CHATRA PATHI SHIVAJI MAHARAJ ( yek lekhana Konkani Bhaashentu )

CHATRA PATHI SHIVAJI MAHARAJ    ( Yek Lekhana Konkani Bhashentu  ) 

                          ಸುಮಾರ .. ಕಿ . ಶ  1627 ಇಸ್ವಿ .. ವೇಳು .  ಮಹಾರಾಷ್ಟ್ರ ರಾಜ್ಯ ಬಿಜಾಪುರ ಆದಿಲ್ ಷಾಲೆ ಪಾಲನೆ೦ತು ಅಶಿಲೇ ವೇಳು . ಸ್ವಲ್ಪ ಭಾಗ ಮುಘಲ್ ಸಾಮ್ರಾಜ್ಯಾ೦ತು ಅಸ್ಸ . ಸ್ವಲ್ಪ ಭಾಗ ದಖ್ಖಣ ಸುಲ್ತಾನಾಲೆ ವಶ ಅಶಿಲೆ .   ಹೇ ವೆಳ್ಯೇರಿ ಹಿಂದೂ ರಾಜ್ಯ , ಮುಸ್ಲಿಂ ದಬ್ಬಾಳಿಕೇರಿ ಯೇವ್ನು ಮಸ್ತ್ ಲೋಕಾಂಕ ಪೊಟ್ಟಾ ವ್ಯಾಪ್ತಿ ಖತಿರಿ  ಸೈನಿಕ ಜಾವ್ನ್ ಕಾಮ  ಕೋರ್ಕಾ ಪೊಳ್ಳೇ  .. ನಾತ್ಲೆರಿ ಸುಲ್ತಾನಾಲೆ ದರ್ಬಾರಾಂತು ಅಧಿಕಾರಿ ಜಾವ್ನ್ ಕಾಮಾಕ ಮೆಳ್ಳೀ೦ತಿ . ಹೇ ಮುಸ್ಲಿಂ ರಾಯಾನಿ ಲೋಕಾಂಕ ಹಿಂದೂ ಧರ್ಮ ಸೋಣು ಮುಸ್ಲಿಂ ಧರ್ಮಾಕ  ಪರಿವರ್ತನ ಕೊರುಂಕ ಶುರು ಕೆಲ್ಲೆ . ಅನ್ಯಾಯ ಜಾವ್ನ್ ಹಿಂದೂ ಬಾಯ್ಲ್ ಮನಶ್ಯಾ೦ಕ ಉಬ್ಬಾರ್ನ್ ವೊರ್ನ್ ಮುಸ್ಲಿಂ ಚೆಲ್ಲೇಕ ದೀವ್ನ್ ವ್ಹರ್ಡಿಕ ಕೊರ್ಚೆ , ನಾತ್ಲೆರಿ ವೈಶ್ಯಾ ವಾಟೀಕೆಕ ಪ್ರಲೋಭ ಕೊರ್ಚೆ .. ಅಸಲೆ ಮಸ್ತ್ ನಮುನೆ ಅನ್ಯಾಯು ಕೊರ್ಚೆ ಅಶಿಲೆ . ಶಿವಾಜಿಲೆ ಬಪ್ಪುಸು ..  ಶಹಾಜಿ ಬೋನ್ಸಲೆ ಮರಾಠಾ ಜನರಲ್ ಜಾವ್ನ್ ದಖ್ಖಣ ಸುಲ್ತಾನಾಲೆ ಹತ್ತಾ ಮುಳಾಂತು ಕಾಮ ಕರ್ತ ಅಶಿಲೊ . ಶಿವಾಜಿ ಲೆ ಆವ್ಸು .. ಜೀಜಾಬಾಯಿ , ಲಕೂಜಿ ಜಾಧವ ರಾವ್ ಲಿ ಧೂವ ಸಿಂಧ ಖೇಡ್ ಮ್ಹಳ್ಳೆಲೆ ಜಾಗೇರಿ ದುಕೂನ್ ಆಯಿಲಿ . ಹಿಂದೂ ಧಾರ್ಮಿಕೆ ಜೀವನಾಂತು ವಿಶ್ವಾಸು ಕರ್ತಲಿ ... ದೇವಾ ವೈರಿ ಮಸ್ತ ಬಂಯ್ಯ್ ಭಕ್ತಿರಿ ಚಲ್ತಲಿ . ಸುಮಾರ 19 / 02 / 1627 ಕ ಶೀವನೇರಿ ಮ್ಹಳ್ಳೆಲೆ ಜಾಗೇರಿ ತಿಗೆಲೆ  ಸಂಬಂಧಿ ಲೋಕಾಲೆ ಘರ್ಲೆಗಿ , (ಜುನಾರ್ ಮ್ಹಳ್ಳೆಲೆ ಶಹರ ಲಗ್ಗಿ  ... ಅತ್ತ ಪೂನಾ ಜಿಲ್ಲಾ೦ತು ಆಸ್ಸಾ )   ಏಕ ದಿವ್ಯ ಘಡಿರಿ ಏಕ ಚೆಲ್ಲೆ ಚೆರಡಾಕ ಜನ್ಮು ದಿಲ್ಲೆ . ಆವ್ಸು ಬಪ್ಪುಸು ದೊಗ್ಗಯಿ 'ಶಿವೈ' ಮ್ಹಳ್ಳೆಲೆ ದೇವೀಕ ನಂಮ್ಗತಾ ಅಶಿಲೀಂತಿ . ನಿತ್ಯ ದೇವೀಲೆ ದರ್ಶನ ಕೋರ್ನು ಸುಖ ಪ್ರಸವ ಜವ್ವೋ ... ವೀರ  ಚೆಲ್ಲೇ  ಚೆರ್ಡು ಜನ್ಮಾಕ ಯೆವ್ವೋ ... ಮುಸ್ಲಿಂ ರಾಜ್ಯ ಅಂತ್ಯ ಜವ್ವೋ ಮೋಣು  ಮಾಗಣೆ ಕರ್ತಾಶಿಲೀಂತಿ . ಚೇರ್ಡಾಕ ದೇವೀ ಲೇ ನಾಂವ 'ಶಿವಾಜಿ ' ಮ್ಹಳ್ಳೆಲೆ ನಾಮಕರಣ ಕೊರ್ನ್.. ಗಾವಾಂತು ಉಂಡೊ ವಾಂಟುನ್ ಸಂತೋಷು ಭೋಗಲೀ೦ತಿ . 

                          " ಅಯ್ಯೋ ... ಅಯ್ಯೋ ... ! ಕೊಣಯ್ ಪುಣಿ ವಂಚಯಾತಿ .. ಸಹಾಯು ಕಾರ್ಯಾತಿ ... ಮಿಗೆಲೆ ಧುವೇಕ ಮುಸ್ಲಿಂ ಲೋಕು ಯೇವ್ನ್ ಉಬ್ಬಾರ್ನ್ ವ್ಹರ್ತಾತಿ ! ... ಅಮ್ಮಾ ... ಅಮ್ಮಾ ... ! ತುಕ್ಕಾ  ಕಶಿ ವಾಂಚೊಚೆ ... ! ಅಯ್ಯೋ ಕೊಣಯ್ ದರ್ಲೆ ಮನಷ್ಯ೦ ಅಸ್ಸ೦ಚಿವೇ .. ? ಮಿಗೆಲೆ ಧುವೇಕ ವಂಚಯಾತಿ ... " ಬೋಬ ಮಾರ್ತಾಚಿ ಎಕ್ಲಿ ಆವ್ಸು ಆಂಗಣಾ೦ತು  ತಾ೦ಯ್ ವೊಚ್ಚುನ್ ಮುಸ್ಲಿಂ ಸೈನಿಕಾಲೆ  ಹಾತು ಧೋರ್ನ್ ತಂಡಿಲೆ ... ಧುವೇಕ ವಾಂಚೊಚೆ ಖತೀರಿ ಶತ ಪ್ರಯತ್ನ ಕೆಲ್ಲೆ . ಸೈನಿಕಾಲೆ ಪಾಯು ಧಡ್ಡನೆ ಕುರ್ಟಾರಿ ಮಸ್ತುನ್ ತಿಕ್ಕಾ ದೂರ ಕರ್ತಾನಾ ... ಜಲ್ಲೆಲೆ ಅವಮಾನ ... ಅನ್ಯಾಯ ದೊಳೆ ಎದ್ರಾಕ ಝತ್ತಾನಾ ... ದುಃಖ ತಡಸೂನ್ ಘೆವ್ಚ್ಯಾ ಜಾಯ್ನಿ ... ದೀನ ಜಾವ್ನು ಸರ್ವಾಂಕ ಪೊಳೈಲೆ . ಸಜ್ಜರಿ ಲೊಕು ಸೈನಿಕಾಂಕ ಪೊಳೊನ್ ಜೀವಾ ಆಶಿರಿ ಕೊಣಾಯ್ ಮುಕಾರಿ ಏನಿಂತಿ . ಜೀಜಾಬಾಯಿ ಕೋಪಾರಿ ಕಡ್- ಕಡ್ಲಿ ದಾಂತ ಚಬ್ಬುನ್ ... ದೇವಾ ಅಸಲಿ ಅಧರ್ಮಿ ಮುಸ್ಲಿಂ  ಲೋಕಾಲೆ ವಂಶ ನಿರ್ನಾಮ ಜವ್ವೋ  ... ಹಿಂದೂ ರಾಜ್ಯ ಸ್ಥಾಪನಾ ಜವ್ವೋ ಅಂಬಾ ಭವಾನಿ ! ... ತುಗ್ಗೆಲ್ ವೈರಿ ಆಣ ... ಮಿಗ್ಗೆಲೆ ಪುತ್ತಾಕ ಹಿಂದೂ ರಾಜ್ಯ ಬಂಧೂಕ ಸರ್ವ ಪ್ರಯತ್ನ ಕರ್ತಾ ... ಮಕ್ಕಾ ಆಶೀರ್ವಾದ ಕರಿ ... ಮಿ ಗೆಲೆ ಪುತ್ತಾಕ ಶಕ್ತಿ ದೀ ಭವಾನಿ ... ಜಗದಂಬಾ ... ಶಿವಾತ್ಮಿಕೆ .... ದೊಳೆ ಧ೦ಕ್ಲೆ . 

