ABHIJNAANA SHAAKUNTALA     ( Konakni Bhashentu )

( ಕಾಳಿದಾಸ ವಿರಚಿತ ಅಭಿಜ್ಞಾನ ಶಾಕುಂತಲ ಕಾಣಿಯೆಚೆ ರೂಪಾಂತರ ಕೆಲ್ಲಾ .. ಕೊಂಕಣಿ ಭಾಶೇಂತು ಬೊರೊಚ್ಯಾಕ ಕೆಲ್ಲೆಲೆ ಏಕ ಸಾನ ಪ್ರಯತ್ನ . ಚೂಕಿ ಜಾವ್ನು ಅಸ್ಲೆರಿ ಕ್ಷಮಾಪಣ ಕೋರ್ಕಾ. ಮೂಲ ಕಾಣಿಯೇಕ ಕಸಲೇಯಿ ಬದಲಾವಣಿ ನಾಶಿ .. ಕೊಂಕಣಿ ಉತ್ತ್ರ೦ ಸಂಭಾಷಣಾ ಘಾಲ್ನು ರಚನಾ ಕೆಲ್ಲಾ . ) ದುಷ್ಯಂತ ಮಹಾರಾಯು ಏಕ್ಲೊಚಿ ಝಲ್ಲೋ ತ್ಯೆ ರನ್ನಾ೦ತು ... ಚಿತ್ತಲಾ ಮಾಕ್ಷಿ ಧಾಂವ್ನು ಧಾ೦ವ್ನು ಮುಕಾರಿ ವತ್ತಾ ಅಸ್ಸ . ಏಕ ಪಂಕ್ತ ದಿಸ್ತಾ ... ದಿಸ್ಸನಾ ... ಶಿಖಾರ ಕರ್ತಾಚಿ ಮುಕಾರಿ ವತ್ತನಾ ಸೈನ್ಯ ಮಾಕ್ಷಿ ಪೊಳ್ಳೆಲೆ ತಕ್ಕಾ ಕಳ್ನಿ ... ವಾಟ ಚುಕ್ಲಿ ವಿಂಗಡ . ಸ್ವಲ್ಪ ದೂರ ವತ್ತರಿ ತೊಡೆಸೇ ಋಷಿ ಸನ್ಯಾಸಿ ಲೋಕ ಎದ್ರಾಕ ಅಯಿಲಿ೦ತಿ . ರಾಯಾಕ ರಬ್ಬಾಯಿಲೆ " ಮಹಾರಾಜ ... ! ಹ್ಯೇ ಕಣ್ವ ಮಹರ್ಷಿಲೆ ಆಶ್ರಮ ಅಸ್ಸುಚ್ಯೇ ಜಾಗೊ . ಹ್ಯೇ ಶಾಂತಿ ಧಾಮ . ಹಾಂಗಾ ಶಿಖಾರ ಕೋರು ನಜ್ಜ " ಮ್ಹಳ್ಳೆಳಿಂತಿ . " ಕಣ್ವ ಮಹರ್ಷಿ ಸೌಖ್ಯ ಅಸ್ಸನವೆ .. ? ಯಜ್ಞ ಯಾಗ ಸುಸೂತ್ರ ಜಾವ್ನು ಚಲ್ತಾನವೇ .. ? " ನಿಂಗಿಲೆ ರಾಯಾನ . "ಏಕೆಕ ಪೋಟಿ ರಾಕ್ಷಸ ಯೇವ್ನು ಉಪದ್ರವ ದಿತ್ತಾತಿ . ತುಮ್ಮಿ ಹಂಗ ರಬ್ಬುನು ... ಯಜ್ಞ ಕಾರ್ಯ ಸುಸೂತ್ರ ಜಾವ್ನು ಜಾವ್ಚ್ಯೇ ತಾಷ್ಶಿ ಕೋರ್ಕಾ " ಮ್ಹಳ್ಳೆಳಿಂತಿ . " ಜಾಯಿತ ... ! ಕಣ್ವ ಮಹರ್ಷಿ ಅಶ್ರಾಮಂತು ಆಸ್ಸತಿ ಕೀ ... ? " ನಿಂಗಿಲೆ . " ನಾ ... ಮಹಾರಾಜ . ತಗೆಲಿ ಧೂವ ಶಕುಂತಲಾ ಆಶ್ರಮಾಂತು ಅಸ್ಸ . ತೀ ತುಮ್ಕಾ ಆತಿಥ್ಯ ಕರ್ತಲಿ " . ದುಷ್ಯಂತ ರಾಯು ಆಶ್ರಮಾ ದಿಕಾನ ಚಮ್ಕಲೋ . ಸಾಧಾರಣ ಮನುಷ್ಯಾ ಮ್ಹಣ್ಕೆ ಅಸ್ಸುಕಾ ಮೊಣು ರಾಯಾನ ತಗೆಲೆ ಅಂಗಾರಿ ಅಷ್ಶಿಲೆ ಭ೦ಗರ , ನಗ , ಕಾಣು ಸಾರಥಿ ಲಗ್ಗಿ ದಿಲ್ಲೆ . ರಥ ದೂರ ರಾಬ್ಬೊನು ... ಚಮ್ಕುನು ಆಶ್ರಮ ದಿಕಾನ ಭಾರಸರ್ಲೊ . ಏಕ ರುಕ್ಕಾ ಆಡ ರಬ್ಬುನು ಪೋಳಯಿಲೆ . ತ್ಯೆಗ ಜನ ತರುಣಿ ... ಝಾಡಾ೦ಕ ಉದ್ದಾಕ ಘಾಲ್ತಾಷ್ಶೀಲಿ೦ತಿ . ತಂತು ಎಕ್ಲಿ ಕಣ್ವ ಪುತ್ರಿ ಶಾಕುಂತಲ ... ಅದ್ವಿತೀಯ ಚಂದಿ ಜಾವ್ನು ದಿಸ್ಲಿ . ತಿಕ್ಕಾ ಪೊಳೈಲೆ ಸತಾನ ರಾಯಾಕ ತಿಗೆಲೆ ವೈರಿ ಮೋಹ ಝಲ್ಲೆ . ಕಿತ್ಲೆ ವೇಳು ತಿಕ್ಕಾ ಪೊಳೈತ ರಬ್ಬಿಲೊ ಕೀ ... ರಾಯಾಕ ವೇಳು ಝಲ್ಲಲೋ ಕಳ್ನಿ . ಹ್ಯೇ ರನ್ನಾ೦ತು ಇತ್ಲಿ ಚಂದಿ ...!! ಮಿಗೆಲೆ ಅಂತಃಪುರಾಂತು ತಾಯಿ ಯಿತ್ಲಿ ಚಂದಿ ಬಾಯ್ಲ್ ಮನಿಷಿ೦ ನಾತಿ . ಕಮಲಾ ಫೂಲ ಚಿಕ್ಲಾಂತು ಅಸ್ಲೆರಿಯಿ ... ಚಂದ ದಿಸ್ಸನಾವೇ .. ? ಚಂದ್ರಾ ವೈರಿ ಕಾಳೆ ಥಪ್ಪೋ ಅಸ್ಲೆರಿಯಿ ಚಂದ್ರು ... ಚಂದು ದಿಸ್ಸನಾವೇ ... ? ಆಹಾ ! .. ಕಿತ್ಲಿ ಚಂದಿ ..ಕೇಶ ರಾಶಿ ... ತ್ಯೆ ನಾಂಕ ...ದೊಳೆ .. ಗಾಲ ... ವಕ್ಷ ಸ್ಥಾನ ... ಕೂರ್ಟ್ ... ಏಕ್ - ಏಕ್ ಅಂಗಾ ರಚನಾ ತ್ಯೆ ಬ್ರಹ್ಮ್ಮಾನ ಇತ್ಲಿ ಚಂದಾಯಿ ಕಷ್ಶಿ ಸ್ರಷ್ಠಿ ಕೋರ್ನು ದವರ್ಲಿ ... ? ದುಷ್ಯಂತ ಮಹಾರಾಜಾಕಾ ಮನಾಂತು ದಿಸ್ಲೆ . ತನ್ನಿ ಹಸ್ತ - ಹಸ್ತಾಚಿ ಉಲ್ಲೊಚೆ ಅಯಿಕಲೋ "ಅನಸೂಯೆ , ಪ್ರಿಯಂವದಾ ...ಹ್ಯೇ ಘೆಲ್ಲೇರಿ ಕಿತ್ಲೆ ಚಂಪೇ ಫುಲ್ಲಂ ಬೊಸ್ಲಾ ಪೊಳೆ ... ! " ಅಪ್ಪಯಿಲೆ ತಂಕಾ ಶಕುಂತಲೆನ .
" ರಾಬ .. ರಾಬ .. ಶಕುಂತಲೆ .. ಹಾಂಗಾ ಪೊಳೆ .. ಹೀ ವಾಲಿ ಕಷ್ಶಿ ಅಂಬೆ ರುಕ್ಕಾಕ ಸುತ್ವುನು ಘೆತ್ಲಾ ಪೊಳೆ .... ಪ್ರೇಮಿ , ಪ್ರಿಯತಮಾಕ ಧರ್ಲೆ ಮ್ಹಣ್ಕೆ ದಿಸ್ತಾ .. !" ಮ್ಹಳ್ಳೆಲಿ ಪ್ರಿಯಂವದಾ . ಶಕುಂತಲೆನ ಪೊಳೈಲೇ . " ವ್ಹಯಿ ...ತೂವೆ ಸಂಘಿಲೆ ಸಮ್ಮ ...ಪ್ರಿಯಂವದಾ ... ಮಕ್ಕಾಯಿ ತಶೀಚಿ ದಿಸ್ತಾ " ಶಕುಂತಲೆಲೆ ದೊಳೆಂತು ಆನಂದ , ಲಜ್ಜ ಎಕ್ಕ ವೆಳ್ಯೇರಿ ದಿಸ್ಲೆ . ತೆದೊಳು ಭಿತರಿ ಏಕ ಮಧು ಭ್ರ೦ಗ ಶಕುಂತಲೆಕ ತೊಂಡಾ ದಿಕಾನ ಯೇವ್ನು ಉಡ್ಡ್ -ಉಡುನು ಸುತ್ತು ಘಾಲೂ ಶುರು ಕೆಲ್ಲೆ . " ಆಹಾ .. ತ್ಯೆ ಮಧು ಭ್ರ೦ಗ ಕಿತ್ಲೆ ಪುಣ್ಯ ಕೆಲ್ಲೆಲೆ .. ? ಫುಲ್ಲೆಲೆ ತಾಂಬ್ಡೇ ಕಮಲಾ ಫುಲ್ಲಾ ಪತ್ತೆ ಮ್ಹಣ್ಕೆ ಅಷ್ಶಿಲೆ ತಿಗೆಲೆ ವೊಂಟಾಕ ಉಮ್ಮೋ ದಿವ್ಚ್ಯಾ ಆಯ್ಲಾ ಮ್ಹಣ್ಕೆ ದಿಸ್ತಾ ... ನಿಜಾವನು ತ್ಯೆ ಭ್ರ೦ಗಾನ ಕಿತ್ಲೆ ಪುಣ್ಯ ಕೆಲ್ಲಾ " ದುಷ್ಯಂತಾನ ಲೆಕ್ಲೆ . " ಅನಸೂಯಾ .. ! ಹ್ಯೇ ಭ್ರ೦ಗ ಮಕ್ಕಾ ಅತ್ತ ಚಾಬ್ತಲೇ ... ! ವಗ್ಗಿ ಧಾಂವ್ಡಾಯಿ ... " ಮ್ಹಳ್ಳೆಲಿ ಶಕುಂತಲಾ . ಹ್ಯೇ ವೆಳ್ಯೇರಿ ದುಶ್ಯಂತು ಎದ್ರಾಕ ಅಯಿಲೊ . ಭ್ರ೦ಗಾಕ ಧಾಂವ್ಡಾಯಿತಾಚಿ ... " ಭೀವ್ನುಕ್ಕಾ ...ಹಾಂವ ಅಸ್ಸ " ಮ್ಹಳ್ಳಲೋ .ಅಪರಚಿತ ರಾಯಾಕ ಪೋಳೋನು ಶಕುಂತಲೆಕ ಆಶ್ಚರ್ಯ ಝಲ್ಲೆ . . " ಕೋಣ ತೂ ... ? ಹಾಂಗಾ ಕಿತ್ಯಾ ಅಯಿಲಾ ..? " ಮೋಣು ಶಕುಂತಲೆನ ನಿಂಗಿಲೆ . " "ಹಾಂವ ... ದುಷ್ಯಂತ ... ಮಹರಾಜಾಲೆ ಮಂತ್ರಿ ... ಕಣ್ವ ಮಹರ್ಷಿಲೆ ದರುಶನಾ ಖತೀರಿ ಹಾಂಗಾ ಅಯಿಲಾ " . ರಾಯಾನ ಉಲ್ಲೊಚ್ಯೆ ರೀತಿ , ಗಾಂಭೀರ್ಯ ಸ್ವರು , ತಗೆಲೆ ರೂಪ ಪೋಳೋನು ... ಶಕುಂತಲೆಕ ತಗೆಲೆ ವೈರಿ ಮೋಹ ಝಲ್ಲೆ .ಮನ ತಿಗೆಲೆ ವಾರೇಕ ಉಬ್ಲೆ ಮ್ಹಣ್ಕೆ ಝಲ್ಲೆ . ತಗೆಲೆ ಚಂದಾಯಿ ಪೊಳೋನು ಮೋಹ ಪರವಶ ಝಾವನು ಶಿಲಾ ಮೂರ್ತಿ ಶೀ ರಬಲಿ . ರಾಯಾಕ ಸಪ್ತಪರ್ಣ ವೃಕ್ಷಾ ತೊಗ್ಗು ಸಾವಟಾಕ ಬೊಸ್ಕರಾನು ತಗೆಲೆ ಕ್ಷೇಮ ಸಮಾಚಾರು ಉಲ್ಲೊಚ್ಯಾ ಶುರು ಕೆಲ್ಲೆ ಬಾಕಿ ಸಖೀನ . "ಕಣ್ವ ಮಹರ್ಷಿ ಬ್ರಹ್ಮಚಾರಿ ಮೋಣು ಅಯಿಕಲೊಲೊ ಶಾಕುಂತಲ ತಗೆಲೆ ಧೂವ ಕಷ್ಶಿ ಝಲ್ಲಿ .. ? " ಮೋಣು ದುಷ್ಯಂತಾನ ನಿಂಗಿಲೆ . ಪ್ರಿಯಂವದಾ : " ಶಕುಂತಲಾ .. ಕಣ್ವ ಮಹರ್ಷಿಲೆ ಪೋಷ್ಶಿಲಿ ಧೂವ ..ವಿಶ್ವಾಮಿತ್ರಾಲೆ ತಪೋಭಂಗ ಕೊರುಂಕ ಇಂದ್ರಾನ ಮೇನಕೆ ಮ್ಹಳ್ಳೆಲೆ ಅಪ್ಸರೆಕ ಭುಯಿಂಚೇರಿ ಪೆಟೋನು ದಿಲ್ಲೆಲೆ . ತಾಂಗೆಲೆ ದೋಗ್ ಜನಾಲೆ ಸಮಾಗಮ ನಿಮಿತ್ಯ ಹೀ ಜನ್ಮಾ ಆಯಿಲಿ . ತನ್ನಿ ದೊಗ್ಗ ಜನಾನಿ ಪರಿತ್ಯಕ್ತ ಕೆಲ್ಲೆಲೆ ನಿಮಿತ್ಯ .. ಶಕುಂತ ಪಕ್ಷಿ ಚೇರ್ಡಾಕ್ ರಕ್ಷಣಾ ಕರ್ತಶಿಲಿ ನಿಮಿತ್ಯ ಹಿಕ್ಕ ಶಕುಂತಲೆ ಮೋಣು ನಾವ ದವರ್ಲೆ .. ಆಶ್ರಮಾ ಹಾಣು ಮಹರ್ಷಿನ ಪೋಶಿಲೆ .. " .. " ಒಹೋ .. ! ಹೀ ಅಪ್ಸರೆಲೆ ಧೂವ ಕೀ .. ? ನಾತ್ಲೆರಿ .... ಇತ್ಲೆ ಚಂದಾಯಿ ಭೂಲೋಕಾಂತು ಕೊಣಾಕ್ ಯೆತ್ತಾ .. ?" ಮ್ಹಳ್ಳಲೋ ದುಶ್ಯಂತು . " ಅನಿ ಹಾಂವ ಯೆತ್ತಾ .. " ಮೋಣು ಸಂಘುನು ಶಕುಂತಲೆ ಉಠಯ್ಲಿ . ರಬ್ಬು೦ಕ ವತ್ತನಾ ತಿಗೆಲೆ ಸೆರಗ ಕಾಂಟೆಕ ಸುತ್ವಾನು ಸೆರಗ ನಿಸರ್ಲೆ . ಅಬ್ಬಬ್ಬಾ ... ಕಿತ್ಲಿ ಚಂದಿ.. ! ತಿಗೆಲೆ ವಕ್ಷ ಸ್ಥಾನ ಪೋಳೋನು ದುಷ್ಯಂತಾಕ ಮನ ಚಂಚಲ ಝಲ್ಲೆ . ರಾಜ್ಯಾಕ ವಾಪಸ್ ವೋಚ್ಚಾ ಮನ ಜಾಯ್ನಿ . ಆಶ್ರಮ ಲಗ್ಗಿ ತಯಿಂಚ್ಯ್ ... ಏಕ .. ಗುಡಾರ ಘಾಲ್ನು ರಾಬ್ಲೊ . ತಗೆಲೆ ಮನಾಂತು ಪೂರಾ ಶಕುಂತಲೆ , ತಿಗೆಲೆ ಚಂದಾಯಿ , ಮೊವಾಳ ಉತ್ತರಂ ,ಮಂದ ಹಾಸು , ಚಂಚಲ ಸುಂದರ ಚಿತ್ತಲಾ ಮ್ಹಣ್ಕೆ ದೊಳೆ , ಪೋಳೋಚೆ ಸುಂದರ ನಮುನೋ , ವೊರೆ ದೊಳೆ ದ್ರಷ್ಟಿ , ಕೌಮಾರ್ಯ ಹಾಸು , ಮಧುರ ಸ್ವರು , ಮಧು ಭ್ರ೦ಗ ಭೀವ್ನು ... ತೊಂಡಾರಿ ಪೊಳೈಲೆಲೆ ಲಾಸ್ಯ ಭೀತಿ ..ತಗೆಲೆ ಮನ , ತಳ್ - ಮಳೆ . ಮನ್ಮಥಾ ಪುಷ್ಪ ಬಾಣ ಎಕಾ ಮಾಕ್ಷಿ ಏಕ ಯೇವ್ನು ಘಾಯು ಕರ್ತಾ . ಜಲ್ಲೇರಿ ... ರಾತ್ರಿ ... ಶೀತಲ ಚಂದ್ರ ಕಿರಣ ... ತಕ್ಕಾ ಉಜ್ಜೆ ಮ್ಹಣ್ಕೆ ಅನುಭವು ಝಲ್ಲೋ .. ! . ಹೃದಯಾ ಲಗ್ಗಿಲೆ ಉಜ್ಜೋ ...ಮನಾ ಯೇವ್ನು ...ಸಗಳೇ ಅಂಗಾಂತು ಲಗ್ಗಿಲೆ ಅನುಭೂತಿ ಝಲ್ಲಿ . 

