MAHABHARATH Part - 31 ( Konkani Bhashentu ) KRISHNA SAHAAYA

MAHABHARATHA   Part - 31  ( Konkani Bhashentu )

                              KRISHNA SAHAAYA      ಕೃಷ್ಣ ಸಹಾಯ 

                          ಪಾಂಡವ ಯುದ್ಧಾಕ ತಯ್ಯಾರಿ  ಕರ್ತಾ ಆಸ್ಸತಿ .  ಭಾರತಾಂತು ಪ್ರತಿ ಏಕ ರಾಜ್ಯ , ಯುದ್ಧಾ೦ತು  ಭಾಗಿ ಜಾವ್ಚ್ಯಾಕ ಉತ್ಸುಕ ಜಾವ್ನ್ ಆಸ್ಸತಿ . ರಾಜ ವಂಶ ಪಾಂಡವಾಂಗೆಲೆ ತರ್ಪೆನ , ಕೌರವಾ೦ಗೆಲೇ ತರ್ಪೆನ ಯುದ್ಧ ಕೊರುಂಕ ತಯ್ಯಾರ ಜಲ್ಲೆಂತಿ . ದ್ವಾಪರ ಯುಗ ಸಮಾಪ್ತ ಜಾವ್ಚ್ಯಾಕ ಆನಿ ಬರೇ 35 ವರುಷ ಮಾತ್ರ ಬಾಕಿ ಆಸ್ಸತಿ . ಕಲಿಯುಗ ಯೆವಚೆ ಸೂಚನಾ ... ಜನಾಲೆ , ರಾಯಾಲೆ , ಮಂತ್ರಿ ಗಣ ಪ್ರಶಾಸನ , ಲೋಕಾಲೆ ಮನಾಂತು ... ತಾಂಗೆಲೆ ಚೋಲಚೆ ರೀತಿಂತು ದಿಸ್ತಾ . ಸೋರೋ , ಮಾಂಸ , ವ್ಯಭಿಚಾರ , ಸೂಖ , ದುಡ್ಡು , ಬದಿಕ , ಆನಂದ ,ಎದ್ರಾಕ .... ಧರ್ಮು ನೀತಿ ಪ್ರೀತಿ ಜೀವನಾ ನೈತಿಕ ಮೌಲ್ಯ ಲಾಸ್ಸುನ್ ಆಸ್ಸತಿ . 

                       ಪಾಂಡವ ಆನಿ ಕೌರವ ಯುದ್ಧಾ ಕ ಸಹಯು ಜಾವ್ಕಾ ಮೋಣು ಬಂಧು ಮಿತ್ರಾ೦ಕ ಆಮಂತ್ರಣ ಕರ್ತಾ ಆಸ್ಸತಿ . ಸ್ವಲ್ಪ್ ರಾಯ ಫುಳ್ಳೆ  ದ್ವೇಷ ಸಾಧನೆ  ಖತಿರಿ ... ಸ್ವಲ್ಪ ಮಿತ್ರತಾ ಅಭಿಮಾನ್ ದೊವೊರ್ನ್ , ಸ್ವಲ್ಪ್ ಬಂಧು ಸಂಬಂಧಾ ನಿಮಿತ್ಯ .. ಹಾಂಗಾ ಥಂಯ್ಯ್ ಪಾಂಡವ ಕೌರವ ಮಧ್ಯೆ ವಂಟೂನ್ ಗೆಲ್ಲೆ . ಗೂಢ ಚರ ಲೋಕು ಎಕ್ಲೆ ವೈರಿ ಅನ್ನೇ ಕ್ಲೋ ಸಂಕಲನ ಕರ್ತಾ ಆಸ್ಸತಿ . ಧರ್ಮಜ ಅನಿ ಧುರ್ಯೋಧನ ರಾಜ ನೀತಿ ವಿಸೋರ್ನ್ ಖಡಾ  ಖಡಿ ಎದುರ ಬದುರ ಜಾವ್ನ್ ರಾಬ್ಲೀ೦ತಿ . ದ್ವಾರಕಾವತಿ ... ಬಲರಾಮ , ಕೃಷ್ಣಾ ಲೆ  ಸಹಾಯು ಆನಿ ಸಹಕಾರು ಘೆವ್ಚ್ಯಾಕ , ಹಸ್ತಿನಾವತಿ ದುಕೂನ್ ಧುರ್ಯೋಧನ ... ಉಪಪ್ಲಾವ್ಯ ದುಕೂನ್ ಅರ್ಜುನ್ ... ಎಕ್ಕ ವೆಳ್ಯೇರಿ ಯೇವ್ನ್ ಪಾವ್ ಲೀ೦ತಿ . ಪಾಂಡವಾಂಗೆಲೆ ಶಕ್ತಿ ಯುಕ್ತಿ ಪೂರಾ ಶ್ರೀ ಕೃಷ್ಣು . ತ್ಯೇ ನಂತರ ಕೃಷ್ಣಾಲೇ ' ನಾರಾಯಣ ಸೈನ್ಯ' ಯುದ್ಧಾ೦ತು ಚುರುಕು , ಧೈರ್ಯಶಾಲಿ ಲೋಕು ... ಸುಮಾರ ಪಾಂಚ ಲಕ್ಷ ಲೋಕು ಸೈನ್ಯಾ೦ತು  ಆಸ್ಸತಿ . ಬಲರಾಮ ಕೃಷ್ಣಾಲೇ ಪಯ್ಯಾರಿ ಹ್ಯೇ ಸೈನ್ಯ ಅಮ್ಕಾ ಮೆಳ್ಳೆರಿ .... ಪಾಂಡವ ಮೂಲ ಶಕ್ತಿ ನಾಶ ಝತ್ತಲೆ ಮೋಣು  ಲೆಕ್ಕುನ್  ಧುರ್ಯೋಧನು ಅಯಿಲಾ . 

