MAHABHARATH Part -51 ( Konkani Bhaashentu )
SHARA SHAYYA ... ಶರ ಶಯ್ಯಾ
ಸೂರ್ಯು ಉದಯು ಝಲ್ಲೊ ... ಆಜಿ ಧಾಂಚೆ ದಿವಸು ... ಭೀಷ್ಮ ಪಿತಾಮಹ ವಗ್ಗಿ ಉಠಯಿಲೊ . ಸೂರ್ಯಾ ಕ ಅರ್ಘ್ಯ ದೀವ್ನ್ ಶಾಂತ ಮನಾರಿ ಯುದ್ಧ ರಂಗಾ ಕ ವೋಚ್ಚಾಕ ತಯ್ಯಾರ್ ಝಲ್ಲೊ . ಭೀಷ್ಮ ಪಿತಾಮಹಾಕ ಗೊತ್ತಸ್ಸ... ಆಜಿ ತಗೆಲ್ ಆಖೇರಿ ದಿವಸು ಮೋಣು . ಝಲ್ಲೇರಿಯಿ ತಗೆಲೆ ಕರ್ಮ ದೃಷ್ಠಿ ದೂರ ಜಾಯ್ನಿ . ಗುರು ಪರಶುರಾಮಾಕ ಧ್ಯಾನ ಕೋರ್ನು ಸಾಷ್ಟಾಂಗ ವಂದನಾ ಕೋರ್ನು , ಶ್ವೇತ ವಸ್ತ್ರ ಧಾರಣ ಕೊರ್ನ್, ನಿಡ್ಲಾರಿ ಅರ್ಧ ಚಂದ್ರ ತಿಲಕ ಲಾವ್ನ್ , ಗಂಗಾ ಮಾತೆ ಕ ವಂದನ ಕೊರ್ನ್ , ಯುದ್ಧ ರಂಗಾ ದಿಕಾನ ಭಾರ್ಸರ್ಲೊ . ತಪಸ್ಯಾ ದುಕೂನ್ ಜಾಗೊ ಝಲ್ಲಲೊ ಮಹಾಶಿವಾ ಮ್ಹಣ್ಕೆ ದಿಸ್ಲೊ . ಕೃಷ್ಣಾಲೆ ಉಡ್ಘಾಸು ಅಯಿಲೊ . ಯುದ್ಧ ಭೂಮಿಂತು ಕೃಷ್ಣಾರ್ಜುನ ಖಂಯ್ ದಿಸ್ತಾತಿಕೀ ಮೋಣು ಚಾರಿ ದಿಕಾನ ಪೋಳಯಿಲೆ ... ದೂರ ... ದೂರ .. ಅರ್ಜುನು ಕೃಷ್ಣ ಸಾರಥ್ಯಾರಿ ಯೆವ್ಚ್ಯೆ ದಿಸ್ಲೆ . ಕೃಷ್ಣಾ ಕ ದೂರ ದುಕುನು , ಮನಾಂತು ಸ್ಮರಣ ಕೋರ್ನ್ ನಮನ ಕೆಲ್ಲೆ ... ಅರ್ಜುನಾಕ ಮೆಳ್ನಾಶಿ ವಿಂಗಡ ವಾಟ ಕೊರ್ನ್ ಯುದ್ಧಾಕ ಗೆಲ್ಲೊ . ಸರ್ವಾನಿ ಧ್ವ೦ಧ್ವ ಯುದ್ಧ ಕೊರ್ಚೆ ಸೊಳ್ಳಾ ... ಯುದ್ಧ ನಿಯಮ , ನಿಭಂಧನಾ ಅತ್ತ ಕೊಣಯ್ಯ್ ಪಾಲನ ಕರ್ನಾತಿ ... ಎಕ್ಲೆ ವೈರಿ ಧಾಹ ಜನ ಪೋಣು ಆಕ್ರಮಣ ಕೋರ್ಚ್ಯಾ ಶುರು ಕೆಲ್ಲಾ . ಅಭಿಮನ್ಯು , ವಿರಾಟ ರಾಯು , ದ್ರುಪದ , ಸಾತ್ಯಕಿ , ಚಿಕೇತನ , ದ್ರಷ್ಟಕೇತು , ಹನ್ನಿ ಪೂರಾ ಜನ ಭೀಷ್ಮಾ ಲಗ್ಗಿ ಯುದ್ಧ ಕೊರುಂಕ ಅಯಿಲೀ೦ತಿ . ಹ್ಯೇ ಪೋಳಯಿಲೆ ದ್ರೋಣಾಚಾರ್ಯನ , ಅಶ್ವತ್ಥಾಮ , ಕೃತವರ್ಮ , ಕೃಪಾಚಾರ್ಯ , ಭೂರಿಶ್ರವಾಹ , ಕಾಂಬೋಜ ರಾಯು , ಸುಶರ್ಮ , ಹಾಂಕಾ ಭೀಷ್ಮಾಲೆ ಸಹಾಯಾಕ ಪೆಟೋನ್ ದಿಲ್ಲೆ . ಕೋಣ ಖಂಯ್ಯ್ ದುಕುನ್ ... ಕೋಣ , ಕೊಣಾ ಲಗ್ಗಿ .. ಯುದ್ಧ ಕರ್ತಾ ಮ್ಹಳ್ಳೆಲೆ ಕಳ್ನಿ . ಭೀಷ್ಮಾನ ಏಕ ಬಾಣ ಹಜಾರ ಬಾಣ ಜಾವ್ಚೆ ತಶಿ ಮಂತ್ರಿತ ಕೊರ್ನ್ ... ಸೈನ್ಯ ಚೆಲ್ಲಾ ಪಿಲ್ಲಿ ಜಾವ್ಚೆ ತಶಿ ಕೆಲ್ಲೆ . ಭೀಷ್ಮಾಕ ಸೊದ್ದು ನ್ ಆಯಿಲೆ ಮ್ಹಣ್ಕೆ... ಕೃಷ್ಣಾನ ರಥು ಭೀಷ್ಮಾಲೆ ಯೆದ್ರಾಕ ಹಾಣು ರಬ್ಬಯಿಲೆ . ಭೀಷ್ಮಾನ ಪೊಳಯಿಲೆ .... ಯೆದ್ರಾಕ ಶಿಖಂಢಿರಾಬ್ಲಾ !