MAHABHARATH Part
- 75 ( Konkani Bhashentu )
Bheeshma Deha Tyaaga / ಭೀಷ್ಮ ದೇಹ ತ್ಯಾಗ
ಭೀಷ್ಮ ಇಚ್ಚಾ ಮರಣಿ . ಸೂರ್ಯೋದಯ ಕೆದನಾಯ್ ಝಲ್ಲೆಮ್ಹಣ್ಕೆ ಉದಯು ಝಲ್ಲಾ . ಆಜಿ ಮಾಘ ಶುದ್ಧ ಏಕಾದಶಿ . ಮಕರ ರಾಶಿರಿ ಸೂರ್ಯು ಆಯಿಲಾ . ಉತ್ತರಾಯಣ ಆರಂಭ ಝಲ್ಲಾ ... ಭೀಷ್ಮಾನ ದೇಹ ತ್ಯಾಗ ಕೊರ್ಚೆ ಘಡಿ ಲಗ್ಗಿ ಯೆತ್ತಾ ಅಸ್ಸ . ಧರ್ಮಜಾನ ಗಂಧಾ ರಕ್ಕುಡ , ತುಪ್ಪಾ ಕೊಳ್ಸೊ , ಗಾಂಧ , ಸೂರಿಂಗೇ ಫುಲ್ಲಂ , ಗಂಗಾ ಜಲ , ನವ್ವೆ ಅಂವ್ಗಾಲೆ , ವೇದ ಪಂಡಿತಾಂಕ ವೊಟ್ಟು ಕೊರ್ನ್ .. ಶ್ರೀ ಕೃಷ್ಣ , ವಿದುರ , ಸಂಜಯ , ಕೃಪಾಚಾರ್ಯ , ತಾಗೆಲ್ ಭಂವ್ಢ , ಕುರುಮಾತಾ ಗಾಂಧಾರಿ , ಕುಂತಿ , ದ್ರೌಪದಿ , ಪುರ ಪ್ರಮುಖ ಪ್ರಜಾ ಸಮೇತ ... ಶಂಬರಿ ರಥಾರಿ ಕುರುಕ್ಷೇತ್ರಾ ಕ ಅಯಿಲೀ೦ತಿ . ಸರ್ವ ಲೋಕು ಭೀಷ್ಮ ಪಿತಾಮಹಾ ಕ ವಂದನಾ ಕರ್ತಾಚಿ .. ತಗೆಲೆ ಸುತ್ತು ಯೇವ್ನ್ ರಬ್ಲೀ೦ತಿ . " ಪಿತಾಮಹಾ ..! ಹಾಂವ ಯುಧಿಷ್ಟಿರ ... ಅಂಮ್ಮಿ ಸರ್ವ ಪಾಂಡವ ... ಕುಟುಂಬ ಸಮೇತ ಐಲೀ೦ತಿ . ಆಶೀರ್ವಾದ ಕರಿ ಪಿತಾಮಹಾ .. " ಮೋಣು ಸಂಘುನ್ ಭೀಷ್ಮಾಲೆ ಚರಣಾರಿ ಪಾಂಯ್ಯ್ ಪೊಳ್ಳೋ ಧರ್ಮಜ .
" ಕುಮಾರಾ .. ! ಅಯಿಲೊ ವೇ .. ? ವಾಸುದೇವು ಖಂಯ್ .. ? " ನಿಂಮ್ಗಿಲೆ ಭೀಷ್ಮಾನ . ಭೀಷ್ಮ ದೇವಾ .. ! ತುಕ್ಕಾ ದಿಲ್ಲೆಲೆ ಉತ್ತರಾಂ ಪ್ರಕಾರ ಹಾಂವ ಅಯಿಲಾ " ಮ್ಹಳ್ಳಲೊ ಕೃಷ್ಣು ಎದುರ ಯೆವ್ನ್ . ಭೀಷ್ಮಾಕ ಸಂತೋಷು ಝಲ್ಲ್ಲೊ . ಕೃಷ್ಣಾ ಕ ಪೊಳೊನ್ ಆನಂದ ಝಲ್ಲೆ ... " ದೇವ ದೇವಾ .. ! ಅಚ್ಯುತಾ .. ! ಅನಂತಾ .. ! ಆದಿ ಮಧ್ಯಂತರ ನತ್ತಿಲೆ ದೇವಾ ... ! ಅಯಿಲ್ ವೇ .. ಮಿಗೆಲೆ ಅನ್ನಾ .. ? ತೂ ಯೆತ್ತ ಕೀ ನಾಕೀ .. ? ಸಂಷಯು ಜಾವ್ನ್ ಮನ ಬೋರ್ನ್ ಅಯಿಲೆ ವಾಸುದೇವಾ ... ! ಅತ್ತ ಮಕ್ಕಾ ಸಂತೋಷು ಝಲ್ಲೊ . ತುಗೆಲೆ ಎದ್ರಾಕ .. ಇಹ ತ್ಯಾಗ ಕೋರ್ಕಾ ಮೋಣು ಲೆಕ್ಲಾ .. " ಕೃಷ್ಣಾ ಕ ದೋನಿ ಹಾಥ ವೊಟ್ಟು ಕೋರ್ನ್ ಪಾಂಯ್ ಪೋಳ್ಳೋ . ಕೃಷ್ಣು ಭೀಷ್ಮಾಲಗ್ಗಿ ಯೇವ್ನ್ ಬೊಸ್ಲೊ . " ವಾಸುದೇವಾ .. ! ಹೇ ಜೀವನ್ ಯಾತ್ರಾ ಪೂರ್ತಿ ಕೊರ್ಚೆ ಘಡಿ ಲಗ್ಗಿ ಅಯಿಲೆ .. ಮಕ್ಕಾ ಅನುಮತಿ ದೀ ವಾಸುದೇವಾ .. ! ಹಾಂವ ಬ್ರಹ್ಮಚಾರಿ .. ! ಬಾಯ್ಲ್ ಚೆರ್ಡು೦ವ ನತ್ತಿಲೊ ಹಾಂವ ಏಕಾಂಗಿ .. ಮಕ್ಕಾ ತುಂವೆಚಿ ವಾಟ ದಕ್ಕೋಕಾ .. ತೂ೦ಚಿ ಮಕ್ಕಾ ಆಶ್ರಯು , ಜಗನ್ನಾಟಕ ಸೂತ್ರ ಧಾರಿ ..! ಹತ್ತಾ೦ತು ಆಯುಧ ಧರನಾಶಿ ... ಇಕ್ರಾ ಅಕ್ಷೋಹಿಣಿ ಸೈನ್ಯ .. ಅತಿರಥ , ಮಹಾರಥ , ವೀರಾಂಕ ಗಡ್ - ಗಡಾಯಿಲೊ ಧೀರೋತ್ತಮ ವೀರ ನಾಯಕ ತೂ ... ಭಳಾ .. ! ಕೃಷ್ಣಾ .. ! , ವಾಸುದೇವಾ ... ಕುರುಕ್ಷೇತ್ರ ಯುದ್ಧಾ೦ತು ಆಯುಧ ಧರನಾ ಮೋಣು ತೂ೦ವೆ ಕೆಲ್ಲೆಲೆ ಪ್ರತಿಜ್ಞಾ ಭಂಗ ಕೊರ್ನ್ .. ತುಂವೆ ಸುದರ್ಶನ ಚಕ್ರ ಧೊರ್ಚೆ ತಶಿ ಕೆಲ್ಲೆ ... ಮಕ್ಕ ಕ್ಷಮಾ ಕರಿ ಮಿಗೆಲೆ ಅನ್ನಾ ... ತುಗೆಲೆ ವೈರಿ ದ್ವೇಷ ದೊವೊರ್ನ್ , ಶತ್ರು ಭಾವನಾ ವೈರಿ ನಯ್ . ಮಿಗೆಲೆ ಅಂತಿಮ ಚರಣಾ ಜೀವನಾಂತು .. ಮಿಗೆಲೆ ಪರಾಕ್ರಮ ತುಕ್ಕ ಏಕ ಪೊಟಿ ದಕ್ಕೋಕಾ ಮೋಣು ಆಶಿ ಝಲ್ಲಿ . ಅರ್ಜುನಾ ವೈರಿ ದಿವ್ಯಾಸ್ತ್ರ ಸೊಡ್ಚೆ ಪಳ್ಳೆ . ಮಿಗೆಲೆ ಅಪರಾಧ ಕ್ಷಮ ಕರಿ ವಾಸುದೇವಾ .. ! " ಭೀಷ್ಮಾಕ ಪೊಳೊನ್ ಕೃಷ್ಣು ಹಾಸ್ಲೊ . " ಹೇ ಜಗನ್ನಾಥಾ .. !ಸುದರ್ಶನ ಚಕ್ರ ಧೋರ್ನ್ ಕೋಪಾರಿ ಮುಕಾರಿ ಯೆತ್ತಾನಾ .. ಅರ್ಜುನಾನ ತುಕ್ಕಾ ರಬ್ಬಯಿಲೊ .. ವಾಸುದೇವಾ ತ್ಯೇ ದಿವಸು ತುಗೆಲೆ ಸುದರ್ಶನ ಚಕ್ರಾಕ ಮಿಗೆಲೆ ಗಳೋ ದಿವ್ಚ್ಯಾಕ ರಬ್ಬಿಲೋ ಮಕ್ಕಾ ಸಂತೋಷು ಝಲ್ಲೊ . ಮಿಗೆಲೆ ಅಂತ್ಯ ತ್ಯೇ ವೇಳೇರಿ ಜಾಲ್ಲೆಲೆ ಝಲ್ಲೆರಿ ... ಮಿಗೆಲೆ ತಿತ್ಲೆ ಭಾಗ್ಯಶಾಲಿ ಕೋಣ ಅಸ್ತಾತಿ ಅಶಿಲೆ .. ? ಜಗನ್ನಾಥಾ .. ! ತುಕ್ಕಾ ಮಾನವ ರೂಪಾರಿ .. ಕೃಷ್ಣ ಜಾವ್ನ್ ಮಸ್ತ್ ಪೊಟಿ ಪೊಳೈಲಾ .. ತುಗೆಲೆ ನಿಜ ರೂಪ ಪೊಳೊಕಾ ಮೊಣು ಆಶಿ ಝಲ್ಲಾ . ಮಾಧವಾ .. ! ಏಕ ಕ್ಷಣಾಕ ತುಗೆಲೆ ವಿಶ್ವ ರೂಪ ಮಕ್ಕಾ ದಕ್ಕಯಿನಾಕೀ .. ? ಮಿಗೆಲೆ ಜೀವಾಕ ತುಗೆಲೆ ಚರಣಾ೦ತು ಸ್ಥಾನ ದೀನಾ ಕೀ .. ? " ಕೃಷ್ಣಾ ಕ ಭೀಷ್ಮಾಲೆ ಮನೋಕಾಂಕ್ಷ ಅರ್ಥ್ ಝಲ್ಲೆ . ವಿಶ್ವ ರೂಪ ಕೃಷ್ಣಾನ .. ಆಕಾಶ ದಿಗಂತ ರಬ್ಬುನ್ ದಕ್ಕಯಿಲೆ ... ಚತುರ್ಭುಜ ರೂಪ .. ಶಂಖ ಚಕ್ರ , ಗಧಾ , ಪದ್ಮ ಧೋರ್ನ್ ಹಸ್ಮುಖೀ ಜಗನ್ನಾಥ ... !! ಭೀಷ್ಮಾನ ದೋಳೆ ಭೋರ್ನ್ ವಿಶ್ವ ರೂಪ ಪೊಳೈಲೆ . ಭೀಷ್ಮಾಕ ಉತ್ತರಂ ಏನಿ .. ದೋಳೆ೦ತು ಧಾರಾಂಧರಿ ಆನಂದ ಭಾಷ್ಪ ಅಯಿಲೆ ... " ಮಹಾವೀರ ಭೀಷ್ಮಾಚಾರ್ಯಾ .. ! ಪವಿತ್ರ ಗಂಗಾ ದೇವಿಲೆ ಪೊಟ್ಟಾಂತು ಜನ್ಮಾ ಯೇವ್ನ್ ... ಪರಶುರಾಮಾ ಆಶ್ರಮಾಂತು ಸರ್ವ ವಿದ್ಯಾ ಶಿಕ್ಕುನು , ಸರ್ವ ಶಾಸ್ತ್ರ ಅಧ್ಯಯನ ಕೊರ್ನ್ ' ಆಚಾರ್ಯ ' ಮ್ಹಳ್ಳೆಲೆ ಬಿರುದು ಘೆತ್ಲಾ . ಬಪ್ಸೂಲೆ ಖತಿರಿ ವಚನ ಭದ್ಧ ಜಾವ್ನ್ ... ಸುದೀರ್ಘ ಬ್ರಹ್ಮಚರ್ಯ ಕೆಲ್ಲಾ ... ಹಸ್ತಿನಾವತಿ ರಕ್ಷಣೆ ಖತಿರಿ ಧಾಹ್ ದಿವಸ ಕುರುಕ್ಷೇತ್ರ ಯುದ್ಧ ರಂಗಾಂತು ಕರ್ಮ ಯೋಗಿ ಜಾವ್ನ್ .. ತುಗೆಲೆ ಭೀಷಣ ಯುದ್ಧ ಪರಾಕ್ರಮು ದಕ್ಕಯಿಲಾ .. ವೀರ ವಿಕ್ರಮು ಜಾವ್ನ್ ಹಜಾರ ಇತ್ಲೆ ಬಾಣ ಅಂಗಾ ಲಗ್ಗುನುಯಿ .. ಶರ ಶಯ್ಯಾರಿ ನಿದ್ದಲೆಲೆ .. ಹೇ ಪುಣ್ಯಾತ್ಮಾ .. ! ಅತ್ತ ಉತ್ತರಾಯಣ ಕಾಲಾ ಕ ರಕ್ತಶಿಲೋ ಇಚ್ಚಾ ಮರಣಿ .. ಹೇ ಪುಣ್ಯ ಮೂರ್ತಿ .. !ದೇವಾ ಲೋಕಾಂತು ವಸು ಲೋಕ ತುಗ್ಗೆಲ್ ಖತಿರಿ ರಕ್ತಾ ಆಸ್ಸತಿ .. ವಸ .. ತುಕ್ಕಾ ಮಂಗಳ ಝವ್ವೊ . ಮಿಗೆಲೆ ಚರಣಾ ಪೋಷಿ ಹೋಡ ... ವೈಕುಂಠ , ಕೈಲಾಸ , ದೇವೇಂದ್ರ ಲೋಕಾ ಪೋಷಿ ಹೋಡ ... ಸ್ವರ್ಘ ಸಮಾನ ಜಗತ್ ರಕ್ಪಕಿ ಭವಾನಿ ಲೆ ಗರ್ಭಾ೦ತು .. ತುಕ್ಕಾ ಸ್ಥಾನ ಮೇಳೋ . ದೇವಾ ಲೋಕಾಂತು ಮೇಳ್ನಾ ನತ್ತಿಲೆ ಸುಖ ಶಾಂತಿ .. ಪ್ರತೀ ಸ್ತ್ರೀ ಗರ್ಭಾ೦ತು ಅಸ್ಸ ... ತ್ಯೆ ಮಿಗೆಲೆ ನಿತ್ಯ ವಾಸ ಸ್ಥಾನ .. " ಮೋಣು ಕೃಷ್ಣಾನ ಆಶೀರ್ವಾದು ಕೆಲ್ಲೊ .