                      ಯದವಾಂಕ ಅನಿ ಪಾಂಡವಾಂಕ ಬಂಧುತ್ವ ಅಸ್ಸ ಕುಂತಿ , ... ವಾಸುದೇವಾಲಿ ಬಯಿಣಿ  . ಸುಭಧ್ರಾ ದೇವಿ , ಬಲರಾಮ ಕೃಷ್ಣಾ ಲೇ ಬಯಿಣಿ ... ಅರ್ಜುನಾಲೆ  ಬಾಯ್ಲ್ . ತ್ಯೆ ನಂತರ ಶ್ರೀ ಕೃಷ್ಣು ... ಪಾಂಡವಾಂಗೆಲ್ ಆಪ್ತ ಮಿತ್ರ ಅಖಂಡ ಮೈತ್ರಿ ಅಸ್ಸ . ಯಾದವಾ೦ಗೆಲೇ ಸಹಾಯು ಅಸ್ಲೆರಿ ಯುದ್ಧಾ೦ತು ವಿಜಯ ನಿಶ್ಚಯ ; ಮೋಣು ಧರ್ಮಜಾ ನ ಲೆಕ್ಕುನ್ ಅರ್ಜುನಾಕ ದ್ವಾರಕೆ ಕ ಪೆಟಯಿಲಾ . ಅರ್ಜುನ್ ಅನಿ ಧುರ್ಯೋಧನ ಯೆಕ್ಕ ವೆಳ್ಯೇರಿ ... ಯೆಕ್ಕು ದಿವಸು ಯೆತ್ತಾತಿ ಮ್ಹಳ್ಳೆಲೆ ಖಬ್ಬರ ಕಳ್ಳೆ  ಸತಾನ ... ಕೃಷ್ಣಾ ನ ನೀದ  ಅಯಿಲೆ ಮ್ಹಣ್ಕೆ ನಟನ ಕೊರ್ನ್ ಏಕ ಲಾಮಣೆ ಮಂಚಾರಿ ( ಹಿಂಡಲೋ ) ನಿದ್ದಲೊ . ಸುರ್ವೇಕ ಧುರ್ಯೋಧನ , ಕೃಷ್ಣ ಮಂದಿರಾಕ ಅಯಿಲೊ . ಕೃಷ್ಣಾ ನ ನಿದ್ದಲೆಲೆ ಪೊಳೊನ್ .. ಕಸಲೆ  ಕೊರ್ಚೆ ಮೋಣು  ಆಲೋಚನ ಕೆಲ್ಲಿ . ಮಾಗಿರಿ ಯೆವಚೆ ಕೀ .... ಜಾಗೋಚೆ ಕೀ ... ಜಾಗೊ ಜಾವ್ಚೆ ತಾಯ್ ರಾಕ್ಚೆ .. ? ಖಂಚೆ ವೆಳ್ಯೇರಿ ಉಠಾಯ್ತ ಲೋ ..? ಅತ್ತ ಸೋಣು  ಗೆಲ್ಲೆರಿ ... ತೆದೊಳ್ ಭಿತರಿ ಅರ್ಜುನಾ ನ ಆಯಿಲ್ಯಾರಿ ... ? ಮಕ್ಕ ಸಹಾಯು ಮೇಳ್ ನಾಶಿವೋಚ್ಚಾ ಪೂರೋ ... ಕಸಲೆಕಾಯ್ ತಾಣೆ  ಜಾಗೊ ಜಾವ್ಚ್ಯೆ ತಾಯ್ ಹಾಂಗಾಚಿ ರಾಕ್ತಾ ... ಛೇ ... ! ಚಕ್ರಾಧಿಪತಿ ಜಾವ್ನ್ ... ಮಿಗ್ಗೆಲೆ ಮರ್ಯಾದಿ ತಕೀತ ಶಿರೋಭಾಗಾರಿ ಅಶಿಲೆ ಆಸಾನಾ ವೈರಿ ಬೊಸ್ತಾ ಮೋಣು ಲೆ ಕ್ಕುನ್ ಕೃಷ್ಣಾ ಲೆ  ಮತ್ತೆ ಬದಿನ ಅಶಿಲೆ ಆಸಾನಾ ವೈರಿ ಬೊಸ್ಲೊ . ಧುರ್ಯೋಧನಾನ ಕೃಷ್ಣಾ ಕ ಪೊಳೈಲೇ ... ಗಾಢ ನೀದ ಕಾಡ್ತಾ ಅಸ್ಸ . ಸಹಾಯು ನಿಮಗೂಚ್ಯಾ ಯೇವ್ನ್ ನಿದ್ದಲೆಲ್ಯಾಕ ಜಾಗೊಚ್ಯೇ ವೇ ? ಪೊಳೋಯಾ ಕೆದನಾ ಜಾಗೊ ಝತ್ತ ಕೀ ಜವ್ವೋ ... ! ತೆದೋಳ್  ತಾಯ್ ರಾಕ್ಯಾ ಮೋಣು  ಲೇಕ್ಲೇ . ಸ್ವಲ್ಪ ವೆಳ್ಯೇನ ... ಅರ್ಜುನ್ ಥಂಯ್ ಯೇವ್ನು ಪಾವಲೋ . ಕೃಷ್ಣಾ ನ ನಿದ್ದಲೆಲೆ , ಧುರ್ಯೋಧನು , ಕೃಷ್ಣಾ ನ ಉಠಾ ಚ್ಯೆ ಖತೀರಿ ರಕ್ಕುನ್  ಬೊಶಿಲೆ ಪೊಳೊನ್ .... ಅರ್ಜುನಾ ನ ಕೃಷ್ಣಾಲೇ ಪಯ್ಯಾಕ ಪಾಂಯ್ ಪೋಣು ... ಪಯ್ಯಾ ದಿಕಾನ ಅಶಿಲೆ ಆಸಾನಾ ವೈರಿ ಬೈಸೂನ್  ರಕ್ಕುನ್  ಬೋಸ್ಲೋ . 