                             ಜೀಜಾಬಾಯ್ ನ ಚೇರ್ಡಾಕ ಮಹಾಭಾರತ್ , ರಾಮಾಯಣಾ ಕಾಣಿ ಸಂಘುನ್ ... ಚಾಂಗ ವಾಯಿಟ , ರಾಜಧರ್ಮ , ಹಿಂದೂ ಧರ್ಮ , ಜೀವನ ಧರ್ಮ ... ಅವತಾರಾ ಕಾರಣ .. ಸಂಘುನ್ ..." ತು ರಾಯು ಜಾವ್ಕಾ ಶಿವಾ.. ಹಿಂದೂ ರಾಜ್ಯ ಬಂಧುಕಾ ಹೇ ಮಿಗೆಲೆ ಅಂತಃ ಕರುಣಾ ಪ್ರಾರ್ಥನಾ " ಮೋಣು  ನಿತ್ಯ ಪ್ರೋತ್ಸಾಹ ಕರ್ತಶಿಲಿ . ಶಿವಾಜಿಲೆ ಮನಾಂತು ಘಲ್ಲೆಲಿ ಬೀ ... ಆಜಿ ಝಾಢ ಜಾವ್ನು ವೃಕ್ಷ ಝಲ್ಲಾ .  ಷಹ ಜಿನ ... ಶಿವಾಜಿ ಕ ಅನಿ ಜೀಜಾಬಾಯಿಕ ಶಿವನೇರಿ ಮ್ಹಳ್ಳೆಲೆ ಜಾಗೇರಿ ಹಾಣು ದಾದಾಜಿ ಕೊಂಡದಿಯೋ ಮ್ಹಳ್ಳೆಲೆ ಸಂಬಂಧಿಲೆ  ಘರ್ಲೆಗಿ .. ಮುಕಾವೈಲ್ ಶಿಕ್ಷಣಾಕ ಬಂದೋಬಸ್ತ್ ಕೆಲ್ಲಾ . ಸಮರ್ಥ ರಾಮದಾಸ್ ತಸಲೆ ಮಹಾನ್ ಗುರು ಶಿವಾಜಿ ಕ ಮೆಳ್ಳಾ . ಗುರುಲೆ  ಪ್ರೇರಣಾ , ಆಶೀರ್ವಾದಾ ನಿಮಿತ್ಯ ಶಿವಾಜಿ ಕ ಮಿತ್ರ ವೃಂದ ವಡ್ಡತ ಗೆಲ್ಲೆ . ಯೇಸಾಜಿ ಕ೦ಕ್ , ಸೂರ್ಯಾಜಿ ಕಾಕಡೆ , ಬಾಜಿ ಪಸಾಲ್ಕರ್ , ಬಾಜಿ ಪ್ರಭು ದೇಶಪಾಂಡೆ , ತಾನಾಜಿ ಮಲುಸಾರೆ ... ಅಸಲೆ ಜೀವು ದಿತ್ತಲೆ ಮಿತ್ರ ವೃಂದಾ ಘೇವ್ನ್ ಸಹ್ಯಾದ್ರಿ ಪರ್ವತ ರನ್ನಾ ಪ್ರಾಂತ್ಯಾ೦ತು ಗೂವ್ನ್ ಯುದ್ಧ ಕುಶಲತಾ , ರಣವಿದ್ಯಾ ಶಿಖ್ಲೋ . ದಾದಾಜಿ ಕೊಂಡದಿಯೋನ  ಶಿವಾಜಿ ಕ ಪೂರ್ತಿ ಶಕ್ತಿ ಶಾಲಿ ಯೋಧ ಜಾವ್ಚ್ಯಾಕ ಪ್ರೇರಣ ಕೆಲ್ಲಿ . ತೋರಣ ಘಡ , ಚಕನ್ ಘಡ , ಕೊಂಡನ್ ಘಡ್ , ರಾಜ್ ಘಡ್ ,ಸಿಂಹ ಘಡ್ , ಪುರಂದರ್ ಘಡ್ , ದಕ್ಷಿಣ ಭಾರಥಾಂತು ತಂಜಾವೂರ್ ತಾಯ್ಯ್ ಮರಾಠಾ ರಾಜ್ಯ ವಿಸ್ತಾರ ಕೆಲ್ಲೆ . ತ್ಯೆ ಕಾಲಾಂತು ಇಂಗ್ಲಿಷ್ , ಫ್ರೆಂಚ , ಡಚ್ಚ ,ಪೋರ್ಚುಗೀಸ್ ಭಾರತ್ ಪ್ರವೇಶ ಘೆತ್ತಿಲೆ ನಿಮಿತ್ಯ ಎಕ್ಲ್ಯಾ..  ಎಕ್ಲೇಕ ಪೈಪೋಟಿ ಅಶಿಲೆ . ಶಿವಾಜಿನ ಸರ್ವಾಂಗೆಲೆಗಿ ಸಾಮಾನ್ಯ ವ್ಯವಹಾರ್ ದೊವೋರ್ನು ಘೇವ್ನು ತಂಗೆಲೆ ಯುದ್ಧ ರೀತಿ , ತೋಪು , ಫಿರಂಗಿ ಮೊಲ್ಲಾ ಘೇವ್ನ್ ಸುಲ್ತಾನ ರಾಯಾಂಕ ದೂರ ದವರ್ಲೆ . ಮಚ್ವೊ , ಹೊಡಿ ದೋಣಿ೦ಯೊ  ಮೊಲ್ಲಾ ಘೇವ್ನು ಮರಾಠಾ ನೇವಿ ಬಂಧಿಲೆ ಪ್ರಪ್ರಥಮ ಪ್ರಶಂಸಾ ಶಿವಾಜಿ ಕ ವತ್ತಾ  .  ಸಿಂಧ ದುರ್ಗ , ಕಾರವಾರ್ , ಖ೦ದೇಶ್ , ಪೊಂಡಾ , ಕೊಂಕಣ್ ಸ್ಥಾನ ..  ಮರಾಠಾ ನೇವಿಚೆ ಮುಖ್ಯ ಸ್ಥಾನ ಜಾವ್ನ್ ಅಶಿಲೆ   ... ಎಕ್ಕಾ  ಮಾಕ್ಷಿ ಏಕ ಪ್ರದೇಶ ಶಿವಾಜಿಲೆ 'ಹಿಂದವೀ ಸ್ವರಾಜ್ಯ' ಮುಳಾ೦ತು ಅಯಿಲೆ . ಶಿವಾಜಿನ ತಾಗೆಲ್ ರಾಜ್ಯ ಪರಿಪಾಲನ ಕೊರ್ಚೆ ಖಾತಿರಿ  8 ಜನ ಮಂತ್ರಿ ಲೋಕಾಂಕ ನಿಯುಕ್ತ ಕೆಲ್ಲೆ . ಮುಖ್ಯ ಪ್ರಧಾನಿ , ಅಮಾತ್ಯ , ಸಚಿವ ಗುಪ್ತಚರ ವಿಭಾಗ , ಸುಮಂತ , ನ್ಯಾಯಾದೇಶ , ಪಂಡಿತ್ ರಾಜ ಪುರೋಹಿತ್ ... ಹನ್ನಿ  ರಾಜ್ಯ ಭಾರ ಸುಗಮ ಜಾವ್ನು ಚೋಲ್ಚ್ಯಾಕ ಶಿವಾಜಿ ಕ ಸಹಾಯು ಕರ್ತಾಶಿಲೀಂತಿ .  1640 ತು ಶಿವಾಜಿ ನ 'ಸಾಯಿಬಾಯಿ ' ನಿಂಬಾಳ್ಕರ್ ಕುಟುಂಬೆ  ಚೆಲ್ಲಿಯೇಕ ವ್ಹರ್ಡಿಕ ಕೆಲ್ಲಿ.  ಜಾವಳಿ ಘಾಟಿ .. ಅತ್ತಚೆ ಮಹಾಬಲೇಶ್ವರ 1656 ಕ ಶಿವಾಜಿ ನ ತಾಗೆಲ್ ರಾಜ್ಯ ಕೊರ್ನ್ ಘೆತ್ಲೆ . ಶಿವಾಜಿನ  ರಾಜ್ಯಾ೦ತು ಮರಾಠಿ ಭಾಷ ಆನಿ ಸಂಸ್ಕೃತ ಭಾಷ ಮುಖ್ಯ  ಭಾಷ ಜಾವ್ನು ಹಳ್ಳೆ . ಸಮರ್ಥ ರಾಮದಾಸು ಶಿವಾಜಿ ಕ ಹಿಂದೂ ರಾಜ್ಯ ಬಂಧೂಕ ಪೂರಾ ನಮುನೆ ಸಹಕಾರ್ ಕೆಲ್ಲೊ . 

ಏಕ ಪೋಟಿ ಶಿವಾಜಿ ಗುರು ರಾಮದಾಸಾ ಲಗ್ಗಿ ವೊಚ್ಚುನ್ .. " ಗುರುದೇವಾ ಹಾಂವ ಹ್ಯೇ ಹಿಂದೂ ರಾಜ್ಯ ಸ್ಥಾಪನೆ೦ತು ಸೊಲ್ವಲೋ ... ಮಿಜ್ಜೇನ ಆನಿ ಯುದ್ಧ ಕೊರ್ಚೆ ಸಾಹಸ , ಧೈರ್ಯ ಅಂಗಾಂತು ಕಾ೦ಯಿ ವ್ಹರ್ನಿ ದೇವಾ ... ಮಕ್ಕಾ  ಮುಕಾರಿ ಸನ್ಯಾಸ ಘೆವ್ಕಾ ಮೋಣು ಮನಾ ದಿಸ್ತಾ ..  ಮಿಗೆಲಿ ಪಾಗ್ಡಿ ತುಗ್ಗೆಲ್ ಚರಣಾಂಕ ಅರ್ಪಿತ ಕರ್ತಾ ಸ್ವೀಕರು ಕೋರ್ನು ಮಕ್ಕಾ ವಿಮುಕ್ತಿ ಕರಿ ... " ಮ್ಹಳ್ಳಲೊ . ಗುರು ರಾಮದಾಸು ಚಿರು ಹಾಸು ತೊಂಡಾರಿ ಹಾಣು ... ಕೃಷ್ಣ  - ಅರ್ಜುನಾಲೆ ಗೀತಾ ಸಂವಾದು ಸಂಘುನ್ ಸಮಾಧಾನ ಕರ್ತಾ ... " ಶಿವಾಜಿ ಬಾಳಾ .. ! ತುಗೆಲಿ ರಾಜ ಪಾಗಡಿ ಸ್ವೀಕರು ಕರ್ತಾ ... ಅನಿ ಮುಕಾರಿ ಹಾಂವ ಮರಾಠಾ ರಾಯು .. ತು ಮಿಗೆಲೆ  ಸೇವಕು ... ತು ಮಿಗೆಲೆ ರಾಜ್ಯ ದಂಡ ನಾಯಕು ... ವಸ ಧೈರ್ಯಾರೀ ವಸ ಮಿಗೆಲೆ ನಾವಾರಿ ರಾಜ್ಯ ಪರಿಪಾಲನ ಕರಿ " ಮೋಣು  ಆದೇಷು ದಿಲ್ಲೊ . ಗುರು ದೇವಾಲೆ ಉತ್ತರಾಂತು ಭಾವುಕ ಝಲ್ಲೋ ಶಿವಾಜಿ .. ಮನಾ ಧೈರ್ಯ ಅಯಿಲೆ ... " ಜೈ ಭವಾನಿ " ಮೋಣು ಉದ್ಗಾರು ಕಳ್ಳೆ . 

ಸುಮಾರ ಕ್ರಿ . ಶ   1657 ತು , ಆದಿಲ್ ಶಾಹ್ ನ ' ಆಫ್ಝಾಲ್ ಖಾನ್ ' ಮ್ಹಳ್ಳೆಲೆ ಸೇನಾಪತಿ ಕ ಶಿವಾಜಿಲೆ ಸೊಕ್ಕು ಮೊಡ್ಕಾ ಮೋಣು ಪ್ರತಾಪ್ ಘಡ್  ದಿಕಾನ ಶಿವಾಜಿ ಕ ಜೀವಂತಿ ಬಂಧಿ ಕೋರ್ಕಾ ಮೋಣು ,  ದೀವ್ನ್ ಪೆಟಯಿಲೊ .. 50,000 ಸೈನ್ಯ ಘೇವ್ನ್ ಅಫ್ಝಲ್ ಖಾನ್ ಸುರ್ವೆಕ ಪಂಢರಪುರ ದೇವಳ , ತುಳ್ಝಾ ಭವಾನಿ ದೇವಳ ಲೂಟಿ ಕೊರ್ನ್ ಶಿವಾಜಿ ಕ ಸೊದ್ದುನ್ ಪ್ರತಾಪ್ ಘಡ ಕ ಅಯಿಲೊ . ಆಫ್ಝಲ್ ಖಾನಾಲೆ ಸೈನ್ಯ ಸುಸಜ್ಜಿತ ... ಹಸ್ತಿ , ಘೋಡೆ , ಫಿರಂಗಿ , ತೋಪು , ಬಂದೂಕ ಘೇವ್ನ್ ಪ್ರತಾಪ್  ಘಡ ಸುತ್ತು ಘಾಲ್ನ್ ರಾಬ್ಲ್ಲೊ . ಫಿರಂಗಿ ಗುಂಡು ಢಮಾರನಿ ಖಿಲಾಚೆ ಬುರುಜಾಕ ಲಾಗ್ತಾನಾ ಹರ್ದೆ  ಭೀವ್ನ್ ಉಡ್ಚೆ ತಶೀ ಝತ್ತಲೆ . ಶಿವಾಜಿ ನ ತಾಗೆಲ್ ಸೈನ್ಯ ಚಾರಿ ತುಕುಡಿ ಕೋರ್ನ್ ಚಾರಿ ದಿಕಾನ ರಕ್ಷಣ್ ಕೋರ್ಚ್ಯಾಕ ರಬ್ಬಯಿಲೆ . ಖಿಲಾ ವೈರಿ ದುಕೂನ್ ಫಿರಂಗಿ ಗುಂಡು ಪಾವ್ಸು ಶೇ ರಕಯಿಲೆ . .. ಕೊಣಾಚ್ಯಾನಯಿ ಖಿಲಾ ಪಾಗೋರು , ದ್ವಾರ

