MAHABHARATH Part - 37 ( Konkani Bhashentu ) Viduraatithya ani Kuntili BheThi

MAHABHARATHA   PART - 37  ( Konkani Bhashentu )

                                         VIDURA  ADARAATHITYA  ANI KUNTILE BHETHI

                                       ವಿದುರ ಆದರಾತಿಥ್ಯ ಅನಿ ಕುಂತಿಲಿ ಭೇಠಿ

                       ಶ್ರೀ ಕೃಷ್ಣು , ಸಾತ್ಯಕಿ ಸಮೇತ ಹಸ್ತಿನಾವತಿಕ ವೋಚ್ಚಾ ಭಾರ್ಸರ್ಲಾ . ಪಾಂಡವ , ತಕ್ಕ ರಥಾರಿ ಚೋಡೊನ್ .. ಶುಭ ಪ್ರಯಾಣ ಸಂಘುಕ ಆಯಿಲೀ೦ತಿ . 

ಧರ್ಮಜ : " ವಾಸುದೇವಾ .. ! ಹಸ್ತಿನಾವತಿಕ ಪಾವಲೆ ಸತಾನ .. ಸುರ್ವೇ ಕ ಆಮ್ಗೆಲೆ ಅಮ್ಮಾ ಕ ಭೇಟಿ  ಕೊರ್ನ್ , ಆಮ್ಗೆಲೆ ಸರ್ವ ಲೋಕಾಲೆ ಪಾದ ನಮಸ್ಕಾರ ಸಂಘುಕಾ ... ಗೋವಿಂದಾ .. ! ಆಮ್ಗೆಲಿ ಮರ್ಯಾದಿ , ಭವಿಷ್ಯ , ಬಾಧ್ಯತಾ , ತುಗೆಲಿ ಭುಜಾರಿ ಅಸ್ಸ " ಕೃಷ್ಣು ಹಸ್ತಾಚಿ ರಥಾರಿ ಚಳ್ಳೋ . ಕೃಷ್ಣು ರಾಯ ಭಾರಿ ಜಾವ್ನ್ ಹಸ್ತಿನಾವತಿಕ ಯೆತ್ತಾ ಮೋಣು .. ಧರ್ಮಜಾ ನ ಸುರ್ವೆಕಚಿ ಸಂಘುನ್ ದೀವ್ನ್ ಪೆಟಯಿಲೆ ನಿಮಿತ್ಯ ... ಧ್ರತರಾಷ್ಟ್ರಾನ , ಕೃಷ್ಣಾ ಲೆ ಸ್ವಾಗತಾ ಖತಿರಿ ಸ್ವಾಗತ ಸಮಾರಂಭ ತಯ್ಯಾರಿ ಕೆಲ್ಲಾ . ಹಜಾರ್- ಹಜಾರ್ ಚಂದಿ ಬಾಯ್ಲ್ ಮನ್ಶ್ಯ೦ಕ ರಾಜ ಬೀದಿರಿ ಸಾಲಾನ್ ರಾಬಕರಾಸುನ್ . ಫುಲ್ಲಾ  ಪಾಕಳೀ , ಸುಗಂಧ ದ್ರವ್ಯ ಸಿಂಚನ್ ಕೊರುಂಕ ಆದೇಷು ದಿಲ್ಲಾ . ಧುರ್ಯೋಧನಾನ , ನಮುನ್  ವಾರು ಗೊಡ್ಶೆ ಖಾಣ , ಫಲಾ ರೋಸು ತಯ್ಯಾರ್ ಕೊರ್ನ್ , ವಟ್ಟೇರಿ ತಾನ್ನಿ ಪ್ರಬಂಧ ಕೆಲ್ಲಾ ..  ಕೃಷ್ಣಾ ನ ರಬ್ಚ್ಯಾಕ ಯೆಕ ಸುಂದರ್ ಮಹಲ್ ಭಾರೀ ಚಂದ ಕೊರ್ನ್ ವೈಭವಾರಿ ಶ್ರಾಂಗಾರ ಕೆಲ್ಲಲೆ ಪ್ರತ್ಯೇಕ ಮಂದಿರ ನಿಗಧಿ ಕೆಲ್ಲಾ ... ಶ್ರೀ ಕೃಷ್ಣಾ ನ ಪುರ ಪ್ರವೇಶ ಕೆಲ್ಲಾ ... ಕೃಷ್ಣಾ ಕ ಪೋಳೋ ಚ್ಯೆ ಖತೀರಿ ಹೀ೦ಡು - ಹೀ೦ಡು ಪುರ ಲೋಕು ಸ್ತ್ರೀ ಪುರುಷು ಮೋಣು ವ್ಯತ್ಯಾಸು  ನಾಶಿ ರಾಜ ಮಾರ್ಗಾಕ ಅಯಿಲೀ೦ತಿ . ಸ್ವಲ್ಪ ಜನ ಫುಲ್ಲಾ ಪಾಕಳಿ ಘಲ್ತಾಚಿ ಝಲ್ಲೇರಿ ... ಅನಿ ಸ್ವಲ್ಪ ಲೋಕು ಫುಲ್ಲಾ ಮಾಳ ಘಾಲ್ನ್ , ಸುಗಂಧ ಪನ್ನೀರ್ ದಾನಿರಿ ಉದ್ದಾಕ ಷಿಂಪುನ್ ಸಂತೋಷು ವ್ಯಕ್ತ ಕೊರ್ನ್ ಸ್ವಾಗತ ಕರ್ತಾತಿ . ಸ್ವಲ್ಪ ಜನ ಹಾತು ಉಬ್ಬಾರ್ನ್ ನಮಸ್ಕಾರು ಕೊರ್ನ್ , ಪ್ರೀತ್ಯೇನ ಸೌಖ್ಯ ವೇ ?ಮೋಣು  ನಿಂಮ್ಗೂನ ಸಂತೋಷು ವ್ಯಕ್ತ ಕರ್ತಾತಿ . ಬ್ರಾಮ್ಮಣ , ವೇದ ಪಂಡಿತ ಲೋಕಾನಿ ವೇದ ಮಂತ್ರ ಸಂಘುನ್ ಅಕ್ಷತ ಘಾಲ್ನ್ ..   ' ಪರಾಕ್ ' ' ಜಯಕಾರ್ ' ಹರ್ಷೋದ್ಘಾರ ಕರ್ತಾತಿ . ಶ್ರೀ ಕೃಷ್ಣಾ ಲೇ ಮದನ ಮೋಹನ ರೂಪ , ಗಲ್ಲಾರಿ ರಬ್ಬಿಲೆ ದೃಶ್ಟಿ ಗೂಳಿ , ಸಮ್ಮೋಹನಾ  ಮಂದ ಹಾಸು , ರಾಜ ಗಾಂಭೀರ್ಯ ಠೀವಿರಿ ರಬ್ಬಿಲೆ ಆಂಗ್ಲೋಟು ... 'ತುಂಮ್ ಕಾ ಸರ್ವಾಂಕ್ ಬೋರೆ ಜವ್ವೋ' ... ಹಾಸಾರಿ .. ದೊಳೆರಿ ಅಭಿನಂದನ ಕೊರ್ನ್ ಯೆತ್ತಲೇ ಕೃಷ್ಣಾ ಲೆ  ವರ್ಣನಾ ಕಸಲೆ ಸಂಘು .. ? ಭೀಷ್ಮ , ವಿದುರ , ಸಂಜಯ , ಧುರ್ಯೋಧನ , ಶತ ಕೌರವ ಯೇವ್ನ್ .. ಶ್ರೀ ಕೃಷ್ಣಾ ಕ ಸ್ವಾಗತ ಕೆಲ್ಲೆ .  " ವೃಷ್ಟಿ ಕುಲಾಬ್ದಿ ಚಂದ್ರಾ ... ಯದು ಕುಲಾನ್ವಯ ಕೀರ್ತಿ ಸಾಂದ್ರಾ ... ಸುಪ್ರಕಾಶಾ ... ಸಜ್ಜನ ಹೃದಯ ನಿವಾಸಾ ... ಮಧುರ ಮಂದಸ್ಮಿತಾ ... ಚಾರುಧರ ಹಾಸಾ ... ಷೋಡಶ ಸಹಸ್ರ ಮಾನಿನೀ ಮನೋಹರಾ ... ಗೋಕುಲ ವಿಹಾರೀ ... ಪಾಂಡವ ರಾಯ ಭಾರೀ ... ಬಹುಪರಾಕ್ ... ಬಹುಪರಾಕ್ .. ಬಹುಪರಾಕ್ " ವಂದಿ ಮಾಗದಾನಿ ಕೀರ್ತನ ಕೆಲ್ಲಿ . ಶ್ರೀ ಕೃಷ್ಣಾನ ಧ್ರತರಾಷ್ಟ್ರಾಕ ಭೇಟಿ ಕೊರ್ನ್ , ಯೋಗ ಕ್ಷೇಮ ವಿಚಾರಣ ಕೊರ್ನ್ , ಅರ್ಘ್ಯ ಪಾದ್ಯ  ಸ್ವೀಕಾರ್ ಕೊರ್ನ್ , ಥಂಯ್ ಅಶಿಲೆ ಪ್ರತಿಷ್ಠಿತ ಲೋಕಾಲೆ ಉಲ್ಲೋನ್ ಸ್ವಲ್ಪ ವೇಳು ಕಳ್ಳೊ ... " ಮಾಮಾ ಧ್ರತರಾಷ್ಟ್ರ ಸಾರ್ವಭೌಮಾ .. ! ಫಲ್ಲೆ ಸಕಾಣಿ ರಾಜ ಸಭೆಕ ಯೆತ್ತಾ . ಅತ್ತ ವಿದುರ ಮಹಾಶಯಾಲೆ ಮಂದಿರಾಂತ್ ವಿಶ್ರಾಮ ಕೋರ್ಕಾ ಮೋಣು ನಿಶ್ಚಯ ಕೆಲ್ಲಾ . " ಮ್ಹಳ್ಳಲೋ ಕೃಷ್ಣು 

ಧುರ್ಯೋಧನ : " ತುಗೆಲೆ ಖತಿರಿ .. ತುಕ್ಕ ರೇಬ್ಚ್ಯೇ ಖತಿರಿ .. ಪ್ರತ್ಯೇಕ ಮಂದಿರ ತಯ್ಯಾರ್ ಕೆಲ್ಲಾ " 

ಕೃಷ್ಣ : " ತುಗೆಲೆ ಆತಿಥ್ಯ ಘೇನಾಶಿ ವಚ್ಚನಾ "   ಧುರ್ಯೋಧನಾ ಕ ನಿರಾಶ ಝಲ್ಲಿ . ವಿದುರಾ ಕ ಸಂತೋಷು ಝಲ್ಲೋ . ವಾಸುದೇವಾನ ತಾಣೆ  ಜಾವ್ನ್ ತಾಗೆಲ್ ಘರಾ ಯೆತ್ತಾ ಮ್ಹಣ್ತಾನಾ ... ' ಮಿಗ್ಗೆಲೆ ಪೂರ್ವ ಜನ್ಮಾ ಸುಕೃತ ಮೊಣ ಲೆಕ್ಲೆ ವಿದುರಾನ . ಪ್ರೀತಿ ಪೂರ್ವಕ ಜಾವ್ನ್ ಕೃಷ್ಣಾ ಕ ತಾಗೆಲ್ ಮಂದಿರಾಕ  ಅಪ್ಪೋನ್ ವೆಲ್ಲೆ . ಪ್ರತ್ಯೇಕ ಆಸನ ಘಾಲ್ನ್ ವ್ಯಾಘ್ರ ಜಿನ ವಸ್ತ್ರ ಘಾಲ್ನ್ ಬಸ್ಕರಾಯಿಲೊ . ನೆಲಾರಿ ಬಯಿಸುನ್ ಕೃಷ್ಣಾ ಲೊ ಪಾದ ಧುಲ್ಲೆ . " ನಾರಾಯಣಾ ... ಅಚ್ಯುತಾ .. ಅನಂತಾ .. ಮಹರ್ಷಿ ಮುನಿ ಜನಾಂಕ ಮೆಳ್ ನಾ ನಾತ್ತಿಲೆ ..  ತೂಗೆಲ್ ಪಾದಪದ್ಮ ಧುವ್ಚ್ಯೇ ಭಾಗ್ಯ ಮಕ್ಕಾ ಮೆಳ್ಳೆ . ಸನಾತನಾ .. ದೀನ ಜನಾವನಾ ..  ಹಾಂವೆ ಕೆಲ್ಲೆಲೆ ಪುಣ್ಯ ಕಸಲೆ .. ? ಭಾಗ್ಯ ಮ್ಹಳ್ಳೇರಿ .. ಹೇ೦ಚಿ ಮಹಾ ಭಾಗ್ಯ .. ಹ್ಯೇ ಮಿಗ್ಗೆಲೆ ಅದೃಷ್ಠ ..  ಪರಂಧಾಮ .. ! ಅಸಲೆ ಭಾಗ್ಯ ದೀವ್ನ್ ಮಿಗೆಲೆ ಜನ್ಮು ಸಾರ್ಥಕ ಕೆಲ್ಲೆ . ಮಿಗೆಲೆ ಜೀವಾಕ  ಇತ್ಲೆ ಪೂರೋ ವಾಸುದೇವಾ ! " 

ಮೋಣು ಸಂಘುನ್ ಆನಂದ ಭಾಷ್ಪ ಕೃಷ್ಣಾ ಲೇ ಚರಣಾ ಕ ಘಾಲ್ನ್ ನಮನ ಕೆಲ್ಲೆ . ತುಳಸೀದಳ ಮಾಲಾ ಗಳೇ ಕ ಘಾಲ್ನ್ .. ಪಿಕ್ಕಿಲೆ , ರುಚಿ ಅಶಿಲೆ ಕೇಳೆ ಸೊಲ್ಲೊನ್ ಎಕೇಕಾಚಿ ಕೃಷ್ಣಾ ಕ ಖಾವೈಲೆ . ಕೃಷ್ಣಾ ಕ ಪ್ರೀತಿ ಮೋಣು ತೀಳು ಗೋಡ ಲೋಣಿ ದೂಧ ಫಲವಸ್ತು ಪೊಳೆರಾ ದೊವೊರ್ನ್ ಕೃಷ್ಣಾ ಕ ಸಮರ್ಪಣ ಕೆಲ್ಲೆ . ಮಧುರ ಭಕ್ತಿ ಭಾವ ಯೇವ್ನ್ ಉಲ್ಲಯಿತಾ - ಲ್ಲಯಿತಾ ವಿಧುರಾನ ಕೇಳೆ ಸೊಲ್ಲೊನ್ .. ಮಧ್ಯ ಭಾಗ ಉಡೊನ್ .. ಕೇಳೇ ಸಾಲಿ ಕೃಷ್ಣಾ ಕ ಅರ್ಪಣ ಕೆಲ್ಲಿ . ಕೃಷ್ಣಾ ನ ಉಲ್ಲಯಿನಾಶಿ ನುತ ಕೇಳೇ ಸಾಲಿ ಅಮೃತ ಶೀ ಸ್ವೀಕಾರ ಕೆಲ್ಲಿ . ಸ್ವಲ್ಪ ವೇಳ್ ನಂತರ ವಿದುರಾಕ ತಾಣೆ  ಕೆಲ್ಲೆಲಿ ಚೂಕಿ ಕಳ್ಳಿ . " ಕ್ಷಮಾ ಕರಿ ವಾಸುದೇವಾ " ಮೋಣು ಕ್ಷಮಾಪಣ್  ಮಾಗ್ಲಿ .ವಿದುರಾಲೆ ದೊಳೆಂತ್ ಉದ್ದಾಕ ಅಯಿಲೆ .

ಕೃಷ್ಣ : "ವಿದುರಾ ..! ತೂ೦ವೆ ಕಸಲೆಯ್ ಚೂಕಿ  ಕರ್ನಿ ... ಮಕ್ಕ ಗೊಡ್ಶೆ ಖಾಣ , ಕಾಣಿಕಾ , ಮಂತ್ರ ತಂತ್ರ ಜಾವ್ಕಾ ಮೋಣು  ನಾ . ಭಕ್ತೀನ ಭಾವೈಕ್ಯ ಜಾವ್ನ್ , ಮನಾನ್ ಕೋಣ ಮಕ್ಕಾ  ಪ್ರೀತಿ ಕರ್ತಾತಿ ಕೀ .. ತಂಕಾ ಹಾಂವ ಪ್ರೀತಿ ಕರ್ತಾ ... ಪಾಯ್ಸು , ಫಲ ರಸ ಮಕ್ಕ ನಕ್ಕಾ . ತೊಡೆಸೇ ಉದ್ದಾಕ ಸಮರ್ಪಣಾ ಕೆಲ್ಲೇರಿ ಹಾಂವ ಪ್ರೀತಿನ  ಸ್ವೀಕಾರ್ ಕರ್ತಾ . ನಂಬಿಕಾ ...  ಮಕ್ಕ ದಿವ್ಚೆ ನೈವೇದ್ಯ . ಭಕ್ತಿ ...  ಮಕ್ಕಾ ದಿವ್ಚೆ ಕಾಣಿಕಾ ... ಡಾ೦ಮ್ಬಿಕಾ ಪೂಜಾ ಆಚಾರ ವಿಚಾರ , ಡಾ೦ಮ್ಬಿಕ ಭಕ್ತಿ ದುಕೂನ್ ಹಾಂವ ದೂರ ಆಸ್ತಾ . ತೂ೦ವೆ ಪ್ರೀತ್ಯೇನ ದಿಲ್ಲೆಲೆ ಕೇಳೇ ಸಾಲಿ ... ಮಕ್ಕಾ ಅಮೃತ ಝಲ್ಲೆ ವಿದುರಾ ... ! " 

                            ಪಾಂಡವ ಅರಣ್ಯ ವಾಸಾಕ ವೊಚ್ಛೆ ಫೂಡೆ ಕುಂತಿಕ ವಿದುರಾಲೆ  ಘರಾ ಸೋಣು ಚ೦ಮ್ಕಲೆಲೆ . ಕೃಷ್ಣು , ಕುಂತಿ ದೇವಿಲೆ ನಿವಾಸ ಸ್ಥಾನಾ ಕ ಚ೦ಮ್ಕಲೋ . ಹ್ಯೇ ತೇರ ವರುಷ ಕುಂತಿ ದೇವಿ ಪಾಂಡವಾಂಕ ಸೋಣು ... ವಿದುರಾಲೆ ಘರಾಂತ್ ರಬ್ಬುನ್ ಅಶೀಲಿ .ಕೃಷ್ಣಾ ಕ ಪೊಳೈಲೆ ಸತಾನ್ ಗಳ್- ಗಳನಿ ರಳ್ಳಿ ಕುಂತಿ ದೇವಿ . " ಶಾಂತ ಝಾ ... ಶಾಂತ ಝಾ ಆತ್ಯಾ .. ! " ಸಮಾಧಾನ ಕೆಲ್ಲಿ ಕೃಷ್ಣಾ ನ . "  ಜಾವಯಿ  ಮಯ್ಯಾ .. ! ಮಿಗ್ಗೆಲೆ ಚೆರ್ಡು೦ವ ಕಶಿ ಆಸ್ಸತಿ .. ? ಅಗ್ನಿ ಪುತ್ರಿ ದ್ರೌಪದಿ ಕಶಿ ಅಸ್ಸ .. ?

ಕೃಷ್ಣ : " ತನ್ನಿ ಸರ್ವ ಜನ ... ಸೌಖ್ಯ ಆಸ್ಸತಿ . ಸರ್ವಾನಿ ತುಗೆಲೆ ಚರಣಾ ಕ ವಂದನ ಸಾಂಗುನ್ ಆಶೀರ್ವಾದ ಮಾಗ್ಲಾ .. "

