MAHABHARATH
Part - 76 ( Konkani Bhashentu )
BABRU VAAHANA / ಬಬ್ರು ವಾಹನ
ವ್ಯಾಸ ಮಹರ್ಷಿನ ಸಂಘಿಲ್ ತಶೀ ಧರ್ಮ ರಾಯಾನ ಅಶ್ವಮೇಧ ಯಜ್ಞ ಪ್ರಾರಂಭ ಕೆಲ್ಲೆ . ಯಾಗಾಶ್ವಾಕ ಪೂಜಾ ಕೊರ್ನ್ , ಸರ್ವ ಆಲಂಕಾರ ಕೋರ್ನು ... ಅರ್ಜುನಾಕ ಯಾಗ ಅಶ್ವ ರಕ್ಷಣೆಕ ರಾಬ್ಬೊನ್ , ನಿಡ್ಲಾರಿ ವೀರ ತಿಲಕ ದೊವೊರ್ನ್ , ವಿಜಯ ಮಾಲ ಘಾಲ್ನ್ ... " ಅರ್ಜುನಾ .. ! ಯಾಗ ಅಶ್ವಾಕ ರಕ್ಷಾ ಜಾವ್ನ್ ಅಸ್ಸುಕಾ . ಖ೦ಯೀ ಅನಾವಶ್ಯಕ ಜಾವ್ನ್ ರಕ್ತ ಪಾತ ಜವ್ವುನಜ್ಜ ... ಸರ್ವಾಲ್ ಮಿತ್ರತ್ವ ಅಂಮ್ಕಾ ಜಾಯಿ ... ಯಾಗ ಕರ್ತಾನಾ ಸರ್ವಾನಿ ಯೇವ್ನ್ ಅಮ್ಗೆಲೆ ಆತಿಥ್ಯ ಸ್ವೀಕಾರ ಕೋರ್ಕಾ ಮೋಣು ನಿವೇದನ ಕರಿ ... ಅನಾವಶ್ಯಕ ಜಾವ್ನ್ ಯುದ್ಧ ನಕ್ಕಾ " ಮ್ಹಳ್ಳಲೊ ಧರ್ಮಜಾ . ಸರ್ವಾಂಕ ನಮಸ್ಕಾರ್ ಕೊರ್ನ್ , ಆಶೀರ್ವಾದ ಘೇವ್ನ್ , ರಥಾ - ರೂಢಿ ಜಾವ್ನ್ , ಸೈನ್ಯ ಸಮೇತ ಜಾವ್ನ್ ಅರ್ಜುನ್ ಭಾರ್ ಸರ್ಲೊ .
ಯಾಗಾಶ್ವ ಪೂರ್ವ ದಿಶಾ ಕಡೆ ಘು೦ವ್ನ್ ತ್ರಿಗರ್ತ ಮ್ಹಳ್ಳೆಲೆ ರಾಜ್ಯಾಕ ಪಾವ್ಲೋ . ತ್ರಿಗರ್ತ ರಾಯ , ಜಾವ್ಕಾ ಮೊಣುಚಿ .. ಯಾಗಾಶ್ವಕ ಬಂಧನ್ ಕೊರ್ನ್ ಯುದ್ಧಾಕ ಆಯಿಲೀ೦ತಿ . ಅರ್ಜುನಾಲೆ ಎದ್ರಾಕ ಯುದ್ಧ ಕೋರ್ನ್ ಶರಣ ಝಲ್ಲಿಂತಿ . ಯಾಗಾ ಘೊಡೊ .. ಪ್ರಗ್ ಜೋತಿಷ ರಾಜ್ಯಾ೦ತು ಯೇವ್ನ್ ಪಾವ್ಲೊ . ಹಾಂಗಾ ರಾಯು ಭಗದತ್ತಾನ ಕುರುಕ್ಷೇತ್ರ ಯುದ್ಧಾ೦ತು , ಧುರ್ಯೋಧನ ಪಕ್ಷಾಂತು ರಬ್ಬುನ್ ಯುದ್ಧ ಕೆಲ್ಲೆಲೆ . ಪಾಂಡವಾಂಗೆಲ್ ನಿಮಿತ್ಯ ಯುದ್ಧಾ೦ತು ಮರಣ ಪಾವ್ಲೋ . ತ್ಯೆ ಕೋಪಾನ ಭಗದತ್ತ ರಾಯಾಲೆ ಪೂತು ವಜ್ರದತ್ತಾನ .. ಯಾಗಾಶ್ವಕ ಬಂಧನ್ ಕೆಲ್ಲೆ . ಅರ್ಜುನಾನ ಯುದ್ಧಾ೦ತು ಪರಾಜಯ ಕೊರ್ನ್ " ವಜ್ರದತ್ತಾ ..! ಧರ್ಮರಾಯಾಲೆ ಆಜ್ಞಾ ಪ್ರಕಾರ ತುಕ್ಕ ಜೀವ ದಾನ ದಿತ್ತಾ ... ಶತ್ರುತ್ವ ಸೋಣು ಅಶ್ವಮೇಧ ಯಜ್ಞಾಕ ಯೇವ್ನ್ .. ಆಮ್ಗೆಲೆ ಮಿತೃತ್ವ ಸ್ವೀಕಾರ ಕರಿ " ಮೋಣು ಸಂಘುನ್ ಪ್ರಾಣ ದಾನ ಕೆಲ್ಲೆ .
ಸಿಂಧು ರಾಜ್ಯ ಸೈ೦ಧವಾಲೆ ಪೂತು ... ಅಶ್ವಮೇಧ ಯಜ್ಞ ಘೊಡೆಕ ಧೋರ್ನ್ ಯುದ್ಧ ಆರಂಭ ಕೆಲ್ಲೆ . ಯುದ್ಧಾ೦ತು ಹೃದಯ ಸ್ಪಂದನ ಜಾವ್ನ್ ಸ್ವರ್ಘಾ ಕ ಪಾವ್ಲೋ . ಸೈ೦ಧವಾಲೆ ಬಾಯ್ಲ್ .. ದುಶ್ಶಲಾ ದೇವಿ .. " ಅಣ್ಣಾ ತುಗ್ಗೆಲ್ ಹತ್ತಾ೦ತು ಮಿಗ್ಗೆಲೆ ಬಾಮ್ಮುಣು ಮರಣ ಪಾವಲಾ . ಅತ್ತ ಮಕ್ಕಾ ಅನಿ ಮಿಗೆಲೆ ರಾಜ್ಯಾಕ ವಂಶ ಆಧಾರು ಮಿಗೆಲೊ ನತ್ತು ಮಾತ್ರ ಅಸ್ಸ . ತಕ್ಕಾ ರಕ್ಷಣಾ ದೀವ್ಕಾ " ಮೋನು ಪ್ರಾರ್ಥನಾ ಕೆಲ್ಲಿ . ತಿಕ್ಕಾ ಸಮಾಧಾನ ಕೊರ್ನ್ , ಯಾಗಾಕ ಯೆವ್ಕಾ ಮೊಣು ಆಮಂತ್ರಣ ಕೊರ್ನ್ ಮುಕಾರ್ಸುನ್ ಗೆಲ್ಲೊ ಅರ್ಜುನ್ .
