MAHABHARATHA Part - 22 ( Konkani Bhashentu )
VIRATA MALLA YUDHDHA
ವಿರಾಟ ನಗರಿಂತು , ಮಕರ ಸಂಕ್ರಮಣ ಮಹಾಉತ್ಸವು ಝತ್ತಾ ಅಸ್ಸ . ಪ್ರತೀ ವರ್ಷಾ ಮ್ಹಣ್ಕೆ , ಹ್ಯೇ ವರ್ಷಯಿ ... ಬೈಲು , ಕುಂಕಡಾ ಕಾಳಗ , ಟಗರ ಪಂದ್ಯ , ಕುಸ್ತಿ ಪಂದ್ಯ , ಜನಾ೦ಕ ಮನೋರಂಜನಾ ಜಾವ್ನು ರಾಜ ಮೈದಾನಾಂತು ಝತ್ತಾ ಅಸ್ಸ . ಮಲ್ಲಯುದ್ಧ ಯೇಕ್ ಪ್ರತ್ಯೇಕ ಜಾಗೇರಿ ಆಯೋಜಿತ ಕೆಲ್ಲಾ . ರಾಣಿವಾಸಾ ಚ್ಯೆ ಸ್ತ್ರೀ ಲೋಕಾಂಕ , ಪರಿಸೇವಕ , ಪರಿಚಾರಿಕೆ , ವೊಟ್ಟು ಸರ್ವ ಸ್ತ್ರೀ ಸಮುದಾಯ ಬಯಿಸುನ್ ಪೋಳೋಚ್ಯಾಕ ವ್ಯವಸ್ಥಾ ಕೆಲ್ಲಾ . ರಾಜ ಸೈನಿಕಾಂಕ ಕುಸ್ತಿ ಪಂದ್ಯ ಪೋಳೋಚೆ ಯೆಕ ವಿಶೇಷ ಸುಯೋಗ . ವಿರಾಟ ರಾಯಾಕ " ಕೀಚಕ " ಮ್ಹಳ್ಳೆಲೆ ಮೇವ್ಣೊ ಅಸ್ಸ . ವಿರಾಟ ರಾಜ್ಯಾಕ ತ್ಯೋಚಿ ಮಹಾ ಸೇನಾನಿ , ಸೇನಾಧಿಪತಿ , ಸರ್ವಾಧಿಕಾರಿ . ವಿರಾಟ ರಾಯು ನಾವಾತಕೀತ .." ರಾಯು " . ರಾಜಾಜ್ಞ ಕೀಚಕಾಲಿ ಚ್ಯಿ ಚಲ್ತಾ . ಕೀಚಕಾಕ ' ಸಿಂಹಬಲ ' ಮ್ಹಳ್ಳೆಲಿ ಪದವಿ ವಿಂಗಡ ಅಸ್ಸ . ಹ್ಯೇ ಕೀಚಕಾಲೆ ಯೆದುರ .. ಮಲ್ಲ ಯುದ್ಧ ಕೋರ್ನು ಕೊಣಾಕಯಿ ಜಯಶಾಲಿ ಜಾವ್ಚೆಕ ಸಾಧ್ಯ ನಾ. ಯೆಕ್ಲೊ ದರ್ಲೊ ಮನುಷು ಸುತ್ತು ಮುತ್ತು ರಾಜ್ಯಾ೦ತು ನಾ . ತಿತ್ಲೆ ಬಲ ಅಶಿಲೋ ..!
ಪೋಳೋಚ್ಯಾಕಯ್ ಅತೀ ಸುಂದರು .. ರಸಿಕು .. ನಯ್ ಮೋಣು ಸಂಘುಕ ಕೋಣಾಕಯ್ ಧೈರ್ಯ ನಾ . ಹ್ಯೇ ಕುಸ್ತಿ ಮಲ್ಲ ಯುದ್ಧ .. ಶುರು ಕೆಲ್ಲೆಲೆ೦ಚಿ .. ಕೀಚಕಾನ . ಸರ್ವಾಧಿಕಾರಿ ಕೀಚಕಾ ಯೆದುರ ಉಲ್ಲಯಿತಲೆ ಕೋಣ ಅಸ್ಸ ? ಅಯಿಚೆ ಮಕರ ಸಂಕ್ರಮಣ ಉತ್ಸವಾ ದಿವಸು ಕೀಚಕು ನಾ . ಕಸಲೆ ಕೀ ರಾಜ ಕಾರಣಾ ನಿಮಿತ್ಯ .. ವಿರಾಟ ರಾಜ್ಯಾ ಭಾಯಿರಿ ಗೆಲ್ಲಾ .
