MAHABHARATH Part - 62 ( Konkani Bhashentu ) Karna - Arjuna Yuddha

MAHABHARATH    Part - 62   ( Konkani Bhashentu )

    KARNA - ARJUNA  YUDHDHA  /  ಕರ್ಣ - ಅರ್ಜುನ ಯುಧ್ಧ 

                             ಸತ್ರಾ ದಿವಸಾ ಯುದ್ಧ ಚಲ್ತಾ ಅಸ್ಸ ... ಶಲ್ಯ ರಾಯಾನ , ಕರ್ಣಾ ಲಗ್ಗಿ ನಿಂಮ್ಗಿಲೆ ... " ರಥು .. ಖಂಚೆ ದಿಕಾನ ಧಾಂವ್ಡಾಚೆ ? "  " ಅರ್ಜುನ್ ಖಂಯ್ಯ್ ಅಸ್ಸ ಕೀ ... ಥಂಯ್ಯ್ ಘು೦ವ್ಡಾಯಿ . ಶಲ್ಯಾ ರಾಜಾ .. ! ಯುದ್ಧ ರಂಗಾಂತು ಯೇವ್ನ್ .. ರಥು  ಖಂಯ್ ಧಾಂವ್ಡಾಚೆ ಮೋಣು ನಿಂಮ್ಗಿತಾ ಮೂ ... ! " ಕರ್ಣಾ ನ ನಿ೦ಮ್ಗಿಲೆ . " ಕರ್ಣಾ ..! ಅತ್ತ ಭೀಮ ಅನಿ ಅರ್ಜುನ್ , ದುಃಶ್ಯಾಸನಾ ದಿವಿಶಿ ಮಾರ್ಲೆಲೆ ಸಮರೋತ್ಸಾಹಾರಿ ಆಸ್ಸತಿ . ಹ್ಯೇ ವೆಳ್ಯೇರಿ ತಾಂಗೆಲೆ ಎದ್ರಾಕ ವೊಚ್ಛೆ ಸ೦ಮ್ಮ್ ನಯ್ಯ್ ..  ಹ್ಯೇ ವೆಳ್ಯೇರಿ ಅಮ್ಮಿ ಥಂಯ್ಯ್ ವೊಚ್ಛೆ ನಕ್ಕಾ ಕರ್ಣಾ .. ಮಕ್ಕಾ ತುಗ್ಗೆಲ್ ರಥ ಸಾರಥ್ಯ ಕೊರ್ಚೆ ಹೋಡ  ವಿಷಯು ನಯ್ಯ್ ... ಮಕ್ಕಾ ತುಗ್ಗೆಲ್ ಪ್ರಾಣ ರಕ್ಷಾ ಕೊರ್ಚೆ ಮುಖ್ಯ . " ಮ್ಹಳ್ಳಲೊ  ಶಲ್ಯ " ಮ್ಹಳ್ಳೆರೀ  .. ತುಗೆಲೆ ಅಭಿಪ್ರಾಯ ಕಸಲೆ .. ? ಅರ್ಜುನ ಮಹಾ ವೀರು ..  ತಕ್ಕಾ , ಹಾಂವ  ಸಮರ್ಥ್ವಾನ್ ನಯ್ಯ್ ಮೋಣು ಕೀ  .. ? " ಕೋಪಾನ ನಿಂಮ್ ಗಿಲೆ ಕರ್ಣಾನ . " ತುಂವೆ ತಶಿ ಲೇಕ್ಲೇರಿಯೀ  ಚಿಂತನಾ .. ಅರ್ಜುನಾಲೆ  ವೊಟ್ಟು ಯುದ್ದ್ಧ ಕೊರ್ಚೆ ಮ್ಹಳ್ಳಾರಿ ... ಧಾಹ ಜನ ವೊಟ್ಟು ಜಾವ್ನ್ ಅಭಿಮನ್ಯುಕ ದಿವಿಶಿ ಮಾರ್ಲೆ ಮ್ಹಣ್ಕೆ ಮೋಣು ಲೇಕ್ಕ್ಲಾವೇ .. ?ಪರಮೇಶ್ವರಾ ವೊಟ್ಟು ಕುಸ್ತಿ ಕೊರ್ನ್ .. ಪಾಶುಪತಾಸ್ತ್ರ ಘೆತ್ತಿಲೊ .. ತುಗೆಲೆ ಜಾಗ್ರತೆ ಖತಿರಿ .. ಸಂಘಿಲೆ ತಿತ್ಲೆಚಿ .. " ಮ್ಹಳ್ಳಲೊ ಶಲ್ಯ . " ಜಾಯ್ತ ಪೂರೊ ಕರಿ ಶತ್ರು ಪ್ರಶಂಸಾ ... ಶಲ್ಯ ರಾಜಾ .. ! ತೂ೦ವೆ ರಥ ಸಾರಥ್ಯ ಕೊರುಂಕ ಘಾಲ್ಲೆಲಿ ನಿರ್ಬಂಧನಾ ಅಂಗೀಕಾರ ಕೊರ್ನ್ .. ತುಗೆಲೆ ಸಾರಥ್ಯಾಕ ಹಾಂವ ಸಂತೋಷು ಪವ್ವಿಲೊ ಕಸಲೇ ಕ ಮೋಣು ಗೊತ್ತಸ್ಸ ಕೀ .. ? ತೂ  ಏಕು ರಾಯು , ಧರ್ಮ ವಿಚಕ್ಷಣ , ತ್ಯೆ - ತ್ಯೇ ವೆಳ್ಯೇರಿ .. ಪರಿಸ್ಥಿತಿ ಕ ಸ೦ಮ್ಮ್  ಜಾವ್ನ್ .. ಮಕ್ಕಾ  ಯುದ್ಧಾ೦ತು ಸಾರಥ್ಯ ಕರ್ತಲೊ ... ಮ್ಹಳ್ಳೆಲೆ ವಿಶ್ವಾಸಾ ನಿಮಿತ್ಯ . ತೂ ಪಾಂಡವಾಂಕ ಮಾವ್ಳೋ ಮೋಣು  ಗೊತ್ತಸ್ಸುನು ... ತುಗೆಲೆ ವೈರಿ ಅತೀ ವಿಶ್ವಾಸು ನಂಬಿಕ ದೊವೊರ್ನ್ ರಥಾರಿ ಬೊಸ್ಲಾ . ಅಯ್ಯಾ.. ! ಶಲ್ಯ ರಾಯಾ ... ! ಕುಹಕ ಸಾರಥ್ಯಾ ನಿಮಿತ್ಯ , ಮಿಗೆಲೆ ಮನೋ ಸ್ಥೈರ್ಯಾಕ ಪೆಟ್ಟು ಮಾರ್ನುಕ್ಕಾ ... ಮಿಗೆಲೆ ಮನೋ ಶಕ್ತಿ .. ತುಗೆಲೆ ಉತ್ತರಾ೦ ನಿಮಿತ್ಯ ಊಣೆ  ಝತ್ತಾ ಅಸ್ಸ . ತುಕ್ಕಾ ಪಾ೦ಯ್ಯ್ ಪೊಡ್ತಾ ... ಮಿಗೆಲೆ ಮನಾಂತು ನಿರುತ್ಸಾಹ ಭೋರ್ನುಕ್ಕಾ .. " ಕರ್ಣಾ ನ ದೀನ ಜಾವ್ನ್ ಸಂಘಲೇ  " ಜಾಯ್ತ .. ತೂ೦ವೆ ಸಂಘಿಲ್ ತಶೀ ರಥ ಸಾರಥ್ಯ ಕರ್ತಾ . ಅತ್ತ ಅರ್ಜುನಾಲೆ  ದಿಕಾನ ರಥು ವ್ಹರ್ತಾ " ಮೋಣು ಸಂಘುನ್ ಚಾಟಿನ ಮಾರ್ನ್ ಘೊಡೆಂಕ ಸಿದ್ಧ ಕೆಲ್ಲೆ . ವಾಯು ವೇಗ ಜಾವ್ನ್ ರಥು ಸೊಳ್ಳೋ ಶಲ್ಯಾನ . 

                          ಶಲ್ಯ ರಾಯು ಕರ್ಣಾಕ ಹಿತ ಶತ್ರು ಝಲ್ಲೊ . ಬಾಣು  ಧನುಷ್ಯ್ಯಾ ಕ ಲಾವ್ನ್ ಲಕ್ಷ್ಯ ಸಾಧನ ಕರ್ತಾನಾ .. ಘೊಡೆಂಕ್ ಭಿವೋನು ತಗೆಲೆ ಲಕ್ಷ್ಯ ಚುಕ್ಕಯಿತಶಿಲೊ .. ಜಾಗ್ರತೆ ಉತ್ತರಂ ಸಂಘುನ್ ತಗೆಲೆ ಸ್ಥೈರ್ಯ , ಮನೋ ಶಕ್ತಿ ಊಣೆ ಕರ್ತಶಿಲೊ ... ತೀಕ್ಷಣ ಉತ್ತರಾ೦ನಿ ಕರ್ಣಾ ಲೆ  ಮನ ದುಕ್ಕಯಿತಶಿಲೊ ... ! ಶಲ್ಯಾ ನ ಸಾರಥ್ಯ ಕೆಲ್ಲೇರಿ .. ಕಸಲೇಯ ಸಾಧನಾ ಕೊರ್ಯೇತ ಮೋಣು ಲೆಕ್ಕಿಲೆ ಕರ್ಣಾಕ ನಿರಾಶ ಝಲ್ಲಿ . ಶಲ್ಯರಾಯು  ... ಕರ್ಣಾ ಲೆ ವಿಷಯಾಂತ್ ಶನಿ ರಾಯು ಝಲ್ಲೊ . ಕರ್ಣಾಲೆ ಧಾಹ್ - ಬಾರಾ  ದುರಾದೃಷ್ಟಾ೦ತು .. ಶಲ್ಯಾಲೆ ಸಾರಥ್ಯ್ ... ಆನಿಏಕ ಝಲ್ಲೆ . ಅರ್ಜುನಾಲೆ ರಥು ರಬ್ಬುನ್ ಅಷ್ಶಿಲೆ  ಜಾಗೆಕ ಸ೦ಮ್  ಜಾವ್ನ್ ಎದ್ರಾಕ ಯೆವ್ಚೆ ಕರ್ಣಾ ಕ ಪೊಳೊನ್ , ಅರ್ಜುನಾಕ ಧರ್ಮರಾಯಾಲೆ ರೂಪ ದೊಳೆ ಯೆದ್ರಾಕ ಅಯಿಲೆ . " ಕೃಷ್ಣಾ ... ! ಯೆದ್ರಾಕ ಯೆವ್ಚೆ ಕರ್ಣಾ ಕ ಪೊಳಯಿತನಾ ... ಅಣ್ಣ !ಧರ್ಮಜಾನ  ಯೆವ್ಚೆ ತಶಿ ದಿಸ್ತಾ .. ! ಹೀ ಮಿಗೆಲೆ ಮನಾ ಭ್ರಾಂತಿ ದಿಸ್ತಾ .. ! " 

ಕೃಷ್ಣ : " ಧುರ್ಯೋಧನ್ ಕಷ್ಶಿ ಕೀ .. ತಶೀ ಚಿ ಕರ್ಣು ಯೀ .. " 

ಅರ್ಜುನ : " ಧಿಕ್ .. ! ಹ್ಯೋ ಸೂತ ಪುತ್ರ ಮಕ್ಕಾ  ಕಷ್ಶಿ ಭಾವು ಲೆಕ್ತಾಲೊ .. ? ಹೀನ ಸೂತ ಕುಲಾಚೊ ... ಹಾ೦ವ ವೀರ ಕ್ಷತ್ರಿಯ " 

ಕೃಷ್ಣ : " ವಯಿ ...  ವೈ ...  ವಯ್ ಅಬ್ಬಾ  !" ಹಾಸ್ಲೊ ಶ್ರೀ ಕೃಷ್ಣು 

ಅರ್ಜುನ : " ಕೃಷ್ಣಾ .. ! ಕರ್ಣಾ ಲೆ ವೊಟ್ಟು ದ್ವಂಧ್ವ ಯುದ್ಧ ಝತ್ತಾನಾ ... ಮಕ್ಕ ಕಸಲೆಯ್ ವಿಪತ್ತ ಝಲ್ಲೇರಿ .. ? "

ಕೃಷ್ಣ : " ಹ್ಯೇ  .. ಅಸಂಭವ್ .. ಅರ್ಜುನಾ .. ! ಹಾಂವೆ ಜೀವಂತಿ ಆಶ್ಚೆ ತೆದೊಳ್ ತಾ೦ಯ್ ... ತುಕ್ಕಾ ಕಸಲೆಯ್ ವಿಪತ್ತ ಯೇನಾ .. " 

ಅರ್ಜುನ : " ಏಕಾತ್ ವೇಳಾ ... ತಷ್ಶಿ ಝಲ್ಲೇರಿ ... ? "

ಕೃಷ್ಣ : " ಮಿಗೆಲಿ ಪ್ರತಿಜ್ಞಾ ಬದಿನ ದೊವೊರ್ನ್ ... ಸುದರ್ಶನ ಚಕ್ರ  ಹತ್ತಾ ಘೆತ್ತಾ . ಸಮಸ್ತ ಕುರು ಪೀಳಿ ಸಮಾಪ್ತ ಕೊರ್ನ್ ಧರ್ಮ ರಾಯಾಕ ಪಟ್ಟಾಭಿಷೇಖ ಕರ್ತಾ ... ಅಶಿ ಕಸಲೇಕ ಉಲ್ಲಯಿತಾ .. ಅರ್ಜುನಾ .. ! ? "

 ಅರ್ಜುನ : "  ಅಶೀ೦ಚ್ಯಿ .. ಮಕ್ಕಾ  ವಿಚಾರು ಅಯಿಲೊ ... ತೂ ಮಿಗೆ ಲೆ ವೊಟ್ಟು ಅಸ್ಲೆರಿ ... ಅಸಲೆ ಹಜಾರ ಕರ್ಣ ಎದ್ರಾ ಕ ಆಯಿಲ್ಯಾರಿ ಮಕ್ಕಾ  ಭ೦ಯ್ಯ ನಾ ವಾಸುದೇವಾ .. ! ಮಕ್ಕಾ ತುಗೆಲೆ ಆಶೀರ್ವಾದು ಜಾಯಿ "      " ವಿಜಯೋತ್ಸು " ಮ್ಹಳ್ಳಲೊ ಕೃಷ್ಣು . 

