MAHABHARATH
Part - 77 ( Konkani Bhashentu )
VAANA PRASTA / ವಾನಪ್ರಸ್ಥ
ಧರ್ಮರಾಯಾಲೆ ಯಾಗಾಶ್ವ ಸರ್ವ ಕುರು ಭೂಮಿಕ ... ಭಾರತ , ಪೂರಾ ರಾಜ್ಯಾ೦ತು ಘು೦ವ್ನ್ ಹಸ್ತನಾವತಿಕ ಯೇವ್ನ್ ಪಾವ್ಲಾ .ವ್ಯಾಸ ಅನಿ ಕೃಷ್ಣಾ೦ಗೆಲೆ ನಿರ್ದೇಶನ ಪ್ರಕಾರ .. ಅಶ್ವಮೇಧ ಯಾಗ ಶುರು ಝಲ್ಲೆ , ವ್ಯಾಸ ಮಹರ್ಷಿ ಲೆ ಶಿಷ್ಯ ಗಣ , ವೈದೀಕ ಜಾವ್ನ್ ಮಂತ್ರ ಸಂಘತಾ ಆಸ್ಸತಿ . ಹಸ್ತಿನಾವತಿ ನಗಾರಾಚೆ ಸರ್ವ ರಾಜ ರಸ್ತೆ೦ತು ಮಂಟೊವು ಘಾಲ್ನ್ ಭಾರತ ದೇಶಾ ದುಕೂನ್ , ವಿವಿಧ ರಾಜ್ಯಾ ದುಕೂನ್ ಆಯ್ಯಿಲೆ ರಾಯ , ಬ್ರಾಹ್ಮಣ , ಕ್ಷತ್ರಿಯ , ಪಂಡಿತ , ಬಂಧು ಬಾಂಧವ ಲೋಕಾಂಕ ಆತಿಥ್ಯ ಮೆಳ್ತಾ ಅಸ್ಸ . ಯುದ್ಧಾ ನಿಮಿತ್ಯ ಝಲ್ಲೆಲೆ ಪಾಪ ಪರಿಹಾರಾ ಖತಿರಿ ಹ್ಯೇ ಯಾಗ ಝತ್ತಾ ಅಸ್ಸ . ಯುದ್ಧಾ ನಿಮಿತ್ಯ ಅನಾಥ ಝಲ್ಲೆಲೆ ಕುಟುಂಬೇಕ ಆರ್ಥಿಕ ಸಹಾಯು ಕೊರುಂಕ .. ಪ್ರತ್ಯೇಕ ದಳ ತಯ್ಯಾರಿ ಕೆಲ್ಲಾ .
ಯಾಗಾಶ್ವ ಏಕ ಖಂಬೇಕ ಬಾಂಧುನ್ ಯಾಗಾ ಬಲಿ ದಿಲ್ಲಾ . ಯಾಗ ವೇದೋಕ್ತ , ವಿದ್ಯುಕ್ತ ಜಾವ್ನ್ ಸಮಾಪ್ತ ಝಲ್ಲಾ . ಧರ್ಮರಾಯಾನ ದ್ರೌಪದಿ ಸಮೇತ .. ಪಂಡಿತ , ಪಾಮರ , ಬ್ರಾಹ್ಮಣ , ಪುರ ಗಣ್ಯ ಲೋಕಾಂಕ ... ಧನ , ಧಾನ್ಯ , ಗೋ ದಾನ , ವಸ್ತ್ರ ದಾನ , ಸುವರ್ಣ ದಾನ , ಕೆಲ್ಲೆ ನಂತರ ಸಮಸ್ತ ಕುರು ಸಾಮ್ರಾಜ್ಯ ವ್ಯಾಸ ಮಹರ್ಷಿ ಕ .. ದಾನ ದಿಲ್ಲೆ ಧರ್ಮಜಾನ . ತಜ್ಜೆ ನಂತರ .. ವ್ಯಾಸ ಮಹರ್ಷಿನ ದಾನ ರೂಪಾರಿ ಮೆಳ್ಳೆಲೆ ಕುರು ಸಾಮ್ರಾಜ್ಯ ..ಧರ್ಮ ರಾಯಾಕ ವಾಪಾಸ್ ದಾನ ಕೊರ್ನ್ ದೀವ್ನು ಅಶೀರ್ವಾದ ಕೆಲ್ಲೆ .
