MAHABHARATH
PART - 68 ( Konkani Bhashentu )
Dhuryodhanale MaraNa / ಧುರ್ಯೋಧನಾಲೆ ಮರಣ
ಭೀಮ ಸೇನಾನ ವೇಳು ಪೋಳೋನ್ , ಸಂಧರ್ಭ ಪೋಳೋನ್ ... ಧುರ್ಯೋಧನಾಲೆ ಕುರ್ಟಾ ಜಾಗೇರಿ ಗಧಾ ಪ್ರಹಾರ ಕೆಲ್ಲೆ . ದೂಕಿ ತಡಸೂನ್ ಘೆವ್ಚ್ಯಾಕ ಜಾಯ್ನಾಶಿ " ಅಮ್ಮಾ .. ! " ಮೋಣು ಚೀತ್ಕಾರ ಕೆಲ್ಲೆ . ಮತ್ತೆ ಘುವ್ವಳಿ ಯೇವ್ನ್ ಧುರ್ಯೋಧನ್ ಧೊಪ್ಪನಿ ನೆಲಾರಿ ಪೊಳ್ಳೋ . ತುರಂತ್ ಭೀಮಾ ನ ತಾಗೆ ಲ್ ಹರ್ದೆರಿ ಪಾಯು ದೊವೊರ್ನ್ , ಆನ್ನೇಕ ಪೋಟಿ ಗಧೇನ ಬಲ ಘಾಲ್ನ್ ಪ್ರಹಾರು ಕೆಲ್ಲೆ . ಧುರ್ಯೋಧನಾ ಕ ಸ್ಮೃತಿ ಚುಕ್ಕಿಲಿ ಅನುಭವು ಜಾವ್ನು " ಅಯ್ಯೋ .. ! "ಮೋಣು ಬೋಬ ಮಾರ್ಲಿ . ... ಅತ್ತ ಹಡ್ಡ೦ ಸಡಿಲ ಜಾವ್ನ್ ಕೊಂಡಿ ಚುಕ್ಕಿಲೊ ... ನಾಗ ಸರೋಪು ಶೀ ... ನಿಸ್ತೇಜ ಜಾವ್ನ್ ಹಲ್ಲುಂಕ ಜಾಯ್ನಾಶಿ ಪೊಳ್ಳೋ . ದಾವೆ ಹಾತ್ತಾನ ತಾಗೆಲ್ ಪಾಯು ಧೋರ್ನ್ ... ದರ ದರ ನಿ ಯುದ್ಧ ರಂಗಾ ಮಧ್ಯೆಂತು ತಂಡುನ್ ಹಳ್ಳೆ . ಪಾಯು ಕುರ್ಟಾ ಜಾಗೇರಿ ದುಕೂನ್ ನಿಸರ್ಲಾ ಮ್ಹಣ್ಕೆ ಝಲ್ಲೆ . ಮಲ್ಲ ಯುದ್ಧ ಪ್ರವೀಣ ಭೀಮ ಸೇನಾಕ ಮರ್ಮ ಜಾಗೇರಿ ಪ್ರಹಾರ ಕೊರುಂಕ ಕಾಯ್ ಕಷ್ಟ ಜಾಯ್ನಿ . ಮುಷ್ಠಿ ಪ್ರಹಾರಾಕ ಧುರ್ಯೋಧನಾಲೆ ಹಡ್ಡ೦ ಕಟ ಕಟನೆ ಮೋಣು ಪುಡ್ಡಿ ಝಲ್ಲಿಂತಿ . " ಲೋ .. ! ದುರಹಂಕಾರಿ ಧುರ್ಯೋಧನಾ ... ಅಗ್ನಿ ಪುತ್ರಿ ದ್ರೌಪದಿಕ , ' ಚೇಡಿ ' ಮೋಣು ಅಪ್ಪಯಿಲೆ ಉಡ್ಘಾಸು ಅಸ್ಸ ಕೀ .. ? ಮಾತೃ ಸಮಾನ ದ್ರೌಪದಿಕ ಮಾನ ಹರಣ ಕೊರುಂಕ ಪ್ರಯತ್ನ ಕೆಲ್ಲೆಲೆ ನವೇ ..? ಏಕ ವಸ್ತ್ರ ಜಾವ್ನ್ ಅಷ್ಶಿಲಿ ಕುಲ ವಧುಕ ... ಮತ್ತೆ ಕೇಷ್ಟ ಧೋರಣ್ ದರ - ದರ ನೆ ... ಸೂಣೆ ಮ್ಹಣ್ಕೆ ತಾಂಡೂನ್ ಹಾಣು ನಗ್ನ ಕೊರುಂಕ ಪ್ರಯತ್ನ ಕೆಲ್ಲೆಲೆ ಉಡ್ಘಾಸು ಕರಿ ... ದುರಾತ್ಮಾ .. ! ಅತ್ತ , ತುಕ್ಕಾ ಧೂಳಿ೦ತು ತಂಡೂನ್ ದಿವಿಶಿ ಮಾರ್ತಾ ... ಝಾ೦ಗಿ ದಕ್ಕೋನ್ ಹಂಗ ಯೇವ್ನ್ ಬಯಿಸ ಮ್ಹಳ್ಳೆಲೆ .. ತ್ಯೆ ತುಗೆಲಿ ಝಾ೦ಗಿ ಪುಡ್ಡಿ ಕರ್ತಾ ... ! ಘೇ ಆನ್ನೇಕ ಪ್ರಹಾರು ... ! ತೇರಹ ವರುಷ ದ್ರೌಪದಿನ ಭೋಗ್ಗಿಲೆ ಮನೋ ವೇದನಾ ಅತ್ತಾ ಲೆಕ್ಕುನ್ - ಲೆಕ್ಕುನ್ ಜೀವು ಸೋಡಿ ... ತ್ಯೇ ಕೋಪಾ ಪರಿಣಾಮ ತುಗೆಲಿ ಝಾ೦ಗಿ ಮೊಡ್ಚ್ಯಾಕ ಕಾರಣ ಝಲ್ಲೆ ಪೊಳೆ .. ! ಆನ್ನೇಕ ಪೋಟಿ ... ಮಾಗಿರಿ ಆನ್ನೇಕ ಪೋಟಿ ಗಧಾ ಪ್ರಹಾರು ಕುರ್ಟಾರಿ .. ಝಾ೦ಗೇರಿ ಕೆಲ್ಲೆಲಿ ತಿತ್ಲೆ ಆನಂದ ಝಲ್ಲೆ ಭೀಮಾಕ . ' ಅಪ್ರಯೋಜಕ ಪಾಂಚ ಬಾಮ್ಮಣ೦ ಅಸ್ಸುನ್ ಕಿತ್ಯೆ ಪ್ರಯೊಜನ .. ? ಸಮರ್ಥ ಮಕ್ಕ ಎಕ್ಲೇಕ ಪೊಳೊನ್ ಘೇ ' ಮ್ಹಳ್ಳೆಲೆ , ತುಗೆಲಿ ಜೀಬ ಕತ್ತೊರ್ನ ಘಾಲ್ತಾ ಮೋಣು ದಾವೆ ಪಯ್ಯನ ಮಸ್ತುನ್ , ತೊಂಡಾರಿ ಮಾರ್ನ್ ರಗತ ವೊಂಕ್ಚೆ ತಶಿ ಕೆಲ್ಲೆ . ... ಅಯ್ಯೋ ... ಅಬ್ಬಾ ... ಆಹಾ .. ! ಏಕ್ - ಏಕ್ ಪೋಟಿ ಚೀತ್ಕಾರ ಕರ್ತನಾ ... ಭೀಮ ಸೇನಾ ಕ ಅನಿಕಯ್ ಉತ್ತೇಜನ ವಾಡ್ತಾಶಿಲೆ . ದೂರ ಬಯಿಸುನ್ ಯುದ್ಧ ಪೊಳೈತಾಲೊ ಬಲರಾಮಾಕ ಕೋಪು ಅಯಿಲೊ .