                             ಕರ್ಣಾರ್ಜುನ ಲೆ ಧ್ವ೦ಧ್ವ  ಯುದ್ಧ ಪೋಳೋಚ್ಯಾಕ ಆರಂಭ ಜಾವ್ಚೆ ಫೂಡೇ ಚ್ಯಿ ಕುರುಕ್ಷೇತ್ರ ಆಕಾಶಾರಿ .. ದೇವೇಂದ್ರ , ದೇವಲೋಕಾ ಸರ್ವ ದೇವ , ಯಕ್ಷ , ಕಿನ್ನರ , ಕಿಂಪುರುಷ , ಸಿಧ್ಧ , ಸಾಧ್ಯ , ನಭಶ್ಚರ ಗಣ ... ಸೂರ್ಯ ಪುತ್ರಾಕ ಅನಿ ಇಂದ್ರ ಪುತ್ರಾಕ ಮಧ್ಯೆ ಜಾವ್ಚೆ ಯುದ್ಧ ಪೊಳೋ ಚ್ಯಾಕ ಅಯಿಲೆ೦ತಿ . ಸಾಕ್ಷಾತ್ ಶ್ರೀ ಮನ್ನಾರಾಯಣ .. ರಾತಾ ಸಾರಥಿ ಜಾವ್ನ್ ಬೊಸ್ಲಾ  ಪಾರ್ಥ ಸಾರಥಿ ಜಾವ್ನು .. !

                       ಕರ್ಣ...  ರಥ ರಾಬ್ಕಾರಾನ್  ಅರ್ಜುನಾ ಕ ಆಪಾದ ಮಸ್ತಕ ತಾಂಯ್ಯ್ ಪೊಳಯಿಲೆ ... ಅಪ್ರಯತ್ನ ಜಾವ್ನ್ ಕರ್ಣಾಲೆ ,  ದೋಳೆ೦ತು ಉದ್ದಾಕ  ಬೋರ್ನ್ ಅಯಿಲೆ ... ಕುಂತಿ ದೇವಿ ಲೆ ಉಡ್ಘಾಸು ಅಯಿಲೆ ... " ಮಿಗೆಲೆ ಭಾವು " ಮನಾ ಅಯಿಲೆ ... ಮಮತಾ ನತ್ತಿಲೆ ಮಾತಾನಾಭಿ ,  ದೇ೦ಟು ಕೆದನ ಕೀ ಸುಕ್ಕುನ್ ಗೆಲ್ಲಾ ... ವೊಂಟ ಸುಖಲೇ ಕಾಂಪ್ಲೇ .. ಆಂಗ ಝು೦ಮ್ಮಯಿಲೆ ... ಹಾಥ ಉಬ್ಬಾರ್ನ್ ಭಾವಾ ಕ ರಕ್ಷಣಾ ಕೋರ್ಕಾ ಅಶಿಲೆ ಹಾಥ ಆಜಿ ... ದಿವಿಶಿ ಮಾರ್ಚ್ಯಾ ಕ ತಯ್ಯಾರ ಝಲ್ಲೇ೦ತಿ  .. ಕಸಲೆ ನಮುನೆ ಧುರ್ವಿಧಿ ಮಿಗೆಲಿ .. ! ಅರ್ಜುನು ಪಾಂಡವೇಯ ... ಹಾಂವ ಕೌ೦ತೇಯ .. ! ಆಮ್ಗೆಲಿ ದೊಗ್ಗ ಜನಾಲಿ ಜನ್ಮ ವಾಲಿ ಯೆಕ್ಕಚಿ .. ಝಲ್ಲೇರಿಯಿ ... ಜನ್ಮಭಾವ , ಅರ್ಥ , ವಿಧಿ , ಆಶಾ , ಕಾಂಕ್ಷ , ವಿಂಗಡ - ವಿಂಗಡ .. ! ಕರ್ತವ್ಯ ಉಡ್ಘಾಸು ಅಯಿಲೊ .. ದೀರ್ಘ ಶ್ವಾಸು ಸೊಳ್ಳೋ . ಅರ್ಜುನಾಲೆ ದೊಳೆಂತ್  ಕುಪಿತ ಜ್ವಾಲಾಗ್ನಿ ಪೋಳಯಿಲೆ ಕರ್ಣಾನ ...ಪಾರ್ಥ ಸಾರಥಿಲೆ ಬೋಧ ಅಯಿಕತಾ ಅಸ್ಸ ...  ಕರ್ಣ ಅರ್ಜುನಾ ಮದ್ಯೆ ಯುದ್ಧ ಆರಂಭ ಝಲ್ಲೆ . ಅರ್ಜುನಾನ ಆಗ್ನೇಯಾಸ್ತ್ರ ಪ್ರಯೋಗ ಕೆಲ್ಲೇರಿ ... ಕರ್ಣಾ ನ ವಾರುಣಾಸ್ತ್ರ  ಮಾರ್ನ್ ಶಮನ  ಕೆಲ್ಲೆ .  ಅರ್ಜುನಾ ನ ಮೇಘಾಸ್ತ್ರ  ಪ್ರಯೋಗ ಕೆಲ್ಲೇರಿ  . ಕರ್ಣಾನ ವಾಯುವ್ಯಾಸ್ತ್ರ ಸೋಣು ನಿರ್ವೀರ್ಯ ಕೆಲ್ಲೆ . ಅರ್ಜುನಾನ .. ಪರ್ಜನ್ಯಾಸ್ತ್ರ ಪ್ರಯೋಗ ಕೆಲ್ಲೆ .. ಕರ್ಣಾನ ಪರ್ಜನ್ಯಾಸ್ತ್ರಾನಿ , ಅರ್ಜುನಾಲೆ  ಬಾಣ ಶಮನ ಕೆಲ್ಲೆ . ವಾರುಣಾಸ್ತ್ರ ಪ್ರಯೋಗ ಕೆಲ್ಲೆ ಅರ್ಜುನಾ ನ ; ಕರ್ಣಾ ನ ವಾಯುವ್ಯಾಸ್ತ್ರ ಸೋಣು ಅರ್ಜುನಾಲೆ ಅಸ್ತ್ರ ನಿಷ್ಪ್ರಯೋಜನ ಕೆಲ್ಲೆ . ನಾರಾಯಣಾಸ್ತ್ರ ಅರ್ಜುನನ ಸೊಳ್ಳೆ ... ಕರ್ಣಾನ ನಾರಾಯಣಾಸ್ತ್ರಾನಿ ಶಮನ ಕೆಲ್ಲೆ . ಕರ್ಣಾನ ಭಾರ್ಘವಾಸ್ತ್ರ ಪ್ರಯೋಗ ಕೆಲ್ಲೆ ... ಅರ್ಜುನಾ ನ ಬ್ರ೦ಹ್ಮ್ಮಾಸ್ತ್ರ ಸೋಣು , ಕರ್ಣಾಲೆ ದಿವ್ಯಾಸ್ತ್ರ ನಶ್ಟ ಕೆಲ್ಲೆ . ಕರ್ಣಾರ್ಜುನಾನಿ ಅಷ್ಶಿ ದಿವ್ಯಾಸ್ತ್ರ ಸೋಣು ಯುದ್ಧ ಕರ್ತಾನಾ .. ಕುರುಕ್ಷೇತ್ರ ಭೂಮಿ ಕಾಂಪ್ಲಿ ... ರಥಾಶ್ವ ಭೀವ್ನ್ ... ಸಾರಥಿಲೆ ನಿಯಂತ್ರಣ ಚುಕ್ಕುನ್ ಹೆಕಡೆ  - ತೆಕಡೆ ಘು೦ವ್ಲೆ . ದಿವ್ಯಾಸ್ತ್ರ ಪ್ರಯೋಗಾ ನಿಮಿತ್ಯ ... ಆಕಾಶಾರಿ ಉಬ್ಚೆ ಪಕ್ಷಿ ಸಂತಾನ ನಾಶ ಝಲ್ಲೆ . ಕುರುಕ್ಷೇತ್ರ ರನ್ನಾ೦ತು , ಪ್ರಾಣಿ ಚರ ಜಂತು ಲಾಸ್ಸುನ್ ಗೆಲ್ಲೆ . ಸರ್ವ ಸೈನಿಕಾನಿ , ಯುದ್ಧ ಕೊರ್ಚೆ ಸೋಣು .. ಕರ್ಣಾರ್ಜುನ ಲೆ ಯುದ್ಧ , ಅಸ್ತ್ರ ಪ್ರಯೋಗ ಪೊಳೋನ್ ರಬ್ಲೀ೦ತಿ ... ದಿಗ್ಭ್ರಾ೦ತಿ ಝಲ್ಲೆ ಸರ್ವಾಂಕ .    ಅಸ್ತ್ರಾಕ .. ಅಸ್ತ್ರ ! ದಿವ್ಯಾಸ್ತ್ರಾ ಕ .. ದಿವ್ಯಾಸ್ತ್ರ ! ಮಹಾಸ್ತ್ರಾ ಕ .. ಮಹಾಸ್ತ್ರ ! ದಿವ್ಯಾಸ್ತ್ರಾಕ ಮೇಘ ಘರ್ಜನ ಝಲ್ಲಿ .. ಮಿಂಚು ಫಳಾರನಿ ಸಕಲ ದೇ೦ವಲಿ ... ಭೀಕರ ಭೀಷಣ ವಾರೆಕ .. ರುಕ್ಕಾ ಪಾಳ ಚುಕ್ಕುನ್ ಹು೦ಮ್ಟಾನ್ ಪೊಳ್ಳಿ೦ತಿ . ದಿವ್ಯಾಸ್ತ್ರ ಪ್ರಳಯ ಘರ್ಜನಾ ... ಹಸ್ತಿನಾವತಿಕ ತಾಂಯ್ಯ್ ಪಾವ್ಲಿ . ಸಂಜಯಾಲೆ ಮುಖಾಂತರ ಕುರುಕ್ಷೇತ್ರ ಯುದ್ಧ ವಾರ್ತಾ ಅಯಿಕತಾಲೊ ಧ್ರತರಾಷ್ಟ್ರ್ರನ  ... ಸಂಜಯಾ ಕ ನಿಂಮ್ಗಿಲೆ .. " ಸಂಜಯಾ .. ! ಹ್ಯೇ ಫಳ - ಫಳಾರ್ಭಟ ಕಸಲೆ ? ... ಹ್ಯೇ ಶಬ್ಧ ಖಂಯ್ಯ್ ದುಕೂನ್ ಯೆತ್ತಾ .. ? ... "    " ಮಹಾರಾಜಾ .. ! ಕರ್ಣಾರ್ಜುನ ದಿವ್ಯಾಸ್ತ್ರ ಎಕ್ಕಾ  ಏಕ ಢೀ ಮಾರ್ನ್ ಮಿಂಚು ಯೇವ್ನ್ ಜಾವ್ಚೆ ಭಯಂಕರ ಶಬ್ಧು , ಯುದ್ಧ ರಂಗಾ ದುಕುನ್ ಯೆತ್ತಾ ಅಸ್ಸ . ಪರಂಧಾಮ ಶ್ರೀ  ಕೃಷ್ಣು .. ಅರ್ಜುನಾಕ ಖಂಚ್ಯೇ ಖಂಚ್ಯೇ ಅಸ್ತ್ರ ಪ್ರಯೋಗ ಕೊರ್ಕಾ ಮೋಣು ಸಾಂಗ್ತಾಚಿ ಅರ್ಜುನಾಕ ಮಾರ್ಗ ದರ್ಶನ ಕರ್ತಾ ಅಸ್ಸ . ಹಾಂತು ಕೋಣ ಸ್ರೇಷ್ಠ .. ಕೋಣ ಪರಾಜಯ ಝತ್ತಲೆ ... ಮೋಣು  ಸಂಘು ಜಾಯ್ನಾ . ಉಭಯತ್ರಯ ಸೈನ್ಯ ಮಹಾ ವಿಸ್ಮಿತ ಜಾವ್ನ್ ಯುದ್ಧ ಪೋಳಯಿತಾ ಆಸ್ಸತಿ .. ಕರ್ಣಾನ ಬತ್ತಳಿಗೆ  ದುಕುನ್ ' ನಾಗಾಸ್ತ್ರ ' ಕಾಣು ಹತ್ತಾ  ಧರ್ಲಾ ... ಮಹಾರಾಜಾ ... " 

                    ಕರ್ಣಾನ  ಬೊಟ್ಟಂ ಸೊಳ್ಳೆ ಸತಾನ .. ನಾಗಾಸ್ತ್ರ ಭಯಂಕರ ವಿಷ ಜ್ವಾಲ ... ವಿಷಾನಿಲ  ಸೋಣು ಅರ್ಜುನಾಲೆ  ಮತ್ತೆ ಸೊದ್ದುನ್ ಲಕ್ಷ್ಯ ಸಾಧನ ಕೊರುಂಕ ಮುಕಾರ್ಸಿಲೆ . ಶಲ್ಯ ಭಿಲ್ಲೊ ... " ಕರ್ಣಾ ಹೇ ಭಯಂಕರ ದಿವ್ಯಾಸ್ತ್ರ ನವೇ ... ? ಆಶ್ಚರ್ಯ ಪಾವ್ನ್ ನಿಂಮ್ಗಿಲೆ . "ಶಲ್ಯ ರಾಜಾ .. ! ಹೇ ಅಶ್ವಸೇನ ನಾಗಾಸ್ತ್ರ ... ಹ್ಯೇ  ಮಹಾಸ್ತ್ರಾ ನಿಮಿತ್ಯ .. ಅರ್ಜುನ್ ಭಸ್ಮ ಝತ್ತಲೊ ಪೊಳೆ  " ಮೋಣು ಅರ್ಜುನಾಲೆ ಹರ್ದೇಕ ಲಕ್ಷ ದವರ್ಲೆ . " ಕರ್ಣಾ ತುಗ್ಗೆಲ್ ಲಕ್ಷಾಂತು ಕಸಲ್ಕಿಏಕ  ಚೂಕಿ ಅಸ್ಸ " ಮೋಣು ಸಂಘುನ್ ಕೃಷ್ಣಾ ಕ ಆರ್ಥು ಜಾವ್ಚೆ ತಶಿ ಸೂಚನ ದಿಲ್ಲಿ ಶಲ್ಯ ರಾಯಾನ . ಕರ್ಣಾನ ನಾಗಾಸ್ತ್ರ ಸೊಳ್ಳೆ . ಶಲ್ಯಾಲೆ ಸೂಚನೆ ಪ್ರಕಾರ .. ಕೃಷ್ಣಾ ನ ಘೋಡೆ ಲಗಾಮು ತಂಡುನ್ ... ಅಶ್ವ೦ ಪಯ್ಯಾ ಗಂಟೀರಿ ರಾಬ್ಚ್ಯೇ ತಶಿ ಕೆಲ್ಲೆ . ರಥ ಏಕ್ದಂ ಸಕಲ ದೆಂವ್ಲೆ . ಕರ್ಣಾ ನ ಲಕ್ಷ ಕೊರ್ನ್ ಸೊಳ್ಳೆಲೆ ನಾಗಾಸ್ತ್ರ .. ಲಕ್ಷ ಚುಕ್ಕುನ್ ... ಅರ್ಜುನಾಲೆ  ಕಿರೀಟಾಕ  ಲಾಗ್ಗುನ್ .. ಇಂದ್ರ ಕಿರೀಟ ಉಬ್ಬುನ್ ಸಕಲ ಪೊಳ್ಳೆ . ಪಾಪ ಕರ್ಣಾಲಿ ಮಹಾ ಆಶಾ ಮತ್ತಿ ಝಲ್ಲಿ . 

