MAHABHARATH Part
- 80 ( Konkani Bhashentu )
DWAPARA YUGA SAMAAPTA / ದ್ವಾಪರ ಯುಗ ಸಮಾಪ್ತ
ಶ್ರೀ ಕೃಷ್ಣಾ ನ ಬೋರಾಯಿಲೆ ರಾಯಸ ಮೆಳ್ಳೆ ಸತಾನ ... ಅರ್ಜುನ್ ರಥಾರಿ ಚೋಣು ದ್ವಾರಕೆ ದಿಕಾನ ಭಾರ್ಸರ್ಲೊ . ಅರ್ಜುನನ ಯೇವ್ಕಾ ಜಲ್ಲೇರಿಚಿ ... ಅರ್ಧ ದ್ವಾರಕೆ ಧ್ವ೦ಸ ಝಲ್ಲಾ . ವಸುದೇವು ದೇವಕಿ ಅರ್ಜುನಾಕ ಪೊಳಯಿಲೆ ಸತಾನ ದೊಳೆ ಉದ್ದಾಕ ಕಾಣು ರೊಡುಂಕ ಶುರು ಕೆಲ್ಲೆ " ಅರ್ಜುನಾ .. ! ತೂ೦ವೆ ಆತ ಯೆವ್ಚೆವೇ .. ? ಸರ್ವ ನಾಶ ಜಾವ್ನು ಗೆಲ್ಲೆ ... ಆಮ್ಗೆಲೆ ನಾತ್ರ೦ , ಪೊ೦ಣ್ತ್ರ ಕೊಣಾಯ್ ವರ್ನಿ೦ತಿ . ಸರ್ವ ಮೋರ್ನ್ ಸ್ವರ್ಘಾಕ ಗೆಲ್ಲಿ೦ತಿ ... ಮಕ್ಕಾ ಅನಿಕಯ್ ಮರಣ ಏನಿ . ಹಾಂಗಾ ಜಾವ್ಚೆ ಘೋರ ನಾಶ ಪೋಳೋಚೆ ಖತಿರಿ ಅಮ್ಮಿ ಅನಿಕಯ್ ಜೀವಂತಿ ಆಸ್ಸತಿ ದಿಸ್ತಾ ... " ಮೋಣು ಸಂಘುನ್ ಅರ್ಜುನಾಕ ಪೋಟೋನ್ ಧೋರ್ನ್ ರಳ್ಳೋ . " ಮಾಮಾ ... ! ಕೃಷ್ಣು ಖಂಯ್ಯ್ ಅಸ್ಸ .. ? " ನಿಂಮ್ಗಿಲೆ ಅರ್ಜುನಾನ . ವಸುದೇವಾನ ಉತ್ತರ ದೀನಿ ... ಆನ್ನೇಕ ಪೋಟಿ ನಿಂಮ್ ಗಿಲೆ ... " ಅಮ್ಗೆಲೆ ಕೃಷ್ಣು ಖಂಯ್ಯ್ ಅಸ್ಸ ಮಾಮಾ .. ? " ... " ಆನಿ ಖಂಯ್ಯ್ ಕೃಷ್ಣು .... ! ಆನಿ ಖಂಯ್ಯ್ ಬಲರಾಮು ... ! ಸರ್ವ ಲೋಕು ಅಂಮ್ಕಾ ಸೋಣು ಗೆಲ್ಲೆ .. ತೂ೦ವೇ ಯೆವ್ಚೆ ವಾಟ ಪೋಳೋಚ್ಯೆ ಖತಿರಿ ಹಾಂವ ಜೀವು ದೊವೋರ್ನ್ ಘೆವ್ನ್ ಅಸ್ಸ . ಅರ್ಜುನಾ .. ! ಹ೦ಗಾ ಅಷ್ಶಿಲೆ ಬಾಯ್ಲ್ ಮನ್ಶ್ಯ೦ಕ ಜಾಗ್ರತೆ ಕೊರ್ನ್ ರಕ್ಷಣ ದಿವ್ಚೆ ಭಾರ ತುಗೆಲೆ ... ದ್ವಾರಕೆ .. ಸಮುದ್ರಾ೦ತು ಬುಡ್ಚೆ ವೇಳು ಲಗ್ಗಿ ಯೆತ್ತಾ ಅಸ್ಸ ... ಜಾಗ್ರತೆ .. ಜಾಗ್ರತೆ .. " ಮೋಣು ಸಾಂಗ್ತಾಚಿ ವಸುದೇವಾನ ನೆಲಾರಿ ಫೋಣು ಅಕಾಸ್ಮಾತ್ ಜೀವು ಸೊಳ್ಳೋ . ವಸುದೇವಾಲೊ ಜೀವ ಪಕ್ಷಿ ಉಬ್ಬುನ್ ಗೆಲ್ಲಿ ... " ಅಯ್ಯೋ ಧುರ್ವಿಧಿ ಕೀ ... ! ಕೃಷ್ಣಾ .. ! ಕೃಷ್ಣಾ .. ! ತೂ ಖಂಯ್ಯ್ ಮೆಳ್ತಾಲೊ ... ?"