 ಭೆತ್ತುಂಕ ಜಾಯ್ನಿ . ದೋನಿ  ಮಹಿನೆ ತಾಂಯ್ ಕಾಯೀ ಕೋರು ಜಾಯ್ನಿ . ಆಖೇರಿಕ ಆಫ್ಝಲ್ ಖಾನಾನ ಶಾಂತಿ ದೂತ ಶಿವಾಜಿ ಲಗ್ಗಿ ಪೆಟಯಿಲೆ . ಕೀ ... ' ದೊಗ್ಗಯಿ ನೇತಾ ಖಿಲಾ ಭಾಯಿರಿ ಏಕ  ಜೋಪಡಿ೦ತು ಮೇಳ್ಕಾ ... ಯೆತ್ತಾನಾ ಎಕ್ಲೊ ಮಾತ್ರ ಅಂಗ ರಕ್ಷಕು ಅಸ್ಸುಕಾ , ಕುರಟಾರಿ  ಖಡ್ಗ ಅಸ್ಸುಯೇತ .. ಇತ್ಯಾದಿ . ಶಿವಾಜಿ ಲೆ ಮನಾಂತು ತುಳಜಾ ಭವಾನಿ , ಪಂಢರ ಪುರ ನಿಧಿ ಲೂಟಿ ... ಮೆಳ್ಳೆಲಿ ಪೈಶಾಚಿಕ ವರ್ತನಾಚೆ  ವಾರ್ತಾ ಅನಿಕಾಯ್ ತಾಜಾ ಜಾವ್ನ್ ಅಸ್ಸ . ಅಸಲೆ ಕ್ರೂರಿ ಹೇ ಪಿಶಾಚಿಕ ಆಶೀ ಸೊಡುಂಕ ನಜ್ಜ ಮೋಣು ... ದಾವೆ ಹತ್ತಾ ಕ ವ್ಯಾಘ್ರ ನಖ ಅಸ್ತ್ರ ಲಾವ್ನ್ ಘೆತ್ಲೆ . ಬಾಯ್ಲಚ್ಯಾನ ಹತ್ತಾಕ ಘಲ್ಲೆಲಿ ಮುದ್ದಿಶೀ ದಿಸ್ತಾಶಿಲೆ . ಏಕಿ ಸಾನಿ ಖಠಾರಿ  ಉಜ್ವೇ  ದಿಕಾನ ನಿಪ್ಪೋನ್ ದವರ್ಲೆ . ಕ್ರಿ . ಶ 10 / 11 / 1659 ದಿವಸು ಶಿವಾಜಿ ಅಫ್ಝಲ್ ಖಾನಾಕ ಮೆಳ್ಚೆ ಖತಿರಿ , ತಾಣೆ ಸಂಘಿಲೆ ಜಾಗೇರಿ ಯೇವ್ನ್ ಪಾವತಾ . ಏಕ ರುಕ್ಕಾ ಮುಳಾಂತು ,  ಸಾನ ಜೋಪಡಿ ಹಾಂಗೇಲೆ ಖತಿರಿಚಿ ಬಂಧ್ಲಾ . ಅಫ್ಝಲ್ ಖಾನಾನ ಶಿವಾಜಿ ಲೆ ಅಂಗ ರಕ್ಷಕಾಕ ದೂರ ರಾಬ ಮೋಣು ದೊಳೆನಿ ಸನ್ನಿ ಕೆಲ್ಲಿ . ಉಠಾನ್ ಯೇವ್ನ್ ಶಿವಾಜಿಕ ಸ್ವಾಗತ ಕೆಲ್ಲೆ . ಶಿವಾಜಿನ ಆಜಾನು ಭಾಹು ಅಫ್ಝಲ್ ಖಾನಾಕ ಪೋಳಯಿಲೆ . ಮುಸಲ್ಮಾನ್ ಪಠಾಣ್ ಅಫ್ಝಲ್ ಖಾನಾ ಎದ್ರಾಕ ಶಿವಾಜಿ ಸಾನು ಚೆಲ್ಲೊ , ಗುಡ್ಡೋ ಶೀ ದಿಸ್ಲೊ .   " ತುಂವೆ ಹಾಂಗಾ ಯೆವ್ಚೆ ಫೂಡೆ ಪಂಡರಾಪುರ ವಿಠೋಬಾ ದೇವಳ , ಅನಿ ತುಳಜಾ ಭವಾನಿಲೆ  ಭಂಗರ ನಗ ನಾಣ್ಯ ಲೂಟಿಕೆಲ್ಲಾ ಮೋಣು ಅಯ್ಕಲಲೊ ... ತ್ಯೆ ಸರ್ವಸ್ವ ಮಕ್ಕಾ ವಾಪಸ್ ಕೋರ್ಕಾ ... ಅಂಮ್ಕಾ ಹಿಂದೂ ಲೋಕಾಂಕ ತ್ಯೆ ಪವಿತ್ರ ... ತು೦ಮ್ಕಾ ಮುಸ್ಲಿಂ ಲೋಕಾಂಕ ಕ್ಷುಲ್ಲಕ ಜಾವ್ನ್ ಆಸ್ಚ್ಯಾ ಪೂರೋ ... ತ್ಯೆ ನಂತರ ದೇವಳ ವಾಪಾಸ್ ಜೀರ್ಣೋದ್ಧಾರ ಕೊರುಂಕ ವೀಸ್ ಹಜಾರ ಭಂಗರಾ ನಾಣ್ಯ ದೀವ್ಕಾ ... ಹೇ ಕಬೂಲ್ ಅಸ್ಲೆರಿ ಮುಕಾವೈಲೆ ವಿಷಯು ಚರ್ಚೆ ಕೊರ್ಯಾ ... " 

ಅಫ್ಝಲ್ : " ಕಾಫೀರ್ ... ! ಕಸಲೆ ಮ್ಹಳ್ಳೆ ... ಲೂಟಿ ಕೆಲ್ಲೆಲೆ ಭಂಗರ ವಾಪಸ್ ದೀವ್ನ್ ... ವೀಸ ಹಜಾರ ಭಾಂಗ್ರಾ ನಾಣ್ಯ ... ! ಸಾಧ್ಯ ನಾ .... ಹಾಂವ ಆಯ್ಯಿಲೊ ತುಕ್ಕ ಬಂಧಿ ಕೋರ್ನು ಬಿಜಾಪುರಾ ಕ ಅಪ್ಪೋನ್ ವ್ಹೊರುಂಕ ... ತ್ಯೆ ಮಾತ್ರ ನಯ್ ... ಪ್ರತಾಪ್ ಘಡ್ , ಸಿಂಹ ಘಡ್ , ರಾಜ ಘಡ್ , ಪುರಂದರ ಘಡ್ ಅಂಮ್ ಕಾ ಸೋಣು  ದೀವ್ಕಾ ... ನಾ ಜಲ್ಲೇರಿ ... ತೂ ಜೀವಂತಿ ಅಸ್ಸ ನಾ .. " ಆಫ್ಝಾಲ್ ಖಾನ್ ಲೆ ಹಾತು ಖಡ್ಘಾ ವೈರಿ ಗೆಲ್ಲೊ . ಝಗ್ಗನಿ ಮಿಂಚು ಸೋ ಶಿವಾಜಿ ಉಠಾನ್ ವ್ಯಾಘ್ರ ನಖ ಆಫ್ಝಾಲ್ ಖಾನಾಲೆ ಪೊಟ್ಟಾಂತು ದೇವಯಿಲೆ ... ಉಜ್ವೇ   ಹತ್ತಾ೦ತು ಖಠಾರಿ ಘೇವ್ನು ಆಫ್ಝಾಲ್ ಖಾನಾಲೆ ಗಳೊ ಕತ್ತರ್ಲೆ . ದೋನಿ  ಮಿನುಟಾ ಭಿತರಿ ಅಷ್ಶಿ  ಭಯಾನಕ್ ಜಾವ್ನ್ ಆಫ್ಝಾಲ್ ಖಾನಾಲೆ ಮರಣ ಝತ್ತ ಮೋಣು  ಕೊಣಾಯ್ ಲೆಕ್ಕನಿ . ದೂರ ರಬ್ಬುನ್ ಅಶಿಲೆ ಮರಾಠಾ ಸೈನ್ಯ ಖಾನಾಲೆ  ಸೈನ್ಯಾಕ ಧ್ವ೦ಸ ಕೆಲ್ಲೆ . ಜೀವಂತಿ ಅಶಿಲೆ ಸ್ವಲ್ಪ ಲೋಕು ಧಾ೦ವ್ನ್ ಗೆಲ್ಲೆ . ಕ್ರಿ . ಶ 1674 ಇಸ್ವಿ೦ತು ಶಿವಾಜಿ ಕ ಪಟ್ಟಾಭಿಷೇಖ ಕೋರ್ನು " ಛತ್ರಪತಿ " ಮೋಣು  ಬಿರುದಾಂಗಿತ ಕೆಲ್ಲೆ ಮೋಣು  ಚರಿತ್ರ ಸಂಘತಾ . 

ಶಿವಾಜಿ ಭೋನಸ್ಲೆ ... ಶಿವಾಜಿ ಮಹಾರಾಜ್ ... ಹಿಂದೂ ರಾಯು ... ಮರಾಠಾ ಪುತ್ರ ...  ಹಿಂದೂ ಲೋಕಾಲೆ ಸಂಘಟನಾ ಖತಿರಿ ಅಷ್ಶಿ  ರಾಜ್ಯ ಸ್ಥಾಪನಾ ಕರ್ತಾಲೊ ಮೋಣು ಕೊಣಾಯ್ಯ್ ಲೆಕ್ಕನಿ . ಮುಕಾರಿ ಔರಂಗಜೇಬ್ ಮುಘಲ್ ರಾಯಾಲೆ ವೊಟ್ಟು ಯುದ್ಧ ಕೊರ್ನ್ , ತಾಗೆಲ್ ಥಾನಾಶಾಹಿಕ ಧಿಕ್ಕಾರ ಕರ್ತಾ . ಔರಂಗಜೇಬಾಲೆ  ರಜಪೂತ ಮಿರ್ಜಾ ...,   ರಾಜಾ ಜೈಸಿಂಗ್ ಪುರಂದರಘಡಾ ವೈರಿ ಆಕ್ರಮಣ ಕೊರ್ನ್ ಶಿವಾಜಿ ಕ ಪರಾಜಿತ್ ಕರ್ತಾ . ಶಿವಾಜಿ ಆನಿ ತಾಗೆಲ್ ಪೂತು ಸಾಂಬಾಜಿ ಕ ಬಂಧಿ ಕೊರ್ನ್ ಆಗ್ರಾಂತು ಔರಂಗಜೇಬಾಲೆ ಬಂಧಿ ಖಾನೇ೦ತು ದೊವೊರ್ಚೆ ತಶಿ ಕರ್ತಾ . ಶಿವಾಜಿ ಆಗ್ರಾ ಬಂಧೀ ಖಾನೆ  ದುಕೂನ್ ಚುಕ್ಕೋನ್ ಘೇವ್ನ್ ತಾಗೆಲ್ ರಾಜ್ಯಾಕ ವಾಪಾಸ್ ಯೆತ್ತಾ . ಮಾತ್ರ ಔರಂಗಜೇಬ್ , ಸಾಂಬಾಜಿ ಕ ಮುಸ್ಲಿಂ ಧರ್ಮಾ ಕ ಪರಿವರ್ತನಾ ಕೊರುಂಕ  ಚಿತ್ರ ಹಿಂಸಾ ದಿತ್ತಾ . ಧಗ ಧಗ ನೇ ಜೋಳ್ಚೆ ಉಜ್ಜೇ೦ತು ಘಾಲ್ನ್ ಆಂಗ ಲಾಸ್ಸುನ್ ಘಾಲ್ತಾ . ಮರಾಠಾ ವೀರ ಸಾಂಬಾಜಿ ಮಾತ್ರ ಔರಂಗಜೇಬಾಕ ಥುಚ್ಚ ಜಾವ್ನ್ ... ಜೀವಾ ಹಂಗು ನಾಶಿ ವಿರೋಧ ಕರ್ತಾ . ಜೀವನ್ ಭರಿ ಶಿವಾಜಿ ಹಿಂದೂ ಸಾಮ್ರಾಜ್ಯ ವಾಂಚೊಚೆ ಖತಿರಿ ಯುದ್ಧ ಕೋರ್ಕಾ ಪೊಳ್ಳೆ .  ಡಚ್ , ಇಂಗ್ಲಿಷ್ , ಫ್ರೆಂಚ್ , ಪೋರ್ಚುಗೀಸ್ ಹಾಂಗೇಲೆ ವೊಟ್ಟು  ಯುದ್ಧ ಕೊರ್ನ್ ಶಿವಾಜಿ , ಪ್ರಥಮ ಸ್ವಾತಂತ್ರ್ಯ  ಸೇನಾನಿ ಮೊಣೋ ನ್ ಘೆತ್ತ . ಸುಮಾರ ಕ್ರಿ . ಶ .  3 / 4 / 1680 ಅನಾರೋಗ್ಯಾ ನಿಮಿತ್ಯ ಶಿವಾಜಿಲೆ  ಮರಣ ಝತ್ತಾ . 