ಮಾಕ್ಷಿ ಅರ್ಜುನ್ ರಾಬ್ಲಾ .. ಕೃಷ್ಣಾಲೆ ತೊಂಡ ಪೋಳಯಿಲೆ... ದೋಳೆ ಪೊಳಯಿಲೆ .. ತ್ಯೆ ದೃಷ್ಟಿ೦ತು .. ಏಕ ಹಠ ಪೋಳಯಿಲೆ... ಅತ್ತ ಕಸಲೆ ಕರ್ತಾ ? ಮ್ಹಳ್ಳೆಲೆ ಪ್ರಶ್ನೋ ಪೋಳಯಿಲೆ. 'ಹತ್ತಾ೦ತುಲೆ ಧನುಷ್ಯ ಸಕಲ ಘಾಲಿ'ಮ್ಹಳ್ಳೆಲೆ ಆಜ್ಞಾ ಪೊಳಯಿಲಿ ... ಭೀಷ್ಮಾನ . ವೊಂಟಾರಿ ಸಾನು ಹಾಸು ಆಯಿಲೊ ಭೀಷ್ಮಾಕ. ಹಾತ್ತಾಂತು ಧರ್ಲೆಲೆ ಧನುಷ್ಯ ಅನಿ ಬಾಣ ಸಕಲ ಘಾಲ್ಲೆ . ಶಿಖಂಢಿ ಲೆ ಏಕು ಬಾ ಣು ಸುರ್ವೇಕ ಪಿತಾಮಹಾಕ ಲಾಗ್ಲೆ ... ದೂರ ರಬ್ಬುನ್ ಯುದ್ಧ ಕರ್ತಾಲೊ ದ್ರೋಣಾಚಾರ್ಯಾ ಕ ದಾವೊ ದೋಳೋ ಅಧರ್ಸಲೆ ...ದಾವೊ ಭುಜೋ ಉಡ್ಲೆ . ಕಸಲೆ ಕೀ ಅಪಶಕುನ ಜಾವ್ಚ್ಯಾ ವತ್ತಾ ಮೋಣು ಅನುಭೂತಿ ಝಲ್ಲಿ . ಆಕಾಶಾಂತು ರಣ ಕಾಯ್ಳೆ ... ಖೀ ... ಖೀ ಮ್ಹಳ್ಳೆಲೆ ಚೀತ್ಕಾರ ಕೊರ್ನ್ ಘು೦ವ್ಚೆ ಪೊಳಾಯಿಲೆ ... ಆಜಿ ಕಸಲ್ ಕೀ ಹೊಡ ಧುರ್ಘಟನಾ ಜಾವ್ಚ್ಯಾ ವತ್ತಾ ಮ್ಹಳ್ಳೆಲೆ ಶಕುನ ದಿಸ್ಲೆ . ಅಶ್ವಥಾಮಾಕ ಘೇವ್ನ್ ಭೀಷ್ಮಾ ದಿಕಾನ ಅಯಿಲೊ .
ಶಿಖಂಢಿಲೆ ಮಾಕ್ಷಿ ರಬ್ಬಿಲೆ ಅರ್ಜುನಾನ ಯೆಕ್ಕ ಪೋಟಿ ಧಾಹ್ ಬಾಣ ಭೀಷ್ಮಾ ವೈರಿ ಪ್ರಯೋಗ ಕೆಲ್ಲೆ . ಆರ್ಜುನು ಭಾವುಕ ಜಾವ್ನ 'ಪಿತಾಮಹಾ .... 'ಮೋಣು ಅಂತರಾಳ ದುಕುನ್ ಚೀತ್ಕಾರ ಕೆಲ್ಲೆ .. ಭೀಷ್ಮಾಲೆ ಸಂಕಟ , ದೂಕಿ .. ತಳ್ - ಮಳ್ ಚೆ ಅನುಭವ .. ಅರ್ಜುನಾಕ ಜಾವ್ನ್ ದೊಳೇ೦ತ್ ಅಶ್ರು ಧಾರಾ ಅರ್ಜುನಾ ಕ ಕಳ್ನಾಶಿ ದೆವಲೆ . ಝಲ್ಲೆರಿಯಿ ಭೀಷ್ಮಾನ ವೀಸಾ ಬಾಣ ಸೊಳ್ಳೆ . ಅರ್ಜುನಾ ನ ಸೊಳ್ಳೆಲೆ ಬಾಣ ಭೀಷ್ಮಾಲೆ ಹರ್ದೆಕ . ಪೊಟ್ಟಾಕ , ಹತ್ತಾಕ ಲಗ್ಗುನ್ ... ಮುಕಾರಿ ದುಕೂನ್ ಮಾಕ್ಷಿ ತಾಯ್ ಪಾವಲೆ .ಭೀಷ್ಮಾನ "ಆಹ್-ಆಹ್ .. ಹಾ ..." ಮೋಣು ಚೀತ್ಕಾರ ಕೊರ್ಚೆ ತಶಿ ಝಲ್ಲೆ . ಹತ್ತಾ ಅಶಿಲೆ ಧನುರ್ ಬಾಣ ತಕ್ಕ ಕಳ್ ನಾಶಿ ನೆಲಾರಿ ಪೊಳ್ಳೆ . ನೆಶೀಲೆ ಶ್ವೇತ ವಸ್ತ್ರ ರಗ್ತಾ ಮಯ ಜಾವ್ನ್ ಬುಡಚೆ ಸೂರ್ಯು ಸೋ ದಿಸ್ಲೊ . ಭೀಷ್ಮಾ ಲೇ ಅಂಗಾ ಕವಚ ಭೇತ್ತುನ್ ಛಿದ್ರ ಝಲ್ಲೆ . ರಕ್ತಾ ಧಾರಾ ಮಧ್ಯೆ ಬಾಣ ಹತ್ತಾ ಧೋರ್ನ್ ಹುಂಮ್ಟಾನ್ ಕಾಡುಂಕ ಪ್ರಯತ್ನ ಕೆಲ್ಲೆ . ಮಾಕ್ಷಿ ಮಾಕ್ಷಿ ಯೆವಚೆ ಅರ್ಜುನಾಲೆ ಬಾಣ ... ಭೀಷ್ಮಾಕ ರಥು ಸೋಣು ಸಕಲ ದೆಂವ್ಚೆ ತಶಿ ಕೆಲ್ಲೆ ಅರ್ಜುನಾನ .
