MAHABHARATH Part - 10 ( Konkani Bhashentu )
DONNI POTI DYOOTA ... AAKHERI POTI
ಶಕುನಿ : " ಕರ್ಣಾ ಪ್ರತೀ ಯೇಕ ಸಮಸ್ಯೆಕ 'ಯುದ್ಧ ' ಪರಿಹಾರ ನಯ್ . ಹತ್ತಾ ನಂಕ್ಟಾನ ಚಿವುಟುನು ಕಾಡ್ಚೆ ಕಾಮಾಕ ಕುರ್ರಾಡಿ ಜಾವ್ಕಾವೇ ? ಸ್ವಲ್ಪ ಬುದ್ಧಿ ಉಪಯೋಗ ಕರಿ . ಕರ್ಣಾ ! ಆನ್ನೇಕ ಪೋಟಿ ಧ್ರಥರಾಷ್ಟ್ರಾಕ ಶರಣ ಯೆವ್ಚೆ ತಶಿ ಕೋರ್ಕಾ . ಧುರ್ಯೋಧನಾ ! ಹೇ ಪೋಟಿ ... ಧ್ರಥರಾಷ್ಟ್ರಾಕ ವೊಚ್ಚುನು ಮೆಳ್ಚೆ ನಕ್ಕಾ .. ತಾಣೆಚಿ ತುಗೆಲೆ ಯೆವ್ಚೆ ತಶೀ ಕೊರ್ಚೆ ಯೇಕ್ ಉಪಾಯು ಸಾಂಗ್ತಾ .... "
ಧುರ್ಯೋಧನ : " ಕಸಲೆ ತ್ಯೆ ಉಪಾಯು ಮಾಮಾ ... ? "
ಶಕುನಿ :" ಹೇ ಪಂಕ್ತಾ ಧುರ್ಯೋಧನಾನ , ಶತ ಭ೦ವ್ಡಾ೦ಗೆಲೆ ವೊಟ್ಟು ... ವನವಾಸ ಕೊರುಂಕ ಹಸ್ತಿನಾವತಿ ಸೊಡ್ಚ್ಯಾ ಸಿದ್ಧ ಜಾವ್ಕಾ ... ರಾಜ್ಯ ಭಾರ ವಿದುರಾಕ ದೀವ್ಕಾ .. ತಿತ್ಲೆಚಿ ! ಅಮ್ಗೆಲೆ ಕಾಮ ಸುಲಭ ಝತ್ತಾ ! ... ಧ್ರಥರಾಷ್ಟ್ರುಚಿ ಪಾಂಡವಾಂಕ ಅಪ್ಪಯಿತಾಲೊ ... ಆನ್ನೇಕ ಪೋಟಿ ದ್ಯೂತ ಖೆಳ್ಚ್ಯಾಕ ! ಝಲ್ಲೇರಿ ... ಹೇ ಪಂಕ್ತಾ ದ್ಯೂತ ಖತೀರಿ ನಯ್ .. ಪಾಂಡವಾ೦ಗೆಲೆ ದಾಸ್ಯ ನಯ್ ... ತಾಂಗೆಲೆ ಧನ ಕನಕ ನಯ್ ... ' ಬಾರ ವರುಷ ಅರಣ್ಯ ವಾಸ .. ಏಕ ವರುಷ ಅಜ್ಞಾತ ವಾಸ .. ! ಅಜ್ಞಾತ ವಾಸ ಭಂಗ ಝಲ್ಲೇರಿ ... ವಾಪಾಸ್ ಬಾರ ವರುಷ ವನವಾಸ ಏಕ ವರುಷ ಅಜ್ಞಾತ ವಾಸ ! ' .. "
ಧುರ್ಯೋಧನ :" ಅರಣ್ಯ ವಾಸ ಅಜ್ಞಾತ ವಾಸ ಪೂರ್ತಿ ಜತ್ತರಿ .. ತಂಗೆಲೆ ರಾಜ್ಯ ತಂಕಾ ದೀವ್ಕಾ ಪೋಡ್ತ ನವೇ ಮಾಮಾ ? "
ಶಕುನಿ :" ಹೇ ಭುಯಿಂಚೇರಿ , ಅಜ್ಞಾತ ವಾಸ ಕರ್ತಾನ ಖಯಿ ನಿಪ್ಪೋನು ಬೋಸ್ಲೆರಿಯಿ ...ತಂಕಾ ಸೊದ್ದುನು ಕಾಡ್ಕಾ ... ಆಮ್ಗೆಲೆ ಗೂಢಚರ .. ಬಲಿಷ್ಠ ಬುದ್ದೋ೦ತ ಹಜಾರ ಲೋಕ ಆಸ್ತಾನಾ ಕಸಲೆಕ ಭೀವಕಾ ಬಾಳಾ ? ಮುಖ್ಯ ಜಾವ್ನು.. ನ್ಯಾಯ ಶಾಸ್ತ್ರಾ ಪ್ರಕಾರ ಕೊಣಯ್ ಬಾರ ವರುಷ ತಾಂಗೆಲೆ ಸ್ಥಿರಾಸ್ತಿ , ಚರಾಸ್ತಿ .. ಕೊಣಾಲೆ ಸ್ವಾಧೀನಾ ಅಸ್ಲೆರಿಯಿ .. ತೀ ಅಸ್ತಿ , ಕೋಣಾಲಗ್ಗಿ ಆಸ್ತಾ ಕೀ .. ತನ್ನಿ .. ತ್ಯೆ ಅಸ್ತಿಚೆ ಸ್ವಾಮಿ ಝತ್ತಾತಿ . ಸ್ವಂತ ಹಕ್ಕು ರದ್ದ್ ಝತ್ತಾ . ನ್ಯಾಯ ಶಾಸ್ತ್ರ , ಸ್ಮ್ರತಿ ಧರ್ಮು ಹೆಂಚಿ ಸಾಂಗ್ತಾ "