                            ಸ್ವಲ್ಪ ವೆಳ್ಯೇನ ... ಕಪಟ ನಿದ್ದೆಂತು ಅಶಿಲೋ ಕೃಷ್ಣು ಜಾಗೊ ಝಲ್ಲೋ . ದೊಳೆ ಪುಸ್ಸುನ್ ... ಪಯ್ಯಾ ದಿಕಾನ ಬೊಶಿಲೆ ಅರ್ಜುನಾ ಕ ಪೊಳೈಲೇ ... "  ಅರೆರೇ ....  ಅರ್ಜುನಾ ... ! ಕೆದನಾ ಅಯಿಲೊ ... ? ತುಮ್ಮಿ ಸರ್ವ ಸೌಖ್ಯ ನವೇ ... ? ಅಭಿಮನ್ಯು ಕಶಿ ಅಸ್ಸ .. ? ಸುಭದ್ರ್ ಕಶಿ ಅಸ್ಸ ? ಧರ್ಮಜ ಅನಿ ಭಂವ್ಡ್ ಸೊಖ್ಯ ನವೇ .. ? ಕೆದ ನಾಯ್ ದಿಸಾಚೆ ನಿದ್ದೋಚ್ಯಾ  ನಾ ...   ನಿದ್ದೋಚೆ  ಅಭ್ಯಾಸು ಯೀ  ನಾ ... ಅಜ್ಜಿ ಕಶಿ ಕೀ ನೀದ  ಪೋಳ್ಳಿ  .... ಜಾಗೋವ್ಚ್ಯಾ ನಜ್ಜ ಅಶಿಲ್ವೆ ... ? ತು ಕೊಣಯ್ ವಿಂಗಡು ವೇ .. ? ಹ್ಯೇ  ಘರ್ಚೆ ಜಾವಯ್ .... ! ತೂ ಅಶಿ ವಿಂಗಡ ಮೊಣ್  ಲೆಕ್ಚಯೇ ವೇ .. ? " ಮ್ಹಣ್ತಚ್ಯ್ ಹಿಂಡ್ಲೆರಿ ದುಕೂನ್ ಸಕಲ ದೇವಲೋ . ಶಿರೋ ಭಾಗಾರಿ ಗಂಭೀರ ಜಾವ್ನ್ ಬೊಶಿಲೆ ಧುರ್ಯೋಧನಾಕ ಪೊಳೊನ್  " ಅರೆ ...! ಸಾರ್ವ ಭೌಮ ... ! ತೂ ಕೆದನಾ  ಆಯ್ಯಿಲೋ ... ? ಧ್ರತರಾಷ್ಟ್ರಮಾಮ ಸೌಖ್ಯ ನವೇ ... ? ಭೀಷ್ಮ , ಬಾಹ್ಲಿಕ ತಾಂಗೆಲೆ ಆರೋಗ್ಯ ಕಶೀ  ಅಸ್ಸ .. ? ತುಗೆಲೊ ಮಿತ್ರ  ಕರ್ಣ ಕಶಿ ಅಸ್ಸ ... ? " ಕೃಷ್ಣಾ ನ ಅಶಿ ನಿಮಗಿತಾಚಿ ಧುರ್ಯೋಧನಾ ಲೇ ತೊಂಡ  ಸೂಕ್ಷ್ಮ ಜಾವ್ನ್ ಪೊಳೈಲೇ . ಧುರ್ಯೋಧನಾಲೆ  ತೊಂಡಾರಿ ಉಕ್ಕುನ್  ಅಯಿಲೊ  ಕೋಪು ಪೊಳೈಲೋ . 

