MAHABHARATH Part - 41 ( Konkani Bhashentu )
BHEESHMA SENADHIPATYA ಭೀಷ್ಮ ಸೇನಾಧಿಪತ್ಯ
ಧುರ್ಯೋಧನಾನ ಸರ್ವಾ೦ ಲಗ್ಗಿ ಅಭಿಪ್ರಾಯ್ಕ್ ನಿಂಮ್ಗೂನ್ , ಭೀಷ್ಮಾಚಾರ್ಯಾಕ ಕೌರವ ಪಕ್ಷಾಚೆ ಮಹಾಸೇನಾಧಿಪತಿ ಕೊರ್ಚ್ಯೇ ಮೋಣು ಆಲೋಚನ ಕೆಲ್ಲಿ . ಅತ್ತ ಭೀಷ್ಮಾಚಾರ್ಯಾಕ 800 ವರ್ಷ೦ ! ಸಾನಸ್ತಾನಾ ಗುರು ಪರಶುರಾಮಾಲೆ ಆಶ್ರಮಾಂತು ವಿದ್ಯಾಭ್ಯಾಸ ಕೊರ್ನ್ , ದೇವ ಗುರು ಬ್ರಹಸ್ಪತಿ ಲಗ್ಗಿ ವೇದ ವೇದಾಂಗ ಅಭ್ಯಾಸು ಕೆಲ್ಲಾ . ಪರಶುರಾಮಾ ಲಗ್ಗಿ ತತ್ವ ಶಾಸ್ತ್ರ , ಧನುರ್ ವಿದ್ಯಾ ಅಭ್ಯಾಸು ಕೆಲ್ಲಾ . ಭೀಷ್ಮಾನ ತಗೆಲೆ ಸುಮಾರ 525 ವರ್ಷ೦ ಕಾಲ ವೇದ ಶಾಸ್ತ್ರ ಆಧ್ಯಯನ ಕೊರುಂಕ ಆಯುಷ್ಯ ಕಳ್ಳಾ . ಕ್ಷತ್ರಿಯ ಜಾವ್ನ್ ಜನ್ಮಾ ಯೇವ್ನ್ ಬ್ರಾಹ್ಮ್ಮಣತ್ವ , ತತ್ವ ವೇದ ನೀತಿ ಅಭ್ಯಾಸು ಕೊರ್ನ್ ಭೀಷ್ಮಾನ ' ಆಚಾರ್ಯ ' ಮ್ಹಳ್ಳೆಲೆ ಶ್ರೇಷ್ಠ ನಾ೦ವ ಘೇತ್ಲಾ . ಅಸಲೆ ವಯೋ ವೃದ್ಧ , ಮಹಾ ಪಂಡಿತ ಭೀಷ್ಮ... ಧುರ್ಯೋಧನಾಲೆ ಮೂರ್ಖತಾ ನಿಂದಾ ಕರ್ತಾಚಿ ... ಕೌರವ ಪಕ್ಷಾ ದುಕೂನ್
ಮಹಾ ಸೇನಾನಿ ಜಾವ್ನ್ ಯುದ್ಧ ಕೊರ್ಚ್ಯೇ ... ಬಹುಷಃ ಭೀಷ್ಮಾಲೆ ವಿಧಿ .. ಮೋಣು ಸಂಘುಕಾ . ಧುರ್ಯೋಧನಾನ ಸರ್ವ ರಾಯಾಂಗೆಲೆ ಏಕ ಸಮಾವೇಶ ಕೋರ್ನು ಸಭೆ೦ತು ಭೀಷ್ಮ ಮಹಾ ಸೇನಾಧಿಪತಿ ಮೋಣು ಘೋಷಣ ಕೆಲ್ಲಿ . " ಭೀಷ್ಮ ಪಿತಾಮಹಾ .. ! ... ಅಜಿ ತುಗೆಲಗ್ಗಿ 11 ಅಕ್ಷೋಹಿಣಿ ಸೈನ್ಯ ಅಸ್ಸ . ತುಗೆಲಿ ಶಕ್ತಿ ಯುಕ್ತಿ , ಕುರು ಹಸ್ತಿನಾವತಿ ಸಾಮ್ರಾಜ್ಯಕ ಶ್ರೀ ರಾಮ ರಕ್ಷೆ ಜವ್ವೋ ... ಮಿಗೆಲಿ ವಿಜಯಲಕ್ಷ್ಮಿ ತುಗೆಲೆ ಖಂದೇರಿ ಅಸ್ಸ ಭೀಷ್ಮ ಪಿತಾಮಹಾ ... ! ಯೋ ಸೇನಾಧಿಪತ್ಯ ಸಿಂಹಾಸನಾ ವೈರಿ ಬೈಸ . " ಮೋಣು ಸಂಘುನ್ ಊ೦ಚ ಸ್ಥಾನಾರಿ ದವರ್ಲೆಲೆ ಸಿಂಹಾಸನಾ ವೈರಿ , ಹಾತು ಧೋರ್ನ ಆಪ್ಪೋನ್ ವೊರ್ನ್ , ಗಳೇ ಕ ಹಾರ ಘಾಲ್ನ್ , ಚರಣ ಸ್ಪರ್ಶ ಕೊರ್ನ್ ಆಶೀರ್ವಾದ ಮಾಗ್ಲೆ . ವಂದಿ ಮಾಗದ ಲೋಕಾನಿ ಪರಾಕು ಸಂಘುನ್ ಜಯಕಾರ ಕೆಲ್ಲೆ . ಸಮಸ್ತ ರಾಯಾನಿ ಜಯಾಕಾರು ಕೊರ್ನ್ ಭೀಷ್ಮಾಕ ವಂದನ ಕೆಲ್ಲಿ . ಅಂತಃಪುರ ಸ್ತ್ರೀ ಲೋಕಾನಿ ಯೇವ್ನ್ , ರಾಜ ತಿಲಕ ಕೊರ್ನ್ ಆರತಿ ಕೆಲ್ಲಿ ... ವಜ್ರ ಕವಚ ಬಾಂಧುನ್ ವೀರ ಖಡ್ಘ ಸಮರ್ಪಣಾ ಕೆಲ್ಲಿ ಧುರ್ಯೋಧನಾನ . ಭೀಷ್ಮ್ ಪಿತಾಮಹಾಕ ಮನಾಂತ್ ಸಂತೋಷು ಝಲ್ಲೋ .
