MAHABHARATHA Part - 21 ( Konkani Bhaashentu )
Viraata Parva - Pura Pravesha ಪುರ ಪ್ರವೇಶ
ಪಾಂಡವ ವಿರಾಟ ರಾಜ್ಯ ಕ ಆಯಿಲಿ೦ತಿ . ಎಕ್ಲೇ೦ಕಯಿ ತಾಂಗೆಲೆ ಗುರ್ತು ಮೆಳ್ಚೆ ತಶೀ ನಾ . ವಿರಾಟ ರಾಜ್ಯ ರಾಜ ರಸ್ತೆ೦ತು , ಎಕ್ಲೆಯಿ ತಾಂಗೆಲೆ ಗುರ್ತು ಕಾಣು ಉಲ್ಲೋಚ್ಯಾ ಯೇನಿ೦ತಿ . ತಿತ್ಲೆ ತಾಂಗೆಲೆ ರೂಪ ಬದಲ್ ಝಲ್ಲಾ . ಸಾರ್ವಜನಿಕ ಲೋಕು , ತಾಂಕಾ ಪೊಳೊನ್ ವಿಸ್ಮಯ ಜಾವ್ನು ಪೊಳೈಲೆ . ಸ್ವಲ್ಪ್ ಜನ ತಾಂಕಾ ಭಕ್ತೀನ ಪ್ರಣಾಮ ಕೆಲ್ಲೆ . ಸ್ವಲ್ಪ ಜನ ತನ್ನಿ ಗಂಧರ್ವ ಮೋಣು ಲೆಕ್ಲೆ . ತ್ಯೆ ದಿವಸು .. ವಿಜಯ ದಶಮಿ ದಿವಸು ಝಲ್ಲೆಲೆ ನಿಮಿತ್ಯ , ತ್ಯೆಚಿ ದಿವಸು ಅಂತಃಪುರಾಕ ಪ್ರವೇಶು ಕೊರ್ಚೆ ಚಾಂಗ ದಿವಸು ಮೋಣು ಧರ್ಮರಾಯಾನ ಲೆಕ್ಲೆ . ದ್ವಾರಪಾಲಕಾನಿ ತಾಂಕಾ ಮರ್ಯಾದಿ ದೀವ್ನು ಅಂತಃಪುರಾಕ ವೊಚ್ಛೆ ವಾಟ ದಕ್ಕಯ್ಲಿ . ತ್ಯೆ ವೆಳ್ಯೇರಿ ವಿರಾಟ ರಾಯು ವಿನೋದ ಜಾವ್ನು ಚಾರಿ ಲೋಕಾಲೆ ಉಲ್ಲಯಿತಾ ಅಶಿಲೊ .
" ಮತ್ಸ್ಯ ದೇಶಾ ರಾಯಾಕ ಜಯ ಜವ್ವೋ ... ವಿರಾಟ ಪ್ರಭು ಕ ಸನ್ಮಂಗಳ ಜವ್ವೋ " ಯತಿ ರೂಪಾರಿ ಅಶಿಲೆ ಧರ್ಮಜಾ ನ ಜಯಕಾರು ಕೆಲ್ಲೊ
" ಮಹಾರಾಜಾ .. ! ಅಮ್ಮಿ ಕುರು ದೇಶಾ ಜನ .. ತುಮ್ಗೆಲೆ ಸದ್ಗುಣ ಅಯಿಕುನು .. ತುಮ್ಗೆಲೆ ಸೇವಾ ಕೊರುಂಕ ಹಾಂಗಾ ಆಯಿಲಿ೦ತಿ ". ವಿರಾಟ ರಾಯಾನ ಪಾಂಡವಾಂಕ ಪೊಳೈಲೆ ... " ತುಂಕಾ ಪೊಳೈಲ್ಯಾರಿ ತುಮ್ಮಿ ರಾಜ ಲಕ್ಷಣ ಅಷ್ಶಿಲೆ ಲೋಕಾ ಮ್ಹಣ್ಕೆ ದಿಸ್ತಾತಿ . ಸೇವಾ ಕೊರೊಂನ್ ಘೇವ್ಚೆ ಶ್ರೀಮಂತ ಲಕ್ಷಣ ಆಸ್ಲೆ ವ್ಹರಿ ದಿಸ್ತಾ . ಸೇವಾ ಕೊರ್ಚೆ ಶ್ರಮಿಕ ಲೋಕಾ ಮ್ಹಣ್ಕೆ ದಿಸ್ಸನಾತಿ " .