ವಿರಾಟ ರಾಯಾಲೆ ದರ್ಬಾರಾಕ 'ಜೀಮೂತ ' ಮ್ಹಳ್ಳೆಲೆ ಮಲ್ಲ ಯೊಧು .. ವಿರಾಟ ರಾಯಾಕ ವಿನಮ್ರ ಪ್ರಣಾಮ ಕೋರ್ನು " ಮಹಾರಾಜಾ ..! ಮಿಗೆಲೆ ನಾಂವ ಜೀಮೂತ ಮೋಣು .. ಸಕ್ಕಡ ರಾಜ್ಯಾಕ ವೊಚ್ಚುನ್ .. ಹಜಾರ್ ಜನ ಮಲ್ಲ ಯೋಧಾಂಕ ಪರಾಭವ ಕೋರ್ನು , ತಾಂಗೆಲೆ ಸೊಕ್ಕು ಮೊಳ್ಳಾ . ಹಾಂಗಾ ಕುಸ್ತಿ ಪಂದ್ಯ ಝತ್ತಾ ಮೋಣು ಅಯಿಕುನು .. ಹಾಂವ ಅಯಿಲಾ . ಝಲ್ಲೇರಿ ... ಮಕ್ಕಾ ಪೋಳೋಣುಚ್ಯಿ .. ತುಮ್ಗೆಲೆ ರಾಜ್ಯಾ ದರ್ಲೆ ..ಕುಸ್ತಿ ಯೋಧ... ಧಾವನು ಗೆಲ್ಲೆ೦ತಿ . ತುಮ್ಗೆಲೆ ಆಸ್ತಾನಾಂತು ಕೊಣಯ್ ಮಲ್ಲ ಯೋಧ ಅಸ್ಲೆರಿ ಅಪ್ಪೋಯೇತ ಮಿಗೆ ಲೆ ವೊಟ್ಟು ಕುಸ್ತಿ ಕೋರು೦ಕ .. ! ಮಲ್ಲ ಯುದ್ಧಾ೦ತು ಜಯ ಜಲ್ಲೆಲೆ ಮನ್ಶ್ಯಾಕ ... ಏಕ ಲಕ್ಷ ಭ೦ಗ್ರಾ ನಾಣ್ಯ ಯಿನಾಮ ಜಾವ್ನು ದಿತ್ತಾ . ತಶೀ ಕೊಣಯ್ ನಾತ್ಲೆರಿ ... ಧಾಹ್ ಹಜಾರ ಭಂಗ್ರಾ ನಾಣ್ಯ ದೀವ್ನು , ತುಮ್ಗೆಲೆ ರಾಜ್ಯ ಪರಾಭವ ಝಲ್ಲೆ ಮೋಣು ಬೊರಾನ್ ದಿಯ್ಯಾತಿ " . ಮೋಣು ಸಂಘುನು ಸವಾಲು ಘಾಲ್ನು ನಮಸ್ಕಾರು ಕೋರ್ನು ರಾಬ್ಲೊ . ವಿರಾಟ ರಾಯಾಕ , ತಗೇಲ್ ಅಹಂಕಾರಾ ಉತ್ತ್ರ೦ ಅಯಿಕುನು ಕೋಪು ಅಯಿಲೊ . ತಗೆಲೆ ಆಸ್ತಾನಾ ದುಕುನು ಧಾಹ್ ಜನ ಮಲ್ಲ ಯೋಧಾಂಕ ಅಪ್ಪೋನ್ " ಹ್ಯೇ ಅಹಂಕಾರಿ ಜೀಮೂತಾಲೆ ಸೊಕ್ಕು ದೇವೊ೦ಕಾ ... ಕಿತ್ಲೆ ಧೈರ್ಯ ..! ಹಾಂವ ವಿರಾಟ ರಾಯು ತುಕ್ಕಾ ... ಪರಾಜಯ ಪತ್ರ ಬೊರಾನ್ ದೀವ್ಕಾ ಕೀ ... ?? " ಮ್ಹಳ್ಳಲೊ .
