAHABHARATH Part - 70 ( konkani Bhashentu )

                                       BHEEMA  PRATIMA ... ಭೀಮ ಪ್ರತಿಮ 

                     ವ್ಯಾಸ ಮಹರ್ಷಿ ಯೇಕ್ ಯೇಕ್ ಉತ್ತರಂ ತೀಕ್ಷ್ಣ ಬಾಣ ಶೇ ಯೇವ್ನ್ ಹರ್ದೇಕ ಲಾಗ್ಲೆ ಮ್ಹಣ್ಕ್ ದಿಸ್ತಶಿಲೆ ಧ್ರತರಾಷ್ಟ್ರಾಕ . ' ವಯ್ ನವೇ .. ! ವ್ಯಾಸ  ಮಹರ್ಷಿನ ಸತ್ಯ ಸಂಘಲಾ .ಝಲ್ಲೆಲೆ ಯೆದೊಳ್ತಾಯ್ ... ಕುರು ಕ್ಷೇತ್ರ ಯುದ್ಧ ಕಸಲೆ ಖತಿರಿಝಲ್ಲೆ .. ! ಅಪ್ಣೆ ಲೆ ಪುತ್ರ ವ್ಯಾಮೋಹಾ ನಿಮಿತ್ಯ ಚಿ ನವೇ ಇತ್ಲೆ ಸಕ್ಕಡ  ಝಲ್ಲೆ .. ? ಹಾಂವ ಧುರ್ಯೋಧನಾ ಕ ಬುದ್ಧಿ ಸಂಘುನ್ ಕಪಟ ದ್ಯೂತ ರಾಬ್ಬೊಕಾ ಅಷ್ಶಿಲೆ.. ದ್ರೌಪದಿಲೆ ಅಪಮಾನ ಜಾವ್ಚ್ಯಾಕ ಸೋಡು ನಜ್ಜ ಅಷ್ಶಿಲೆ ... ! ದ್ಯೂತ  ಝತ್ತರಿ, ಪಾಂಡವಾಂಕ ತಾಂಗೆಲೆ ರಾಜ್ಯ ವಾಪಾಸ್ ಕೋರ್ಕಾ ಅಷ್ಶಿಲೆ ... ಸಂಧಿ ಉತ್ತರಂ ಝತ್ತಾನಾ ಕೃಷ್ಣಾ ಲೇ ಉತ್ತರಂ ಅಯಿಕುಕಾ ಅಷ್ಶಿಲೆ ... ! ಮಕ್ಕಾ ಕಸಲೆ  ಝಲ್ಲೆ  ತ್ಯೇ  ವೇಳೇರಿ ... ? ಪುತ್ರ ವ್ಯಾಮೋಹಾ ನಿಮಿತ್ಯ, ಮಿಗೆಲೆ ಬುದ್ಧೀಕ  ಕಸಲೇಕ ಗೃಹಣ ಲಾಗ್ಲೇ .. ? ಮಿಗ್ಗೆಲೆ ಗೃಹಚಾರ .. ನಾತ್ಲೆರಿ ಹೇ  ಸರ್ವ ನಾಶಾ ಕ  ಹಾಂವ ಕಾರಣ ಝಲ್ಲೋ ವೆ .. ? ಧ್ರತರಾಷ್ಟ್ರಾಲೆ ಮನಾಂತು ಹಜಾರ ಪ್ರಶ್ಣೋ ಯೇವ್ನು ಗೆಲ್ಲೆ . " ಏಕು ಮುಖ್ಯ ವಿಷಯು, ತುಕ್ಕಾ ಅನಿಕಯ್ ಕಳ್ ನಾಶಿ ವೊಚ್ಚುನ್  ಆಸ್ಚ್ಯಾ ಪೂರೋ ... ಯುದ್ಧಾ೦ತು ವಿಜಯ ಝಲ್ಲೇರಿಯಿ... ಪಾಂಡವ ಅನಿಕಯ್ ಹಸ್ತಿನಾವತಿಂತು ಪಾಯು ದವರ್ನಾಶಿ ... ಅನಿಕಯ್ ಕುರುಕ್ಷೇತ್ರಾ೦ತು ತುಗೆಲೆ ಆಜ್ಞಾ ಖತಿರಿ ರಕ್ಕುನ್  ಆಸ್ಸತಿ . ದೃಥರಾಷ್ಟ್ರಾ ... ! ಅತ್ತ ಆನಿ ಕಸಲೆ ಜಾವ್ಕಾ ಪೊಳೆ ... ತುಗೆಲಿ ಬುದ್ಧಿ ಮಾಂದ್ಯ ಸೊಡಿ . ಪಾಂಡವಾಂಕ ಅಪ್ಪೋನ್ ತಾಂಗೆಲೆ ರಾಜ್ಯ ತಾಂಕಾ ದೀ . ತುಗೆಲೆ ಮಲಘಡೆ ಪಣ ರಕ್ಕುನ್  ಘೆ . ಪಾಂಡವಾಂಗೆಲೆ ಹತ್ತಾ೦ತು ತುಗೆಲೆ ಚೆರ್ಡು೦ವಾಲೆ ಶ್ರಾದ್ಧ್ , ಪಿಂಡದಾನ ಕರ್ಮ ಕೊರೊಚ್ಯಾ ಪೊಳೆ " ಮ್ಹಳ್ಳಲೊ ವ್ಯಾಸ ಮಹರ್ಷಿ . " ವ್ಯಾಸ ದೇವಾ .. ! ಹ್ಯೇ ದುಃಖ ಸಾಗರಾಂತು ಪೋಣು .. ಮಿಗೆಲೆ ಕರ್ತವ್ಯ ವಿಸರ್ಲೊ . ಮಿಗೆಲೆ ಅತೀ ಪುತ್ರ ವ್ಯಾಮೋಹ , ಸಿಂಹಾಸನಾ ಕಾಂಕ್ಷಾ .. ಮಕ್ಕಾ ಹೇ ಪರಿಸ್ಥಿತಿಕ ಕಾರಣ ಝಲ್ಲೆ . ಕುರುಕ್ಷೇತ್ರಾ  ಕ ವೊಚ್ಚುನ್ , ಪಾಂಡವಾಂಕ ಸ್ವಾಗತ ಕೋರ್ನ್ ಅಪ್ಪೋನ್ ಹಾಡ್ತಾ " ಮೋಣು ವ್ಯಾಸ ದೇವಾಲೆ ಪಯ್ಯಾರಿ ಪೋಣು ಮರ್ಯಾದಿ ಕೆಲ್ಲಿ . ಸಂಜಯ ,ವಿದುರಾಕ ಅಪ್ಪೋನ್ ಘೇವ್ನ್ , ಕುಂತಿ ಗಾಂಧಾರಿ ಸಮೇತ .. ಕುರುಕ್ಷೇತ್ರಾಕ ಪ್ರಯಾಣ ಕೆಲ್ಲೆ . 