ಉಮಾಪತಿ 

               

                                              
 

Bandha Anubandha Kutumbentu ( Konkani Vicharu )

Bandha anubandha Kutumbentu  ( Konkani Vicharu )

ಬಂಧ ಅನುಬಂಧ ಕುಟುಂಬೆಂತು  ( ಕೊಂಕಣಿ ವಿಚಾರು ) 

                                    ಚೆಲ್ಲೋ ಚೆಲ್ಲಿ ಏಕ ಪ್ರಾಯೇರಿ ಯೇವ್ನ್ ಪಾವ್ಲೆ ನಂತರ ತಂಕಾ ' ವಿವಾಹ ' ಮ್ಹಳ್ಳೆಲೆ ಏಕ ಬಂಧ ನಾಂತು ಒಟ್ಟುಕೊರ್ನ್ ಜತ್ತರಿ  ಗ್ರಹಸ್ಥಾಶ್ರಮಾಕ ಪಾಯು ದವರ್ತಾತಿ . ವ್ಹರ್ಡಿಕೆ ವೆಳ್ಯೇರಿ ಯಾಕ ಲಾಯೆಕ್ ಮುಹೂರ್ತ್ ಪೋಳೋನು , ಮಾಲಾರ್ಪಣ , ಸಪ್ತಪದಿ ಇತ್ಯಾದಿ ನಿಶ್ಚಯ ಝತ್ತ . ಕಿತ್ಲೆಕೀ ಪಂಕ್ತಾ ಚೆಲ್ಲಿಯೇನ ಮಾಲಾರ್ಪಣ ಕೋರು ವತ್ತನಾ ಚೆಲ್ಲೋ ಮತ್ತೆ ಅನಿಕಾಯ್ ವೈರಿ ಕೊರ್ಚೆ ... ದೋಸ್ತ್ ಲೋಕಾನಿ ಚೆಲ್ಲೇಕ ಉಬ್ಬಾರ್ನ್ ಅನಿಕಯ್ ಸಂಕಟ ಹಾಡೊಚೆ ಮಂಟವೆಂತು ಝತ್ತಾ . ವೇಳು , ಕಾಲು , ಮುಹೂರ್ತ ಕೊಣಾ ಲಗ್ಗಿ ನಿಂಮ್ಗೂನ್ ರಬ್ಬನಾ . ವಿವಾಹ ಶುಭ  ಮುಹೂರ್ತಾರಿ ಲಗ್ನ ಜಾವ್ಕಾ . ಚೆಲ್ಲೆನ ನೆಲಾರಿ ರಬ್ಬುನ್ ಮಾಲಾರ್ಪಣ ಸ್ವೀಕಾರ ಕೋರ್ಕಾ , ಮತ್ತೆ ಬಗ್ಸೂನ್ ಮರ್ಯಾದಿ ದೀವ್ನ್ .. ಚೆಲ್ಲಿಯೇನ ಘಾಲ್ಚೆ ಸ್ವಯಂವರ ಮಾಳ  ಸ್ವೀಕಾರ ಕೋರ್ಕಾ ಹೇ ಕ್ರಿಯಾ , ದೇವಾಕ ದಿವ್ಚೆ ಮರ್ಯಾದಿ .. ಪ್ರಾರ್ಥನಾ ಮೋಣು ಲೆಕ್ಕುಕಾ .. " ಹೇ  ದೇವಾ .. ! ಮಿಗೆಲೆ  ವೈವಾಹಿಕ ಜೀವನ ಸುಖಮಯ ಜವ್ವೋ " ಮೋಣು ಪ್ರಾರ್ಥನಾ ಕೊರ್ಚೆ ಘಡಿ . ಮುಕಾರಿ ಪುಣಿ ಚೆಲ್ಲೆ ಮರ್ಯಾದಿ ದೀವ್ನ್ .. ಮತ್ತೆ ಬಗ್ಸೂನ್ ಮಾಲಾ ಸ್ವೀಕಾರ ಕರ್ತಾಲೆ ಮೋಣು ಆಶಿ ಪಾವ್ತಾ . ಕನ್ಯಾದಾನ ವೆಳ್ಯೇರಿ ... ಆವ್ಸು ಬಪ್ಪುಸು ದೊಳೆ ಉದ್ದಾಕ ಕಾಣು ಪ್ರೀತಿ ಮಮತಾ ಅಂತಾ ಗಾಂಟಿ ಸೊಡ್ವಾನು ಕನ್ಯಾ ದಾನ ಕರ್ತಾತಿ . ಪೊಳೈತಲೆ ಲೋಕಾಂಕ ದಿಸ್ಸನಾ ... ಅನುಭವಾರಿ ಮಾತ್ರ ಕೊಳ್ಚೆ ವಿಷಯು .         

                          ಹಾಂಗಾ ದುಕೂನ್ ತಂಗೆಲೆ ಕುಟುಂಬ ಜೀವನ ಆರಂಭ ಝತ್ತಾ . ಜಾತಕಾ ಮೇಳಾ ಮೇಳಿ , ಗೃಹ ಮಿತೃತ್ವ , ಮುಕಾವೈಲೆ ಜೀವನ ಸ್ತಿಥಿ ಕಷ್ಶಿ ಆಸ್ತಲೆ ಮೋಣು ಅಂದಾಜೋ ಕೋರ್ನು ಮಲಘಡೆ ನಿಶ್ಚಿತಾರ್ಥ ಕರ್ತಾತಿ . ಪ್ರಕೃತಿ ನ ದಿಲ್ಲೆಲೆ ಏಕ ಮಹಾ ಕಲಾ ಕೃತಿ " ಕುಟುಂಬ " . ಬಾಯ್ಲ್  ಬಾಮ್ಮುಣು ಜಾವ್ನ್ ಜೀವನ ಕಷ್ಶಿ ಆಸ್ತಾಲೆ    ನಕ್ಷತ್ರ .. ನವ ಗೃಹ ಚಲನ ಪರಿಣಾಮ ಪೊಳೊನ್ ಕುಟುಂಬ ಕ್ಶಶಿ ಮುಕಾರ್ಸುನ್ ವತ್ತಲೆ ... ? ಕಿತ್ಲೆ ಕಷ್ಟ ಸುಖ ಪಾವ್ತಾಲೆ .. ? ಮೋಣು ಲೆಕ್ಕಾಚಾರ ಘಾಲ್ನ್ ವಿವಾಹ ಕಾರ್ಯಾಕ ಮುಕಾರ್ಶಿತಾತಿ . ಅದೃಷ್ಟ ಕಿತ್ಲೆಯ್ ಚಾಂಗ ಅಸ್ಲೆರಿಯಿ .. ಕಿತ್ಲೆಯ್ ಕಷ್ಟ ಪಾವಲೆರಿಯಿ ... ಬಾಯ್ಲೆಲೆ ಸಹಕಾರ ನಾಶಿ ಮುಕಾರ್ಸುನ್ ವೋಚ್ಚಾ ಜಾಯ್ನಾ. ತಿಗೆಲೇಯ್ ಜಾತಕಾ ಫಲ ಜೀವನಾಂತು ಏಕ ಪ್ರಮುಖ ಪಾತ್ರ ಘೇವ್ನ್ ಯೆತ್ತಾ . ಬಮ್ಮಣಾಲೆ ಆದಾಯ , ಘರಾಖರ್ಚು , ಪೊಳೊನ್ ಅಗತ್ಯ ನತ್ತಿಲೆ ಖರ್ಚು ಊಣೆ ಕೋರ್ನ್ ಘರಾ ಚಲಾಯಿಸುನ್ ವ್ಹರ್ತಲಿ ಬಾಯ್ಲ್ ಮೆಳ್ಳೇರಿ ಪುಣ್ಯ . ಪ್ರತೀ ಬಮ್ಮಣಾನ ... ತಗೆಲಿ ಬಾಯ್ಲ್ ..  ತಾಗೆಲ್ ಆಮ್ಮಾಲೆ ರೂಪ ಮೋಣು ಲೆಕ್ಲೇರಿ ..  ಮರ್ಯಾದಿ ದೀವ್ನ್ , ತೀಣೆ ಸಂಘಿಲೆ ತಶೀ  ಘರಾ ಮರ್ಯಾದಿ ರಾಕ್ಲೇರಿ ...ತಶೀ೦ಚಿ ಪ್ರತಿ ಬಾಯ್ಲೆನ , ತಿಗೆಲೊ ಬಾಮ್ಮುಣು .. ತಿಗೆಲೊ ಮಲಘಡೊ ಪೂತು ಮೋಣು ಆಪ್ಯಾಯತಾ ದಕ್ಕಯಿಲ್ಯಾರಿ ತ್ಯೆಚಿ ಜೀವನ ಮಧುರ ಜೀವನ ,ಮಧುರ  ಬಂಧನ್  ಮೊಣೋನ್ ಘೆತ್ತಾ . ಬಮ್ಮಣಾಲೆ ಸೇವಾ ಕೊರ್ಚೆ ಮ್ಹಳ್ಳೇರಿ .. ಬಮ್ಮುಣ್ ಬಾಯ್ಲಾ೦ಗೆಲೆ ಬಂಧನ ಅಮ್ಮಿ ಗೌರವ ದಿತ್ತಾತಿ ಮೋಣು ಅರ್ಥ . ಸಂಸಾರ್ ಮ್ಹಳ್ಳೆ ನಂತರ ಕಷ್ಟಾಂತು ... ದೂಧ ಉದ್ದಾಕ ಶೇ ದೊಗ್ಗಾನಿಯಿ ಒಟ್ಟು ಮೆಳ್ನ್ , ಎಕ್ಲೇಕ ಎಕ್ಲೊ ಅರ್ಥ ಕೋರ್ನ್ , ಅಖೇರಿ ತಾಂಯ್ಯ್ ಸಹಕಾರಿ ಜಾವ್ನ್ ರಾಬ್ಚೆ . ಬಮ್ಮಣಾನ ಬಾಯ್ಲೆಲೆ ಮನ ಅರ್ಥ ಕೊರ್ನ್ , ದೊಳೆ ಉದ್ದಾ ಕ ಯೇನಾಶಿ ಪೊಳೊಕಾ .. ದೊಳೆ ಉತ್ಕಾಕ  ಕಾರಣ ಸಂಮ್ ಜೂನ್ ಘೇವ್ನ್ ತಕ್ಕಾ ಪರಿಹಾರ ಕೋರ್ಕಾ . ಬಮ್ಮು ಣ್  ಬಾಯ್ಲಾಂಗೆಲೆ ಸಂಬಂಧ ಶಾಶ್ವತ . ಮಧ್ಯ ಸ್ವಲ್ಪ ಲೋಕು ಯೆತ್ತಾತಿ ವತ್ತಾತಿ .  ಬಮ್ಮಣಾಕ ಬಾಯ್ಲ್ ಶಾಶ್ವತ ... ಬಾಯ್ಲೆಕ ಬಮ್ಮುಣು  ಶಾಶ್ವತ . ಘರಾ ವ್ಯವಹಾರ ಚೂಕಿ  ನಾಶಿ ಕರ್ತಲಿ ಬಾಯ್ಲ್ ತೀ ವಿದ್ಯಾ ಸಾಗರಿ ... ಸರಸ್ವತಿ ... ಶಾರದೆ ಮೋಣು ಲೆಕ್ಕುಕಾ . ಅಮ್ಮಾನ ನಾಶಿ ಅಂಮ್ಕಾ ಜನ್ಮು ನಾ ... ಬಾಯ್ಲ್ ನಾಶಿ ಜೀವನಾಕ  ಅರ್ಥ ನಾ . ಪ್ರಾಯೇರಿಮೋಜು ಕೊರ್ನ್ ಮುಲ್ಲೇಕ ಘಲ್ಚೆ ವಸ್ತು ನಯ್ಯ್ ... ಮಂಥರ್ ಪಣಾರಿ ತಾಂಯ್ಯ್ ಮನಸ್ಪೂರ್ತಿ ಜಾವ್ನು ತಿಗೆಲೆ ಮನ ಅರ್ಥ ಕೊರ್ನ್ ತೀಣೆ  ವಾಂಚೆ ತಿತ್ಲೆ  ಕಾಳ ಕಷ್ಟ ಪಾವನಾಶಿ ಪೊಳೋಚೆ ಬಂಧಿಲೇ ಮಂಗಳ ಸೂತ್ರಾ ಜವಾಬ್ದಾರಿ .