ಅರ್ಜುನ್ ತೀರ್ಥ್ ಯಾತ್ರಾ ಕರ್ತಾ ಆಸ್ತಾನಾ .. ಮಣಿಪುರ ರಾಯು ಚಿತ್ರವಾಹಕ ರಾಯಾಲೆ ಏಕ್ಲೀ ಧೂವ ಚಿತ್ರಾ೦ಗದಾಕ ವ್ಹರ್ಡಿಕ ಝಲ್ಲೋಲೊ . ವ್ಹರ್ಡಿಕೆ ಪೊಷಿ ಫೂಡೆಚಿ .. ಚಿತ್ರವಾಹಕ ರಾಯಾನ ಅರ್ಜುನಾಲೆ ವೊಟ್ಟು ಸಂಧಿ ಕರಾರ ಕೊರ್ನ್ ಘೆತ್ತಿಲೆ . ತ್ಯೆ ಕರಾರ ಕಸಲೆ ಮ್ಹಳ್ಳೇರಿ .. ವ್ಹರ್ಡಿಕಾ ಝಲ್ಲೆ ನಂತರ ಚಿತ್ರಾ೦ಗದಾಕ ಬಮ್ಮಣಾಲೆ ಘರಾಕ ಪೆಟಯಿನಾತಿ . ಚಿತ್ರಾ೦ಗದೇಕ ಜಾವ್ಚೆ ಚೇರ್ಡಾಕ ಆಪ್ಣೆಕ ದತ್ತ ದೀವ್ಕಾ ... ಜಾವ್ಚೆ ಚೆರ್ಡಾ ವೈರಿ , ಅರ್ಜುನಾ ಕ ಕಸಲೆಯ್ ಅಧಿಕಾರ ಅಸ್ಸ ನಾ ... ಅಸಲೆ ಕರಾರಾಕ ಸಮ್ಮತಿ ದೀವ್ನ್ ಚಿತ್ರಾ೦ಗದೆ ಕ ವ್ಹರ್ಡಿಕ ಝಲ್ಲಲೊ ಅರ್ಜುನ್ . ಕುರುಕ್ಷೇತ್ರ ಯುದ್ಧಾ೦ತು .. ಅರ್ಜುನ ಅನಿ ಉಲೂಪಿಕ ಜಲ್ಲಲೊ ಇರಾವಂತ , ಸುಭದ್ರೆಕ ಜಲ್ಲಲೊ ಅಭಿಮನ್ಯು , ಯುದ್ಧ ಕೊರ್ನ್ ವೀರ ಮರಣ ಪ್ರಾಪ್ತಿ ಝಲ್ಲೀ೦ತಿ . ಜಲ್ಲೇರಿ .. ಚಿತ್ರಾ೦ಗದೆ ಜಲ್ಲಲೋ ಬಭ್ರುವಾಹನಾ ನ ಮಾತ್ರ ಖಂಚೇಯ್ ಸಹಕಾರ್ ದೀನಿ ಕುರುಕ್ಷೇತ್ರ ಯುದ್ಧಾಕ ... ಕಸಲೆಯ್ ನಮುನೆ ಸಹಾನುಭೂತಿ ದಕ್ಕಯಿನಿ . ' ಪಾಂಡವ ಕೋಣ್ ಕೀ ... ಹಾಂವ ಕೋಣ್ ಕೀ ' ಮ್ಹಳ್ಳೆಲೆ ನೀತಿ ದಕ್ಕಯಿಲಿ . ಅಪ್ಣೆನ ಕರಾರಾ ಪ್ರಕಾರ ಚಿತ್ರ ವಾಹಕ ರಾಯಾಕ ( ಅಜ್ಜೋ ) ದತ್ತ ಗೆಲ್ಲೆಲೆ ನಿಮಿತ್ಯ ... ಅರ್ಜುನಾ ನ ಪಿತೃ ಸ್ಥಾನ ಯೇಕ್ ರೀತ್ಯೇರಿ ನಿರ್ಲಕ್ಷ್ಯ ಕೆಲ್ಲೆಲೆ . ತ್ಯೆ ವೆಳ್ಯೇರಿ , ಅರ್ಜುನಾಕ ಮಸ್ತ ದುಃಖ ಝಲ್ಲೆಲೆ . ದೋಸ್ತ್ , ಆತ್ಮೀಯ ಲೋಕು , ದೂರ್ಚೆ ಸಂಬಂಧಿ ಲೋಕ , ಬಂಧು ಅಭಿಮಾನ ಲೋಕ , ಪಾಂಡವಾಂಕ ಯುದ್ಧಾ೦ತು ಸಹಾಯು ಕೆಲ್ಲಾ ... ತ್ಯೇ ಮಾತ್ರ ನಯ್ಯ್ .. ಯುದ್ಧ ಕೋರ್ನು ಪಾಂಡವಾಂಗೆಲ್ ಖತಿರಿ ಆತ್ಮ ಸಮರ್ಪಣ ಕೆಲ್ಲಾ . ಅಷ್ಶಿ ಅಶಿಲೆ ತೆದ್ನಾ ... ಮಣಿಪುರಾ ಚಿತ್ರಾ೦ಗದೆ ಕ ಮಿಗ್ಗೆಲೆ ನಿಮಿತ್ಯ ಜನ್ಮಾ ಆಯ್ಯಿಲೆ ಬಭ್ರುವಾಹನಾ ನ ಆಮ್ಗೆಲೆ ತರ್ಪೆನ ದೊಳೆ ಉಬ್ಬಾರ್ನ್ ತಾಯಿ ಪೋಲಾಯಿನಿ ಮೂ .. ! ಮ್ಹಳ್ಳೆಲೆ ಮನೋ ವೇದನಾ ಅರ್ಜುನಾ ಕ ಅಶಿಲಿ , ದತ್ತು ದಿಲ್ಲೆಲೆ ನಿಮಿತ್ಯ ಚಿತ್ರಾ೦ಗದೇಕ ಮನಾ ದುಕುನ್ ಕಾಣು ಸೊಳ್ಳಾ . ಹಕ್ಕಾ ಮೊಣ್ಚೆ .. ವಿಧಿ ಮೊಣು .
ಬಭ್ರುವಾಹನ , ಅರ್ಜುನಾ ಮ್ಹಣ್ಕೆ , ಅಭಿಮನ್ಯುಕ ಸರಿ ಸಮಾನ ಜಾವ್ನ್ ಬಿಲ್ ವಿದ್ಯೆಂತು ಪಾರಂಗತು ಝಲ್ಲಾ . ಬಿಯ್ಯಳಾ ಮ್ಹಣ್ಕೆ ಸಶಿ ಜಾವ್ಚೆ .. ಸರ್ವ ಸಾಧಾರಣಾ ವಿಷಯು .... ರೂಪಾಂತು ... ಷೋವ್ ರ್ಯಾಂತು ... ಪರಾಕ್ರಮಾಂತು ... ಉಲ್ಲೋಚೆ ಉತ್ತರಾಂತು .. ಹಾವ ಭಾವ ವೇಷ ಭೂಷಣಾಂತು ... ದೇಹ ಛಾಯೆಂತು ... ಆಲೊಚನಾ೦ತು... ಅರ್ಜುನಾಲೆ ತದ್ರೂಪ . ಆನ್ನೇಕ ವಿಷಯು ಕಸಲೆ ಮ್ಹಳ್ಳೇರಿ ... ಚಿತ್ರಾ೦ಗದೆಕ ವ್ಹರ್ಡಿಕ ಝತ್ತರಿ ... ಅರ್ಜುನ್ , ಏಕ ಪೋಟಿ ಪುಣಿ ಪೋಳೋಚ್ಯಾಕ ಏನಿ . ಇಂದ್ರಪ್ರಸ್ತ ರಾಜ್ಯ ನಿರ್ಮಾಣ ಕಾರ್ಯಾಂತು , ವನವಾಸಾಂತು , ಮಗ್ನ ಜಾವ್ನು ಅಶಿಲೆ ತೆದ್ನಾ ... ವರ್ಷಾ ವೈರಿ ವರ್ಷ೦ ನಿಸೋರ್ನ್ ಗೆಲ್ಲೆಲೆ ಕಳ್ನಾಶಿ ಗೆಲ್ಲೆ . ಕೆದನಾಯ್ ಮಣಿಪುರ ರಾಜ್ಯಾ ಕ ಯೆವ್ಚ್ಯಾ ಜಾಯ್ನಿ ಅರ್ಜುನಾಕ . ಬಭ್ರುವಾಹನ ದೂರ ಜಾವ್ಚ್ಯಾಕ ಹೇವಾ೦ಯಿ ಏಕ ಕಾರಣ ಝಲ್ಲೆ . ಚಿತ್ರಾ೦ಗದೆ ನ ಪುತ್ತಾನ ಹೊಡು ಝಲ್ಲೆ ನಂತರ ... ವೈರಾಗ್ಯ ಸ್ವೀಕಾರ ಕೆಲ್ಲಾ . ಚಿತ್ರವಾಹಕಾ ನ .. ಬಭ್ರುವಾಹನಾಕ , ಮಣಿಪುರ ರಾಜ್ಯಾಕ ರಾಯು ಜಾವ್ನ್ ನಿಯುಕ್ತ ಕೆಲ್ಲಾ . ಕುರು - ಪಾಂಡವ ಯುದ್ಧಾ ವಿಷಯು ... ಚಿತ್ರವಾಹಕಾಕ ರಾಯಾಕ ಗೊತ್ತಶಿಲೆ . ನಾತ್ವಾ ವೈರಿ ಮೋಗು ... ಚಿತ್ರ ವಾಹಕ ರಾಯಾ ನ ಕುರುಕ್ಷೇತ್ರ ಯುದ್ಧಾ ವಿಷಯು ಕಸಲೆಯ್ ಖಬ್ಬರ , ಬಭ್ರುವಾಹನಾ ಕ ಕೋಳು ನಜ್ಜ ಮೋಣು ಜಾಗ್ರತೆ ಘೆತ್ತಿಲಿ . ಪಿತೃ ವಾತ್ಸಲ್ಯ ಕಸಲೆ ಮ್ಹಳ್ಳೆಲೆ ಅನುಭವ ನತ್ತಿಲೆ ಬಭ್ರುವಾಹನಾನ , ಕುರುಕ್ಷೇತ್ರ ಯುದ್ಧಾ ವಿಷಯು ಲೆಕ್ಕಾಕ ಘೇನಿ . ಬಭ್ರುವಾಹನ ರಾಯು ಝತ್ತರಿ ಚಿತ್ರಾ೦ಗದ ದೇವಿನ ಶೈವ ಧರ್ಮ ಸ್ವೀಕಾರ ಕೊರ್ನ್ , ಶಿವ ಭಕ್ತಿಣಿ ಜಾವ್ನ್ , ರನ್ನಾ೦ತು ಸನ್ಯಾಸಿ ಜಾವ್ನ್ , ತಿಗೆಲೆ ಚಿ ಆಶ್ರಮ ಬಂಧುನ್ , ವಾನಪ್ರಸ್ತ ಜೀವನ ಕರ್ತಾ ಅಸ್ಸ .
