MAHABHARATH
Part - 63 ( Konkani Bhashentu )
KARNALE MARANA / ಕರ್ಣಾಲೆ ಮರಣ
ಯುದ್ಧ ಆರಂಭ ಜಾವ್ಚೆ ಫುಡೇ ಕುಂತಿ ದೇವಿನ ಕರ್ಣಾಕ ಭೇಟಿ ಜಾವ್ನ್ ... ಅರ್ಜುನಾ ವೊಟ್ಟು ಯುದ್ಧ ಕರ್ತನಾ ಏಕ ಪೊಟಿ ಸೊಳ್ಳೆಲೆ ಬಾಣು ಆನ್ನೇಕ ಪೊಟಿ ಪ್ರಯೋಗ ಕೋರು ನಜ್ಜ ಮೋಣು ಆಣ ಭಾಸ ಘೆತ್ತಿಲಿ . ತ್ಯೆ ಕಾರಣಾ ನಿಮಿತ್ಯ ಕರ್ಣಾನ ನಾಗಾಸ್ತ್ರ ದೊನ್ನಿ ಪೊಟಿ ಪ್ರಯೋಗ ಕರ್ನಿ . ಕರ್ಣಾಲೆ ದುರಾದೃಷ್ಟ , ಜೀವನ ಜನ್ಮ ದಿಲ್ಲೆಲಿ ಆವ್ಸು ... ಅಂತ್ಯಾಕಯಿ ಕಾರಣ ಝತ್ತಾ . ಅಶ್ವಸೇನ ನಾಗಾಸ್ತ್ರ ಕಿತ್ಲೆ ನಮೂನೇರಿ ' ಮಕ್ಕ ಆನ್ನೇಕ ಪೊಟಿ ಪ್ರಯೋಗ ಕರಿ ' ಮೋಣು ಪ್ರಾರ್ಥನ ಕೆಲ್ಲೇರಿಯಿ .. ಕರ್ಣಾ ನ ತಗೆಲೆ ವಚನ ಭದ್ಧತಾ ಮಾನ ದೊವೊರ್ನ್ , ನಾಗಾಸ್ತ್ರಾ ಕ ' ಆನ್ನೆಕಲೇ ಲೆ ಆಶ್ರಯ ಘೇ ' ಮೋಣು ದೀವ್ನ್ ಪೆಟಯಿಲೆ .
ಕರ್ಣಾರ್ಜುನ ಯುದ್ಧ ವಾಪಾಸ್ ಆರಂಭ ಝಲ್ಲೆ . ಧ್ವ೦ಧ್ವ ಯುದ್ಧ ಕೋರ್ಕಾ ಮೋಣು ಕಿತ್ಲೆಕೀ ವರ್ಷ೦ ರಕ್ಕುನ್ ಅಷ್ಶಿಲೆ ಮಹಾ ಯೋಧ ತಾಂಗ್ - ತಾಂಗೆಲೆ ಸರ್ವ ಶಕ್ತಿ ವೊಟ್ಟು ಕೊರ್ನ್ ಯುದ್ಧ ಕರ್ತಾ ಆಸ್ಸತಿ . ಶ್ರಾಪಗೃಹಸ್ಥ , ಕವಚ ಹೀನ , ಅರ್ಧ ರಥಿಕ , ಮೋಣು ಭೀಷ್ಮಾಚಾರ್ಯಾಲೆ ನಿಂದನಾ ಅಯಿಕಲೆ ಕರ್ಣಾ ಆಜಿ ವೀರ ವಿಕ್ರಮ ಜಾವ್ನ್ ಯುದ್ಧ ಕೊರ್ಚೆ ಪೊಳೊನ್ .. ಕುರು ಪಾಂಡವ ಸೈನ್ಯ ಸ್ಥಬ್ದ ಜಾವ್ನ್ .. ಯುದ್ಧ ಪೊಳೈತ ರಾಬಲೆ . ಸೂರ್ಯಾಸ್ತ ಜಾವ್ಚ್ಯಾಕ ಸ್ವಲ್ಪ ವೇಳು ಅಸ್ಸ ... ಕರ್ಣಾ ನ ರುದ್ರಾಸ್ತ್ರ .. ಅಭಿಮಂತ್ರಿತ ಕೊರ್ನ್ ಧನುಷ್ಯಾಕ ಲಾಯಿಲೆ .. ತ್ಯೆಚಿ ವೆಳ್ಯೇರಿ ... ಕರ್ಣಾಲೆ ಕಾಂಚನ ರಥ ಚಕ್ರ ಭುಯಿಂತು ದೇ೦ವ್ಲೆ . " ಕರ್ಣಾ .. ! ರಥ ಚಕ್ರ ಸಕಲ ಭೊಯಿಂತು ನಿಸರ್ಲೆ ... " ಮ್ಹಳ್ಳಲೋ ಶಲ್ಯ ರಾಜ . " ಕಸಲೆ ಕೋರಚ್ಯೆ .. ! ಶಲ್ಯ ರಾಜಾ .. ? " ನಿಂಮ್ಗಿಲೆ ಕರ್ಣಾನ . " ಮಕ್ಕ ಕಸಲೆ ಗೊತ್ತು .. ? ಅತ್ತ ರಥ ಚಕ್ರ ವೈರಿ ಕಾಣು ದಿಲ್ಲೇರಿ ... ಹಾಂವ ಸಾರಥ್ಯ ಕರ್ತಾ " ಮೋಣು ಸಾಂಗ್ತಾಚಿ ರಥಾರಿ ದುಕುನ್ ಸಕಲ ದೆಂವ್ಲೊ ಶಲ್ಯ ರಾಯು . ಕರ್ಣಾ ನ ಸುತ್ತು ಮುತ್ತು ಕೊಣಯ್ ಸೈನಿಕ ದಿಸ್ತಾತಿ ಕೀ ಮೋಣು ಪೋಳಯಿಲೆ . ಕರ್ಣಾ ಲೆ ಹತ್ತಾ೦ತು ಮಹಾ ದಿವ್ಯಾಸ್ತ್ರ ಪೊಳೊನ್ , ಸೈನಿಕ ಭೀವ್ನ್ ಧಾಂವ್ನ್ ಗೆಲ್ಲೆ . ಎಕ್ಲೊ ಪುಣಿ ಅಶ್ವಿಕ , ಸೈನಿಕ ನಾ . ಹತ್ತಾ೦ತು ಧನುಷ್ಯ ಧೋರ್ನ್ ಕರ್ಣ ರಥಾರಿ ದುಕೂನ್ ಸಕಲ ದೆಂವ್ಲೊ . " ಶಲ್ಯ ರಾಜಾ .. ! ಮಕ್ಕಾ ಸ್ವಲ್ಪ್ ಸಹಾಯು ಕರಿ .. ಅಮ್ಮಿ ದೊಗ ಜನ ವೊಟ್ಟು ಜಾವ್ನ್ ... ರಥ ಚಕ್ರ ಭೂಯಿ೦ತುಲೇನ ವೈರಿ ಉಬ್ಬಾರ್ಯಾ .. " ಪ್ರಾರ್ಥನಾ ಪೂರ್ವ್ಕ ಜಾವ್ನ್ ಶಲ್ಯಾ ಲಗ್ಗಿ ನಿವೇದನ ಕೆಲ್ಲಿ . " ಕರ್ಣಾ .. ! ಸಾರಥ್ಯ ಕೊರುಂಕ ಫುಡೇಕಚ್ಯಿ ... ಹಾಂವೆ ತುಕ್ಕಾ ಸಂಗ್ಲಾ ... ಸಾರಥ್ಯ್ ಸೋಣು ವಿಂಗಡ ಕಸಲೆಯ್ ಕಾಮ ಕರ್ನಾ ಮೋಣು ... ! ಹಾಂವೆ ಕಸಲೆ ಕೊರ್ಚ್ಯೇ .. ? ಸೂರ್ಯಾಸ್ಥ ಜಾವ್ಚ್ಯೇ ವೇಳು ಹ್ಯೋ ! ಯುದ್ಧ ರಬ್ಬಾಯಿತಲೆ ... ಫಲ್ಲೆ ಯೇವ್ನ್ ಪೋಳೋಯಾ ... ! ಏಕ ಕಾಮ ಕರಿ ... ಹಾಂಗಾ ದುಕೂನ್ ಧಾಂವ್ನ್ ವಸ ... ಅನಿ ಪ್ರಾಣ ಪುಣೀ ವಾಂಚೊನ್ ಘೇ ... ನಾತ್ಲೆರಿ ಅರ್ಜುನಾಲೆ ಹತ್ತಾ೦ತು ತುಗ್ಗೆಲ್ ಮರಣ ನಿಶ್ಚಯ .. " ಮೋಣು ಸಂಘುನ್ ಪರಿಹಾಸ ಕೆಲ್ಲೆ ಶಲ್ಯಾನ . " ಧಿಕ್ ... ! ಆಮ್ಗೆಲೆ ಪಕ್ಷಾಂತು ಅಸ್ಸುನ್ ಮಕ್ಕಾ ಮೋಸು ಕರ್ತಾವೇ .. ? ತುಗ್ಗೆಲ್ ತಸಲೊ ನೀಚ , ದ್ರೋಹಿ ಮನುಷ್ಯ ಸಾರಥ್ಯಕ್ಕೆ ಮಾತ್ರ ನಂಯ್ಯ್ .. ಮಿಗೆಲೆ ಪಾಯು ಅಪ್ಪೊಡುಂಕ ತಾಯ್ ಅರ್ಹತಾ ನಾ ... ದಯಾ ದೊವೊರ್ನ್ ಮಿಗ್ಗೆಲೆ ದೊಳೆ ಎದ್ರಾ ದುಕೂನ್ ಖಂಯಿ ಪುಣಿ ವಸ ... ಮಿಗೆಲೆ ಸಾರಥಿಕ , ಹಾಂವೆಚಿ ಯುದ್ಧ ರಂಗಾಂತು ದಿವಿಶಿ ಮಾರ್ಲೆ ಮೋಣು .. ಅಪಕೀರ್ತಿ ಯೆವಚೆ ತಶಿ ಕೋರ್ನುಕ್ಕಾ .. " ಕರ್ಣಾಕ ಮಸ್ತ ಕೋಪು ಅಯಿಲೊ . ಶಲ್ಯಾಕ , ಹ್ಯೆಂಚಿ ಜಾವ್ಕಾ ಅಶಿಲೆ . ಯುದ್ಧ ರಂಗಾ ದುಕೂನ್ ಹತ್ತಾ ಅಶಿಲಿ ಸಾರಥ್ಯಾ ಚಾಟಿ ರಥಾರಿ ಉಡೋನ್ ಜಾಗೊ ಸೋಣು ಚಮ್ಕಾಲೊ . ಯುದ್ಧ ರಂಗಾಂತು ಕರ್ಣ ಎಕ್ಲೊಚಿ ಝಲ್ಲೋ . ಉಗ್ರ .. ಸಮುದ್ರಾ೦ತು , ಬುಡ್ಚ್ಯೆ ದೋಣಿ೦ತ್ ಆಸ್ಲೆ ಮ್ಹಣ್ಕೆ ಅನುಭವ ಝಲ್ಲೋ ಕರ್ಣಾಕ . ಸಾರಥಿ ನಾಶಿ ಕಷ್ಶಿ ಯುದ್ಧ ಕರ್ತಾಲೊ ... ? ವೇದ ಬ್ರಾಹ್ಮಣಾ ನಿಮಿತ್ಯ ಮೆಳ್ಳೆಲೆ ಶ್ರಾಪ ... ಅತ್ತ ಕಾಮ ಕರ್ತಾ ಅಸ್ಸ . ಏಕ ಪೊಟಿ ಅಸ್ತ್ರ ಅಭ್ಯಾಸ ಕರ್ತಾನಾ , ಕರ್ಣಾಲೆ ಬಾಣಾ ಕ .. ಏಕ ಯಜ್ಞಾ ಗಾಯಿ ,, ಕರ್ಣಾಕ ಕಳ್ನಾಶಿ ಆಹುತಿ ಝತ್ತಾ , ತ್ಯೆ ಗಾಯಿಚಿ ಪಾಲಕ ಬ್ರಹ್ಮ್ಮಣ ಯೇವ್ನ್ ಕರ್ಣಾ ಕ ಶ್ರಾಪ ದಿತ್ತಾ ... " ತೂ ಖಂಚೆ ಸಾಧನೇಕ ಅಸ್ತ್ರ ಅಭ್ಯಾಸ ಕರ್ತಾ ಕೀ ... ತ್ಯೆ ಯುದ್ಧ ಲಕ್ಷೆ ವೆಳ್ಯೇರಿ ತುಗೆಲೆ ರಥು ಭೂಯಿಂತು ಪೂರ್ನ್ ವತ್ತಲೋ ... ! ಹ್ಯೇ ಕಾರಣಾ ನಿಮಿತ್ಯ .. ತುಗೆಲೆ ಅಂತ್ಯ ಹ್ಯೇ ಗಾಯಿಚೆ ಮ್ಹಣ್ಕೆ ಝವ್ವೊ "
ಯುದ್ಧ ಕರ್ತಾಚಿ ಕರ್ಣ , ರಥಾ ಮಾಕ್ಷಿ ವೊಚ್ಚುನ್ ರಥಾ ಚಕ್ರ ಧೋರ್ನ್ ಉಬ್ಬಾರುಂಕ ಗೆಲ್ಲೊ ... ಚಕ್ರ ಹಲ್ಲನಿ ಉಜೆವೆ ಭುಜೊ ದೀವ್ನ್ ಅಶ್ವಾ೦ಕ ಪ್ರೇರಿತ ಕೊರ್ನ್ ಚಕ್ರ ಭಾಯಿರಿ ತಂಡುಚ್ಯಾ ಪ್ರಯತ್ನ ಕೆಲ್ಲೆ ... ಜಾಯ್ನಿ . ಯುದ್ಧ ನಿಯಮಾ ಪ್ರಕಾರ ಧ್ವ೦ಧ್ವ ಯುದ್ಧ ಕರ್ತಾನಾ , ಯೋಧಾನಿ ರಥಾರಿ ಅಸ್ಸುಕಾ .. ನಾತ್ಲೆರಿ ನೆಲಾರಿ ಅಸ್ಸುಕಾ ... ಎಕ್ಲೇನ ರಥಾರಿ .. ಅನ್ನೇಕ್ಲೊ ನೆಲಾರಿ ಅಸ್ಲೆರಿ ತಗೆಲೆ ವೊಟ್ಟು