MAHABHARATH
- Part 66 ( Konkani Bhashentu )
JALA
STHAMBHANA / ಜಲಸ್ತ೦ಭನ ... - ll
ಶ್ರೀ ಕೃಷ್ಣ ಸಮೇತ ಜಾವ್ನ್ , ಪಾಂಡವ ವೈಶಂಪಾಯನ ತಳೆ ಲಗ್ಗಿ ಅಯಿಲೀ೦ತಿ . ಘೊಡೆ ಪಯ್ಯಾ ನಿಶಾನಿ , ರಾಜ ಪಾದ ರಕ್ಷೆ ನಿಶಾನಿ .. ತಳೆ ದಂಡೇರಿ ಪೊಳೈಲೆ . ಧುರ್ಯೋಧನು ಹಂಗಾಚಿ ಅಸ್ಸ ಮೋಣು ಖಾತ್ರಿ ಝಲ್ಲಿ . " ಧರ್ಮರಾಯಾ .. ! ಧುರ್ಯೋಧನು ಹ್ಯೇ ತಳೆ೦ತ್ ಜಲಸ್ತ೦ಭನ ವಿದ್ಯಾ ಮಂತ್ರ ಮಹಿಮೆ ನಿಮಿತ್ಯ ಹಾಂಗಾ ನಿಪ್ಪೋನ್ ಬೊಸ್ಲೆ ಮ್ಹಣ್ಕೆ ದಿಸ್ತಾ ... ಹಂತು ಸಂಷಯು ನಕ್ಕಾ .... ಹಕ್ಕಾ ಧೊರ್ಚೆ ಕಷ್ಶಿ .. ? " " ಹಾಂವ ವೊಚ್ಚುನ್ ಧೋರ್ನ್ ಹಡ್ತಾ " ಮ್ಹಳ್ಳಲೊ ಭೀಮು . " ಆಗ್ನೇಯಾಸ್ತ್ರ ಸೋಣು ತಳೆ೦ತುಲೆ ಉದ್ದಾಕ ಅಟ್ಟಯಿತಾ " ಮ್ಹಳ್ಳಲೊ ಅರ್ಜುನ್ . " ಶಕ್ತಿ ಪ್ರಯೋಗಾ ನಿಮಿತ್ಯ ಪ್ರಯೋಜನ ನಾ ... ಅತ್ತ ಯುಕ್ತಿ ಪ್ರಯೋಗ ಕೋರ್ಕಾ ... ಜಲ ಸ್ಥ೦ಮ್ಭನಾ ವೆಳ್ಯೇರಿ ತಾಗೆಲ್ ಸುತ್ತು ಉದ್ದಾಕ ಫತ್ರಾ ಮ್ಹಣ್ಕೆ ಘಟ್ಟಿ ಝತ್ತಾ ... ತೆದ್ನಾ , ಜಲ ಚರ ಜೀವಿ ನಿಮಿತ್ಯ ಕಸಲೆಯ್ ಕಷ್ಟ ಜಾಯ್ನಾ . ತಳೆ೦ತು ದೇವ್ನ್ , ಧೋರ್ಚ್ಯಾಕ ಜಾಯ್ನಾ ತಾಕ್ಕಾ . ತ್ಯೋ ಮಹಾ ದುರಾಭಿಮಾನಿ .. ಮಸ್ತ ನಿಂದಾ ಕೋರ್ಕಾ ... ತಗೆಲೆ ಮನ ದುಕ್ಕೋಕಾ ... ನಿಷ್ಠುರ ಜಾವ್ನ್ ತಾಕ್ಕಾ ಅವಮಾನ ಜಾವ್ಚೆ ತಶೀ ತಗೆಲೆ ಮನ ದುಕ್ಕೊಕಾ . ಧರ್ಮರಾಯಾ ಕೆದನಾಯ್ ಕೋಣಾಕಯ್ ಯೆದೊಳ್ ತಾಯ್ ನಿಂದನ ಕರ್ನಾ ನಾತ್ತಿಲೆ ಮ್ಹಣ್ಕೆ .. ತಾಕ್ಕಾ ತುವೆಂಚಿ ನಿಂದನ ಕೋರ್ಕಾ " ಮೋಣು ಕೃಷ್ಣಾನ ವಾಟ ದಕ್ಕಯಿಲಿ . ಧರ್ಮಜಾನ ನಿಂದಾ ಶುರು ಕೆಲ್ಲೆ ... " ಧುರ್ಯೋಧನಾ ... ! ಮಹಾ ವೀರ ಮೋಣು ಸರ್ವ ಲೋಕು ಮಾನ್ಯತಾ ದಿತ್ತಾತಿ .... ಕುರು ಕುಲ ಚಕ್ರವರ್ತಿ ತೂ .. ರಾಜ ರಾಜೇಂದ್ರ ತೂ .. ಅಖಂಡ ಭಾರತಾಚೆ ಸಾರ್ವಭೌಮ ತೂ ... ಇತ್ಲೆ ನಾವಾ ದೀಕು ಚಕ್ರವರ್ತಿ .. ಅಷ್ಶಿ ಜೀವಾ ವೈರಿ ಆಶೇನ ನಿಪ್ಪೋನ್ ಬೋಸ್ಲಾಮು ತೂ ... ! ತುಕ್ಕ ಧೈರ್ಯ ಶಾಲಿ ಮೋಣು ಕೋಣ್ ಸಾಂಗ್ತಾ .. ? ತೂ ಬರೀ ಪುಕ್ಕಾ ತೂ ... ಯುದ್ಧ ಕೊರುಂಕ ಗೊತ್ನಾ ನಾತ್ತಿಲೊ ... ಗುರು ದ್ರೋಣ .. ಗುರು ಬಲರಾಮಾಕ ಅವಮಾನ ಕೆಲ್ಲೆ ಲೆ ಶಿಷ್ಯ ತೂ ... ತುಗ್ಗೆಲ್ ಖತಿರಿ .. ತುಗೇಲ್ ಹಠಾ ನಿಮಿತ್ಯ ... ಭೀಷ್ಮ , ದ್ರೋಣ , ಬಾಹ್ಲಿಕ , ಸೊಮದತ್ತ , ಭೂರಿಶ್ರವ , ಕರ್ಣ . ದುಃಶ್ಶಾಸನ ಶಂಬರಿ ಬಂವ್ಡಾನಿ .. ತುಗ್ಗೆಲ್ ಖತಿರಿ ಜೀವು ಸೊಳ್ಳೋ . ಇಕ್ರಾ ಅಕ್ಷೋಹಿಣಿ ಸೈನ್ಯ ಯುದ್ಧ ರಂಗಾಂತು ಪ್ರಾಣ ಸೊಳ್ಳೆ ... ಅಜಿ ತೂ ... ತುಗ್ಗೆಲ್ ಎಕ್ಲೇಲೆ ಜೀವು ವಾಂಚೊಚೆ ಖತೀರಿ ... ರಣ ಪುಕ್ಕಾ ಜಾವ್ನ್ ಅಷ್ಶಿ ನಿಪ್ಪೋನ್ ಬೊಸ್ಲಾ ಮೂ ... ಛಿ .. ತುಗ್ಗೆಲ್ ಜನ್ಮಾ ... ತುಕ್ಕಾ ಲಜ್ಜಿ ಕರ್ನಾ .. ? ಯುದ್ಧ ನಕ್ಕ .. ನಕ್ಕಾ ಮೋಣು ಹಾಂವೆ ಕಿತ್ಲೆ ಪೋಟಿ ಸಂಘುನ್ ದೀವ್ನ್ ಪೆಟಯಿಲ್ ತೆದ್ನಾ .. ಯುದ್ಧ ಜಾವ್ಕಾ ಮೋಣು ರಾಜ ಸಭೆ೦ತು ಆರ್ಭಟ ಕೆಲ್ಲೆಲೆ ಮೂ ತುಂವೇ .. ! ವಿಸೋರ್ಲೊ ವೇ .. ? ಅತ್ತ ಕಸಲೆಕ ನಿಪ್ಪೋನ್ ಬೋಸ್ಲಾ .. ? ಜೀವಾ ಆಶಿ ಅಸ್ಲೆರಿ ಮಿಗೆಲೆ ಪಯ್ಯಾರಿ ಪೋಣು ಜೀವ ದಾನ ಕೋರ್ಕಾ ಮೋಣು ಮಾಗ . ಹಾಂವ ತುಕ್ಕಾ ಜೀವ ದಾನ ಕರ್ತಾ ... ಯೋ ಭಾಯಿರಿ ಯೋ .. ! ಇತ್ಲೆ ಜೀವಾ ವೈರಿ ಆಶಿ ಅಷ್ಶಿಲೊ ... ಮಿಗೆಲೆ ರಾಯಭಾರಿಕ ಕಸಲೆಕ ತಿರಸ್ಕಾರ ಕೆಲ್ಲೆ .. ? ಪಾಂಚ ಪಟ್ಟಣ ದಿಲ್ಲೇರಿ ಪೂರೋ ಮೋಣು ನೀ೦ಮಗಿತನಾ ... ಸೂವೇ ಮೊನ್ನೇ ತಿತ್ಲೆ ಜಾಗೊ ದೀನಾ ... ಸಾಧ್ಯ ಅಸ್ಲೆರಿ ಕ್ಷತ್ರಿಯಾ ಮ್ಹಣ್ಕೆ ಯುದ್ಧ ಕೊರ್ನ್ ರಾಜ್ಯ ಸಂಪಾದನ ಕರಿ ಮ್ಹಳ್ಳಲೋ ತೂ .. ಆಜಿ ... ಥೂ ... ಚಿ ಛಿ ಛಿ .. ತುಗ್ಗೆಲ್ ಜನ್ಮಾಕ ಧಿಕ್ಕಾರ ಧಿಕ್ .. ತೂ ಕುಲನಾಶಕ ... ಮಹಾಪಾಪಿ ... ಷಂಢ ತೂ ... ಭಂಢ ದ್ರೋಹಿ ... ಷಂಢ ಪುರುಷತ್ವ ನಾತ್ತಿಲೊ ಪಾಖಂಡಿ .. ಕಸಲೆ ನಮುನೆ ಪುರುಷ ತೂ ... ಸರ್ವಾಂಕ ಮೋಸು ಕೆಲ್ಲೆಲೋ .. ಧೈರ್ಯ ನಾತ್ತಿಲೊ ... ಕುರು ರಾಯು ಕೀ ತೂ .. ? ಯೋ ಭಾಯಿರಿ ಯೋ .. ! "
