MAHABHARATH
Part - 64 ( Konkani Bhashentu )
Shalya
Pradhani / ಶಲ್ಯ ಪ್ರಧಾನಿ
ಕರ್ಣಾಲೆ ಮರಣ ... ಧುರ್ಯೋಧನಾಕ ಸಹನಾ ಕೊರೂ ಜಾಯ್ನಿ .. ಆಪ್ತ ಮಿತ್ರ ವಿಂಗಡ ... ಭೀಷ್ಮ ದ್ರೋಣ , ಯುದ್ಧ ರಂಗಾ ದುಕುನ್ ದೂರ ಝಲ್ಲೆಲೆ ತೆದ್ನಾ , ಧುರ್ಯೋಧನಾಕ ತಿತ್ಲೆ ಮನಾ ಸಂಕಟ ಜಾಯ್ನಿ ಅಶಿಲೆ . ಆಜಿ .. ಕರ್ಣಾಲೆ ಮರಣ ವಾರ್ತಾ ಅಯಿಕಲಿ ಸತಾನ ಧುರ್ಯೋಧನಾ ಕ ಸರ್ವಸ್ವ ಕಾಣ ಘೆತ್ಲೆ ಮ್ಹಣ್ಕೆ ಏಕ ಅನುಭೂತಿ ಝಲ್ಲಿ . ಅರ್ಜುನಾ ಕ ದಿವಿಶಿ ಮಾರ್ಕಾ ಮ್ಹಳ್ಳೆಲೆ ಏಕ ಮಾತ್ರ ಕಾಂಕ್ಷ ಅಶಿಲೋ ಕರ್ಣಾ ಕ ಅಷ್ಶಿ ಝಲ್ಲೆ ಮೂ ... ! ಮನಾಕ ಮಸ್ತ ಪಶ್ಚಾತಾಪ್ ಝಲ್ಲೋ . ಶಲ್ಯ ರಾಯಾ ಕ ಪೋಳಯಿಲ್ ಸತಾನ .. ಸಾನ್ ಚೆರ್ಡಾ ಮ್ಹಣ್ಕೆ ರೊಡುಂಕ ಶುರು ಕೆಲ್ಲೆ . ಏಕ ಘಡಿಯೇರಿ ಆತ್ಮ ಹತ್ಯಾ ಕೋರುಂಕ ಆಲೋಚನಾ ಕೆಲ್ಲಿ ಧುರ್ಯೋಧನಾ ನ . ಕೃಪಾಚಾರ್ಯ , ಅಶ್ವಥ್ತ್ಥಾಮ , ಕೃತವರ್ಮ , ಶಲ್ಯ , ಶಕುನಿ ಸರ್ವ ಆಪ್ತ ಲೋಕಾನಿ ಸಮಾಧಾನ ಕೆಲ್ಲ್ಯಾರಿಯ್ .. ಧುರ್ಯೋಧನಾ ಕ ಸಮಾಧಾನ ಜಾಯ್ನಿ .
ಹಸ್ತಿನಾವತಿ೦ತು ಸಂಜಯಾ ನಿಮಿತ್ಯ ದೃತರಾಷ್ಟ್ರಾಕ ಸುದ್ದಿ ಮೆಳ್ಳಿ . ದೃತರಾಷ್ಟ್ರ , ಗಾಂಧಾರಿ ಸ್ವಂತ ತಾಂಗೆಲೆ ಪುತ್ತಾಲೆ ಮರಣ ಝಲ್ಲೆ ಮ್ಹಣ್ಕೆ .. ಹರ್ದೇರಿ ಮಾರ್ನ್ ಘೇವ್ನ್ ರಳ್ಳೀ೦ತಿ . ಭೀಷ್ಮಾಚಾರ್ಯ , ದ್ರೋಣಾಚಾರ್ಯ ... ತಾಂಗೆಲೆ ಸ್ವಂತ ಚೆರ್ಡು೦ವ ಯುದ್ಧ ರಂಗಾಂತು ಮರ್ತಾನಾ ..