                               ಧ್ರಾಥರಾಷ್ಟ್ರಾನ ವಾಟ್ಟೇರಿ ಘರ್ - ಘರಾಂತು ಆಬಾಲ ವೃದ್ಧ , ಸ್ತ್ರೀ ಲೋಕಾಲೆ ಶೋಕ ರೋಧನ ಅಯಿಕತಾಚಿ ಪ್ರಯಾಣ ಮುಕಾರ್ಶಿಲೆ . ವಾಟ್ಟೇರಿ .. ಕೃಪಾಚಾರ್ಯ ಅನಿ ಕೃತವರ್ಮಾಲೆ ಭೇಟಿ ಝಲ್ಲಿ .. " ಮಹಾರಾಜಾ ... ! ತುಗೆಲೆ ಸರ್ವ ಕುಮಾರ ವೀರ ಮರಣ ಪಾವಲೀ೦ತಿ . ಪಾಂಡವಾನಿ ಧರ್ಮ ಯುದ್ಧ ಕರ್ನಿ . ಭೀಷ್ಮ , ದ್ರೋಣ , ಕರ್ಣ , ಧುರ್ಯೋಧನ ಅಧರ್ಮ ವಟ್ಟೇರಿ .. ಪರಾಭವ ಝಲ್ಲೆಂತಿ . ಧುರ್ಯೋಧನ ಆಖೇರಿ ವೆಳ್ಯೇರಿ ತಾಂಯ್ ಶೌರ್ಯಾರಿ ಯುಧ್ಧ ಕೆಲ್ಲಾ . ಜೀವು ಸೊಡ್ಚೆ ಫೂಡೆ ...' ಅಖಂಡ್ಹ ಭಾರತ ಚಕ್ರವರ್ತಿ ಜಾವ್ನ್ ಸಕಲ ಮರ್ಯಾದಿ ಘೆತ್ಲಾ  . ಸರ್ವ ಕಷ್ಟ ಸುಖ ಬೊಗ್ಲಾ . ಕುರು ಅಭಿಮಾನಿ ಮೋಣು ಖ್ಯಾತಿ ಪಾವ್ಲಾ . ಮಿಗೆಲೆ ಖತಿರಿ ಲಕ್ಷಾಂತರ ಸೈನ್ಯಾನಿ ಜೀವು ಸೊಳ್ಳಾ . ಅತ್ತ .. ಹಸ್ತಿನಾವತಿಂತು , ವೃದ್ಧ ಆನಿ ಬಾಯ್ಲ್ ಮನ್ಶ್ಯಾ೦ ಮಾತ್ರ ಆಸ್ಸತಿ . ಯುವ ಪೀಳಿ , ರಾಜ್ಯ ರಕ್ಷಣೆಕ ಎಕ್ಲೊಯೀ ವ೦ಚನೀತಿ . ಅಸಲೆ ರಾಜ್ಯಾ೦ತು .. ಪಾಂಡವ ರಾಜ್ಯ ಭಾರ ಕೋರೋ೦ತಿ ... ಹಾಂವ ವೀರ ಮರಣ ಪಾವ್ಲಾ೦ಗೆಲೆ  ವೊಟ್ಟು ಸ್ವರ್ಘಾ೦ತು ರಬ್ತಾ . ದೇವಾ ಸಮಾನ ,ಅಷ್ಶಿಲೆ ಮಿಗೆಲೆ ಆನಮ್ಮಾ೦ಕ ಚಾರಣ ವಂದನ ಕೆಲ್ಲಾ  ಮೋಣು  ಸಂಘಯಾತಿ ' ಮೋಣು ಸಂಘಲೇ  " ಮ್ಹಳ್ಳಲೊ ಕೃಪಾಚಾರ್ಯ . ಧ್ರತರಾಷ್ಟ್ರಾಲೆ ದೊಳೆಂತು ..ಪುತ್ತಾಲೆ ಉತ್ತರಂ ಅಯಿಕುನ್ .. ಉದ್ದಾಕ ಅಯಿಲೆ . ಹರ್ದೆ ಪೀಳ್ನ್ ಘಲ್ಲೆಲೆ ಅನುಭವ ಝಲ್ಲೆ .. ' ಹೇ ದೇವಾ .. !' ಮೋಣು  ರಳ್ಳೋ . ಗಾಂಧಾರಿ ಆನಿ ಧ್ರಥರಾಷ್ಟ್ರ ಧುರ್ಯೋಧನಾ ಲೆಉಡ್ಘಾಸು ಕಾಣು ಪುತ್ರ ಶೋಕಾರಿ ರಳ್ಳಿ೦ತಿ . " ಮಹಾರಾಜ .. ! ಅಶ್ವತ್ಥಾಮಾನ ಯುದ್ಧ ಸಮಾಪ್ತಿ ಝಲ್ಲೆ ನಂತರ , ಪಾಂಡವಾಂಕ ಸಹಾಯು ಕೋರ್ಕಾ ಮೋಣು ಪ್ರಯತ್ನಕೆಲ್ಲೆಲೆ ವಯಿ . ಪಾಂಡವಾಂಕ ದಿವಿಶಿ ಮಾರ್ಚ್ಯಾಕ ಪ್ರಯತ್ನ ಕೆಲ್ಲೆ .. ಝಲ್ಲೇರಿ  ಶ್ರೀ ಕೃಷ್ಣಾಲೆ ಅಭಯಾ ನಿಮಿತ್ಯ ತಂಕಾ ದಿವಿಶಿ ಮಾರೂ೦ಕ ಜಾಯ್ನಿ . ಪಾಂಡವಾಂಕ ಸೋಣು ಬಾಕಿ .. ಸರ್ವ ಲೋಕಾಂಕ ದಿವಿಶಿ ಮಾರ್ನ್ ... ತಾಂಗೆಲೆ ವ೦ಶು ನಿರ್ನಾಮ ಕೆಲ್ಲೆ " ಮೋಣು ಕೃಪಾಚಾರ್ಯಾನ ವಿವರಣ ದಿಲ್ಲಿ . ಅತ್ತ ಅಶ್ವತ್ಥಾಮ ಅರಣ್ಯಾ ವೊಚ್ಚುನ್ ಘೋರ ತಪಸ್ಯ ಕರ್ತಾ ಅಸ್ಸ ತಾಗೆಲ್ ಪಾಪ ಪರಿಹಾರಾ ಖತಿರಿ . ವಿಷಯು ಆಯಿಕುನ್ ಧ್ರಾಥರಾಷ್ಟ್ರ ಮನೋ ಸಂಕಟಾಕ ಪೊಳ್ಳೋ .