ಅತ್ತ ಯಾಗಾ ಘೋಡೊ ಮಣಿಪುರ ರಾಜ್ಯಾ೦ತು ಆಯಿಲಾ . ಅರ್ಜುನಾಲೆ ಯಾಗಾಶ್ವ , ಮಣಿಪುರ ರಾಜ ಭಟಾನಿ ಧೋರ್ನ್ ರಬ್ಬಯಿಲಾ . ಚಕ್ರವರ್ತಿ ಧರ್ಮ ರಾಯಾಲೆ ಯಾಗಾಶ್ವ ಧರ್ಲೆಲೆ , ತಾಜ್ಜೆ ರಕ್ಷೆಕ ಜಾವ್ನ್ .. ಅರ್ಜುನಾನ ಅಯ್ಯಿಲೆ ವಿಷಯು ಐಕುನ್ ಬಭ್ರುವಾಹನಾಕ ಸಂತೋಷು ಝಲ್ಲೊ . ಮಕ್ಕಾ ಜನ್ಮು ದಿಲ್ಲೆಲೊ ಅರ್ಜುನಾಕ ಹಾಂವೆ ಕೆದನಾಯ್ ಪೊಳೈನಿ .. ಅತ್ತ ಪೊಳೋಚ್ಯಾ ಮೆಳ್ಳಾ ನವೆ ... ! " ಮಹಾಮಂತ್ರಿ ... ! ಪಾಂಡವಾಂಗೆಲ್ ಅಶ್ವ ಮೇಧಾ ಯಾಗಾ ಘೋಡೊ ಆಮ್ಗೆಲೆ ರಾಜ್ಯಾ೦ತು ಯೇವ್ನ್ , ರಾಜ ಭಾಟಾನಿ ಧೋರ್ನ್ ರಬ್ಬಯಿಲಾ ಮೋಣು ಆಯಿಕಲಾ . ಅಶ್ವ ರಕ್ಶಕು ಜಾವ್ನ್ ವೀರಾಧಿ ವೀರ , ಅಪ್ರತಿಮ ಧನುರ್ ಧಾರಿ , ಪರಮ ಶಿವಾ ಲಗ್ಗಿ ಯುದ್ಧ ಕೊರ್ನ್ ಪಾಶುಪತಾಸ್ತ್ರ ಘೆತ್ತಿಲೊ , ಮಿಗೆಲೆ ಪುಣ್ಯ ಮೂರ್ತಿ , ಜನ್ಮದಾತಾಕ ಅಖಂಡ ಮರ್ಯಾದಿ ಸಮೇತ ಗೌರವ ದೀವ್ನು ಸನ್ಮಾನ ಕೋರ್ಕಾ ಆನಿ ಪಿತೃ ಋಣ ಪಾವ್ವೊಕಾ ಮೋಣು ಅಸ್ಸ . ಮಹಾಮಂತ್ರಿ .. ! ಸರ್ವ ಸನ್ಮಾನ ಕಾರ್ಯಾಕ ತಯ್ಯಾರಿ ಕೋರ್ಕಾ " ಮೋಣು ಆಜ್ಞಾ ದಿಲ್ಲಿ .
ಹಜಾರ ಇತ್ಲೆ ಸೈನ್ಯ , ರಥ , ಮಂಗಳ ಸುವರ್ಣ ಕಲಶ .. ಸುಮಂಗಲಿಯಾಂಕ ಪುಷ್ಪ ಹಾರ ಧೋರ್ನ್ , ಸುಗಂಧ ದ್ರವ್ಯ , ಫಲ ಪುಷ್ಪ , ಬಂಗರಾ ನಾಣ್ಯ ಧೋರ್ನ್ ಯಾಗಾಶ್ವಾ ಎದ್ರಾಕ ದೊವೊರ್ನ್ ಅರ್ಜುನಾಕ ಪೋಳೋಚ್ಯಾ ಅಯಿಲೊ ಬಭ್ರುವಾಹನು . ಅಪಾರ ಪರಿವಾರ ಪೋಳೋನ್ ಮಣಿಪುರ ರಾಯು ಯುದ್ದಾಕ ಯೆತ್ತಾ ಮೋಣು ಲೇಕ್ಲೇ ಅರ್ಜುನಾನ . ಯಾಗಾಶ್ವ ಎದ್ರಾಕ ಹಳ್ಳೆಲೆ ನಗ ನಾಣ್ಯ ದೊವೊರ್ನ್ ಯೆವ್ಚೆ ನಮ್ಯೂನೋ ಪೊಳೊನ್ ವಾಪಸ್ ಕೊರ್ನ್ ಸ್ವಾಗತ ಕೊರುಂಕ ಅಯ್ಲೆಂತಿ ಮೋಣು ಲೆಕ್ಲೆ . ಅರ್ಜುನಾಲೆ ಗುಡಾರ ಸ್ವಲ್ಪ ದೂರ ಸೈನ್ಯಾ೦ಕ ರಥಾಕ ರಾಬ್ಬೊನ್ , ಸುಮಂಗಲಿಯಾ ವೊಟ್ಟು .. ಪುಷ್ಪ ಹಾರ ಘೇವ್ನ್ ಗುಡಾರಾ ಭಾಯಿರಿ ರಾಬ್ಲೊ ಬಭ್ರುವಾಹನು . ಅರ್ಜುನಾ ನ ಬಾಯಿರಿ ಯೇವ್ನ್ ಪೊಳೈಲೆ . ಬಭ್ರುವಾಹನಾಕ ಪೊಳೊನ್ ಆಶ್ಚರ್ಯ ಝಲ್ಲೆ ... ತಗೆಲೆ ರೂಪ .. ಗಾಂಭೀರ್ಯ , ಅಭಿಮನ್ಯು ಮ್ಹಣ್ಕೆ ದಿಸ್ತಾ ಅಸ್ಸ ! ಅರ್ಜುನಾಕ .. ಬಭ್ರುವಾಹನಾ ಪೊಳೊನ್ ಚಿತ್ರಾ೦ಗದೆಲೆ ಪೂತು ಮೋಣು ಕಳ್ಳೆ . ದೋನಿ ಮಿನುಟ ಉತ್ತರಂ ಏನಿ ... " ಕೋಣ ತೂ .. ? " ನಿ೦ಮ್ಗಿಲೆ ಅರ್ಜುನಾನ . " ಮಹಾಭಾಗಾ .. ! ಹನ್ನಿ ಮಣಿಪುರ ರಾಯ ... ಬಭ್ರುವಾಹನ ... ಚಿತ್ರಾ೦ಗದೆ - ಅರ್ಜುನಾಲೆ ಪುತ್ರ . ತುಕ್ಕ ಸತ್ಕಾರ ಕೊರ್ನ್ ಅಂತಃಪುರಾಕಾ ಅಪ್ಪೋನ್ ವೊರ್ಚಾಕ ಅಯಿಲೀ೦ತಿ .. " ಮ್ಹಳ್ಳಲೊ ಮಹಾಮಂತ್ರಿ . " ಧರ್ಮರಾಯಾಲೆ ಯಾಗಾಶ್ವ ತುಮ್ಮಿ ಬಂಧಿ ಕೆಲ್ಲಾ ನವೆ ತುಮ್ಮಿ .. ? ಭ೦ಧಿ ಕೆಲ್ಲೆಲೆ ವೀರ ಹತ್ತಾ೦ತು ಆಯುಧ ಘೇವ್ನ್ ಭೇಠಿ ಕೋರ್ಕಾ ಶಿವಾಯ್ ... ಹತ್ತಾ೦ತು ಫುಲ್ಲಾ ಮಾಳ ಧೋರ್ನ್ ನಯ್ . " " ವೀರಾಗ್ರಣಿ ..! ಯಾಗಾಶ್ವ ಕೊಣಾಲೆ ಮೋಣು ಕಳ್ ನಾಶಿ .. ಚುಕ್ಕುನ್ ಆಮ್ಗೆಲೆ ರಾಜಭಟಾನಿ ಅಂತಃಪುರಾಕ ಹಳ್ಳಾ . ಯಾಗಾಶ್ವ ರಕ್ಷಣೆಕ ತುಮ್ಮಿ ಅಯಿಲೆಂತಿ ಮೋಣು ಕೋಳ್ನು ಆನಂದ ಝಲ್ಲೆ .. ಕೂಡ್ಲೆ ಅಮ್ಮಿ ಯಾಗಾಶ್ವ ಘೇವ್ನ್ ತುಮ್ಗೆಲೆ ಯೆದ್ರಾಕ ಅಯಿಲೀ೦ತಿ .. ಕಳ್ ನಾಶಿ ಕೆಲ್ಲೆಲೆ ಚೂಕಿಕ ಕ್ಷಮಾಪಣ ಅಸ್ಸೋ .. " ವಿನಮ್ರ ಜಾವ್ನ್ ಮಹಾಮಂತ್ರಿನ ಸಂಘಲೆ .
