MAHABHARATHA
Part - 27 ( Konkani Bhashentu )
GO GRAHANA .... ಗೋ ಗ್ರಹಣ
ಪಾಂಡವಾಂಗೆಲೆ ಅರಣ್ಯ ವಾಸ ಅಜ್ಞಾತ ವಾಸ ಕೈದ ಜಾಯ್ತ ಆಯಿಲೆ . ಅಜ್ಞಾತ ವಾಸ ಕಶೀ ಪುಣಿ ಭಂಗ ಕೋರ್ಕಾ ... ಅನಿ ಕಶೀ ಪುಣಿ ವಾಪಾಸ್ ಪಾಂಡವಾಂಕ ಅರಣ್ಯ ವಾಸಾಕ ಪೆಟೋಕಾ ಮ್ಹಳ್ಳೆಲೆ ಉದ್ದೇಶ್ಯಾರಿ , ಗುಪ್ತ ಚರ ಸಂಘಟನಾ ಆನಿಕಾಯ್ ಮಜಬೂತ್ ಕೆಲ್ಲಾ . ಕೊಣಾಕಯ್ ಪಾಂಡವಾಂಗೆಲೆ ಖಬ್ಬರ್ ಮೇಳ್ನಿ . ಮುಕಾವಾಯಿಲೆ ಕಾರ್ಯ ಕಶಿ ಕೊರ್ಚೆ ಮೋಣು ಚರ್ಚೆ ಕೊರುಂಕ ಏಕ ಸಭಾ ಅಪ್ಪಯಿಲಿ . ಧುರ್ಯೋಧನಾ , ಬಾಹ್ಲಿಕ , ಭೀಷ್ಮ , ಸೋಮದತ್ತಾ , ಭುರಿಶ್ರವ , ಧ್ರಥರಾಷ್ಟ್ರ , ವಿದುರ , ದ್ರೋಣ ,ಕೃಪಾಚಾರ್ಯ , ಅಶ್ವತ್ತಾಮ , ಕರ್ಣ , ದುಃಶ್ಯಾಸನ , ಆಪ್ತ್ ಮಿತ್ರ ತ್ರಿಗರ್ತಪುರ ದೇಶಾ ರಾಯು ಸುಶರ್ಮಾ ಉಪಸ್ತಿಥ ಅಶಿಲೆ . ಗುಪ್ತ ಚರ ದಳ ನಾಯಕ ಸರ್ವ ಆಯ್ಯಿಲೆ .
ದುಃಶ್ಶಾಸನ : " ಇತ್ಲೆ ಗುಪ್ತಚರ ದಳ ಅಸ್ಸುನಯ್ ಪಾಂಡವ ಖಂಯ್ ಆಸ್ಸತಿ ಮೋಣು ಕಳ್ನಿ ಝಲ್ಲೇರಿ ... ಬಹುಶಃ ಪಾಂಡವ ಮೋರ್ನು ಅಸ್ಸುಕಾ . ಭರತ್ ಸಮ್ರಾಜ್ಯಾ೦ತು ಅಮ್ಗೆಲೆ ಗುಪ್ತ ಚರ ಲೋಕಾಂಕ ಕಳ್ನಾ ನಾತ್ತಿಲೊ ವಿಷಯು ನಾ . ಅಶಿ ಅಸ್ಸೂನ್ ಹನ್ನಿ ಮೇಳ್ನಾ ನಾತ್ತಿಲೊ ... ವಿಷಯು ಆಮ್ಕಾ ಸರ್ವಾಂಕ ಲಜ್ಜಾಸ್ಪದ ವಿಷಯು .. "
ಭೀಷ್ಮ : " ತಶಿ ನಯ್ ದುಃಶ್ಯಾಸನಾ .. ! ಪಾಂಡವ , ದೈವಾಂಶ ಶಕ್ತಿರಿ ಜನ್ಮ್ಮಾ ಆಯ್ಯಿಲೆ .... ಕಷ್ಠಾಕ ಭೀವ್ನ್ ಧಾಂವ್ನ್ ವತ್ತಲೇ ನಯ್ . ದೈವ ಶಕ್ತಿ ನಿಮಿತ್ಯ ಜೀವಂತಿ ಅಸ್ಸ ತಿ ... "
ಕೃಪಾಚಾರ್ಯ : " ದ್ವಾರಕಾ ನಗರಿ ಸಮ್ಮ್ ಶೋಧ ಕೆಲ್ಲಾ ಕೀ ? "
ಶಕುನಿ : " ಮಾದ್ರ ದೇಶಾಂತು , ಪಾಂಚಾಲ ದೇಶಾಂತು .. ಪೊಳೈಲಾಕೀ
? "
ಯೆಕ್ಲೊ ಗುಪ್ತಚರು .. "ಪ್ರಭು ..!ಯೇಕು ವಿಷಯು ಕಸಲೆ ಮ್ಹಳ್ಳೆರಿ ... ವಿರಾಟ ದೇಶಾಂತು ಕೀಚಕ ಸೇನಾನಿಕ , ಮಲ್ಲ ಯುದ್ಧ ಕೋರ್ನು .. ಕೋಣಾಕಯ್ ಗುರ್ತು ಮೇಳ್ನಾ ತಶಿ ಮಾರ್ನ್ ಘಲ್ಲಾ ಕೋಣ್ ಕೀ .... ! " ಕಾರಣ ಕಸಲೇ .. ? " ನಿಮ್ಗಿಲೆ ಧುರ್ಯೋಧನಾ ನ ... " ವಿರಾಟ ರಾಯಾ ಅಂತಃಪುರಾಂತು ಎಕ್ಲಿ ಸುಂದರ್ ಸ್ತ್ರೀ .. ಸೈರ೦ಧ್ರಿ
ಕಾಮಾ ಕ ಅಶಿಲಿ ಮ್ಹಣತಾತಿ ... ತಿಕ್ಕಾ ಪಾಂಚ ಗಂಧರ್ವ ಬಮ್ಮಣ೦ ಖ೦ಯ್ ....; ಕೀಚಕ ಸೇನಾನಿ ತ್ಯೆ ಸುಂದರ್ ಸ್ತ್ರೀ ವೈರಿ ಮೋಹಿತ ಜಾವ್ನ್ ಅಶಿಲೋ ಮ್ಹಣತಾತಿ . ಹ್ಯೇ ಕಾರಣಾ ನಿಮಿತ್ಯ ತಿಗೆಲೆ ಬಮ್ಮಣಾ೦ನಿ ... ಅತಿ ಅಪಮಾನ ಜನಿಕ ಜಾವ್ನು ... ನರ್ತನ ಶಾಲೆಂತು ಮಾರ್ನ್ ಘಾಲ್ಲಾ ಮೋಣು ಸುದ್ದಿ . ಪ್ರಭೂ .. ! ಜೀಮೂತ ಮಲ್ಲಾ ಕ , ಅಂತಃಪುರವೂ ವಾಸರಿಂತು ಕಾಮ ಕರ್ತಾಲೊ ಯೆಕ್ಲೊ ಸಾಧಾರಣ ರ೦ನ್ಪೇನ ... ಮಲ್ಲ ಯುದ್ಧ ಕೊರ್ನ್ ದಿವಿಶಿ ಮಾರ್ಲಾ ಖಂಯ್ ... ಹ್ಯೇ ಸಕ್ಕಡ್ ಪೊಳೈತಾನಾ ... ಭೀಮ ಸೇನಾ ಮಹಾರಾಜಾನಚಿ ... ಕೀಚಕಾ ಕ ದಿವಿಶಿ ಮಾರ್ಲೆ ಕೀ ..! ಮೋಣು
ಸಂದೇಹು ಝತ್ತಾ . ಆನಿ ಕೋಣಾಲೇ ನಿಮಿತ್ಯ ಹ್ಯೇ ಕಾಮ ಕೋರು೦ ಸಾಧ್ಯ ನಾ . ಮಕ್ಕಾ
ದಿಸ್ತಾ ..... ಪಾಂಡವ ವಿರಾಟ ದೇಶಾಂತು ಆಸ್ಚ್ಯಾ ಪೂರೊ ಮೊಣು ದಿಸ್ತಾ ... "
