MAHABHARATHA – 17 ( Konkani Bhashentu )
SAUGANDHIKA PUSHPA
ಲೋಮಶ ಮಹರ್ಷಿ ನ ದಿಲ್ಲೆಲೆ ಮಾರ್ಗ ದರ್ಶನಾ ಪ್ರಕಾರ .. ಧರ್ಮಜ , ಭೀಮ , ನಕುಲ ಸಹದೇವ , ದ್ರೌಪದಿಲೆ ವೊಟ್ಟು ಅನಿ ದೌಮ್ಯ , ಪುರೋಹಿತ ಬ್ರಾಹಮಣ
ಸಮುದಾಯ ವೊಟ್ಟು .. ಪಾಂಡವ ರನ್ನಾ೦ತು ಪ್ರವಾಸ ಕರ್ತಾ ಅಶಿಲೀಂತಿ . ವಟ್ಟೇರಿ ಲೋಮಶ ಮಹರ್ಷಿ ... ತೀರ್ಥ ಕ್ಷೇತ್ರಾಚೆ ವಿಶೇಷತಾ , ದೇವಸ್ಥಾನ ತಜ್ಜೆ ಪ್ರಾಚ್ಯ
ನಿರ್ಮಾಣ ಕೆಲ್ಲೆಲೆ ಕಾರಣ , ತ್ಯೆ ಪ್ರಾಂತ್ಯಾ ರಾಯು , ಮಹಾತ್ಮ ಲೋಕಾಲೆ ಜೀವನ ಚರಿತ್ರ ಸಾಂಗ್ತಾಚಿ .. ಪಾಂಡವಾಂಕ ಮಸ್ತ ದಣು ಜಾಯ್ನಾಶಿ ಮಾರ್ಗ ದರ್ಶನ ಕರ್ತಾ
ಅಶಿಲೋ . ಅತ್ತ ಪಾಂಡವ ಗಂಧಮಾದನ ಪರ್ವತ ಪ್ರಾಂತ್ಯಾಕ ಯೇವ್ನು ಪಾವಲೀ೦ತಿ . ಥೋಡೆ ವೆಳ್ಯೇನ .. ಜೋರು ಪಾವ್ಸು ವಾರೆ ಗುಡು ಗುಡು ಮಿಂಚಾ ವೊಟ್ಟು
ಜೋರು ಹಿಮಾ ಪಾವ್ಸು ಶುರು ಝಲ್ಲೋ . ಹೇ ಭಯಂಕರ ಭೀಭತ್ಸ ವಾರೆ ನಿಮಿತ್ಯ ಜನ , ಚಲ್ಲಾ ಪಿಲ್ಲಿ ಝಲ್ಲೆ . ಥೊಡೆಸೇ ಲೋಕು ಭೀವ್ನು ದೊಳೆ ಉದ್ದಾಕ ಕಾಣು
ರೋಡು೦ಕ ಶುರು ಕೆಲ್ಲೆ . ಕಿತ್ಯೆ ಕರ್ತಲಿ೦ತಿ ? ನಿಸರ್ಗಾ ನಿಯಮು ಕೋಣೆ ನಿಯಂತ್ರಣ ಕೋರ್ಚ್ಯಾ ಸಾಧ್ಯ ಅಸ್ಸ !! ವೊಚ್ಛೇ ವಾಟ ಭಾರಿ ದುರ್ಗಮ ಅಶಿಲೆ . ವಾತಾವರಣ
ಸಮ್ಮ ನಾ . ಚಮಕುಚಾ ಜಾಯ್ನಾಶಿ .. ದ್ರೌಪದಿ ಪ್ರಜ್ಞಾ ಚುಕ್ಕುನು ಸಕಲ ಪೊಳ್ಳಿ . ಭೀಮಸೇನಾ ನ , ಘಟೋತ್ಕಚಾಲೇ ಉಡ್ಘಾಸು ಕೆಲ್ಲೊ . ಘಡಿ ಭಿತರಿ ಘಟೋತ್ಕಚ
ಪ್ರತ್ಯಕ್ಷ ಝಲ್ಲೋ ಪಾಂಡವಾಂಕ ಪ್ರಣಾಮ ಕೋರ್ನು ಕಿತ್ಯಾ ಸ್ಮರಣ ಕೆಲ್ಲೆಲೆ ಮೋಣು ನಿಮಗಿಲೆ .
ಧರ್ಮಜ : " ಪುತ್ರಾ ಘಟೋತ್ಕಚಾ ! ಅಮ್ಕಾ ಸರ್ವಾಂಕ ಬಿಂದು ಸರೋವರ ನಾರಾಯಣ ಆಶ್ರಮಾ ಲಗ್ಗಿ ಅಶಿಲೆ ಅರಣ್ಯ ಪ್ರಾಂತ್ಯಾಕ ಪಾವೈ " ಮೋಣು ಸಂಘಲೆ .
