MAHABHARATH Part - 59 KARNA PARVA

MAHABHARATH    Part - 59   ( Konkani Bhashentu )

   KARNA PARVA                  ಕರ್ಣ ಪರ್ವ 

                      ತ್ಯೆ ರಾತ್ರಿ ವೇಳು ... ಧುರ್ಯೋಧನಾ ಕ ದ್ರೋಣಾಚಾರ್ಯಾಲೆ ನಂತರ ಕೋಣಾಕ ಸೇನಾಧಿಪತಿ ಕೊರ್ಚೆ ... ಕುರು ಸೈನ್ಯಾಕ ,ಕುರು ವೀರಾಂಕ ಸರ್ವಾಂಕ ಸಹಮತಿ ಅಶಿಲೋ ಸೇನಾಧಿಪತಿ ಕೊಣಾಕ ಕೊರ್ಚೆ ...?  ಮೋಣು ಏಕ ಕುರುಸಭಾ ಅಪ್ಪಯಿಲಿ . ತ್ಯೆ ಸಭೆ೦ತು ..   " ಪಿತಾಮಹ ಭೀಷ್ಮಾಲೆ ಸಾರಥ್ಯಾ೦ತು ಹೇ ಯುದ್ಧ ಸಮಾಪ್ತ ಝತ್ತಲೇ ಮೋಣು  ಲೆಕ್ಕಿಲೆ ... ಜಾಯ್ನಿ ..! ಭೀಷ್ಮ ಪಿತಾಮಹ ಶರ ಶಯ್ಯೇರಿ ನಿದ್ದಲಾ . ಗುರು ದ್ರೋಣಾಚಾರ್ಯಾಲೆ ಸಾರಥ್ಯಾ೦ತು ವಿಜಯ ಲಕ್ಷ್ಮಿ ಆಮ್ಗೆಲೆ ಝತ್ತಲೇ ಮೋಣು ಲೆಕ್ಕಿಲೆ . ಝಲ್ಲೆರಿ ಪಾಂಡವಾನಿ ಮೋಸು ಕೊರ್ನ್ ದ್ರೋಣಾಚಾರ್ಯಾಕ ಸಂಹಾರು ಕೆಲ್ಲೆ . ಹ್ಯೇ ಮಕ್ಕಾ ಮನಾಂತು ದುಃಖ ಅಸ್ಸ . ತುಂಮ್ಕಾ ಕೋಣ ಸೇನಾಧಿಪತಿ ಜಾವ್ಕಾ ಮೋಣು ಮನಾ ಅಸ್ಸ .. ? ತುಮ್ಗೆಲೆ ನಿರ್ಣಯ ಮಕ್ಕಾ ಒಪ್ಪಿಗ ಅಸ್ಸ . ಕೋಣ ಸೇನಾಧಿಪತಿ ಜಾವ್ಯೆತ ... ? " ಧುರ್ಯೋಧನಾನ ನಿಂಮ್ ಗಿಲೆ . ಸರ್ವಾನಿ ಚರ್ಚೆ ಕೆಲ್ಲೆ . ಕೃಪಾಚಾರ್ಯು ... " ಧುರ್ಯೋಧನಾ .. ! ತುಗ್ಗೆಲ್ ಮನಾಂತು ಕಿತ್ಲೆ ಕಷ್ಟ ಅಸ್ಸ ಕೀ ... ತಿತ್ಲೆಂಚಿ ದುಃಖ ಆಮ್ಗೆಲೆ ಸರ್ವ ಲೋಕಾಂಕ  ಅಸ್ಸ . ತುಗೆಲೆ ಆಪ್ತ ಮಿತ್ರ .. ' ಕರ್ಣ '  ಸರ್ವ ವಿಧಾನಾರಿ ಸೇನಾಧಿಪತಿ ಸ್ಥಾನಾಕ ಯೋಗ್ಯ ಮೋಣು ದಿಸ್ತಾ . ಕರ್ಣಾಕ ನಿಯುಕ್ತಿ ಕೊರ್ಚೆ ಲಾಯೇಕ . " ಮ್ಹಳ್ಳಲೊ . ಕೃಪಾಚಾರ್ಯಾಲೆ ವಿಚಾರಾಕ ಅಶ್ವಥಾಮಾನ ಸಮರ್ಥನ ಕೆಲ್ಲಿ . ಧುರ್ಯೋಧನಾಲೆ ಮನಾಂತು .. ಕರ್ಣಾ ಕ ಸೇನಾಧಿಪತಿ ಕೋರ್ಕಾ ಮೊಣು ಅಶಿಲೆ . ಸಭೆ೦ತು ಕರ್ಣಾಲೆ ನಾಂವ ಅಯ್ಲೆಲೆ ಸಂತೋಷು ಝಲ್ಲೆ . ತಾಗೆಲ್ ಮನಾ ಅಶಿಲೆ ತಶೀಚಿ ಕರ್ಣಾಕ ಕುರು ಸೇನಾಧಿಪತಿ ಮೋಣು ಘೋಷಣ ಕೆಲ್ಲಿ .ಕರ್ಣಾಕ ಅತ್ತ ಮಸ್ತ ಖುಷಿ ಝಲ್ಲಿ . ಭೀಷ್ಮ ದ್ರೋಣಾ ನಂತರ ಮಕ್ಕಾ ಮಹಾ ಗೌರವ ಮೆಳ್ಳೆ ಮೋಣು ಆನಂದ ಝಲ್ಲೆ . ಧುರ್ಯೋಧನಾನ ವಂದಿ ಮಾಗದ , ಪುರೋಹಿತ , ಗಂಗಾ ಜಲ , ಫುಲ್ಲಾ ಮಾಳಾ ಸಕ್ಕಡ ಹಾಡೊನ್ ... ಕರ್ಣಾಕ ಉಚ್ಚ ಸ್ಥಾನಾರಿ ಬೊಸ್ಕಾರಾನ್ ಗಂಗಾಜಲ ಅಭಿಶೇಖು ಕೆಲ್ಲೆ . ಮತ್ತೇರಿ ವಿಶಿಷ್ಟ ಕಿರೀಟ ದೊವೋರ್ನು , ಫುಲ್ಲಾ ಮಾಳ ಘಾಲ್ನ್ , ಗಂಧ ಚಂದನ ಲಾವ್ನ್ ಮರ್ಯಾದಿ ಕೆಲ್ಲಿ . ವಂದಿ ಮಾಗದ ಲೋಕಾನಿ ಸ್ತುತಿ ಸ್ತೋತ್ರ ಸಂಗ್ತಾನಾ .... ರಾವ್ಳಾರಾ ಬಾಯ್ಲ ಮನಶ್ಯಾನಿ ವೀರ ತಿಲಕ ಕರ್ಣಾಕ ದೊವೊರ್ನ್ ಮಂಗಳಾರತಿ ಕೊರ್ನ್ .. ಕುರು ವಂಶಾಕ ಯುದ್ಧ ವಿಜಯ ಮೇಳೋ ಮೋಣು ಪ್ರಾರ್ಥನಾ ಕೆಲ್ಲಿ . ಆರತಿ ಉಜ್ವಾಡಾಕ ಕರ್ಣಾಲೆ ದೊಳೆ ಸಂತೋಷಾರಿ ಮಿರ್ - ಮಿರ್ಲೆ . ದುಃಶ್ಶಾಸನ ಆನಿ ವಿಂಗಡ ಭಂವ್ಢ ಯೇವ್ನ್ ಫುಲ್ಲಾ ಮಾಳ ಘಾಲ್ನ್ ಸನ್ಮಾನ ಕೆಲ್ಲೆ . ಧುರ್ಯೋಧನಾನ ಹತ್ತಾಕ ವೀರ ಕಂಕಣ ಘಾಲ್ನ್ , ನವರತ್ನ ಭರ್ಲೆಲೆ ವೀರ ಖಡ್ಘ ಹತ್ತಾ೦ತು  ದಿಲ್ಲೆ . ಕರ್ಣಾ ನ ಮಿತ್ರ ಧುರ್ಯೋಧನಾಲೆ ತೊಂಡ  ಪೋಳಯಿಲೆ ... ದೃಷ್ಟೀ೦ತು ಅಶಿಲೆ ಧುರ್ಯೋಧನಾಲೆ ಆಶಿ ಆಕಾಂಕ್ಷ ಕರ್ಣಾ ನ ಪೋಳಯಿಲೆ ... ಕರ್ಣಾನ ಸನ್ನಿ ರೀಚಿ ಮಿತ್ರಾಕ ಆಶ್ವಾಸನ ದಿಲ್ಲಿ . ಕರ್ಣಾಕ ರೋಮಾಂಚನ ಝಲ್ಲೆ ... ಯೆಕಾನ ಏಕ ದಿವಸು ಕುಲ ಹೀನ ಮೋಣು ಅವಮಾನ ಕೆಲ್ಲೆಲೆ .... ಆಜಿ ಸರ್ವ ರಾಯಾಂಗೆಲೆ ಎದ್ರಾಕ , ಕುರು ಮಹಾ ಸೈನ್ಯಾಕ ಮಹಾ ಸೇನಾಧಿಪತಿ ಮೋಣು ಘೋಷಣ ಕರ್ತನಾ ... ನರ್ - ನರಾಂತು, ಅಂಗಾಂತು ರಗತ ಸಂತೋಷಾರಿ ಧಾಂವ್ಲೆ ... ದೋಳೆ ಉದ್ದಾಕ ಬೋರ್ನ್ ಅಯಿಲೆ ... ಸಂತೋಷಾರಿ ಧುರ್ಯೋಧನಾ ಕ ಪೊಟೋನ್ ಧರ್ಲೆ . " ಪ್ರಾಣ ಮಿತ್ರಾ ... ! ಹ್ಯೇ ಸೂತ ಪುತ್ರಾಕ ಸೇನಾಧಿ ಪತಿ ಪಟ್ಟ ಬಾಂಧುನ್ .. ಆಮ್ಗೆಲೆ ಸ್ನೇಹ ಮಿತೃತ್ವಾಕ ಬಂಧಿಲೆ ಮೋಲ ಅನನ್ಯ .. ತುಗೆಲೆ ಸ್ನೇಹ , ತುಗೆಲೆ ಆಶ್ರಯಾಂತು ಶೀತ ಖಾವ್ನ್ , ಹೇ ದೇಹ ಮಿಗೆಲೆ ಮೋಣು ಕೆದನಾಯ್ ಲೆಕ್ಕನಿ . ಹಾಂವ ತುಗೆಲೆ ಖತಿರಿ ವ೦ತಾ ಅಸ್ಸ .ತುಗೆಲೆ ಖತಿರಿ ಮಿಗೆಲೆ ಪ್ರಾಣು  ದಿತ್ತಾ . ಮಿತ್ರಾ ... ! ಮಿತ್ರ ಧರ್ಮು ಕಸಲೆ ಮೋಣು ಜಗತ್ಯಾಕ ದಕ್ಕಯಿತಾ .... ಧುರ್ಯೋಧನಾ ... ! ತುಕ್ಕಾ ಭರಥ  ಸಾಮ್ರಾಜ್ಯಾ ಚಕ್ರವರ್ತಿ ಕರ್ನಾಶಿ .. ಹಾಂವ ವಿಶ್ರಾಮ ಘೇನಾ .. "  ದೊಳೆಂತು ದೆಂವ್ಚೆ ಉದ್ದಾಕ  ತಡ್ಸುನ್ ಘೆವ್ಚ್ಯಾ ಕ ಜಾಯ್ನಾಶಿ ಗದ್ಗಧಿತ ತಾಳೇನ ಸಂಘಲೆ . ಕರ್ಣಾಲೆ ಉತ್ತರಂ ಅಯಿಕುನ್ , ಧುರ್ಯೋಧನ , ದುಃಶ್ಶಾಸನ ..ಮಹಾ ಆನಂದಿತ ಝಾಲ್ಲಿ೦ತಿ . ಕೃಪಾಚಾರ್ಯ , ಅಶ್ವಥಾಮ , ಶಕುನಿ  , ಶಲ್ಯ , ಕೃತವರ್ಮ ಹನ್ನಿ ಕರ್ಣಾ ಲೇ ಯೇವ್ನ್ ಮತ್ತೇರಿ ಪುಷ್ಪ ವೃಷ್ಠಿ ಕೊರ್ನ್ ಫೊಟೊನ್ ಧೋರ್ನ್ ಗೌರವ ಕೋರ್ನ್ ವಿಶ್ವಾಸು ದಕ್ಕಯಿಲೆ . " ಮಿತ್ರ ಕರ್ಣಾ ... !ಅಮ್ಗೆಲೆ ಕುರು ಸೈನ್ಯಾಕ .. ತುಕ್ಕಾ ಮಹಾ ಸೇನಾಧಿಪತಿ ಕೋರ್ಕಾ ಮೋಣು ಅಶಿಲಿ ಆಶಾ ..  ಆಜಿ ಪೂರ್ತಿ ಝಲ್ಲಿ . ಜಯಾ - ಅಪಜಯ ಪೊಶಿ ಮಕ್ಕಾ ತುಗೆಲೆ ಸ್ನೇಹ , ಮಿತ್ರತಾ  ಮುಖ್ಯ . ತುಗೆಲೆ ಸಮರ್ಥನಾ ಮಕ್ಕಾ ಅಸ್ಸ ಮೋಣು ಲೆಕ್ಕುನ್ ಹಾಂವ ಯುದ್ಧಾಕ  ದೆವ್ವಿಲೊ . ಭೀಷ್ಮ , ದ್ರೋಣ ದೊಗ್ಗಯಿ .. ಪಾಂಡವ ಪಕ್ಷ ಪಾತಿ ಜಾವ್ನ್ ಅಶಿಲೆ .  ಆಮ್ಗೆಲೆ ಕುರು ಸೈನ್ಯ  ತುಗ್ಗೆಲ್ ಫಟೀ ಬಲಾಕ ಅಸ್ಸ . ತುಗೆಲೆ ಷೌರ್ಯ ನ  ಮೆಳ್ಚೆ ವಿಜಯಾ ಖತಿರಿ ಹಾಂವ ಎದುರ ಪೋಳ ಯಿತಾ . ತುಕ್ಕಾ ಸರ್ವ ನಮೂನೆ ಜಯ ಪ್ರಾಪ್ತ ಝವ್ವೋ ಮೋಣು ದೇವಾಲೆ ಪ್ರಾರ್ಥನಾ ಕರ್ತಾ . " ಮೋಣು ಧುರ್ಯೋಧನಾ ನ ಆತ್ಮೀಯ ಜಾವ್ನ್ ಸಂಘಲೆ .

