MAHABHARATH Part -74 ( konakni Bhashentu ) BHEESHMA BHETHI / ಭೀಷ್ಮ ಭೇಠಿ
ಧರ್ಮರಾಯಾಲೆ ಪಟ್ಟಾಭಿಷೇಕಾ ಉತ್ಸವು ಭಾರೀ ಗೌಜಿನ ಝಲ್ಲೆ . ದ್ರೌಪದಿಕ ಮಸ್ತ ಆನಂದ ಝಲ್ಲೆ . ಕೃಷ್ಣಾಲೆ ಪಯ್ಯಾರಿ ಪೋಣು , ಗೊಡ್ಶೆ ಖಾಣ ತೊಂಡಾಂತು ಘಾಲ್ನ್ , ಫುಲ್ಲಾ ಹಾರ ಘಾಲ್ನ್ , ಸಂತೋಷಾರಿ ಪೊಟೋನ್ ಧೋರ್ನ್ ಕೃತಜ್ಞತಾ ಭಾವ ವ್ಯಕ್ತ ಕೆಲ್ಲೆ . ದ್ರೌಪದಿ , ಅನಿ ಕುಂತಿಲೆ ಸಂತೋಷು ಪೊಳೊನ್ ಕೃಷ್ಣಾ ಕಯಿ ಸಂತೋಷು ಝಲ್ಲೋ . " ದ್ರೌಪದಿ ... ! ತುಗೆಲ್ ತೊಂಡಾರಿ ಸಂತೋಷು ಪೊಳೊನ್ ಮಕ್ಕಾ ಮನಾಂತು ಸಂತೃಪ್ತಿ ಝಲ್ಲೆ . ತುಕ್ಕಾ ಅವಮಾನ ಕೆಲ್ಲೆಲೆ ದುಃಶ್ಶಾಸನ , ಧುರ್ಯೋಧನ , ಕೌರವಾ೦ಗೆಲೆ ನಿರ್ನಾಮ ಝಲ್ಲೆ .. ಹ್ಯೇ ಸಮಸ್ತ ಭರತ ಭೂಮಿಕ ಮಹಾರಾಣಿ ಜಾವ್ನ್ .. ಫುಳ್ಳೆ ದಿವಸ , ಕೋಡು ಅನುಭವ ವಿಸೋರ್ನ್ , ಸುಖ ಶಾಂತಿ ಜೀವನ ಕರಿ " ಮೋಣು ಆಶೀರ್ವಾದ ಕೆಲ್ಲೆ . " ಧರ್ಮರಾಯಾ .. ! ತುಗೆಲೆ ಮನಾಂತು ಅನಿಕಯ್ , ಪಾಪ ಕೆಲ್ಲಾ ಮೋಣು ಆಪರಾಧಿ ಭಾವನಾ ಅಸ್ಸ . ತುಂವೆ ಭೀಶ್ಮಾಚಾರ್ಯಾಲೆ ಉತ್ತರಂ ಆಯಿಕುಕಾ .. ಫಾಲ್ಲೆ ಭೀಷ್ಮಾಕ ಪೊಳೋಚ್ಯಾ ವೊಚ್ಚಾ ... " ಮ್ಹಳ್ಳಲೊ ಕೃಷ್ಣು .