" ಜಾಯ್ತ ಪಿತಾಶ್ರೀ " ಮೋಣು ಸಂಘುನು ಘಟೋತ್ಕಚಾನ ತಗೆಲ್ ಹತ್ತಾ ತಾಳ್ವತಿ ಬ್ರಹ್ಮ್ಮಾ೦ಡ ಜಾವ್ನು ವಡ್ಡಯಿಲೆ ಅನಿ ಸರ್ವಾಂಕ ಹತ್ತಾ ತಾಳ್ವತಿರಿ ಬೋಸ್ಕಾರಾನು
ಬಿಂದು ಸರೋವರ ಪ್ರಾಂತ್ಯಾ೦ತು ದೇವೈ ಲೆ . " ಅಗತ್ಯ ಅಶಿಲೆ ತೆದ್ನಾ ಮಕ್ಕಾ ಅಪ್ಪಯ್ಯಾತಿ ಪಿತಾಶ್ರೀ " ಮೋಣು ಸಂಘುನು ಅದ್ರಶ್ಯ ಝಲ್ಲೋ ಘಟೋತ್ಕಚು . ಬಿಂದು
ಸರೋವರ ನಾರಾಯಣ ಆಶ್ರಮ , ಬದರಿಕಾ ಆಶ್ರಮ ಪ್ರಾಂತ್ಯ ಭಾರಿ ಚಂದು ಜಾಗೊ . ನರ ನಾರಾಯಣ , ಹ್ಯೇ ಬದರಿಕಾಶ್ರಮಾಂತು ತಪಸ್ಯ ಕೆಲ್ಲೆಲೆ ಜಾಗೊ .
ಹ೦ಗಾ ಕ್ರೂರ ಪ್ರಾಣಿ , ಸಾಧು ಜೀವಾಂಕ ದಿವಿಶಿ ಮಾರ್ನು ಖಾಯ್ನಾ.. ದೊಗ್ಗಯ್ ಪ್ರೀತ್ಯೆರಿ , ವೊಟ್ಟುಚಿ ಜೀವನ ಕೊರ್ಚ್ಯೇ ಪೊಳೈತನಾ ಸರ್ವಾಂಕ ಆಶ್ಚರ್ಯ ಝತ್ತಾ .
ಕದಳಿ , ದ್ರಾಕ್ಷ , ಅಂಬೊ , ಪೊಣೊಸು , ಚಿತ್ರ ವಿಚಿತ್ರ ಫಲವಸ್ತು , ಸ್ವಾದು ಭರ್ಲೆಲೆ ರಸಾಮೃತ ಫಲವಸ್ತು , ರಮ್ಯ ಬಣ್ಣು , ವಿಶಾಲ ರಬ್ಬು೦ಕ ಯೋಗ್ಯ ಜಲ್ಲೆಲೆ ಗುಹ್ಯ ಜಾಗೊ
ರಮ್ಯ ಜಲಪಾತ ,ಬಣ್ಣ ಬಣ್ಣಾ ಫುಷ್ಪ ಲತಾ , ಝಡ್ಡ೦ , ಅತೀ ಸುಂದರ ಮೋಹಕ ಸುಗಂಧ ಭರಿತ ಫುಲ್ಲ೦ ,ಹ್ಯೇ ಸಕ್ಕಡ ಪೊಳೈತಾನಾ .. ಸೃಷ್ಟಿ ವೈಚಿತ್ರ ಮದ್ಯೆ ಬದರಿಕಾಶ್ರಮ
ಪಾಂಡವಾಂಕ ಸ್ವರ್ಘು ಶೇ ದಿಸ್ಲೆ .
ದ್ರೌಪದಿ ಅನಿ ಭೀಮು ಹಾಂಗಾ ಪ್ರಕೃತಿ ಚಂದಾಯಿ ಪೋಳೋನು ಆನಂದ ಪಾವ್ಲೀ೦ತಿ . ಏಕ ದಿವಸು ದೊಗ್ಗಯಿ ವಿಹಾರ ಕರ್ತಾಚಿ ಮಸ್ತ ದೂರ
ತಾಯ್ ವೊಚ್ಚುನು ದ್ರಾಕ್ಷ , ಕದಳಿ ಖಾವ್ನು .. ನಿವಾಸ ಸ್ಥಾನಾಕ ವಾಪಾಸ್ ಯೆತ್ತಾನಾ ... ಖಂಯ್ ಕೀ ದುಕುನು ಮಸ್ತ ಸುಗಂಧ ಭರ್ಲೆಲೆ ಏಕ ಫುಲ್ಲಾ ಪೊರೊಂಬೊಳು
ಗಪ್ಪನೆ ನಂಕಾ ಲಾಗ್ಲೆ . ದ್ರೌಪದಿ ಅನಿ ಭೀಮಸೇನಾಕ ತ್ಯೆ ಸುಗಂಧ ಪೊರೊಂಬೊಳಾಕ ಮನ ಸೊಲ್ವಲೆ . ಖಂಯ್ ಕೀ ದುಕುನು .. ಏಕ ಭಾಂಗ್ರಾ ಬಣ್ಣಾ ಏಕ ಸುಂದರ
ಕಮಲಾ ಫೂಲಾ ವಾರೇಕ ಯೇವ್ನು ತಂಗೆಲೆ ಲಗ್ಗಿ ಪೊಳ್ಳೇ . ಹಜಾರ ದಳ ಅಶಿಲೆ ತ್ಯೆ ಚಂದ ಕಮಲಾ ಫೂಲ .. ಭಂಗರ ಹಳದಿ ಬಣ್ಣಾ ಫೂಲ , ಮನಮೋಹಕ ಸುಗಂಧ ಭರಿತ