ಭೀಷ್ಮ : " ಧುರ್ಯೋಧನಾ .. !ವಯೋ ವೃದ್ಧ , ಮಂಥಾರೋ ಮೋಣು .. ತೂ ನಿರ್ಲಕ್ಷ್ಯ ಕರ್ತಾಲೊ ಮೋಣು ಹಾಂವೆ ಲೆಕ್ಕಿಲೆ .. ! ಶಾಹಬ್ಬಾಶ್ ... ! ತುಗೆಲಿ ರಾಜ ನೀತಿ ಪ್ರಜ್ಞೆ ಕ ಹಾಂವ ಮಾನ್ಯ ಕರತಾ .. !ಹಾಂವೆ ಖಂಚ್ಯೇ ಕುರು ವಂಶ ಅಭಿವೃದ್ಧಿ ಜಾವ್ಕಾಮೋಣು ಲೆಕ್ಕುನ್ , ಮಿಗೆ ಲೆಸರ್ವಸ್ವ , ಜೀವಮಾನ ಪರ್ಯಂತ ಕಷ್ಠ ಕಳ್ಳೆಲೆ ಕೀ ... ತ್ಯೇಚಿ ಕುರು ವಂಶಾಚೆ ... ಏಕ ಪಕ್ಷ ಘೇವ್ನ್ ಯುದ್ಧ ಕೋರ್ಕಾ ಪೊಳ್ಳೇ ... ಹ್ಯೇ ಮಿಗೆಲಿ ಧುರ್ವಿಧಿ .. ! ದುರಾದ್ರಷ್ಟ .. ! ತುಗೆಲೇ ಮನಾ ಖುಷಿ ಜಾವಚೆ ಏಕ ವಿಷಯು ಸಾಂಗ್ತಾ ಧುರ್ಯೋಧನಾ .. ! ಹಾಂವ ಪ್ರತೀ ನಿತ್ಯ 10000 ಯೋಧ ಸೈನ್ಯಾಕ ನಾಶ ಕರ್ತಾ .. ಹೇ ಮಿಗೆಲೆ ವಚನ ... ಅನಿ ಆಶ್ವಾಸನ ದಿತ್ತಾ " ಸಭೆ೦ತು ಅಷ್ಶಿಲೆ ಸರ್ವಾಂಕ ಸಂತೋಷು ಝಲ್ಲೋ . ಸರ್ವ ರಾಯಾನಿ ಕರತಾಡನ ಕೊರ್ನ್ ಹರ್ಷೋದ್ಗಾರು ಕೆಲ್ಲೊ . " ಜಲ್ಲೇರಿ ... ಧುರ್ಯೋಧನ ಕುಮಾರಾ .. ಪಾಂಡವ ಮಿಗೆಲೆ ಹತ್ತಾ೦ತು ಸಿರ್ಕಲೇರಿ .. ಹಾಂವ ತಂಕಾ ದಿವಿಶಿ ಮಾರ್ನಾ ... ! ಕಿತ್ಯಾ ಮ್ಹಳ್ಳೇರಿ ತನ್ನಿ ಮಿಗೆಲೆ ಲಾಲನೆ ಪಾಲನೇರಿ ಹೊಡ್ದ೦ ಜಲ್ಲೆಲೀ೦ತಿ ... ತಾಂಕಾ ದಿವ್ಶಿ ಮಾರ್ಚ್ಯಾಕ ಮಕ್ಕಾ ಜಾಯ್ನಾ . ಅನ್ನೇಕ ವಿಷಯು ಆಯಿಕ .... ಹಾಂವ ಬಾಯ್ಲ್ ಮನಷ್ಯಾ೦ ವೊಟ್ಟು , ಷಂಡ ಲೋಕಾಲೆ ವೊಟ್ಟು , ಜೀವ ಮರಣಾ ಭಂಯ್ಯಾ ನಿಮಿತ್ಯ ಶರಣ ಜಾಲ್ಲೆಲೆ೦ಗೆಲೆ ವೊಟ್ಟು , ರಣರಂಗಾ ದುಕೂನ್ ಧಾಂವ್ನ್ ವತ್ತಲೆ ಲೋಕಾಲೆ ವೊಟ್ಟು ಯುದ್ಧ ಕರ್ನಾ ... ಪಾಂಡವ ಪಕ್ಷಾಂತ್ ದ್ರುಪದ ರಾಯಾಲೆ ಪೂತು ಶಿಖಂಡಿ ... ತಾಣೆ ಮಿಗೆಲೆ ಎದ್ರಾಕ ಯೆನಾಶಿ ತೂ೦ವೆ ಪೊಳೊಕಾ ... "
ಧುರ್ಯೋಧನ : " ಯುದ್ಧ ನಿಯಮ ಕಸಲೆ ಅಸ್ಸುಕಾ ಪಿತಾಮಹಾ .. ? ಕೊಣೆ ಕೊಣಾಲೆ ವೊಟ್ಟು ಯುದ್ಧ ಕೊರ್ಯೇತ .. ? ಆ೦ಮ್ಗೆಲೆ ಪಕ್ಷಾಂತ್ .. ಅನಿ ಪಾಂಡವ ಪಕ್ಷಾಂತ್ ಕೊಣ್ - ಕೋಣ ಅತಿರಥ , ಮಹಾರಥ ಅರ್ಧ ರಥ ಆಸ್ಸತಿ .. ? ತುಗ್ಗೆಲ್ ಸೂಚನೆ ಪ್ರಕಾರ ಯುದ್ಧ ನಿಯಮ ... ದೊನ್ನಿ ಪಕ್ಷಾಂತ್ ಅಯಿಕತಲೀ೦ತಿ .. "