ಕುಂತಿ : " ವಾಸುದೇವಾ ..ತೂ ಪೋಳೋಚ್ಯಾ ಯೆತ್ತ ಕೀ ..  ಯೇನಾ ಕೀ  ಮೋಣು ಸಂಕಟ ಪಾವ್ತಾಶಿಲಿ " ಕೃಷ್ಣ : " ತುಕ್ಕ ಪೋಳೋಚ್ಯಾಕ  ಆಯಿಲಾ ಆತ್ಯಾ ... ತುಗ್ಗೆಲ್ ನಿಮಿತ್ಯ ಪಾಂಡವಾಂಕ ಏಕ ಹೋಡ  ಸಹಾಯು ಜಾವ್ಕಾ ... ತುಕ್ಕ ಕರ್ಣ ಗೊತ್ತಸ್ಸ ನವೇ .. ? ಮಿಗೆಲೆ ಸಂಧಾನಾ ಪ್ರಸ್ತಾವ ಧುರ್ಯೋಧನು  ಅಂಗೀಕಾರ ಕರೈಶಿ ನಾ ...! ಯುದ್ಧ ಖಂಡಿತ ಝತ್ತಲೆ ... ಝಲ್ಲೆರಿಯಿ ಹಾಂವ ಮಿಗೆಲೆ ಪ್ರಯತ್ನ ಕರ್ತಾ .ಯೇಕತ್ ವೇಳ್   ಯುದ್ಧ ಝಲ್ಲೆರಿ .. ತುಗ್ಗೆಲ್ ಚೆರ್ಡುವಾಂಕ ಕರ್ಣಾಲೆ  ನಿಮಿತ್ಯ ಖಂಡಿತ ಅಪಾಯ ಅಸ್ಸ . ತೂ೦ವೇ  ಯೇಕಾಂತ ಜಾವ್ನ್ ಕರ್ಣಾಕ ಮೇಳ್ಕಾ ... ಅನಿ  ತುಗ್ಗೆಲ್ ಚೆರ್ಡುವಾಂಕ ಜೀವದಾನ ಕೋರ್ಕಾ ಮೊಣು ನಿ೦ಮ್ಗುಕಾ . ಕೊಣಾಕಯ್ ಕಳ್ನಾಶಿ , ರಹಸ್ಯ ಜಾವ್ನ್ ಹ್ಯೇ ಕಾಮ ಜಾವ್ಕಾ . ತಗೆಲ್ ನಿಮಿತ್ಯ ಧರ್ಮಜ , ನಕುಲ ಸಹದೇವಾಲೆ ಜೀವಾಕ ಸಂಚಕಾರ ಅಸ್ಸ . ಹ್ಯೇ ಮಿಗೆಲೆ ನಂಮ್ಗಣ . ಮಸ್ತ್ ಚತುರಾಯೆರಿ ಹ್ಯೇ ಕಾಮ ತುವೆಂಚಿ ಕೋರ್ಕಾ . ಹಜ್ಜೆ ಖತಿರಿ , ತೂಗೇಲೇ ಸಂಗಚೆ ಖತಿರಿ ಹಾಂವ ಹಾಂಗಾ ಅಯಿಲಾ ."

ಕುಂತಿ :" ಜಾಯ್ತ ಕೃಷ್ಣಾ ಮಯ್ಯಾ ...! ಹಜ್ಜೆ ನಿಮಿತ್ಯ ಕರ್ಣಾಲೆ ಜೀವಾ ಕ ಕಾಯೀ ಲುಕ್ಸಾಣಿ ನಾ ನಾವೇ .. ? "

ಕೃಷ್ಣ : " ಭಾರ್ಘವ ರಾಮಾಲೆ ಶಿಷ್ಯ ... ಕರ್ಣಾಕ ಕಸಲಿ ಲುಕ್ಸಾಣಿ ... ? ನಾ ... ನಾ .. ! ಫಲ್ಲೇ ..  ಕುರು ಸಭೆ೦ತು ಸಂಧಾನ ಉತ್ತರ೦ ಝತ್ತರಿ ... ಹಾಂವ ಉಪಪ್ಲಾವ್ಯ ನಗಾರಾ ಕ ವಾಪಾಸ್ ವತ್ತಲೋ ... ಹಾಂವೆ ಸಂಘಿಲೆ ವಿಷಯು ವಿಸೋರ್ನುಕ್ಕಾ ಆತ್ತ್ಯಾ .. !"

ಕುಂತಿ : " ಸಂಧಾನ ಕಸಲೆ ಮೋಣು  ಕೃಷ್ಣಾ  ... ? "

ಕೃಷ್ಣ :" ನ್ಯಾಯ ಜಾವ್ನ್ ತೇರ ವರುಷ ... ಅರಣ್ಯ , ಅಜ್ಞಾತವಾಸ ಜಾತ್ತರಿ ... ಇಂದ್ರಪ್ರಸ್ಥ ವಾಪಾಸ್ ಕೋರ್ಕಾ ... ಹಕ್ಕಾ ಧುರ್ಯೋಧನಾನ ಅಂಗೀಕಾರ ದೀನಿ ಝಲ್ಲೇರಿ , ಪಂಚ ಪಾಂಡವಾಂಕ ' ಪಾಂಚ ಪಟ್ಟಣ ದಿಲ್ಲೆರಿ ಪೂರೊ ' ಮೋಣು ಧರ್ಮಜಾನ ಮಿಗೆಲೇ  ಸಂಗ್ಲಾ ... ಆನಿ ಮಕ್ಕಾ ತಾಗೆಲೆ ರಾಯಭಾರಿ ಜಾವ್ನ್ ನಿಯುಕ್ತಿ ಕೆಲ್ಲಾ . "

ಕುಂತಿ :" ನಕ್ಕಾ ...  ಕೃಷ್ಣ ಮಯ್ಯಾ ....! ಹ್ಯೇ ಸಂಧಾನ ನಕ್ಕಾ ... ಮಿಗೆಲೆ ಚೆರ್ಡು೦ವ ದೇವತಾಂಶ ಜಾವ್ನ್ ಮಿಗೆಲೆ ಗರ್ಭಾ೦ತ್  ಜನ್ಮಾ ಅಯ್ಯಿಲೆ . ಭಿಕ್ಷಾ ಮಗ್ಗುನ್ ಜೀವನ ಕೋರ್ಚ್ಯೆ ನಕ್ಕಾ . ಜಾವ್ಕಾ ಝಲ್ಲೆರಿ ಧರ್ಮಜ ... ತಾಗೆಲ್ ಭ೦ವ್ಡಾ೦ಕ ಘೇವ್ನ್ ...  ಶಾಶ್ವತ್ ಜಾವ್ನ್ ಅರಣ್ಯ ವಾಸ ಕೊರೋ ... ದಾಯಾದಿ ದಯೆ ವೈರಿ , ಎಕ್ಲೆ೦ಗೆಲೆ  ಹಂಗಾರಿ , ಲಜ್ಜಾಸ್ಪದ ಜಾವ್ನ್ ... ಜೀವನ ಕೊರ್ಚೆ ನಕ್ಕಾ . ಪಾಂಡು ರಾಯಾಲೆ ಚೆರ್ಡು೦ವ ... ಅಪ್ರಯೋಜಕ ... ಯುದ್ಧ ಕೊರು೦ ಕಳ್ನ ನತ್ತಿಲೆ ... ಷಂಡ ಮೋಣು ಸಗಳೇ ಪ್ರಪಂಚ ಹಾಸ್ಚ್ಯೆ ನಕ್ಕಾ .. ಧರ್ಮಜಾ ಕ ಸಾಂಗ ...! ಕ್ಷತ್ರಿಯ ,  ಶೌರ್ಯಾರಿ ಜೀವನ ಕರ್ತಲೆ ... ದಾಯಾದಿ ದಯೆ ವೈರಿ ನಯ್ ಮೋಣು ಸಾ೦ಗ . "

ಕೃಷ್ಣ : " ಜಾಯ್ತ .. ಆತ್ತಯ್ಯಾ ..  ತೂಗೇ ಲೆ ಅಭಿಪ್ರಾಯಾ  ಮ್ಹಣ್ಕೆ ಜತ್ತಲೇ ..ಮೋಣು ಸಂಘುನ್ ವಾಸುದೇವು ಹಾಸ್ಲೊ . 

                       ಶ್ರೀ ಕೃಷ್ಣಾ ಕ ..  ಆತಿಥ್ಯಾಕ  ಅಪ್ಪೋನ್ ವೋರುಂಕ ಧುರ್ಯೋಧನಾಲೆ ಜನ , ವಿದುರಾಲೆ ಮಂದಿರಾ ಕ ಅಯಿಲೆ . ಕೃಷ್ಣಾ ನ ವಿದುರ ಮಂದಿರಾಂತ್ ರಾಬ್ಚ್ಯೆ ... ಧುರೋಧನಾಕ ಯಿಷ್ಠ ನಾ . ವಿಂಗಡ ಅಪ್ಪೋನ್ ಆತಿಥ್ಯ ಗೃಹಾ೦ತ್   ಕೃಷ್ಣಾ ಕ ಮಧುಪಾನ ...  ರಾಸ ಲೀಲಾ ಕ ಮಧುವತಿಯಾಂಕ ದೋವೋರ್ನ್ , ಮನ ತಂಢ ಕೊರ್ನ್ , ಕೃಷ್ಣಾ ಕ ತಾಗೆಲ್ ಬದಿನ ಕೊರ್ನ್ ಘೆವ್ಕಾ ಮೋಣು ... ಶಕುನಿಲೆ ಕುತಂತ್ರಾ ಕ ತಾಳ ಘಾಲ್ತಾ ಅಸ್ಸ " ಕೃಷ್ಣಾ ..! ತುಗ್ಗೆಲ್ ಆತಿಥ್ಯಾಕ ಸರ್ವ ಸಿದ್ಧತಾ ಕೊರ್ನ್ ಝಲ್ಲೆ . ಕುರು ವೀರ ತುಗ್ಗೆಲ್ ವಾಟ ಪೊಳೈತಾತಿ ... ಯೋ .. ವೊಚ್ಯಾ " ಮ್ಹಳ್ಳಲೋ ಧುರ್ಯೋಧನ್ ." ಕೃಷ್ಣಾಕ ಮಿಗೆಲೆ ಘರಾಂತುಚಿ ಜೆವಣಾ  ವ್ಯವಸ್ತಾ ಕೆಲ್ಲಾ " ಮ್ಹಳ್ಳಲೋ ವಿದುರ. 

ಕೃಷ್ಣ : " ವಯಿ ... ಧುರ್ಯೋಧನಾ ..! ಹಾಂವ ವಿದುರಾಲೆ  ಘರಾ೦ತ್  ಜೇವಣ ಕರ್ತಾ . ಹಾಂವ ಅತ್ತ ದ್ವಾರಕಾಚೆ ರಾಯು ಜಾವ್ನ್ ಯೇನಿ ... ಪಾಂಡವಾಂಗೆಲೆ ದೂತ ಜಾವ್ನ್ ಅಯಿಲಾ . "

ಧುರ್ಯೋಧನ : " ಮ್ಹಳ್ಳೇರಿ ... ! ಹಾಂವ ತೂಗೇ ಲ್  ಶತ್ರು ಮೋಣು  ಲೆಕ್ತ ವೇ ಕೃಷ್ಣಾ .. ? " 

ಕೃಷ್ಣ : " ತೂ ಕಷ್ಶಿ ಜಾವ್ಕಾ ಕೀ ತಶ್ಶ್ಯ್ ಲೇಕ ... " 