ಚಿತ್ತಾಕರ್ಷಕ ಫೂಲ ದ್ರೌಪದಿನ ವೆಂಚುನು ಹತ್ತಾ ಧರ್ಲೆ . " ಆರ್ಯ ಪುತ್ರಾ ! ಶಿವಾಲೆ ಅರ್ಚನೆಕ ಅಸಲೆ ಫೂಲ ಅಸ್ಲೆರಿ ಕಿತ್ಲೆ ಲಾಯಕ್ ಅಶಿಲೆ ! ಶಿವ ಪೂಜೆಕ ಅಸಲೆ ಫೂಲ
ಹಾಣು ದೀನಾ ಕೀ ? " ನಿಮ್ಗಿಲೆ ದ್ರೌಪದಿನ . ಶಿವ ಪೂಜೆಕ ಮ್ಹಣ್ತನ .. ಭೀಮಾಕ , ಜಾಯ್ನಾ ಮೋಣು ಸಂಘು ಜಾಯ್ನಿ . ಪಾಂಚಾಲಿನ ಸುರ್ವೆ ಪೋಟಿ ಭೀಮಾ ಲಗ್ಗಿ
ನಿಮಗೂಚೆ . " ದ್ರೌಪದಿ ! ... ತೂ ಆಶ್ರಮಾಕ ವಸ .. ಹಾಂವ ಫುಲ್ಲ೦ ವೊಟ್ಟು ಕೋರ್ನು ಹಾಣು ದಿತ್ತಾ . ಸಂತೋಷಾರಿ ಶಿವ ಪೂಜಾ ಕರಿ . " ಗಧಾ ಖಂದೇರಿ
ದೊವೋರ್ನು , ಫೂಲ ಹತ್ತಾ ಧೋರ್ನು ತಸಲೆ ಸುಗಂಧ ಭರಿತ ಫೂಲಾ ಸೊದ್ದುನು ರನ್ನಾ೦ತು ಚಮ್ಕಾಲೋ . ಯೆದ್ರಾ ಆಯ್ಯಿಲೆ ಮಹರ್ಷಿ ಲಗ್ಗಿ ತ್ಯೆ ಫೂಲಾ ದಕ್ಕೋನು
" ಮಹಾತ್ಮಾ ! ಅಸಲೆ ಫೂಲಾ ಖಂಯ್ ಮೆಳ್ತಾಲೇ ? ಭೀಮಾನ ನಿಮಗಿಲೆ . " ಹ್ಯೇ ದೇವತಾ ಪುಷ್ಪ !.. ಹಂಗ ದುಕೂನು ಉತ್ತರ ದಿಶೆಕ ಮಸ್ತ ದೂರ ವತ್ತರಿ .. ಏಕ ತಳೆ
ಮೆಳ್ತಾಲೆ .. ತ್ಯೆ ತಳೆ೦ತು ಮಾತ್ರ ಹೇ ಫೂಲ ಮೆಳ್ತಾಲೆ ... ಹೇ ಫುಲ್ಲಾ ನಾಂವ ' ಸೌಗಂಧಿಕಾ ಪುಷ್ಪ ' . ಹೇ ಭಾರಿ ಅಪರೂಪಾ ಪುಷ್ಪ .. ಸರ್ವಾಂಕ ಹತ್ತಾ ಮೆಳ್ನಾ .. ತ್ಯೆ
ಸರೋವರ ಯಕ್ಷ ಲೋಕಾಲೆ ಸ್ವಾಧೀನ ಅಸ್ಸ . ಅಲಕಾ ನಗರಿ ಕುಬೇರ ಚಕ್ರವರ್ತಿಲೆ ಶಿವ ಪೂಜೆಕ ಹೇ ಫುಲ್ಲಂ ಸಮರ್ಪಣ ಝತ್ತಾ . ತ್ಯೆ ಜಾಗೇರಿ ಸಾಧಾರಣ ಜನಾಂಕ
ವೋಚ್ಚಾ ಜಾಯ್ನಾ . " ಮ್ಹಳ್ಳಲೋ ಋಷಿ . " ಇತ್ಲೆ ಮಾಹಿತಿ ದಿಲ್ಲೆಲೆ ತುಮ್ಕಾ ಮಸ್ತ ಧನ್ಯ ವಾದು ಮಹರ್ಷಿ !... ಹಾಂವ ಕುರು ವಂಶಾ ಪಾಂಡು ರಾಯಲೆ ದೊನ್ನಿ ಪುತ್ರ
ಭೀಮ ಸೇನಾ . ಮಿಗೆಲಿ ಬಾಯ್ಲ್ ಲೆ ಇಚ್ಚಾ ಪ್ರಕಾರ .. ಶಿವ ಪೂಜೆಕ ಸೌಗಂಧಿಕಾ ಪುಷ್ಪ ಹಾಡೂ೦ಕ ಭಾರ್ ಸರ್ಲಾ . ಮಿಗೆಲೆ ಕಾರ್ಯಾರ್ಥ ಸಿದ್ಧಿ ಝವ್ವೊ ಮೋಣು
ಆಶೀರ್ವಾದ ಕರಿ ಮಹಾತ್ಮಾ " ಮ್ಹಳ್ಳಲೊ ಭೀಮು . " ಸತ್ಕಾರ್ಯಾಕ ಭಾರ್ ಸರ್ಲಾ ಪಾಂಡು ಕುಮಾರ ! ಹಂಗ ದುಕುನು ಧಾಹ್ ಯೋಜನೆ ದೂರ ತ್ಯೇ ಫುಲ್ಲಂ ಅಸ್ಸ .