                ಶಾಕುಂತಲ  : " ಪ್ರಿಯಂವದಾ  ...!  ತ್ಯೆ  ರಾಯಾಕ  ಪೊಳೈಲೇ  ಕ್ಷಣಾ  ದುಕುನು  ... ತಗೆಲೆ  ವೈರಿ  ಪ್ರೀತಿ  ಅನಿಕಯ್  ಚಡ  ಝತ್ತಾ  ಅಸ್ಸ  . ತಾಣೆ  ಪ್ರೀತಿ  ಭಾವೇನ  ,ದೊಳೆ  ರೊಂಪೆ  ಹಲ್ಲಾಯಿನಾಶಿ  ಮಕ್ಕ  ಪೊಳೈತಾನಾ   , ಮನ್ಮಥ  ಬಾಣ  ಮಿಗೆಲೆ  ಹೃದಯ  ಭೇತ್ತುನು  ಘಾಲ್ತಾ  ಕೀ  ಮೋಣು  ದಿಸ್ಲೆ  . ರಾತ್ರಿ  , ಏಕ  ಕ್ಷಣಿಕ  ನೀದ  ಪೋಣಿ  . ಮೋಹ  ಉನಮಾದ  ಝಲ್ಲಾ  ದಿಸ್ತಾ  ... ಮನ  ಚಂಚಲ್  ಝಲ್ಲ  , ಸ್ಥಿರ .. ನಾಶಿ  ಏಕ  ವಿಷಯು  ಸ್ಥಿರ  ಜಾವ್ನು  , ಆಲೋಚನಾ  ಕೋರ್ಚ್ಯಾ  ಜಾಯ್ನಾ   ... ಸಖೀ   ಕಿತೆ  ಕೋರು  ... ? " ಮ್ಹಳ್ಳೆಲಿ  

