Mahabharath  Part - 65   ( konkani Bhashentu )

Jala sthambhana  / ಜಲ ಸ್ಥ೦ಮ್ಭನ  

                       "' ಸಂಜಯಾ ..! ಸಾಂಘ ... ಧುರ್ಯೋಧನ ಖಂಯಿ ಮೋಣು ಸಾಂಘ ... ಖಂಯಿ ವೊಚ್ಚುನ್ ಅಶ್ಚ್ಯಾ ಪೂರೊ ಮೋಣು ಸಾಂಘ ... ಹ್ಯೇ ಯುದ್ಧಾ೦ತು ಮಿಗೆಲೆ ಶಂಬರಿ ಜನ ಪುತ್ರಾ೦ಕ ಕಾಣ್ ಘೆತ್ಲೆ .. ಹ್ಯೇ ಶಂಬರಿ ಜನ ವಿಧವೈಲೆ ಸುನ್ನಾ೦ಕ ಕಷ್ಶಿ ಸಮಾಧಾನ ಕೊರ್ಚೆ .. ? ಪಿಂಡ ಪ್ರದಾನ ಕೊರುಂಕ ಮಿಗೆಲೆ ಎಕ್ಲೊಯ್ ಪೂತು ವಾಂಚುನ್ ವರ್ನಿ .. ಸಂಜಯಾ ... ! ಧುರ್ಯೋಧನ್ ಆತ್ಮ ಹತ್ಯಾ ಕೊರುಂಕ ಬಿನಿ ಭಾರಸರ್ನಿ ನವೇ ... ? " 

ಸಂಜಯ : " ಹಾಂವ ಶೀಘ್ರ ಜಾವ್ನ್ ಮಿಗೆಲೆ ಮನೋ ಶಕ್ತಿನ ತಗೆಲೇ ವೊಚ್ಚುನ್ ಯೆವ್ವೋ ವೇ .. ಮಹಾರಾಜಾ .. ? " ಸಂಜಯಾನ ನಿಂಮ್ಗಿಲೆ  . " ಧುರ್ಯೋಧನ ಮಹಾರಾಜಾನ ಎದ್ರಾ ಕ ಮೆಳ್ಳೇರಿ ಕಸಲೆ  ಮೋಣು ಸಾಂಗ್ಚೆ ಪ್ರಭೂ ... ? "

ದೃತರಾಷ್ಟ್ರ : " ಧುರ್ಯೋಧನಾ ಕ ಸಾಂಘ ಸಂಜಯಾ .. ! ಹಾಂವೆ ಸಾಂಘಲಾ  ಮೋಣು ಸಾಂಘ .. ಧುರ್ಯೋಧನ ಚಕ್ರವರ್ತಿ ... ! ಮಹಾ ಧೈರ್ಯಶಾಲಿ ತೂ .. ಮಹಾ ಆತ್ಮಾಭಿಮಾನಿ ತೂ .. ಅಧೈರ್ಯ ಜಾವ್ನ್ ಕೆದನಾಯ್ ಆತ್ಮಾಹುತಿಕ ಪ್ರಯತ್ನ ಕೋರ್ನುಕ್ಕಾ ಪುತಾ .. ! ತುಂವೆ ಅತ್ತ ಸಹಮತಿ ದಿಲ್ಲೇರಿ ... ಧರ್ಮರಾಯಾಕ ಸಂಘುನ್ ಹಸ್ತಿನಾವತಿ ತುಕ್ಕಾ ದಿವೈಶಿ ಕರೈತಾ ಪುತಾ .. ! ಏಕ ಪೋಟಿ ... ಹಸ್ತಿನಾವತಿಕ ಯೋ ಬಾಳಾ .. !ಅತಂತ್ರ ಜಾವ್ನ್ ಅಷ್ಶಿಲೆ ತುಗ್ಗೆಲ್ ಆನಮ್ಮಾ೦ಕ ಪೋಳೋಚ್ಯಾಕ ಏಕ ಪೋಟಿ ಯೋ ಬಾಳಾ .. ! ಮೋಣು ಸಾಂಘ ಸಂಜಯಾ ... ಧ್ರತರಾಷ್ಟ್ರಾಲೆ ಮನೋ ಪೀಡಾ ಪೊಳೊನ್ ಸಂಜಯಾಕ ದೊಳೆ ಬೋರ್ನ್ ಅಯಿಲೆ.                         