ಧುರ್ಯೋಧನ : "ಶಹಬ್ಬಾಶ್ ..! ತೂಗೇಲೆ ಬುದ್ಧಿ , ವ್ಯವಹಾರ ಜ್ಞಾನ .. ಮಕ್ಕಾ ಖುಷಿ ಝಲ್ಲಿ ... ದುಃಶ್ಯಾಸನಾ ... ! ಹ್ಯೇ ಗುಪ್ತಚರಾಕ ಏಕ ಹಜಾರ ಭಾಂಗ್ರಾ ನಾಣ್ಯ ದೀವ್ನ್ ಪೆಟೋನ್ ದೀ .. "
ಹ್ಯೇ
ಸುದ್ದಿ ನಿಮಿತ್ಯ ಪಾಂಡವ ಖಂಯ್ ಅಸ್ಸತಿ ಕೌರವಾಂಕ ಕಳ್ಳೆ . ವಿರಾಟ ದೇಶಾಂತು ಗೋ ಸಂಪದ ಪುಷ್ಕಳ ಜಾವ್ನ್ ಅಸ್ಸ . ಯುದ್ಧ ಕೊರ್ಚೆ ಬದ್ಲಾ ... ಗೋ ಸಂಪದ ಲೂಟಿ ಕೆಲ್ಲಾರಿ ... ಗೋ ಗ್ರಹಣ ಕೆಲ್ಲೇರಿ ... ವಿರಾಟ ರಾಯು ಯುದ್ಧಾಕ ಯೆತ್ತಲೊ ... ತಾಂಗೆಲೆ ವೊಟ್ಟು ... ರಾಯಾಕ ಸಹಾಯು ಕೊರಚ್ಯಾಕ ಕೊಣಾಯ್ ಎಕ್ಲೊ ಪಾಂಡವ ಯೆತ್ತಾಲೊ ಮೋಣು ಧುರ್ಯೋಧನಾನ ಆಲೋಚನ ಕೆಲ್ಲಿ . ಝಲ್ಲೇರಿ ವಿರಾಟ ರಜ್ಯಾ೦ತು ದೋನಿ ಜಾಗೇರಿ ಗೋ ಖಜಾನಾ ಆಸ್ಸತಿ . ಏಕ ಉತ್ತರ ದಿಶೆಂತು .. ಆನ್ನೇಕ ದಕ್ಷಿಣ ದಿಶೆಂತು . ದಕ್ಷಿಣ ದಿಶೆ ದುಕುನ್ , ತ್ರಿಗರ್ತಿ ಪುರ ರಾಜ್ಯಾ ಚೆ ರಾಯು ಸುಶರ್ಮಾನ ಆಕ್ರಮಣ ಕೊರ್ಚೆ .. ಅನಿ ಉತ್ತರ ದಿಶೆ ದುಕುನ್ ಧುರ್ಯೋಧನಾನ ಆಕ್ರಮಣ ಕೊರ್ಚೆ ಮೋಣು ಸಭೆ೦ತು ನಿರ್ಣಯ ಕೆಲ್ಲೊ . ಕೀಚಕಾಲೆ ಹತ್ತಾ೦ತು ದೋನಿ ಪೊಟಿ ಯುದ್ಧಾ೦ತು ಪರಾಭವ ಝಲ್ಲಲೊ ಸುಶರ್ಮಾ ಕ ... ಅತ್ತ ಭಾರಿ ಖುಷಿ . ಅತ್ತ ಕೀಚಕು ನಾ ... ತಾಣೆ ಮೆಲ್ಲೆಲೆ ವಿಷಯು ಅಯಿಕುನ್ ಭಾರೀ ಖುಷಿ ಝಲ್ಲಿ . ಅತ್ತ ಮೆಳ್ಳಲೊ ಸಂಧರ್ಭ ಭಾರಿ ಲಾಯಕ್ ಅಸ್ಸ ಶೋಧ ಪ್ರತಿಶೋಧ ಕೊರುಂಕ ಏಕ ಲಾಯಕ್ ಸಂಧರ್ಭ ಮೆಳ್ಳೆ ಮೊಣು ಲೆಕ್ಲೆ .
