MAHABHARATHA Part - 40 ( Konkani Bhashentu )
ಕುಂತಿ - ಕರ್ಣಾಲಿ ಭೇಠಿ KUNTI - KARNAALI BHETHI
ಯುದ್ಧ ಮುಹೂರ್ತಾಕ , ಅನಿಕಯ್ ಪಾಂಚ ದಿವಸ ಬಾಕಿ ಅಸ್ಸ . ಕೌರವ , ಪಾಂಡವಾನಿ ತಾಂಗೆಲೆ ಸೈನ್ಯ ಕುರುಕ್ಷೇತ್ರ ರಣ ಭೂಮಿಕ ಹಾಡಚೆಂತು ತಲ್ಲೀನ ಜಾವ್ನ್ ಆಸ್ಸತಿ . ಭರಥ ಖಂಢಾ೦ತು ಖ೦ಯಿ ಪೋಳೋಯ್ಲ್ಯಾರಿಯಿ .. ಯುದ್ಧಾ ವಿಷಯು ಚರ್ಚೆ ಝತ್ತಾ ಅಸ್ಸ . ಪೂರಾ ಜನಾಲೆ ಮನಾಂತು ಪ್ರಾಣಭಯ ಮನಾ ರಿಗ್ಲಾ . ಬಂಧು ಪ್ರೀತಿ ಚಡ ಝತ್ತಾ ಅಸ್ಸ . ಮಾರ್ತಾಲೊ ಕೋಣ ಕೀ ... !! ವಂತಾಲೊ ಕೋಣ ಕೀ ... !!
ಕರ್ಣ , ಪ್ರತೀ ದಿವಸು .. ಪ್ರಾತಹ್ ಕಾಲಾರಿ ಗಂಗಾ ತೀರಾ ಯೇವ್ನು , ಸೂರ್ಯ ದೇವಾ ಕ ಅರ್ಘ್ಯ ಸಮರ್ಪಣ ಕೊರ್ನ್ , ಬಾಕೀ ಕಾಮಾಕ ವೊಚ್ಛೆ ತಗೆಲೆ ಅಭ್ಯಾಸು . ಆಜಿ ಕುಂತಿದೇವಿ ಗಂಗಾ ತೀರಾರಿ .. ಕರ್ಣಾಲೆ ಖತಿರಿ ರಕ್ಕುನ್ ರಬ್ಬಲೆ . ಕರ್ಣಾ ನ ಕುಂತಿಕ ಪೊಳೊನ್ ... " ಕುಂತಿ ರಾಜಮಾತೆಕ ... ಹೇ ರಾಧೇಯಾಲೆ ಪ್ರಣಾಮ " ಮೋಣು ಸಂಘುನ್ ತಿಗೆಲೆ ಚರಣಾ೦ಕ ಪಾ೦ಯ್ ಪೊಳ್ಳೋ . ಕೀರ್ತಿ ಮಾನ್ ಝಾ ... ಕರ್ಣ ಕುಮಾರಾ .. ! " ಮೋಣು ಕುಂತಿ ನ ಆಶೀರ್ವಾದ್ ಕೆಲ್ಲೊ . ಕರ್ಣ ಮುಕಾರಿ ವೋಚ್ಚಾ ಗೆಲ್ಲೊ ... " ಕ್ಷೇಮ ಜಾವ್ನ್ ಅಸ್ಸ ವೇ ? ಕರ್ಣಾ .. ? ಕುರು ಪಾಂಡವ ಮಧ್ಯ ಯುದ್ಧ ಅನಿವಾರ್ಯ ಝಲ್ಲೆ ಮೋಣು ಅಯಿಕಲಿ ... "
" ವಯಿ .. ! ಯೆವಚೆ ಅಮಾವಾಸ್ಯೆ ದಿವಸು ಯುದ್ಧ ಆರಂಭ ಝತ್ತಾ " ಮ್ಹಳ್ಳಲೊ ಕರ್ಣ .
ಕುಂತಿ : " ತಷ್ಶಿ ಝಲ್ಲೇರಿ ... ರಾಜ್ಯ ಸಿಂಹಾಸನಾ ಖತಿರಿ ಬಾಬ್ಬ೦ವಢ ಎಕ್ಲೇಕ - ಎಕ್ಲೆ ಮಾರ್ನ್ ಘೇವ್ನ್ ನರಸಂಹಾರ ಕರ್ತಲೆಂತಿ ... "
ಕರ್ಣ : " ದಾಯಾದಿ ಲೋಕಾನಿ ... ಅಶೀ೦ಚಿ ಯುದ್ಧ ಕೋರ್ನ್ , ರಾಜ ಶಾಸನ ಖತಿರಿ , ಯುದ್ಹ್ ಕೊರ್ಚೆ ... ಹೇ ನವೇ ಕಾಯ್ ನಯ್ .. ರಾಜ ಮಾತೆ .. !"