ಭೀಷ್ಮ : " ಧುರ್ಯೋಧನಾ .. ! ಯುದ್ಧ ನಿಯಮ ಅಮ್ಮಿಮಾತ್ರ ನಿರ್ಣಯ ಘೇವ್ಚೆ ಸಂಮ್ ನಯ್ . ಪಾಂಡವ ಪಕ್ಷಾ ದುಕೂನ್ ಎಕ್ಲೇಕ ಅಪ್ಪೋನ್ .. ಯುದ್ಧ ನಿಯಮ ದೊನ್ನಿ ಪಕ್ಷಾಕ ಸಹಮತಿ ಅಷ್ಶಿಲೆ ಪೊಳೊನ್ ನಿರ್ಧಾರ್ ಕೋರ್ಕಾ ... "
ಧುರ್ಯೋಧನ : " ಭೀಷ್ಮ ಪಿತಾಮಹಾ .. !ಅತಿರಥ , ಮಹಾರಥ ಕೋಣ್ - ಕೋಣ ಮೋಣು ತೂ೦ವೆ ಎಕ್ಲೆನ ಚಿ ಸಂಘುಕಾ .. "
ಭೀಷ್ಮ : " ಭೀಮ ಸೇನ ಅತಿರಥ ಶ್ರೇಷ್ಠ ... ಧರ್ಮಜ ಅತಿರಥ ... ನಕುಲ , ಸಹದೇವ ಸಮರಥ ... ದ್ರೌಪದಿಲೆ ಪಾಂಚ ಪುತ್ರ .. ಮಹಾರಥ , ವಿರಾಟ ರಾಯಲೆ ಪೂತು ಉತ್ತರಕುಮಾರ್ ... ಮಹಾರಥಿ , ಅಭಿಮನ್ಯು .. ಅತಿರಥ ಶ್ರೇಷ್ಠ , ಸಾತ್ಯಕಿ .. ಅತಿರಥ , ದ್ರುಪದ ಮಹಾರಾಜ .. ಮಹಾರಥಿ , ದೃಷ್ಟದ್ಯುಮ್ನ .. ಅತಿರಥ , ಶಿಖಂಡಿ , ದ್ರಷ್ಟಕೇತು , ಯುಧಾಮ್ಯ , ಭೋಜರಾಯು ... ಮಹಾರಥಿ , ಘಟೋತ್ಕಚ ಮಾಯಾ ಯುದ್ಧಾ೦ತು ಮಹಾ ನಿಪುಣ ... ಆನಿ ಅತಿರಥ ಶ್ರೇಷ್ಠ . ಮಸ್ತ ಲೋಕ ಆಸ್ಸತಿ .. ಮಕ್ಕ ಅತ್ತ ಉಡ್ಘಾಸು ಯೇನಾ .. "
ಧುರ್ಯೋಧನ : " ಆ೦ಮ್ಗೆಲೆ ಪಕ್ಷಾಂತು ... ಅತಿರಥ ಮಹಾರಥ ಕೋಣ ಆಸ್ಸತಿ ಪಿತಾಮಹಾ ... ! ? "
ಭೀಷ್ಮ : " ಅ೦ಮ್ಗೆಲೆಂತು ... ಬಾಹ್ಲಿಕಾ .. ಅತಿರಥ ಶ್ರೇಷ್ಠ , ಶತಕೀರ್ತಿ , ಸೋಮದತ್ತಾ , ಭೂರಿಶ್ರವ ಅನಿ ತೂ ಧುರ್ಯೋಧನಾ .. ತುಮ್ಮಿ ಸರ್ವ ಅತಿರಥ , ತುಗೆಲೆ ಭಂವ್ಢ ... ಸಮರಥ , ಕೃತವರ್ಮಾ , ಶಲ್ಯ ರಾಜ , ಕೃಪಾಚಾರ್ಯ ... ಅತಿರಥ , ಸೈ೦ಧವ , ಸುದಕ್ಷಿಣಾ , ಮಾಹಿಷ್ಮತಿ ರಾಯ , ಭಗದತ್ತಾ , ಅಶ್ವತ್ಥಾಮ ... ಹ್ಯೇ ಲೋಕು .. ಅತಿರಥ , ತ್ರಿಗರ್ತ ರಾಯು , ಅವಂತಿ ರಾಯು , ಲಕ್ಷ್ಮಣ ಕುಮಾರ , ಬೃಹದ್ಬಲ , ಶಕುನಿ ಹನ್ನಿ ... ಸರ್ವ ಸಮರಥ , ದ್ರೋಣಾಚಾರ್ಯ ... ಅತಿರಥೋತ್ತಮ , ಅತಿರಥ ಶ್ರೇಷ್ಠ ... ಮಹಾವೀರ ಮಣೋನ್ ಘೇತ್ತಾ ... ನಂತರ್ ಅತಿರಥ , ಮಾಗಿರ್ ಮಹಾರಥಿ , ತಾಜ್ಜೆ ನಂತರ್ ಸಮರಥ . ಮಾಗಿರ್ ಅರ್ಧರಥ . ಯುದ್ಧ ನಿಯಮಾ ಪ್ರಕಾರ ... ಅತಿರಥಾನ .. ಅತಿರಥಾಲೆ ವೊಟ್ಟು , ಮಹಾರಥಾನ ... ಮಹಾರಥಿಲೇ ವೊಟ್ಟು , ಸಮರಥಾನ್ ... ಸಮರಥಿಲೆ ವೊಟ್ಟು ಯುದ್ಧ ಕೋರ್ಕಾ ... ಹ್ಯೇ ಯುದ್ಧ ನೀತಿ . .. "
ಧುರ್ಯೋಧನ : " ಪಿತಾಮಹಾ .. ! ಕರ್ಣ ಆನಿ ಅರ್ಜುನಾಲೆ ವಿಷಯು ಕಸಲೇಕ ಸಂಘನಿ ..? "
ಭೀಷ್ಮ : " ಅರ್ಜುನ .. ಅತಿರಥ ಶ್ರೇಷ್ಠ .. ! ಕರ್ಣ ... ಅರ್ಧರಥಿ ...! " ಕರ್ಣ , ಧುರ್ಯೋಧನ , ಸಮಸ್ತ ರಾಯ ... ಭೀಷ್ಮಾನ ಸಂಘಿಲ್ ಅಯಿಕೂನ್ ಸ್ಥಬ್ಧ ಝಲ್ಲೆ ... ವಿಚಲಿತ ಝಲ್ಲೆ .
ಧುರ್ಯೋಧನ : " ಕರ್ಣ ... ಅರ್ಧರಥಿ ವೇ .. ! ಪಿತಾಮಹಾ .. ?
ಭೀಷ್ಮ : " ವಯ್ .. ಧುರ್ಯೋಧನಾ ... ಹಾಂವ ಸತ್ಯ ಸಾಂಗ್ತಾ ಅಸ್ಸ . ಗುರು ಪರಶುರಾಮಾಲೆ ಶ್ರಾಪ ಅಸ್ಸ . ಬ್ರಹ್ಮಣಾ ಲೆ ಶ್ರಾಫ್ ಅಸ್ಸ . ಹಜ್ಜೆ ಪೋಶಿ ... ಕರ್ಣಾನ ಕವಚ ಕುಂಡಲ ಕೆದನಾ ಕಾಣ್ ಘೆತ್ಲಾ೦ಕೀ ... ತೆದಾನಾಚಿ .. ಕರ್ಣಾನ ತಗೆಲೆ ವೀರ , ವಿಕ್ರಮ , ಪೌರುಶ .. ಕಾಣ್ ಘೆತ್ಲಾ ."
ಕರ್ಣ : " ಗಾಂಗೇಯಾ .. ! ತುಗೆಲೆ ವೀರ ನಿರ್ಣಯ ರಬ್ಬಯಿ ... ತೂಗೆಲೆ ಅತಿರಥ ಮಹಾರಥಿ ನಿರ್ಣಯ ... ಹಾಂವ ಅಂಗೀಕಾರ ಕರ್ನಾ . ! ತೂ ಪಾಂಡವ ಪಕ್ಷ ಪಾತಿ .. ! ಮಹಾ ವೃದ್ಧ ಜಲ್ಲಲೋ .. ಮಲಘಡೊ ಮೋಣು ಲೆಕ್ಕುನ್ ತುಕ್ಕಾ ... ಕುರು ಸೇನಾಧಿಪತಿ ಕೊರ್ನ್ , ಧುರ್ಯೋಧನಾನ ಹೊಡಿ ಚೂಕಿ ಕೆಲ್ಲಿ . ಹಾಂವ ಅರ್ಧರಥಿ ಮೊಣು ಸಂಘುಕ ತುಕ್ಕಾ ಕ್ಶಶಿ ಮನ ಆಯಿಲೆ ಗಂಗಾತನಯಾ .. ! ? ಉತ್ತರ ಭಾರತ ಚೆ ರಾಯಾಂಕ ಪರಾಜಯ ಕೊರ್ನ್ ... ಹಸ್ತಿನಾವತಿ ಧನಾಘಾರಾಂತು ಧನ ಕನಕ ರಾಶಿ ಭರ್ಲೆಲೆ ಕೋಣೆ .. ? ಹಾಂವ ವೀರ ನಯ್ ಮೋಣು , ಇತ್ಲೆ ರಾಯ ಬಯಿಸೂನ್ ಅಶಿಲೆ ಸಭೆ೦ತು ಅಪಮಾನ ಕೊರ್ಚೆ ಅಗತ್ಯ ಅಶಿಲೆವೇ ... ? ಅರ್ಜುನಾಲೆ ಎದ್ರಾಕ ಹಾಂವೆ ರಬ್ಬು ನಜ್ಜ ಮೋಣು ತುಗೆಲೆ ಅಭಿಪ್ರಾಯ್ಕ್ ವೇ .. ? ಹಾಂವ ಸೂತ ಕುಲಾಚೊ ಮೋಣು ಮಕ್ಕಾ ಉಡ್ಘಾಸು ಕರತ್ ಅಸ್ಸವೇ ? ಶತ್ರುಲೆ ವೊಟ್ಟು ಯುದ್ಧ ಕೊರುಂಕ ಧೈರ್ಯ ಮುಖ್ಯ ... ಪ್ರಾಣು ತ್ರಣ ಸಮಾನ ಮೋನು ಲೆಕ್ಚಯೇ ತ್ಯಾಗ ಜಾಯಿ ... ಪ್ರಭು ಭಕ್ತಿ .. ಆತ್ಮ ಶಕ್ತಿ ಜಾವ್ಕಾ ... ಮಿಗೆಲೆ ಮಿತ್ರ ಧುರ್ಯೋಧನಾ ಖತಿರಿ ಹಾಂವ ಮಿಗೆ ಲೆ ಪ್ರಾಣ ತ್ಯಾಗ ಕೊರುಂಕ ಸಿದ್ಧ ಅಸ್ಸ . ಅರ್ಜುನಾಲೆ ಎದ್ರಾಕ ಯುದ್ಧ ಕೊರುಂಕ ಇತ್ಲೆ ಅರ್ಹತಾ ಅಸ್ಲೆರಿ ಪೂರೊ "
ಭೀಷ್ಮ : " ಕರ್ಣಾ .. ! ಯುದ್ಧ ರಂಗಾಂತು ಜೀವು ಸೊಡ್ತಾಲೆ ನಯ್ ... ಅಂಮ್ಕಾ ಜಾವ್ಕಾ ಜಾಲ್ಲೆಲೆ ... ಪ್ರಾಣು ಕಡ್ತಾಲೆ ಜಾವ್ಕಾ . ಪ್ರಭು ಭಕ್ತಿ ತುಗೆಲೆಗೀ ಅಸ್ಸೋ .. ! ಹ್ಯೇ ಮಿಗೆಲೆ ನಿರ್ಣಯ .. ಇತ್ಲೆಂಚಿ .. ! " ಭೀಷ್ಮ ಕರ್ಣಾಲೆ ವಾದ ವಿವಾದ ... ಧುರ್ಯೋಧನಾಕ , ಸಂಕಟಾ ಪಾಡಾಯಿಲೆ ... ಮಲಘಡೊ ಭೀಷ್ಮ ಪಿತಾಮಹಾಕ ಸಂಗ್ಚ್ಯೆ ಕಶಿ .. ? ಪ್ರಾಣ ಮಿತ್ರ ಕರ್ಣಾಕ ಕಶಿ ಸಮಾಧಾನ ಕೊರ್ಚೆ ... ?
ಧುರ್ಯೋಧನ : " ಪಿತಾಮಹಾ .. !ಆಮ್ಗೆಲೆ ಭಿತರೀಚಿ ಅಶೀ .. ವಾದ ವಿವಾದ ಕೊರ್ಚೆ ಪೊಶಿ ... ಮಿಗೆಲೆ ಖತಿರಿ ... ಶತ್ರು ಸೈನ್ಯಾ ವೊಟ್ಟು ಯುದ್ಧ ಕೊರ್ಚೆ ಲಾಯಕ್ ನವೇ ?"
ಕರ್ಣ : " ಮಿತ್ರ ಧುರ್ಯೋಧನಾ ... ! ಹ್ಯೇ ಭೀಷ್ಮ ಪಿತಾಮಹಾಲೆ ... ಪಾಂಡವ ಪಕ್ಷಾ ವೈರಿ ದವರ್ಲೆಲೆ ಪ್ರೀತಿ ನಿಮಿತ್ಯ ... ಅಂಮ್ಕಾ ಜಯ ಮೆಳ್ಚೆ ಸಾಧ್ಯ ನಾ . ಭೀಷ್ಮಆಚಾರ್ಯಾನ ಅಸ್ಚೆ ತೆದೊಳ್ ತಾಯ್ ... ಹಾಂವ ಯುದ್ಧ ರಂಗಾಂತು ಪ್ರವೇಶು ಕರ್ನಾ .. ತಾಗೆಲ್ ನಿಮಿತ್ಯ ಚಿ .. ವಿಜಯ ಸಾಧನ ಕೋರ್ಕಾ ಮೋಣು ಅಸ್ಲೆರಿ ... ತೂಗೆಲ್ ಶಕ್ತಿ ದಕ್ಕಯಿ ಯುದ್ಧ ರಂಗಾಂತು . ತುಗ್ಗೆಲ್ ನಿಮಿತ್ಯ .. ಧುರ್ಯೋಧನಾಕ ವಿಜಯ ಜವ್ವೋ ." ಮೋಣು ಕೋಪಾನ ಸಂಘುನ್ ಸಭಾ ಸೋಣು ಭಾಯಿರಿ ಚ೦ಮ್ಕಲೊ .
