MAHABHARATH
Part -78 ( Konkani Bhashentu )
PUNAR MILANA / ಪುನರ್ಮಿಲನ
ಏಕು ದಿವಸು ಪಾಂಡವಾಂಕ..... ವಾನಪ್ರಸ್ಧಾ ಅಷ್ಶಿಲೆ , ಆವ್ಸು ಕುಂತಿ , ಗಾಂಧಾರಿ , ದೃತರಾಷ್ಟ್ರ , ವಿದುರ , ಸಂಜಯಾಕ ಪೊಳೊಕಾ ಮೋಣು ದಿಸ್ಲೆ . ಧರ್ಮರಾಯು , ಮಸ್ತ ನಮುನೆ ಮಿಠಾಯಿ ಖಾಣ ತಯ್ಯಾರ್ ಕೊರ್ನ್ .. ಕುರು ಸುನ್ನಾ೦ಕ , ಅಂತಃಪುರಾ ಸ್ತ್ರೀ ಲೋಕಾಂಕ ಘೇವ್ನ್ , ಶತಯೂಪ ಆಶ್ರಮಾಕ ಯೇವ್ನ್ ಪಾವ್ಲೀ೦ತಿ . ಧ್ರತರಾಷ್ಟ್ರಾಕ ಮಸ್ತ ಖುಷಿ ಝಲ್ಲಿ . ಹಳ್ಳೆಲೆ ಮಿಠಾಯಿ ಖಾಣ , ಫಲ ವಸ್ತು ಸರ್ವಾಂಕ ವಂಟುನ್ ಖಾವ್ನ್ ಸಂತೋಷು ಪಾವ್ಲೀ೦ತಿ . ಝಲ್ಲೇರಿ ... ವಿದುರ ದೇವು ಆಶ್ರಮಾ ಸುತ್ತು ಖಂಯಿ ದಿಸ್ಸನಿ . ತೀನಿ ದಿವಸಾ ದುಕೂನ್ ಆಶ್ರಮಾಕ ಏನಿ ಮೋಣು ಕಳ್ಳೆ . ಪಾಂಡವ ... ವಿದುರ ದೇವಾಕ ಸೊದ್ದುನ್ ಗೆಲ್ಲೆ . ಏಕ ಅಶ್ವತ್ಥಾ ರುಕ್ಕಾ ಮುಳಾಂತು .. ವಿದುರ ಮಹಾಷಯು ದೋಳೆ ಧಾಂಕುನ್ , ದಿಗಂಬರ ಜಾವ್ನ್ , ಪದ್ಮಾಸನ ಘಾಲ್ನ್ , ಧ್ಯಾನಾಕ ಬೊಶಿಲೆ ಪೊಳೈಲೆ . ಧರ್ಮಜಾನ ಲಗ್ಗಿ ವೊಚ್ಚುನ್ " ಬಪ್ಪಾ .. ! ಹಾಂವ ಧರ್ಮರಾಯು ಅಯಿಲಾ .. ಅಮ್ಮಿ ಸರ್ವ ತುಗ್ಗೆಲ್ ವಾಟ ರಕ್ತಾ ಆಸ್ಸತಿ .. ಯೋ ಅಮ್ಮಿ ಆಶ್ರಮಾಕ ವೊಚ್ಚಾ " ಮ್ಹಳ್ಳಲೊ . ವಿದುರ ದೇವು ಜೀವಂತಿ ನಾ .. ಕೆದನ ಕೀ ತಗೆಲೆ ಆತ್ಮ , ವಾಯು ಮಂಡಲಾಂತು ಲೀನ ಝಲ್ಲಾ . ಪಾರ್ಥಿವ ಶರೀರಾಕ ಧೋರ್ನ್ ಗೊಳೋ ಮೋಣು ರಳ್ಳೊ ಧರ್ಮಜ . ಪಾಂಡವಾನಿ ರಕ್ಕುಡ ವೊಟ್ಟು ಕೊರ್ನ್ ಶವ ಸಂಸ್ಕಾರಾಕ ಚಿತಾ ತಯ್ಯಾರಿ ಕೆಲ್ಲಿ . ಅಗ್ನಿ ಸ್ಪರ್ಶ ಕೊರುಂಕ ವತ್ತನಾ ಏಕ ಅಶರೀರವಾಣಿ ಅಯಿಕ ಪಳ್ಳಿ . 'ಧರ್ಮಜಾ .. ! ಯತಿ ಧರ್ಮಾರಿ ಅಷ್ಶಿಲೆ ವಿದುರಾಕ ಅಗ್ನಿಸ್ಪರ್ಶ ಕೋರ್ನುಕ್ಕಾ' ಮೋಣು ಅಯಿಕಲೋ . ತಶೀ೦ಚಿ ವಿದುರಾಕ ಖನನ ಸಂಸ್ಕಾರ ಕೆಲ್ಲೆ . ಆಶ್ರಮಾಕ ಯೇವ್ನ್ , ವಿದುರಾಲೆ ಮರಣ ವಾರ್ತಾ ಸಂಘಲೆ .
