MAHABHARATHA Part - 20 ( ಕೊಂಕಣಿ ಭಾಶೆಂತು )
Viraata Parva ವಿರಾಟ ಪರ್ವ
ಆನಿ ದೋನಿ ತೀನಿ ದಿವಸಾನ ಪಾಂಡವಾಂಗೆ ಲೆ ವನವಾಸ ಪೂರ್ತಿ ಜಾವ್ಚ್ಯಾ ವತ್ತಾ . ಕಾಮ್ಯಕಾ ವನಾಂತು ಪಾಂಡವ , ಸರ್ವ ಬ್ರಾಹ್ಮಣಾಂಕ ಅಪ್ಪೋನು ಏಕ ಸಭೆ೦ತು ಉಲ್ಲಯಿತಾ ಆಸ್ಸತಿ .
ಧರ್ಮಜ :" ಅಮ್ಗೆಲೆ ಬಾರಾ ವರುಷವೂ ವನವಾಸ ಪೂರ್ತಿ ಜಾವ್ಚ್ಯೇ ಕಾಲು ಅಯಿಲಾ . ಇತ್ಲೆ ವರುಷ ಮಿಗೆಲೆ ವೈರಿ ದವರ್ಲೆಲೆ ಪ್ರೀತಿ ಅಭಿಮಾನ ನಿಮಿತ್ಯ ತುಮ್ಮಿ ಸರ್ವ ಅಮ್ಗೆಲೆ ವೊಟ್ಟು ಅರಣ್ಯ ವಾಸಾಂತು ಯೇವ್ನು ಆಮ್ಗೆಲೆ ಕಷ್ಟಾಂತು ಭಾಗಿ ಝಲ್ಲೆಲೀಂತಿ . ತುಮ್ಕಾ ಸರ್ವಾಂಕ ಕಷ್ಶಿ ಧನ್ಯವಾದು ಸಂಗ್ಚೆ ಮೋಣು ಮಕ್ಕಾ ಕಳ್ನಾ . ತುಮ್ಕಾಸರ್ವಾಂಕ ತುಮ್ಗೆಲಿ ಪ್ರೀತಿ , ವಾತ್ಸಲ್ಯ, ಮಮಕಾರ ದಕ್ಕಯಿಲೆ ಖತಿರಿ ಅನಂತಾನಂತ ವಂದನಾ ಕರ್ತಾ . ಅಜ್ಞಾತ ವಾಸ ಕ ಅಮ್ಮಿ ಮುಕಾರ್ಸುನ್ ವತ್ತನಾ ಆಮ್ಗೆಲೆ ವಿಯೋಗ ಚುಕ್ಚ್ಯೇ ನಾ . ತುಮ್ಮಿ ಸರ್ವಾನಿ ತು೦ಮ- ತುಮ್ಗೆಲೆ ಘರಾಕ ವಾಪಸ್ ವೊಚ್ಚುಕಾ ಮೋಣು ವಿನಮ್ರ ಜಾವ್ನು ವಿನಂತಿ ಕರ್ತಾ "
ದೌಮ್ಯಮುನಿ :" ಧರ್ಮಜಾ .. ಕಿತ್ಲೆ ಚಂದ ಜಾವ್ನು ಬಾರ ವರುಷ ವನವಾಸ ಕಾಲು ಸರ್ಲೊ ! ತಶೀಚ್ಯ್ ಅಜ್ಞಾತ ವಾಸ ಎಕ ವರುಷ ಚಂದಾಯೇರಿ ಜಾವ್ನು , ತುಮ್ಮಿ ಸರ್ವ ಪಾಂಡವ , ಹಸ್ತಿನಾವತಿಕ ಯೆವಚೆ ತಶಿ ಝಾವೊ ,ಮೋಣು ಪರಮಾತ್ಮಾಲೇ ಪ್ರಾರ್ಥನಾ ಕರ್ತಾ . ಅಮ್ಮಿ ಸರ್ವ ಬ್ರಾಹ್ಮಣ ಫಲ್ಲೆ ಸಕಾಣಿ ಹಸ್ತಿನಾವತಿಕ ಪ್ರಯಾಣ ಕರ್ತಾತಿ" ತಶೀಚ್ಯ್ ಸರ್ವಾನಿ ಪಾಂಡವಾಂಕ ಆಶೀರ್ವಾದ ಕೋರ್ನು , ತಾಂಗ - ತಾಂಗೆಲೆ ಘರಾಕ ವಾಪಸ್ ಗೆಲ್ಲೆ . ಪಾಂಡವಾಂಕ ತ್ಯೆ ರಾತ್ರಿ ನೀದ ಪೋಣಿ . ಅಜ್ಞಾತ ವಾಸಾಂತು ಕೋಣ್ - ಕೋಣ್ ಕಸಲೆ ವೇಷ ಧಾರಿ ಜಾವ್ನು ... ಕಷ್ಶಿ ದಿವಸ ಕಾಡ್ತಾತಿ ಮ್ಹಳ್ಳೆಲೆ ವಿಷಯಾಂತು ಚರ್ಚೆ ಕರ್ತಾಚಿ , ರಾತ್ರಿ ಲಕಯಿಲಿ . ಹೆರ್ದಿವಸು ಸೂರ್ಯೋದಯಾ ವೆಳ್ಯೇರಿ , ಧರ್ಮರಾಯಾನ ಸೂರ್ಯಾಲೆ ಸ್ತುತಿ ಕೋರ್ನು " ಹ್ಯೇ ಸೂರ್ಯ ದೇವಾ ! ತುಗ್ಗೆಲ್ ಕೃಪೇನ ಅಕ್ಷಯ ಪಾತ್ರ ದೀವ್ನು ಆಮ್ಕಾ ಸರ್ವಾಂಕ ಇತ್ಲೆ ಚಂದ ಕೋರ್ನು ರಕ್ಷಣ ಕೆಲ್ಲಿ ... ಜಾಯ್ ತಿತ್ಲೆ ಭಕ್ಷ್ಯ ಭೋಜನ ದೀವ್ನು ಮಾನ ಮರ್ಯಾದಿ ರಾಕ್ಲೆ ತೂ೦ವೆ ! ತುಗೆಲೆ ದಯಾ ಆಶೀಚಿ ಆಮ್ಗೆಲೆ ವೈರಿ ಆಸ್ಸೊ . ತುಗೆಲೆ ಅಕ್ಷಯ ಪಾತ್ರಾ ವಾಪಸ್ ಘೇ ... ಸೂರ್ಯದೇವಾ .. ! " ಧರ್ಮ ರಾಯಾಲೆ ಹಾತ್ತಾ೦ದುಕುನು ಅಕ್ಷಯ ಪಾತ್ರ ಆಕಾಶಾ ದಿಕಾನ ಉಬ್ಬುನ್ ಗೆಲ್ಲೆ .
ಧರ್ಮಜ : "ಹ್ಯೇ ಬಾರಾ ವರುಷ ವನವಾಸ ಅಮ್ಮಿ ಸರ್ವ ವೊಟ್ಟು ಜಾವ್ನು ಅಶಿಲೆ ನಿಮಿತ್ಯ , ಆಮ್ಕಾ ತಿತ್ಲೆ ಕಷ್ಠ ಕಳ್ ನಿ . ಕಷ್ಠ ಕೀ ಸೂಖ ಕೀ .. ಅಮ್ಮಿ ಸರ್ವಾನಿ ವಂಟೂನ್ ಘೇವ್ನು ತಾಜ್ಜೆ ಆನಂದ ಘೆತ್ಲೆ . ಅನಿ ಮುಕಾರಿ ತಷ್ಶಿ ನಯೀ .. ತಾಂಗ್ - ತಾಂಗೆಲೆ ಕಷ್ಠ ತನ್ನೀಚಿ ಬೊಗ್ಗುಕಾ ... ಕಸಲೆಯೀ ಕಾರಣಾ ನಿಮಿತ್ಯ .. ಆಮ್ಗೆಲೆ ಸಹ ಜನಾ ಮಧ್ಯೆ ಎಕ್ಲೇಕ ಸೊದ್ದುನ್ ಕಳ್ಳೊ ಮೋಣು ಝಲ್ಲೇರಿ ... ಮಾಗಿರಿ ವಾಪಾಸ್ ಬಾರ ವರುಷ ವನವಾಸ ಕಾಡಕಾ ಝತ್ತಾ , ಹ್ಯೋ ವಿಷಯು ಆಲೋಚನಾ ಕರ್ತಾನಾ .. ಮನಾ ಮಸ್ತ ಕಷ್ಠ ಝತ್ತಾ ... "
ಅರ್ಜುನ : " ಅಣ್ಣಾ .. ! ಅಮ್ಮಿ ಸರ್ವಾನಿ ವಿಂಗಡ ಜಾವ್ನು ಅಸ್ಸುಚೆ ಬರೀ ಏಕ ವರುಷ ಮಾತ್ರ .. ! ದೊಳೆ ಧಾಂಕುನ್ ಸೊಡ್ಚೆ ಭಿತರಿ .. ಏಕ ವರುಷ ಕಶಿ ವತ್ತಾ ಮೊಣು ಸಾಂಘು ಜಾಯ್ನಾ . ಅನಾವಶ್ಯಕ ಜಾವ್ನು ಚಿಂತಾ ಕೋರ್ನುಕ್ಕಾ " ಮ್ಹಳ್ಳಲೋ ಅರ್ಜುನ . ತ್ಯೆ ರಾತ್ರಿ ಚರ್ಚೆ ಕರ್ತಾಚಿ ... ಎಕ್ಲೇಕ ಎಕ್ಲೊ ಜಾಗ್ರತ ಸಾಂಗ್ತಾಚಿ ರಾತಿ ಫಲ್ಲೆ ಕೆಲ್ಲೆ . ಹೇರದಿವಸು ಪ್ರಾತಃ ಕಾಲಾಂತು , ಲಗ್ಗಿ ಅಶಿಲೆ ಜಲಪಾತಾ೦ತು ನಾವ್ನು ಸಂಧ್ಯಾ ವಂದನ ಕೋರ್ನು , ಸರ್ವಾಂಕ ಲಗ್ಗಿ ಬೊಸ್ಕರಾನು ಸಾಂಗ್ಲೆ ..
ಧರ್ಮಜ :" ಅಮ್ಗೆಲೆ ಅಜ್ಞಾತ ವಾಸಾಕ ಮತ್ಸ್ಯ ದೇಶ ಮಸ್ತ ಅನುಕೂಲ ಜಾವ್ನು ಅಸ್ಸ . ಮತ್ಸ್ಯ ದೇಶಾ ವಿರಾಟ ರಾಯು , ಪ್ರಜಾ ಪಾಲನ ಲಾಯಕ್ ಕರ್ತಾ . ಚಾಂಗ್ ಮನುಷು . ದೈವಭಕ್ತಿ ಅಷ್ಶಿಲೋ ಮನುಷ್ಯು . ಅಮ್ಮಿ ಅಜ್ಞಾತ ವಾಸ ವಿರಾಟ ರಾಯಾಲೆ ಅಂತಃ ಪುರಾಂತು ಕಾಡ್ಯಾ ... ಭೀಮ ಸೇನಾ .. ! ತುಗ್ಗೆಲ್ ಪುತ್ರ ಘಟೋತ್ಕಚಾ ಕ ಸ್ಮರಣ ಕರಿ . ತ್ಯೋ ಅಮಕಾ ಸರ್ವಾಂಕ ವಿರಾಟ ರಾಯಾಲೆ ಆಸ್ಥಾನಾಕ ಪಾವೈತಾಲೊ . ತ್ಯೆ ನಂತಾ .. ಆಮ್ಗೆಲೆ ಆಯುಧ ಆನಿ ಶಸ್ತ್ರಾಸ್ತ್ರ ಜಾಗ್ರತೆನ ದೊವೊರ್ಕಾ . ವಿರಾಟ ರಾಯಾಕ ಮಸ್ತ್ ಹೋಡ ಗೋವಳ ಅಸ್ಸ . ತ್ಯೆ ಜಾಗೇರಿ ಶಸ್ತ್ರಾಸ್ತ್ರ ಭಧ್ರ ಕೋರ್ಕಾ ".