                            ಅರ್ಜುನಾ ಕ " ಕಿರೀಟಿ " ಮ್ಹಳ್ಳೆಲೆ ನಾಂವ ಅಸ್ಸ . ಹ್ಯೇ ಕಿರೀಟಾಂತ್ ದಿವ್ಯ ಶಕ್ತಿ ಅಸ್ಸ . ಸ್ವತಹಾ ದೇವೇಂದ್ರಾನ , ಅರ್ಜುನಾಲೆ  ಮತ್ತೇರಿ ದೊವೊರ್ನ್ ಸನ್ಮಾನ ಕೆಲ್ಲೆಲೆ ... ಇಂದ್ರ ಲೋಕಾ ಆಯ್ಯಿಲೆ ವೆಳ್ಯೆರಿ.ಆಜಿ ನಾಗಾಸ್ತ್ರ ನಿಮಿತ್ಯ ವಜ್ರ  ಕಿರೀಟ ನಾಶ ಝಲ್ಲೆ .ನಾಗಾಸ್ತ್ರ ವಾಪಾಸ್ ಕರ್ಣಾ ಲೆ ಯೇವ್ನು " ಕರ್ಣಾ .. ! ಕೃಷ್ಣಾಲೆ  ಕಾಲ ಸ್ಫೂರ್ತಿ ನಿಮಿತ್ಯ .. ಅರ್ಜುನಾಲೆ ರಥು ಸಕಲ ದೆಂವ್ಲೆ .. ತಾಜ್ಜೆ ನಿಮಿತ್ಯ ಅರ್ಜುನಾಕ ಸಂಹಾರು ಕೋರು೦ ಜಾಯ್ನಿ . ಮಹಾವೀರಾ .. ! ಮಕ್ಕಾ  ಆನ್ನೇಕ ಪೋಟಿ ಪ್ರಯೋಗ ಕರಿ . ಹೇ ಪಂಕ್ತಾ ಖಂಡಿತ ಅರ್ಜುನಾ ಕ ದಿವಿಶಿ ಮಾರ್ತಾ " ಮ್ಹಳ್ಳೆ ಅಶ್ವಸೇನ ನಾಗಾಸ್ತ್ರ .   " ಕ್ಷಮ ಕರಿ ಅಶ್ವಸೇನಾ .. ! ಏಕ ಪೋಟಿ ಪ್ರಯೋಗ ಕೆಲ್ಲೆಲೆ ಅಸ್ತ್ರ ಆನ್ನೇಕ ಪೊಟಿ ಪ್ರಯೋಗ ಕರ್ನಾ ಮೋಣು ಹಾಂವೆ ಎಕ್ಲೀಕ ಉತ್ತರ ದಿಲ್ಲಾ . ತುಕ್ಕ ಆನ್ನೇಕ ಪೋಟಿ ಪ್ರಾಯೊಗು ಕೆಲ್ಲೇರಿ ... ದಿಲ್ಲೆಲೆ ಉತ್ತರ ಚುಕ್ಲೆ ಮ್ಹಣ್ಕೆ ಝತ್ತಾ ... ' ಉತ್ತರ ಚುಕ್ಕಿಲೋ ಕರ್ಣ ' ಮೋಣು ಅಪಖ್ಯಾತಿ ಯೆತ್ತ ಮಕ್ಕಾ . ಹೇ ತುಗೆಲೆ  ದುರಾದೃಷ್ಟ ಅಶ್ವಸೇನಾ ... ! ತುಗೆಲೆ  ಹಗೆ ಸಫಲ ಜಾವ್ಚೆ ಖತಿರಿ .. ತೂ೦ವೇ ಅನ್ನೆಕ್ಲೇಲೆ ಆಶ್ರಯು ಘೆವ್ಚೆ ಲಾಯಕ " ಮ್ಹಳ್ಳಲೋ ಕರ್ಣ . ನಾಗಾಸ್ತ್ರ ನಿರಾಶ ಜಾವ್ನ್ ವಿಂಗಡ ವಾಟ  ನಾಶಿ  ಅದೃಶ್ಯ ಝಲ್ಲೆ 

                        ಯುದ್ಧ ಆರಂಭ ಜಾವ್ಚೆ ಫೂಡೇ ಕುಂತಿ ದೇವಿ ಕರ್ಣಾಕ ಭೇಟಿ ಜಾವ್ನ್ ... ಅರ್ಜುನಾ ವೊಟ್ಟು  ಯುದ್ಧ ಕರ್ತಾನಾ ಏಕ ಪೋಟಿ ಸೊಳ್ಳೆಲೆ ಬಾಣ , ಆನ್ನೇಕ ಪೋಟಿ ಪ್ರಯೋಗ ಕೋರು ನಜ್ಜ ಮೋಣು ಆಣ ಭಾಸ ಘೆತ್ತಿಲಿ . ತ್ಯೇ ಕಾರಣಾ ನಿಮಿತ್ಯ .. ಕರ್ಣಾನ ನಾಗಾಸ್ತ್ರ ದೊನ್ನಿ  ಪೋಟಿ ಪ್ರಾಯೊಗು ಕರ್ನಿ . ಕರ್ಣಾಲೆ ದುರಾದೃಷ್ಟ ... ! ಜನ್ಮ ದಿಲ್ಲೆಲಿ ಆವ್ಸು... ಕರ್ಣಾಕ ದುರ್ವಿಧಿ ಝತ್ತಾ . 

ಉಮಾಪತಿ 

                                                                                           
 

                                    

THANDHA UTKAA NAANA ( Konkani Kavita )

THANDHA UTKAA NAANA     ( Konkani Kavita )
ಆಹಾ ವೊಹೋ ಖುಷಿ ಅಮ್ಮಾ , ರಕಯಿ ಥಂಡ ಉದ್ದಾಕ  ಅಮ್ಮಾ
ನಾಹ್ಲೆಲಿ ತಿತ್ಲೆ ಖುಷಿ ಅಮ್ಮಾ ,  ಖೆಲ್ಲೆಲೆ  ತಿತ್ಲೆ ಆಶಿ ಅಮ್ಮಾ
ಪಾವ್ಸಾಡಿ ರಬ್ತಾ ಮಾಡಾ ಮುಳಾಂತ್ , ಪಾವ್ಸಾ ಧಾರಾ ಆನಂದ ಅಮ್ಮಾ
ಬಾದ್ರಪದ ಮಹಿನೆ ತಿಂಬುಕಾ ಅಮ್ಮಾ , ಅಂಗಣ ಭರಿ ನಾಂಚುಕಾ ಅಮ್ಮಾ

ಧೊರುಂಕ ಝತ್ತಲೇ ತುಕ್ಕಾ ಅಮ್ಮಾ ? ಸೆರಗ ಮುಳಾಂತ್ ನಿಪ್ಪಯಿತಾಲಿ ಅಮ್ಮಾ
ಮಿಗೆಲಿ ಸ್ವರ್ಘು  ಹಂಗಾಚಿ ಅಮ್ಮಾ , ಥಂಢ ಉತ್ಕಾ ಖೆಳ್ಚೆ ಅಮ್ಮಾ
ಥಂಡಿ ತಾಪು ಸಂಘು ನುಕ್ಕಾ , ಅನ್ನಾಲೆ ಸಾಂಗ್ತಾ  ಮೊಣು ಕ್ಕಾ ಅಮ್ಮಾ
ರಕಯಿ ರಕಯಿ ಮತ್ತೇರಿ ಉದ್ದಾಕ , ಗುಮ್ಮಟಾ ಅಭಿಷೇಕು ಅಂಗಣಾಂತ್ ಅಮ್ಮಾ

ಹಾಂವಚಿ ಚಂದ್ರು ಹಾಂವಚಿ ಇಂದ್ರ್ , ಸ್ವಾರ್ಘ ಧಾಮಾ ರಾಯು ಅಮ್ಮಾ
ಗೋಪಿ ವಸ್ತ್ರ ಮಾಯಕ ಅಮ್ಮ , ನಂದ ಗೋಕುಲ ಕೃಷ್ಣ ಅಮ್ಮಾ
ಕಾಳಿಂಗ ಮರ್ದನ ಶ್ಯಾಮ ಅಮ್ಮ . ಅಂಗಣಾ ವೊಕ್ಕುಳ ರಾಕ್ತಾ ಅಮ್ಮಾ
ತೃಪ್ತಿ ಮನಾ ಆನಂದ ಅಮ್ಮಾ , ಸಂತೋಷು ಪಾವ ನಾಣಾ೦ತ್ ಅಮ್ಮಾ
ಉಮಾಪತಿ

थंड उत्का नाणं    ( कोंकणी कविता )

आहा वोहो ख़ुशी अम्मा , रकाई  थंढ उद्दाक अम्मा
नाहल्लेली तितले ख़ुशी अम्मा , खेल्लेले तितले अशी अम्मा
पावासाडि राबता माडा मुळांत , पावसा धारा आनंद अम्मा
बाधरापद महिने तिंबुका अम्मा , अंगण भरि नांचुका अम्मा

धोरुंक   झत्तले तुक्का अम्मा  ?  सेरगा मुळांत निप्पयितालि अम्मा
मिगॆले स्वरघु हांगाची अम्मा , थंङ उत्का खेळचे अम्मा
थांडि  तापु संघु नुक्का , अन्नाले सांगता मोणुक्का अम्मा
रकाई रकाई मत्तेरि उद्दाक , गुम्मटा अभिशेखु अंगणांत अम्मा

 हांवचि  चंद्र हांवचि  इंद्र , स्वारघा धामा रायु अम्मा 

गोपी वस्त्र मायक अम्मा , नंद गोकुल कृष्णा अम्मा
काळिंग मर्दन श्याम अम्मा , अंगणा वोक्कुळ  राक्ता अम्मा
तृप्ती मना आनंद अम्मा , संतोषु पाव नाणांत  अम्मा

उमापति 

https://www.facebook.com/vijith.kr.31/videos/562068620553218/

MAHABHARATH  Part - 61  ( konkani Bhashentu )

      Sathraa divasaa yudhdha..... Dhushyasana vadha / ದುಃಶ್ಶಾಸನ ವಧ 

                          ಸೂರ್ಯಾಲೆ ಆರಾಧನಾ ಕೊರ್ನ್ , ವೀರ ತಿಲಕ ನೀಡ್ಲಾರಿ ಲಾವ್ನ್ , ವಿಜಯ ಧನುಷ್ಯ ಹತ್ತಾ೦ತು  ಧೋರ್ನ್ ... ತ್ಯೆ ದಿವಸಾಚ್ಯೆ ಯುದ್ಧ ವ್ಯೂಹ ಮನಾ ಕಲ್ಪನಾ ಕೊರ್ನ್ ಭಾರ್ಸೊರ್ಚೆ  ವೇಳೇರಿ .. ಸರ್ಪ ರಾಯಾಲೆ  ಪೂತು' ಅಶ್ವಸೇನ ' ಮ್ಹಳ್ಳಲೊ ನಾಗ ಕುಮಾರ್ , ಕರ್ಣಾ ಲೆ ಯೆದ್ರಾಕ ಯೇವ್ನ್ ನಮಸ್ಕಾರ್ ಕೊರ್ನ್ ರಾಬ್ಲೊ . " ಕರ್ಣಾ .. ! ಹಾಂವ ತಕ್ಷಕ ಸರ್ಪ ರಾಯಾಲೆ ಪೂತು ಅಶ್ವಾಸೇನ . ಕೃಷ್ಣ ಅರ್ಜುನಾನಿ ಖಾಂಡವ ವನ ಅಗ್ನಿ ಕ ಆಹುತಿ ದಿಲ್ಲೆಲೆ ವಿಷಯು ತುಕ್ಕಾ ಗೊತ್ತಸ್ಸುಕಾ . ತ್ಯೆ ರಂನ್ನಾ೦ತು ರಬ್ಬುನ್ ಅಶಿಲೆ ಮಿಗೆಲೆ ಆನಮ್ಮಾ೦ಕ ಅಗ್ನಿ ಕ ಆಹುತಿ ದೀವ್ನ್ ... ಅರ್ಜುನಾನ ಆಮ್ಗೆಲೆ ಸಂಸಾರು ನಾಶ ಕೆಲ್ಲಾ . ಅರ್ಜುನು ತುಗೆಲೆ ಪ್ರತಿಸ್ಫರ್ಧಿ ಮೋಣು ಅಯಿಕುನ್ ತಗೆಲೆ ವೈರಿ ಪ್ರತಿಶೋಧ ಕೊರ್ಚ್ಯಾಕ ಹಾಂವ ಹಾಂಗಾ ಅಯಿಲಾ . ಹಾಂವ ನಾಗಾಸ್ತ್ರ ರೂಪ ಧಾರಣ ಕೋರ್ನ್ ತುಗ್ಗೆಲ್ ಬತ್ತಳಿಗೆ  ಭಿತರಿ ಬೊಸ್ತಾ . ಯುದ್ಧಾ೦ತು ಅರ್ಜುನಾ ವೈರಿ ಮಕ್ಕಾ  ಪ್ರಯೋಗ ಕೆಲ್ಲೇರಿ .. ಮಿಗೆಲಿ ಪ್ರತಿಜ್ಞಾ ಪೂರ್ತಿ ಝತ್ತಾ ... ತಶೀ೦ಚಿ ತುಗ್ಗೆಲ್ ಲಕ್ಷ್ಯ ಸಾಧನ ಝತ್ತಾ .. " ಮ್ಹಳ್ಳಲೊ ನಾಗ ಕುಮಾರ್  .  " ಅಶ್ವಸೇನಾ .. ! ತುಗೆಲಿ ಆಶಾ ಪೂರ್ತಿ ಕರ್ತಾ ಯೋ ... !ನಾಗಾಸ್ತ್ರ ಜಾವ್ನ್ ಮಿಗೆಲೆ ಸಹಾಯು ಕರಿ . " ಮ್ಹಳ್ಳಲೊ ಕರ್ಣ . ಅಶ್ವಸೇನ , ನಾಗಾಸ್ತ್ರ ಜಾವ್ನ್ .. ಅರ್ಜುನಾಲೆ ಬತ್ತಳಿಗೆ ಭಿತರಿ ಬೋಸ್ಲೊ                