ಯಕ್ಷಾಲೇ ನಿಮಿತ್ಯ ಕಸಲೆಯ್ ಆಪತ್ ಯೆವ್ಚಾ ಪೂರೋ ಜಾಗ್ರತ ಕರಿ ... ತುಗ್ಗೆಲ್ ಮನೋಭಿಷ್ಠ ಸಿದ್ಧಿ ಝವ್ವೋ " ಮೋಣು ಆಶೀರ್ವಾದ್ ಕೆಲ್ಲೊ
" ಕೊಣಯ್ ಆಡ ಅಯಿಲೇರಿ ... ಮಿಗ್ಗೆಲೆ ಮನಾ ಆಯ್ಯಿಲೆ ಕಾರ್ಯ ಕರ್ತಾ " ಮ್ಹಳ್ಳಲೊ ಭೀಮು
ರನ್ನಾ೦ತು ಅಶಿಲೆ ಕ್ರೂರ ಪ್ರಾಣಿ೦ಕ ಧಾಂವ್ಡಾಯಿತಾ .. ಹತ್ತ ಮೆಳ್ಳೆಲೆ ಫಲ ವಸ್ತು ಖತ್ತಾಚಿ ... ಓ ಹೋ ಹೋ ಹೋ ಹೋ ! ಮೋಣು ಜಂತು ಪ್ರಾಣಿ
ಪಕ್ಷಿ೦ಕ ಜಾಗೈತಾಚಿ ದೂರ ಧಾಂವ್ಡಾನು ವಿನೋದ ಜಾವ್ನು ಭೀಮು ಹೆಜ್ಜೆ ಘಾಲ್ತಾಚಿ ಮುಕಾರಿ ಗೆಲ್ಲೊ . ವನಾಂತು ಅಶಿಲೆ ಆಂಜನೇಯಾಕ .. ಭೀಮಾಲೆ ಸಿಂಹ ನಾದ
ಅಯಿಕಲೆ . ದಿವ್ಯ ದೃಷ್ಟಿರಿ .. ಭೀಮಾಕ ಪೊಳೈಲೆ . ಆಂಜನೆಯು ಅನಿ ಭೀಮು ದೊಗ್ಗಯಿ ವಾಯು ದೇವಾಲೆ ಅನುಗ್ರಹಾರಿ ಜನ್ಮಾ ಆಯ್ಯಿಲೆ . ಅಂಜನೇಯಾಕ ಭೀಮಾಲೆ
ಭುಜ ಬಲ ಕಿತ್ಲೆ ಅಸ್ಸ ಮೋಣು ಪರೀಕ್ಷಾ ಕೋರ್ಕಾ ಮೋಣು ದಿಸ್ಲೆ . ಭೀಮಸೇನಾನ ಯೆವಚೆ ವಟ್ಟೇರಿ .. ಯೆಕ ಮಂಥಾರೆ ಮಂಕಡಾ ರೂಪ ಘೇವ್ನು .. ಭೀಮಾಲೆ ವಾಟ್ಟೇರಿ
ತಾಗೆಲೆ ಬಾಲ ಆಡ ಘಾಲ್ನು ..ನೀದ ಪೊಳ್ಳೇ ಮ್ಹಣ್ಕೆ ನಾಟಕ ಕೋರ್ನು ರುಕ್ಕಾ ಮುಳಾಂತ್ ಆಡ ಸರ್ಲೊ .
ತ್ಯೆಚಿ ವಾಟ್ಟೇರಿ ಆಯ್ಯಿಲೆ ಭೀಮಸೇನಾ , ತಗೆಲೆ ವಟ್ಟೇರಿ ಆಡ ಜಾವ್ನು ಪೋಣು ಅಶಿಲೆ ಮಂಕಡಾ ಬಾಲ ಪೊಳೊನ್ ಹಸ್ತಾಚಿ " ದೋನಿ ಹಾತ್ತಿ
ಮಂಕ್ಡಾಕ , ಧಾಹ ಹಾತ್ತಿ ಬಾಲ " ಸಾಂಗ್ತಾಚಿ ಬಾಲ ಉಡ್ದುನು ವೊಚ್ಚಾ ಗೆಲ್ಲೊ ಭೀಮು ." ಚೂಕಿ .... ಚೂಕಿ ...! ಧರ್ಮು ಗೊತ್ತಶಿಲೆ ಲೋಕು ಕೊಣಯ್ ಬಾಲ
ದಾಂಟ್ವನಾತಿ . " ಮ್ಹಳ್ಳಲೋ ಮಂಕಡಾ ರೂಪಾರಿ ಅಶಿಲೋ ಮಾರುತಿ .