ಭೀಷ್ಮ : " ಧುರ್ಯೋಧನಾ .. ! ಕರ್ಣ ಯುದ್ಧ ರಂಗಾತು .. ನಾ ಮೋಣು ಲೆಕ್ಕುನ್ , ಚಿಂತಾ ಕೋರ್ನುಕ್ಕಾ . ಹಾಂವ ಆಸ್ತಾನಾ ತುಕ್ಕಾ ಕಾಯೀ ಭಂಯ್ಯ ನಾ ... ಏಕ್ ಏಕ್ ದಿವಸಾಕ ಧಾಹ್ - ಧಾಹ್ ಹಜಾರ ಸೈನ್ಯಾಕ ದಿವಿಶಿ ಮಾರ್ನ್ , ಯಮ ಲೋಕಾಕ ಪೆಟಯಿತಾ . ಪಾಂಡವಾಂಕ ನಿದ್ರಾಹಾರ ನಾಶಿ ಕರತಾ . ಕೃಷ್ಣಾರ್ಜುನಾಂಕ , ಯುದ್ಧ ರಂಗಾಂತು ವಿನಾ ಕಾರಣ ವಾಪಾಸ್ ಘು೦ವ್ನು ವೊಚ್ಛೇ ತಶಿ ಕರ್ತಾ .. ಹತ್ತಾ೦ತು ಶಸ್ತ್ರ ಧರ್ನಾ ಮೋಣು ಸಂಘಿಲ್ ಕೃಷ್ಣಾ ಕ ಆಯುಧ ಧೊರ್ಚೆ ತಶಿ ಕರ್ತಾ . ಹೋ .. ಪಿತಾಮಹ .. ಮಂಥಾರೊ ಮೋಣು ಲೆಕ್ಕುನುಕ್ಕಾ .. ಶಂಬರಿ ಕರ್ಣಾನ ಯೇವ್ನ್ ರಬ್ಲೇರಿಯಿ .. ಮಕ್ಕಾ ಸಮಾನ ನಯ್ .. " ಧುರ್ಯೋಧನಾ ಕ ಸ್ವಲ್ಪ ಸಮಾಧಾನ ಝಲ್ಲೆ " ಕುಮಾರಾ .. ! ದ್ರುಪದ ರಾಯಾಲೆ ಪುತ್ರ ಶಿಖಂಡಿ ಮಿಗೆ ಲೆ ಎದ್ರಾಕ ಯೇನಾಶಿ ಪೊಳೆ ... ಹ್ಯೇ ವಿಷಯು ತೂ೦ವೇ ಉಡ್ಘಾಸು ದವೋರ್ನ್ ಘೆವ್ಕಾ ... "
ಧುರ್ಯೋಧನ : " ಶಿಖಂಡಿ ನ ತುಗೆಲೆ ಎದ್ರಾಕ ಯೇನಾಶಿ... ದುಃಶ್ಶಾಸನ ಪೊಳೋನ್ ಘೆತ್ತಾ ಪಿತಾಮಹಾ .. ತ್ಯೋ ತುಕ್ಕ ಅಂಗರಕ್ಷಕ ಜಾವ್ನ್ ರಾಬ್ತಾ " .
ಹೇತಾ೦ತು ... ಪಾಂಡವ ಶಿಬಿರಾಂತು ...
ಧರ್ಮಜ :" ಹಾಂವೆ ಕಸಾಲೆ ಕೊರ್ಚೆ ವಾಸುದೇವಾ .. ? "
ಕೃಷ್ಣ : " ನಿರ್ಣಯ ಘೇ ... ಧರ್ಮಜಾ .. "
ದ್ರೌಪದಿ : " ಹನ್ನಿ ಕಸಲೆ ನಿರ್ಣಯ ಘೆತ್ತಲೀ೦ತಿ .. ದೇವಕಿ ನಂದನಾ .. ? ಹಾಂಕಾ , ಹಾಂವ ಕಸಲೇ ಕ ಮಿಗ್ಗೆಲೆ ಕೇಶ ರಾಶಿ ಸೋಣು ಭೌ೦ವತಾ ಮೋಣು ಉಡ್ಘಾಸು ನಾ ... ನಿರ್ಣಯ .. ! ಹಾಂವ ಘೇತ್ತಾ .. ! " ಮೋಣು ಸಂಘುನ್ ಧರ್ಮಜಾ ಲೆ ವೀರ ಶಂಖು ಘೆವ್ನ್ ರಣ ಭೂ೦ಕಾರ ಕೆಲ್ಲೆ . ಹೇ ರಣ ಭೂ೦ಕಾರ .. ಆಕಾಶ ಪಾತಾಳ ಭೂಮಂಡಲ ಗಡ್ - ಘಡ್ಲೆ ... ಭೀಭತ್ಸ ಸಮುದ್ರ ಪಾಳ ಧೋ ಧೋ ಮೋಣು ಉಠಾನ್ ರಾಬ್ಲೆ ... ಪ್ರಳಯ ಕಾಲಾ ಸೂಚನ ಝಲ್ಲಿ ... ಏಕ ಕ್ಷಣ ಅಂಧಕಾರಾ ಮೇಘ ಸಂಚಾರ್ ಝಲ್ಲೋ ... ನಭೋ ಮಂಡಲಾ೦ತ್ ಗುಡುಗು ಮಿಂಚಾ ಕರ್ಕಶ ಶಬ್ಧ ಝೇಂಕಾರ ಝಲ್ಲೆ .