ಕುಂತಿ : " ಯೆಕ್ಕ ಅವಸೂಲೆ ಪೊಟ್ಟಾ ಝಲ್ಲೆಲೆ ಚೆರ್ಡು೦ವ ... ದಾಯಾದಿ ಜತ್ತಾಚಿ ವೇ .. ಕರ್ಣಾ .. ? "
ಕರ್ಣ : " ಕೌರವ .. ಗಾಂಧಾರಿ ದೇವೀಲೆ ಚೆರ್ಡು೦ವ ... ಪಾಂಡವ ತೂಗೆಲಿ ಚೆರ್ಡು೦ವೇ ದೇವಿ .. ? "
ಕುಂತಿ : " ಹಾಂವೆ ಸಾಂಗಚೆ ತೂಗೆಲೆ ವಿಷಯಾನ "
ಕರ್ಣ : " ಹಾಂವ ರಾಧೇಯ ... ರಾಧೇಲೆ ಪುತ್ರ .. ಸೂತ ಪುತ್ರ ... ಸೂತ ಕುಲಾಚೊ ಹಾಂವ .. ! "
ಕುಂತಿ : " ತೂ ಸೂತ ಕುಲಾಚೊ ನಯ್ ಕರ್ಣಾ ... ರಾಧಾ ದೇ ವಿಲೆ ಪುತ್ರ ನಯ್ ಕುಮಾರಾ .. "
ಕರ್ಣ : " ಕೋಣೆ ಸಂಘಿಲೇ ತುಕ್ಕಾ ... ರಾಜ ಮಾತೆ .. ? "
ಕುಂತಿ : " ಕೊಣಯ್ ಕಸಲೇಕ ಸಂಘುಕಾ ... ! ಹಾಂವಚಿ ಸಾಂಗ್ತಾ ಅಸ್ಸ "
ಕರ್ಣ : " ತೂ೦ವೇ ಸಂಘಚೇ ಫಟ್ಟಿ ... !! ಶುದ್ಧ ಫಟ್ಟಿ .. ! ರಾಜಮಾತೆ ... ಮಿಗೆ ಲಿ ಅಮ್ಮಾ ರಾಧಾದೇವಿ ... ಮಿಗ್ಗೆಲೆ ಆನು ಅಧಿರಥು .. ಹಾಂವ ಸೂತ ಕುಲಾಚೊ ... ಮಿಗ್ಗೆಲೆ ಜನ್ಮ ನಾ೦ವ ವೃಷಸೇನಾ .. ! ಮಕ್ಕಾ ಹೋಡು ಕೊರುಂಕ ಮಸ್ತ ಕಷ್ಟ ಕಾಣು ... ಪ್ರೀತ್ಯೇ ನ ವಿದ್ಯಾಭ್ಯಾಸು ಕರಯಿಲಾ ... ತಾಂಗೆಲೆ ಋಣ ಹೇ ಜೀವ ಮಾನಾಂತು ವಿಸೊರು ಝತ್ತಾ ವೇ ರಾಜಮಾತೆ .. ? "
ಕುಂತಿ : " ನಾ ಕುಮಾರಾ .. ! ತುಗೆಲೆ ಜನ್ಮ ದಾತು ತೋ ಸೂರ್ಯ ಭಗವಂತ್ ... ತುಕ್ಕಾ ಜನ್ಮ ದಿಲ್ಲೆಲಿ ... ಹಾಂವ .. !! ಕುಮಾರಾ .. ದುರ್ವಾಸ ಮಹರ್ಷಿನ ದಿಲ್ಲೆಲೆ ವರ - ಮಂತ್ರ ... ಫಲ ದಿತ್ತಾ ಕೀ ನಾ ಮೋಣು ಸಂಷಯು ಮನಾಂತ್ ಯೇವ್ನ್ ಸೂರ್ಯ ಮಂತ್ರ ಪಠಣ ಕೆಲ್ಲೆ . ಸೂರ್ಯ ದೇವು ಪ್ರತ್ಯಕ್ಷ ಜಾವ್ನ್ ಮಂತ್ರ ಫಲ
ಹತ್ತಾ೦ತು ದೀವ್ನ್ ಚಮ್ಕಾಲೊ ... ! ಹಾಂವ ವ್ಹರ್ಡಿಕ ಜಾಯ್ನಾ ನತ್ತಿಲಿ ... ಕನ್ನಿಕಾ ... ಕುಮಾರಿ .. ವ್ಹರ್ಡಿಕ ಜಾಯ್ನಾಶಿ ಚೆರ್ಡು ಜಲ್ಲೇರಿ ... ಸಮಾಜಾಂತು ಮರ್ಯಾದಿ ನಾ ... ಆಮ್ಗೆಲೆ ರಾಜ ಕುಟುಂಬ ... ಮರ್ಯಾದೆ ಪ್ರಶ್ನೋ ... ಮಿಗೆಲೆ ತೀ ಅವಸ್ಥಾ ಕೊಣಾಲೆ ಸಾಂಗ್ಚೆ .. ? ದೇವಾಲೆ ಮಾಫಿ ಮಗ್ಗುನ್ ಗಂಗೇ ಲೆ ಸೆರಗಾಂತ್ ತುಕ್ಕಾ ಘಲ್ಲೆ ... ಮಿಗೆಲಿ ಮನಾ ಪೀಡಾ .. ಸಂತಾಪು .. ಹೃದಯಾ ತಳ್ - ಮಳ್ ... , ಆವ್ಸೂಲೆ ಮಮತಾಗ್ನಿ .. ಮಕ್ಕಾ ಲಸ್ಸುನ್ ಘಲ್ಲೆ . ಮಿಗೆಲೆ ಸಂಕಟ ಕೊಣಾಲೆ ಸಾಂಗ್ತಾಲಿ .. ? ಕವಚ ಕುಂಡಲ ತುಗ್ಗೆಲ್ ಅಂಗಾರಿ .. ಜನ್ಮಾ ಯೆತ್ತನಾ ಚಿ ಸೂರ್ಯ ದೇವಾನಾ ದಿಲ್ಲೆಲೆ ಅಭಯ . ರಾಜಕುಲ ಮರ್ಯೆದೆಕ ಭೀವ್ನ್ , ಸಮಾಜಾಕ ಭೀವ್ನ್ ... ಗಂಗೆಂತು ಸೊಡ್ತಾನಾ ... ಕರ್ಣ ಕುಮಾರಾ .. ! ಮಿಗೆಲೆ ಅಂತ ಕತ್ತೋರ್ನ್ ಅಯಿಲೆ ... ಇತ್ಲೆ ನಿರ್ದಯಿ ಜಾವ್ನ್ .. ಜನ್ಮ ದಿಲ್ಲೆಲಿ ಆವ್ಸು .. ಇತ್ಲೆ ಚಂದ ಚೆರಡಾಕ ... ಗರ್ಭಾ ಏಕ ಭಾಗ ... ದಿವಿಶಿ ಮಾರ್ತಾ ಅಸ್ಸ ಮೂ ... ! ಮೋಣು ... ಹೃದಯ ಕರ್ಗುನ್ ವೊಚ್ಛೆ ತಿತ್ಲೆ ತಾ೦ಯ್ ರಳ್ಳಿ .. ದೇವಾಕ ಮಿಗೆಲ್ ವೈರಿ ಕರುಣ ಆಯಿಲ್ ಶೀ ದಿಸ್ತಾ .. ದೂರ ದುಕೂನ್ ಏಕ ರುಕ್ಕಾ ಪೇಟಿ ಹೋಳ್ನ್ ಅಯ್ಯ್ಲಲಿ . ತ್ಯೆ ಪೆಟ್ಟೆ೦ತ್ ಕಮಲಾ ಪನ್ನ೦ , ತಣ ಘಾಲ್ನ್ ದೇವಾಲೆ ಮಾಗಣೆ ಕೊರ್ನ್ ತ್ಯಾಗ ಕೆಲ್ಲೆ ಕುಮಾರಾ .. !! ದ್ರೋಣಾಚಾರ್ಯ ... ತಾಗೆಲ್ ಶಿಷ್ಯಾ೦ಗೆಲೆ ಶಸ್ತ್ರ ಪರೀಕ್ಷಾ ಕರ್ತನಾ .. ತುಕ್ಕ ಪೊಳೊನ್ .. ತೂ ಮಿಗೆ ಲೊ ಪೂತು ಮೋಣು ಗುರ್ತು ಮೆಳ್ಳೆ . ತೂ ಕೋಣ್ ಮೋಣು ಕಳ್ಳೆ .. ತೂ ಮಿಗೆಲೆ ಪೂತು ಮೋಣು ಸಂಘುಕ ತೇದನಾಯ್ .. ಧೈರ್ಯ ಯೇನಿ .. ! ಮಿಗೆಲಿ ಪರಿಸ್ಥಿತಿ ತಸಲಿ ಬಳಾ ... ! ಹಾಂವೆ ಕೆಲ್ಲೆಲಿ ಚೂಕಿ ... ಅಸಲಿ ಚೂಕಿ ಪ್ರಪಂಚಾ೦ತು ಅನಿ ಕೊಣಯ್ ಕೋರೂ ನಜ್ಜ ... ಇತ್ಲೆ ವರುಷ೦ ಹ್ಯೇ ಗೋಪ್ಯ ವಿಚಾರು .. ಮಿಗೆಲೆ ಅಂತ ಕತ್ತರ್ತಶಿಲೆ ಬಾಳಾ .. ! ಆಜಿ ತುಗೆಲೆ ಜನ್ಮರಹಸ್ಯ ಸಂಘುನ್ ಮಿಗೆಲೆ ಮನ ಹೃದಯ ಶಾಂತ ಕೊರ್ನ್ ಘೇತ್ತಾ " ಎಕ್ಕಡೆ ಪಶ್ಚಾತ್ತಾಪು .. ಲಜ್ಜಿ .. ! ಕೆಲ್ಲೆಲೆ ಫುಳ್ಳೆ ಪಾಪ ಪುತ್ತಾಲೆ ಎದ್ರಾಕ ಸಂಘುನ್ ಕುಂತಿಲೆ ಮನ ಛಿಧ್ರ ಝಲ್ಲೆ ... ದೋಳೆ ಉದ್ದಾಕ ಧರಾ೦ಧರಿ ದೇ೦ವ್ಲೆ .
ಕುಂತಿಲೆ ದೊಳೆ ಉದ್ದಾ ಕ ... ಪಶ್ಚಾತ್ತಾಪ ಪಾವ್ನ್ , ನಿರ್ಮಲ ಮೂರ್ತಿ ಶೀ ರಬ್ಬಿಲಿ ಕುಂತಿ ದೇವಿ . ಕರ್ಣಾ ಕ ' ದೇಹೀ ' ಮ್ಹಳ್ಳೆ ಮ್ಹಣ್ಕೆ ದಿಸ್ಲೆ ಕರ್ಣಾಕ . ತಾಗೆಲ್ ಮನ ಕರ್ಗಲೆ ...
ಕರ್ಣಾ : " ಚೂಕಿ ಕೆಲ್ಲೆಲಿ ತೂ೦ವೆ .. !ಶಿಕ್ಷ ಅನುಭವ ಕೆಲ್ಲೆಲೋ ಹಾಂವ ! ಕಸಲೆಕ ದೇವಿ .. ? ತೆದಾನಾಚಿ ... ಮಿಗೆಲೆ ಗಳೋ ತೀರ್ಪುನ್ ದಿವಿಶಿ ಮಾರ್ನಿ .. ? ಸೂತ ಕುಲಾಚೊ ಮ್ಹಳ್ಳೆಲೆ ಯೆಕ್ಕ ಕಾರಣಾ ನಿಮಿತ್ಯ .. ಮಿಗೆಲೆ ಜೀವನಾಂತು ಮಸ್ತ ಸಕ್ಕಡ ವಿಷಯು ಕಾಣ್ ಘೆತ್ಲೆ .. ಹಾಂವ ಕಿತ್ಲೆ ಕಷ್ಟ ಭೋಗ್ಲಾ ... ಅವಮಾನ ಪಾವ್ಲಾ .. ಮ್ಹಳ್ಳೆಲೆ ತುಕ್ಕಾ ಕಲ್ಪನಾ ಕೋರು೦ ತಾ೦ಯ್ ಜಾಯ್ನಾ ಮಾತೆ .. ! ಬ್ರಾಹ್ಮಣ ಮೋಣು ಸಂಘುನ್ ಪರಶುರಾಮಾ ಲಗ್ಗಿ ಧನುರ್ ವಿದ್ಯಾ ಶಿಕ್ಲೊ . ಫಟ್ಟಿ ಉಲ್ಲಯಿಲೆ ಕಾರಣ .. ಗುರುದೇವಾಲೆ ಶ್ರಾಪ ಲಾಗಲೊ . ದ್ರೋಣಾಚಾರ್ಯನ ಮಕ್ಕ ಕ್ಷತ್ರಿಯ ನಯ್ ಮೋಣು ಸಂಘುನ್ ತಿರಸ್ಕಾರ ಕೆಲ್ಲೆ .. " ಇತ್ಲೆ ಸಾಂಗ್ತಾ ನಾ ಕರ್ಣಾಲೇ
ದೋ ಳೆ ಭೋರ್ನ್ ಆಯಿಲೆ .
ಕುಂತಿ : " ಸುರ್ವೇ ಪಂಕ್ತಾ ... ಸಹಜ ಜಾವ್ನ್ ಅಶಿಲೆ ಕವಚ ಕುಂಡಲ ಅಸ್ತ್ರ ವಿದ್ಯಾ ಪರೀಕ್ಷೆ ವೆಳ್ಯ್ಯೇರಿ ತುಕ್ಕ ' ಕುಲ ಹೀನ ' ಮೋಣು ಸಾಂಘುನ್ ದೂರ ಕರ್ತಾನಾ ... ಮಕ್ಕ ಮನಾಂತು ಮಸ್ತ ಸಂಕಟ ಝಲ್ಲೆ . ಹಾಂವೆ ಅನುಭವ ಕೆಲ್ಲೆಲೆ ನರಕ ಯಾತನಾ ,ಮನಾ ಸಂಕಟ ಕೊಣಾಲೆ ಸಾಂಗ್ಚೆ .. ? ತೂ ಎಕ್ಲಿ ಬಾಯ್ಲ್ ಮನಿಷಿ ಜಾವ್ನು ಜನ್ಮಾ ಆಯ್ಯಿಲೆ ಝಲ್ಲೆರಿ ತುಕ್ಕಾ ಕಳ್ತಾಶಿಲೆ ... ಹಾಂವ ಜನ್ಮಾ ಆಯ್ಯಿಲೀಚಿ .. ಕಷ್ಠ ಬೊಗ್ಗು೦ಕ ದಿಸ್ತಾ .. ! ಶೂರ ಸೇನಾಲಿ ಪುತ್ರಿ ಜಾವ್ನ್ ಜನ್ಮಾ ಯೇವ್ನ್ , ಭೋಜ ರಾಜಾಲಿ ಘರ್ಲೆ.. ಹೊಡಿ ಝಲ್ಲಿ . ಕುಮಾರಿ ಅವಸ್ಥೆರಿ ತುಕ್ಕಾ ಜನ್ಮು ದೀವ್ನ್ ... ತುಗೆಲೆ ಆವ್ಸು ಪಣೆ ಕ .. ಚೆರ್ಡು ತುಗ್ಗೆಲ್ ಪ್ರೀತಿ ಖೆಳಾಕ ವಂಚಿತ ಝಲ್ಲಿ . ಪಾಂಡುರಾಯಾ ಕ ವ್ಹರ್ಡಿಕ ಕೊರ್ನ್ ... ಸಾಂಮ್ಸಾರಿಕಾ ಸೂಖ , ರಾಜ ಭೋಗಾ ಕ ದೂರ ಜಾವ್ನ್ ಅರಣ್ಯ ವಾಸ ಕೆಲ್ಲೆ . ಪತಿ ದೇವಾಕ ಕಾಣ್ ಘೇವ್ನ್ .. ಅತ್ತ ಚೆರ್ಡು೦ವ ದುಕೂನ್ ದೂರ ಜಾವ್ನ್ , ದಾಯಾದಿ ಲೋಕಾಲೆ ಘರಾಂತು ಸೂಣೆಶೀ ... ಪೋಣು ಅಸ್ಸ . ಹೇ ಮಂಥಾರೆ ಪಣಾರಿ ಅನಿ ಕಸ್ - ಕಸಲೆ ಕಷ್ಠ ಬೊಗ್ಗುಕಾಕೀ .. ಕುಮಾರ !. ಕುಂತಿನನ್ ರೋಡಚೆ ಪೊಳೊನ್ , ಕರ್ಣಾಕ ಸಹನಾ ಕೋರು ಜಾಯ್ನಿ ... ಜ್ವಾಲಾ ಮುಖಿ ಹಜಾರ ಯೇಕ್ಕ ಪೊಟಿ ಉಠಾನ್ ಸ್ಪೋಠ ಝಲ್ಲೆ ಮ್ಹಣ್ಕೆ ಅನುಭವು ಝಲ್ಲೋ ... ಯೆಕ್ಲಿ ಬಾಯ್ಲ ಮನಿಷಿ .. ಯೇಕ್ ದರ್ಲೆ ಮನ್ಶ್ಯಾ ಲಗ್ಗಿ ಯೆವ್ನ್ ಹಾಂವ ತುಗೇಲಿ ಆವ್ಸು ಮೋಣು ದಕ್ಕೊನ್ ಘೆತ್ತಲಿ ಕೀ ... ಕೆಲ್ಲೆಲಿ
ಚುಕ್ಕೇ ಕ ಪಶ್ಚಾತ್ತಾ ಪ ಪಾವ್ನ್ ಅಶಿ ಪ್ರಲಾಪ ಕರ್ತಲಿ ಕೀ .... ! " ಅಮ್ಮಾ" ಮೋಣು ಕುಂತಿಲೆ ಪಯ್ಯಾರಿಪಳ್ಳೊ. ಪಾದ ಸ್ಪರ್ಶ ಕೊರ್ನ್ , ಧೂಳಿ ಮತ್ತೇರಿ ಲಾವ್ನ್ ಘೆತ್ಲೆ . ಅಂತರಂಗಾ ದುಕೂನ್ .. ಎಕ್ಕಯೇಕ ಶಬ್ದ ಯೇನಿ ... ಭರ್ಲೆಲೆ ಉತ್ಕಾ ತಳೆಶೆ .. ಪಾಳ ನತ್ತಿಲೆ ಪ್ರಶಾಂತ ಸಮುದ್ರ್ ಸೊ ಝಲ್ಲೋ ಕರ್ಣ . " ಕುಮಾರಾ "... " ಕರ್ಣಾ" ... ! ಚೆರಡಾ ...ರತ್ನಾ .. !" ಮೋಣು ಸಂಘುನ್ .. ಲಗ್ಗಿ ಆಯ್ಯಿಲೆ ಕರ್ಣಾಕ ಫೊಟೊನ್ ಧೋರ್ನ್ ತಾಗೆಲ್ ಮತ್ತೆ ಝ೦ಗೀರಿ ದೊವೊರ್ನ್, ಮತ್ತೆ ಕೇಸು ಪ್ರೀತ್ಯೇನ ಸ್ಪರ್ಶ ಕೆಲ್ಲೆ ... ಆವ್ಸು ಚೆರ್ಡಾಲಿ ಮಮತಾ , ಪ್ರೀತಿ ಅನುಭೂತಿ ಕೆಲ್ಲಿ ದೊಗ್ಗಾನಿ .ಅಂತರಂಗಾ ಪಾಶ ಕತ್ತೋ ರ್ನ ಆಯಿಲೆ .. ಕರ್ಣಾ ಲೇ ದೋಳೆ ಬೋರ್ನ್ ಅಯಿಲೆ " ಶತ ಶತ ಜನ್ಮಾಂತ ತುಗೆಲಿ ಆವ್ಸು ಜಾವ್ನ್ ಯೆತ್ತಾ ಕುಮಾರಾ ಹೇಂಚಿ ಮಿಗೆಲೆ ಪಾಪಾಕ ಪ್ರಾಯಶ್ಚಿತ್ತ ... ಹೇ ಜನ್ಮಾ೦ತು ಪಾಪ ಮೋಕ್ಶಾಕ ತಪಸ್ಯ ಕರತಾ" ...ಕುಂತಿ ಲೆ ದೋ ಳೆ ಉತ್ಕಾ ಥೆ೦ಭೆ ಕರ್ಣಾಲೆ ನಿಡ್ಲಾರಿ ಕಪೋಲಾರಿ ಪೊಳ್ಳೇ ಆಶೀರ್ವಾದಾ ರೂಪಾರಿ . ಇತ್ಲೆ ವರುಷ ಆವ್ಸೂಲೆ ಪ್ರೀತಿ ಪೊಳೈ ನಾ ನತ್ತಿಲೆ ಕರ್ಣಾಲೆ ಮನ , ಹೃದಯ ... ಪಾವ್ಸು ಪೊಳ್ಳೆಲೆ ಬಂಜರ ಭೂಯಿಂಚೆ ಮ್ಹಣ್ಕೆ ... ಶಾಂತ ಝಲ್ಲೆ .. ತಂಪುಶೀತಲ ಝಲ್ಲೆ .ಕಿತ್ಲೆ ವೇಳು ಕರ್ಣ , ಕುಂತಿಲೆ ಹತ್ತಾ ಬಂಧನಾ ಅಶಿಲೋ ಕೀ .. ! ಪೋಳಯಿಲೊ ಸೂರ್ಯ ದೇವು ಮಾತ್ರ .. ಸಂತೋಷು ಪಾವ್ನ್ ಮೊಡಾಂತ್ ನಿಪ್ಲೋ . ಅಂತರಾಳಾ ಅಂತಾ .. ಅನುತಾಪಾ ಮೌನ ಮಮತಾ ... ಕರ್ಣಾಕ ಆನಿ ಕುಂತಿಕ ಮಾತ್ರ ಕೊಳ್ನಸ್ತಾಲೆ .... !