ವಿರಾಟ ರಾಜ್ಯಾಚೆ ಉತ್ತರ ಭಾಗಾ ದುಕುನ್ ಆಕ್ರಮಣ ಕೊರುಂಕ್ ಕೌರವ ಸೈನ್ಯ ಸಿದ್ಧ ಝಲ್ಲೆ . ತ್ಯೇ ಕಾಲಾಂತು .. ಗೊರ್ವಾಂಕ .. ಘರಾ ಏಕ ಸಂಪದ ಮೋಣು ಲೆಕ್ತಾಶಿಲೀಂತಿ . ಕಿತ್ಲೆ ಗೊರ್ವ೦ ಅಸ್ಸ ಕೀ .. ತಿತ್ಲೆ ಶ್ರೀಮಂತ ಮೋಣು ಲೆಕ್ತಾಶಿಲೀಂತಿ . ಕ್ಷತ್ರಿಯ ಲೋಕು ಗೊರ್ವಾ ಸಂಪದಾ ಖತಿರಿ ಆನ್ನೇಕ ರಾಯಾಲೆ ವೊಟ್ಟು ಯುದ್ಧ ಕೊರ್ಚೆ ಯೆಕ ಗೌರವಾನ್ವಿತ ಕಾಮ ... ಅನಿ ತ್ಯೇ ಕಾಲಾ ಧರ್ಮ ಜಾವ್ನ್ ಅಶಿಲೆ . ಯುದ್ಧ ಝತ್ತರಿ ಗೊರ್ವಾಂಕ ಅಂಬುಣ್ ಘೇವ್ನ್ ವತ್ತಾಶಿಲೀಂತಿ . ಭೂಮಿ , ಗೊರವಂ ,ವ್ಹರ್ಡಿಕ ಜಾಯ್ನಾ ನತ್ತಿಲೆ ಸ್ತ್ರೀ ಲೋಕಾಂಕ , ದುಡ್ಡು , ಬದಿಕ , ಭಂಗರ , ವಜ್ರ , ವೈಢೂರ್ಯ ... ವಿಜಯಿ
ಝಲ್ಲಲೋ ರಾಯು ತಗೆಲೆ ಖಜಾನೆ೦ತು ಬೋರ್ನ್ ಘೆತ್ತಶಿಲೋ ... ಹ್ಯೇ ಅಧರ್ಮ ನಯ್ .
ಸುಶರ್ಮ ರಾಯಾನ ದಕ್ಷಿಣ ದಿಶೆ೦ತು ಗೋ ಗ್ರಹಣಾಕ ಆಕ್ರಮಣ ಕೆಲ್ಲೆ . ಗೋಪಾಲಕ , ಸಾಧಾರಣ ಜನಾಂಕ ಭಿವೊನ್ ಗೊರ್ವಾಂಕ ಜಪ್ತಿ ಕೆಲ್ಲೆ . ತುರಂತ್ ಲೋಕಾನಿ ವಿರಾಟ ರಾಯಾಕ ವಿಷಯು ಕಳಿತಾ ಹಳ್ಳೆ . " ಮಹಾರಾಜಾ .. ! ತ್ರಿಗರ್ತ ದೇಶಾ ರಾಯು ಸುಶರ್ಮಾನ ಆಕ್ರಮಣ ಕೊರ್ನ್ ಗೊರ್ವಾಂಕ ಜಪ್ತಿ ಕೊರ್ನ್ ಘೆತ್ಲಾ .. ಅನಿ ಗೋಪಾಲಕಾಂಕ ಬಂಧಿ ಕೆಲ್ಲಾ . ಅಮ್ಕಾ ಸರ್ವಾಂಕ ರಕ್ಷಣಾ ದೀವ್ಕಾ " ಮೋಣು
ವಿಜ್ಞಪ್ತಿ ಕೆಲ್ಲಿ . ವಿರಾಟ ರಾಯಾನ ಮಂತ್ರಿ ಗಣ ಸಭಾ ಅಪ್ಪಯ್ಲಿ . ತಶೀ೦ಚಿ ಕಂಕು ಭಟ್ಟಾ ರೂಪಾರಿ ಅಶಿಲೋ ಧರ್ಮಜಾಕ , ಸಭೆ೦ತು ಅಪ್ಪೋನ್ ವಿಷಯು ಸಂಘಲೊ . " ಮಹಾರಾಜಾ .. ! ತುಮ್ಮಿ ಕಾಯ್ ಯೆಚ್ಚನ ಕಾಡ್ಚೆ ನಕ್ಕಾ . ರಾಜ್ಯ ಸೈನ್ಯ ತಯ್ಯಾರಿ ಕರ್ಯಾತಿ ... ಹಾಂವ ತುಮ್ಗೆಲೆ ವೊಟ್ಟು ರಬ್ಬುನ್ ಯುದ್ಧ ಕರ್ತಾ . ಅಮ್ಗೆಲೆ ವೊಟ್ಟು ಅಂತಃ ಪುರಾ ಪಾಕ ಶಾಳೆಂತ್ ಅಶಿಲೋ ರನ್ಪೊಯೀ .. ವಲಲ ಯೆತ್ತಾ ಲೊ .. ಹಾಂವ ಸಾಂಗ್ತಾ .... ಅಂಮಕಾ ಖಂಡಿತ ಜಯ ಝತ್ತಾ ಪ್ರಭೋ ..." ಮೋಣು