ಭೀಮ ಸೇನಾನ ಘಟೋತ್ಕಚಾಲೆ ಸ್ಮರಣ ಕೆಲ್ಲೆ ಸತಾನ ಪ್ರತ್ಯಕ್ಷ ಝಲ್ಲೋ ಘಟೋತ್ಕಚ . " ಅಯ್ಯಾ .. ! ಮಕ್ಕಾ ಅಪ್ಪೋಚ್ಯಾ ಕಾರಣ ಕಸಲೇ ? ತುಮ್ಗೆಲೆ ಸೇವಾ ಕಸಲೆ ಕೋರೂ ?" ವಿನಯ ಪೂರ್ವಕ ನಮಸ್ಕಾರು ಕೋರ್ನು ನಿ೦ಮ್ಗಿಲೆ .
ಭೀಮಸೇನಾ : " ಘಟೋತ್ಕಚ ಕುಮಾರಾ .. ! ಆಮ್ಕಾ ಸಕ್ಕಡಾಂಕ ಮತ್ಸ್ಯ ದೇಶಾ .. ಗೋಕುಲ ಶಾಲಾಕ ಪಾವೈ . " ಘಟೋತ್ಕಚಾನ ಪಾಂಡವಾಂಕ ಹತ್ತಾ ತಾಳ್ವತಿರಿ ಬೊಸ್ಕರಾನು ಗೋಕುಲ ಶಾಲಾಕ ಪಾವೈಲೆ . ತಯೀ೦ಚಿ ಲಗ್ಗಿ ಅಷ್ಶಿಲೆ ನ೦ಯಿಚೆ ಬದಿನ ಬನ್ನಿ ರುಕ್ಕಾರಿ ಶಸ್ತ್ರಾಸ್ತ್ರ ಏಕ ನಿರ್ಜೀವ ಮನುಷ್ಯಾಲೆ ಮಡೆ ಮ್ಹಣ್ಕೆ ತಯ್ಯಾರಿ ಕೋರ್ನು ರುಕ್ಕಾರಿ ಲಾಂಬತ್ ಘಲ್ಲೆ . ತೊಗ್ಗು ದುಕುನು ಪೊಳೈತಾನಾ ಅತಿ ಭಯಂಕರ ಪ್ರೇತ ಶೇ ದಿಸ್ತಾ ಅಶಿಲೆ . ಲಗ್ಗಿ ವೊಚ್ಚಾಕ ಬಾಕಿ ಲೋಕಾನಿ ಭೀವ್ಕಾ ತಶೀ ಕೋರ್ನು ದೊರಿನ ಬಾಂಧುನ್ ಭಧ್ರ ಕೆಲ್ಲೆ .
ಧರ್ಮಜ : " ಘಟೋತ್ಕಚ ಕುಮಾರಾ ..! ತುಗ್ಗೆಲ್ ಸೇವಕ ಭೂತ ಪ್ರೇತಾಂಕ ಏಕ ವರುಷ ತಾಯ್ ಹ್ಯೇ ದಿವ್ಯಾಸ್ತ್ರ ರಕ್ಶಣೆ ಕ ನಿಯುಕ್ತ ಕರಿ . ಅಂಮ್ಕಾ ಮಾತ್ರ ದಿವ್ಯಾಸ್ತ್ರ ದಿಸ್ಚೆ ತಶಿ ಕರಿ . ಬಾಕಿ ಲೋಕಾಂಕ ಪ್ರೇತ ಪಿಸಾಚ ಸರೋಪು ಶೀ ದಿಸ್ಸುಕಾ ." ಘಟೋತ್ಕಚಾನ ದೋನಿ ಭುತ್ತಾ೦ಕ ರಾಖ್ವಲಿ ದವರ್ಲೆ . ಬನ್ನಿ ರುಕ್ಕಾಕ ವಿನಮ್ರ ಪ್ರಣಾಮ ಕೋರ್ನು , ಯಮಧರ್ಮರಾಯಾಕ ಸ್ಮರಣ ಕೆಲ್ಲೆ . ತ್ಯೆ ದಿವಸು ಅಶ್ವಯುಜ ಶುದ್ಧ ದಶಮಿ .. ಭಾರೀ ಚಾಂಗ ದಿವಸು ಜಾವ್ನು ಅಶಿಲೋ . ಯಮಧರ್ಮರಾಯಾನ , ಧರ್ಮಜಾಕ ಅಜ್ಞಾತ ವಾಸ ವೆಳ್ಯೇರಿ ಕೊಣಾಕಯ್ ತಾಂಗೆಲೆ ರೂಪ ಕಳ್ನಾಶಿ ರಬ್ಬು೦ಕ ವರು ದಿಲ್ಲೆಲೋ . ತ್ಯೇ ವರ ಫಲಾ ನಿಮಿತ್ಯ .. ಧರ್ಮಜ, ಭೀಮ , ನಕುಲ ಸಹದೇವಾಕ ತಂಗ್ - ತಾಂಗೆಲೆ ನೈಜ ರೂಪ ವೋಚ್ಚುನ್ ಪ್ರಚ್ಚನ್ನ ರೂಪ ಅಯಿಲೆ . ಊರ್ವಶಿ ಶ್ರಾಪ ನಿಮಿತ್ಯ ಅರ್ಜುನ ಷಂಡ ರೂಪ ಅಯಿಲೆ . ದ್ರೌಪದಿಲೆ ರೂಪ ತಾಯ್ ಬದಲ್ ಝಲ್ಲೆ . ಎಕ್ಲೆ೦ಗೆಲೆ ತೊಂಡ ಎಕ್ಲೆನ ಪೊಳೈಲೆ . ಪಾಂಡವಾಂಕ ತ೦ಕಾಚಿ ನಂಮ್ಗುಚ್ಯಾ ಜಾಯ್ನಾ ನಾತ್ತಿಲೆ ತಿತ್ಲೆ .. ವಿಶಿಷ್ಠ ರೂಪ ಅಯಿಲೆ . ವಿರಾಟ ರಾಯಾಲೆ ರಾವಳಾರ ವೊಚ್ಛೆ ಫುಡೇ .. ಕೋಣ್ - ಕೋಣೆ ಕಶಿ ಪ್ರವೇಶು ಕೋರ್ಕಾ ಮೋಣು ನಿರ್ಧಾರು ಕೆಲ್ಲೆ . ಘಟೋತ್ಕಚ ಸರ್ವಾಂಕ ಪ್ರಣಾಮ ಕೋರ್ನು ಅಂತರ್ಧಾನ ಝಲ್ಲೊ .
ಧರ್ಮಜ : " ಹಾಂವ ಯತಿ ರೂಪಾರಿ ' ಕಂಕು ಭಟ್ಟಾ' ನಾವಾರಿ ವಿರಾಟ ಆಸ್ತಾನಾ ಕ ಪಾವ್ತಾ "
ಭೀಮ : " ಹಾಂವ .. ' ವಲವಲ ' ಮ್ಹಳ್ಳೆಲೆ ನಾವಾರಿ ಅಂತಃ ಪುರಾ ವಸರಿ ಪಾವ್ತಾ . ಮಿಗ್ಗೆಲೆ ಪಾಕಶಾಸ್ತ್ರ ಜ್ಞಾನ ಸರ್ವಾಂಕ ದಕ್ಕಯಿತಾ "
