MAHABHARATHA Part - 49 ( Konkani Bhashentu )
MAHAA YUDHDHA ... ಮಹಾಯುದ್ಧ
ಚಾರೀಚ್ಯೇ .. ದಿವಸಾ ಯುದ್ಧ ಆರಂಭ ಝಲ್ಲೆ . ಅಭಿಮನ್ಯು , ಅನಿ ದ್ರೌಪದಿಲೆ ಪುತ್ರ೦ ... ಪ್ರತಿವಿಂದ್ಯ , ಶ್ರತ ಸೋಮಾ , ಶ್ರತಾನಿಕ , ಶ್ರತಕೀರ್ತಿ . ಶ್ರತ ಸೇನಾ ಹ್ಯೇ ಪಾಂಚ ಜನ , ಭೀಮ ಪುತ್ರ ಘಟೋತ್ಕಚ ಹನ್ನಿ .. ಚಾರಿ ದಿವಸಾ ಯುದ್ಧಾ೦ತು ಪ್ರಧಾನ ಜಾವ್ನು ಮುಕಾರಿ ರಬ್ಬುನ್ ಪಾಂಡವ ಸೈನ್ಯಾಕ ರಕ್ಷಣಾ ಕೊರುಂಕ್ ಯುದ್ಧ ಕೆಲ್ಲೆಲೆ . ಅಭಿಮನ್ಯು , ಶಲ್ಯ ರಾಜಾ ವೈರಿ ಉಡ್ದುನ್ ರಥಾ ಧ್ವಜ ಕತ್ತೋರ್ನ್ ಉಡಯಿಲೆ . ಭೀಮ ಸೇನಾ ನ ತಾಗೆಲ್ ವಜ್ರ ಗಧಾ ಘು೦ವಡಾನ್ ಕೌರವ ಸೇನಾ , ಗಜ ಸೇನಾ ಪುಡ್ಡಿ ಕೊರ್ನ್ ಉಡಯಿಲೆ . ಏಕ್ ಏಕ್ ಗಧಾ ಪ್ರಹಾರು ಹಸ್ತೇ ಘೀ೦ಕಾರ್ ಅಯಿಕತ ನಾಚಿ ಸುತ್ತು ಆಶಿಲೇ೦ಕ ರೋಮಾಂಚನ ಝತ್ತಶಿಲೆ ಅನಿ ಏಕ ಏಕ್ ಹಸ್ತಿ ಮೋರ್ನ್ ಪೊಡ್ತಾಶಿಲೆ . ನರಕಾಸುರಾಲೆ ಪುತ್ರ ಭಗದತ್ತಾ ... ' ಸುಪ್ರತೀಕ ' ಮ್ಹಳ್ಳೆಲೆ ಹಸ್ತೇರಿ ಬಯಿಸುನ್ ಭೀಮ ಸೇನಾ ಲಗ್ಗಿ ಯುದ್ಧ ಕೊರುಂಕ ಅಯಿಲೊ . ಹೇ ಹಸ್ತೆಕ ಸೋಂಡಾಳಿ೦ತು ಗಧ ಧೋರ್ನ್ ಯುದ್ಧ ಕೊರುಂಕ ಬುದ್ದೋ೦ತಕಾಯಿ ಅಸ್ಸ . ತಸಲಿ ಹ್ಯೀ ಹಸ್ತಿ ಮ್ಹಳ್ಳೇರಿ ಭಾಗದತ್ತಾ ಕ ಭಾರಿ ಪ್ರೀತಿ . ಭೀಮ ಸೇನಾಲೆ ಗಧಾ ಪ್ರಹಾರ ತಡ್ಸುನ್ ಘೇವ್ನ್ ... ಭೀಮ ಸೇನಾಕ ದಾಡೇನ ಘಾಯು ಕೆಲ್ಲೊ . ಘಟೋತ್ಕಚನ ತಗೆಲೆ ಮಾಯಾವಿ ಶಕ್ತಿನ ಚಾರಿ ದಾಡೆ ಅಶಿಲಿ ಹಸ್ತಿ ಕ ಸೃಷ್ಟಿ ಕೆಲ್ಲಿ. ಹೇ ಮಾಯಾವಿ ಹಸ್ತಿನ, ಭಗದತ್ತಾಲೆ ಹಸ್ತಿಕಾ ಘಾಯು ಕೊರ್ನ್ ಸೈನ್ಯ ಚೆಲ್ಲಾ - ಪಿಲ್ಲಿ ಕೆಲ್ಲೆ . ಸುಪ್ರತೀಕ ಭೀವ್ನ್ ಧಾವ್ನ್ ವೊಚ್ಯಾ ಶುರು ಕೆಲ್ಲೆ . ಭಾಗದತ್ತಾಕ ಭೀಮಾನ ಧೋರ್ನ್ ಗಧಾ ಪ್ರಹಾರ ಕೋರೂ ಶುರು ಕೆಲ್ಲೆ . ಭೀಷ್ಮ ದ್ರೋಣ , ಭಾಗದತ್ತಾ ಕ ಸಹಾಯು ಕೊರುಂಕ ಲಗ್ಗಿ ಅಯಿಲೆ . ಹ್ಯೇ ಪೊಳೊನ್ ಘಟೋತ್ಕಚಾನ ಆಕಾಶಾರಿ ಸಿಂಹ ಘರ್ಜನ್ ಕೆಲ್ಲಿ . ಸಿಂಹ ಘರ್ಜನ ಅಯಿಕುನ್ ಘೋಡೆ ಭೀವ್ನ್ ಧಾಂವ್ಚ್ಯಾಶುರು ಕೆಲ್ಲೆ . ಮಸ್ತ ಘೋಡೆ ಪಾಯು ಮೋಣು ಘೇವ್ನ್ ನೆಲಾರಿ ಪೊಳ್ಳೇ . ರಣ ಭೂಮಿ ... ಧೂಳಿ ಮಯ ಝಾವ್ನ್ ... ಸೈನ್ಯಾಕ ವಾಟ ಕಳ್ನಾಶಿ ... ರಬ್ಬಿಲೇ ಕಡೆನ ಚಿ ... ಮತ್ತೆ ಘು೦ವನು ಪೊಳ್ಳೆ . ಘಟೋತ್ಕಚಾಲೆ ಶಕ್ತಿ .. ಸಂಜೆ ಮ್ಹಣ್ತಾನ ತಗೆಲೆ ಮಾಯಾವಿ ಶಕ್ತಿ ವಡ್ಡತ್ ಆಯಿಲಿ . ಹತ್ತಾಕ ಮೆಳ್ಳೆಲೆ ಕುರು ಸೈನ್ಯಾಕ ದಿವಿಶಿ ಮಾರ್ಲೆ . ಹ್ಯೇ ವೆಳ್ಯೇರಿ ಭೀಮಸೇನಾನ , ಧುರ್ಯೋಧನಾಲೇ ಧಾಹ್ ಜನ ಭಂವ್ದಾಂಕ ದಿವಿಶಿ ಮಾರ್ಲೆ . ಮಾರ್ನ್ ಪೊಳ್ಳೆಲೆ ಭಂವ್ದಾಂಕ ಪೊಳೊನ್ ಧುರ್ಯೋಧನಾ ಕ ಮಸ್ತ ದುಃಖ ಝಲ್ಲೆ . ಸೂರ್ಯಾಸ್ತ ಜಾವ್ಚೆ ಪೊಳೊನ್ , ಭೀಷ್ಮಾನ ಶಂಖ ವಾಜ್ಜುನ್ ಯುದ್ಧ ವಿಶ್ರಾಮ ಸೂಚನಾ ದಿಲ್ಲಿ .