                            ಯುದ್ಧ ರಂಗಾಂತು ಯೆವ್ಚೆ ಕರ್ಣಾಕ ಧುರ್ಯೋಧನು ಯೆದ್ರಾಕ ಯೇವ್ನ್ ಸ್ವಾಗತ ಕೆಲ್ಲೆ . " ಮಿತ್ರ ಕರ್ಣಾ .. ! ಮಾದ್ರ ದೇಶಾ ರಾಯು ಶಲ್ಯ ರಾಜಾ ನ ತುಗೆಲೆ ರಥ ಸಾರಥ್ಯ ಕೊರುಂಕ ಅಂಗೀಕಾರ ಕೆಲ್ಲಾ . ಶಲ್ಯ ಸಾರಥ್ಯಾ೦ತು , ತುಗೆಲೆ ವೀರ ವಿಕ್ರಮ ಯುದ್ಧ ಪೊಳೊಕಾ ಮೋಣು ಆಶಿ ಝಲ್ಲಾ " ಮ್ಹಳ್ಳಲೊ ಧುರ್ಯೋಧನು . " ಶಲ್ಯ ರಾಯು ಮಕ್ಕಾ ಸಾರಥಿ ಜಾವ್ನ್ ಮೆಳ್ಚ್ಯೇ ಮಿಗೆಲೆ ಅದೃಷ್ಟ . ಆಜಿ ಕುರು ಪಕ್ಶಾಕ ಜಯ ಸಿದ್ಧ .ಯುದ್ಧ ಫಲಿತಾಂಶ ಶೀಘ್ರ ಜಾವ್ನ್ ತುಕ್ಕಾ ಮೇಳ್ಚೆತಶಿ ವ್ಯವಸ್ಥ ಕರ್ತಾ ." ಮ್ಹಳ್ಳಲೊ ಕರ್ಣ .  " ಮಾಮಾ ...! ಶಲ್ಯ ರಾಜಾ ... ಮಿಗೆಲಿ ಆಶಾ ಮನಾ  ದೊವೋವೋರ್ನ್ ಘೆವ್ನ್ .. ಹ್ಯೇ ಕರ್ಣಾ ಲೆ ರಥ ಸಾರಥ್ಯ ಕೊರುಂಕ ಅಂಗೀಕಾರ ದಿಲ್ಲೆಲೆಕ ಹಾಂವ ತುಕ್ಕಾ ಚಿರ ಋಣಿ ಜಾವ್ನ್ ಅಸ್ಸ ಮಾಮಾ .. "  

ಶಲ್ಯ : " ಕರ್ಣಾ ... ! ಮಿಗೆಲೆ ಸಾರಥ್ಯ ಜ್ಞಾನ ದಕ್ಕೂಕಾ ಮ್ಹಳ್ಳೆಲಿ ಆಶೇ ನ ... ಹೇ ಕಾಮಾ ಕ ಅಂಗೀಕಾರ ಕೆಲ್ಲಾ . ಮಿಗೆಲಿ ನಿಭಂಧನಾ ತುಕ್ಕಾ ಆನ್ನೇಕ ಪೋಟಿ ಸಂಘುನ್ ಉಡ್ಘಾಸು ಕರ್ತಾ ಕರ್ಣಾ .. ! ಹಾಂವೆ ಸಾರಥ್ಯ್ ಮಾತ್ರ ಕೊರ್ಚೆ ... ಸಾರಥ್ಯ ಕರ್ತನಾ ... ಮಕ್ಕಾ ಕೀಳ ಜಾವ್ನು ಪೊಳೋಚ್ಯಾ ನಜ್ಜ . ಕಸಲೆಯ್ ಕಾಮ ಮಕ್ಕಾ ಸಂಘು ನಜ್ಜ . ಮಿಗೆಲೆ ಅಭಿಮಾನ ಭಂಗ ಜಾವ್ಚ್ಯೆ ತೂ೦ವೆ ಕಸಲೆಯ್ ವಿಷಯು ಸಾಂಗ್ಲೆರಿ ... ಹಾಂವ ಸಾರಥ್ಯ ಸೋಣು ಸೊಡ್ತಾ " ಮೋಣು ಶಲ್ಯಾ ನ ಖಡಾ- ಖ೦ಡಿತ ಜಾವ್ನು ಸಂಘಲೆ  . ಶಲ್ಯಾಲೆ ನಿಯಮಾ ಕ ಕರ್ಣಾ ನ ಅಂಗೀಕಾರ ದಿಲ್ಲೊ . ಶಲ್ಯ ಅನಿ ಕರ್ಣ , ರಥಾರಿ ಚಳ್ಳಿ೦ತಿ . ಶಲ್ಯಾ ಕ ರಥ ಸಾರಥಿ ಜಾವ್ನ್ ಸ್ವೀಕಾರ್ ಕೊರ್ನ್ ಕರ್ಣಾನ ಹೊಡಿ ಚೂಕಿ  ಕೆಲ್ಲಿ . ಪಾಂಡವಾಂಕ ಮಾವ್ಳೋ ಶಲ್ಯ ರಾಯು ... ನಕುಲ ಸಹದೇವಾ ಕ ದಿಲ್ಲೆಲೆ ವಚನ ಪ್ರಕಾರ .. ಕರ್ಣಾಕ ಅವಮಾನ ಕೋರ್ಚ್ಯಾ ಕ ಸಿಧ್ದ ಝಲ್ಲಾ  ಶಲ್ಯ .  " ಶಲ್ಯ ರಾಜಾ .. ತುಗೆಲೆ ಸಾರಥ್ಯಾ೦ತು ಅರ್ಜುನಾ ನ ಮಿಗೆಲೆ ಹತ್ತಾ೦ತು ಛಿಧ್ರ ಜಾವ್ಕಾ . ಮಿತ್ರ ಧುರ್ಯೋಧನಾ ಕ ಸಂತೋಷಾ ವಿಷಯು ವಗ್ಗಿ ಸಂಘುಕಾ " ಮ್ಹಳ್ಳಲೊ ಕರ್ಣ  .  

ಶಲ್ಯ :  " ಕರ್ಣಾ .. ! ಭೊಂಕ್ಚಯೆ ಸೂಣೆ ಕೆದನಾಯ್ ಚಬ್ಬ ನಾ ಮೋಣು  ಸಾಂಗ್ತಾತಿ . ಅರ್ಜುನ್ ಮ್ಹಳ್ಳೇರಿ ಸಾಮಾನ್ಯ ವೀರ ನಯ್ ... ಶಂಕರಾಕ ತಪಸ್ಯ ಕೊರ್ನ್ ಪ್ರಸಾದ ರೂಪಾರಿ ಮೆಳ್ಳೆಲೆ ಪಾಶುಪತಾಸ್ತ್ರ ತಾಗೆಲೆ  ಅಸ್ಸ . ದೊನ್ನಿ  ಹಾತ್ತಾನ ಬಾಣ ಸೊಡಚೆ ಪ್ರವೀಣ .. ಲಕ್ಷ್ಯ ಸಾಧನ ಕೊರ್ಚೆ ಸವ್ಯಸಾಚಿ .. !ತಗೆಲೇಗಿ ಮಸ್ತ ದಿವ್ಯಾಸ್ತ್ರ ಅಸ್ಸ . ಮಸ್ತ ಪ್ರತಿಭಾಶಾಲಿ . ತೂ .. ಪರಶುರಾಮ ಶಿಷ್ಯ ತುಗ್ಗೆಲ್ ಕಸಲೆ ದಿವ್ಯಾಸ್ತ್ರ ಅಸ್ಸ ... ? ತಾಜ್ಜೆ ವೈರಿ ಪರಶುರಾಮಾಲೆ ಶ್ರಾಪು  ತುಗ್ಗೆಲ್ ವೈರಿ ಅಸ್ಸ . ಜನ್ಮ ಸಿದ್ಧ ಜಾವ್ನ್ ಅಶಿಲೆ ಕವಚ ಕುಂಡಲ , ಕೆದನಾ ದೇವೇಂದ್ರಾ ಕ ದಾನ ದಿಲ್ಲೆ ಕೀ ... ತೆದ್ನಾ ದುಕೂನ್ ತೂ ... ನಿಸ್ತೇಜ ಝಲ್ಲಾ ಕರ್ಣಾ .. "  ಅಷ್ಶಿ ಲೋಪದೋಷ ದಕ್ಕೊನ್ ... ಕರ್ಣಾಲೆ  ಮನ ದುಕ್ಕಯಿಲೆ . ಶಲ್ಯಾ ಕ ದಿಲ್ಲೆಲೆ ಉತ್ತರ ಉಡ್ಘಾಸು ಯೇವ್ನ್ .. ಕರ್ಣಾ ನ ಕಸಲೆಯ್ ಜವಾಬ್ ದೀನಿ . 

                         ಯುದ್ಧ ಧಮಾಸಾನ್ ಶುರು ಝಲ್ಲೆ .. ಕರ್ಣಾ ಕ ದಿವಿಶಿ ಮಾರ್ಚೆ ತಾಂಯ್ಯ್ ಕವಚ ಸೊಡ್ವಾಯಿನಾ ಮೋಣು ಅರ್ಜುನಾ ನ ಕೆಲ್ಲೆಲಿ ಪ್ರತಿಜ್ಞಾ .. ಭೀಮ ಸೇನಾ ಕ ಕಳ್ಳೆ . ನಿರಂತರ ಜಾವ್ನ್ ಕುರು ಗಜಬಲ ,   ಸೈನ್ಯಾಕ ಧ್ವ೦ಸ ಕೊರುಂಕ ಶುರು ಕೆಲ್ಲೆ ಭೀಮ ಸೇನಾನ . ಆಡ ಆಯ್ಯಿಲೆ ಶಕುನಿಕ ಮತ್ತೇರಿ ಪ್ರಹಾರು ಕೊರ್ನ್ ಸೋಯ್ಯ್ ಚುಕ್ಚೆ ತಷ್ಶಿ ಕೆಲ್ಲೆ . ಧುರ್ಯೋಧನಾನ ತಗೆಲೆ ರಥಾರಿ ಯೇವ್ನ್ ಶಕುನಿ ಕ ರಥಾರಿ ನಿದ್ಕಾರಾನ್  ರಕ್ಷಣ ಕೆಲ್ಲಿ . ಅರ್ಜುನಾ ನ ಧುರ್ಯೋಧನಾಲೆ ಧಾಹ ಜನ ಭಂವ್ದಾಂಕ ದಿವಿಶಿ ಮಾರ್ಲೆ . ಹ್ಯೇ ಪೋಳಯಿಲ್ ಭೀಮ ಸೇನಾನ ಸಿಂಹ ನಾದ ಕೆಲ್ಲೆ . ಧುರ್ಯೋಧನಾ ನ ತಗೆಲೆ  ಭಂವ್ಡಾಲೆ ಮರಣ ದೊಳೇನ್ ಪೊಳಯಿಲೆ ..ಮನಾ ಉದಾಸಿ ಝಲ್ಲೋ .  ದುಃಶ್ಶಾಸನ ,  ತಾಗೆಲ್ ಗಧಾ ಘೇವ್ನ್ ಯುದ್ಧಾ ಕ ಅಯಿಲೊ . ಭೀಮ ಸೇನಾನ  " ಲೋ .. ! ಕುರುಡಾಲೆ ಸೂಣೆ ಯೋ .. ! " ಮೋಣು  ಸಂಘುನ್ ಗಧೆ ನ ಏಕ ಮಾರು ಮಾರ್ಲೊ ..." ತುಗೆಲ್ ಬಾಯ್ಲೆಲೆ ಮಾಂಗಲ್ಯ ಕುಡಿಕೆ ಜಾವ್ಚೆ ವೇಳು ಅಯಿಲಾ .. ಹ್ಯೇ  ಭೊಯಿಂಚೇರಿ ತುಗೆಲೆ  ಋಣ ಪಾವ್ಲೆ  ಮೋಣು ಲೇಕ .. ಯೋ .. " ಗಧೆ ನ ಆನ್ನೇಕ ಮಾರು ಮಾರ್ಲೊ . ದುಃಶ್ಯಾಸನಾ ನ ಪೆಟ್ಟಾಕ್ -ಪೆಟ್ಟು ವಾಪಾಸ್  ದಿಲ್ಲೊ ಭೀಮಾ ಕ . " ಲೋ ಭೀಮಾ ..! ವಿರಾಟ ರಾಯಾಲೆ ರಂನ್ಪೊ ಜಾವ್ನ್ ಕಾ೦ಮ ಕೊರ್ನ್ .. ಕೊಳಿವಿಂದ್ರಾ ಮ್ಹಣ್ಕೆ ಆಂಗ ವಡ್ಡಯಿಲಾ ತುಗೆಲೊ  ಸೊಕ್ಕು ದೇವಾಂಯಿತಾ " ಮ್ಹಳ್ಳಲೋ ದುಃಶ್ಶಾಸನು . ದೊಗ್ಗ ಜನಾ ಮಧ್ಯೆ ಧಮಾಸಾನ್ ಯುದ್ಧ ಝಲ್ಲೆ . ಯುದ್ಧಾ೦ತು  ರಥ ಸಾರಥಿ , ಘೋಡೆ ದೊಗ್ಗ  ಜನಾಲೆ ಮೆಲ್ಲೆ . ರಥಾರಿ ದುಕೂನ್ ದೊಗ್ಗ ಜನ ಸಕಲ ಉಡ್ಲೆ . ದೊಗ್ಗ೦ಯಿ ಗಧಾ ಯುದ್ಧ ಪ್ರವೀಣ . ಸರ್ವ ಶಕ್ತಿ ವೊಟ್ಟು  ಕೊರ್ನ್ , ಭೀಮಾಕ ಗಧಾ ಪ್ರಹಾರು ಕೆಲ್ಲೆ .. ಭೀಮಾನ ಗಧಾ ಘು೦ವ್ಡಾನ್ ದುಃಶ್ಯಾಸನಾಲೆ ಗಧಾ ಹತ್ತಾ  ದುಕೂನ್ ಚುಕ್ಕೋನ್ , ವೈರಿ ಉಬ್ಚೆ ತಶಿ ಮಾರ್ಲೆ . ಹತ್ತಾ  ದುಕೂನ್ ಗಧಾ ಸಕಲ ಪೊಳ್ಳೆಲೆ ಪೊಳೊನ್ ... ದುಃಶ್ಶಾಸನು ಪ್ರಾಣ ವಾಂಚೊನ್ ಘೆವ್ಚೆ ಖತಿರಿ ಧಾಂವ್ಚಾ ಗೆಲ್ಲೊ . ಭೀಮ ಸೇನಾನ , ತಾಗೆಲೆ ಮತ್ತೇ ಕೇಷ್ಟ ಧೋರ್ನ್ , ತಂಡೂನ್ ನೆಲಾರಿ ಘಲ್ಲೆ . ಮುಷ್ಠಿ ಧೋರ್ನ್ ಪೊಳ್ಳೆಲೆ  ಜಾಗೇರೀಚಿ  ಮಾರುಂಕ ಶುರು ಕೆಲ್ಲೆ . ರನ್ನಾ೦ತುಲೆ ವಾಗು ... ಚಿತ್ತಲಾಕ ಧೋರ್ನ ಬರ - ಬರನಿ  ತಂಡಿಲಾ ಮ್ಹಣ್ಕೆ ... ಮತ್ತೆ ಕೇಷ್ಠ ಧೋರ್ನ್ ತಂಡುನ್ ಚಿತ್ರ ಹಿಂಸಾ ದಿಲ್ಲೆ  ... " ದುಷ್ಟ ದುಃಶ್ಯಾಸನಾ ... ! ಮಾತೃ ಸಮಾನ ದ್ರೌಪದಿಕ , ಮಾಯಾ ದ್ಯುತಾ ವೆಳ್ಯೇರಿ ... ಭರ್ಲೆಲೆ ರಾಜ ಸಭೆ೦ತು .. ಮತ್ತೆ ಕೆಷ್ಟಾ ಧೋರ್ನ್ ನೆಲಾರಿ ಘಾಲ್ನ್ ಬರ- ಬರನಿ ತಂಡುನ್ ... ಅಪಮಾನ ಕೆಲ್ಲೆಲೆ ಉಡ್ಘಾಸು  ಅಸ್ಸ ಕೀ .. ? ಅಂಗಾರಿ  ನೆಶ್ಶಿಲೆ ಕಪ್ಪಡಾ ಸೆರಗ ಧೋರ್ನ್.. ವಸ್ತ್ರ ಹೀನ ಕೊರ್ಚ್ಯಾಕ ಪ್ರಯತ್ನ ಕೆಲ್ಲೆಲೆ ತುಗೆಲೆ ಹಾಥ ಅಸ್ಲೆರಿ ಕಿತ್ಯೆ ...! ನಾತ್ಲೆರಿ ಕಿತ್ಯೆ ...? ತ್ಯೆ ವೆಳ್ಯೇರಿ ಕೆಲ್ಲೆಲೆ ಪಾಪಾಕ ಅತ್ತ ಹಾಂವ ತುಕ್ಕಾ  ಶಿಕ್ಷ ದಿತ್ತಾ ... " ಮೋಣು  ಸಂಘುನ್ ಹತ್ತಾ  ರಟ್ಟೆ ಘು೦ವ್ಡಾಯಿಲೆ ... ಘು೦ವ್ಡಾಯಿಲೆ . ದುಕ್ಕೇನ ಸಹನಾ ಕೋರೂ ಜಾಯ್ನಾಶಿ ದುಃಶ್ಯಾಸನಾನ ಡುಕ್ರಾನ ಕಿರ್ಚಾಲೇ ಮ್ಹಣ್ಕೆ  ಕಿರ್ಚುನ್ ಬೋಬ್ ಮಾರ್ಲಿ ... ಯುದ್ಧ ಭೂಮಿಂತು ಅಯಿಕತಲೆ  ಕೋಣ ಅಸ್ಸ .. ! ಭೀಮಾಲೆ ವಿಕೃತ  ರೂಪ ... ದುಃಶ್ಯಾಸನಾಲೆ  ಭೀಭತ್ಸ ಅವಸ್ಥಾ ... ಕೋಣ ಪೊಳೈತಲೆ .. ? ಹತ್ತಾ ರಟ್ಟೆ ಭುಝಾರಿ ದುಕೂನ್ ನಿಸೋರ್ನ್ ಅಯಿಲೆ ... 