ಧರ್ಮಜ : " ವಾಸುದೇವಾ .. ! ಪಾಂಚಾಲಿಕ ತೂ ಸಾಂಗ ... ಹಾಂವ ಕಾಯರ್ ನಯ್ .. ಹಾಂವ ಎಕ್ಲೊ ರಾಯು . ಯುದ್ಧಾ ಖತೀರಿ ಮಿಗ್ಗೆಲೆ ಪಕ್ಷಾಕ ಆಯ್ಯಿಲೆ ಸೈನ್ಯಾ ಕ , ರಕ್ಷಾ ಕೊರ್ಚೆ ಭಾರ .. ಮಿಗೆಲೆ ಭುಝಾರಿ ಅಸ್ಸ . ಹ್ಯೇ ಮಿಗೆಲೆ ಕರ್ತವ್ಯ ಝತ್ತಾ . ಹ್ಯೇ ಕರ್ತವ್ಯ .. ಮಿಗೆಲೆ ಭಂವ್ಡಾ೦ಕಯ್ ಅಸ್ಸ . ಪಾಂಚಾಲಿ ..! , ತುಗ್ಗೆಲ್ ಸೊಳ್ಳೆಲೆ ಕೇಶ ರಾಶಿ ರಾತಿ - ಫಲ್ಲೆ ಹೃದಯಾಂತ್ ಘಾಯು ಘಾಲ್ತಾ ಆಸ್ತಾ . ಹಾಂವ ಕೇವಲ್ ತುಗೆಲ್ ಪತಿ ಮಾತ್ರ ನಯ್ .. ಹಾಂವ ರಾಯು .. ಕ್ಷತ್ರಿಯು .. "
ದ್ರೌಪದಿ : " ಹಾಂವಯೀ ... ಕೇವಲ ಬಾಯ್ಲ್ ಮಾತ್ರ ನಯ್ .. ಹಾಂವ ಇಂದ್ರಪ್ರಸ್ಥಾ ಪಟ್ಟಾ ರಾಣಿ . ಮಕ್ಕ ಇಂದ್ರಪ್ರಸ್ಥ ನಕ್ಕಾ ... ಮಕ್ಕಾ ಕೇವಲ್ ದುಃಶ್ಯಾಸನಾ ಹರ್ದೇ ರಗತ ಜಾವ್ಕಾ ... ತ್ಯೆ ರಗ್ತಾನ ಮಕ್ಕಾ ಝಲ್ಲೆಲೆ ಅಪಮಾನ ಶಮನ ಕರ್ತಾ , ಕೇಶ ರಾಶಿಕ ಪುಸೂನ್ ... ಲಗ್ಗಿಲೆ ಧೂಳಿ ಸ್ವಚ್ಛ ಕರ್ತಾ ... ! ಏಕ ಸ್ತ್ರೀ ಕ .. ಭರ್ಲೆಲೆ ಸಭೆ೦ತು .. ಗುರು ವಂದ್ಯ ಲೋಕಾಲೆ ಎದ್ರಾ ಕ ವಸ್ತ್ರ ಹರಣ ಕೊರ್ನ್ ಅಪಮಾನ ಕೆಲ್ಲೆಲೆ ಪಾಪಿ ದುಃಶ್ಯಾಸನಾಲೆ ಪ್ರಾಣ ಹರಣ ಜಾವ್ಕಾ .. ತಸಲೆ ಮಹಾ ಪಾಪಿಕ .. ತೀಕ್ಷ್ಣ ಶಿಕ್ಷಾ ಜಾವ್ಕಾ ... ಅನಿ ಮುಕಾರಿ ಕೆದನಾಯ್ ... ಸ್ತ್ರೀ ಅವಮಾನ ಕಂಚೇಯ್ ಯುಗಾಂತು ಜವ್ವು ನಜ್ಜ .. "
ಭೀಮ : " ತ್ಯೆ ರಗತ ತುಕ್ಕಾ ಅವಶ್ಯ ಜಾವ್ನ್ ಮೆಳ್ತಾಲೆ ಪಾಂಚಾಲಿ ... !ಖಂಡಿತ ಮೆಳ್ತಾ ... ಹಾಂವ ಹಾಣು ದಿತ್ತಾ . ಕುರು ವಂಶಾ೦ತ್ ಪ್ರತಿಜ್ಞಾ ಕರ್ತಲೊ ... ಭೀಷ್ಮ ಮಾತ್ರ ನಯ್ ಪಾಂಚಾಲಿ " ಕೃಷ್ಣ : "ಕೋಪಾ ಸಮುದ್ರಾ೦ತು ಇತ್ಲೆ ಮುಳಾಕ ವೊಚ್ಚುನುಕ್ಕಾ ... ತೂ ಸ್ವಯಂ ಬುಡ್ಡುನ್ ವತ್ತಾಲೋ ಭೀಮಾ .. ! ಹ್ಯೇ ವೆಳ್ಯೇರಿ ಸೇನಾಪತಿ ಮ್ಹಣ್ಕೆ ಉಲ್ಲಯಿ . ಸೇನೆ ಆಮ್ಗೆಲೆ ಸಾಥ್ ಅಕ್ಷೋಹಿಣಿ ; ತಾಂಗೆಲೆ ಇಕ್ರಾ ಅಕ್ಷೋಹಿಣಿ ಅನುಪಾತಾರಿ ಅಸ್ಸ . ತಾಂಗೆಲೆ ಸೇನಾಪತಿ ಭೀಷ್ಮ .. ಇಚ್ಚಾ ಮರಣಿ ... ದ್ರೋಣ , ಅಶ್ವಥ್ತ್ಥಾಮ . , ಕರ್ಣ ತಸಲೆ ಮಹಾ ಯೋಧ ಆಸ್ಸತಿ .. "