ರುಕ್ಮಿಣಿ ಲಗ್ಗಿ ಯೇವ್ನ್ .. " ಅಣ್ಣಾ .. ! ತೂ೦ವೆ ಅಷ್ಶಿ ದುಃಖ ಪಾವ್ನ್ , ಮನಾ ಶಾಂತಿ ಕಾಣ್ ಘೆತ್ಲೆರಿ ... ಅಂಮ್ಕಾ ಅನಿ ಕೋಣ ಪೊಳೈತಲೆ .. ? ಅಣ್ಣಾ ಧೈರ್ಯ ಘೇ .. ಮಿಗೆಲೆ ಸ್ವಾಮೀ ಕ ತುಗೆಲೆ ವೈರಿ .. ಇತ್ಲೆ ಪ್ರೀತಿ ... ಮಾತ್ರ ನಯ್ ತುಗೆಲೆ ವೈರಿ ತಾಂಕಾ ಇತ್ಲೆ ವಿಶ್ವಾಸು ... ತಶಿ ಜಾವ್ನ್ ಅಂಮ್ಕಾ ಸರ್ವಾಂಕ ತುಗೆಲೆ ರಕ್ಷಣೆ ಕ ಸಂಘುನ್ ಗೆಲ್ಲಿಂತಿ . ದ್ವಾರಕೇ೦ತು .. ಯಾದವ ಕುಲ ಗುರು ಗರ್ಗಾಚಾರ್ಯ ಆಸ್ಸತಿ . ತಾಂಗೆಲೆ ಸಹಾಯು ಘೇವ್ನ್ .. ಮಿಗೆಲೆ ಸ್ವಾಮಿಲೆ ಪಾರ್ಥಿವ ಶರೀರ ಹಾಂಗಾ ಹಾಡೋಕಾ .. ಹ್ಯೇ ಆ೦ಮ್ಗೆಲೆ ಸರ್ವಾಲಿ ಇಚ್ಚಾ .. " ದೊಳೆ ಉದ್ದಾಕ ಕಾಣು ಅರ್ಜುನಾಕ ನಮಸ್ಕಾರ್ ಕೆಲ್ಲೆ .