ಯುದ್ಧ ಕೋರು ನಜ್ಜ . ಹ್ಯೆಂಚಿ ಯುದ್ಧ ಧರ್ಮು ಕರ್ಣಾನ ಅರ್ಜುನಾ ಕ ಸಂಘುನ್ ಉಡ್ಘಾಸು ಕೆಲ್ಲೆ ... " ಅರ್ಜುನಾ ... ! ಮಹಾವೀರ ಜಾವ್ನ್ಅಷ್ಶಿಲೋ ತುಕ್ಕಾ , ಹಾಂವೆ ತುಕ್ಕಾ ಯುದ್ಧ ಧರ್ಮ ಸಂಘುಕಾ ಮೋಣು ನಾ ... ಹಾಂವೆ ನೆಲಾರಿ ಅಶಿಲೆ ತೆದನಾ ... ಯುದ್ಧ ಕೊರ್ಚೆ ಸ೦ಮ್ಮ ನಯ್ ... ಧರ್ಮುಯೀ ನಯ್ . ಹಾಂವೆ ರಥ ಚಕ್ರ ವೈರಿ ಹಾಡುತಾ೦ಯಿ ... ಯುದ್ಧ ರಾಬ್ಬೊಚ್ಯೆ ನ್ಯಾಯು ಅಸ್ಸ . " ಪಕ - ಪಕ ನೇ ಹಾಸ್ಲೊ ಕೃಷ್ಣು . .... " ಅಸಹಾಯ ಶೂರ .. ! ಮಹಾವೀರ .. ! ಕರ್ಣಾ .. ! ಧರ್ಮು ಉಡ್ ಘಾಸು ಅತ್ತ ಅಯಿಲೊವೇ .. ? ನ್ಯಾಯು ತುಕ್ಕಾ ಅತ್ತ ಜಾವ್ಕಾ ಝಲ್ಲೋ ವೇ .. ? ಅತ್ತ ಝಲ್ಲ್ಯಾರಿ ತುಕ್ಕಾ ... ಧರ್ಮು , ನ್ಯಾಯು , ನೀತಿ , ನಿಯಮ ಉಡ್ಘಾಸು ಜಲ್ಲೆಲ್ಯಾಕ ಮಸ್ತ ಸಂತೋಷು ಝಲ್ಲೋ . ಅಂಗರಾಜಾ .. ! ಧಗ - ಧಗ ನಿ ಜೊಳ್ ಚ್ಯೆ ಉಜ್ಜೇ೦ತು ಲೊಕ್ಕಂಡ ಹೂನ ಜಾವ್ನ್ ಕಂಭಾರಾಲೆ ಸುತ್ತೆ ಪೆಟ್ಟಾಕ ಕಷಿ ಜಾವ್ಕಾ ಕೀ ತಷ್ಶಿ ರೂಪ ಘೆತ್ತಾ ... ತಷ್ಶಿ ... ತುಗೆಲೆ ಜೀವನ ಯೀ ತಶೀ೦ಚಿ ಝಲ್ಲಾ ... ಮಹಾವೀರಾ .. ! ಕುರು ಪಾಂಡವಾಲೆ ಕಾಣಿ , ಸ್ನೇಹ , ಪ್ರೀತಿ ವೈಶಮ್ಯ ತುಕ್ಕಾ ಗೊತ್ತಸ್ಸ . ಕೋಣ ಧರ್ಮವಂತ ... ಕೋಣ ಅಧರ್ಮವಂತ ಮೊಣುಯಿ ಗೊತ್ತಸ್ಸ . ಅಧರ್ಮಾಕ ಶಕ್ತಿ ಚಡ .. ತಷ್ಶಿ ಜಾವ್ನ್ ರಾವಣಾಕ ಧಾಹ್ ಮತ್ತೆ ತೋಂಡ , ವೀಸ ಹಾಥ ... ಶೀ೦ಗ ಚೂಪ ಜಾವ್ನ್ ಅಸ್ಲೆರಿಯೀ ಶೀಘ್ರ ಪ್ರತಿಕ್ರಿಯೆ ನಾತ್ತಿಲೆ ಗಾಯಿ .. ವಾಗಾ ಕ ಬಲಿ ಝತ್ತಾ . ತ್ಯೆ ನಿಮಿತ್ಯ ವಾಗಾಕ ಕೊಣಯ್ ಪೂಜಾ ಕರ್ನಾತಿ . ಗಾಯ್ ಕ ಕೊಣಯ್ ತಿರಸ್ಕಾರ ಕರ್ನಾತಿ ಅಂಗರಾಜಾ ... ! ಮನುಷ್ಯಾಲೆ ಬುದ್ಧಿ ಶಕ್ತಿ ಅನಿ ದೈಹಿಕ ಶಕ್ತಿ ಉಜ್ಜೇ ಮ್ಹಣ್ಕೆ ಉಪಯೋಗು ಝತ್ತಾ . ಉಜ್ಜೆ ನಿಮಿತ್ಯ ಸಾತ್ವಿಕ ಜಾವ್ನ್ ಆಹಾರ ಸಿಜೋನ್ ಖಾವ್ಯೆತ ತಶೀ೦ಚಿ ... ಸುತ್ತು ಮುತ್ತು ಅಶಿಲೆ ಘರವಂದ ಲಾಸ್ಸುನ್ ಘಾಲ್ನ್ ... ಗೊಬ್ಬೊರು ಕೊರ್ಯೆತ . ಕರ್ಣಾ .. ! ತುಂವೆ ತುಗೆಲೆ ಶಕ್ತಿ ಘೇವ್ನ್ ದೊನ್ನಿಯಿ ಕಾಮ ಕೆಲ್ಲಾ . ತುಗೆಲೆ ಎಕ್ಲಾಲೆ ಸ್ನೇಹಾ ನಿಮಿತ್ಯ .. ಕುರು ಪಾಂಡವಾಂಗೆಲೆ ವೈಷಮ್ಯ ವಡ್ಡಯಿಲಾ ... ತುಗೆಲೆ ಎಕ್ಲಾಲೆ ನಿಮಿತ್ಯ ಹೇ ಕುರುಕ್ಷೇತ್ರ ಯುದ್ಧಾ೦ತು ಸಹಸ್ರ ಸಹಸ್ರ ಕ್ಷತ್ರಿಯ ಕುಲ ನಾಶ ಝತ್ತಾ ಅಸ್ಸ . ಅಸಂಖ್ಯ ಸೈನಿಕ ಲೋಕು ಮತ್ತಿ ಜಾವ್ನ್ ಗೆಲ್ಲೆಂತಿ . ಹಂತು .. ತುಗೆಲಿ ಪ್ರತಿಷ್ಟೇ ಕ ಮಾತ್ರ ಹ್ಯೇ ಯುದ್ಧ ಸಕ್ಕಡ ಝಲ್ಲಾ . ತುಗೆಲೆ ಸ್ನೇಹ ಧರ್ಮ , ಸ್ವಾಮಿ ಭಕ್ತಿ ...ಹ್ಯೇ ಪೈಶಾಚಿಕ ... ಮಾರಣ ಹೋಮು ಝಲ್ಲಾ . ಲಾಕ್ಷಾ ಗೃಹಾ೦ತು ಪಾಂಡವ ಲಾಸ್ಸುನ್ ವಧ ಕರ್ತನಾ .. ತುಂವೇ ' ಅನ್ಯಾಯು ' ಮೋಣು ಸಂಘನಿ .. ! ಮಾಯಾ ದ್ಯೂತ ಖೇಳ್ನ್ ಧರ್ಮಜಾಲೆ ಚರ ಚಿರ ಸ್ಥಿರ ಆಸ್ತಿ , ಧುರ್ಯೋಧನಾನ ಲೂಟಿ ಕರ್ತನಾ .. ' ಅಧರ್ಮ ' ಮೋಣು ರಬ್ಬಯಿನಿ . ಕುಲವಧು ದ್ರೌಪದಿಲೆ ಕೆಷ್ಟ ಧೋರ್ನ್ ... ಭರ್ಲೆಲೆ ಸಭೆ೦ತು ತಂಡುನ್ ಹಾಡ್ತಾನಾ .. ' ಅಕಾರ್ಯ ' ಮೋಣು ಸಂಘನಿ . ಸಭಾ ಮಧ್ಯೆ ರಬ್ಬೊನು ... ಪಾಂಡವ ಪತ್ನಿಲೆ ಸೆರಗ ಧೋರ್ನ್ .. ವಿವಸ್ತ್ರ ಕೊರುಂಕ ಪ್ರಯತ್ನ ಕರ್ತಾನಾ ತುಂವೇ ' ಅನ್ಯಾಯು ' ಮೋಣು ಸಂಘನಿ .. ದೊನ್ನಿ ಪೋಟಿ ದ್ಯೂತ ಖೆಳ್ತನಾ ' ಅಧರ್ಮ ' ಮೋಣು ಸಂಘನಿ ... ಅರಣ್ಯ ವಾಸ , ಅಜ್ಞಾತ ವಾಸ ಕಯಿದ ಕೊರ್ನ್ ಯೇವ್ನ್ ... ಪಾಂಚ ಪಟ್ಟಣ ದೀವ್ನ್ ಯುದ್ಧ ರಬ್ಬೊಕಾ ಮೋಣು ನಿಂಮ್ಗೀತನಾ ... ತುಂವೇ ' ಧರ್ಮಾ ' ವಿಷಯಾನ ಚಕ್ಕರ ಶಬ್ಧ್ ಉಲ್ಲಯಿನಿ . ಕರ್ಣಾ ..! ಖಂಯ್ ಅಸ್ಸ ಧರ್ಮು .. ? ಖಂಯ್ ಅಸ್ಸ ನ್ಯಾಯು .. ? ಅಭಿಮನ್ಯು ಕುಮಾರಾಕ ಕುರುವೀರ ತುಮ್ಮಿ ಪೂರಾ ಲೋಕಾನಿ ವೊಟ್ಟು ಜಾವ್ನ್ ಚಿತ್ರ ಹಿಂಸ ಕೊರ್ನ್ ವಧ ಕರ್ತಾನಾ ... ಖಂಯ್ ಅಷ್ಶಿಲೆ ಧರ್ಮು ನ್ಯಾಯು .. ? ದಾನ ವೀರ ಕರ್ಣಾ .. ! ಸಕ್ಕಡಾಕ ತುಂಚಿ ಕಾರಣ ಮೋಣು ಹಾಂವ ಸಂಘ್ತಾನಾ ... ತೂ ಮಿತ್ರ ಜಾವ್ನ್ ಧರ್ಮು ನ್ಯಾಯಾ ವಿಷಯಾನ ಬುದ್ಧಿ ಸಂಘನಿ ಮೋಣು ಹಾಂವ ಸಂಘತಾ .. " ಮ್ಹಳ್ಳಲೋ ಕೃಷ್ಣ . ಪರಶುರಾಮಾಲೆ ಶ್ರಾಪಾ ನಿಮಿತ್ಯ ... ಬ್ರ೦ಹ್ಮಾಸ್ತ್ರ , ದೇದೀಪ್ಯಮಾನ ದಿವ್ಯಾಸ್ತ್ರ ಉಡ್ಘಾಸು ಏನಿ ಕರ್ಣಾಕ . ರಥ ಚಕ್ರ ವೈರಿ ಉಬ್ಬಾರ್ಚೆ ಪ್ರಯತ್ನಾರಿ ಅಷ್ಶಿಲೋ ಕರ್ಣ . " ಅರ್ಜುನಾ .. ! ಕಸಲೆ ಪೊಳೈತಾ .. ! ದಿವ್ಯಾಸ್ತ್ರ ಕಾಣು ಕರ್ಣಾ ಲೆ ಜೀವನ ಸಮಾಪ್ತ ಕರಿ .. ! " ಮ್ಹಳ್ಳಲೊ ಕೃಷ್ಣ . ಅರ್ಜುನಾನ ' ಅಂಜಲಿಕಾಸ್ತ್ರ ' ಮ್ಹಳ್ಳೆಲೆ ದಿವ್ಯಾಸ್ತ್ರ ಕರ್ಣಾ ದಿಕಾನ ಲಕ್ಷ್ಯ ಕೊರ್ನ್ ಸೊಳ್ಳೆ . ತ್ಯೆ ಅಸ್ತ್ರ ಫಟೀಕ ಲಾಗ್ಗುನ್ ಹರ್ದೆ೦ತುಲೇನ ಪಿಸೊಳ್ನ್ ಭಾಯಿರಿ ಅಯಿಲೆ . ಕರ್ಣಾಕ ಏಕ ಮಿನುಟ್ ಶ್ವಾಸು ರಾಬಲೆ ಮ್ಹಣ್ಕೆ ಅನುಭವು ಝಲ್ಲೋ . ಕರ್ಣಾನ ಘು೦ವ್ನು ಅರ್ಜುನಾ ದಿಕಾನ ಪೊಳೈಲೆ ... ಆನ್ನೇಕ ದಿವ್ಯಾಸ್ತ್ರ ಯೇವ್ನು ಕರ್ಣಾ ಲೆ ಹರ್ದೆಕ ಲಾಗ್ಲೆ . ಹೂನ ರಗತ ಕಾರಂಜಿ ಶೆ ಉಕ್ಕುನ್ ಅಯಿಲೆ . ಹತ್ತಾನ ಬಾಣ ಹುಂಮ್ಟಾನ್ ಕಳ್ಳೆ ... ಆಯ್ಯಿಲೆ ದೂಕಿ ತಡಸೂನ್ ಘೇವ್ನ್ ... " ಕೃಷ್ಣಾ .. " ಮೋಣು ಕರ್ಣಾನ ಅಂತರ್ ಧ್ಯಾನ ಕೊರ್ನ್ ಅಪ್ಪಯಿಲೆ . ಅರ್ಜುನಾಕ ರಥಾರಿ ಸೋಣು .. ಕೃಷ್ಣು ರಥಾರಿ ದುಕುನ್ ದೇವ್ನ್ ಕರ್ಣಾ ಲಗ್ಗಿ ಅಯಿಲೊ . " ಕರ್ಣಾ .. ! ಮಕ್ಕಾ ಅಪ್ಪಯಿಲ್ವೇ .. ? " ಕರ್ಣಾಕ .. ಕೃಷ್ಣಾ ಪೊಳೊನ್ .. ದೊಳೆಂತು ಧರಾಂಧರಿ ಉದ್ದಾಕ ಅಯಿಲೆ ... " ಕೃಷ್ಣಾ ಸರ್ವ ವಿಷಯು ಗೊತ್ತಸ್ಸುನು ಹ್ಯೇ ಪಾಪಾಂತು ದುಕೂನ್ ವಿಮುಕ್ತಿ ದೀನಿ ತೂ೦ವೇ ಮಕ್ಕಾ ... ! ಕಿತ್ಯಾ ಕೃಷ್ಣಾ .. ? ಏಕತ್ ವೇಳಾ .. ತುಂವೆ ಮಕ್ಕಾ ಸುರ್ವೆಕಚಿ ಸಂಘಿಲ್ ಝಲ್ಲೇರಿ .. ಮಿಗೆಲಿ ಚರಿತ್ರಾ ವಿಂಗಡ ಝತ್ತಷಿಲಿ .. ಜನ್ಮು ದಿಲ್ಲೆಲಿ ಆವ್ಸು .. ಸುತ್ತು ರಬ್ಬಿಲೆ ಬಂಧು ಬಾಂಧವಾನಿ ಮೆಳ್ನ್ ಮಕ್ಕಾ ದೂರ ದವರ್ಲೊ ... ಕಿತ್ಯಾ ಕೃಷ್ಣಾ .. ? ಹೇ ಮಿಗ್ಗೆಲೆ ಪ್ರಾರಬ್ದ ಕೀ .. ? ಹೇ ಫುಳ್ಳೆ ಜನ್ಮಾ ಕರ್ಮ ಕೀ .. ? ಸಕ್ಕಡ ಅಸ್ಸುನ್ ಕೊಣಯ್ ನಾ ಝಲ್ಲೀ೦ತಿ ಕಿತ್ಯಾ .. ? ಮಿಗೆಲೆ ಜೀವನ ಅಷ್ಶಿ ಕಸಲೆಕ ಝಲ್ಲೆ .. ? ಮಕ್ಕಾ ತುಗೆಲಿ ಜವಾಬ ಜಾಯಿ ಕೃಷ್ಣಾ .. ! "
" ದಾನ ವೀರ ಕರ್ಣಾ ... ಅತ್ತ ದುಃಖ ಪಾವ್ನುಕ್ಕಾ ಕರ್ಣಾ ... ಅಷ್ಶಿ ಝತ್ತಾ ಮೋಣು ಮಕ್ಕಾ ಸುರ್ವೆಕಚಿ ಗೊತ್ತಶಿಲೆ . ಹಾಂವೆ ತುಕ್ಕಾ ಸುರ್ವೆಕಚಿ ಸಂಘಲಾ ... ಝಲ್ಲೇರಿ , ಧುರ್ಯೋಧನಾ ವೈರಿ ಅಷ್ಶಿಲೆ ಸ್ವಾಮಿ ಭಕ್ತಿ ನಿಮಿತ್ಯ ಕೊಣಾಲೇಯಿ ಉತ್ತರ ಅಯಿಕನಿ ತುಂವೆ . ತೂ .. ತುಗ್ಗೆಲ್ ಧರ್ಮ .. ಕರ್ಮಾಕ ನಂಮ್ಗೂನ್ ಅಶಿಲೋ , ಮಹಾ ಕರ್ಮ ಯೋಧ ತೂ .. ತುಕ್ಕಾ ಶಾಶ್ವತ ಜಾವ್ನ್ ಸ್ವರ್ಘ ವಾಸ ಮೇಳೋ ... ತೂ ಕುಂತಿಲೊ ಪೂತು ಮೋಣು .. ಸೋತ ಕುಲಾಚೋ ನಯ್ ಮೋಣು ಪ್ರಪಂಚ ಸಾಂಗ್ತಾ "
" ವಾಸುದೇವಾ .. ! ತೂ ಕೋಣ .. ಮ್ಹಳ್ಳೆಲೆ ಸತ್ಯ ಮಕ್ಕಾ ಅತ್ತ ಕಳ್ಳೆ .. ಋಷ್ಯಶ್ರ೦ಗ ಮಹರ್ಷಿ ನ ದಿಲ್ಲೆಲೆ ವರ ಪ್ರಕಾರ ಮಿಗೆಲೆ ಅಂತ್ಯ ಕಾಲಾಂತು ಪರಮಾತ್ಮಾಲೆ ದರ್ಶನ ಝತ್ತಾ ಮೋಣು ಸಂಘಿಲೆ ... ಪರಮಾತ್ಮಾ .. ! ಪರಂಧಾಮಾ .. ! ಜಗದೀಶ್ವರಾ .. ! ಶ್ರೀಮನ್ ನಾರಾಯಣಾ .. ! ಧರ್ಮ ಸಂಸ್ಥಾಪನಾಚಾರ್ಯಾ .. ! ಹಾಂವ ಧನ್ಯ ಝಲ್ಲೋ .. "
