MAHABHARATH Part
-79 Mousala Parva ( Konkani Bhashentu )
Kali yuga aarambhu .. Sri Krishna NirvaaNa
ಕಲಿಯುಗ ಆರಾಂಭು ... ಶ್ರೀ ಕೃಷ್ಣ ನಿರ್ವಾಣ
ಧರ್ಮರಾಯಾಕ ಪಟ್ಟಾಭಿಷೇಖ ಜಾವ್ನ್ 35 ವರ್ಷ೦ ಝಲ್ಲಾ . ಕಲಿಯುಗ ಪ್ರಾರಂಭ ಜಾವ್ಚ್ಯಾ ವತ್ತಾ ... ಕಲಿ ಪುರುಷಾಲೆ ಪ್ರಭಾವು ಸಮಸ್ತ ಲೋಕಾ ವೈರಿ ಪರಿಣಾಮ ಝತ್ತಾ ಅಸ್ಸ . ಸ್ವೇಚ್ಚಾಪಣ , ಜುಗಾರಿ , ಮಧ್ಯಪಾನ , ಶ್ರಾಂಗಾರ ಆಶಾ , ಧನ ವ್ಯಾಮೋಹ , ಸ್ತ್ರೀ ವ್ಯಾಮೋಹ , ವೈಶ್ಯಾ ವಾಟಿಕಾ , ಅಸಲೆ ವಿಷಯಾನ ಜನಾ೦ಕ ಮಸ್ತ ಮನಾ ಲಾಗ್ಲಾ . ಢಾ೦ಬಿಕ ಭಕ್ತ , ಢಾ೦ಬಿಕ ಗುರು .. ಜನ್ಮಾ ಅಯಿಲೆಂತಿ . ಆಕಾಸ್ಮಾತ್ ಧನ ಪ್ರಾಪ್ತಿ ಕೋರ್ಕಾ , ಸುಖ ಪಾವ್ಕಾ ಮ್ಹಳ್ಳೆಲಿ ಆಶಾ . ಗುರು ಮಾಲಘಡೆ ಮ್ಹಳ್ಳೆಲೆ ಭಯ ಭಕ್ತಿ ಮಾಯಾ ಝತ್ತಾ ಅಸ್ಸ . ಧರ್ಮ ಮಾರ್ಗ ಸೋಣು .. ಕಿತ್ಲೆ ವಗ್ಗಿ ಧನ ಕನಕ ಸಂಪಾದನಾ ಕೋರು೦ ಝತ್ತಾ ಮ್ಹಳ್ಳೆಲೆ ಆಷಿ ಮನಾ ಅಯಿಲಾ . ವೇದ ಶಬ್ಧಾ೦ಕ ವಿಪರೀತ ಅರ್ಥು ಸಂಗ್ಚೆ ಪಂಡಿತ , ಪೋಟ ಭೋರ್ಚೆ ಖತಿರಿ ಫಟ್ಟಿ ಉಲ್ಲೋಚೆ , ಫಟ್ಟಿ ಗ್ರಹಚಾರ ದೋಷಾಕ .. ಫಟ್ಟಿ ಉಪಶಮನಾ , ಅನ್ಯಾಯು ಜಾವ್ನು ಪ್ರಜಾಂಕ ಸುಲಿಗಾ ಕೊರ್ಚೆ, ಮೋಸು ಕೊರ್ಚೆ , ಅನ್ಯಾಯು ಕೊರ್ಚೆ , ಬಲಾತ್ಕಾರ್ ಕೋರ್ನ್ ಬಾಯ್ಲ್ ಮನಷ್ಯಾ೦ಕ ವೈಶ್ಯಾ ವಾಟಿಕೆ ದಿಕಾನ ಜೀವನ ಕೋರ್ಚ್ಯಾಕ ಪ್ರೇರಣ ದಿವ್ಚೆ , ಊ೦ಚ ಕುಲ ಸ್ತ್ರೀ ಲೋಕಾನಿ ಕೀಳ ದರ್ಜೆ ಪುರುಶಾಲೆ ಸಂಘಾಕ ತಯ್ಯಾರಿ ಜತ್ತಾಶಿಲೀ೦ತಿ , ಏಕ ಕ್ಷಣ ಸುಖಾ ಖತಿರಿ ದಿವಿಶಿ ಮಾರ್ಚೆ , ದೊಂಬಿ ಕೊರ್ಚೆ , ಕಿತ್ಲೆ ನಮುನೆ ಅನ್ಯಾಯು ಕೊರು೦ ಜತ್ತಕೀ ತಿತ್ಲೆ ನಮುನೆ .. ಮೋಸು ದಗಾ ಕೋರ್ಚ್ಯಾ ಶುರು ಕೆಲ್ಲೆ ಲೋಕಾನಿ . ಮಾನವೀಯತಾ ಶಬ್ಧ ಶಿಖ್ಖನಿ ಶೀ ... ಅರ್ಥ ಗೊತ್ತನಾ ನಾತ್ತಿಲೆ ಮ್ಹಣ್ಕೆ ವರ್ತನ ಕರ್ತಾಶಿಲೀಂತಿ . ಧರ್ಮ ಸಿದ್ಧಾಂತ , ನೀತಿ , ನಿಯಮ , ಸಮಾಜಾಂತು ನಾತ್ತಿಲೆ ಮ್ಹಣ್ಕೆ ವರ್ತನಾ ಕೋರ್ಚ್ಯಾಕ ಶುರು ಕೆಲ್ಲೆ ಲೋಕಾನಿ . ನಿಂಮ್ಗೀತಲೋ ಎಕ್ಲೊ ರಾಯು ಅಸ್ಸ ಮೋಣು ಅಂಗಾರಿ ಧ್ಯಾಸು ನತ್ತಿಲೆ ಮ್ಹಣ್ಕೆ ವರ್ತನಾ ಶುರು ಕೆಲ್ಲೆ .
ಕಲಿಯುಗ ಪ್ರಾರಂಭ ಝಲ್ಲಾ . ಶ್ರೀ ಕೃಷ್ಣಾಲೆ ದ್ವಾರಕಾವತಿಕ ತಾ೦ಯ್ಯ್ ಪಾವ್ಲಾ . ದ್ವಾರಕೆ೦ತು ಯಾದವ ದುಡ್ದುವಾಳ ಲೋಕು . ಹೇ ಅತೀ ಆರ್ಥಿಕ ಸ್ತಿಥಿ ನಿಮಿತ್ಯ ಸರ್ವ ಯಾದವ .. ಆಳ್ಶಿ ಲೋಕ ಜಲ್ಲೀ೦ತಿ . ಜುಗಾರಿ , ಮಧ್ಯ ಪಾನ , ವ್ಯಭಿಚಾರ , ಸರ್ವ ನಮುನೆ ದೌರ್ಜನ್ಯ ಕೊರುಂಕ ಶರಣ ಜಲ್ಲೀ೦ತಿ . ಕೃಷ್ಣಾಲೆ ಕುಟುಂಬೇ ಲೋಕು ತಾ೦ಯ್ಯ್ ಪಿವಿಂಡೆ ಜಲ್ಲೀ೦ತಿ . ಹೇ ಸರ್ವ ದುಷ್ಕೃತ್ಯ ಕೃಷ್ಣು ಪೊಳೈತಾ ಅಸ್ಸ . "ಸ್ವಜನ ಅಂತಃಕಲಹಾ ನಿಮಿತ್ಯ .. ಯಾದವ ಕುಲ ನಾಶ ಜವ್ವೋ " ಮ್ಹಳ್ಳೆಲೆ ದುರ್ವಾಸಾಲೆ ಶ್ರಾಪು ಏಕ ಬದೀನ ಝಲ್ಲೇರಿ ... ಆನ್ನೇಕ ಬದಿನ ಗಾಂಧಾರಿ ಲೆ ಶ್ರಾಪು ಕಾರ್ಯ ರೂಪಾರಿ ಯೆತ್ತಾ ಅಸ್ಸ . ಯಾದವ ಕುಲ ನಾಶಾಕ ವೇಳು ಅಯಿಲಾ . ವಿಧಿ ನಿರ್ಣಯು ... ಕೃಷ್ಣಾ ಕ ರಾಬ್ಬೊಚ್ಯಾಕ ಖುಷಿ ನಾ . ಯುಗ ಶಾಸನಾಕ ಸರ್ವಾನಿ ಸಹಮತಿ ದೀವ್ಕಾ .
