Mahabharath Part - 69 Ashwathaamaale Brahmaastra

MAHABHARATH  Part - 69  ( Konkani Bhashentu )

Ashwatthaamale Brahmmaastra  / ಅಶ್ವಥ್ಥಾಮಾಲೆ ಭ್ರಹ್ಮಾಸ್ತ್ರ 

                          ಪಾಂಡವಾಂಗೆಲೆ ಪಾಂಚ ಉಪಪಾಂಡವ ,  ಅಶ್ವಥಾಮಾಲೆ ಹತ್ತಾ೦ತು ರಾತೋ ರಾತ್ರಿ ರುಂಡ ಛೇದನ ಜಾವ್ನ್ ಮೋರ್ನ್ ಪೊಳ್ಳೀ೦ತಿ . ಪಂಚ ಪಾಂಡವ ಮೋಣು ಲೆಕ್ಕುನ್ ... ಉಪಪಾಂಡವಾಲೆ ಪಾಂಚ ಜನಾಲೆ ಮತ್ತೆ ಕತ್ತೊರ್ನ್ ಸಂಹಾರು ಕೆಲ್ಲೆ . ತ್ಯೆ ಕಾಳ್ಕಾ೦ತು  ಮಧ್ಯೆ ರಾತ್ರಿ ಪಾಂಡವ ಕೋಣ ... ಉಪಪಾಂಡವ ಕೋಣ ಮೋಣು  ಕಳ್ನಾಶಿ ದಾರುಣ ಹತ್ಯಾ ಜಾವ್ನು ಪೋಣು ಅಶಿಲೀಂತಿ . ಪಾಂಚ ಹಜಾರ ಪಾಂಡವ ಸೈನ್ಯ , ಕೃಪಾಚಾರ್ಯ ಆನಿ ಕೃತವರ್ಮಾಲೆ ಹತ್ತಾ೦ತು ಮರಣ ಪಾವ್ಲೀಂತಿ . ದೃಷ್ಟದ್ಯುಮ್ನಲೆ  ಸಾರಥಿ ತ್ಯೆ ಕಳ್ಕಾ೦ತು ಚುಕ್ಕೋನ್ ಘೇವ್ನ್ ವೊಚ್ಚುನ್ ಪಾಂಡವಾಂಕ ದಾರುಣ ಹತ್ಯೆ ಸುದ್ದಿ ಪಾವಯಿಲಿ . ಅಶ್ವಥಾಮಾ ..  ಮಧ್ಯೆ ರಾತ್ರಿ ನಿರ್ದಾಕ್ಷಿಣ್ಯ ಹತ್ಯೇ ವಿಷಯು ಆಯಿಕುನ್ ಪಾಂಡವ , ಶಿಬಿರಾ ಕ  ಯೇವ್ನ್ ... ಶಿಬಿರಾ  ಅವಸ್ಥ ಪೊಳೋನ್ ಚಕಿತ ಝಲ್ಲಿಂತಿ . ಭಸ್ಮ ಜಾವ್ನು ಪೊಳ್ಳೆಲೆ ಶಿಬಿರಾ ಮಧ್ಯೆ ... ಮತ್ತೆ ನತ್ತಿಲೆ ಮೆಲ್ಲೆಲೆ ಉಪಪಾಂಡವ ರಕ್ತಾ ನಂಯ್ತು ... ಅನಾಥ ಜಾವ್ನ್ ಪೋಣ್ ಅಶಿಲೆ ಉಪಪಾಂಡವಾಂಕ ಪೋಳೋ ನ್  .. ಹರ್ದೆ '   ಝಲ್ಲ ' ಮ್ಹಳ್ಳೆಲೆ ಅನುಭೂತಿ ಝಲ್ಲಿ . ದೃಷ್ಟದ್ಯುಮ್ನ , ಶಿಖಂಢಿಲೆ ಮೃತ ದೇಹ ಪೊಳೊಚ್ಯಾ ಜಾಯ್ನಾಶಿ ... ಧರ್ಮರಾಯಾನ ದೊಳೆ ಧ೦ಕ್ಲೆ . ದ್ರೌಪದಿಲೆ  ದುಃಖಾ ಕ ಮಿತಿ ನಾಝಲ್ಲಿ . ದೋಗ ಜನ ಭಂವ್ಡ್  ಆನಿ ಪಾಂಚ ಉಪಪಾಂಡವ ... ತಿಗೆಲೆ ಮೊಗಾ ಪುತ್ರ೦ ... ಆಜಿ ಜೀವಂತಿ ನಾತಿ ... " ಪುತಾ .. ! ಪ್ರತಿವಿಂದ್ಯಾ .. ! ಪುತಾ .. ! ಶ್ರುತಸೋಮಾ ... ! ಮಿಗೆಲೆ ಅನ್ನಾ ... ಶ್ರುತಕೀರ್ತಿ ... ! ಚೆರ್ಡಾ.. ! ಶತನಿಕಾ .. ! ಬಳಾ .. ! ಶ್ರುತಸೇನಾ ... ! ಚೆರ್ಡುವಾಂಕ ಎಕ್ಲೆಕ್ಲೆಂಕ ನಾಂವ ಕಾಣು ... ಅಯ್ಯೋ ...!  