Tandlaa MooDo .... ಆಮ್ಗೆಲೆ ಫುಳ್ಳೆ ರೀತಿ ರಿವಾಜ ಕೊಂಕಣಿ ಲೇಖನ
ಅಮ್ಮಿ ಸಾನಸ್ತಾನಾ ಘರ್ ಘರಾಂತು ತಂದ್ಲಾ ಮೂಡೋ ಅಸ್ತಶಿಲೋ . ಪಾವ್ಸಾಡಿ ಕ ಜಾಯಿ ಜಲ್ಲಲೊ ತಿತ್ಲೊ ತಂದುಲು ವೊಟ್ಟು ಕೋರ್ನು ದೊವೊರ್ಚೆ ಅಷ್ಶಿಲೆ .ತಂಬಡೊ ತಂದುಲು ಭಾರಿ ಪೊರೊಂಬೊಳು ಆನಿ ಭಾರಿ ರುಚಿ . ಆಮ್ಗೆಲೆ ಮಂಗಳೂರು ಉಡುಪಿ ಬದಿನ ,ದಕ್ಷಿಣ ಕನ್ನಡ ಪ್ರಾಂತ್ಯಾ೦ತು ತಂದ್ಲಾ ಮೂಡೊ ಬಂಧುಚ್ಯೆ ಆನಿ ವಿಕ್ಚೆ ಏಕ ಆರ್ಥಿಕ ವ್ಯವಹಾರ್ ಅಷ್ಶಿಲೋ .ಅತ್ತ ದಿವಸಾಂತು ತಂದ್ಲಾ ಮೂಡೋ ಭಾರಿ ಅಪರೂಪ ಝಲ್ಲ .ವ್ಹರ್ಡಿಕಾ , ಮೂ೦ಜಿ ,ನವ್ವೆ ಘರಾ ಗೃಹ ಪ್ರವೇಶು ಅಸಲೆ ವೆಳ್ಯೇರಿ ತಂದ್ಲಾ ಮೂಡೋ ದವೋರ್ನು ಅನ್ನಪೂರ್ಣಿಲೆ ಉಡ್ಘಾಸು ಕಾಣು , ಧನ ಧಾನ್ಯ ಘರಾ ಬೋರೋ .. ಮೋಣು ಪ್ರಾರ್ಥನಾ ಕೋರ್ಚ್ಯೇ , ಆರತಿ ಕೋರ್ಚ್ಯೇ ಆಂಮ್ಗೆಲೋ ಏಕು ಚಂದು ರಿವಾಜು . ಅತ್ತಚೆ ಪೀಳಿಕ ಅಮ್ಮಿ ಚಿತ್ರ ದಕ್ಕೋನು ಹ್ಯೇ ಕಸಲೆ ಮೋಣು ಸಂಗ್ಚೆ ಕಾಲು ಆಯಿಲಾ . ಯೆಯ್ಯಾ ತಂದ್ಲಾ ಮೂಡೋ ಕಷ್ಶಿ ಕರ್ತಾತಿ ,ಕಷ್ಶಿ ಬಂಧಿತಾತಿ , ಕಸಲೆ ಖತೀರಿ ಬಂಧಿತಾತಿ , ಎಕ್ ಮುಡೇ೦ತು ಕಿತ್ಲೊ ತಂದುಲು ಆಸ್ತಾ , ತಾಜ್ಜೆ ಜಡಾವಣ ಕಿತ್ಲೆ ಅಸ್ಸುಕಾ ಮ್ಹಳ್ಳೆಲೆ ವಿಚಾರು ಕೋರ್ಯಾ . ಹ್ಯೇ ಲೇಖಿ ವೊಟ್ಟು ಥೊಡೆ ಚಿತ್ರ ತುಮ್ಮಿ ಸರ್ವಾನಿ ಪೋಳೋಕಾ ಮೋಣು ಶೇರ್ ಕೆಲ್ಲಾ . ಫೋಟೊ೦ತು ಕಳ್ ಷೋ , ಸೇರು ,ಪಾವು , ಮೂಡೋ ಬಂಧುಚ್ಯೇ ಪೆಟ್ಟಾಣೊ ,ತಣ ವೆಂಟುನು ಕೆಲ್ಲೆಲೋ ರಜಜೋ ಕತ್ತೊರಚ್ಯ್ ಕೊಯಿತಿ ... ತುಮ್ಮಿ ಪೋಳಯಿ ಲಾ . ಏಕ ಮೂಡೆಂತು 3 ಕಳ್ ಷೋ ತಂದುಲು ಅಸ್ಸುಕಾ. . ಏಕ ಕಳ್ ಶೋ ಮ್ಹಳ್ಳೆರಿ ..14 ಸೇರು ..ಏಕ ಸೇರು ಮ್ಹಳ್ಳೆರಿ ..4 ಪಾವು . ಹ್ಯೇ ತ್ಯೆ ಕಾಲಾ ಚ್ಯೆ ಏಕ ಮಾಪ . ಹ್ಯೇ ಲೆಕ್ಕಾರಿ ತಂದ್ಲಾ ಮೂಡೊ ಬಂಧಿತ ಶಿಲೀಂತಿ . ಜಡಾವಣ ಸುಮಾರ 38 kg ಆಸ್ತಾಶಿಲೆ . ಅಷ್ಶಿ ಮೂಡೇ೦ತು ಸುಕ್ಕಿಲೆ ಭಾತ ಯೆವ್ಚ್ಯೇ ವರ್ಷಾ ಸಾಗುವಳಿಕ ಬಿಯ್ಯಾಳ ಜಾವ್ನು ದವರ್ತಾ ಅಷ್ಶಿಲೀಂತಿ . ಅಸಲೆ ಬಿಯ್ಯಾಳಾ ಮೂಡೆಕ ಷೇಣ ಬಾಯ್ಲ್ಚ್ಯಾನ ಲಾವನು ಸಾರೋನ್ ಸುಕ್ಕೋನು ಕುಟ್ಟಾಟಾರಿ ಮ್ಹಳ್ಳೆರಿ ರನ್ನಿ ಧುವೊರು ಲಾಗ್ಚ್ಯೋ ಜಾಗೇರಿ ದವರ್ತಾ ಅಷ್ಶಿಲೀಂತಿ . ಅಷ್ಶಿ ಜೋಪಾನ ಕೋರ್ನು ದವೊರ್ಲೆಲೆ ಭಾತ 3 ವರ್ಷ ತಾ೦ಯಿ ವಾಯ್ಟ್ ಜಾಯೀನಾಶಿಲೆ ಮ್ಹಣತಾತಿ . ಪಾವ್ಸಾಡಿ ಯೆತ್ತಾ ಮ್ಹಣ್ತಾನಾ ಘರಾಂತು 20 -30 ತಂದ್ಲಾ ಮೂಡೆ ಘೇವ್ನು ವೊಟ್ಟು ಕೋರ್ನು ದವೊರ್ಚ್ಯೇ ತ್ಯೆ ಕಾಲು ವಿಸೂರು೦ಕ ಜಾಯ್ನಾ . ತ್ಯೆ ಕಾಲಾಂತು ಘರಾಂತು ಎಲೆಕ್ಟ್ರಿಕ್ ಬಲ್ಬ್ ನಾ .ಚಿಮಿಣಿ ಲಾವನು ತ್ಯೆ ಉಜ್ವಾಡಾಕ ಪೇಜಾ ಜೋವ್ಕಾ ಅಷ್ಶಿಲೆ . ಭಾಯಿರಿ ಜೋರು ಕಣ್ಣಾ ಧಾರೆ ಪಾವ್ಸು ...ಗುಡ- ಗುಡು ಮಿಂಚು ...ಚಿಮಿಣಿ ದಿವ್ವೆ ಉಜ್ವಾಡಾಕ ಹೂನ ಹೂನ ಪೇಜ ... ಕಾಶಾ ವಟ್ಟೆ೦ತು ... ಮೀಟ ತೂಪ ಘಾಲ್ನು ..ಅಂಬುಲಿ ಸಸಮಾ ನೋಣ್ಚೆ ಲಗ್ಗಿ ಅಸ್ಲೆರಿ ... ಕಸಲೊ ತೋ ಸ್ವರ್ಘು ..ತ್ಯೆ ದಿವಸ ... ವಾಪಾಸ ಯೆತ್ತ ಲೇ ಕೀ ?ಉಮಾಪತಿ