ಅರ್ಜುನ : " ಹಾಂವ ' ಬ್ರಹನ್ನಳೆ ' ಮ್ಹಳ್ಳೆಲೆ ನಾವಾರಿ .. ಅಂತಃಪುರ ರಾಜ ಕುಮಾರಿಕ ನೃತ್ಯ ಸಂಗೀತ ಶಿಖಯಿತಾ "
ನಕುಲ : " ಮಕ್ಕ ಅಶ್ವ ಹೃದಯ ವಿದ್ಯೆ ಗೊತ್ತಸ್ಸ . ಹಾಂವ 'ಧರ್ಮಗ್ರಂಥಾ' ಮ್ಹಳ್ಳೆಲೆ ನಾವಾರಿ ಅಶ್ವ ಶಾಲೆಂತು ಅಸ್ತಾ "
ಸಹದೇವ : " ಅಣ್ಣಾ .. ! ಹಾಂವ 'ತಂತ್ರಿಪಾಲ ' ಮ್ಹಳ್ಳೆಲೆ ನಾವಾರಿ ಪಶು ವೈದ್ಯ ಜಾವ್ನು ಗೋಕುಲ ಶಾಲೆಂತು ರಾಬತಾ "
ಧರ್ಮಜ : " ದ್ರೌಪದಿ .. ! ಕಿತ್ಯಾ ಮೌನ ಜಾವ್ನು ಅಸ್ಸ ? ಅಂಮ್ಕಿ ದರ್ಲೆ ಮನಷ್ಯ೦... ಅಮ್ಮಿ ಕಶೀಚ್ಯ್ ದಿವಸ ಕಾಡ್ತಾತಿ .. ಝಲ್ಲೆರಿ ತೂ ಬಾಯ್ಲ್ಯಮನಿಷಿ ತು ಕಶಿ ದಿವಸ ಕಾಡ್ತಾಲಿ ?ಮ್ಹಳ್ಳೆಲೆ ಆಲೋಚನಾ ಕರ್ತಾನಾ ... ಮನಾ ಸಂಕಟ ಝತ್ತಾ . ಸದ .. ದಾಸಿ ಲೋಕಾಲೆ ಹತ್ತಾ೦ತು ಕಾಮ ಕೊರೊಂನ್ ಘೆತ್ತಶಿಲಿ ಮಹಾರಾಣಿ ... ಅಜಿ ದಾಸಿ ಜಾವ್ನು ಅನ್ನೇಕ್ಲೇ ಲಗ್ಗಿ ಕಾಮ ಕೊರ್ಚೆ ಕಿತ್ಲೆ ಖಠಿಣ ಮೋಣು ಅತ್ತ ದಿಸ್ತಾ . ವೀರಾದಿ ವೀರ ಪಾಂಡವ ಅಮ್ಮಿ ಆಸ್ಸುನು .. ತುಕ್ಕಾ ಕಷ್ಠ ಚುಕ್ಕನಿ ಪೊಳೆ .. ! ಸರ್ವಾಲ್ ಹ್ಯೇ ಗತೀಕ ಕಾರಣ ಹಾ೦ವಚಿ ... ಹಾಂವೆ ದ್ಯೂತ ಖೇಳ್ನಾಶಿ ಆಶಿಲೆ ಝಲ್ಲೇರಿ .. ಹೀ ಕಷ್ಠ ಯೇನಾ ಅಶಿಲೆ . ತುಮ್ಕಾ ಸರ್ವಾಂಕ ದಾಸ ವೃತ್ತಿ ಯೆವ್ಚ್ಯಾ ಕ ಕಾರಣ ಹಾಂವ " ಮೋಣು ಸಂಘುನು ದೊಳೆ ಉದ್ದಾಕ ಕಳ್ಳೆ .