                         ತ್ಯೇ ರಾತ್ರಿ ... ಕರ್ಣಾಕ  ಸ೦ಮ್ಮ ನೀದ ಏನಿ . ಫುಳ್ಳೆ ... ಗತ ಜೀವನಾಚೆ ದಿವಸ ಉಡ್ಘಾಸು ಅಯಿಲೊ . ಕನ್ಯಾ ಜಾವ್ನ್ ಆಸ್ತಾನಾ ಕುಂತೀ ನ ಕುಟುಂಬೆ ಮರ್ಯಾದೆ ಖತಿರಿ ...ಮಕ್ಕಾ ಗಂಗೆಂತು ಸೊಳ್ಳೆ ..! ಕುಂತಿನ ಮಿಗ್ಗೆಲೆ ಪಾಂಚ ಚೆರ್ಡುವಾಂಕ ರಕ್ಷಣ ಕೋರ್ಕಾ .. ಮೋಣು .. ದೇಹೀ ... ಜಾವ್ನ್ ಸೆರಗ ಎದ್ರಾಕ ದೋರ್ನ್ ಮಾಗ್ಗಿಲೆ ... ರಾಧಾ ದೇವಿನ ಪ್ರೀತಿ ಪೂರ್ವಕ ಜಾವ್ನು ಹೋಡು ಕೆಲ್ಲೆಲಿ ರೀತಿ ... ಧುರ್ಯೋಧನಾಲೆ ಮಿತೃತ್ವ ... ಪರಶುರಾಮಾಲೆ ಶ್ರಾಫ್ ... ಪ್ರಾಣ ಪ್ರದ ಜಾವ್ನ್ ಅಶಿಲೆ ಕವಚ ಕುಂಡಲ , ಇಂದ್ರಾನ  ಯೇವ್ನ್ ದಾನ ಮಗ್ಗಿಲೆ ... ಬ್ರಾಹ್ಮಣಾಲೆ ಶ್ರಾಫ್ ... ಕುಂತೀನ ... ಏಕ ಪೊಟಿ ಪ್ರಯೋಗ ಕೆಲ್ಲೆಲೆ ಅಸ್ತ್ರ ದೊನ್ನಿ  ಪೊಟಿ ಪ್ರಯೊಗು ಕೋರು ನಜ್ಜ ಮೋಣು  ವಚನ ಘೆತ್ತಿಲೆ ... ಇಂದ್ರಾನ  ದಿಲ್ಲೆಲೆ ' ಶಕ್ತಿ ಅಸ್ತ್ರ ' ಅರ್ಜುನಾ ಖತಿರಿ ಕಾಣ ದವರ್ಲೆಲೆ ,  ಅಸ್ತ್ರ ಘಟೋತ್ಕಚಾ  ವೈರಿ ಪ್ರಯೋಗ ಕೆಲ್ಲೆಲೆ ... ಭೀಷ್ಮಾಲೆ  ವೈರಿ ಕೋಪಾನ ... ಯುದ್ಧ ರಂಗಾಂತು ಯೆನಾಶಿ ರಬ್ಬಿಲೆ ... ಕೃಷ್ಣಾನ ಏಕಾಂತ ಜಾವ್ನ್ ಜನ್ಮ ರಹಸ್ಯ ಸಂಘಿಲೆ ... ಜ್ಯೇಷ್ಠ ಕುಂತೀ ಪುತ್ರ ಕ್ಷತ್ರಿಯ ಮೋಣು  ಸಂಘಿಲೆ ... ಭೀಷ್ಮಾನ ಶರ ಶಯ್ಯಾರಿ ನಿದ್ದೋನ್ , ಪಾಂಡವ ಅಗ್ರಜ ಜಾವ್ನ್ ಯುದ್ಧ ರಬ್ಬಯಿ ಮೋಣು  ಸಂಘಿಲೆ ... ಆಲೋಚನಾ ,  ಮಾಕ್ಷಿ -  ಮಾಕ್ಷಿ ಬಾಣಶೆ ಕರ್ಣಾಲೆ ಮನಾಂತು ಅಯಿಲೆ . ಹ್ಯೇ  ದೇವಾ ... !! ಯುದ್ಧ ಆರಂಭ ಜಾವ್ಚೆ ಪೊಷಿ ಫೂಡೇ , ಮಕ್ಕಾ  ಹೇ ನಮುನೆರಿ ... ಹ್ಯೇ ಮಲಘಡೇನಿ ... ಜನ್ಮ ರಹಸ್ಯ ಸಂಘುನ್ ದಿವಿಶಿ ಮಾರ್ಲೆ ಮೂ ... ಮಕ್ಕಾ ..! ಹಜ್ಜೆ ಫೂಡೆಚಿ ಸಂಘುನಜ್ಜ ಅಷ್ಶಿಲ್ವೇ ... ? ಕೃಷ್ಣಾನ ಮಿಗೆ ಲಗ್ಗಿ ಕಸಲೇಕ ನಾಟಕ ಕೆಲ್ಲೆ .. ? ತಗೆಲೆ ತೊಂಡಾರಿ ಆಯ್ಯಿಲೊ  ಕುಹಕ ಹಾಸು ಅರ್ಥ್ ಕೊರ್ನ್ ಘೆವ್ಚ್ಯಾ ಜಾಯ್ನಿ ಮೂ .... ಮಕ್ಕಾ ! ಕೃಷ್ಣಾ ಹಾಂವ ಮಿತ್ರ ದ್ರೋಹ ಕರ್ನಾ ... ಮಿಗೆಲೆ ಧರ್ಮ ಮಕ್ಕಾ ರಾಕ್ತಾ . ಮಿಗೆಲಿ ವಿಧಿ ಕಸಲೇಯ್  ಆಸ್ಸೊ ... ಮಿತ್ರಾ ಖತಿರಿ ಆತ್ಮಾರ್ಪಣ ಕರ್ತಾ . ಕೃಷ್ಣಾ ....  ಆಜಿ ರಾತ್ರಿ ನಿದ್ದೋಚ್ಯಾ ಸೋಡಿ ... ಕರ್ಣಾನ ದೋಳೆ ಧ೦ಕ್ಲೆ ... ನಿದ್ರಾ ದೇವಿಲೆ ಸ್ತುತಿ ಕೆಲ್ಲಿ . ಝಲ್ಲೇರಿಯೀ  ನೀದ ಏನಿ . .. ಉಡ್ಘಾಸು ಅಯಿಲೊ ಕುಂತೀ ದೇವಿಲೊ . 

ಕುಂತಿ : ಕುಮಾರಾ ..! ಯುದ್ಧ ರಂಗಾಂತು ತುಗ್ಗೆಲ್ ಭಂವ್ಢ ಪಾಂಡವಾ ವೊಟ್ಟು ಯುದ್ಧ ಕೋರ್ಕಾಚಿ ಜತ್ತಾ ವೇ ? ..

ಕರ್ಣ :  ವಯ್ಯ್ ಅಮ್ಮಾ .. ! ಕುರುಕ್ಷೇತ್ರ ಯುದ್ಧ ಚಿ .. ಭಂವ್ಢಾ ಮಧ್ಯೆ ಜಾವ್ಚ್ಯೇ ಯುದ್ಧ ... !!

ಕುಂತಿ : ನಕ್ಕಾ ಕರ್ಣಾ ನಕ್ಕಾ .... ಯೆದೊಳ್ ತಾ೦ಯ್ ಝಲ್ಲೆಲೆ ವಿಷಯು  ತೂ ವಿಸೋರ್ನ್ ಸೋಡಿ ! ತೂ ಪಾಂಡವಾಲೆ ವೊಟ್ಟು ಮೇಳ ... ತನ್ನಿ ತುಕ್ಕಾ ಪ್ರಾಣಾ ಪೋಷಿ ಚಡ ಪ್ರೀತಿ ಕರ್ತಾತಿ . ಧರ್ಮರಾಯಾಕ ಸ೦ಘುನ್ ಹಾಂವ ... ತೂ ಪಾಂಡು ಪೂತು , ಕ್ಷತ್ರಿಯ ಮೋಣು ಪ್ರಕಟ ಕರ್ತಾ .. ಕೌರವಾಂಕ ; ಪಾಂಡವ ದಾಯಾದಿ .. ತೂ ಪಾಂಡವಾಲೆ ಮಲಘಡೊ ಭಾವು ... ! ಯೆಕ್ಕ ಆವ್ಸೂಲೆ ಚೆರ್ಡುವಾನಿ ಎಕ್ಲೆ ವೈರಿ ಎಕ್ಲೆನ ಖಡ್ಘ ತಂಡುನ್ ಯುದ್ಧ ಕೋರು ನಜ್ಜ ಕುಮಾರಾ .. ! ದಯಾ ದೊವೊರ್ನ್ ತೂ .. ಪಾಂಡವಾಲೆ ವೊಟ್ಟು ಮೇಳ ... ತುಮ್ಮಿ ಸಹ ಜನ ವೊಟ್ಟು ಝಲ್ಲೇರಿ .. ದೇವ ಲೋಕಾ ದೇವೇಂದ್ರ ತಾಯ್ ಭಿತ್ತಲೋ ... "

