MAHABHARATH Part - 73 ( Konkani Bhashentu )

DHARMAJA LE   STREE SHRAAPA / ಧರ್ಮಜಾಲೆ ಸ್ತ್ರೀ ಶ್ರಾಪ 

                      ಕುರುಕ್ಷೇತ್ರ ನಂಯ್ ಚೆ ತಟಾರಿ ... ಇಕ್ರ ದಿವಸ ಶ್ರಾದ್ಧ ಕರ್ಮ ಕಾರ್ಯ ಪೂರ್ತಿ ಕೊರ್ನ್ ಝಲ್ಲೆ . ಹ್ಯೇ ಇಕ್ರ ದಿವಸ ಧರ್ಮಜಾಲೆ ಮನಾಂತು ಯೇಕ್ - ಯೇಕ್ ಕ್ಷಣಾಕ ಕರ್ಣಾ ಲೇ ಉಡ್ಘಾಸು ಕಿತ್ಲೆ ಪೋಟಿ ಆಯಿಲೊ ಮೋಣು ನಾ ... ! ಯುದ್ಧಾ ವೆಳ್ಯೇರಿ , ತಗೆಲೆ ಮರಣಾ ಖತಿರಿ ಕಿತ್ಲೆ ಪೋಟಿ ಆಲೋಚನಾ ಕರ್ತಾಅಷ್ಶಿಲೋ  ಕೀ ... ತಗೆಲೆ ಪೊಷಿ ,ಮಸ್ತ ಪಂಕ್ತಾ  ಕರ್ಣಾ...ತಾ೦ಗೆಲ್ ಮಲಘಡೋ ಭಾವು ಮೋಣು ಲೆಕ್ಕಿಲೇ ಕ್ಷಣಾ ದುಕುನ್ ..ತಗೆಲೆ ವಿಷಯಾನ ಮನಾಂತು ದುಃಖ ಪಾವಲೋ ಧರ್ಮಜ .                     ಏಕ ದಿವಸು ... ನಾರದ ಮಹರ್ಷಿ ತಗೆಲೆ ಮಿತ್ರ ವೃಂದಾ ವೊಟ್ಟು , ಪಾಂಡವಾಂಕ ಪೊಳೋಚ್ಯಾ ಅಯಿಲೊ . " ಧರ್ಮರಾಯಾ .. ! ಕುರುಕ್ಷೇತ್ರ ಯುದ್ಧಾ೦ತುಕಿತ್ಲೆ ವೀರ ಯೋಧಾಂಕ ದಿವಿಶಿ ಮಾರ್ನ್ ಹೇ ಭೂಮಂಡಲಾಕ ಚಕ್ರವರ್ತಿ ಝಲ್ಲಾ ತೂ ... ! ತುಗ್ಗೆಲ್ ವಿಜಯಾ ಸುದ್ದಿ ತೀನಿ ಲೋಕಾಂಕ ಮೇಳ್ನು , ಅಷ್ಟ ದಿಕ್ಪಾಲಕ ಸಕಲ ದೇವ ಗಣಾಂಕ ಸಂತೋಷು ಝಲ್ಲಾ . ಸತ್ಯ ,  ನ್ಯಾಯ , ನೀತಿ ,  ಸದಾಚಾರ , ಧರ್ಮಾ ನಿಮಿತ್ಯ .. ಶಾಂತಿ ಸ್ಥಾಪನಾ ಕೊರ್ನ್ , ಸರ್ವ ಪ್ರಜಾಂಕ ಹಿತ ರಕ್ಷಣ ದೀವ್ನ್ , ಲೋಕಪಾಲನ ಕರಿ .. " ಮ್ಹಳ್ಳಲೊ .  " ಮುನೀಂದ್ರಾ .. ! ಹೇ ಕುರುಕ್ಷೇತ್ರ ವಿಜಯ ಆ೦ಮ್ಗೆಲೆ ನಯ್ ... ಅಂಮ್ಕಾ ಸರ್ವಾಂಕ ಮುಕಾರ್ಸುನ್ಸ್ ವೋರ್ನ್ ... ಮಾರ್ಗ ದರ್ಶನ ಕೋರ್ನ್  ... ಅಂಮ್ಕಾ ರಕ್ಷಣಾ ಕೆಲ್ಲೆಲೋ ಶ್ರೀ ಕೃಷ್ಣಾ ಕ .. ಹೇ ಶ್ರೇಯ ವತ್ತಾ .. ಅಮ್ಮಿ ನಿಮಿತ್ಯ ಮಾತ್ರ . ಆಮ್ಗೆಲೆ ಗುರು , ಬಂಧು , ಮಿತ್ರ , ದೇವು , ಶಕ್ತಿ ... ಸರ್ವ ಶ್ರೀ ಕೃಷ್ಣು  " ಝಲ್ಲೆರಿಯಿ .. ಧರ್ಮಜಾಲೆ  ಮನಾಂತು ಕಸಲ್ಕಿ ಸಂಕಟ  ಅಸ್ಸ ಮೋಣು ನಾರದಾಕ ಕಳ್ಳೆ . ನಾರದಾನ ,  ಮನಾ ಸಂಕಟಾಕ ಕಾರಣ ಕಸಲೆ ಮೋಣು ನಿಂಮ್ಗಿಲೆ . " ನಾರದ ಮಹರ್ಷಿ .. ! ಮಿಗೆಲೆ ಪ್ರೀತ್ಯೆಚೆ ಬಂಧು ಲೋಕ ... ಅಭಿಮನ್ಯು ,  ದ್ರೌಪದಿಲೆ ಚೆರ್ಡು೦ವ ಮೆಲ್ಲೆಲೆ ತೆದ್ನಾ ಝಲ್ಲೆಲೆ ಅನುಭವ ದುಃಖಾ ಪೊಶಿ ಹೊಡ ... ಅರ್ಜುನಾಲೆ ಹತ್ತಾ೦ತು ಝಲ್ಲೆಲೆ ಕರ್ಣಾಲೆ ಮರಣ ... ! ಮಿಗೆಲೆ ಮನಾಂತು ಮಸ್ತ ದೂಕಿ ಹಳ್ಳಾ  " ಧರ್ಮಜಾಲೆ ಉತ್ತರಂ ಐಕುನ್ ನಾರದು ಹಸ್ಲೊ .. " ಧರ್ಮರಾಯಾ .. ! ಕರ್ಣ ಪೂರ್ವ ಜನ್ಮಾಂತು ' ನಿವಟ ಕವಚ ' ಮ್ಹಳ್ಳಲೊ ರಾಕ್ಷಸು ಜಾವ್ನ್ ಆಶಿಲೋ . ಹಜಾರ ವಜ್ರ ಕವಚ ಘಾಲ್ನು , ದೇವೇಂದ್ರ , ಅಷ್ಟ ದಿಕ್ಪಾಲಕ , ಯಕ್ಷ , ಕಿನ್ನರ , ಕಿಂಪುರುಷ , ಸಿದ್ಧ , ಸಾಧ್ಯ , ನಾಗ , ನಭಶ್ವರ , ಗರುಡ , ರಾಕ್ಷಸ ಜಾತಿಕ ನಿರ್ನಾಮ ಕೆಲ್ಲೆಲೋ ... ನರ ನಾರಾಯಣಾನಿ ನಿವಟ ಕವಚ ರಾಕ್ಷಸಾ ವೊಟ್ಟು ಯುದ್ಧ ಕೊರ್ನ್ , ತಗೆಲೆ ವಜ್ರ ಕವಚ ನಾಶ ಕೋರ್ನು ಆಸ್ಲೆರಿಯೀ ... ಏಕ ವಜ್ರ ಕವಚ ವಾಂಚೊನ್ ಘೇವ್ನ್ ಧಾಂವ್ನ್ ಗೆಲ್ಲೊ . ತ್ಯೇ ಏಕ ಕವಚ , ದೇವೇಂದ್ರಾನ ಬ್ರಾಹ್ಮಣ ವೇಸು ಘಾಲ್ನ್ , ವಜ್ರ ಕವಚ ಕರ್ಣಾಲೆ ಅಂಗಾರಿ ದುಕೂನ್ ದಾನ ರೂಪಾರಿ ಕಾಡೈಲೆ . ತಾಜ್ಜೆ ವೊಟ್ಟುಚಿ ಅಮೃತ ಕರ್ಣ ಕುಂಡಲ ಕಾಡೈಲೆ . ನರ ನರಾ೦ತಕ ಝಲ್ಲೆಲೆ ಶ್ರೀ ಕೃಷ್ಣಾ ನ ತಕ್ಕಾ ದಿವಿಶಿ ಮಾರ್ಲೆ . ಧರ್ಮಜಾ .. ! ಕರ್ಣಾಲೆ ಮರಣಾಕ ... ಅರ್ಜುನ್ ಎಕ್ಲೊಚಿ ಕಾರಣ ನಯ್ ... ಗುರು ಪರಶುರಾಮಾಲೆ ಶ್ರಾಪ .. ' ಆಖೇರಿ ಕಾಲಾಕ ಹಾಂವೆ ಶಿಖಾಯಿಲೆ ಅಸ್ತ್ರ ಶಸ್ತ್ರ ಉಪಯೋಗ ಯೆನಾಶಿ ... ಅಸ್ತ್ರ ಮಂತ್ರ ವಿಸೋರ್ನ್ ವೊಚ್ಚೊ ' ಶಸ್ತ್ರ ಅಭ್ಯಾಸು ಕರ್ತನಾ ... ಕರ್ಣಾಲೆ ಬಾಣಾಕ ಮೆಲ್ಲೆಲೋ ಯಾಗ ಧೇನುಲೆ ಶ್ರಾಪ ... " ಯುದ್ಧ ರಂಗಾಂತು ತುಗೆಲೆ ರಥ ಭೊಯಿಂತು ಪೂರ್ನ್ ವೊಚ್ಚೊ' ಮ್ಹಳ್ಳೆಲೆ ಶ್ರಾಪ ... ಕುಂತಿ ದೇವೀಕ ' ಧರ್ಮ , ಭೀಮ , ನಕುಲ , ಸಹದೇವಾ ಸೋಣು , ಯುದ್ಧಾನಂತೂ ಎದುರ ಮೆಳ್ಳೆರಿಯಿ ಜೀವದಾನ ಕೊರ್ನ್ ... ಪಾಂಚ ಜನಾಲೆ ಜೀವು ರಾಕ್ತಾ ಮೋಣು  ದಿಲ್ಲೆಲೆ ವಚನ ರಾಕ್ಕುನ್ ಘೆತ್ಲಾ ... ಏಕ ಪೋಟಿ ಸೊಳ್ಳೆಲೆ ಬಾಣು ಆನ್ನೇಕ ಪೋಟಿ ಪ್ರಯೋಗ ಕರ್ನಾ ಮೋಣು ಉತ್ತರ ದಿಲ್ಲೆಲೆ ಕುಂತಿ ದೇವೀಕ . ರಥ ಸಾರಥಿ ಶಲ್ಯ ಮಹಾರಾಜಾನ ನಿಮಿಷ - ನಿಮಿಶಾಕ ಕಠೋರ ಉತ್ತರಾ೦ನಿ ಅವಮಾನ ಕೆಲ್ಲೆಲೆ ... ಭೀಷ್ಮಾಚಾರ್ಯನ ' ಅರ್ಧ ರಥಿ ' ಮೋಣು ನಿರೂಪಣ ಕೆಲ್ಲೆಲೆ ನಿಮಿತ್ಯ .. ಶ್ರೀ ಕೃಷ್ಣಾನ ವೇಳೇಕ ಸಂಮ್ ಜಾವ್ನ್ ಕೆಲ್ಲೆಲೆ ಸಾರಥ್ಯಾ ನಿಮಿತ್ಯ .. ಅರ್ಜುನಾಲೆ ದಿವ್ಯಾಸ್ತ್ರ ಘಾಯಾ ನಿಮಿತ್ಯ .. ಕರ್ಣಾಲೆ  ಮರಣ ಝಲ್ಲಾ . ಇತ್ಲೆ ಲೋಕಾನಿ , ಮನಾ ವೈರಿ , ಶಾರೀರಿಕ ಜಾವ್ನ್ ಕರ್ಣಾ ವೈರಿ ಆಕ್ರಮಣ ಕೆಲ್ಲಾ . ಎಕ್ - ಎಕ್ಲಾನಿ  .. ಎಕ್ - ಏಕ್  ರೂಪಾರಿ , ರೀತ್ಯೇರಿ , ಕರ್ಣಾ ಕ ತೇಜೋ ಭಂಗ ಕೆಲ್ಲಾ . ಆಖೇರಿಕ .. ಅರ್ಜುನಾಲೆ ಬಾಣಾಕ ಕರ್ಣಾಲೆ ಮರಣ ಝಲ್ಲಾ . ಕುಂತಿ ದೇವೀಕ ದಿಲ್ಲೆಲೆ ಭಾಷೇ ಪ್ರಕಾರ .. ಚಾರಿ ಜನಾಂಕ ಜೀವ ದಾನ ಕೆಲ್ಲಾ ಅರ್ಜುನಾ ಸೋಣು .. " ಮ್ಹಳ್ಳಲೊ ನಾರದ ಮುನಿ .

                             ನಾರದಾನ ಸಂಘಿಲೆ ವಿಷಯು ಐಕುನ್ ಧರ್ಮರಾಯು ಅನಿಕಯ್ ಮನಾಂತು ಕಷ್ಟ ಪಾವಲೋ . " ಇತ್ಲೆ ಲೋಕಾನಿ ಕರ್ಣಾಕ ದಿವಿಶಿ ಮಾರ್ಲೆ ವೇ .. ? ಆಶ್ಚರ್ಯ ಪಾವಲೋ . " ಅಣ್ಣಾ .. ! ದಾನ ಶೂರ ಕರ್ಣಾ .. !ತೂಂಚಿ ಧನ್ಯ ! ... ತುಗ್ಗೆಲ್ ಜನ್ಮ ಧನ್ಯ .. ! ತುಗೆಲೆ ಆದರ್ಶ ದಾಯಕ ಜೀವನ ಧನ್ಯ .. ! ತುಗೆಲೆ ಚರಿತ್ರ ಧನ್ಯ ... ! ಮಹಾವೀರ ಕರ್ಣಾ .. ! ತುಗ್ಗೆಲ್ ಸೇವೆ ಕೊರ್ಚೆ ಭಾಗ್ಯ ಮೆಳ್ನಿ ಪೊಳೆ ಮಕ್ಕಾ .. !ಮೋಣು  ಮನಾಂತು ದುಃಖ ಪಾವ್ಲೋ ಧರ್ಮಜಾ .