            ಧುರ್ಯೋಧನ ಕುರುಕ್ಷೇತ್ರ ಭೂಯಿ ಸೋಣು ... ಮನಾ ಸಮಾಧಾನೆ ಖತಿರಿ ವೈಶಂಪಾಯನ ಸರೋವರ ಲಗ್ಗಿ ಅಯಿಲೊ . ರಥ ಮಸ್ತ ದೂರ ದೊವೊರ್ನ್ , ಸಕಲ ದೇವ್ನ್ ಗಧಾ ದಂಡ ಹತ್ತಾ  ಧೋರ್ನ್ , ಚಾಟಿನ ಘೊಡೆಂಕ ಏಕ ಮಾರು ದಿಲ್ಲೆ ಸತಾನ .. ಘೊಡೆ ರಥ ಘೇವ್ನ್ ದೂರ ಧಾಂವ್ಲೆ . ಚಂಮ್ಕುನ್ , ಧುರ್ಯೋಧನು ಎಕ್ಲೊಚಿ ಆಲೋಚನಾ ಕರ್ತಾಚಿ ಸರೋವರಾ ಲಗ್ಗಿ ಅಯಿಲೊ ... " ಅಯ್ಯೋ ..! ವಿಧಿ ವೈಚಿತ್ರ ಕೀ ..! ಜೀವನಾಂತು ಕಸಲೆ ಶಾಶ್ವತ ಜಾವ್ನ್ ಅಸ್ಸ .. ? ಏಕ ಕ್ಷಣಾಚೆ ವೈಭವ ಅತ್ತ ನಾ ಝಲ್ಲೆ ಮೂ .. ! ಇಕ್ರಾ ಅಕ್ಷೋಹಿಣಿ ಸೈನ್ಯ ವಂದಿ ಮಾಗದ ಸ್ತುತಿ ಮಧ್ಯೆ ಭಂವ್ದಾಂಗೆಲೆ ವೊಟ್ಟು , ಬಂಧು ಮಿತ್ರಾ೦ಕ ಘೇವ್ನ್ ಕುರು ಕ್ಷೇತ್ರ ಯುದ್ಧ ಭೂಮಿಕ ಆಯ್ಯಿಲೋ ಕುರು ಸಾರ್ವಬ್ಹೌಮ ... ಆಜಿ ಎಕ್ಲೊಚಿ  ಜಾವ್ನ್ .. ಪರಿಚಾರಕ ಲಗ್ಗಿ ನಾಶಿ .. ನಿರಾಶೆ ಜಾವ್ನ್ .. ಹೃದಯಾಂತು ದುಃಖ ಬೋರ್ನ್ , ಸಂತಾಪು ಪಾವ್ನ್ , ಪರಾಜಯ ಜಾವ್ಚೆ ವೇಳು ರಾಕ್ತಾಚಿ ... ಮಂಥಾರೋ ಸಿಂಹು ಶೀ .. ಹಳೂ ಮುಕಾರಿ ವತ್ತಾ ಅಸ್ಸ . ಹ್ಯೇ  ವಿಧಿ ಖೇಳು ನಾತ್ಲೆರಿ ಕಸಲೇ .. ? ಅಯ್ಯೋ ಕುರು ಸಾರ್ವ ಬ್ಹೌಮ ... ಖಂಯ್ ಗೆಲ್ಲೆ ತುಗ್ಗೆಲ್ ಪೌರುಷ .. ? ಖಂಯ್ ಗೆಲ್ಲೆ ತುಗೆಲೆ  ಅಹಂಕಾರ .. ? ಕೋಪು ಆಯ್ಯಿಲೆ ಕಾಳಿಂಗ ಸರ್ಪಾ ಮ್ಹಣ್ಕೆ .. ಭುಸು- ಭುಸು ಶ್ವಾಸು ಸೊಡ್ತಾಚಿ .. ಆಜಿ ತೂ ಖಂಯ್ಯ್ ವತ್ತಾ ಅಸ್ಸ .. ? ಧುರ್ಯೋಧನಾ .. ! ತೂ ಏಕ್ಲೊಚಿ ಝಲ್ಲೋ ಮೂ ..! ಅತ್ತ ತೂ ಕಸಲೆ ಕರ್ತಾ ... ? ಅತ್ತ ಪುಣಿ ಕಳ್ಳೆ  