ಕರ್ಣ : ಅಮ್ಮಾ ...! ಘಟಾನು ಘಟಿ ಕೀ ... ಕಾಕ ತಾಳೀಯ ಕೀ .. ! ಫುಳ್ಳೆ ಜನ್ಮಾ ಫಲ ಜಾವ್ನ್ ಕೀ ... ತೂ೦ವೆ ಮಕ್ಕಾ  ಜನ್ಮ ದಿಲ್ಲಾ . ದೊಳೆ ಸೊಡ್ಚೆ ಫೂಡೇಚಿ ಗಂಗೆಂತು ಸೊಳ್ಳಾ . ಮಿಗೆಲೆ ಜನ್ಮ ವಿಧಿ ವಶ ಝಾವ್ನ್ ರಾಧೇಲೆ ವಶ ಝಲ್ಲಾ . ಖಂಚೆ ಜನ್ಮಾ ಋಣ  ಕೀ .. ? ರಾಧೇ ಮಾತೆನ ದೇವಾನಾ ದಿಲ್ಲೆಲೆ ವರು ಮೋಣು ಲೆಕ್ಕುನ್ .. ಸ್ವಂತ ಪುತ್ತಾ ಮ್ಹಣ್ಕೆ ಪ್ರೀತೀನ ಪೊಷಿಲಾ . ಹ್ಯೇ ಲೋಕಾ೦ಕ ಹಾಂವ ರಾಧಾ ಪುತ್ರ .. ರಾಧೇಯ ಜಾವ್ನ ಗೊತ್ತಸ್ಸ . ಸೂತ ಪುತ್ರ ...  ಮೋಣುಚಿ ಹೊಡು ಝಲ್ಲಾ  ...  ಸೂತ  ಪುತ್ರ ಝಾವ್ನ್ ಜೀವಿತ ಕರ್ತಾ ಅಸ್ಸ .. ಸೂತ ಪುತ್ರ ಝಾವ್ನು ಚಿ ...  ಮಿಗೆಲೆ ಅಂತ್ಯ ಕಾಲ ಪೊಳಯಿತಾ . ಧುರ್ಯೋಧನು ಪಾಂಡವಾಂಗೆಲೆ ದೃಷ್ಟೀ೦ತು ವಾಯಿಟು .. ತೋ  ಬಾಕಿ ವಿಷಯಾಂತು ಮಕ್ಕಾ  ಚಾಂಗು ಮನುಷು . ಪಾಂಡವ ತುಕ್ಕಾ ಹಸ್ತಿನಾವತಿ೦ತು ಸೋಣು ಅರಣ್ಯ ವಾಸಾಕ ಚಮ್ಕಲೀಂತಿ . ಧುರ್ಯೋಧನಾನ ಹ್ಯೇ ತೇರ ವರುಷ ಸ್ವಂತ ಆವಸೂ ಮ್ಹಣ್ಕೆ ಪೊಳೊನ್ ಘೆತ್ಲಾ . ಹಾಂವೆ ಪಾಂಡವ ಪಕ್ಷಾಕ ಮೆಳ್ಚೆ ಸೋಡಿ ; ಹಾಂವ ಕುಂತೀ ಪುತ್ರ ಮೋಣು ಕಳ್ಳೇರಿ ಪೂರೊ .... ತೋ  ದುಃಖಿ ಜಾವ್ನ್ ಆತ್ಮ ಹತ್ಯಾ ಕೊರ್ನ್ ಘೇತ್ತಾ . ತಿತ್ಲೆ ತಕ್ಕಾ ಮಿಗೆಲೆ ವೈರಿ ವಿಶ್ವಾಸು ಅಸ್ಸ . ತಾಣೆ ಮಕ್ಕಾ ಮಾಲ್ಘಡೊ ಭಾವಾ ಮ್ಹಣ್ಕೆ ಮರ್ಯಾದಿ ದಿಲ್ಲೆ ... ತ್ಯೆ ಮಾತ್ರ ನಯ್ಯ್ ತಗೆಲೆ ಬಾಕೀ ಭಂವ್ ಢ ತಾಯ್ .. ತಿತ್ಲೆಚಿ ಮರ್ಯಾದಿ ದಿತ್ತಾತಿ ... ಹೇ ಪೋಳಯಿತಾನಾ ... ಹಾಂವೆ ಕುರು ಪಾಂಡವ ಮಧ್ಯೆ ಆತ್ಮೀಯ ಸೇತು ಜಾವ್ಕಾ ಅಷ್ಶಿಲೆ ... ಮಿಗೆಲಿ ವಿಧಿ ಆನ್ನೇಕ ರೀತ್ಯೆರಿ ಅಸ್ಸ . ಅಂಗ ದೇಶಾ ರಾಯು ಕೊರ್ನ್ , ಹಸ್ತಿನಾಪುರ ರಾಜ್ಯಾ .. ರಾಜ ಸೂತ್ರ ಮಿಗ್ಗೆಲೆ ಹತ್ತಾ೦ತು ದಿಲ್ಲಾ . ಶತ  ಕೌರವಾನಿ ದಿಲ್ಲೆಲಿ ಮರ್ಯಾದಿ .. ಮಕ್ಕಾ ಜೀವ ಮಾನಾಂತು ಅನಿ ಖಂಯ್ಯ್ ಮೆಳ್ ಚಿ ನಾ . ಮಿಗೆಲೆ ಅಂಗಾಂತು ಆಸ್ಸುಚೆ ಏಕ್ - ಏಕ್ ಬಿಂದು ರಗತ , ತಾಣೆ  ಘಲ್ಲೆಲೆ ಭಿಕ್ಷೆ ಶಿತ್ತಾ ನ ಹೋಡ ಝಲ್ಲಾ . ಯುದ್ಧಾ ವೆಳ್ಯೇರಿ ಧುರ್ಯೋಧನಾ ಸೋಣು ; ಪಾಂಡವಾಂಕ ಮಾಲ್ಘಡ್ ಭಾವು  ಜಾಯ್ನಾ .. ! ಮಿತ್ರ ದ್ರೋಹಿ ಜಾಯ್ನಾ ಅಮ್ಮಾ .. ! ಹ್ಯೋ ಕರ್ಣ ..  ದುರಾದೃಷ್ಟ ಅಷ್ಶಾ ಪೂರೊ ... ಝಲ್ಲೇರಿಯಿ ... ದುರ್ಮಾರ್ಗಿ ನಯ್ಯ್ ... ಮಕ್ಕಾಯಿ ಪ್ರಾಯ ಝಲ್ಲೆ . ಜೀವನಾ ಆಖೇರಿ ಕ್ಷಣಾರಿ ... ಚರಿತ್ರ ಹೀನ ಜಾಯ್ನಾ .. ಮಕ್ಕಾ ಕ್ಷಮಾ ಕರಿ ಅಮ್ಮಾ .. ! ತೂ೦ವೆ ಗಂಗೇ೦ತ್  ಹೊಳ್ಚೆ ಉದ್ದ್ಕಾಂತು ಸೊಳ್ಳೆಲೆ ತೆದ್ನಾಚಿ ತುಗೆಲೆ ಮಲ್ಘಡೊ ಪೂತು ಮೆಲ್ಲೊ ಮೋಣು ಲೇಕ ... !! " ಮ್ಹಳ್ಳಲೊ ಕರ್ಣ 

ಕುಂತಿ : " ಕುಮಾರಾ .. ! ಕರ್ಣಾ !! ದಾನ ವೀರ ಕರ್ಣ , ಕೊಣಯ್ ದೇಹಿ ... ಮೋಣು  ಆಯಿಲ್ಯಾರಿ ತಾಂಕಾ ದಾನ ದೀವ್ನ್ ಸನ್ಮಾನ ಕರ್ತಲೋ ದಯಾ ನಿಧಿ ತೂ .. ! ತುಕ್ಕಾ ಜನ್ಮು ದಿಲ್ಲೆಲಿ ಆವ್ ಸು ಹಾಂವ .. ! ಮಕ್ಕಾ ಪುತ್ರ ಭಿಕ್ಷಾ ದೀ ... ಮಿಗ್ಗೆಲೆ ಚೆರ್ಡುವಾಂಕ ವಂಚಯಿ . ತುಗೆಲೆ ಪ್ರತಾಪಾಕ ... ಕೋಪಾಕ .. ಕೊಣಾಕಯ್ ದಿವಿಶಿ ಮಾರ್ನುಕ್ಕಾ ಮಿಗೆಲೆ ಅನ್ನಾ .. ! " ಮೋಣು  ಸಂಘುನ್ ತಿಗೆಲೆ  ಸೆರಗ ಮುಕಾರಿ ಧೋರ್ನ್  ಯಾಚನ ಕೆಲ್ಲಿ . ಕಸಲೆ ಕೊರ್ಚೆ ಮೋಣು ಕರ್ಣಾಕ ಕಳ್ನಿ ... ರಗತ ಮಾಸ ವಂಟುನ್ ಘೇತ್ತಿಲಿ ಅಮ್ಮಾ ... ಮಸ್ತ ಕಾಳ  ನಂತರ 'ಪುತ್ತಾ' ಮೋಣು ಸಂಘುನ್ ರಡ್ತಾ ಅಸ್ಸ . ಕರ್ಣಾ ..  ನಖ ಶಿಖಾಂತ ಗಡ್ - ಘಡ್ಲೊ . ಪೊಟ್ಟಾ ಅಂತ ಕತ್ತೊರನ್ ಅಯಿಲೆ ಭಾಸ ಝಲ್ಲಿ ... ಆವ್ಸೂಲೆ ಕರುಣಾ ಜನಿಕ ಸ್ತಿಥಿ ಪೊಳೋನ್ ... ದೊಳೆಂತ್ ಉದ್ದಾಕ ಭರ್ಲೆ . ಖ೦ಚೆಯ್ ಪೂತು ಹ್ಯೇ ವೆಳ್ಯೇರಿ ವಿಚಲಿತ ಝತ್ತಾ . ತಶೀ೦ಚಿ ಕರ್ಣ ..  ಮಾತೃ ಮಮಕಾರಾ ಕ ಬಂಧಿ ಝಲ್ಲಾ . 

ಕರ್ಣ : " ಅಮ್ಮಾ .. !! ಮಿಗೆಲೆ ದಿವಸ ಲಗ್ಗಿ ಯೆತ್ತಾ ಆಸ್ಸ . ಯುದ್ಧ ಏಕ ನೆವನ . ಹ್ಯೇ  ವೆಳ್ಯೇರಿ ತೂ ,  ಪುತ್ರ ಭಿಕ್ಷಾ ನಿಂಮ್ಗೀತ ಮೂ .. ! ತುಕ್ಕಾ  ನಿರಾಶ ಕರ್ನಾ . ಪಾಂಡವಾಂತು ... , ಅರ್ಜುನ್ ಮಾತ್ರ ಮಿಗೆಲೆ ಪ್ರತಿ - ಸ್ಪರ್ಧಿ ...ಬಾಕಿ ಚಾರಿ ಜನಾಂಕ ಹಾಂವ  ಮಿಗೆಲೆ ಹತ್ತಾನಿ ಮಾರ್ನಾ . ಧರ್ಮಜ ಭೀಮ , ನಕುಲ ಸಹದೇವಾಂಕ ಪ್ರಾಣ ದಾನ ಕರ್ತಾ ; ಸಂತೋಷಾರಿ ಘರಾ ವಸ .. "

ಕುಂತಿ : " ಕರ್ಣಾ .. ! ತೂ೦ವೆ ಮಕ್ಕಾ  ಯೆಕು ವರು ದಿಲ್ಲೆ ; ಹಾಂವ ಆನ್ನೇಕ ವರು ತುಗೆಲೆ ನಿ೦ಮ್ಗಿತಾ . ಯುದ್ಧಾ೦ತು ಚಾರಿ ಜನಾಲೆ ಪ್ರಾಣ ದಾನ ದಿಲ್ಲಾ . ಮಿಗೆಲಿ ಆನ್ನೇಕ ಆಶಾ ಕಸಲಿ ಮ್ಹಳ್ಳೇರಿ ... ತುಂವೆ ಅರ್ಜುನಾಲೆ ವೊಟ್ಟು ಯುದ್ಧ ಕರ್ತನಾ .. ಏಕ ಪೋಟಿ ಪ್ರಯೋಗ ಕೆಲ್ಲೆಲೆ ಅಸ್ತ್ರ ಆನ್ನೇಕ ಪೋಟಿ ಪ್ರಯೋಗ ಕರ್ನಾ ಮೋಣು ಮಕ್ಕಾ ಆಣ ಭಾಸ ಘಾಲಿ . ಮಕ್ಕಾ ತೆದ್ನಾ ಮನಾ ಶಾಂತಿ ಮೆಳ್ತಾ ಕುಮಾರಾ .. " ... ಕರ್ಣ ಹಾಸ್ಲೊ 

ಕರ್ಣ : " ಅಮ್ಮಾ .. ! ತುಕ್ಕಾ ಪಾಂಡವಾಂಗೆಲೆ ವೈರಿ ಕಿತ್ಲೆ ಪ್ರೀತಿ ಅಭಿಮಾನ ಅಸ್ಸ ಮೋಣು ಕಳ್ಳೆ ' ಜಾಯ್ತ ' ಏಕ ಪೋಟಿ ಪ್ರಾಯೊಗು ಕೆಲ್ಲೆಲೆ ಅಸ್ತ್ರ ; ದೊನ್ನಿ  ಪಂಕ್ತಾ ಪ್ರಾಯೊಗು ಕರ್ನಾಶಿ ...  ಅರ್ಜುನಾಲೆ  ವೊಟ್ಟು ಯುದ್ಧ ಕರ್ತಾ .. ಸಂತೋಷು ಝಲ್ಲೆ ವೇ .. ಅಮ್ಮಾ .. !! ? "  

ಕುಂತಿ : " ಕುಮಾರ ಕರ್ಣಾ .. ! ತುಗ್ಗೆಲ್ ಆತ್ಮ ಶಕ್ತಿ ಅಚಂಚಲ ಝವ್ವೋ ... ' ದಾನ ವೀರ 'ತುಗ್ಗೆಲ್ ನಾಂವ ಅಜರಾಮರ ಜಾವ್ನ್ ಅಸ್ಸೋ .. ತುಕ್ಕಾ  ಜನ್ಮು ದಿಲ್ಲೆಲೆ ಆವ್ಸೂಲೆ ಪುಣ್ಯ ,  ತುಕ್ಕಾ ಮೇಳೋ ... ಮಿಗೆಲೆ ಅಂತಃ ಕರಣಾ ಶಾಂತಿ , ಆನಂದ, ಪ್ರೀತಿ , ವಾತ್ಸಲ್ಯ , ಆಶೀರ್ವಾದ ತುಗ್ಗೆಲ್ ಮತ್ತೇ ಮುಕುಟ ಝವ್ವೋ . ತುಗೆಲೆ ನಾಂವ ಚರಿತ್ರೆ೦ತು ಸುವರ್ಣಾಕ್ಷರಾಂತು ಬೊರಾನ್ ಅಸ್ಸೊ ... ಕೀರ್ತಿ  ಮಾನ್ ಭವ ಕುಮಾರಾ .. !"  ಮೋಣು  ಕುಂತಿನ ಹೃತ್ಪೂರ್ವಕ ಅಶೀರ್ವಾದ ಕೆಲ್ಲೊ . ಕರ್ಣಾಲೆ ಜೀವನಾಂತ್ ಕುಂತಿಲೆ ಮಾಗಣೆ ..  ಸುವರ್ಣ ಅಧ್ಯಾಯು ಝತ್ತಾ ... ಕೃಷ್ಣಾಲೆ ಮನಾಂತು ಅಷ್ಶಿಲೆ ತಶೀ  ಝತ್ತಾ . 

                      ಆಜಿ ಸೂರ್ಯ ದೇವು .. ಮಿಗೆಲೆ ಕರ್ಣ ಕಷ್ಶಿ ಯುದ್ಧ ಕರ್ತಾ .. ?  ಮೋಣು ಪೊಳೋಚ್ಯಾಕ ,  ಉತ್ಸುಕ ಜಾವ್ನ್ ವಗ್ಗಿ ಅಯಿಲಾ ಮ್ಹಣ್ಕೆ ದಿಸ್ಲೆ ಕರ್ಣಾಕ . ಕಾಲ ಕೃತ್ಯ , ಸೂರ್ಯ ವಂದನಾ ಪೂರ್ತಿ ಕೊರ್ನ್ , ಸೂರ್ಯ ದೇವಾಕ ಅಂಜಲಿ ಸೋಣು ಪಾಂಯ್ಯ್ ಪೊಳ್ಳೋ " ಪಿತೃ ದೇವಾ .. ! ಹಾಂವ ಕುಂತಿ ಪುತ್ರ ಮೋಣು ಪಾಂಡವಾಂಕ ಗೊತ್ನಾ .. ಝಲ್ಲೇರಿ ಮಕ್ಕಾ ... ಪಾಂಡವ ಮಿಗೆಲೆ ಭಾ೦ವ್ ಢ ಮೋಣು ಗೊತ್ತಸ . ಹ್ಯೇ ದುಸ್ತಿತಿ೦ತು ... ಮಕ್ಕಾ  ಸಂಪೂರ್ಣ ಆತ್ಮ ಶಕ್ತಿ ದೀವ್ನ್ ಮಿಗೆಲೆ ಕರ್ತವ್ಯ ಕೊರುಂಕ ಪ್ರೇರಣ ದೀ ದೇವಾ .. ! " ಮೋಣು  ಪ್ರಾರ್ಥನಾ ಕೆಲ್ಲಿ . ಕರ್ಣಾಲಿ ಬಾಯ್ಲ್ ಚಂದ್ರಮತಿ ದೇವಿನ ಕರ್ಣಾಕ  ವೀರ ತಿಲಕ ದೊವೊರ್ನ್ ಆರತಿ ಕೆಲ್ಲಿ . ಮನಾಂತು ಗುರು ಪರಶುರಾಮಾಕ ನಮನ ಕೊರ್ನ್ , ವಿಜಯ ಧನುಷ್ಯ ಹತ್ತಾ  ಧೋರ್ನ್ , ಕುರು ಸೈನ್ಯ ವಾಹಿನಿ ಯೆದುರ ಯೇವ್ನ್ ರಾಬ್ಲೊ ಕರ್ಣ

ಉಮಾಪತಿ 

                    

MAHABHARATH Part - 58 ( konkani Bhashentu ) Ashwathaama Hatoha Kunjaraha

MAHABHARATH    Part - 58    ( Konkani Bhashentu )

   ASHWATHTHAMA HATOHA ..  KUNJARAHA    ಅಶ್ವಥಾಮ ಹತೋಹ ..  ಕುಂಜರಃ 

                               ಚೌದಾ ದಿವಸಾಚೆ ಯುದ್ಧ ... ರಾತ್ರಿ ದಿವಸು ಮುಕಾರ್ಸಿತಾ ಅಸ್ಸ . ಸೂರ್ಯೋದಯ ಜಾವ್ಚಾಕ ಅನಿಕಯಿ ಸ್ವಲ್ಪ ವೇಳು ಅಸ್ಸ . ಶಂಬರಿ ವರ್ಷ೦ ಪೂರ್ತಿ ಜಲ್ಲಲೋ ದ್ರೋಣಾಚಾರ್ಯ , ಮಂಥಾರೋ  ಸಿಂಹು ಸೋ ಯುದ್ಧ ಕರ್ತಾ ಅಸ್ಸ . ಯುದ್ಧ ವಿರಾಮ ಘೇನಾಶಿ ... ಬ್ರಾಹ್ಮಣ ಯುಕ್ತಿ , ಕ್ಷತ್ರಿಯ ಶಕ್ತಿ ಘೇವ್ನ್ , ಕೊಣಾಲೆಯಿ ಸಹಾಯು ನಾಶಿ , ಪಾ೦ಡವ ಸೈನ್ಯಾಕ ಕತ್ತೋರ್ನ್  ಘಲ್ತಾ ಅಸ್ಸ . ಪಾಂಚಾಲ ಸೈನ್ಯ ಅನಿ ದ್ರುಪದ ಮಹಾರಾಜಾ ಕ ಸಂಹಾರು ಕರ್ನಾಶಿ ... ಯುದ್ಧ ಕವಚ ಅಂಗಾ ವೈಲಾನ ಸೊಡ್ವಾಯ್ನಾ ಮೋಣು ದ್ರೋಣಾಚಾರ್ಯಾನ ಪ್ರತಿಜ್ಞಾ ಕೆಲ್ಲಾ . ಆಜಿ ರಥು ಘು೦ವ್ವ್ಡಾನ್ ದ್ರುಪದ ಮಾಹಾರಾಜಾ ಲಗ್ಗಿ ಯುದ್ಧ ಕೊರುಂಕ ಅಯಿಲಾ . ದ್ರೋಣ ದ್ರುಪದಾ ಮಧ್ಯೆ ಘನ ಘೋರ ಯುದ್ಧ ಝತ್ತಾ ಅಸ್ಸ . ದ್ರುಪದಾಲೆ  ನಾತ್ರಾ೦ಕ ಎಕ್ಲೆ೦ಕಯಿ ಸೋಣಾಶಿ ... ನಿರ್ದಾಕ್ಷಿಣ್ಯ ಜಾವ್ನ್  ದಿವಿಶಿ ಮಾರ್ಲೆ . " ಲೋ ...ದ್ರುಪದಾ ... ! ಹಾಂವ ಅನಿಕಯ್ ಜೀವು ಧೋರ್ನು ರಾಬ್ಲಾ .. ತುಗೆಲೆ ಸಂಹಾರ ಖತಿರಿ . ಹೇ ದಿವ್ಯಾಸ್ತ್ರಾನಿ ತುಗೆಲೆ ಜೀವನಾ ಆಖೇರಿ ಸೀಮಾ ರೇಖಾ ತಂಡಿತಾ .. " ಮೋಣು ಸಂಘುನ್ , ಬಾಣ ಲಕ್ಷ್ಯ ದೊವೊರ್ನ್ , ಮಂತ್ರ ಸಂಘುನು  ಸೊಳ್ಳೆ ದ್ರೋಣಾನ . ಮಹಾ ಉಜ್ಜೋ ಉಗಳ್ತಾ ಯೆವ್ಚೆ ದಿವ್ಯ ಬಾಣ ಪೊಳೊನ್ , ದ್ರುಪದಾನ ದೈವ ಸ್ಮರಣ ಕೊರ್ನ್ , ದೊಳೆ ಧಾಂಕುನ್ ಆತ್ಮಾರ್ಪಣ ಕೆಲ್ಲೆ . ದ್ರುಪದಾನ  ತ್ಯೇಚಿ ಕ್ಷಣಾರಿ ಜೀವು ಸೊಳ್ಳೋ .. ದ್ರೋಣಾಲೆ ಬಾಣಾಕ . 

                       ದ್ರುಪದಾಲೆ ಮರಣಾ ನಂತರ ... ಅನಿಕಾಯ್ ರೋಷ ಭರಿತ ಜಾವ್ನ್ ಕೇಕಯ , ಮತ್ಸ್ಯ ರಾಜ್ಯ ಸೈನ್ಯಾ ವೈರಿ ಯುದ್ಧ ಆರಂಭ ಕೆಲ್ಲೆ . ದ್ರೋಣಾ ಚಾರ್ಯಾಲೆ ದೈಹಿಕ ಶಕ್ತಿ , ಸ್ಥೈರ್ಯ ಪೊಳೊನ್ ಪಾಂಡವಾಂಕ ಆಶ್ಚರ್ಯ ಝಲ್ಲೆ . ಕಾಲಿ  ಸಕಾಣಿ ಧರ್ಲೆಲೆ ಧನುಷ್ಯ ಸಕಲ ದವರ್ನಾಶಿ ಹೇರ್  ದಿವಸು ಸಾಕಾಣಿ ತಾಯ್ ... ಅವಿರತ ಯುದ್ಧ ಕೊರ್ಚೆ ದ್ರೋಣಾಕ ಪೊಳೈತನಾ ... ಸಾಕ್ಷಾತ್ ಮಹಾ ಕಾಲೇಶ , ರುದ್ರಾಕ ಪೊಳೈಲೇ ಮ್ಹಣ್ಕೆ ಝತ್ತಾಶಿಲೆ . ಕುರು ಪಾಂಡವ ವೀರ , ಸೈನ್ಯ ದ್ರೋಣಾಚಾರ್ಯಾ ಕ ಪೊಳೋ ನ್ ವಂದನ ಕೆಲ್ಲಿ .   " ಕೃಷ್ಣಾ .. ! ವಿರಾಟ ರಾಯು ದ್ರೋಣಾಲೆ ವೊಟ್ಟು  ಯುದ್ಧ ಕರ್ತಾಚಿ  ಕಷ್ಟಾರಿ ಪೊಳ್ಳಾ ಅಮ್ಮಿ ತಕ್ಕಾ  ಸಹಾಯು ಕೋರ್ಯಾ ... ರಥು  ತಗೆಲೆ ದಿಕಾನ ವ್ಹರಿ .. " ಮ್ಹಳ್ಳಲೊ ಅರ್ಜುನು . ಹ್ಯೇ  ಭ್ರ೦ಹ್ಮ ಮುಹೂರ್ತಾ ವೇಳು ... ದ್ರೋಣಾಚಾರ್ಯಾಲೆ ವೇಳು ... ದ್ರೋಣ ಬ್ರಾಹ್ಮಣಾಕ ಕೋಪು ಹಡೋಚೊ ವೇಳು ನಯ್ ಅರ್ಜುನಾ .. "   ಮ್ಹಳ್ಳಲೊ ಕೃಷ್ಣು . ತೆದೊಳ್ ಭಿತರಿ ದ್ರೋಣಾಲೆ ದಿವ್ಯಾಸ್ತ್ರಾಕ ವಿರಾಟ ರಾಯಾನ ಜೀವು ಸೊಳ್ಳೊ . ವಿರಾಟ ರಾಯಾಲೆ ಮರಣಾ ಸುದ್ದಿ ಆಯಿಕುನ್ .. ಕೇಕಯ , ಮತ್ಸ್ಯ ರಾಜ್ಯಾ ಸೈನಿಕ ಯುದ್ಧ ಭೂಮಿ ದುಕೂನ್ ಧಾಂವ್ಚ್ಯಾ ಶುರು ಕೆಲ್ಲೆ . ದ್ರೋಣಾ ಚಾರ್ಯಾ ನ ಶಪಥ ಕೆಲ್ಲೆಲೆ ತಶಿ .. ದ್ರುಪದ , ವಿರಾಟ ರಾಯಾಲೆ ಮರಣಾ ನಂತರ ಯುದ್ಧ ಕವಚ ಸೊಡ್ವಾಯಿಲೆ .. ಆನ್ನೇಕ ಪೋಟಿ ಸಿಂಹ ಘರ್ಜನ್ ಕೆಲ್ಲೆ . 

                      ಸೂರ್ಯೋದಯ ಝತ್ತಾ ಅಸ್ಸ . ದ್ರೋಣಾಚಾರ್ಯಾ ನ ಕಾಲಕೃತ್ಯಾ ಖತಿರಿ ,  ಯುದ್ಧ ವಿಶ್ರಾಂತಿ ಘೋಷಣಾ ಕೆಲ್ಲಿ . ಯುದ್ಧ ರಬ್ಬ್ಲೆ. ಹಸ್ತಿ ಘೋಡೆಂಕ ಆಹಾರ , ಪಾನೀಯ ಸೈನಿಕಾನಿ  ದಿವ್ಚ್ಯಾ ಶುರು ಕೆಲ್ಲೆ . ದ್ರೋಣಾಚಾರ್ಯ , ಕೃಪಾಚಾರ್ಯ , ಅಶ್ವಥಾಮ ನಾ೦ವ್ನು ಸೂರ್ಯಾರ್ಘ್ಯ , ಕ್ರಿಯಾರ್ಥ ... ಶಮಂತ ಪಂಚಕ ತಳೆ  ದಿಕಾನ ಗೆಲ್ಲೆ೦ತಿ . ದ್ರೋಣಾಚಾರ್ಯನ ಮತ್ತೇರಿ ನಾವನ್ . ತಳೆ ಬದಿನ ಬಯಿಸುನ್ ಆಸ್ತಾನಾ ... ದ್ರೋಣಾಲೆ ಪಿತಾಮಹ , ದೇವ ಗುರು ಬ್ರಹಸ್ಪತಿ ಪ್ರತ್ಯಕ್ಷ ಝಲ್ಲೋ . " ದ್ರೋಣಾ ... ! ಧನುರ್ವೇದ ಪಂಡಿತ ಜಾವ್ನ್ ಭರಥ ವೀರಾಂಕ ಗುರು ಜಾವ್ನ್ .. ವಿಶ್ವ ವಿಖ್ಯಾತ ಜಲ್ಲೊಲೋ ತುಕ್ಕಾ .. ಹ್ಯೇ  ಹಿಂಸಾಚಾರ ಸ೦ಮ್ಮ್ ನಯ್ಯ್ ... ಅನಿ ಪೂರೊ ಕರಿ .. ಹ್ಯೇ ಯುದ್ಧ . ಹೇ ನರಮೇಧ ಯಾಗ ರಬ್ಬಯಿ ... ಬ್ರಾಹ್ಮಣ ಜಾವ್ನ್ , ಕ್ಷತ್ರಿಯ ಜೀವನ ಪೂರೊ . ಭಾರದ್ವಾಜ ಕುಲ ಪಿತೃ ಮಲಘಡೇಂಕ ವಾಯಿಟ ನಾಂವ ಹಾಡೋನುಕ್ಕಾ .. ಭೂಲೋಕಾಂತ್ ತುಗೆಲೆ ಆಯುಷ್ಯ ಪೂರ್ತಿ ಝಲ್ಲೆ .. ಸ್ವರ್ಘಾ ಬಾಗ್ಲ೦ ತುಗೆಲೆ ಖತಿರಿ ಉಗಡೂನ್ ದವರ್ಲಾ .. ಯೋ .. ಯುದ್ಧ ನಕ್ಕಾ  " ಮೋಣು  ಸಂಘುನ್  ಅದ್ರಶ್ಯ ಝಲ್ಲೋ . ಸಪ್ತಋಷಿ ಮಂಡಲಾ ದುಕೂನ್ .. ಭೃಗು , ಅಂಗೀರಸ , ಕಶ್ಯಪ , ಆರ್ತಿ , ವಸಿಷ್ಠ , ವಿಶ್ವಾಮಿತ್ರ , ಅಗಸ್ತ್ಯ .. ಹನ್ನಿ  ಯೇವ್ನ್ ದರುಶನ ದಿಲ್ಲೆ . ಸರ್ವಾಂಕ ಪಾದ ನಮನ ಕೆಲ್ಲೆ . ಅರುಣೋದಯ ವೆಳ್ಯೇರಿ  ಸೂರ್ಯಾ೦ಜಲಿ ದೀವ್ನ್ ... ಯುದ್ಧ ರಂಗಾ ಕ ವಾಪಾಸ್ ಆಯಿಲೊ . 

                                 ಪಂದ್ರಾ ದಿವಸಾ ಯುದ್ಧ ಆರಂಭ ಝಲ್ಲೆ ಕೃಷ್ಣಾನ ದೃಷ್ಟದ್ಯುಮ್ನಕ ಅಪ್ಪೋನ್ .. " ದೃಷ್ಟದ್ಯುಮ್ನಾ ..! ಅಯಿಚೆ ಯುದ್ಧಾಕ ತೂಚಿ ಪ್ರಧಾನ ಸೂತ್ರ ಧಾರಿ ... ದ್ರೋಣಾಚಾರ್ಯಾ ಕ ಆಜಿ ಅಖೇರಿ ದಿವಸು ಜಾವ್ಕಾ " ಮ್ಹಳ್ಳಲೊ .    " ವಾಸುದೇವಾ .. ! ಮಿಗ್ಗೆಲೆ ಬಪ್ಪುಸು ದ್ರುಪದ ರಾಯಾಲೆ ಮರಣಾ ಕ ಕಾರಣ ಝಲ್ಲಲೋ ದ್ರೋಣಾ ನ .. ಮಿಗೆಲೆ ಖಡ್ಘಾ ಕ ಬಲಿ ಜಾವ್ಕಾ .. ತೇದನಾ ಚಿ  ಮಿಗೆಲೆ ಜನ್ಮು ಸಾರ್ಥಕ ಝತ್ತಲೆ .. ಮಕ್ಕಾ  ಆಶೀರ್ವಾದು ಕರಿ  "  ಮೋಣು  ಸಂಘುನ್ ಕೃಷ್ಣಾ ಲೇ ಚರಣಾ ಕ ಪಾ೦ಯ್ ಪೊಳ್ಳೋ . " ಕಾರ್ಯಾರ್ಥ ಸಿದ್ಧಿ ರಸ್ತು ... ! " ಮ್ಹಳ್ಳಲೊ ಕೃಷ್ಣು . ದ್ರೋಣಾಚಾರ್ಯ ,  ಶರ ಶಯ್ಯಾರಿ ಅಶಿಲೆ ಭೀಷ್ಮಾಚಾರ್ಯಾಲೆ ಜಾಗೇರಿ  ವೊಚ್ಚುನ್ ಪ್ರಣಾಮ ಕೆಲ್ಲೆ . ದೊಗ್ಗ ಜನಾನಿ ಯುದ್ಧರಂಗಾ ವಿಷಯು ಉಲೋನ್  ವಿಮರ್ಶಾ ಕೆಲ್ಲೆ ... ಗತ ಜೀವನಾಚೆ ವೈಭವ ಉಡ್ಘಾಸು ಕಾಣು ಉಲ್ಲಯಿಲೀ೦ತಿ . " ಗ೦ಗೇಯಾ ... ! ಅನಿ ಮಕ್ಕಾ ಆಜ್ಞಾ ದೀ ... " ಮ್ಹಳ್ಳಲೋ ದ್ರೋಣ . " ಜಾಯ್ತ ..  ವೊಚ್ಚುನ್ ಯೋ ... ತುಗೆಲೆ ತೊಂಡ ಪೊಳೈತಾನಾ ... ತೂ ಕಸಲ್ಕಿ ವಿಷಯು ಮನಾ ಲೆಕ್ಕುನ್  ಸಂಕಟ ಪಾವ್ತಾ ಶಿ ದಿಸ್ತಾ .... ಆಚಾರ್ಯಾ .. ! ಕರ್ತವ್ಯ ದೀಕ್ಷೆ೦ತು ಮನಾ ಸ್ಥೈರ್ಯ ಕಾಣ್ ಘೇವ್ನುಕ್ಕಾ .. ಆಚಾರ್ಯಾ .. ! " ಮ್ಹಳ್ಳಲೋ ಭೀಷಮು . ಯುದ್ಧ ರಂಗಾಂತು ದ್ರೋಣಾಚಾರ್ಯನ ಯೆವ್ಚೆ ರಾಕ್ತಾಶಿಲೋ ಅಶ್ವಥಾಮ ... ಲಗ್ಗಿ ಅಯಿಲೊ . " ಅಶ್ವಥಾಮಾ ... ! ಅಮ್ಮಿ ಕ್ಷತ್ರಿಯ ನಯ್ಯ್ .. ಅಮ್ಮಿ ಯುದ್ಧ ಪ್ರಿಯ ನಯ್ .. ಅಮ್ಮಿ ಶಾಂತಿ ಪ್ರಿಯ ಬ್ರಾಹ್ಮಣ ವಂಶಾಚೆ .. ಅಶ್ವಥಾಮಾ .. ! ಹಾಂವ ತುಕ್ಕಾ ಏಕ ಮಹಾಸ್ತ್ರ ದಿತ್ತಾ .. ತಾಜ್ಜೆ ನಾಂವ ' ಭ್ರ೦ಹ್ಮ ಶಿರೋನಾಮಕಾಸ್ತ್ರ ' ಖಂಚೆಯ್ ವೆಳ್ಯೇರಿ ತುಗ್ಗೆಲ್ ಜೀವಾಕ ಅಪಾಯ ಜಲ್ಲೆಲೆ ತವಳಿ .. ಮಿಗ್ಗೆಲೆ ಉಡ್ಘಾಸು ಕಾಣು ಏಕ ಗರಿಕಾ ಕಾಣು ಸೊಳ್ಳೇರಿ ... ತ್ಯೆ ಭ್ರಂಮಾಸ್ತ್ರ ಝತ್ತಾ " ಮೋಣು  ಸಂಘುನ್ ಭ್ರಂಮಾಸ್ತ್ರ ಮಂತ್ರ ಉಪದೇಶ ದಿಲ್ಲೊ . 

                      ಯುದ್ಧ ರಂಗಾಂತು ದ್ರೋಣಾಚಾರ್ಯನ ಸೊಳ್ಳೆಲೆ ಸಹಸ್ರ ಸಹಸ್ರ ಬಾಣಾಕ ಪಾಂಡವ ಸೈನ್ಯ ನಾಶ ಜಾತ್ತಾ ಗೆಲ್ಲೆ . ಕೃಷ್ಣಾ ನ ರಥು ದ್ರೋಣಾಚಾರ್ಯಾಲೆ ಯೆದುರ ಹಾಣು ರಬ್ಬಯಿಲೆ . ' ದ್ರೋಣಾಚಾರ್ಯಾಲೆ ಆಜಿ ಆಖೇರಿ ದಿವಸು ' ಮೋಣು  ಸಂಘಿಲೆ ಕೃಷ್ಣಾಲೆ ಉತ್ತರಂ ಉಡ್ಘಾಸು ಆಯಿಲೊ . ಅರ್ಜುನಾಲೆ  ಮನ ಕರ್ಗಲೆ .. ದೊಳೆಂತು ಅಶ್ರು ಬೋರ್ನ್ ಅಯಿಲೆ ... ಹೃದಯ ಭೇತ್ತುನ್  ವತ್ತ ಕೀ ಮೊಣು ದಿಸ್ಲೆ . ಗುರು ದ್ರೋಣಾಚಾರ್ಯಾಲೆ ಯೆದುರ ನಮಸ್ಕಾರ  ಬಾಣ ಮಾರ್ನ್ ... ದೊನ್ನಿ  ಹತ್ತಾನ  ಗುರು ವಂದನ ಕೆಲ್ಲಿ . ದ್ರೋಣಾಚಾರ್ಯಾ ನ  ' ಯಶಸ್ವೀ ಭವ ' ಮೋಣು ಹಾತು ಉಬ್ಬಾರ್ಲೆ ಲೆ ಅರ್ಜುನಾ ನ ಪೊಳೈಲೆ . ದೊಗ್ಗ ಜನಾ ಭಿತರಿ ಘೋರ ಯುದ್ಧ ಝಲ್ಲೆ . ದಿವ್ಯಾಸ್ತ್ರಾ ಕ ದಿವ್ಯಾಸ್ತ್ರ .. ಮಹಾಸ್ತ್ರಾ ಕ ಮಹಾಸ್ತ್ರ ... ಗುರು ಕ ಸಂಘಿಲೆ  ಶಿಷ್ಯ ಮೋಣು ಆಶ್ಚರ್ಯ ಜಾವ್ನ್ ಯುದ್ಧ ಪೋಳಯಿತಾ ರಬ್ಲೀ೦ತಿ . ತ್ಯೆ ವೇಳ್ಯೇರಿ .. ರಥಾ ಸಾರಥ್ಯ ನಕುಲಾ ಕ ದೀವ್ನ್  ... ಕೃಷ್ಣು  ಧರ್ಮ ರಾಯಾಲೆ ಅಯಿಲೊ .. " ಧರ್ಮ ರಾಯಾ ..! ಯುದ್ಧ ರಂಗಾಂತು ಅಕಾಸ್ಮಾತ್ ಅಪಘಾತ ಜಲ್ಲೆಲೆ ವಿಷಯು ಆಯ್ಕಾಲ್ಯಾರಿ ದ್ರೋಣಾಚಾರ್ಯ ನ ಶಸ್ತ್ರ ಸನ್ಯಾಸ ಕರ್ತಾ ಮೋಣು  ಸಂಘಿಲ್ ನವೇ ? "    " ವಯ್ ವಾಸುದೇವಾ ..!  ದ್ರೋಣಾಚಾರ್ಯ ಕ  ಯುದ್ಧ ರಂಗಾಂತುಲೇನ ದೂರ ಕೊರುಂಕ ಸಾತ್ಯಕಿ ಕ ಅಶ್ವಥಾಮಾ ಲಗ್ಗಿ  ಪೆಟಯ್  .. ತೂ ದ್ರೋಣಾಚಾರ್ಯ ಲಗ್ಗಿ ವೊಚ್ಚುನ್ ' ಅಶ್ವಥಾಮ ಹತ ಝಲ್ಲೊ' ಮೊಣು ಏಕ ಫಟ್ಟಿ ಸುದ್ದಿ  ಸಾಂಗ . ಅಶ್ವಥಾಮ ಮರಣ ಪಾವ್ಲೋ ಮೋಣು  ಅಯಿಕಲಿ ಸತಾನ ... ದ್ರೋಣಾಚಾರ್ಯ ಶಸ್ತ್ರ ಸನ್ಯಾಸ ಘೆತ್ತಾ . ತ್ಯೇಚಿ ವೆಳ್ಯೇರಿ ದೃಷ್ಟದ್ಯುಮ್ನಾ ನ ದ್ರೋಣಾಲೆ ವೊಟ್ಟು ಯುದ್ಧ ಕೋರ್ಕಾ ... " 

ಧರ್ಮಜ : " ಕೃಷ್ಣಾ ವಾಸುದೇವಾ .. ! ಅಶ್ವಥಾಮ ಮರಣ ಪಾವ್ಲೋ ಮೋಣು ಫಟ್ಟಿ ಉಲ್ಲೋನು ... ಪಿತೃ ಸಮಾನ ಗುರು ದ್ರೋಣಾಚಾರ್ಯಾಕ ವಂಚನ ಕೊರ್ಚೆ ಸ೦ಮ್ಮ್ ವೇ ? ಹ್ಯೇ ಗುರು ದ್ರೋಹ ನೈವೆ .. ? ಮಿಜ್ಜೆನ ಸಾಧ್ಯ ನಾ ... ಗುರು ದ್ರೋಹ ಕೋರ್ಚ್ಯಾಕ ಮಿಜ್ಜೆನ ಜಾಯ್ನಾ ಕೃಷ್ಣಾ ... " ಮ್ಹಳ್ಳಲೋ ಧರ್ಮಜಾ . 