ಭೀಷ್ಮ್ : " ಹಾ... ಹಾ... ಹಾ... ಮಕ್ಕ ಗೊತ್ತಸ್ಸ ಅರ್ಜುನಾ ... ಮಿಗೆಲೆ ಅಂಗಾ ಲಾಗ್ಗುನ್ ರಗತ ಪಿವ್ಚೆ ಏಕ್ - ಏಕ್ ಬಾಣ ತೂಗೆಲೆ ಮೋಣು ಮಕ್ಕಾ ಗೊತ್ತಸ್ಸ . ಆಚಾರ್ಯ ದ್ರೋಣಾ ... ತುಗ್ಗೆಲ್ ಶಿಷ್ಯ ಅರ್ಜುನ .. ಸಫಲ ಝಲ್ಲೋ ಹೇ ಯುದ್ಧಾ೦ತು ... ಧನ್ಯ ತೂ ಅಸಲೆ ಶಿಷ್ಯಾ ಕ ತಯ್ಯಾರ್ ಕೆಲ್ಲೆಲೊ .. " ಭೀಷ್ಮ ಚಂಮ್ಕುನ್ ಅರ್ಜುನಾಲೆ ರಥಾ ದಿಕಾನ ಯೆತ್ತಾ ಅಸ್ಸ ಕೃಷ್ಣಾ ಕ ಪೊಳೊನ್ ಹಾಸ್ಲೊ ...' ಹ್ಯೇ ! ಅಚ್ಚುತಾನಂತಾ ! ಮಕ್ಕಾ ಮೋಕ್ಶ ದೀ .. ಕೃಷ್ಣಾ ಕ ಪಾ೦ಯ್ ಪೊಳ್ಳೋ " ಅಹ್ .. ಹಕ್ .. ಹೋ ... ಹೂ .. ವೋ .. " ಚೀತ್ಕಾರ ಕೆಲ್ಲೆ ಭೀಷ್ಮಾನ . ಯೆಕ್ಕಾ ಮಕ್ಷಿ .. ಯೆಕ ಅರ್ಜುನಾಲೆ ಬಾಣ ಕವಚ ಭೇತ್ತುನ್ ಭಾಯಿರಿ ಯೆತ್ತಾ ಅಸ್ಸ . ಅರ್ಜುನಾಲೆ ಯೇಕ್ - ಯೇಕ್ ಬಾಣ ಅಂಗಾ ಲಗ್ತಾನಾ ,, ಭೀಷ್ಮಾನ ಅರ್ಜುನಾ ಕ ಆಶೀರ್ವಾದ್ ಕೆಲ್ಲೆ ... " ಆಯುಷ್ಯಮಾನ್ ಭವ .. " ಭೀಷ್ಮ್ಮಾ ಲೇ ಅಂಗಾಂತು ಬಾಣ ಲಗ್ಗನಾ ನಾತ್ತಿಲೆ ಜಾಗೊ ನಾ . " ಪಿತಾಮಹ ..! ಮಕ್ಕ ಕ್ಷಮ ಕರಿ ಮೋಣು ಸಂಘುನ್ .. ಅರ್ಜುನಾನ ಆಖೇರಿ ಬಾಣು ಮಾರ್ಲೊ . ತ್ಯೋ ಬಾಣು ಭೀಷ್ಮಾಲೆ ಗಳೆ ಸಕಲ ಲಾಗ್ಗುನ್ ಲಕಯಿಲೆ ಮ್ಹಣ್ಕೆ ಝಲ್ಲೆ . ಭೀಷ್ಮ ಪಿತಾಮಹ ಧೊಪ್ಪನಿ ನೆಲಾರಿ ಪೊಳ್ಳೋ . ಅಂಗಾ ಲಗ್ಗಿಲೆ ಹಜಾರ ಬಾಣ ಶರ ಮಾಂಚೊ ಶೀ ಆಧಾರ್ ಘೇವ್ನು ನೆಲಾರಿ ಪೊಳ್ಳೋ . ಕೌರವ ಸೈನ್ಯ ಚಕಿತ ಝಲ್ಲೆ . ಅತಿರಥ , ಮಹಾರಥ .. ಯುದ್ಧ ರಬ್ಬೊನ್ ... ಭೀಷ್ಮ ಪಿತಾಮಹಾ ನ ನೆಲಾರಿ ಪೊಡ್ಚೆ ಪೊಳೋನ್ ರಬಲೆ . ಧುರ್ಯೋಧನ , ದುಃಶ್ಶಾಸನ , ದ್ರೋಣ, ಕೃಪಾಚಾರ್ಯ , ಅಶ್ವಥಾಮ .. ಕುರು ವೀರ ಲೋಕು ಭೀಷ್ಮಾಲೇ ಸುತ್ತು ಯೇವ್ನ್ ರಬ್ಬುನ್ ಭೀಷ್ಮಾಲೇ ಕರುಣಾ ಜನಕ ಸ್ತಿಥಿ ಪೊಳೋನ್ ರಾಬಲೆ . ಅರ್ಜುನಾ ಲೆ ದೊಳೆಂತ್ ಧಾರಾ ಕಾರ ಜಾವ್ನ್ ಅಶ್ರು ದೇವ್ನ್ ಆಯಿಲ್ . ಪಿತಾಮಹಾ ..! ಪಿತಾಮಹಾ .. ! ಪಿತಾಮಹಾ .. ! ಮೋಣು ಸಂಘುನ್ ಭೀಷ್ಮ ಚರಣ ಹತ್ತಾ ಘೇವ್ನ್ ಮತ್ತೆಕ ಲಾಗ್ಗೋನ್ ಘೇವ್ನ್ ಕ್ಷಮಾಪಣ ಮಾಗಲಿ . "ಅರ್ಜುನಾ ಮಕ್ಕ ಮತ್ತೇ ಕ ಏಕ ಆಧಾರ ಜಾಯಿ ... ವೀರ ಶಯ್ಯೇಕ ಸಮಾನ ಮತ್ತೆ ಕ ಏಕ ಆಧಾರ ದೀ ... " ಮ್ಹಳ್ಳಲೋ ಭೀಷ್ಮ . ಅರ್ಜುನಾ ನ ಬಾಣ ಮಾರ್ನ್ ಮತ್ತೆ ಕ ಆಧಾರ ರ್ಕೊರ್ನ್ ದಿಲ್ಲೊ . " ಅರ್ಜುನಾ .. !