ಧರ್ಮಜ : " ಮಹಾರಾಜಾ ..! ಸೇವ ಕೊರ್ಚೆ ಶ್ರಮಿಕ ಲೋಕಾಂಕ ಪೋಳೋನ್ ಉದಾತ್ತ ಭಾವನಾ ಪೋಳೋಚ್ಯೆ... ತುಮ್ಗೆಲೆ ಕರುಣಾ ಜನಿತ ದೃಷ್ಟಿ ಭಾವ ವಿಶಿಷ್ಠ ;ಆನಿ ಮರ್ಯಾದಿ ಪೂರ್ವಕ ಜಾವ್ನು ಅಸ್ಸ . ಅಮ್ಮಿ ನಿಜಾವ್ನು ತುಮ್ಗೆಲೆ ಸೇವಾ ಕೋರ್ಕಾ ಮೋಣು ನಿರ್ಮಲ ಭಾವನೇನ ಅಯಿಲೆ೦ತಿ ಪ್ರಭೂ ".
ವಿರಾಟ ರಾಯು : " ಭಳಾ ಭಳಾ .. ! ಪೊಳೋಚ್ಯಾ ಮಾತ್ರ ನಯ್ ... ಉತ್ತರಾಂತುಯಿ ತೂ ಬುದ್ದೊಂತು ದಿಸ್ತಾ ... ಯತಿ ರೂಪಾರಿ ಅಶಿಲೋ ತುಗ್ಗೆಲ್ ನಾಂವ ಕಸಲೆ ?
ಧರ್ಮಜ : " ವಸುಧೇಶ್ವರಾ ! ಪೂರ್ವಾಶ್ರಮ ನಾಂವ ವಿಂಗಡ .. ಅತ್ತ ಮಕ್ಕಾ ' ಕಂಕು ಭಟ್ಟ' ಮೋಣು ಅಪ್ಪಯಿತಾತಿ . ಹಾಂವೆ ಸಮಸ್ತ ವೇದ ಪುರಾಣ ವಜ್ಜುನ ಧರ್ಮಾ ವಿಷಯು ಗೊತ್ತಷ್ಶಿಲೊ ಮನುಷ್ಯ . ದ್ಯೂತ ವಿದ್ಯೆಂತು ಮಕ್ಕಾ ಮಸ್ತ ಅನುಭವ ಅಸ್ಸ . ತುಮ್ಮಿ ದ್ಯೂತ ವಿಶಾರದ ಮೊಣು ಐಕುನ್ ಗೊತ್ತು . ತುಂಮಕಾ ದ್ಯೂತ ಖೆಳಾ ವೊಟ್ಟು .. ಧಾರ್ಮಿಕ ಶಾಸ್ತ್ರ ಸಂಘುಕಾ ಮೋಣು ಮಕ್ಕಾ ಆಶಿ ಅಸ್ಸ . ಜಲ್ಲೇರಿ .. ಪ್ರಭೂ .. ಮೋಸು ಫಟ್ಟಿ ಉಲ್ಲೊಚ್ಯೇ , ವಂಚನ ಕೊರ್ಚೆ .. ಅಸಲೆಂತು ಹಾಂವ ಮಸ್ತ ದೂರ . ಎಕ್ಲೆನ ಅಪ್ಪಳ್ಳೆಲೆ ಆಹಾರ ಹಾಂವ ಘೇನಾ . ಮಧ್ಯ ಪಾನ , ಮಾ೦ಸ ಹಾಂವ ಖಾಯ್ನಾ .. ಕೊಣಯ್ ದಿಲ್ಲೆಲೆ ಕಾಣಿಕಾ ಘೇನಾ . ರಾಜಸುಖ ಮಕ್ಕಾ ನಕ್ಕಾ .. ತುಮ್ಗೆಲೆ ಪ್ರೀತಿ ವಿಶ್ವಾಸು ಚಿ .. ಮಕ್ಕಾ ದಿವ್ಚೆ ಸಂಭಾವನ ಮೋಣು ಹಾಂವ ಲೆಕ್ತಾ " .