ಕೃಷ್ಣ : ಅಸತ್ಯ ಸಂಘುನ್ ಪಾಪ ಝತ್ತಾ ಮೊಣು .. ತೂ ಭಿತ್ತ ನವೆ .. ? ಜಲ್ಲೇರಿ ಏಕ ಕಾಮ ಕರಿ ... ಆಮ್ಗೆಲೆ ಗಜ ಸೈನ್ಯಾ೦ತು ... ಅಶ್ವಥಾಮ ಮ್ಹಳ್ಳೆಲೆ ಏಕ ಹಸ್ತಿ ಅಸ್ಸ . ಭೀಮ ಸೇನ ವೊಚ್ಚುನ್ .. ತ್ಯೆ ಹಸ್ತಿಕ ದಿವಿಶಿ ಮಾರ್ತಲೊ . ತೂ ದ್ರೋಣಾಚಾರ್ಯಾ ಲೇ ವೊಚ್ಚುನ್ " ಅಶ್ವಥಾಮ ಹತಃ .."ಹೊಡಾನಿ  ಸಂಘುನ್  "ಕುಂಜರಃ " ಮೋನು ಸಾಂಗ್ತಾ ನ ತಾಳೊ ಹಗುರ ಕೊರ್ನ್ ಸಾಂಗ .. ಸ್ವಗತ ಹಳೂ ಕೊರ್ನ್ ಸಾಂಗ್ಲೇರಿ ಜತ್ತಾ . ತುಕ್ಕ ಪಾಪ ಲಾಗ್ಗ್ ನಾ . "  ನತ್ತಿಲೆ ಮನಾ ನ ಧರ್ಮಜ ... ಕೃಷ್ಣಾ ನ ಸಂಘಿಲ್ ತಶಿ ಕೊರುಂಕ ಸಹಮತಿ ಕೆಲ್ಲಿ . ಭೀಮ ಸೇನಾನ ಅಶ್ವಥಾಮ ಮ್ಹಳ್ಳೆಲಿ ಹಸ್ತಿಕ ದಿವಿಶಿ ಮಾರ್ಲಿ  ... ಧರ್ಮಜಾ ನ ದೃಷ್ಟದ್ಯುಮ್ನಾ ವೊಟ್ಟು ಯುದ್ಧ ಕರ್ತಾಶಿಲೆ ದ್ರೋಣಾ ಚಾರ್ಯಾ ಲಗ್ಗಿ ವೊಚ್ಚುನ್ " ಅಶ್ವಥಾಮ ಹತಃ  .. ಕುಂಜರಃ " ಕೃಷ್ಣಾ ನ ಸಂಘಿಲ್ ತಶೀ ಸಾಂಗ್ಲೆ . ಕೃಷ್ಣಾನ ಪಾಂಚ ಜನ್ಯ ಶಂಖು ವಜ್ಜಿಲೊ . ಶಂಖಾ ಭೂ೦ಕಾರಾ ಯೆದ್ರಾಕ  ... ಕುಂಜರಃ ಶಬ್ಧ ಅಯಿಕ್ಕ್ ಪಣಿ . ದ್ರೋಣಾಚಾರ್ಯಾ ಕ 'ಅಶ್ವಥಾಮ ಹತಃ ' ಮೋಣು  ಮಾತ್ರ ಅಯಿಕ್ಕ್ ಪಳ್ಳೆ . ದ್ರೋಣಾ ಚಾರ್ಯಾ ಲೇ ಮನಾ ಮಸ್ತ ಆಘಾತ ಝಲ್ಲೆ ... ಬುದ್ಧಿ ಮಂಕು ಝಲ್ಲೆ ... ಜ್ಞಾನ ಶಕ್ತಿ ನಾಶ ಝಲ್ಲೆ ... ಅವಿವೇಕ ಮನಾ ಸುತ್ತುನ್  ರಬ್ಬಲೆ .. ತಾರ್ಕಿಕ ಬುದ್ಧಿ ಹೀನ ಝಲ್ಲೆ ... ಹತ್ತಾ  ಅಶಿಲೆ ಧನುಷ್ಯ ಕಾಣು ಉಡಯಿಲೆ  .. ಫಟೀರಿ ಅಶಿಲೆ ಬತ್ತಳಿಗ ಕಾಣು ಸಕಲ ಘಲ್ಲೆ .. ವಕ್ಷ ಸ್ಥಾನಕ್ಕೆ ಬಂಧಿಲೇ ಕವಚ ಸೊಡ್ವಾನ್  ಕಾಣು ನೆಲಾರಿ ಘಾಲ್ಲೆ ... ಕಂಪನ ಜಾವ್ಚೆ ದೇಹ ಘೇವ್ನ್ ... ದೊಳೆ ಉದ್ದಾ ಕ ಬೋರ್ನ್ , ರಥಾರಿ  ದುಕೂನ್ ಸಕಲ ದೇವ್ನ್ , ಯುದ್ಧ ರಂಗಾ ಧೂಳೀ೦ತು ... ಪದ್ಮಾಸನ ಘಾಲ್ನ್ .. ದೋಳೆ  ಧಾಂಕುನ್ ದೇಹ ತ್ಯಾಗ ಕೊರುಂಕ ಸಿದ್ಧ ಝಲ್ಲೋ ದ್ರೋಣಾಚಾರ್ಯು . ದ್ರುಪದಾಲೆ  ಪೂತು ದೃಷ್ಟದ್ಯುಮ್ನನ ಹ್ಯೋಚಿ ವೇಳು  ಸ೦ಮ್ಮ ಮೋಣು ಲೆಕ್ಕುನ್ , ದ್ರೋಣಾ ಚಾರ್ಯಾಲೆ ಎದ್ರಾಕ ಅಯಿಲೊ ... ದ್ರೋಣಾಚಾರ್ಯಾಲೆ  ಶಿಖೆ ದೋರ್ನ್ ... ಸಮಾಧಿ ಸ್ಥಿತಿರಿ ಅಶಿಲೆ ಗುರು ದೇವಾಲೆ ಮತ್ತೆ ಖಂಡನ ಕೆಲ್ಲೆ ಯೆಕ್ಕ ಪೆಟ್ಟಾಕ . ಆಚಾರ್ಯಾನ ದೋಳೆ  ಸೋಣಿ  .. ಓಂಮ್ ಕಾರಾ ಮಧ್ಯೆ ಜೀವಾತ್ಮ ದಿಗ೦ತಾ  ಲೀನ ಝಲ್ಲೆ . ರುಂಡ ಕತ್ತೊರ್ನ ಯುದ್ಧ ರಂಗಾ ಧೂಳಿಂತ್ ಪೊಳ್ಳೆ . ಶಿವ - ಶಿವಾ ಮೋಣು ಕುರು ಪಾಂಡವ ಸೈನ್ಯ ಸ್ಥಬ್ಧ ಝಲ್ಲೆ .. ! ಸರ್ವ ಶಾಸ್ತ್ರ ವಿಶಾರದ ... ಕುರು ಪಾಂಡವ ಗುರು ಶಿರೋಮಣಿ ... ಏಕ ಧ್ರುವ ನಕ್ಷತ್ರ ....  ಅಂತರ್ ಧಾನ ಝಲ್ಲೆ . ದ್ರೋಣಾ ಚಾರ್ಯಾಲೆ ಮರಣಾ ನಿಮಿತ್ಯ ತ್ಯೆ ದಿವಸಾ ಯುದ್ಧ ಸಮಾಪ್ತಿ  ಝಲ್ಲೆ . ದ್ರೋಣ ಪರ್ವ ಹಾಂಗಾ ಸಮಾಪ್ತಿ . 

ಉಮಾಪತಿ 

            

MAHABHARATH Part - 57 ( Konkani Bhashentu ) GhaTotkacha MaraNa

MAHABHARATH   Part - 57  ( Konkani Bhashentu )

           Ghatotkachale MaraNa / ಘಟೋತ್ಕಚಾಲೆ ಮರಣ

                        ದ್ರೋಣಾಚಾರ್ಯಾಕ ,  ಪಾಂಚಾಲ ರಾಯು ದ್ರುಪದಾ ವೈರಿ  ಅಷ್ಶಿಲೆ ಕೋಪು ಅನಿಕಾಯ್ ನೀವ್ನಿ . ರನ್ನಾ೦ತು ಆಶ್ರಮಾ ಅಸ್ಸುನ್ ಧಾರ್ಮಿಕ ಜೀವನ ಕೋರ್ಕಾ ಅಷ್ಶಿಲೆ ... ಹಾಂವ ಅಷ್ಶಿ ಕಷ್ಶಿ ಜಲ್ಲೊ  .. ? ಬಹುಶಃ ಮಿಗೆಲಿ ವಿಧಿ ...  ವಶ ಜಾವ್ನ್ ಯುದ್ಧ ಕೋರ್ಕಾ ಜಾಲ್ಲೆ ದಿಸ್ತಾ ... ಮೋಣು  ಹಜಾರ ಪಂತಾ ಲೆಕ್ಕಿಲೆ ಅಸ್ಸ . ಭಾರದ್ವಾಜ ಋಷಿಲೆ ಪುತ್ರ , ಅಗ್ನಿ ಮಹರ್ಷಿಲೆ ಶಿಷ್ಯ , ಭಗವಾನ್ ಪರಶುರಾಮಾಲೆ ಅನುಗ್ರಹ ಅಸ್ಸುನ್ ,  ಬ್ರಾಹ್ಮಣ ಜಾವ್ನ್ ಜನ್ಮ ಘೆವ್ನ್  , ಶಾಸ್ತ್ರ ವಿಶಾರದ ಜಾಯ್ನಾಶಿ ... ಕ್ಷುದ್ರ ಕ್ಷತ್ರಿಯಾ ಮ್ಹಣ್ಕೆ ... ಶಸ್ತ್ರಾಸ್ತ್ರ ಹತ್ತಾಂತು  ಧೊರ್ಕಾ ಪೊಳ್ಳೆ ಮೂ .... ಹ್ಯೇ ರೀತ್ಯೇರಿ ಹಿಂಸಾಚಾರ ಕೊರ್ಕ ಝಲ್ಲೆ ಮೂ ... ದ್ರುಪದ ದ್ವೇಷ ಮ್ಹಳ್ಳೆಲೆ ರನ್ನಾ ಉಜ್ಜೇ೦ತು ಶರಣ ಜಾಯ್ನಾಶಿ ಅಷ್ಶಿಲೆ ಜಲ್ಲೆರಿ ... ಮಿಗ್ಗೆಲೆ ಜೀವನ ಆನ್ನೇಕ  ಬಾರ್ಘವ ರಾಮು ಮೋಣು  ಲಾಯೇಕ್ ನಾಂವ ಯೆತ್ತಶಿಲೆ ... ಕಸಲೆ ಝಲ್ಲೆರಿಯೀ ಪಾಂಚಾಲ ದೇಶ ... ಸರ್ವ ನಾಶ ಕೊರ್ಚೆ ಧ್ಯೇಯ ಝಲ್ಲಾ ... ಮೋಣು  ಲೇಕ್ಲೆ  ದ್ರೋಣಾಚಾರ್ಯಾನ  . 