ಕಾಲ ಚಕ್ರಾಕ ದಿವಸ ಎಕ್ಕಾ ಮಾಕ್ಷಿ ಏಕ ಯೇವ್ನು .. ಮಹಿನೊ ,ವರುಷ ನಿಸೋರ್ನ್ ಗೆಲ್ಲೆ . ಯೆಕು ದಿವಸು ದೃತರಾಷ್ಟ್ರಾನ .. ವಿದುರ , ಸಂಜಯಾ ಲಗ್ಗಿ ವಿಮರ್ಶಾ ಕೊರ್ನ್ .. ಧರ್ಮಜಾ ಕ ಲಗ್ಗಿ ಅಪ್ಪಯಿಲೆ .. " ಧರ್ಮಜಾ .. ! ಕ್ಷತ್ರಿಯ ಜಾವ್ನ್ ಜನ್ಮ ಘೆತ್ತಿಲೆ ಮನುಷ್ಯಾನ ಘರ್ಲೆಗಿಚಿ ಮಂಚಾರಿ ಪೊಣು ಮೊರು ನಜ್ಜ ... ಮೊಣು ಧರ್ಮ ಶಾಸ್ತ್ರ ಸಂಘತಾ ... ತಶಿ ಜಾವ್ನ್ ಹಾಂವ ಆಶ್ರಮ ವಾಸಾಕ ವೊಚ್ಚುಕಾ ಮೊಣು ಲೆಕ್ಲಾ .. ಮಿಗೆಲೆ ನಿಶ್ಚಯಾಕ ಎದುರ ಉತ್ತರ ದೀನಾಶಿ ಮಿಗೆಲಿ ಆಶಿ ಪೂರ್ತಿ ಕೊರ್ನ್ ದೀವ್ಕಾ "
ಧರ್ಮಜ : " ಪಿತಾಮಹಾ .. ! ಧರ್ಮ ಪ್ರಕಾರ .. ವಾನಪ್ರಸ್ಥ ಕೊರ್ಚೆ ಸ೦ಮ್ಮ . ಝಲ್ಲೇರಿ .. ದೃಷ್ಟಿ ಹೀನ ಜಾವ್ನ್ ಅಷ್ಶಿಲೆ ತುಕ್ಕಾ ವನವಾಸ ಆಯಾಸ ಝತ್ತಲೆ .. ಮಾತೃ ಶ್ರೀ ಗಾಂಧಾರಿಕಯಿ ಕಷ್ಟ ಝತ್ತಲೆ . ತುಮ್ಮಿ ದೊಗ್ಗ೦ಯಿ ಹಾಂಗಾಚಿ ಆಮ್ಗೆಲೆ ವೊಟ್ಟು ರಬ್ಬುನ್ , ತುಮ್ಗೆಲಿ ಸೇವಾ ಕೊರುಂಕ ಆಸ್ಪದ ಕೊರ್ನ್ ದೀವ್ಕಾ ಮೋಣು ವಿನಂತಿ ಕರ್ತಾ "
ದೃತರಾಷ್ಟ್ರ : " ಕುಮಾರಾ .. ! ಪುತ್ರ ವ್ಯಾಮೋಹಾ ನಿಮಿತ್ಯ ಹಾಂವೆ ಕೆಲ್ಲೆಲೆ ಪಾಪಾಕ ಪ್ರಾಯಶ್ಚಿತ್ತ ಕೊರ್ನ್ ಘೆವ್ಕಾ ಮೋಣು ಲೆಕ್ಲಾ . ತಪೋದೀಕ್ಷಾ ಘೇವ್ನ್ , ವಿಮುಕ್ತಿ ಜಾವ್ಕಾ ಮೋಣು ಆಶಿ ಪಾವ್ತಾ . ತಿತ್ಲೆಂಚಿ ಶಿವಾಯ್ ತುಮ್ಗೆಲೆ ವೈರಿ .. ಮಕ್ಕಾ ಕಾ೦ಯೀ ಕೋಪು ನಾ " ತ್ಯೇಚಿ ವೆಳ್ಯೇರಿ ವ್ಯಾಸಮಹರ್ಷಿ ಯೇವ್ನ್ ಪಾವ್ಲೋ.