ವಿರಾಟ ರಾಯು : " ಶಹಬ್ಬಾಷ್ ! ತುಮಚೆ ತಸಲೆ ನಿಷ್ಠಾವಂತ ಆಮ್ಗೆಲೆ ಅಂತಃಪುರಾಂತು ಅಷಚೆ ಅಂಮಕಾ ಮಸ್ತ ಗೌರವ ... ಯೆಯ್ಯಾ ಹ್ಯೇ ಆಸನಾಂತು ಬಯಿಷ್ಯಾ " ಭೀಮಾಕ ಪೊಳೋನ್ " ತೂ ಕೋಣ್ ? " ಮೋಣು ನಿ೦ಮ್ಗಿಲೆ .
ಭೀಮ : " ಮಹಾ ಪ್ರಭೂ ! ಹಾಂವ ' ವಲಲ ' ಪಾಕ ಶಾಸ್ಟ್ರಾಂತು ಪಂಡಿತ . ಹಾಂವೆ ರಾಂದಪ ಕೆಲ್ಲೇ ಮ್ಹಣ್ಕೆ ಭಕ್ಷ್ಯ ಭೋಜ್ಯ ಖಂಚೇಯಿ .. ಬಾಯ್ಲ್ಯಾ ಮನ್ಷಯಾಂಕ
ಕೋರು ಜಾಯ್ನಾ . ಇಂದ್ರಪ್ರಸ್ಥ ರಾಜ್ಯಾ೦ತು ಭೀಮಸೇನ ರಾಯಾಕ ಶಿಷ್ಯ ಜಾವ್ನು .. ಮಲ್ಲಯುದ್ಧ , ಮುಷ್ಠಿಯುದ್ಧ , ... ಶಿಕ್ಲಾ . ತನ್ನಿ ವನವಾಸಾಕ ವತ್ತರಿ .. ಥ೦ಯಿ ಹಂಗಾ , ಕಾಮ ಕೋರ್ನು .. ತುಮ್ಗೆಲೆ ನಾ೦ವ ಅಯಿಕುನು ಕಾಮ ಸೊದ್ದುನ್ ಅಯಿಲಾ " .
ವಿರಾಟ ರಾಯು : " ಭಳಾ ..! ಜಾಯ್ತ ವಲಲಾ .. ತೂ ಪಾಕ ಶಾಲೆಂತು ರಬ್ಬುನ್ , ತುಗ್ಗೆಲ್ ಕಾಮ ಕೋರ್ನು ಆಮ್ಗೆಲೆ ಅಂತಃ ಪುರಾಂತು ರಾಬ್ಬುಯೇತ " .
ರಾಜ ಭಟಾ೦ಕ ಅಪ್ಪೋನ್ ಪಾಕ ಶಾಲೆಂತ್ ರಾಬ್ಚ್ಯಕ ವ್ಯವಸ್ಥ ಕೆಲ್ಲಿ . ತಾಜ್ಜೆ ನಂತರ ನಕುಲಾನ ತಾಗೆಲ್ ಪರಿಚಯು ದಿಲ್ಲೊ .