ಮಕ್ಕಾ ತಾನಿ ಯೆತ್ತಾ .. ಒಂಟ ಸುಕ್ಕುನ್ ಸಂಕಟ ಝಲ್ಲಾ .. ಮಕ್ಕಾ ಪಾತಾಳ ಜಲ ಜಾವ್ಕಾ .. " ಅರ್ಜುನಾ ನ ವಾರುಣಾಸ್ತ್ರ ಮಾರ್ನ್ ಪಾತಾಳ ಗಂಗೆಕ ಹಡಾಯಿಲೆ . ಗಂಗಾ ಕಾರಂಜಿ ಜಾವ್ನ್ ಭೀಷ್ಮಾಲೆ ತಾನಿ ನಿವ್ವಯಿಲಿ . ಗಂಗೆ ಕ ಪೊಳೋನ್ " ಅಮ್ಮಾ .. ತೂ ಅತ್ತ ಪುಣಿ ಆಯಿಲಿ ನವೇ .. ? ಪೊಳೆ ಅಮ್ಮಾ ಹಾಂವೆ ಮಿಗೆಲೆ ಕರ್ತವ್ಯ ಕೆಲ್ಲಾ ... ಮಿಗ್ಗೆಲೆ ಅನ್ನಾಕ ದಿಲ್ಲೆಲೆ ವಚನ ಪೂರ್ತಿ ಕೆಲ್ಲಾ . ಹಾಂವೆ ಧರ್ಲೆಲೆ ಕರ್ಮ ಮಾರ್ಗ ...ಹೇ ಕರ್ಮ ಮಾರ್ಗಾರಿ ಕುರು ರಾಜ್ಯಾಚೆ ಸೇವಾ ಕೆಲ್ಲಾ . ಪರಮಾತ್ಮಾಲಿ ಆಜ್ಞಾ ಝಲ್ಲೇ ..ಅಮ್ಮಾ .. ! ಕೃಷ್ಣು ಸಾಂಗ್ತಾ ಹಾಂವೆ ವಂಚಿಲ್ ಪೂರೋ ಮ್ಹಣತಾ ಅಮ್ಮಾ ... ಸೃಷ್ಠಿ , ಜೀವ , ಲಯ ಜೀವನಾ ಚಕ್ರ ನಿಯಮ ಪಾಲನ ಕರಿ ಮ್ಹಣ್ತಾ .. ಅಮ್ಮಾ ! "
ಗಂಗಾ : " ಬಳಾ ... ಪೂರೋ .. ಅತ್ತ ತೂ ಭುಯಿಂಚೇರಿ ಜನ್ಮಾ ಆಯ್ಯಿಲೆ ಕಾರ್ಯ ಸಾಧನ ಝಲ್ಲಿ .. ತುಗೇಲಿ ಸಂಕಲ್ಪ .. ತುಗ್ಗೆಲ್ ಪಿತೃ ವಚನ ಸಮಾಪ್ತ ಝಲ್ಲೆ .. ಯೋ... ತೂ ಮಿಗ್ಗೆಲೆ ವೊಟ್ಟು ಯೋ ... ಹಾಂವ ತುಕ್ಕ ಅಪ್ಪೋನ್ ವ್ಹರ್ತಾ ಬಳಾ .. ! "
ಭೀಷ್ಮ : " ಅಮ್ಮಾ .. ! ಹಾಂವ ಇಚ್ಚಾ ಮರಣಿ . ಅತ್ತ ದಕ್ಷಿಣಾಯನ ಝತ್ತಾ ಅಸ್ಸ . ಉತ್ತರಾಯಣ ಯೆವ್ಚೆ ತಾಯ್ ಅನಿಕಾಯ್ 58 ದಿವಸ ಅಸ್ಸ . ತೆದೊಳ್ ತಾಯಿ .. ಹಾಂವ ಹೇ ಶರ ಶಯ್ಯಾವೈರಿ ಪ್ರಾಣ ದೊವೋರ್ನ್ ಘೆವ್ನ್ ರಕ್ಕುನ್ ರಾಬತಾ . ಮಿಗ್ಗೆಲೆ ಅಂತರಾತ್ಮ , ಪರಮಾತ್ಮಾ ಲೇ ಸ್ತುತಿ ಕೊರ್ನ್ ಪಾವನ ಜಾವ್ಕಾ ಮೋಣು ಸಾಂಗ್ತಾ . ಅನಿಕಯ್ ಕುರು ರಾಜ್ಯ, ಕೊಣಾಲೆ ರಾಜ್ಯ ಮೋಣು ಇತ್ಯರ್ಥ ಜಾಯ್ನಿ .. ಹೇ ರಾಜ್ಯ .. ಕುರುಕ್ಷೇತ್ರ ಯುದ್ಧಾ೦ತು ಕೋಣಾಕ ಜಯ ಝತ್ತಾ ಮ್ಹಳ್ಳೆಲೆ ಪೊಳೊಕಾ ಮೋಣು ದಿಸ್ತಾ .. "
ಗಂಗಾ : " ಬಳಾ ... ಯುದ್ಧ ಪರಿಣಾಮ .. ರಾಜ್ಯ ಇತ್ಯರ್ಥ್ ಕೋರ್ಚ್ಯಾಕ ವಾಸುದೇವು ಅಸ್ಸ .. !ತೂ ಕಸಲೇಕ ಹಾಂಗಾ ರಬ್ಬುಕಾ .. ? "