ಭೀಮ : " ಓ ಹೊ .. ತು ಸಾಧಾರಣ ಮಂಕಡ್ ನಯ್ .. ಉಳ್ಳೊಚ್ಯಾ ಕಳ್ಚೆ ಮಂಕಡ್ ? ವೊಚ್ಚ ವಟ್ಟೇರಿ ಆಡ ಜಾವ್ನು ಬಾಲ ಘಾಲ್ನು , ನೀದ ಕಾಡ್ತಾ ಅಸ್ಸವೆ ? ಬಾಲ ಕಾಡಿ
ಕಪಿರಾಯಾ ... ಮಕ್ಕ ಹೇ ವಾಟ್ಟೇರಿ ವೊಚ್ಚುಕಾ "
ಆಂಜನೇಯ : " ಅಯ್ಯಾ ! ಹಾಂವ ಮಂಥಾರೋ ... ಮಿಗೆಲೆ ಬಾಲ ಉಬ್ಬಾರ್ನು , ಏಕ ಬದಿನ ಘಾಲ್ನು , ಮಕ್ಕಾ ಸಹಾಯು ಕೋರೂ ನಜ್ಜ ವೇ ? ಬಾಲ ಬದಿನ ಕೋರ್ಚ್ಯೆ
ತಾಕತ ... ತಾ೦ಯಿ ನಾ .. ಮಕ್ಕಾ "
ಭೀಮ : " ಮಂಥಾರೋ .. ಅಶಕ್ತ .. ಮ್ಹಣ್ತಾ ನವೆ ಜಾಯ್ತ " ಮೋಣು ದಾವೆ ಹತ್ತಾ ದೊನ್ನಿ ಬೊಟ್ಟಾನಿ ಬಾಲ ಉಬ್ಬಾರುಂಕ ಗೆಲ್ಲೊ . ವಿಚಿತ್ರ !.. ಜಾಯ್ನಿ . ಪಾಂಚ ಬೊಟ್ಟಾನಿ
ಮುಷ್ಠಿ ಧೋರ್ನು .... ಊ .. ಹೂ.. ಹೂ .. ಹೂ ಜಾಯ್ನಿ ... ದೊನ್ನಿ ಹತ್ತಾನಿ .. ಬಾಲ ಉಬ್ಬಾರುಂಕ ಪ್ರಯತ್ನ ಕೆಲ್ಲೆ ಜಾಯ್ನಿ ... ಭೀಮ ಶಕ್ತಿ ಘಾಲ್ನು ಉಬ್ಬಾರುಂಕ ಪ್ರಯತ್ನ
ಕೆಲ್ಲೆ ... ಜಾಯ್ನಿ ! ಧಾಹ್ ಹಜಾರ ಹಸ್ತೇ ಬಲ ಘಾಲ್ನು ಉಬ್ಬಾರುಂಕ ಪೊಳೈಲೆ ... ನಾ ಜಾಯ್ನಿ ... ನೀಡಲಾರಿ ಹೂಮ್ ದೇವಲಿ . ಅಂಗ ವಸ್ತ್ರ ಏಕ ಬದಿನ ದೊವೋರ್ನು
ಸರ್ವ ಶಕ್ತಿ ವೊಟ್ಟು ಕೋರ್ನು ಪ್ರಯತ್ನ ಕೆಲ್ಲೆ ... ಜಾಯ್ನಿ .. !!
ಆಂಜನೇಯ : " ಅಯ್ಯಾ ! ಜಾಯ್ನಿ ವೇ ? .... ಮಕ್ಕಾ ಹೇ ... ಮಂತಾರ್ಪಣಾರಿ ... ಹೇ ಬಾಲಚಿ ಮಸ್ತ ಜಡ ಝಲ್ಲಾ ... ಚ೦ಮ್ ಕುಚ್ಯಾ ಜಾಯ್ನಾ .. ರಬ್ಬು೦ಕ
ಜಾಯ್ನಾ... ಬೊಶ್ಯಾ ಜಾಯ್ನಾ ... ಘೆಲ್ಲೇರಿ ದುಕೂನು ಘೆಲ್ಲೇರಿ ಉಡ್ಡು೦ಕ್ ಜಾಯ್ನಾ ... ಲೆಕ್ಕಿಲೇ ಫಲ್ ವಸ್ತು ವೆಂಚುನ್ ಖಾವುಂಕ ಜಾಯ್ನಾ ... ಮಿಗ್ಗೆಲೆ ಬಾಲ ಚ್ಯಿ ಸಂಕಟ
ಝಲ್ಲಾ ... !ಅಯ್ಯಾ ! ಆನ್ನೇಕ ಪೋಟಿ ಪ್ರಯತ್ನ ಕರಿ " ಮ್ಹಳ್ಳಲೋ . ಭೀಮಾನ ಪ್ರಯತ್ನ ಕೆಲ್ಲೆ ... ಬಾಲ ಲವ ಲೇಶ ಹಲ್ಲನಿ . ಮಾರುತಿ ... ಕಿಚ ಕಿಚ .. ನಿ ಹಾಸ್ಲೊ .
ಭೀಮಾಲೆ ದೊಳೆಂತು ಉದ್ದಾಕ ಭರ್ಲೆ . ಮನ ಹೃದಯ ಭೇತ್ತುನು ಅಯಿಲೆ ... ಅಹ೦ಕಾರು ಚೂರು ಝಲ್ಲೋ . ಕಸಲೆ ನಮುನೆ ಅಪಮಾನ ? ಏಕ ಸಗಳೋ ರೂಕು
ಉಬ್ಬಾರ್ನು , ಪುಡ್ಡಿ ಕೊರ್ಚೆ ತಾಕತ್ ಅಶಿಲೋ ಮಕ್ಕಾ ... ಸಾಧಾರಣ ಏಕ ಮಂಕಡಾ ಬಾಲ ಉಬ್ಬಾರುಂಕ ಜಾಯ್ನಿ ಮೂ ! ಹಾಂವೆ ಜೀವಂತಿ ಆಸ್ಸುನೂ ಪ್ರಯೋಜನ ಕಸಲೆ
? ಶಕ್ತಿ ನಾತ್ತಿಲೊ ಪುರುಷು ಅಸ್ಲೆರಿ ಕಿತ್ಯೆ ನಾತ್ಲೆರಿ ಕಿತ್ಯೇ ? ಮಿಗ್ಗೆಲೆ ಭಂವ್ ಡಾಂಕ್ ಕಶಿ ತೊಂಡ ದಕ್ಕೋಚೆ ? ಮಿಗೆಲೆ ಶಕ್ತಿ ವೈರಿ ನಂಬಿಕ ದವರ್ಲೆಲಿ ದ್ರೌಪದಿ ಕ ಹಾಂವ
ಕಸಲೆ ಸಾಂಗ್ಚೆ ?