ನಕುಲ : " ಪ್ರಭು ..ಹಾಂವ ... ' ಧಾಮೃಗಂಧ 'ಮಕ್ಕಾ ಅಶ್ವ ಶಾಸ್ಟ್ರಾಂತು ಮಸ್ತ ಜ್ಞಾನ ಅಸ್ಸ . ಅನುಭವುಯಿ ಅಸ್ಸ . ಅಶ್ವ ಜ್ಞಾನ , ಮನೋಗತಿ ಮಕ್ಕಾ ಗೊತ್ತಸ್ಸ . ಹಾಂವೆ ಪ್ರಶಿಕ್ಷಣ ದಿಲ್ಲೆಲೆ ಘೋಡೆ , ವಿಶ್ವಾ೦ತು ಅಸಾಮಾನ್ಯ ಘೋಡೆ ಮೋಣು ನಾ೦ವ ಘೆತ್ತಿಲೆ ಅಸ್ಸ . ಪ್ರಭೂ ..! ಹ್ಯೋ ಮಿಗೆಲೆ ಭಾವು ಹಗೆಲ್ ನಾ೦ವ ' ತಂತ್ರಿಪಾಲ ' ಮೋಣು . ಹ್ಯೋ ಪಶುವೈದ್ಯ ಶಾಸ್ಟ್ರಾಂತು ವಿಶಾರದು . ಹಾಣೆ ದಿಲ್ಲೆಲೆ ಫಾಲ್ಲೋ ಖಾವನು ಕ್ಷೀರ ಸಮೃದ್ಧಿ ಝತ್ತಾ , ಪಶು ಕುಲ ವೃದ್ಧಿ ಕೊರ್ಚೆ ವಿದ್ಯೆ೦ತು ಮಹಾ ನಿಪುಣ " ಮೋಣು ಸಂಘುನ್ ಸಹದೇವಾಲೆ ಗುರ್ತು ಕೋರ್ನು ದಿಲ್ಲೊ . ವಿರಾಟ ರಾಯಾನ ದೊಗ್ಗಾ೦ಕಯ್ ಕಾಮಾಕ ನಿಯುಕ್ತಿ ಕೆಲ್ಲಿ ಅಶ್ವ ಶಾಲೆಂತು , ಗೋಶಾಲೆಂತು ರಬ್ಬು೦ಕ ವ್ಯವಸ್ಥಾ ಕೆಲ್ಲಿ
ಅರ್ಜುನ ಊರ್ವಶಿ ಶ್ರಾಪ ನಿಮಿತ್ಯ ಸ್ತ್ರೀ ರೂಪಾರಿ ಅಸ್ಸ . ವಿರಾಟ ರಾಯಾನ ಸ್ತ್ರೀ ಮೋಣು ಲೆಕ್ಕುನು " ತೂ ಕೋಣ ಅಮ್ಮಾ ...! ? " ಮೋಣು ನಿಮಗಿಲೆ " ತುಕ್ಕ ಪೊಳೈತಾನಾ ನಾಟ್ಯ ಗೊತ್ತಷಿಲೆ ಮ್ಹಣ್ಕೆ ದಿಸ್ತಾ ... ತುಕ್ಕಾ ಅಮ್ಗೆಲೆ ನಿಮಿತ್ಯ ಕಸಲೆಯೀ ಸಹಾಯು ಜಾವ್ಕಾ ಅಶಿಲೋ ವೇ ? ನಾತ್ಲೆರಿ ತುಗ್ಗೆಲ್ ನೃತ್ಯ ಪ್ರದರ್ಶನಾ ಕ ಸಹಕಾರ್ ಜಾವ್ಕಾವೇ ?" ಮೋಣು ನಿಮಗಿಲೆ ... ಅರ್ಜುನಾನ ... ವಯ್ಯಾರ ಕೋರ್ನು ... ನಾಟ್ಯ ಭಂಗಿರಿ ರಾಯಾ ಕ ವಂದನಾ ಕೆಲ್ಲಿ .