ಧುರ್ಯೋಧನ : " ಮಾಮಾ ! .. ಏಕತ್ ವೆಳ್ಯೇರಿ ... ವನವಾಸ , ಅಜ್ಞಾತ ವಾಸ ಜತ್ತರಿ ಆಮ್ಗೆಲೆ ರಾಜ್ಯ ಅಮ್ಕಾ ವಾಪಸ್ ಜಾವ್ಕಾ ಮೋಣು ಹಠ ಕೆಲ್ಲೇರಿ .. ?? "
ಶಕುನಿ : " ಧುರ್ಯೋಧನಾ !! ಹ್ಯೇ ತೇರ ವರುಷ ಕಾಲ ಅಮ್ಮಿ ಹಾಥ ಬಂಧುನು ಬಸತಾತಿ ವೇ ! ?ವಿಶಾಲ ಭಾರತಾಚೆ ಸರ್ವ ರಾಯಾಂಗೆಲೆ ಸ್ನೇಹ ಕೋರ್ನು , ಹಸ್ತಿನಾವತಿ ಚಕ್ರವರ್ತಿ ಜಾವ್ನು ತೂ ಆಸ್ತಾಲೊ ..! ಯುದ್ಧ ಮೋಣು ಆಯಿಲ್ಯಾರಿ ಅಮ್ಮಿ ಸರ್ವ ತಯ್ಯಾರ್ ಜಾವ್ಯಾ ! ಅಮ್ಕಾ ತಿತ್ಲೆ ವೇಳು ಮೆಳ್ತಾ ನವೇ ? "
ಧುರ್ಯೋಧನ :" ವಾಹ್ ಮಾಮಾ !.. ವಾಹ್ ! ತುಗೆಲೆ ತೀಕ್ಷ್ಣ ಬುದ್ಧಿಕ ಹಾಂವ ಶರಣು ಮಾಮಾ .... ತೂ೦ವೇ ಸಂಘಿಲ್ ತಶೀಚಿ ಹಾಂವ ವನವಾಸಾಕ ಭಾರ್ ಸರ್ತಾ ... ಅಮ್ಕಾ ಆಶೀರ್ವದು ಕರಿ ಮಾಮಾ " ಹಾತು ವೊಟ್ಟು ಕೋರ್ನು ಪ್ರಣಾಮ್ ಕೆಲ್ಲೊ .
ಶಕುನಿ : " ವಿಜಯೋಸ್ತು .... ದಿಗ್ವಿಜಯೋತ್ಸು ... ಅಭೀಷ್ಠ ಸಿದ್ದಿ ರಸ್ತು !! " ಹೇರ್ದಿವಸು ... ಧುರ್ಯೋಧನು ... ಶಕುನಿ ಮಾಮಾನ ಸಂಘಿಲ್ ತಶಿ ನಾಟಕ ಕೆಲ್ಲೆ . ಧುರ್ಯೋಧನು ಆನಿ ಶತ ಕೌರವ .. ರಾಜ ವೇಷ ಭೂಷಣ ಕಾಣು , ಕಾವಿ ವಸ್ತ್ರ ನೆಸ್ಲಿ೦ತಿ . ವಿದುರ ಅನಿ ಸಂಜಯಾ ಕ ಅಪ್ಪೋನು ... ತಾಂಕಾ ವನವಾಸಾ ಕ ವೊಚ್ಛೆ ವಿಷಯು ಸಂಘಲೇ . ಕಾರಣಯಿ ತಿಳ್ಸಿಲೆ . ಧ್ರಥರಾಷ್ಟ್ರಾಕ ಅನಿ ಗಾಂಧಾರಿಕ , ಲಾಯಕ್ ಕೋರ್ನು ಪೋಳೋನು ಘೆಯ್ಯಾ ಮೋಣು ಸಂಘುನು , ವನವಾಸಕ ಪ್ರಯಾಣ ಶುರು ಕೆಲ್ಲೆ . ಪೋಳೋಚ್ ಪೋಳೋಚ್ ಭಿತರಿ ಹೀ ಸುದ್ದಿ ಧ್ರಥರಾಷ್ಟ್ರಾಕ , ಅಂತಃಪುರಾ ಪಾವ್ಲಿ . ಶತ ಕೌರವಾ೦ಗೆಲೆ ಬಾಯ್ಲಾಂಕ ಸುದ್ದಿ ಕಳ್ಳಿ . ತಾಂಗೆಲೆ ಬಾಯ್ಲೊ ಧ್ರಾಥರಾಷ್ಟ್ರಾಕ ವೊಚ್ಚುನು ಮೇಳ್ನು ಗಳ್- ಗಳೀ ರೊಡುಂಕ ಶುರು ಕೆಲ್ಲೆ . ದೃಥರಾಷ್ಟ್ರ , ಗಾಂಧಾರಿ , ಸಂಜಯ ಸಮೇತ ಧುರ್ಯೋಧನಾ ಲಗ್ಗಿ ಅಯಿಲೊ