ವ್ಯಾಸ ಮಹರ್ಷಿನ ಧ್ರತರಾಷ್ಟ್ರಾ ಲಗ್ಗಿ ಅನಿ ಗಾಂಧಾರಿ ಲಗ್ಗಿ " ತುಮ್ಮಿ ವಾನಪ್ರಸ್ಥಾ ಆಶ್ರಮಾ ಅಷ್ಶಿಲೆ ತುಮ್ಕಾ ಕಾಯೀ ಪುಣಿ ಕಾಣಿಕಾ ದೀವಕಾ ಮೋಣು ಲೆಕ್ಲಾ . ನಿಂಮ್ಗಿಯಾ ತುಮ್ಗೆಲೆ ಮನಾಂತು ಕಸಲೆಯ್ ಇಚ್ಚಾ ಅಸ್ಲೆರಿ ಸಂಘಯಾ . " ಗುರು ವ್ಯಾಸ ದೇವಾ .. !ಸರ್ವ ಮಿಗೆಲಿ ಆಶಾ ಸೊಡ್ಚ್ಯಾಕ ಆಶ್ರಮ ವಾಸಾಕ ಅಯಿಲಾ ... ಜೀವನಾಂತು ಸರ್ವ ಸುಖ ಭೋಗ್ಲಾ .. ಅನಿ ಮಕ್ಕಾ ಕಸಲೆ ಜಾಯೀ .. ಮಕ್ಕಾ ಕಸಲೆಯ್ ಆಶಾ ನಾ " ಮ್ಹಳ್ಳಲೊ ದೃತರಾಷ್ಟ್ರ . "ಅಮ್ಮಾ ಗಾಂಧಾರಿ .. ! ತುಗ್ಗೆಲ್ ಮನಾಂತು ಕಸಲೆಯ್ ಆಶಾ ಅಸ್ಸ ವೇ .. ? " ನಿ೦ಮಗಿಲೆ . " ಭಗವಾನ್ ಆಜೀಕ ಕುರುಕ್ಷೇತ್ರ ಯುದ್ಧ ಜಾವ್ನ್ ಸೊಳಹ ವರ್ಷ೦ ಜಲ್ಲೀ೦ತಿ . ಮಿಗೆಲೆ ಚೆರ್ಡು೦ವ ಕಷ್ಶಿ ಆಸ್ಸತಿ ಮೋಣು , ಏಕ್ ಪೊಟಿ ಪೊಳೊಕಾ ಮೋಣು ಆಶಿ ಅಸ್ಸ ... ಸಾಧ್ಯ ಆಸ್ಲೆರಿ ... ಮಿಗೆಲಿ ಆಶಾ ಪೂರ್ತಿ ಕೊರ್ನ್ ದಿಯ್ಯಾತಿ ಗುರು ದೇವಾ .. " ಮ್ಹಳ್ಳಲಿ . " ಅಮ್ಮಾ ಕುಂತಿ ದೇವಿ , ತುಗೆಲಿ ಆಶಾ ಕಸಲೆಯ್ ಆಸ್ಲೆರಿ ಸಾಂಘ ... "
ಕುಂತಿ : " ಗುರು ವ್ಯಾಸ ದೇವಾ .. ! ತುಗೆಲೆ ಆಶೀರ್ವಾದಾ ನಿಮಿತ್ಯ ಅನಿ ಕೃಷ್ಣಾಲೆ ದಯೆ ನಿಮಿತ್ಯ ... ಅಮ್ಮಿ ಸರ್ವ ಕಷ್ಟಾ೦ದುಕುನ್ ಪಾರ ಝಲ್ಲಿ೦ತಿ ... ಝಲ್ಲೆರಿಯೀ .. ಕರ್ಣಾಲೆ ವಿಷಯಾಂತು .. ಅನಿಕಾಯ್ ಮಿಗೆಲೆ ಮನಾಂತು ಬಾಧಾ ಅಸ್ಸ . ಮಿಗೆಲೆ ಪೊಟ್ಟಾಂತು ಜನ್ಮಾ ಯೇವ್ನ್ ... ರಾಧೆಯ ಮೋಣು ಮಸ್ತ ಅಪಮಾನ ಪಾವ್ಲೋ ... ತಗೆಲೆ ಕಸಲೆಯ್ ಚೂಕಿ ನಾಶಿ ... ಮಿಗೆಲೆ ಚುಕ್ಕೀಕ ತಕ್ಕಾ ಶಿಕ್ಷ ಮೆಳ್ಳೆ ಮೋಣು ನಿತ್ಯ ಫುಳ್ಳೆ ದಿವಸ ಉಡ್ಘಾಸು ಯೇವ್ನ್ ಮನಾ ಕಷ್ಟ ದಿಸ್ತಾ . ತಗೆಲೆ ದುರಂತ ಜೀವನ ಪೊಳೈತಾನಾ ... ಪಾವ್ವಿಲೆ ಮರಣ ಪೊಳಯಿತಾನಾ ... ಮನಾಕ ಮಸ್ತ ಸಂಕಟ ಝತ್ತಾ . ಏಕ ಪೋಟಿ ತಕ್ಕ ಪೊಳೊನ್ ಕ್ಷಮಾ ಮಗ್ಗುಕಾ ಮೋಣು ಆಶೇರಿ ಅಸ್ಸ " ಮೋಣು ಸಂಘುನ್ ದೊಳೆ ಉದ್ದಾಕ ಕಳ್ಳೆ .
ಅರ್ಜುನ : " ವ್ಯಾಸ ದೇವಾ .. ! ದಾನ ನಿಧಿ ಕರ್ಣಾಕ ಮಿಗ್ಗೆಲೆ ಹಾತ್ತಾನ ಹತ್ಯಾ ಝಲ್ಲಾ . ಹಾಂವ ತಗೆಲೊ ಭಾವು ಮೋಣು ತಕ್ಕಾ ಗೊತ್ತಶಿಲೆ ... ಝಲ್ಲೇರಿ .. ಮಕ್ಕಾ ತ್ಯೋ .. ' ಅಣ್ಣಾ 'ಮೋಣು ಗೊತ್ನಾ ಅಷ್ಶಿಲೆ . ಮರಣ ಪಾವತಾನಾ ... ಕಿತ್ಲೆ ನಮುನೆ ಸಂಕಟ ಪಾವ್ಲೋ ಕೀ .. ಕಿತ್ಕಿ .! ನಿಸ್ಸಹಾಯ್ ಜಾವ್ನ್ ಅಷ್ಶಿಲೆ ಕರ್ಣಾ ಕ .. ಹತ್ತಾ೦ತು ಶಸ್ತ್ರ ನಾತ್ತಿಲೆ ವೆಳ್ಯೇರಿ ದಿವ್ಯಾಸ್ತ್ರ ಪ್ರಯೋಗ ಕೆಲ್ಲೆ . ಮಕ್ಕಾಯಿ .. ತಕ್ಕಾ ಪೊಳೊನ್ ಏಕ್ ಪೊಟಿ ತ್ಯೇ ಮಹಾವೀರಾಕ ಫೊಟೊನ್ ಧೋರ್ನ್ ಕ್ಷಮಾ ಮಗ್ಗುಕಾ ಮೋಣು ಆಶಿ ಅಸ್ಸ ಗುರು ದೇವಾ .. " ಮ್ಹಳ್ಳಲೊ ಅರ್ಜುನ .