ಮಾರ್ಗಶಿರ ಮಾಸು ಪುನ್ನವ ... ಪುನ್ನವ ಅನಿ ಅಮವಾಸ್ಯೆ ದಿವಸು ರಜೆ ದಿವಸು ಮೋಣು ಮಾನ್ಯತಾ ಕರ್ತಾಶಿಲೀಂತಿ . ಕೃಷ್ಣಾ ಲೆ ಚೆರ್ಡು೦ವ , ರಾಜ ವಂಶ ಲೋಕಾಲೆ ವೊಟ್ಟು ಗಳೊ ಭರಿ ಪೀವ್ನ್ ... ಗಾಯನ ಗೀತ ಸಂಗತಾಚಿ ನೃತ್ಯ ಕರ್ತಾಶಿಲೀಂತಿ ಏಕ ರುಕ್ ಮುಳಾ೦ತು . ತ್ಯೆಚಿ ವೆಳ್ಯೇರಿ ಭಾರದ್ವಾಜ , ದುರ್ವಾಸ , ಅತ್ರಿ , ಬೃಗು , ಜಮದಗ್ನಿ ಮಹರ್ಷಿ ವೃಂದ , ಶಿಷ್ಯ ಸಮೇತ ' ಪಿಂಡಾರಕ ' ಮ್ಹಳ್ಳೆಲೆ ಕ್ಷೇತ್ರಾಕ ವತ್ತಾಶಿಲೀಂತಿ . ರುಕ್ಮಿಣಿಲೆ ಪೂತು ಚಾರುದತ್ತಾ ನ ... ಸಾಂಬ ಮ್ಹಳ್ಳೆಲೆ ಆನ್ನೇಕ ಕೃಷ್ಣಾಲೆ ಪುತ್ತಾಕ ದಕ್ಕಯಿಲೆ . ಮುನಿ ಲೋಕಾಂಕ ಅಪಮಾನ ಕೊರ್ಚೆ ಖತಿರಿ .. ಸಾಂಬಾನ ಬಾಯ್ಲ್ ಮನ್ಶ್ಯಾ ಮ್ಹಣ್ಕೆ ವೇಸು ಘಾಲ್ನ್ ... ' ಹೇ ಗುರ್ಬಿಣಿ ಸ್ತ್ರೀಕ ಚೆಲ್ಲೋ ಝತ್ತಾ ಕೀ ಚೆಲ್ಲಿ .. ? ಮೋಣು ಭವಿಷ್ಯ ನಿಂಮ್ ಗೂಯಾ ' ಮೋಣು ಮುನಿ ಲೋಕಾಲೆ ಯೆದ್ರಾಕ ಯೇವ್ನ್ ...ತಾಂಕಾ ಗೇಲಿ ಕುಶಾಲಿ ಕರ್ತಾಚಿ ನಿಂಮ್ ಗಿಲೆ .
ಯೋಗೀಶ್ವರಾ .. ! ಶ್ರೀ ಕೃಷ್ಣಾಲೆ ಚೆರ್ಡುವಾಂಕ .. ಮುನಿ ಲೋಕಾಂಕ ಗೇಲಿ ಕೊರ್ಚ್ಯಾಕ ದುರ್ಬುದ್ಧಿ ಆಯ್ಯಿಲೆ೦ಚಿ ವಿಧಿ ಸಂಕಲ್ಪ್ ಮೋಣು ಸಂಘುಯೇತ . ತಾಂಗೆಲೆ ಕರ್ಮಾಕ ಸ೦ಮ್ಮ ಝಲ್ಲೆಲೆ ಬುದ್ಧಿ ಕಾಮ ಕರ್ತಾ ಮೋಣು ಸಾಂಗ್ತಾತಿ . ವಾಯಿಟ ಕಾಲು ಆಯ್ಯಿಲೆ ತೆದ್ನಾ.. ಆಲೋಚನಾ ತಾಂಯ್ಯ್ ವಾಯ್ಟ್ ಝತ್ತಾ .. ಅನಿ ಮನುಷ್ಯು ವಾಯಿಟ ವಾಟ್ಟೇನ ವತ್ತಾ . ಚಾಂಗ ವೇಳು ಅಯಿಲೇರಿ .. ಚಾಂಗ ಆಲೋಚನಾ ಯೇವ್ನ್ ಅದೃಷ್ಟ ಮಾರ್ಗಾರಿ ಯೆತ್ತಾತಿ .
ಕೃಷ್ಣಾಲೆ ಪುತ್ರಾನಿ ದುಃಖ ಜಲ್ಲಾ ಮ್ಹಣ್ಕೆ ನಟನ ಕೊರ್ನ್ ಮುನಿ ವೃಂದಾ ಲಗ್ಗಿ ವೊಚ್ಚುನ್ .. " ಸ್ವಾಮಿ .. ! ಕಾಲಿ ದುಕುನ್ ಹೀ ಬಾಯ್ಲ್ಯಾ ಮನಿಷಿ ಪೊಟ್ಟಾ ದೂಕಿ ಯೆವ್ನ್ ವಳ್ - ವಳತಾ . ಗುರ್ಬಿಣಿ ... ಹಿಕ್ಕಾ ಚೆಲ್ಲೋ ಝತ್ತಾ ಕಿ ಚೆಲ್ಲಿ .. ? " ಮೋಣು ಕುಚೇಷ್ಟ ಕೊರ್ನ್ ನಿ೦ಮಗಿಲೆ . ನಾರದ ಮುನಿನ " ಕೋಣ ತುಮ್ಮಿ .. ? " ಮೋಣು ನಿ೦ಮಗಿಲೆ . " ಆಮ್ಮಿ ಕೃಷ್ಣಾಲೆ ಚೆರ್ಡು೦ವ " ಮ್ಹಳ್ಳೆಲೀಂತಿ . ಧರ್ಮ ಸಂಸ್ಥಾಪಕ ಕೃಷ್ಣಾಲೆ ಚೆರ್ಡು೦ವ ವೇ .. ? " ಆಶ್ಚರ್ಯ ಝಲ್ಲೆ ಮುನಿ ಲೋಕಾಂಕ ." ಪೊಳೈಲ್ವೇ .. ! ಅಂಬೆ ರುಕ್ಕಾಕ .. ಬೇವಾ ಫಳ ಜಾವ್ಚೆ ಮ್ಹಳ್ಳೆರಿ ಹ್ಯೆಂಚಿ .. ! ನಾರಾಯಣ .. ನಾರಾಯಣ .. ! " " ಕಸಲೆ .. ? ಅಮ್ಮಿ ಬೇವಾ ಫಳ ವೇ .. ? " ಕೋಪಾನ ನಿಂಮ್ಗಿಲೆ ಸೋಮಕಾ ನ . ಜಮದಗ್ನಿ ಮಹರ್ಷಿನ " ಅಮ್ಮಿ ಪಿಂಡಾರಕ ಕ್ಷೇತ್ರಾ ಕ ವತ್ತಾ ಆಸ್ಸತಿ ... ಮಾಗಿರಿ .. ತುಮ್ಗೆಲೆ ಪಿತೃ ದೇವ ಕೃಷ್ಣಾ ಕ ಮೇಳ್ನ್ ವೊಚ್ಚಾ ಮೋಣು ಆಯ್ಯಿಲೆ೦ತಿ . ದಯ ದೊವೋರ್ನ್ ಆಮ್ಗೆಲೆ ವಾಟ ಅಂಮ್ಕಾ ಸೋಡಿ .. ಅಷ್ಶಿ ಸಾಧು ಸಂತಾಂಕ ಗೇಲಿ ಕೊರ್ಚೆ ಸ೦ಮ್ಮ ನಯ್ಯ್ . " ಮ್ಹಳ್ಳಲೊ . ಪಿಲ್ಲೆಲೆ ಅಮಲಾರಿ ಅಷ್ಶಿಲೆ ಕೃಷ್ಣಾಲೆ ಚೆರ್ಡು೦ವಾ೦ಕ ಸ೦ತ ಲೋಕಾಲೆ ಹಿತ ವಚನ ಸ೦ಮ್ಮ ದಿಸ್ಸನಿ . ಸರ್ವ ಲೋಕು ಹಸ್ಸುನ್ ಅನಿಕಯ್ ಅವಮರ್ಯಾದಿ ಕೆಲ್ಲಿ . ತನ್ನಿ ನೆಶಿಲೆ ಗೋಚಿ ತಂಡುನ್ ಅಪಹಾಸ್ಯ ಕೆಲ್ಲೆ . ತೆದೊಳ್ ತಾಯ್ಯ್ ಸಮಾಧಾನೆರಿ ಅಷ್ಶಿಲೆ ದುರ್ವಾಸ ಮುನಿಕ ಕೋಪು ಯೇವ್ನ್ ....