ದೇವಾ ... ! ತುಂಮ್ಕಾ ... ಹೀ .. ಶಿಕ್ಷಾ ಕಸಲೇಕ ? " ಮೋಣು ತಾಂಗೆಲೆ ಅಂಗಾರಿ ಪೋಣು ರುದ್ರ ಅರಣ್ಯ ರೋಧನ ಕೆಲ್ಲೆ . ಪುತ್ರ ಶೋಕ ... ಸರ್ವ ದುಃಖಾಂತು ಮಹಾ ರುದ್ರ ಶೋಕ ಮ್ಹಣೋನ್ ಘೆತ್ತಾ .. ಮೋಣು ಶಾಸ್ತ್ರ ಸಂಘತಾ . ಆಜಿ ದ್ರೌ ಪದಿ ಲೆ ದುಃಖ .. ಪುತ್ರ ಶೋಕ ... ಪಾಂಡವಾಂಕ , ಅಂತಾ ಲಗ್ಗಿಲೆ ಉಜ್ಜೋ ಶೀ  ಅನುಭವು ಝಲ್ಲೋ .. " ಆರ್ಯ ಪುತ್ರಾ .. ! ಅನಿ ಮಕ್ಕಾ  ಜೀವಂತಿ ಅಸ್ಸುಕಾ ಮೋಣು ಆಶಿ ನಾ ...ಮಿಗೆಲೆ  ಚೆರ್ಡುವಾ೦ಲೆ ವೊಟ್ಟು ಹಾಂವೈ ಜೀವು ತ್ಯಾಗ ಕರ್ತಾ .. ಮಿಗೆಲೆಯ್ ಮತ್ತೆ ಕತ್ತರ್ಯಾತಿ .. ತುಮ್ಗೆಲೆ ಗುರು ಪುತ್ರ ಅಶ್ವಥಾಮ ಕಿತ್ಲೆ ಏಕ ನೀಚ ಮನುಷು ಜಾವ್ನ್ ಅಸ್ಸ .. ! ನಿದ್ದೆಂತು ಅಶಿಲೆ ಮಿಗೆಲೆ ಚೆರ್ಡು೦ವಾಂಕ ಹತ್ಯಾ ಕೋರ್ಕಾ ಝಲ್ಲೇರಿ ... ತ್ಯೋ ಕಿತ್ಲೆ ಏಕ ಕಸಾಯಿ ಮನುಷ್ಯ್ಕ್ ಜಾವ್ನಸ್ತಾಲೊ .. ? ತ್ಯೋ  ಎಕ್ಲೊ ಬ್ರಾಹ್ಮಣ ಜಾತಿಚೊ ಕೀ .. ! ಮಹಾ ಪಾಪಿ ಅಶ್ವತ್ಥಾಮಾ .. ಧರ್ಮ ದ್ರೋಹಿ ಅಶ್ವತ್ಥಾಮಾ !  ಕಸಾಯಿ ಪಾಪಿ ಅಶ್ವತ್ಥಾಮಾ ... !  ತಗೆಲೆ ಹಾಥ ಪಾಯ೦ ಕತ್ತರ್ಯಾತಿ ... ಕೃಷ್ಣಾ .. ! ಪೊಳೈಲ್ವೇ ಹ್ಯೇ ಭೀಭತ್ಸ ಹತ್ಯಾ ... ? ಹೇ ... ಮಿಗೆ ಲೆ ದಯಾ ನತ್ತಿಲೆ ವಿಧಿ ಕೀ .. ? ಕುರುಕ್ಷೇತ್ರ ಯುದ್ಧಾ೦ತು ಲಕ್ಷ ಕಟ್ಲೇನ ಸೈನಿಕಾಂಕ ಗಿಳ್ಳೇಲಿ  ರಣ ಕಾಳಿ ... ತಾಂಗೆಲೆ ನಂತಾ ಮಿಗೆಲೆ ಚೆರ್ಡು೦ವ ತುಕ್ಕಾ  ಜಾಯ್ ಝಲ್ಲೀ೦ತಿ ವೇ .. ? " ದ್ರೌಪದಿಲೆ ಪುತ್ರ ಶೋಕ ...  ಕಟ್ಟೆ  ಭೆತ್ತಿಲೆ ನಂಯ್ ಶೀ ಝಲ್ಲೆ . 

                                   ಪಾಂಡವ ಶ್ರೀ ಕೃಷ್ಣ ಸಮೇತ ಅಶ್ವತ್ಥಾಮಾ ಕ ಸೊದ್ದುನ್  ಆಯಿಲೀ೦ತಿ . ವಟ್ಟೇರಿ ರಕ್ತಾ ಥೆ೦ಮ್ಬೊ- ಥೆ೦ಮ್ಭೆ೦  ಜಾವ್ನು ಅಶ್ವತ್ಥಾಮಾನ ಬಂಧಿಲೆ ಗಾಂಟಿಯೇ ದುಕೂನ್ ಪೊಳ್ಳೆಲೆ ರಗತ ತಾಣೆ ಗೆಲ್ಲೆಲಿ ವಾಟ ದಕ್ಕಯಿತಶಿಲಿ ... ವಾಟ  ಪೊಳೈತಾ ಚಿ ..  