ಮಲ್ಲ ಯುದ್ಧ ಪೋಳೋಚ್ಯಾಕ ಕಂಕುಭಟ್ಟ ಜಾವ್ನು ಅಶಿಲೋ ಧರ್ಮರಾಯು , ಬ್ರಹನ್ನಳ ಜಾವ್ನು ಅಶಿಲೋ ಅರ್ಜುನ್ , ಸೈರಂಧ್ರಿ ರೂಪಾರಿ ಅಶಿಲಿ ದ್ರೌಪದಿ , ವಲಲ ನಾವಾರಿ ಅಶಿಲೋ ಭೀಮು ಯೇವ್ನು ಬೊಸ್ಲೀ೦ತಿ . ವಿರಾಟರಾಯಾ ವೊಟ್ಟು ಮಹಾರಾಣಿ ಸುಧೆಷ್ಣಾ ದೇವಿ , ಯುವರಾಜ ಉತ್ತರ ಕುಮಾರ್ , ಯುವರಾಣಿ ಉತ್ತರ ಕುಮಾರಿ ಹನ್ನಿ ಯೇವ್ನು ಉನ್ನತ ಆಸನಾ ವೈರಿ ಬೋಸ್ಲೀ೦ತಿ . ಧರ್ಮರಾಯು ವಿರಾಟ ರಾಯಾಲೆ ಮಾಕ್ಷಿ ಬದಿನ ಅಶಿಲೆ ಆಸನಾಂತು ಬೊಸ್ಲೊ . ವಿರಾಟ ರಾಯಾಲೆ ಮಲ್ಲ ಯೋಧ .. ಎಕ್ಲೆ - ಎಕ್ಲೇಚಿ ಯೇವ್ನು .. ರಾಯಾಕ ಪ್ರಣಾಮ ಕೋರ್ನು ಜಾಂಗೇರಿ ಮಾರ್ನು , ಮೀಶಿ ಘು೦ವಡಾನು , ಭುಜ ಬಲ ದಾಕ್ಕೋನ್ , ಜೀಮೂತಲೆ ವೊಟ್ಟು ಮಲ್ಲ ಯುದ್ಧ ಕೊರುಂಕ ರಾಬ್ಲೀ೦ತಿ . ವಿರಾಟ ರಾಯಾನ " ಆಮ್ಗೆಲೆ ರಾಜ್ಯಾಚಾ .. ಮಲ್ಲ ಜಟ್ಟಿ ಲೋಕ ತುಮ್ಮಿ ... ಆಮ್ಗೆಲೆ ರಾಜ್ಯಾ ಪ್ರತಿಷ್ಠ ಆಜಿ ತುಮ್ಗೆಲ್ ಹತ್ತಾ೦ತು ಅಸ್ಸ . ಹ್ಯೇ ಸೊಕ್ಕು ಲಗ್ಗಿಲೆ ಜೀಮೂತ ಜಟ್ಟಿಕ ಕಶಿಪುಣಿ ಪರಾಭವ ಕೋರ್ಕಾ . ಆಮ್ಗೆಲೆ ದುರಾದೃಷ್ಠಕ ... ಆಮ್ಗೆಲೆ ಸೇನಾಧಿಪತಿ ರಾಜ್ಯಾ೦ತು ನಾತಿ . ತಾಣೆ ಅಶಿಲೆ ಝಲ್ಲೇರಿ ... ಅಸಲೆ ಜೂಜುಬಿ ಫೈಲ್ವಾನಕ ಎಕ್ಕ ಪೆಟ್ಟಾಕ ಮತ್ತಿ ಖಾವೈತಶೀಲೊ ...! ಹಕ್ಕಾ ಪರಾಭವ ಕೆಲ್ಲೇರಿ .. ಹಾಂವ ಏಕ ಲಕ್ಷ ಭಾಂಗ್ರಾ ನಾಣ್ಯ ತುಂಮ್ಕಾ ದಿತ್ತಾ " ಮೋಣು ಸಂಘುನು ಪ್ರೋತ್ಸಾಹ ಕೆಲ್ಲೊ . ಕುಸ್ತಿ ಶುರು ಜಾವ್ಚೆ ಫುಡೇಕಚಿ ... ಜೀಮೂತಾನ ಲಕ್ಷ ಭ್೦ಗ್ರಾ ನಾಣ್ಯ ಹಾಣು , ವಿರಾಟ ರಾಯಾಲೆ ಯೆದ್ರಾಕ ದವರ್ಲೆ . ಮಲ್ಲ ಯುದ್ಧ ಪ್ರಾರಂಭೊ ಝಲ್ಲೊ .. ಡೋಲು , ತಮ್ಮಟೆ, ನಗಾರಿ , ಕೊಂಬು , ಕಹಳೆ , ಶಂಖ ವಾದ್ಯ ವಾಜ್ಜುನು ,ಕರ ತಾಡನ ಕೋರ್ನು ವಿರಾಟ ಕುಸ್ತಿ ಜಟ್ಟೆ೦ಕ ಪ್ರೋತ್ಸಾಹನ ದಿಲ್ಲೆ . ವಿರಾಟ ಯೋಧಾಂಕ ಜೀಮೂತಾಲೆ ವೊಟ್ಟು ಕುಸ್ತಿ ಖೆಳು೦ಕ ಜಾಯ್ನಿ ಎಕ್ಲೆ - ಎಕ್ಲೇ೦ಕಚಿ ಹಾತು ,ಪಾಯು , ಕೂರ್ಟು ಮೋಣು ರಂಗ ಮಂಚಾ ದುಕುನು ಭಾಯಿರಿ ಉಡಯಿಲೊ . ಅಶಿ ಜೀಮೂತಾನ ವಿಜಯ್ ಝತ್ತಾನಾ ,,, ಮಹಾರಾಜಾ ಕ ಅವಮಾನು ಝತ್ತಶಿಲೋ .. ಅತ್ತ .. ಕಸಲೆ ಕೊರ್ಚೆ ? ಹೇ ದೇವಾ ..! ಮನಾ ಸಂಕಟ ಜಾವ್ಚ್ಯಾ ಶುರು ಝಲ್ಲೆ . ಹೆಕಡೆ - ತೇಕಡೆ ಪೊಳೈತಾ ಮಾಕ್ಷಿ ಬೊಶಿಲೆ ಧರ್ಮ ರಾಯಾಕ ಪೋಳೋನು " ಕಸಲೆ ಕೊರ್ಚೆ ಕಂಕು ಭಟ್ಟಾ ..? ಹಗೆಲ್ ನಿಮಿತ್ಯ ಅವಮಾನು ಝಲ್ಲೋ ಮೂ ..! ಮಿಗ್ಗೆಲೆ ಮೇವ್ಣೊ ಅಶಿಲೆ ಝಲ್ಲೇರಿ ... ಹಕ್ಕಾ ಎಕ್ಕ ಪೆಟ್ಟಾಕ ದಿವಿಶಿ ಮಾರ್ನು ಸೊಡ್ತಾಶಿಲೋ ... " ಮೋಣು ಸಂಘುನ್ ಗಜಿ- ಗಿಜಿ ಝಲ್ಲೋ .