" ಕೃತ್ರಿಮ ರೂಪಾರಿ ಅಶಿಲೆ ಹೇ ಮನುಷ್ಯಾಕ ಚೆಲ್ಲೊಯಿ ಜಾಯ್ನಾ ಚೆಲ್ಲಿಯೀ ಜಾಯ್ನಾ ... ಏಕ ... ಮುಸಲ ( ' ಕಂಡಣ ' ) ಜನ್ಮಾ ಯೇವ್ನ್ ತುಮ್ಗೆಲೆ ಸರ್ವ ನಾಶ ಝತ್ತಾ ... ತುಮ್ಗೆಲೆ ಮೃತ್ಯು ಜಾವ್ಚೆ ಮುಸಲಾ ನಿಮಿತ್ಯ .. " ಮೋಣು ಶ್ರಾಪ್ ದಿಲ್ಲೊ . ಪಿಲ್ಲೆಲೆ ಅಮಲೇರಿ ಅಷ್ಶಿಲೆ ಕೃಷ್ಣಾ ಲೇ ಚೆರ್ಕೆ ಹಸ್ - ಹಸ್ತಾಚಿ ನಂಚುನ್ ಆನಂದ ಪಾವ್ಲೆ೦ತಿ .
ದೂರ್ವಾಸಾಲೆ ಶ್ರಾಪ ತಶೀ೦ಚಿ ... ಸಾಂಬಾಕ ಮುಸಲ ( ಕಂಡಣ ... ಮುಸಲಾ ಸಂಸ್ಕೃತ ಶಬ್ಧ , ತ್ಯೆಚಿ ಶಬ್ಧ ವಾಪರ್ಲಾ. ) ಪೊಟ್ಟಾ ದುಕುನ್ ಭಾಯಿರಿ ಅಯಿಲೆ . ಕೃಷ್ಣಾಲೆ ಚೆರ್ಕೆ೦ಕ ಪಿಲ್ಲೆಲೆ ಮದಿರಾ ಅಮಲ ಎಕ್ಕ ಪೊಟಿ ದೆ೦ವ್ಲೆ . ಭೀವ್ನ್ ಹಾಥ್ - ಪಾಯ್ಯಂ ಕಡ್ - ಕಡ್ಚ್ಯಾಲಾಗ್ಲೆ . ಮುಸಲ ಪುಟ್ಟಾ ದುಕೂನ್ ಭಾಯಿರಿ ಆಯಿಲ್ ಸತಾನ ಸಾಂಬಾನ ಜೀವು ಸೊಳ್ಳೊ . ಕೃಷ್ಣಾಕ ಹೊ ವಿಷಯು ಕಳ್ಳೊ .. ವಿಧಿ .. ! ಪ್ರಾರಬ್ಧ ಮೋಣು ವಿಷಯು ತಯೀ೦ಚಿ ಸೊಳ್ಳೆ . ಸಾಂಬಾಲೆ ಅಗ್ನಿ ಸಂಸ್ಕಾರು ಕೊರುಂಕ ಆಜ್ಞಾ ದಿಲ್ಲಿ . ಮರಣೋತ್ತರ ಕಾರ್ಯ ಮುಕಾರ್ಸುನ್ ವೆಲ್ಲೆ . ಸಾಂಬಾಲೆ ಗರ್ಭ ಛಿದ್ರ ಕೊರ್ನ್ ಭಾಯಿರಿ ಆಯ್ಯಿಲೆ ಮುಸಲಾಕ ಪ್ರಭಾಸ ತೀರ್ಥಾ ಚೆ ಸಮುದ್ರಾ ಉತ್ಕಾಂತು ಘಷ್ಟುನ್ - ಘಷ್ಟುನ್ ಪುಡ್ಡಿ ಕೊರ್ನ್ ಸಮುದ್ರ ಜಲಾಂತು ಘಾಲ್ನು ಯೆವ್ಚ್ಯಾಕ ಸೇವಾಕಾಂಕ ನಿಯುಕ್ತಿ ಕೊರ್ನ್ ಅಷ್ಶಿಲೆ . ತ್ಯೆ ಪ್ರಮಾಣೇರಿ ಮುಸಲಾ ಜೋರೊನ್ - ಜೊರೊನ್ , ಸಮುದ್ರ ಉತ್ಕಾಂತು ಪಿಟ್ಟಿ ಕೋರ್ನ್ ... ಅಖೇರಿ ಕಡ್ಡಿಶೆ ವರ್ಲೆಲೆ ಏಕ ದಿಗೂ ಕುಡ್ಕೊ ... ತ೦ಯೀ೦ಚಿ ಉಡೊನ್ ರಾಜ ಭಟ ವಾಪಾಸ್ ಗೆಲ್ಲೆ .
ಯಾದವ ವಂಶ ನಾಶ ಜಾವ್ಚೆ ವಿಷಯು ಯಾದವಾಂಕ ಮಸ್ತ ಜನಾಂಕ ಗೊತ್ನಾ . ಕೃಷ್ಣ , ಬಲರಾಮ , ಕುಲಗುರು ಗರ್ಗಾಚಾರ್ಯಾಕ ಅಶಿ ಸ್ವಲ್ಪ ಲೋಕಾಂಕ ಗೊತ್ತಶಿಲೆ . ರುಕ್ಮಿಣಿ ದೇವಿನ ಕೃಷ್ಣಾ ಲಗ್ಗಿ ನಿಂಮ್ಗಿಲೆ .. " ಸ್ವಾಮೀ .. ! ಯದು ವಂಶ ನಾಶ ಜಾವ್ಚೆ .. ರಬ್ಬೊಚ್ಯಾ ಜಾಯ್ನಾವೇ ? " ಕೃಷ್ಣು ಹಾಸ್ಲೊ ... "ದೇವೀ .. ! ಅಗ್ನಿ ಮ್ಹಳ್ಳೆಲೆ .. ಸರ್ವ ರುಕ್ಕಾ೦ಕ ನಾಶ ಕರ್ತಾನಾ .. ಗಂಧಾ ರುಕ್ಕಾಕಯಿ ಲಗ್ಗುನ್ ನಾಶ ಕರ್ತಾ . ದುರ್ವಾಸಮುನಿಲೆ ಶ್ರಾಪು ಏಕ ವಿಧಿಲೆ ಶಾಸನ ಜಾವ್ನು ಅಸ್ಸ . ವಿಧಿ ಶಾಸನ ಅಮ್ಮಿಚಿ ನಕಾರು ಕೆಲ್ಲೇರಿ ಕಷ್ಶಿ .. ? ಅಮ್ಮಿ ಭೂಲೋಕಾಕ ಆಯ್ಯಿಲೆ ಕಾಮ ಪೂರ್ತಿ ಝಲ್ಲೆ . ದ್ವಾರಕೇ ಭಾಯಿರಿ ಅಷ್ಶಿಲೆ ದುಷ್ಟ ಲೋಕಾಲೆ ಸಂಹಾರು ಝಲ್ಲಾ . ಅತ್ತ ದ್ವಾರಕೇ ಭಿತರಿ ಅಷ್ಶಿಲೆ ದುಷ್ಟ ಲೋಕಾಲೆ ಸಂಹಾರು ಜಾವ್ಚೆ ಬಾಕಿ ಅಸ್ಸ . ಜರಾಸಂಧ , ಶಿಶುಪಾಲ , ದಂತವಕ್ತ್ರ , ಧುರ್ಯೋಧನ , ಕಂಸ , ಹಾಂಗೇಲೆ ನಾಶ ಝಲ್ಲಾ . ದ್ವಾರಕೆ೦ತು ವಡ್ಡಿಲೇ ದುರಾಚಾರಿ ಲೋಕಾಂಕ .. ಕಾಲದೇವಾಕ .. ವಿಧಿಕ ಸೊಡುಂಕ ನಿರ್ಧಾರ್ ಕೆಲ್ಲಾ .. ತ್ಯೇ೦ಚಿ ಯಾದವ ವಂಶ ನಾಶನ " ರುಕ್ಮಿಣಿಲೆ ದೊಳೆಂತು ಉದ್ದಾಕ ಅಯಿಲೆ .