ಧರ್ಮಜ : " ವ್ಯಾಸ ದೇವಾ .. ! ತೂ ಪುಣಿ ಸಾಂಘ ... ಪಿತಾಶ್ರೀ ಕ ವಾನಪ್ರಸ್ಥಾಕ ವೊಚ್ಛೆ ನಕ್ಕಾ ಮೋಣು ಸಾಂಘ . "
ವ್ಯಾಸ ಮಹರ್ಷಿ : " ಕುಮಾರ ಯುಧಿಷ್ಠಿರಾ .. ! ತುಗ್ಗೆಲ್ ಮಂಥಾಕ ರಬ್ಬೊನುಕ್ಕಾ .. ತಕ್ಕಾ ವಾನಪ್ರಸ್ಥ ಚಿ ಲಾಯಕ್ . ವನ ವಾಸಾಕ ವೊಚ್ಛೆ ಫುಡೆ ತಾಗೆಲ್ ಹತ್ತಾನಿ ದಾನ ಧರ್ಮ ಕರಯಿ . ಧ್ರತರಾಷ್ಟ್ರಾ ..! ತೂ೦ವೆ ಅತ್ತ ಘೆತ್ತಿಲೆ ನಿರ್ಣಯ ಲಾಯೆಕ್ ಅಸ್ಸ . ಅಂಬಿಕಾ ತನಯಾ ! ಜನ್ಮ ಅಂಧಹೀನ ಜಾವ್ನ್ 70 ವರುಷ ಹೇ ರಾಜ್ಯಾಕ ಚಕ್ರವರ್ತಿ ಜಾವ್ನ್ ರಾಜ್ಯ ಪರಿಪಾಲನ ಕೆಲ್ಲಾ ... ಶಂಬರಿ ಚೆರ್ಡು೦ವಾಲೆ ಪಿತೃ ಸೌಖ್ಯ ಭೋಗ್ಲಾ . ಅತ್ತ ಅನಿ ಮುಕಾರಿ ದೇವಾಲೆ ನಾಮಸ್ಮರಣ ಕೊರ್ನ್ ಪರಿಶುದ್ಧ ಝಾ ಕುಮಾರಾ .. ! "
ವಿದುರ : " ಕುಮಾರ ಧರ್ಮಜಾ .. ! ಹಾಂವ ಅನಿ ಸಂಜಯು ಮಹಾರಾಜಾಲೆ ವೊಟ್ಟು .. ಆಮ್ಗೆಲೆ ಸನ್ನಪಣಾ ದುಕುನ್ ವಿದ್ಯಾಭ್ಯಾಸ ಕೊರ್ನ್ ಆಯ್ಯಿಲೆ . ಅಮ್ಮಿ ಮಹಾರಾಜಾಲೆ ವೊಟ್ಟು ವಾನಪ್ರಸ್ಥಾಕ ವೋಚ್ಚುಕಾ ಮೋಣು ಲೆಕ್ಲಾ . ಅತ್ತ ಹ್ಯೇ ವೆಳ್ಯೇರಿ ಮಹಾರಾಜಾಕ ನಿಸ್ಸಹಾಯ ಜಾವ್ನ್ ಸೊಡ್ಚ್ಯಾಕ ಮನ ನಾ .. ಆಂಮ್ಕಾಯಿ ಆಜ್ಞಾ ದೀವ್ಕಾ .. " ಮ್ಹಳ್ಳಲೊ ವಿದುರ .