ಪಾಂಡವ ಕುರುಕ್ಷೇತ್ರಾಕ ಯೇವ್ನ್ , ಭೀಷ್ಮಾನ ಶರ ಶಯ್ಯೇರಿ ನಿದ್ದಲೆಲೆ ಜಾಗೇರಿ ಯೇವ್ನ್ ಪಾವಲೀ೦ತಿ . ಪಾಂಡವಾಂಕ ಪೊಳೈಲೆ ಸತಾನ್ ಭೀಷ್ಮಾಕ ಅಂಗ ರಕ್ಷಕ ಜಾವ್ನ್ , ರಕ್ಕುನ್ ಪೊಳೈತಶಿಲೆ .. ದೇವ ಗಣ ಮಾಯ ಝಲ್ಲೆ . ಪಾಂಡವ ಎಕ್ಲೆ - ಎಕ್ಲೇಚಿ ಯೇವ್ನ್ ಭೀಷ್ಮಾಲೆ ಪಯ್ಯರಿ ಮತ್ತೆ ದೊವೋರ್ನು ಭಕ್ತೀರಿ , ಪ್ರೇತ್ಯೇರಿ ಚರಣ ನಮನ ಕೆಲ್ಲೆ . ಆಯ್ಯಿಲೆ ದುಃಖ ತಡ್ಸುನ್ ಘೆವ್ನ್ " ಪಿತಾಮಹ .. ! " ಮೊಣು ಗದ್ - ಘಾಧಿತ ಸ್ವರಾನಿ ತಾ೦ಗ್ - ತಾಂಗೆಲೆ ನಾಂವ ಸಂಘುನ್ ಪ್ರೀತಿ ದಕ್ಕಯಿಲೆ . " ಪಿತಾಮಹಾ .. ! ನಿರಾಹಾರಿ ಜಾವ್ನ್ , ಹೇ ಶರ ಶಯ್ಯಾರಿ .. ಹೇ ಘಾಯಾ ವೊಟ್ಟು ಕಷ್ಶಿ ರಬ್ಬು ಝಲ್ಲೆ .. ? ಧ್ರತರಾಷ್ಟ್ರಾ ಮ್ಹಣ್ಕೆ ಹಾಂವೈ ಕುರುಡೊ ಜಾವ್ನು ಅಷ್ಶಿಲೆ ಝಲ್ಲೇರಿ ... ಲಾಯಕ್ ಅಷ್ಶಿಲೆ . ಹಾಂವೆ ಜೀವಂತಿ ಅಸ್ಸುಚೆ .. ತುಗೆಲಿ ಹ್ಯೀ ಪರಿಸ್ತಿಥಿ ಪೊಳೋಚ್ಯಾ ವೇ .. ? ಮೋಣು ದೊಳೇಕ ಉದ್ದಾಕ ಕಾಣು ರಾಬ್ಲೊ ವಿದುರ . ಕೃಷ್ಣ ; " ಗಂಗಾ ಪುತ್ರಾ .. ! ಅಂಗಾ ಭರಿ ಬಾಣ ಲಗ್ಗುನ್ , ಶರ ಶಯ್ಯಾರಿ ತೂ ನಿದ್ದೋನ್ ಅಷ್ಶಿಲೆ ತುಕ್ಕಾ ಕಿತ್ಲೆ ಕಷ್ಟ ಝಲ್ಲೆ .. ! ಅಕಳಂಕ ಬ್ರ೦ಹ್ಮ್ರಚರ್ಯ ಕೋರ್ನ್ ಕರ್ಮ ಯೋಗೀಶ್ವರ್ ಜಾವ್ನ್ , ತುಗ್ಗೆಲ್ ಕರ್ತವ್ಯ ತುಂವೆ ಕೆಲ್ಲೆ . ವೇದ ವೇದಾಂತ ಶಿಕ್ಕುನ್ , ಸಮಸ್ತ ಶಾಸ್ತ್ರ ಹತ್ತಾ೦ತುಲೊ ಆವಾಳೊ ಶೀ ಧರ್ಲಲೋ ಪಂಡಿತು ತೂ ... ಪರಮ ಪಾವನಿ ಗಂಗೆ ಪೊಟ್ಟಾಂತು ಜನ್ಮ ಘೇವ್ನ್ , ಪರಮ ಪುನೀತ ಜಾವ್ನ್ ಅಸ್ಸ ತೂ ... ತುಗೆಲೆ ಜೀವನ ಅಮರ ಝಲ್ಲೆ . ಕುರುಕ್ಷೇತ್ರ ಯುದ್ಧಾ೦ತು .. ಹಾಂವೆ ಆಯುಧ ಹತ್ತಾ೦ತು ಧರ್ನಾ ಮೋಣು ಸಂಘಿಲೆ ... ತಷ್ಶಿ ಅಸ್ಸುನಿಯ್ , ಹಾಂವೆ ಆಯುಧ ಧೊರ್ಚೆ ತಶಿ ಕೆಲ್ಲೆ .. ! ಮಹಾ ವೀರ ತೂ .. ತುಗೆಲೆ ಜನ್ಮ ಧನ್ಯ ಝಲ್ಲೆ " ಮ್ಹಳ್ಳಲೊ ಕೃಷ್ಣು . ಭೀಷ್ಮಾಲೆ ದೊಳೆಂತು ಆನಂದ ಭಾಷ್ಪ ದೆಂವ್ಲೆ ... " ದೇವಾದಿ ದೇವಾ .. ! ಯೋಗೀಶ್ವರಾ .. ! ಸನಾತನಾ .. ! ಮಧುಸೂಧನಾ .. ! ನಾರಾಯಣಾ .. ! ಅಚ್ಯುತಾ .. ! ಗೋವಿಂದಾ .. ! ಮಾಧವಾ ... ! ಜಗತ್ಪಾಲಕಾ .. ! ತೂ .. ಮಿಗೆಲೆ ಗುಣ ಗಾನ ಕರ್ತಾ ವೇ .. ? ಪೂರೋ ಕರಿ ಕೃಷ್ಣಾ .. ಹೇ ಸಂತೃಪ್ತಿ ಪೂರೊ ಮಕ್ಕಾ .. ಮಕ್ಕಾ ಆನ್ನೇಕ ಅದೃಷ್ಟ ನಕ್ಕ ಮಕ್ಕಾ . ಹಾಂವ ಅತ್ತ ಸಂಘತಾ .. ಮಿಗೆಲೆ ಜೀವನ ಅತ್ತ ಸಾರ್ಥಕ ಝಲ್ಲೆ .. ಮುರಾರಿ .. ! ಅಂತೂ ಮಕ್ಕಾ ಪೋಳೋಚ್ಯಾ ಅಯಿಲೊ ನವೇ .. ! ವಾಸುದೇವಾ .. ! ಸೂರ್ಯು ಮಕರ ರಾಶಿ ವೈರಿ ಅಯಿಲೆ ನಂತರ , ಉತ್ತರಾಯಣ ಶುರು ಝತ್ತಾ . ಮಾಘ ಶುದ್ಧ ಏಕಾದಶಿ ದಿವಸು .. ಹಾಂವ ದೇಹ ತ್ಯಾಗ ಕೋರ್ಕಾ ಮೋಣು ಲೆಕ್ತಾ ಅಸ್ಸ . ತುಗೆಲೆ ಸಮಾಕ್ಷಮಾಂತು .. ತುಗೆಲೆ ಆಜ್ಞಾ ಘೆತ್ತ್ಲೆ ನಂತರ ಚಿ , ಹೇ ದೇಹ ತ್ಯಾಗ ಕರ್ತಾ .. !ಮಿಗೆಲಿ ಹೀ ಇಚ್ಚಾ ಪೂರ್ತಿ ಕೊರ್ನ್ ದೀ ಅನ್ನಾ .. ! " ಭೀಷ್ಮಾಲೆ ಮರಣ ಮುಹೂರ್ತ ಆಯಿಕುನ್ ಸರ್ವಾಲೆ ದೊಳೆ ಬೋರ್ನ್ ಅಯಿಲೆ . ಅರ್ಜುನಾನ ... " ಪಿತಾಮಹಾ .. ಅಜ್ಜಾ .. ! ಅಂಮ್ಕಾ ಸಕ್ಕಡಾಂಕ ಸೋಣು ವತ್ತ ವೇ .. ಅಜ್ಜಾ ? ತುಗೆಲೆ ವೈರಿ ಮಹಾಸ್ತ್ರ ಸೊಳ್ಳಲೊ ಮಹಾ ಪಾಪಿ ಹಾಂವ .. ! ಮಿಗೆಲೆ ವೈರಿ ಅನಿಕಯ್ ಕೋಪು ಅಸ್ಸವೇ ಅಜ್ಜಾ .. ? ತುಗೆಲೆ ವೈರಿ ಶರ ಸಂಧಾನ ಕರ್ತಾನಾ ಕಿತ್ಲೆ ಮನಾ ಬಾಧಾ ಝಲ್ಲಿ ಮಕ್ಕಾ .. ! ತ್ಯೆ ಪರಮೇಶ್ವರಾಕ ಗೊತ್ತಸ್ಸ . ತುಗೆಲೆ ವೈರಿ ಬಾಣ ಸೊಡ್ತನಾ .. ಧನುಷ್ಯ ಹತ್ತಾ೦ತುಲೇನ ನಿಸರ್ತಾಶಿಲೆ .. ಹಾಥ ಪಾಯಂ ಗಡ್ - ಗಡ್ತಾಶಿಲೆ .. ! ವಿಧಿ ಪ್ರೇರಣಾ ನಿಮಿತ್ಯ ತುಗ್ಗೆಲ್ ವೈರಿ ಬಾಣ ಸೊಡ್ಕಾ ಝಲ್ಲೆ ಅಜ್ಜಾ .. ! ಮಕ್ಕಾ ತುಗೆಲೆ ವೈರಿ ಹಗೆ ಜಾವ್ವೋ ದ್ವೇಷ ನಾ .. ಆನು ನಾತ್ತಿಲೆ ಅಂಮ್ಕಾ ಸರ್ವಾಂಕ ಪೊಸ್ಸುನ್ ಹೋಡು ಕೆಲ್ಲೆಲೋ ದೇವು ತೂ .. ! ಹೇ ಪಾಪಾತ್ಮಾಕ ಕ್ಷಮ ಕರಿ ಅಜ್ಜಾ .. ! " ಭೀಷ್ಮ : " ಪುತಾ ಅರ್ಜುನಾ .. ! ದೊಳೆ ಉದ್ದಾಕ ಕಾಣುಕ್ಕಾ ಬಾಳಾ .. ತೂ ಮಹಾವೀರ ! ವೀರ ಕ್ಷತ್ರಿಯಾಕ ದೊಳೆ ಉದ್ದಾಕ ಕಡ್ಚೆ ಸ೦ಮ್ಮ ನಯ್ . ಮಿಗೆಲೆ ಗುರು ಭಾರ್ಗವ ರಾಮಾ ಲಗ್ಗಿ ತೇವೀಸ ದಿವಸ ಯುದ್ಧ ಕೆಲ್ಲಾ . ಯುದ್ಧಾ೦ತು ಲಗ್ಗಿಲೆ ಬಾಣ ತಿತ್ಲೆ ಬಾಧ ಜಾಯ್ನಿ . ಝಲ್ಲೇರಿ ತುಂವೆ ಮಿಗ್ಗೆಲೆ ವೈರಿ ಸೊಳ್ಳೆಲೆ ಬಾಣ ಮಸ್ತ ದೂಕಿ ಹಾಡಯ್ಲಿ ಬಳಾ .. ! ತುಂವೆ ಸಾನಸ್ತನಾ ದುಕೂನ್ ವಡ್ಡಯಿಲೆ ಪ್ರೀತಿ ಮ್ಹಳ್ಳೆಲೆ ವೃಕ್ಷಾ ಘೆಲ್ಲೆ .. ಏಕ್ -ಏಕ ಕೊರ್ನ್ ಸಕಲ ಘಾಲ್ಲೆ ಮ್ಹಣ್ಕೆ ದಿಸ್ಲೆ ಬಳಾ ! ಹ್ಯೇ ಅಜ್ಜಾ ವೈರಿ ಕೊಣಯ್ ಶರ ಸಂಧಾನ ಕೊರ್ನ್ ಯುದ್ಧ ಕರ್ನಿ ಕುಮಾರಾ .. ತುಗೆಲೆ ಶಸ್ತ್ರ ನೈಪುಣ್ಯ , ಚುರುಕು ಹಸ್ತ ಲಾಘವ ಯುದ್ಧಾ೦ತು ಪೊಳೋನ್ ಮಕ್ಕಾ ಮಸ್ತ ಆನಂದ ಝಲ್ಲೆ ಕುಮಾರಾ .. ! " ಲಗ್ಗಿ ರಬ್ಬುನ್ ಅಷ್ಶಿಲೆ ಭೀಮ ಸೇನಾನ ... ಪಿತಾಮಹಾ .. ! ತುಂವೆ ಹಾಥ ಧೋರ್ನ್ ಬಾಣ ಪ್ರಯೋಗ ಕೊರ್ನ್ ಅಶಿಲೆ ಝಲ್ಲೇರಿ .. ತುಗೆಲೆ ಯೆದುರ ದೇವ ಅಸುರಾಂಕ ತಾಂಯ್ ಎದ್ರಾಕ ರಬ್ಬು ಜಾಯ್ನಾಶಿಲೆ . ತುಂವೇ .. ಅಮ್ಮಿ ಯುದ್ಧಾ೦ತು ವಿಜಯ್ ಜಾವ್ಕಾ ಮೋಣುಚಿ ಲೆಕ್ಕುನ್ .. ಶಸ್ತ್ರ ತ್ಯಾಗ ಕೊರ್ನ್ ಶರ ಮಂಚಾರಿ ದೇವಲಾ ಅಜ್ಜಾ .. ! ನಾತ್ತಿಲೆ ಝಲ್ಲೆರಿ .. ಕುರುಕ್ಷೇತ್ರ ಯುದ್ಧ ವಿಜಯ .. ಅಂಮ್ ಕಾ ಸ್ವಪ್ಪ್ನ ಜಾವ್ನ್ ಅಸ್ತಶಿಲೆ ಪಿತಾಮಹಾ " ಮ್ಹಳ್ಳಲೋ ಭೀಮು . ಕೃಷ್ಣ : " ಗಂಗಾ ಪುತ್ರಾ .. ! ಧರ್ಮ ರಾಯಾಲೆ ಮನಾಂತು ಏಕ ಪ್ರಶ್ನೊ ಅಸ್ಸ . ಮಾನಸಿಕ ಜಾವ್ನು ಕಸಲ್ಕಿ ಧರ್ಮ ಸಂಕಟಾಂತು ಅಸ್ಸ . ಆಮ್ಗೆಲೆ ಒತ್ತಾಯಾರಿ ಸಿಂಹಾಸನಾ ವೈರಿ ಬೋಸ್ಚ್ಯಾಕ ಅನುಮತಿ ಕೆಲ್ಲಾ . ಕೋಣೆ ಕಸಲೆಯ್ ಸಂಘಲೆರಿ .. ತಗೆಲೆ ಐಹಿಕ ತತ್ವಾಕ ದೂರ ಕೊರುಂಕ ಮನ ನಾ . ತಾಕ್ಕಾರಾಜ ಧರ್ಮ ಬೋಧನ ಕೋರ್ನು ... ಸಾಮ್ರಾಜ್ಯ ಪಾಲನೆಕ ತಯ್ಯಾರ್ ಕೋರ್ಕಾ . ತುಂವೆ ಚಾರಿ ಹಿತ ಬೋಧ ಸಂಘುಕಾ .. ಪಿತಾಮಹ " ಮ್ಹಳ್ಳಲೋ ಕೃಷ್ಣು . ಭೀಷ್ಮ : " ವಾಸುದೇವಾ .. ! ಪುರಾಣ ಪುರುಷಾ .. ! ಸರ್ವ ಧರ್ಮ ಶಾಸ್ತ್ರಾ ಕ , ಸಮಸ್ತ ವೇದಾಂಕ ಮೂಲ ಪುರುಷ ತೂ ... ತುಂವೆ ಆಸ್ತಾನಾ ಹಾಂವೆ ಕಸಲೆ ಸಂಘಚೆ .. ? ಮ್ಹಳ್ಳಲೋ ಭೀಷ್ಮ . ಕೃಷ್ಣ : " ಗಂಗೆಯಾ ... ! ಶಂಬರಿ ವರ್ಷ೦ ವೇದ ಅಧ್ಯಯನ ಕೆಲ್ಲೆಲೋ ತುಂವೆ . ಸಾಡೇ ತಿಂನ್ಶಿ ವರ್ಷ೦ ತತ್ವ ಶಾಸ್ತ್ರ ಶಿಖ್ಲಾ ..ಆಟ್ಶಿಂ ವರ್ಷ ಶಸ್ತ್ರ ವಿದ್ಯಾ ಶಿಖ್ಲಾ ಭೂ೦ಯಿಂಚೇರಿ ತುಗ್ಗೆಲ್ ತಿತ್ಲೆ ಹೋಡು ವಿದ್ಯಾರ್ಥಿ ಅನಿ ಕೊಣಯ್ ನಾತಿ .. ಧರ್ಮ ರಾಯಾಕ ಗುರು ಸ್ಥಾನಾರಿ ರಬ್ಬು೦ಕ ತುಕ್ಕಾ ಮಾತ್ರ ಸಾಧ್ಯ ಅಸ್ಸ . ತುಕ್ಕಾ ಆಯಾಸು ಜಾಯ್ನಾಶಿ , ಉಡ್ಘಾಸು ಸಮ ಆಶ್ಚಯೆತಶಿ .. ತುಗೆಲಿ ಬುದ್ಧಿ ಶಕ್ತಿ ಊಣೆ ಜಾಯ್ನಾಶಿ ತುಕ್ಕಾ ವರ ದಿತ್ತಾ . ಮಕ್ಕಾಯಿ , ತುಗೆಲೆ ಧರ್ಮ ಬೋಧ ಅಯಿಕುಕಾ ಮೋಣು ಆಶಿ ಅಸ್ಸ . " ಮ್ಹಳ್ಳಲೊ ಶ್ರೀ ಕೃಷ್ಣ .
ಉಮಾಪತಿ
No comments:
Post a Comment