ಬಲರಾಮಾಕ ಅಪ್ಪೋನ್ ಘೇವ್ನ್ ಕೃಷ್ಣು ... ದ್ವಾರಕೇ ಸಮುದ್ರ ತಟಾರಿ ಆಯಿಲಾ . ಬಲರಾಮಾಕ ಕೃಷ್ಣಾ ಲೆ ತೊಂಡಾರಿ ಅಶಿಲೆ ಭಾವ ಅರ್ಥ ಜಾಯ್ನಿ ... ಕೆದನಾಯ್ ಹಸ್ಮುಖೀ ಜಾವ್ನ್ ಅಸ್ತಶಿಲೋ ಕೃಷ್ಣು .. ಆಜಿ ಘ೦ಭೀರ , ನಿರುತ್ಸಾಹ , ನಿರ್ಲಿಪ್ತ ಜಾವ್ನ್ ಆಸ್ಸುಚೆ .. ಕೃಷ್ಣಾ ಕ ಪೊಳೊನ್ .. " ಕೃಷ್ಣಾ .. !ಸುಮಾರ ದಿವಸ ದುಕುನ್ ತುಕ್ಕ ಪೊಳೈತಾ .. ಕಿತ್ಯಾ ಹೇ ಮನೋ ವೇದನಾ .. ? ಕಸಲೆ ಝಲ್ಲೆ .. ? " " ಬಲರಾಮಾ .. ! ಕಲಿಯುಗ ಆರಂಭ ಝಲ್ಲಾ .. ಅಮ್ಮಿ ಭುಂಯ್ಚೇರಿ ಜನ್ಮಾ ಆಯ್ಯಿಲೆ ಕಾಮ ಪೂರ್ತಿ ಝಲ್ಲಾ ಅತ್ತ ಅಮ್ಮಿ ಹ೦ಗಾ ದುಕುನ್ ವೊಚ್ಛೆ ವೇಳು ಅಯಿಲಾ .. ತು ತಯ್ಯಾರ್ ಝಾ " ಮೋಣು ಸಂಘುನ್ ದೋಳೆ ಧ೦ಕ್ಲೆ . ಇಂದ್ರ ಲೋಕಾ ದುಕುನ್ ದೇವೇಂದ್ರ .. ಅಷ್ಟ ದಿಕ್ಪಾಲಕ ಸಮೇತ , ಪ್ರತ್ಯಕ್ಷ ಝಲ್ಲೊ . " ಮಾಧವಾ .. ! ತುಗ್ಗೆಲ್ ಅವತಾರಾ ವೇಳು ಸಂಪನ್ನ ಝಲ್ಲಾ .. ತುಕ್ಕಾ ವೈಕುಂಠಾಕ ಸ್ವಾಗತ ಕೊರುಂಕ ಸರ್ವಾಂಕ ಅಪ್ಪೋನ್ ಘೆವ್ನ್ ಅಯಿಲಾ .. " ಮೋಣು ಸಂಘುನ್ ಕೃಷ್ಣಾ ಕ ನಮನ ಕೆಲ್ಲೆ . " ದೇವೇಂದ್ರಾ .. !ಯೆವ್ಚೆ ಪುನ್ನವೇ ದಿವಸು .. ಹಾಂವ ವೈಕುಂಠ ಪ್ರವೇಶು ಕರ್ತಾ " ದವರ್ಲೆಲೆ ಮುಹೂರ್ತ ವಿಷಯು ಸಂಘಲೆ . ಕಲಿ ದೇವು ... " ವಾಸುದೇವಾ .. ! ತೂ೦ವೆ ವಾಪಾಸ್ ವೊಚ್ಛೆ ದಿವಸು ಮಿಗೆಲೆ ಕಲಿಯುಗ ಆರಂಭ ಜಾವ್ಚೆ ಮುಹೂರ್ತ ಜಾವ್ವೋ ಮೋಣು ಆಶೀರ್ವಾದ ಕರಿ .. " " ತಥಾಸ್ತು " ಮ್ಹಳ್ಳಲೊ ಶ್ರೀ ಕೃಷ್ಣು .