ಪ್ರಿಯಂವದಾ  : " ಶಕುಂತಲಾ  ... ! ತೂ  ... ತುಕ್ಕ  ಸಾಮ್ಮ್  ಝಲ್ಲಲೋ  ಪ್ರಿಯತಮಾಕ  ಪ್ರೀತಿ  ಕರ್ತಾ  ಅಸ್ಸ  . ನಯೀ  , ಸಮುದ್ರಾ  ದಿಕಾನಚ್ಯ್  ಹೊಳ್ಚೆ     ಪೊಡ್ತಾ  ... ವಾಲೀ  .. ರುಕ್ಕಾಚಿ  ಆಶ್ರಯ  ಘೆತ್ತ  . ತೂ  ಏಕ  ಕಾಮ  ಕರಿ  ... ತಕ್ಕ  ಏಕ   ಪ್ರೇಮ  ಪಾತ್ರ  ಬರೈ   . ತುಗ್ಗೆಲ್  ಮನಾ  ಅಷ್ಶಿಲೆ  ಭಾವನಾ  ವ್ಯಕ್ತ  ಕರಿ  . ಹಾಂವ  ತ್ಯೆ  ಪ್ರೇಮ  ಪಾತ್ರ  , ಫುಲ್ಲ  ತಟ್ಟೆ೦ತು   ನಿಪ್ಪೋನು  ದೊವೋರ್ನು  ತಕ್ಕ  ಪಾವಾಯಿತಾ  " ಶಕುಂತಲೆನ   ಕಮಲಾ  ಪತ್ರೆ  ವೈರಿ  ನಾಂಕುಟ  ಘು೦ವ್ಡಾ ನು    ಬೊರೈಲೆ ....   " ತುಗ್ಗೆಲ್  ಮನ  ಹೃದಯಾಂತು   ಕಸಲೆ  ಅಸ್ಸ  ಮೋಣು  ಮಕ್ಕ  ಕಳ್ನಾ  ... ನಾತ್ಲೆರಿಯಿ  .... ತುಗ್ಗೆಲ್  ವೈರಿ  ಅಷ್ಶಿಲೆ  ಮಿಗೆಲಿ  ಪ್ರೀತಿ  ... ರಾತಿ  ದಿವಸು  ಮಕ್ಕಾ  ಜಳಯಿತಾ   ಅಸ್ಸ  ....ತುಕ್ಕ  ಪೊಳೊಕಾ  ಮೋಣು   ದಿಸ್ತಾ  " ನೀದ  ಪಣಾಶಿ   ದುಶ್ಯಂತು  ಚನ್ನಿನೆ  ಉಜ್ವಾಡಾಕ  ಭೋವಂತ  ... ತ೦ಯೀ    ಯೇವ್ನು  ಪಾವಲೋ  . 'ಒಹ್  .. ! ಮನಾ  ಲೆಕ್ಕಿಲೋ  ಮಿಗೆಲೋ  ಪ್ರಿಯತಮು  ಅಯಿಲೊ  .. ಅನಿ  ಹಾಂವ  ಆಶ್ರಮಾ  ಕ  ವತ್ತಾ ' ಮೋಣು  ಶಾಕುಂತಲ  ಆನಿ  ತಿಗೆಲೆ  ಸಖಿ  ಉಠಾಯಿಲಿ೦ತಿ  . " ಪೊಳೆ  ರಾಜನ್  ... ! ಪ್ರಜಾಲೆ  ಕಷ್ಠ  -ಸುಖ  ತೂವೆಂಚ್ಯ್  ಪೊಳೊಕಾ  ... ಮಿಗೆಲಿ  ಸಖಿ  ಶಕುಂತಲಾ   ತುಗ್ಗೆಲ್  ಯಚ್ಚನ  ಕಾಣು  ಸಂಕಷ್ಠ   ಪಾವಲೆ  . ತಿಕ್ಕಾ  ತೂವೆ೦ಚ್ಯ್  ರಕ್ಕೂಕ  ..." ಮೋಣು  ಸಂಘುನು  ತ್ಯೆ  ಜಾಗೇರಿ  ದುಕೂನು  ಚಮ್ಕಲೀ೦ತಿ    . 

ದುಷ್ಯಂತ  : " ವೊಚ್ಚುನುಕ್ಕಾ  .. ಶಕುಂತಲೆ  ...! ಆಮ್ಗೆಲೆ  ತನು  ಮನ  ಶಾಂತ  ಜಾಯಿನಿ  ..." ತಿಗೆಲೊ  ಹಾತು  ಧೋರ್ನು  ರಬ್ಬಯ್ಯಲೇ   

ಶಾಕುಂತಲ  : " ಪೌರವಾ  ... ! ಸ೦ಯ್ಯಮ    ಅಸ್ಸೋ  ...ಹಾಂವ  ತುಗ್ಗೆಲ್  ಪ್ರೀತಿನ  ದಗ್ಧ  ಜಾವ್ನು ... ಅಸ್ಸ . ಝಾಲ್ಲ್ಯೆರಿಯಿ  ಹಾಂವ  ಸ್ವತಂತ್ರ  ಜಾವ್ನು  ಮುಕಾರ್ಸುಚ್ಯಾ  ಜಾಯ್ನಾ  ." 

ದುಷ್ಯಂತ  : " ಭೀವ್ನುಕಾ  ... ಪ್ರಿಯೆ  ..! ಅಮ್ಕಾ   ಅಮ್ಮಿಚ್ಯ್  ಬಂಧು  ... ಆನಿ  ಆಮ್ಕಾ  ಅಮ್ಮಿಚ್ಯ್  ಶತ್ರು  ... ತಶ್ಶ್ಯ್  ಜಾವ್ನು  ... ಆಮ್ಗೆಲೊ   ನಿರ್ಧಾರು  ಅಮ್ಮಿಚ್ಯ್  ಘೆವ್ಕಾ  ... ಪರಸ್ಪರ  ಅಮ್ಮಿ  ಕೆದನಾ  ಪ್ರೀತಿ  ಕರ್ತಾತಿ  ಕೀ  ... ಗಾಂಧರ್ವ  ವಿಧಿರಿ  ಅಮ್ಮಿ  ಲಗ್ನ  ಜಾವ್ಯಾ  ... ಹ್ಯೇ  ಶ್ರೇಷ್ಠ  ರೀತಿ  ...ಆಮ್ಗೆಲೆ  ಪೋಷಿ  ಫುಡೆ  ... ಕಿತ್ಲೆ  ಕೀ  ಲೋಕಾನಿ  ಹ್ಯೇ  ರೀತ್ಯೇರಿ  ಲಗ್ನ  ಝಲ್ಲೆಂತಿ  ... ಅಮ್ಮಿಯಿ  ತಶೀಚ್ಯಿ  ಕೋರ್ಯಾ  . ಅಮ್ಮಿ  ಲಗ್ನ  ಝಲ್ಲೆರಿ  ಆಮ್ಗೆಲೆ  ಜಾವ್ವೋ  , ತುಗ್ಗೆಲ್  ಜಾವ್ವೋ    , ಮಲಘಡೆ   ಕೊಪ್ಪ  ನಾತಿ  "

ಶಾಕುಂತಲ  : " ಮಕ್ಕ  ಸೋಡಿ ರಾಜನ್  .. ! " ಲಜ್ಜೆನ  ಸಾಂಗ್ಲೆ  "ಮಿಗ್ಗೆಲೆ  ಸಖಿಲೇ  ನಿಂಗೀತಾ  " ಫುಲ್ಲ  ನಿಮಿತ್ಯ  ಆಕರ್ಷಣ   ಝಲ್ಲೆಲೆ  ಮಧು  ಭ್ರ೦ಗ   ಶೇ  ...ಶಕುಂತಲಾ  ಮನ  ರಾಯಾ  ದಿಕಾನ  ಘು೦ವ್ಲೇ    . ರಾಯಾಕ  ಸೊಡು  ಜಾಯ್ನಿ . ದುಷ್ಯಂತಾನ  ಶಕುಂತಲೆಕ  ಗಾಂಧರ್ವ  ವಿವಾಹ  ಕೆಲ್ಲೆ  . ನವ  ದಾಂಪತ್ಯಾಕ  ಪದಾರ್ಪಣ  ಕೆಲ್ಲೆಲೆ  , ನವ  ವಧು  ವರ  , ನವ  ಪ್ರೇಮ  ಜೋಡಿಕ   .... ಕಾಲ  ಚಕ್ರ  ಘುವ್ವಿಲೆ  ಕಳ್ನಿ  . ಯಜ್ಞ  ರಕ್ಷಣೆ  ಕಾಮ  ಪೂರ್ತಿ  ಕೋರ್ನು  ರಾಯು  ತಗೆಲೆ  ರಾಜ್ಯಾಕ  ವಾಪಸ್  ಭಾರ ಸರ್ರ್ಲೊ  . ಶಕುಂತಲೆ  ಬೊಟ್ಟಾಕ  ತಗೆಲೆ  ನಾವ  , ಮುದ್ರಾ  , ಲಾಂಛನ  ಅಷ್ಶಿಲೆ  ಮುದ್ದಿ  ಘಾಲ್ಲ್ನು  , ವಗ್ಗಿ  ತಿಕ್ಕಾ  ಅಪ್ಪೋನು  ವ್ಹರ್ತಾ  ಮೋಣು   ಆಶ್ವಾಸನ  ದೀವ್ನು  , ಅಧರ  ಚುಂಬನ  ದೀವ್ನು  , ಬಾಹು  ಬಂಧನ  ಸೊಡ್ವಾನು , ಮನ ಶಕುಂತಲೆ ಕ ದೀವ್ನು , ನಾತ್ತಿಲೆ ಮನಾನ ,ಹೃದಯಾಂತು ದುಮ್ಮಾನ ಭೋರ್ನು ,  ದೊಳೆ ಉದ್ದಕ ಭೋರ್ನು ... ಕಷ್ಟಾರಿ ಚಮ್ಕಲೋ ....   . 