ಭೀಮ : " ಸ್ವಾಮೀ ! ತೂ ಕೋಣ ? ಸರ್ವ ಶಕ್ತಿ ಪರೀಕ್ಷ ಕರ್ತಾಲೊ ಪರಮೇಶ್ವರು .. ಈಶ್ವರು ಕೀ ? ಪರಂಧಾಮು ಕೀ ... ಸಹಸ್ರ ಗಜ ಬಲ ಅಷ್ಶಿಲೋ , ಮಕ್ಕ ಬುದ್ಧಿ
ಸಂಗೂ ಆಯ್ಯಿಲೋ ವಾಯು ದೇವು ಕೀ ? ತೂ ಸಾಧಾರಣ ಮಂಕಡ ನಯ್ ಮೋಣು ಮಕ್ಕ ಕಳ್ಳೆ ... ಮಂಕಡಾ ರೂಪಾರಿ ಅಶಿಲೋ ಗ೦ಧರ್ವ ಕೀ .. ಯಕ್ಷ ಕೀ .. ಕಿನ್ನರ
ಕೀ .. ಕಿಂಪುರುಷು ಕೀ .. ತೂ ಕೋಣ ಮಹಾತ್ಮಾ ! ?
ಆಂಜನೇಯ : " ಶ್ರೀ ರಾಮ್ ! ಶ್ರೀ ರಾಮ್ ! ಜಯ್ ಜಯ್ ರಾಮ್ ! "
ಭೀಮ ಸೇನಾ ಕ ' ರಾಮ್ ' ಮ್ಹಳ್ಳೆಲೆ ಉಚ್ಚಾರು ಅಯಿಕಲಿ ಸಂತಾನ ಕಳ್ಳೆ ! ಮಂಕ್ಡಾ ರೂಪಾರಿ ಅಶಿಲೋ ಆಂಜನೇಯು ಚಿ .. ಮೋಣು ಕಳ್ಳೆ !
ಮಹಾತ್ಮಾ ಆಂಜನೇಯಾ , ಮಾರುತಿರಾಯಾ , ಹನುಮಂತರಾಯಾ ! ಮೋಣು ಸಂತೋಷು ಝಲ್ಲೋ . ಹಾಥ ವೊಟ್ಟು ಕೋರ್ನು ಭಕ್ತೀನ ಪ್ರಣಾಮ ಕೆಲ್ಲೆ . ಅನಿ
ಆಂಜನೇಯಾಲೆ ಸ್ತುತಿ ಕೆಲ್ಲಿ
" ಮನೋಜವಂ ಮಾರುತ ತುಲ್ಯ ವೇಗಂ
ಜಿತೇಂದ್ರಿಯಮ್ ಬುದ್ಧಿ ಮತಾಂ ವರಿಷ್ಠಮ್
ವಾತಾತ್ಮಜಮ್ ವಾನರ ಯೂಧ ಮುಖ್ಯಾಮ್
ಶ್ರೀ ರಾಮ ದೂತಮ್ ಶಿರಸಾ ನಮಾಮಿ "
ಅಂಜ ನೇಯು ನಿಜರೂಪ ಘೇವ್ನು ಭೀಮಾಲೆ ಎದ್ರಾಕ ಯೇವ್ನು ರಾಬ್ಲೊ . ಆಂಜನೇಯಾಲೆ ಪಯ್ಯಾರಿ ಪೋಣು ನಮಸ್ಕಾರು ಕೆಲ್ಲೊ ಭೀಮಾನ . ಭೀಮಾಲೆ
ಸಂತೋಶಾಕ ಪಾರು ನಾ ಝಲ್ಲೆ
ಆಂಜನೇಯ : " ಭೀಮಾ ! ಭೀಮ ಸೇನಾ ! ತುಗ್ಗೆಲ್ ದೇಹ ಶಕ್ತಿ ಕಿತ್ಲೆ ಅಸ್ಸ ಪೊಳೊಕಾ ಮೋಣು ದಿಸ್ಲೆ ಮಕ್ಕಾ .. ಯೋ ಭೀಮಾ ಮಕ್ಕ ಫೊಟೊನ್ ಧರಿ " ...
ಆಂಜನೇಯಾಕ ಫೊಟೊನ್ ಧರ್ಲೆ ಭೀಮಾನ . " ಭೀಮ ಸೇನಾ ! ಮಕ್ಕ ಆಲಿಂಗನ ಕೆಲ್ಲೆಲೆ ನಿಮಿತ್ಯ ತುಗ್ಗೆಲ್ ದೇಹ ಶಕ್ತಿ ದೋನಿ ವಾಂಟೇನ ವಾಡ್ಲಿ . ತುಕ್ಕಾ
ಕೊಣಾಲೆಯ್ ನಿಮಿತ್ಯ ಪರಾಭವ ನಾ .. ಯೆವಚೆ ಕುರು ಪಾಂಡವ ... ಮಹಾಭಾರತ ಯುದ್ಧಾ೦ತು ತುಗ್ಗೆಲ್ ಭೂಮಿಕಾ ಮುಖ್ಯ ಅಸ್ಸ . ತುಗ್ಗೆಲ್ ಭುಜ ಶಕ್ತಿ ವೈರಿ ತುಮ್ಗೆಲೆ
ವಿಜಯ ಲಕ್ಷ್ಮಿ ಆಧಾರ ಜಾವ್ನು ಅಸ್ಸ ."