                               ದೃತರಾಷ್ಟ್ರ , ಪರಿವಾರ ಸಮೇತ ಕುರುಕ್ಷೇತ್ರಾಕ ಯೆವಚೆ ವಿಷಯು .. ಪಾಂಡವಾಂಕ ಸುದ್ದಿ ಮೆಳ್ಳಿ . ಧರ್ಮ ರಾಯಾನ ರಾಜೋಚಿತ ಗುಡಾರ ,ಶಿಬಿರ ತಯ್ಯಾರ್ ಕೆಲ್ಲೆ . ಕೃಷ್ಣಾನ ಪಾಂಡವಾಂಕ ಭುದ್ಧಿ ಸಾಂಘಲೆ . " ಅತ್ತ ದೃಥರಾಷ್ಟ್ರ .. ಕೋಪು ಆಯ್ಯಿಲೋ ವಾಗು ಶೀ ಆಸ್ಸ . ಗಾಂಧಾರಿ -ಧ್ರತರಾಷ್ಟ್ರಾನ ಕಸಲೆಯ್ ಸಂಘಲೇರಿ .. ಚುಕ್ಕುನ್ ಪುಣಿ ಜವಾಬ ದೀವ್ಚ್ಯಾ ನಜ್ಜ . ಸಮಾಧಾನೆರಿ ತಂಕಾ ಆದರ ಸ್ವಾಗತ ಕರ್ಯಾ .. ಹೇ ಏಕ ಹೋಡ ಪರೀಕ್ಷೆ ವೇಳು " ಮ್ಹಳ್ಳಲೊ ಕೃಷ್ಣು .ಕೃಷ್ಣಾ ನ ದಿವ್ಯ ದೃಷ್ಟೀರಿ ದೃಥರಾಷ್ಟ್ರಾಲೆ  ಮನೋ ಸ್ತಿಥಿ ಪೊಳೈಲಿ . ಭೀಮ ಸೇನಾಕ ಅಪ್ಪೋನ್ ತಗೆಲೇ ಮ್ಹಣ್ಕೆ ... ತಗೆಲೆ ತಿತ್ಲೆಚಿ ದೀಗಿ , ದಷ್ಟ ಪುಷ್ಟ ಲೊಕ್ಕಂಡಾ ಮೂರ್ತಿ ಹಾಣು ಯೆದ್ರಾಕ ದವರ್ಲಿ . 

                           ಧ್ರಾಥರಾಷ್ಟ್ರನ ಕುರುಕ್ಷೇತ್ರಾ ಅಯಿಲೆ ಸತಾನ .. ಸುರ್ವೆಕ ಕುರು ಪಿತಾಮಹ ಭೀಷ್ಮ ಶರಮಂಚಾ ಜಾಗೇಕ ಚ೦ಮ್ಕಲೊ . ದೃತರಾಷ್ಟ್ರ ,ಗಾಂಧಾರಿ , ಕುಂತಿ , ವಿದುರ ಅನಿ ಸಂಜಯ .. ಭೀಷ್ಮಾಚಾರ್ಯಾಲೆ ಚರಣ ಸ್ಪರ್ಶ ಕೋರ್ನು ವಂದನ ಕೆಲ್ಲೆ . " ಪಿತಾಮಹಾ .. ! ಹಾಂವ ಹ್ಯೇ ಪರಿಸ್ಥಿ೦ತು ತುಮ್ಕಾ ಭೇಟಿ ಕರ್ತಾಲೊ ಮೋಣು  ಕೆದನಾಯ್ ಲೆಕ್ಕನಿ .. ಅರ್ಜುನಾನ ದಯಾಹೀನ ಜಾವ್ನ್ ತುಮ್ಗೆಲೆ ಅಂಗಾಕ  ಇತ್ಲೆ ಘಾಯ ಕೊರ್ನ್ ... ಇತ್ಲೆ ಬಾಣ ಮಾರ್ನ್ ಶರ ಶಯ್ಯಾರಿ ನಿದ್ಕಾರಯಿಲೆ ವಿಷಯು ಆಯಿಕುನ್ ಮಸ್ತ ದುಃಖ ಝಲ್ಲೆ . ಶಿಖಂಡಿಕ ಯೆದ್ರಾ ದೊವೊರ್ನ್ , ಶಸ್ತ್ರ ಸನ್ಯಾಸ ಘೆತ್ತಿಲೆ ತೆದ್ನಾ.. ತು೦ಮ್ಚೆ ವೈರಿ ಇತ್ಲೆ ಬಾಣ ಪ್ರಯೋಗ ಕೆಲ್ಲೆಲೆ ಅಯಿಕುನ್ .. ಮಕ್ಕಾ ಸಂಕಟ ಝಲ್ಲೆ ... ಅಮ್ಮಿ ಇತ್ಲೆ ಲೋಕು ಅಸ್ಸುನ್ ... ತುಕ್ಕಾ ಹಾಂಗಾ ಅನಾಥ ಶೇ ಸೋಡು ಝತ್ತವೆ ಪಿತಾಮಹಾ ... ! " .... " ಮಿಗೆಲೆ ವಿಷಯಾನ ಚಿಂತಿತ್ ಜಾವ್ಚೆ ಅಗತ್ಯ ನಾ ಪುತಾ .. ! ಪಂಚಭೂತ ದೇವಾಂಗೆಲೆ ಆಶೀರ್ವದು ಅಷ್ಶಿಲೆ ನಿಮಿತ್ಯ .. ಮಕ್ಕಾ ಹಾಂಗಾ ಕಾಯಿ ಕಷ್ಟ ನಾ . ಪ್ರತೀ ದಿವಸು ಮಿಗೆಲಿ ಅಮ್ಮಾ .. ಗಂಗಾ ಮಾತೆ ಯೇವ್ನ್ ಮಿಗೆಲಿ ತಾನಿ ಭೂಖ ನಿವಾರ್ಷಿತಾ . ಅನಿ ಹಾಂವ ಮಸ್ತ ದಿವಸ ಕಾಣಾ ಪುತಾ ... ಯೆವ್ಚೆ ಮಾಘ ಶುಕ್ಲ ಏಕಾದಶಿ ದಿವಸು ... ಹೇ ದೇಹ ತ್ಯಾಗ ಕೋರ್ಕಾ ಮೋಣು ಲೆಕ್ಲಾ . ಇಚ್ಚಾ ಮರಣಿ ಭೀಷ್ಮಾಲೆ ಉತ್ತರಂ ಅಯಿಕಲೆ  ಸತಾನ ... ಧ್ರಥರಾಷ್ಟ್ರು ಚೆರ್ಡಾ ಮ್ಹಣ್ಕೆ ರಳ್ಳೊ .