                                    ಜೀವನಾಚೆ ಹೇ ಪವಿತ್ರ ಬಂಧನ ಮೊಣಾಶಿ ಅಸ್ಸುಕಾ ಝಲ್ಲೆರಿ ... ಎದುರ ಅಶಿಲೆ ಮನುಷ್ಯಾನ ಚೂಕಿ  ಕೆಲ್ಲೆಲೆ ತೆದ್ನಾ .. ಕ್ಷಮಾಪಣ ಕೋರ್ಕಾ .. ಅಮ್ಮಿ ಚೂಕಿ  ಕೆಲ್ಲೇರಿ ಕ್ಷಮಾ ಕರಿ ಮೋಣು ಮಗ್ಗುಕಾ . ಮೂರ್ಖ ಬಾಯಿಲ ಮನಿಷಿ ಬಮ್ಣಾಕ ಕಾಮಾಚಾ ಪೊಷಿ ಹೀನಾಯಾ ಜಾವ್ನ್ ಪೊಳೋನು .. ಘರಾ ಯಜಮಾನಿ ಶೀ ವರ್ತನಾ ಕರ್ತಾ .. ಝಲ್ಲೆರಿ ಬುದ್ದೋ೦ತಿ ಮಹಿಳಾ...  ತಿಗೆಲೆ ಬಮ್ಮಣಾಕ ರಾಯು ಕೋರ್ನ್ .. ತೀ ರಾಣಿ ಜಾವ್ನ್ ಮರ್ಯಾದಿ ಘೇತ್ತಾ .  ಕುಟುಂಬೆಂತು ಕಿತ್ಲೆಯ್ ಕಷ್ಟ ಅಸ್ಸೋ .. ಸಮಾಜಾಂತು ಬಮ್ಮಣಾಲಿ ಮರ್ಯಾದಿ ರಕ್ಕುನ್ , ತಗೆಲೆ ಆನಿ ಕುಟುಂಬೇ  ಮರ್ಯಾದಿ ರಕ್ಚೆ  ಬಾಯ್ಲೆಲೆ ಕರ್ತವ್ಯ ಝತ್ತಾ . ಬಾಯ್ಲೆಕ ಕ್ಷುಲ್ಲಕ ಜಾವ್ನ್ ಪೊಳಯಿನಾಶಿ ಸಮಾಜಾಂತು ಗೌರವ ದಿವ್ಚೆ ಬಮ್ಮಣಾಲೆ ಧರ್ಮ. ಪ್ರೀತಿ ಮ್ಹಳ್ಳೆಲೆ ಏಕ ಮಹಾ ಅಮೂಲ್ಯ ಅನುಭೂತಿ . ಹೃದಯಾಂತು ಕೆದನಾಯ್ ದೊವೊರ್ನ್ ನಿತ್ಯ ಪೂಜೆ ಮ್ಹಣ್ಕೆ.. ದೇವಾಲಿ  ದಯಾ ಮೆಳ್ಚೆ ತಶಿ ಮಾಗಣೆ  ಕೊರುಂಕ ಜಾಯಿ .ಮನುಷು ಸಂಘ ಜೀವಿ .. ಸಮಾಜ ಜೀವಿ ಮ್ಹಣತಾತಿ ... ಕಿತ್ಲೆಕೀ ನಮೂನೆ ಠೀಕಾ ತೀಕ್ಷ್ಣ ಉತ್ತರಂ , ಪರಿಸ್ಥಿತಿ ದಾಂಪತ್ಯ ಜೀವನಾಂತು ಯೇವ್ನ್ ರಬ್ಬುನ್ ದೊಗ್ಗಯ್ ವಿಂಗಡ ಜಾವ್ಚ್ಯಾಕ ,ಡೈವೋ ರ್ಸ್ ದಿವ್ಚ್ಯಾಕ ಭಾರ್ಸರತಾತಿ , ಮನಾ ಶಾಂತಿ ಕಾಣ್ ಘೆವ್ನ್ ... ನರಕ ಯಾತನಾ ಪಾವ್ತಾಲೆ ಆಸ್ಸತಿ . ಜೀವನಾಂತು ಪ್ರೀತಿ , ವಿಶ್ವಾಸು ಎಕ್ಲೇಕ ಎಕ್ಲೆ ಆದರ ಸನ್ಮಾನ ಕೊರ್ನ್ ಕುಟುಂಬೆ ಬುನಾದಿ ಘಟ್ಟಿ ಕೊರ್ಚೆ ವಿವಾಹ ಕಾರ್ಯಾ ಮುಖ್ಯ ಉದ್ದೇಶ. ಅತ್ತ ಕಾಲಾಂತು ... ಮೊಬೈಲ್ ಯೆತ್ತರಿ , ಸೋಶಿಯಲ್ ಮೀಡಿಯಾ ಆಲೋಚನಾ ಕೋರ್ಚ್ಯಾಕ ವೇಳು ಮೆಳ್ನಾ . ಯಕ್ಕ ಘರ್ಲೆಗಿ ಅಸ್ಲೆರಿಯೀ ಶಾಂತ ಜಾವ್ನು ಉಲ್ಲೋಚ್ಯಾಕ ಪುರುಸೋತಿ ನಾ . ಮೆಸೇಜ್ ಕೊರ್ನ್ ನಿರ್ಧಾರ ಕರ್ತಾತಿ ... ಜೀವನಾ ಮೆಳ್ಚೆ ಸುಂದರ್ ಘಡಿ ದೂರ ಕೊರ್ನ್ ಘೇತ್ತಾತಿ . ಫೋನ್ ಏಕ್ ಬದಿನ ಅಸ್ಸೋ .. ಬಾಯ್ಲ್ ಚೆರ್ಡು೦ವಾ ಖತೀರಿ .. ಪ್ರೀತ್ಯೆರಿ .. ಆಪ್ಯಾಯತ ದಕ್ಕೋನ್ ಚಾರಿ ಗೋಡ ಉತ್ತರಂ ಉಲ್ಲಯಾ . ಉತ್ತರಂ ಕೆದನಾಯ್ ಮೊವಾಳ , ಆತ್ಮೀಯ , ಸ್ನೇಹ ಪೂರ್ವಕ ಜಾವ್ನ್ ಅಸ್ಸೋ .    

                                    ಕುಟುಂಬೇ  ಬಂಧನ ಏಕ ಪುಸ್ತಕಾ ಮ್ಹಣ್ಕೆ... ಚೂಕಿ ಮಳ್ಳೆಲೆ ಪುಸ್ತಕಾಂತುಲೆ ಏಕ ಪೇಜ್ ಮಾತ್ರ... ಏಕ ಚೂಕಿ ಝಲ್ಲೆ ಸತಾನ ಸಗಳೇ ಬೂಕ ಪಿಂದುನ್ ಘಾಲ್ಚೆ ನಯ್ಯ್ . ಬಮ್ಮಣಾಕ ಬಾಯ್ಲೆಲೆ ಪ್ರೋತ್ಸಾಹ , ಧೈರ್ಯ , ಸಮರ್ಥನ, ಬಲ ಜಾಯಿ ... ಬಲಹೀನತಾ ಜವ್ವು ನಜ್ಜ . ಬಾಯ್ಲೆಕ ಬಮ್ಮಣಾಲೆ ಭರೋಸಾ ,ಸಮರ್ಥನಾ ಜಾಯಿ... ಜಡಾವಣ ನಕ್ಕಾ. ಬಮ್ಮುಣ್-ಬಾಯ್ಲಾಲೇ ಬಂಧನಾ ಅನ್ಯೋನ್ಯ ಅಸ್ಸುಕಾ . ಅಯೋಮಯ ಜವ್ವು ನಜ್ಜ . ಮನಾ ಕಷ್ಟ , ಪ್ರೀತಿ ಭಾವ ದೊಳೇರಿ ಪೊಳೊನ್ ಅರ್ಥ್ ಕೊರ್ನ್ ಚಲ್ತಾಲೆ ಲೋಕು ದೈವೀಕ ಮಾನವ ಮೊಣೋನ್  ಘೆತ್ತಾತಿ . ಅಸಲೆ ಲೋಕು ಕುಟುಂಬೆ ಭಿತರಿ ಅಸ್ಲೆರಿ .. ಹೋಡ ಅದೃಷ್ಟ. ವ್ಹರ್ಡಿಕೆ ಚೌಕಟ್ಟ್ಯಾಂತು ತಾ೦ಗ - ತಾ೦ಗೆಲೆ ಆತ್ಮೋದ್ಧಾರ ಪೊಳೊಕಾ ...