ದೃಥರಾಷ್ಟ್ರ :" ಕಸಲೆ ಝಲ್ಲೆ.. ಧುರ್ಯೋಧನಾ ! ವಾನ ಪ್ರಸ್ತಾಕ ವೊಚ್ಚುಕಾ ಜಾಲ್ಲೆಲೆ ಅಮ್ಮಿ ! ದೊಳೆ ನಾಶಿ ಅಂಧ ಜಲ್ಲೆಲೆ ನಿಮಿತ್ಯ ಅಮ್ಕಾ ಅವಕಾಶು ನಾ ಝಲ್ಲೆ . ತುಗ್ಗೆಲ್ ಶತ ಭಾಂವ್ಡಾ ಘೇವ್ನು ವನ ವಾಸಾಕ ವೊಚ್ಛೆ ಹೀ ಸ್ಥಿಥಿ ತುಕ್ಕಾ ಕಶಿ ಆಯಿಲಿ ? "
ಧುರ್ಯೋಧನ :" ಪಿತಾಶ್ರೀ ! ಅಮ್ಮಿ ಹಾಂಗಾ ಅಸ್ಲೆರಿ ಪಾಂಡವ ಆಮ್ಕಾ ವಂಚೂ ಸೋಣಾತಿ . ಭೀಮಾನ ಕೆಲ್ಲೆಲಿ ಪ್ರತಿಜ್ಞಾ ... ನಂತರ ತಾಂಕ ಭೀವ್ನು ತಾಂಗೆಲೆ ರಾಜ್ಯ ತ೦ಕಾ ದಿಲ್ಲೆ . ಹೇ ಸಮಸ್ತ ಭೂಮ೦ಡಲಾಕ ತನ್ನಿಚಿ ರಾಜ್ಯ ಭಾರ ಕೊರೊಂತಿ . ಆಮ್ಗೆಲೆ ವೈರಿ ಕೋಣಾಕಯಿ ಪ್ರೀತಿ , ಅಭಿಮಾನ ನಾ ... ಮಾಮಾ ಶಕುನಿ ಮಾಮಾ ! ಆಮ್ಗೆಲೆ ಆನಮ್ಮಾಕ ತುವೆಂಚ್ಯ್ ಪೊಳೊನ್ ಘೆವ್ಕಾ " ...
ಶಕುನಿ :" ಕಸಲೆ ಉಲ್ಲಯಿತಾ ಧುರ್ಯೋಧನಾ ..! ತೂ ಅನಿ ತುಗ್ಗೆಲ್ ಭಂವ್ಡ .. ಹಾಂಗಾ ರಬ್ಬಾನಾ ನಾತ್ಲೆರಿ ... ಹಾಂವೆ ಮಾತ್ರ ಹಾಂಗಾ ಕಶಿ ರಾಬಚೆ ? ಹಾಂವ ಯಿ ತುಮ್ಗೆಲೆ ವೊಟ್ಟು ವನವಾಸಾಕ ಯೆತ್ತಾ ... ಪಲ್ಲೋ , ಫಲ, ಮೂಳಿ ಖಾವ್ನು ಜೀವನ ಕರ್ತಾ . ಅಯ್ಯೋ ಶಿವಾ ! ಮಿಗೆಲೆ ಮೊಗಾ ಭಚ್ಚೇಂಕ ಸೋ ಣು ಕಷ್ಶಿ ರಾಬ್ಚೆ ? ತಾಂಕಾ ಅಸಲಿ ಪರಿಸ್ಥಿತಿ ಕಸಲೆ ಹಳ್ಳೆ ಶಿವಾ ! ಧುರ್ಯೋಧನಾ ! ಹಾಂವ ತುಗ್ಗೆಲ್ ವೊಟ್ಟು ಯೆತ್ತಾ " ಮ್ಹಳ್ಳಲೋ ಶಕುನಿ ಖಡಾ ಖಡಿ ಜಾವ್ನು
ಗಾಂಧಾರಿ :" ಧುರ್ಯೋಧನಾ ! ತುಕ್ಕಾ ಕಸಲೆ ಕಷ್ಠ ಅಯಿಲಾ ಬಾಳಾ ? ತುಗ್ಗೆಲ್ ಸಂತೋಷಾ ಖತಿರಿ ತುಗ್ಗೆಲ್ ಅಣ್ಣಾ ಲಗ್ಗಿ ಹಾಂವ ಸಾಂಗ್ತಾ . ಮಹಾರಾಜನ ಕಸಲೆ ಕೋರ್ಕಾ ? ಮೋಣು ಸಾಂಗ ಚೆರ್ಡಾ ... ಹಾಂವ ಸಂಘುನು ಕರೈತಾ .. ತಿತ್ಲೆ ಶಿವಾಯ್ .. ತೂ ಆಮ್ಕಾ ಸೋಣು ಅನಾಥ ಕೋರ್ನು ವೊಚ್ಛೆ ಸಮ್ಮ ನಯ್ " ಮೋಣು ಸಂಗುನು ದೊಳೆ ಉದ್ದಾಕ ಕಳ್ಳೆ .
ಶಕುನಿ :"ಅಕ್ಕಾ ! ಪಾಂಡವಾಂಗೆಲೆ ವೊಟ್ಟು ದ್ಯೂತ ಖೆಳಾಂತು .. ಸಂಪಾದನ ಕೆಲ್ಲೆಲೆ .. ಸರ್ವಸ್ವ .. ಮಹಾರಾಜನ ತಾಂಕಾ ವಾಪಾಸ್ ಕೆಲ್ಲೆ ... ಭೀಮ ಸೇನಾನ ... ಧುರ್ಯೋಧನ , ದುಃಶ್ಶಾಸನಾಕ .. ಜೀವಂತಿ ದಾವರ್ನಾ ಮೋಣು ಸಾಂಗ್ಲೆ ನಂತರ ..ಕ್ಷತ್ರಿಯ ಜಾವ್ನು ಮಜ್ಜರ್ ಶೇ .. ಭೀವ್ನು ಬೊಸ್ಕಾ ಮೋಣು ಅಸ್ಸವೇ ? ತೂ೦ವೆ ಮಹಾರಾಜಾಲೆ ಸಂಘುನು .. ಪಾಂಡವಾಂಕ ಆನ್ನೇಕ ಪೋಟಿ ದ್ಯೂತ ಖೇಳು೦ಕ ಆಮಂತ್ರಣ ಕೆಲ್ಲೇರಿ ... ಹಾಂವ ಧುರ್ಯೋಧನಾಕ ಕಸಲೆಯೀ ಸಂಘುನು , ತಾಗೆಲೆ ಮನ ಘು೦ವ್ಡಾನು.. ಹಾಂಗಾಚಿ ರಾಬಚಿ ತಶಿ ಕರ್ತಾ . ಅಕ್ಕಾ ! ನಾ ಝಲ್ಲೇರಿ ತುಮ್ಗೆಲೆ ಮನಾ ಆಯ್ಯಿಲೆ ತಶಿ ಕರ್ಯಾ ... ತುಮ್ಮಿ ಆಸ್ಸತಿ ... ತನ್ನಿ ಆಸ್ಸತಿ ! ಮಧ್ಯೆ ಹಾಂವ ಕಸ ಲೇಕ ? " ಮೋಣು ಶಕುನಿ ರಾಗಾರಿ ಉಲ್ಲಯಿಲೋ . ಶಕುನಿಲೆ ಉತ್ತರಂ ಸರ್ವಾಂಕ ವೈ ಶೇ ದಿಸ್ಲೆ . ಗಾಂಧಾರಿನ ದೃಥರಾಷ್ಟ್ರಾಕ ಸಂಗುನು ಮಹಾರಾಜಾಲೆ ಸಹಮತಿ ಘೆತ್ಲೆ . ಧ್ರಾಥರಾಷ್ಟ್ರಾನ ವಿದುರಾಕ ಅಪ್ಪೋನು ಸಾಂಗ್ಲ್ಲೆ . ವಿದುರಾನ ರಾಜಾಜ್ಞೆ .. ಮೋಣು ಪಾಂಡವಾಂಕ ಆಮಂತ್ರಣ ದಿಲ್ಲೆ . ಸರ್ವ ಪಾಂಡವ , ಧ್ರ್ಮರಾಯಾಲೆ ವೊಟ್ಟು ... ಆನ್ನೇಕ ಪೋಟಿ ದ್ಯೂತ ಸಹಮತಿ ದಿತ್ತಾತಿ ' ಮಾಹಾರಾಜಾಲೆ ಆಜ್ಞಾ ' ' ಮಲಘಡೇಲೆ ಆದೇಷು ' ' ಆಮಂತ್ರಣ ಧರ್ಮು ' ಮೋಣು ಧರ್ಮಜಾಲೆ ಉತ್ತರಾಂಕ ಬದ್ಧ ಝತ್ತಾತಿ .