ನಕುಲ : " ಆಮ್ಗೆಲೆ ಪಕ್ಷಾಂತು ಕೋಣ ಊಣೆ ಆಸ್ಸತಿ .. ಕೃಷ್ಣಾ .. ? ಮಹಾರಾಜ್ ದ್ರುಪದ , ವಿರಾಟ ನರೇಶ್ , ದ್ರಷ್ಟದ್ಯುಮ್ನ , ಮಹಾವೀರ ಶಿಖಂಡಿ , ಮಹಾವೀರ ಸಾತ್ಯಕಿ ,ಭೀಮ ಅರ್ಜುನ .. ತ್ಯೇಮಾತ್ರ ನಯ್ .. ಅರ್ಜುನಾಲೆ ಅಸ್ಲೇವರಿ ದಿವ್ಯಾಸ್ತ್ರ ಕೊಣಾ ಲಗ್ಗಿ ಅಸ್ಸ ತಾಂಗೆಲೆ ಪಕ್ಷಾಂತು ? "
ಅರ್ಜುನ : " ತ್ಯೆ ಮಾತ್ರ ನಯ್ ವಾಸುದೇವಾ ... ಆಮ್ಗೆಲೆ ಪಕ್ಷಾಂತು ತೂ ಅಸ್ಸ .. "
ಕೃಷ್ಣ : " ಝಲ್ಲೆರಿಯಿ ... ಹಾಂವ ಶಸ್ತ್ರ ಧರ್ನಾ .. ಅರ್ಜುನಾ ! "
ಅರ್ಜುನ : " ಅಂಮ್ಕಾ ತುಗೆಲೆ ವರದ ಹಸ್ತ ಜಾಯಿ , ಆಶೀರ್ವಾದು ಜಾಯಿ ವಾಸುದೇವಾ .. ! ತಂಗೆಲಗ್ಗಿ ಮಸ್ತ ಶಸ್ತ್ರ ಅಸ್ಸ ... ಅಮ್ಗೆಲೆಗಿಯೀ ಆಸ್ಸ . ಝಲ್ಲೆರಿ .. ತಾಂಗೆಲೇಗಿ ಪಾಂಚಾಲಿ ನ ಸೊಳ್ಳೆಲೆ ಧೂಳಿ ಧರ್ಲೆಲೆ ಕೇಶ ರಾಶಿ ನಾ .. ತಾಂಗೆಲೇಗಿ ತೂ೦ವಯ್ ನಾ ಕೇಶವಾ .. ! "
ಕೃಷ್ಣ : "ತುಗೆಲೆ ವೊಟ್ಟು ಅನಿಕಯ್ ಮಸ್ತ್ ಅಸ್ಸ ಪಾರ್ಥಾ .. ! ತಜ್ಜಿ ನಿಮಿತ್ಯ ಹಾಂವ ತುಗೆಲೆ ವೊಟ್ಟು ಅಸ್ಸ . ತುಂಮ್ಗೆಲೆ ವೊಟ್ಟು ಧರ್ಮು ಅಸ್ಸ . ತಜ್ಜೆ ನಿಮಿತ್ಯ ... ಧರ್ಮಜಾ ...! ಭೀಷ್ಮಾ ಎದುರ ಕೊಣಾಕ ಸೇನಾಧಿಪತಿ ಕರ್ತಾ ... ? "
ಧರ್ಮಜ : " ಮಿಗೆಲೆ ಮನಾಂತು ದ್ರುಪದ ಮಹಾರಾಜಾ ಕ ... ಭೀಷ್ಮಾ ಲೆ ಎದುರ ಯೋಗ್ಯ ಮೋಣು ದಿಸ್ತಾ ವಾಸುದೇವಾ ... "
ಅರ್ಜುನ : " ದೃಷ್ಟದ್ಯುಮ್ನ ಕಿತ್ಯಾ ಜವ್ವುನಜ್ಜ .. ? ಭೀಷ್ಮ ಪಿತಾಮಹ ... ಚಾರಿ ಯುಗಾ ಮಕ್ಷಿಚ್ಯೆ ಯೋಧು ... ಮಿಗೆಲೆ ವಿಚಾರಾ ಪ್ರಕಾರ ದೃಷ್ಟದ್ಯುಮ್ನ ಆ೦ಮ್ಗೆಲೆ ಕಾಲಾಚೊ ... ಮಕ್ಕಾ .. ತ್ಯೋ ಸ೦ಮ್ಮ ಮೋಣು ದಿಸ್ತಾ ... "
ಕೃಷ್ಣ : " ಮಕ್ಕಾ .. ಪಾರ್ಥಾನ ಸಂಘಿಲೆ ಸ೦ಮ್ಮಮೋಣು ದಿಸ್ತಾ ... ದೃಷ್ಟದ್ಯುಮ್ನಕಚೀ ಮಹಾಸೇನಾಧಿಪತಿ ಕೊರ್ಚೆ ಲಾಯಕ್ . " ದೃಷ್ಟದ್ಯುಮ್ನ ಉಠಾನ್ ರಬ್ಬುನ್ ಕೃಷ್ಣಾ ಕ , ಧರ್ಮಜಾ ಕ ವಂದನ ಕೆಲ್ಲಿ . " ಮಹಾಸೇನಾಧಿಪತಿ ಜಾವ್ಚ್ಯಾಕ ಒಪ್ಪಿಗ ಅಸ್ಸ .. ಹಾಂವ ಮಿಗೆಲಿ ಕರ್ತವ್ಯ ನಿಷ್ಠಾ ಪೂರ್ವಕ ಜಾವನು ಕರ್ತಾ " ಮೋಣು ಪ್ರತಿಜ್ಞಾ ಕೆಲ್ಲಿ .
ಉಮಾಪತಿ
No comments:
Post a Comment