ಧ್ರತರಾಷ್ಟ್ರ:  "  ಅಯ್ಯಯ್ಯೋ .. ಅಯ್ಯೋ ಕಿತ್ಲೆ ದುಕ್ಲೆ  ಕೀ ... ಮಿಗೆಲೆ ಪುತ್ತಾಕ  ... ! ಸಂಜಯಾ ...  ಲಗ್ಗಿ ಕೌರವ ಸೈನ್ಯ ನಾತಿ  ವೇ ತ೦ಯ್ಯ್ .. ? ಕೊಣಯ್ ಯೇವ್ನ್ ರಕ್ಷಣ ಕರ್ನಿ ವೇ .. ? " ಧ್ರತರಾಷ್ಟ್ರಾ ನ ನಿಮ್ಗಿಲೆ ಸಂಜಯಾ ಲಗ್ಗಿ .  " ನಾ .. ಮಹಾರಾಜಾ ... ! ದಿಗ್ಭ್ರಾ೦ತ ಸೈನಿಕ ಧಾಂವ್ನ್ ಗೆಲ್ಲೆ  " ಮ್ಹಳ್ಳಲೊ ಸಂಜಯ .....  " ....  ಅಯ್ಯೋ .. ಹಾ ಹಾ ಹಾ .. ! " ಮೋಣು  ಕಿರಚುನ್ ಸ್ಮೃತಿ ಚುಕ್ಕುನ್ ದೋಳೆ  ಧಾಂಕ್ಲೆ  .. ಭೀಮಾನ ಮುಷ್ಠಿ ಬಾಂಧುನ್ ತೊಂಡಾರಿ ಮಾರ್ಲೆ ... ಹರ್ದೇರಿ  ಮಾರ್ಲೆ ದುಃಶ್ಯಾಸನಾನ ದೋಳೆ ಸೋಣಿ ... ದೊನ್ನಿ  ಪಾ೦ಯ ಧೋರ್ನ್ ಗಿರ - ಗಿರನಿ ಘು೦ವ್ಡಾನ್ ನೆಲಾರಿ ಮಾರ್ಲೆ . ರಕ್ತ ಬೊಂಬೊಳು ಝಲ್ಲೊ  ದುಃಶ್ಶಾಸನ . ಅಂಗಾ ಹಡ್ಡ೦ ಪುಡ್ಡಿ ಜಾವ್ನ್ .. ಭಾಯಿರಿ ಯೆತ್ತಾನಾ ದೂಕಿ ತಡ್ಸುನ್ ಘೆವ್ವು ಜಾಯ್ನಾಶಿ ರಾನ್ ಡುಕ್ರಾ ಮ್ಹಣ್ಕೆ ಬೋಬ್ಬ್ ಮಾರ್ಲಿ . ಭೀಮಾ ಕ ಅನಿಕಾಯ್ ತೃಪ್ತಿ ಜಾಯ್ನಿ ... ಮತ್ತೆ ಕೇಷ್ಟಾ ಧೋರ್ನ್ ಬರ್ - ಬರಿ ಯುದ್ಧ ಭೂಮಿ ದುಕೂನ್ ಭಾಯಿರಿ ತಂಡುನ್ ವೆಲ್ಲೆ  . ಏಕ್ ಫತ್ರಾ  ವೈರಿ ರುದ್ರ ನರಸಿಂಹ ಶೀ ಬೊಸ್ಲೊ . ದುಃಶ್ಯಾಸನಾ ಕ ಝಾ೦ಗೇರಿ ಆಡ  ಘಾಲ್ನ್ ಸಿಂಹ ಘರ್ಝನಾ ಕೆಲ್ಲಿ . " ಮಾರಿ ... ಮಾರಿ ತುಗ್ಗೆಲ್ ಮನ ಭರಿ .. ತೃಪ್ತಿ ಜವವೋ ತಾಯ್ ಬೋಬ ಮಾರಿ ...  ಕುರ್ಡೊ ತುಗ್ಗೆಲ್  ಬಪ್ಪುಸು ಆಯ್ಕವೋ .. ತುಗ್ಗೆಲ್ ಮರಣಾ ವಿಷಯು ದ್ರೌಪದಿಕ ಆಯ್ಕು೦ವೋ ... ತೆದೊಳ್ ತಾ೦ಯ ಬೋಬ ಮಾರಿ .   ಆಜೀಕ  ಸತ್ರಾ ದಿವಸ ..  ಪಾಂಚಾಲಿ ರಾಕ್ತಾ ಅಸ್ಸ ತುಗ್ಗೆಲ್ ಮರಣ ವಾರ್ತೇಕ .... ಹಾಂವ ತುಗೆಲೆ  ಖತಿರಿ ತೇರ ವರುಷ ದುಕುನ್ ಹೇ ಶುಭ ಘಡಿಕ ರಾಕ್ತಾ ಅಷ್ಶಿಲೊ   . ತ್ಯೆ ದಿವಸು.. ತುಗ್ಗೆಲ್ ಹಾಥ ಲಾಗ್ಗುನ್ ದ್ರೌಪದಿಲೆ  ನಿಸರ್ಲೆಲಿ ಕೇಶ ಝುಕ್ಕಾ  .. ಆಜಿಕ ತಾಂಯ್ಯ್ ಪಾಂಚಾಲಿ ನ ತಶೀನಂಚಿ ಸೊಳ್ಳಾ  ... ಅನಿಕಯ್ ಗಾಂಟಿ ಘಾಲ್ನ್ ಬಂಧಿನಿ . ತುಗ್ಗೆಲ್ ಹರ್ದೇ  ರಾಗತ ಪಾಂಚಾಲಿ ಕೇಸು ರಕ್ತಾ ಅಸ್ಸ . ಸುರ್ವೆಕ ತುಗ್ಗೆಲ್ ಹಾರ್ದೇ  ರಗತ ಪೀವನ್ ಮಿಗ್ಗೆಲೆ ಪ್ರತಿಜ್ಞಾ  ಪೂರ್ತಿ ಕರ್ತಾ ..."    ಅಶಿ ಉಲ್ಲಯಿತನಾ ಅಸ್ತನಾ , ಭೀಮ ಸೇನಾಲೆ  ಬೊಟ್ಟಂ ದುಃಶ್ಯಾಸನಾಲೆ  ಹರ್ದೇ  ಭಿತರಿ  ರಿಗ್ಲೆ . ಆಆಆ ... ಹೂ ಹೋ .... ಹೋ ಮೋಣು ಕಿರ್ಚಾತಾನಾ ಹರ್ದೆ  ಪಿಸೊಳ್ನ್  ಅಯಿಲೆ . ಹೂನ ರಗತ ಕಾರಂಜಿ ಶೇ ಭಾಯಿರಿ ಆಯಿಲೆ  . ತಕ - ತಕನಿ ಉಡಚೆ ಹೂನ ರಗತಾಕ ,   ಭೀಮ ಸೇನಾ ನ ಪೈಶಾಚಿಕ ರೂಪಾರಿ ಉಗ್ರ ರೂಪಾರಿ ವೊಂಟಾ ದೀವ್ನ್ ಪಿಲ್ಲೊ ... ರಗತ ಅಂಗಾ ಕ ತೊಂಡಾಕ ಲಾವ್ನ್ ಘೆತ್ಲೆ ... ದೊನ್ನಿ  ಹತ್ತಾನಿ  ರಗತ ಧೋರ್ನ್ " ಪಾಂಚಾಲಿ ... ಪಾಂಚಾಲಿ ಯೋ ....  ಪೊಳೆ ...  ದುಃಶ್ಯಾಸನಾಲೆ  ಹರ್ದೇ ರಗತ ಹಳ್ಳಾ  ಪೋಳೆ  ... ಸೊಳ್ಳೆಲೆ ತುಗ್ಗೆಲ್ ಕೇಶ ರಾಶಿ ಕ ರಗತ ಲಾವ್ನ್ ಮಿಗ್ಗೆಲೆ ಹತ್ತಾನಿ  ಕೇಶ ಝುಕ್ಕಾ ಬಂಧಿತಾ ..  ಯೋ ಪಾಂಚಾಲಿ .... ! " ಭೀಮ ಸೇನಾಲೆ  ಮೇಘ ಘರ್ಜನ್ ಅಯಿಕುನ್   ದ್ರೌಪದಿ  ಶಿಬಿರಾ ದುಕೂನ್ ಭಾಯಿರಿ ಆಯಿಲಿ . ಭೀಮಾಲೆ ಉತ್ತರಂ ಅಯಿಕುನ್ .. ತಗೆಲೆ ರುದ್ರ ರೂಪ ಪೊಳೊನ್ ... ದ್ರೌಪದಿಕ ಆನಂದ ಝಲ್ಲೆ ... ಸಂತೋಷು ಝಲ್ಲೆ .. ಮತ್ತೆ ಕೇಶು ಸ್ವಯಂ ಭೀಮಾ ಲೇ ಹತ್ತಾ೦ತು ದೀವ್ನ್ ಘೊವ್ನ್ ರಬಲಿ . ಕಸಲಿ ಏಕ ವಿಡಂಬನಾ ... ಕಿತ್ಲಿ ಕೀ ಪಂಕ್ತಾ ಭೀಮಾನಾ ಮತ್ತೆ ಕೇಶ ರಾಶಿಕ್ ಫುಲ್ಲಂ ಲಾಯಿತನಾ ಘೋವ್ ನ್ ರಬ್ಬಿಲಿ ಪಾಂಚಾಲಿ ಸಾಕ್ಷಾತ್ ಹೃದಯ ಲಕ್ಷ್ಮಿ ಜಾವ್ನ್ ದಿಸ್ಸಿಲಿ ಭೇಮಾ ಕ . ಆಜಿ ಪಾಂಚಾಲಿ ... ಕೈಲಾಸ ದುಕೂನ್ ದೆವ್ವಿಲಿ ದುರ್ಗಾ ಕೀ ... ಮಹಾಕಾಳಿ ಕೀ ..ಮಹಾಮಾಯಿ ಕೀ ... ಮಾರಿಯಮ್ಮ ಕೀ .. ಚ೦ಡಿನಿ ,ಮುಂಡಿನಿ , ಶಾಖಿಣಿ , ಸಿಂಹವಾಹಿನಿ , ಚಕ್ರಿಣಿ , ಭೈರವಿ , ಬ್ರ೦ಹ್ಮ್ಮವಿಷ್ಣು ಶಿವಾತ್ಮಿಕೆ , ಮಹಿಷಾಸುರ ಮರ್ದಿನಿ , ಭವಾನಿ , ಕಪಾಲಿ , ದುರ್ಗತಿ ನಾಶಿನಿ , ಅಘೋರ್ಯೆ , ತ್ರಯಂಬಿಕೆ , ನಾರಾಯಿಣಿಕೀ  ... !!! ಮತ್ತೆ ಕೇಸು ಕೋಪಾನ ಹಲ್ಲೋ ದೋಳೆ ತಾಂಬ್ಡೆ ಝಲ್ಲೆ ಭುಜ ಗಡ - ಗಡ ನಿ  ಹಲ್ಲೆ ... ಪಯ್ಯಾ ನುಪುರ  ಝಣ ಝಣ .. ಘಲ್ಲ ಹಲ್ಲೆ .  ಸಾಕ್ಷಾತ್ ದೇವಿ ಶೀ ದಿಸ್ಲಿ  ಭೀಮಾ ಕ . ಪ್ರೀತ್ಯೇನ ಹಾತ್ತಾ೦ತು ಅಶಿಲೆ ದುಃಶ್ಯಾಸನಾ ರಗತ ಲಾಯಿಲೆ . " ಶಾಂತ ಝಾ .. ಶಾಂತ ಝಾ ಪಾಂಚಾಲಿ ... ಝಲ್ಲೆಲೆ  ಅಪಮಾನಾ ಕ ಪ್ರಾಯಶ್ಚಿತ್ತ ಝಲ್ಲೆ ... ತೇರ ವರುಷಾ  ತುಗೆಲೆ  ಮನಾ ಸಂಕಟ ... ಅಜ್ಜಿ ಶಾಂತ ಜವ್ವೋ . ರಗತ ಪ್ರೀತ್ಯೇನನ ಕೇಶ ರಾಶಿಕ  ಲಾವ್ನ್ ಕೇಶ ವೊಟ್ಟು  ಕೊರ್ನ್ ಝುಕ್ಕ ಬಂಧಿಲೆ . ದ್ರೌಪದಿ  ಶಾಂತ ಝಲ್ಲಿ ... ಭೀಮ ಸೇನಾ ಕ ಫೊಟೊನ್ ಧರ್ಲೆ .. ಸಂತೃಪ್ತಿ ಮನಾ ಆಲಿಂಗನ ಕೊರ್ನ್ ಭೀಮಾ ಕ ಮರ್ಯಾದಿ ಕೆಲ್ಲಿ .    " ಮಿಗೆ ಲೆ ಮನಾ ಯೇಕು ಕಾ೦ಟೊ ನಿವಾರಣ ಝಲ್ಲೊ .. ಅನ್ನೇಕು  ಕಾಂಟೊ ಅಸ್ಸ" ಭೀಮಾ ಲೇ ಕನ್ನಾ೦ತು ಹಳೂ  ಸಾಂಗ್ಲೆ . "ಆಜಿ ಫಲ್ಲೆ  ಭಿತರಿ ತೊವಾಯಿ ಕಾಂಟೊ ಕಾಣು ಉಡಯಿತಾ" ಮ್ಹಳ್ಳಲೊ  ಭೀಮು . ಪಾಂಚಾಲಿ ಮನ ಹೃದಯ ಬೋರ್ನ್ , ಸಂತೃಪ್ತಿ ಜಾವ್ನ್ ಹಾಸ್ಲಿ  . ಕಾಲು ...  ದ್ರೌಪದಿ ಲೆ ಹಾಸು ಪೊಳೊನ್ ಚಕಿತ ಪಾವ್ಲ್ಲೆ  