" ಅಗ್ನಿ ದೇವಾ .. ! ಧರ್ಮ ಸಂಸ್ಥಾಪನೆ ಖತಿರಿ ತುಗೆಲೆ ಘೆತ್ತಿಲೆ ಚಕ್ರಾ ಯುಧ ' ಸುದರ್ಶನ , ಕೌಮುದಕಿ , ಗಧಾಯುಧ ತುಕ್ಕಾ ವಾಪಾಸ್ ಕರ್ತಾ.. ವಾಯುದೇವಾ .. ! ಮಿಗೆಲೆ ದಿವ್ಯ ರಥ ' ಕಾಂಚನ ' ತುಕ್ಕಾ ವಾಪಸ್ ಕರ್ತಾ " ಮ್ಹಳ್ಳಲೊ ಕೃಷ್ಣು . ದೊಳೆ ಉದ್ದಾಕ ಕಾಣು ರಬ್ಬಿಲೆ ಭೂದೇವಿಕ ಪೊಳೊನ್ .. " ದೇವಿ .. ! ತುಕ್ಕ ದಿಲ್ಲೆಲೆ ವಚನ ಪ್ರಕಾರ ಹಾಂವೆ ತುಗೆಲೆ ಲೋಕಾಂತು ಜನ್ಮ ಘೇವ್ನ್ .. ದುಷ್ಟ ಲೋಕಾಂಕ ಶಿಕ್ಷ ದೀವ್ನ್ ... ಶಿಷ್ಟ ಲೋಕಾಂಕ ಸಂರಕ್ಷಣ ಕೆಲ್ಲಾ ... ತುಗೆಲೆ ಅಪಾರ ಭೂ ಭಾರ ಊಣೆ ಕೆಲ್ಲಾ . ಮಿಗೆಲೆ ಕಾಲು ಝಲ್ಲೆ . " " ಅನಿ ಕೆದನಾ ಯೆತ್ತಾ ಕೃಷ್ಣಾ .. ? " ನಿಂಮ್ ಗಿಲೆ ಭೂದೇವಿನ . ಕೆದನಾ ಧರ್ಮಾ ಕ ಚ್ಯುತಿ ಯೆತ್ತ ಕೀ ... ಕೆದನಾ ಅಧರ್ಮ, ... ಸದಾಚಾರಿ ಲೋಕಾಂಕ , ಸಂಕಟಾಕ ಘಾಲ್ತಾಕೀ , ತ್ಯೆ ವೆಳ್ಯೇರಿ ಹಾಂವ ಚುಕ್ಕನಾಶಿ ಅವತಾರು ಘೆವ್ನ್ ಯೆತ್ತಾ . ಶಿಷ್ಟ ರಕ್ಷಣೆ ಕರ್ತಾ .. ಮಿಗೆಲೆ ಭಕ್ತಾದಿ ಲೋಕಾಂಕ ಸಂರಕ್ಷಣ ಕೊರುಂಕ ಆನ್ನೇಕ ಪೋಟಿ ಜನ್ಮಾ ಯೆತ್ತಾ . ಮಕ್ಕಾ ನ೦ಮ್ಗಲೆಲೆ ಲೋಕಾಂಕ ಹಾಥು ಸೋಣು ಘಾಲ್ನಾ . ಪ್ರತೀ ಗಯ್ಯೇ ಲೆ ಆತ್ಮಾ೦ತು ಹಾಂವ ಅಸ್ಸ. ಪ್ರತೀ ಚೆರ್ಡಾಲೆ ಅಂಗಾಂತು ಹಾಂವ ಅಸ್ಸ .. ಓಂಕಾರ ಶಬ್ಧಾ೦ತು ಹಾಂವ ಅಸ್ಸ .. ಗಾಯತ್ರೀ ಮಂತ್ರಾ೦ತು ಹಾಂವ ಅಸ್ಸ . ಮಿಗೆಲೆ ವೈರಿ ಭಕ್ತಿ ದೊವೊರ್ನ್ .. ಮಿಗೆಲೆ ಪೂಜನ ಕೊರ್ನ್ ... ಸ್ಮರಣ ಮಾತ್ರೇನ ಹಾಂವ ಯೇವ್ನ್ ಪಾವ್ತಾ . ನಿರ್ಮಲ ಮನ ಅಸ್ಲೆರಿ ಪೂರೊ .. " ಭೂದೇವಿ ಕೃಷ್ಣಾಲೆ ಚರಣಾಂಕ ಪಾ೦ಯ್ ಪೋಣು ಚಮ್ಕಲಿ . " ಅಣ್ಣಾ ಬಲರಾಮಾ .. ! ತುಗೆಲೆ ಹಲಾಯುಧ ಸಮುದ್ರಾ೦ತು ಸೋಣು ಯೋ .. ಅತ್ತ ಅಂಮ್ ಕಾ ಕಾಲುಚಿ .. ಆಯುಧ ಯೋ .. ವೊಚ್ಚಾ " ಮ್ಹಳ್ಳಲೊ ಕೃಷ್ಣು . ದೊಗ್ಗಯಿ ಸಮುದ್ರಾ ಮಧ್ಯೆ ವೊಚ್ಚುನ್ ಹಲಾಯುಧ ಅನಿ ಕೃಷ್ಣಾಲೆ ಕೊಳಲು ಉತ್ಕಾಂತು ಸೊಳ್ಳೆ . ಬಲರಾಮು ಅನಿ ಕೃಷ್ಣು ನಿರಾಯುಧ ಜಾವ್ನು ಅಂತಃಪುರಾಕ ಚಂಮ್ಕುನ್ ಗೆಲ್ಲೆ . ಯೆದ್ರಾಕ ' ದ್ವಾರಕಾವತಿ ' ನಗರಾ ಅಧಿ ದೇವತೆ ಯೇವ್ನ್ ರಾಬಲಿ . " ದ್ವಾರಕಾವತಿ .. ! ತು ಕಸಲೇಕ ಹಾಂಗಾ ಆಯಿಲ್ ಮೋಣು ಮಕ್ಕಾ ಗೊತ್ತಸ್ಸ . ಮಿಗೆಲೆ ನಿರ್ವಾಣಾ ನಂತರ .. ಸಾಥ್ ದಿವಸ ನಂತರ , ಸಾಗರ ಗರ್ಭಾ೦ತು ಗುಪ್ತ ಜಾವ್ನ್ ರಬ್ಬುಕಾ .ಸ್ವಲ್ಪ ಹಾಜರ್ ವರುಷ ನಂತರ ಹಾಂವ ಜನ್ಮಾಕ ಯೇವ್ನ್ ತುಕ್ಕಾ ಯೇವ್ನ್ ಮೆಳ್ತಾ . ತುಕ್ಕಾ ಆನ್ನೇಕ ಪೋಟಿ ಚೇತನ ಕರ್ತಾ ... ಬಹಿಣಾ .. ! ತುಗೆಲೆ ಹೃದಯಾ೦ತು ಅರ್ಧ ಭಾಗ ಜಾವ್ನ್ ಅಷ್ಶಿಲೊ .. ಹಾಂವ ಕೆದನಾಯ್ ವಿಸರ್ನಾ ತುಕ್ಕಾ.. ಆನ್ನೇಕ ಪೊಟಿ ಮೆಳ್ತಾ " ಮೋಣು ಸಂಘುನ್ ಕೃಷ್ಣು ಮುಕಾರ್ಸಲೊ . ಕೃಷ್ಣಾಲೆ ದೊಳೆ೦ತು ಉದ್ದಾಕ ಯೇವ್ನ್ ಘು೦ವಲೆ.
ದ್ವಾರಕೇ೦ತು .. ಸಮುದ್ರ ಜಾತ್ರಾ ಶುರು ಝಲ್ಲಿ ಕೃಷ್ಣಾನ ಅರ್ಜುನಾಕ ಏಕ ಕಾಗದ ಬೊರೈಲೆ " ಪ್ರಿಯ ಅರ್ಜುನಾ .. ! ದುರ್ವಾಸ ಗಾಂಧಾರಿಲೆ ಶ್ರಾಪಾ ಪ್ರಕಾರ ಯಾದವ ವಂಶ ನಿರ್ನಾಮ ಜಾವ್ಚೆ ವೇಳು ಅಯಿಲಾ . ತೂ೦ವೆ ತತ್ಕಾಲ ದ್ವಾರಕೆಕ ಯೇವ್ನ್ , ಸರ್ವ ಸ್ತ್ರೀ , ಬಾಲ ಬಾಲಿಕೆ೦ಕ ಘೇವ್ನ್ ಹಸ್ತಿನಾವತಿಕ ಅಪ್ಪೋನ್ ವೋರ್ಕಾ . ಅನಿ ದೋನಿ ದಿವಸಾನ ದ್ವಾರಕೆ ನಗರ ಸಮುದ್ರಾ೦ತು ಬುಡ್ತಾ . ಜಲ್ಲೆಲೆ ನಿಮಿತ್ಯ .. ತೂ೦ವೆ ಜಾಲ್ತಿತ್ಲೆ ವಗ್ಗಿ ಬಾರ್ಸೊರ್ನ್ ಯೇವ್ಕಾ.