                " ವಾಸುದೇವಾ ... ! ಅರ್ಜುನಾ ಪೋಷಿ ... ಫುಡೇಕಚ್ಯಿ  ಹಾಂವ ಹಾಂಗಾ ಅಯಿಲೊ .... " ಮ್ಹಳ್ಳಲೋ ಧುರ್ಯೋಧನು  " ಹೊ ವೈವೇ ... ! ಹಾಂವೆ ಸುರ್ವೇಕ ಅರ್ಜುನಾಕ ಪೊಳಯಿಲೆ .... ಅಸ್ಸೋ ಮಾಕ್ಷಿ ಮುಕಾರಿ ಹ್ಯೇ ಚರ್ಚೆ ಅತ್ತ ಕಸಾಲೆಕ .... ? ಕಿತ್ಯೆ ... ? ತೂ ಕಸಾಲೆಕ ಆಯ್ಯಿಲೋ ಮೋಣು ಸಾಂಗ ಬಾಕಿ ವಿಷಯು ಮಗಿರಿ ಉಲ್ಲೋಯಾ " ಮೋ ಣು ಹಸ್ತಾಚಿ ಉಲ್ಲಯಿಲೊ ಕೃಷ್ಣು 

ಧುರ್ಯೋಧನ : " ಕೃಷ್ಣಾ ..!ಕುರು ಪಾಂಡವ ಮಧ್ಯೆ  ಕೆದನಾಯ್ ಪುಣಿ  ಯುದ್ಧ ಜಾವ್ಚ್ಯಾ ಪೂರೋ .. ಮೋಣು  ಮಿಗೆಲೆ  ಪಿತಾಶ್ರೀಕ ಅನುಮಾನ . ಕೆದನಾಯ್ ಸಂಕಟ ಪಾವ್ತಾ ಆಸ್ತಾ .... ತಸಲೆ ಕಸಲೆಯ್ ಯುದ್ಧ ಝಲ್ಲೇರಿ ... ತೂ೦ವೆ ತುಗೆಲ್  ಸೈನ್ಯ ವೊಟ್ಟು ಆಮ್ಕಾ ಸಹಾಯು ಕೋರ್ಕಾ . ಹಾಂವ ತೂಗೆಲೊ  ಸಹಾಯು ಸಹಕಾರ ನಿಂಗೂಚ್ಯಾ ಅಯಿಲಾ " ಮ್ಹಳ್ಳಲೋ ಧುರ್ಯೋಧನ . 

ಅರ್ಜುನ : " ದೇವಕೀ ನಂದನಾ ... ! ಹಾಂವ ಧರ್ಮಜಾಲೆ ಆಜ್ಞೆ ಪ್ರಕಾರ ಹಾಂಗಾ ಅಯಿಲಾ . ಸರ್ವಸ್ವ ಕಾಣ್ ಘೇವ್ನ್ ... ದುಸ್ರೆಲೆ ಅಶ್ರಯಾರಿ ಧರ್ಮಜ ಅಸ್ಸ . ಯುದ್ಧ ಕೋರ್ಕಾ ಮೋಣು ಅಂಮ್ ಕಾ ಕೊಣಾಕಯ್ ಆಶಿ ನಾ . ಝಲ್ಲೇರಿ ... ಅನ್ಯಾಯು ಪೊಳೋನ್ ನುತ ಬೋಸ್ ಚೆ ... ಭೀವ್ನ್ ಬೊಸ್ತಲೆ ಅಮ್ಮಿ ಕಾಯರ್ ನಯ್ . ವಿಂಗಡ ಉಪಾಯ್ ನಾಶಿ ... ಏಕತ್ ವೇಳಾ ಯುದ್ಧ ಝಲ್ಲೆರಿ .. ಆಮ್ಕಾ ತುಗೆಲೊ ಸಹಾಯು ಜಾಯಿ ಮೋಣು ಧರ್ಮಜಾನ ವಿನಂತಿ ಕೆಲ್ಲಾ " ಮ್ಹಳ್ಳಲೋ ಅರ್ಜುನ್ 

ಕೃಷ್ಣ : " ತುಮ್ಮಿ ದೊಗ್ಗಯಿ ಎಕ್ಕ ವೆಳ್ಯೇರಿ ಯೇವ್ನು ...  ಮಿಗೆಲೆ  ಸಹಾಯು ನಿಮ್ಗಿತಾ ಆಸ್ಸತಿ . ತುಮ್ಮಿ ದೊಗ್ಗ  ಜನೈ ಮಿಗೆಲೆ ಬಂಧು ಜನ . ಎಕ್ಲೇಕ ಉತ್ತರ ದೀವ್ನ್ ಅನ್ನೇ ಕ್ಲೇಕ ಬರೀ ಹಾತ್ತಾನ ಪೆಟೋಚ್ಯಾ ಮಕ್ಕಾ ಮನ ನಾ " ಮ್ಹಳ್ಳಲೋ ಕೃಷ್ಣು 

ಧುರ್ಯೋಧನ : " ದ್ವಾರಕಾಪತಿ ... ! ಸುರ್ವೆಕ ಹಾಂಗಾ ಆಯ್ಯಿಲೋ ಹಾಂವ ನೈವೇ .. ? .... " 

ಕೃಷ್ಣ : " ಕೌರವೇಯಾ ... ! ಆಯ್ಯಿಲೋ ತೂ ಸುರ್ವೆಕ ... ಝಲ್ಲೆರಿ ... ಹಾಂವೆ ಪೊಳೈಯಿಲೊ ಸುರ್ವೆಕ ಅರ್ಜುನಾ ಕ . ಹ್ಯೋ ಮಿಗೆಲೆ ಮಾವಳ್ನಿ ಪೂತು ... ತ್ಯೆ ನಂತರ ಅರ್ಜುನ್ ಮಿಗೆಲೆ ಭಯ್ ಣಿ ಬಾಮ್ಮುಣು ... ಹ್ಯೇ ಘರ್ಚೆ ಜಾವಯಿ ಮನುಷು ... ತಾಕ್ಕಾ ಅನ್ಯಾಯು ಕೋರು ಮನ ನಾ ... ಅರ್ಜುನಾ ಹೈ ವೆಳ್ಯೇರಿ ತುಂಕಾ ದೊಗ್ಗ ಜನಾಂಕ ಸಹಾಯು ಕೋರ್ಕಾ ಮೋಣು ಲೇಕ್ಲಾ . ತುಕ್ಕಾಯ್ ಸಮ್ಮತಿ ಅಸ್ಸ ನವೆ ? " ನಿಮ್ಗಿಲೆ ಕೃಷ್ಣಾ ನ 

ಅರ್ಜುನ : " ಕೃಷ್ಣಾ ..! ತುಗ್ಗೆಲ್ ಮನಸಾಕ್ಷಿ ಕ ಸಮ್ಮ ಜಾವ್ನ್ .. ತುಂವೆ ಕಸಲೆ ನಿರ್ಧಾರ್ ಕೆಲ್ಲೇರಿ ಯೀ ... ಮಕ್ಕಾ  ಸಮ್ಮತಿ ಅಸ್ಸ ." ಮ್ಹಳ್ಳಲೋ ಅರ್ಜುನ್ 

ಕೃಷ್ಣ : " ಝಲ್ಲೆರಿ ತುಮ್ಮಿ ದೊಗ್ಗ ಯಿ ಅಯಿಕಯಾತಿ . ಮಿಗೆಲೆ  ನಾರಾಯಣ ಸೇನೆ ಮ್ಹಳ್ಳೆಲೆ ಪಾಂಚ ಲಕ್ಷ ಸೈನಿಕ ಅಶಿಲೆ ಏಕ ತುಕಡಿ ಅಸ್ಸ . ತನ್ನಿ ಯುದ್ಧ ರಂಗಾಂತು ಮಹಾ ಶೌರ್ಯ ದಕ್ಕೊನ್  ಯುದ್ಧ ಕೊರ್ಚೆ ಸೈನ್ಯ  . ಆನ್ನೇಕ ಬದಿನ ಹಾಂವ ಆಸ್ಸಾ . ಹಾಂವ ಆಯುಧ ಧೋರ್ನ್ ಯುದ್ಧ ರಂಗಾಂತು ಯುದ್ಧ ಕರ್ನಾ . ಹಾಂವ ಯುದ್ಧ ರಂಗಾಂತು ಮಿಗೆಲೆ ಸೂಚನಾ , ಸಲಹಾ ದಿತ್ತಾಲೋ . ತುಂಕಾ ನಾರಾಯಣ ಸೈನ್ಯ ಜಾವ್ಕಾ ಕೀ ... ಹಾಂವ ಜಾವ್ಕಾ ಕೀ ....  ಮೋಣು ಆಲೋಚನಾ ಕೊರ್ನ್ ಸಂಘಯಾತಿ " ಮ್ಹಳ್ಳಲೋ ಕೃಷ್ಣು

ಧುರ್ಯೋಧನ : " ಹಾಂವೆ ನಿಂಮ್ ಗುಚೆ ವೇ ... ಕೃಷ್ಣಾ ? " ಮ್ಹಳ್ಳಲೋ ಧುರ್ಯೋಧನ 

ಕೃಷ್ಣ : " ಕೌರವಾ ರಾಬ ... ತು ಸಾರ್ವ ಭೌಮ .. ತುಕ್ಕ ಸ್ವತಂತ್ರ ಜಾವ್ನ್ ನಿರ್ಣಯ ಘೆವ್ಚ್ಯಾ ಝತ್ತಾ ... ಝಲ್ಲೆರಿ .. ಅರ್ಜುನ್ ತಗೆಲೆ ಭಾವಾ ಸಕಲ ಅಶಿಲೋ ... ತಗೆಲ್ ಪ್ರತಿನಿಧಿ ಜಾವ್ನ್ ಅಯಿಲಾ ... ತುಗ್ಗೆಲ್ ಪೋಷಿ ಪ್ರಾಯೇನ  ಸಾನು . ಹ್ಯೇ  ಧರ್ಮ ಸೂಕ್ಷ್ಮತಾ ಸುರ್ವೆಕ ಅಪೇಕ್ಷ ಕೊರ್ಚ್ಯಾಕ ಅರ್ಜುನಾಕ ಅಸ್ಸ ನವೇ ..?" ಮ್ಹಳ್ಳಲೋ ಕೃಷ್ಣು 

ಅರ್ಜುನ : " ಝಲ್ಲೆರಿ .... ಮಿಗ್ಗೆಲೆ ಅಪೇಕ್ಷ ಸಂಘುಯೇತ ವೇ ಕೃಷ್ಣಾ ... ? "
ಕೃಷ್ಣ : " ಅರ್ಜುನಾ ... ! ಸಮಾ ಆನ್ನೇಕ ಪೋಟಿ ಆಯಿಕಾ ... ಹಾಂವ ಯುದ್ಧ ಕರ್ನಾ ... ಮಕ್ಕ ಯುದ್ಧ ಕೋರ್ಕಾ ಮೋಣು  ಕೊಣಾಯ್ ನಿರ್ಬಂಧ ಘಲು ನಜ್ಜ . ಮಿಗೆಲೆ ಸಹಕಾರು ಉತ್ತರಾಚ್ಯೋ ಮಾತ್ರ . ಸಲಹಾ ಕಸಲೆಯ್ ನಿರ್ಬಂದ್ ನಾ ... ಮಕ್ಕ ಕೊಣಯ್ ತಶಿ ಕರಿ ...  ಅಶಿ ಕರಿ ಮೋಣು  ಸಂಘು ನಾ . ಆನ್ನೇಕ ಬದಿ ನಾರಾಯಣಿ ಸೈನ್ಯ ತನ್ನಿ ಯುದ್ಧ ಕರ್ತಾತಿ ... ಅರ್ಜುನಾ  ಸಮ ಆಲೋಚನಾ ಕೋರ್ನು ಸಾಂಗಾ . " ಮ್ಹಳ್ಳಲೋ ಕೃಷ್ಣ 