ಕಸಲೇ ಕ ದೊಳೆ ಉದ್ದಾಕ ಕಡ್ತಾ ಪುತಾ ... ! ಅಟ್ಟಾಶಿ ( 800 ) ವರ್ಷ೦ ಆಯುಷ್ಯ ಕಾಲ ಅನುಭವ ಕೆಲ್ಲಾ ಹಾಂವೆ .. !  ' ಭೀಷ್ಮ '  ಮ್ಹಳ್ಳೆಲೆ ಬಿರುದಾವಳಿ ನಾಂವ ಘೆತ್ಲಾಹಾಂವೆ . ಕ್ಷತ್ರಿಯ ಜಾವ್ನ್ ಜನ್ಮಾ ಯೇವ್ನ್ ... ಬ್ರಾ೦ಹ್ಮಣತ್ವ ಘೇವ್ನ್ ಆಚಾರ್ಯ ಮ್ಹಳ್ಳೆಲೆ ಪ್ರಶಸ್ತಿ ಘೆತ್ಲಾ ಹಾಂವೆ .. ! ನೈಷ್ಠಿಕ ಬ್ರ೦ಹ್ಮಚರ್ಯಾನ ... ಕಾಮ ,ಕ್ರೋಧ ,ಲೋಭ , ಮೋಹ , ಮದ , ಮಾತ್ಸರ್ಯ ಷಡ್ವೈರಿಕ ದೂರ ಕೆಲ್ಲಾ ಹಾಂವೆ . ಜೀವ ವಿಮುಕ್ತಿ ಖತಿರಿ ಕುರುಕ್ಷೇತ್ರ ಯುದ್ಧ ಕೆಲ್ಲಾ ಹಾಂವೆ .. ಹೇ ಮಂಥ್ಹಾರ್ ಪಣಾರಿ ವೀರ ಮರಣ ಪಾವ್ಚೆ ...  ಕಿತ್ಲೆ ಏಕ ಸಂತೋಷಾ ವಿಷಯು ... ! ಮಕ್ಕಾ  ಮನಾ ತೃಪ್ತಿ ಅಸ್ಸ ಪುತಾ . ಮಿಗೆಲೆ ಮರಣಾಕ ಕೊಣಯ್ ದುಃಖ ಪಾವ್ವು ನಜ್ಜ . ಮರಣ ಮ್ಹಳ್ಳೆರಿ ವಿಮುಕ್ತಿ .ಕ್ಷತ್ರಿಯಾಕ ಜೀವನಚಿ ... ಏಕ ನಿತ್ಯ ಮರಣ ನವೆ ಪುತಾ .. ? ತುಗೇ೦ಲಿ ಷಂಬರಿ ಜನ ಪುತ್ರ೦ ಯುದ್ಧಾ೦ತು ಮರಣ ಪಾವ್ಲೀ೦ತಿ ಮೋಣು ಪಾಂಡವಾ ವೈರಿ ದ್ವೇಷ ನಕ್ಕಾ ... ಅತ್ತ ಪಾಂಡವಚಿ ತುಗೆಲಿ ಪುತ್ರ೦ ಸಂತಾನ . ಧರ್ಮರಾಯಾಲೆ ಸಾವಳೆರಿ ಶೇಷ ಜೀವನ ಕೋರ್ಚ್ಯಾಕ ಪ್ರಯತ್ನ ಕರಿ "  ಮೋಣು ಬುದ್ಧಿ ವಾದ ಸಂಘಲೆ . ಭೀಷ್ಮಾಕ ವಂದನಾ ಕೊರ್ನ್ ಧ್ರತರಾಷ್ಟ್ರಾನ .. ಪಾಂಡವ ಶಿಬಿರಾ ದಿಕಾನ ಪ್ರಯಾಣ ಕೆಲ್ಲೆ .

                       ಧ್ರಥರಾಷ್ಟ್ರಾನ ಶಿಬಿರಾ ಲಗ್ಗಿ ಯೆವಚೆ ಫೂಡೇಚಿ ... ವ್ಯಾಸ ಮಹರ್ಷಿ , ಥಂಯ್ ಯೇವ್ನ್ ಪಾವಲೋ . ಪಾಂಡವಾನಿ ಮಾತೆ ಕುಂತಿಕ ... ತೇರ ವರುಷ ಅರಣ್ಯ ವಾಸ ಅನಿ ಅಜ್ಞಾತ ವಾಸ ನಂತರ ಸುರ್ವೆ ಪೊಟಿ ಪೊಳೋ ಚ್ಯಾಕ ಮೆಳ್ಚೆ . ಆನಂದ ಭಾಷ್ಪ ಘಲ್ತಾಚಿ ಪಾಂಡವ ಕುಂತಿಲೆ ಚರಣಾರಿ ಪೋಣು ಆಶೀರ್ವದು ಮಾಗ್ಲೊ . ಕುರುಕ್ಷೇತ್ರ ಯುದ್ಧಾ೦ತು ವಿಜಯ ಝಲ್ಲೆಲೆ ಖತಿರಿ ಅಭಿನಂದನ ಕೆಲ್ಲೆ ... ಪ್ರೀತಿ , ಮಮತೆರಿ ಆಶೀರ್ವಾದು ಕೆಲ್ಲೆ ಅನಿ ಆತ್ಮೀಯತಾ ವಾಂಟುನ್ ಘೆತ್ಲೆ . ಆನಂದ ದುಃಖ ವೊಟ್ಟುಜಾವ್ನ್ ಕಸಲ್ ಕೊರ್ಚೆ ಮೋಣು ಕಳ್ನಿ ತಿಕ್ಕಾ ... ದೃತರಾಷ್ಟ್ರ ಅನಿ ಗಾಂಧಾರಿ ... ಮುಂಬ್ರಾಂತುಲೆ  ಉಜ್ಜೋ ಶೀ ಆಸ್ಸತಿ ... ಭಿತರ್- ಭಿತರ್ ಪುತ್ರ ಶೋಕ ... ಬರೀಪಾಂಚ ಪಾಂಡವ  ವಾಂಚುನ್ ... ತಿಗೆಲೆ ತರ್ಪೇನ ಶಂಬರಿ ಕುರು ಕುಮಾರ ನಾಶ ಝಲ್ಲೆಂತಿ ಮೂ ... ! ಮೋಣು ಏಕ್ ನಮುನೆ ಮಾತ್ಸರ್ಯ ..! ಧ್ರಥರಾಷ್ಟ್ರ ಗಾಂಧಾರಿ ಕ ಪದೆ - ಪದೇ ಈರ್ಷ ... ಹೂನ - ಹೂನ ತೆಲ್ಲಾ ಮ್ಹಣ್ಕೆ ಖೋತ್  - ಖತ್ತಾ . ಏಕ್ - ಎಕ್ಲೆ೦ಗೆಲೇ ದುರ್ಮರಣ ಅಯಿಕುನ್ ... ತಿಗೆಲೆ ಮನ ಕಾಳ  ಸರ್ಪಾ ಹೇಡೊ ಶೀ ಉಠಾನ್ ರಬ್ತಾ . ಕೋಪಾನ ಹತಪಾಂಯ್ಯ್ ಕಡ್ - ಕಡ್ತಾ . ಲಗ್ಗಿ  ಬೊಶಿಲೆ ಧ್ರಥರಾಷ್ಟ್ರಾಲೆ ಸೂಕ್ಷ್ಮ ಕನ್ನಾ೦ಕ ಗಾಂಧಾರಿಲೆ ಶ್ವಾಸು ಉಚ್ವಾಸು ಅಯಿಕತಾ -