ಭೀಷ್ಮ : " ಕ್ಷಮಾ ಕರಿ ಮಾತೆ ... ಹ್ಯೇ ಮಿಗೆಲೆ ನಿರ್ಧಾರು .. ! " ಗಂಗೆಕ ಮಿಗೆಲೆ ಉತ್ತರ ಅಯ್ಕಾತಾಲೊ ಮನುಷು ನಯ್ ಮೋಣು ಕಳ್ಳೆ . ಭೀಷ್ಮಾಲೆ ಮತ್ತೇಕ ಪ್ರೀತಿನ ಅಪ್ಪೋಣ್ " ತುಗ್ಗೆಲ್ ನಾಂವ ಚಿರಾಯು ಝವ್ವೊ ... ಚರಿತ್ರಾರ್ಥ್ ಝಾವ್ವೊ .. ಸೂರ್ಯ ಚಂದ್ರ ಕೆದನಾ ತಾಯ್ ಆಸ್ಸತಿ ಕೀ .. ತೆದೊಳ್ ತಾಯ್ಯ್ ... ತುಗ್ಗೆಲ್ ನಾಮ ಸ್ಮರಣ ಲೋಕು ಕರ್ತಾಲೆ " ಮೋಣು ಆಶೀರ್ವಾದ ಕೆಲ್ಲೊ . ದೊಳೆ ಉದ್ದಾಕ ಕಾಣು ಅಂತರ್ಧಾನ ಝಲ್ಲಿ ಗಂಗಾ . ರಾಜ ವೈದ್ಯ ಯೇವ್ನ್ ಭೀಷ್ಮಾಲೆ ಅಂಗಾ ಜಲ್ಲೆಲೆ ಘಾಯಾ ಕ ವಕ್ಕದ , ಲೇಪು ಲಾವುಂಕ ಪ್ರಯತ್ನ ಕೆಲ್ಲೆ . ಭೀಷ್ಮಾನ ಸನ್ನಿ ಕೊರ್ನ್ ನಜ್ಜ ಮ್ಹಳ್ಳಲೋ . ಭೀಷ್ಮಾನ ಪೊಳ್ಳೆಲೆ ಜಾಗೇರಿ ಅಂಗರಕ್ಷಕ ದೊವೋರ್ನ್ ರಾತಿ ಫಲ್ಲೆ ಸೇವೆಕ ನಿಯುಕ್ತಿ ಕೆಲ್ಲಿ ಧುರ್ಯೋಧನಾ ನ . ಕುರು ಶಿಬಿರಾಂತು ಭೀಷ್ಮಾನ ಶರ ಶಯ್ಯಾರಿ ನಿದ್ದಲೆಲೆ ವಿಷಯು ಸರ್ವಾಂಕ ಕಳ್ಳೆ . ಭೀಷ್ಮ ಪಿತಾಮಹ , ಯುದ್ಧಾ೦ತು ಹೇ ರೀತ್ಯೇರಿ ಶರ ಶಯ್ಯಾರಿ ಪೊಡ್ತಾಲೊ ಮೋಣು ಧುರ್ಯೋಧನಾ ನ ಲೆಕ್ಕನಿ . ಕಪಟಿ ಕೃಷ್ಣ .. ! ಅರ್ಜುನಾ ವೈರಿ , ಮಹಾ ಕೋಪು ಅಯಿಲೊ . ದಾಂತ ಕರ ಕರ ನಿ ಚಬ್ಬುನ್ ... ಪ್ರತೀಕಾರ ಕೋರ್ಕಾ ಮೊಣು ನಿರ್ಧಾರ್ ಕೆಲ್ಲೊ .
ಕುರು ಕ್ಷೇತ್ರ ಭೂ೦ಯ್ತು ಭೀಷ್ಮ ಪಿತಾಮಹ ಶರ ಶಯ್ಯಾರಿ ಪೊಳ್ಳೆಲೆ ವಿಷಯು ಕರ್ಣಾಕ ಕಳ್ಳೆ . ತ್ಯೆ ರಾತ್ರಿ ಮತ್ತೇರಿ ನಾವ್ನ್ ಭೀಷ್ಮ ಪಿತಾಮಹಾಲೆ ಜಾಗೇರಿ ಅಯಿಲೊ . ಭೀಷ್ಮ ದೋಳೆ ಧಾಂಕುನ್ , ಸಾಮ ವೇದ ಉಚ್ಚಾರು ಕರ್ತಶಿಲೋ . ಭುಂಯ್ಚೆರಿ ಸೊಕ್ಕು ಲಗ್ಗಿಲೆ ಸಿಂಹು , ಘಾಯು ಜಾವ್ನ್ ... ಆಖೇರಿಘಡೇಕ ರಾಕ್ಲೆ ಮ್ಹಣ್ಕೆ ಅಶಿಲೋ ಭೀಷ್ಮ ಪಿತಾಮಹ ... ಬಂಧು ಭಾಂಧವಾಂಕ ದೂರ ಜಾವ್ನ್ ... ಇಚ್ಚಾ ಮರಣಿ ಜಾವ್ನ್ .. ಆತ್ಮ ತ್ಯಾಗ ಕೋರ್ಕಾ ಮೊಣು ಅಷ್ಶಿ ಶರ ಶಯ್ಯಾರಿ ಪೊಳ್ಳೆಲೆ ಪೊಳೊನ್ .. ಕರ್ಣಾ ಕ ದೊಳೆ ಬೋರ್ನ್ ಆಯಿಲೆ . ಲಗ್ಗಿ ಪಾವ್ನ್ ಭೀಷ್ಮ ಚರಣಾಕ ಸ್ಪರ್ಶ ಕೊರ್ನ್ .. ಶಿರ ನಮನ ಕೆಲ್ಲೆ . ಕರ ಸ್ಪರ್ಶಾ ಕ ಭೀಷ್ಮ ಜಾಗೊ ಝಲ್ಲೋ ... " ಕೋಣ .. ? " ಮೋಣು ನಿಂಮ್ಗಿಲೆ . " ಹಾಂವ ಪಿತಾಮಹಾ .. ಹಾಂವ ರಾಧೇಯ " ಮ್ಹಳ್ಳಲೋ ಕರ್ಣ .
" ಲಗ್ಗಿ ಯೋ ಬಾಳಾ " ಮೋಣು ಪ್ರೀತ್ಯೇನ ಅಪ್ಪಯಿಲೆ ಭೀಷ್ಮಾನ.