ಧುರ್ಯೋಧನ :" ಹಸ್ತಿನಾವತಿ ಚಕ್ರವರ್ತಿಲೆ ಆತಿಥ್ಯಾ  ಪೊಷಿ ... ಹ್ಯೇ ದಾಸಿ ಪುತ್ರ ... ವಿದುರಾಲೆ ಆತೀಥ್ಯ ಆತ್ಮೀಯ ಝಲ್ಲೆ ನವೇ ... ? " 

ವಿದುರ : " ಧುರ್ಯೋಧನಾ ... ! ಕೋಣ ದಾಸಿ ಪುತ್ರ ... ? "

ಧುರ್ಯೋಧನ : " ತೂ ... ಚೀ ... ಆನಿ ಕೋಣ .. ? "

ವಿದುರ :" ಪಿತಾ ಸಮಾನ ... ಮಕ್ಕಾ ... ದಾಸಿ ಪುತ್ರ ಮೋಣು ಹಂಗಶಿತಾ ... ? ತುಕ್ಕಾ ಕಸಲ್ಕಿ ವಾಯ್ಟ್ ದಿವಸ ಅಯಿಲೆಂತಿ . ಮೂರ್ಖ .. ! ಪ್ರಖ್ಯಾತ ಕುರು ವಂಶಾಂತ್ ಕುಲ ನಾಶಕ ಜಾವ್ನ್ ಜನ್ಮಾ ಅಯಿಲಾ ತೂ .. ತುಜ್ಯೇ  ತಸಲೆ ಅಹಂಕಾರಿ , ದುಷ್ಠಾ ಕ ದೇವಾಲಿ ನಿಮಿತ್ಯಯೀ ರಕ್ಕೂ ಸಾಧ್ಯ ನಾ " ...  ಘರ್ಲೆಗಿ ಅಶಿಲೆ ಧನುರ್ ಬಾಣ ಹತ್ತಾ ಘೇವ್ನ್ ... ಘರಾ ಅಂಗಣಾ ಬಾಯಿರಿ ಉಡಯಿಲೆ ...  " ಪೊಳೆ ಆಜಿ ದುಕೂನ್ ಹಾಂವ ಅಸ್ತ್ರ ಶಸ್ತ್ರ ಹತ್ತಾ೦ತು ಧರನಾ ... ಫಲ್ಲೇ ಚಿ ... ಹಾಂವ ಹಿಮಾಲಯಾ ಋಷ್ಯಾಶ್ರಮಾಕ ವತ್ತಾ . ಆನಿ ತೂ೦ವೆ ಮೆಲ್ಲೆ ನಂತರ ಹಸ್ತಿನಾವತಿಕ ಯೆತ್ತಾ . ಆನಿ ಮುಕಾರಿ ತುಗ್ಗೆಲ್ ತೊಂಡ  ದಕ್ಕೋನುಕ್ಕಾ" 

ಧುರ್ಯೋಧನ : ಧಿಕ್ ..! ಮಿಗೆಲ್ ಘರಾ ಶೀತ ಖಾವ್ನ್ ... ಮಕ್ಕಾಚಿ ವಾಯಿಟ್  ಲೆಕ್ತಾಲೊ ... ತುಝೇ ತಸಲೊ ಅಯೋಗ್ಯಾಕ ಅರಣ್ಯ ವಾಸ ಚಿ ಲಾಯೇಕ . ಸುಣೆಕ ಅಷ್ಶಿಲೆ ಕೃತಜ್ಞತಾ ಭಾವ ತುಕ್ಕಾ ನಾ ... " ಮೋಣು  ಸಂಘುನ್ ಘರಾ ಭಾಯಿರಿ ಗೆಲ್ಲೊ . ಹೇರದಿವಸು ಬ್ರಹ್ಮ್ಮಾ ಮುಹೂರ್ತಾಕ , ಕೃಷ್ಣಾ ಕ ವಂದನಾ ಕೊರ್ನ್ ವಿದುರ ಹಿಮಾಲಯಾ ದಿಕಾನ ಚ೦ಮ್ಕಲೋ . ಅಶ್ಶ್ಯ್ ಝತ್ತಾ  ಮೊಣು ಕೃಷ್ಣಾಕ  ಗೊತ್ತಶ್ಶ್ಯಿಲೆ . 

                         ತ್ಯೆತಾಂತು ... ಭೀಷ್ಮ , ಬಾಹ್ಲಿಕ , ಸೋಮದತ್ತ , ಭೂರಿಶ್ರವ , ಕುರುವಂಶ ಮಲಘಡೆ ಧುರ್ಯೋಧನಾ ಕ ಹಿತ ಸಾಂಗ್ತಾಶಿಲೆ .... 