ಅರ್ಜುನ : " ಮಹಾರಾಜಾ ..! ಹಾಂವ ' ಬ್ರಹನ್ನಳ ' .. ನಾಟ್ಯ , ವಾದ್ಯ , ಸಂಗೀತ , ಗಾಯನಾಂತು ಮಕ್ಕ ಜ್ಞಾನ ಪ್ರತಿಭ ಅಸ್ಸ . ಪ್ರಭೂ .. ! ತುಮ್ಮಿ ಕಲಾ ಪೋಷಕ ಮೋಣು ಐಕುನ್ ಗೊತ್ತು . ತುಮ್ಗೆಲೆ ನರ್ತನ ಶಾಲೆಂತು , ನಾಟ್ಯಾಚಾರ್ಯ ಜಾವ್ನು , ರಾಜ ಕುಮಾರಿಕ , ವಿಂಗಡ ರಾಣಿಲೆ ದಾಸಿಯಾಂಕ ನರ್ತನ ಶಿಖಯಿತಾ .. ತುಮ್ಗೆಲಿ ಆಜ್ಞಾ ಜಾವ್ಕಾ " ನಯ ವಿನಯ ನಾಜೂಕ ಜಾವ್ನು ಅರ್ಜುನಾನ ಸ೦ಗ್ಲೆ . ವಿರಾಟ ರಾಯಾಕ ಸಂತೋಷು ಝಲ್ಲೋ " ಬ್ರಹನ್ನಳೆ .. ! ಮಸ್ತ ದಿವಸ ದುಕುನ್ ಆಮ್ಗೆಲೆ ಅಂತಃಪುರಾಕ ಎಕ್ಲಿ ನಾಟ್ಯಾಚಾರ್ಯ ಜಾವ್ಕಾ ಮೋಣು ಮನಾ ಲೆಕ್ತಾಶಿಲೋ . ತೂ೦ವೆ ಆಯ್ಯಿಲೆ ಸಂತೋಷು ಝಲ್ಲೋ . ಆಮ್ಗೆಲೆ ರಾಜ ಕುಮಾರಿಕ ನಾಟ್ಯಾಚಾರ್ಯ ಜಾವ್ನು ಆಶೀರ್ವಾದು ಕೋರ್ಕಾ . " ಮೋಣು ಫಲ ಪುಷ್ಪ ವೀಡೊ ದೀವ್ನು ಮರ್ಯಾದಿ ಕೆಲ್ಲಿ
ದ್ರೌಪದಿ , ಸೈರಂಧ್ರಿ ವೇಷಾರಿ ವಿರಾಟ ರಾಯಾಲೆ , ರಾಣಿ ಸುದೇಷ್ಣಾ ದೇವಿಕ ಏಕ ದಾಸಿಲೆ ಸಹಾಯು ಘೇವ್ನು ಅಂತಃಪುರಾಕ ವೊಚ್ಚುನ್ ಮೆಳ್ಳಿ . ದ್ರೌಪದಿ ದೇವಿಲೆ ರೂಪ ಪೊಳೋನ್ ಸುದೇಷ್ಣಾ ದೇವಿಕ ಆಶ್ಚರ್ಯ ಝಲ್ಲೆ . ಮಹಾರಾಣಿಕ ವಿನಮೃತಾ ಪೂರ್ವಕ ಸೈರ೦ಧ್ರಿ ನ ನಮಸ್ಕಾರ್ ಕೆಲ್ಲೆ " ಕೋಣ ಅಮ್ಮಾ ತೂ ..? " ಸುದೇಷ್ಣಾ ದೇವಿನ ನಿಮಗಿಲೆ .
ದ್ರೌಪದಿ : " ಅಮ್ಮಾ .. ! ಹಾಂವ ಯೆಕ್ಲಿ ಗಂಧರ್ವ ಸ್ತ್ರೀ ! ಏಕ ವರುಷ ಭೂ ಲೋಕಾಂತು ಅಸ್ಸುನ್ ಮಹಾ ವೃತ ಕೋರ್ಕಾ ಮೋಣು ಲೆಕ್ಕುನ್ ಅಯಿಲೆ . ಹ್ಯೇ ಏಕ ವರುಷ