ಕರ್ಣ : " ಪಿತಾಮಹಾ .. ! ಹಾಂವೆ ಫಲ್ಲೆ ದುಕೂನ್ ಯುದ್ಧಾ ಕ ಯೆವ್ಕಾ ಮೋಣು ಲೆಕ್ಲಾ ... ಹಾಂವ ತುಗೆಲೆ ಆಶೀರ್ವಾದ ನಿಂಮ್ಗುಚ್ಯಾ ಅಯಿಲಾ ... ! ಫುಳ್ಳೆ ಕೋಪು ಸೋಣು ಮಕ್ಕಾ ಆಶೀರ್ವಾದ ಕರಿ .. ಪಿತಾಮಹಾ .. "
ಭೀಷ್ಮ : " ಕರ್ಣಾ.. ! ಲಗ್ಗಿ ಯೋ .. ಕುಮಾರಾ ..! " ಕರ್ಣ , ಮತ್ತೆ ಲಗ್ಗಿ ಯೇವ್ನ್ ರಾಬ್ಲೊ . " ಅಂಗರಾಜಾ .. ಮಕ್ಕಾ ಕೆದನಾಯ್ ತುಗ್ಗೆಲ್ ವೈರಿ ದ್ವೇಷ ನಾ ಬಾಳಾ ... ತುಗೆಲೆ ಹಿತ ಬೋಧ ನಿಮಿತ್ಯ ... ಧುರ್ಯೋಧನ ಅಕಾರಣ ಜಾವ್ನು ದೈಜಿ ಕಲಹಾಂತು ಪೊಡ್ತಾ .. ಮೋಣು ಮನಾ ಬಾಧಾ ದಿಷ್ಶಿಲೆ ಅಸ್ಸ .. ತಿತ್ಲೆಂಚಿ .. ಕರ್ಣಾ .. ! ಹಾಂವೆ ಮೊರ್ಚೆ ಫೂಡೆ .. ತುಕ್ಕಾ ಏಕ ರಹಸ್ಯ ಸಂಘುಕಾ ಮೋಣು ಅಷ್ಶಿಲೋ ... ತಕ್ಕಾ ಕಾಲು ಅಯಿಲಾ ಮೋಣು ದಿಸ್ತಾ ... ಮಿಗೆಲೆ ಉತ್ತರಂ ಅಯಿಕುನ್ .. ಮನಾ ಸ್ಥೈರ್ಯ ಕಾಣ್ ಘೆವ್ಚ್ಯಾ ನಜ್ಜ .. " ಕರ್ಣ : " ತ್ಯೆ ಕಸಲೆ ರಹಸ್ಯ ಪಿತಾಮಹಾ .. ? "
ಭೀಷ್ಮ : " ತೂ .. ರಾಧೇಯ ನಯ್ಯ್ ಬಾಳಾ ... ! ತೂ ಸೂತ ಪುತ್ರ ನಯ್ಯ್ .. ! ತೂ ಕುಂತೀ ಪುತ್ರ ... !! ಸೂರ್ಯ ಭಗವಾನ್ ತುಗೆಲೆ ಬಪ್ಪುಸು ... ದೈವಾಂಶ ಸಂಭೂತ ತೂ ! ಗತ ಜನ್ಮಾಂತು ತೂ .. ' ನಿವಾತ ಕವಚ ' ಮೋಣು ತುಗೆಲೆ ನಾಂವ . ಮಕ್ಕಾ ವ್ಯಾಸ ಮಹರ್ಷಿನ ಸಂಘಿಲೆ .. ಬಾಳಾ .. !"
ಇತ್ಲೆ ಸಂಗ್ತಾನ .. ಕರ್ಣಾಲೆ ದೊಳೆ ದುಕುನ್ ಧರಾಂಧರಿ ಅಶ್ರು ಜಲ ದೆಂವ್ಲೆ .. ದೋನಿ ಬಿಂದು ಭೀಷ್ಮಾ ಲೆ ಹತ್ತಾರಿ ಪೊಳ್ಳೇ . ", ದುಃಖ ಕೋರ್ನುಕಾ ಬಾಳಾ .. ! ಅಂಮ್ ಕಾ ಸರ್ವಾಂಕ ಕೋಳ್ನು ಆಮ್ಗೆಲೆ ಜನನ ಜಾಯ್ನಾ .. ಕೊಳ್ನ್ ಮರಣ ಯೇನಾ ... ಮಾತ್ರ , ಅಂಮ್ ಕಾ ಕೋಳ್ನುಚಿ ... ಜೀವನ ಚಕ್ರ , ಕಾಲ ಚಕ್ರ ಘು೦ವತಾ ಕರ್ಣಾ .. ! ಮಿಗೆಲೆ ಮರಣಾ ನಂತರ ಪುಣಿ ಧುರ್ಯೋಧನಾ ಕ ಚಾಂಗ ಬುದ್ಧಿ ಎತ್ತಲಿ .. ತೂ ಪಾಂಡವ ಪಕ್ಷಾಕ ಮೆಳ್ಳೇರಿ ಹ್ಯೇ ಯುದ್ಧ ರಾಬ್ತಲೆ .. ಅಕಾರಣ ಜಾವ್ನ್ ರಕ್ತ ಪಾತ ಜಾವ್ಚ್ಯೆ ರಬ್ಬತಾಲೆ .. ! ತೂ ನಾತ್ಲೆರಿ ಧುರ್ಯೋಧನ ಯುದ್ಧ ಕರ್ನಾ ಕುಮಾರಾ .. ತುಗೆಲಿ ಸಹಮತಿ ಅಸ್ಲೇರಿ ... ಧರ್ಮಜ , ಭೀಮ , ಅರ್ಜುನಾ ಕ ಮಿಗ್ಗೆಲೆ ಎದ್ರಾಕ ಅಪ್ಪೋನ್ , ... ತೂ ಪಾಂಡವ ಅಗ್ರಜ ಮೋಣು ಘೋಷಣಾ ಕರ್ತಾ ಕುಮಾರಾ ... ! " ಮ್ಹಳ್ಳಲೊ ಭೀಷ್ಮ .