ಅಯಿಕತಾ ತಿಗೆಲೆ  ಉದ್ವಿಗ್ನ ಮನ ಅರ್ಥ  ಕೊರ್ನ್ ಘೆತ್ತಾ ಅಸ್ಸ . ಯೆದ್ರಾಕ ತೊಂಡಾರಿ ಭಾವ ದಕ್ಕೊನ್ ಘೇನಾಶಿ ದೃತರಾಷ್ಟ್ರ..  ಉತ್ಕಾ ಮುಳಾಂತುಲೆ ಸಿಸೋಡಿ ಶೀ ..  ಪ್ರತೀಕಾರ ಕೊರುಂಕ ವೇಳು  ಪೊಳೈತಾ ಅಸ್ಸ . ಹ್ಯೇ ಸಕ್ಕಡ .. ಸೂಕ್ಷ್ಮ ಜಾವ್ನ್ ವ್ಯಾಸ ಮಹರ್ಷಿ ಅನಿ ಶ್ರೀ ಕೃಷ್ಣಾ ನ ಪೊಳೈಲೆ . ಗಾಂಧಾರಿ ವ್ಯಾಸ ಮಹರ್ಷಿಲೆ ವೊಚ್ಚುನ್ " ವ್ಯಾಸ ದೇವಾ .. ! ಅಖೇರಿ ಏಕ ಪೋಟಿ ಮಿಗೆಲೆ  ಚೆರ್ಡುವಾಂಕ ಪೊಳೊಕಾ ಮೋಣು  ದಿಸ್ತಾ ... ! ಏಕ ಪೋಟಿ ಮಕ್ಕ ದಿವ್ಯ ದೃಷ್ಟಿ ದೀವ್ನ್ ಮಿಗೆಲಿ ಆಶಾ ಪೂರ್ತಿ ಕರ್ತಲೀ೦ತಿವೇ ... ಭಗವಾನ್ .. ? ", " ಅಮ್ಮಾ ಗಾಂಧಾರಿ .. ! ಅತೀ ಭೀಭತ್ಸ ದೃಶ್ಯ ... ತ್ಯೇ ... ಅರ್ಧ ಛಿಧ್ರ ಝಲ್ಲೆಲೆ ಮಡೆ ರಾಶಿ ಮಧ್ಯೆ ... ಮಡೆ ಕಾಯಿಳೆ೦ನಿ ಸುತ್ತು ಘಾಲ್ನ್ ಮಾಸ ತಂಡುನ್ ಖಾವ್ಚೆ ದ್ರಶ್ಯ ತುಜ್ಜೆನ ಪೊಲೊಚ್ಯಾ ಜಾಯ್ನಾ ಚೆರ್ಡಾ ... ಸಂಜಯಾನ ಧ್ರಥರಾಷ್ಟ್ರಾಕ ಸಂಘಿಲೆ  ಯುದ್ಧ ವಿವರಣ ಆಯಿಕುನ್ .. ತುಗೆಲೆ ಮನ ಚೂರು ಝಲ್ಲಾ . ಮಾಗಿರಿಯ್ ತುಕ್ಕಾ ಪೊಳೊಕಾ ಮೋಣು ಆಶಿ ಅಸ್ಲೆರಿ .. ಹಾಂವ ತುಕ್ಕ ದಿವ್ಯ ದೃಷ್ಟಿ ಪ್ರದಾನ ಕರ್ತಾ " ಗಾಂಧಾರಿ ದಿವ್ಯ ದೃಷ್ಠಿ ಜಾವ್ಕಾ ಮ್ಹಳ್ಳೆಲಿ .. ವ್ಯಾಸ ಮಹರ್ಷಿ ನ ತೊಡೆ ವೇಳೇಕ ದಿವ್ಯ ದೃಷ್ಠಿ ಪ್ರಸಾದ  ಕೆಲ್ಲೆ .  

                          ಗಾಂಧಾರಿನ ಪೊಳೈಲೆ ... ಭೀಮ ಸೇನಾನ ರುದ್ರ ರೂಪಾರಿ ಶತ  ಕೌರವಾಂಕ ಚೆಂಡು ಸೋ ಕೋರ್ನು ಮಲ್ಲಯುದ್ಧಾ೦ತು , ಹಡ್ಡ೦ ಪುಡ್ಡಿ ಕೊರ್ನ್ದಿವಿಶಿ ಮಾರ್ಲೆ ಲೆ ದೃಶ್ಯ ... ದುಃಶ್ಯಾಸನಾಲೆ  ಹರ್ದೇ  ಪಿಸೊಳ್ನ್ ರಗತ ಪಿಲ್ಲೆಲೆ ಭೀಭತ್ಸ ಅವತಾರ್ ದೃಶ್ಯ ... ಧುರ್ಯೋಧನಾಲೆ ಮರಣ ... ಪೊಲೊಚ್ಯಾ ಜಾಯ್ನಾ ನಾತ್ತಿಲೆ ದೃಶ್ಯ ... ಹಾಥ ಪಾಯ್ಯಾ೦ ನತ್ತಿಲೆ ಕೌರವ ಸೈ೦ನ್ಯ ... ರುಂಡ ಛೇದನ ಜಾವ್ನ್ ಪೊಳ್ಳೆಲೆ ಮೃತ ದೇಹ .. ಕೊಲ್ಲೆ , ಮಡೆ ಕಾಯ್ಲ್ಯಾಣಿ ತಂಡುನ್ ಛಿದ್ರ ಕೆಲ್ಲೆಲೆ ದೇಹ೦ , ಹಸ್ತಿ ಘೊಡೆ ರಾಶಿ ಮಧ್ಯೆ ... ಚಕಣಾ  ಚೂರು ಝಲ್ಲೆಲೆ ರಥ . ಝಲ್ಲೆರಿ ತಿಗೆಲೆ  ಮನ ಮೋರ್ನ್ ಪೊಳ್ಳೆಲೆ  ದುಃಶ್ಯಾಸನಾ ವೈರಿ ... ವಿಕೃತ ರೂಪ ... 