               ದುಷ್ಯಂತಾನ   ಗೆಲ್ಲೆ  ನಂತರ  .... ,  ಶಕುಂತಲೆ  ತಗೆಲೆ  ಉಡ್ಘಾಸು   ಕಾಣು  , ತಗೆಲೆ  ರೂಪ  , ಪ್ರೀತಿ  ಮನಾ  ಲೆಕ್ಕುನು  , ತಗೆಲೆ  ಧ್ಯಾನಾಂತು  ಬುಡ್ಲಿ  . ಅನ್ನ  ಆಹಾರ  ನಕ್ಕ  ಝಲ್ಲೆ  ...ನೀದ  ವಿಶ್ರಾಮ  ನಕ್ಕ  ಝಲ್ಲೆ  ... ಧ್ಯಾನ  ... ಧ್ಯಾನ  ... ದುಷ್ಯಂತ  .... ಧ್ಯಾನ  ..... ! ವಿರಹ ಯಾತನಾ ... ದುಷ್ಯಂತ ವಿರಹ .

                    ಏಕ  ದಿವಸು  ತ್ಯೆ  ಆಶ್ರಮಾಕ  ದೂರ್ವಾಸ  ಮುನಿಲೆ  ಆಗಮನ  ಝಲ್ಲೆ  . ಶಕುಂತಲೆ  ಯೇಕ್ಲಿ ಅಷ್ಶಿಲಿ . ತಿಗೆಲೆ ಮನ  ... ಫುಲ್ಲಾ  ಬುಡ್ಡಿಲೆ ಮಕರಂದ  ಭ್ರ೦ಗ  ಶೇ  ಅಷ್ಶಿಲೆ  . ಭಿಕ್ಷೆ  ಖತಿರಿ  ದುರ್ವಾಸ ಮುನಿನ  ಪದೇ - ಪದೇ  ಯಾಚನಾ  ಕೆಲ್ಲಿ  . ಶಕುಂತಲೆಕ  ಅಯಿಕುಪಣಿ  . ಧ್ಯಾಸು  ಅಂಗಾರಿ  ನಾ  . ವಿರಹ ಯಾತನಾಂತು ಬುಡ್ಡಿಲೇ ಮೊಗ್ಗು ಕಮಲಾ ಫೂಲ ಶಿ ಅಶಿಲಿ .  ದಿವ್ಯ  ದ್ರಶ್ಟೀರಿ   ಪೊಳೈಲೇ  ...ತಿಗೆಲೆ  ಅಂತರಂಗ  ದುರ್ವಾಸ  ಮುನಿ  ಕ  ಕಳ್ಳೆ  . ಮಹಾ  ಕೋಪು  ಅಯಿಲೊ  ... " ಕೊಣಾಲೆ   ಸ್ಮರಣ  ಕೋರ್ನು  .... ಮಿಗ್ಗೆಲೆ  ಉಪೇಕ್ಷ  ಕೆಲ್ಲೆ  ಕೀ  .... ತ್ಯೋ  ತುಕ್ಕಾ  ವಿಸೋರ್ನು ವೊಚ್ಚೊ  ... !!  " ಮೋಣು  ಶ್ರಾಪು  ದಿಲ್ಲೊ  . ತೆದೊಳು  ಭಿತರಿ  ಪ್ರಿಯಂವದಾ  ತ೦ಯೀ   ಯೇವ್ನು  ಪಾವ್ಲಿ  . ದುರ್ವಾಸ  ಲೆ  ಘನ  ಘೋರ  ಶ್ರಾಪು  ಅಯಿಕುನು  ಏಕ  ಪಂಕ್ತಾ  ಭಿಲ್ಲಿ  . ದೂರ್ವಾಸಾಲೆ  ಪಯ್ಯಾರಿ  ಪೋಣು   " ಮಹಾ  ತಪಸ್ವಿ ! ... ಶಕುಂತಲೆ  ಕಾಯಿ  ಕಳ್ನಾ  ನಾತ್ತಿಲೆ  ಮುಗ್ಧ  ಕನ್ಯಾ  ... ತಿಗೆಲೆ  ವೈರಿ  ಕೃಪಾ  ಕೋರ್ಕಾ  . ಕ್ಷಮಾಪಣ  ತಿಗೆಲೆ  ತರ್ಪೇನ   ಹಾಂವ  ನಿಮಗಿತಾ  " ದೊಳೆ  ಉದ್ದಾಕ   ಕಾಣು ಪಯ್ಯಾರಿ ಪೋಣು ಕ್ಷಮಾಪಣ ಮಾಗ್ಲಿ ..... " ಮಿಗ್ಗೆಲೆ  ಉತ್ತರ  ವಾಪಸ್  ಘೆವ್ಚ್ಯಾ  ಜಾಯ್ನಾ  ... ಝಲ್ಲೆರಿಯಿ  ತಿಗೆಲೆ  ಅಷ್ಶಿಲೆ  ಅಭಿಜ್ಞಾನ  ಮುದ್ದಿ  ಪೊಳೈಲೇ   ಸತಾನ  ಶ್ರಾಪ  ವಿಮೋಚನಾ  ಝತ್ತಾ  " ಮ್ಹಳ್ಳಲೋ  ದೂರ್ವಾಸ  ಮುನಿ  .

                                  ಸ್ವಲ್ಪ  ದಿವಸಾನ  , ತೀರ್ಥ  ಯಾತ್ರಾ  ಕ  ಗೆಲ್ಲೆಲೋ  ಕಣ್ವ  ಮುನಿ  ಆಶ್ರಮಾ  ಕ  ವಾಪಸ್  ಅಯಿಲೊ  . ಆಶ್ರಮಾ  ಪಾಯು  ದವರ್ತಾನಾ   ಚ್ಯಿ  ಏಕ  ಅಶರೀರ  ವಾಣಿ  ಅಯಿಕು ಪಳ್ಳಿ  ... " ಅಗ್ನಿಕ  ಶಮೀ  ವೃಕ್ಷ  ಕ್ಶಶಿ  ಧಾರಣ  ಕರ್ತಾ  ಕೀ  ... ತಶಿ   ... ಭೂಮಂಡಲಾ  ಚಂಗಾಕ  , ಬೊರೆಪಣಾಕ  ಶಕುಂತಲಾ  ... ದುಷ್ಯಂತಾಲೆ   ತೇಜಸ್ಸ  ಧಾರಣ  ಕೆಲ್ಲಾ  .. " ದಿವ್ಯ  ದ್ರಷ್ಠಿನ   ಪೋಳೋನು  ಕಣ್ವ  ಮಹರ್ಷಿಕ  ಸರ್ವ  ವಿಷಯು  ಕಳ್ಳೆ  . ಶಕುಂತಲೆ  ಕಣ್ವ  ಮುನಿಲೆ  ಪಯ್ಯಾರಿ   ಪೊಳ್ಳಿ ...ಅನ್ನಾ ... ಮೋಣು ಪಯ್ಯಾಕ ಘೊ೦ಚೊ  ಘಾಲ್ನು ರಳ್ಳಿ ... ಉತ್ತರಂ ಯೇನಿ ...  ಸಂಕಟ  ಝಲ್ಲೆ  ... ಪಶ್ಚತ್ತಾಪು   ಪಾವ್ಲಿ  ... ದೊಳೆ  ಉತಕಾನಿ ... ತಗೆಲೆ  ಪಾಯು  ಧುಲ್ಲೋ . . ಕಣ್ವ  ಮುನಿಲೆ  ದೊಳೆ ಉದ್ದಾಕ ಅಯಿಲೆ ... " ಉಟ್ಟಾ .. ಚೆರ್ಡಾ   ... ! " ತಿಕ್ಕಾ  ಧೋರ್ನು  ಉಬ್ಬಾರ್ಲೆ  ... ಪೋಟೋನು  ಧರ್ಲೆ  ... ಸಾಂತ್ವನ  ಕೆಲ್ಲೆ  .. " ಯಜ್ಞ  ಕರ್ತಾನಾ  .... ಹೋಗೆ  ನಿಮಿತ್ಯ  ದೊಳೆ  ಮಂದ  ಝಾಲ್ಲ್ಯೆರಿಯಿ  ಆಹುತಿ  ಯಜ್ಞಾಕ  ಪಾವಯಿಲಾ  ಮ್ಹಣ್ಕೆ ...  ತೂವೆ  ಯೋಗ್ಯ  ವರಾ ಕ  ಲಗ್ನ  ಝಾಲ್ಲೇ  .. ಚೆರ್ಡಾ  ....ತೂವೆ  ಕಾಯಿ  ದುಃಖ  ಪಾವ್ಚ್ಯೇ  ಅಗತ್ಯ  ನಾ ಬಾಳಾ  ... ಪ್ರೀತಿ ಮಮತಾ ಅನುರಾಗ ಕಾಮ ಮೊಹ ಪ್ರಕ್ರತಿ ದತ್ತ ದೇವಾನಾ ದಿಲ್ಲೆಲೆ ವರ ಬಾಳಾ ... ತುಗ್ಗೆಲ್ ಮನಾ ದುಮ್ಮಾನ ಮಕ್ಕ ಕಳ್ತಾ ಚೆರ್ಡಾ ... ಆಜೀಚ್ಯ್   ತುಕ್ಕಾ  ಋಷಿಮುನಿಲೆ  ವೊಟ್ಟು  ಹಸ್ತಿನಾವತೀ ಕ   ಪಾವೈತಾ." ಮ್ಹಳ್ಳಲೋ  . ಶಕುಂತಲೆಕ  ಮಸ್ತ ಮನಾ ಸಮಾಧಾನ ಝಲ್ಲಿ ಬಪ್ಸುಲೆ ಉತ್ತರಂ ಅಯಿಕುನು ..  ಕಣ್ವ  ಮಹರ್ಷಿನ  ತಾಗೆಲೆ ತಪೋ  ಬಲಾನ  ರುಕ್ಕಾ  ದುಕೂನು  ರೇಷ್ಮಾ  ಕಪ್ಪಡ  , ಭಾಂಗ್ರಾ  ನಗ  ನಾಣ್ಯ  , ಹಾಡೋನು  ಆಶೀರ್ವಾದು  ಕೆಲ್ಲೊ  . ತಿಗೆಲೆ  ಸಖೀ  ಲೋಕಾನಿ  ಶ್ರಾಂಗಾರು  ಕೆಲ್ಲೊ  . ಶಕುಂತಲೆನ  ತಿಗೆಲೆ  ಪ್ರೀತ್ಯೇನ ಪೋಶಿಲೆ  ಚಿತ್ತಲ  ,ಕೀರು  , ಮೋರು  , ಗಾಯಿವಸ್ರು  , ಫಲ  ಪುಷ್ಪ  ವನಾ  ಝಾಡ  ವೃಕ್ಷಾಂಕ  ಪೋಟೋನು  ಧೋರ್ನು  , ದೊಳೆಂತು  ಭೋರ್ನು  ಘೆತ್ಲೆ  . ವಿಯೋಗ  ದುಃಖ  ಹರದೆಂತು  ಭೋರ್ನು  ಅಯಿಲೆ  ...ದೊಳೆಂತು  ಅಶ್ರು  ಧಾರಾ   ದೇವ್ಲಿ   ... ಕಾಲ  ಚಕ್ರಾಂತು  ದಕ್ಕಯ್ಯಲೇ   ಪ್ರೀತಿ  , ಮಮತಾ  ,ವಾಂಟುನು   ಘೆತ್ತಿಲೆ  ಸಂತೋಷು  ಉಡ್ಘಾಸು   ಝಲ್ಲೋ  . ಕಣ್ವ  ಮುನಿಕ  ದೊಳೆ  ಭೋರ್ನು  ಅಯಿಲೆ  ...ಧ್ವನಿ  ಗದ್  -ಘಧಿತ  ಝಲ್ಲಿ  ... ಕನ್ಯಾ  ವಿದಾಯ  ಘಡಿ  ಆಯಿಲಿ  ..  

                         " ಅಮ್ಮಾ....ಶಕುಂತಲಾ   .. !! ದೀರ್ಘ  ಸುಮಂಗಲಿ  ಭವ  .... ಕಿತ್ಯಾ  ಅಮ್ಮಾ  .... ಹೀ   ಅಂತರಂಗಾ  ...ಅಂತಾ  ಸ್ಪಂದನಾ  ...? ಪೊಟ್ಟಾ  ಅಂತ  ಕತ್ತೊರ್ನು   ಯೆತ್ತಾ  ಅಸ್ಸ  ... ! ಮಹರ್ಷಿ  ಜಾವ್ನು  ಮಕ್ಕಾ  ಇತ್ಲೆ  ಅನುಬಂಧಾ  ಅನುಭವು  ಝತ್ತಾನಾ  ... ಸಾಮನ್ಯ  ಆನಮ್ಮಾಲೆ   ಗತಿ  ಕಸಲೆ  ಭಾಂಗ್ರಾ  ... ! ಚೆಲ್ಲಿಯೇ  ಚೇರ್ಡಾಕ  ತಿಗೆಲೆ  ಬಮ್ಮಣಾಲೆ  ಘರಾ  ಕ  ಪೆಟೋನು ವಿದಾಯ  ದಿತ್ತಾನಾ   ಇತ್ಲೆ  ಕಷ್ಠ  ಕಸಲೆ  ಝತ್ತಾ  ... ? ... ತುಮ್ಮಿ  ದೊಗ್ಗಯಿ ಆದರ್ಶ  ದಂಪತಿ  ಝಯ್ಯಾ  ... ತುಗ್ಗೆಲ್  ಪೊಟ್ಟಾಂತು  ಜನ್ಮಾ  ಯೆವ್ಚ್ಯೇ  ಪೂತು  ಸಾರ್ವಭೋವಮ     , ಚಕ್ರವರ್ತಿ  ... ಭಾರತೇಶ್ವರ   ಝತ್ತ  ಅಮ್ಮಾ  .." ಮೊಣು ಆಶೀರ್ವಾದು  ಕೆಲ್ಲೊ.   " ಮುದ್ದಿ  ಜಾಗ್ರತೆ  ... ರಾಯಾನ  ತುಗ್ಗೆಲ್  ಗುರ್ತು  ಧರನಾ  ನಾತ್ತಿಲೆ  ವೆಳ್ಯೇರಿ  ಮುದ್ದಿ  ದಕ್ಕಯಿ  " ಮ್ಹಳ್ಳೆಲಿ  ಪ್ರಿಯಂವದಾ  . ಸಾನಸ್ತಾನಾ  ದುಕೂನು  ಪೋಳೋನು  ಗೊತ್ತಷ್ಶೀಲಿ ಗೌತಮಿ  ಮ್ಹಳ್ಳೆಲಿ   ವೃಧ್ಧೆ  ಬಾಯ್ಲ್  ಮನಿಷಿಕ  ಲಾಗ್ಗಿ   ಘೇವ್ನು  ದೋಣಿರಿ  ಚಳ್ಳಿ  ಶಕುಂತಲಾ  . ಗಂಗಾ  ನಯ್ಚ್ಯೇ  ಶಾಂತ  ವಾತಾವರಣಾಂತು   ದೋಣಿ  ವೊತ್ತಿತಾಲೊ  ತಗೆಲೆ  ವಾಸೆ  ಕಂಬು  ಶಬ್ಧು   ಮಾತ್ರ  ಅಯಿಕತಾ .  ಸರ್ವಾಲೆ  ಮನಾಂತು  , ದುಃಖ  ಭೋರ್ನು  ಅಷ್ಶಿಲೆ  . ರಾತಿ  ದಿವಸು   ಪ್ರಯಾಣ  ಕೋರ್ನು  ಹಸ್ತಿನಾವತಿಕ  ಪಾವ್ಲೀ೦ತಿ

ಶಕುಂತಲೆಕ  ಮೆಳ್ಳೆಲೆ  ಮಾನ  ಮರ್ಯಾದಿ  ಕಸಲಿ  ... ? ನಿತ್ಯ  ಪೊಳೈಲೇ   ತಿಗೆಲೆ  ಸೊಪ್ಪನ   ಕಸಲೆ  ಝಲ್ಲೆ  ... ? ತೀಣೆ   ಬಂಧಿಲೇ  ಆಶಾ  ಗೋಪುರ  ಕಷ್ಶಿ  ಭೆತ್ಲೆ  .. ? ಮಧುರ  ನಿನಾದ  ಕೋರ್ನು  ಹೊಳ್ತಾ ಅಶಿಲಿ   ನಯೀ೦ತು  ಹೊಡು  ಪ್ರವಾಹು  ಅಯಿಲೆ  ಮ್ಹಣ್ಕೆ  ಝಲ್ಲೆ  . ಹಳೂ  ಯೆವ್ಚ್ಯೋ  ಪಾವ್ಸು  , ಆನಂದ  ಸಂತೋಷು  ಹಾಡಾಯಿತಾಚಿ   ... ಕೊಪ್ಪುನು ... ಧಾರಾಂಧರಿ  .. ಮಿಂಚು  ಗುಡಗುಡಾ  ವೊಟ್ಟು  ಯೇವ್ನು  ..ಘರ  ಕೊಸೊಳ್ನು  ವೆಲ್ಲೇ   ಮ್ಹಣ್ಕೆ  ಝಲ್ಲೆ  ... ! ಪ್ರಶಾಂತ  ಜಾವ್ನು  ಅಷ್ಶಿಲೆ  ರನ್ನಾ೦ತು ...   ಅಷ್ಶಿಲೆ - ತಶೀ೦ಚಿ ,  ಭಯಂಕರ  ಜ್ವಾಲಾಗ್ನಿ  ಉಠಾಯಿಲೆ  ಮ್ಹಣ್ಕೆ  ಝಲ್ಲೆ  . ರಾಯಲೆ  ಅನುಮತಿ  ಘೇವ್ನು  , ಶಕುಂತಲೆ  ಸಭೆಚ್ಯಾ  ಎದ್ರಾ  ಆಯ್ಲಿ  ..  