ಧರ್ಮಜಾನ ಸಂಘುನ್ ವಿರಾಟ ರಾಯಾಕ ಪ್ರೋತ್ಸಾಹ ಕೆಲ್ಲೆ . ಕಂಕು ಭಟ್ಟಾ ಲೆ ಉತ್ತರಾಂತು , ಮಹಾರಾಜಾಕ ಯೇಕ ಭಾರಿ ವಿಶ್ವಾಸು . ತಾಣೆ ಸಂಘಿಲ್ ಭವಿಷ್ಯ ವಾಣಿ ಖರೆ ಝತ್ತಾ ಮ್ಹಳ್ಳೆಲೆ ವಿಶ್ವಾಸು . ಮಂತ್ರಿ ಲೋಕಾಂಕ ಸಂಘುನ್ ಸೈನ್ಯ ತಯ್ಯಾರ ಕೆಲ್ಲೆ . ಧರ್ಮಜಾನ ಗುಪ್ತ ಜಾವ್ನ್ ... ಭೀಮ , ನಕುಲ , ಸಹದೇವಾಂಕ ಮೆಳ್ಳೊ ... " ಆನಿ ದೋನಿ ದಿವಸಾನ ಆಮ್ಗೆಲೆ ಅಜ್ಞಾತ ವಾಸ ಪೂರ್ತಿ ಝತ್ತಾ . ಫಲ್ಲೆ ಅರ್ಜುನಾಕ ಶ್ರಾಪ ವಿಮೋಚನ ಝತ್ತಾ . ಅ೦ಮ್ಕಾ ಯೆಕ ವರುಷ ಅಜ್ಞಾತ ವಾಸಾ ಕಾಲಾಂತು .. ಆಶ್ರಯ ದಿಲ್ಲೆಲೆ ವಿರಾಟ ರಾಯಾಕ ಆಮ್ಗೆಲೆ ಋಣ ಪಾವ್ವೊಕಾ . ಅರ್ಜುನಾ ಎಕ್ಲೇಕ ಸೋಣು ಅಮ್ಮಿ ಚಾರಿ ಜನ , ಯುದ್ಧಾ೦ತು ಭಾಗಿ ಜಾವ್ಯಾ " ಮೋಣು ಸಂಘುನ್ ಭಾಯಿರಿ ಗೆಲ್ಲೊ .
ವಿರಾಟ ರಾಯಾಕ ' ಶತಾನಿಕ 'ಆನಿ ' ಮದಿರಾಶ್ವ' ಮ್ಹಳ್ಳೆಲೆ ದೊಗ ಜನ ಭಂವಂಢ ಆಸ್ಸತಿ . ತನ್ನಿಯಿ ಯುದ್ಧಾ ಕ ತಯ್ಯಾರ ಜಾವ್ನ್ ಅಯಿಲೀ೦ತಿ
. ದೊಗ್ಗಾ೦ಕಯಿ ಸೇನಾನಿ ಜಾವ್ನ್ ನಿಯುಕ್ತ ಕೆಲ್ಲೆ ... ಅನಿ ಸೈನ್ಯಾಕ ಮುಕಾರಿ ಪೆಟಯಿಲೆ . ಅಂತಃಪುರ ರಕ್ಷಣೆಕ ಉತ್ತರ ಕುಮಾರಾಕ ರಬ್ಬಯಿಲೊ . ಭೀಮ ನಕುಲ ಸಹದೇವಾಂಕ ಘೇವ್ನ್ ವಿರಾಟ ರಾಯು ಯುದ್ಧಾಕ ಭಾರ್ಸರ್ಲೊ . ತ್ರಿಗರ್ತಿಪುರ ಸೈನ್ಯಾಕ ಆನಿ ಮತ್ಸ್ಯ ದೇಶಾ ಸೈನಿಕಾ ಮಧ್ಯೆ ಅತೀ ತೀವ್ರ ಯುದ್ಧ ಝಲ್ಲೆ . ಧರ್ಮಜ , ಭೀಮ , ನಕುಲ ಸಹದೇವಾ ನಿ ... ತ್ರಿಗರ್ತಿಪುರ ಸೈನ್ಯಾಕ ಭಾತ ಪುಡ್ಡಿ ಕೆಲ್ಲೆ ಮ್ಹಣ್ಕೆ ಮಾರ್ನ್ ಸಂಹಾರು ಕೆಲ್ಲೆ .