ಭೀಷ್ಮ :" ಧುರ್ಯೋಧನ ಕುಮಾರಾ ..! ಸಂಧಾನ ಕೊರುಂಕ ಶ್ರೀ ಕೃಷ್ಣ ಅಯಿಲಾ . ಅನಾವಶ್ಯಕ ಜಾವ್ನ್ ತರ್ಕ ಕೊರ್ಚೆ ಸೋಣು ... ಪಾ೦ಡವಾಂಕ ತಾಂಕಾ ತಾಂಗೆಲೆ ರಾಜ್ಯ ದೀವ್ನ್ ... ಹ್ಯೇ ಯುದ್ಧಾ೦ತು ಜಾವ್ಚೆ ರಕ್ತಪಾತ ರಬ್ಬಾಯಿ ಕುಮಾರಾ .. ಕುರು ವಂಶಾ ಶ್ರೇಯಾ ಖತಿರಿ ... ಕುರು ಸಾಮ್ರಾಜ್ಯ ವಿಸ್ತಾರ ಖತಿರಿ .. ಮಿಗ್ಗೆಲೆ ಜೀವನ ಪೂರ್ತಿ ವ್ಯಯ ಕೆಲ್ಲಾ ... ಅತ್ತ ಮೊರ್ಚೆ ಸಮಯು ಆಯಿಲಾ .. ಹ್ಯೇ ವೆಳ್ಯೇರಿ , ಹ್ಯೇ ಮಂತಾರ್ಪಣಾರಿ ...  ಮನಾ ಶಾಂತಿ ದೂರ ಕೋರ್ನುಕ್ಕಾ . ಖಂಚೆ ವಂಶಾ ಶ್ರೇಯಾ ಖತಿರಿ .. ಇತ್ಲೆ ಕಷ್ಟ ಕಳ್ಳಾ ಕೀ .. ತ್ಯೆ ವಂಶಾ  ಚಿಗುರು ಆಜಿ ... ಮಿಗೆಲೆ ದೊಳೆ ಯೆದುರ .. ರಾಜ್ಯ ಕಾಂಕ್ಷ ಜಾವ್ನ್ ಬಾಬ್ಬ೦ವಡ ಯುದ್ಧಾಂತ್ ಲಡಾಯಿ ಕೊರ್ನ್ ನಾಶ ಕೊರುಂಕ ಭಾರ್ ಸರ್ಲೆ . ಮಕ್ಕ ಪೊಳೋಚ್ಯಾ ಜಾಯ್ನಾ ಕುಮಾರ ... ಮನೋ ಚಿಂತೆ ಕ ಕಾರಣ ಜಾವ್ನುಕ್ಕಾ ಧುರ್ಯೋಧನಾ ..! ಅಮ್ಮಿ ಸರ್ವ ಪಾಂಡವ ಪಕ್ಷ ಪಾತಿ  ಮೊಣು ಯೆದ್ದೋಳತಾಯ್ ತೂ  ಲೆಕ್ತಾ ಅಸ್ಸ .  ಏಕಾತ್ ವೇಳಾ ಅಮ್ಮಿ ಪಾಂಡವ ಪಕ್ಷಪಾತಿ ಜಾವ್ನ್ ಅಸ್ಲೆರಿ ... ದ್ರೋಣ , ಕೃಪಾಚಾರ್ಯ , ಅಶ್ವತ್ಥಾಮ , ತಾಂಗೆಲೆ ಪಕ್ಷಾ ಕ ಮೆಳ್ಳೇರಿ ....  ತಾಂಕಾ ರಬ್ಬಾಯಿತಲೆ ಕೋಣ ಅಸ್ಸ .. ? ಅಮ್ಮಿ ಪಾಂಡವ ಪಕ್ಷ ಪಾತಿ  ನಯ್ ಕುಮಾರಾ ... ಅಮ್ಮಿ ಕಸಲೆಯ್ ಸಂಗ್ಲಾರಿ , ತೂಗೇಲ್ ಚಾಂಗಾಯೆ ಖತಿರಿ ... ಬೊರೇ  ಪಣಾ ಖಾತಿರಿ  ಬಾಳಾ ... ತುಗ್ಗೆಲ್ ವೈರಿ ... ಮಹಾರಾಜ ವೈರಿ ... ಹ್ಯೇ  ಸಿಂಹಾಸನಾ ವೈರಿ  ಅಭಿಮಾನ ದೊವೊರ್ನ್ ..  ತೂ೦ವೆ ಕಸಲಿ  ಚೂಕಿ ಕೆಲ್ಲೆರಿಯೀ .. ಅಮ್ಮಿ ಸಹನ ಕೊರ್ನ್ ಘೆತಲಿ . ದ್ರೌಪದಿಲೆ ಮಾನ ಭಂಗ ಜತ್ತನಾಯಿ .. ತೂಗೆಲಿ ರಾಜ ಪದವಿಕ ಮಾನ್ಯತಾ ದೀವ್ನ್ , ಅಸಮರ್ಥ ಮಲಘಡೆ ಜಾವ್ನ್ , ಚರಿತ್ರ ಹೀನ ಝಲ್ಲೆಂತಿ . ನಕ್ಕಾ ...! ಧುರ್ಯೋಧನಾ ...! ಹ್ಯೇ ಮಹಾ ಯುದ್ಧ ನಕ್ಕಾ .. ಕುಮಾರಾ .. ! "

ಧುರ್ಯೋಧನ :" ಮಿಗೆಲೆ ಆಖೇ ರೀ ನಿರ್ಣಯ ...  ಹಾಂವ ಫಲ್ಲೆ  ಜಾವ್ಚೆ ಕುರು ಸಭೆ೦ತು ಸಾಂಗ್ತಾ ಪಿತಾಮಹಾ ... ! " ಮೋಣು  ಸಂಘುನ್ ಭೀಷ್ಮಾಲೆ ಪಯ್ಯಾರಿ ಪೋಣು ವಂದನ ಕೆಲ್ಲಿ . 

ಉಮಾಪತಿ