ಗರ್ಗಾಚಾರ್ಯಾಕ ಘೇವ್ನ್ .. ಅರ್ಜುನ್ ... ಪ್ರಭಾಸ್ ತೀರ್ಥಾಕ ಯೇವ್ನು ಪಾವಲೋ . ಕಸಲೆ ಪೋಳೋಚ್ಯೆ .. ! ರಾಶಿ ರಾಶಿ ಮೃತ ದೇಹ .. ! ಯುವಕ , ಯುವತಿ , ಆಬಾಲಾ , ವೃದ್ಧ , ಗೋಪ ಗೋಪಿ ಯಾದವ ಪ್ರಜಾ ಲೋಕ .. ಸೈನಿಕ , ಪಶು ಪ್ರಾಣಿ ...ಮೋರ್ನ್ ಪೊಳ್ಳೀ೦ತಿ . ಜೀವಂತಿ ಅಶಿಲೆ ಎಕ್ಲೇಯ್ ಅರ್ಜುನಾಲೆ ದೊಳೇಕ ಪೋಣಿ .. . ಕೃಷ್ಣಾಲೆ ಖತಿರಿ ಸೊದ್ದಿಲೆ ... ಕೃಷ್ಣಾ ... ! ದೇವಾದಿ ದೇವಾ .. ಪುರುಷೋತ್ತಮಾ .. ! ತುಕ್ಕಾ ಹಾಂವ ಖಂಯ್ ಸೊದ್ದಿತಾಲೊ .. ? ಗೆಲ್ಲೆಲೆ ತಿತ್ಲೆ ದೂರ ದೂರ ಮೃತ ಶರೀರ ರಾಶಿ ರಾಶಿ .. " ಶಿವ ಶಿವಾ .. ! " ಅರ್ಜುನಾಕ ದೊಳೆ ಕಾಳೋಕು ಆಯಿಲೊ .. " ದೀನ ಬಾಂಧವಾ .. ! ಅನಂತಾ .. ! ಅಚ್ಚುತಾ .. ! ಪರಂಧಾಮಾ ... ! ಕೃಷ್ಣಾ .. ! ತೂ ಖಂಯ್ಯ್ ಅಸ್ಸ .. ? ತೂ ಖಂಯ್ಯ್ ಮೆಳ್ತಾಲೊ .. ? ಮಕ್ಕಾ ಅನಾಥ ಕೊರ್ನ್ .. ತು ಎಕ್ಲೋಚಿ ಪರ ಲೋಕಾ ವೊಚ್ಚೆ ಸ೦ಮ್ಮ ವೇ .. ? ಹೇ ನ್ಯಾಯ ವೇ .. ಧರ್ಮ ವೇ .. ? ಪ್ರಿಯ ಕೃಷ್ಣಾ ತೂ ಅಷ್ಶಿ ಕಸಲೆಕ ಕೆಲ್ಲೆ .. ? ಏಕ ಪೋಟಿ ಮಕ್ಕಾ ಮೇಳ .. ! " ಅರ್ಜುನಾಲೆ ಮನಾಂತು ಉದ್ವೇಗ ಝಲ್ಲೊ . ಪುಣ್ಯಾನ ... ಎಕ್ಲೊ ರನ್ನಾ೦ತುಲೊ ಕಿರಾತು ಯೇವ್ನ್ ... ಕೃಷ್ಣಾ ನ ನಿದ್ದೋನ್ ಅಷ್ಶಿಲೆ ಜಾಗೊ ಸಂಘಲೆ . ತಗೆಲೆ ಸಹಾಯು ಘೇವ್ನ್ .. ಕೃಷ್ಣಾಲೆ ಪಾರ್ಥಿವ ಶರೀರ ಅಷ್ಶಿಲೆ ಜಾಗೇರಿ ಯೇವ್ನ್ ಪಾವಲೊ .