                          ಧರ್ಮಜಾನ ಏಕ ರುಕ್ಕಾ ಮುಳಾಂತು ಬಯಿಸುನ್ ಆಲೋಚನ  ಕೊರ್ನ್ ಅಷ್ಶಿಲೆ ವೆಳ್ಯೇರಿ ಕುಂತಿ ದೇವೀನ ಪೊಳೈಲೆ . " ಧರ್ಮರಾಯಾ ... ! ಕಸಲೆಕ ಕರ್ಣಾಲೆ ವಿಷಯಾನ ಚಿಂತಿತ್ ಝಲ್ಲಾ  .. ? "    " ಅಮ್ಮಾ .. ! ಇತ್ಲೆ ಹೋಡು ವೀರಾಧಿ ವೀರ ಕರ್ಣಾಕ ಕಷ್ಶಿ ವಿಸೋರು ಝತ್ತಾ .. ? "   " ' ಯುದ್ಧಾ ಪೋಷಿ ಫೂಡೆ .. ಹಾಂವೆ ಆಮ್ಗೆಲೆ ತರ್ಪೆನ ಯೇವ್ನ್ ಯುದ್ಧ ಕರಿ ಮೋಣು ಕರ್ಣಾಕ  ಸಂಘಿಲೆ ... ಝಲ್ಲೆರಿ ತ್ಯೋ .. ಧುರ್ಯೋಧನಾಕ ಸೋಣು ಯೆವ್ಚ್ಯಾ ತಯ್ಯಾರ್ ನಾ ಅಷ್ಶಿಲೊ "   " ಕಸಲೇಕ  ಕಂಯ್ಯ್ .. ? "  " ಧುರ್ಯೋಧನು ಕರ್ಣಾಕ ತಗೆಲೆ ಶಂಬರಿ ಜನ ಭಂವ್ಡಾ ಪೋಷಿ ಚಡ ಆದರ ಕರ್ತಾಲೊ ಖಂಯ್ಯ್ . ಭಾತೃ ಸಮಾನ ಜಾವ್ನ್ ಗೌರವ ಕರ್ತಾಲೊ ಖಂಯ್ಯ್ . ನಾವಾಂಕ ತಕೀತ್ ಧುರ್ಯೋಧನು ಚಕ್ರವರ್ತಿ ಝಲ್ಲೇರಿಯೀ ... ರಾಜ್ಯಾ೦ಗ ಕರ್ಣಾನ ಚಿ ಪೊಳೊನ್ ಘೇವ್ಚೆ ಅಷ್ಶಿಲೆ ಖಂಯ್ಯ್ ... ತಕ್ಕ ನಂಮ್ಗುನುಚಿ ಯುದ್ಧ ರಂಗಾಂತು ದೆಂವ್ಲಾ ಮೋಣು ಮ್ಹಣ್ತಾಶಿಲೋ ಖಂಯ್ಯ್ . ಸೂತ ಕುಲ ಘರಾಂತು ವಡ್ಡುನ್ , ಸೂತ ಕುಲಾ ಚೆಲ್ಲಿಯೇಕ ವ್ಹರ್ಡಿಕ ಕೊರ್ನ್ , ಸೂತ ಕುಲಾಚ್ಯೊ ಮೋಣು ಪ್ರಸಿದ್ಧ ಜಾವ್ನ್ , ಅತ್ತ ಕುಂತಿ ಪುತ್ರ ಮೋಣು ಸಂಘಲೇರಿ ... ಸರ್ವ ಹಸ್ತಾತಿ .. ! ಧುರ್ಯೋಧನಾಕ ಕಳ್ಳೇರಿ ...  ಆತ್ಮ ಹತ್ಯಾ ಕೊರ್ನ್ ಘೇತ್ತಾಶಿಲೊ ಖಂಯಿ ... ! "   " ಅಮ್ಮಾ ..! ಹ್ಯೇ ವಿಷಯು ಯುದ್ಧಾ ಪೊಷಿ ಫೂಡೆ ಕಸಲೆಕ ಸಂಘನಿ ತುಂವೇ  ಮಕ್ಕಾ .. ? ಸಂಘಿಲ್ ಝಲ್ಲೆರಿ .. ಇತ್ಲೆ ವಿನಾಶ ಝತ್ತಾಷಿಲ್ವೇ  ಅಮ್ಮಾ  ... ? ಕರ್ಣಾ  ಪೋಷಿ ಹೇ ರಾಜ್ಯ ಮಕ್ಕಾ  ಹೋಡ ಕೀ ಅಮ್ಮಾ ...? ಅಮ್ಮಿ ಸಹ ಜನ ಶಸ್ತ್ರ ಧೋರ್ನ್ ರಾಬ್ಲೇರಿ .. ಸುರ ಲೋಕು ತಾಂಯ್ಯ್ ಸ್ವಾಧೀನ ಕೋರು೦ ಜಾಯ್ನಾ ಅಷ್ಶಿಲ್ವೆ ಅಮ್ಮಾ .. ? ಕರ್ಣ , ಅ೦ಮ್ಗೆಲೊ ಮಲಘಡೊ ಭಾವು ಮೋಣು ಕಳ್ಳೆಲೆ ಝಲ್ಲೇರಿ ... ಹಾಂವ ಪಾ೦ಚ ಗ್ರಾಮ ಕಸಲೇಕ ನಿಂಮ್ಗೀತಶಿಲೋ ... ಹಾಂವ ಕರ್ಣಾಕ ಚಿ ಮಿಗೆಲೆ ದಿಕಾನ ನಿಮ್ಗೀತಶೀಲೋ ... ! ಕಿತ್ಲೆ ಹೊಡಿ ಚೂಕಿ ಕೆಲ್ಲಿ ತುಂವೆ ಅಮ್ಮಾ .. ? " ಕುಂತಿ ದೇವಿಕ ಫೊಟೊನ್ ಧರ್ಲೆ ಧರ್ಮಜಾನ . " ವಯ್ ಧರ್ಮರಾಯಾ  .. ! ಮಿಗ್ಗೆಲೆ ಪೊಟ್ಟಾಂತು ಜನ್ಮಾ ಯೇವ್ನ್ ... ಊತ್ಕಾ ಹೋಳ್ನು ಗೆಲ್ಲೋ  .. ಧುರ್ಯೋಧನಾಲೆ  ಮಿತ್ರ ಜಾವ್ನ್ ಯುದ್ಧ ಅಗ್ನಿ೦ತು ಪೊಳ್ಳೋ ! ಜಾತೀ ನಾಂವ ಘೇವ್ನ್ .. ಸರ್ವಾನಿ  ತಾಗೆಲ್ ಮರ್ಯಾದಿ ಕಳ್ಳಿ . ಹಾಂವೆ ತಾಕ್ಕಾ ಸುರ್ವೆ ಪೋಟಿ ಮೆಳ್ಳೆಲೆ ತೆದ್ನಾ .. ತಗೆಲೆ ಜನ್ಮ ರಹಸ್ಯ ಸಂಘಲೆ ... ಸೂರ್ಯ ದೇವಾನಾ ಯೇವ್ನ್ ಸಾಕ್ಷಿ ಸಂಘಲೆ ... ಹಾಂವ ತಗೆಲಿ ಆವ್ಸು ಮೋಣು ಕೋಳ್ನು ಮಿಗ್ಗೆಲೆ ಪಯ್ಯಾರಿ ಫೋಣು ದೊಳೆ ಉದ್ದಾಕ ಕಳ್ಳೆ ... ಆವ್ಸೂಲೆ ಮಮತಾ ಕರ್ಗುನ್ .. ಹಾಂವೆ ಕಿತ್ಲೆಕೀ ರಳ್ಳಿ ... ತೆದನಾ ಹಾಂವ ಕನ್ಯಾ ಮಣಿ ... ವ್ಹರ್ಡಿಕ ಜಾವ್ಕಾ ಮಾತ್ರ ... ಮಿಗ್ಗೆಲೆ ಕುಲಾ ಮಾನ ಮುಖ್ಯ ಜಾವ್ನ್ ಲೆಕ್ಲೆ ... ಅಸಲೆ ಕಾರ್ಯಾಕ ದಂಡ ದಿತ್ತಲೊ .. ಮಿಗೆಲೊ ಬಪ್ಪುಸು ಐಕಲೆಲೆ ಝಲ್ಲೆರಿ ಮಕ್ಕ ದಿವಿಶಿ ಮಾರ್ತಾಶೀಲೋ ... ಆತ್ಮ ಹತ್ಯಾ ಕೊರ್ನ್ ಘೆತ್ತಶಿಲೋ ಅವಮಾನ ತಡಸೂನ್ ಘೆವ್ಚ್ಯಾ ಜಾಯ್ನಾಶಿ ...   ಪಶ್ಚಾತಾಪ ಪಾವ್ಲಿ ..  ತಾಗೆಲ್ ಮತ್ತೆ ಧೋರ್ನ್ ಝ೦ಗೇರಿ ದೊವೊರ್ನ್ ... ' ಪುತಾ ' .. !  ಮೋಣು ಅಂತ ನಿವ್ವೋತಾಂಯ್ಯ್ ... ಆಶಾ ಭರಿ ರಳ್ಳಿ ಪಶ್ಚಾತಾಪಾರಿ ಮಾಫಿ ತಾಂಯ್ಯ್ ಮಾಗಲಿ ... ಬಹುಷಃ ಚೆರಡಾಕ ಉತ್ಕಾ೦ತು ಸೊಡ್ತಾನಾ ತಿತ್ಲೆ  ವಿಚಲಿತ ಜಾಯ್ನಿ ಅಶಿಲಿ ... ಮಿಗೆಲೆ ಆಯುಷ್ಯ ಪೂರಾ ತಾಕ್ಕಾ ಲಗ್ಗೋ ಮೋಣು ಆಶೀರ್ವಾದ ಕೆಲ್ಲೆ ... ಮಿಗೆಲೆ ದೊಳೆ ಉದ್ದಾಕ ತ್ಯೆ ಸೂರ್ಯ ದೇವಾಕ ತಾಂಯ್ ಪೊಳೋಚ್ಯಾ ಜಾಯ್ನಿ ..' ಜನ್ಮ ರಹಸ್ಯ ಕಳ್ತರಿ .. ಅನಿ ಮುಕಾರಿ ಕಷ್ಶಿ ಅರ್ಜುನಾಲೆ  ವೊಟ್ಟು  ಯುದ್ಧ ಕರ್ತಾಲೊ  ? ಇತ್ಲೆ ವರ್ಷ ವಡ್ಡುನ್ ದವರ್ಲೆಲೆ ಆಶಾ ಕಷ್ಶಿ ಪೂರ್ತಿ ಕರ್ತಲೊ ? ಕಷ್ಶಿ ಅರ್ಜುನಾ ವೈರಿ ಬಾಣು  ಸೊಡ್ತಾಲೊ .. ? ' ಕರ್ಣ ಚಿಂತಿತ ಝಲ್ಲೊ . ಧಾರ್ಮ ರಾಯಾಕ ವಿಜಯ ಜವ್ವೋ ಮೋಣು  ಆಶೀರ್ವಾದ ಕೆಲ್ಲೆ ತಾಣೆ  .. ' ದ್ರೌಪದಿಕ ಅನ್ಯಾಯ ಜಾಯ್ನಾಶಿ ಪೊಳೈತಾಶಿಲೋ ' ಮೋಣು  ದೊಳೆ ಉದ್ದಾಕ  ಕಾಣು ಸಂಘಲೆ . ' ತೂ ಕೌ೦ತೇಯ ಪಾಂಡವ ಅಗ್ರಜ ' ಮೋಣು ಸಂಘಲೆ ..  ಧರ್ಮ ರಾಯಕ ಕಳ್ಳೇರಿ ... ಮಹಾ ಆನಂದ ಪಾವ್ತಾಲೊ ಮೋಣು  ಸಂಘಲೆ . ' ನಕ್ಕಾ ಅಮ್ಮಾ ನಕ್ಕಾ .. ! ಧರ್ಮ ರಾಯಾ ಕ ಸಂಘುನುಕ್ಕಾ ಮಿಗೆಲೆ ವೈರಿ ಆಣ ' .. ಮ್ಹಳ್ಳಲೊ . ಏಕತ್ ವೆಳಾ ತಾಕ್ಕಾ ಕಳ್ಳೇರಿ ಯುದ್ಧ ಕೊರುಂಕ ಭಿತ್ತಲೊ ... ಮಿಗ್ಗೆಲೆ ವೊಟ್ಟು  ಯುದ್ಧ ಕೊರುಂಕ ಅರ್ಜುನ್ ಭಿತ್ತಲೊ ... ಮಿಗೆಲೆ ಭಂವ್ಢ ಮರ್ಯಾದಿ ಕಾಣ್ ಘೇತ್ತಾಶಿಲೀಂತಿ ಕುರು ವಂಶ ಚರಿತ್ರೆ೦ತು ... ಹಾಂವ ನತದೃಷ್ಟ .. ದೇವೀ , ಯುದ್ಧಾ೦ತು ಮೆಲ್ಲೇರಿ ಕಾ೦ಯ್ ಊಣೆ ಜಾಯ್ನಾ .. ಯುದ್ಧ ರಂಗಾಂತು ತುಗೆಲೆ ಪುತ್ರಾ೦ಕ ಹಾಂವ ದಿವಿಶಿ ಮಾರ್ನಾ .. ಅರ್ಜುನಾಕ ಸೋಣು .. ' ಸಂಘಿಲ್ ತಶಿ ಚಲ್ಲೊ ಪೊಳೆ .. ! ತುಂಮ್ಕಾ ಜೀವ ದಾನ ದಿಲ್ಲೆ ಪೊಳೆ .. ! " ರಡ್ತ - ರಡ್ತಾ ಸಂಘಲೇ ಕುಂತಿ ದೇವಿನ .