ವೇ .. ? ಜೀವನ ಏಕ ಊತ್ಕಾ ವೈಲೆ  ವಾರೆ ಬುಗ್ಗೊ ಮೋಣು ..! ಆಸ್ತಿ , ಅಧಿಕಾರು , ರಾಜ್ಯ , ಐಶ್ವರ್ಯ , ಹೇ ಪ್ರಪಂಚಾಂತುಲೆ ಸರ್ವ ವಿಷಯು ಅಶಾಶ್ವತ ಮೋಣು ಅತ್ತ ಪುಣಿ ಕಳ್ಳೆ ವೇ ಧುರ್ಯೋಧನಾ .. ? ಸ್ತ್ರೀ ಲೋಲುಪ ಜಾವ್ನ್ ದ್ರೌಪದಿಕ ಭರ್ಲೆಲೆ ಸಭೆ೦ತು ಕೆಲ್ಲೆಲೆ ಅಪಮಾನ ಅತ್ತ ಪುಣಿ ಚೂಕಿ ಮೋಣು  ಕಳ್ಳೆ ವೇ .. ? ಕುರು ವಂಶ , ಹಸ್ತಿನಾವತಿ ಅಸ್ತಿತ್ವ ಮೂಳ ಸಮೇತ ಹುಂಮ್ಟಾನ್  ಗೆಲ್ಲೆ ತುಗ್ಗೆಲ್ ಅಹ೦ಕಾರಾ  ನಿಮಿತ್ಯ .. ! ತಗೆಲೆ ಅಂತರಾತ್ಮ ತಕ್ಕಾಚಿ ನಿಂಮ್ಗುಚ್ಯಾ ಶುರು ಝಲ್ಲೆ . ಸಂಜಯಾನ ..  ವ್ಯಾಸ ಮಹರ್ಷಿನ ದಿಲ್ಲೆಲೆ ವರ ಪ್ರಸಾದಾ ನಿಮಿತ್ಯ .. ಧುರ್ಯೋಧನಾಲೆ  ಶೋಧ ಕೆಲ್ಲೆ . ಆಖೇರಿಕ ವೈಶಂಪಾಯನ ಸರೋವರಾ ಲಗ್ಗಿ .. ಏಕ ಅಶ್ವತ್ಥ ರುಕ್ಕಾ ಮುಳಾಂತ್ ದೀರ್ಘ ಆಲೋಚನಾ ಕೊರ್ನ್ ಬೊಶಿಲೇ ಧುರ್ಯೋಧನಾಕ ಪೋಳಯಿಲೆ . " ಮಹಾರಾಜಾ .. ! " ಮೋಣು ಅಪ್ಪಯಿಲೆ ಪೊಳೊನ್ ದಿಗ್ಭ್ರಾಂತ ಜಾವ್ನ್ ಧುರ್ಯೋಧನಾನ ಪೋಳಯಿಲೆ . ಎದ್ರಾಕ ಸಂಜಯು .. ! " ಮಹಾರಾಜಾ ವ್ಯಾಸ ದಿವ್ಯ ದೃಷ್ಟಿ ನಿಮಿತ್ಯ .. ಯುದ್ಧ ರಂಗಾಂತು ಝಲ್ಲೆಲೆ ಪ್ರತಿ ನಿತ್ಯಾ ಯುದ್ಧ ವಿವರಣ ಮಹಾರಾಜಾಕ ದಿತ್ತಾ ಅಶಿಲೋ .. " 

ಧುರ್ಯೋಧನ : " ಸಂಜಯಾ .. ! ಮಹಾರಾಜ್ ... ಮಿಗೆಲೆ ಪಿತಾಶ್ರೀ ಕಷಿ ಅಸ್ಸ ... ಸಂಜಯಾ .. ? " ಧುರ್ಯೋಧನಾನ ನಿಂಮ್ಗಿಲೆಲೆ ಪ್ರಶ್ಣೆ  ಕ ಸಂಜಯಾ ಲೆ  ದೊಳೆಂತು ಉದ್ದಾಕ  ಭರ್ಲೆ . " ಪ್ರಭೋ   ... ! ಹಾಂವೆ ಕಸಲೆ ಸಂಗ್ಚೆ .. ? ಕಸಲೆ ಮೋಣು ಸಂಘು ? ಅಮ್ಗೆಲೆ ಪಕ್ಷಾ ದುಕುನ್ ವೀರ ಯೋಧ ಮೋರ್ನ್ ನೆಲಾರಿ ನಿದ್ಧತಾನಾ ... ಮರಣ ವಾರ್ತಾ ಅಯಿಕತಾನಾ  ... ಅಯಿಕತಾ .. ಅಯಿಕತಾ ನಿತ್ಯ ಶೋಕ ಪಾಲನ ಕರ್ತಾ ಅಸ್ಸ .. ಮಹಾರಾಜ . ಅಂತಃಪುರ ದಾಸ ದಾಸಿ ಲೋಕು ನಿತ್ಯ ಶೋಕ ತಪ್ತ ಜಾವ್ನ್ .... ಅನ್ನ ಆಹಾರ ನಾಶಿ ... ಆಜಿ ...  ನವೋ  ವಿಷಯು ಕಸಲೆ ಅಯಿಕುಚಾ ಪೊಡ್ತಾ ಕೀ ... ಮೋಣು ಎದುರಾ ಪೊಳೈತಾಚ್ಯ್  ರೋಣು - ರೋಣು ನಿಷ್ಶಕ್ತಿ ಝಲ್ಲಿಂತಿ . ಮಹಾರಾಣಿ ಅನಿ ಮಹಾರಾಜ ಪುತ್ರ ಶೋಕಾ ವೆಳ್ಯೇರಿ ಕೊಣಾಚ್ಯಾನ  ಸಮಾಧಾನ ಕೊರುಂ ಝತ್ತಾ ... ? ತಾಂಗೆಲೆ ಶೋಕ ತಪ್ತ ಕೃಶ ಆಂಗ ವಿಷಯ ಅಯಿಕುನುಚಿ ನಿರ್ಜೀವ ಝಲ್ಲಾ . " ಮೋಣು  ಸಂಘುನ್ ಸಂಜಯ ಮನಸ್ಪೂರ್ತಿ ರಳ್ಳೋ . ಧುರ್ಯೋಧನಾ ದೊಳೆ ದುಕುನೂಯಿ ಉದ್ದಾಕ ಅಯಿಲೆ ... " ಸಂಜಯಾ .. ! ಹಾಂವ ಅದೃಷ್ಟ ನಾತ್ತಿಲೊ ... ತೂವೆಂಚಿ ಮಿಗೆಲೆ ಆನಂಮ್ಮಾ೦ಕ ರಕ್ಕೂಕಾ .. " ಮ್ಹಳ್ಳಲೊ ಧುರ್ಯೋಧನ                                                

ಸಂಜಯ : " ಧುರ್ಯೋಧನ ಮಹಾರಾಜಾ .. ! ಹಾಂವೆ ತುಗೆಲೆ ಖತಿರಿ ...   ದೃತರಾಷ್ಟ್ರ ಮಹಾರಾಜಾಲೆ ಏಕು ಸಂದೇಷು ಘೇವ್ನ್ ಅಯಿಲಾ . ಹಾಂವ ತಂಗೇಲೆ ಉತ್ತರಾಂತುಚಿ ...  ಪೆಟಯಿಲೊ  ಸಂದೇಷು ಸಾಂಗ್ತಾ ... ಆಯಿಕುಕಾ ಕುಮಾರಾ ... " ' ಧುರ್ಯೋಧನಾ .. ! ಮಹಾ ಧೈರ್ಯವಂತು  ತೂ ! ಆತ್ಮಾಭಿಮಾನಿ ತೂ ! ಸ್ಥೈರ್ಯ , ಧೈರ್ಯ ಆಶಿಲೋ ಹಸ್ತಿನಾವತಿ ಚಕ್ರವರ್ತಿ ತೂ !.... ಚುಕ್ಕುನ್ ಕೆದನಾಯ್ ... ಆತ್ಮ ಹತ್ಯೆಕ ಪ್ರಯತ್ನ ಕೋರ್ನುಕ್ಕಾ ಪುತಾ ... ! ಅತ್ತ ಝಲ್ಲೆರಿಯೀ .. ತುಂವೆ ಸಂಘಲೇರಿ ... ಧರ್ಮರಾಯಾಕ ಸಂಘುನ್ , ಹಸ್ತಿನಾವತಿ ಸಾಮ್ರಾಜ್ಯ ತುಕ್ಕಾ ಘೆವೊನ್ ದಿವೈತಾ ... ! ಕುಮಾರಾ ಏಕ ಪೋಟಿ ಹಸ್ತಿನಾವತಿಕ ಯೋ ... ಗತಿ ಗೋತ್ರ ನಾಶಿ .. ಹಾಂಗಾ ಪೋಣಶಿಲೆ ಆನಮ್ಮಾ೦ಕ ಪೊಳೋ ಚ್ಯಾ ಯೋ .... ಏಕ .. ಪೊಟಿ ತುಕ್ಕಾ ಪೊಟೋನ್ ಧೊರ್ಕಾ ಮೋಣು ದಿಸ್ತಾ ಕುಮಾರಾ ... ! ಹೀ ಮಿಗೆಲಿ ಆನಿ ತುಗೆಲಿ ಅಮ್ಮಾಲಿ ಆಶಿ ಬಳಾ .. ! ' ಮೋಣು ... ತುಕ್ಕಾ ಸಂದೇಷು ಪೆಟಯಿಲಾ " ಸಂಜಯಾಲೆ ದೊಳೆ೦ತ್ ಉದ್ದಾಕ ಅಯಿಲೆ .   ಶಂಬರಿ ಭಂವ್ಡಾ೦ಗೆಲೆ ಮರಣ ... ಯುದ್ಧ ರಂಗಾಂತು ಪೋಳಯಿಲೆ ...  ಯೆಕ್ಕ ಆನಮ್ಮಾಲೆ ಪೊಟ್ಟಾ  ಜನ್ಮಾ ಆಯ್ಯಿಲೆ ಚೆರ್ಡು೦ವ ...  ಮಿಗೆಲೆ ಕಾಂಕ್ಷೆಕ , ರಾಜ್ಯ ದಾಹಾಕ ,  ಮರಣ ಪಾವಲೀ೦ತಿ . ಝಲ್ಲೆರಿಯೀ ಧುರ್ಯೋಧನಾಲೆ  ಮನ  ವಿಚಲಿತ ಜಾಯ್ನಿ . ದೊಳೆ೦ತ್ ಉದ್ದಾಕ ಏನಿ ... ಝಲ್ಲೇರಿ , ಆಜಿ ಸಂಜಯಾಲೆ ಉತ್ತರಂ ಆಯಿಕುನ್ .. ಹರ್ದೆ೦ತು ಉಕ್ಕುನ್  ಆಯ್ಯಿಲೆ ದುಃಖ ... ಶಬ್ದ ಜಿಬ್ಬೆರಿ ಯೆನಾಶಿ ... ಸಾನ ಚೆರ್ಡಾ ಮ್ಹಣ್ಕೆ ಆನು ಅಮ್ಮಾಕ ಲೆಕ್ಕುನ್  ಲೆಕ್ಕುನ್  ರೊಡುಂಕ ಶುರು ಕೆಲ್ಲೆ . ನಿಡ್ಲಾರಿ ಮತ್ತೇರಿ ಮಾರ್ನ್ ಘೇವ್ನ್ ರಳ್ಳೋ . " ಸಂಜಯಾ .. ! ಮಿಗೆಲೆ ಪಿತಾಶ್ರೀ ಕ ಮಿಗ್ಗೆಲೆ ವೈರಿ ಕಿತ್ಲೆ ಪ್ರೀತಿ ಅಸ್ಸ ಮೋಣು .. ಮಕ್ಕಾ ಮಾತ್ರ ಗೊತ್ತಸ್ಸ . ಆಕಾಶಾ ಪೊಷಿ ವಿಶಾಲ ... ಭೂಮಂಡಲಾ ಪೋಷಿ ವಿಸ್ತಾರ ... ತಸಲೆ ಬಪಸೂಲೆ  ಸೇವಾ ಕೊರ್ಚೆ ಭಾಘ್ಯ ನಾ ಝಲ್ಲೆ ಸಂಜಯಾ ... " ಮ್ಹಳ್ಳಲೋ ಧುರ್ಯೋಧನ . " ಕುಮಾರಾ ..! ಏಕ ಪೋಟಿ ಯೋ , ಹಸ್ತಿನಾವತಿಕ ಯೇವ್ನ್ ... ದೃತರಾಷ್ಟ್ರ ಪ್ರಭು ಕ ಮೆಳ್ಳೆರಿ , ತುಮ್ಗೆಲೆ ದೊಗ ಜನಾಲೆ ಮನಾಂತು ಶಾಂತಿ ಝತ್ತಲಿ ... ಮುಕಾರಿ ಕಸಲೆ ಜಾವ್ಕಾ ಮೋಣು ... ಮಹಾರಾಜ್ ನಿರ್ಧಾರ್ ಕರ್ತಲೊ " ಸಂಜಯಾ ನ ವಿನಮ್ರ ಜಾವ್ನ್ ಪ್ರಾರ್ಥನಾ ಕೆಲ್ಲಿ . " ಹಾಂವ ಯೇನಾ ಸಂಜಯಾ ... ! ಮಿಗೆಲೆ ಬಪ್ಸೂಲ್ ಉತ್ತರ ಮೀರವೂನ್ , ನಿರ್ಲಕ್ಷ್ಯ ಕೊರ್ನ್ ಯುದ್ಧ ರಂಗಾಂತು ದೆ೦ವಲಾ ... ಮಿಗೆಲೆ ಚೆರ್ಡು೦ವ ... ಮಿಗೆಲೆ ಶಂಬರಿ ಜನ ಭಂವ್ಢ ... ಯುದ್ಧ ರಂಗಾಂತು ಬಲಿದಾನ ಕೆಲ್ಲಾ ... ಹೇ ಪೈಶಾಚಿಕ ಮರಣಾ ಭಾರು ಮಿಗೆಲೆ ಮತ್ತೇರಿ ದೊವೊರ್ನ್ .. ಹಾಂವ ಹಸ್ತಿನಾವತಿಕ ಯೇನಾ ... ! " ಮ್ಹಳ್ಳಲೊ .  " ಹ್ಯೇ ಆಖೇರಿ ನಿಶ್ಚಯ ವೇ ಕುಮಾರಾ .. ? " ನಿಂಮ್ ಗಿಲೆ  ಸಂಜಯಾನ .  " ಹಾಂವೆ ಅತ್ತ ಹಸ್ತಿನಾವತಿಕ ಅಯಿಲೇರಿ ಜನ ಮಕ್ಕಾ ... ಲಕ್ಷ ಲೊಕಾಂಕ ದಿವಿಶಿ ಮಾರ್ನ್ .. ಲಜ್ಜಿನಾಶಿ , ಯುದ್ಧ ರಂಗಾ ದುಕುನ್ ಜೀವಾ ಆಷೇರಿ ವಾಪಾಸ್ ಅಯಿಲೊ ಮೋಣು ಸಾಂಗ್ತಾಲೀ೦ತಿ . ಹಾಂವ ಆತ್ಮಾಹುತಿ ಕೊರ್ನ್ ಘೇನಾ ಮೋಣು ಮಿಗೆಲೆ ಪಿತಾಶ್ರೀ ಕ ಸಾಂಘ . ಮಿಗೆಲೆ ಮಾತಾಶ್ರೀ ಕ ಚರಣ ಅಭಿವಂದನಾ ಕೆಲ್ಲಾ ಮೋಣು ಸಾಂಘ . ಆಯಿಚೆ ರಾತ್ರಿ  ಜಲಸ್ತ೦ಭನ  ಕೊರ್ನ್ ಹೇ ವೈಶಂಪಾಯನ ಸರೋವರಾ ಭಿತರಿ ಅಸ್ತಾ . ಫಲ್ಲೆ  ಸೂರ್ಯೋದಯಾ ನಂತರ ಕಸಲೆ ಕೋರ್ಕಾ ಮೋಣು ನಿಶ್ಚಯ ಕರ್ತಾ . ಅನಿ ತೂ ವೊಚ್ಚುನ್ ಯೋ ಸಂಜಯಾ .. "  ಮುಕಾರಿ ಕಸಲೆಯ್ ಉಲ್ಲಯಿನಾಶಿ .. ಸಂಜಯು ನಮಸ್ಕಾರು ಕೊರ್ನ್ , ಮೌನ ಜಾವ್ನ್ ಹಸ್ತಿನಾವತಿಕ ವಾಪಾಸ್ ಚಮ್ಕಲೊ . 