ಅರ್ಜುನ : ಪದ್ಮನಾಭಾ ... ಕೃಷ್ಣಾ ... ! ನಾರಾಯಣಿ ಸೈನ್ಯ ಮಕ್ಕ ನಕ್ಕಾ ... ಮಕ್ಕ ತೂ ಜಾಯಿ ... ತುಗ್ಗೆಲ್ ನಿರ್ದೇಶನ ಜಾಯಿ ... ತೀನಿ ಲೋಕು ವೊಟ್ಟು  ಕೊರ್ನ್ ತು ಏಕ ಬದಿನ ರಾಬ್ಲೇರಿ ... ಮಕ್ಕಾ  ತೂ ಜಾಯಿ ಕೃಷ್ಣಾ ! ತೂ ಮಕ್ಕ ರಥ ಸಾರಥಿ ಜಾವ್ನ್ ... ಮಿಗ್ಗೆಲೆ ಯುದ್ಧ ಗುರು ಸ್ರೇಷ್ಠ ಜಾವ್ನ್ .... ಮಕ್ಕ ನಿರ್ದೇಶನ ದೀ ಕೃಷ್ಣಾ " ಪಯ್ಯಾರಿ ಪೋಣು , ವಿನಮ್ರ ಜಾವ್ನು ಕೃಷ್ಣಾ ಲಗ್ಗಿ ಯಾಚನಾ ಕೆಲ್ಲಿ ಅರ್ಜುನಾನ

                     ಧುರ್ಯೋಧನಾ ಕ ಭಾರಿ ಸಂತೋಷು ಝಲ್ಲೋ " ಕೃಷ್ಣಾ ... ! ನಾರಾಯಣಿ ಸೈನ್ಯ .... ಮಕ್ಕ ಸಮ್ಮತಿ ಅಸ್ಸ . ತುಗ್ಗೆಲ್ ಸಹಾಯಕ ಹಾಂವ ಚಿರ ಋಣಿ ... ಮಿಗ್ಗೆಲೆ ಗುರು ವರ್ಯಾ ಬಲರಾಮಾಕ  ಪೊಳೋ ನ್ ಯೆತ್ತಾ " ಮೋಣು  ಸಂಘುನ್ ಧುರ್ಯೋಧನು ಭಾರ್ ಸರ್ಲೊ . ಲೆಕ್ಕನಾಶಿ ...  ಮನಾ ಅಶಿಲೆ ಮಾಗ್ ಣೆ ಪೂರ್ತಿ ಝಾಲ್ಲಿ .... ಹಾಂವೆ ನಿಮಗಿನಾಶಿ ಸೈನ್ಯ ಮಕ್ಕ ಮೆಳ್ಳೆ .... ಬುದ್ಧಿ ನಾತ್ತಿಲೊ ಅರ್ಜುನ್ ....  ಮೋಣು  ಆನಂದ ಪಾವ್ಲೋ . " ಗೋವಿಂದಾ  ... ! ಅಚ್ಯುತಾ ...!  ಅನಂತಾ .... ! ಹಾಂವೆ ಕಸಲೆ ಜಾಯಿ ಮೋಣು ಲೆಕ್ಕುನ್ ಹಾಂಗಾ ಆಯ್ಯಿಲೋ ಕೀ ... ತ್ಯೆ ಮೆಳ್ಚೆ ತಶಿ ಕೆಲ್ಲೆ ದೇವಾ ... ರಥಾರಿ ಕಾಪಿ ಧ್ವಜ ಅಸ್ಸುನ್ ಧರ್ಮ , ಅರ್ಥ , ಕಾಮ , ಮೋಕ್ಷ , ಚತುರ್ವಿಧ ಪುರುಷಾರ್ಥ ಸೂಚಕ ಜಾವ್ನ್ ಅಶಿಲೆ  ಚಾರಿ ಶ್ವೇತಅಶ್ವ ಬಂಧಿಲೆ ಮಿಗ್ಗೆಲೆ ರಥಾರಿ   ಬಯಿಸುನ್, ಮಿಗೆಲೆ ಯುಧ್ಧ ಗುರು ಜಾವ್ನ್ ಮಿಗೆಲೆ ಮಾರ್ಗ ದರ್ಶನ ಕರಿ ರಾಮಣಾ ಅಮ್ಕಾ ಸರ್ವಾಂಕ ಮುಕಾರ್ಸುನ್ ಕಸಲೆ  ಕೋರ್ಕಾ ಮೋಣು ನಿರ್ದೇಶನ ದಿತ್ತ ಲೋ  ತೂಚಿ .... ವಾಸುದೇವಾ ಪರಂಧಾಮಾ ! ತುಕ್ಕಾ ಶತ  ಶತ ಪ್ರಣಾಮ ... ! ವಿನಮ್ರ ಜಾವ್ನು ಮ್ಹಳ್ಳಲೋ . ಕೃಷ್ಣಾ ಕ ಸಂತೋಷು ಝಲ್ಲೋ . ಪ್ರೀತ್ಯೇನ್  ಅರ್ಜುನಾ ಕ ಫೊಟೊನ್ ಧರ್ಲೆ      