ಭೀಮ : " ಮಹಾತ್ಮಾ ! ಭೂತ ಭವಿಷ್ಯ ವರ್ತಮಾನ , ಸರ್ವ ವಿಷಯ ಜ್ಞಾನ ಅಶಿಲೋ ತೂ . ನವ ಬ್ರಹ್ಮ್ಮ ಜಾವ್ನು ಮುಕಾವೈಲ್ ಸೃಷ್ಟಿ ಕರ್ತಾಲೊ ತೂ ! ... ಸರ್ವ ಕಾಲ ,
ಸರ್ವ ಅವಸ್ಥೆ೦ತು ತುಗ್ಗೆಲ್ ಕರುಣ ಆಮ್ಗೆಲೆ ವೈರಿ ಅಶ್ಚ್ಯೇ ತಶಿ ಅನುಗ್ರಹ ಕರಿ ದೇವಾ ! "
ಆಂಜನೇಯ : " ತಥಾಸ್ತು ! ಭೀಮ ಸೇನಾ ತಥಾಸ್ತು !! "
ಭೀಮ : " ಅಗ್ರಜಾ ! ಕುರು ಪಾಂಡವ ಯುದ್ಧಾ೦ತು ... ತೂ೦ವೆ ಅಮ್ಗೆಲೆ ಅರ್ಜುನಾಲೆ ರಥಾರಿ ಬೈಸೂನು ತುಗ್ಗೆಲ್ ಭಂವ್ದಾ೦ಗೆಲೆ ಯುದ್ಧ ಪರಾಕ್ರಮ ಪೊಳೊಕಾ . "
ಆಂಜನೇಯ : " ಜಾಯ್ತ .. ಅರ್ಜುನಾಲೆ ರಥಾ ವೈರಿ ರಥಪತಾಕೆ೦ತು ಬೈಸೂನು .. ತುಗ್ಗೆಲ್ ಬಾಹು ಬಲ ದೊಳೆ ಭೋರ್ನು ಪೊಳೊಕಾ ಮೋಣು ಆಶಿ ಅಸ್ಸ . ಹಾಂವೆ
ಅಶಿಲೆ ಜಾಗೇರಿ... ಯಕ್ಷ , ರಾಕ್ಷಸ , ಮಾನವ ಮಾಯೆ ಕಸಲೆಯೀ ಚಲನಾ .."
ಭೀಮ : " ಮಹಾತ್ಮಾ ! ಮಕ್ಕಾ ಏಕಿ ಆಶಾ ಅಸ್ಸ .. ಏಕ ಪೋಟಿ ತುಗ್ಗೆಲ್ ವಿಶ್ವ ರೂಪ ಪೊಳೊಕಾ ಮ್ಹಳ್ಳೆಲೆ ಆಶಾ ... " ಆಂಜನೇಯನ ಭೀಮಾ ಕ ದಿವ್ಯ ದೃಷ್ಠಿ ದೀವ್ನು
" ಭೀಮಾ ಪೊಳೆ ಮಕ್ಕಾ .. " ಆಂಜನೇಯನ ತಾಗೆಲ್ ವಿಶ್ವ ರೂಪ ದಕ್ಕಯಿಲೆ . ಪೊಳೈತ ಪೊಳೈತಾಚಿ ... ಅಂಜನೆಯು ವಾಡ್ಲೊ ... ವಾಡ್ಲೊ ... ಆಕಾಶ ಪರ್ಯಂತ
ವಾಡ್ಲೊ . ಆಂಜನೇಯಾಲೆ ವಿಶ್ವ ರೂಪ ಪೋಳೋನು , ಭೀಮು ಭೀವ್ನು ಗೆಲ್ಲೋ . ಸಂಜೀವಿನಿ ಪರ್ವತು ಉಬ್ಬಾರ್ಲಲೋ .. ಲಂಕಾ ದಹನ ಕೆಲ್ಲೆಲೋ ಆಂಜನೇಯಾಕ
ಪೋಳೋನ್ ಮನಸ್ಪೂರ್ತಿ ಗುಣ ಗಾನ ಕೆಲ್ಲೆ .