ಭೀಮಸೇನ :" ವಿದುರ ದೇವಾ ! ದ್ಯೂತ ಜಾವನು ಏಕ ದಿವಸು ಜಾಯ್ನಿ ... ಆನ್ನೇಕ ಪಂಕ್ತಾ ದ್ಯೂತಾಕ ಅಪ್ಪೋಚ್ಯೆ ವೇ ? ಮಕ್ಕಾ ಹಾಸ್ಕಾಕಿ ರೋಡ್ಕಾ ಕೀ ಮೋಣು ಕಳ್ನಾ . ಧರ್ಮಜಾ ಕ .. ದ್ಯೂತ ರಾಯು ಮೋಣು ಲೆಕ್ಲಾಶೀ ದಿಸ್ತಾ ತ್ಯೇ ಕುರ್ಡಾಲೆ ಚೆರ್ಡುವಾನಿ " ಧರ್ಮಜಾಕ , ದೊನ್ನಿ ಪಟಿ ದ್ಯೂತ ಖೆಳು೦ಕ ಮನ ನಾ ... ತಶಿ ಮೋಣು .. ಸೋಡ್ಚ್ಯಾಕಯಿ ಮನ ನಾ . ಧರ್ಮ .. ದ್ಯೂತಾ೦ತು ನಿಮಗೀ ನಾಶಿ ದೃಥರಾಷ್ಟ್ರನ ರಾಜ್ಯ ಸರ್ವಸ್ವ ವಾಪಾಸ್ ಕೆಲ್ಲಾ ... ಮಂಥಾಲೆ ಇತ್ಲೆ ಹೊಡ ಮನಾಕ , ತಗೆಲೆ ಉತ್ತರಾಂಕ ಮರ್ಯಾದಿ ದಿವ್ಚ್ಯೆ ನಕ್ಕ ವೇ ? ಆಮಂತ್ರಣ ನಕಾರ ಕೊರ್ಚೆ ಕೀ .. ಹಾಂ ! ಕೊರ್ಚೆ ? ಮ್ಹಳ್ಳಲೇ ಧ್ವ೦ಧ್ವ ಮನಾಂತು ಝಲ್ಲೆ
ಅರ್ಜುನ :" ಅಣ್ಣಾ ! ದ್ಯೂತ ಜಾವ್ನು ಭಾಯಿರಿ ಯೆತ್ತಾನಾ .. ಕೌರವಾನಿ ಆಮ್ಕಾ ಪೊಳೊನ್ ಹಾಸ್ಯ ಕೆಲ್ಲೆಲೆ ಉಡ್ಘಾಸು ಅಸ್ಸ ಕೀ ..' ಬಾಯ್ಲ್ ಮನ್ಶೇಲೆ ದೋಳೆ ಉತ್ಕಾನಿ ರಾಜ್ಯ ಘೆತ್ತಿಲೆ ಅಪ್ರಯೋಜಕ ಹನ್ನಿ ... ' ಮೋಣು ಸಂಘುನು ಹಶ್ಶಿಲೆ ನವೇ ? ತಸಲೆ ರಾಜ್ಯ ಅಸ್ಲೆರಿ ಕಿತ್ಯೆ .. ನಾತ್ಲೆರಿ ಕಿತ್ಯೆ ? ಆನ್ನೇಕ ವಿಷಯು .. ದೃಥರಾಷ್ಟ್ರನ , ಇಂದ್ರಪ್ರಸ್ಥ ದ್ರೌಪದಿಕ ಉಡ್ಗಿರೆ ಜಾವ್ನು ದಿಲ್ಲಾ ಮ್ಹಳ್ಳೆಲೆ ಉತ್ತ್ರಾ೦ತು ಮಸ್ತ ಅಂತರಾರ್ತು ಅಸ್ಸ . ಅಣ್ಣಾ !.. ಅತ್ತ ಇಂದ್ರಪ್ರಸ್ಥ ಆಮ್ಗೆಲೆ ವಾ೦ಟೇಕ ಸ್ತ್ರೀಧನ ಝಲ್ಲಾ . ಸ್ತ್ರೀ ಧನ ಜಾವ್ನು ಮೆಳ್ಳೆಲೆ ರಾಜ್ಯಾಕ ಪಾಂಡವ ರಡ್ತಾತಿ ಮೋಣು .. ಫಲ್ಲೆ ಸಾಮಂತ ರಾಯ ಮಾಕ್ಷಿಚೇನ ಸಂಗನಾಶಿ ರಬ್ಬನಾತಿ . ಅಣ್ಣಾ ಧರ್ಮಜಾ ! ಕಸಲೆ ಜಾವ್ಕಾ ಮೋಣು ಅಸ್ಸಕೀ ... ತೇ ಝವ್ವೊ ! ಚಿಂತಾ ಕೋರ್ನುಕ್ಕಾ ಯೋ ವೊಚ್ಚಾ "
ದ್ರೌಪದಿ : " ಸ್ವಾಮೀ ! ಅರ್ಜುನಾನ ಸಂಘಿಲೇ ಸಮ್ಮ . ಸುಕ್ಷತ್ರಿಯ ತುಮ್ಮಿ ... ರಾಜ್ಯ ಶೌರ್ಯಾನಿ , ಧೈರ್ಯಾನಿ , ಯುದ್ಧಾ೦ತು ಮೆಳ್ಕಾ . ತಾಷ್ಶಿ ಪ್ರಾಪ್ತ ಕೆಲ್ಲೇರಿ ಮಾತ್ರ ಕ್ಷತ್ರಿಯ ಧರ್ಮಾಕ ಮೋಲ ಯೆತ್ತಾ . ಉಡ್ಗಿರೆ ಜಾವ್ನು ದಾನ ರೂಪಾರಿ ಘೆವ್ವು ನಜ್ಜ . ಹಾಂವ ವೀರ ಪಾಂಡವಾಂಗೆಲ್ ಬಾಯ್ಲ್ ಮ್ಹಣೋನ್ ಘೆವ್ಚ್ಯಾಕ ಸಂತೋಷ್ ಪಾವ್ತಾ . ಮಕ್ಕಾ ತಂತೂಚಿ ಸಂತೋಷು ಮೇಳ್ತಾ . " ಪೂರಾ ಪಾಂಡವಾನಿ ದೊನ್ನಿ ಪಂಕ್ತಾ ದ್ಯೂತ ಖೇಳು೦ಕ ಸಹಮತಿ ಕೆಲ್ಲಿ . ಕುರು - ಪಾಂಡವ ತೋರಣ ಸಭೆ೦ತು ದೊನ್ನಿ ಪೊಟಿ ದ್ಯೂತ ಖೇಳು೦ಕ ಬಸ್ಲಿ೦ತಿ ಶಕುನಿ : " ಧರ್ಮರಾಯಾ ! ಎದ್ದೋಳು ತಾ೦ಯಿ ... ಧನ ಕನಕ ರಾಜ್ಯ ಪಣ್ಣ ದೊವೋರ್ನು ಖೆಳ್ಳ್ ಲೀ೦ತಿ . ಅತ್ತ ತಷ್ಶಿ ನಯೀ .. ಯೆಕ್ಕೂ ಯೆಕು ಖೇಳು ! ಎಕ್ಕಚಿ ಪಣ್ಣ ! " ಮ್ಹಳ್ಳಲೋ ಶಕುನಿ .