ಉಮಾಪತಿ 

                

MAHABHARATH Part - 60 KARNA SAARATHY ( konkani Bhashentu )

MAHABHARATH  Part - 60   ( konkani Bhashentu )

                                        

      KARNA  SARATHYA   / ಕರ್ಣ ಸಾರಥ್ಯ

                        ಆಜಿ ಸೊಳಾ ದಿವಸಾ ಯುದ್ಧ ... ಕರ್ಣಾ ನ ' ಮಕರ ವ್ಯೂಹ ' ರಚನ ಕೆಲ್ಲಾ . ಪಾಂಡವಾನಿ ...' ಅರ್ಧ ಚಂದ್ರ ವ್ಯೂಹ ' ರಚನ ಕೆಲ್ಲಿ .ಯುದ್ಧ ಆರಂಭ ಝಲ್ಲೆ . ಅರ್ಜುನಾನ ...  ಧುರ್ಯೋಧನ , ಶಿಖಂಡಿ , ಕೃಪಾಚಾರ್ಯಾಕ  ಮುಕಾರಿ ಯೇನಾಶಿ ಯುದ್ಧ ರಂಗಾಂತು ಏಕ ಬದಿನ ರಾಬ್ಬ್ಚೆ  ತಶಿ ಕೆಲ್ಲೆ . ಸಾತ್ಯಕಿ ಅನಿ ಭೀಮಸೇನ ಕರ್ಣಾ ಲೆ ವೊಟ್ಟು ಯುದ್ಧ ಆರಂಭ ಕೆಲ್ಲೆ . ಕರ್ಣಾ ನ , ನಾಕುಲಾಕ ಪೋಳಯಿಲೆ . ನಾಕುಲಾಲೆ ದೊಳೆ೦ತ್ ಅಶಿಲೆ ಆಕ್ರೋಶ ಪೋಳಯಿಲೆ . ದೊಗ್ಗ ಜನಾಮಧ್ಯೆ ಧಮಾಸಾನ್ ಯುದ್ಧ ಝಲ್ಲೆ . ಕರ್ಣಾ ನ ನಕುಲಾಲೆ ರಥಾಶ್ವ , ಸಾರಥಿಕ ದಿವಿಶಿ ಮಾರ್ಲೆ . ಕರ್ಣಾಲೆ ದಿವ್ಯಾಸ್ತ್ರಾಕ ರಥ ಚೂರು ಚೂರು ಜಾವ್ನ್ ನೆಲಾರಿ ಪೊಳ್ಳೋ . ನಾಕುಲಾನ ಭೀನಾಶಿ ಕರ್ಣಾಕ ಬಾಣ ಮಾರ್ನ್ ಘಾಯು ಕೆಲ್ಲೊ . "ಹ್ಯೇ ಮಾದ್ರೇಯಾ .. ! ಯುದ್ಧ ಮ್ಹಳ್ಳೇರಿ ವಿರಾಟ ರಾಯಾಲೆ ಘೋಡೆ ರಾಕ್ಚ್ಯೆ ಕಾಮ ಮೋಣು ಲೆಕ್ಲಾವೆ .. ? ಹತ್ತಾ೦ತು ಶಕ್ತಿ ಅಸ್ಸ ಮೋಣು ಕೋಣ ಮೋಣು ಪೊಳೈನಾಶಿ ಯುದ್ಧ ಕೊರ್ಚೆ ವೇ .. ?ತುಗ್ಗೆಲ್ ಸಮಾನ ಅಶಿಲೆಲೆ  ವೊಟ್ಟು ಯುದ್ಧ ಕರಿ . ತೂ ಮಿಗೆಲೆ ಪೊಷಿ ಪ್ರಾಯೇನ ಸಾನು .. ವಸ .. ಮಿಗೆಲೆ ಎದ್ರಾ ದುಕುನ್ ವಸ ."  ಕರ್ಣಾನ ಕುಂತಿಕ ದಿಲ್ಲೆಲೆ ಆಣ ಭಾಷೇ ಪ್ರಕಾರ .... ಭೀಮ ನಕುಲ ಸಹದೇವಾ ಕ ಸೋಣು ರಥ ಆನ್ನೇಕ ಬದಿನ ವೆಲ್ಲೆ . 

                      ಕೃಪಾಚಾರ್ಯ ಅನಿ ದ್ರಷ್ಟದ್ಯುಮ್ನ ಮಧ್ಯೆ ಯುದ್ಧ ಆರಂಭ ಝಲ್ಲೆ  " ಲೋ .. ದ್ರಷ್ಟದ್ಯುಮ್ನ .. ! ಯೋಗ ಸಮಾಧಿ೦ತು ಅಶಿಲೆ ಆಚಾರ್ಯಾ ಕ ಮತ್ತೆ ಕತ್ತೊರ್ನ್ ಘಲ್ಲೆ ನವೇ .. ? ತುಕ್ಕಾ ಸೋಣಾ .. " ಮೋಣು ಸಂಘುನ್ ಬಾಣ ಮಾರ್ನ್ ದ್ರಷ್ಟದ್ಯುಮ್ನ ಕ ಅಂಗಾ ಭರಿ  ಘಾಯು ಕೆಲ್ಲೊ . ಕೃಪಾಚಾರ್ಯಾಲೆ ಬಾಣಾಕ ಭೀವ್ನ್ ... ದೃಷ್ಟದ್ಯುಮ್ನ ಭೀಮ ಸೇನಾ ನ ಅಷ್ಶಿಲೆ ಜಾಗೇಕ ಧಾಂವ್ಲೊ . ಕಸಲೇ ಮ್ಹಳ್ಳಾರಿ ಕೃಪಾಚಾರ್ಯು ಚಿರಂಜೀವಿ . ಅಸ್ತ್ರ ಶಸ್ತ್ರಾ ನಿಮಿತ್ಯ ಕೃಪಾಚಾರ್ಯಾಕ ಮರಣ ನಾ . ಭೀಮಾ ಲೆ ಗದಾ  ಪ್ರಹಾರಕ ... ನಾರಾಯಣ ಸೈನ್ಯ , ಲಕ್ಷ ಲೋಕಾನಿ ಜೀವು ಸೊಳ್ಳೋ . ಧಾರ್ಮರಾಯು ಅರ್ಜುನಾ ದಿಕಾನ ವೊಚ್ಚುನ್ " ಅರ್ಜುನಾ .. ! ಕರ್ಣಾಕ ಪೋಳಯಿಲಾ ವೇ .. ? ಸಾಕ್ಷಾತ್ ಸೂರ್ಯ ದೇವಾ ಮ್ಹಣ್ಕೆ ದಿಸ್ತಾ  ಅಯಿಚೆ .. ಹ್ಯೇ  ಯುದ್ಧಾ ಕ ಕಾರಣ ತ್ಯೋಚಿ ... ತೂ ಕಿತ್ಲೆ ವಗ್ಗಿ ತಗೆಲೆ ಸಂಹಾರು ಕರ್ತಾ ಕೀ ... ತಿತ್ತಲೆ  ವಗ್ಗಿ ಅಂಮ್ಕಾ ಸರ್ವಾಂಕ ಚಾಂಗ . ಹಗೆಲೆ ಮರಣಾ ನಂತರ ಕುರುಕ್ಷೇತ್ರ ಯುದ್ಧ ರಾಬ್ತಾ .. " ಮ್ಹಳ್ಳಲೊ . ಸಾತ್ಯಕಿ , ಕುರು ವೀರ ಲೋಕಾಲೆ ವೊಟ್ಟು , ಚೇದಿ ರಾಜ್ಯಾ ಸೈನ್ಯಾ ವೊಟ್ಟು , ದ್ರಷ್ಟದ್ಯುಮ್ನ, ದ್ರೌಪದಿಲೆ ಭಂವಢ ... ಚೋಳ , ಮಗಧ , ವಂಗ ರಾಜ್ಯಸೈನ್ಯಾ  ವೊಟ್ಟು ಯುದ್ಧ್ ಆರಂಭ ಕೆಲ್ಲೆ . ಕುಲೂತ ರಾಯು ಕ್ಷೇಮಧೂರ್ತಿ , ಗಜ ಬಲ ಘೇವ್ನ ... ಭೀಮ ಸೇನಾಕ ಸುತ್ತು ಘಾಲ್ನ್ ಯುದ್ಧ ಆರಂಭ ಕೆಲ್ಲೆ . ಭೀಮಸೇನಾನ ಹಸ್ತಿ೦ಗೆಲೆ ವೊಟ್ಟು  ಯುದ್ಧ ಕರ್ತಾಚಿ ಕ್ಷೇಮಧೂರ್ತಿಕ ತಗೆಲೆ ಗದಾ ಯುದ್ಧ ನೈಪುಣ್ಯ ದಕ್ಕಯಿಲೆ . ಹಸ್ತೇ ದಾಂತ ಮೊಳ್ಳೆ .. ಸೋಂಡಾಳಿ ಧೋರ್ನ್ , ಹಸ್ತಿಯಾಂಕ ಉಬ್ಬಾರ್ನ್ ಘು೦ವ್ಡಾನ್ , ನೆಲಾರಿ ಘಾಲ್ನ್ ದಿವಿಶಿ ಮಾರ್ಲೆ . ಹಸ್ತೇ ಕುಂಭ ಜಾಗೇರಿ ಗದಾ ಪ್ರಾಹರು ಕೊರ್ನ್ ..  ರಬ್ಬಿಲೆ  ಕಡೇನಚಿ ಪ್ರಾಣ ಕಳ್ಳೆ . ಶಂಬರಿ ಹಸ್ತೇ ಭುಜಬಲ ಭೀಮಸೇನಾಕ ಆಸ್ಸ . ಆಂಜನೇಯಾ ಆಶೀರ್ವಾದ ನಿಮಿತ್ಯ ಭುಜ ಬಲ ಭೀಮ ಸೇನಾಕ ಲೆಕ್ಕಿಲೆ  ತೆದ್ನಾ ವೃದ್ಧಿಝಲ್ಲೆ . ಎಕ್ಲೆನಚಿ .. ಹಸ್ತೇ ಹೀ೦ಡು ನಾಶ ಕೆಲ್ಲೆ . ಭೀಮಾಲೆ ಗಜ ಯುದ್ಧ ಪೊಳೊನ್ ಕುರು ಪಾಂಡವ ಸೈನ್ಯ ಸ್ತಬ್ಧ ಝಲ್ಲೆ .. ಆಶ್ಚರ್ಯ ಪಾವ್ಲ್ಲೆ . ಕ್ಷೇಮಧೂರ್ತಿನ ಬೊಶಿಲೆ ಹಸ್ತೇ ಸೊಂಡಿಲ ಧೋರ್ನ್ ಗಿರ್  - ಗಿರಾನಿ  ಘು೦ವ್ಡಾನ್ ನೆಲಾಕ ಮಾರ್ಲೆ . ಹಸ್ತೇ ಫಾಟೀರಿ ದುಕೂನ್ ಸಕಲ ಪೊಳ್ಳೋ ಕ್ಷೇಮಧೂರ್ತಿ . ಅವಮಾನ ತಡ್ಸೂನ್ ಘೆವ್ಚ್ಯಾ ಜಾಯ್ನಾಶಿ .. ಕ್ಷೇಮಧೂರ್ತಿ , ಭೀಮಾ ವೈರಿ ಗದಾ ಪ್ರಹಾರು ಕೆಲ್ಲೆ . ಭೀಮ ಸೇನಾನ ತಾಗೆ ಲ್ ಮತ್ತೆ ಕೆಷ್ಟ ಧೋರ್ನ್ ಉಬ್ಬಾರ್ನ್ ನೆಲಾಕಮಾರ್ನ್ .. ಸಿಂಹ ಘರ್ಜನ ಕೆಲ್ಲಿ . ಹ್ಯೇ ಸುದ್ದಿ ಮೆಳ್ಳೆ  ಸತಾನ ... ಕರ್ಣಾನ , ಪಾಂಡವ ಗಜ ಸೈನ್ಯಾಕ ಚಿತ್ರ ವಿಚಿತ್ರ ಜಾವ್ನ್ ಬಾಣ ಮಾರ್ನ್ ಸಂಹಾರು ಕೆಲ್ಲೆ . ವಿಂದ ಅನಿ ಅನುವಿಂದ , ಸಾತ್ಯಕಿ ಲೆ ವೊಟ್ಟು ಯುದ್ಧ ಕರ್ತಾಚಿ ಜೀವು ಸೊಳ್ಳೆ . ಪ್ರತಿ ವಿಂದ್ಯಾನ  , ಚಿತ್ರಸೇನಾಕ ದಿವಿಶಿ ಮಾರ್ಲೆ . ದ್ರೌಪದಿಲೆ ಭಾ೦ವ್ಡಾನಿ ಸನ್ನ-ಸನ್ನ ರಾಜ್ಯಾ ರಾಯಾಂಕ ದಿವಿಶಿ ಮಾರ್ಲೆ . ಅಶ್ವಥಾಮ ಆನಿ ಭೀಮ ಸೇನಾ ಮಧ್ಯೆ ಧಮಾಸಾನ್ ಯುಧ್ಧ  ಝಲ್ಲೆ . ಹಾಂಗೆಲೆ ಮಧ್ಯೆ ಕೋಣ ಊಣೆ .. ಕೋಣ ಚಡ ಮೋಣು ಕಳ್ನಿ . ಧರ್ಮರಾಯು ಆನಿ ಧುರ್ಯೋಧನಾ ಮಧ್ಯೆ ಧ್ವ೦ಧ್ವ ಯುದ್ಧ ಝಲ್ಲೆ .. ಕರ್ಣ ಅರ್ಜುನಮಧ್ಯೇ ಧ್ವ೦ದ್ವ ಯುದ್ಧ ಝಲ್ಲೆ . ಅಗ್ನಿ ಪರ್ವತಾ ಮ್ಹಣಕೆ ಕೋಪಾಗ್ನಿ ಉಕ್ಕುನ್ ಯೇವ್ನ್ ಕಂದರಾ ದಿಕಾನ ಧ೦ವ್ಲೆ ಮ್ಹಣ್ಕೆ .. ದೊಗ್ಗಾನಿ ಯೀ ಎಕ್ಲೆ ವೈರಿ ಎಕ್ಲೊ ಬಾಣ ಸೋಣು ಯುದ್ಧ ಕೆಲ್ಲೆ ಅಸ್ತ್ರಾಕ  ಪ್ರತಿ ಅಸ್ತ್ರ , ಬಾಣಾ ಕ .. ಪ್ರತಿ ಬಾಣ ,  ಪೆಟ್ಟಾಕ ಪ್ರತಿ ಪೆಟ್ಟು ಘಾಲ್ತಾಚಿ ಅರ್ಜುನಾ ಕ ಪುರ್ ಪುರೊ ಕೆಲ್ಲೆ . ಕರ್ಣಾನ ಯುದ್ಧ ಕೊರ್ಚೆ ನಮುನೊ ಪೊಳೊನ್ ಕೃಷ್ಣಾ ಕ ಸಂಕಟ ಝಲ್ಲೆ . ಕೃಷ್ಣಾ ಲೆ  ಸಾರಥ್ಯಾರಿ ಅಷ್ಶಿಲೆ ಅರ್ಜುನಾ ಲೆ ರಥು ... ಕ್ರಮಾರಿ ಏಕ್ - ಏಕ ಬಾಣಾಕ ಮಾಕ್ಷಿ ಸೊರ್ಚೆ ತಶಿ ಕೆಲ್ಲೆ . " ಪೊಳಯಿಲೆ ವೇ ... ಪಾರ್ಥಾ .. ! ಭೀಷ್ಮಾಲೆ ವೊಟ್ಟು , ದ್ರೋಣಾಚಾರ್ಯಾ ಲೆ ವೊಟ್ಟು ಯುದ್ಧ ಕೊರ್ಚೆ ಏಕ  ನಮುನೊ ... ಹೇ ಕರ್ಣಾಲೆ ವೊಟ್ಟು  ಯುದ್ಧ ಕೊರ್ಚೆ ಆನ್ನೇಕ ನಮುನೊ ... ಹಗೆ ಕಾರಾ ಪೊಷಿ ಚಡ .. ನಮುನೆರಿ ಯುದ್ಧ ಕರ್ತಾ ಅಸ್ಸ ! " ಮ್ಹಳ್ಳಲೊ ಕೃಷ್ಣು . ಸೂರ್ಯಾಸ್ತ ಜಾಯ್ತ್ ಅಯಿಲೆ . ಯುದ್ಧ ನಿಯಮಾ ಪ್ರಕಾರ ಶಂಖ ತುತ್ತೂರಿ ವಜ್ಜುನ್ ವಿರಾಮ  ಘೋಷಣ ಕೆಲ್ಲಿ ..  ಯುದ್ಧ ರಾಬಲೆ . 