ಶ್ರೀ ಆಂಜನೇಯಂ ಪ್ರಸನ್ನಾ೦ಜನೇಯಂ
ಪ್ರಭಾ ದಿವ್ಯ ಕಾಯಂ ಪ್ರಕೀರ್ತಿ ಪ್ರದಾಯಂ
ಭಜೇ ವಾಯು ಪುತ್ರಂ ಭಜೇ ವಾಲ ಗಾತ್ರಂ
ಭಜೇ ರುದ್ರ ನೇತ್ರಂ ಭಜೇಹ೦ಮ್ ಪವಿತ್ರಂ
ಭಜೇ ಚಾರು ಚಿತ್ರಂ ಭಜೇ ರಾಮ ಭಕ್ತಮ್
ಭಜೇ ಭಕ್ತಿ ಯುಕ್ತಮ್ ಭಜೇ ಹ೦ಮ್ ಭಜೇ ಹ೦ಮ್
ಭಜೇ ಹ೦ಮ್ ಭಜೇ ಹ೦ಮ್ ಭಜೇ ಹ೦ಮ್ ಭಜೇ ಹ೦ಮ್
ವೀರ ಹನುಮಾ ... ಪೂರೋ ಪೂರೋ ಭಾಸ್ ಕರಿ .. ಉಪಸಂಹಾರು ಕರಿ ... ಅನಿ ಮುಕಾರಿ ಪೊಳೋಚ್ಯಾ ಜಾಯ್ನಾ... " ಆಂಜನೇಯಾನ ವಿಶ್ವ ರೂಪ ಶಮನ ಕೆಲ್ಲೆ ಯಥಾ ಸ್ತಿಥಿರಿ ಯೇವ್ನು " ಭೀಮ ಸೇನಾ !ಯೋ ಮಕ್ಕಾ ಏಕ ಪೋಟಿ ಆಲಿಂಗನ ಕರಿ ... ತುಗೇಲಿ ಶಕ್ತಿ ದೋನಿ ವಾಂಟೇನಿ ವಾಡ್ತಾ . ಕೊಣಾಲೆಯ್ ನಿಮಿತ್ಯ ತುಕ್ಕಾ ಪರಾಜಯ ನಾ ." ಭೀಮಸೇನಾನ ಆಂಜನೇಯಾಕ ಫೊಟೊನ್ ಧೋರ್ನು ಭಕ್ತಿ ಪ್ರೀತಿ ದಕ್ಕಯಿಲಿ . " ಸೌಗಂಧಿಕಾ ಪುಷ್ಪ ಹಡೂ೦ಕ ವತ್ತಾ ಅಸ್ಸ ... ಜಾಗ್ರತಾ ತ್ಯೆ ಪುಷ್ಪ ಕುಬೇರಾಲೆ ಸರೋವರಾಂತು ಅಸ್ಸ . ಯಕ್ಷ , ರಾಕ್ಷಸ ಲೋಕು ರಾಖ್ವಣಿ ಕ ಆಸ್ಸತಿ ... ಜಾಗ್ರತ .. ಅತ್ತ ತಂಗೆಲೆ ಮಾಯಾ ವಿದ್ಯಾ ತುಗೆಲಗ್ಗಿ ಚಲ್ನಾ . ವೊಚ್ಚುನು ಯೋ ... ವಿಜಯೀ ಭವ .. " ಮೋಣು ಆಶೀರ್ವಾದ್ ಕೆಲ್ಲೊ .
" ಜ್ಯಯ್ ಹನುಮಾನ್ " ಸಂಗತಾಚಿ ಭೀಮು ಮುಕಾರ್ಸುನ್ ಗೆಲ್ಲೊ .
ರಾತಿ ಝಲ್ಲೆರಿಯಿ ಭೀಮ ಸೇನು ಆಶ್ರಮಾ ಯೇವ್ನು ಪಾವ್ನಿ . ಧರ್ಮರಾಯಾಕ ಮನಾ೦ತು ಸಂಕಟ ಝಲ್ಲೆ . ಹೆರ್ದಿವಸು , ಭೀಮ ಪುತ್ರ ಘಟೋತ್ಕಚಾಲೆ
ಉಡ್ಘಾಸು ಕೆಲ್ಲೊ . ಮನಾ ಲೆಕ್ಲೇ ಸತಾನ ಘಟೋತ್ಕಚ ಪ್ರತ್ಯಕ್ಷ ಝಲ್ಲೋ . ತಗೆಲಾಗ್ಗಿ ಭೀಮ ಸೇನಾ ನ ಯೇನಾ ನಾತ್ತಿಲೆ ... ಸೌಗಂಧಿಕಾ ಪೂಲ ಸೊದ್ದುನು ಗೆಲ್ಲೆಲೆ ವಿಷಯು ಸಾಂಗ್ಲೊ . ಘಟೋತ್ಕಚಾನ ದಿವ್ಯ ದ್ರಷ್ಠಿರಿ ಪೊಳಯಿಲೆ ... ಭೀಮಾ ನ , ಯಕ್ಷ ರಾಕ್ಷಸ ವೊಟ್ಟು ಯುದ್ಧ ಕೋರ್ನು ಸೌಗಂಧಿಕಾ ಫುಲ್ಲ೦ ಹತ್ತಾ ಘೇವ್ನು ಯೆವ್ಚೆ ವಿಷಯು ಘಟೋತ್ಕಚನ ಸ೦ಗ್ಲೆ .
ಭೀಮ ಸೇನಾಕ ಪೊಳೊನ್ ದ್ರೌಪದಿ ಕ ಸಂತೋಷು ಝಲ್ಲೋ .ಆಶ್ರಮಾ ಭಾಯಿರಿ ದೂರ ತಾ೦ಯ್ ಯೇವ್ನುಭೀಮಸೇನಾಕ ಪ್ರೀತೀನ ಸ್ವಾಗತ್ ಕೆಲ್ಲೆ . ಸೌಗಂಧಿಕಾ ಪುಲ್ಲ೦
ದ್ರೌಪದಿ ಲೆ ಸೇರಗಾಂತು ಭರ್ಲೆ ಭೀಮ ಸೇನಾನ . ದ್ರೌಪದಿಲೆ ತೊಂಡಾರಿ ಕ್ರತಾರ್ಥ್ ಭಾವ , ಸಂತೋಷು ಪೊಳೊನ್ , ಭೀಮ ಸೇನ ಗರ್ವ ಪಾವಲೋ
ಉಮಾಪತಿ