'ಅಶಿ ಕಸಲೆಕ ಝಲ್ಲೆ ಪುತಾ' .. ಮೋಣು  ಉದ್ಗಾರು ಆಯಿಲೊ ... ಆನ್ನೇಕ ಬದಿನ ಧುರ್ಯೋಧನಾಲೆ ಪೂರ್ತಿ ಜಖಂ ಝಲ್ಲೆಲೆ ಆಂಗ ... ! ಕಷ್ಶಿ ಅಶಿಲೆ ಮಿಗೆಲೆ ಚೆರ್ಡು೦ವ ... ಶಿವ ಶಿವಾ ... ! ಶಿವ ಶಿವಾ ... ! ಕಸಲೆಕ ಅಸಲೆ ದುರ್ಮರಣ ... ? ಕೊಣಯ್ ಮನುಷ್ಯತ್ವ ಅಶಿಲೆ ಅಷ್ಶಿ ಪಿಶಾಚಿ ಮ್ಹಣ್ಕೆ ರಗತ ಪಿತ್ತಾತಿವೇ ... ? ಕುರ್ಟಾ  ಸಕಲ ಮಾರ್ನು ಗಧಾಯುದ್ಧ ಕೊರ್ಚೆ ಕಸಲೆ ನ್ಯಾಯ .. ?ಭಂಢ ಭೀಮಾ .. ! ತೂ೦ವೇ ಕೆಲ್ಲೆಲೆ ಪಾಪ ದೋನಿ  ಹತ್ತಾನಿ  ಖಾವಚಾ ಅಸ್ಸ ಮುಕಾರಿ .. ' ವ್ಯಾಸ ಮಹರ್ಷಿನ ದಿವ್ಯ ದೃಷ್ಠಿ ಶಮನ ಕೆಲ್ಲೆ . " ಗಾಂಧಾರಿ ... ಶಾಂತ ಝಾ ಆವೇಷು ಪಾವ್ನುಕ್ಕಾ ..  ಅನಿ ಮುಕಾರಿ ಜಾವ್ಚೆ ಪೊಳೆ . ವಿಧಿ ನಿಯಮ ಕಸಲೆ ಜಾವ್ಕಾ ಅಷ್ಶಿಲೆ  ಕೀ ... ತ್ಯೇ೦ಚಿ ಝಲ್ಲಾ .. ವಿಧಿಚೆ ಎದ್ರಾಕ ಅಮ್ಮಿ ಸರ್ವ .. ನಿಮಿತ್ಯ ಮಾತ್ರ . ಅತ್ತ ಪಾಂಡವ ತುಗೇಲಿ ಚೆರ್ಡು೦ವ . ಧುರ್ಯೋಧನು ..  ನಾ ..  ಮ್ಹಳ್ಳೆಲೆ ವಿಸರಿ .. ಪಾಂಡವ ತುಗೆಲೆ ಸೇವಕಾ ಮ್ಹಣ್ಕೆ .. ತುಗೆಲಿ ಸೇವಾ ಕರ್ತಲೀ೦ತಿ . ತುಗೆಲೆ ಆಜ್ಞಾ ಪ್ರಕಾರ ಧರ್ಮರಾಯು ಚಲ್ತಾಲೊ ... " ಮ್ಹಳ್ಳಲೋ ವ್ಯಾಸ ಮಹರ್ಷಿ .                " ಪುತಾ ದೃಥರಾಷ್ಟ್ರಾ.. ! ಹ್ಯೇ ಮೌನ ಕಸಲೇಕ .. ? ವೊಚ್ಚುನ್ ಪಾಂಡು ಪುತ್ರಾ೦ಕ ಲಗ್ಗಿ ಘೇ ... ತನ್ನಿಯಿ ತುಗ್ಗೆಲ್ ಚೆರ್ಡು೦ವ .. ಗತ ಜನ್ಮಾ ಪಾಪ ಪುಣ್ಯಾ ಫಲ ..  ಹೇ ಜನ್ಮಾಂತು ಅನುಭವ ಕೋರ್ಕಾ ಪೊಡ್ತಾ . ಪಾಂಡು ಪುತ್ರ೦ ತುಗ್ಗೆಲ್ ಸ್ವಾಗತಾ ಖಾತಿರಿ  ರಾಕ್ತಾ ಆಸ್ಸತಿ . ವಸ ... ಅಪ್ಪೋನ್ ಹಾಡಿ . ತುಗೇಲಿ ಮರ್ಯಾದಿ ತೂ೦ವೆ ರಕ್ಕುನ್ ಘೆವ್ಕಾ " ವ್ಯಾಸ ಮಹರ್ಷಿನ  ಹಿತೋಪದೇಷು ಕೆಲ್ಲೊ  " ಮಹಾರಾಜಾ .. ! ವ್ಯಾಸ ಮಹರ್ಷಿನ  ಸಂಘಿಲೆ ಸಮ್ಮ . ಪಾ0ಡುಕುಮಾರಾಂಕ ಆಪ್ಪೋನ್ ಮುಕಾರಿ ಜಾವ್ಚೆ ಮರಣೋತ್ತರ ಸಂಸ್ಕಾರ ವಿಚಾರು ಪೋಳೋಯಾ " ವಿಧುರಾನ ಕನ್ನಾ೦ತು  ಯೇವ್ನ್ ಸಂಘಲೇ . " ಮಿಗೆಲೆ ಪಾಂಡುಕುಮಾರ ಖಂಯಿ ಆಸ್ಸತಿ ವಿದುರಾ .. ? " ವಿದುರನ ಪಾಂಡವಾಂಕ ಅಪ್ಪೋನ್ ಹಳ್ಳೆ . ಎಕ್ಲೆ ಮಾಕ್ಷಿ ಎಕ್ಲೆ ಪಿತಾಮಹ ಧ್ರಾಥರಾಷ್ಟ್ರಾಕ ಮೇಳು೦ಕ ಅಯಿಲೆ . ಕೃಷ್ಣಾ ನ ಭೀಮ ಸೇನಾಲೇ ಹಾತು ಧೋರ್ನ್  ತಗೆಲಗ್ಗಿ ರಬ್ಬೊನ್ ಘೆತ್ಲೆ . " ಪಿತಾಮಹ .. ! ಹಾಂವ ಯುಧಿಷ್ಟಿರ ... ಹಾಂವ ಅರ್ಜುನ್ ... ಹಾಂವ ನಕುಲ ... ಹಾಂವ ಸಹದೇವ ... ಎಕ್ಲೆ  ಎಕ್ಲೇ೦ಚಿ ಪಾಯ ಧೋರ್ನ್  ಆಶೀರ್ವಾದು ಘೆತ್ಲೊ . " ಧಾರ್ಮ ರಾಯಾ .. ! ಭೀಮು ಖಂಯ್ .. ? " ನಿ೦ಮಗಿಲೆ    " ಮಹಾರಾಜಾ ತುಕ್ಕಾ ಭೀವ್ನ್ ದೂರ ರಾಬ್ಲಾ " ಮೋಣು  ವಿದುರಾನ ಸಂಘಲೇ . " ಭೀಮ ಸೇನಾ .. ! ಮಂಥಾಲಗ್ಗಿ ಯೆವ್ಚ್ಯಾಕ ತುಕ್ಕಾ  ಕಸಲೆ ಭಂಯ್ಯ ..