ಧರ್ಮಜ : " ಮಹಾತ್ಮಾ .. ! ವ್ಯಾಸದೇವಾ ... ಮಕ್ಕಾಯಿ ಕರ್ಣಾಕ ಪೊಳೊಕಾ ಮೋಣು ಆಷಿ ಅಸ್ಸ " ಮ್ಹಳ್ಳಲೊ .
ವ್ಯಾಸಮಹರ್ಷಿ : " ತು೦ಮ್ಕಾ ಸರ್ವಾಂಕ ಏಕ್ ವಿಷಯು ಸಾಂಗ್ತಾ ... ಕಲಿಯುಗ ಆರಂಭ ಜಾವ್ಚ್ಯಾಕ ಶುರು ಝಲ್ಲೆ . ಕುರುಕ್ಷೇತ್ರ ಯುದ್ಧ , ದ್ವಾಪರ ಯುಗ ಸಮಾಪ್ತಿ ಖತಿರಿ ಝಲ್ಲೆಲೆ . ಧುರ್ಯೋಧನಾದಿ ಲೋಕು , ಯುದ್ಧಾ ಖತಿರಿ ಜನ್ಮಾ ಆಯ್ಯಿಲೆ .. ಯುದ್ಧಾ೦ತು ವೀರ ಮರಣ ಪವ್ವಿಲೆ ಸೈನಿಕ ಲೋಕು .. ವಾಪಾಸ್ ಜನ್ಮಾಕ ಅಯಿಲೇ೦ತಿ . ಭೀಷ್ಮ - ಪ್ರಭಾಸ ಮ್ಹಳ್ಳೆಲೆ ವಸು ಪುರುಷು . ತೂ - ಧ್ರತರಾಷ್ಟ್ರ ಮ್ಹಳ್ಳೆಲೆ ಗಂಧರ್ವ ಪುರುಷು . ಪಾಂಡುರಾಯು - ಪುನಃ ಪ್ರಶಿಕ್ಷಣಾಕ ಜನ್ಮಾ ಆಯ್ಯಿಲೊ . ದ್ರೋಣಚಾರ್ಯು - ಬ್ರಹಸ್ಪತಿ ಅಂಶ ಜಾವ್ನ್ ಜನ್ಮಾ ಆಯ್ಯಿಲೊ . ಕಲಿ ಪುರುಷು ಚಿ - ಧುರ್ಯೋಧನ ಜಾವ್ನ್ ಜನ್ಮು ಘೆತ್ತಿಲೊ . ಅನೇಕ ರಾಕ್ಷಸ - ಧುರ್ಯೋಧನಾಲೆ ಭಂವಡ ಜಾವ್ನ್ ಜನ್ಮಾ ಆಯ್ಯಿಲೆ . ಯಮಧರ್ಮ ರಾಯೂಚಿ - ಯುಧಿಷ್ಠಿರ ... ಯಮಧರ್ಮ ರಾಯಾಲೆ ಆನ್ನೇಕ ಅಂಶು . ವಿದುರ - ಜಾವ್ನ್ ಜನ್ಮಾ ಆಯ್ಯಿಲೊ ನೈಋತ್ಯ ವಾಯು ಪುರುಷು , ಯುಯುತ್ಸು - ರಾವಣಾ ಪೂತು .. ಇಂದ್ರಜಿತ್ , ದುಃಶ್ಯಾಸನ - ಕಾಲಕೇಯ ರಾಕ್ಷಸು , ಸೈ೦ಧವ - ಜಾವ್ನ್ ಜನ್ಮಾ ಆಯ್ಯಿಲೋ ಕುಹತಿ ಮ್ಹಳ್ಳಲೊ ರಾಕ್ಷಸು , ಕುಹೂ ಮ್ಹಳ್ಳಲಿ ರಾಕ್ಷಸಿ - ತುಗೆಲಿ ಧೂವ ದುಃಶ್ಶಲಾ , ಹಿರಣ್ಯಕಶಿಪಾಲೆ ಪೂತು ಪ್ರಹ್ಲಾದು