ಪಂಚಾ ದಿವಸಾ ಯುದ್ಧ ... ಕೌರವಾನಿ ಮಕರ ವ್ಯೂಹಾ ರಚನಾ ಕೆಲ್ಲಿ . ಪಾಂಡವಾನಿ ಗರುಡ ವ್ಯೂಹ ರಚನಾ ಕೆಲ್ಲಿ .... ಯುದ್ಧ ಆರಂಭ ದುಕುನ್ .. ಶಿಖಂಢಿ , ಭೀಷ್ಮಾಲಗ್ಗಿ ಯುದ್ಧ ಕೊರುಂಕ ಮುಕಾರಿ ಯೇವ್ನ್ ರಾಬ್ಲೊ . ಭೀಷ್ಮ... ನಪುಂಸಕಾ ವೊಟ್ಟು ಯುದ್ಧ ಕರ್ನಾ ಮ್ಹಳ್ಳೆಲೆ ವಿಷಯು ಶಿಖಂಢಿಕ ಗೊತ್ತಶಿಲೆ . ಭೀಷ್ಮಾನ ಶಿಖಂಢಿಕ ಪೋಳಯಿಲೆ . ಬಾಣ ಧನುಷ್ಯ ಹತ್ತಾ ಧೋರ್ನ್ ನುತಾ ಬೋಂಬೆ ಶೇ ರಾಬ್ಲೊ . ಶಿಖಂಢಿನ ಭೀಷ್ಮಾ ವೈರಿ ಬಾಣ ಸೋಣು ಘಾಯು ಕೆಲ್ಲೊ . ಹತ್ತಾ೦ತು ಧರ್ಲೆಲೆ ಧನುಷ್ಯ ಮೋಣು ಘಲ್ಲೆ . ಹ್ಯೇ ಪೋಳಯಿಲೆ ದ್ರೋಣಾಚಾರ್ಯ , ಭೀಷ್ಮಾಲೆ ರಕ್ಷೆಕ ಅಯಿಲೊ . ದ್ರೋಣಾಚಾರ್ಯಾ ಕ ಪೊಳೋನು .. ಶಿಖಂಢಿ ಭೀವ್ನ್ ಮಾಕ್ಷೇಲೋ ಸಾತ್ಯಕಿ ಅರ್ಜುನಾ ಲೇ ಶಿಷ್ಯ . ' ಗುರು ಮ್ಹಣ್ಕೆ ಶಿಷ್ಯ ' ಮ್ಹಳ್ಳೆ ಮ್ಹಣ್ಕೆ ... ಸಾತ್ಯಕಿನ ಕೌರವ ಸೈನ್ಯ , ಹಜಾರ್ - ಹಜಾರ್ ಲೋಕಾಂಕ ದಿವಿಶಿ ಮಾರ್ಲೆ . ರಥಿಕ ರಾಯಾಂಕ ಸಕಲ ಘಾಲ್ನ್ ,ರಥಾ ಚಕ್ರ ಪುಡ್ಡಿ ಕೊರ್ನ್ , ರಥ ಭುಯಿಂತು ಪೂರ್ನ್ ಘಾಲ್ಲೆ . ಮಿಂಚಾ ಮ್ಹಣ್ಕ್ ಬಾಣ ಸೋಣು ರಥಿಕ ರಾಯಾಂಕ ಸ್ವಾರ್ಘಾ ಕ ಪೆಟಯಿಲೆ . ಭೂರಿಶ್ರವ , ಸಾತ್ಯಕಿ ವೊಟ್ಟು ಯುದ್ಧ ಕೊರುಂಕ ಅಯಿಲೊ . ತಾಂಗೆಲೆ ಭಿತರಿ ಅಸ್ತ್ರ ಶಸ್ತ್ರ ಚಕ ಮಕಿ ಝಲ್ಲೆ . ಸಾತ್ಯಕಿಲೆ ಧಾಹ್ ಜನ ಚೆರ್ಡು೦ವ .. ಸಹಾಯಾ ಅಯಿಲೆ .ತಾಂಕಾ ಭೂರಿಶ್ರವಾ ನ ಕತ್ತೋರ್ನ್ ಉಡಯಿಲೆ . ಜೀವಾ ಹಂಗು ಸೋಣು ... ಭೂರಿಶ್ರವ , ಸಾತ್ಯಕಿ ಮಧ್ಯೆ ಯುದ್ಧ ಝಲ್ಲೆ ... ದೊಗ್ಗ ಜನಾ೦ಕ ತೀವ್ರ ಘಾಯು ಝಲ್ಲಾ . ಭೀಮ ಸೇನಾನ ಯೇವ್ನ್ ಸಾತ್ಯಕಿ ಕ ತಂಡುನ್ ಘೆವ್ನ್ ಚಮ್ಕಲೊ . ಭೂರಿಶ್ರವಾ ಕ ಧುರ್ಯೋಧನ ಯೇವ್ನ್ ತಂಡುನ್ ಘೆವ್ನ್ ಚಮ್ಕಲೊ .
ಸಂಚ್ಯೆ ದಿವಸಾ ಯುದ್ಧ .... ಪಾಂಡವಾನಿ ಮಕರ ವ್ಯೂಹ ರಚನ ಕೆಲ್ಲಿ ... ಕೌರವಾನಿ ಕ್ರೌ೦ಚ ವ್ಯೂಹ ರಚನ ಕೆಲ್ಲಿ . ಭೀಷ್ಮ ದ್ರೋಣಾ ನಿ ಯೇವ್ನ್
ಪಾಂಡವಾಂಗೆಲೆ ಮಕರ ವ್ಯೂಹ ಭೆತ್ತಿಲೆ . ದುಃಶ್ಶಾಸನ , ಅನಿ ತಗೆಲೆ ಭಂವ್ಡ ಯೇವ್ನ್ ಭೀಮ ಸೇನಾಲೆ ವೊಟ್ಟು ಯುದ್ಧ ಶುರು ಕೆಲ್ಲೆ . ಭೀಮಾನ ಗಜ ಶಕ್ತಿ ಪ್ರಯೋಗ ಕೆಲ್ಲೆ . ದುಃಶ್ಯಾಸನಾಲೆ ಸೈನ್ಯ .. ಭೀಮಾಲೆ ಶಕ್ತಿ ಎದುರ ಧೂಳಿ ಶೀ ಉಬ್ಲೆ . ದ್ರಷ್ಟದ್ಯುಮ್ನ ಭೀಮ್ ಸೇನಾಲೆ ರಕ್ಷೆ ಕ ಅಯಿಲೊ .. ಧುರ್ಯೋಧನಾ ನ ಶಂಬರಿ ಕೌರವ ರಥಿಕಾಂಕ ಭಾವಾಲೆ ರಕ್ಷೆ ಕ ಪೆಟಯಿಲೆ . ದ್ರಷ್ಟದ್ಯುಮ್ನನ ಸಮ್ಮೋಹನ ಅಸ್ತ್ರ ಪ್ರಯೋಗ ಕೆಲ್ಲೊ ... ಅನಿ ಕೌರವ ಸೈನ್ಯ ಬೋಧ ಚುಕ್ಕುನ್ ನೆಲಾರಿ ಪೊಳ್ಳೀ೦ತಿ . ದ್ರೋಣಾಚಾರ್ಯನ ಯೇವ್ನ್ ಪ್ರಜ್ಞಾಸ್ತ್ರ ಪ್ರಯೋಗ ಕೊರ್ನ್ .. ಸರ್ವ ಕೌರವ ಸೈನ್ಯಾಕ ಪ್ರಜ್ಞೆ ಕ ಹಾಡಯಿಲೆ . ಯುದ್ಧ ಧಮಾಸಾನ ಝಲ್ಲೆ ಭೀಮ , ದೃಷ್ಟದ್ಯುಮ್ನಲೆ ವೀರ ಯುದ್ಧಾ೦ತು ... ಕೌರವ ಸೈನ್ಯ ಹಜಾರ್ ಹಜಾರ್ ಲೋಕಾನಿ ಜೀವು ಸೊಳ್ಳೊ . ದ್ರೋಣಾಲೆ ಶಕ್ತಿ .. ದೃಷ್ಟದ್ಯುಮ್ನಲೆ ಬಾಣಾ ಎದುರ ಕಾಮ ಕರ್ನಿ . ಆಜಿ ಭೀಷ್ಮ ಪಿತಾಮಹ ಯುದ್ಧಾಕ ಯೇನಿ . ಕೃಷ್ಣ ಅರ್ಜುನ ತಾಯಿ ವಿಶ್ರಾಮ ಕೆಲ್ಲೆ ...