ಕುಂತಿ : " ಕುಮಾರಾ ..! ಯುದ್ಧ ರಂಗಾಂತು ತೂ೦ವೆ ತುಗ್ಗೆಲ್ ಭಂವ್ಢ ಪಾಂಡವಾ ವೊಟ್ಟು ಯುದ್ಧ ಕೋರ್ಕಾಚಿ ಝತ್ತ ವೇ .. ? "
ಕರ್ಣ : " ವಯ್ ಅಮ್ಮಾ .. ಕುರುಕ್ಷೇತ್ರ ಯುದ್ಧ ಚಿ ... ಭಂವ್ ಢಾ ಮಧ್ಯ ಜಾವಚೆ ಯುದ್ಧ .. !
ಕುಂತಿ : " ನಕ್ಕಾ ಕರ್ಣಾ ... ! ಯೆದೊಳ್ ತಾ೦ಯ್ ಝಲ್ಲೆ ತೂ ವಿಸೋರ್ನ್ ಸೋಡಿ .. ! ತೂ ಪಾಂಡವಾಲೆ ವೊಟ್ಟು ಮೇಳ .. ತಾನ್ನಿ ತುಕ್ಕಾ ಪ್ರಾಣಾ ಪೋಷಿ ಚಡ ಪ್ರೀತಿ ಕರ್ತಾತಿ. ಧರ್ಮ ರಾಯಾಕ ಸಂಘುನ್ ಹಾಂವ .. ತೂ ಪಾಂಡು ಪುತ್ರ , ಕ್ಷತ್ರಿಯ ಮೋಣು ಪ್ರಕಟ ಕರ್ತಾ . ಕೌರವಾಂಕ .. ಪಾಂಡವ ದಾಯಾದಿ .. ತೂ ಪಾಂಡವಾಂಗೆ ಲೆ ಮಲ್ಘಡೊಭಾವು. ಯೆಕ್ಕ ಆವ್ಸೂಲೆ ಚೆರ್ಡು೦ವಾನಿ ಖಡ್ಘ ತಾಂಡೂನ್ಎಕ್ಲೇ ವೈರಿ ಅನ್ನೆಕ್ಲೇನ ಯುದ್ಧ ಕೋರು ನಜ್ಜ ಕುಮಾರಾ ... ! ದಯಾ ದವೋರ್ನ್.. ತೂ ಪಾಂಡವಾ ಲೆ ವೊಟ್ಟು ಮೇಳ . ತುಮ್ಮಿ ಸಹ ಜನ ವೊಟ್ಟು ಝಲ್ಲೇರಿ... ದೇವಾ ಲೋಕಾ ದೇವೇಂದ್ರ ತಾ೦ಯ್ ಭಿತ್ತಲೊ
ಕರ್ಣ: " ಅಮ್ಮಾ .. ! ಖಂಚೆ ಜನ್ಮಾ ಋಣಾನು ಬಂಧ ಕೀ ... ! ಹಾಂವೆ ಕೆಲ್ಲೆಲೆ ಕರ್ಮಾ ಫಲ ಕೀ ... ಮಕ್ಕಾ ಕಳ್ ನಾ ... ತೂ೦ವೆ ಮಕ್ಕಾ ಜನ್ಮು ದಿಲ್ಲಾ ವಯ್ . ಜನ್ಮಾ ಯೇವ್ನ್ ದೋಳೆ ಸೊಡ್ಚೆ ಪೊಶಿ ಫುಡೆಚಿ .. ಗಂಗೆಂತು ಸೊಳ್ಳಾ . ಮಿಗೆಲೆ ಜನ್ಮು ವಿಧಿ ವಶ ಜಾವ್ನ್ ... ಪುಣ್ಯಾನ .. ರಾಧೇಲೆ ಪ್ರೀತಿ ಸೇರಗಾಂತು ಪಾವಲೋ . ಖಂಚೆ ಜನ್ಮಾ ಋಣ ಕೀ .. ! ರಾಧೇ ಮಾತೇನ .. ದೇವಾನಾ ದಿಲ್ಲೆಲೆ ವರು ಮೋಣು ಲೆಕ್ಕುನ್ ... ಮಕ್ಕಾ ಸ್ವಂತ ಪುತ್ತಾ ಮ್ಹಣ್ಕೆ ಪ್ರೀತೀನ ಪೋಶಿಲಾ . ಹೇ ಲೊಕಾಕ ಹಾಂವ ರಾಧಾ ಪುತ್ರ ಜಾವ್ನ್ , ರಾಧೆಯ ಜಾವ್ನ್ ಗೊತ್ತಸ್ಸ . ಸೂತ ಪುತ್ರ ಮೋಣುಚಿ ಹೊಡು ಝಲ್ಲಾ .. ಸೂತ ಪುತ್ರ ಝಾವ್ನ್ ಜೀವನ ಕರ್ತಾ ಅಸ್ಸ . ಸೂತ ಪುತ್ರ ಜಾವ್ನುಚಿ ಮಿಗೆಲೆ ಅಂತ್ಯ ಕಾಲ ಪೊಳೈತಾ .... ಧುರ್ಯೋಧನು ... ಪಾಂಡವಾಂಗೆಲ್ ದೃಷ್ಠಿ೦ತು ವಾಯಿಟು . ತೋ .. ಮಕ್ಕಾ .. ಮಿಗ್ಗೆಲೆ ದೃಷ್ಠಿ೦ತ್ ಚಾ೦ಗ್ ಮನುಷ್ಯ . ಪಾಂಡವ ತುಕ್ಕಾ ಹಸ್ತಿನಾವತಿ೦ತ್ ಸೋಣು ಅರಣ್ಯ ವಾಸಾಕ ಚ೦ಮ್ಕಲೀಂತಿ . ಧುರ್ಯೋಧನಾನ ತುಕ್ಕಾ .. ಸ್ವಂತ ಆವ್ಸೂಮ್ಹಣ್ಕೆ ಪೊಳೋನ್ ಘೆತಲಾ . ಹಾಂವೆ ಪಾಂಡವ ಪಕ್ಷಾಕ ಮೆಳ್ಚೆ ಸೋಡಿ .. ಹಾಂವ ಕುಂತಿ ಪುತ್ರ ಮೋಣು ಕಳ್ಳೇರಿ ಪೂರೋ ... ತೋ ಖಂಯ್ ಪುಣಿ ಆತ್ಮ ಹತ್ಯಾ ಕೊರ್ನ್ ಘೆತ್ತಲೊ . ತಿತ್ಲೆ ತಾಕ್ಕಾ ಮಿಗೆಲೆ ವೈರಿ ವಿಶ್ವಾಸು ಅಸ್ಸ . ತಾಣೆ , ಮಕ್ಕಾ ಮಲಘಡೊ ಭಾವಾ ಮ್ಹಣ್ಕೆ ಮರ್ಯಾದಿ ದಿಲ್ಲಾ . ಶತ ಕೌರವ ಮಲಘಡೊ ಭಾವು ಮೊಣು ಮರ್ಯಾದಿ ಆದರ ಕರ್ತಾತಿ . ಅಂಗ ದೇಶಾ ರಾಯು ಕೊರ್ನ್ , ಹಸ್ತಿನಾವತಿ ರಾಜ ಸೂತ್ರ ಮಿಗೆಲೆ ಹತ್ತಾ೦ತು ದಿಲ್ಲಾ . ಶತ ಕೌರವಾನಿ ದಿಲ್ಲೆಲೆ ಮರ್ಯಾದಿ ಮ್ಹಣ್ಕೆ ... ಮಕ್ಕಾ ಜೀವಮಾನಾಂತು ಅನಿ ಖಂಯೀ ಮೆಳ್ಚಿನಾ . ಮಿಗೆಲೆ ಅಂಗಾ ರಕ್ತಾ ಕಣ - ಕಣ ತಾಣೆ ಘಲ್ಲೆಲೆ ಶಿತ್ತಾ ಭಿಕ್ಷೇನ ಹೊಡ ಝಲ್ಲಾ . ಯುದ್ಧಾ ವೆಳ್ಯೇರಿ ಧುರ್ಯೋಧನಾ ಸೋಣು ; ಪಾಂಡವ ಮಲಘಡೊ ಜಾಯ್ನಾ ... ಅಮ್ಮಾ .. ! ಹ್ಯೋ ಕರ್ಣ ದುರಾದೃಷ್ಟ ಆಸ್ಚ್ಯಾ ಪೂರೊ ... ಝಲ್ಲ್ಯಾರಿ , ದುರ್ಮಾರ್ಗಿ ನಯ್ . ಮಕ್ಕಾಯ್ ಪ್ರಾಯ ಝಲ್ಲೆ . ಜೀವನಾಚೆ ಆಖೇರಿ ಕ್ಷಣಾರಿ ... ಚರಿತ್ರ ಹೀನ ಜಾಯ್ನಾ ... ಮಕ್ಕ ಕ್ಷಮಾ ಕರಿ .. ಅಮ್ಮಾ ..! ತೂ೦ವೆ ಗಂಗಾ ನಯ್೦ತ್ ಸೊಡ್ತಾನಾ ತುಗ್ಗೆಲ್ ಮಲಘಡೊ ಪೂತು ಮೆಲ್ಲೊ ಮೋಣು ಲೇಕ .. ! " ಮ್ಹಳ್ಳಲೊ ಕರ್ಣ .
ಕುಂತಿ : " ಕುಮಾರ ಕರ್ಣಾ .. ! ದಾನ ವೀರ ಕರ್ಣಾ .. ! ಕೊಣಯಿ ದೇಹೀ ಮೋಣು ಅಯ್ಲ್ಯಾರಿ ... ತಾಂಕಾ ದಾನ ದೀವ್ನ್ ಸನ್ಮಾನ ಕರ್ತಾಲೊ ದಯಾನಿಧಿ ತೂ ... ತುಕ್ಕಾ ಜನ್ಮ ದಿಲ್ಲೆಲಿ ಆವ್ಸು ಹಾಂವ .. ! ಮಕ್ಕಾ ಪುತ್ರ ಭಿಕ್ಷಾ ದೀ ... ಮಿಗೆಲೆ ಚೆರ್ಡುವಾಂಕ ವ೦ಚಯಿ ... ತುಗ್ಗೆಲ್ ಪ್ರತಾಪಾಕ , ಕೋಪಾಕ , ಕೋಣಾಕಯಿ ದಿವಿಶಿ ಮಾರ್ನುಕ್ಕಾ ಅನ್ನಾ ... ! " ಮೋಣು ಸಂಘುನ್ ತಿಗೆಲೆ ಸೆರಗ ಧೋರ್ನ್ ಯಾಚನ ಕೆಲ್ಲಿ . ಕಸಲೆ ಕೊರ್ಚೆ ಮೋಣು ಕರ್ಣಾಕ ಕಳ್ನಿ . ರಗತ ಮಾಸ ವಾಂಟುನ್ ಘೆತ್ತಿಲಿ ಆಮ್ಮಾ ... ಮಸ್ತ ಕಾಳ ನಂತರ ' ಪುತ್ತಾ ' ಮೋಣು ಸಂಘುನ್ ರಡ್ತಾ ಅಸ್ಸ . ಖಂಚೇಯ್ ಪೂತು ಹ್ಯೇ ವೆಳ್ಯೇರಿ ವಿಚಲಿತ ಝತ್ತಾ . ತಶೀ೦ಚಿ ಆಜಿ ಕರ್ಣಾ ಮಾತೃ ಮಮಕಾರಾ ಕ ಬಂಧಿ ಝಲ್ಲಾ .