                    ದ್ರೋಣಾಚಾರ್ಯಾ ನ ಸೈ೦ಧವಾ ಕ , ಸ೦ಮ್ಮ ರಕ್ಷಣೆ ದೀನಾಶಿ ... ತಗೆಲೆ ಮರಣಾ ಕ ಕಾರಣ ಝಲ್ಲಾ ಮೋಣು .. ಧುರ್ಯೋಧನಾಕ , ದ್ರೋಣಾಚಾರ್ಯಾ ವೈರಿ ಕೋಪು ಅಯಿಲಾ " ದ್ರೋಣ ಗುರು ದೇವಾ .. ! ತುಂಮ್ಕಾ ಪಾಂಡವಾಂಗೆಲೆ ವೈರಿ ಅಷ್ಶಿಲಿ ಪ್ರೀತಿ , ಅಭಿಮಾನಾ ನಿಮಿತ್ಯ .. ಮಿಗೆಲಿ ಎಕ್ಲಿಚಿ  ಭಯಿಣಿ ಲೆ ಬಮ್ಮುಣ್ ..  ಜಯದೃಥ ಯುದ್ಧ ರಂಗಾಂತು ಮೆಲ್ಲಾ . ಕಸಲೆಕ ಅಷ್ಶಿಆತ್ಮ ವಂಚನ ಕರ್ತಾತಿ .. ? ಭೀಶ್ಮಾಚಾರ್ಯಾನ ದಕ್ಕಯಿಲೆ ಸ್ಥೈರ್ಯ ... ವೀರಾವೇಶ ಯುದ್ಧ , ತುಮ್ಮಿ ಯುದ್ಧ ರಂಗಾಂತು ದಕ್ಕಯಿನಿ . ಇತ್ಲೆ ಕುರುವೀರ , ಮಹಾಸೈನ್ಯ ಆಸ್ಸುನೂಯಿ ... ಪಾಂಡವಾಂಕ ದಿವಿಶಿ ಮಾರ್ನಾತಿ  ಕಿತ್ಯಾ .. ? ಮಕ್ಕಾ ಲಜ್ಜಿ ಕರ್ತಾ ಸಂಘುಕ ... ಯುದ್ಧ ಪ್ರಾರಂಭೊ ಜಾವ್ನ್ ಚೌದ ದಿವಸ ಜಲ್ಲೆರಿಯಿ ಅಮ್ಮಿಕಸಲೆಯ್ ಸಾಧನ ಕರ್ನಿ ... ಭೀಷ್ಮ ಪಿತಾಮಹ ಅನಿ ತುಮ್ಮಿ ಪಾಂಡವ ಪಕ್ಷಪಾತಿ ... ತು೦ಮ್ಗೆಲೆ ಹೃದಯಾ೦ತು ಪಾಂಡವಾಂಗೆಲೆ  ವಿಷಯಾನ ಪ್ರೀತಿ ಅನಿಕಯ್ ಅಸ್ಸ . ತು೦ಮ್ಕಾ ನಂಮ್ಗುನ್ ... ಯುದ್ಧ ಆರಂಭ ಕೆಲ್ಲೆಲೆ ಮಿಗೆಲಿ ಹೊಡಿ ಚೂಕಿ ಝಲ್ಲಿ . ತು೦ಮ್ಗೆಲೆ ನಿಮಿತ್ಯ ಆ೦ಮ್ಕಾವಿಜಯ ಮೆಳ್ತಾಲೆ ... ಮೋಣು ಆಶಿ ಕಳ್ಳೆಲೆ .. ಘನ ಘೋರ ಅಪರಾಧ ಝಲ್ಲೆ ಮಿಗೆಲೆ ... " ಮ್ಹಳ್ಳಲೊ ಧುರ್ಯೋಧನು . 

                          " ಧುರ್ಯೋಧನಾ ...! ಮಿಗೆಲಿ ಕಾರ್ಯ ಶೈಲಿ , ಶಸ್ತ್ರ ನಿಪುಣತಾ , ಯುದ್ಧ ವಿಜಯಾ ಸಾಧನಾ ಅನ್ನೇಕ್ಲೇಕ ಸಂಗ್ಚೆ ಪೊಳ್ಳೇ ... ಹೇ ಮಿಗೆಲೆ ದುರಾದೃಷ್ಟ . ಮಿಗೆಲೆ ವೈರಿ ತುಕ್ಕಾ ನ೦ಮಬಳಿಕ  ನಾ ಝಲ್ಲೇರಿ ಸಾಂಗ ... ಹಾಂವ ಪ್ರಮುಖ ಸೇನಾಧಿಪತ್ಯ ಸೋಣು ದಿತ್ತಾ ... ತೂ ಅನ್ನೇಕ್ಲೋ ಸಮರ್ಥ ಸೇನಾನಿ ಕ ನಿಯುಕ್ತ ಕೊರ್ಯೆತ ... " ಮ್ಹಳ್ಳಲೊ ದ್ರೋಣಾಚಾರ್ಯ .  " ಗುರುದೇವಾ ... ! ಮಿಗ್ಗೆಲೆ ಉತ್ತರಾಂ ನಿಮಿತ್ಯ ತುಮ್ಕಾ  ಕೋಪು ಆಯಿಲ್ಯಾರಿ ಕ್ಷಮಾ ಕೋರ್ಕಾ .. ಹಾಂವ ಅತ್ತ ಹಸ್ತಿನಾವತಿ ಸಾರ್ವ ಭ್ಹೌಮ  ನಯ್... ಹಾಂವ ತುಂಮ್ಗೆಲೊ ಶಿಷ್ಯ . ಕ್ಷಮಾ ಕೋರ್ಕಾ .." ಮ್ಹಳ್ಳಲೊ ಧುರ್ಯೋಧನು  .   "  ಧುರ್ಯೋಧನಾ .. ! ಪಾಂಡವಾಂಕ ಮುಖ್ಯ ಬಲ ಜಾವ್ನ್ ಅಶಿಲೋ ಪಾಂಚಾಲ ದೇಶಾ ಸೈನ್ಯ  ನಾಶ ಕರ್ನಾಶಿ ... ಮಿಗೆಲೆ ಅಂಗ ಕವಚ ಕಾಣಾ .. ಹಾಂವೆ ಮೋರ್ಕಾ ... ನಾ .. ಝಲ್ಲೇರಿ ತನ್ನಿ ಮೋರ್ಕಾ  .. " ಮೋಣು ದ್ರೋಣಾಚಾರ್ಯಾ ನ ಶಪಥ ಕೆಲ್ಲೆ . ಧುರ್ಯೋಧನಾ ಕ ಸಂತೋಷು ಝಲ್ಲೋ .. ಮನಾ ಸಮಾಧಾನ ಝಲ್ಲೆ . ದ್ರೋಣಾಚಾರ್ಯಾಲೆ  ಶಪಥ ಗೂಢಚರ್ಯ ಲೋಕಾಲೆ ನಿಮಿತ್ಯ ಪಾಂಡವಾಂಕ ಕಳ್ಳೆ . ಪಾಂಡವಯೀ ರಾತ್ರಿ ಯುದ್ಧಾಕ ತಯ್ಯಾರಾ ಝಲ್ಲೆ . ಶುದ್ಧ ತ್ರಯೋದಶಿ .. ಶುಕ್ಲ ಪಕ್ಷ .. ಚ೦ದ್ರಾಲೆ  ಚನ್ನಿನೆ ಉಜ್ವಾಡು ಸಗ್ಳೆ  ಜಗತ್ಯಾ ಕ ಪಾವ್ಲಾ  " ವಾಸುದೇವಾ .. ! ರಾತ್ರಿ ವೇಳು .. ಹ್ಯೇ ಚನ್ನಿನೇಕ ಯುದ್ಧ ಕೊರ್ಚೆ ಸ೦ಮ್ಮ್ ನಯ್ ಮೋಣು ದಿಸ್ತಾ ... ಅಂಮ್ಕಾ ಕಸಲೆಯ್ ಪುಣಿ ನಷ್ಟ ಝತ್ತಾಲೆ .. ಮೋಣು ಮಕ್ಕಾ ಅನುಮಾನ ಝತ್ತಾ ಅಸ್ಸ " ಮ್ಹಳ್ಳಲೊ ಧರ್ಮರಾಯು . " ಧರ್ಮರಾಯಾ ... ! ಭೀವ್ನುಕ್ಕಾ ... ಭೀಮಾಲೆ ಪೂತು ಘಟೋತ್ಕಚ ರಾತ್ರಿಚೆ ಯುದ್ಧ ಕೊರುಂಕ ಮಹಾ ಬುದ್ದೊಂತು.ತಾಕ್ಕಾಯುದ್ಧಾ ಆವೇಷು ಹಾಡೊನ್ ಯುದ್ಧ ರಂಗಾಕ ಪೆಟಯ್." ಮ್ಹಳ್ಳಲೊ ಕೃಷ್ಣ . 