ಸತ್ತಾ ದಿವಸಾ ಯುದ್ಧ ... ಆಜಿ ಕೌರವಾನಿ ' ಮಂಡಲ ' ವ್ಯೂಹ ರಚನ ಕೆಲ್ಲಿ , ಪಾಂಡವಾನಿ ' ವಜ್ರ' ವ್ಯೂಹ ರಚನ ಕೆಲ್ಲಿ . ದ್ರೋಣ , ವಿರಾಟ ರಾಯಾಲೆ ವೊಟ್ಟು , ಅಶ್ವಥಾಮ .. ಶಿಖಂಡಿ ವೊಟ್ಟು , ದೃಷ್ಟದ್ಯುಮ್ನ ... ಧುರ್ಯೋಧನಾ ವೊಟ್ಟು , ನಕುಲ ... ಶಲ್ಯ ರಾಯಾಲೆ ವೊಟ್ಟು , ಭೀಮ .. ಕೃತವರ್ಮಾಲೆ ವೊಟ್ಟು , ಘಟೋತ್ಕಚ .. ಆಲಂಬಸಾ ವೊಟ್ಟು , ಸಾತ್ಯಕಿ .. ಭೂರಿಶ್ರವಾ ವೊಟ್ಟು , ಕೃಪಾಚಾರ್ಯ ... ಚಿಕೀತನಾ ವೊಟ್ಟು , ಧರ್ಮರಾಯು ... ಶ್ರತಾಯು ವೊಟ್ಟು , ಅಷ್ಶಿ ಎಕ್ಲೆ ವೊಟ್ಟು ಅನ್ನೇಕ್ಲೊ ... ಯುದ್ಧ ಕೋರೂ೦ ಲಾಗ್ಲೆ . ಯುದ್ಧಾ೦ತು ... ಯುದ್ಧ ಶಾಸ್ತ್ರಾ೦ತು ಶಿಕ್ಕಿಲೆ ... ಸರ್ವ ನಮುನೆ ಅಸ್ತ್ರ ಶಸ್ತ್ರ ಪ್ರಯೋಗ ಝಲ್ಲೆ .... ಮಾಯಾಸ್ತ್ರ , ದಿವ್ಯಾಸ್ತ್ರ ಹಜಾರ ನಮೂನೇರಿ ಮಂತ್ರಿತ ಜಾವ್ನ್ ಯೆತ್ತ ನಾ ... ರಣ ಭೂಮಿ .. ರೌದ್ರ ರೂಪಿ ಝಲ್ಲಿ . ಎಕ್ಲೆಲೆ ಮತ್ತೆ ತಸ್ಸುನ್ ಗೆಲ್ಲೆ , ಎಕ್ಲೆಲೆ ಹಾತು ಕತ್ತೋರ್ನ್ ಗೆಲ್ಲೊ . ಧ್ರತಿ ಚುಕ್ಕುನ್ ಧಾಂವ್ವು ಜಾಯ್ನಾಶಿ ಪಾಯ ಸೊಲ್ವುನ್ ರಬ್ಬಿಲೇ ಕಾಡಿನ ಚಿ ರಾಬ್ಲೀ೦ತಿ . ಸ್ವಲ್ಪ ಲೋಕು ಪಯ್ಯಾಕ ಬಾಣ ಲಾಗ್ಗುನ್ ಘಾಯು ಜಾವ್ನು ತಳ್ - ಮಳ್ ತಾಚಿ ಬೋಧ ಚುಕ್ಕುನ್ ಪೊಳ್ಳೀ೦ತಿ . ಭೀಷ್ಮಾಲೆ ಬಾಣ ಆಕಾಶಾರಿ ದುಕೂನ್ ... ಪೊಳ್ಳೆಲೆ ಪಾವ್ಸು ಸೊ ... ಉಕ್ಕುನ್ ಸೊಕ್ಕುನ್ ರಬ್ಬಿಲೇ ಸಮುದ್ರಾ ಪಾಳ ಸೊ ಸುತ್ತು ಧೂಳಿ ... ಅಗ್ನಿ ಜ್ವಾಲಾ .. ಗುಡುಗು ಮಿಂಚಾ ಧಾರಾ ಸೊ ಮಾಕ್ಷಿ ಮಾಕ್ಷಿ ಯೆತ್ತಾ ಅಸ್ಸ .ಚಾಲಕ ನಾತ್ತಿಲೆ ರಥ , ಸವಾರ ನಾತ್ತಿಲೆ ಘೋಡೆ .. ಮಾಹುತ ನಾತ್ತಿಲೆ ಗಜ ಸೈನ್ಯ ... ಅಂಧಕಾರಾಂತ್ , ಮೆಳ್ಳೆಲೆ ದಿಕಾನ ಧ೦ವ್ಚ್ಯಾ ಶುರು ಕೆಲ್ಲೆ . ಕೃಷ್ಣಾ ನ ಅರ್ಜುನಾಲೆ ರಥ ಭೀಷ್ಮಾ ಎದ್ರಾಕ ಹಾಣು ರಬ್ಬಯಿಲೆ . ಅರ್ಜುನಾ ನ ಭೀಷ್ಮಾಲೆ ದಿವ್ಯಾಸ್ತ್ರ ಧನುಷ್ಯಾ ದುಕೂನ್ ಭಾಯಿರಿ ಯೆವಚೆ ಫುಡೇ ಚಿ ಕತ್ತೋರ್ನ್ ಘಲ್ಲೆ . ತೀನ್ ಚಾರಿ ಪೊಟಿ ಹತ್ತಾ ಧರ್ಲೆಲೆ ಧನುಷ್ಯ ಮೋಣು ಘಾಲ್ಲೆ . ಭೀಷ್ಮಾಲೆ ಅಂಗಾರಿ , ಏಕ್ ಏಕ್ ಘಾಯು ಝತ್ತಾನಾ ಭೀಷ್ಮು ಅನಿಕಾಯ್ ಉದ್ರೇಕ ಝತ್ತಶಿಲೋ . ಅರ್ಜುನಾಲೆ ಬಾಣ ಅರ್ಧಾರಿಚಿ ಕತ್ತೊರ್ನ್ ಘಾಯ ಜಾಯ್ನಾಶಿ ಜಾಗ್ರತೆ ಕರ್ತಶಿಲೋ ಭೀಷ್ಮ . ಹ್ಯೇ ಸಾಥ್ ದಿವಸಾ ಯುದ್ಧಾಂತ ಧುರ್ಯೋಧನಾಲೆ ವೀಸ್ ಭಂವಂಢ ಸ್ವಾರ್ಘ ವಾಸ ಝಲ್ಲೆಂತಿ , ಇಕ್ರಾ ಅಕ್ಷೋಹಿಣಿ ಸೈನ್ಯಾ೦ತು ... ಚಾರಿ ಅಕ್ಷೋಹಿಣಿ ಸೈನ್ಯ ನಾಶ ಝಲ್ಲಾ . ಪಾಂಡವಾಂಗೆಲ್ ದಿಕಾನ ... ಸಾಥ್ ಅಕ್ಷೋಹಿಣಿ ಸೈನ್ಯಾನ೦ತು .. ದೋಣಿ ಅಕ್ಷೋಹಿಣಿ ಸೈನ್ಯ ನಾಶ ಝಲ್ಲಾ . ಪಾಂಡವಾ ದಿಕಾನ ಯುದ್ಧಾ೦ತು ವಿರಾಟ ರಾಯಾಲೆ ಪೂತು ಉತ್ತರ ಕುಮಾರ್ ವಿಧಿ ವಶ ಝಲ್ಲಾ .
ಅಟ್ಟಾ .. ದಿವಸಾ ಯುದ್ಧ ... ಅಯಿಚೆ ಯುದ್ಧಾಕ ಪಾಂಡವಾನಿ ' ಕೂರ್ಮ ' ವ್ಯೂಹ ರಚನ ಕೆಲ್ಲಾ ... ಕೌರವಾನಿ 'ಪರ್ವತ 'ವ್ಯೂಹ ರಚನಾಕೆಲ್ಲಾ. ಯುದ್ಧ ಆರಂಭ ಝತ್ತನಾಚಿ ಭೀಮಸೇನಾ ನ ಹಠಾತ್ ಜಾವ್ನ್ ,ಭೀಷ್ಮಾಲೆ ರಥಾರಿ ಮಿಂಚು ಸೋ ಪೋಣು ,ಭೀಷ್ಮಾಲೆ ಸಾರಥಿ ಅನಿ ರಥಾಶ್ವ೦ಕ ದಿವ್ಶಿಮಾರ್ಲೆ . ಭೀಷ್ಮಾಲೆ ರಥಾ ಕ ಪಯ್ಯಾನ ಮಾರ್ನ್ ಧ್ವ೦ಮ್ಸಕೆಲ್ಲೆ . ಹ್ಯೇ ಪೊಳೊನ್ ಧುರ್ಯೋಧನಾ ನ ತಗೆಲೆ ಭಂವಢ ಸುನಭ ,ಆದಿತ್ಯಕೇತು, ಅಪರಾಜಿತ , ಬಹುವಾಸಿ ,ಖಾ೦ಡಿತಾ, ಕುಂಡದಾರು, ವಿಶಾಲಾಕ್ಷ , ಮಹೋದರಾ , ಮ್ಹಳ್ಳಲೆ ಸಾಥ ಜನಾ೦ಕ ಭೀಷ್ಮಾಲೆ ರಕ್ಷೇಕ ಪೆಟಯಿಲೆ .ಭೀಮಸೇನಾನ ತಗೆಲೆ ಗಧೆ ನ ಮಾರ್ನ್ ಸಾತ್ ಭಂವ್ಢಾಕ ಪರಲೋಕಾಕ ಪೇಟಯಿಲೆ. ಧುರ್ಯೋಧನಾನ ತಗೆಲೆ ಭಂವ್ಢ ತಗೆಲೆ ದೊಳೆ ಯೆದ್ರಾಕ ಚ್ಯಿ ಮೊರ್ಚೆ ಪೋಳಯಿಲೆ . ತಾಕ್ಕಾ ಮನಾಂತು ಮಸ್ತ ದುಃಖ ಝಲ್ಲೆ .ಧಾಂವ್ನ್ ಯೇವ್ನ್ ಭೀಷ್ಮಾ ಲಗ್ಗಿ " ಪಿತಾಮಹಾ ... ! ಮೋಣು ಸ೦ಘುನ್ ದೊಳೆ ಉದ್ದಾಕ ಕಳ್ಳೆ . "ಕಸಲೆ ಝಲ್ಲೇ ಧುರ್ಯೋಧನಾ ..."ಮೋಣು ನಿಂಮ್ಗಿಲೆ ಭೀಷ್ಮಾನ ." ಪಿತಾಮಹಾ ..! ಮಿಗೆಲೆ ಭಂವ್ ಢ ...ತ್ಯೆ ಭಂಢ ಭೀಮಾಲೆ ಹತ್ತಾ೦ತು ಮೊರ್ಚ್ ಪೋಳಯಿಲೆ ನವೆ ...! ತೂ ಮಾತ್ರ ಪೊಳೊನ್ ..ಪೋಳಯಿನಾ ನಾತ್ಲೆ ಮ್ಹಣ್ಕೆ ಯುದ್ಧ ಕರ್ತಾ ಅಸ್ಸ ! . ಅಂಮ್ಕಾ ಸರ್ವಾಂಕ ಭೀಮಾಲೆ ಹತ್ತಾ೦ತು ದಿವಿಶಿ ಮಾರೋಕಾ ಮೋಣು ತುಗೆಲಿ ಆಶಿ ವೇ ?.. ಸಾಂಗ "
ಭೀಷ್ಮ : "ಧುರ್ಯೋಧನಾ .. !ಯುದ್ಧ ನಕ್ಕಾ... ನಕ್ಕಾ ಮೋಣು ಕಿತ್ಲೆ ಪೋಟಿ ಸಾಂಗ್ಲೆರಿಯಿ .. ತೂ ಅಯಿಕನಿ ... ಅತ್ತ ದೊಳೆ ಉದ್ದಾಕ ಕಾಣು ಕಸಲೆ ಪ್ರಯೋಜನ ? ಚೆರಡಾ .. ! ಪಾಂಡವ ದೈವಾಂಶ ಜಾವ್ನ್ ಜನ್ಮಾಕ ಅಯ್ಯಿಲೆ .. ತಂಕಾ ದೇವಾಲೆ ಸಹಾಯು , ಕಟಾಕ್ಷ ಅಸ್ಸ . ತೂ .. ಕರ್ಣ ಕ ನಂಮ್ಗೂನ್ ... ತಗೆಲೆ ಉತ್ತರ ಅಯಿಕತಾ ವಿನಾಃ ... ಪಾಂಡವಾ೦ಗೇಲೆ ಭುಜ ಬಲ ಕಿತ್ಲೆ ಮೋಣು ಪೊಳಯಿನಿ ... ತ್ಯೆ ಫಲ ಅತ್ತ ಖತ್ತಾ ಅಸ್ಸ ' ಯಥಾ ಕರ್ಮ , ತಥಾ ಬುದ್ಧಿ . ಯಥಾ ಬುದ್ಧಿ ತಥಾ ಫಲ ' ಕರ್ಮಾ ಯೋಗಿ ಜಾವ್ನ್ ಹಾಂವ ಯುದ್ಧ ಕರ್ತಾ ಅಸ್ಸ . ಧಾಹ್ ಹಜಾರ ಯೋಧಾಂಕ ಏಕ್ ಏಕ್ ದಿವಸು ನಾಶ ಕೆಲ್ಲಾ . ಯುದ್ಧಾ ಪೊಷಿ ಫುಡೇಕಚಿ ಹಾಂವೆ ತುಕ್ಕ ಸಾಂಗ್ಲಾ . ಪಾಂಡವಾಂಕ ಮಿಗ್ಗೆಲೆ ಹಾತ್ತಾನ ದಿವಿಶಿ ಮಾರ್ನಾ ಮೋಣು ... ಧುರ್ಯೋಧನಾ ..! ಹಾಂವ ಅತ್ತ ಆನ್ನೇಕ ಪೋಟಿ ಸಾಂಗ್ತಾ ತುಗೆಲೆಗಿ ಶಂಬರಿ ಅಕ್ಷೋಹಿಣಿ ಸೈನ್ಯ ಆಸ್ಲೆರಿಯಿ ... ಪಾಂಡವಾಂಕ ನಾಶ ಕೋರು ಜಾಯ್ನಾ . ಧರ್ಮ ರಾಯಾಕ ಹಾಂವ ಸಂಘುನ್ ಸಮಾಧಾನ್ ಕರ್ತಾ ... ಸಂಧಾನ ಕೊರ್ನ್ ಸುಖಾರಿ ರಾಬ ". ಮ್ಹಳ್ಳಲೊ . ಭೀಷ್ಮಾಲೆ ಉತ್ತರ ಅಯಿಕುಚೆ ಕಸಲೆ ... ? ಛೆ .. ! ಮಿಗ್ಗೆಲೆ ಪಕ್ಷಾಂತು ರಬ್ಬುನ್ ಪಾಂಡವಾಂಗೆಲ್ ವೈರೀ ಕಿತ್ಲೆ ಮೋಗು ... ! ಅಂಮ್ ಕಾ ಹಗೆಲ್ ನಿಮಿತ್ಯ ವಿಜಯ ಮೆಳ್ಚೆ ಸಾಧ್ಯ ಅಸ್ಸ ವೇ ... ! ಧಿಕ್ .. ! ಧಿಕ್ಕಾರ ಕೊರ್ನ್ , ದಾಂತ ಚಬ್ಬುನ್ .. ಧುರ್ಯೋಧನ ಆನ್ನೇಕ ಕಡೇನ ಚಮ್ಕಾಲೊ .
ಯುದ್ಧ ಭೂಮಿ ಆಜಿ ಗಡ್ - ಗಡಲಿ . ಗಜ ಸೈನ್ಯ ಭೀಮಾಲೆ ಗಧಾ ಪ್ರಹಾರಾಕ ಏಕ್ - ಏಕ್ ಜಾವ್ನ್ ನೆಲಾರಿ ಪೊಳ್ಳಿ೦ತಿ . ನಕುಲ , ಸಹದೇವಾ ನಿ ಕೌರವ ಅಶ್ವ ಸೈನ್ಯಕ ಕ ಧೂಳಿ ಪಟ ಕೆಲ್ಲೆ . ಉಲೂಪಿ ಅನಿ ಇರಾವಂತ ಅರ್ಜುನಾಲೆ ಪೂತು , ಶಕುನಿಲೆ ಸಾಥ ಭಂವ್ಢಾಂಕ ನಾಗಾಸ್ತ್ರ ಸೋಣು ದಿವಶಿ ಮಾರ್ಲೆ . ಹೇ ಪೋಳಯಿಲ್ ಧುರ್ಯೋಧನಾ ನ ಅಲಂಬಸ ಮ್ಹಳ್ಳೆಲೆ ರಾಕ್ಷಸ ವೀರಾ ಕ , ಇರಾವಂತ ಎದ್ರಾಕ ಪೆಟಯಿಲೆ . ಹಗೆಲ್ ಮಾಯಾ ಯುದ್ಧಾ೦ ತು ಇರಾವಂತ ಆನಿ ಉಲೂಪಿನ ಜೀವು ಸೊಳ್ಳೊ . ಘಟೋತ್ಕಚಾ ಕ , ತಗೆಲೆ ಪೂತು ಉಲೂಪಿಲೆ ಮರಣಾ ನಿಮಿತ್ಯ .. ಭಾರಿ ದುಃಖ ಝಲ್ಲೆ . ತಗೆಲೆ ಅಂಗ ರಕ್ಷಕಾಂಕ ಘೇವ್ನ್ ಆಲಂಬಸಾ ಎದ್ರಾಕ ಯುದ್ಧಾ ಕ ರಾಬಲೊ . ಘಟೋತ್ಕಚಾಲೆ ಅಂಗ ರಕ್ಷಕ ಮಾಕ್ಷಿ ರಬ್ಬಿಲೆ ಧುರ್ಯೋಧನಾಲೆ ಹತ್ತಾ೦ತು ಮೇಳ್ನ್ ಪ್ರಾಣ ಸೊಳ್ಳೋ . ಇರಾವಂತಾ ಲೇ ಮರಣ .. ಅರ್ಜುನಾಕ ಸಹನಾ ಕೋರು೦ಕ ಜಾಯ್ನಿ . ಪುತ್ರ ಶೋಕಾಂತ್ ಉದ್ವಿಗ್ನ ಝಲ್ಲೋ . ಕೃಷ್ಣಾ ನ ಅರ್ಜುನಾಕ ಸಮಾಧಾನ ಕೆಲ್ಲೆ . ಇರಾವಂತಾಲೆ ಮರಣ , ಅರ್ಜುನಾಲೆ ಪುತ್ರ ಶೋಕ , ಪೊಳೊನ್ ಭೀಮ , ಕೋಪಾನ ಉಜ್ಜ್ಯೋ ಶಿ ಝಲ್ಲೋ . ಹತ್ತಾ೦ತು ಖಡ್ಘ ಘೆವ್ನ್ ಶತ್ರು ಸೈನ್ಯಾಲ್ ರುಂಡ ಉಬ್ಬೊಚ್ಯಾ ಶುರು ಕೆಲ್ಲೆ . ಧುರ್ಯೋಧನಾಲೆ ಭಂವ್ಢ ... ಅನದ್ರಶ್ಯ , ಕುಂಡಬೇಧಿ , ಕನಕ ಧ್ವಜ , ವಿರಾವಿ , ದೀರ್ಘಬಾಹು , ದೀರ್ಘಲೋಚನ ,.... ಸರ್ವ ವೊಟ್ಟು ಜಾವ್ನು ಭೀಮಾ ವೈರಿ ಶರ ವರ್ಷ ದೇವೈಲೆ.... ಝಲ್ಲೇರಿ , ಭೀಮ ಸೇನಾ ನ ಯೇಕ್ಲ್ - ಎಕ್ಲೆ೦ನ್ಕ ಧೋರ್ನ ನೆಲಾರಿ ಮಾರ್ನ್ ದಿವಿಷಿ ಮಾರ್ಲೆ ಧುರ್ಯೋಧನ , ದುಃಶ್ಶಾಸನ , ಶಕುನಿ ಯೇವ್ನ್ ... ಕೌರವ ಭಂವ್ಢಾ೦ಗೆಲೆ ಮೃತ ದೇಹ ಪೊಳೊನ್ ... ಶಕುನಿ ಕ ಆಲಿಂಗನ ಕೊರ್ನ್ ' ಭೋ' ಮೋಣು ರಳ್ಳೊ . ಶಕುನಿ ಕ ಕಷ್ಶಿ ಸಮಾಧಾನ ಕೊರ್ಚೆ ಮೋಣು ಕಳ್ನಿ . " ಧುರ್ಯೋಧನಾ ..! ಹ್ಯೇ ಆಟ ದಿವಸಾ ಯುದ್ಧ ವಿಶ್ಲೇಷಣ ಕರ್ತಾನಾ ಮಕ್ಕ ಯೆಕು ಅನುಮಾನ ಯೆತ್ತಾ . ಭೀಷ್ಮ , ದ್ರೋಣ ಕೃಪಾಚಾರ್ಯ ಹನ್ನಿ ಪಾಂಡವ ಪಕ್ಷ ಪಾತಿ ಜಾವ್ನ್ ಯುದ್ಧ ಕರ್ತಾತಿ ಕೀ ... ಮೋಣು ದಿಸ್ತಾ . ಕಶೀ ಪುಣಿ ಕರ್ಣಾಕ ... ಯುದ್ಧ ರಂಗಾಂತು ಹಾಡಕಾ . ಅಯಿಚೆ ತುಗ್ಗೆಲ್ ಭಂವ್ಢಾ೦ಗೆಲೆ ಮರಣಾ ಸಂಕಟ , ಹಗೆ ಧೋರ್ನ್ ಪಾಂಡವಾ ವೈರಿ ಕಾಡ್ಕಾ " " ವಯ್ ಮಾಮಾ ... ತೂ೦ವೆ ಸಂಗ್ಚೆ ಸತ್ಯ ಮೋಣು ದಿಸ್ತಾ ಮಕ್ಕಾ ... ಮಕ್ಕ ಏಕ ಪೋಟಿ ಕರ್ಣಾಕ ಪೊಳೊಕಾ .. ತೂ ವೊಚ್ಚುನ್ ಕರ್ಣಾ ಕ ಮಿಗೆ ಲೆ ಶಿಬಿರಾ ಕ ರಾತ್ರಿ ಅಪ್ಪೋನ್ ಹಾಡಿ " ಮೋಣು ಆಜ್ಞಾ ಕೆಲ್ಲಿ . ಸೂರ್ಯಾಸ್ತ ಜಲ್ಲೆಲೆ ನಿಮಿತ್ಯ ವಿರಾಮ ಘೋಷಣ ಶಂಖ ಪುಂಖಾರನ ಜಲ್ಲಿ . ತ್ಯೇ ದಿವಸಾ ಯುದ್ಧ ರಾಬಲೆ . ರಾತ್ರಿ ... ಕರ್ಣ ,ದುಃಶ್ಶಾಸನ ,ಶಕುನಿ ಧುರ್ಯೋಧನಾಲೆ ಶಿಬಿರಾಂತು ಯೇವ್ನು ಪಾವಲೀ೦ತಿ.
ಕರ್ಣ :" ಕಸಲೆ ಮಿತ್ರಾ ..!? ಕಿತ್ಯಾಕ ಅಪ್ಪಯಿಲೆ .. ? ಹಾಂವ ಮಿಗೆಲೆ ಶಿಬಿರಾಂತು ಬಯಿಸೂನ್ ಯುದ್ಧ ಕೋಲಾಹಲ ಅಯಿಕುನ್ ಬೊಸ್ಲೊ ... ಅನಿ ಹಾಂವೆ ಕಸಲೆ ಕೊರ್ಚೆ .. ? ತುಗೆಲೆ ಮಹಾ ಸೇನಾನಿ ನ ಇಚ್ಚಾಮರಣಿ ಕವಚ ಧಾರಣ ಕೆಲ್ಲಾ . ತುಗೆಲೆ ಸೈನ್ಯಾ ಕೋಲಾಹಲ ... ವಿಜಯೀ ಕೋಲಾಹಲ ಮೋಣು ಲೆಕ್ಕುನ್ ಅಶಿಲೋ . ತುಗೆಲೆ ತೊಂಡ ಪೊಳೈತನಾ ... ಹಾಂವೆ ಲೆಕ್ಕಿಲೆ ಚೂಕಿ ಮೋಣು ದಿಸ್ತಾ ... ಕಸಲೆ ಮಿತ್ರಾ ... ? "
ಶಕುನಿ : " ಹ್ಯೇ .. ಇಚ್ಚಾಮರಣಿ ಕವಚ ಚೀ ... ಹೋಡ ಸಮಸ್ಯ ಜಾವ್ನ್ ರಾಬಲಾ .. ಅಂಗಾರಾಜ್ , ಪಿತಾಮಹ .. ಪಾಂಡವಾಂಗೆಲೆ ವಧ ಕರ್ನಾ ... ಆನಿ ಭೀಷ್ಮಾ ಕ ಕೊಣಾಚ್ಯಾನ ದಿವಿಷಿ ಮಾರೂ ಜಾಯ್ನಾ . ಹೇ ಇಚ್ಚಾಮರಣಿ ಮಧ್ಯೆ ಯೇನಾ ನಾತ್ತಿಲೆ ಝಲ್ಲೇರಿ ... ಅನಿ ಕೋಣಾಕಾಯ್ ಪುಣಿ ಪ್ರಧಾನ ಸೇನಾಧಿಪತಿ ಕೊರ್ಯೇತಶಿಲೆ ... ಹೇ ಗಂಗಾ ಪುತ್ರ , ಭರಥ ಶಿರೋಮಣಿ , ಅಂಮ್ ಕಾ ಪರಾಜಯ್ ಜಾವಚಾ ಸೋಣಾ ... ಹ್ಯೇ ಖಂಡಿತ .. ಝಲ್ಲೇರಿ ಹೇವಯ್ ಸತ್ಯ .. ಆಯಿಕ ಧುರ್ಯೋಧನ್ , ಆಂಮ್ಕಾ ... ಜಯ ಜಾವ್ಚ್ಯಾತಾಯ್ ಸೋಣಾ ತ್ಯೋ .. "
ದುಃಶ್ಶಾಸನ :" ಮಾಮಾ ..! ಅಸಲೆ ನಮುನೆ ಸೇನಾಪತಿ ಅರ್ಥ ಕಸಲೆ .. ? ಅಂಮ್ ಕಾ ವಿಜಯ ಮೇಳ್ ನಾ ... ಪರಾಜಯ ಜಾವ್ಚ್ಯಾ ಸೋಣಾ ... ಮ್ಹಳ್ಳೆರಿ ಹಜ್ಜೆ ಅರ್ಥ ಕಸಲೆ .. ? "
ಧುರ್ಯೋಧನ : " ಹಾಂವ ತಕ್ಕಾ ... ಪ್ರಧಾನ ಸೇನಾಪತಿ ಕೊರುಂಕ ಸೋಣಾ ಅಷ್ಶಿಲೊ .. !ಝಲ್ಲೇರಿ .. ಮಾಮಾ ತೂವೆಂಚಿ ಸಂಘಿಲೆ ... ಉಡ್ಘಾಸ್ ಕರಿ .."
ಶಕುನಿ :" ಹಾಂ ... ಹಾಂ ..! ಝಲ್ಲೇರಿ ... ಗೆಲ್ಲೆರಿ ... ಶಬ್ಧಾ ಪ್ರಯೋಗ ಕೊರ್ಚೆ ಫುಡೇ ... ಸಮಾ ಆಲೋಚನ ಕೊರ್ಕಾ ಧುರ್ಯೋಧನ್ ... ತುಗ್ಗೆಲ್ ಮಿತ್ರ ಅಂಗರಾಜ ಕರ್ಣಾಕ ಸೇನಾಪತಿ ಕೆಲ್ಲೆಲೆ ಝಲ್ಲೇರಿ ... ರಣ ಭೂಮಿ೦ತು ತೂ .. ಎಕ್ಲೊಚಿ ಝತ್ತಷ್ಶಿಲೋ ... ಭರಥ ವಂಶಾ ಧ್ವಜ ಸಕಲ ಯೆನಾಶಿಲೊ .. ಭರಥ ವಂಶಾ ಪತಾಕೆ ಮುಳಾಂತ್ ಅಂಮ್ ಕಾ ಸಕ್ಕಡಾಂಕ ಯುದ್ಧ ಕೋರ್ಕಾ ಅಶಿಲೆ ... ತ್ಯೆ ನಿಮಿತ್ಯ ಹಾಂವೆ .. ಭೀಷ್ಮಾನ ಪ್ರಧಾನ ಸೇನಾಪತಿ ಜಾವ್ಕಾ ಮೋಣು ಸಂಘಿಲೆ ..."
ಧುರ್ಯೋಧನ : " ತಷ್ಶಿ ಝಲ್ಲೆರಿ ಹಾಂವೆ ಕಸಲೆ ಕೋರ್ಕಾ ಅಷ್ಶಿಲೆ .. ? ಶಕುನಿ ಮಾಮಾ .. ! ಆಮ್ಗೆಲೆ ವಿಜಯಾ ಕ .. ಅರ್ಜುನಾಲೆ ವಧಾ ಜಾವ್ಚೆ ಅತೀ ಅವಶ್ಯ ಅಸ್ಸ ಮಾಮಾ ... ಅರ್ಜುನ ವಧಾ ಪಿತಾಮಹ ಕರ್ನಾ .. ಹ್ಯೇ ಖಂಡಿತ . ಹಾಂ .. ! ತ್ಯೆ ಅರ್ಜುನಾ ನ ಲಕ್ಷ - ಲಕ್ಷ ಸೈನಿಕಾಲೆ ಮೃತ ದೇಹ ರಾಶಿ ಘಾಲ್ಲಾ .. ಯೆಕಾತ್ ವೆಳ್ಯೇರಿ ... ಹಾ೦.. ! ಅಷಿ ಝತ್ತ ಮೋಣು ಗೊತ್ತಶಿಲೆ ಝಲ್ಲೆರಿ ... ಅನ್ನೇ ಕ್ಲೇಕ ಸೇನಾಪತಿ ಕೊರುಂಕ ಹಾಂವ ಖುದ್ದ್ .. ಪಿತಾಮಹಾಲೆ ವಧಾ ಕರ್ತಾಶಿಲೋ .. ಮಕ್ಕಾ .. ಹ್ಯೇ ಯುದ್ಧಾಂತ್ ವಿಜಯ್ ಜಾವ್ಕಾ ... ಅನಿ ಮಿಗ್ಗೆಲೆ ಮಿತ್ರ ಕರ್ಣಾ ಲೆ ಸಹಾಯು ನಾಶಿ .. ಮಕ್ಕಾ ವಿಜಯ್ ಜಾವ್ಚ್ಯಾ ಸಾಧ್ಯ ನಾ . ಏಕಾಂತ್ ವೇಳಾ ಅರ್ಜುನ್ ಯುದ್ಧಾ೦ತ್ ಪ್ರಶ್ನೊ ಝಲ್ಲೇರಿ ... ತ್ಯೆ ಪ್ರಶ್ನೆ ಕ ಉತ್ತರ ... ಮಿಗ್ಗೆಲೆ ಮಿತ್ರ ಕರ್ಣ ... ತ್ಯೆ ನಿಮಿತ್ಯ ಮಾಮಾ .. ! ಭೀಷ್ಮಾ ಲೆ ಜಾಗೇರಿ .. ಕರ್ಣಾಕ ಕಶಿ ಹಾಡ್ಚೆ ಮೋಣು ವಿಚಾರ ಕೊರ್ನ್ ಸಾಂಘ . " ಶಕುನಿ :" ಅರೆ ..! ಹ್ಯೇ ವಿಷಯಾಂತ್ ಮಕ್ಕಾ ವಿಚಾರ ಕೋರ್ಚ್ಯಾಕ ಕಾಯೀ ನಾ .. ಪ್ರಿಯ ಧುರ್ಯೋಧನ್ .. ! ಯೇಕಾತ್ ವೆಳಾ .. ಪಾಂಡವಾಂಕ ಯುದ್ಧಾ೦ತು ವಿಜಯ ಜಾವ್ಕಾ ಜಲ್ಲೇರಿ ... ಭೀಷ್ಮಾಕ ದಿವಿಶಿ ಮಾರ್ಚ್ಯಾಕ ಕಾಯಿ ಪುಣಿ ಆಲೋಚನಾ .. ಉಪಾಯ ಕೊರ್ನ್ ಅಸ್ಸುಕಾ ... ತ್ಯೆ ವಿಷಯಾನ್ ಅಮ್ಮಿ ಕಸಲೇಕ ಮತ್ತೆ ಹೂನ ಕೋರ್ಕಾ .. ? ತಾಂಗೆಲೆ ವಿಚಾರು ತಾಂಕಾ ಸೋಡಿ . ತಾಂಗೆಲೆ ಪಕ್ಷಾಂತ್ ವಾಸುದೇವ್ ಕೃಷ್ಣ ಅಸ್ಸ .. ತ್ಯೋ ಕಸಲೆಯ್ ಉಪಾಯ್ ಸೊದ್ದಿತಾಲೊ ..! ಹ್ಯೋ ಕಾಂಟೊ ತಾಂಗೆಲೆ ಗಳೇ೦ತುಯಿ ಶಿರ್ಕಲಾ ಹಾಂ " ಧುರ್ಯೋಧನ :" ಮಿತ್ರ ಕರ್ಣಾ ..! ಮಿಗೆಲೆ ಖತಿರಿ ಪುಣಿ ತೂ೦ವೆ ಯುದ್ಧಾ ಕ ಯೆವ್ಕಾ .. ಮಿಗೆಲೆ ಭಂವ್ಢ .. ತ್ಯೆ ದುಷ್ಟ ಭಂಢ ಭೀಮ ಸೇನಾಲೆ ಹಾತ್ತಾಂತುಮೊರ್ಚೆ ಪೊಳಯಿತನಾ ಮಕ್ಕಾ ನೀದ ಯೇನಾ . ತೂ೦ವೆ ಯುದ್ಧ ಭೂಮಿಕ ಯೇನಾ ನಾತ್ಲೆರಿ .. ಪಾ೦ಡವ , ಮಿಗೆಲೆ ಬಾಕಿ ವ್ಹರ್ಲೆಲೆ ಭಂವ್ಢಾಂಕ ದಿವಿಶಿ ಮಾರ್ತಾತಿ . ಸೇನಾಧಿಪತ್ಯ ತುಕ್ಕಾ ದಿತ್ತಾ ... ಭೀಷ್ಮ ಪಿತಾಮಹ ಸ್ವಲ್ಪ ದಿವಸ ವಿಶ್ರಾಮ ಕೊರೋ . "