ವಿರಾಟ ರಾಯಾಕ ಬಂಧಿ ಕೊರ್ನ್ .. ಸುಶರ್ಮಾನ ರಥಾರಿ ಘಾಲ್ನ್ ವೋಚ್ಚಯೇ ಧರ್ಮಜಾನ ಪೊಳೈಲೆ " ಭೀಮ ಸೇನಾ ... ! ವಿರಾಟ ರಾಯಾಕ ರಕ್ಷಾ ಕರಿ " ಮ್ಹಳ್ಳಲೋ . ಭೀಮಸೇನಾನ ವೋಗ್ಗಿ ವೊಚ್ಚುನ್ ... ಸುಶರ್ಮಾಲೆ ರಥಾ ಎದುರಾ ಯೇವ್ನ್ ರಾಬ್ಲೊ ಆನಿ " ಮಹಾರಾಜಾ ರಥಾರಿ ದುಕೂನ್ ಊಡ ... ಆಮ್ಗೆಲೆ ಸೈನ್ಯಾ ದಿಕಾನ ವಸ " ಮೋಣು ಬೊಬ ಮಾರ್ಲಿ . ಭೀಮಸೇನ ಆನಿ ಸುಶರ್ಮಾ ಮಧ್ಯೆ ಮಸ್ತ ವೇಳು ಯುದ್ಧ ಝಲ್ಲೆ . ಆಖೇರಿಕ ಸುಶರ್ಮಾ ಭೀಮ ಸೇನಾಕ ಶರಣ ಝಲ್ಲೋ . ತಕ್ಕಾ ಬಂಧಿ ಕೊರ್ನ್ ಧರ್ಮಜಾ ಎದುರಾ ಹಾಣು ರಬ್ಬಾಯಿಲೊ . ಸುಶರ್ಮ ರಾಯು ಬಂಧಿ ಝಲ್ಲೆಲೆ ಪೊಳೋನ್ ... ತ್ರಿಗರ್ತಿಪುರ ಸೈನ್ಯ .. ಮತ್ಸ್ಯ ದೇಶಾ ಸೈನ್ಯಾಕ ಶರಣ ಝಲ್ಲೆ . ಭೀಮ ಸೇನಾನ ಸುಶರ್ಮ ರಾಯಾಕ ದಿವಿಶಿ ಮಾರ್ಚೆ ಖಾತ್ತಿರಿ ಖಡ್ಘ ಉಬ್ಬಾರ್ಲೆ . ಧರ್ಮರಾಯಾನ ತಾಕ್ಕಾ ರಬ್ಬಾಯಿಲೆ . " ಹಾಂವ ವಿರಾಟ ರಾಯಾ ಕ ದಾಸ ಝತ್ತಾ .. ತ್ರಿಗರ್ತಿಪುರ ರಾಜ್ಯ , ವಿರಾಟ ರಾಯಾಕ ದಾನ ಕರ್ತಾ " ಮ್ಹಳ್ಳಲೋ ಸುಶರ್ಮ . ದಕ್ಷಿಣ ದಿಶೆಂತು ಗೋರಕ್ಷ ಕೊರ್ನ್ ಶಾಂತಿ ವಾಪಸ್ ಅಯಿಲೆ . ವಿರಾಟ ರಾಯಾಕ ಮಸ್ತ ಆನಂದ ಝಲ್ಲೆ . ಧರ್ಮಜಾಕ ಫೊಟೊನ್ ಧೋರ್ನ್ ತಗೆಲೆ ಸಂತೋಷು ವ್ಯಕ್ತ ಕೆಲ್ಲೆ .
ಉಮಾಪತಿ
No comments:
Post a Comment