                        ತ್ಯೆ ರಾತ್ರೀ ..ಧುರ್ಯೋಧನ , ದುಃಶ್ಶಾಸನ , ಶಕುನಿ .. ಕರ್ಣಾಲೆ ಶಿಬಿರಾಕ ಅಯಿಲೆ . ಶಕುನಿ ನ .. ಕರ್ಣ , ಕಸಲ್ಕಿ ಚಿಂತನ ಕರ್ತಾ ಅಶಿಲೆ ... ದೋಳೆ ನ ಸನ್ನಿಯೆರಿ ಧುರ್ಯೋಧನಾಕ ದಕ್ಕಯಿಲೆ .. " ಮಿತ್ರ ಕರ್ಣಾ ..!ಕಸಲ್ಕಿ ಚಿಂತಾ ಕರ್ತಾ ಅಸ್ಸ ಮೋಣು  ದಿಸ್ತಾ .. ಕಸಲೆ ಖತಿರಿ   ಚಿಂತಾ ಕರ್ತಾ ..? " ನಿ೦ಮ್ಗಿಲೆ ಧುರ್ಯೋಧನಾನ . " ಆಜಿ ಜಲ್ಲೆಲೆ ಯುದ್ಧ ಮಕ್ಕ ಸಮಾಧಾನ ಜಾಯ್ನಿ . ಮ್ಹಳ್ಳಲೊ ಕರ್ಣ .... " ಕೋಣೆ ತಷ್ಶಿ ಸಂಘಲೇ .. ? ಇತ್ಲೆ ದಿವಸು  ... ಸೋಳಹ ದಿವಸು ಝಲ್ಲೆಲೆ ಯುದ್ಧಾ೦ತು .. ಅಜ್ಜಿ ಮಕ್ಕಾ ಝಲ್ಲೆಲೆ ಯುದ್ಧಾ೦ತು ಮಸ್ತ ಸಂತೋಷು ಝಲ್ಲಾ .. ಸಮಾಧಾನ ಝಲ್ಲಾ . ಪಾಂಡವ ಗಜ ಸೈನ್ಯ ಆಜಿ ನಾಶ ಝಲ್ಲೆ . ತುಗೆಲೆ ಎಕ್ಲೆಲೆ ಹತ್ತಾ೦ತು ಪಾಂಡವಾಲೆ ಏಕ ಅಕ್ಷೋಹಿಣಿ ಸೈನ್ಯ ಮತ್ತಿಯೆಂತ್  ಮೇಳ್ನ್ ಗೆಲ್ಲಾ ... ತುಗೆಲೆ ಯುದ್ಧ ಕೌಶಲ್ಯಾಕ ಕೃಷ್ಣಾರ್ಜುನಾಂಕ ದಿಗ್ಭ್ರಮ ಝತ್ತ ಅಶಿಲೆ ಖಂಯ್ ... ! " ಮ್ಹಳ್ಳಲೊ ಧುರ್ಯೋಧನ . " ಧುರ್ಯೋಧನಾ ..! ಅರ್ಜುನ್ ಮಿಗೆಲೆ ಪೊಷಿ ದೈಹಿಕ ಜಾವ್ನ್ ಶಕ್ತಿ ವಂತು ನಯ್ ... ಬಾಣ ಪ್ರಯೋಗಾಂತು ಮಕ್ಕಾ ಮೀರ್ವುನ್ ವೊಚ್ಛೆ ನೈಪುಣ್ಯ ನಾ ತಾಕ್ಕಾ . ತಗೆಲೆಗಿ ಗಾಂಡೀವ ಅಸ್ಸ ಝಲ್ಲೇರಿ .. ಮಿಗೆಲೆಗಿ ವಿಜಯ ಧನುಷ್ಯ ಅಸ್ಸ . ತ್ಯೋ ದ್ರೋಣ ಶಿಷ್ಯ ಝಲ್ಲೆರಿ .. ಹಾಂವ ಪರಶುರಾಮ ಶಿಷ್ಯ . ತಾಕ್ಕಾ ಗೊತ್ತಶಿಲೆ ಸರ್ವ ದಿವ್ಯಾಸ್ತ್ರ ಜ್ಞಾನ ಮಕ್ಕಾ ಅಸ್ಸ , ಅರ್ಜುನಾಲೆ  ಶಕ್ತಿ ಯುಕ್ತಿ ಮಿಗೆಲೆ ಅಸ್ತ್ರಾ ಎದುರ ನಿಷ್ಪ್ರಯೋಜನ ಝತ್ತ ಪೊಳೆ ... ಝಲ್ಲೆರಿ ಏಕ ವಿಷಯಾನ ಮಿಗೆಲೆ ಶಕ್ತಿ ನಿಷ್ಫಲ ಝತ್ತಾ .. ! " ಮ್ಹಳ್ಳಲೊ ಕರ್ಣ .  " ಕಸಲೆ ವಿಷಯು ತ್ಯೆ ಮಿತ್ರಾ .. ? " ನಿ೦ಮ್ಗಿಲೆ ಧುರ್ಯೋಧನಾನ .  " ಸಾರಥ್ಯ ವಿಷಯಾನ ಧುರ್ಯೋಧನಾ ... ! ಅರ್ಜುನಾಲೆ  ಯುದ್ಧ ರಹಸ್ಯ ... ಕೃಷ್ಣಾಲೆ  ಸಾರಥ್ಯ ನಿಮಿತ್ಯ ಅರ್ಜುನ್ ಸಫಲ ಝತ್ತಾ ಅಸ್ಸ .. ! ಮಕ್ಕಾಯಿ ... ಕೃಷ್ಣಾ ಮ್ಹಣ್ಕೆ  ಚುರುಕು ಸಾರಥಿ ಜಾವ್ಕಾ .. ತ್ಯೆ ಅತ್ತ  ಕಷಿ ಸಾಧ್ಯ ಝತ್ತಾ ... ? " ಮ್ಹಳ್ಳಲೊ ಕರ್ಣ " ಹೋ ಇತ್ಲೆಂಚಿ ವೇ ... ! ? ಲಾಯೆಕ್ ಚುರುಕು ಸಾರಥಿ ..  ಅಶ್ವ ಹೃದಯ  ವಿದ್ಯಾ ಗೊತ್ತಶಿಲೋ ... ತಾಣೆ  ಅಂಗೀಕಾರ ದಿಲ್ಲೇರಿ .. ಕರ್ಣಾಲೆ ಮನಾ ಅಶಿಲೋ ಸಾರಥಿ ಮೆಳ್ತಾ ನವೇ .. ? " ಮ್ಹಳ್ಳಲೊ  ಶಕುನಿ . ಹಕ್ಕಾ ಶಲ್ಯ ಮಹಾರಾಜ ಅಂಗೀಕಾರ ದೀಶಿ ನಾ ... " ಮ್ಹಳ್ಳಲೊ ದುಃಶ್ಶಾಸನ . " ಕಸಾಲೆಕ ಆಂಗೀಕಾರ ಕರ್ನಾ .. ? ಅಂಗೀಕಾರ ದಿವ್ಚ್ಯೇ ತಶಿ ಅಮ್ಮಿ ಕೋರ್ಕಾ ... ಧುರ್ಯೋಧನಾ .. ! ತಕ್ಕಾ ಹೋಗಳ್ಸುನು , ಗಳೊ ಭರಿ  ಪಿವ್ವೊನ್ ಅಂಗೀಕಾರ ದಿವ್ಚೆ ತಶಿ ಕೋರ್ಯಾ .. ! " ಮ್ಹಳ್ಳಲೊ ಶಕುನಿ . " ಶಕುನಿ ಮಾಮಾ ... ಅಮ್ಮಿ , ಶಲ್ಯ ರಾಯಲೆ  ಶಿಬಿರಾ ಕ  ವೊಚ್ಚಾ ... ಕರ್ಣಾ .. ! ತು ಕಾಯ್ ಯೆಚ್ಚನ ಕಾಣುಕ್ಕಾ " ಮ್ಹಳ್ಳಲೊ ಧುರ್ಯೋಧನು . ಪ್ರತ್ಯೇಕ ಶಿಬಿರ ತಯ್ಯಾರ್ ಕೊರ್ನ್ ... ದುಃಶ್ಶಾಸನಾಕ .. ಶಲ್ಯ ರಾಯಾಲೆ ಗುಡಾರಾ ಕ ಆಪ್ಪೋನ್  ಹಾಡುಂಕ ಪೆಟಯಿಲೊ . ವಿಷಯು ಆಯ್ಕುನ್ ಶಲ್ಯ ರಾಯಾಕ ಸಂತೋಷು ಝಲ್ಲೊ . " ಧುರ್ಯೋಧನಾ .. ಕರ್ಣ ಕಸಲೇಕ ಏನಿ  ಹಂಗಾ ... ? "  ಶಕುನಿ : " ಕಸಾಲೆ ಸಾಂಘಚೇ ... ಶಲ್ಯ ರಾಜಾ .. ! ಕರ್ಣ ಮಹಾ ಚಿಂತೆಂತು ಪೊಳ್ಳಾ  ... ಕೃಷ್ಣಾ ಮ್ಹಣ್ಕೆ ಅಶ್ವ ವಿದ್ಯೆ ಗೊತ್ತಶಿಲೋ ಕೊಣಾಯಿ ನಾತಿ  ಖೈ೦ ... ! ಕೃಷ್ಣಾ ಮ್ಹಣ್ಕೆ ಸಾರಥ್ಯ ಕರ್ತಾಲೊ ದರ್ಲೊ ಮನುಷ್ಯು ಭರತ ಖಂಢಾ೦ತು ನಾ ಖೈ೦ .. ! " ಶಲ್ಯ : " ಕೊಣೆ  ತಷಿ ಸಂಘಿಲೆ ... ?" 