ಕುರುಕ್ಷೇತ್ರ ರಣ ಭುಯಿಂಕ ಯೇವ್ನ್ ಪಾವ್ಲಿ೦ತಿ . ಉಪಪಾಂಡವಾಂಗೆಲೆ ಮತ್ತೆ ಪೊಟ್ಲಿ , ಧುರ್ಯೋಧ ನಾಲೆ ಮೃತ ಶರೀರ ವೊಟ್ಟು  ಪೊಳೊನ್ .. ಭೀಮಸೇನ ಅನಿಕಯ್ ಉಗ್ರ ಝಲ್ಲೊ . ಲಗ್ಗಿ ಅಷ್ಶಿಲೆ ಆಶ್ರಮ ವಾಸಿಂಕ ಅಶ್ವತ್ಥಾಮಾಲೆ ವಿಚಾರು ಕೋರ್ನ್ , ಪಾಂಡವ ವ್ಯಾಸಾಶ್ರಮ ಕ ಯೇವ್ನ್ ಪಾವ್ಲೀ೦ತಿ . ತ೦ಯಿ ಅಶ್ವತ್ಥಾಮ , ನಿಡ್ಲಾಕ ಅಂಗಾಕ ಭಸ್ಮ ಲಾವ್ನ್ ಘೇವ್ನ್ ಧ್ಯಾನಾಕ ಬೊಶಿಲೆ ಪೊಳೈಲೆ . ಕೃಷ್ಣ ಅನಿ ಪಾಂಡವ , ವ್ಯಾಸ ಮಹರ್ಷಿಕ ಪೊಳೋ ನ್ ನಮನ ಕೋರ್ನು ಜಲ್ಲೆಲೆ ವಿಷಯು ಸಂಘಲೆ . ಭೀಮ ಸೇನಾನ ... " ಅಶ್ವತ್ಥಾಮಾ .. ! ಆಶ್ರಮ ಸೋಣು ಭಾಯಿರಿ ಯೋ ... ಹ್ಯೇ ಪವಿತ್ರ ಆಶ್ರಮಾಂತು ಪಾಯು ದೊವೊರುಂಕ ಯೋಗಿತ್ಯ ನಾ ತುಕ್ಕಾ ... ಆಶ್ರಮಾಂತು ನಿಪ್ಪೋನ್ ಬೊಸ್ಲೆ  ಸತಾನ .. ತೂ  ವಾಂಚ್ಲೊ ಮೊಣು ಲೆಕ್ಕುನುಕ್ಕಾ  ಯೋ ಭಾಯಿರಿ ಯೋ .. " ಮೋಣು ಘರ್ಝನ ಕೆಲ್ಲಿ . ಭೀಮಸೇನಾಲೆ ತಾಳೊ ಅಯಿಕಲೆ  ಸತಾನ ... ಅತ್ತ ಮಿಗೆಲೆ ಜೀವು ವಾಂಚೊಚ್ಯೆ ಮುಖ್ಯ ಮೋಣು .. ಏಕ ಸಾನ ದರ್ಬೆ ಹತ್ತಾ  ಧೋರ್ನ್ ಬ್ರ೦ಹ್ಮ್ಮಸ್ತ್ರ ಜಪ ಕೋರ್ನ್ ಪಾ೦ಡವ  ನಾಶಾ ಖತಿರಿ ಸೊಳ್ಳೆ . ತ್ಯೆ ದರ್ಬೆ ಆಕಾಶಾರಿ ಉಬ್ತಾಚಿ , ಬ್ರ೦ಹ್ಮ್ಮಸ್ತ್ರ ಜಾವ್ನ್ , ಪ್ರಳಯ ಕಾಲಾ ಗುಡುಗು ಮಿಂಚಾ ವೊಟ್ಟು .. ಪ್ರಳಯ ಕಾಲಾ ಶಬ್ದ  ಜಾವ್ನ್ ಪಾಂಡವಾ ದಿಕಾನ ಯೆತ್ತಾ ಅಸ್ಸ ... ಕೃಷ್ಣಾ ನ ...  " ಅರ್ಜುನಾ ತೂವೈ ಬ್ರ೦ಹ್ಮಾಸ್ತ್ರ ಪ್ರಯೋಗ ಕೋರ್ನು .. ತ್ಯೆ ಅಸ್ತ್ರ ನಿಗ್ರಹ ಕರಿ " ಮ್ಹಳ್ಳಲೊ . ಅರ್ಜುನಾನ ಬ್ರ೦ಹ್ಮಾಸ್ತ್ರ ಜಪ ಕೊರ್ನ್ ಸೊಳ್ಳೆ . ದೊನ್ನಿಯಿ ಅಸ್ತ್ರ ಆಕಾಶಾರಿ 'ಢೀ' ಮಾರ್ಲೆ . ಆಕಾಶು .. ಪ್ರಳಯ ಶಬ್ಧಾ ನ ಹೋಡು ಮಿಂಚು ಯೇವ್ನ್ ಭುಂಯಿ ಏಕ ಪೊಟಿ ಕಂಪನ ಝಲ್ಲಿ . ಸಮುದ್ರ್ ಏಕ ಪೋಟಿ ಉನ್ಮಾದ ಯೇವ್ನ್ ಉಕ್ಕುನ್ ಪಾಳ ಘು೦ವ್ನ್ ಪೊಳ್ಳೀ೦ತಿ .. ಆಕಾಶಾರಿ ಉಬ್ಚೆ ಪಕ್ಷಿ ಜೀವ ರಾಶಿ ಲಾಸ್ಸುನ್ ಕರ್ಟುನ್ ನೆಲಾರಿ ಪೊಳ್ಳೀ೦ತಿ ... ಗುಡ್ಡೋ , ಪರ್ವತು ಭೇತ್ತುನ್ ಹೂನ ಲಾವಾ ಭಾಯಿರಿ ಅಯಿಲೆ .. ಹಿಮಾದ್ರಿ ಶಿಖರಾ ಮಂಜು ಧೆಪ್ಪಳ - ಧೆಪ್ಪಳ ಜಾವ್ನ್ ಧೋ ಧೋ ಮೋಣು ನಿಸೋರ್ನು ಪೊಳ್ಳೇ .. ನ೦ಯ್ಚೆ , ಸಮುದ್ರಾ ಉದ್ದಾಕ  ಬೋರ್ನ್ .. ಉಕ್ಕುನ್ ವಿನಾಶ ತಾಂಡವ ಖೆಳ್ಳೆ ... ವ್ಯಾಸ ಮಹರ್ಷಿ ನ ಆಜ್ಞಾ ಕೆಲ್ಲಿ ಅಶ್ವತ್ಥಾಮಾಕ ... ಬ್ರ೦ಹ್ಮಾಸ್ತ್ರ ಉಪಶಮನ ಕೊರುಂಕ .ಝಲ್ಲೆರಿ ಅಶ್ವತ್ಥಾಮಾಕ ಬ್ರ೦ಹ್ಮಾಸ್ತ್ರ ಉಪಶಮನ ಕೊರುಂಕ ಗೊತ್ನಾ ಅಶಿಲೆ . ವ್ಯಾಸ ಮಹರ್ಷಿಲೆ ಪಯ್ಯಾರಿ ಪೋಣು ಮಾಫಿ ಮಾಗ್ಲಿ . ತಗೆಲೆ ಸಹಮತಿ ಘೇವ್ನ್ .. ತಾಗೆಲ್ ಬ್ರ೦ಹ್ಮಾಸ್ತ್ರ ಪಾಂಡವ ಬಾಯ್ಲ್ ಮನಶ್ಯಾ೦ಲೆ  ಪಿಂಡಾ ದಿಕಾನ ಘು೦ವ್ಡಾಯಿಲೆ . ಅರ್ಜುನಾ ನ ಬ್ರ೦ಹ್ಮಾಸ್ತ್ರ ಉಪಶಮನ ಕೆಲ್ಲೆ . ಕೃಷ್ಣಾ ಕ ಮಹಾ ಕೋಪು ಅಯಿಲೊ . ಝಲ್ಲೆರಿ ಕಸಲೆ ಕೊರ್ಚೆ .. ? ಅಶ್ವತ್ಥಾಮ ಚಿರಂಜೀವಿ ... ಬ್ರಾಹ್ಮಣು ... ಗುರು ಪುತ್ರ .. !ತಾಣೆ  ಕೆಲ್ಲೆಲೆ ಕಾರ್ಯ ಕ್ಷಮ ಕೋರ್ಚ್ಯಾ ಯೋಗ್ಯ ನಯ್ .. ! " ಅಶ್ವತ್ಥಾಮಾ .. ! ಏಕ ಬ್ರಾಹ್ಮಣ ವಂಶಾಂತು ಜನ್ಮ ಘೇವ್ನ್ , ಲೋಕ ಕಲ್ಯಾಣ ಕೊರ್ಚೆ ಸೋಣು ... ಅರ್ಧ ರಾತ್ರಿ ವೆಳ್ಯೇರಿ .. ನಿದ್ರೇ೦ತು  ಅಶಿಲೆ ಉಪಪಾಂಡವಾ೦ಗೆಲೆ ಹತ್ಯಾ ಕೆಲ್ಲೆ .. ತೂ ಕ್ಷಮ ಕೊರುಂಕ ಲಾಯಕ್  ನಾ  .. ಗುರು ಪುತ್ರ ಝಲ್ಲೆಲೆ ನಿಮಿತ್ಯ ತುಕ್ಕಾ ಖಡ್ಘ ಪ್ರಹಾರ ಕೊರ್ಚೆ .. ಅಧರ್ಮ ಝತ್ತಾ . ಕೊಣೆಯ್ ತುಕ್ಕ ಕ್ಷಮಾ ಕೆಲ್ಲೇರಿಯಿ .. ಹಾಂವ ಕ್ಷಮಾ ಕರ್ನಾ ತುಕ್ಕಾ .. ' ಆಜಿ ದುಕೂನ್ ತೂ .. ಆನಿ ತೀನಿ ಹಜಾರ  ವರ್ಷ ಪರ್ಯಂತ ಅರಣ್ಯ ವಾಸ ಕರ್ತಾಚಿ .. ಕುಷ್ಠ ರೋಗಾಕ ಬಲಿ  ಜಾವ್ನ್ ... ಗತಿ ಗೋತ್ರ ನಾತ್ತಿಲೆ ಮನುಷ್ಯ ಜಾವ್ನ್ ದೀನ ಜಾವ್ನ್ ಜೀವನ ಕಾಡಿ .. ಹ್ಯೇ ಮಿಗೆಲೆ ಶ್ರಾಪ್ ತುಕ್ಕಾ .. !! " ಮೋಣು ಕೃಷ್ಣಾನ ಶ್ರಾಪು ದಿಲ್ಲೆ ." ತು೦ವೇ ಕೆಲ್ಲೆಲೆ ಚುಕ್ಕೆಕ ...  ನಿಡ್ಲಾರಿ ಅಶಿಲೆ ಶಿರೋಮಣಿ ಕಾಣು ಭೀಮಸೇನಾ ಕ ದೀ . " ಮೋಣು ಆಜ್ಞಾ ಕೆಲ್ಲಿ . ಕೃಷ್ಣಾಲೆ ಕೋಪು ... ವ್ಯಾಸ ಮಹರ್ಷಿಲೆ ಸಾಂತ್ವನಾ ಉತ್ತರಂ ಅಯಿಕುನ್  ಅಶ್ವತ್ಥಾಮಾ ನ ನಿಡ್ಲಾರಿ ಅಶಿಲೆ ಶಿರೋಮಣಿ ಸ್ವತಃ ಪೆಸ್ಕಾತೇನಿ ಕತ್ತೊರನ್ ಭೀಮ ಸೇನಾಕ ದಿಲ್ಲಿ . ಪಾಂಡವಾಂಕ ಮನಾ ಸಮಾಧಾನ ಝಲ್ಲಿ . ಶಿರೋಮಣಿ ಕಡ್ತಾರಿ ... ಅಶ್ವತ್ಥಾಮ ಪೂರ್ತಿ ಬದಲ್ ಝಲ್ಲೊ . ಅಹ೦ಕಾರು  , ಆವೇಷು , ನೀವ್ನ್ ಶಾಂತ ಝಲ್ಲೊ . ವ್ಯಾಸ ಮಹರ್ಷಿಲೆಗಿ ದೀಕ್ಷಾ  ಘೇವ್ನ್ ಹಿಮಾಲಯಾ ದಿಕಾನ ತಪಸ್ಯಾಕ ಭಾರ್ಸರ್ಲೊ  .