ಚೆರ್ಡಾ   ? ಯೋ ಬಾಳಾ .. ! ಮಕ್ಕ ಯೇವ್ನ್ ಏಕ ಪೋಟಿ ಆಲಿಂಗನ ಕರಿ ... ಯೋ ಭೀಮ ಸೇನಾ .. " ಅಪ್ಪಯಿಲೆ ದೃಥರಾಷ್ಟ್ರಾನ . ಕೃಷ್ಣಾ ನ ಭೀಮ ಸೇನಾಕ ರಬ್ಬೊನ್ , ಕನ್ನಾ೦ತು  ಸಂಘಲೆ ... ವಸ .. ತೂ ಮಂಥಾಕ ಆಲಿಂಗನ ಕೊರುಂಕ ... ಸುರ್ವೆಕ ತುಗ್ಗೆಲ್ ಮ್ಹಣ್ಕೆ ಕೆಲ್ಲೆಲೆ ಲೊಕ್ಕ೦ಡಾ  ಪ್ರತಿಮಾ ಮುಕಾರಿ ದವರಿ " ಮೋಣು ರಹಸ್ಯ ಜಾವ್ನ್ ಸಂಘಲೆ . ಕೃಷ್ಣಾ ನ ಸಂಘಿಲ್ ತಷ್ಶಿ೦ಚಿ ಲೊಕ್ಕ೦ಡಾ ಪ್ರತಿಮಾ ಮುಕಾರಿ ದವರ್ಲಿ .. " ಮಂಥಾ .. ! ಹಾಂವ ಭೀಮ ಸೇನಾ ಅಯಿಲಾ ... ಆಶೀರ್ವಾದ ಕರಿ " ಮ್ಹಳ್ಳಲೊ ... ಮನಾಂತು ಉದ್ವೇಗ ... ಪೊಟ್ಟಾ೦ತು ಸಂಕಟ ... ಮಕ್ಕಾ ಇತ್ಲೆ ಹೊಡ ಅನ್ಯಾಯ ಝಲ್ಲೆ ಮೂ ... ! ಮೋಣು ಸಂಕಟ .. ಶತ  ಪುತ್ರಾ೦ಕ ಹೀನಾಯ ಜಾವ್ನ್ ದಿವಿಶಿ ಮಾರ್ಲೆಲೆ ಭೀಮ ಸೇನಾ ವೈರಿ 

ಪ್ರತೀಕಾರಾಉಜ್ಜ್ಯೋ ... ಪೊಟ್ಟಾಂತು ಭಗ್ಗ್ ಆನಿ ಜೊಳ್ಳೋ ... ಪ್ರತಿಶೋಧ ... ಪ್ರತಿಶೋಧ ... ಪ್ರತಿಶೋಧ .. ಧ್ರಥರಾಷ್ಟ್ರಾನ  ಭೀಮಸೇನಾ ಮೋಣು ಲೆಕ್ಕುನ್ ಲೊಕ್ಕ೦ಡಾ ಪ್ರತಿಮಾ ಆಲಿ೦ಗನ ಕೆಲ್ಲಿ . ಹತ್ತಾ ೦ತು  , ಭುಜಾಂತು .. ಪ್ರತಿಶೋಧ ಜ್ವಾಲಾ ಉಠಾನ್ ರಬ್ಲಿ ಏಕ ಕ್ಷಣಾಕ .... ಹೃದಯ ಮನಾಂತು ಉದ್ವೇಗ ... ನರ -ನರಾಂತು ... ಪಾಖಂಢಿ ಪ್ರತಿಶೋಧಾ ಭಾವ ... ತೊಂಡ ಕಠಿಣ ... ದಾಂತ ಚಬ್ಬುನ್ ... " ಭೀಮ ಸೇನಾ ... !"  ಮೋಣು ಶಕ್ತಿ ಪೂರಾ ಹತ್ತಾ ರಟ್ಟೇರಿ ದೇವೊ೦ನ್ ... ಹರ್ದೇ ಹಡ್ಡ೦ ಪುಡ್ಡಿ ಜಾವ್ಚೆ ತಿತ್ಲೆ ಶಕ್ತಿ  ಘಾಲ್ಲಿ ... ಉಸ್ರು ಬಂಧುನ್ ... ಬಲ ಘಾಲ್ನ್ ಹಲ್ಲಯಿಲಿ ಪ್ರತಿಮಾ . ಚೂರು - ಚೂರು ಝಲ್ಲಿ ಲೊಕ್ಕ೦ಡಾ ಪ್ರತಿಮಾ ... " ಅಯ್ಯೋ ಭೀಮ ಸೇನಾ ... !!" ಮೋಣು ಕಿಂಚಿ ಘಾಲ್ಲಿ ದೃಥರಾಷ್ಟ್ರಾನ . ಪರಿಜನ , ವ್ಯಾಸಮಹರ್ಷಿ , ವಿದುರ , ಸಂಜಯ , ಕು೦ತಿ , ಪಾಂಡವಾಂಕ ಆಶ್ಚರ್ಯ ಝಲ್ಲೆ . ದೃಥರಾಷ್ಟ್ರಾಲೆ ಕುಟಿಲ ಬುದ್ಧಿಕ ಮನ ಭರಿ ನಿಂದಾ ಕೆಲ್ಲಿ . ಕೃಷ್ಣಾಲೆ ವೊಂಟಾರಿ  ಚಿರು ಹಾಸು ಯೇವ್ನ್ ಮಾಯ ಝಲ್ಲೊ . ದೃಥರಾಷ್ಟ್ರಾಕ ಕಳ್ಳೆ ' ಮಕ್ಕ ಹಾಂಗಾ ಕಸಲೆಕೀ ಮೋಸು ಝಲ್ಲಾ ಮೊಣು ... ಕೋಪು ನಿವ್ವ್ಲೊ ... ವಾಸ್ತವ್ಯ ಕಳ್ಳೆ ... ಲಜ್ಜಿ ಜಾವ್ನು ನಿಸ್ತೇಜ ಜಾವ್ನು ಪಯ್ಯಾ ಗಾಂಟೆರಿ ಕೊಸೊಳ್ನ್ ಬೋಸ್ಲೊ . ಭೀಮ ಸೇನಾ ವಾಂಚುನ್ ವರ್ಲೊ . 