ಭಾರಥಾ ಕಥಾ ಪುರುಷು , ಕಿರು ಹಾಸಾ ಮೋಹನ ಮೂರ್ತಿ , ಶ್ರ೦ಗಾರಾ ಕಾಣಿಯೇ ಮಹಾ ನಾಯಕು , ದೇವಾದಿ ದೇವು , ನಿರ್ವಿಕಾರ , ನಿರಾಮಯ , ನಿತ್ಯಾನಂದ , ಚಿನ್ಮಯ ಮೂರ್ತಿ , ಧರ್ಮ ರಕ್ಷಕ , ಯೋಗೀಶ್ವರ , ಪುರಾಣ ಪುರುಷ .... , ನೀದ ಕಾಡ್ಚೆ ಕೃಷ್ಣಾ ಕ , ಪೊಳೈಲೆ ಅರ್ಜುನಾನ . ಕುರುಕ್ಷೇತ್ರ ಯುದ್ಧ ರಂಗಾಂತು .. ವಿರಾಟ ರೂಪ ದಕ್ಕಯಿಲೆ ಕೃಷ್ಣು ಖಂಯಿ ... ! ಅತ್ತ ರುಕ್ ಮುಳಾಂತು ನಿಶ್ಚೇತ ಗೋಪ ನಂದನು ಖಂಯ್ಯ್ ... ! ಆಶ್ಚರ್ಯ ಝಲ್ಲೆ .. ಅಪ್ಪಣಿತ್ಯಾಕ ದೋಳೆ ಭೋರ್ನ್ ಅಯಿಲೆ ... ಹೃದಯ ಕಂಪನ ಝಲ್ಲೆ ... ಹೃದಯ , ಅಂತ ಘಲ್-ಗಲೆ೦ತಿ ... " ಕೃಷ್ಣಾ .. ! " ಮೋಣು ಪಾರ್ಥಿವ ಶರೀರಾ ಕ ಧೋರ್ನ್ ಗೊಳೋ ಮೋಣು ರಳ್ಳೋ ... ಅರ್ಜುನು . " ಪಾಂಡವ ಬಂಧು , ಮಿಗೆಲೆ ಗುರು , ಮಿತ್ರ , ಮಿಗೆಲೆ ಪ್ರಾಣ ಸಖ ... ಮಕ್ಕಾ ಸೋಣು ಗೆಲ್ಲೊವೇ ಪರಂಧಾಮಾ .. ? " ಅನೇಕ ರೀತ್ಯೇರಿ ಶೋಕ ಪ್ರಲಾಪ ಕೆಲ್ಲೆ ಅರ್ಜುನಾನ . ಸುತ್ತು ರಬ್ಬಿಲೆ ಜನ .. ಹೇ ದೃಶ್ಯ ಪೊಳೊನ್ ಅನಾಥಾ ಮ್ಹಣ್ಕೆ ದುಃಖ ಜಾವ್ನ್ ರಳ್ಳಿ೦ತಿ . ಕೃಷ್ಣಾಲೆ ಅನಿ ಬಲರಾಮಾಲೆ ಪಾರ್ಥಿವ ಶರೀರ , ಗರ್ಗಾಚಾರ್ಯಾಲೆ ಸಹಾಯು ಘೇವ್ನ್ ದ್ವಾರಕೆ ಕ ಹಳ್ಳೆ ... ಪುರ ಸ್ತ್ರೀ ಲೋಕು , ಕೃಷ್ಣಾ ಲೇ ಆಖೇರಿ ದರ್ಶನ ಕೊರ್ಚ್ಯಾಕ ರಾಜಾಂಗಣಾ ಕ ಅಯಿಲೀ೦ತಿ .. ಪುಷ್ಪ ಗುಚ್ಛ .. ಪುಷ್ಪ ಮಾಳಾ ಅರ್ಪಣ ಕೊರ್ನ್ ತಾ೦ಗ್ ತಾಂಗೇಲೆ ದುಃಖ ಮನಸ್ಪೂರ್ತಿ ವ್ಯಕ್ತ ಕೆಲ್ಲೆ . ಸಗಳೆ ದ್ವಾರಕೆ ದುಃಖ ರೋಧನ, ಆಕಾಶಾ ಅಂಚಾ ತಾಂಯ್ಯ್ ಪಾವ್ಲೆ . ವಾಯು ತಟಸ್ಥ್ ಝಲ್ಲೊ .. ಉಬ್ಚೆ ಪಕ್ಷಿ ವೃಂದ ತಟಸ್ಥ ಝಲ್ಲೆ .. ಕೃಷ್ಣಾ ಲೆ ಪ್ರೀತೀ ಚೆ ಗೊರವಂ ' ಅಂಬಾ ' ಮೋಣು ಅಕಾಶು ಪೊಳೋನ್ ರೋಡ್ಚ್ಯಾ ಲಾಗ್ಲಿ೦ತಿ . ಬಾಯ್ಲ್ಯಾ ಮನ್ಶ್ಯಾ೦ಗೆಲೆ ರೋಧನ ದ್ವಾರಕೆ೦ತು ಪ್ರತಿಧ್ವನಿತ ಝಲ್ಲೆ .. ! ಕೆದನಾಯ್ ಚಿರು ಹಾಸಾನಿ ಸುಖ ದಿತ್ತಲೊ ಮುರಾರಿ ... ಆಜಿಯೀ , ತಶೀ೦ಚಿ ಹಾಸನ್ ಮುಖಿ ಜಾವ್ನ್ ಅಸ್ಸ . ಕಿತ್ಲೆ ಕೀ ಮಹಿಮಾ ಪವಾಡ ದಕ್ಕಯಿಲೊ ನಾರಾಯಣ ಸ್ವರೂಪ ಕೃಷ್ಣು ಮರಣ ಪಾವಲೋ ಮೋಣು ಸಂಘುಯೇತವೇ .. ? ದೇವಾಕಯಿ ಮರಣ ಅಸ್ಸವೇ .. ? ಜನನ ಮೋಣು ಅಸ್ಲೆ ನಂತರ ' ಮರಣ ' ಮ್ಹಳ್ಳೆಲೆ ಸ್ರಷ್ಟಿ೦ತು ಅಸ್ಸುಕಾಚಿ .. ಹೇ ವಿಧಿ ನಿಯಮ . ಕೊಣಾಕಯ್ ಚುಕ್ಕೋಚ್ಯಾ ಸಾಧ್ಯ ನಾ . ಮರಣ ಪಾವ್ವಿಲೆ ಪ್ರತೀ ಆತ್ಮ .. ವಾಪಾಸ್ ಜನ್ಮಾಕ ಯೇವ್ಕಾಚಿ . ಹ್ಯೇ ದೈವೀಕ ನಿಯಮ . ತಶಿ ಕೃಷ್ಣಾನ ಇಹ ಶರೀರ ಸೊಳ್ಳಾ .
ಅರ್ಜುನಾನ ಕೃಷ್ಣ , ಬಲರಾಮಾಲೆ ಪಾರ್ಥಿವ ಶರೀರ ಚಿತೆರಿ ದೊವೊರ್ನ್ ಅಗ್ನಿ ಸ್ಪರ್ಶ ಕೆಲ್ಲೆ .... ಕೃಷ್ಣಾಲೆ ಆದೇಶಾ ಪ್ರಕಾರ , ಗರ್ಗಾಚಾರ್ಯಾ ಸಮೇತ ದ್ವಾರಕೇ೦ತು ಅಶಿಲೆ ಸ್ತ್ರೀ ಆಬಾಲ ವೃದ್ಧ ಲೋಕಾಂಕ ಘೇವ್ನ್ ಹಸ್ತಿನಾವತಿ ದಿಕಾನ ಭಾರ್ಸರ್ಲೊ . ಸರ್ವಾಂಕ ಗೊತ್ತಶಿಲೆ .. ದ್ವಾರಕೆ ಹೇರದಿವಸು ಬುಡ್ತಾ ಮೋಣು . ಹತ್ತಾ೦ತು ಕಿತ್ಲೆ ಧೊರುಂಕ ಸಾಧ್ಯ ಅಸ್ಸ ಕೀ ತಿತ್ಲೆ .. ಮತ್ತೇರಿ ಕಿತ್ಲೆ ಹೊಂವ್ಚ್ಯಾ ಸಾಧ್ಯ ಅಸ್ಸ ಕೀ ತಿತ್ಲೆ .. ಘೇವ್ನು ಅರ್ಜುನಾಲೆ ಮಾಕ್ಷಿ ಭಾರಸರ್ಲಿಂತಿ . ರಾತೋ ರಾತ್ರಿ ದ್ವಾರಕೆ ಸೀಮಾ ದುಕೂನ್ ಭಾಯಿರಿ ಪೊಳ್ಳಿ೦ತಿ . ಸ್ವಲ್ಪ ವೇಳೇನ ಚಂಡ ಪ್ರಚಂಡ ವ್ಹಾರೆ ಶುರು ಝಲ್ಲೆ . ಕಾರ್ಮೋಡ ಆಕಾಶಾರಿ ವೊಟ್ಟು ಝಲ್ಲೆ ... ಗುಡುಗು ಮಿಂಚು ಚಟ್ - ಸಟಾರಿ ನೆಲಾರಿ ಪೊಳ್ಳೆ .. ಸಮುದ್ರಾ ಪಾಳ೦ ಆಕಾಶಾ ದಿಕಾನ ಉಬ್ಬು೦ಕ ಶುರು ಝಲ್ಲೆ ... ಪ್ರಚಂಡ ವ್ಹಾರೆ ಪಾಳಾ೦ಕ ಘೇವ್ನ್ ದ್ವಾರಕೆ ನಗರಾ ಭಿತರಿ ಪ್ರವೇಶು ಕೆಲ್ಲೆ .. ಭೂ ಕಂಪನ ಝಲ್ಲಿ .. ದ್ವಾರಕೆ ನಗರಾ ಘರ್ ವಂದ , ಮಹಲ್ , ಬುರುಜ , ರಾಜ ಮಹಲ ಗಡ್ - ಗಡಾನ್ ನೆಲ ಸಮ ಝಲ್ಲೆ .ಪೊಳೈತಾ ಪೊಳೈತಾ .. ಸಮುದ್ರಾ ಉದ್ದಾಕ ದ್ವಾರಕಾವತಿ ನಗರಾಕ ಪೂರ್ತಿ ಬುಡ್ಡೋನ್ ಘಲ್ಲೆ ..! ಕೃಷ್ಣಾಲಿ ಭೂ ವೈಕುಂಠ .. ಚಂದ ದ್ವಾರಕಾವತಿ ಸಮುದ್ರಾ೦ತು ಮೇಳ್ನ್ ಗೆಲ್ಲಿ .. ! ಅರ್ಜುನಾನ ಬುಡ್ಚೆ ದ್ವಾರಕೆಕ ನಮನ ಕೆಲ್ಲೆ . ದ್ವಾರಕೆ ವೊಟ್ಟು ಕೃಷ್ಣಾವತಾರ ಸಮಾಪ್ತ ಝಲ್ಲೆ .
ಯಾದವ ಸ್ತ್ರೀ ಲೋಕಾಂಕ ಘೇವ್ನ್ ಅರ್ಜುನಾನ ಹಸ್ತಿನಾವತಿ ದಿಕಾನ ಪ್ರಯಾಣ ಮುಕಾರ್ಶಿಲೆ . ರಾತ್ರಿ ವೇಳು ರನ್ನಾ೦ತು ಚ೦ಮ್ಕೂನ್ ಪ್ರಯಾಣ ಕೊರ್ನ್ , ಮಸ್ತ್ ದಣ್ವಲೀ೦ತಿ . ಲೋಕು ಆಯಾಸು ಪರಿಹಾರ್ ಕೊರುಂಕ ರಾತ್ರಿ ಪಳ್ಹಾರು ಖಾವ್ನ್ ಏಕ್ ಜಾಗೇರಿ ವಿಶ್ರಾಮ ಕರ್ತಾಶೀಲಿ೦ತಿ . ತಿತ್ಲೆ ಭಿತರಿ ರನ್ನಾ೦ತು ಅಷ್ಶಿಲೆ ಡಕಾಯಿತ ಲೋಕು ಅಂಗಾರಿ ಪೋಣು ಯಾದವ ಸ್ತ್ರೀ ಲೋಕಾಲೆ ನಗ ಭ೦ಗರ ತಂಡುನ್ ಘೆತ್ಲೆ . ಆಯಾಸು ಜಾವ್ನ್ ನಿದ್ದಲೆಲೆ ಅರ್ಜುನಾಕ ಲೋಕಾಲಿ ಬೋಬ್ ಅಯಿಕುನ್ .. ರಕ್ಷಣೆ ಖತೀರಿ ಗಾಂಡೀವಾ ದುಕುನ್ ಬಾಣ ಸೊಳ್ಳೆ . ಖಂಚೇಯಿ ಬಾಣ ಡಕಾಯಿತ ಲೋಕಾಂಕ ಲಗ್ಗನಿ . ದಿವ್ಯಾಸ್ತ್ರ ಕಾಣು ಸೊಡುಂಕ ಪ್ರಯತ್ನ ಕೆಲ್ಲೆ .. ಮಂತ್ರ ಉಡ್ಘಾಸು ಏನಿ .