                             " ಅಮ್ಮಾ .. ! ತೂಂವೆ ಚೂಕಿ ಕೆಲ್ಲೆಲಿ ವಯ್ . ಕರ್ಣಾಕ ತೂ೦ಚಿ ಹೊಡಿ ಶತ್ರು ಅಮ್ಮಾ ..! ಆ೦ಮ್ಕಾ ಕೊಣಾಕಯ್ ಪಾಂಡುರಾಜ ನಿಮಿತ್ಯ ಜನ್ಮು ದೀನಿ ... ದೇವತಾ ಮಂತ್ರಾ ನಿಮಿತ್ಯ ಜನ್ಮ ದಿಲ್ಲಾ . ಸಮಾಜಾ ಭೀವ್ನ್ ..  ಸೂರ್ಯಾ ದೇವಾಲೆ ಮಂತ್ರಾ ನಿಮಿತ್ಯ ಜನ್ಮ ದಿಲ್ಲೆಲೆ ವಿಷಯು ಘುಟ್ಟು ಕೊರ್ನ್ ... ಕಿತ್ಲೆ ಹೊಡಿ ಚೂಕಿ ಕೆಲ್ಲಿ ಪೊಳೆ ಅಮ್ಮಾ .. ! ಹೇ ಕರ್ಣಾ ನಿಮಿತ್ಯ .. ಜಾತಿ , ಪಂಗಡ , ಮೂಲ ಭೂತ ಅಂತಾ ಕೊಂಡಿ ಚುಕ್ಕುನ್ ... ಅವಮಾನ , ಮಾನಸಿಕ ಸಂಕಟ , ಆ೦ಮ್ಗೆಲೆ ಭಿತರಿ ವೈಷಮ್ಯ ... ಇತ್ಲೆ ಸಕ್ಕಡ ಸಂಕಟ ...  ತುಗೆಲೆ ಮೌನ ..  ಘುಟ್ಟು ಕೆಲ್ಲೆಲೆ ನಿಮಿತ್ಯ . ಸಮಸ್ತ ಸ್ತ್ರೀ ಜಾತಿಕ ಹಾಂವ ಶ್ರಾಪ್ ದಿತ್ತಾ ಅಮ್ಮಾ .. ! ಆಜಿ ದುಕುನ್ ಭೂಲೋಕಾಚೆ ಖ೦ಚೇಯ್ ಸ್ತ್ರೀ ಜಾತಿಲೆ ಮನಾಂತು , ಹೃದಯಾಂತು ... ಕಸಲೇಯ್ ರಹಸ್ಯ ವಿಚಾರು ರಬ್ಬನಾಶಿ ವೊಚ್ಚೋ ... ಹಕ್ಕಾ ಸೂರ್ಯ ದೇವು ಸಾಕ್ಷಿ ಕ ಅಸ್ತಾಲೊ ... ! " ಮೋಣು  ಸಮಸ್ತ ಸ್ತ್ರೀ ಜಾತಿಕ ಧರ್ಮ ರಾಯಾನ ಶ್ರಾಪ್ ದಿಲ್ಲೊ . 

ಉಮಾಪತಿ