ಅರ್ಜುನ್ ತಾತ್ಸಾರ ಕೊರ್ನ್ ಹಾಸ್ಲೊ .. " ಕುರುವಂಶ ಮ್ಹಳ್ಳೆರಿ ಕೋಣ .. ? ಪಾಂಡವ ಮ್ಹಳ್ಳೇರಿ ಕೋಣ .. ? ಧರ್ಮರಾಯು , ಅರ್ಜುನ್ ಮ್ಹಳ್ಳೇರಿ ಕೋಣ .. ? ಹಸ್ತಿನಾವತಿ ಖಂಯ್ ಅಸ್ಸ .. ?ಮ್ಹಳ್ಳೆಲೆ ವಿಷಯು .. ತುಮ್ಗೆಲೆ ರಾಯಾಕ ಗೊತ್ತಸ್ಸುನಕ್ಕಾ .. ? ತುಮ್ಗೆಲೆ ರಾಯಾಕ ಗೊತ್ನಾ ಝಲ್ಲೇರಿ ರಾಜ ಭಟಾಕ ಕಷ್ಶಿ ಕಳ್ತಾಲೆ .. ? ಅರ್ಜುನಾಲೆ ತೀಕ್ಷ್ಣ ಉತ್ತರಂ .. ಬಭ್ರುವಾಹನ ಶಾಂತ ಜಾವ್ನ್ ಅಯಿಕುನ್ ರಾಬ್ಲೊ . " ಪಾಂಡವ ವೀರಾ .. ! ಬಭ್ರುವಾಹನ ತುಗೆಲೆ ಪೂತು .. ಪುತ್ತಾಲೆ ನಿಮಿತ್ಯ ಝಲ್ಲೆಲೆ ಚೂಕಿ , ಬಪ್ಪುಸು ಜಾವ್ನು ತೂ೦ವೆ ಕ್ಷಮಾ ಕರ್ನಾ ನತ್ತಲೇರಿ ಆನಿ ಕೋಣ ಕರ್ತಾ .. ? ಸುಭಧ್ರಾ ಪುತ್ರ ಅಭಿಮನ್ಯು ವಿಂಗಡ ನಯ್ .. ! ಚಿತ್ರಾ೦ಗದಾ ಪೂತು ಬಭ್ರುವಾಹನ ವಿಂಗಡ ನಯ್ .. " ಮ್ಹಳ್ಳಲೊ ಮಹಾಮಂತ್ರಿ . " ಛಿ .. ತೊಂಡ ಧಾಂಕಿ .. ! ವೀರಾಧಿ ವೀರ , ವೀರ ಪುರುಷೋತ್ತಮ ವೀರ ಅಭಿಮನ್ಯು ಸಮಾನ ಕೊಣಯ್ ನಾತಿ . ಅಭಿಮನ್ಯುಲೆ ನಾಂವ ಕಾಡುಂಕ ತುಮ್ಕಾ ಯೊಗ್ಯತಾ ನಾ ... ತೋ ಮಿಗೆಲೆ ಪೂತು .. ಕುರುವಂಶಾ ಮಹಾರತ್ನ . ಕುರುಕ್ಷೇತ್ರ ಯುದ್ಧಾ೦ತು.. ಅತಿರಥ , ಮಹಾರಥಾ೦ಗೆಲೆ ಎಕ್ಲೊಚಿ ಯುದ್ಧ ಕೊರ್ನ್ ವೀರ ಮರಣ ಪವ್ವಿಲೊ .. ! ಮಿಗೆಲೆ ಪೂತು ವೀರ ಅಭಿಮನ್ಯುಕ ತುಲನ ಕೊರ್ಚ್ಯಾಕ .. ಹೇ ಬಭ್ರುವಾಹನಾಕ ಕಸಲೆ ಯೋಗ್ಯತ ಅಸ್ಸ .. ? "
ಅರ್ಜುನಾಲೆ ನಿಷ್ಟುರ ಉತ್ತರಂ ಅಯಿಕುನ್ ಬಭ್ರುವಾಹನಾಕ ಮನಾ ಮಸ್ತ ದುಃಖ ಝಲ್ಲೆ .. ಮೌನ ಜಾವ್ನ್ ದೊಳೆ ಉದ್ದಾಕ ಕಳ್ಳೆ . ಕಸಲೆ ಕೊರ್ಚೆ ಮೋಣು ಕಳ್ನಾಶಿ ಕೋಪಾನ ಕಾಂಪ್ಲೊ . " ಪಿತೃ ದೇವಾ .. !ಸುರ್ವೆ ಪೋಟಿ ತುಕ್ಕಾ ಪೋಳೋಚ್ಯೆ ಭಾಗ್ಯ ಮೆಳ್ಳೆ ಮೋಣು .. ಸಂತೋಷಾರಿ ತುಗೆಲೆ ಪಯ್ಯಾರಿ ಪೋಣು ತುಗೆಲೆ ಆಶೀರ್ವಾದು ಘೆವ್ಚ್ಯಾಕ ಅಯಿಲಾ .. ! ಮಿಗೆಲೆ ವೈರಿ ತುಕ್ಕಾ ಕಸಲೇಕ ಕೋಪು ಆಯಿಲಾ ಮೋಣು ಗೊತ್ತಸ್ಸ . ಕುರುಕ್ಷೇತ್ರ ಯುದ್ಧಾ೦ತು ಭಾಗಿ ಜಾಯ್ನಿ ಮೋಣು ... ತುಮ್ಗೆಲೆ ತರ್ಪೇನ ಯುದ್ಧ ಕರ್ನಿ ಮೋಣು .. ಕೋಪು ಯೆವಚೆ ಸಹಜ . ಮಹಾ ಮಹಾ ವೀರ ಲೋಕಾನಿ ಯುದ್ಧ ರಂಗಾಂತು ಆಸ್ತಾನಾ .. ಮಿಗೆಲೆ ಅಗತ್ಯ ಕಸಲೇಕ ಮೋಣು ಲೆಕ್ಲೆ . ಯುದ್ಧಾ೦ತು ಭಾಗಿ ಜಾವ್ಕಾ ಮೋಣು ಅಂಮ್ಕಾ ಆಮಂತ್ರಣ ತಾಂಯ್ ಏನಿ . ಪಾಂಡವಾಂಗೆಲೆ ಕೊಣಾಲೆಯ್ .. ಮಕ್ಕಾ ಪರಿಚಯು ನಾ . ಸುಭಧ್ರ ಮಾತೆ ಮ್ಹಣ್ಕೆ ... ದ್ರೌಪದಿ ಮಾತೆ ಮ್ಹಣ್ಕೆ ... ಮಿಗೆಲಿ ಮಾತಾ ಚಿತ್ರಾ೦ಗದ ದೇವಿಕ ತುಂವೆ ಪೊಳೊನ್ ಘೇನಿ . ಹಾಂವೆ ಜನ್ಮಾ ಆಯ್ಯಿಲೆ ಖಬ್ಬರ ತಾಂಯ್ ಗೊತ್ನಾ ತುಕ್ಕಾ . ಜನ್ಮಾಕ ಯೆವಚೆ ಫೂಡೇಚಿ ... ಮಕ್ಕಾ ಚಿತ್ರವಾಹಕ ರಾಯಾಕ ದತ್ತು ದಿಲ್ಲಾ ... ಮಹಾ ಪುತ್ರ ಪ್ರೇಮಿ ತೂ ..! ಇತ್ಲೆ ವರುಷ ಝಲ್ಲೇರಿಯಿ ಏಕ ಪೋಟಿ ಯೇವ್ನ್ ಪೊಳೈನಾ ನಾತ್ತಿಲೊ ಮಹಾ ಪಿತೃ ದೇವು ತೂ .. ! ಅಗ್ನಿ ಸಾಕ್ಷಿ ಜಾವ್ನ್ .. ಮಿಗೆಲೆ ಆವಸೂಕ ವ್ಹರ್ಡಿಕ ಕೊರ್ನ್ .. ಧರ್ಮಾರ್ಥ , ಕಾಮಾರ್ಥ ಹಾಥು ಸೋಣಾ ಮೋಣು ಪ್ರತಿಜ್ಞಾ ಕೋರ್ನ್ .. ತಿಗೆಲೆ ದೇಹ ಸುಖ ಅನುಭೋಗ ಕೊರ್ನ್ ಧಾಂವ್ನ್ ಗೆಲ್ಲೆಲೊ ಪುಣ್ಯಾತ್ಮ ತೂ ... ! ನತದೃಷ್ಟ ಪೂತು ಹಾಂವ . ಅದೃಷ್ಟ ವಂತ ಅಭಿಮನ್ಯು ! ತಾಕ್ಕಾ ಮಕ್ಕಾ ಹೋಲಿಕಾ ಕಷ್ಶಿ ಝತ್ತಲೇ .. ? " ಮ್ಹಳ್ಳಲೊ ಬಭ್ರುವಾಹನ " ಓ ಹೋ .. ! ತಿತ್ಲೆ ವಿಮರ್ಶ ಕೊರ್ಚೆ ತಿತ್ಲೆ .. ಹೋಡು ಜಾಲ್ಲೊ ವೇ ತೂ ... ತುಂವೆ ಘಲ್ಲೆಲೆ ಪ್ರಷ್ಣೆಕ ಉತ್ತರ ತುಗ್ಗೆಲ್ ಅಮ್ಮಾ ಲಾಗ್ಗಿ ವೊಚ್ಚುನ್ ನಿಂಮ್ಗಿ ... ತೀಚಿ ಉತ್ತರ ದಿತ್ತಲಿ .. " ಮೋಣು ಕೋಪಾನ ಸಂಘಲೆ ಅರ್ಜುನಾನ .
" ಮಿಗೆಲೆ ಅಮ್ಮಾಕ , ತುಗೆಲೆ ಮನ ಕಸಲೆ ಮೋಣು ಕಳ್ನಿ . ತೂ೦ಚಿ ಪ್ರತ್ಯಕ್ಷ ದೇವು ಮೋಣು ನಂಮ್ಗೂನ್ , ತುಗೆಲೆ ಸ್ಮರಣ , ಧ್ಯಾಸಾಂತು ಸುಮಂಗಲಿ ಜಾವ್ನ್ ದೇಹ ತ್ಯಾಗ ಕೋರ್ಕಾ ಮೋಣು ಆಶಿ ಕಾಡ್ತಾ ಅಸ್ಸ ..! ಬಮ್ಮಣು .. ಪೂತು .. ಕುಟುಂಬ ಅಸ್ಸುನ್ ಸನ್ಯಾಸಿನಿ ಶೀ ಜೀವನ ಕಡ್ತಾ ಅಸ್ಸ . ತ್ಯೇ ಪುಣ್ಯ ಮಾತೆ ಖತಿರಿ .. ಮಕ್ಕಾ ಜನ್ಮ ದಿಲ್ಲೆಲೆ ಪಿತೃ ದೇವಾ ಎದುರ .. ಹಾಂವ ಏಕ ಅನಾಥ ಭಿಕ್ಷುಕ ಜಾವ್ನ್ ರಾಬ್ಲಾ .. ! " ದೊಳೆ ಉದ್ದಾಕ ಕಳ್ಳೆ ಬಭ್ರುವಾಹನಾನ . ಅರ್ಜುನಾಕ ಕಸಲೆ ಉಲ್ಲೋಚೆ ಮೋಣು ಕಳ್ನಾಶಿ ಶಿಬಿರಾ ಭಿತರಿ ಗೆಲ್ಲೊ . ಬಭ್ರುವಾಹನಾಕ ಸ್ವಾಭಿಮಾನ ಭಂಗ ಝಲ್ಲೆ . ಕೋಪು ಯೇವ್ನ್ .. ಹತ್ತಾ೦ತು ಧರ್ಲೆಲೆ ಫುಲ್ಲಾ ಹಾರು ನೆಲಾರಿ ಉಡಯಿಲೆ ... ಸುಮಂಗಲಿಯಾಲೆ ಹತ್ತಾ೦ತು ಅಷ್ಶಿಲೆ ಸುಗಂಧ ದ್ರವ್ಯ ಭರ್ಲೆಲೆ ಪೊಳೆರು ಮಾರ್ನ್ ನೆಲಾರಿ ಘಲ್ಲೆ . ಉಕ್ಕುಂನ್ ಎವ್ಚೆ ಕೋಪು , ಅಪಮಾನ ಸಹನಾ ಕೊರುಂ ಜಾಯ್ನಿ ಬಭ್ರುವಾಹನಾಕ . " ಮಹಾ ಮಂತ್ರಿ .. ! ಯಾಗಾಶ್ವ , ಅಂತಃಪುರಾಕಾ ವಾಪಸ್ ವೊಚ್ಚೊ .. ಯುದ್ಧಾಕ ಸೈನ್ಯ ತಯ್ಯಾರಿ ಕರಿ .. ಹೋ ಬಭ್ರುವಾಹನ ರಣ ಕಾಯರ್ ಕೀ .. ರಣ ಸಿಂಹ ಕೀ .. ಮೋಣು ದಕ್ಕಯಿತಾ ಅರ್ಜುನಾಕ . ವೀರ ಅಭಿಮನ್ಯು ಪೊಶಿ .. ವೀರ ಬಭ್ರುವಾಹನ ಖಂಚಾ೦ತು ಊಣೆ ಮೋಣು ಅರ್ಜುನಾಲೆ ತೊಂಡಾ ದುಕುನ್ ಹಾಡಯಿತಾ ... ಹಾಂವೈವೀರ ಅರ್ಜುನಾಲೆ ಪೂತು .. " ಮೋಣು ಸಾಂಗ್ತಾಚಿ ಬಭ್ರುವಾಹನ ರಥಾರಿ ಚೋಣು ಅಂತಃಪುರಾಕ ಯೇವ್ನ್ ಪಾವಲೋ . ರಾತ್ರಿ ಝಲ್ಲಿ .. ಬಭ್ರುವಾಹನಾಕ ಅಂತರ್ ಮಂಥನ ಆರಂಭ ಝಲ್ಲೊ . ಅರ್ಜುನಾನ ಮಣಿಪುರಾಕ ಅಯ್ಯಿಲೆ ಖಬ್ಬರ ಅನಿಕಯ್ ಚಿತ್ರಾ೦ಗದೆ ಕಳ್ನಿ . ಆವ್ಸೂಕ ಖಬ್ಬರ ಸಂಘುನ್ ದೀವ್ನ್ ಪೆಟಯಿಲ್ಯಾರಿ ಕಷ್ಶಿ ಆಸ್ತಾಲೆ .. ? ಸಂಘನಾ ನಾತ್ಲೆರಿ ಕಸಲೆ ಝತ್ತಲೇ .. ? ಹಾಂವ ಕಸಲೆಯ್ ವಿಷಯು ಆವ್ಸೂಕ ಸಂಘನಾಶಿ ... ಅನ್ಯಾಯು ಕರ್ತಾ ಅಸ್ಸ ಕೀ .. ? ಅರ್ಜುನಾಲೆ ಯುದ್ಧ ಕುಶಲತಾ ಕಷ್ಶಿ ಆಸ್ತಾಲಿ .. ? ಆಮ್ಗೆಲಿ ಯುದ್ಧ ತಯ್ಯಾರಿ ಕಷ್ಶಿ ಅಸ್ಸುಕಾ .. ? ಇತ್ಲೆ ಆಲೋಚನಾ ಕರ್ತನಾ ತ್ಯೆಚಿ ವೇಳೇರಿ ನಾಗ ಲೋಕಾ ದುಕುನ್ ಉಲೂಪಿ ಪ್ರತ್ಯಕ್ಷ ಝಲ್ಲಿ . ಬಭ್ರುವಾಹನ ಏಕ್ ಪಂಕ್ತ ಚಕಿತ ಝಲ್ಲೊ " ಕೋಣ ಅಮ್ಮಾ ತೂ .. ? " ನಿಂಮ್ಗಿಲೆ . " ಕುಮಾರಾ ಹಾಂವ ಉಲೂಪಿ .. ನಾಗ ಲೊಕಾಚಿ ... ಅರ್ಜುನಾಲಿ ಬಾಯ್ಲ್ .. ತುಗೆಲಿ ಮಾಹ್ವ ". " ತೂ ಹಾಂಗಾ ಕಷ್ಶಿ ಆಯಿಲಿ .. ? " ಅದೃಶ್ಯ ಶಕ್ತಿನಿ ಆಯಿಲಿ ಕುಮಾರಾ .. ! " ತುಗ್ಗೆಲ್ ಬಪ್ಪುಸು ತುಗೆಲೆ ಶಕ್ತಿ ಕಿತ್ಲೆ ಅಸ್ಸ ಮೊಣು ಪರೀಕ್ಷ ಕೊರುಂಕ .. ಯುದ್ಧಾ ಕ ಅಪ್ಪಯಿತಾ ಮೋಣು ದಿಸ್ತಾ ..., ಕಾಯಿ ಭೀವ್ನುಕ್ಕಾ ಬಳಾ .. ತುಗ್ಗೆಲ್ ವೊಟ್ಟು ಹಾಂವ ಅಸ್ಸ . ತುಗೆಲೆ ವೀರ ವಿಕ್ರಮಯುದ್ಧ ಚತುರಾಯಿ ದಕ್ಕೋನ್ .. ತುಗೆಲೆ ಪಿತೃ ದೇವಾಕ ಸಂತೋಷು ಕರಿ .. ಕ್ಷತ್ರಿಯ ಲೋಕು ಯುದ್ಧಾಕ ಭೀನಾತಿ .. ಲೋಕೈಕ ವೀರ ಅರ್ಜುನಾಕ ಸ೦ಮ್ಮ ಝಲ್ಲೋಲೊ ಪೂತು ಬಭ್ರುವಾಹನು ... ಮೋಣು ಕೀರ್ತಿ ತುಕ್ಕಾ ಯೆವ್ವೊ .ತುಕ್ಕಾ ಹಾಂವ ಏಕ ಮಹಾಸ್ತ್ರ ದಿತ್ತಾ . ಹೇ ಅಸ್ಟ್ರಾ ನಿಮಿತ್ಯ ತಾಂಕಾ ಪರಾಜಯ ಖಂಡಿತ .. ತುಕ್ಕಾ ಜಯ ಜವ್ವೋ . ತುಗ್ಗೆಲ್ ವೊಟ್ಟು ಹಾಂವ ಅದ್ರಶ್ಯ ರೂಪಾರಿ ಆಸ್ತಾ . ಕಾಯಿ ಭೀವ್ನುಕ್ಕಾ " ಮ್ಹಳ್ಳಲಿ . ಬಭ್ರುವಾಹನಾನ ದಿವ್ಯಾಸ್ತ್ರಾಕ ನಮನ ಕೋರ್ನು ಹತ್ತಾ೦ತು ಘೆತ್ಲೆ . " ಕುಮಾರಾ .. ! ಅತ್ತ ರಾತ್ರಿ ಝಲ್ಲಿ .. ಲಾಯಕ್ ನೀದ ಕಾಡಿ " ಮ್ಹಳ್ಳಲಿ ಉಲೂಪಿ .
ಸೂರ್ಯೋದಯ ಝಲ್ಲೆ .. ಯುದ್ಧ ರಣ ಭೇರಿ , ಶಂಖ , ತುತ್ತೂರಿ ಮೊಳ್ಗಲಿ .. ಹಸ್ತಿನಾವತಿ ಸೈನ್ಯ ಆನಿ ಮಣಿಪುರಾ ಸೈನ್ಯ ಎದುರ - ಬದುರ ಜಾವ್ನ್ ರಬಲೆ೦ತಿ . ಹನುಮಾನ್ ಧ್ವಜ ಅಷ್ಶಿಲೆ ರಥಾರಿ ಅರ್ಜುನ್ .. ಹಂಸ ಧ್ವಜ ಅಷ್ಶಿಲೆ ರಥಾರಿ ಬಭ್ರುವಾಹನ . ಯುದ್ಧ ಶುರು ಝಲ್ಲೆ . ಅರ್ಜುನಾಕ ಸಮ್ಮ ಜಾವ್ನ್ ಬಭ್ರುವಾಹನಾನ ಯುದ್ಧ ಕೆಲ್ಲೆ . ಹೇ ಯುದ್ಧ ದಿವ್ಯಾಸ್ತ್ರ ಯುದ್ಧ ನಯ್ಯ್ .. ಸರ್ವೇ ಸಾಧಾರಣಾ ಯುದ್ಧ . ಅಭಿಮನ್ಯು ಮ್ಹಣ್ಕೆ ದಿಸ್ತಾಶಿಲೆ ಬಭ್ರುವಾಹನ ವೈರಿ ಬಾಣ ಸೊಡುಂಕ ಜಾಯ್ನಾ ಅರ್ಜುನಾಕ . ಬಪ್ಸೂ ವೈರಿ ತೀವ್ರ ದಿವ್ಯ ಬಾಣ ಸೊಡುಂಕ ಭಿತ್ತಶಿಲೊ ಬಭ್ರುವಾಹನ . ನಿಜಾವ್ನ್ ಸಂಘಚೆ ಝಲ್ಲೇರಿ .. ವೀರ ಅರ್ಜುನಾ ಎದ್ರಾಕ .. ಬಭ್ರುವಾಹನ ಸಾಧಾರಣ ಶಿಷ್ಯಾ ಮ್ಹಣ್ಕೆ ... ಪುತ್ತಾಲೆ ಯುದ್ಧ ನಿಪುಣತಾ ಪೋಳೋ ಚೆ ಖತಿರಿ ವೈಷಮ್ಯ ನಾತ್ತಿಲೆ ಯುದ್ಧ ಕರ್ತಾ ಅಸ್ಸ ಅರ್ಜುನ್ . ಬಭ್ರುವಾಹನಾಕ ತಗೆಲೆ ಹಸ್ತ ಕುಶಲತಾ ದಕ್ಕೋಕಾ ಮೋಣು ಮನ . ಮೇಘಾಸ್ತ್ರ ಸೋಣು .. ಕಾಳೆ ಮೋಡ ಸೃಷ್ಠಿ ಕೆಲ್ಲೆ ... ವಾಯುವ್ಯಾಸ್ತ್ರ ಸೋಣು ಭೀಷಣ ವಾರೆ ಸೃಷ್ಠಿ ಕೆಲ್ಲೆ .. ವಾರುಣಾಸ್ತ್ರ , ಪರ್ಜನ್ಯಾಸ್ತ್ರ ಸೋಣು ಗುಡುಗು ಮಿಂಚು ಕುಂಭ ವೃಷ್ಟಿ ಜಾವಚೆ ತಶಿ ಕೆಲ್ಲೆ . ಮಣಿಪುರ ಸೈನಿಕ , ದಿವ್ಯಾಸ್ತ್ರ ಪೊಳೊನ್ ಭೀವ್ನ್ ಧಾಂವ್ನ್ ಗೆಲ್ಲೆ . ಹ್ಯೆಚಿ ವೆಳ್ಯೇರಿ ಉಲೂಪಿ ಪ್ರತ್ಯಕ್ಷ ಝಲ್ಲಿ . " ಕುಮಾರ .. ! ಭೀವ್ನುಕ್ಕಾ .. ತುಗ್ಗೆಲ್ ಬಪ್ಪುಸು ದಿವ್ಯಾಸ್ತ್ರ ಸೊಡುಂಕ ಪ್ರಯತ್ನ ಕರ್ತಾ .. ಹಾಂವೆ ದಿಲ್ಲೆಲೆ ದಿವ್ಯಾಸ್ತ್ರ ಪ್ರಯೋಗ ಕರಿ " ಮ್ಹಳ್ಳಲಿ ಉಲೂಪಿ . ಬಭ್ರುವಾಹನಾನ ಫುಳ್ಳೆ ದಿವಸ ದಿಲ್ಲೆಲೆ ದಿವ್ಯ ಬಾಣ ಪ್ರಯೋಗ ಕೆಲ್ಲೆ . ತಿತ್ಲೆಚಿ ... ಅರ್ಜುನು ... ನಿಷ್ಕ್ರಿಯ ಜಾವ್ನ್ ನೆಲಾರಿ ಧೊಪ್ಪನೆ ಪೊಳ್ಳೋ ! ಅರ್ಜುನಾಲೆ ಮರಣ ಪೊಳೊನ್ ಪಾಂಡವ ಸೈನ್ಯ ಹಾಹಾಕಾರ ಕೆಲ್ಲೆ . ಅರ್ಜುನಾಳೆ ಮರಣಾ ನಿಮಿತ್ಯ ಯುದ್ಧ ರಾಬ್ಬಲೆ . ಉಲೂಪಿ ಅದ್ರಶ್ಯ ಝಲ್ಲಿ .
ಆಶ್ರಮಾಂತು ಅಶಿಲೆ ಚಿತ್ರಾ೦ಗದೆಕ ವಿಷಯು ಕಳ್ಳೆ .. ಘೊಡೆರಿ ಬಯಿಸುನ್ ಯುದ್ಧ ರಂಗಾ ಕ ಆಯಿಲಿ . ಚಿತ್ರಾ೦ಗದೆನ ಯೆವ್ಚೆ ಪೊಷಿ ಫೂಡೆ ಚಿ ... ಕಸಲೆ ಜಾವ್ಚ್ಯಾ ನಜ್ಜ ಅಶಿಲೆ ಕೀ .. ತ್ಯೆಚಿ ಜಾವ್ನು ಗೆಲ್ಲೆ ..!ಅಂಗಾಂತು ಜೀವು ನಾತ್ತಿಲೊ ಅರ್ಜುನ್ ಶವ್ ಜಾವ್ನ್ ನೆಲಾರಿ ಪೋಣ್ ಅಸ್ಸ ! ದೊಳೆಂತ್ ಉದ್ದಾ ಕ ಧರಾಂಧರಿ ಅಯಿಲೆ ... " ಸ್ವಾಮೀ .. ! ಸ್ವಾಮೀ .. ! ಕಸಲೆ ಝಲ್ಲೆ ತು೦ಮ್ಕಾ .. ? ಉಠಾಯಾತಿ .. ಗಜೇಂದ್ರಾಕ ಸಾನ ಏಕ ಮೆಂಡೀನ ದಿವಿಶಿ ಮಾರ್ಚೆ ವೇ .. ? ವೀರ ಸಿಂಹಾ ಕ .. ಏಕ ಚಿತ್ಲಾನ ದಿವಿಶಿ ಮಾರ್ಚೆ ವೇ .. ? ಶಿವ .. ಶಿವಾ ... ! ಕಸಲೆ ಹ್ಯೇ ವಿಚಿತ್ರ .. ? ಪರಮೇಶ್ವರಾ ಲಗ್ಗಿ ಯುದ್ಧ ಕೆಲ್ಲೆಲೊ .. ಮಹಾವೀರ , ಪುತ್ತಾಲೆ ಹತ್ತಾ೦ತು ಮೊರ್ಚೆ ಮ್ಹಳ್ಳೇರಿ ... ಚಂದ್ರ , ಸೂರ್ಯಾನ ಮಂಜು ಶೀಲಾ ಝಲ್ಲೆ ಮ್ಹಣ್ಕೆ ... ಕುರುಕ್ಷೇತ್ರ ಮಹಾ ಸಂಗ್ರಾಮ ದುಕುನ್ ದಾಂಟವೂನ್ ಯೇವ್ನ್ ... ಹಾಂಗಾ ಉದ್ದಾ ಕ ನಾತ್ತಿಲೆ ಫೊ೦ಡಾ ಪೊಳ್ಳೋ ವೇ ? ಪತಿ ದೇವಾ .. ! ಕೊಣಾಲೆ ಶ್ರಾಪಾ ನಿಮಿತ್ಯ ಅಷ್ಶಿ ಝಲ್ಲೇ .. ? ಕಸಲೆ ಪಾಪಾ ನಿಮಿತ್ಯ ಅಷ್ಶಿ ಝಲ್ಲೆ .. ? ಧರ್ಮಜಾದಿ ಪಾಂಡು ಪುತ್ರಾ೦ಕ ಹಾಂವ ಕಸಲಿ ಜವಾಬ ದಿತ್ತಲಿ .. ! ಧರ್ಮ ರಾಯಾಕ ಕೋಪು ಆಯಿಲ್ಯಾರಿ ಮಣಿಪುರ ರಾಜ್ಯ ಧೂಳಿ ಜಾವ್ನ್ ವತ್ತಲೆ ಮೂ .. ! ತುಗೆಲೆ ಆಪ್ತ ಮಿತ್ರ ಶ್ರೀ ಕೃಷ್ಣಾಲೆ ಕೋಪಾಕ .. ಕೊಣೆ ಆಡ ಯೆವಚೆ ಹ್ಯೇ ಪ್ರಥ್ವಿ೦ತು ... ? ಪತಿ ದೇವಾ ತೂ ನಾತ್ತಿಲೆ ಹೇ ಪ್ರಪಂಚ ಮಕ್ಕಾ ನಕ್ಕಾ ... ! ಹಾಂವೈ ತುಗ್ಗೆಲ್ ವೊಟ್ಟು ಸ್ವರ್ಘಾಕ ಯೆತ್ತಾ . ಮಿಗೆಲೆ ಕುಳಾರಾ ತರ್ಪೆನ್ ಝಲ್ಲೆಲೆ ಅಪರಾಧಾಕ ಕ್ಷಮಾಪಣ ನಾ ... ಮಹಾಮಂತ್ರಿ .. ! ಮಿಗ್ಗೆಲೆ ಪತಿದೇವಾ ಶವಾ ವೊಟ್ಟು ಹಾಂವಯ್ ಅಗ್ನಿ ಪ್ರವೇಶ ಕರ್ತಾ . ಚಿತೆ ತಯ್ಯಾರ್ ಕರ್ಯಾತಿ ... ಹ್ಯೇ .. ಮಹಾರಾಣಿ ಚಿತ್ರಾ೦ಗದೆಲೆ ಆಜ್ಞಾ .. !" ಬಭ್ರುವಾಹನ ... " ಅಮ್ಮಾ " ಮೋಣು ಆವ್ಸೂಲೆ ಪಯ್ಯಾರಿ ಪೊಳ್ಳೋ . " ತೂ .. ಪಾಪಿ .. ಮಿಗ್ಗೆಲೆ ಪಯ್ಯಾಕ ಅಪ್ಪೋಣುಕ್ಕಾ ... ತುಜೆ ತಸಲೆ ಪಾಪಿಷ್ಠ ಪೂತು ಮಿಗೆಲೆ ಗರ್ಭಾ೦ತು ಜನ್ಮಾಕ ಆಯ್ಯಿಲೊ ಮೋಣು ಸಂಘುಕ ಲಜ್ಜಿ ಕರ್ತಾ ಮಕ್ಕಾ . ತೂ ಮಣಿಪುರ ರಾಜ್ಯಾಕ .. ರಾಜ ಕುಟುಂಬೇಕ .. ರಾಜ್ಯ ಪ್ರಜೆ೦ಕ್ ಅವಮರ್ಯಾದಿ ಕೆಲ್ಲೆ . ತುಝೇ ತಸಲೆ ಪೂತು ... ಖಂಚೇಯ್ ಆವ್ಸೂಕ ... ಜವ್ವು ನಜ್ಜ " ಮೊಣು ಸಂಘುನ್ ಚಿತ್ರಾ೦ಗದೆನ ಪುತ್ತಾಕ ದೂರ ಕೆಲ್ಲೆ . " ಚೂಕಿ ಝಲ್ಲಿ ಅಮ್ಮಾ ... ಕ್ಷಮಾ ಕರಿ " ಮ್ಹಳ್ಳಲೊ ಪೂತು . " ತುಝೇ ತಸಲೆ ಪಿತೃ ದ್ರೋಹಿಕ ತ್ಯೋ ದೇವು ತಾಂಯ್ ಕ್ಷಮಾಪಣಾ ಕರ್ನಾ " " ತಷ್ಶಿ ಸಂಘುನುಕ್ಕಾ ಅಮ್ಮಾ " " ಜನ್ಮು ದಿಲ್ಲೆಲೆ ಬಪ್ಸೂನ ಅವಹೇಳನ ಕೆಲ್ಲೇರಿ ಕಸಲೆ ಝಲ್ಲೆ .. ? ಕಸಲೆ ತುಗ್ಗೆಲ್ಮರ್ಯಾದಿ ಗೆಲ್ಲಿ .. ? ತಾಕ್ಕಾ ತಿತ್ಲೆ ಸ್ವಾತಂತ್ರ್ಯ ನಾವೇ .. ಅಧಿಕಾರು ನಾವೇ ? ತೂ ಕಸಲೆ ನಮುನೆ ಪೂತು ತೂ ... ಜನ್ಮ ದಿಲ್ಲೆಲೆ ಬಪ್ಸೂಕ ದಿವಿಶಿ ಮಾರ್ಲೆ ಮೂ.. ! ಪೂತು ಜಾವ್ನ್ ಬಪ್ಸೂಲ್ ಮೃತ್ಯು ಝಲ್ಲೋ ಮೂ .. ?ಇತ್ಲೆ ವರ್ಷಾಚೆ ಮಿಗೆಲೆ ತಪಸ್ಯ ಧೂಳಿ ಕೆಲ್ಲಿ ಮೂ .. !" ಮೋಣು ಸಂಘುನ್ ಬ ಭ್ರು ವಾಹನಾಕ ನಿಂದಾ ಕೆಲ್ಲಿ . ಹ್ಯೇ ಚಿ ವೆಳ್ಯೇರಿ ಉಲೂಪಿ ಯುದ್ಧ ರಂಗಾಂತು ಪ್ರತ್ಯಕ್ಷ ಝಲ್ಲಿ . " ಬಹಿಣಾ ಚಿತ್ರಾ೦ಗದಾ !.. ಅರ್ಜುನಾಲೆ ಮರಣಾ ಕ ಬಭ್ರುವಾಹನ ಕಾರಣ ನಯ್ಯ್ .. ಹಾಂವ ಕಾರಣ .. ! ಮಿಗ್ಗೆಲೆ ಬಪ್ಪುಸು ಸಂಜೀವಿನಿ ಮಣಿ ಹಾಡುಂಕ ಗೆಲ್ಲಾ .. ಪೊಳೈತಾರಾಬ .. ತುಗೆಲೊ ಬಮ್ಮಣು ನಿದ್ದೆ ದುಕುನ್ ಉಠಾಯಿಲೆ ಮ್ಹಣ್ಕೆ ಉಠಾನ್ ರಾಬ್ತಾ ... " ಮೋನು ಧೈರ್ಯ ದಿಲ್ಲೆ . ನಾಗ ಲೋಕಾ ದುಕುನ್ ನಾಗ ರಾಜು ' ಕೌರವ್ಯಾ' ನ ಸಂಜೀವಿನಿ ಮಣಿ ಹಾಣು ಅರ್ಜುನಾಕ ಜೀವ ದಾನ ಕೆಲ್ಲೆ . ಅರ್ಜುನ್ ನಿದ್ದೆ ದುಕೂನ್ ಉಠಾಯಿಲೆ ಮ್ಹಣ್ಕೆ ಉಠಾನ್ ರಾಬ್ಲೊ . ಸರ್ವಾಂಕ ಆನಂದ ಝಲ್ಲೆ . " ಅರ್ಜುನಾ ...! ಕುರುಕ್ಷೇತ್ರ ಯುದ್ಧಾ೦ತು ಭೀಷ್ಮಾಕ ಅನ್ಯಾಯ ಜಾವ್ನ್ ರಥಾರಿ ದುಕೂನ್ ಪಾಡೊನ್ ... ಶರ ಶಯ್ಯೇರಿ ನಿದ್ದಯಿಲೆ ಕಾರಣ ವಸು ಲೋಕಾನಿ ತುಗ್ಗೆಲ್ ವೈರಿ ,ತಂಗೆಲ್ ಕೋಪು ಕಾಡಚೆ ಖತಿರಿ ... ಗಂಗಾ ದೇವಿ ಮುಖಾಂತರ ತುಕ್ಕಾ ಏಕ ವರುಷ ಭಿತರಿ ತುಗ್ಗೆಲ್ ಮರಣ ಜಾವ್ಕಾ ಮೋಣು ಶ್ರಾಪ ದಿಲ್ಲೆಲೆ . ಝಲ್ಲೆರಿ ಹಾಂವೆ ತಾಂಗೆಲೆ ಪಯ್ಯಾರಿ ಪೋ ಣು , ಅರ್ಜುನಾಕ ಪ್ರಾಣ ದಾನ ದೀವ್ಕಾ ಮೋಣು ಪ್ರಾರ್ಥನಾ ಕೆಲ್ಲೆಲಿ . ಭೀಷ್ಮ ಜಾವ್ನ್ ಜನ್ಮಾ ಆಯ್ಯಿಲೆ ಪ್ರಭಾಸ ವಸು , ಬ್ರ೦ಹ್ಮ ದೇವಾ ಲಗ್ಗಿ ಪ್ರಾರ್ಥನಾ ಕೊರ್ನ್ ಶ್ರಾಪ ಉಪಶಮನ ಕೆಲ್ಲೆ . ಸಂಜೀವಿನಿ ಮಣಿ ನಿಮಿತ್ಯ ಮರು ಜೀವಿತ ಜಾವ್ಚ್ಯಕ ವರು ದಿಲ್ಲೆ . ದುಸ್ರೇಂಗೆಲೆ ಹತ್ತಾ೦ತು ಅರ್ಜುನಾ ಕ ಮರಣ ಆಯಿಲ್ಯಾರಿ .. ಪಾಂಡು ಕುಲಾಕ ಅಪಮಾನು ಮೋಣು ಲೆಕ್ಕುನ್ ... ತುಗ್ಗೆಲ್ ಪುತ್ತಾಲೆ ಹತ್ತಾ೦ತು ಮರಣ ಜಾವ್ಚೆ ತಶಿ ಕೊರ್ನ್ .. ಅರ್ಜುನಾಕ ಜೀವ ದಾನ ಕೆಲ್ಲೆ ಉಲೂಪಿಲೆ ವಿಚಕ್ಷಣ ಜ್ಞಾನ ಶ್ಲಾಘ ನೀಯ " ಮ್ಹಳ್ಳಲೊ ನಾಗರಾಜು . ಬಭ್ರುವಾಹನಾನ ಅರ್ಜುನಾಲೆ ಪಯ್ಯಾರಿ ಪೋಣು ಕ್ಷಮಾ ಯಾಚನ ಕೆಲ್ಲಿ . ಅರ್ಜುನಾ ನ ಪ್ರೀತ್ಯೇನ ಬಭ್ರುವಾಹನಾ ಕ ಫೊಟೊನ್ ಧರ್ಲೆ ... ಚಿತ್ರಾ೦ಗದೆ ಆನಿ ಉಲೂಪಿ ಅರ್ಜುನಾಕ ನಮಸ್ಕಾರ್ ಕೋರ್ನ್ ಅಂತಃಪುರಾಕಾ ಅಪ್ಪೋನ್ ವೆಲ್ಲೆ . ಅಶ್ವ ಮೇಧಾ ಯಾಗಾ ಘೋಡೊ ಘೇವ್ನ್ ಅರ್ಜುನ್ ಮುಕಾರ್ಸುನ್ ಗೆಲ್ಲೊ
ಉಮಾಪತಿ