ಚಿ - ಶಲ್ಯ ಮಹಾರಾಯು , ಕೂರ್ಮ ಮ್ಹಳ್ಳೆಲಿ ಗಂಧರ್ವಿಣಿ ಚಿ - ಕುಂತೀ ದೇವಿ , ಉದ್ಧಾಹ ಮ್ಹಳ್ಳೆಲೆ ಗಂಧರ್ವು ಚಿ - ಸಂಜಯು , ರುದ್ರ ದೇವಾಲೆ ಅಂಶುಚಿ - ಶಿಖಂಡಿ , ಹಹಾ ಮ್ಹಳ್ಳೆಲೆ ಗಂಧರ್ವಚಿ - ವಿರಾಟರಾಯು , ಹುಹೂ ಮ್ಹಳ್ಳೆಲೆ ಗಂಧರ್ವ್ ಚಿ - ದ್ರುಪದರಾಯು , ಶಿಶ್ಕಿಂಬ ಮ್ಹಳ್ಳಲೊ ರುದ್ರ ದೇವಾಲೆ ಅಂಶುಚಿ - ಕೃಪಾಚಾರ್ಯ , ಮಹಾಭಿಷ ಮ್ಹಳ್ಳಲೋ ಗಂಧರ್ವ ಚಿ - ಶಂತನು ರಾಯು , ಶ್ರೀಮಾನ್ ನಾರಾಯಣುಚಿ - ಕೃಷ್ಣು , ಆದಿಶೇಷು ಚಿ - ಬಲರಾಮು , ನರಾ ಮ್ಹಳ್ಳೆಲೆ ಮುನೀಶ್ವರುಚಿ - ಅರ್ಜುನ , ಮಹಾನಿಷ್ಠ ವಾಯುದೇವು ಚಿ - ಭೀಮಸೇನ ,ಅಶ್ವಿನಿ ದೇವಾಲೆ ಪುತ್ರ ಸತ್ಯು ಅನಿ ದಸ್ರು - ನಕುಲ ಸಹದೇವ ಜಾವ್ನು ಜನ್ಮಾ ಅಯಿಲೆ೦ತಿ , ಮೌದ್ಗಲ್ಯ ಮಹರ್ಷಿಲೆ ಬಾಯ್ಲ್ ಇಂದ್ರ ಸೇನಾಚಿ - ದ್ರೌಪದಿ , ಚಂದ್ರು ಚಿ - ಅಭಿಮನ್ಯು , ಅಗ್ನಿ ದೇವು ಚಿ - ದೃಷ್ಟದ್ಯುಮ್ನ , ರುದ್ರ ಚಿ - ಅಶ್ವಥಾಮ , ಸಾಕ್ಷಾತ್ ಸೂರ್ಯ ದೇವಾಲೆ ಅಂಶುಚಿ - ಕರ್ಣ , ದ್ವಾಪರ ಯುಗಾ ಅಂಶುಚಿ - ಶಕುನಿ , ... ಪುನರಪಿ ಜನನಂ ಪುನರಪಿ ಮರಣಂ .. ತುಮ್ಮಿ ಪೂರಾ ಜನಾನಿ ನಿರ್ಮಲ ಮನ ದೊವೊರ್ನ್ , ಗಂಗಾ ಸ್ನಾನ ಕೋರ್ನ್ ಆಜಿ ರಾತ್ರಿ ಯೆವ್ಚೆ .. ಮರಣ ಪವ್ವಿಲೆ ವೀರ ಲೋಕಾಂಕ ಹೇ ಭುಯಿಂಚೇರಿ ಅಪ್ಪಯಿತಾ ... ತುಮ್ಮಿ ಸರ್ವಾನಿ ತಂಗೆಲೆ ವೊಟ್ಟು ಸಂವಾದು ಕೋರ್ಯೆತ " ಮ್ಹಳ್ಳಲೊ ವ್ಯಾಸ ಮಹರ್ಷಿ .
ತ್ಯೆ ರಾತ್ರಿ ... ಗಂಗೆಂತು ಬುಡ್ಡುನ್ ಸರ್ವಾನಿ ಸ್ನಾನ ಕೊರ್ನ್ ತಯ್ಯಾರಾ ಝಲ್ಲೆ . ವ್ಯಾಸ ಮಹರ್ಷಿ ಏಕ ಫಾತ್ರಾ ವೈರಿ ಕೃಷ್ಣಾರ್ಜಿನ ಘಾಲ್ನ್ ತಪೋ ಮಗ್ನ ಝಲ್ಲೋ . ತ್ಯೆ ದಿವಸು ಪುನ್ನವ .. ರತ್ರೀ ಪುನ್ನವೇ ಉಜ್ವಾಡಾಕ ಗಂಗೆ ನಂಯ್ಯ್ ಚೆ ವೈರಿ ಚ೦ಮ್ಕತಾಚಿ ... ಶತಕೌರವ , ಕರ್ಣ , ಕುರು ವಂಶಾ ವೀರ ಲೋಕು ಕುರುಕ್ಷೇತ್ರ ಯುದ್ಧಾ೦ತು ಮರಣ ಪವ್ವಿಲೆ ಪಾಂಡವ ಬಂಧು ಮಿತ್ರ ... ವ್ಯಾಸ ಮಹರ್ಷಿಲೆ ತಪೋ ಬಲಾನ ಭುಂಯಿಚೆರಿ ಯೇವ್ನ್ ಪಾವ್ಲೀಂತಿ . ದಾಯಾದಿ ಲೋಕು ಸರ್ವ ವೊಟ್ಟು ಝಲ್ಲೆ . ವ್ಯಾಸ ಮಹರ್ಷಿನ ಧ್ರತರಾಷ್ಟ್ರಾಕ ಏಕ ದಿವಸಾ ಮಟ್ಟಾಕ ಕ ದೃಷ್ಠಿ ದಿಲ್ಲಿ . ಧ್ರತರಾಷ್ಟ್ರಾಲೆ ಸುನ್ನಾ೦ಕ ಮಸ್ತ ಸಂತೋಷು ಝಲ್ಲೊ . ಸರ್ವ ಲೋಕಾಂಕ ಎಕ್ಲೆ೦ಕ - ಎಕ್ಲೆ ಪೊಳೊನ್ ಸಂತೋಷು ಝಲ್ಲೋ ... ಮನಾ ಆನಂದ ಝಲ್ಲೆ ... ನಿರ್ಮಲ ಹೃದಯಾನಿ .. ಪ್ರಫುಲ್ಲಿತ ಮಾನಾನಿ ಸ್ವಾಗತ ಕೆಲ್ಲೆ . ಕರ್ಣಾಕ ಪೊಳೊನ್ ಧರ್ಮಜಾ ಕ ಅನಿ ಅರ್ಜುನಾಕ ಸಂತೋಷು ಝಲ್ಲೆ . ಆಲಿಂಗನ ಕೋರ್ನು ಮರ್ಯಾದಿ ದಕ್ಕಯಿಲೆ ... ಶಾಂತ ಮನಾನ ಪ್ರೀತಿ ದಕ್ಕಯಿಲಿ .. ಪಯ್ಯಾರಿ ಫೋಣು ಕ್ಷಮಾಪಣ ಮಾಗ್ಲೀಂತಿ . ತಶೀ೦ಚಿ ಧುರ್ಯೋಧನ , ದುಃಶ್ಯಾಸನ ಕೌರವ ದಾಯಾದಿ ಲೋಕಾನಿ .. ಪಾಂಡವಾಂಕ ಪೊಲೊನ್ ಆಲಿಂಗನ ಕೊರ್ನ್ ಮರ್ಯಾದಿ ಕೆಲ್ಲಿ . ದೊಳೆ೦ತು ಜವ್ವೋ ಮನಾಂತು ಜವ್ವೋ .. ಹೃದಯಂತು ಥೊಡೆ ಪುಣಿ ಫುಳ್ಳೆ ದಾಯಾದಿ ವೈರತ್ವ , ಹಠ , ಈರ್ಶಾ , ಹಗೆ , ಕೆಲ್ಲೆಲೆ ಪಾಪಾತ್ಮಕ ಕಾರ್ಯ ವಿಷಯಾನ ಲವಲೇಶ ಚಿಂತಾ ದಿಸ್ಸನಿ ... ಶಾಂತ .. ಹಿಮಾದ್ರಿ ಶಾಂತಿ ದೈವೀಕ ಶಾಂತಿ ದಿಸ್ತಾಶಿಲೆ ತೊಂಡಾರಿ . ಉಜ್ಜೆ ದುಕೂನ್ ಕಳ್ಳೆಲೆ .. ಫಳ್ - ಫಳ್ಚೆ ಬಂಗರ ಶೇ ದಿಸ್ತಾಶಿಲೀಂತಿ ... ಧರ್ಮಜಾ ಕ ಆಶ್ಚರ್ಯ ಝಲ್ಲೆ . ನಿಷ್ಕಳಂಕ ಮನ .. ಪ್ರೀತಿ .. ಅನುಕಂಪ ಭರ್ಲೆಲೆ ಮಮತಾ ಭೋರ್ನು ಎಕ್ಲೇಕ - ಎಕ್ಲೆ ಆಲಿಂಗನ ಕೋರ್ನು , ಪೊಳೋನ್ , ತಾಂಗೆಲೆ ಪ್ರೀತಿ ಮಮತಾ ಎದುರ .. ದ್ರವಿತ ಝಲ್ಲೆ . ಕುರು ಪಾಂಡವ ದ್ವೇಷ ವಿಸೋರ್ನ್ ಏಕ ಝಲ್ಲೆ . ಕುಂತಿ ಕ ಕರ್ಣಾಕ ಪೊಳೊನ್ ಮಾತೃ ಹೃದಯ ಬೋರ್ನ್ ಅಯಿಲೆ ಸಂತೋಷಾರಿ .. ಕರ್ಣಾಲೆ ಮತ್ತೆ ಧೋರ್ನ್ , ನಿಡ್ಲಾರಿ ಉಮ್ಮೋ ದೀವ್ನ್ ಮಾತೃ ವಾತ್ಸಲ್ಯ ದಕ್ಕಯಿಲೆ ... " ಮಾಫಿ ಕರಿ ಬಳಾ " ಅಂತರಾತ್ಮಾ ದುಕೂನ್ ಸಹಜ ಜಾವ್ನ್ ಮಾಫಿ ಮಾಗ್ಲಿ .ಧ್ರತರಾಷ್ಟ್ರಕ ,ತಗೆಲೆ ಚೆರ್ಡುವಾಂಕ ಪೊಳೊನ್ ಸಂತೋಷು ಝಲ್ಲೋ . ಸೂರ್ಯೋದಯ ಜಾವ್ಚೆ ವೇಳು ಆಯಿಲೆ ... ವ್ಯಾಸ ಮಹರ್ಷಿ ನ ಸರ್ವಾಂಕ ತನ್ನಿ ಆಯ್ಯಿಲೆ ಕಾಮ ಝಲ್ಲೆ ಮೋಣು ಸೂಚನಾ ದಿಲ್ಲಿ . ಕುರು ಸುನ್ನಾ೦ಕ ತಾಂಗೆಲೆ ಬಮ್ಮಣಾ೦ಗೆಲೆ ವೊಟ್ಟು ವೊಚ್ಯೇತ ಮೋಣು ಅನುಮತಿ ದಿಲ್ಲೆ . ತ್ಯೆ ಪ್ರಮಾಣೇರಿ ..