ಬಲರಾಮು ಅನಿ ಕೃಷ್ಣು .. ಸಮುದ್ರ ಜಾತ್ರೇಕ ಪ್ರಭಾಸ ತೀರ್ಥಾ ಕ ಯೇವ್ನು ಪಾವ್ಲಿ೦ತಿ . ಜಾತ್ರೆ ಶುರು ಜಾವ್ನ್ ಸಹ ದಿವಸ ಝಲ್ಲೆ . ಕೃಷ್ಣಾ ನ ದ್ವಾರಕೆ ಸೊಳ್ಳೆ ಸತಾನ .. ಭೂ೦ಯಿ ಕಾಂಪ್ಲಿ .. ಅನೇಕ ಜಾಗೇರಿ ಉತ್ಪಾತ ಝಲ್ಲೆ .. ಗಾಂವ್ಚೆ ಸೂಣೆ .. ಕೊಲ್ಲೆ ಮ್ಹಣ್ಕೆ ರೊಡು ಶುರು ಕೆಲ್ಲೆ .. ರನ್ನಿ೦ತು ಜೋಳ್ಚೆ ಅಗ್ನಿ ಎಕಾ - ಏಕೀ ವಾಡ್ವಾನು ಗೆಲ್ಲೆ ... ಕೀರು ಮೋರಾನಿ ಅಶುಭ ಸೂಚನಾ ದಿಲ್ಲೆ ... ತೂಪ ಭರ್ಲೆಲೆ ಕುಂಭ ಅಪಣಿತ್ಲೇಕ ಭೇತ್ತುನ್ ಗೆಲ್ಲೆ .. ಗೊರ್ವ೦ , ದುದ್ದಾ ಬದ್ಲಾಕ ರಗತ ದಿವ್ಚ್ಯಾ ಶುರು ಕೆಲ್ಲೆ ... ಆಕಾಶಾರಿ ಉಬ್ಚೆ ಪಕ್ಷಿ ವೃಂದ ಅಕಾಸ್ಮಾತ್ ನೆಲಾರಿ ಪೋಣು ಜೀವು ಸೊಳ್ಳೆ ... ಮಹಾಪ್ರಳಯ ವಾಯು , ಕಾರ್ಮೋಡ ವೊಟ್ಟು ಜಾವ್ನ್ .. ಮಿಂಚು ಗುಡುಗಾ ಪಾವ್ಸು ರೊಕ್ವೊಚಾ ಶುರು ಝಲ್ಲೆ .. ಘರ್ ವಂದ ನಾಶ ಜಾವ್ನ್ ಭಿತರಿ ಅಷ್ಶಿಲೆ ಲೋಕು ಸಮೇತ ಭುಯಿಂತು ಪೂರ್ನ್ ಗೆಲ್ಲೆ . ಪ್ರಳಯ ವಾಯು ರಬ್ಬಿಲೇ ವೃಕ್ಷ ವೃಂದಾಕ ಪಾಳ ಸಮೇತ ಹುಂಮ್ಟಾನ್ ಕಾಣು ನಾಶ ಕೊರ್ನ್ ನೆಲಾರಿ ಘಲ್ಲೆ . ಅಪ್ಪಣಿತ್ಲೇಕ ಅಗ್ನಿ ಜ್ವಾಲಾ ಸೃಷ್ಟಿ ಝಲ್ಲಿ ... ಘರ್ ವಂದ ಉಜ್ಜೋ ಲಾಗ್ಗುನ್ ಭಸ್ಮ ಝಲ್ಲೆ ... ದ್ವಾರಕೆ ಲೋಕು ಭೀವ್ನ್ ಚೆಲ್ಲಾ ಪಿಲ್ಲಿ ಜಾವ್ನ್ ಧಾಂವ್ನ್ ಗೆಲ್ಲೆ .
ಹೆತಾ೦ತು , .. ಪ್ರಭಾಸ ತೀರ್ಥ ಜಾತ್ರೆ೦ತು ಪವ್ವಿಲೆ ಲೋಕು ಸಂತೋಷಾರಿ ಡೋಲು ಮಾರ್ನ್ ಸಂಗೀತ ಸಂಘುನ್ ನೃತ್ಯಾ೦ತು ಮಗ್ನ ಜಾವ್ನ್ ಅಶಿಲೆ . ಥೊಡೆ ಲೋಕಾನಿ ಮದಿರಾ ಪಾನ ಕೆಲ್ಲೆಲೆ ನಿಮಿತ್ಯ .. ಅಂಗಾರಿ ಸೋಯ ನಾಶಿ ನಾಂಚು೦ಕ ಶುರು ಕೆಲ್ಲೆ .. ಯುವ ಲೋಕಾಲೆ ಕುಸ್ತಿ , ಮಲ್ಲ ಯುದ್ಧ , ಕತ್ತಿ ವರಸಾ , ದೊಣ್ಣೆ ವರಸಾ ... ಹರುಷಾಕ , ಸಂತೋಷಾಕ ಪಾರ ನಾ . ಸ್ತ್ರೀ ಲೋಕಾಲೆ ಹಾಸು ನಿಡ್ - ನಿಡು .. ವಯ್ಯಾರ ಉತ್ತರಂ .. ಅಂಗ ಅಂಗ ಹಲ್ಲೊನ್ ನಾ೦ಚ .. ಪುಂಗಿ ಎದ್ರಾಕ ರಬ್ಬಿಲೇ ನಾಗು ಶೇ ಎಕ್ಲೆ೦ಕ - ಎಕ್ಲೆ ವಿಸರ್ಲೆ . ಸ್ತ್ರೀ ಪುರುಷ ವ್ಯತ್ಯಾಸು ನಾಶಿ ಕಾಮುಕ ಭಾವೇರಿ ನಾಂಚ್ಲೆಂತಿ . ಮೆಳ್ಳೆ - ಮೆಳ್ಯಾಲೆ ಬಾಯ್ಲಾ೦ಕ ತಂಡುನ್ ಅಪಹಾಸ್ಯ ಕೆಲ್ಲೆ . ಧರ್ಮಾ ಧರ್ಮ ನೀತಿ ನತ್ತಿಲೆ ಲೋಕಾ ಮ್ಹಣ್ಕೆ ವರ್ತನ ಕೆಲ್ಲೆ . ಹ್ಯೇ ಸಕ್ಕಡ ಪೊಳೈತಲೆ ಬಲರಾಮಾಕ .. ಕೃಷ್ಣಾನ ಸಂಘಲೆ " ಯಾದವ ನಾಶ ದೊಳೆ ಎದ್ರಾಕ ದಿಸ್ಲೆ " ಹ್ಯೆಂಚಿ ಸ೦ಮ್ಮ್ ಜಲ್ಲಲೋ ವೇಳು ಮೋಣು ಸಂಘುನ್ ಬಲರಾಮು ದೇಹ ತ್ಯಾಗ ಕೊರುಂಕ ಸಮುದ್ರಾ ದಿಕಾನ ವತ್ತಾ ರಾಬ್ಲೊ . ಉತ್ಕಾಂತು ದೆಂವ್ಲೆ ಸತಾನ ಯೆಕ್ ಮಹಾ ಪಾಳ ಯೇವ್ನ್ ಬಲರಾಮಾಕ ತಂಡುನ್ ವೆಲ್ಲೆ . ಗಂಭೀರ ಜಾವ್ನ್ ಉತ್ಕಾಂತು ದೇವ್ನ್ .. ಸಮುದ್ರಾ೦ತು ಲೀನ ಝಲ್ಲೊ . ಹಜಾರ ಮತ್ತೆ ಅಶಿಲೋ .. ಆದಿಶೇಷಾಕ ಸಮುದ್ರಾ೦ತು ಪೊಳೊನ್ ಲೋಕು ದಿಗ್ಬ್ರಾ೦ತ ಝಲ್ಲೆ .. ದೊನ್ನಿ ಹಾಥ ಉಬಾರ್ನ್ ಪಾ೦ಯ್ಯ್ ಪೊಳ್ಳೆಂಚಿ . ಗುಡುಗು ಮಿಂಚಾ ಪಾವ್ಸು ರಾತ್ರಿ ವೇಳು .. ಮಿಂಚಾ ಉಜ್ವಾಡಾಕ ಆದಿಶೇಶಾಲೆ ಮತ್ತೆ ಜಗ ಜಗ ನೆ ದಿಸ್ಸುನ್ ಅಂತರ್ಧಾನ ಝಲ್ಲೆ . ಬಲರಾಮು ಸಮುದ್ರಾ೦ತು ನಿರ್ವಾಣ ಝಲ್ಲೋ .
ಕೃತ ವರ್ಮಾ ಅನಿ ಸಾತ್ಯಕಿ ದೊಗ್ಗೈ ಜನಾನಿ ಪೀವ್ನು ಸೋಯ ನಾಶಿ ತಮಾಷೆರಿ ಉಲ್ಲಯಿತಶೀಲೀಂತಿ . ಉತ್ರಾ೦ಕ ಉತ್ತರ ಮೇಳ್ನ್ ವಿರಸಾ ಕ ಪಾವ್ಲ್ಲೆ. ಸುರ್ವೇಕ ಹತ್ತಾನಿ ಲೊಕೊನ್ ಘೇವ್ನ್ ಕೋಪು ದಕ್ಕಯಿಲೆ .. ವತ್ತಾ ವತ್ತಾ ದೊಗ್ಗ ಯಿ ಯುದ್ಧಾ ಕ ರಾಬಲೆ . ಮುಸಲ ಘಷ್ಟುನ್ ಪುಡ್ಡಿ ಕೊರ್ನ್ ಸಮುದ್ರಾ ಉತ್ಕಾಂತು ಮಿಶ್ರಿತ ಕೊರ್ನ್ ಅಶಿಲೆ ಜಾಗೇರಿ ... ಅತ್ತ ತಣ ಚಿಗುರ್ಲಾ . ತ್ಯೆ ತಣ .. ಖಡ್ಘ ಶೀ ದಿಸ್ಲೆ . ತ್ಯೇ ಬದಿ - ಹ್ಯೇ ಬದಿ ಲೋಕಾನಿ , ತ್ಯೆ ತಣ ಹತ್ತಾ೦ತು ಘೆತ್ಲೆ . ಹತ್ತಾ೦ತು ತಣ ಖಡ್ಘಶೆ ರೂಪಾಂತರ ಝಲ್ಲೆ . ಯೇಕ್ - ಎಕ್ಲೇನಿ ಚಿ ಖಡ್ಘ ಘು೦ವ್ಡಾನು ಎದುರಾಳಿ ಗಳೂ ಕತ್ತೋರ್ನ್ ಕತ್ತೋರ್ನ್ ಘಾಲ್ಲೆ . ಸಾತ್ಯಕಿನ .. ಕೃತವರ್ಮಾ ಲೆ ಗಳೋ ಕತ್ತೊರ್ನ್ ಘಲ್ಲೆ . ತಗೆಲೆ ಜನಾನಿ , ಹಾಂಗೇಲೆ ಮತ್ತೆ ಕತ್ತೊರ್ನ್ ಘಲ್ಲೆ . ದರ್ಲೆ ಮನ್ಶ್ಯಾನ , ಬಾಯ್ಲ್ ಮನ್ಶ್ಯಾನ ದ್ವೇಷ ಸಾಧನ ಕೆಲ್ಲೆ ... ತಾಂಗೆಲೆ ಜನಾನಿ ಹಂಗೇಲೆ ಜನಾಂಕ ... ಹಂಗೇಲ್ ಜನಾನಿ ತಂಗೆಲ್ ಜನಾಂಕ ಮಾರಕ ಘಾಯು ಕೊರ್ನ್ ದಿವಿಶಿ ಮಾರ್ಲೆ . ಶ್ರೀ ಕೃಷ್ಣಾ ಲೆ ಚೆರ್ಡು೦ವ .. ಸಮಸ್ತ ಯಾದವ , ಶ್ರಾಪ ಪ್ರಭಾವಾ ನಿಮಿತ್ಯ ಧುರ್ಮರಣ ಪ್ರಾಪ್ತ ಝಲ್ಲೆ . ಪ್ರಭಾಸ ತೀರ್ಥಾ೦ತು ನಿರ್ಜೀವ ಶರೀರ ರಾಶಿ ಪೊಳ್ಳಿ . ರೋಡ್ಚ್ಯಾಕ ಏಕ್ಲೊಯ್ ವರ್ನಿ . ಅತೀ ಭಯಂಕರ ನಾಶ ... ಬಾಬ್ಬಾ೦ವ್ಡಾ ಮಧ್ಯೆ ಯುದ್ಧ ... ! ಕೋಣ ವಾಂತಲೆ .. ! ಅತ್ತ ಯಾದವ ಕುಲಾಂತು ಶ್ರೀ ಕೃಷ್ಣ ಮಾತ್ರ ವಾಂಚುನ್ ಅಸ್ಸ .
ಶ್ರೀ ಕೃಷ್ಣು ನಿದ್ದೋನ್ ಅಷ್ಶಿಲೋ ತಗೆಲೆ ಶಿಬಿರಾಂತು . ಶಿಬಿರಾ ಭಾಯಿರಿ ಯೇವ್ನ್ ಪೊಳೈಲೆ ... ಯಾದವ ವಂಶ ... ಅಪಣೆಲೆ ಸಂತಾನ ಮೋರ್ನ್ ಪೊಳ್ಳೆ೦ತಿ ... ತಾಂಗೆಲೆ ಭೀಭತ್ಸ ಮರಣ ಪೊಳೊನ್ ಮನಾ ದುಃಖ ಝಲ್ಲೆ . ಮಾಂತ್ರಿಕ ಬೋಂಬೆ ಶೇ ಮಸ್ತ ದೂರ ಚಂಮ್ಕುನ್ ಅರಣ್ಯ ದಿಕಾನ ಯೇವ್ನ್ ಪಾವಲೋ . ಸ್ವಲ್ಪ ವಿಶ್ರಾಂತಿ ಘೆವ್ಚೆ ಖತೀರಿ ಏಕ ಗೋಳಿ ರುಕ್ ಮುಳಾಂತು ಆಡ ಸರ್ಲೊ . ಸಾಂಭಾಲೆ ಪೊಟ್ಟಾಂತು ಜನ್ಮಾ ಆಯ್ಯಿಲೆ ಮುಸಲಾ .. ಕೃಷ್ಣಾ ನ ಸಂಘಿ ಲೇ ತಶೀ ರಾಜ ಭಠಾನಿ ಘಷ್ಟುನ್ , ಪುಡ್ಡಿ ಕೊರ್ನ್ ... ಆಖೇರಿಕ ಕಡ್ಡಿ ಶೇ ಅಶಿಲೆ ಏಕ ಕುಡ್ಕೊ ಉಡೊನ್ ಗೆಲ್ಲಿ೦ತಿ ನವೇ ... ! ತೀ ಕಡ್ಡಿ ' ಜರಾ ' ಮ್ಹಳ್ಳೆಲೆ ರಾನ್ನಾ೦ತುಲೆ ಕಿರಾತಾಕ ಮೆಳ್ಳೆ . ತಾಣೆ ತೀ ಕಡ್ಡಿ ಬಾಣ ಶೇ ಉಪಯೋಗಾ ಯೆತ್ತಲೆ ಮೋಣು ಭಧ್ರ ಜಾವ್ನ್ ದೊವೊರ್ನ್ ಘೆತ್ತಿಲೆ . ಶ್ರೀ ಕೃಷ್ಣಾ ನ ನಿದ್ದಲೆಲೆ ಜಾಗೇರಿ ಶಿಖಾರಾ ಖತಿರಿ ಯೇವ್ನ್ ಪಾವಲೋ . ದೂರ ರುಕ್ ಮುಳಾಂತು ನಿದ್ದಲೊಲೊ ಕೃಷ್ಣು ತಾಕ್ಕಾ ಚಿತ್ತಲ ಶೆ ದಿಸ್ಲೆ ..! ಹೇ ವಿಧಿ ವಿಚಿತ್ರ ಕೀ .. ! ವಿಧಿ ಪ್ರೇರಣಾ .. ? . ಜರಾನ ಝಡ್ಕುಟಾ ಮಧ್ಯೆ ಹಳೂ ಯೇವ್ನ್ ತಾಕ್ಕಾ ಮೆಳ್ಳೆಲಿ ಕಡ್ಡಿ .. ಬಾಣ ಶೇ ಬಿಲ್ಲಾ ದೊವೊರ್ನ್ ತಂಡೂನ್ ಶಿಖಾರಾ ದಿಕಾನ್ ಸೊಳ್ಳೆ ... ! ವಿಧಿ ಆದೇಶಾ ಪ್ರಕಾರ ತ್ಯೆ ಬಾಣು ರುಕ್ಕ ಮುಳಾಂತು ನಿದ್ದಲೆಲೆ ಶ್ರೀ ಕೃಷ್ಣಾ ಕ ಲಾಗ್ಲೆ .. ! ದೂರ ದುಕೂನ್ ಶಿಖಾರ ವಿಲ್ - ವಿಲ್ಚೆ ಪೊಳೊನ್ , ಜರ ಕಿರಾತ ಧೊರುಂಕ ಮೋಣು ಲಗ್ಗಿ ಗೆಲ್ಲೊ . ಥಂಯಿ ಶ್ರೀ ಕೃಷ್ಣ ತಾಗೆಲ್ ಅವತಾರು ಸಮಾಪ್ತ ಕರ್ತಶಿಲೋ ... ಕೃಷ್ಣಾ ಕ ಪೊಳೊನ್ ... " ಅಯ್ಯೋ ಸ್ವಾಮೀ ... ! ಚೂಕಿ ಝಲ್ಲಿ ಮೂ .. ಮಿಗೆಲೆ ನಿಮಿತ್ಯ .. ಮಾಫಿ ಕರಿ ಸ್ವಾಮಿ .. ದೂರ ದುಕುನ್ ಪೊಳೈಲೆ ತೆದ್ನಾ ಮಕ್ಕಾ ಚಿತ್ತಲ ಶೇ ದಿಸ್ಲೆ ... ಚಿತ್ತಲ ಮೋಣು ಬಾಣ ಸೊಳ್ಳೆ ... ಸ್ವಾಮೀ ಮಿಗೆಲೆ ನಿಮಿತ್ಯ ಘೋರ ಅಪರಾಧ ಝಲ್ಲಾ ... ಮಕ್ಕ ಕ್ಷಮಾ ಕರಿ ಸ್ವಾಮಿ ... ತು ಕೋಣ ಮಹಾತ್ಮಾ .. ? ಹಾಂವೆ ಕಸಲ್ ಕೊರ್ಚೆ .. ? " ಮೋಣು ಪಯ್ಯಾರಿ ಪೋಣು ಕ್ಷಮಾಪಣ ಮಾಗ್ಲಿ . " ತೂ ಕಸಲೆ ಕರ್ತಾಲೊ .. ತುಗೆಲಿ ಕಾಯೀ ಚೂಕಿ ನಾ ... ಹೇ ದೆವಾಲಿ ಖೇಳ " ಮ್ಹಳ್ಳಲೊ ಕೃಷ್ಣು . " ಸ್ವಾಮೀ ಕೋಣ ತೂ .. ?" ನಿ೦ಮ್ಗಿಲೆ ಜರಾ ಕಿರಾತಾನ . " ಹಾಂವ ದ್ವಾರಕಾ ಪ್ರಭು ಕೃಷ್ಣು "
" ಅಯ್ಯೋ ಸ್ವಾಮೀ .. ದ್ವಾರಕಾ ದೇವು .. ಹ್ಯೇ ಮಿಗೆಲೆ ಪ್ರಭು .. ಮಿಗೆಲೆ ಅನ್ನಾ .. ಮಹಾ ಘೋರ ಚೂಕಿ ಝಲ್ಲಿ .. ಮಕ್ಕಾ ಘಾಯು ವಾಸಿ ಕೊರ್ಚೆ ಝಡ್ಡ ಮೂಲಿಕಾ ನಾಟಿ ಔಷಧ ಕೋರು೦ ಗೊತ್ತಸ್ಸ . ತಾಜ್ಜೆ ಲೇಪು ಕೊರ್ನ್ ವಾ೦ಚಯಿತಾ ಲಗ್ಗಿಲೆ ಬಾಣು ತಂಡುನ್ ಕಾಡ್ತಾ " .. ಕೃಷ್ಣಾ ನ ಕಿರಾತಾಲೆ ಹಾತು ಧೋರ್ನ್ ರಬ್ಬಯಿಲೆ . " ಕಿರಾತಾ ... ! ತುಗೆಲೆ ನಾ೦ವ ಕಸಲೇ .. ? " "ಮಕ್ಕಾ.. ಜರಾ ಮೋಣು ಅಪ್ಪಾಯಿತಾತಿ ಸ್ವಾಮೀ .. "
" ತೂ ಫುಳ್ಳೆ ಜನ್ಮಾ೦ತು ...' ವಾಲಿ ' ಮ್ಹಳ್ಳೆಲೆ ವಾನರ ಜಾತಿಚ್ಯೊ . ತುಕ್ಕ ಹಾಂವೆ ರುಕ್ಕಾ ಮಾಕ್ಷಿ ರಬ್ಬುನ್ ಬಾಣ ಘಾಲ್ನ್ ದಿವಿಶಿ ಮಾರ್ಲೆಲೆ .. ತ್ಯೆ ಕಾರಣಾ ನಿಮಿತ್ಯ ತುಂವೇ ಹ್ಯೇ ಜನ್ಮಾಂತು .. ಪ್ರತೀಕಾರು ಜಾವ್ನ್ ಮಕ್ಕಾ ಬಾಣು ಘಲ್ಲಾ ... ದುಃಖ ಪಾವನುಕ್ಕಾ ಜರಾ ಕಿರಾತಾ .. ಚಿಂತಾ ಕೋರ್ನುಕ್ಕಾ . ತೂ ದ್ವಾರಕೆಕ ವೊಚ್ಚುನ್ ಮಿಗೆಲೆ ಬಪ್ಪುಸು ವಸುದೇವ ಮಹಾರಾಜಾಕ ಸುದ್ದಿ ದೀ .. ಯದು ವಂಶ , ಅಂಧಕ , ಭೋಜ ವಂಶ .. ಪ್ರಭಾಸ ತೀರ್ಥ್ ಮ್ಹಳ್ಳೆಲೆ ಜಾಗೇರಿ ಮೋರ್ನ್ ಪೊಳ್ಳಿ೦ತಿ ಮೊಣು ಸಾಂಘ .. "
ಕಿರಾತು ದ್ವಾರಕೆ ಕ ಗೆಲ್ಲೆ ನಂತರ .. ಬ್ರ೦ಹ್ಮ, ಶಿವ ಪಾರ್ವತಿ , ದೇವೇಂದ್ರ , ಅಷ್ಟ ದಿಕ್ಪಾಲಕ ಶ್ರೀ ಕೃಷ್ಣಾ ಲಗ್ಗಿ ಯೇವ್ನ್ ಪಾವ್ಲೀ೦ತಿ " ವೈಕುಂಠ ವಾಸಾ .. ! ಶ್ರೀಮನ್ನಾರಾಯಣಾ .. ! ತೂ೦ವೆ ಭುಯಿಂಚೇರಿ ಆಯ್ಯಿಲೆ ಕಾರ್ಯ ಝಲ್ಲೆ . ಅತ್ತ ತುಗೆಲೆ ಲೋಕಾ ಕ ಯೇವ್ಕಾ. ತುಕ್ಕಾ ಸ್ವಾಗತ ಕೊರುಂಕ ಅಮ್ಮಿ ಸರ್ವ ಅಯಿಲೀ೦ತಿ . " ಆಕಾಶಾರಿ ದುಕುನ್ .. ಸುಗಂಧ ಪುಷ್ಪ ವೃಷ್ಟಿ ಝಲ್ಲಿ . ಕೃಷ್ಣಾ ನ ಓಂಕಾರ ಕೊರ್ನ್ ದೋಳೆ ಧ೦ಕ್ಲೆ . ಕೃಷ್ಣಾವತಾರ ನಿರ್ವಾಣ ಝಲ್ಲೆ .
ಉಮಾಪತಿ