ಧರ್ಮಜ " " ವಿದುರ ದೇವಾ .. ! ಅತ್ತ ತುಮ್ಮಿ ಸರ್ವಾನಿ ಮಕ್ಕ ಸೋಣು ಗೆಲ್ಲೆರಿ .. ಹಾಂವೆ ಕಸಲೆ ಕೊರ್ಚೆ .. ? ರಾಜ್ಯ ಸೂತ್ರ ಘೇವ್ನ್ ಮುಕಾರಿ ವತ್ತನಾ ಮಕ್ಕಾ ಹಿತ ಬೋಧ ಕರ್ತಾಲೆ ಕೋಣ ಅಸ್ಸ .. ? "
ವಿದುರ : " ಕುಮಾರಾ .. ! ಸರ್ವ ಪ್ರಜಾ .. ತುಗೆಲೆ ಚೆರ್ಡು೦ವಾ ಮ್ಹಣ್ಕೆ ಲೇಕ .. ಕಸಲೆಯ್ ಕಾರಣಾ ನಿಮಿತ್ಯ ತಾಂಕಾ ಮನಾಕ ದೂಕಿ ಜಾಯ್ನಾಶಿ ಪೊಳೆ .. ಚಂದ್ರ ವಂಶಾ ಕೀರ್ತಿಕ ಕಸಲೆಯ್ ಅಪಮಾನ ಜಾಯ್ನಾಶಿ ಪೊಳೆ . ಪರಿಚಾರಿಕೆ೦ಕ , ಸೇವಕ , ಸೈನ್ಯಾ೦ಕ ಚುಕ್ಕನಾಶಿ ಸಂಬೋಳ್ ದಿವ್ಚೆ ಪೊಳೋನ್ ಘೆ .. ಅನುಮಾನ ಆಯ್ಯಿಲೆ ತೆದ್ನಾವಿಚಾರಣ ಕರಿ . ಪರಿಪಾಲನಾ ರಹಸ್ಯ ಕೋಣಾಕಯಿ ಸಂಘುನುಕ್ಕಾ . ಚೌಧ ವರ್ಷಾ ಪೋಷಿ , ಸಕಲ ಅಶಿಲೆ ಬಾಲ ಲೋಕಾಂಕ ಶಿಕ್ಷ ದೀವ್ನುಕ್ಕಾ . ರಾಜ್ಯ ಪಾಲನಾ ವಿಷಯು ಪರಿಚಾರಕ ಲೋಕಾಲೆ ವೊಟ್ಟು ವಿಮರ್ಶಾ ಕೋರ್ನುಕ್ಕಾ . ಪಶು ಪ್ರಾಣಿ ವೈರಿ ನಿರ್ಲಕ್ಷ್ಯ ನಕ್ಕಾ . ಬೂಟಾಟಿಕ ಕರ್ತಲೆ , ಮಾಂತ್ರಿಕ , ಮಾಟ ಕರ್ತಲೆ೦ಕ ದೇಶ ಬಹಿಷ್ಕಾರ ಘಾಲಿ . ಪಕ್ಷಿ ಸಂತತಿ ವಾಡ್ಲೆರಿ ... ವೃಕ್ಷ ಸಂತತಿ ವಾಡ್ತಾ ... ವೃಕ್ಷ ಸಂತತಿ ವಾಡ್ಲೇರಿ ದೇಶಾಕ ಪಾವ್ಸು ಯೇವ್ನ್ ಸುಭಿಕ್ಷ ಚಡ ಝತ್ತಾ . ಚೊರಾಂಕ ಧರ್ಮ ದ್ರೋಹಿ ಪ್ರಜೆ೦ಕ , ಕ್ರೂರಿ ಲೋಕಾಂಕ ಕ್ಷಮಾ ದಿವ್ವು ನಜ್ಜ .. ಪಾಲಕ .. ಧರ್ಮ ಭ್ರಷ್ಟ ಝಲ್ಲೇರಿ .. ಪ್ರಜಯೀ ಧರ್ಮ ಭ್ರಷ್ಟ ಝತ್ತಾತಿ . ಅಮಾಯಕ ಲೋಕಾಂಕ ವ್ಯಾಪಾರಿ ವರ್ಗಾನಿ ಮೋಸು ಕೊರ್ಚೆ ಚಡ .. ತಸಲೆ ವ್ಯಾಪಾರಿ ಲೋಕಾಂಕ ಕಠಿಣ ಶಿಕ್ಷಾ ದೀವ್ನ್ ತಾಂಗೆಲೆ ಆಸ್ತಿ ಪಾಸ್ತಿ ಖಾಜಾನೆಕ ಜಮಾ ಕೋರ್ಕಾ . ಅನಾವಶ್ಯಕ ಜಾವ್ನ್ ಕರ / ಶುಲ್ಕ ಘಾಲುಂಕ ನಜ್ಜ . ಜನಾ೦ಕ ದಂಡನ ಕೊರ್ನ್ , ಬಲಾತ್ಕಾರ್ ಜಾವ್ನ್ ದುಡ್ಡು ವಸೂಲಿ ಕೋರು ನಜ್ಜ . ಮುನಿಜನ , ಪಂಡಿತ , ಲೋಕಾಂಕ ಕೆದನಾಯ್ ನಿಂದಾ ಕೊರುನಜ್ಜ " ಮೋಣು ಅಸಲಿ ಕಿತ್ಲೆಕೀ ನಮುನೆ ರಾಜ್ಯ ಪರಿಪಾಲನಾ ವಿಷಯಾಂತು ವಿದುರಾನ ಬೊಧನಾ ಕೆಲ್ಲಿ .
ಲಾಯೇಕ್ ಮುಹೂರ್ತಾರಿ ದೃತರಾಷ್ಟ್ರ ವಾನ ಪ್ರಸ್ತಾಕ ಭಾರ್ ಸರ್ಲೊ .. ಚಕ್ರವರ್ತಿ ರಾಯಾಕ ಪೋಳೋಚ್ಯಾಕ ಲಕ್ಷ ಲೋಕು ಆಯ್ಯಿಲೆ . ಸರ್ವಾಲೆ ದೊಳೆ ಭೋರ್ನ್ ಅಯಿಲೆ . ಪ್ರಜಾ ಲೋಕಾಂಕ ವಿನಮ್ರ ಜಾವ್ನ್ ನಮಸ್ಕಾರು ಕೊರ್ನ್ , ಪಾಂಡವಾಂಕ ಆಲಿಂಗನ ಕೊರ್ನ್ , ಪ್ರೀತಿ ದಕ್ಕೋನ್ ರಥಾರಿ ಚಳ್ಳೋ . ಮಹಾರಾಜಾಕ ಶುಭ ಜವ್ವೋ ಮೋಣು ಜಯಕಾರು ಕೊರ್ನ್ ಆನಂದ ಭಾಷ್ಪ ಘಲ್ಲೆ ಲೋಕಾನಿ .