ತಾಂಗ್ - ತ೦ಗೆಲೆ ಬಮ್ಮಣಾ೦ಗೆಲೆ ಹಾತು ಧೋರ್ನ್ ಗಂಗೆಂತು ಪ್ರವೇಶ ಕೆಲ್ಲೆ.. ಇಹ ದೇಹ ಸೋಣು ಸ್ವರ್ಘಸ್ತ ಝಲ್ಲೆ .ಉಜ್ವಾಡು ಯೆತ್ತನ ಧ್ರತರಾಷ್ಟ್ರಾಲೆ ದೃಷ್ಠಿ ಮಾಯಾ ಝಲ್ಲಿ. ವ್ಯಾಸ ಮಹರ್ಷಿ ಸರ್ವಾಂಕ ಆಶೀರ್ವಾದ್ ಕೊರ್ನ್ ಅಂತರ್ಧಾನ ಝಲ್ಲೋ .
ಏಕು ದಿವಸು ಆಶ್ರಮಾ ಸುತ್ತು .. ರನ್ನಾ೦ತು ಮಹಾ ಅಗ್ನಿ ಪ್ರವೇಶು ಝಲ್ಲೋ . ರನ್ನಾ೦ತುಲೆ ವನ್ಯ ಮೃಗ ಜೀವರಾಶಿ ಭಸ್ಮ ಝಲ್ಲೆ . ತಾರಕ ಸ್ತಾಯಿ ಉಜ್ಜೆ ಜ್ವಾಲಾ ಭಯಂಕರ ಜಾವ್ನ್ ಜೋಳ್ನ್ ವನ್ಯ ಸಂಪದ ಲಾಸ್ಸುನ್ ನಾಶ ಝಲ್ಲೆ . ಧಗ ಧಗನಿ ಜೋಳ್ಚೆಉಜ್ಜೆ ಜ್ವಾಲಾಂತುಅರಣ್ಯ ಲಾಸ್ಸುನ್ ಭಸ್ಮ ಝಲ್ಲೆ . ಪೊಳೋಚೆ- ಪೋಳೋ ಚೆ ಭಿತರಿ .. ಆಶ್ರಮಾಕ ಉಜ್ಜೋ ಲಾಗ್ಲೊ ... ಧ್ರತರಾಷ್ಟ್ರ , ಗಾಂಧಾರಿ , ಕುಂತಿ , ಸಂಜಯ ಸಮೇತ .. ಮಹಾರುದ್ರ ,ಭಯಾನಕ ಉಜ್ಜೇ೦ತು ಭಸ್ಮ ಝಲ್ಲಿ೦ತಿ .ಹೇ ದುರ್ಘಟನಾಜಲ್ಲೆಲೆ ಸ್ವಲ್ಪ ದಿವಸಾ ನಂತರ ಪಾಂಡವಾಂಕ ಮುನಿ ಲೋಕಾಲೆ ನಿಮಿತ್ಯ ವಾರ್ತಾಮೆಳ್ಳಿ. ಮರಣ ವಾರ್ತಾ ಅಯಿಕುನ್ ಮಸ್ತ ದುಃಖ ಝಲ್ಲೆ . ಪಾಂಡವಾನಿ ಪಿಂಡಪ್ರದಾನ , ಧನ ಕನಕ ಗೋ ದಾನ ಕೊರ್ನ್ ಸ್ವರ್ಘಸ್ತ ಆತ್ಮಾ೦ಕ ಶಾಂತಿ ಮೇಳೋ .. ಮೋಣು ಪ್ರಾರ್ಥನಾ ಕೆಲ್ಲಿ .
ಉಮಾಪತಿ
No comments:
Post a Comment