 " ಮಹಾರಾಜಾ  .. ! ಹಾಂವ  ಶಕುಂತಲೆ  ... ತುಮ್ಗೆಲೆ  ಚರಣ  ದಾಸಿ  .. ಕಣ್ವ  ಆಶ್ರಮಾಂತು  ... ಗಾಂಧರ್ವ  ವಿವಾಹ  ಝಲ್ಲೇಲ್ಲಿಂತಿ " ....  ಶ್ರಾಪಗ್ರಸ್ತ  ರಾಯಾಕ  ಉಡ್ಘಾಸು   ಯೇನಿ   .. " ಹಾಂವೆ  ತುಕ್ಕಾ  ಕೆದನಾಯಿ  ಪೊಳೈನಿ   ... ಫಟ್ಟಿ  ಉಲ್ಲೋನು  ಅಪವಾದು  ಘಲ್ಲೆರಿ ... ಜೀಬ  ಲಾಸ್ಸೂನು  ಘಾಲ್ತಾ   ... ಜಾಗ್ರತ  .. " - ರಾಯಾನ  ಸಮ್ಮ  ತಿಗೆಲೆ  ತೊಂಡ  ಪೊಳೊಕಾ  ಮೋಣು  ಗೌತಮಿನ  ಶಕುಂತಲೆಲೆ  ಸೆರಗ  ಸಮ್ಮ  ಕಾಣು  ತೊಂಡ  ದಿಸ್ಚ್ಯೇ ತಶೀ  ಕೆಲ್ಲೆ  . " ನಾ  .. ಹಿಕ್ಕಾ  ಹಾಂವೆ  ಕೆದನಾಯಿ  ಪೊಳೈನಿ   ... ವಿವಾಹ  ಕೆಲ್ಲಾ  ಮೋಣು   ಫಟ್ಟಿ   ಸಾಂಗ್ತಾ  ಅಸ್ಸ  .. ಹೀ  ಕೋಣ್ ಕೀ  .. ಪರಸ್ತ್ರೀ  .."

" ಹಾಂವ  ಪರಸ್ತ್ರೀ  ನಯೀ  .. ರಾಜಾ  .. ! ತುಮ್ಗೆಲಿ  ಪ್ರೇಯಸಿ  ... ಆಶ್ರಮಾಂತು  ಚಿತ್ತಲಾ  ಪೀಲ  ಮೂರ್ಚಿತ   ಜಾವ್ನು  ಪೋಣ   ಆಸ್ತಾನಾ  ತುಮ್ಮಿ  ಉದ್ದಾಕ   ಪಿವೋನು   .. ಅಮ್ಮಿ  ಅರಣ್ಯ  ವಾಸಿ  .. ಪರಸ್ಪರ  ಪ್ರೀತಿ  ವಿಶ್ವಾಷು  ಅಷ್ಶಿಲೆ  ಲೋಕು  , ಮೋಣು  ಸಂಘಿಲ್  ವುಡ್ಘಾಸು   ಅಸ್ಸವೇ  ? .. ವೊಚ್ಚೊ  ಮಿಗ್ಗೆಲೆ  ಹತ್ತಾ  ಬೊಟ್ಟಾ  ಕ  ತುಮ್ಮಿ  , ವಿವಾಹ  ವೆಳ್ಯೇರಿ  ಘಾಲ್ಲೆಲಿ  ಹೀ ಮುದ್ದಿ  ಉಡ್ಘಾಸು   ಯೆತ್ತವೇ  .. ?" ಶಕುಂತಲೆ  ನ  ಹಾತು  ಮುಕಾರಿ  ಹಾಣು  ಮುದ್ದಿಯೇ  ಬೋಟ  ದಕ್ಕಯಿಲೆ  . ಝಲ್ಲೆರಿ ...  ತೀ  ಮುದ್ದಿ  ಖಂಯಿ  .. ? ಬೊಟ್ಟಾಂತು  ಮುದ್ದಿ  ನಾ  ... ಅರೆ .. ಖಂಯಿ  ಮಾಯಾ  ಝಲ್ಲಿ  ... ? " ಬಯ್ಲಾ  ಮನ್ಶ್ಯಾ  ಕೆದನಾಯಿ  ವೇಳು  ಪೋಳೋನು  ಉಲ್ಲಯಿತಲಿ೦ತಿ   . ತಾಂಗೆಲೆ  ಕಾರ್ಯ  ಸಿದ್ಧಿ  ಜಾವ್ಚ್ಯಾಕ  ಕಸಲೆಯೀ  ಫಟ್ಟಿ  ಬದ್ದ  ಶೀ .. ಉಲ್ಲಯಿತಲಿ೦ತಿ  .  ಚಂದ  ಕೋರ್ನು  ಹಾವ - ಭಾವ  ಕೋರ್ನು  ಫಟ್ಟಿ  ಅಷ್ಶಿಲೆ ... ಬದ್ದ  ಕರ್ತಲಿಂತಿ   ..ತಾಂತು  ... ತೂ  ಎಕ್ಲಿ  . ಮಾನವ  ಜಾತಿ  .. ತಂತೂಯಿ ... ಬಾಯ್ಲ್  ಮನಿಷಿ  ...  ಕಪಟ  ಕೋರ್ಚ್ಯೇ  ಗುಣ  ಸಹಜ  ಜಾವ್ನು  ಆಸ್ತಾ  .. ಕೊಣಯಿ  ಶಿಖೋಕಾ  ಮೋಣು  ನಾ  . ಕೋಯಲ್  ಪಕ್ಷಿ  ತಾಜ್ಜೆ  ಮೊಟ್ಟೊ   ವಿಂಗಡ  ಪಕ್ಷಿ  , ಕಾಯ್ಳೆ   ಗೂಡಾ೦ತು   ದವರ್ನಾ   ವೇ  .. ? ಪರಸ್ತ್ರೀ  ವಿಷಯಾನ  , ದರ್ಲೆ  ಮನಷ್ಯ  ಕೆದನಾಯಿ  ಸ್ಥಿತ  ಪ್ರಜ್ಞ  ಜಾವ್ನು  ಆಸ್ತಲಿಂತಿ   ... ಮನ  , ವಾಯ್ಟ   ಕೋರ್ಚ್ಯೇ  ಅಸಲೆ  ಬಾಯ್ಲ್  ಮನಶ್ಯಾನಿಚಿ " ದುಷ್ಯಂತ  ರಾಯು  ಕಠೋರ  ಜಾವ್ನು  ಉಲ್ಲಯಿಲೊ  .

                " ಅಯ್ಯೋ   .. ! ದೇವಾ  ..ಪೂರೋ  ... ಪೂರೋ  .. ಹಾಂವ  ತಸಲಿ  ನಯ್  ... ರಾಜಾ  .. ವೊಂಟಾರಿ  .. ಜಿಬ್ಬೆರಿ  ಮೋವು    ದಕ್ಕೋನು  ಹೃದಯಾಂತು  ವಿಷ  ಭರ್ಲೆಲೆ ಮಕ್ಕಾ ಸಹನಾ ಕೋರು ಜಾಯ್ನಾ ... ಮಿಗ್ಗೆಲೆ ದೊಳೆ ಪೋಳೋಣು ಸಾಂಘ ... ಪುರು  ವಂಶ  ರಾಯು  ತೂ  ..... ಅಷ್ಶಿ  ಕರ್ತಾಲೊ  ಮೋಣು   ಹಾಂವ  ಸ್ವಪ್ಪನಾತಾಯಿ  ಲೆಕ್ಕ  ನೀ  " ಅಂತ ಘಲ್ - ಘಾಲೇ ..ದುಃಖ ಕಟ್ಟೆ ಭೇತ್ತುನು  ಅಯಿಲೆ .. ಕಿತ್ಯೆ ಕರ್ತಾಲಿ ..?  ಸೆರಗ  ತೊಂಡಾ  ಆಡ  ದವೋರ್ನು  ಮನ  ಭರಿ  ರಳ್ಳಿ . ' ಅಮ್ಮಾ ' ... ಉದ್ಗಾರು ಅಂತಾ ದುಕೂನು ಅಯಿಲೆ ... ಕೊಣಾಲೆ ಸಾಂಗ್ಚೆ ಮಿಗ್ಗೆಲೆ ಕಷ್ಠ ..!    ಶಕುಂತಲೆ ಲೆ  ದುಃಖ ಕೋಪಾರಿ  ಪರಿವರ್ತನ  ಝಲ್ಲೆ . ..ದೊಳೆ  ತಾಂಬ್ಡೆ   ಝಲ್ಲೆ ...  " ರಾಜಾ  ... ! ತೂವೆ  ರಹಸ್ಯ  ಜಾವ್ನು  ಮಿಗ್ಗೆಲೆ  ವೊಟ್ಟು  ಪ್ರಣಯ  ಕೇಳಿ  ಕೆಲ್ಲೆಲೆ  .... ಕೋಣಾಕಯಿ  ಕಳ್ನಾ  ಮೋಣು  ಲೆಕ್ಕು  ನಕ್ಕಾ  .. ಸರ್ವಾಂಗೆಲೆ  ಹೃದಯಾಂತು  ರಾಬ್ಬಿಲೊ   ಪರಮಾತ್ಮು    ಎಕ್ಲೊ  ಪೊಳೈತಾ  . ತಕ್ಕ  ತೂವೆ  ಮೋಸು  ಕೋರುಕ್  ಜಾಯ್ನಾ  . ತುಗ್ಗೆಲ್  ನಿಮಿತ್ಯ  ಜನ್ಮಾ  ಯೆವ್ಚ್ಯೇ  ಮಿಗ್ಗೆಲೆ  ಗರ್ಭಾ೦ತು  ಪುರು  ವಂಶ  ಕುಡಿ  ವಾಡ್ತಾ  ಅಸ್ಸ  .ಏಕ  ದಿವಸು  ... ಜನ್ಮಾ  ಯೆತ್ತಲೊ ...   ಮಿಗ್ಗೆಲೆ  ಪೂತು ..... ಪೊಳೈತಾ   ರಾಬ ...  ತೋ  ... ಹ್ಯೇ  ಭೂಮಂಡಲಾಕ  ಸಾರ್ವ  ಬ್ಹೌಮ   ಝತ್ತಲೋ  .. "