ಧರ್ಮಜ : " ಕಸಲೆ ಮಾಮಾ ! ಪಣ್ಣ ಕಸಲೇ .. ?
ಶಕುನಿ :" ಖೆಳಾ೦ತು ಕೋಣ್ ಪರಾಜಯ ಝತ್ತಾತಿ ಕೀ ... ತನ್ನಿ ಬಾರ ವರುಷ ವನವಾಸ ಕೋರ್ಕಾ , ಏಕ ವರುಷ ಅಜ್ಞಾತ ವಾಸ ಕೋರ್ಕಾ . ಅಜ್ಞಾತ ವಾಸ ಭಂಗ ಝಲ್ಲೇರಿ .. ವಾಪಾಸ್ ಬಾರ ವರುಷ ವನವಾಸ , .. ಏಕ ವರುಷ ಅಜ್ಞಾತ ವಾಸ ಕೋರ್ಕಾಚಿ . ಹೇ ಅಯಿಚೆ ದ್ಯೂತ ಪಣ್ಣ .. ಜಾಯಿತ ವೇ ? " " ಜಾಯಿತ " ಮ್ಹಳ್ಳಲೊ ಧರ್ಮಜ . " ಧುರ್ಯೋಧನಾ ! ತುಕ್ಕಾ ಸಮ್ಮತಿ ಅಸ್ಸ ವೇ ? " ಶಕುನಿನ ನಿಮ್ಗಿಲೆ
ಧುರ್ಯೋಧನ :" ಮಕ್ಕಾ ಸಮ್ಮತಿ ಅಸ್ಸ ಮಾಮಾ !... ಝಲ್ಲೇರಿ ... ಮಿಗ್ಗೆಲೆ ಬದ್ಲಾಕ ತುಂವೆಚಿ ದಾಳ ಘಾಲ್ಕಾ "
ಶಕುನಿ :" ನಾ ..! ಧುರ್ಯೋಧನಾ ... ನಾ ... ದಾಳ ಧರ್ಮಜಾನ ಚಿ ಘಾಲ್ಕಾ . ಫಲ್ಲೆ ಪೂರಾ ಜನ ವೊಟ್ಟು ಜಾವ್ನು .. ಹಾಂವೆ ಕಸಲ್ಕಿ ಮೋಸು ಕೆಲ್ಲಾ .. ಮೋಣು ಲೆಕ್ತಾಲೀಂತಿ .. ಕೊಣಯ್ ಮಕ್ಕಾ ನಿಂದಾ ಕೋರುನಜ್ಜ . "
ಧರ್ಮಜ : " ಮಾಮಾ ! ಹಾಂವ ಕೆದನಾಯಿ ಮೋಸು ಕುತಂತ್ರಾ ಕ ಭೀನಾ . ಧರ್ಮಾಕ , ಆನಿ ದೇವಾಕ ಭಿತ್ತಾ . ಅನ್ಯಾಯ ಜಾವ್ನು ಮೆಳ್ಚೆ ವಸ್ತು ಕೆದನಾಯಿ ಸೂಖ ದೀನಾ ಮಾಮಾ " ಮನಾಂತು ಲೆಕ್ಕುನು ಧರ್ಮಜ ಸಾಂಗ್ತಾ .