ಕರ್ಣ : " ಕ್ಷಮಾಪಣ ಅಸ್ಸೋ ಪಿತಾಮಹಾ .. ! ಮಿಗ್ಗೆಲೆ ಜನ್ಮ ರಹಸ್ಯ ಕುಂತಿ ಮಾತೆಲೆ ನಿಮಿತ್ಯ ಕಳ್ಳೆ .. ತೂ೦ವೇ ಸಂಘಿಲ್ ತಶಿ .. ಹಾಂವೆ ಪಾಂಡವ ಪಕ್ಷಾಕ ಗೆಲ್ಲೆರಿ ... ಧುರ್ಯೋಧನ , ಆತ್ಮ ಹತ್ಯಾ ಕೊರ್ನ್ ಘೆತ್ತಲೊ ... ! ಹಾಂವ ಎಕ್ಲೊ ನತದೃಷ್ಟ ... ಸನ್ನ್ ಪಣಾ ದುಕೂನ್ ಅವಮಾನ ಬೊಗ್ಗುನ್ ಹೋಡು ಝಲ್ಲಲೊ ... ಶ್ರಾಪು ಗೀಳ್ನ್ ಜೀವನ ಕಾಡ್ತಾ ಅಸ್ಸ . ಪಾಂಡವ ಕಷ್ಶಿ ಮಿಗೆಲೆ ಭಂವಢ ಕಿ , ತಶೀ೦ಚಿ ಮಕ್ಕಾ ಧುರ್ಯೋಧನ .. ಪಿತಾಮಹಾ ... ! ಧುರ್ಯೋಧನಾ ಕ ತುಮ್ಮಿ ಏಕ ದೃಷ್ಠಿರಿ ಪೋಳ ಯಿಲಾ ಝಲ್ಲೆರಿ .. ಹಾಂವೆ ಸರ್ವ ದೃಷ್ಠಿರಿ ಪೊಳೈಲಾ . ತ್ಯೋ ಮಿಗೆಲೆ ಸ್ವಾಮಿ .. ! ಮಿಗೆಲೆ ಪ್ರಭು , ಮಿಗೆಲೆ ಭಾವು , ಮಿಗೆಲೆ ಆಪ್ತ ಮಿತ್ರ , ಮಿಗೆಲೆ ಜೀವನಾಚೆ ಸರ್ವಸ್ವ ... ಆಪ್ತು ... ಧುರ್ಯೋಧನ . ! ತಾಗೆಲೆ ಖಾತಿರಿ ಮೊರ್ಚ್ಯಾಂತು ಮಕ್ಕ ಸೂಖ ಅಸ್ಸ , ತೃಪ್ತಿ ಅಸ್ಸ . ಜೀವನಾಚ್ಯೆ ಆಖೇರಿ ಘಡಿಂತು ಹಾಂವ ಭ್ರಷ್ಟ ಜವ್ವು೦ಕ ತಯ್ಯರ ನಾ ಪಿತಾಮಹಾ .. ! ಮಿಗೆಲೆ ಜೀವನ ಅಶೀ೦ಚ್ಯಿ ಕಯಿದ ಝವ್ವೋ .. ಧುರ್ಯೋಧನಾಲೆ ಮಿತ್ರ , ಸ್ನೇಹಿತ ಮೋಣು ಪ್ರಪಂಚ ಮಕ್ಕಾಪೋಳೋವೋ . ಮಕ್ಕಾ ಪ್ರಭುಲೆ ಋಣ ಪಾವ್ವೊಕಾ .. ಪಿತಾಮಹಾ .. ! " ಮ್ಹಳ್ಳಲೋ ಕರ್ಣ . ತಾಕ್ಕಾ ಆಶ್ಚರ್ಯ.. ದುಃಖ .. ಜನ್ಮ ರಹಸ್ಯ ... ಕುಂತಿನ ಸೆರಗ ಧೋರ್ನ್ ' ಅಮ್ಮಾ ಮೋಣು ಏಕ ಪೋಟಿ ಅಪ್ಪಯಿ ' .. ದೇಹೀ ಮ್ಹಳ್ಳೆಲೆ ... ಕೃಷ್ಣಾ ಲೆ ವಿಚಾರು .. ಹಿತ ಭೋಧ .. ಉಡ್ಘಾಸು ಅಯಿಲೊ . ಹ್ಯೇ ದೇವಾ ... ! ಮಕ್ಕಾ ಎಕ್ಲೇಕ ಸೋಣು ... ಬಾಕಿ ಸರ್ವಾಂಕ ಮಿಗೆಲೆ ಜನ್ಮ ರಹಸ್ಯ ಗೊತ್ತಶಿಲೆ ... ಸರ್ವ ಲೋಕಾನಿ ಮಕ್ಕಾ ... ಮೌನ ಜಾವ್ನ್ ... ಜೀವಂತಿ ದಿವಿಶಿ ಮಾರ್ಲೆ ... ಮ್ಹಳ್ಳೆಲೆ ಮನಾ ಆಯಿಲೆ ಕರ್ಣಾಕ .
ಭೀಷ್ಮ : " ಕರ್ಣ ಕುಮಾರಾ .. ! ಕಸಲೆಕ ಹ್ಯೇ ಹಠ .. ? "
ಕರ್ಣ : " ಹಠ ನಯ್ಯ್ ಪಿತಾಮಹಾ .. ! ಪ್ರಭು ನಿಷ್ಠಾ .. ಸ್ವಾಮಿ ಭಕ್ತಿ .. ಸ್ನೇಹ ಧರ್ಮ .. ಕರ್ಮ ದೀಕ್ಷಾ ... ಹ್ಯೇ ಸೇವಾ ಧರ್ಮಾ ನಿಮಿತ್ಯ .. ಹಾಂವ ತುಂಮ್ ಗೆಲೆ ದೃಷ್ಟಿ೦ತು ವಾಯ್ಟ್ ದಿಸ್ತಾ . ಹಾಂವ ಕಸಲೇ .. ಮೊಣು ಮಿಗೆಲೆ ಅಂತರಾತ್ಮಾ ಕ ಗೊತ್ತಸ್ಸ . ಹಾಂವೆ ಕೆದನಾಯ್ ಅಧಿಕಾರಾಕ , ದುಡ್ಡುವಾಕ , ಶಾರೀರಿಕ ಕಾಮ ಭೋಗಾ ಕ ಆಶಿ ಕೆಲ್ಲೆಲೋ ನಯ್ . ಧುರ್ಯೋಧನಾ ಖತಿರಿ ಪಾಂಡವಾಂಗೆಲೆ ವೈರತ್ವ ಬಾಂಧುನ್ ಘೆತ್ಲೆ . ಮಕ್ಕ ಕೊಣಾ ವೈರಿ ವೈರತ್ವ , ದ್ವೇಶ ನಾ ಪಿತಾಮಹಾ .. ! ಹ್ಯೇ ಮಿಗೆಲೆ ದುರಾದೃಷ್ಟ ... ನಿಡ್ಲಾರಿ ಬೋರಯಿಲೆ ವಿಧಿ ಲಿಖಿತ .. "
ಭೀಷ್ಮ : " ಜವ್ವೋ ... ಅಮ್ಮಿ ಕಸಲ್ಕಿ ಲೆಕ್ಕುನ್ ಆಮ್ಗೆಲೆ ಜೀವನ ವಾಯ್ಟ್ ಕೊರ್ನ್ ಘೆತ್ಲೆ ... ಅಮ್ಮಿ ಲೆಕ್ಕಿಲೇ ಕಸಲೆಯ್ ಜಾಯ್ನಾ ... ಕರ್ಮಾ ಪ್ರೇರಣಾ ಜಾವ್ನ್ ಯುದ್ಧ ಕರಿ ... ಉದಾತ್ತ ಸ್ನೇಹಾ ಕ ಉದಾಹರಣ ಝಾ ... ತುಗ್ಗೆಲ್ ಜೀವನ ಚರಿತ್ರಾರ್ಥ ಜವ್ವೋ " ವಾಪಾಸ್ ಭೀಷ್ಮಾ ಕ ಪಾಂಯ್ಯ್ ಪೋಣು , ಆಶೀರ್ವಾದು ಘೆವ್ನ್ , ಕರ್ಣ ತಗೆಲ್ ಶಿಬಿರಾಕ ಚ೦ಮ್ಕಲೊ .