                         ಕೊಣಯ್ ಪುಣಿ ಸಹಜ ಜಾವ್ನ್ , ಹೇ ಲೋಕಾಂತ್ .. ತಾಂಗೆಲೆ ಕುಟುಂಬೆ ಖತಿರಿ , ಕೋಣ ತ೦ಕಾ ಪ್ರೀತಿ ಆದರ ಕೊರ್ನ್ ಪೊಳೈತಾ೦ಗೆಲೆ ಖತಿರಿ ... ಮಿತ್ರ ಬಂಧು ಖತಿರಿ  , ಸಮಾಜಾ ಖತಿರಿ , ಆಪ್ಣೇಕ ನಂಮ್ಗುನ್ ಆಯ್ಯಿಲೆ ಜನಾ ಖತಿರಿ ,  ಶ್ರಮ ಕಾಣು ಮುಕಾರಿ ಯೇವ್ನ್ ರಕ್ಷಣ ದೀವ್ನ್  ಮಾಗಿರಿ ಮತ್ತಿ ಝತ್ತಾತಿ . ಹೇ ಸರ್ವಾಂಕ ಸಹಜ . ಝಲ್ಲೇರಿ ಧುರ್ಯೋಧನ ತಸಲೆ ದುರಭಿಮಾನಿ , ದುರಹಂಕಾರಿ , ಯೀರ್ಷ , ದ್ವೇಷ ಮನಾ ದೊವೊರ್ನ್ ತಗೆಲೆ ಜನಾಂಕ ಮನಾ ದುಕ್ಕೊನ್ .. ಆಖೇರಿಕ ಆಪ್ ಣೇನ ದುಃಖ ಪಾವ್ನ್ ದೇಹ ತ್ಯಾಗ ಕೋರ್ಕಾ ಪಳ್ಳೆ . ಧುರ್ಯೋಧನಾ ಲೇ ಜೀವನ ಹೀನ ಜಾವ್ನ್ ಕಯಿದ ಝಲ್ಲಾ . ಆಖೇರಿ ಕ್ಷಣಾರಿ ಆತ್ಮೀಯ ಲೋಕು ಲಗ್ಗಿ ನಾಶಿ ... ಗೌರವ , ಆದರ ಕರ್ತಲೆ ನಾಶಿ ... ತೊಂಡಾಂತು ಏಕ ಘೋಟು ಥೆ೦ಬೊ ಉದ್ದಾಕ ಘಲ್ತಾಲೆ ನಾಶಿ ... ಹೀನ ಪರಿಸ್ತಿಥಿರಿ ಧುರ್ಮರಣ ಪಾವ್ಲೋ . ಮನುಷ್ಯ ಕಷ್ಶಿ  ಜನ್ಮಾ ಅಯಿಲಾ  ... ?  ಖಂಯಿ ಜನ್ಮಾ ಅಯಿಲಾ .. ? ಖಂಚೆ ಕುಟುಂಬೆ ಜನ್ಮಾ ಅಯಿಲಾ .. ? ಕೊಣಾಲೆ ಪೊಟ್ಟಾಂತು ಜನ್ಮಾ ಅಯಿಲಾ ..  ? ಮ್ಹಳ್ಳೆಲೆ ಮುಖ್ಯ ನಯ್ ... ಕಷ್ಶಿ ಮರಣ ಪಾವ್ಲಾ .. ! ಮ್ಹಳ್ಳೆಲೆ ಅತ್ತ ಮುಖ್ಯ . ಜೀವನ , ಅಮ್ಮಿ ಲೆಕ್ಕಿಲೆ ತಶಿ ಕಸಲೆಯ್ ಜಾಯ್ನಾ . ಹೇ ಅಮ್ಮಿ ಸರ್ವಾನಿ ಉಡ್ಘಾಸು ದೊವೊರ್ನ್ ಘೆವ್ಕಾ . ಜನನ - ಮರಣ ಆಮ್ಗೆಲೆ ಹತ್ತಾ೦ತು ನಾ . ಅಮ್ಮಿ ಲೆಕ್ಕಿಲೇ ತಷ್ಶಿ ಜಾಯ್ನಾ . ಮರಣ ಅಮ್ಮಿ ಲೆಕ್ಕಿಲೇ ತಷ್ಶಿ ಜಾವ್ಕಾ ಮೋಣು ಅಸ್ತಾ . ಜೀವನಾಚೆ ಆಖೇರಿ ತಾಂಯ್ ... ಬಾಯ್ಲ್ ಚೆರ್ಡು೦ವಾಲೆ ಖತೀರಿ ಕಷ್ಟ ಕಾಣು ಕಾಣು ... ಆಖೇರಿ ಏಕ ದಿವಸು , ಹೇ ದೇಹ ಸೋಣು  ವತ್ತನಾ ... ಆತ್ಮೀಯ ಲೋಕಾಲೆ ಆಪ್ಯಾಯತ , ಪೊಟ್ಟಾ ಜನ್ಮಾ ಆಯ್ಯಿಲೆ ಚೆರ್ಡು೦ವಾಲೆ ಆತ್ಮೀಯತ ನಾಶಿ , ಬಂಧು ಬಾಂಧವ ಲೋಕಾಲೆ ಪರಾಮರ್ಶ ನಾಶಿ ... ಮೆಲ್ಲೇರಿ ಹೇ ಜೀವನಾಂತು ಕಸಲೆ ಪುರುಷಾರ್ಥ ಸಿದ್ಧಿ ಕೆಲ್ಲೆ ಮ್ಹಣ್ಕೆ ಝತ್ತಾ .. ? ಅಷ್ಶಿ ಕೊಣಯ್ ಮೊರು ನಜ್ಜ . 