                    ಪಾಂಡವಾನಿ ಧುರ್ಯೋಧನಾ ಖತಿರಿ ಸೊದ್ದುಚ್ಯಾ ಶುರು ಕೆಲ್ಲೆ .  ಗುಪ್ತಚರ ಲೋಕಾನಿ ಕುರುಶಿಬಿರಾಂತು ಸೊದ್ದಿಲೆ . ಧುರ್ಯೋಧನ ದೃಷ್ಟಿ ಕ ಪೋಣಿ . ಜೀವಂತಿ  ಅಷ್ಶಿಲೆ ವಿಷಯು ತಾಯ್ ಕಳ್ನಿ . ಆತ್ಮಾಹುತಿ ಕೊರ್ನ್ ಆಶ್ಚ್ಯಾ ಪೂರೊ ಕೀ ಮೋಣು ಅನುಮಾನ ಅಯಿಲೊ ... " ಶತ್ರುಶೇಷ " ... " ಋಣಶೇಷ " ಆಸ್ಚ್ಯಾ ನಜ್ಜ ಮ್ಹಣತಾತಿ ಮಲಘಡೆ . ತಾಜ್ಜೆ ಖತಿರಿ .. ಧುರ್ಯೋಧನಾ ಕ ಶೋಧ ಕೋರು೦ಕ ಶುರು ಕೆಲ್ಲೆ . ಎಕ್ಲೊ ರನ್ನಾ ಬೇಡ ಮನುಷ್ಯ , ಮಾಸ , ಶಿಬಿರಾ ಕ ಪಾವೈತಾಲೊ ... ಭೀಮ ಸೇನಾ ಕ ಏಕ ಖಬ್ಬರ ಪಾವೈತಾ .. " ತೇಗ ಜನ ಘೋಡೇರಿ ಯೇವ್ನ್ ಯೆಕ್ಕ ಸರೋವರಾ ದಂಡೇರಿ ಯುದ್ಧ ವಿಷಯು ಉಲ್ಲೋನ್ ಘೆತ್ತಶಿಲೀಂತಿ . ತೇಗ ಜನ ವಾಪಾಸ್ ಚಮ್ಕಲೆ .. ಎಕ್ಲೊ ಮಹಾರಾಜು ಸರೋವರಾಂತು ಬುಡ್ಲಾ . ಬುಡ್ಡಿಲೊ ಮನುಷ್ಯ ಉತ್ಕಾಂತುಲೇನ ಭಾಯಿರಿ ಏನಿ . ಅಮ್ಮಿ ಮಸ್ತ ವೇಳು  ರಕ್ಕುನ್ ಪೊಳೈಲೆ ತ್ಯೋ ಭಾಯಿರಿ ಏನಿ " .... "ಅತ್ತ ಧುರ್ಯೋಧನು ಖಂಯ್ ಅಸ್ಸ ಮೋಣು ಕಳ್ಳೆ ". ವಾಸುದೇವು ಮ್ಹಳ್ಳಲೊ ... " ಧುರ್ಯೋಧನಾಕ ಜಲಸ್ಥ೦ಭನ ಮಂತ್ರ ವಿದ್ಯಾ ಗೊತ್ತಸ್ಸ . ಹ್ಯೇ ಮಂತ್ರ ಶಕ್ತಿ ನ ಮಹಿನೆ  ಕಾಲ  ಉತ್ಕಾಂತು ವಾಸ ಕೊರ್ಯೇತ . ಹೀ ವಿದ್ಯಾ ...  ಭೀಷ್ಮ ಪಿತಾಮಹಾಲೆ ಶಿಖಲಾ . ಅಮ್ಮಿ ಕೂಡ್ಲೇ ವೈಶಂಪಾಯನ ಸರೋವರಾಕ ವೊಚ್ಚುಕಾ " ಮ್ಹಳ್ಳಲೊ . ಸಹ , ಸಾಥ್ ರಥ ತಯ್ಯಾರ್ ಝಲ್ಲೆ . ಪಾಂಡವ ರಥಾರಿ ಬಯಿಸುನ್ ವೈಶಂಪಾಯನ ಸರೋವರಾಕ ಅಯಿಲೆ 

ಉಮಾಪತಿ