ಧರ್ಮಜಾನ ತಳೆ ದಂಡೇರಿ ರಬ್ಬುನ್ ... ಕರ್ಣ - ಖಠೊರ ಉತ್ರಾನಿ ನಿಂದಾ ಕರ್ತಾನಾ ... ಉತ್ಕಾಂತು ಅಶಿಲೆ ಧುರ್ಯೋಧನ್ ಏಕ್ ಪೋಟಿ ಹುಮೇಲೊ ... ಮನಾ ಸಂಕಟ ಝಲ್ಲೆ .. ತ್ಯೆ ಬದಿನ ದುಕುನ್ ಹ್ಯೇ ಬದಿಕ ಘು೦ವಲೋ . ರೋಷ ಯೇವ್ನ್ .. ಸುಳಿ ಘು೦ವಲೋ .. ದಾಂತ ಚಬ್ಲೆ... " ಧುರ್ಯೋಧನಾ .. ! ಅಭಿಮನ್ಯು ಕುಮಾರಾಕ , ತುಮ್ಮಿ ಸರ್ವ ಜನಾನಿ ವೊಟ್ಟು ಜಾವ್ನ್ , ಅಧರ್ಮ ರೀತ್ಯೇರಿ ಹತ್ಯಾ ಕೆಲ್ಲೆ ಮ್ಹಣ್ಕೆ .. ಅಮ್ಮಿ ಸರ್ವ ಮೆಳ್ನ್ ತುಕ್ಕಾ ದಿವಿಶಿ ಮಾರ್ತಾತಿ ಮೊಣು ಭಂಯ್ಯ ಕೀ .. ? ಆಮ್ಗೆಲೆಂತು ಕೊಣಾಯ್ ಎಕ್ಲೇಲೇ ವೊಟ್ಟು ... ತೂ೦ಚಿ ಯುದ್ಧಾ ಕ ವೇಂಚಿ ... ಎಕ್ಲೆಲೆ ವೊಟ್ಟು ಯುದ್ಧ ಕೊರ್ನ್ ವಿಜಯಿ ಝಲ್ಲೇರಿ ... ಸಮಸ್ತ ರಾಜ್ಯ ತುಕ್ಕಾ ಸೋಣು ದಿತ್ತಾ ... ಯೋ .. ಭಾಯಿರಿ ... ಯೋ .. ! ತುಂವೇ ಭಾಯಿರಿ ಯೇನಾ ಝಲ್ಲೆರಿ ... ಅಮ್ಮಿ ಸೋಣು ವತ್ತಾತಿ ಮ್ಹಳ್ಳೆಲೆ ತುಗೆಲಿ ಆಶಾ ಫಟ್ಟಿ ... ತಳೆ ಉದ್ದಾಕ ಅಟ್ಟೋನ್ , ತುಕ್ಕಾ ಧೋರ್ನ್ ... ಸೂಣೆ ಮ್ಹಣ್ಕೆ ದಿವಿಶಿ ಮಾರ್ತಾತಿ . ಯೋ .. ಭಾಯಿರಿ " ಕೃಷ್ಣಾಲೆ ದೊಳೆ ಸನ್ನಿ ಪ್ರಕಾರ .. ಭೀಮ ಸೇನಾನ ತಳೆ ದಂಡೇರಿ ರಬ್ಬುನ್ ಧುರ್ಯೋಧನಾ ಕ ಅವಮಾನ ಕೊರ್ಚ್ಯಾ ಶುರು ಕೆಲ್ಲೆ .
" ಲೋ ಕುರ್ಡೇಲ್ ಪುತ್ತಾ ... ! ಹಾಂವ ಭೀಮ ಸೇನಾ .. ತೂ ಮೀಶಿ ಅಷ್ಶಿಲೆ ದರ್ಲೊ ಮನುಷ್ಯ್ ಝಲ್ಲೇರಿ ಉಠಾನ್ ಭಾಯಿರಿ ಯೋ ... ! ದುಃಶ್ಯಾಸನಾ ಮಾರ್ಲೆ ಮ್ಹಣ್ಕೆ .. ತುಕ್ಕಾಯಿ ಗಧೆ ನ ಮಾರ್ನ್ ತುಗೆಲೆ ಹಡ್ಡ೦ ಪುಡ್ಡಿ ಕರ್ತಾ ... ಉಠಾನ್ ಭಾಯಿರಿ ಯೋ ... ಷಂಢಾ . ಲೋ ಬರಡಾ .. ! ಲೋ ಜರಡಾ ... ! ಹ್ಯೇ ತಳೆ೦ತು ಕಸಲೇ ... ? ತೀನಿ ಲೋಕಾಂತು ತೂ ಖಂಯಿ ನಿಪ್ಪೋನ್ ಬೊಸ್ಲೆರಿ .. ಹ್ಯೋ ಭೀಮು ತುಕ್ಕಾ ಸೋಣಾ ... ತುಗೆಲೆ ಮರಣ ಪೊಳೈನಾಶಿ ಹಾಂವ ನಿದ್ದ ನಾ ... ಬುದ್ಧಿ ನಾತ್ತಿಲೆ ಭಂಢಾ ... ಯೋ .. ಮಿಗೆಲಿ ಶಕ್ತಿ ತುಕ್ಕಾ ದಕ್ಕಯಿತಾ ... ಕೊಬ್ಬಾ ಝೊಲ್ಲೋ ಪಿಳ್ಳೆ ಮ್ಹಣ್ಕೆ .. ತುಗೆಲೆ ಹಡ್ಡ೦ ಪಿಳ್ತಾ ಯೋ .... ತುಗೆಲೆ ಹಡ್ಡ೦ ಪಟ- ಪಟನೆ ಮೋಣು ಪೀಟ ಕರ್ತಾ ... ತುಗೆಲೆ ಬಪ್ಸುಕ ಪಿಂಡ ಘಾಲ್ತಾಲಿ ಕೊಣಯಿ ಮೆಳ್ತಲಿ ನಾಶಿ ಕರ್ತಾ ... ಲೋ ಷಂಢಾ .. ! ದಂಡಾ ! ಪಿಂಡಾ ! ಭಂಢಾ ! ನಿಕೃಷ್ಟ ದುರಾತ್ಮಾ .. ! ದುರಹಂಕಾರಿ ..! ದುರ್ಬುದ್ಧಿ ಧುರ್ಯೋಧನಾ .. ! ಉಠಾನ್ ಯೋ .. " ಮೋಣು ಸಂಘುನ್ ಜಾಂಘಿ ಮಾರ್ನ್ ಯುದ್ಧಾಕ ಆಮಂತ್ರಣ ಕೆಲ್ಲೆ ಭೀಮ ಸೇನಾನ . ಭೀಮ ಸೇನಾಲೆ ಉತ್ತರಾಂಕ ... ಧುರ್ಯೋಧನ್ ರೋಷ ಯೇವ್ನ್ ಸಮಾಧಿ ದುಕೂನ್ ಭಾಯಿರಿ ಅಯಿಲೊ . ಉತ್ಕಾಂತ ಪೊಳ್ಳೋಲೊ ಮದ ಗಜ ಮ್ಹಣ್ಕೆ ಉಠೈಲೊ ಧುರ್ಯೋಧನು . ಶ್ರೀ ಕೃಷ್ಣಾಕ , ಭೀಮ ಸೇನಾಕ ಪೊಳೊನ್ .. ಏಕ ಪೊಟಿ ಸಿಂಹ ಘರ್ಜನ ಕೆಲ್ಲಿ . ತಾಗೆಲ್ ದೊಳೆ೦ತು ಲವ ಲೇಶ ಭಂಯ್ಯಾ .. ಛಾಯ ದಿಸ್ಸನಿ . ಗಧಾ ಖ೦ದೇರಿ ದೊವೊರ್ನ್ ಪಾಂಡವಾಂಗೆಲೆ ಎದ್ರಾಕ ಯೇವ್ನ್ ರಬ್ಬಲೋ .
" ಯುಧಿಷ್ಟಿರಾ .. ! ಹಾಂವ ಏಕ್ಲೊಚಿ ಝಲ್ಲೋ ಮೋಣು .. ದುಃಖಾ ನಿಮಿತ್ಯ ... ಪ್ರಾಣ ಭಯಾ ನಿಮಿತ್ಯ ... ಯುದ್ಧ ಭಯಾ ನಿಮಿತ್ಯ ಹ್ಯೇ ಸರೋವರಾಂತ್ ನಿಪ್ಪೋನ್ ಬೊಶಿಲೊ ನಯ್ . ಹ್ಯೇ ಆಟ್ರ ದಿವಸ ಯುದ್ಧಾ೦ತು .. ಏಕು ದಿವಸು ಪುಣಿ ತೂ೦ವೆ ಧರ್ಮ ಯುದ್ಧ ಕರ್ನಿ . ಶಿಖಂಢಿ ಮುಕಾರಿ ದೊವೊರ್ನ್ .. ಭೀಷ್ಮ ಪಿತಾಮಹಾ ಕ ನೆಲಾರಿ ಘಾಲ್ಲೊ ... ಆಶ್ವಥ್ತ್ಥಾಮಾಲೆ ಮರಣ ಝಲ್ಲೆ ಮೋಣು ಫಟ್ಟಿ ಸಂಘುನ್ ದ್ರೋಣಾಚಾರ್ಯಾಲೆ ವಧಾ ಕೆಲ್ಲೆ ... ನಿರಾಯುಧ , ರಥಹೀನ ಜಾವ್ನ್ ಅಶಿಲೆ ಮಿಗೆಲೆ ಮಿತೃ ಕರ್ಣಾಕ ದಿವಿಶಿ ಮಾರ್ಲೆ . ಮಕ್ಕಾ ಯುದ್ಧಾ ಭಂಯ್ಯ್ ನಾ . ಝಲ್ಲೇರಿ ತುಮ್ಗೆಲೆ ಅಧರ್ಮ ಯುದ್ಧ ... ಕುಹಕಿ ಯುದ್ಧಾ ಕ ಭಿತ್ತಾ ... ಮಿಗೆಲೆ ಸರ್ವ ಬಂಧು ಲೋಕಾಂಕ ಕಾಣ್ ಘೆತ್ಲೆ ನಂತರ ... ಹಾಂವೆ ಎಕ್ಲೆನ ಚಿ .. ವಾಂಚುಕಾ ಮ್ಹಳ್ಳೆಲೆ ಆಶಿ ನಾ "
" ಧುರ್ಯೋಧನಾ ... ! ತುಗೆಲೆ ತೊಂಡಾಂತು .. ಧರ್ಮು , ನ್ಯಾಯು , ನೀತಿ ಶಬ್ದ ಅಯಿಕತಾನಾ ... ಮಕ್ಕಾ ಆಶ್ಚರ್ಯ ಝತ್ತಾ . ಬಹುಷಃ ಮೊರ್ಚೆ ಫುಡೆ ಧರ್ಮಾ ವಿಷಯು ಉಡ್ಘಾಸು ಅಯಿಲಾ ದಿಸ್ತಾ .. ! ಭೀಮ ಸೇನಾಕ ವಿಷ ಖಾವ್ವೊ ನ್ ಉತ್ಕಾಂತ ಘಾಲ್ತಾನಾ ... ಲಾಕ್ಷಾ ಗೃಹಾಂತು ಅಂಮ್ ಕಾ ಸರ್ವಾಂಕ ಲಾಸ್ಸುನ್ ದಿವಿಶಿ ಮಾರ್ಕಾ ಮೋಣು ಲೆಕ್ತಾನಾ .... ಮಾಯಾ ದ್ಯೂತ ಖೇಳ್ನು ಆಮ್ಗೆಲೆ ರಾಜ್ಯ ವಂಚನಾ ಕೆಲ್ಲೆಲೆ ತೆದ್ನಾ ... ಭರ್ಲೆಲೆ ರಾಜ ಸಭೆ೦ತು ದ್ರೌಪದಿಕ ತಂಡುನ್ ಹಾಣು ಅವಮಾನ ಕರ್ತನಾ ... ಅಭಿಮನ್ಯು ಕುಮಾರಾಕ , ತುಮ್ಮಿ ಸರ್ವಾನಿ ಮಾಕ್ಷಿ ದುಕೂನ್ ಪ್ರಹಾರು ಕೊರ್ನ್ ದಿವಿಶಿ ಮಾರ್ತಾನ ... ಧರ್ಮು ನ್ಯಾಯು , ನೀತಿ ಉಡ್ಘಾಸು ಏನಿ ಕೀ ... ? ಅತ್ತ ತುಗೆಲಿ ಅವಸ್ಥಾ ಪೊಳೈತಾನಾ ಮಕ್ಕ ಲಜ್ಜಿ ಕರ್ತಾ . ಅಂಮ್ ಕಾ ಇಂದ್ರಪ್ರಸ್ಥ ಪೂರೋ .. ಹಸ್ತಿನಾವತಿ ರಾಜ್ಯ ತೂ೦ಚಿ ದವೋರ್ನ್ ಘೆ ... ತೂ , ಧರ್ಮಾರಿ ನ್ಯಾಯ ಪಾಲನಾ ಕರಿ .. ಮೋಣು ಸಂಘಿಲ್ ತೆದ್ನಾ .. ಕಿತ್ಲೆ ಅಹಂಕಾರಾರಿ ಛಿ ಮಾರಿ ಘಲ್ಲೆ .. ? "
" ಧರ್ಮರಾಯಾ ... ! ಹಾಂವ ಕುರು ವಂಶಾ ಕ್ಷತ್ರಿಯ .. ಮಕ್ಕಾ ಅಮ್ಗೆಲೆ ವಂಶಾ ಅಭಿಮಾನ ಅಸ್ಸ .. ಮಿಗೆಲೆ ಭುಜ ಬಲಾನ ಸಂಪಾದನ ಕೊರ್ನ್ ಮೆಳ್ಳೆಲೆ ರಾಜ್ಯ ಪೊಳೋನ್ ಘೇತ್ತಾ ವಿನಃ ... ಅಷ್ಶಿ ತೂ೦ವೆ ದಿಲ್ಲೆಲಿ ಭಿಕ್ಷಾ ನಕ್ಕಾ ಮಕ್ಕಾ . ದುಸ್ರೆಲೆ ದಯಾ ದಾಕ್ಷಿಣ್ಯ ಘೇವ್ನ್ ವಾಂಚುನ್ ವೊರ್ಚೆ ಆಶಿ ನಾ ಮಕ್ಕಾ . ಅತ್ತ ಹಾಂವ ಎಕ್ಲೊ .. ತುಂಮ್ಕಿ ಧಾಹ್ ಜನ ಆಸ್ಸತಿ ... ಅತ್ತ ಪುಣಿ ಧರ್ಮಾರಿ ಮಿಗೆಲೇಗಿ ಯುದ್ಧ ಕರ್ಯಾತಿ .. ಮಕ್ಕ ತಿತ್ಲೆ ಪೂರೊ . ಮಿಗೆಲೆ ಆಗರ್ಭ ಶತ್ರು ಭೀಮಸೇನಾ ... ಹಾಂವ ತಗೆಲೆ ಯುದ್ಧ ಕೋರ್ಕಾ ಮೋಣು ಲೆಕ್ತಾ . ಜಯ ... ವಿಜಯ ಆಮ್ಗೆಲೆ ದೋಗ್ ಜನಾ ಮಧ್ಯೆ ಜಾವ್ಚೆ ಯುದ್ಧಾ೦ತು ನಿಶ್ಚಯ ಝವ್ವೊ . ಭೀಮಾ ಕ ಸೊಳ್ಳೇರಿ ಬಾಕಿ ತುಮ್ಮಿ ... ಗಧಾ ಯುದ್ಧಾ೦ತು ಮಕ್ಕಾ ಸಮಾನ ನಯ್ಯ್ . ಜಲ್ಲೇರಿ ಯುದ್ಧ ... ಕುರುಕ್ಷೇತ್ರ ಯುದ್ಧ ಭೂ೦ಯಿಚೇರಿ ಜಾವ್ಕಾ " ಮ್ಹಳ್ಳಲೊ ಧುರ್ಯೋಧನ . " ಜವ್ವೋ ತುಂವೆ ಲೆಕ್ಕಿಲೆ ತಶೀಚ್ಯಿ ಯುದ್ಧ .. ಕುರುಕ್ಷೇತ್ರ ಯುದ್ಧ ರಂಗಾಂತು ಜವ್ವೋ " ಮ್ಹಳ್ಳಲೊ ಧರ್ಮಜ . ಸರ್ವಾನಿ ಕುರುಕ್ಷೇತ್ರ ದಿಕಾನ ಪ್ರಯಾಣ ಕೆಲ್ಲೆ
ಉಮಾಪತಿ
No comments:
Post a Comment