ಉಮಾಪತಿ     
 

     

                                  

MAHABHARATH Part - 81 SwarghaaroahaNa / Mahaprasthaana

MAHABHARATH Part - 81 ( Konkani Bhashentu )

  MAHAPRASTHANA / SwargharohaNa ... ಮಹಾಪ್ರಸ್ಥಾನ / ಸ್ವರ್ಘಾರೋಹಣ

                              ಜೀವನ ಮ್ಹಳ್ಳೇರಿಚಿ .. ಏಕ ಖೇಳು . ಹೇ ಖೆಳಾಂತು ಜಯ  ಅಸ್ಸ .. ತಶೀ೦ಚಿ ಪರಾಭವ ಅಸ್ಸ . ಶಾಶ್ವತ ಜಾವ್ನು ಕೊಣಾಕಯ್ ವಿಜಯ ಮೆಳ್ನಾ . ತಶೀ೦ಚಿ ಪರಾಭವ ಕೆದನಾಯ್ ಝತ್ತಾ ಅಸ್ಸ ನಾ . ಜೀವನಾಚೆ ರಂಗ ಭೂಮಿಂತು ಅಮ್ಮಿ ಸರ್ವ ... ಏಕ ನಯ್ಯ್ ಏಕ , ಆನ್ನೇಕ ಪಾತ್ರ ಧಾರಿ ಜಾವ್ನ್ ಅಸ್ಸತಿ . ಜೀವನಾಚೆ ದಿಗ್ದರ್ಶಕು ತೋ .. ಪರಮಾತ್ಮು . ತ್ಯೇ ಪರಮಾತ್ಮಾಲೆ ಇಚ್ಚಾ  ಪ್ರಕಾರ ... ಜೇವನಾಂತು ಸರ್ವ  ವೈರಿ ತೊಗ್ಗು ಝತ್ತಾ . ಹ್ಯೇ ಕರ್ಮ ಭೂಮಿ . ಗತ ಜನ್ಮಾ ಕರ್ಮ ಫಲಾ ನಿಮಿತ್ಯ ಆಮ್ಗೆಲೆ ಕಷ್ಠ ಸುಖಾಂತು ಬದಲಾವ್ ಯೆತ್ತಾ . ಹೇ ಜನ್ಮಾ ಕರ್ಮಾ ಫಲ ಗಾಂಟಿ ಬಾಂಧುನ್ ಮರಣ ಪಾವತಾತಿ . ಹ್ಯೇ  ಜನ್ಮಾ  ಪಾಪ ಅನಿ ಪುಣ್ಯಾಕ ಸ೦ಮ್ಮ ಜಾವ್ನು ಆನ್ನೇಕ ಪೋಟಿ ಜನ್ಮಾಕ ಯೆತ್ತಾತಿ . " ಪುನರಪಿ ಜನನಂ ..  ಪುನರಪಿ ಮರಣ೦ . " ಹ್ಯೇ ಜನನ ಮರಣಾ ಚೆ ಬಾಧಾ ನಾತ್ತಿಲೆ ಚಿ ... ಪರಮ ಪದ " ಮುಕ್ತಿ " ಮೊಣೊನ್ ಘೇತ್ತಾ . ' ಮಹಾಪ್ರಸ್ಥಾನ ' ಮ್ಹಳ್ಳೇರಿ .. ಮರಣ ಯಾತ್ರಾ . ಅಮ್ಮಿ ಖಂಯಿ ಆಸ್ಲೆರಿಯಿ ಮರಣ ಅಂಮ್ಕಾ  ಸೊದ್ದುನ್ ಘೇವ್ನ್ ಯೆತ್ತಾ . ಹ್ಯೇ ಮಹಾ ಸತ್ಯ . ಮಹಾ ಪ್ರಸ್ತಾನಾಂತು , ಮರಣ ಸೊದ್ದುನ್ ...  ಅಮ್ಮಿ ಜಾವ್ನ್ ವೊಚ್ಛೆ . ಐಹಿಕ ಸುಖ ಸೋಣು ... ಬುದ್ಧ ವ್ಯಾಮೋಹ ಸೋಣು ... ಮರಣೋನ್ಮುಖಿ ಜಾವ್ನ್ .. ರನ್ನಾ೦ತು , ಗುಡ್ಡೋ , ವನ್ಯ ಜಾಗೇರಿ ಚಂಮ್ ಕುನ್ ವೋಚ್ಛೆ  ಸಾಧ್ಯ್ ವೇ .. ? ಜೀವನ ಅಶಾಶ್ವತ .. ದುಡ್ಡು ,  ನಗ ನಾಣ್ಯ ,ಬಾಯ್ಲ್ ಚೆರ್ಡು೦ವ , ಆಸ್ತಿ ಪಾಸ್ತಿ , ನಾಂವ ಪ್ರತಿಷ್ಠಾ ... ಹ್ಯೇ ಏಕ ಮಾಯಾ ಮೋಣು , ಆತ್ಮಾಕ ಜ್ಞಾನೋದಯ ಝತ್ತನ ಮಾತ್ರ ಸಾಧ್ಯ ಅಸ್ಸ . ನಿಷ್ಕಾಮಿ ಜಾವ್ನ್ , ಅಂತರ್ ಮುಖಿ ಜಾವ್ನ್ .. ಅಪ್ಪಣ ಕೋಣ ಮೋಣು ಕಳ್ಳೆಲೆ ತೆದ್ನಾ ಮಾತ್ರ ಸಾಧ್ಯ ಅಸ್ಸ , ನಿಜಾವ್ನ್ ಕರ್ಮ ಯೋಗಿ ಜಾವ್ನ್ ಅಶಿಲೆ ಲೋಕಾಂಕ ಸಾಧ್ಯ . ಆಶಾ ವೈರಿ ವಿಜಯ ಪಾವ್ವಿಲೆ ಬುದ್ಧಾ ಕ ಮಾತ್ರ ಸಾಧ್ಯ ಅಸ್ಸ. 

                                  ಅರ್ಜುನಾಲೆ ಮನಾಂತು ದ್ವಾರಕೆ ದುಕೂನ್ ವಾಪಸ್ ಯೆತ್ತಾನಾ .. ಯಮುನಾ ನಂಯ್ತು ಕೃಷ್ಣಾ ಲೆ ಬಾಯ್ಲಾ೦ನಿ ಉಡ್ದುನ್ ಜೀವು ಕಾಣ್ ಘೆತ್ತಿಲೆ ... ಕೃಷ್ಣ ಸತಿಯಾ೦ಕ ವಾಂಚೊಚಾ ಜಾಯ್ನಾ ನತ್ತಿಲೆ ... ತಾಗೆಲ್ ವೈರಿ ಅಷ್ಶಿಲೆ ನಂಬಿಕಾ , ಆತ್ಮ ವಿಶ್ವಾಸು , ದಿವ್ಯಾಸ್ತ್ರ ಮಂತ್ರ ವಿಸೋರ್ನ್  ಮಾಯಾ ಝಲ್ಲೆಲೆ ನಿಮಿತ್ಯ ಮೊಣು ಸಂಷಯು ಝಲ್ಲೊ ಅರ್ಜುನಾಕ . ತನ್ನಿ ಸರ್ವಾನಿ ಆತ್ಮಾರ್ಪಣ ಕೊರ್ನ್ ಘೆವ್ಚ್ಯಾಕ ಕಾರಣ ಹಾವಂಚಿ ... ಮೋಣು ಮನಾ ಯೇವ್ನ್ ... ಅರ್ಜುನಾಕ  ಜೀವುಚಿ ನಕ್ಕಾ ಶೇ ದಿಸ್ಲೆ . ಅಂತಃಪುರಾಕ  ಪವ್ವಿಲೋ ಅರ್ಜುನಾ ಕ ಮಸ್ತ್ ದುಃಖ ಜಾವ್ನ್ ನೆಲಾರಿ ಪೊಣು ಆಲೋಚನಾ ಶುರು ಕೆಲ್ಲಿ . ಛೆ .. !ಮಿಗೆ ಲೆ  ಗಾಂಡೀವ , ದಿವ್ಯಾಸ್ತ್ರ ಕಸಲೇ  ಕಯಿ ಕಾಮಾ ಏನೀ ಮೂ ಮೋಣು ಅನಿಕಯ್ ದುಃಖ ಪಾವಲೋ ...ಧರ್ಮಜ , ಭೀಮ ,  ನಕುಲ ಸಹದೇವ , ದ್ರೌಪದಿ ಸರ್ವ ಲೋಕು ಸುತ್ತು ರಬ್ಬುನ್ ಅರ್ಜುನಾಲೆ ಉತ್ತರಂ ಆಯಿಕುನ್ ... ಶ್ರೀ ಕೃಷ್ಣಾಲೆ ಅನಿ ಬಲರಾಮಾಲೆ , ಯಾದವ ಕುಟುಂಬ ನಿರ್ನಾಮ ಝಲ್ಲೆಲೆ ... ಲಕ್ಷ ಲಕ್ಷ  ದ್ವಾರಕಾವತಿ ಲೋಕಾಲೆ ಹೀನಾಯ ಮರಣ ಆಯಿಕುನ್ ಮಸ್ತ ಸಂಕಟ ಝಲ್ಲೆ . ಕೃಷ್ಣಾ .. ಕೃಷ್ಣಾ .. ! ಮೋಣು  ಉದ್ಗಾರ ಕಳ್ಳೆ ... ಆಯ್ಯಿಲೆ ದುಃಖ ತಡ್ಸುನ್ ಘೇ೦ವ್ವು ಜಾಯ್ನಾಶಿ ನೆಲಾರಿ ಸೋಯ ಚುಕ್ಕುನ್ ಪೊಳ್ಳೆಂತಿ . ದ್ರೌಪದಿ , ಸುಭದ್ರೆ , ಸತ್ಯ ಭಾಮಾ ಗೊಳೋ ಮೋಣು ರೋಣು " ಅಂಮ್ಕಾ ಅನಿ ಕೋಣ ಗತಿ .. ? " . ಅರ್ಜುನಾನ ಎಕ್ಲೆ - ಎಕ್ಲೆ೦ಗೆಲೇ ಮರಣ ಝಲ್ಲೆಲೆ ರೀತಿ ಸಂಘ್ತಾನಾ ... ಸರ್ವಾಂಕ ದೊಳೆ ಬೋರ್ನ್ ಅಯಿಲೆ . ರೋಣು ರೋಣು ಮೂರ್ಚಿತ ಝಲ್ಲೆ . ಹಸ್ತಿನಾವತಿ ಅಂತಃಪುರ ದುಃಖ ಸಾಗರಾಂತು ಬುಡ್ಲೆ . 

                             ದಿವ್ಯದೃಷ್ಟಿರಿ ... ಹ್ಯೇ  ಸಕ್ಕಡ ಕಳ್ಳೆಲೆ  ವ್ಯಾಸ ಮಹರ್ಷಿ , ಹಸ್ತಿನಾವತಿಕ ಯೇವ್ನ್ ಪಾವಲೋ . ಪಾಂಡವಾನಿ ವ್ಯಾಸ ಚರಣಾಂಕ ನಮನ ಕೆಲ್ಲೆ . ಸಾಂತ್ವನ ಕರ್ತಾಚಿ ... " ಕೃಷ್ಣಾಲೆ ನಿರ್ವಾಣ ಝತ್ತರಿ ಕಲಿಯುಗ ಪ್ರಾರಂಭ ಝಲ್ಲಾ ... ಶ್ರೀಮನ್ನಾರಾಯಣು ಧರ್ಮ ರಕ್ಷೇಕ ತತ್ತವಳಿ ಜನ್ಮ ಘೆತ್ತಾ ... ಅವತಾರ ಪುರುಷಾಕ ಜೀವನ್ ಮರಣಾ ಭಂಯ್ಯ್ ನಾ . ಅನಿ ಯೆವಚೆ ದಿವಸ ಪೂರಾ ಅಧರ್ಮ ದಿವಸ . ಧರ್ಮರಾಯಾ ... ! ತುಗೆಲೆ ಭಂವಂಡಾಕ ಘೇವ್ನ್ ಹಿಮಾಲಯಾ ದಿಕಾನ ಮಹಾಪ್ರಸ್ಥಾನ ಕೊರ್ಚೆ ಲಾಯೆಕ್ ಮೋಣು ದಿಸ್ತಾ . ತುಗೆಲೆ ನಂತರ ಪರೀಕ್ಷಿತಾಕ ರಾಜ್ಯಾ ಅಭಿಷೇಖ ಕೋರ್ಕಾ " ಮೋಣು ಆದೇಷು ದಿಲ್ಲೊ . ವ್ಯಾಸ ಮಹರ್ಷಿ .. ಪಾಂಡವಾಂಕ ಧೈರ್ಯ ದೀವ್ನ್ ಅಂತರ್ಧಾನ ಝಲ್ಲೋ . 

                           ಏಕ ಶುಭ ಘಡಿರಿ ... ಹಸ್ತಿನಾವತಿ ಸಿಂಹಾಸನ ಪರೀಕ್ಷಿತಾಕ , ... ಕೃಷ್ಣಾಲೆ ನತ್ತು ವಜ್ರಾಕ ಇಂದ್ರಪ್ರಸ್ಥ ಸಿಂಹಾಸನ , ಕೃತವರ್ಮಾಲೆ ನಾತ್ವಾಕ ಕುರುಕ್ಷೇತ್ರ .. ಸಿಂಹಾಸನ , ಸಾತ್ಯಕಿಲೆ  ಪುತ್ತಾಕ ಸರಸ್ವತೀ ನಗರಾ ಸಿಂಹಾಸನ .... ವೇದೋಕ್ತ ಮಂತ್ರ ಸಂಘುನ್ ಪಟ್ಟಾಭಿಶೇಕು ಕೆಲ್ಲೊ . ಸುವರ್ಣ ದಾನ ,  ಗೋದಾನ , ವಸ್ತ್ರ ದಾನ , ಧನ ಧಾನ್ಯ ದಾನ ಕೆಲ್ಲೆ . ಸಮಸ್ತ ರಕ್ಷಣಾ ಬಾಧ್ಯತಾ ಕೃಪಾಚಾರ್ಯಾಕ , ಯುಯುತ್ಸುಕ ದಿಲ್ಲೆ . ದೌಮ್ಯ ಪುರೋಹಿತಾಕ ರಾಜ ಗುರು ನಿಯುಕ್ತ ಕೆಲ್ಲೆ . ಆನಿ ಪೂರಾ ಪ್ರಮುಖಾಂಕ , ದಂಡನಾಯಕ , ಮಲಘಡೆಂಕ , ಸೇನಾಧಿಪತಿ ಯಾಂಕ , ಸೈನ್ಯಾ೦ಕ , ಸೆವಕಾಂಕ ಅಪ್ಪೋನ್ ... " ಮಹಾಜನ ಲೋಕಾಂಕ ಮಿಗೆಲಿ ನಿವೇದನಾ ಕಸಲಿ ಮ್ಹಳ್ಳೇರಿ .. ಆಜಿ ದುಕೂನ್ ... ಹಸ್ತಿನಾವತಿ ಮಹಾಸಾಮ್ರಾಜ್ಯಾ ಕ  ಪರೀಕ್ಷಿತ ಪ್ರಭು ಚಕ್ರವರ್ತಿ ಜಾವ್ನ್ ರಾಜ್ಯ ಭಾರ ಕರ್ತಲೊ . ಸರ್ವಾನಿ  ಮಕ್ಕಾ ದಿಲ್ಲೆ ಮ್ಹಣ್ಕೆಚಿ ಸಹಕಾರ್ ದೀವ್ನ್ ಪರೀಕ್ಷಿತ ಚಕ್ರವರ್ತಿಕ ಮಾನ್ಯತಾ ದೀವ್ಕಾ . ಅಮ್ಮಿ ಪಾಂಡವ ದ್ರೌಪದಿ ಸಮೇತ ವಾನಪ್ರಸ್ಥ ಸ್ವೀಕಾರ್ ಕರ್ತಾತಿ . " ಮೋಣು ಪ್ರಕಟ ಕೆಲ್ಲೆ .

                           ಏಕ ಶುಭ ಮುಹೂರ್ತಾರಿ ಪಾಂಡವ ಮತ್ತೇರಿ ನಾಹ್ವನು ಕಾವಿ ವಸ್ತ್ರ ಧಾರಣ ಕೊರ್ನ್ .. ಮಹಾಪ್ರಸ್ಥಾನಕ ಪ್ರಯಾಣ ಶುರು ಕೆಲ್ಲೆ . ಅಂತಃಪುರ ಲೋಕು , ರಾಜ ದರ್ಬಾರಿ ಲೋಕು , ಸಮಸ್ತ ಪುರ ಲೋಕು , ರಾಜ ಮಾರ್ಗಾರಿ ದೊನ್ನಿ ದಿಕಾನ ರಬ್ಬುನ್ ಪುಷ್ಪ ವೃಷ್ಟಿ ಕೆಲ್ಲೆ . ಪಾಂಡವಾಕ ಜಯಕಾರ ಕರ್ತಾಚಿ ದೊಳೆ ಉದ್ದಾಕ ಕಾಣು ವಿದಾಯ ಕೆಲ್ಲೆ ಪಾಂಡವಾಂಕ . ಜನ ಸಾಮನ್ಯ ಶೆ ಲೋಕಾಲೆ ವೊಟ್ಟು ಮೇಳ್ನು ..  ಬಂಧು ಮಿತ್ರ ಮಲಘಡೆ೦ಕ ಆಲಿಂಗನ ಕೊರ್ನ್ ಸಾಂತ್ವನ ಕೋರ್ನು .. ಪಾದ ಯಾತ್ರೆರಿ ಮುಕಾರ್ಸುನ್ ಗೆಲ್ಲೆ . ತ್ಯೇಚಿ ವೆಳ್ಯೇರಿ ಏಕ ಶ್ವಾನ ಪಾಂಡವಾಂಕ ಮಾಕ್ಷೀಚಿ ಅನುಸರಣ ಕರ್ತಾಚಿ ಗೆಲ್ಲೆ . ಹಸ್ತಿನಾವತಿ ದುಕೂನ್ ಪೂರ್ವ ದಿಶೆ ಕ ಪ್ರಯಾಣ ಕೊರ್ನ್ ಪಾ೦ಚ - ಸಹ ದಿವಸಾ ನಂತರ , ಪವಿತ್ರ ಭಾಗೀರಥಿ ನಂಯ್ಯ್ ಚೆ ತಟಾರಿ ಯೇವ್ನ್ ಪಾವ್ಲೀಂತಿ . ಭಾಗೀರಥಿ ಸ್ನಾನ ಕೊರ್ನ್ ಝತ್ತರಿ ಧರ್ಮಜಾನ ... ಏಕ ಶ್ವಾನ ಹಸ್ತಿನಾವತಿ ದುಕೂನ್ ತಾಂಗೆಲೆ ಮಾಕ್ಷಿ ಯೆವ್ಚೆ ಪೋಳಯಿಲೆ ... ಖಂಚೆ ಜನ್ಮಾ ಬಂಧನ ಕೀ ... ! ಹ್ಯೇ ಸೂಣೆ ಆಮ್ಗೆಲೆ ಮಾಕ್ಷೀಚಿ ಯೆತ್ತಾ  ಅಸ್ಸ. ಕೊಣಯ್ ತಕ್ಕ ಧಾ೦ವಡಾನುಕಾತಿ ಮೋಣು ಆದೇಷು ದಿಲ್ಲೊ . ತ್ಯೆ ದಿವಸು ದುಕುನ್ ಸೂಣೆ ತಾಂಗೆಲೆ ಪರಿವಾರ ಸದಸ್ಯ ಝಲ್ಲೆ . 

                              ಏಕ ದಿವಸು ಪ್ರಾತಃ ಕಾಲಾರಿ ಸೂರ್ಯ ದೇವು ಪ್ರತ್ಯಕ್ಷ ಝಲ್ಲೋ ಪಾಂಡವಾಂಗೆಲೆ ಯೆದ್ರಾಕ . ಸರ್ವಾನಿ  ಸೂರ್ಯ ದೇವಾಕ ಪಾಂಯ್ಯ್ ಪೊಳ್ಳೇ . " ಅರ್ಜುನಾ ... ! ಕಾಂಡವ ದಹನಾ ವೆಳ್ಯೇರಿ ಹಾಂವೆ ಗಾಂಡೀವ ಧನುಷ್ಯ ಅನಿ ಅಕ್ಷಯ ಬತ್ತಳಿಗ ಕಾಣಿಕ ದಿಲ್ಲೆಲಿ . ಅತ್ತ ಗಾಂಡಿವ ತುಕ್ಕ ಅಗತ್ಯ ನಾ . ಮುಕಾರಿ ವೊಚ್ಚುನ್ ಗಂಗಾ ನಂಯ್ ತು ಜಿವಿಸರ್ಜನ ಕರಿ . " ಮೋಣು ಸಾಂಘುನ್ ಆಶೀರ್ವಾದ ಕೆಲ್ಲೊ . ಸೂರ್ಯ ದೇವಾನ ಸಂಘಿಲ್ ತಶೀಚಿ ಅರ್ಜುನಾನ ಗಾಂಡೀವ ಗಂಗೆಂತು ವಿಸರ್ಜನ ಕೆಲ್ಲಿ . 