ಕರ್ಣ : " ಅಮ್ಮಾ .. ! ಮಿಗೆಲೆ ದಿವಸ ಲಗ್ಗಿ ಯೆತ್ತಾ ಅಸ್ಸ . ಯುದ್ಧ ಏಕ ನೆವನ ! ಹೇ ವೇಳಾ .. ಪುತ್ರ ಭಿಕ್ಷಾ ಮಾಗ್ತ ಮೂ ... ತುಕ್ಕಾ ನಿರಾಶ ಕರ್ನಾ . ಪಾಂಡವಾಂತು ... ಅರ್ಜುನ್ ಮಾತ್ರ ಮಿಗೆಲೆ ಪ್ರತಿಸ್ಪರ್ಧಿ ... ಬಾಕಿ ಚಾರಿ ಜನಾ೦ಕ ಮಿಗೆಲೆ ಹತ್ತಾನಿ ಮಾರ್ನಾ . ಧರ್ಮಜ , ಭೀಮ , ನಕುಲ , ಸಹದೇವ ಹನ್ನಿ ಚಾರ್ ಜನಾ೦ಕ ಪ್ರಾಣ ದಾನ ಕರ್ತಾ ... ಸಂತೋಷಾರಿ ಘರಾ ವಸ . "
ಕುಂತಿ : " ಕರ್ಣಾ .. ! ತುಂವೇ ಮಕ್ಕ ಏಕು ವರು ದಿಲ್ಲೆ ... ಹಾಂವ ಆನ್ನೇಕ ವರು ತುಗೆಲೆ ನಿ೦ಮಗಿತಾ . ತುಂವೆ ಅರ್ಜುನಾಲೆ ವೊಟ್ಟು ಯುದ್ಧ ಕರ್ತನಾ , ಏಕ್ ಪೊಟಿ ಪ್ರಯೋಗ ಕೆಲ್ಲೆಲೆ ಅಸ್ತ್ರ ಆನ್ನೇಕ ಪೋಟಿ ಪ್ರಯೋಗ ಕರ್ನಾ ಮೋಣು ಆಣ ಭಾಸ ಘಾಲಿ . ಮಕ್ಕ ತೆದನಾ ಮನಾ ಶಾಂತಿ ಮೆಳ್ತಾ ಕುಮಾರಾ .. ! " ಕರ್ಣ ಹಾಸಲೋ
ಕರ್ಣ : " ಪಾಂಡವಾಂಗೆಲೆ ವಯಿರಿ ತುಕ್ಕ ಕಿತ್ಲಿ ಪ್ರೀತಿ ಅಸ್ಸ ಮೋಣು ಕಳ್ಳೆ . ಜಾಯ್ತ ಏಕ ಪೋಟಿ ಪ್ರಯೋಗ ಕೆಲ್ಲೆಲೆ ಅಸ್ತ್ರ ... ಆನ್ನೇಕ ಪೋಟಿ ಪ್ರಯೋಗ ಕರ್ನಾಶೀ ಅರ್ಜುನಾಲೆ ವೊಟ್ಟು ಯುದ್ಧ ಕರ್ತಾ . ಸಂತೋಷು ಝಲ್ಲೋ ವೇ ಅಮ್ಮಾ .. ?
ಕುಂತಿ : " ಕುಮಾರ ಕರ್ಣಾ ! ತು ಗೆ ಲೆ ಆತ್ಮ ಶಕ್ತಿ .. ಅಚಲ ಝವೋ ... ದಾನ ವೀರ ತುಗೆಲೆ ನಾ೦ವ ಅಜರಾಮರ ಜಾವ್ವೋ . ತುಝೇ ತಸಲೆ ಪುತ್ರಾಕ ಜನ್ಮದಿಲ್ಲೆಲಿ ಆವ್ಸುಲೆ ... ಮಿಗೆಲೆಅಂತಾ ಶಾಂತಿ ,ಆನಂದ , ಆಶೀರ್ವಾದು , ತುಕ್ಕಾ ಮೇಳೋ . ತುಗೆಲೆ ನಾ೦ವ ಚರಿತ್ರೆ೦ತು ಸುವರ್ಣ ಅಕ್ಷರಾಂತು ಬೊರೋನ್ ಅಸ್ಸೊ . ಕೀರ್ತಿ ಮಾನ್ ಭವ ಕುಮಾರಾ ... ! " ಮೋಣು ಕುಂತಿ ನ ಹೃತ್ಪೂರ್ವಕ ಆಶೀರ್ವಾದು ಕೆಲ್ಲೊ . ಹೀ ಆವ್ಸು ಪುತ್ತಾಲಿ ಭೇಠಿ .. ಏಕ ಸುವರ್ಣ ಅಧ್ಯಾಯು ಝತ್ತಾ . ಸೂತ್ರ ಧಾರಿ ಕೃಷ್ಣಾ ಲೇ ಮನಾಂತು ಅಶಿಲೆ ತಶಿಂಚಿ ಜತ್ತಾ .
ಉಮಾಪತಿ