                          ಬೀಮಾಲೆ ನಿಮಿತ್ಯ ಕುರು ವೃದ್ಧ ... ಬಾಹ್ಲಿಕ ಮರಣ ಪಾವಲೋ . ಅಶ್ವಥಾಮಾಲೆ ಬಾಣಾಕ ಕುಂತಿ ಭೋಜಾಲೆ ತೇರ ಜನ ಪುತ್ರ೦ ಮೆಲ್ಲಿ೦ತಿ . ಧುರ್ಯೋಧನಾಲೆ ಧಾಹ್ ಜನ ಭಂವ್ಡ್  , ಶಕುನಿಲೆ ಬಾರಾ ಜನಭಂವ್ಡ್ ಭೀಮಾಲೆ ಗಧಾ ಪ್ರಹಾರಾಕ ಯಮ ಲೋಕಾಕ ಪಾವ್ಲಿ೦ತಿ . ದ್ರೋಣಾಚಾರ್ಯ ಅನಿ ಅಶ್ವಥಾಮ ವೊಟ್ಟು ಜಾವ್ನ್ ಪಾಂಚಾಲ ಸೈನ್ಯಾಕ  ದ್ವ೦ಸ ಕರ್ತಾ ಆಸ್ಸತಿ . ರಾತ್ರಿ ವೇಳು ... ರಣ ಕಾಳೀ ದೇವಿ ,  ಪ್ರಳಯ ನೃತ್ಯ ಕರ್ತಾ ಆಸ್ಲೆ ಮ್ಹಣ್ಕೆ ದಿಸ್ಲೆ . ಹೇಚಿ ವೆಳ್ಯೇರಿ ಸಹದೇವು ಕರ್ಣಾ ಲೆ ವೊಟ್ಟು  ಯುದ್ಧ ಕೊರ್ನ್ ... ಕರ್ಣ ಶರಣಾಗತ ಝಲ್ಲೋ . ಕುಂತೀ ದೇವಿಕ ದಿಲ್ಲೆಲೆ ವಚನ ಪ್ರಕಾರ ಕರ್ಣಾ ನ ಸಹದೇವಾ ಕ ದಿವಿಶಿ ಮಾರ್ನಾಶಿ ಸೊಳ್ಳೆ .   " ಲೋ ಮಾದ್ರಿ  ಪುತ್ರಾ ..! ಕರ್ಣಾಲೆ ಯುದ್ಧ ಕೊರ್ಚೆ ... ತೂ೦ವೆ ... ಗಯ್ಯೋ ಚರಯ್ಲೆ ಮ್ಹಣ್ಕೆ ಮೋಣು ಲೆಕ್ಲಾ ದಿಸ್ತಾ ... ಆನ್ನೇಕ ಪೊಟಿ ಮಿಗೆಲೆ ದೊಳೆ ಯೆದ್ರಾಕ ಪೋಣುಕ್ಕಾ ... ವಸ .. ಧಾ೦ವ್ನ್ ವಸ " ಮೋಣು ನಿಂದಾ  ಕೊರ್ನ್ ಸೊಳ್ಳೆ . ಧರ್ಮಜಾನ , ಘಟೋತ್ಕಚಾಕ ಅಪ್ಪೋನ್ " ಪುತಾ ..  ಘಟೋತ್ಕಚಾ .. ! ಹೇ ರಾತ್ರೀ ಯುದ್ಧಾ೦ತು ತೂವೇಂಚಿ ಅಮ್ಗೆಲೆ ಸೈನ್ಯಾಕ ವಾಂಚೊಕಾ ... ತುಗೆಲಿ ಮಾಯಾ ಶಕ್ತಿ ದಕ್ಕೋನ್ .. ಕೌರವ ಸೈನ್ಯಾಕ ಯೆಕ ಪಾಠು ಶಿಖೋಕಾ . ಆಮ್ಗೆಲೆ ಸೈನ್ಯಾ ರಕ್ಷಣ ಕೊರ್ಚೆ ಆಜಿ ತುಗೆಲಿ ಬಾಧ್ಯತಾ " ಮ್ಹಳ್ಳಲೊ ಧರ್ಮಜಾ .  " ಜಾಯಿತ ಮಂಥಾ ... ! " ಮ್ಹಳ್ಳಲೋ ಘಟೋತ್ಕಚ . ಮಾಯಾ ಯುದ್ಧ ಆರಂಭ ಕೆಲ್ಲೆ ಘಟೋತ್ಕಚಾನ  . ಕುರು ಸೈನ್ಯ ಭಿಲ್ಲೇ೦ತಿ ... ಥೋಡ್ ಲೋಕು ಧಾಂವ್ನ್ ಗೆಲ್ಲೆ ... ಥೊಡೆ ಲೋಕ ಮಾಯಾವಿ ಹತ್ತಾ೦ತು ಮೋರ್ನ್ ಪೊಳ್ಳೇ ... ಥೋಡೆ ಲೋಕು ಹರ್ದೆ ಭೇತ್ತುನ್ ಮೋರ್ನ್ ಪೊಳ್ಳೇ . ಹ್ಯೇ ಕ್ಷಣಾಕ ಹಾಂಗಾ ದಿಶ್ಶಿಲೋ .. ಮಂಗಾ ಮಾಯಾ ಜಾವ್ನ್ ರಣ ಭೂ೦ಯ್ಚೆ ಆನ್ನೇಕ ಬದಿನ ದಿಸ್ತಾಶಿಲೋ ...ಮಗಿರಿ ಅನೀ ಏಕ ಕ್ಷಣಾ೦ತು ಆಕಾಶಾರಿ ದಿಸ್ತಾಶಿಲೋ . ಘಟೋತ್ಕಚ ಆಕಾಶಾರಿ ದುಕುನ್ ಅಗ್ನಿ ಚೆಂಡು ಕಾಣು  ಸೈನ್ಯಾ ವೈರಿ ಸಕಲ ಘಾಲ್ನ್ ... ಧಗ ಧಗ ನಿ ಜೋಳ್ಚೆ  ಅಗ್ನಿ ಘಾವೆಕ ಲಾಸ್ಸುನ್ ಘಾಲ್ತಾಶಿಲೋ ... ಅನೇಕ ಕ್ಷಣಾ ಕ ಮೊಡಾಂತ್ ನಿಪ್ಪೋನ್ ಧಾರಾ ಪಾವ್ಸು ಘಾಲ್ನು ದಿಗ್ ಬಂಧನ ಕರ್ತಾಶಿಲೋ . ಕರ್ಣಾಕ ಬಾಣಾ  ಲಕ್ಷ್ಯ ಖಂಯಿ ದೊವೊರ್ಚೆ ಮೋಣು  ಕಳ್ ನಾಶಿ .. ಮನಾಂತು ಸಂಕಟ ಪಾವ್ಲೋ .ಧುರ್ಯೋಧನಾ ಕ ಕಸಲೆ ಕೊರ್ಚೆ ಮೋಣು ಕಳ್ ನಾಶಿ ಕರ್ಣಾ ಲಗ್ಗಿ ಅಯಿಲೊ . " ಕರ್ಣಾ .. ! ಹೇ ಮಾಯಾವಿಕ ಅತ್ತ ಚಿ ದಿವಿಶಿ ಮಾರ್ಕಾ ... ದೇವೇಂದ್ರಾ ನ ದಿಲ್ಲೆಲೆ ಶಕ್ತಿ ಆಯುಧ ಕಾಣು ಮಾರಿ ..." ಮ್ಹಳ್ಳಲೊ . " ಶಕ್ತಿ ಆಯುಧ ಅರ್ಜುನಾಕ ದಿವಿಶಿ ಮಾರ್ಚೆ ಖತಿರಿ ಕಾಣು ದವರ್ಲಾ " ಮ್ಹಳ್ಳಲೋ ಕರ್ಣ . " ಫಲ್ಲೇ  ಅರ್ಜುನಾ ಪೊಷಿ ... ಅತ್ತ ಹ್ಯೇ ಮಾಯಾವಿ ಹೊಡ ಸಂಕಟ ನಯ್ ವೇ ? ಹೇ ಮಾಯಾವಿ ಕ ದಿವಿಶಿ ಮಾರ್ಚೆ  ಅತೀ ಅಗತ್ಯ ಅತ್ತ ಮಿತ್ರಾ ... ! ಅರ್ಜುನಾಲೆ  ವಿಷಯು ವಿಸರಿ ... ತರ್ಕ ಕೋರ್ನುಕ್ಕಾ .. " ಮ್ಹಳ್ಳಲೋ ಧುರ್ಯೋಧನು . ಕರ್ಣಾ ನ ಕವಚ ಕುಂಡಲ ಕಾಣು .. ದೇವೇಂದ್ರಾ ಕ ದಾನ ರೂಪಾರಿ ದಿತ್ತಾನಾ ... ದೇವೇಂದ್ರಾ ನ ದಿಲ್ಲೆಲೆ  ' ಶಕ್ತಿ ಅಸ್ತ್ರ ' ಏಕ ಪೋಟಿ ಮಾತ್ರ ಶಕ್ತಿ ಅಸ್ತ್ರ ಪ್ರಯೋಗ ಕೊರ್ಯೆತ ಮೋಣು ವರದಾನ ಕರ್ತಾನಾ  ಸಂಘುನ್ ದಿಲ್ಲೆಲೆ ಅಸ್ತ್ರ ... ತ್ಯೆ ಶಕ್ತಿ ಅಸ್ತ್ರ ಅರ್ಜುನಾ ಖತೀರಿ ಭದ್ರ ಕೊರ್ನ್  ಕಾಣು ದವರ್ಲೆಲೆ ... ತಸಲೆ ಅಸ್ತ್ರ ಘಟೋತ್ಕಚಾ  ವೈರಿ ನಷ್ಟ ಝತ್ತಾ ಮೂ ಮೋಣು ಏಕ ನಮುನೆ ಸಂಕಟ ಝಲ್ಲೆ ಕರ್ಣಾ ಕ . ಧುರ್ಯೋಧನಾಲೆ ವೊತ್ತಾಯಾ ನಿಮಿತ್ಯ ಶಕ್ತಿ ಅಸ್ತ್ರ ಧನುಷ್ಯಾರಿ ದೊವೋರ್ನ್ ಮಂತ್ರ ಜಪ ಕೊರ್ನ್ , ಘಟೋತ್ಕಚಾ ಕ ಲಕ್ಷ್ಯ ಮನಾ ದೊವೊರ್ನ್ ಶಕ್ತಿ ಅಸ್ತ್ರ ಸೊಳ್ಳೆ . ಯುದ್ಧ ರಂಗಾಂತು .. ಕೋಟಿ  ಸೂರ್ಯ ಪ್ರಭೆಚ್ಯಾ ಸೂರ್ಯ ಶಕ್ತಿ ಉತ್ಪನ್ನ ಝಲ್ಲಿ .. ಘಟೋತ್ಕಚಾ  ಕ ಸೊದ್ದುನ್ ವೊಚ್ಚುನ್ ಹರ್ದೇರಿ ಸ್ಫೋಟ ಜಾವ್ನ್ ಘಟೋತ್ಕಚಾ ಕ ಛಿಧ್ರ - ಛಿದ್ರ ಕೊರ್ನ್ ಮಾಯ ಝಲ್ಲೆ . ಕುರು ಸೈನ್ಯಾಕ ಆನಂದ ಝಲ್ಲೆ  . ಧರ್ಮರಾಯು ಘಟೋತ್ಕಚಾಲೆ ಮರಣ ವಾರ್ತಾ ಅಯಿಕುನ್ ಮೂರ್ಚ್ಯಾ ಗೆಲ್ಲೊ . ಕೃಷ್ಣಾನ ಯೆವ್ನ್ ಧರ್ಮಜಾ ಕ ಸಮಾಧಾನ ಕೆಲ್ಲೆ . " ಧರ್ಮರಾಯಾ ... ! ಘಟೋತ್ಕಚಲೇ ಮರಣಾ  ನಿಮಿತ್ಯ ಸರ್ವಾಂಕ ದುಃಖ ಝಲ್ಲಾ . ಕರ್ಣಾಲೆ  ಶಕ್ತಿ ಆಯುಧಾಕ ಘಟೋತ್ಕಚ ಬಲಿ  ಜಾಯ್ನಾಶಿ ಅಷ್ಶಿಲೆ ಝಲ್ಲೇರಿ ... ಅರ್ಜುನ್ ,  ತಾಕ್ಕಾ ಬಲಿ ಝತ್ತಶಿಲೋ . ಅರ್ಜುನಾನ ಜೀವಂತಿ ಆಸ್ಕಾ ಝಲ್ಲೇರಿ .. ಘಟೋತ್ಕಚಾಲೆ  ಮರಣ ಅತೀ ಅವಶ್ಯ ಅಷ್ಶಿಲೆ  . ಹೇ ತಗೆಲೆ ವಿಧಿ  ಲಿಖಿತ ಮರಣ .... ಅಮ್ಮಿ ಕೊಣಯ್ ಕಸಲೆಯ್ ಕೋರು೦ ಜಾಯ್ನಾ . ಏಕ ವಿಷಯು ಸಂಪಾದನಾ ಕರ್ತಾನ ... ಅನ್ನೇಕ ವಿಷಯು ತ್ಯಾಗ ಕೋರ್ಕಾ ಪೊಡ್ತಾ ... ವಿದ್ಯೆ ಸಂಪಾದನಾ ಕರ್ತಾನಾ , ನೀದ ತ್ಯಾಗ ಕೋರ್ಕಾ ಪೊಡ್ತಾ ... ದುಡ್ಡು ಸಂಪಾದನಾ ಕೋರ್ಕಾ ಝಲ್ಲೇರಿ , ಸುಖ ತ್ಯಾಗ ಕೋರ್ಕಾ ... ಜ್ಞಾನ ಸಂಪಾದನಾ ಕೋರ್ಕಾ ಝಲ್ಲೇರಿ , ಅಹಂ ಅಹಂಕಾರು ತ್ಯಾಗ ಕೋರ್ಕಾ ... ಹ್ಯೇ ಪ್ರಪಂಚಾಂತು ಕಸಲೆಯ್ ಸಂಪಾದನಾ ಕೋರ್ಕಾ ಝಲ್ಲೆರಿ , ಥೊಡೆ ಅಮ್ಗೆಲೆಯ್ ವಿಷಯು  ತ್ಯಾಗ ಕೋರ್ಕಾ . ತ್ಯಾಗ ನಾಶೀ ಕಸಲೆಯ್ ಮೆಳ್ನಾ ಧರ್ಮರಾಯಾ .. " ಮ್ಹಳ್ಳಲೊ ಕೃಷ್ಣು  .

                                 ಘಟೋತ್ಕಚಾಲೇ ಮರಣ ....  ಭೀಮ ಸೇನಾ ಕ , ಭಿತರಿ - ಭಿತರಿ ದುಃಖ ಝಲ್ಲೆ . ಘಟೋತ್ಕಚು ರಾಕ್ಷಸು ಜಾವ್ನ್ ಆಸ್ಲೆರಿಯೀ ಭೇಮಸೇನಾಲೆ ನಿಮಿತ್ಯ ಜನ್ಮಾ ಆಯ್ಯಿಲೊ . ತ್ಯೋ ಸಾತ್ವೀಕ್ ಜಾವ್ನ್ ಅಶಿಲೊ . ಪಾಂಡವಾಂಕ ವನವಾಸಾ೦ತು , ಅಜ್ಞಾತ ವಾಸಾಂತು ಮಸ್ತ ಸಹಾಯು  ಕೆಲ್ಲೆಲೊ . ಉಡ್ಘಾಸು ಕಳ್ಳೆ ಸತಾನ ... ಪ್ರತ್ಯಕ್ಷ ಝತ್ತಲೊ ಆಪದ್ಬಾಂಧವು ಜಾವ್ನ್ ಅಶಿಲೊ . ಧಾರ್ಮ ರಾಯು ಘಟೋತ್ಕಚಾಲೆ  ಉಡ್ಘಾಸು ಕಾಣು ಕಾಣು ,  ಮನಾಂತು ಮಸ್ತ್ ದುಃಖ ಪಾವ್ಲೋ . ಘಟೋತ್ಕಚಅಲೆ ವೀರ ವಿಕ್ರಮ ಮರಣ . ಮಾಯಾ ಯುದ್ಧ ಕೆಲ್ಲೆಲೆ ನಮುನೋ ... ಕುರು ಸೈನ್ಯ  ಧೂಳಿಪಟ ಕೆಲ್ಲೆಲೆ ಯುದ್ಧ್ ಶೈಲಿ  ..  ಉಡ್ಘಾಸು ಕಳ್ಳೆಲೆ  ತಿತ್ಲೆ ನುಪ್ರೊ ಶೀ  ದಿಸ್ಲೆ . ಘಟೋತ್ಕಚಾಲೆ ಮರಣ ,  ಅನಿ ಅಭಿಮನ್ಯುಲೆ ಮರಣ ....  ಪಾಂಡವಾಂಕ ಮನೋ ಸ್ಥೈರ್ಯ ವಾಯಿಟ ಝಲ್ಲೆ . 

ಉಮಾಪತಿ