ಧ್ರತರಾಷ್ಟ್ರಾಲೆ ವೊಟ್ಟು , ಗಾಂಧಾರಿ , ವಿದುರ , ಸಂಜಯ , ಕುಂತಿ ದೇವಿ ... ವಾನ ಪ್ರಸ್ಥಾಶ್ರಮಾಕ ಭಾರ್ ಸರ್ಲಿಂತಿ . ಪಾಂಡವ , ಕುಂತಿಲೆ ಪಯ್ಯಾರಿ ಪೋ ಣು ಆಶೀರ್ವಾದ ಘೆತ್ಲೊ . " ಅಮ್ಮಾ .. ! ಜೀವನಾಂತು ತೂ೦ವೆ ಕಾಯೀ ಸೂಖ ಪಾವ್ನಿ ... ಅತ್ತ ಅಂಮ್ಕಾ ಸೋಣು ವೊಚ್ಛೆ ಸ೦ಮ್ಮ ವೇ .. ? ನ್ಯಾಯು ವೇ .. ? ಧರ್ಮು ವೇ .. ? ಅಂಮ್ಕಾ ಧರ್ಮ ಸಂಕಟಾ ಕ ಘಾಲ್ನ್ .. ಕಸಲೇಕ ಶಿಕ್ಷಾ ದಿತ್ತಾ ಅಮ್ಮಾ .. ? " ಮ್ಹಳ್ಳಲೊ ಧರ್ಮಜಾ .
ಕುಂತಿ ದೇವಿ : " ಕುಮಾರಾ .. ! ಸಾಠಿ ವರ್ಷಾ ದುಕೂನ್ .. ತುಗ್ಗೆಲ್ ಮಂಥಾನ , ಮಾಹ್ವೇನ ಪೊಳೊನ್ ಘೆತ್ಲಾ ಮಕ್ಕಾ .. ಧುರ್ಯೋಧನಾನ ಸಮೇತ ಮಕ್ಕಾ ಆವಸೂ ಮ್ಹಣ್ಕೆ ಸ್ಥಾನ ಮಾನ ದೀವ್ನ್ , ಆವಸೂ ಮ್ಹಣ್ಕೆ ಪೊಳೊನ್ , ಕಸಲೆಯ್ ಕಷ್ಠ ನಷ್ಠ ಜಾಯ್ನಾಶಿ ಚಂದ ಕೊರ್ನ್ ಪೊಳೋನ್ ಘೆತ್ಲಾ . ದೃಷ್ಟಿ ಹೀನ ಜಲ್ಲೆಲೆ ತುಗ್ಗೆಲ್ ಮಂಥಾ ಕ ರನ್ನಾ೦ತು ಸೋಣು ಅಂತಃ ಪುರಾಂತು ಸುಖಾರಿ ರಬ್ಬು೦ಕ ಮಕ್ಕಾಮನ ನಾ . ಅತ್ತ ಅನಿ ತುಮ್ಗೆಲೆ ಕಾಲು .. ! ಮಿಗೆಲೆ ಕಾಲು ಝಲ್ಲೆ .. ಹಾಂವ ತಾಂಗೆಲೆ ವೊಟ್ಟು ವಾನಪ್ರಸ್ಥಾಕ ವತ್ತಾ . " ಮೋಣು ಖಡಾ ಖಂಡಿತ ಜಾವ್ನ್ ಸಂಘಲೆ . ವಿದುರಾನ , ಸಂಜಯಾನ " ಅಮ್ಮಿ ಸಾನಸ್ತಾನ ದುಕುನ್ ವೊಟ್ಟು ಅಶಿಲೀಂತಿ ... ಸೂಖ ಭೋಗ್ಚೆ ಕಾಲಾಂತು ಸೂಖ ಭೋಗಲೆ ... ಅತ್ತ ವಾನಪ್ರಸ್ಥಾಕ ವತ್ತನಾ ಅಂಮ್ ಕಾ ರಬ್ಬೊನುಕ್ಕಾ " ಮ್ಹಳ್ಳೆಲೀ೦ತಿ . ವ್ಯಾಸ ಮಹರ್ಷಿನ ಸಂಘಿಲೆ ತಶೀ೦ಚ್ಯಿ ದೃತರಾಷ್ಟ್ರ ... ' ಶತಯೂಪ ' ಆಶ್ರಮಾ ದಿಕಾನ ಪ್ರಯಾಣ ಝಲ್ಲೋ
ಉಮಾಪತಿ
No comments:
Post a Comment