                           ಪಾಂಡವ ಅತ್ತ ... ಹಿಮವತ್ ಪ್ರದೇಶಾಂತು ಆಸ್ಸತಿ . ಕೊಣಾಕಯ್ ತಂಗೆಲೊ ಗುರ್ತು ಸಮೇತ ಮೇಳ್ನಾ . ಆಂಗ ಕಾಳೆ ಜಾವ್ನ್ , ಸುಕ್ಕುನ್ ವೃದ್ಧ ಝಲ್ಲಿ೦ತಿ . ಮಹರ್ಷಿ ಲೋಕಾಲೆ ಮ್ಹಣ್ಕೆ ದಿಸ್ತಾತಿ . ಮಹಾಪ್ರಸ್ಥಾನಾ ಪ್ರಯಾಣ ಶುರು ಕೊರ್ನ್ ಆಟ್ರಾ ಮಹಿನೊ ಝಲ್ಲಿಂತಿ . ನಿರಂತರ ಪ್ರಯಾಣ ... ದಿವಸಾಕ  ಏಕ್ ಪೋಟಿ ಪುಣಿ ಕಂದ ಮೂಲ  ಆಹಾರ ಸೇವನಾ .. ಪಾವ್ಸು ಶೀ೦ಯ , ವತ ಮ್ಹಳ್ಳೆಲೆ ಲಕ್ಷ್ಯಾಕ  ವ್ಹರ್ನಾಶಿ ... ಮರಣಾಕ  ಸೊದ್ದುನ್ ವತ್ತಾ ಆಸ್ಸತಿ .ದ್ರೌಪದಿ ಹೇ ಸಕ್ಕಡ್ ಕಷ್ಠ ಅನುಭವ ಕೊರ್ನ್ , ಪಾಂಡವಾಂಕ .. ಅನುಸರಣ ಕೋರ್ನು ವತ್ತಾ ಆಸ್ಸ . ಕಸಲೆ ನಮುನೆ ದೀಕ್ಷಾ ... ! ಕಸಲೆ ಖತಿರಿ ನಿಯಮ ..! ಕಸಲೆ ಖಠೊರ ಸಂಯ್ಯ೦ಮ ... ! ಮಹಾಶಿವಾನ ತಪಸ್ಯ ಕೆಲ್ಲೆಲೆ ..ಕೈಲಾಸ ಹಿಮ ಪರ್ವತ ಎದ್ರಾಕ ದಿಸ್ಸುನ್  ಉತ್ತರಾದಿ ಪ್ರಯಾಣ ಶುರು ಕೆಲ್ಲೆ . ದ್ರೌಪದಿನ ಶಿವ ಸ್ಮರಣ ಕರ್ತಾಚಿ ನೆಲಾರಿ ಪೋಣು ಜೀವು ತ್ಯಾಗ ಕೆಲ್ಲೊ .. ಪಾಂಡವಾನಿ ,  ಪ್ರೀತಿ ಮಮತಾ ಬಂಧನ ಸೋಣು ದ್ರೌಪದಿಕ ವಂದನಾ ಕೆಲ್ಲಿ ಅನಿ ತಾಂಗೆಲೆ ಪ್ರಯಾಣ ಮುಕಾರ್ಷಿಲೆ . ನಂತರ .. ಅರ್ಜುನ .. , ನಂತರ ನಕುಲ .. , ನಂತರ ಸಹದೇವ .. , ನಂತರ ಭೀಮ ಸೇನಾ ... ಎಕ್ಲೆ ಮಾಕ್ಷಿ ಎಕ್ಲೆ ಬಾಧಾ ನಾಶಿ ಮರಣ ಪಾವಲೆ . ಅತ್ತ ಧರ್ಮರಾಯು ಅನಿ ಶ್ವಾನ ಮಾತ್ರ ಆಸ್ಸತಿ . ವಿರಾಗಿ ಜಾವ್ನ್ ಧರ್ಮರಾಯಾನ ಪ್ರಯಾಣ ರಬ್ಬಯಿನಾಶಿ ಮುಕಾರ್ಸುನ್ ಗೆಲ್ಲೊ . ಏಕ ದಿವಸು ಪ್ರಾತಃ ಕಾಲಾರಿ ಸೂರ್ಯ ವಂದನಾ ಕೊರ್ನ್ ಮಾಕ್ಷಿ ಪೊಳೈತಾನಾ ಏಕ ದಿವ್ಯ ಭ೦ಗ್ರಾ ವಿಮಾನ ಪೊಳೊನ್ ಆಶ್ಚರ್ಯ ಝಲ್ಲೆ . " ಧರ್ಮರಾಯಾ ... ! ಮಿಗೆಲೆ ನಾ೦ವ ಮಾತಲಿ ..  ಸ್ವಾರ್ಘಾಧಿಪತಿ ದೇವೇಂದ್ರಾಲೆ  ಸಾರಥಿ ... ತು೦ಮ್ಕಾ ಶರೀರ ಸಮೇತ ಸ್ವಾರ್ಘಾ ಕ ಅಪ್ಪೋನ್ ಹಾಡ್ಕಾ ಮೋಣು ಆದೇಷು ಝಲ್ಲಾ ... ಯೆಯ್ಯಾತಿ ದಿವ್ಯ ವಿಮಾನಾಂತು ಬಯಿಶ್ಯಾತಿ " ಧರ್ಮರಾಯು ಮಾಕ್ಷೀಚಿ ಯೆವಚೆ ಸೂಣೆ ಕ ಘೇವ್ನ್ ವಿಮಾನಾಂತು ಬೊಸ್ಲೊ . ಮಾತಲಿನ ಸಂಘಲೆ ... " ಧರ್ಮರಾಯಾ .. ! ಸ್ವರ್ಘಾ೦ತು ಹೇ ಸೂಣೆಕ ಸ್ಥಾನ ನಾ ... ನೀಚ ಪ್ರಾಣಿಕ  ಸಶರೀರ ಜಾವ್ನ್ ಬಿಲ್ಕುಲ್ ಪ್ರವೇಶ ನಾ .. ಸಕಲ ಸೋಡಿ .. " ಮೋಣು ಅಸಹ್ಯ ಕೊರ್ನ್ ಸಂಘಲೆ . ಧರ್ಮರಾಯು , ವಿಮಾನಾ ದುಕುನ್ ಸೂಣೆ ಸಮೇತ ಸಕಲ ದೆ೦ವ್ಲೊ . " ಮಾತಲಿ ...! ಧರ್ಮಾ- ಧರ್ಮ ವಿಚಾರು ಮಕ್ಕಾ  ಗೊತ್ನಾ .. ಹೇ  ಸೂಣೆ ಹಸ್ತಿನಾವತಿ ದುಕುನ್ ಅಮ್ಗೆಲೆ ಮಾಕ್ಷೀಚಿ ಯೆತ್ತಾ ಅಸ್ಸ . ಮಕ್ಕಾ ನಂಮ್ಗುನ್ ಮಿಗೆಲೆ ವೊಟ್ಟು ಅಸ್ಸ . ಸ್ವರ್ಘು  ಮೆಳ್ಳೊ ಮೋಣು ... ಹೇ ಹಿಮವತ್ ಪ್ರಾಂತ್ಯಾ೦ತು ಸೂಣೆ ಕ ಸೋಣು ಗೆಲ್ಲೇರಿ ಧರ್ಮು ಝತ್ತವೇ .. ? ಮಿಗೆಲೆ  ಲೋಕಾಂಕ ಮೆಳ್ನಾ ನಾತ್ತಿಲೆ ಸ್ವರ್ಘು ... ಮಕ್ಕಾ ಕಸಲೇಕ .. ?  ಜೀವನಾಚೆ ಆಖೇರಿ ಕ್ಷಣಾರಿ ಅಷ್ಶಿಲೆ ಮಕ್ಕಾ ... ಮಿಗೆಲೆ ಧರ್ಮ ಸೋಣು ಹಾಂವ ಸ್ವರ್ಘಾಕ ಯೇನಾ .. " ಮೋಣು ಸಂಘುನ್ ಸೂಣೆ ಕ ಘೇವ್ನ್ ಮುಕಾರ್ಸುನ್ ಗೆಲ್ಲೊ . ಸ್ವಲ್ಪ ದೂರ ವತ್ತಾರಿ ಸೂಣೆ ಮಾಯಾ ಝಲ್ಲೆ .. ! ಸೂಣೆ ಖತಿರಿ ಸೋದ್ದಿತಾ ಆಸ್ತಾನಾ ಧರ್ಮ ದೇವತಾ ಪ್ರತ್ಯಕ್ಷ ಝಲ್ಲಿ . " ಧರ್ಮರಾಯಾ .. ! ತುಗೆಲೆ ಧರ್ಮ ನಿಷ್ಠಾ ಪರೀಕ್ಷಾ ಕೊರುಂಕ ಹಾಂವ ಸೂಣೆ ರೂಪ ಧಾರಣ ಕೊರ್ನ್ ತುಗೆಲೆ ಮಾಕ್ಷಿ ಆಯ್ಯಿಲಿ . ಮಿಗೆಲೆ ಪರೀಕ್ಷೆ೦ತು ಉತ್ತೀರ್ಣ ಝಲ್ಲೊ . ಎದ್ದೊಳ್ ತಾ೦ಯ್ಯ್ ಕೊಣಯ್ ಶರೀರ ಸಮೇತ ಸ್ವರ್ಘಾ ಕ ಪಾವ್ನೀ೦ತಿ .... ವಸ .. ! ದಿವ್ಯ ವಿಮಾನ ಚೋಣು ಸ್ವರ್ಘಾಕ ವಸ " ಮೋಣು ಆಶೀರ್ವಾದು ಕೊರ್ನ್ ಅಂತರ್ಧಾನ ಝಲ್ಲಿ ... 

ಉಮಾಪತಿ 

000000000000000

                                                                    ಧನ್ಯವಾದ 

                                  ಸುಮಾರ ಆಠ ವರ್ಷಾ ಮಾಕ್ಷಿ ..ಮಿಗೆಲೆ  ಗುರು .. ಶ್ರೀ ಗೋಕರ್ಣ ಪರ್ತಗಾಳಿ  ಮಠಾಧೀಶ ಗುರು ಶ್ರೀ ಶ್ರೀ ವಿದ್ಯಾಧಿರಾಜ ಸ್ವಾಮಿ ಮಹಾರಾಜ್ ಹನ್ನಿ ತಾಂಗೆಲೆ ಪ್ರವಚನಾಂತು ಮಹಾಭಾರತಾ ಚೆ ಕಾಣಿಯೆ ಸನ್ನಿವೇಷು ಸಂಘಿಲೆ  ಅಯಿಕುನು , ಮಕ್ಕಾ ಏಕ ಪ್ರೇರಣಾ ಮೆಳ್ಳಿ . ಕೊಂಕಣಿ ಭಾಶೇಂತು ಮಹಾಭಾರತಾ ಕಾಣಿ ಕಿತ್ಯಾ ಬೊರೊಚ್ಯಾ  ನಜ್ಜ  ? ಮೊಣು ದಿಸ್ಲೆ . ಗುರುಲೆ ಚರಣಾಂಕ ಪಾಂಯ್ಯ್ ಪೊಣು  ಚಾಂಗ ದಿವಸು ಪೊಳೋನು ಪ್ರಾರಂಭ ಕೆಲ್ಲೆ . ಆಜಿ  ' ಪಾರ್ಟ್ 81 ಸ್ವರ್ಘಾ ರೋಹಣ ' ಬೊರೋನು ಝತ್ತರಿ ... ಮಕ್ಕಾ ಮನಾ  ಸಮಾಧಾನ ಝಲ್ಲಿ . 

                    ಬೊರೊಯಿಲೆ ..  ಕೊಂಕಣಿ ಮಹಾಭಾರತಾ ಕಾಣಿ ಕನ್ನಡ ಲಿಪಿಂತು ಅಸ್ಸ . ಮೂಲ ಕಾಣಿ ಹ೦ಗಾ ತಾ೦ಯ್ ವಾಜ್ಜುನ್ , TV  ಸೀರಿಯಲ್ ಪೋಳೋನು ... ಕಾಣಿಯೆಂತು ಯೇವ್ನು ವೊಚ್ಚೆ ಪಾತ್ರ ವಿಸರನಾಶಿ ಬೊರೋನು ಪ್ರಸ್ತುತ ಕೆಲ್ಲಾ  . ಮಸ್ತ ಜನಾನಿ ವಾಜ್ಜುನು ಟಿಪ್ಪಣಿ ದೀವ್ನು ಮಾರ್ಗ ದರ್ಶನ ಕೆಲ್ಲೆಲೆ ಅಸ್ಸ  . ಸರ್ವಾಂಕ ಮಿಗೆಲೆ ಹೃತ್ಪೂರ್ವಕ ನಮನ ಅನಿ ಧನ್ಯವಾದು  . ಶ್ರೀ ಶ್ರೀ ವಿದ್ಯಾಧಿರಾಜ ಸ್ವಾಮಿ ಮಹಾರಾಜ್ ಹಾಂಗೇಲೆ ಚರಣಾಂಕ ಸಾಷ್ಟಾಂಗ ವಂದನಾ ಕರ್ತಾಚಿ ... ಕೊಂಕಣಿ  ಮಹಾಭಾರತ ತಂಗೆಲೆ ದಿವ್ಯ ಚರಣಾಂಕ ಸಮರ್ಪಣ ಕರ್ತಾ . ಮಹಾಭಾರತ ..  ಕಾಲಾಕ ಸಂಮ್ ಜಾವ್ನ್ ಮಸ್ತ ಮಹಾನ್ ಲೋಕಾನಿ ಮಸ್ತ್ ನಮೂನೇರಿ ಬೋರಾಯಿಲ್ ಅಸ್ಸ . ಭಾಷಾ ರೀತಿ , ಸಂವ್ವಾದು ಕೊಂಕಣಿ ಶಬ್ಧಾ ಉಚ್ಚಾರು ..  ಅಲ್ಪ ಪ್ರಾಣ ಮಹಾಪ್ರಾಣ , ಶಬ್ಧಾ ಮೂಲ ಸಂಸ್ಕೃತ ಭಾಶೆಚೆ ನಮುನೋ , ಹಿಂದಿ , ಮರಾಠಿ , ಕನ್ನಡ , ತೆಲುಗು ತದ್ಭವ ಝಲ್ಲೆಲೆ ರೀತಿ ಅಧ್ಯಯನ ಕೋರ್ನು ... ಸಕ್ಕಡ ಶಬ್ದ ಪ್ರಯೋಗ ಹಂಗಾ  ಕೆಲ್ಲಾ . ಮಿಗ್ಗೆಲೆ ಉದ್ದೇಶ ... ಕೊಂಕಣಿ ಭಾಷ ಸುಂದರ್ ಕೊರ್ಚೆ . ಇತ್ಲೆ ಕಾಲಾ ದುಕುನ್ ಕೊಂಕಣಿ ಮಹಾಭಾರತ ವಾಜ್ಜುನ್ ಪ್ರೋತ್ಸಾಹ ಕೆಲ್ಲೆಲೆ ಬಂಧು ಮಿತ್ರಾ೦ಕ  ಮಿಗೆಲೆ ಹೃತ್ಪೂರ್ವಕ ನಮನ . ಚೂಕಿ ಕಸಲೆಯ್  ಜಾವ್ನು ಅಸ್ಲೆರಿ ಮಾಫಿ ಕೊರ್ಚೆ ಹೃದಯ ವಂತಿಗ ಅಸ್ಸೋ . ಪ್ರತೀ ವಾರಾ ಫೇಸ್ಬುಕ್ಕಾರಿ ಪ್ರಕಟ ಜಾವ್ಚೆ ಹೇ ಕೊಂಕಣಿ ಮಹಾಭಾರತ ಹಾಂಗಾಚಿ ಸಮಾಪ್ತ ಕರ್ತಾ . ವಾಜ್ಜುನ್ ಸಾರಸ್ವತ ಲೋಕ ಬಾಂಧವಾನಿ ಆಶೀರ್ವಾದು ಕೋರ್ಕಾ . ಸ್ವಾಮೇ೦ಗೆಲೊ ಆಶೀರ್ವಾದು  , ದೇವಾಲಿ ದಯಾ ಜಾವ್ಕಾ .

ಉಮಾಪತಿ