ತುಮ್ಗೆಲ್ ಅಂತಃಪುರಾಂತ್ ರಬ್ಬುನ್ ಸೈರ೦ಧ್ರಿ ಕಾಮ ಕೋರ್ನು ಅಸ್ತಾ . ( ಸೈರ೦ಧ್ರಿ ಮ್ಹಳ್ಳೆರಿ .. ರಾಣಿಲೆ ಆಪ್ತ ಸೇವಕಿ . ಥಂಢ ಫಲ ವಸ್ತಾನ ಪೇಯ ತಯ್ಯಾರಿ ಕೋರ್ನು ದಿತ್ತಲಿ . ಕೇಶಾಲಂಕಾರ , ಆಭೂಷಣ ಘಾಲುಂಕ ಸಹಾಯು ಕರ್ತಲಿ .. ರಾಣಿ ಕ ಸೌಂದರ್ಯ ವರ್ಧಕ ಲೇಪು , ತೇಲ ಮಾಲಿಷ ಕರ್ತಲಿ .. ) ತುಮ್ಗೆಲೆ ಸೌಂದರ್ಯ ವರ್ಧನೆ ಕ ಅನೇಕ ಮೂಲ ಪಾಳ ಔಷಧ ಮಿಗ್ಗೆಲೆಗಿ ಅಸ್ಸ . ಸೌಂದರ್ಯ ಶಾಸ್ಟ್ರಾಂತು .. ಮಕ್ಕಾ ಮಸ್ತ ನಮುನೆ ವಿಷಯು ಗೊತ್ತಸ್ಸ . ಕುರೂಪಿ ಜಾವ್ನು ಅಶಿಲೆ ಬಾಯ್ಲ್ ಮನಶಾಂಕ ಮಸ್ತ ರೂಪವತಿ ಕೊರ್ಚೆ ಕಲಾ ಮಿಗೆಲೆ ಅಸ್ಸ . ವಸ್ತ್ರಾಲಂಕಾರ , ಪುಷ್ಪಾಲಂಕಾರಾಂತು ಮಕ್ಕಾ ಮಸ್ತ ಜ್ಞಾನ ಅಸ್ಸ . ತುಮ್ಗೆಲೆ ಅಂಗೀಕಾರು ಅಸ್ಲೆರಿ ಹಾಂವ ಮಿಗ್ಗೆಲೆ ವೃತ ಪೂರ್ತಿ ಝವ್ ತಾಯಿ ತುಮ್ಗೆಲೆ ಅಂತಃಪುರಾಂತು ಆಸ್ತಾ . " " ತುಗ್ಗೆಲ್ ನಾಂವ ಕಸಲೆ ಮೋಣು ಸಂಘನಿ " ಮಿಗ್ಗೆಲೆ ನಾಂವ ಮಾಲಿನಿ "
ಸುದೇಷ್ಣಾ ದೇವಿ : " ತುಗ್ಗೆಲ್ ನಾಂವ .. ತುಗ್ಗೆಲ್ ತಿತ್ಲೆಚಿ ... ಚಂದ ಅಸ್ಸ ಮಾಲಿನಿ .. ಅತಿ ಸುಂದರ ! ಪೊಳೆ ಮಾಲಿನಿ ..! ಹ್ಯೇ ರಾಜ ಅಂತಃಪುರ . ರಾಯಾಕ ಚಂಚಲ ಬುದ್ಧಿ ಚಡ .. ತೂ ಸುಂದರ್ ಸ್ತ್ರೀ .. ! ತೇವಯ್ ತೂ ಗಂಧರ್ವ ಸ್ತ್ರೀ ... ಗಂಧರ್ವಾ೦ಕ ಸ್ವೇಚ್ಚ ಬುದ್ಧಿ ಚಡ ... ಹಾಂವೆ ಸ್ವಲ್ಪ ಆಲೋಚನಾ ಕೋರ್ಕಾ .. ಜಾವ್ಕಾ ಝಲ್ಲೆರಿ ಸ್ವಲ್ಪ ದಿವಸ ರಾಬ . " ಮಾಲಿನಿ : " ಮಹಾರಾಣಿ .. ! ಹಾಂವ ಪಾಂಚ ಗಂಧರ್ವಾ೦ಕ ಬಾಯ್ಲ್ ಜಾವ್ನು ಅಸ್ಸ . ಕಾಮಾ ರೂಪಾರಿ ಮಿಗ್ಗೆಲೆ ಬಮ್ಮಣ೦ ಮಕ್ಕಾ ರಾಕ್ತಾತಿ . ಮಿಗ್ಗೆಲೆ ಬಮ್ಮಣಾ೦ಗೆಲೆ ಸಂರಕ್ಷಣೆ೦ತು .. ತ್ಯೆ ದೇವ ಅಸುರಾ೦ಕ ತಾಯ್ ಮಕ್ಕಾ ಆಪ್ಪೋಡು೦ಕ ಭಿತ್ತಾತಿ . ಮಹಾರಾಜಾಲೆ ಉದಾರ ಬುದ್ಧಿ , ಅನಿ ತುಮ್ಗೆಲೆ ಉದಾತ್ತ ಮನ ಸಕ್ಕಡ ಐಕುನು ಹಾಂವ ಹಾಂಗಾ ಅಯಿಲೆ . ಬರೀ ಏಕ ವರುಷ .. ರಾಬ್ಚ್ಯಾ ಆಶ್ರಯ ದಿಲ್ಲೆರಿ ಪುರೊ . ತಾಜ್ಜೆ ನಂತರ ಮಿಗ್ಗೆಲೆ ನಿಮಿತ್ಯ ತುಂಮ್ಕಾಮಹಾ ಉಪಕಾರು ಝತ್ತಲೊ . ಮಹಾರಾಣಿ ..! ಹಾಂವೆ ವೃತಾರಿ ಆಶ್ಚಯೇ ನಿಮಿತ್ಯ ... ಅಪವಿತ್ರ ಕಾಮ ಕರ್ನಾ . ಉಷ್ಠೆ ಪದಾರ್ಥ್ , ಫಲ ವಸ್ತು ಖಾಯಿನಾ .. ದುಸರೇಲೆ ಪಾಯು ಅಪ್ಪಣಾ .. ಮದ್ಯ ಮಾಂಸ ಆಹಾರ ವಿಷಯಾನ ದೂರ ಆಸ್ತಾ . ಹ್ಯೇ ಮಿಗ್ಗೆಲೆ ನಿಯಮ .. "
ಸುದೇಷ್ಣಾ ದೇವಿ : " ನಾ ಮಾಲಿನಿ ..! ತಸಲೆ ಕಾಮಾಕ ತುಕ್ಕಾ ನಿಯುಕ್ತಿ ಕರ್ನಾ . ತುಗ್ಗೆಲ್ ವೃತ ತೂ ಭಕ್ತಿನ ಆಚರಣ ಕರಿ . ಮಿಗ್ಗೆಲೆ ಅಂತಃಪುರ ಮಂದಿರಾಂತು ರಬ್ಬುಕಾ . ಹಾಂವೆ ಸಾಂಗ್ಲೆ ಶಿವಾಯ್ .. ಮಿಗೆಲಿ ಅನುಮತಿ ನಾಶಿ .. ಭಾಯಿರಿ ವೋಚ್ಚಾ ನಾ " .
ದೈವ ಕೃಪೇನ , ಪಾಂಡವ ವಿರಾಟ ರಾಜ್ಯಾ೦ತು ... ಸರ್ವಾಂಗೆಲೆ ವೊಟ್ಟು ಮೇಳ್ನು ಗೆಲ್ಲಿಂತಿ . ದಿವಸ ಚಂದಾಯೇರಿ ವತ್ತಾ ಅಸ್ಸ . ಪುರುಸೋತಿ ಮೆಳ್ಳೆಲಿ ತೆದ್ನಾ .. ಎಕ್ಲೇನ ಆನ್ನೇಕ್ಲೆಕ ಎದುರ ಪೊಳಯಿತಾನಾ ದೊಳೆನ ಸನ್ನಿ ಕೋರ್ನು ಸಾಂಕೇತಿಕ ರೂಪಾರಿ ವಿಚಾರು ವಿನಿಮಯ ಕರ್ತಾಲಿ೦ತಿ . ಧರ್ಮರಾಯು ವಿರಾಟ ರಾಯಾಲೆ ಅನುಮತಿ ಘೇವ್ನು ಗೋಕುಲಶಾಲೆಕ ವೊಚ್ಚುನು ನಕುಲ ಸಹದೇವಾ ಕ ಪೊಳೋನ್ ಯೆತ್ತಲೊ . ಅಷ್ಶಿ ಪಾಂಚ ಮಹಿನೊ ಗೆಲ್ಲೆ .
ಉಮಾಪತಿ
No comments:
Post a Comment