                            ಧುರ್ಯೋಧನ ಚಕ್ರವರ್ತಿಲೆ ಮರಣ ಸಾಧಾರಣ ಅಶೀ೦ಚಿ ಝಲ್ಲಾ . ಅಪಾರ ರಕ್ತ  ಸಂಭಂಧಿ ... ಆತ್ಮೀಯ ಲೋಕು ... ರಕ್ಷೆಕ ಸೈನಿಕ .. ಸೇವೇಕ ಅಪಾರ ದಾಸ ದಾಸಿ ... ಅನಂತ ಭೋಗ ಭಾಘ್ಯ .. ಲೆಕ್ಕೂ೦ಕ  ಜಾಯ್ನಾ ನಾತ್ತಿಲೆ ನಗ ನಾಣ್ಯ ಸಂಪದ ನಿಕ್ಷೇಪ ಸರ್ವ ವಿಷಯ ಅಷ್ಶಿಲೊ ... ಮಹಾನ್ ಚಕ್ರವರ್ತಿ ... ಕುರು ಕ್ಷೇತ್ರ ಯುದ್ಧ ರಂಗಾ ಧೂಳೀ೦ತು ... ಕೊಲ್ಲೆ ಸೂಣೆ ತಂಡುನ್ ... ಅನಾಥ ಜಾವ್ನ್ ಪ್ರಾಣು ಸೊಳ್ಳಾ . ಹಕ್ಕಾಚಿ ದುರ್ಮರಣ ಮೋಣು ಸಾಂಗ್ತಾತಿ ಮಲಘಡೆ .. ಹಸ್ತಿನಾವತಿ ಅಂತಃಪುರಾ ಮಾತ್ರ ನಯ್ ... ಸಗಳೇ ಭಾರತ ದೇಶ , ದುಃಖ ಸಾಗರಾಂತು ಬುಡ್ಲಾ . ಖಂಚೇಯ್ ಘರಾಂತು ಪೊಳಯ್ಲ್ಯಾರೀ ... ದುಃಖ ಪ್ರಲಾಪ ... ದೀನ ಆಲಾಪ .. ಶವ ಸಂಸ್ಕಾರು ಕೊರುಂಕ  ಮೆಳ್ನಾ ನಾತ್ತಿಲೆ ದೇಹ ... ರುಂಡ ನಾತ್ತಿಲೆ ದೇಹ ... ಗುರ್ತು ಮೇಳ್ನಾ  ನಾತ್ತಿಲೆ , ಜಖಂ ಝಲ್ಲೆಲೆ ದೇಹ .. ಕೊಲ್ಲೆ ಸೂಣೆ೦ ನಿ ಭೂಖೇಕ ರೌದ್ರ ರೂಪಾ ಭಕ್ಷಣ ಕೆಲ್ಲೆಲೆ ಅರ್ಧ ಛಿದ್ರ ಝಲ್ಲೆಲೆ ... ತಂಡುನ್ ವಿಭಜನ ಕೆಲ್ಲೆಲೆ ದೇಹ ... ಅಂಗಾಂಗ ನಾತ್ತಿಲೆ ದೇಹ ... ಮಡೇ ಕಾಯ್ಳಾನಿ ಕೊಂಕುನ್ ಕೆಲ್ಲೆಲೆ ರುದ್ರ ಭೀಭತ್ಸ ..  ಕುಸ್ಸುನ್  ವರ್ಲೆಲೆ ದೇಹ  ..  ಮಹಾದುರ್ಗಂಧ ಯೇವ್ನ್ ಲಗ್ಗಿ ವೊಚ್ಚಾ ಜಾಯ್ನಾ ನತ್ತಿಲೆ ಅಂಗಾಂಗ . ಪ್ರತೀ ಘರಾಂತು ... ಅಣ್ಣಾ , ಬಪ್ಪುಸು , ಬಾಮ್ಮುಣು , ಪೂತು , ಭಾವು , ಬಪ್ಪಾ , ಮಾಂತು , ಮಾ೦ವು ಖಂಚೆಯ್ ಏಕ ಸಂಬಂಧು ಅಸ್ಸುನ್ ಶೋಕ ತಪ್ತ ಜಾವ್ನ್ ಹರ್ದೆ೦ತು ಉಜ್ಜೋ  ಜೋಳ್ಚೆ  ಅನುಭೂತಿ ಪವ್ತಾಶಿಲೀಂತಿ .  

                          ವಿದುರ ಮಹಾಶಯ್ ... ಧುರ್ಯೋಧನಾ ಲಗ್ಗಿ ಝಗಡೆ ಕೋರ್ನ್ ,ತೀರ್ಥ ಯಾತ್ರೆಕ ಗೆಲ್ಲೆಲೋ ... ಅತ್ತ ವಾಪಾಸ್ ಹಸ್ತಿನಾವತಿಕ ಅಯಿಲಾ ... ಧ್ರತರಾಷ್ಟ್ರಾಕ  ಮೇಳ್ನ್ ಆಲಿಂಗನ ಕೊರ್ನ್ ರಾಯಾಲೆ ಕಷ್ಟ ಅಯಿಕಲೋ .  " ವಿದುರಾ ... ! ಹಾಂವೆ ತುಗೆಲೆ ಉತ್ತರಂ ಅಯಿಕನಿ . ಪುತ್ರ ವ್ಯಾಮೋಹಾನಿ .. ತುಕ್ಕಾ ಮಸ್ತ ಅಲಕ್ಷ್ಯ ಕೆಲ್ಲೆ .. ಹಾಂವೆ ಹೊಡಿ ಚೂಕಿ  ಕೆಲ್ಲಿ ವಿದುರಾ ... !ಶ೦ಬರಿ ಚೆರ್ಡು೦ವಾಲೆ ಸೂಖ  ಮೆಳ್ಳೆರಿಯಿ , ಯೇಕ್ಳಿಂಚಿ ವಾಂಚುನ್ ವರ್ನಿತಿ . ಅಸಲೆ ಘೋರ ಕಷ್ಟ ಆಯಿಲೆ  ತೆದ್ನಾ ... ಹಾಂವೆ ಹರ್ದೆ  ಭೇತ್ತುನ್  ಮೋರ್ಕಾ ಅಷ್ಶಿಲೆ ... ಝಲ್ಲೆರಿಯಿ , ಹಾಂವ ಅನಿಕಯ್ ಜೀವಂತಿ ಅಸ್ಸ ... ಮಕ್ಕ ಅನಿಕಯ್ ಮರಣ ಯೇನಾ ಖಂಯ್ ..!ಹಾಂವ ಕಸಲೆ ನಮುನೆ ಪಾಪಿ ಪೊಳೆ .. ವಿದುರಾ !" ಗೊಳೋ ಮೋಣು ರಳ್ಳೋ ಧ್ರತರಾಷ್ಟ್ರು . " ಸಮಾಧಾನ ಕರಿ ಮಹಾರಾಜಾ.. ! ತುಗ್ಗೆಲ್ ಚೆರ್ಡು೦ವ ಕುರುಕ್ಷೇತ್ರ ಯುದ್ಧ ರಂಗಾಂತು ವೀರ ಮರಣ ಪಾವಲೀ೦ತಿ. ಯುದ್ಧ ರಂಗಾತು ಜೀವು ದಿವ್ಚೊ ಕ್ಷತ್ರಿಯ ಲಕ್ಷಣ ... ! " 

ದೃತರಾಷ್ಟ್ರ: " ವಿದುರಾ .. !ಹ್ಯೇ ಕುರ್ಡೇಕ ಮುಕಾರಿ ಕೋಣ ಗತಿ ... ? ಅಯ್ಯೋ .. !ಮಿಗೆಲೆ ಶಂಬರಿ ಚೆರ್ಡು೦ವ ಭಿತರಿ ಏಕ್ಲೊಯೀ ನಾ .. ತಶಿ .. ಪಾಂಡವಾನಿ  ದಿವಿಶಿ ಮಾರ್ಲೆ ವಿದುರಾ .. ! ತ್ಯೆ ಕುಂತಿಲೆ  ಚೆರ್ಡು೦ವ ಇತ್ಲೆ ನಿರ್ದಯಿ ಮೋಣು  ಹಾಂವೆ ಲೆಕ್ಕನಿ . ಇತ್ಲೆಕಯ್ ತೊ ಅಹಂಕಾರಿ ಭೀಮ .. ಕಾರಣ ಝಲ್ಲೋ ವಿದುರಾ... ! ಧ್ರತರಾಷ್ಟ್ರಾಲೆ ದೋಳೆ  ಬೋರ್ನ್ ಅಯಿಲೆ .