ಕರ್ಣ :" ಧುರ್ಯೋಧನಾ ..! ಭೀಷ್ಮಾ ಕ ಮಿಗೆಲೆ ವೈರಿ ದ್ವೇಷ ಅಸ್ಸ ಹ್ಯೇ ಸತ್ಯ ... ಭೀಷ್ಮ ತ್ರಿಲೋಕ ವೀರ ಮೋಣು ಸರ್ವಾಂಕ ಗೊತ್ತಶಿಲೋ ವಿಷಯು ... ಹೇ ವಿಸೋರು ನಜ್ಜ . ಶಂಬರಿ ಜನ ಕರ್ಣ , ಅರ್ಜುನ ಎದುರ ಅಯಿಲೇರಿ ಭೀಷ್ಮಾಕ ಪರಾಜಯ ಕೊರ್ಚೆ ಅಸಾಧ್ಯ . ಭೀಷ್ಮ ದ್ರೋಣ ಅಷ್ಶಿಲ್ ನಿಮಿತ್ಯ .. ಇತ್ಲೆ ದಿವಸ ತುಗ್ಗೆಲ್ ಸೈನ್ಯ ವಾಂಚುನ್ ಉರ್ಲೆ . ಭೀಷ್ಮಾನ ಆಸ್ಚಯೆ ತೆದೊಳ್ ತಾಯ್ ... ತುಕ್ಕಾ ಕಾಯಿ ಭ೦ಯ್ಯ ನಾ . ತೂ ಅತ್ತ ಭೀಷ್ಮಾಲೆ ಶಿಬಿರಾ ವೊಚ್ಚುನ್ .. ನ್ಯಾಯ ವಿನಯ ಉತ್ರಾನಿ .. ಸಾಮೋಪಾಯನ ತಕ್ಕಾ ತುಗ್ಗೆಲ್ ದಿಕಾನ ಕೊರ್ನ್ ಘೇ . ಭೇದೋಪಾಯ ನಿಮಿತ್ಯಾನ ನಯ್ಯ್ . ತ್ಯೆ ಮಂಥಾರೆಕ ಮುಖ ಸ್ತುತಿ ಕೆಲ್ಲೇರಿ ಖುಶೀ ಝತ್ತಾ . ತಕ್ಕ ಮನಾ ಖುಷಿ ಕೊರ್ನ್ , ತುಗ್ಗೆಲ್ ವಿಚಾರಾಕ ಸಮ್ಮ ಜಾವ್ನ್ ನಾಂಚೆ ತಶಿ ಕರಿ ಮೋಣು ವಾಟ್ ದಕ್ಕಯಿಲಿ . ಭೀಷ್ಮಾಲೆ ಶಿಬಿರಾಂತ್ .. ರಾಜ ವೈದ್ಯ , ಅಂಗಾ ಜಲ್ಲೆಲೆ ಘಾಯಾಕ ವಕ್ಕಾದ ಲಾಯಿತಾ ಆಶಿಲೇಂತಿ . ಇತ್ಲೆ ಘಾಯ ಪೊಳೋನ್ ಧುರ್ಯೋಧನಾಕ ಪಿತಾಮಹಾ ವೈರಿ ಅಭಿಮಾನ ದಿಸ್ಲೆ ... ಮನಾಂತ್ ಗರ್ವ ಪಾವ್ಲೋ ... ಅಶಿ ಚೂಕಿ ಲೆಕ್ಕುನಜ್ಜ ಅಶಿಲೆ ಮೋಣು ಸಂತಾಪು ಪಾವಲೋ . ಭೀಷ್ಮಾಲೆ ಮತ್ತೆ ಬದೀನ ರಬ್ಬುನ್ ವಾರೆ ಘಾಲ್ನ್ ರಾಬ್ಲೊ . ಭೀಷ್ಮಾನ ದೋಳೆ ಸೊಡ್ತಾನಾ .. ಧುರ್ಯೋಧನ , ದುಃಶ್ಶಾಸನ ಹಯೇ ಬದಿ ತ್ಯೆ ಬದಿ ರಬ್ಬುನ್ ವಾರೆ ಘಾಲ್ಚೆ ಪೋಳೋನ್ " ಧುರ್ಯೋಧನಾ ಹ್ಯೇ ವೆಳ್ಯೇರಿ ಕಿತ್ಯಾ ಅಯಿಲೊ .. ? " ಮೋಣು ನಿ೦ಮಗಿಲೆ . " ಕಾಯಿ ನಾ ತುಕ್ಕಾ ಪೊಳೋ ನ್ ವೋಚ್ಚಾ ಮೋಣು ಆಯ್ಯಿಲೋ " ಮೋಣು ಸಂಘುನ್ ಪಯ್ಯಾರಿ ಪೋಣು ವಂದನ ಕೆಲ್ಲಿ . " ಯೋ ಬಾಳಾ ..! ಬಯಿಸ ..ತುಗ್ಗೆಲ್ ಶೀತ ಖೆಲ್ಲೆಲೆ ಋಣಾ ಕಾರಣ ತುಗ್ಗೆಲ್ ದಿಕಾನ ರಬ್ಬುನ್ ಯುದ್ಧ ಕರ್ತಾ ಅಸ್ಸ . ದಿವಸ ದಿವಸಾ ಕ ಅಂಗಾ ಶಕ್ತಿ ಊಣೆ ಝತ್ತಾ ಅಸ್ಸ . ಹ್ಯೇ ಪೌರುಷ ಜೀವನಾ ಕ ಫೊಡ್ಧೊ ಘಾಲ್ಚೆ ವೇಳು ಅಯಿಲಾ ಮೋಣು ದಿಸ್ತಾ ... ಕುಮಾರಾ ..! ಕುರು ವಂಶಾ ಕುಡಿ ಎಕ್ಲೆ ಎಕ್ಲೆನ ಭುಂಯ್ಚೇರಿ ಪೋಣು , ಮಿಗ್ಗೆಲೆ ದೊಳೆ ಎದ್ರಾಕ ಆತ್ಮ ಬಲಿದಾನ ಕೊರ್ಚೆ ಪೋಳಯಿತಾನಾ ... ಮಿಗೆಲೆ ಆತ್ಮ , ಮನ , ಮುಕ್ತಿ ಖತಿರಿ ಉತ್ತೇಜನ ಕರ್ತಾ ಅಸ್ಸ .".... ಮ್ಹಳ್ಳಲೋ ಭೀಷ್ಮ . ಪಿತಾಮಹಾಲೇ ಉತ್ರಾಕ ಧುರ್ಯೋಧನಾ ಲೇ ಮನ ಕರ್ಗಲೆ ..." ಪಿತಾಮಹಾ ...! ದೋಳೆ ಧಾಂಕುನ್ ಥೊಡೆ ವಿಶ್ರಾಮ ಕರಿ " ಮೋಣು ಸಂಘುನ್ ತಾಗೆಲ್ ಸೇವಾ ಕೊರುಂಕ ಮುಕಾರ್ಸುನ್ ಅಯಿಲೊ .
ಉಮಾಪತಿ
No comments:
Post a Comment