              ಬಲರಾಮಾ ಕ ವಿಷಯು ಧುರ್ಯೋಧನಾ ನ ಸಂಘೀಲೆ ನಿಮಿತ್ಯ ಕಳ್ಳೆ . " ಗುರುದೇವಾ ತೂ೦ವೆ ಅಂಮ್ ಕಾ ಸಹಾಯು ಕೋರ್ಕಾ . ಆಮ್ಗೆಲೆ ಬದಿ ನ ಯೇವ್ನ್ ಅಮ್ ಕಾ ಸಹಾಯು ಕೋರ್ಕಾ " ನಿಮಗಿಲೆ ಕೌರವ ರಾಯಾ ನ . " ಜಾಯ್ನಾ ....  ಧುರ್ಯೋಧನಾ .. ! ಕೃಷ್ಣಾ ನ ಪಾಂಡವ ಪಕ್ಷೆ ಕ ಕೆದನಾ ಮೆಳ್ಳೊ ಕೀ ... ತೇದನಾ ಪ್ರತಿ ಪಕ್ಷಾ  ರಬ್ಬುನ್ ಹಾಂವ ಯುದ್ಧ ಕರ್ನಾ . ಅಮ್ಮಿ ಸನ್ಪಣಾ ದುಕೂನ್ ಪ್ರಾಣ ಏಕ ದೇಹ ದೋನಿ ...  ಮ್ಹಳ್ಳೆ ಮ್ಹಣ್ಕೆ ವಡ್ಡಿಲೀಂತಿ . ಹ್ಯೇ ಅಂತ್ಯ ಸಮಯಾಕ ಕೃಷ್ಣಾ ಕ ಎದುರ ರಬ್ಬಾನಾ " ಮ್ಹಳ್ಳಲೋ ಬಲರಾಮು . " ಗುರುದೇವಾ ಮಿಗ್ಗೆಲೆ ಪಕ್ಷಾಕ ಮೆಳ್ನಾ ನಾತ್ಲೆರಿ ಜಾಯ್ತ . ... ಝಲ್ಲೇರಿ ಪಾಂಡವ ಪಕ್ಷಾ ಕ  ಮೇಳ್ನು ತುಗ್ಗೆಲ್ ವೈಶಮ್ಯಾಕ ಕಾರಣ ಜವ್ವು ನಜ್ಜ " ಮೋಣು ಪ್ರಾರ್ಥನಾ ಕೆಲ್ಲಿ ."ಮಸ್ತ ದಿವಸ ದುಕೂನ್ ತೀರ್ಥ ಯಾತ್ರಾ ಕೋರ್ಕಾ ಮೋಣು ಲೆಕ್ತಾಶಿಲೋ .... ಹಾಂಗಾ ಅಸ್ಲೆರಿ ಕೃಷ್ಣು ಮಕ್ಕ ಯುದ್ಧಾ೦ ತು ಗೂಪ್ಸಾಯಿ ತಾಲೊ ... ಹಯೇ ವೆಳ್ಯೇರಿ ಹಾಂವೆ ತೀರ್ಥ ಯಾತ್ರೆಕ ವೊಚ್ಛೆ ಲಾಯಕ್ " ಮ್ಹಳ್ಳಲೋ ಬಲರಾಮು . ಭೋಜ ವಂಶಾ ದುಕೂನ್ ಕೃತ ವರ್ಮಾ ಮಾತ್ರ ಧುರ್ಯೋಧನಾ ಕ ಸಹಾಯು ಕೊರುಂಕ ವೊಪ್ಪಿಗ ದಿತ್ತಾ

ಉಮಾಪತಿ