ಇತ್ಲೆ ದುಃಖ ಪಾವನಿ ತಿ ಅಶಿಲೆ . ಕರ್ಣಾ ಲೆ ಮರಣ ವಾರ್ತಾ ಅಯಿಕುನ್ ದೊಗ್ಗ೦ಯಿ ' ಅಯ್ಯೋ ' ಮೋಣು ರಳ್ಳಿ೦ತಿ . ಕೌರವ ಶಿಬಿರ ಮೂಕ ಜಾವ್ನ್ ಶೋಕ ತಪ್ತ ಝಲ್ಲೆ ಪಾಂಡವ ಶಿಬಿರಾಂತು ... ಸಂತೋಷು ... ಸಮುದ್ರಾ ಮ್ಹಣ್ಕೆ ಪಾಳ ಉಕ್ಕುನ್ ಜಯ ಜಯ ಕಾರ ಕೆಲ್ಲೆಲೆ ಅನುಭೂತಿ ... ಕರ್ಣಾ ಮರಣ ವಾರ್ತಾ ಘೋಷಣ ಕರ್ತಾಚಿ ಆನಂದ ಪಾವತಾಶಿಲಿಂತಿ . ನಕುಲ ಸಹದೇವಾನಿ ಜಯ ಜಯ ಕಾರು ಕೆಲ್ಲೊ . ದ್ರೌಪದಿ ಋದ್ ಮುಕಾರಿ ಯೇವ್ನ್ ... ಅರ್ಜುನಾಲೆ ಕವಚ ಸೊಡವಾನ್ ... ಸಂತೋಷಾರಿ ಫೋಟೋನ್ ಧೋರ್ನ್ ಅರ್ಜುನಾಕ ಮರ್ಯಾದಿ ಕೆಲ್ಲಿ .. ತಿಗೆಲೆ ಮನಾಂತುಲ್ ಸಂತೋಷು ಸರ್ವಾನಿ ಪೊಳೋಚ್ಯೇ ತಶಿ ಕೆಲ್ಲೆ . " ವಾಸುದೇವಾ .. ! ತುಗ್ಗೆಲ್ ಆಶೀರ್ವಾದಾ ನಿಮಿತ್ಯ ಯೆದೊಳ್ ತಾ೦ಯಿ , ಕುರುಕ್ಷೇತ್ರ ಯುದ್ಧಾ೦ತು ಅಂಮ್ ಕಾ ಜಯ ಮೆಳ್ತಾ ಅಸ್ಸ ... ಅಂಮ್ ಕಾ ಮುಕಾರಿಯಿ ತುವೆಂಚಿ ಮಾರ್ಗ ದರ್ಶನ ಕೊರ್ನ್ ರಕ್ಷಣಾ ಕೋರ್ಕಾ ಪರಂಧಾಮಾ .. ! " ದ್ರೌ ಪದಿ ಸಮೇತ ಪಾಂಡವಾನಿ ಕೃಷ್ಣಾಕ ನಮನ ಕೆಲ್ಲೆ . " ಧರ್ಮರಾಯಾ .. ! ಕುರುಕ್ಷೇತ್ರ ಯುದ್ಧ ಆರಂಭ ಜಾವ್ನ್ ಫಲ್ಲೇಕ ಆಟ್ರ್ ದಿವಸ ಪೂರ್ತಿ ಝತ್ತಾ . ಫಲ್ಲೇ ಯುದ್ಧಾ೦ತು ... ಶಲ್ಯಾಲೆ ಮರಣ ತುಗೆಲೆ ಹತ್ತಾ೦ತು ... ಶಕುನಿಲೆ ಮರಣ , ಸಹದೇವಾಲೆ ಹತ್ತಾ೦ತು .... ಧುರ್ಯೋಧನಾಲೆ ಮರಣ ಭೀಮ ಸೇನಾಲೆ ಹತ್ತಾ೦ತು ಜಾವ್ಕಾ ... " ಮೋಣು ಕೃಷ್ಣಾನ ಸಂಘಲೆ
ಹೆಕಡೆ ಕೌರವ ಶಿಬಿರಾಂತು ಆಪ್ತ ಶಕುನಿ , ಅಶ್ವತ್ಥಾಮ , ಕೃತವರ್ಮಾ , ವೊಟ್ಟು ಜಾವ್ನ್ ಶಲ್ಯ ರಾಯಾಕ ಪ್ರಧಾನ ಸೇನಾನಿ ಜಾವ್ನ್ ನಿಯುಕ್ತ ಕೋರ್ಕಾ ಮೋಣು ಸಂಘಲೇ . ಸಭೆ ನಿರ್ಧಾರ ಪ್ರಕಾರ .. ಶಲ್ಯ ರಾಯಾಕ ಗಳೇಕ ಫುಲ್ಲಾ ಮಾಳ ಘಾಲ್ನ್ , ವೀರ ತಿಲಕ ದೊವೊರ್ನ್ , ವೀರ ಖಡಗ ದೀವ್ನ್ ಸನ್ಮಾನ ಕೆಲ್ಲೆ . " ಶಲ್ಯ ಮಾಮಾ .. ! ಅನಿ ತೂ೦ವೆ ಮಕ್ಕಾ ವಾಟ ದಕ್ಕೋಕಾ " ಮೋಣು ಸಂಘುನ್ ನಮಸ್ಕಾರು ಕೆಲ್ಲೊ . ಶಲ್ಯಾನ ದೊಳೆ ಉದ್ದಾಕ ಕಾಣು "ಧುರ್ಯೋಧನಾ .. ! ಕುರುಕ್ಷೇತ್ರ ಯುದ್ಧ ರಂಗಾಂತು ಅಸಲೆ ಸ್ಥಾನ ಮಾನ .. ಮಕ್ಕಾ ಮೆಳ್ತಾ ಮೋಣು , ಹಾಂವೆ ಕೆದನಾಯ್ ಲೆಕ್ಕನಿ . ಫಲ್ಲೆ ಜಾವ್ಚೆ ಯುದ್ಧಾ೦ತು ಧರ್ಮರಾಯಾನ ಅಸ್ಸುಕಾ ... ನಾತ್ಲೆರಿ ಹಾಂವೆ ಜೀವಂತಿ ಅಸ್ಸುಕಾ ದೊನ್ನಿ ಪೈಕಿ ಏಕ ಝತ್ತಲೆ ... " ಮೋಣು ಶಪಥ ಕೆಲ್ಲೆ . ಸರ್ವ ಕುರು ಸೈನ್ಯಾನಿ ಕರತಾಡನ ಕೊರ್ನ್ ಶಲ್ಯಾಕ ಉಮೇದಿ ಭರಲಿ ... ಹ್ಯೀ ಸುದ್ದಿ ಪಾಂಡವಾಂಕ ಮೆಳ್ಳಿ .
ಅಠಾರಾ ದಿವಸ ಯುದ್ಧ ಆರಂಭ ಝಲ್ಲೆ . ಧರ್ಮರಾಯು ಶಲ್ಯಾ ವೊಟ್ಟು ಯುದ್ಧ ಕೊರುಂಕ ರಾಬ್ಲೊ . ಭೀಮು ಧುರ್ಯೋಧನಾ ವೊಟ್ಟು ... ಅರ್ಜುನ್ , ಅಶ್ವತ್ಥಾಮ ವೊಟ್ಟು .. ಸಾತ್ಯಕಿ , ಕೃತವರ್ಮಾ ವೊಟ್ಟು .. ಸಹದೇವ , ಶಕುನಿ ವೊಟ್ಟು ... ಯುದ್ಧಾಕ ರಾಬಲೆ . ಕಶೀ ಪುಣಿ ಧರ್ಮರಾಯಾಕ ದಿವಿಶಿ ಮಾರ್ಕಾ ಮೋಣು ಶಲ್ಯ ... ಕಸಲೆಯ್ ಜವ್ವೋ , ಶಲ್ಯ ರಾಯಾಕ ದಿವಿಶಿ ಮಾರ್ನ್ ಯುದ್ಧ ಸಮಾಪ್ತ ಕೋರ್ಕಾ ಮೋಣು ... ಧರ್ಮರಾಯು .. ! ಶಲ್ಯಾನ 'ಶಕ್ತಿ 'ಆಯುಧ ಪ್ರಯೋಗ ಕೆಲ್ಲೆ . ಧರ್ಮಜಾ ನ ಶಕ್ತಿ ಆಯುಧಾಕ ಪ್ರಣಾಮ ಕೊರ್ನ್ .. ಶಕ್ತಿ ಆಯುಧ ಹತ್ತಾ೦ತು ಧೋರ್ನ್ ... ವಾಪಾಸ್ ಧರ್ಮಜಾನ ಶಲ್ಯ ರಾಯಾ ವೈರಿ ಪ್ರಯೋಗ ಕೆಲ್ಲೆ . ಶಲ್ಯಾ ನ ಪ್ರಯೋಗ ಕೆಲ್ಲೆಲೆ ಶಕ್ತಿ ಆಯುಧ ವಾಪಾಸ್ ಯೇವ್ನ್ ಶಲ್ಯಾ ಕ ದಿವಿಶಿ ಮಾರ್ಲೆ . ಪಾಂಡವ ಸೈನ್ಯ ಸಂತೋಷಾರಿ ಜಯಕಾರು ಕೆಲ್ಲೆ . ಅಯಿಚೆ ಯುದ್ಧ ಶಲ್ಯಾಲೆ ಮರಣಾ ನಂತರ ರಬ್ಬನಿ . ಶಕುನಿ ಲೆ ಪೂತು ಉಲೂಕ , ಸಹದೇವಾಲೆ ಬಾಣಾಕ ಜೀವು ಸೊಳ್ಳೋ . ಶಕುನಿಕ ಮಸ್ತ ಕೋಪು ಯೇವ್ನ್ .. ಸಹದೇವಾ ಕ ಮಾರುಂಕ ಅಯಿಲೊ . ಸಹದೇವಾಲೆ ಸಹಸ್ರ ಬಾಣ ಶಕುನಿ ಕ ಯೇವ್ನ್ ಲಾಗ್ತಾನಾ .. ಅಂಗಾ ಭರಿ ಘಾಯ ಜಾವ್ನ್ ಸುಸ್ತ್ ಝಲ್ಲೋ .. ಶಕುನಿ ನ ಅಯ್ಯೋ ಮೋಣು ಚೀತ್ಕಾರ ಕರ್ತಾನಾ .. ಸಹದೇವಾನ , ಶಕುನಿಲೆ ದೊನ್ನಿ ಹಾಥ್೦ ಛೇಧನ ಕೆಲ್ಲೆ ... ದೂಕಿ ತಡ್ಸುನ್ ಘೆವ್ಚ್ಯಾ ಜಾಯ್ನಾಶಿ ವೊಳ್ - ವಾಳ್ತಾನಾ ... " ಮಾಮಾ ಅತ್ತ ಖೇಳ ಮಾಯಾ ದ್ಯೂತ .. ! " ಮ್ಹಳ್ಳಲೊ ಸಹದೇವ . " ಯೆಕ್ಕಪೊಟಿ ದಿವಿಶಿ ಮಾರಿ .. ಹ್ಯೀ ದೂಕಿ ಸಹನಾ ಕೋರು ಜಾಯ್ನಾ " ಮ್ಹಳ್ಳಲೊ ಶಕುನಿ . ಸಹದೇವಾನ , ಹತ್ತಾ೦ತು ಖಡ್ಘ ಘೇವ್ನ್ ಶಕುನಿಲೆ ಶಿರ ಛೇಧನ ಕೆಲ್ಲೆ .
ಶಲ್ಯಾ , ಶಕುನಿಲೆ , ಘೋರ ಮರಣ ಆಯಿಕುನ್ ... ಧುರ್ಯೋಧನ , ಸಾರಥಿಕ ರಥಾರಿ ದುಕೂನ್ ದೆವ್ವೋನ್ ... ಸ್ವತಃ ಸಾರಥ್ಯ ಕರ್ತ್ಯಾಚಿ .. ಪೂರ್ವ ದಿಶೆ ಕ ಪ್ರಯಾಣ ಕೆಲ್ಲೆ ಧುರ್ಯೋಧನಾನ . ಭೀಮ ಸೇನಾ ನ ಧುರ್ಯೋಧನಾ ಖತಿರಿ ಯುದ್ಧ ರಂಗಾಂತು ಸೊದ್ದಿಲೆ . ಖಂಯಿ ಮೆಳ್ನಿ ... " ಧುರ್ಯೋಧನ .. ಖಂಯಿ ದೃಷ್ಟಿ ಕ ದಿಸ್ಸನಾ " ಮೋಣು ಹೋಡಾನ ಬೋಬ್ ಮಾರ್ಲಿ . ಕೃಪಾಚಾರ್ಯಾನ ಆನಿ ಅಶ್ವಥಾಮನ ತ್ಯೆ ದಿವಸಾ ಯುದ್ಧ ರಬ್ಬಯಿಲೆ .
" ಸಂಜಯಾ ... ! ಸಾಂಘ ... ಧುರ್ಯೋಧನ ಖಂಯ್ಯ್ ಮೋಣು ಸಾಂಗ್ ... ಖಂಯಿ ವೊಚ್ಚುನ್ ಅಷ್ಯಾ ಪೂರೋ ಮೋಣು ಸಾಂಘ ... ಹ್ಯೇ ಯುದ್ಧಾ೦ತು ಮಿಗೆಲೆ ಶಂಬರಿ ಜನ ಪುತ್ರಾ೦ಕ ಕಾಣ್ ಘೆತ್ಲೆ ... ಹೇ ಶಂಬರಿ ವಿಧವಯಿಲೆ ಸುನ್ನಾ೦ಕ ಕಷ್ಶಿ ಸಮಾಧಾನ ಕೊರ್ಚೆ .. ? ಪಿಂಡ ಪ್ರದಾನ ಕೊರುಂಕ ಏಕ್ಲೊಯಿ ಮಿಗೆಲೆ ಪೂತು ವಾಂಚುನ್ ವರ್ನಿ ... ಸಂಜಯಾ ... ! ಧುರ್ಯೋಧನು ತಾಗೆಲೆ ಆತ್ಮ ತ್ಯಾಗ ಕೊರುಂಕ ಬಿನಿ ಭಾರ್ ಸರ್ನಿ ನವೇ .. ? " ಧ್ರತರಾಷ್ಟ್ರಾ ಕ ಮನಾ ಭೀತಿ ಲಾಗ್ಲಿ . " ಹಾಂವೆ ಶೀಘ್ರ ಜಾವ್ನ್ ... ಮಿಗೆಲೆ ಮನೋಶಕ್ತಿನ ತಗೆಲೆ ವೊಚ್ಚುನ್ ಯೆವ್ವುವೇ .. ? ಮಹಾರಾಜಾ .. ? " ಸಂಜಯಾನ ನಿ೦ಮಗಿಲೆ . " ಧುರ್ಯೋಧನ ಮಹಾರಾಜಾ ನ ಎದ್ರಾಕ ಮೆಳ್ಳೆರಿ ಕಸಲೆ ಮೋಣು ಸಂಘಚೇ ಪ್ರಭು .. ? " " ಸಂಜಯಾ ... ! ಧುರ್ಯೋಧನಾ ಕ ಸಾಂಘ ... ಹಾಂವೆ ಸಂಘಲಾ ಮೋಣು ಸಾಂಘ ... ಧುರ್ಯೋಧನ ಚಕ್ರವರ್ತಿ ... ! ಮಹಾ ಧೈರ್ಯ ಶಾಲಿ ತೂ ... ಮಹಾ ಆತ್ಮಾಭಿಮಾನಿ ತೂ ... ಅಧೈರ್ಯ ಜಾವ್ನ್ ಕೆದನಾಯ್ ಆತ್ಮಾಹುತಿಕ ಪ್ರಯತ್ನ ಕೋರ್ನುಕ್ಕಾ .. ಪುತಾ .. ! ತೂ೦ವೆ ಅತ್ತ ಸಮ್ಮತಿ ದಿಲ್ಲೇರಿ ... ಧರ್ಮರಾಯಾಕ ಸಂಘುನ್ ... ಹಸ್ತಿನಾವತಿ ತುಕ್ಕಾ ದಿವೈಶಿ ಕರೈತಾ ಪುತಾ ... ಏಕ ಪೋಟಿ ಹಸ್ತಿನಾವತಿಕ ಯೋ ಬಾಳಾ .. ! ಅತಂತ್ರ ಜಾವ್ನ್ ಅಶಿಲೆ ತುಗೆಲೆ ಆನಮ್ಮಾ೦ಕ ಪೊಳೋ ಚ್ಯಾ ಯೇಕ ಪೋಟಿ ಯೋ ಬಾಳಾ ... ! ಮೋಣು ಸಾಂಘ ಸಂಜಯಾ ... " ಧ್ರತರಾಷ್ಟ್ರಾಲಿ ಮನೋ ಪೀಡಾ ಪೊಳೊನ್ .. ಸಂಜಯಾ ಕ ದೊಳೆ ಉದ್ದಾಕ ಅಯಿಲೆ .
ಉಮಾಪತಿ
No comments:
Post a Comment