                             ಋಷಿ  ಮುನಿ  , ಗೌತಮಿ , ಲೋಕಾನಿ  .. " ರಾಜನ್  ..! ಶಕುಂತಲೆ ಕ ಗಾಂಧರ್ವ ವಿವಾಹ ಕೆಲ್ಲೆಲೆ ಉಡ್ಘಾಸು ಕರಿ ಏಕ ಪೋಟಿ .. ಧರ್ಮಾ ಕ ಸಮ್ಮ ಜಾವ್ನು ತೀ ತುಗ್ಗೆಲ್ ಸಹ ಧರ್ಮಿಣಿ . ಅಷ್ಶಿ ನಕಾರಾತ್ಮಕ ಜಾವ್ನು ಉಲ್ಲೋಚೆ ತುಕ್ಕಾ ಶೋಭಾ ದೀನಾ . ಇತ್ಲಿ ಹೊಡಿ ರಾಜ ಸಭೆ ಎದುರ ... ತುಗೆಲೆ ಕೌಟುಂಬಿಕ ವಿಷಯು ಸಾರ್ವಜನಿಕ ಜಾವ್ನು ಚರ್ಚೆ ಕೊರ್ಚೆ ಸಮ್ಮ ನಯೀ ... ತೀ ತುಗ್ಗೆಲ್ ಬಾಯ್ಲ್ ...ಸ್ವೀಕಾರ್ ಕರಿ ..ವೊಚ್ಚೊ ...! ರಾಜ ದಯಾ ದಕ್ಕೋನು .. ದಾಸಿ ಜಾವ್ನು ರಬ್ತಾಲಿ ಹಾಂಗಾ ...  ಸ್ಮರಣ ಶಕ್ತಿ ವಾಪಾಸ್ ಯೆತ್ತರಿ ...ದೇವಾಲೆ ದಯೇನ ತುಮ್ಮಿ ದೊಗ್ಗಯಿ ಸಂತೋಷಾರಿ ಆಸ್ತಾಲಿ೦ತಿ . " ಮೋಣು ಬುದ್ಧಿವಾದು ಸಾಂಗ್ಲೆ .ತಿಕ್ಕಾ ಸಭೆ೦ತು ಸೋಣು  ಚಮ್ಕಲೆ .                   

                      ಅತ್ತ  ... ಶಕುಂತಲೆ  ಅನಾಥ  ಝಲ್ಲಿ  ... ಅಸಹಾಯಕಿ  ಝಲ್ಲಿ  .... ಆವ್ಸುನಾ  ಪರಿತ್ಯಕ್ತ  ಕೆಲ್ಲೆಲಿ  ಚೆರ್ಡುಶೀ  ಝಲ್ಲಿ . ಶಕುಂತಲೆಕ , ಮತ್ತೆ ಘುವ್ವಳಿ ಯೇವ್ನು ನೆಲಾರಿ ಧೊಪ್ಪನಿ ಪೊಳ್ಳಿ .  ಅಂತರಿಕ್ಷೇ  ದುಕೂನು  ಮೇನಕೆ  ಸ್ವತಹಾ  ಆಯಿಲಿ  ... ಶಕುಂತಲೆ  ಕ  ಪೋಳೋನು  ಮಸ್ತ  ದುಃಖ  ಝಲ್ಲೆ  . ಮಿಗ್ಗೆಲೆ  ನಿಮಿತ್ಯ  ಚೆರ್ಡಾನಾ   ಕಷ್ಠ  ಪಾವ್ಕಾ  ಝಲ್ಲೆಮೂ ..  ಮೋಣು  ಸಂತಾಪು  ಝಲ್ಲೆ  . ಫೂಡೆ   ಕೆಲ್ಲೆಲೆ  ಪಾಪಾಕ   ಅತ್ತ  ಪುಣಿ  ಪರಿಹಾರ  ಝಾವ್ವೊ   ಮೋಣು   ಲೆಕ್ಲೆ  ..ಧೂವೆಲೆ  ಹಾತು  ಧೋರ್ನು  ಆಕಾಶ  ಮಾರ್ಗ  ಜಾವ್ನು  ಅಪ್ಪೋನು  ವೆಲ್ಲೆ.    . 

               ಏಕು  ದಿವಸು  .. ಸೈನಿಕಾನ  ಎಕ್ಲೊ  ಮಚುವಾರಾಕ  ಧೋರ್ನು  ರಾಯಾಲೆ  ಅಸ್ಥಾನಾಂತು  ರಬ್ಬಯ್ಯಲೇ   . ರಾಜ  ಮುದ್ರಾ  ಅಷ್ಶಿಲಿ  ಮುದ್ದಿ  ತಾಣೆ  ಚೋರ್ಲಾ  ಮೋಣು  ತಗೆಲೆ  ವೈರಿ  ಆಪಾದನಾ  . ಝಲ್ಲೆರಿ  ತ್ಯೋ  .. ವಿಂಗಡ  ಕಾಣಿ  ಸಾಂಗ್ತಾಶಿಲೊ   " ಪ್ರಭೂ ... ! ಹಾಂವೆ  ಬಲೆ  ಉಡೋನು  ಧರ್ಲೆಲೆ  ಝಳ್ಕೆ  ಪೊಟ್ಟಾ೦ತು   ಮೆಳ್ಳೆಲಿ  ಮುದ್ದಿ  ಹೀ  ...ಧುರ್ಬಳೋ  ಹಾಂವ  ... ಹಾಂವ  ನಿರಪರಾಧಿ ಪ್ರಭು ..." ದೋಣಿರಿ  ಬೈಸುನು   ಪ್ರಯಾಣ  ಕರ್ತಾನಾ  ಶಕುಂತಲೆನ  ಹಾತು  ಉತ್ಕಾಂತು ಮನ ಖುಶ್ಯೆರಿ  ಘಾಲ್ಲೆಲೆ  . ಗ್ರಹಚಾರ  ನಿಮಿತ್ಯ  ಮುದ್ದಿ  ನಿಸೋರ್ನು  ಉತ್ಕಾಂತು  ಪೊಳ್ಳಿ  . ತ್ಯೆ  ..ಏಕ ಝಳ್ಕೆನ್  ಗಿಳ್ಳಿ   . ಹ್ಯೆಚಿ ಝಳ್ಕೆ  ಮಚುವಾರಲೆ   ಬಲೇ   ಪೋಣು ಹಕ್ಕಾ ಮೆಳ್ಳಾ  . ದುಷ್ಯಂತಾಕ  ಮುದ್ದಿ  ಪೊಳೈಲೇ   ಸತಾನ  ಶಕುಂತಲೆ  ಉಡ್ಘಾಸು   ಅಯಿಲೊ  . ದೂರ್ವಾಸಾಲೆ  ಶ್ರಾಪು  ... ಅತ್ತ  ವಿಮೋಚನ  ಝಲ್ಲೆ  . ಶಕುಂತಲೆಕ  ಕೆಲ್ಲೆಲೆ  ಅಪಮಾನು  ಉಡ್ಘಾಸು  ಅಯಿಲೊ ..ವಿಷಾ  ಬಾಣು   ಹರ್ದೆರಿ  ಲಾಗ್ಲೆ  ಮ್ಹಣ್ಕೆ  ಅನುಭವು  ಝಲ್ಲೋ  ...ಹಜಾರ  ಪಂಕ್ತಾ   'ಶಕುಂತಲೆ ' ... ನಾವ  ಉಚ್ಚಾರು  ಕೆಲ್ಲೊ  ..ಪಶ್ಚಾತ್ತಾಪು  ಜಾವ್ನು  ಕರ್ಗುನು  ಗೆಲ್ಲೊ  .. ರಾಜ್ಯ  ಭಾರ  ಕಾಮ  ದುಕುನು  ದೂರ  ರಾಬ್ಲೊ  ... ಖಂಚೆಯೀ  ಕಾಮಾಂತು  ಮನ  ಸ್ಥಿರ  ರಬ್ಬನಾ  ... ವಾಪಸ್  ಕಣ್ವ  ಆಶ್ರಮ  ದಿಕಾನ  ಅಯಿಲೊ  ... ಶಕುಂತಲೆ  ಖತಿರಿ  ರುಕ್ - ರುಕ್ಕಾಲೇ  , ಪ್ರತಿ  ಏಕ  ಝಡ್ಕುಟಾಲೆ    ,ವಾಲಿ  , ಪಶು  ಪಕ್ಷಿ  ಲಗ್ಗಿ  ಕ್ಷಮಾಪಣ  ಮಾಗಲಿ  . ' ಯೇಕ ಪಂಕ್ತಾ  ಶಕುಂತಲೆ  ಕ  ಪೋಳೋನು  ಕ್ಷಮಾ  ನಿಮಗಿತಾ .... ಯೆಕು  ಪೋಟಿ  ದಕ್ಕಯಾ  ' ಮೋಣು  ಪ್ರಲಾಪನ  ಕೆಲ್ಲೆ  ... ಶಕುಂತಲೆ  ವಿರಹ .. ಆಂಗ ಭರಿ   ಉಜ್ಜೋಶೀ  ಜೊಳೂ೦ಕ   ಶುರು  ಝಲ್ಲೆ  . 'ಬಹುಶ  ಹಾಂವೆ  ಕೆಲ್ಲೆಲೆ  ಪುಣ್ಯ  ಸೋರ್ನ್ನು  ಅಸ್ಸುಕಾ  ... ಮಲಘಡೇನ    ದಿಲ್ಲೆಲಿ  ಆಶೀರ್ವಾದು  ಸೋರ್ನ್ನು  ಅಸ್ಸುಕಾ  ... ತಾಷ್ಶಿ  ಜಾವ್ನು  ಅಸಲಿ  ಬುದ್ಧಿ  ಆಯಿಲಿ  ... ಅಯ್ಯೋ  ... ! ಕಸಲೆಕ  ಹಾಂವೆ  ಅಪಮಾನು  ಕೆಲ್ಲೆ   .... ? ಚನ್ನಿನೆ  ರಾತ್ರಿ  ...ಫಲ  ಪುಷ್ಪ  ಭರಿತ  ಉದ್ಯಾನ  ... ಮಿಂಚಾ  ವೊಟ್ಟು  ಅಯಿಲೆ   ಕಾಳೆ  ಮೋಡ  ... ಥಂಡ  ಶೀತಲ  ವಾರೆ  ... ಶಕುಂತಲೆ  ಉಡ್ಘಾಸು   ಅನಿಕಾಯಿ  ಚಡ  ಕರ್ತಾಶಿಲೆ    .. ಹೃದಯ  ವೇದನಾ  ... ಮನಾ  ಅಶಾಂತಿ  ... ಖಾವ್ಚ್ಯಾ  , ಜೇವ್ಚ್ಯೇ ..  ನಕ್ಕಾ  ಝಲ್ಲೆ  . ಶಕುಂತಲೆ  ಚಿಂತಾ೦ತು   ರಾಯು ಕೃಶ .. ಕ್ಷೀಣಿತ  ಝಲ್ಲೋ  . 