 ಶಕುನಿ : ಅನಿ ಕೊಣೆ  ಸಂಘಚೆ ... ? ಭೀಮ ಸೇನಾನ ಸಂಘಿಲ್ ಖೈ೦ " 

ಕೃತವರ್ಮ : ಕಿತ್ಲೆ ಸೊಕ್ಕು ತಕ್ಕಾ ಭೀಮಾ ಕ .. ! ಅಶ್ವ ವಿದ್ಯೆಂತು ಶಲ್ಯ ರಾಯಾಲೆ ತಿತ್ಲೆ ನಿಪುಣ ತೀನಿ ಲೋಕಾಂತು ನಾತಿ  ಮೋಣು ಮಿಗೆಲೆ ಅಭಿಪ್ರಾಯು ... ಕಿತ್ತೆ  ಸಾಂಗ್ತಾ ಧುರ್ಯೋಧನಾ .. ? " 

ಶಕುನಿ : " ಸತ್ಯ ಸಂಘಲೇ ಕೃತವರ್ಮಾ ... ! ಅಮ್ಗೆಲೆ ಶಲ್ಯ ಮಹಾರಾಯು ಅಶ್ವ ವಿದ್ಯೆಂತು ಪಂಡಿತ ..  ಕೊಣೆ  ಸಂಘಿಲೇ ತ್ಯೇ ... ಕೃಷ್ಣು , ಶಲ್ಯ ಮಹಾರಾಜಾ ಪೊಶಿ ಹೋಡು ವಿದ್ವಾನ್ ಮೊಣು .. ? ಭೀಮ ಸೇನಾ ಕ ಕಸಲೆ ಗೊತ್ತಸ್ಸ ... ? ಶಲ್ಯಾ ಕ ಕೋಪು ಯೆವಚೆ ತಶಿ ಕೆಲ್ಲೆ "

ಶಲ್ಯ : " ಹಾಂವ ಪಾಂಡವ ಪಕ್ಶಾಕ ಯೆನಾಶಿ .. ಧುರ್ಯೋಧನ ಪಕ್ಶಾಕ ಅಯಿಲಾ ಮೋಣು ಕೋಪು ಅಸ್ತಲೊ ಭೀಮಾಕ  . ತಾಕ್ಕಾ ಪೋಟ  ಭೋರ್ಚೆ ಮಾತ್ರ ಗೊತ್ತಸ್ಸ ... ತಕ್ಕಾ ಮಿಗೆಲೆ ಅಶ್ವ ಶಾಸ್ತ್ರ ಜ್ಞಾನ ವಿಷಯು ಕಸಲೆಯ್ ಗೊತ್ತನಾ . " ಶಕುನಿ ನ , ತಗೆಲೆ ಲೋಟೆ೦ತು ಮಧ್ಯ ಪಾನ ರಕಯಿಲೆ .. ಶಲ್ಯಾ ನ ಸಂತೋಷಾರಿ ಲೋಟೊ ಉಬ್ಬಾರ್ಲೊ ...

ಶಕುನಿ : " ಕಸಲೆಯ್ ಜವ್ವೋ .. ತುಗೆಲೆ ಸಾರಥ್ಯ ಶಕ್ತಿ ವಿಷ್ಯಾನ ತಷ್ಶಿ ಉಲ್ಲೊಚಾ ನಜ್ಜ ಅಶಿಲೆ ... ಕೃಷ್ಣಾ ಕ ಆನಿ  ಪಾಂಡವಾಂಕ ತುಗೆಲೆ ಅಶ್ವ ನಿಪುಣತಾ ದಕ್ಕೊಕಾ ಜಲ್ಲೇರಿ ಏಕ ಪೋಟಿ ರಥ ಸಾರಥ್ಯ ಕೋರ್ಕಾ ... ಶಲ್ಯ ರಾಜಾ .. ! " 

ಧುರ್ಯೋಧನ : " ಶಲ್ಯ ಮಾಮಾ .. ! ತುಗೆಲೆ  ಅಂಗೀಕಾರ ಅಸ್ಸ ಮೋಣು  ಝಲ್ಲೇರಿ ... ಹಾಂವ ಏಕ ವಿಷಯು ಸಂಘತಾ .. ದಯಾ ದೊವೊರ್ನ್ ಕೊಪ್ಪು ನಜ್ಜ .. "

ಶಲ್ಯ : " ನಿಂಮ್ಗೀ .. ಧುರ್ಯೋಧನಾ .. ತುಗೆಲೆ ವಿಷಯಾಂತು  ಹಾಂವ ಕೆದನಾಯ್ ಕೊಪ್ಪನಾ . ತೂ೦ವೆ ಇತ್ಲೆ ಮರ್ಯಾದಿ ಕೊರ್ನ್ ಸಾಂಗ್ತಾನಾ ಹಾಂವ ಅಯಿಕನಾಶಿ ವತ್ತ ವೇ .. ? " 

ಧುರ್ಯೋಧನ : " ಮಾಮಾ .. ! ತುಗೆಲೆ ಸಾರಥ್ಯ ಕೊರ್ಚೆ ಏಕ ಪೋಟಿ ಪೊಳೊಕಾ ಮೋಣು ಆಶಿ ಝಲ್ಲಾ ... ಫಲ್ಲೇ , ಯುದ್ಧ ರಂಗಾಂತು ಮಿಗೆಲೆ ಮಿತೃ ಕರ್ಣಾಕ ಸಾರಥ್ಯ ಕೋರ್ಕಾ .. " 

ಶಲ್ಯ : " ಧಿಕ್ ..! ಕಸಲೇ .. ? ತ್ಯೆ ಸೂತ ಕುಲ ..  ಕರ್ಣಾಕ ಸಾರಥ್ಯ .. ! ಸುಕ್ಷತ್ರಿಯ ಜಾವ್ನ್ ಅಷ್ಶಿಲೆ ಹಾಂವ .. ತಕ್ಕ ಸಾರಥ್ಯ ಕೋರ್ಕಾ ವೇ .. ? ಥೂ .. ಥೂ . ! ಹಜ್ಜೆ ಪೋಷಿ ನೀಚ ಕಾಮ ಕಸಲೆ ಅಸ್ಸ .. ? ಹಜ್ಜೆ ಪೋಷಿ ಅವಮಾನಾ ಕಾರ್ಯ ಕಸಲೆ ಅಸ್ಸ .. ಧುರ್ಯೋಧನಾ .. ? " 

ದುರ್ಯೋಧನ : " ಕರ್ಣ ಮೀಗೆಲೆ ಆತ್ಮೀಯ ಮಿತ್ರ ನ೦ಯ್ವೇ ... ಮಾಮಾ .. ! "

ಶಲ್ಯ : ತ್ಯೋ ಆತ್ಮೀಯ ಅಸ್ಸೋ ... ಮಿತ್ರ ಅಸ್ಸೋ ... ಸೂತ ಕುಲಾಚೊ ಕೆದನಾಯ್ ಸೂತು ಚಿ ... ಯುದ್ಧ ರಂಗಾಂತು ಕೆದನಾಯ್ ಸೂತ  ಕ್ಷತ್ರಿಯ ಜಾಯ್ನಾ ಧುರ್ಯೋಧನಾ ... " 

ಧುರ್ಯೋಧನ : "  ಮಾಮಾ .. ! ಹಾಂವ ಮಸ್ತ ಆತ್ಮಾಭಿಮಾನಿ ಗೊತ್ತಸ್ಸ ನವೇ ತುಕ್ಕಾ ... ? ಹಾಂವ ಕೊಣಾ ಲಗ್ಗಿ ಕಸಲೆಯ್ ನಿ೦ಮ್ಗೀನಾ ... ದೇಹೀ ... ಮೋಣು  ಭಿಕ್ಷಾ ಮಗ್ಗನಾ . ನಿ೦ಮ್ಗುನ್ ಬಾಧ ಪಾವನಾ . ಆಮ್ಗೆಲೆ ಪಕ್ಷಾಂತು ಭೀಷ್ಮ ದ್ರೋಣ ನಂತರ ತೂ೦ಚಿ ಅಂಮ್ಕಾ  ಮಲಘಡೊ . ತುಗೆಲೇ   ಪೊಷಿ ಚಡ ಮಾಕ್ಕಾ ಪ್ರೀತಿ ಕರ್ತಲೊ ...  ಅನಿ ಕೋಣ ಅಸ್ಸ .. ಮಾಮಾ .. ? ತುಗೆಲೆ ಭಯಿಣಿಲೆ ಚೆರ್ಡು೦ವ ನಕುಲ , ಸಹದೇವಾ ಪೋಷಿ ಚಡ ಅಭಿಮಾನ ದೊವೊರ್ನ್ .. ಮಿಗೆಲೆ ಪಕ್ಷಾಂತು ರಬ್ಬುನ್ ಯುದ್ಧ ಕರ್ತಲೊ ... ತುಕ್ಕಾ  ಮಿಗೆಲೆ ವೈರಿ ಅಷ್ಶಿಲೆ ಪ್ರೀತಿ ಕಿತ್ಲೆ ಮೋಣು  ಕಷ್ಶಿ ಸಂಗ್ಚೆ .. ! ತುಗೆಲೆ ಪೊಷಿ ಹೊಡ್ದ೦ ಮಕ್ಕಾ ಆನಿ ಕೊಣಯ್ ನಾತಿ  ಮಾಮಾ . ಕೃಷ್ಣಾ ಕ ಪ್ರತ್ಯಾರ್ಥಿ ಜಾವ್ನ್ .. ತೂ೦ವೆ ಸಾರಥ್ಯ ಕೊರ್ಚೆ ಪೊಳೊಕಾ ಮ್ಹಳ್ಳೆಲೆ ಆಶೇ ನ ನಿ೦ಮ್ಗಿಲೆ . ಮೀಗೆಲೆ ವೈರಿ ಅಭಿಮಾನ ಅಸ್ಲೇರಿ ಕರಿ .... ನಾತ್ಲೆರಿ ಕೋರ್ನುಕ್ಕಾ . ! ತುಂವೇ ಕರ್ನಾ ಮ್ಹಳ್ಳೇರಿ ... ಹಾಂವ ದುಃಖ ಪಾವನಾ ಮಾಮಾ ... " ಮ್ಹಳ್ಳಲೊ ಧುರ್ಯೋಧನು . ದೋನಿ ಮಿನುಟ ದೊಗ್ಗಯಿ ಮೌನ ಝಲ್ಲಿ೦ತಿ .

ಶಲ್ಯ : " ಧುರ್ಯೋಧನಾ .. ! ತುಗೆಲೆ ಖತಿರಿ ...  ತುಗೆಲೆ ಪ್ರೀತಿ ಖತಿರಿ ... ಮಿಗೆಲೆ ಆತ್ಮಾಭಿಮಾನ ಸೋಣು ... ತುಗೆಲೆ ಇಚ್ಛೆ ಪ್ರಕಾರ ... ಹಾಂವ ಕರ್ಣಾಕ ಸಾರಥ್ಯ ಕರ್ತಾ .. " ಸರ್ವಾನಿ ಸಂತೋಷಾರಿ ಕರ ತಾಡನ ಕೆಲ್ಲೆ . ಧುರ್ಯೋಧನಾ ನ ಯೇವ್ನ್ ಶಲ್ಯ ರಾಯಾಕ ಪೋಟೋನ್ ಧರ್ಲೆ . ಧುರ್ಯೋಧನಾ ಕ ಸಂತೋಷು ಝಲ್ಲೋ ಮೋಣು ... ಶಲ್ಯಾ ಕ ಸಂತೋಷು ಝಲ್ಲೊ  .

ಶಲ್ಯ : " ಹಾಂವ ರಥ ಸಾರಥಿ ಜಾವ್ನ್ ಅಸ್ಸ ಮೋಣು .. ಕೊಣಯ್ ಉಣೆ ಪಣ್ ದಕ್ಕೊನ್ ಅವಮರ್ಯಾದಿ ಕೋರು ನಜ್ಜ . ತಶಿ ಏಕತ್ ವೆಳೇರಿ ಕೊಣಯ್ ಅವಮಾನ ಕೆಲ್ಲೆ ಮೋಣು  ಝಲ್ಲೇರಿ ... ತತ್ಕಾಲ ಯುದ್ಧ ರಂಗಾಂತು  ಚಿ ಸಾರಥ್ಯ ಸೋಣು  ವತ್ತಾ . ರಥ ಸಾರಥ್ಯ ಸೋಣು ಆನಿ ಕಸಲೆಯ್ ಸಹಾಯು ಅಪೇಕ್ಷ ಕೋರುನಜ್ಜ " ಧುರ್ಯೋಧನಾನ ...  ಶಲ್ಯಾನ  ಘಲ್ಲೆಲೆ ನಿರ್ಬಂಧನ ಅಂಗೀಕಾರ ಕೆಲ್ಲೆ .

                   ಶಲ್ಯಾನ ಕರ್ಣಾಲೆ  ರಥ ಸಾರಥ್ಯ ಕೊರುಂಕ ಅಂಗೀಕಾರಾ ಕೆಲ್ಲ ಮ್ಹಳ್ಳೆಲೆ ವಿಚಾರು ಪಾಂಡವ ಶಿಬಿರಾ ಕ ಸುದ್ದಿ ಪಾವ್ಲಿ . ಶ್ರೀ ಕೃಷ್ಣಾ ನ , ತುರಂತ ನಕುಲ ಸಹದೇವಾ ಕ ಅಪ್ಪೋನ್ ... ಶಲ್ಯಾಲೆ ಸಹಾಯು ನಿಂಮ್ಗುಕಾ ಮೋಣು ಶಲ್ಯ ರಾಯಾಲೆ ಶಿಬಿರಾ ಕ ಪೆಟಯಿಲೆ . ನಕುಲ ಸಹದೇವಾ ಕ ಆತ್ಮೀಯ ಜಾವ್ನ್ ಸ್ವಾಗತ ಕೊರ್ನ್ ತಂಗೆಲಗ್ಗಿ ಶಲ್ಯ ಚಂದ ಕೊರ್ನ್ ಉಲ್ಲಯಿಲೊ . ಕರ್ಣಾಲೆ ರಥ ಸಾರಥ್ಯಾ  ವಿಷಯಾನ ನಿ೦ಮ್ಗೀತನಾ .. ಶಲ್ಯಾನ  " ವಯ್ .. ! ಹಾಂವ ದಿಲ್ಲೆ ಲೆ ಉತ್ತರ ಚುಕ್ಕನಾ .. " ಮ್ಹಳ್ಳಲೊ . " ಕೌರವ ಪಕ್ಷಾಂತು ಅಸ್ಲೆರಿಯ್ ಹಾಂವ ವೇಳು  ಆಯ್ಯಿಲೆ ತೆದನಾ ಸಹಾಯು ಕರ್ತಾ " ಫುಳ್ಳೆ ಪಂಕ್ತಾ ಸಂಘಿಲ್ ಉತ್ತರಂ ಉದ್ಘಾಸು ಅಯಿಲೊ  . " ಹಾಂವ ಕರ್ಣಾಕ ಸಾರಥಿ  ಜಾವ್ನ್  ಅಸ್ತನಾಚಿ .. ತಗೆಲೆ ಮನ ದುಕ್ಕೊನ್ ... ಅವಮಾನ ಕೊರ್ನ್ .. ಅರ್ಧ ಮೊರ್ಚ್ಯೇ ತಶಿ ಕರ್ತಾ ... ಅರ್ಧ ಪ್ರಾಣ ಅರ್ಜುನ್ ಕಾಡೊ .. " ಮ್ಹಳ್ಳಲೋ ಶಲ್ಯ ರಾಯು . ಶಲ್ಯ ಮಾಮಾ ಕ ನಮನ ಕೊರ್ನ್ , ನಕುಲ ಸಹದೇವ ಪಾಂಡವ ಶಿಬಿರಾ ಕ ಯೇವ್ನ್ ಪಾವ್ಲೀ೦ತಿ 

ಉಮಾಪತಿ