" ಕರ್ಣಾ .. ! ಸೂರ್ಯ ಚಂದ್ರಾನಿ ಆಸ್ಚಯೆ ತೆದೊಳ್ ತಾಯಿ ತುಗೇಲಿ ಕೀರ್ತಿ ಅಜರಾಮರ ಜಾವ್ನ್ ಆಸ್ತಾ . ತುಗೆಲೆ ದಾನ ಗುಣ ಚರಿತ್ರೆ೦ತು ಕೊಣಾಯ್ ವಿಸರ್ನಾತಿ"
" ವಾಸುದೇವಾ .. ! ಅರ್ಜುನ್ ಮಿಗೆಲೆ ಭಾವು ... ತಗೆಲೆ ಹಾತ್ತಾನ ಮಕ್ಕಾ ಮರಣ ಕಸಾಲೆಕ ದಿಲ್ಲೆ .. ? "
" ಅರ್ಜುನ್ ತುಗ್ಗೆಲ್ ಮರಣಾಕ ಕಾರಣ ನಂಯ್ ... ಕರ್ಣಾ .. ! ತುಗೆಲೆ ಮರಣಾಕ ಕಾರಣ ಸಹ ಜನ ಆಸ್ಸತಿ .. ಪರಶುರಾಮ ಬ್ರಹ್ಮಾಸ್ತ್ರ ಶ್ರಾಪು ... ವೇದ ಬ್ರಾಹ್ಮಣ ಶ್ರಾಪು ... ದೇವೇಂದ್ರಾನ ಕವಚ ಕುಂಡಲ ಹರಣ ... ಕುಂತಿ ದೇವಿಕ ದಿಲ್ಲೆಲೆ ವರದಾನ ... ಶಲ್ಯ ರಾಜಾಲೆ ಕಪಟ ಸಾರಥ್ಯ ... ಕಡೆರಿ ಅರ್ಜುನಾಲೆ ಅಸ್ತ್ರ ಸಂಧಾನ ... ಹ್ಯೇ ಸಹ ಜನಾಲೆ ನಿಮಿತ್ಯ ತುಗೆಲೆ ಮರಣಾಕ ಕಾರಣ ಝಲ್ಲಾ . " ಕರ್ಣಾನ ದೊನ್ನಿ ಹಾಥ ವೊಟ್ಟು ಕೊರ್ನ್ ಕೃಷ್ಣಾ ಕ ನಮನ ಕೆಲ್ಲೆ . ಕೃಷ್ಣಾ ಲೆ ರೂಪ ಮನಾ ದೊವೊರ್ನ್ ಘೆತ್ಲೆ ... ನಿಶ್ಚಲ ನಿರ್ಮಲ ಯೋಗ ಮುದ್ರಾ ಧಾರಣ ಕೆಲ್ಲೆ . ಓ೦ಮ್ಕಾರ ಸಂಗ್ತಾಚಿ ಪ್ರಾಣ ವಾಯು ಅಕಾಶಾಂತು ಲೀನ ಕೆಲ್ಲೆ .
" ಕೀರ್ತಿಮಾನ್ ಭಾವ .. " ಕೃಷ್ಣಾ ನ ಆಶೀರ್ವದು ಕೆಲ್ಲೊ . ಸೂರ್ಯಾಸ್ತ ಝಲ್ಲೆ .. ತ್ಯೆ ದಿವಸಾ ಯುದ್ಧ ರಾಬಲೆ . ಆಕಾಶಾರಿ ದೇವೇಂದ್ರ ಸಮೇತ ದೇವಾದಿ ಲೋಕ ಯೇವ್ನ್ .. ಕರ್ಣಾಲೆ ಅಂತಿಮ ಜೀವನಾ ನಾಟಕ ಪೊಳೊನ್ ರಾಬಲೆ೦ತಿ . ಜಯ ಜಯಕಾರು ಕೊರ್ನ್ ವ್ಯಾಸ ಮಹರ್ಷಿಕ ನಮನ ಕೆಲ್ಲೆ . ಸಂಜಯಾನ ಯುದ್ಧ ವೃತ್ತಾಂತ ಸಾಂಗ್ತಾನಾ ದೋಳೆ ಬೋರ್ನ್ ಆಯಿಲೆ . ಪುತ್ರ ವ್ಯಾಮೋಹಿ ದೃತ ರಾಷ್ಟ್ರಾಕ ... .." ಅನಿ ಕೋಣ ಅಸ್ಸ ! ಧುರ್ಯೋಧನಾ ಬದಿನ ... ತಾಕ್ಕಾ ಸಹಾಯು ಕೊರುಂಕ .. ?" ಯಚ್ಚಾನಾ ಶುರು ಝಲ್ಲಿ ಧ್ರತರಾಷ್ಟ್ರಾಕ .
ಉಮಾಪತಿ
No comments:
Post a Comment