                            ವ್ಯಾಸಮಹರ್ಷಿ  ... ಧ್ರತರಾಷ್ಟ್ರಕ ಸಮಾಧಾನ ಕೊರುಂಕ ಹಸ್ತಿನಾವತಿಕ ಅಯಿಲೊ .  ಸಂಜಯ ಅನಿ ವಿದುರ ವ್ಯಾಸ ಮಹರ್ಷಿಕ ವಂದನ ಕೊರ್ನ್, ಧ್ರತರಾಷ್ಟ್ರಕ ವ್ಯಾಸ ಮಹರ್ಷಿ ನ ಆಯ್ಯಿಲೆ ವಿಷಯು ಸ೦ಗ್ಲೆ . " ಅಯಿಲೊವೇ ... ಮಿಗೆಲೆ ಅನ್ನಾ .. ? ಮಿಗೆಲೆ ವ೦ಶು  ನಿರ್ನಾಮ ಝಲ್ಲೆ ... ಎಕ್ಲೀ೦ಯಿ ವಂಚನೀ೦ತಿ  ... ಮಿಗೆಲೆ ಚೆರ್ಡು೦ವ .. ! ಹ್ಯೇ ಕುರ್ಡೇಕ ಅನಾಥ ಕೊರ್ನ್ ಸ್ವರ್ಘಾ ಕ ಗೆಲ್ಲೆ೦ತಿ . ಮಕ್ಕ ಆನಿ ಕೋಣ ಗತಿ .. ? ಹಾಂವೆ ಕಸಲೆ ಕೋರ್ಚ್ಯೆ .. ? ಮಕ್ಕಾಯಿ ಮಿಗ್ಗೆಲೆ ಚೆರ್ಡು೦ವಾ  ವೊಟ್ಟು ಸ್ವಾರ್ಘಾಕ ಪಾವೈ ವ್ಯಾಸ ಗುರು ದೇವಾ ... ಹೇ ದುಃಖ ಸಾಗರಾ ದುಕೂನ್ ಪಾರ ಕರಿ ದೇವಾ .. " ಮೋಣು ಧ್ರತರಾಷ್ಟ್ರಾನ  ಪ್ರಾರ್ಥನಾ ಕೆಲ್ಲಿ ಆನಿ ವ್ಯಾಸ ಮಹರ್ಷಿಲೆ ಪಯ್ಯಾರಿ ಪೊಳ್ಳೋ  . " ಪುತಾ .. ! ತೂ ಕಿತ್ಲೆಕೀ ಧರ್ಮ ಶಾಸ್ತ್ರ ಅಯಿಕುನ್ ಅಶ್ಚ್ಯಾ ಪೂರೊ ... ಪುರಾಣ ಅಯಿಕುನ್  ಅಶ್ಚ್ಯಾಪೂರೊ ... ನಿಡ್ಲಾ ಬರಪ ಕೊಣಾಚ್ಯಾನ ಚುಕ್ಕೋಚ್ಯಾ ಜಾಯ್ನಾ ... ತ್ಯೆ ತ್ರಿಮೂರ್ತಿ೦ಕಯಿ  ತಾಯಿ ಜಾಯ್ನಾ . ತ್ಯೆ ಪರಮಾತ್ಮಾಲೆ ಆನುಗೃಹ ... ಆಜ್ಞಾ ... ನಾಶಿ ಕಸಲೆಯ್ ಜಾಯ್ನಾ . ಯುದ್ಧ ಪರಿಣಾಮ ಪೊಳೊನ್ ... ತುಗ್ಗೆಲ್ ದುಃಖ ಪೊಳೊನ್ , ತುಕ್ಕಾ ಸಮಾಧಾನ ಕೊರುಂಕ ಅಯಿಲಾ ಪುತಾ .. ! ಧ್ರತರಾಷ್ಟ್ರಾ .. ! ಹೇ  ದಾಯ್ಜ್ಯೇ ಕ್ಲೇಶ ಆಯೀಚೆ ನವೇ ನಯ್ ... ಇತ್ಲೆ  ವರ್ಷ೦ ಭಿತ್ - ಭಿತರೀ ಚಿ ಈರ್ಷ , ರಾಜ್ಯ ವಾಂಛ , ಪೊಟ್ಟಾ ಉಜ್ಜೋ  ಖತ್ - ಖತೇನು ... ಅತ್ತ ಅಗ್ನಿ ಪರ್ವತಾ ಮ್ಹಣ್ಕೆ ಸ್ಫೋಟ ಝಲ್ಲಾ . ಹಕ್ಕಾ ತೂ೦ವೈ ಏಕ ಕಾರಣ ಜಾವ್ನ್ ಅಸ್ಸ . ತುಗೆಲೆ ಎದ್ರಾಕ ಮಾಯಾ ದ್ಯೂತ ಝಲ್ಲಾ ... ತುಗೆಲೆ ಕುಲವಧು .. ದ್ರೌಪದಿ ಕ ತುಗೆಲೆ  ಚೆರ್ಡು೦ವಾನಿ ಅವಮಾನ ಕೆಲ್ಲಾ . ತುಗೆಲೆ ಅನುಮತಿ ಘೇವ್ನ್ ಝತ್ತರೀಚ್ಯಿ ... ನಿಯಮನುಸಾರ ಪಾಂಡವ ಅರಣ್ಯ ಆನಿ ಅಜ್ಞಾತ ವಾಸ ಕೊರುಂಕ ಗೆಲ್ಲೆಂತಿ . ಅಜ್ಞಾತ ವಾಸ ಝತ್ತರಿ ನ್ಯಾಯ ಜಾವ್ನ್ ತಾಂಗೆಲೆ ರಾಜ್ಯ ತಂಕಾ ವಾಪಾಸ್ ದೀವ್ಕಾ ಅಷ್ಶಿಲೆ . ಧರ್ಮರಾಯಾನ ಪಾಂಚ ಪಟ್ಟಣ ಝಲ್ಲೆರಿಯಿ ಝತ್ತಾ ಮೋಣು ರಾಯಭಾರಿ ಮುಖಾಂತರ ಸಂಘುನ್ ದೀವ್ನ್ ಪೆಟಯಿಲೆ ತೆದ್ನಾ .. ತೂ೦ವೆ ಚಕ್ಕಾರ ಶಬ್ಧ್ ಉಲ್ಲಯಿನಿ . ಶ್ರೀ ಕೃಷ್ಣಾ ನ ಯೇವ್ನ್ ನಿಂಮ್ಗೀತನಾ ... ತೂ೦ವೆ ಯುದ್ಧಾ ಕ ವಾಟ  ದಕ್ಕಯಿಲಿ . ಭೀಷ್ಮ , ವಿದುರಾಲೆ  ಹಿತ ವಚನ ಅಯಿಕನಿ . ಮಿಗೆಲೆ ಉತ್ತರಂ ತಾ೦ಯಿ ಐಕನಿ ... ತುಕ್ಕಾ ಕುರುಡುಪಣ , ಅಂಧತ್ವ ...  ಅಂಗಾ ಕ ಮಾತ್ರ ನಯ್ ತುಗೆಲೆ ಮನಾಕ ಬುದ್ಧಿಕ ಹೃದಯಾಕ ಲಾಗ್ಗುನ್ ಅಸ್ಸ .. ಪುತ್ರ ಮೋಹಾ ನಿಮಿತ್ಯ ಪೂರ್ತಿ ಕುರುಡು ಝಲ್ಲಾ ತೂ ... ಅತ್ತ ತುಗೆಲಿ ಚುಕ್ಕೇ ಕ ಶಿಕ್ಷ ಅನುಭವ ಕರ್ತಾ ಅಸ್ಸ . " ವ್ಯಾಸ ಮಹರ್ಷಿಲೆ ಉತ್ತರಂ .. ಏಕ ಅಪರಾಧಿ ಸೊ  ಅಯಿಕತಶಿಲೋ ದೃತರಾಷ್ಟ್ರ . " ಪಾಂಡವ ... ತುಗೆಲಿ ಆಜ್ಞಾ ಖತೀರಿ , ಪುರ ಪ್ರವೇಶ ಕೊರುಂಕ  ಕುರುಕ್ಷೇತ್ರಾ೦ತು ರಕ್ಕುನ್  ಆಸ್ಸತಿ . ಅತ್ತ ಪುಣಿ ತಂಕಾ ಮರ್ಯಾದೆರಿ ಸ್ವಾಗತ ಕೊರ್ನ್ ತಾಂಗೆಲೆ ರಾಜ್ಯ ತಾಂಕಾ ದೀ .. ಮೋರ್ನ್ ಸ್ವರ್ಘ ವಾಸ ಝಲ್ಲೆಲೆ ತುಗೆಲೆ ಚೆರ್ಡುವಾಂಕ , ಶ್ರಾಧ್ದ ಕರ್ಮ ಕೊರ್ನ್ ಮುಕಾ ವೈಲೆ ಕಾಮ ಕಸಲೆ ಮೋಣು ಪೋಳೆ .. ತೂ ಮಲಘಡೊ ಮೋಣು ತುಗೆಲಿ ಮರ್ಯಾದಿ ದೊವೊರ್ನ್ ಘೆವ್ಚ್ಯೆ ಕಾಮ ಕರಿ .. " ಮೋಣು  ಹಿತೋಪದೇಶ ಕೆಲ್ಲೆ . ದೃತರಾಷ್ಟ್ರ ಹೃದಯ ಫತ್ತೋರ್  ಕೊರ್ನ್, ನತ್ತಿಲೆ ಮನಾರಿ , ಅಸಂತುಷ್ಟ ಜಾವ್ನ್ ,   ವಿದುರ ಅನಿ ಸಂಜಯ ವೊಟ್ಟು ..  ಪಾಂಡವಾಂಕ ಸ್ವಾಗತ ಕೊರುಂಕ ಕುರುಕ್ಷೇತ್ರ ದಿಕಾನ ಪ್ರಯಾಣ ಶುರು ಕೆಲ್ಲೆ . 

ಉಮಾಪತಿ