                       ಸ್ವಲ್ಪ ಕಾಲಾ ನಂತರ  , ದೇವೇಂದ್ರ  ಸಾರಥಿ  'ಮಾತಲಿ  ' ದುಷ್ಯಂತ  ಸಭೆಕ  ಅಯಿಲೊ  .  ' ದೇವ  - ರಕ್ಕಸ  ಮಧ್ಯೆ  ಯುದ್ಧಾಕ  ದುಷ್ಯಂತ  ರಾಯಾಲೆ   ಸಮರ್ಥನ  ಜಾವ್ಕಾ  ಮೋಣು  ದೇವೇಂದ್ರಾನ   ಸಂಘುನು  ದೀವ್ನು  ಪೆಟಯಿಲಾ ' ಮೋಣು ದೇವ ರಾಯಸ ದಿಲ್ಲೆ . ದೇವೇ0ದ್ರಾಲೇ  ಆಮಂತ್ರಣಕ ಸಹಮತಿ ದೀವ್ನು  ದುಶ್ಯಂತು  ಮಾತಲಿ  ವೊಟ್ಟು  ದೇವಲೋಕಾಕ  ಪ್ರಯಾಣ  ಶುರು  ಕೆಲ್ಲೆ  . ದೇವ  ದಾನವ  ಯುದ್ಧ  ಘಾನಾ  ಘೋರ  ಜಾವ್ನು ....   ದೇವೇಂದ್ರಾಕ  , ದುಷ್ಯಂತಾ  ನಿಮಿತ್ಯ  .. ವಿಜಯ ಪ್ರಾಪ್ತ   ಝಲ್ಲೆ  . ದೇವಲೋಕಾ  ದುಕುನು  ವಾಪಸ್  ಯೆತ್ತಾನಾ  ಕಿಂಪುರುಷ  ಲೋಕಾಲೆ  ಆವಾಸ  ಸ್ಥಾನ  ಹೇಮಕೂಟ  ಪರ್ವತ  ಶ್ರೇಣಿ  ಪೊಳೈಲೇ   . ಮಾರೀಚ  ಮುನಿ  ಹಾಂಗಾ  ಆಶ್ರಮ ಬಂದುನು   ರಬಲಾ  ಮೋಣು   ಮಾತಲಿನ  ಸಾಂಗ್ತರಿ  .. ದುಶ್ಯಂತು  ತಕ್ಕ  ಪೋಳೋಚ್ಯಾ   ಮೋಣು  ತಗೆಲೆ  ಆಶ್ರಮಾ  ಅಯಿಲೊ  . ಥಂಯ್  ತಕ್ಕಾ , ಏಕ  ಆಶ್ಚರ್ಯ  ರಕ್ಕುನು  ಅಷ್ಶಿಲೆ . ಆಶ್ರಮಾ  ಭಾಯಿರಿ  ಎಕ್ಲೊ  ಬಾಲಕು  ಸಿಂಹ  ಪಿಲ್ಲಾ೦ಕ   ತಾಜ್ಜೆ  ಆವ್ಸುಲೆ   ದುಕುನು  ತಂಡೂನು  ಹಾಣು  ಖೆಳ್ತಾಶಿಲೊ   . ರಾಯಾಲೆ   ಮನ  ಸಹಜ  ಜಾವ್ನು  ಸಾನ  ಚೆರ್ಡಾ   ದಿಕಾನ  ಗೆಲ್ಲೆ  . ಥಂಯ್  ಆಯ್ಯಿಲೆ  ಆಶ್ರಮ  ನಿವಾಸಿ೦ಕ್  ರಾಯಕ  ಅನಿ  ಬಾಲಕಾ  ಮಧ್ಯೆ  ಯೆಕ್ಕ  ಸಾರ್ಕೆ  ಅಶ್ಚ್ಯೇ  ಪೋಳೋನು  ಆಶ್ಚರ್ಯ  ಝಲ್ಲೆ  . ವಿಚಾರಣ   ಕರ್ತಾನಾ  ಕಳ್ಳೆ  ರಾಯಾಕ .... "ತ್ಯೋ  ಬಾಲಕು  'ಸರ್ವದಮನ  ' . ಹಾಗೇಲಿ  ಅಮ್ಮ  ಬಮ್ಮಣಾ   ನಿಮಿತ್ಯ  ಪರಿತ್ಯಕ್ತ  ಝಲ್ಲೆಲಿ ... ಅಪ್ಸರ  ಸ್ರೀಲೇ  ಧೂವ ,  ಹ್ಯೇ  ತಪೋವನಾಂತು  ಜನ್ಮ  ದಿಲ್ಲೊಲೊ  .. ಬಾಲಕು  ಪುರು  ವಂಶಾ  ಚ್ಯೋ " . ಬಾಲಕಾನ  ಬಂಧಿಲೇ  ತಾಯಿತ  ದೊರಿ  ಸಕಲ  ಪೊಳ್ಳಿ  . ರಾಯಾನ   ಹತ್ತಾ  ಘೇವ್ನು  ವಾಪಸ್  ಚೆರ್ಡಾಲೆ    ಹತ್ತಾಕ  ಬಂಧಿಲೇ  . ಹ್ಯೇ  ಪೋಳೋನು  .. ಆಶ್ರಮ  ವಾಸಿ  ಸಾಂಗ್ತಾತಿ .  " ಹ್ಯೇ  ಸಾಧಾರಣ  ತಾಯಿತ  ನಯ್   .. ಆನು  , ಅಮ್ಮಾಕ  ಸೋಣು  ವಿಂಗಡ  ಕೊಣಯಿ ಹಾತ್ತಾ೦ತು   ಘೆತ್ಲೆರಿ ...   ತಾಯಿತ  , ಸರೋಪು  ಜಾವ್ನು  ಚಾಬ್ತಾ  " ಹಾಂವ್  ತ್ಯೆ  ಚೆರ್ಡಾಲೆ    ಬಪ್ಪುಸು  ಮೋಣು  ಮನಾಂತು  ಅನುಭೂತಿ  ಝತ್ತ  . " ತಶಿ  ಝಲ್ಲೆರಿ  ಹ್ಯೇ  ಚೆರ್ಡಾಲೆ   ಆವ್ಸೂಕ  ಏಕ  ಪೋಟಿ  ದಾಕ್ಕಯಾ" ಮೋಣು  ವಿನಂತಿ  ಕರ್ತಾ  . ಬಾಲಕಾ  ಘೇವ್ನು  ಆವ್ಸೂನ   ಅಷ್ಶಿಲೆ  ಜಾಗೇರಿ  ವತ್ತಾತಿ  . ಯೆದುರ   ಅಷ್ಶಿಲಿ  ತಿ   .... ಶಕುಂತಲೆ  .. !!   ದುಷ್ಯಂತಾಕ  ಮಸ್ತ  ಸಂತೋಷು  ಝತ್ತಾ  . ಶಕುಂತಲೆ  ಹಾತು  ಧೋರ್ನು  ಕ್ಷಮಾಪಣ  ಮಾಗ್ತಾ  . ಕಸಲೆಕೀ  ಗ್ರಹಚಾರ  ನಿಮಿತ್ಯ ...  ಹಾಂವೆ  ಕೆಲ್ಲೆಲೆ  ಚೂಕಿ ...  ನಿಮಿತ್ಯ  ಅಮ್ಮಿ  ವಿಂಗಡ  ಝಲ್ಲಿಂತಿ   .. ದೇವಾಲಿ  ದಯಾ  , ಕೃಪಾ  ಅಶಿಲೆ   ನಿಮಿತ್ಯ  ಅಮ್ಮಿ  ವಾಪಾಸ್  ವೊಟ್ಟು  ಝಲ್ಲೆ  ಮೋಣು ಲೆಕ್ಕುಯಾ ... ಶಕುಂತಲೆಕ  ದೊಳೆ ಭೋರ್ನು ಅಯಿಲೆ .   

             ಮಾರೀಚ  , ಅನಿ  ತಗೆಲೆ  ಬಾಯ್ಲ್  'ಅದಿತಿ ' ತಾಂಗೆಲೆ  ಅಶೀರ್ವಾದು  ಘೇವ್ನು  ದುಶ್ಯಂತು  ಶಕುಂತಲೆ  ಅನಿ  ಬಾಲಕು  ಸರ್ವದಮನಾಕ  ಘೇವ್ನು  ಹಸ್ತಿನಾವತಿಕ  ಪ್ರಯಾಣ  ಕರ್ತಾ  . ಮುಕಾರಿ  ಸರ್ವದಮನ  ಅಷ್ಶಿಲೋ  'ಭರತ   ಚಕ್ರವರ್ತಿ ' ಝತ್ತ  . ಸಾರ್ವ  ಬ್ಹೌಮ   ಭಾರತ  ಏಕ  ವಂಶಾಕ  ಕಾರಣ  ಝತ್ತಾ  ... ದುಷ್ಯಂತ  ಶಕುಂತಲೆ  ಪ್ರೀತಿ  , ಪ್ರೇಮಾ  ಚ್ಯೆ  ಕಾಣಿ  ಅಮರ  ಝತ್ತಾ 

ಉಮಾಪತಿ  

Beautiful Art  : RAJA RAVI VARMA