ಶಕುನಿ : " ವೈ ಧರ್ಮಜಾ ! ತುಂವೆ ಸತ್ಯ ಸಾಂಗ್ಲಾ ... ಘೆ ! ದಾಳ ಹತ್ತಾ ಧರಿ ... " ದಾಳ ಹತ್ತಾ ಧೋರ್ನು ದೋಳೆ ಧಾಂಕುನು ನಿಡ್ಲಾ ಲಗ್ಗಿ ಹಾಣು ... ಪ್ರಾರ್ಥನಾ ಕೋರ್ನು ದಾಳ ಧರ್ಮಜಾ ಲಗ್ಗಿ ದಿತ್ತಾ . ಧರ್ಮಾರಾಯಾನ ವಿನಯ ಪೂರ್ವಕ ಜಾವ್ನು , ದಾಳ ಹತ್ತಾ ಘೇವ್ನು , ನಿಡ್ಲಾ ಲಗ್ಗಿ ಹೋರ್ನು ದೇವಾಕ ಸ್ಮರಣ ಕೋರ್ನು ,ದಾಳಾಕ ಚುಂಬನ ಕೋರ್ನು .. ಸಕಲ ಸೊಡ್ತಾ
ಧುರ್ಯೋಧನ : " ಮಾಮಾ ! ಮಕ್ಕಾ ಧಾಹ್ ಜಾವ್ಕಾ " ಧುರ್ಯೋಧನು ಸಂಗತಾ ಧರ್ಮಜ : " ಮಾಮಾ ಮಕ್ಕಾ ನೊವ್ವಾ !!" ಸೊಳ್ಳೆಲೆ ದಾಳ ಉಡ್ದ್ನುಘು೦ವ್ನು ಧಾಹ್ ದಕ್ಕೋನು ರಬ್ತಾ . ಶಕುನಿ , ಧುರ್ಯೋಧನಾನ ಮನಾ ಲೆಕ್ಕಿಲೇ ಸಂಖ್ಯಾ ಧಾಹ್ ಮೆಳ್ತಾನಾ ಭಾರಿ ಸಂತೋಷು ಝತ್ತಾ . ಧರ್ಮಜಾಕ ಘಡ್ - ಘಡಿ ಹೂಮ ಯೆತ್ತಾ . ಹಾಂವ ಪರಾಜಯ ಝಲ್ಲೊಮೂ ... ಮೋಣು ಸಂತಾಪು ಝತ್ತಾ
ಧುರ್ಯೋಧನ :" ಆ ಹಾ ಹಾ ಹಾ ಹ ಹ ಹ ... ಮಾಮಾ ಅಮ್ಕಾ ಜಯ ಮೆಳ್ಳೆ ಮಾಮಾ ... ಹಾ ಹಾ ಹಾ ಹಾ " ಪಾಂಡವಾ೦ಕ ದುಃಖ ಜಾಯ್ನಿ .. ತನ್ನಿ ಲೆಕ್ಕಿಲೆ ತಶೀಚಿ ಅನುಮಾನ ದೃಢ ಝಲ್ಲೆ . ಸರ್ವಾಂಕ ಕಳ್ಳೆ .. ಪಾಂಡವ ಆನ್ನೇಕ ಪೋಟಿ ಪರಾಜಯ ಝಲ್ಲೆ ಮೋಣು . ಪಾಂಡವ ವಿದುರಾಲೆ ಘರಾ ಯೆತ್ತಾತಿ .
ಕುಂತಿ :" ಧರ್ಮರಾಯಾ ತುಕ್ಕಾಚಿ ಹ್ಯೇ ಧರ್ಮ ಸಂಕಟ ಕಸಲೆ ಅಯಿಲಾ ? ಧರ್ಮು , ದೇವು ,ದೈತ್ಯ್ ಮೊಣು ಸಾಂಗ್ತಾಲೊ ತೂ .. ಆಜಿ ಕಸಲೆಕ ಪರಾಜಯ ಝಲ್ಲೊ ? ದಯಾ ಮಾಯಾ ದೇವು ಖೈ ಅಸ್ಸ ? ಅಶ್ಶ್ಯ್ ಕಸಲೇಕ ದೊಳೆ ಧಾಂಕುನು ಬೊಸ್ಲಾ ತೂ ? "
ಧರ್ಮಜ :" ದಯಾ ದೋವೋರ್ನು ದೇವಾಕ ನಿಂದಾ ಕೋರ್ನುಕ್ಕಾ ಅಮ್ಮಾ ! ಥೋಡೆ ಕಷ್ಠ ಆಮ್ಗೆಲೆ ಚಾಂಗಾಕ ದೇವು ಕರ್ತಾ . ಕಾರಣ ನಾಶಿ ದೇವು ಕಷ್ಠ ಜವ್ವೋ ಸೂಖ ಜವ್ವೋ ಕರ್ನಾ .. ಅಮ್ಕಾ ಮುಕಾರಿ ಚಾಂಗ ಜಾವ್ಕಾ ಮೋಣು ದೇವಾಲಿ ಇಚ್ಚಾ ಆಸ್ತಾಲಿ .. ಆಮ್ಕಾ ಮುಕಾರಿ ಚಾಂಗ ಝತ್ತಲೆ ಅಮ್ಮಾ .... ವಿದುರ ದೇವಾ ! ಹೇ ತೇರ ವರುಷ ... ಅಮ್ಮಾ ತುಗ್ಗೆಲ್ ಘರ್ಲೆಗಿ ಆಸ್ತಾಲಿ . ಆಜಿ ದುಕುನು ಆಮ್ಗೆಲೆ ಅಮ್ಮಾಕ ಪೋಳೋಚ್ಯೆ ಬಾಧ್ಯತಾ ತುಗೆಲಿ " ಮೋಣು ಸಂಘುನು ದೋಳೆ ಉದ್ದಾಕ ಪುಶಿಲೆ . ಅಮ್ಮಾ ಅಮ್ಮಿ ಖೈ ಅಸ್ಲೆರಿಯಿ ಆಮ್ಗೆಲೆ ಮನ ತುಗ್ಗೆಲ್ ಸುತ್ತು ಆಸ್ತಾ ಅಮ್ಮಾ .. ಭಯಂಕರ ರನ್ನಾ ಮಧ್ಯೆ ವನವಾಸ ಕೊರ್ಚೆ ತುಗೇಲಿ ಪ್ರಾಯ ನಯ್ . ಅಮ್ಮಿ ಪಾಂಚ ಜನಾನಿ ವನವಾಸ ಕೋರ್ಕಾ ಝಲ್ಲೆಲೇ ... ದ್ರೌಪದಿ ನ ಆಮ್ಗೆಲೆ ಮಾಕ್ಷಿ ಯೆವಚೆ ನಕ್ಕಾ "
ಕುಂತಿ :" ಧರ್ಮರಾಯಾ ! ಹಾಂವೈ ತು೦ಮ್ಚೆ ವೊಟ್ಟು ಯೆತ್ತಾ . ತೇರ ವರುಷ ಸುಧೀರ್ಘ ಕಾಲ ಮಕ್ಕಾ ...ತುಮ್ಕಾ ಪೊಳೈನಾಶಿ ರಾಬ್ಬುಜಾಯ್ನಾ ಮಕ್ಕಾ. ಅಮ್ಮಾ ದ್ರೌಪದಿ ! ತೂ ಪುಣಿ ಧರ್ಮಾರಾಯಾಕ ಸಂಘುನು ಮಕ್ಕಾ ಅಪ್ಪೋನು ವೊರ್ಚೆ ತಷ್ಶಿ ಕರಿ . "
ದ್ರೌಪದಿ :" ವ್ಹರ್ಡಿಕ ಜಾವ್ನು ಬಮ್ಮಣಾಲೆ ಘರಾ ಅಯಿಲ್ ಮಾಗಿರಿ .. ತಾಂಗೆಲೆ ಸುಖ - ದುಃಖಾಂತು ಭಾಗಿ ಜಾವ್ಚೆ ಹಕ್ಕು ಮಕ್ಕಾ ಅಸ್ಸ . ಹಾಂವ ತುಮ್ಗೆಲಿ ಸಾವ್ಳಿ ಜಾವ್ನು ಮಾಕ್ಷಿ ಯೆತ್ತಾ . ಧರ್ಮ ಅರ್ಥ ಕಾಮ ಮೋಕ್ಷ ಪಾರಮಾರ್ಥಿಕ ಅರ್ಥಾ೦ತು ತು೦ಗೆಲೆ ಮಾಕ್ಷಿ ಆಸ್ಸುಚೇ ಚಿ ಮಕ್ಕಾ ಲಾಯಕ್ ಮೋಣು ದಿಸ್ತಾ . ಹಾಂವ ತುಮ್ಗೆಲೆ ವೊಟ್ಟು ವನವಾಸಾಕ ಯೆತ್ತಾ . ಬಾಯ್ಲ್ ಮನ್ಷ್ಯಾ೦ಕ ಗಳೇ ತಾಳಿ ಬಂಧಿಲೆ ನಂತರ , ಕುಳಾರ್ಚೆ ಋಣ ತ೦ಯಿ ಅಂತ್ಯ ಝತ್ತಾ . ಪಾಂಡುರಾಯು ಶ್ರಾಪಗ್ರಸ್ಥ ಝಲ್ಲೆ ನಂತರ ವನವಾಸಾಕ ತುಮ್ಗೆಲಿ ಅಮ್ಮಾ ತಾಂಕಾ ಸೋಣು ಅಷ್ಶಿಲಿ ಕೀ ? " ಮೋಣು ಖಡಾ - ಖಡಿ ಉಲ್ಲಯಿಲಿ ದೌಮ್ಯ ಪುರೋಹಿತ , ಉಪಪಾಂಡವ ಸಮೇತ ದ್ರೌಪದಿಕ ಘೇವ್ನು , ವನವಾಸಕ್ಕೆ ಚಾಂಗ ಮುಹೂರ್ತ ಪೋಳೋನು ಪಾಂಡವ ವನವಾಸಾಕ ಭಾರಸರ್ಲಿಂತಿ . ಹಸ್ತಿನಾವತಿ ಪ್ರಜಾಲೋಕು .. ರಸ್ತೆ .. ಹಯೇ ಬದಿ , ತ್ಯೆ ಬದಿ ರಬ್ಬುನು .. ಭರ್ಲೇಲೆ ದೊಳೆ ಉದ್ದಕಾನ ಪ್ರೀತಿ ದಕ್ಕೋನು ನಮನ ಕರ್ತಾಚಿ ಪಾಂಡವಾಂಕ ವಿದಾಯ ಕೆಲ್ಲೆ
ಉಮಾಪತಿ
No comments:
Post a Comment