ಧರ್ಮಜ , ಭೀಮ , ಅರ್ಜುನ , ನಕುಲ , ಸಹದೇವಾನಿ ಭೀಷ್ಮಾಲೆ ಪಾಯ ಧು೦ವ್ನ್ , ಸುಗಂಧ ಫುಲ್ಲಾನಿ ಪೂಜಾ ಕೊರ್ನ್ , ನಮಸ್ಕಾರು ಕೆಲ್ಲೊ . ಇತ್ಲೆ ಭಿತರಿ .. ತ೦ಯ್ಯ್ ವ್ಯಾಸ ಮಹರ್ಷಿ ಪ್ರತ್ಯಕ್ಷ ಝಲ್ಲೊ .ಪವಿತ್ರ ತುಳಸಿ ತೀರ್ಥ ಭೀಷ್ಮಾಕ ಪಿವ್ವಯಿಲೆ . ಆಕಾಶಾರಿ ದುಕುನು ಪುಷ್ಪ ವೃಷ್ಟಿ ಝಲ್ಲಿ . ಹಸ್ತಿನಾವತಿ ಪುರ ಲೋಕು , ಮಂತ್ರಿ , ಸಾಮಂತ , ದಂಡನಾಯಕ , ಸಾಲಾನಿ ಯೇವ್ನ್ ಭೀಷ್ಮಾಚಾರ್ಯಾಕ ವಂದನ ಕೆಲ್ಲಿ . ಆಕಾಶಾರಿ ದೇವ ದುಂದುಭಿ ಝಲ್ಲಿ . ವೇದ ಪಂಡಿತಾನಿ ವಿಷ್ಣು ಸಹಸ್ರ ನಾಮ ಪಾರಾಯಣ ಕೆಲ್ಲೆ . ವಂದಿಮಾಗದ ಲೋಕಾನಿ ಅಮರ ಘೋಷಣ ಕೆಲ್ಲಿ . " ಅಮರ್ ಹೋ ಅಮರ್ ಹೋ " ಭೀಷ್ಮಾನ ಶ್ರೀ ಕೃಷ್ಣ , ವ್ಯಾಸ ಮಹರ್ಷಿ ಕ ದೋಳೆ ಭೋರ್ನು ಆಯ್ಯಿಲೆ ಪೊಳೊನ್ , ನಮಸ್ಕಾರು ಕೊರ್ನ್ ದೋಳೆ ಧಾಂಕುನ್ ಪಂಚ ಪ್ರಾಣ ಏಕ್ - ಏಕ್ ಜಾವ್ನ್ ಸೊಡ್ಚ್ಯಾ ಪ್ರಾರಂಭ ಕೆಲ್ಲೆ .. ಭೀಷ್ಮಾಲೆ ಅಂಗಾಕ ಲಗ್ಗಿಲೆ ಬಾಣ ಏಕ್ - ಏಕ್ ಜಾವ್ನ್ ಸಕಲ ನೆಲಾರಿ ಪೊಳ್ಳೇ . ಸಕ್ಕಡ ಲೋಕು ಭೀಷ್ಮಾಕ ಪೊಳೈತಾಚಿ ... ನಮಸ್ಕಾರು ಕರ್ತಾಚಿ .. ಆಶ್ಚರ್ಯ ಪಾವ್ಲೀ೦ತಿ . ಭೀಷ್ಮಾಲೆ ಆಂಗಾ ದುಕುನ್ ಏಕ್ ದಿವ್ಯ ಜ್ಯೋತಿ ಉಠಾನ್ ಆಕಾಶಾ ದಿಕಾನ್ ಪ್ರಯಾಣ ಕೆಲ್ಲೆ . ಪಾಂಡವಾನಿ ಭಕ್ತೀನ ತ್ಯೆ ಜ್ಯೋತಿ ಕ ನಮನ ಕೆಲ್ಲೆ . ಪಾಂಡವಾನಿ ಭೀಷ್ಮಾಲೆ ಪಾರ್ಥಿವ ಶರೀರಾ ಕ ಗಂಗಾ ಸ್ನಾನ ಕರಯಿಲೆ . ಅಂಗಾ ಕ ಗಂಧ ಲೇಪನ ಕೊರ್ನ್ , ಪುಷ್ಪ ಮಾಳ ಘಾಲ್ನ್ , ಗಂಧಾ ರುಕ್ಕಾನಿ ಬಂಧಿಲೆ ಭೀಷ್ಮ ಚಿತೆಕ ... ತೂಪ ಘಾಲ್ನ್ ... ಅಗ್ನಿ ಸ್ಪರ್ಶ ಕೆಲ್ಲೆ . ತ್ಯೆಚಿ ವೆಳ್ಯೇರಿ .. ಗಂಗಾ ದೇವಿ ಪ್ರತ್ಯಕ್ಷ ಝಾಲ್ಲಿ . ತಿಗೆಲೆ ಪೂತು ಭೀಷ್ಮಾಖತಿರಿ ಪರಿ ಪರಿ ಜಾವ್ನ್ ರಳ್ಳಿ " ವ್ಯಾಸ ದೇವಾ ... " ಇತ್ಲೆ ವಯೋವೃದ್ಧ ಜಾವ್ನ್ ಆಸ್ಸುಚೆ ಮಿಗೆಲೆ ಪುತ್ತಾಕ ಎದುರ ಯೇವ್ನ್ ಯುದ್ಧ ಕರ್ನಾಶಿ ... ಷಂಢ ಶಿಖಂಢಿ ಎದ್ರಾಕ ದೊವೊರ್ನ್ ... ಶಸ್ತ್ರ ಹತ್ತಾ೦ತು ನತ್ತಿಲೆ ವೆಳ್ಯೇರಿ .. ಹಜಾರ ಬಾಣ ಸೋಣು .. ಹೀ ಅವಸ್ಥ ಹಾಡುಂಕ ಕಾರಣ ಝಲ್ಲೆಲೆ ಅರ್ಜುನ್ ಕೋಣ .. ? " ರೌಧ್ರ ಕ್ರೋಧಾರಿ ನಿಂಮ್ಗಿಲೆ ಗಂಗೆ ನ . " ಕಸಲೇಕ ಭವಾನೀ ... ? " ಮೋಣು ನಿಂಮ್ಗಿಲೆ ಕೃಷ್ಣಾನ . " ತಕ್ಕಾ ಹಾಂವ ಆಶೀ ಸೋಣಾ ... "
" ಗಂಗಾ ಭವಾನಿ ... ! ಪುತ್ತಾನ ಮೆಲ್ಲೆಲೆ ಕಾರಣಾ ನಿಮಿತ್ಯ ... ಆವೇಷು ಕೊರ್ನ್ ಕೊಪ್ಪುನುಕ್ಕಾ .. ! ಹೇ ಭುಯಿಂಚೇರಿ ಜೀವನ ಪೂರೋ ಮೋಣು ದಿಸ್ಸುನ್ ... ಯುದ್ಧ ರಂಗಾಂತು ದೆವಲಾ ... ಭೀಷ್ಮಾಲೆ ಮರಣಾ ಖತಿರಿ .. ಪರಮ ಶಿವಾಲೆ ದಯೆ ನಿಮಿತ್ಯ ಜನ್ಮ ಘೆತ್ತಿಲೆ ಶಿಖಂಢಿಕ ಎದ್ರಾಕ ದೊವೋರ್ನ್ ಯುದ್ಧ ಕೆಲ್ಲಾ . ಹೇ ಸ್ವತಹಾ ಭೀಷ್ಮಾನ ಆದೇಷು ದಿಲ್ಲೆಲೆ . ತಾಂತು ಅರ್ಜುನಾಲೆ ಚೂಕಿ ನಾ .. ಶಾಂತ ಝಾ ಗಂಗಾ ಭವಾನಿ .. ! ವಸಿಷ್ಠಾಲೆ ಶ್ರಾಪಾ ನಿಮಿತ್ಯ .. ಅನಿ ಪರಮೇಶ್ವರಾಲೆ ವರ ಪ್ರಸಾದಾ ನಿಮಿತ್ಯ ಭೀಷ್ಮಾಲೆ ಮರಣ ಝಲ್ಲಾ . ಭೀಷ್ಮಾಕ ಶ್ರಾಪ ವಿಮೋಚನ ಝಲ್ಲೋ ಭಾಗೀರಥೀ ... ! " ಮೋಣು ಕೃಷ್ಣಾನ ಶಾಂತ ಕೆಲ್ಲೆ . ವ್ಯಾಸ ಮಹರ್ಷಿನಯಿ , ಗಂಗೆಕ ಸಮಾಧಾನ ಕೆಲ್ಲೆ . ಅದೃಶ್ಯ ಝಲ್ಲಿ ಭಾಗೀರಥಿ ..
ಉಮಾಪತಿ
No comments:
Post a Comment