ತ್ಯೆ ರಾತ್ರಿ ... ವ್ಯಾಸ ಮಹರ್ಷಿನ ಯೇವ್ನ್ ಭೀಷ್ಮಾಕ ಪೊಳಯಿಲೆ . " ಗಂಗಾ ಪುತ್ರ .. ! ದೇವವೃತ ... ಭೀಷ್ಮಾ .. ! ತೂ೦ವೆ ಜನ್ಮಾ ಆಯ್ಯಿಲೆ ಕಾರ್ಯ ಸಂಪನ್ನ ಝಲ್ಲೆ . ತ್ಯೆ ಪರಮಾತ್ಮಾಲೆ ಧ್ಯಾನ ಕರಿ . ತುಗೆಲೆ ಆತ್ಮ ಪರಮಾತ್ಮಾಲೆ ಚರಣಾರಿ ದವರಿ ಅನಿ ಪುನೀತ ಝಾ . " ಮ್ಹಳ್ಳಲೋ ವ್ಯಾಸಮಹರ್ಷಿ
ಭೀಷ್ಮ : " ಗುರು ದೇವಾ .. ! ಮಹಾತ್ಮಾ .. ! ಹಾಂವ ಉತ್ತರಾಯಣಾ ಕ ರಾಕ್ತಾ . ಮಿಗ್ಗೆಲೆ ನಾತ್ವಾನ ದಿಲ್ಲೆಲೆ ಶರ ಶಯ್ಯಾ ವೈರಿ ಆತ್ಮ ಸಮರ್ಪಣಾ ಜವ್ವೋ ತಾಯ್ ತಪಸ್ಯ ಕರ್ತಾ .. ಪರಮಾತ್ಮಾಲೆ ಧ್ಯಾನ ಕರ್ತಾ ... ದೀಕ್ಷಾ ದೀ ಗುರುದೇವಾ " ಮ್ಹಳ್ಳಲೋ ಭೀಷ್ಮ . ದೇವ ಲೋಕಾ ದುಕೂನ್ ವಸು ಲೋಕು ಅಯಿಲೆ . ಶರ ಶಯ್ಯಾ ವೈರಿ .. ಅಂಗಾ ಜಲ್ಲೆಲೆ ಘಾಯ ದೂಕಿ ಜಾಯ್ನಾಶಿ ವರ ದಿಲ್ಲೆ . ಉತ್ತರಾಯಣಾ ತಾಯ್ ಇಚ್ಚಾ ಮರಣಿ ಕ ಮನೋ ಧೈರ್ಯ ಜಾವ್ಕಾ ಮೋಣು ಆಶೀರ್ವಾದ ಕೆಲ್ಲೆ .
ಸಂಜಯಾ ನಿಮಿತ್ಯ ... ಧ್ರತರಾಷ್ಟ್ರಾಕ ವಿಷಯು ಕಳ್ಳೊ . " ಮಹಾಪ್ರಭು .. ! ವ್ಯಾಸ ಮಹರ್ಷಿನ ... ಪಿತಾಮಹಾ ಕ ದೀಕ್ಷಾ ದಿಲ್ಲಿ . ಅತ್ತ ಪಿತಾಮಹಾಲೇ ತೊಂಡಾರಿ ಏಕ ತೇಜ ಪುಂಜ ಅಯಿಲಾ .. ಮನಾಂತು ಕಾಯೀ ದುಃಖ ನಾ .. ಕರ್ಮ ಯೋಗಿಕ ... ವ್ಯಾಸ ಗುರುದೇವಾ ಕ ಪೊಳೋನ್ , ಸಂತೋಷು ಝಲ್ಲಾ . " ಧ್ರತರಾಷ್ಟ್ರ ... ಗಳ-ಗಳ ನಿ ರಳ್ಳೋ ... ಹ್ಯೇ ದೇವಾ .. ! ಪೂಜನೀಯ ಪಿತಾಮಹಾಲೆ ಹ್ಯೇ ಪರಿಸ್ಥಿತಿ ಕ ... ಹಾಂವ ಕಾರಣ ಝಲ್ಲೋಮು ದೇವಾ ... ! ಮೋಣು ಪಶ್ಚಾತ್ತಾಪ ಪಾವಲೋ . ಅಂತಃಪುರಾಂತು ಶರ ಶಯ್ಯಾರಿ ಪೊಳ್ಳೆಲೆ ... ಆತ್ಮ ಸಮರ್ಪಣಾ ಕ ರಕ್ಕುನ್ ರಬ್ಬಿಲೆ ಪಿತಾಮಹಾಲೆ ವಿಷಯು ಆಯಿಕುನ್ ಸರ್ವ ಶೋಕ ತಪ್ತ ಝಲ್ಲೆ .
ಉಮಾಪತಿ
No comments:
Post a Comment