ದ್ರೌಪದಿ : " ಆರ್ಯಪುತ್ರಾ .. ! ಬಾಯ್ಲ ಮನಿಷಿ ... ಸಹನೆಕ ಪ್ರತಿರೂಪ . ಮಿಗ್ಗೆಲೆ ವಿಷಯಾಂತು ಯಚ್ಚನಾ ಕಾಣುಕ್ಕಾತಿ . ಮಕ್ಕ ತುಮ್ಕಾ ಪೊಳೈತಾನಾ ಮನಾ ಮಸ್ತ ಕಷ್ಟ ದಿಸ್ತಾ . ಕುರು ಚಕ್ರವರ್ತಿ ಸ್ಥಾನಾರಿ ಅಷ್ಶಿಲೆ .. ರಾಜ ಭೋಗಾಂತು , ರಾಜ ವೈಭವಾಂತು ಅಸ್ಕಾ ಝಲ್ಲೆಲೆ ತುಮ್ಮಿ ... ಕ್ಷತ್ರಿಯ ಜಾವ್ನು , ದುಸ್ರೆಂಕ ದಾಸ ಜಾವ್ನು ಅಜ್ಞಾತ ಜೀವನ ಕೊರ್ಚೆ , ಪರ ದಾಸ್ಯಕ ಮತ್ತೆ ಬಾಗ್ಸುನ್ ... ತುಮ್ಗೆಲೆ ಹೀ ಪರಿಸ್ಥಿತಿರಿ ತುಂಮ್ಕಾ ಪೊಳೈತಾನಾ ... ಮಕ್ಕಾ ಅಂತ ಲಶ್ಶಿಲೆ ಅನುಭವು ಝತ್ತಾ " ಮೋಣು ಸಂಘುನ್ ಮಸ್ತ ರಳ್ಳಿ
ವಯಿ .. ! ಕೊಣಾ ಝಲ್ಲೆರಿಯೀ .. ಪ್ರಾರರಭ್ಧ ಚುಕ್ಕೋಚ್ಯಾ ಜಾಯ್ನಾ . ತ್ಯೆ ಅನುಭವಾಕ ಯೇವ್ನು ಚ್ಯಿ ಸರ್ವ ದುಃಖ ದಿತ್ತಾ . ಲೋಕಾಧಿಪತಿ ಜವ್ವೋ , ತ್ರಿಮೂರ್ತಿ೦ಕ ಜವ್ವೋ ... ಕರ್ಮಾಚೆ ಫಲ ಬೊಗ್ಗುಕಾ ಜತ್ತ . ಮಹಾ ಶಿವಾಕ ಭಿಕ್ಷು ಜಾವ್ನು ಜೀವನ ಕೋರ್ಕಾ ಪಳ್ಳೆ . ಹರಿಶ್ಚ೦ದ್ರ ಚಕ್ರವರ್ತಿಕ ... ಬಾಯ್ಲ್ ಚೆರ್ಡು೦ವಾಂಕ ಕಾಣ್ ಘೇವ್ನು .. ಚಾಂಡಾಲ ವೃತ್ತಿ ಕೋರ್ಕಾ ಪಳ್ಳೆ .. ನಳ ಚಕ್ರವರ್ತಿಕ ಅತೀ ನಿಕೃಷ್ಠ ಜೀವನ ಕೋರ್ನು .. ಪಾಕ ಶಾಲೆಂತು ರಾನ್ಪೊ ಜಾವ್ನು ರಾಬಚೆ ಪರಿಸ್ಥಿತಿ ಆಯಿಲಿ . ಮನುಷ್ಯಾಲೇ ಬುದ್ದೋ೦ತಕಾಯಿಕ ಅನಿ .. ವಿಧಿ ವಿಕೋಪಾಕ ಕಾಯಿ ಸಂಬಂಧು ನಾ
ದ್ರೌಪದಿ : " ವಿರಾಟ ಮಂದಿರಾಂತು ಹಾಂವ ಸೈರಂಧ್ರಿ ಜಾವ್ನು ' ಮಾಲಿನಿ ' ಮ್ಹಳ್ಳೆಲೆ ನಾವಾರಿ .. ಸರ್ವಾಂಕ ಕೇಶ ಶ್ರಾಂಗಾರ ಕೋರ್ನು ... ರಾಣಿಕ ವಸ್ತ್ರ ಅಲಂಕಾರ ಕೋರ್ನು .. ಮಕ್ಕಾ ಗೊತ್ತಶಿಲೆ ಅಲಂಕಾರ ವಿದ್ಯಾ ದಕ್ಕೋನು , ಮಹಾರಾಣಿಲೆ ಮನ ಸಂತುಷ್ಠ ಕರತಾ " ( ಮಹಾರಾಣಿ ಪರಿವಾರಾಕ ಪಿವ್ಚೆ ಉದ್ದಾಕ ತಂಪು ಫಲಾ ರೋಸು ದಿವ್ಚೆ ಕಾಮ ಕರ್ತಲಿಕ ' ಸೈರಂಧ್ರಿ ' ಮೋಣು ಅಪ್ಪಯಿತಾತಿ )
ಉಮಾಪತಿ
No comments:
Post a Comment