ಹತ್ತಾ೦ತು ಹಲಾಯುಧ ಉಬ್ಬಾರ್ನ್ ಭೀಮ ಸೇನಾಕ ದಿವಿಶಿ ಮಾರುಂಕ ಮುಕಾರಿ ಆಯಿಲೊ . ಕೃಷ್ಣಾನ ಬಲರಾಮಾಲೆ ಹಾತು ಧೋರ್ನ್ ರಬ್ಬಾಯಿಲೆ . " ಕೃಷ್ಣಾ .. ! ಗಧಾ ಯುದ್ಧಾ೦ತು ನಾಭಿ ಸಕಲ , ಮಾರೂ ನಜ್ಜ ... ಮ್ಹಳ್ಳೆಲೆ ನಿಯಮ ಗೊತ್ತಸ್ಸುನ್ ಭೀಮ ಸೇನಾನ ಕುರ್ಟಾರಿ ಝಾ೦ಗೇರಿ ಮಾರ್ನ್ ಅನ್ಯಾಯು ಕೆಲ್ಲಾ . ಹಕ್ಕಾ ಹಾಂವ ಹಲಾಯುಧಾನಿ ದಿವಿಶಿ ಮಾರ್ತಾ " ಮ್ಹಳ್ಳಲೊ ಬಲರಾಮು . ಕೃಷ್ಣು ಭೀಮ ಸೇನಾಕ ಆಡ ಯೇವ್ನ್ ರಾಬ್ಲೊ ... " ಬಲರಾಮಾ .. ! ಹ್ಯೇ ದಾಯಾದಿ ಲೋಕಾಲೆ ಯುದ್ಧ .. ! ಭೀಮ ಸೇನಾ ಕ ದಿವಿಶಿ ಮಾರ್ಚೆ ಅಧಿಕಾರು ತುಕ್ಕಾ ಕಸಲೆ ಅಸ್ಸ .. ? ಹ್ಯೇ ದೊಗ್ಗ೦ಯಿ ಅಮ್ಗೆಲೆ ಮಾವಳ್ನಿಲೆ ಚೆರ್ಡು೦ವ ... ಅಮ್ಮಿ ಪ್ರೇಕ್ಷಕ ಜಾವ್ನ್ ಅಸ್ಸುಕಾ ... ಧುರ್ಯೋಧನಾನ ಕಿತ್ಲೆ ಕೀ ಅನ್ಯಾಯು ಕೆಲ್ಲಾ . ತ್ಯೇ ವೆಳ್ಯೇರಿ ತುಂವೇ ಏಕ ಪೊಟಿ ಪುಣಿ ಧರ್ಮ ಪಕ್ಷಪಾತಿ ಜಾವ್ನ್ ಧುರ್ಯೋಧನಾ ಕ ಶಿಕ್ಷ ದಿವ್ಚ್ಯಾಕ ಮುಕಾರಿ ಏನಿ . ಧುರ್ಯೋಧನಾಲೆ ಕೂರ್ಟು ಮೊಡ್ತಾ ಮೋಣು ಭೀಮ ಸೇನಾ ನ ತೇರ ವರುಷ ಫುಡೇಚಿ .. ಶಪಥ ಘಲ್ಲೆಲೆ ... ತ್ಯೆ ಶಪಥಾ ಪ್ರಕಾರ ತಾಣೆ ಕುರ್ಟಾ ಸಕಲ ಮಾರ್ನ್ ಯುದ್ಧ ಕೆಲ್ಲಾ ಹಂತು ಕಸಲೆಯ್ ಚೂಕಿ ನಾ " ಮ್ಹಳ್ಳಲೋ ಕೃಷ್ಣು . " ತೂ ಪಾಂಡವ ಪಕ್ಷ ಪಾತಿ ಕೃಷ್ಣಾ " ಮ್ಹಳ್ಳಲೊ ಬಲರಾಮು . " ಸಾಧಾರಣ ಲೋಕಾನಿ ಸಂಗ್ಚ್ಯೆ ತಶಿ ತೂ೦ವೈ ಸಂಘಲೇ ಬಲರಾಮಾ ... ! ಹಾಂವ ಧರ್ಮ ಪಕ್ಷಪಾತಿ . ತೀರ್ಥ ಯಾತ್ರೆಕ ಗೆಲ್ಲೆಲೆ ತೆದ್ನಾ .. ಕುರು ಪಾಂಡವ ಮಧ್ಯೆ ಝಲ್ಲೆಲೆ ವಿಷಯು ಬಲರಾಮಾಕ ವಿಸ್ತಾರ ಜಾವ್ನ್ ಸಂಘಲೆ . ಬಲರಾಮು ಶಾಂತ ಝಲ್ಲೋ .
ಪಾಂಡವ ವಿಜಯಿ ಜಾವ್ನ್ ಶಿಬಿರಾಕ ಅಯಿಲೆ . ಪಾಂಡವ ಶಿಬಿರಾಂತು ಸರ್ವ ಲೋಕು ವಿಜಯೋತ್ಸವ ಕರ್ತಾ ಅಶಿಲೀಂತಿ . ಕೃಷ್ಣಾ ನ ಅರ್ಜುನಾಕ ಅಪ್ಪೋನ್ " ಅರ್ಜುನಾ .. ! ತುಗ್ಗೆಲ್ ಗಾಂಡೀವ ಧನು , ಅಕ್ಷಯ ಬತ್ತಳಿಗಾ ರಥಾಂತು ಅಸ್ಸ .. ಶಸ್ತ್ರಾಸ್ತ್ರ ಘೆವ್ನ್ ಯೋ " ಮ್ಹಳ್ಳಲೊ . ಅರ್ಜುನಾನ ವೊಚ್ಚುನ್ ತಗೆಲೆ ಶಸ್ತ್ರಾಸ್ತ್ರ ರಥಾರಿ ದುಕೂನ್ ದೇವೈಲೆ ಸತಾನ ... ಅಗ್ನಿ ದೇವಾನಾ ದಿಲ್ಲೆಲೆ ಸ್ವರ್ಣ ರಥ ಧಗ - ಧಗ ನೆ ಉಜ್ಜೋ ಲಗ್ಗುನ್ ಜೊಳ್ಚ್ಯಾ ಶುರು ಝಲ್ಲೆ . " ಕೃಷ್ಣಾ ... ! ರಥಾ ಕ ಉಜ್ಜೊ ಲಗ್ಲಾ " ಮ್ಹಳ್ಳಲೊ ಅರ್ಜುನ್ . " ವಯ್ಯ್ ಅರ್ಜುನಾ ... ! ಕರ್ಣಾನ , ತುಗೆಲೆ ವೈರಿ ಪ್ರಯೋಗ ಕೆಲ್ಲೆಲೆ ದಿವ್ಯಾಸ್ತ್ರ ಶಕ್ತಿ ... ಹಾಂವೆ ಧೋರ್ನ್ ರಬ್ಬಯಿಲೆ . ಅತ್ತ ಯುದ್ಧ ಕಯಿದ ಝಲ್ಲಾ . ಹೇ ದಿವ್ಯ ರಥಾಚೆ ಕಾಮ ಝಲ್ಲೆ ... ಆನಿ ರತಾಚೆ ಅಗತ್ಯ ನಾ " ಮ್ಹಳ್ಳಲೊ ಕೃಷ್ಣು .
"ಕೃಷ್ಣಾ ! ವಾಸುದೇವಾ ! ಪುರುಷೋತ್ತಮಾ ! ಆಶ್ರಿತ ರಕ್ಷಕಾ ! ದೀನ ಜನ ಬಾಂಧವಾ ! ದೇವಾದಿ ದೇವಾ ! ಧರ್ಮ ಸಂಸ್ಥಾಪನಾಚಾರ್ಯಾ ! ... ತುಗೆಲೆ ಕೃಪೇನ . ತುಗೆಲೆ ರಕ್ಷೇನ ಅಮ್ಮಿ ... ಕುರುಕ್ಷೇತ್ರ ಯುದ್ದಾ೦ತು ವಿಜಯ್ ಜಾವ್ನು ಅಯಿಲೆಂತಿ " ಮೋಣು ಸಂಘುನ್ , ಪಾಂಡವ ಕೃಷ್ಣಾಲೆ ಪಯ್ಯಾರಿ ಪೊಣು ನಮನ ಕೆಲ್ಲೆ . ಕೃಷ್ಣಾ ನ ಎಕ್ಲೇ - ಎಕ್ಲೆ೦ಕಚಿ ಉಬ್ಬಾರ್ನ್ ಆಲಿಂಗನ ಕೊರ್ನ್ ಪ್ರೀತಿ ದಕ್ಕಯಿಲಿ . " ಧರ್ಮರಾಯಾ .. ! ಕುರುಕ್ಷೇತ್ರ ಯುದ್ಧಾ ಫುಡೆ .. ತುಗೆಲೆ ಅರ್ಜುನಾ ಕ ಮಿಗೆಲೆ ರಕ್ಷೇಕ ದಿಲ್ಲೆಲೆ . ಆಜಿ ತುಗೆಲೆ ಭಾವಾಕ ... ತುಕ್ಕಾ ರಕ್ಷೇಕ ದಿತ್ತಾ . ಆಜಿ ರಾತ್ರಿ ನ೦ಯೀಚೆ ಬದಿನ ವಾಸ ಕೆಲ್ಲೇರಿ ... ತೇರ ವರುಷಾ ಶನಿ ಪ್ರಭಾವ , ನಯಿಂಚಿ ಬದಿನ ವಾಸ ಕೆಲ್ಲೆಲೆ ನಿಮಿತ್ಯ ನಾಶ ಝತ್ತಾ ಮೋಣು ಸಾಂಗ್ತಾತಿ . ಹಾಂವಯ್ .. ತುಮ್ಗೆಲೆ ವೊಟ್ಟು ನ೦ಯಿಚೆ ಬದಿನ ವಾಸ ಕೋರು ಯೆತ್ತಾ ." ಮ್ಹಳ್ಳಲೊ ಕೃಷ್ಣು . ಕುರುಕ್ಷೇತ್ರ ಲಗ್ಗಿ ಅಷ್ಶಿಲೆ ' ಓಘವತಿ ' ಮ್ಹಳ್ಳೆಲೆ ನಂಯ್ಚೆ ಬದಿನ ವಾಸ ಕೊರ್ನ್ , ನಂಯಿತು ನಾಹ್ವನ್ ಎವ್ಯಾ ಮೋಣು .. ಸರ್ವ ನಂಯ್ಚೆ ದಿಕಾನ ಬಾರಸರ್ಲಿಂತಿ . ಯುದ್ಧ ಶಿಬಿರಾಂತು ಉಪ ಪಾಂಡವ , ದೃಷ್ಟ್ಯದ್ಯುಮ್ನ , ಶಿಖಂಡಿ ಮಾತ್ರ ಅಷ್ಶಿಲೀಂತಿ
ಸಂಜ್ವಾಳಾ ವೇಳು .... ಅಶ್ವಥ್ತ್ಥಾಮ , ಕೃಪಾಚಾರ್ಯ , ಕೃತವರ್ಮ ... ಧುರ್ಯೋಧನಾಕ ಸೊದ್ದಿತಾ ಚಿ ... ಕುರುಕ್ಷೇತ್ರ ಯುದ್ಧ ರಂಗಾಕ
ಅಯಿಲೀ೦ತಿ . ಯುದ್ಧ ರಂಗಾಂತು , ಏಕ ಮೋಣು ನಷ್ಟ ಝಲ್ಲೆಲೆ ರಥಾ ಲಗ್ಗಿ .... ಅಪ್ಣೆಲೆ ಮೃತ್ಯು ಕೆದ್ನಾ ಯೆತ್ತಲೇ ಮೋಣು ರಕ್ಕುನ್ ಅಷ್ಶಿಲೆ ಧುರ್ಯೋಧನಾ ಕ ಪೊಳೈಲೆ . ಭೀಮ ಸೇನಾಲೆ ಗಧಾ ಪ್ರಹಾರು , ಮಲ್ಲ ಯುದ್ಧಾ ಕುಸ್ತಿ ಪೆಟ್ಟು ಖಾವ್ನ್ , ಹಾಡ್ಡ್೦ ಮೋಣು ಘೇವ್ನ್ , ರಕ್ತಾ ಒಕ್ಕುಳಿ ಮಧ್ಯೆ ... ಜೀವಾ ಹಪ್ಕೋ ತಂಡುನ್ ತಂಡುನ್ ಆಖೇರಿ ಹಪ್ಕೋ ಏನಿಮೂ ... ನರಕ ಯಾತನ ಪಾವಚೆ ಧುರ್ಯೋಧನಾಕ ಪೊಳೈಲೆ . ಚಾಂಗ ಚರಿತ್ರ ನತ್ತಿಲೆ ಲಗ್ಗಿ ಮೃತ್ಯು ದೇವತಾ ತಾಂಯ್ ಲಗ್ಗಿ ಯೇನಾ ಮ್ಹಣತಾತಿ ... ಅಶ್ವಥ್ತ್ಥಾಮಾಕ ದೋಳೆ ಭೋರ್ನ್ ಅಯಿಲೆ ... " ಅಯ್ಯೋ .. ! ಧುರ್ಯೋಧನ ಚಕ್ರವರ್ತಿ .. ! ತುಕ್ಕ ಹ್ಯೀ ಸ್ತಿಥಿ ಕೀ ... ? " ತೋಂಡ ಪುಸ್ಸುನ್ ತಗೆಲೆ ಮತ್ತೇ ಕ ಧೋರ್ನ್ ಆಧಾರು ಕೆಲ್ಲೊ . " ಅಶ್ವಥ್ತ್ಥಾ... ಮಾ .. ! ಪಾಂಡ ... ವಾನಿ .. ಮಕ್ಕಾ ಅಧರ್ಮ ಜಾವ್ನ್ ಮಿಗೆಲೆಗಿ ಯುದ್ಧ ಕೆಲ್ಲೆ . ಗಧಾ ಯುದ್ಧ ನಿಯಮ ಬದಿನ ದೊವೊರ್ನ್ , ಭೀಮ ಸೇನಾನ ಮಿಗೆಲೆ ಝ೦ಗೀರಿ ಮಾರ್ನ್ ಅನ್ಯಾಯು ಕೆಲ್ಲೆ . ಹಾಂವ ನಿಸ್ಸಹಾಯಕು ಜಾವ್ನ್ ಅಸ್ತನಾ ... ದಾವೆ ಪಾಯ್ಯಾನಿ ಹರ್ದೇರಿ , ಮತ್ತೇರಿ ಮಸ್ತಿಲೆ ... ಆವಾಚ್ಯ್ ಶಬ್ಧಾನಿ ಮಿಗೆಲೆ ಅಪಮಾನ ಕೆಲ್ಲೆ ... " ಮೋಣು ಸಂಘುನ್ ದೊಳೆ ಉದ್ದಾಕ ಕಳ್ಳೆ . ಅಗ್ನಿ ಪರ್ವತಾ ಮ್ಹಣ್ಕೆ ... ಕೋಪಾನ ಉಠಾನ್ ರಾಬ್ಲೊ ಅಶ್ವಥ್ಥಾಮು . " ಧುರ್ಯೋಧನಾ .. ! ತ್ಯೆ ಅಧರ್ಮಿ ಪಾಂಡವಾಂಕ ಸ೦ಮ್ಮ ಶಿಕ್ಷಾ ದೀನಾಶಿ ಹಾಂವ ಸೋಣಾ .. ! ಭೀಷ್ಮ , ದ್ರೋಣ ,ಕರ್ಣ ತಂಗೇಲೆ ನಿಮಿತ್ಯ ಜಾಯ್ನಾಶಿ ಅಷ್ಶಿಲೆ ಕಾರ್ಯ ... ಹಾಂವ ಕೊರ್ನ್ ದಕ್ಕಯಿತಾ . ಪಾಂಡವಾಂಕ ನಾಶ ಕರ್ತಾ ... ದ್ರೋಣಾಚಾರ್ಯ ಗುರು ವೈರಿ ಆಣ .. ! ಕೊರ್ನ್ ಸಾಂಗ್ತಾ ... ತುಗೆಲೆ ಹ್ಯೇ ಸ್ಥಿತಿ ಕ ಕಾರಣ ಝಲ್ಲೆಲೆ ಭೀಮಾ ಕ ಹಾಂವ ಸೋಣಾ .. ! " " ಅಶ್ವಥ್ತ್ಥಾಮಾ ... ! ಪಾಂಡವಾನಿ ನಾಶ ಝಲ್ಲೆಲೆ ವಿಷಯು ಅಯಿಕುನ್ ಹಾಂವ ಜೀವು ಸೊಡ್ತಾ .. ! " ಮ್ಹಳ್ಳಲೊ ಧುರ್ಯೋಧನು ಪ್ರತೀಕಾರ .. ಕೊಪ್ಪಿಲೊ ಕಾಳಿ೦ಗುಸೊ ಉಠಾನ್ ರಾಬ್ಲೊ ಅಶ್ವಥ್ಥಾಮ್ . " ಧುರ್ಯೋಧನಾ ... ! ಹಾಂವ ವಾಪಾಸ್ ಯೆವ್ವೋ ತಾ೦ಯ್ ... ಮಿಗೆಲೆ ಖತಿರಿ ರಾಕ " ಮೋಣು ಸಂಘುನ್ ಅಶ್ವಥ್ತ್ಥಾಮಾ , ಕೃಪಾಚಾರ್ಯ ಆನಿ ಕೃತವರ್ಮ ಘೋಡೇರಿ ಚೋ ಣು ಪಾಂಡವ ಶಿಬಿರಾ ದಿಕಾನ ಗೆಲ್ಲೆ . ಅಶ್ವಥ್ತ್ಥಾಮಾನ ದೀವಟಿಕ ಲಾವ್ನ್ ಪಾಂಡವ ಶಿಬಿರಾಂತು ... ಪಾಂಡವಾ ಖತಿರಿ ... ಪ್ರತೀಕಾರ ಕೋರ್ಚ್ಯೆ ಪಿಶ್ಶೆ ವಾಗಾ ಮ್ಹಣ್ಕೆ ಸೊದ್ದುಂಕ ಶುರು ಕೆಲ್ಲೆ . ಎದ್ರಾಕ ದೃಷ್ಟದ್ಯುಮ್ನಕ ಪೊಳೈಲೆ . ನಿದ್ದೆಂತು ಅಷ್ಶಿಲೆ ದೃಷ್ಟದ್ಯುಮ್ನ ಕ ಪಯ್ಯಾನಿ ಮಾರ್ನು ಜಾಗಯಿಲೆ . ಉಠಾನ್ ರೇಬ್ಚ್ಯೇ ಭಿತರಿ .. ತಾಗೆಲ್ ಶಿರಹ ಛೇದನ ಕೆಲ್ಲೆ . ತಗೆಲ್ ರಗತ ಹತ್ತಾ ಧೋರ್ನ್ ... " ಪಿತೃ ದೇವಾ .. ! ಗುರು ದ್ರೋಣಾಚಾರ್ಯ .. ! ಅನ್ಯಾಯು ಜಾವ್ನ್ ತುಕ್ಕಾ ಸಂಹಾರು ಕೆಲ್ಲೆಲೋ ದ್ರಷ್ಟದ್ಯುಮ್ನಲೆ ರಕ್ತಾನ ತುಕ್ಕಾ ತರ್ಪಣ ದಿತ್ತಾ ... ! ತು ಖಂಚೆಯ್ ಲೋಕಾಂತು ಅಸ್ಲೆರಿಯೀ ತುಗೆಲೆ ಆತ್ಮಾ ಕ ಶಾಂತಿ ಮೇಳೋ " ಸುರ್ವೆಕ ಸ್ವಕಾರ್ಯ ... ಮಾಗೀರಿ ಸ್ವಾಮಿ ಕಾರ್ಯ .. ಆನ್ನೇಕ ಶಿಬಿರಾಂತು ದ್ರೌಪದಿ ಲೆ ಚೆರ್ಡು೦ವ .. ಪ್ರತಿವಿಂಧ್ಯಾ , ಶ್ರುತಸೋಮ , ಶ್ರುತ ಕೀರ್ತಿ , ಶತಾನಿಕ , ಶ್ರುತಸೇನಾ ಪಾಂಚ್ ಜನ ಉಪಪಾಂಡವ ನಿದ್ದೋ ನ್ ಅಶಿಲೀಂತಿ . ಅಶ್ವಥ್ತ್ಥಾಮಾ ನ ಪಾಂಡವ ಮೋಣು ಲೆಕ್ಕುನ್ .. ತಾಂಗೆಲೆ ಮತ್ತೆ೦ ಸರ ಸರನೆ ಕತ್ತೊರ್ನ ... ಪಾಂಚ ರುಂಡ ಏಕ ಅಂವ್ಗಲೆ೦ತ್ ಗುಟ್ಲಾನ್ ಪೊಟ್ಲಿ ಕೆಲ್ಲಿ . ಆನ್ನೇಕ ಶಿಬಿರಾಂತು ಶಿಖಂಡಿ ನಿದ್ದೋನ್ ಅಷ್ಶಿಲೊ ... ತಕಾಯಿ ಹ್ಯೀಚಿ ಗತಿ ದಕ್ಕಯಿಲಿ ಆಶ್ವಥ್ತ್ಥಾಮಾನ . ಪಾಂಡವ ಸೈನ್ಯ ಜಾಗೆ ಝಲ್ಲೆ .. ಶಿಬಿರಾಂತು ಜಾವ್ಚೆ ಹತ್ಯಾ ಪೊಳೊನ್ ಶಸ್ತ್ರಾಸ್ತ್ರ ಧೋರ್ನ್ ಹೆಕಡೆ ತೇಕಡೆ ಧಾಂವ್ತಾನಾ ... ಕೃತವರ್ಮಾನ ಆನಿ ಕೃಪಾಚಾರ್ಯಾನ , ಸೈನಿಕಾಂಕ ಕಾಳ್ಕಾಂತು , ಮಾಕ್ಷಿ ಮುಕಾರಿ ಪೊಳೈನಾಶಿ ಕತ್ತೋರ್ನ್ - ಕತ್ತೊರ್ನ್ ಘಲ್ಲೆ ನಿರ್ದಾಕ್ಷಿಣ್ಯ ಜಾವ್ನ್ . ಅಶ್ವಥ್ತ್ಥಾಮ ಶಿಬಿರ ದುಕೂನ್ ಬಾಯಿರಿ ಅಯಿಲೊ ... ಹತ್ತಾ೦ತು ಪಾಂಚ ರುಂಡ ಬಂಧಿಲೇ ಗಾಂಟಿ ಘೇವ್ನ್ .... " ಆ ಹ ಹಾಹಾ ಆ ಹಾಹಾ " ಗಹ ಗಹನಿ ಹಾಸ್ಲೊ . ಭಾಯಿರಿ ಯೆತ್ತಾನಾ .. ಶಿಬಿರಾಕ ಅಗ್ನಿ ಸ್ಪರ್ಶ ಕೊರುಂಕ ವಿಸರ್ನಿ . ತ್ಯೆಗ ಜನ ಕುರುಕ್ಷೇತ್ರ ಯುದ್ಧ ರಂಗಾ ಕ ಯೆವ್ನ್ " ಧುರ್ಯೋಧನಾ ಅಮ್ಮಿ ಗೆಲ್ಲೆಲೆ ಕಾಮ ಝಲ್ಲೆ . ಪಂಚ ಪಾಂಡವ ನಿರ್ನಾಮ ಝಲ್ಲಿ೦ತಿ ... ದಿವಿಶಿ ಮಾರ್ನ್ ತಾಂಗೆಲೆ ರುಂಡ ಹಳ್ಳಾ ಪೊಳೆ .. ! ... ಪೊಟ್ಲಿ ಸೊಡ್ವಾನ್ ರಕ್ತ ಮಯ ರುಂಡ , ಧುರ್ಯೋಧನಾಲೆ ಹತ್ತಾ೦ತು ದಿಲ್ಲೆ .... ! ಧುರ್ಯೋಧನಾನ ದೊಳೆ ಸೋ ಣು ಪೊಳೈಲೆ .. " ಅಶ್ವಥ್ತ್ಥಾಮಾ ... ! " ಕ್ರತಜ್ಞತಾ ಭಾವ ಧುರ್ಯೋಧನಾಲೆ ದೊಳೆ೦ತು ದಿಸ್ಲೆ .... ದುಕ್ಕಿನ ಜೀವು ಸೊಡ್ಚೆ ವೇಳು ... ಝಲ್ಲೆರಿಯೀ ... ಧುರ್ಯೋಧನಾಲೆ ತೊಂಡಾರಿ ಸಂತೋಷಾ ಹಾಸು ಅಯಿಲೊ ... ಆತ್ಮ ತೃಪ್ತಿ ಹಾಸು ... ವಿಜಯೀ ಹಾಸು ... ಕೃತಜ್ಞತಾ ಹಾಸು ... ತದಿಗೆ ಚಂದ್ರ ಪ್ರಕಾಶಾಂತು ತ್ಯೆ ರುಂಡ ಪಾಂಡವಾಲೆ ನಯ್ ಮೋಣು ಕಳ್ಳೆ ಧುರ್ಯೋಧನಾಕ . " ಗುರು ಪುತ್ರಾ ... ! ಹ್ಯೇ ಉಪಪಾಂಡವಾಲೆ ರುಂಡ ... ಮಿತ್ರಾ .. ! ಯಚ್ಚನಾ ಕಾಣುಕ್ಕಾ ... ಕೊಣಾಯ್ ಮಕ್ಕ ಇತ್ಲೆ ಸಂತೋಷು ದೀನಿ .... ಝಲ್ಲೆರಿಯೀ ತುಂವೆ ಮಿಗೆಲೆ ಮನ ಪ್ರಫುಲ್ಲಿತ ಕೆಲ್ಲಾ ... ಏಕ ಕ್ಷಣಾಕ ಮಿಗ್ಗೆಲೆ ಮನಾಕ ಸಂತೋಷು ಝಲ್ಲೆ . ಅಶ್ವಥ್ತ್ಥಾಮಾ ... !ಮಿಗೆಲೆ ಆನಮ್ಮ೦ಕ ಸಾಂಗ ... ಹಾಂವ ವೀರ ಮರಣ ಪಾವಲೋ ಮೋಣು ಸಾಂಘ ... ಮೊಣು ಸಾಂಗ್ತಾಚಿ ದೊಳೆ ಧ೦ಕ್ಲೆ ... ಶ್ವಾಸು ಬಂಧನ ಕೊರ್ನ್ ಜೀವು ತ್ಯಾಗ ಕೆಲ್ಲೊ . ಧುರ್ಯೋಧನಾಲೆ ಮರಣಾ ವೊಟ್ಟು ಮಹಾಭಾರತಾಚೆ ಅಠಾರಾ ದಿವಸು ಕುರುಕ್ಷೇತ್ರ ಯುದ್ಧ ಸಮಾಪ್ತ ಝಲ್ಲೆ . ಸಂಜಯ : " ಮಹಾರಾಜಾ ... ! ಅಷ್ಶಿ ಜವ್ವುನಜ್ಜ ಅಶಿಲೆ ... ! ರಾಜ ಕುಮಾರಾ ಕ ಇತ್ಲೆ ಹೀನಾಯ ಮರಣ ಆಯಿಲ್ ಮೂ ... ಮೋಣು ಸಂತಾಪು ಝತ್ತಾ .."
ದೃತರಾಷ್ಟ್ರ : " ಸಂಜಯಾ ... ವಿಜಯ್ ಝಲ್ಲೆಲೆ ಮಿಗೆಲೆ ಪಾಂಡವ ರತ್ನ ಅತ್ತಾ ಖಂಯ್ ಆಸ್ಸತಿ ... ? " ಉತ್ತರಾಂತು ಪ್ರತೀಕಾರ ಛಾಯ ದಿಸ್ಲಿ ಸಂಜಯಾಕ
ಉಮಾಪತಿ
No comments:
Post a Comment