ಸರ್ವಾಲೆ ದೃಷ್ಟಿ೦ತ್ ಆಜಿ ಧೃಥರಾಷ್ಟ್ರ... ಸಾನ್ ಮನುಷ್ಯ ಝಲ್ಲೊ . ವೆಳ್ಯೇರಿ ಕೃಷ್ಣಾ ನ ವಂಚಯಿಲೆ ... ಸರ್ವಾನಿ  ಕೃಷ್ಣಾಲೆ  ಜಯಕಾರು ಕೆಲ್ಲೊ . " ಸರ್ವ ನಾಶ ಝಲ್ಲೆರಿಯೀ... ಮಾಮಾ ಧೃಥರಾಷ್ಟ್ರ ... ! ತುಕ್ಕ ಅನಿಕಯ್  ಬುದ್ಧಿ ಯೇನೀ ವೇ  .. ? ಬಾಹು ಬಂಧನಾಂತು ಭೀಮ ಸೇನಾಕ ದಿವಿಶಿ ಮಾರ್ಕಾ ಮೋಣು ಲೆಕ್ಲೆ ಮೂ ... ! ಪಾಂಡವಾಂಗೆಲೆ ರಕ್ಷಣ ಕೊರುಂಕ ಹಾಂವ ಅಸ್ಸ ಮೋಣು ತೂ ವಿಸರ್ಲೊ ವೇ .. ? ತೂ ಮಾತ್ರ ನಯ್ .. ಸಾಕ್ಷಾತ್ ಯಮ ಧರ್ಮ ರಾಯಾನ ಅಯ್ಲ್ಯಾರಿಯ್ ಕಾ೦ಯ್ ಕೋರು ಜಾಯ್ನಾ ಪಾಂಡವಾಂಕ ..! ಹಾಂವೆ ಅಶ್ಚೇ ತೇದೊಳ್ ತಾಯ್ ಪಾಂಡವಾಂಕ ಕಸಲೆಯ್ ಕೋರು೦ ಜಾಯ್ನಾ . ಪಾಂಡವಾ ವೈರಿ ತುಕ್ಕಾ ಕಸಲೇ ಕ  ದ್ವೇಷ .. ?ಪಾಂಡವಾನಿ  ಕಸಲೆ ಕೆಲ್ಲೆ ಮೋಣು ತುಕ್ಕಾ ದ್ವೇಷ ... ?  ಯುದ್ಧಾ೦ತು ತುಗೆಲೆ ಚೆರ್ಡುವಾಂಕ ದಿವಿಶಿ ಮಾರ್ಲೆ ಮೋಣು ಕೋಪು ವೇ .. ? ಹೇ ಸಮಸ್ತ ನಾಶಾ ಕ ಮೂಲ 

ಖಂಬೋ ತೂಚಿ ನಯ್ವೇ .. ? ತುಗೆಲೆ ಶಂಬರಿ ಚೆರ್ಡುವಾಂಗೆಲೆ ಮಧ್ಯೆ ಎಕ್ಲೇಕ ಪುಣಿ ..  ಧರ್ಮಾ ವಿಷಯಾನ ಜ್ಞಾನ ದೀನಿ . ವಿಷ ಬೀ ಘಾಲ್ನ್ .. ವಿಷ ವೃಕ್ಷ ವಡ್ಡಯಿಲಾ .ವಾರಣಾವೃತಾಚೆ ಲಾಕ್ಷಾ ಗೃಹ ತುಗೆಲೆ ಸಹಮತಿ ನಾಶಿ ಬಂಧಿಲ್ವೇ .. ? ತೇರ ವರುಷ ಫೂಡೆ .. ಕುರು ಪಾಂಡವಾ ಮಧ್ಯೆ ದ್ಯೂತ ಖೆಳ್ಳೆಲೆ ... ತ್ಯೇ ಸಾಧಾರಣ ದ್ಯೂತ ನಯ್ ... ಮಾಯಾ ದ್ಯೂತ  .. !  ಮೋಣು ತುಕ್ಕಾ ಗೊತ್ತಶಿಲೆ ... ಕಸಲೇಕ ಪಾಂಡವಾ ವೈರಿ ಇತ್ಲೆ ದ್ವೇಷ .. ? ತುಗ್ಗೆಲ್ ಚೆರ್ಡು೦ವಾನಿ ಮಾತ್ರ ಸುಖಾರಿ ಅಸ್ಸುಕಾ ಕೀ .. ? ಅತೀ ಪುತ್ರ ಸ್ನೇಹ ತುಗೆಲೆ ಅನಿ ಗಾಂಧಾರಿ ನಿಮಿತ್ಯ ... ತುಗೆಲೆ ಸರ್ವ ಚೆರ್ಡು೦ವ ನಾಶ ಝಲ್ಲೀ೦ತಿ .. ! ತುಮ್ಚೆ ತಸಲೆ ಆನಮ್ಮಾ೦ಗೆಲೆ ಪುತ್ರ ವ್ಯಾಮೋಹಾ ನಿಮಿತ್ಯ ...ಚೆರ್ಡು೦ವ ವಾಯ್ಟ್ ಝತ್ತಾತಿ .ಆಖೇರಿಕ ತು೦ಮ್ಗೆಲೆ ಮ್ಹಣ್ಕೆ ದೊಳೆ ಉದ್ದಾಕ ಕಾಣು ಅತಂತ್ರ ಝತ್ತಾತಿ ... ಹೇ .. ಸತ್ಯ .. ಸತ್ಯ .. ಸತ್ಯ .. ! " 

                                     ದೃಥರಾಷ್ಟ್ರಾಕ ಅವಮಾನ ಝಲ್ಲೆ ..."  ಪೂರೋ ಕೃಷ್ಣಾ .. ! ಪೂರೋ ಕರಿ ... ತುಗೆಲೆ ಉತ್ತ್ರ೦ಚಿ ... ಬಾಣು ಶೀ ಯೇವ್ನ್ ಮಿಗೆಲೆ ಹೃದಯಾಕ ಲಾಗ್ತಾ ಅಸ್ಸ ... ವಯ್ .. ! ಹಾಂವ ಪಾಪಿ .. ! ನತದೃಷ್ಟ .. ! ಪುತ್ರ ಶೋಕಾ ಪೋಣು ಕಸಲೆ ಕೊರ್ಚೆ ಮೋಣು ಕಳ್ ನಾಶಿ ಉನ್ಮಾದು  ಝಲ್ಲೊ . ಭೀಮ ಸೇನಾಕ ಮಿಗೆಲೆ ಭುಜ ಬಲಾನ ದಿವಿಶಿ ಮಾರ್ಕಾ ಮೋಣು ಲೆಕ್ಕಿಲೆ ವಯ್ಯ್ .. ಚೂಕಿ ಝಲ್ಲಿ ವಾಸುದೇವಾ .. ! ಚೂಕಿ ಝಲ್ಲಿ .. ಗುರು ವ್ಯಾಸ ದೇವಾ .. ! ಚೂಕಿ ಝಲ್ಲಿ  ಕ್ಷಮಾಪಣ ಕೋರ್ಕಾ " ಪಶ್ಚಾತ್ತಾಪು ಪಾವಲೋ ಧೃಥರಾಷ್ಟ್ರ. 

ಉಮಾಪತಿ