ಕಂಕು ಭಟ್ಟ : " ಮಹಾರಾಜಾ .. ! ಅವೇಷು ಪಾವ್ಚೆ ಅಗತ್ಯ ನಾ .. ತುಮ್ಕಾ ... ಆಮ್ಗೆಲೆ ರಾಜ್ಯಾ ಕ ಅವಮಾನ ಜಾಯ್ನಾಶಿ ಹಾಂವ ಪೊಳೈತಾ .. ಹ್ಯೋ ಮಲ್ಲ ಯೋಧು ಪ್ರಾಣ ದವೋರ್ನು ಘೇವ್ನು ವಾಪಾಸ್ ವೋಚ್ಚನಾ ... ! ತುಮ್ಮಿ ಪೋಳಯಿತಾ ರಬ್ಯಾತಿ .. " ಸಮಾಧಾನ ಕೆಲ್ಲೆ ವಿರಾಟ ರಾಯಾಕ . ತಯೀ೦ಚಿ ಸ್ವಲ್ಪ ದೂರ ಬೊಶಿಲೆ ಭೀಮ ಸೇನಾಕ ದೊಳೆನ ಸನ್ನಿ ಕೆಲ್ಲಿ ಧರ್ಮಜಾನ . ಭೀಮಾನ ಮತ್ತೆ ಹಲ್ಲೋನ್ ಅಂಗೀಕಾರ ದಿಲ್ಲೊ . ಜೀಮೂತ ಮಲ್ಲಾನ ರಾಜ ಮಲ್ಲ ಯೋಧಾಂಕ ಪರಾಜಯ ಕೋರ್ನು ಸಿಂಹ ನಾದ ಕೆಲ್ಲೆ . " ಆ ಹಾ ಹ ಹ ಹ .. ಮಹಾರಾಜಾ ... ! ಆನಿ ಕೊಣಯ್ ಅಸ್ಲೆರಿ ಪೆಟೋಯೇತ .. ತಾಗೆಲ್ ಮತ್ತೆ ಘು೦ವ್ಡಾನ್ ನೆಲಾ ಮಾರ್ತಾ ... ಕೊಣಯ್ ನಾ ಝಲ್ಲೆರಿ ಧಾಹ ಹಜಾರ ಭಂಗರಾ ನಾಣ್ಯ ಆನಿ ... ಪರಾಜಯ ಪತ್ರ ಬೊರೊನ್ ರಾಜ ಮುದ್ರಾ ಘಾಲ್ನ್ ದಿಯ್ಯಾ ... " ಮೋಣು ಸಂಘುನ್ ಜಂಗೀ ಮಾರ್ನ್ ಸಿಂಹ ನಾದ ಕೆಲ್ಲೆ . ಅತ್ತ ನಿಜಾವ್ನ್ ರಾಯು ಉತ್ಕಾ ತೊಟ್ಟಿಯೆಂತು ಪೊಳ್ಳೋಲೊ ವಿಂದುರ್ ಶೀ ಝಲ್ಲೊ .
ವಿರಾಟ ರಾಯು : " ಕಂಕು ಭಟ್ಟಾ ..! ತೂ೦ವೆ ಸಂಘಿಲ್ ಜ್ಯೋತಿಷ್ಯ ಪ್ಹಟ್ಟಿ ಝಲ್ಲೆ ..! ಅತ್ತ ಕಸಲೆ ಕೊರ್ಚೆ .. ? " ಮ್ಹಳ್ಳಲೋ
ಕಂಕು ಭಟ್ಟ : " ಮಹಾರಾಜಾ ..! ಮಿಗ್ಗೆಲೆ ಉತ್ತರ ಕೆದನಾಯ್ ಫ್ಹಟ್ಟಿ ಜಾಯ್ನಾ . ಆಮ್ಗೆಲೆಗಿ ... ತುಂಮ್ಕಾ ಕಳ್ನಾಶಿ ... ಪಲ್ಲೇ ಮಾಕ್ಷಿ ನಿಪ್ಪಿಲೊ ಅಂಬೇ ಮ್ಹಣ್ಕೆ ... ಯೆಕ್ಲೊ ಮಲ್ಲ ಯೋಧ ಅಸ್ಸ . ತಗೆಲೆ ಶಕ್ತಿ ಸಾಮರ್ಥ್ಯ .. ತುಮ್ಮಿಚಿ ದೊಳೆನ ಪೋಳೋಯೆತ .. "
ಮಹಾರಾಜ : " ಕೋಣ ತ್ಯೋ .. ? ತಸಲೊ ಮಲ್ಲ ಯೋಧ ಕೋಣ ? "
ಕಂಕು ಭಟ್ಟ : " ಆಮ್ ಗೆಲೊ ರಾಜ ವಸರಿ ರಾನ್ಪೋ ' ವಲಲ ' ಮಹಾರಾಜಾ ! "
ವಿರಾಟ ರಾಯು : "ಕಂಕು ಭಟ್ಟಾ .. ! ರಾನ್ಪೆಕ ಮಲ್ಲ ಯುದ್ಧ ಕಶಿ ಯೆತ್ತಲೇ ... ! ಹ್ಯೇ ಮಲ್ಲ ಯುದ್ಧ ... ಮಕ್ಕಾ ತೂ , ಅನಿಕಯ್ ಅವಮಾನು ಕರ್ತಾ ಅಸ್ಸ ಕೀ ?"
ಕಂಕು ಭಟ್ಟ :" ಖಂಚ್ಯೇ ಹುತ್ತಾ೦ತು ಖಂಚೇ ಸರೋಪು ಅಸ್ಸ ಮೋಣು ಕಳ್ತವೆ ಮಹಾರಾಜಾ ? ಕಶಿ ಕಳ್ತಾ ... ಹುತ್ತೊ ಖೊ೦ಡೂನ್ ಕಳ್ಳೆರಿ ಮಾತ್ರ ಕಳ್ತಾ . ಮಹಾರಾಜ ತಕ್ಕಾ ಅಪ್ಪಯ್ಯಾತಿ " ಮ್ಹಳ್ಳಲೊ . ಧರ್ಮಜಾಲೆ ಉತ್ತರಾ೦ಕ ಮಾನ್ಯ ಕೋರ್ನು ವಲಲಾ ಕ ಅಪ್ಪೋನ್ ಘೆತ್ಲೆ .
ವಿರಾಟ ರಾಯು : " ವಲಲಾ ..! ತುಗ್ಗೆಲ್ ವಿಷಯಾಂತು ಕಂಕು ಭಟ್ಟ ಮಸ್ತ ಪ್ರಶ೦ಶಾ ಕರ್ತಾ ... ! ಹ್ಯೇ ಅಹಂಕಾರಿ ಮಲ್ಲಾಕ ಪರಾಜಯ ಕೋರ್ನು ಆಮ್ಗೆಲೆ ರಾಜ್ಯಾಕ ಲಾಯೇಕ ನಾ೦ವ ಹಾಣು ದೀ " ಮ್ಹಳ್ಳಲೊ
ಭೀಮ ಸೇನ ಮಹಾರಾಜಾಕ ಪ್ರಣಾಮ ಕೋರ್ನು ರಂಗಾಕ ದೆವಲೊ . ವೀರ ಕಾಸು ಮಾರ್ನು , ಕುರ್ಟಾಕ ಅಂಗವಸ್ತ್ರ ಬಾಂಧುನ್ .. ಹನುಮಂತಾಕ ಉಡ್ಘಾಸ್ ಕಾಣು ..., ಹತ್ತಾರಿ , ಭುಜಾರಿ ,ಝ೦ಗೇರಿ ಮಾರ್ನು .. ಸುತ್ತು ಮುತ್ತು ರಬ್ಬಿಲೆ ಜನಾ೦ಕ ಅಯಿಕುಚೆ ತಶಿ ವೀರ ಶಬ್ದ ಕೋರ್ನು ಪಟ್ಟು ಧೊರು೦ಕ ಬಾಗ್ವಲೋ . ಜೀಮೂತ ಮಲ್ಲಾಕ ಹ್ಯೋ ಸಾಧಾರಣ ಮನುಷ್ಯ ಶೀ ದಿಸ್ಲೊ ವಲಲ . ಅಹಂಕಾರಿನ ಸಾಧಾರಣ ಪೆಟ್ಟು ದಿಲ್ಲೊ . ವಲಲಾ ನ ಭಿಲ್ಲೇ ಮ್ಹಣ್ಕೆ .. ಮಸ್ತ ದೂಕಿ ಝಲ್ಲೆ ಮ್ಹಣ್ಕೆ .. ಚೀತ್ಕಾರು ಕೆಲ್ಲೊ .. ಏಕ ದೋನಿ ತೀನಿ ಪೆಟ್ಟು ಖಾವನು ಅಯ್ಯೋ ಅಯ್ಯಯ್ಯೋ .. ಮೋಣು ವಲಲಾನ ಉದ್ಗಾರು ಕೆಲ್ಲೊ . ಜೀಮೂತ ಮಲ್ಲಾಕ ಹಾವ೦ಚಿ ಧೀರು .. ಅನಿ ದೋನಿ ಸುತ್ತ್ವಾಂತು ಹ್ಯೋ ಪರಾಭವ ಝತ್ತಲೋ ಮ್ಹಳ್ಳೆಲಿ ವಿಷಯು ಖಾತ್ರಿ ಝಲ್ಲಿ . ಅತ್ತ ಮುಷ್ಠಿ ಬಂಧುನ್ ವಲಲಾ ಹರ್ದೇರಿ ಮಾರ್ಲೆ . ವಲಲ , ಸುರ್ವೆಕ ವಿನೋದ ಜಾವ್ನು ಖೇಳ್ಳೋ ... ಅತ್ತ ತಗೆಲೋ ಹಾತು ಧೋರ್ನು ಘು೦ವಡಾನ್ ಭುಜಾರಿ ಕೋಂಪ್ರಾನ್ ಏಕ್ ಮಾರು ದಿಲ್ಲೊ . ಹತ್ತಾ ರಟ್ಟೆ , ಪಯ್ಯಾ ಹಡ್ಡ೦ ಏಕ್ ಏಕ್ ಮೋಣ್ ಶಬ್ದ ಜಾಯ್ನಾಶಿ ಪುಡ್ಡಿ ಕೆಲ್ಲೆ . ಏಕ ಪೋಟಿ ದಾ೦ವ್ ಪಾಯು .. ಆನ್ನೇಕ ಪೋಟಿ ಉಜ್ವೋ ಪಾಯು , ಪಯ್ಯಾ ಖತ್ರೀ೦ತ್ ಮಧ್ಯೆ ಸಿರ್ಕಾನು ಉಸ್ರು ಬಂಧಿಲೆ .. ಸೊಡ್ವಾನು ಘೆತ್ಲೆರಿ ... ಪಯ್ಯಾ ಧೋರ್ನು ಅಂವಗಾಲೆ ಉಂಬಳ್ಳೆ ಮ್ಹಣ್ಕೆ ತಕ್ಕಾ ಧೋರ್ನು .. ಕಾಣು ನೆಲಾರಿ ಮಾರ್ಲೆ .... ಅಯ್ಯೋ ..! ಮೋಣು ಉದ್ಗಾರು ಕಾಡುಂಕ ಆಸ್ಪದ ದೀನಿ . ತಾಗೆಲ್ ಮತ್ತೆ ಧೋರ್ನು ... ಝ೦ಗೀರಿ ಮಾರ್ನು ಫಟೀ ಹಡ್ಡ೦ ಕಟ - ಕಟನಿ ಕುಡ್ಕೆ ಜಾವ್ಚೆ ತಶಿ ಕೆಲ್ಲೆ . ಮಾಂಮ್ಸಾ ಮುದ್ದೋ ಶೀ ಕೋರ್ನು ವಯಿರಿ ಉಡೊನ್ ಸಕಲ ಘಾಲ್ತಾ ನಾ .. ಡುಕ್ರಾನ್ ಕಿರ್ಚಾಲೇ ಮ್ಹಣ್ಕೆ ಚೀತ್ಕಾರು ಕೆಲ್ಲೆ ಜೀಮೂತಾ ನ . ಬಾಯ್ಲ್ ಮನ್ಶ್ಯಾ೦ ಮಧ್ಯೆ ಬೊಶಿಲಿ ಬ್ರಹನ್ನಳಾನ ಜೋರು ಹತ್ತಾ ತಾಳಿ ಮಾರ್ಲಿ . ಸರ್ವ ಬಾಯ್ಲ೦ ಮನ್ಶ್ಯಾನಿ ವಲಲಾ ಕ ಪ್ರೋತ್ಸಾಹ ಕೆಲ್ಲೆ . ಬಾಯ್ಲ್೦ ಮನಷ್ಯಾ೦ಗೆಲೆ ಪ್ರೋತ್ಸಾಹವು , ಸಂತೋಷು ಪೊಳೊನ್ ... ತ೦ಯ್ ಬೊಶಿಲೆ ಸೈನ್ಯ , ಪುರುಷ , ನಾಗರಿಕ , ಶೀಳ್ ಮಾರ್ನು , ಬಾಬ್ ಮಾರ್ನ್ ಅನಿಕಾಯ್ ಪ್ರೋತ್ಸಾಹ್ ಕೆಲ್ಲೆ . ವಲಲಾಕ ಅನಿಕಾಯ್ ಉಮೇದಿ ಅಯಿಲಿ . ಜೀಮೂತಾಕ ಉಬ್ಬಾರ್ನು , ರಂಗ ಸ್ಥಾನಾಕ ಸುತ್ತು ಕಾಣು ಜೀವು ನಾತ್ತಿಲೆ ಬೊ೦ಬೆ ಮ್ಹಣ್ಕೆ ಧೋರ್ನು ... ಗಿರ - ಗಿರನಿ ಘು೦ವ್ಡಾನ್ ವಯಿರಿ ಉಡೊನ್ ಧೋರ್ನು ನೇಲಾರಿ ಮಾರ್ಲೆ . ಜೀಮೂತಾ ಲೇ ನವ್ವರಂಧ್ರಾ ದುಕುನು ರಗತ ಯೇವ್ನು , ಪ್ರಾಣವಾಯು ಸೋಣು ಗೆಲ್ಲೆ .
ವಿರಾಟರಾಯಾಕ ಮಸ್ತ ಸಂತೋಷು ಝಲ್ಲೋ " ಕಂಕುಮ್ ಭಟ್ಟಾ ತೂ೦ವೆ ಸಂಘಿಲ್ ಭವಿಷ್ಯ ಸತ್ಯ ಝಲ್ಲೆ .. !! ಆಮ್ಗೆಲೆ ರಾಜ್ಯ ಪ್ರತಿಷ್ಠಾ ವಂಚಯ್ಲಿ ... ! ಮೋಣು ಸಂಘುನ್ ಕಂಕುಭಟ್ಟಾ ಫೊಟೊನ್ ಧರ್ಲೆ . ಅಂತಃಪುರಾ ರನ್ಪೆ ಕಾಮಾಚೆ , ಸೈನಿಕ ಲೋಕು ಭೀಮಸೇನಾಲೆ ಅಂಗಾರಿ ಅಶಿಲೆ ಧೂಳಿ ಫಾಪ್ಪು ಣ್ " ವಲಲಾ ಕ ಜಯ ಝವೊ " ಮೋಣು ಹರ್ಷೋದ್ಗಾರು ಕೆಲ್ಲೊ . ಜೀಮೂತಾನ ದವರ್ಲೆಲೆ ಏಕ ಲಾಖ ಭಾಂಗ್ರಾ ನಾಣ್ಯ .. ಆನಿ ತಿತ್ಲೆಚ್ಯ್ ಧನ ಸಂಪದ .. ವಿರಾಟರಾಯಾನ ಭೀಮ ಸೇನಾ ಕ ಪಾರಿತೋಷಕ ಜಾವ್ನು ದಿಲ್ಲೆ . ತಾಗೆಲ್ ಗಳೇ ಅಶಿಲೆ ನವರತ್ನಾ ಹಾರು ಭೀಮ ಸೇನಾಲೆ ಗಳೇ ಘಾಲ್ನ್ನು ಹರ್ಷೋದ್ಗಾರ ಕೆಲ್ಲೆ . ಭೀಮ ಸೇನಾನ ತ೦ಯ್ ಅಶಿಲೆ ರಾಜ ಸೇವಕ ಸೇವಕಿ ಲೋಕಾಂಕ ಭಾಂಗ್ರಾ ನಾಣ್ಯ ವಾಂಟುನ್ ದಿಲ್ಲೆ . ಧರ್ಮಜ , ಅರ್ಜುನ , ನಕುಲ ಸಹದೇವ , ದ್ರೌಪದಿನ ಮನಾಂತುಚಿ ಭೀಮ ಸೇನಾ ಕ ಅಭಿನಂದನಾ ಕೆಲ್ಲಿ.
ಉಮಾಪತಿ