ಖಂಚೇಯ್ ಮಂತ್ರ ಉಡ್ಘಾಸು ಏನಿ .. ಗಾಂಡೀವ ತಂಡುನ್ ಬಾಣ ಸೊಡ್ತಾನಾ ಝೇಂಕಾರ ತಾಂಯ್ಯ್ ಜಾಯ್ನಿ .. ವಿಚಿತ್ರ ದಿಸ್ಲೆ ಅರ್ಜುನಾಕ . ಕುರುಕ್ಷೇತ್ರ ಯುದ್ಧ ರಂಗಾತು ಝೇಂಕಾರ್ ಕೊರ್ನ್ ಶತ್ರು ಸೈನ್ಯಾ ಧೈರ್ಯ ನಿಪ್ಪಯಿಲೆ ಗಾಂಡೀವ ವೇ .. ? ಮೋಣು ಅರ್ಜುನಾಕ ಆಶ್ಚರ್ಯ ಝಲ್ಲೆ . ಸ್ವಲ್ಪ ಲೋಕಾಂಕ ಕಷ್ಟಾರಿ ದಿವಿಶಿ ಮಾರ್ಲೆ . ಝಲ್ಲೆರಿಯೀ ... ಅರ್ಜುನಾನ ಲೆಕ್ಕಿಲೇ ತಿತ್ಲೆ ಲೋಕಾಂಕ ಸಂಹಾರು ಕೊರುಂಕ ಜಾಯ್ನಿ . ಡಕಾಯಿತ ಲೋಕು ನಾಗ ನಾಣ್ಯ ಘೇವ್ನು ಕಾಳ್ಕಾಂತು ಧಾವ್ನ್ ಗೆಲ್ಲೆ . ಯಾದವ ಸ್ತ್ರೀ ಲೋಕಾಂಕ ರಕ್ಷಣೆ ಕೊರುಂಕ ಜಾಯ್ನಿ ಮೂ .. ಮೋಣು ಮನಾ ಸಂಕಟ ಝಲ್ಲೆ .. ಅವಮಾನ ಝಲ್ಲೆ ಅರ್ಜುನಾಕ . ದಿವ್ಯಾಸ್ತ್ರ ಮಂತ್ರ ಎಕ್ಕಯಿ ಉಡ್ಘಾಸು ಯೇನಾ ನತ್ತಿಲೆ ... ಮಸ್ತ್ ಸಂಕಟ ಝಲ್ಲೆ . ಕೃಷ್ಣಾ ಲೆ ನಿರ್ವಾಣ ಝತ್ತರಿ , ದಿವ್ಯಾಸ್ತ್ರ ಶಕ್ತಿ ತಾಕ್ಕಾ ಸೋಣು ಗೆಲ್ಲೆಲೆ ವಿಚಾರು ಮಸ್ತ ದುಃಖ ಝಲ್ಲೆ . ಕೃಷ್ಣಾಲೆ ಬಾಯ್ಲಾ೦ನಿ ಯಮುನೆ೦ತು ಉಡ್ಡುನ್ ಜೀವು ಕಾಣು ಘೆತ್ಲೊ .. ' ಕೃಷ್ಣಾ ನ ಹ್ಯೇ ಜೀವನ ನಕ್ಕಾ .. ಮೋಣು ಆತ್ಮಾಹುತಿ ಕೊರ್ನ್ ಘೆತ್ತಿಲಿ '. ಅರ್ಜುನಾ ನ ಕಿತ್ಲೆ ಸಾಂತ್ವನ ಸಂಘಲೆರಿಯಿ .. ತಾಗೆಲ್ ಉತ್ತರಂ ಕೊಣಯ್ ಅಯಿಕನೀಂತಿ . ಸತ್ಯ ಭಾಮಾ ಏಕ್ಲೀಚಿ ಅರ್ಜುನಾನ ಸಂಘಿಲ್ ಆಯಿಕುನ್ ... ಹಸ್ತಿನಾವತಿಕ ಮಾಕ್ಷೀಚಿ ಭಾರ್ಸರ್ಲಿ
ಉಮಾಪತಿ
No comments:
Post a Comment