MAHABHARATH Part - 56 ( Konkani Bhashentu ) Saindhava Vadhaa

MAHABHARATH    Part - 56    ( Konkani Bhashentu )

                          SAINDHAVA VADHAA       ಸೈ೦ಧವ  ವಧ 

                        ಮಹಾಭಾರತ ಯುದ್ಧ ಆರಂಭ ಜಾವ್ನ್ ಆಜೀಕ್ 14 ದಿವಸ ಜಲ್ಲೆ . ದ್ರೋಣಾಚಾರ್ಯಾಲೆ ಸೇನಾಧಿಪತ್ಯ ಆಜಿ ಚಾರಿಚೆ  ದಿವಸ ... ಸೈ೦ಧವಾಕ ರಕ್ಷಣೆ ದಿವ್ಚ್ಯಾಕ ದ್ರೋಣಾಚಾರ್ಯಾನ " ವ್ಯೂಹ ತ್ರಯ ವ್ಯೂಹ " ರಚನಾ ಕೆಲ್ಲಾ . ಹ್ಯೇ ವ್ಯೂಹ ಅತಿ ಭಧ್ರ ವ್ಯೂಹ ; ಆನಿ ತೀನಿ ಹ೦ತಾರಿ ರಚನಾ ಕೆಲ್ಲೆಲಿ ವ್ಯೂಹ .. ಶಕಟ ವ್ಯೂಹ ,ಪದ್ಮ ವ್ಯೂಹ , ಪದ್ಮ ವ್ಯೂಹಾ ಭಿತರಿ ... ಶುಚೀ ವ್ಯೂಹ . ಭಿತರಿ ಯೆವ್ಕಾ ಝಲ್ಲೇರಿ ತೀನಿ ವ್ಯೂಹ ಛೇಧ  ಕೊರ್ನ್ ಯೆವ್ಕಾ . ಸಾನ್ ಸುಮಾರಾಕ ಕೊಣಾಚ್ಯಾನಯಿ ಛೇಧ ಕೋರೂ  ಜಾಯ್ನಾ . ಸೈ೦ಧವಾ ಕ ರಕ್ಷಣಾ ದಿವ್ಚೆ ಖತಿರಿ , ದ್ರೋಣಾಚಾರ್ಯನ ಹೀ ವ್ಯೂಹ ರಚನಾ ಕೆಲ್ಲಾ .' ಸೈ೦ಧವ ' ಮೋಣು  ಅಪ್ಪೊಚೆ ... ಜಯದೃಥ ಆಜಿ ವ್ಯೂಹತ್ರಯ ವ್ಯೂಹಾ ಮಧ್ಯೆ ಅಸ್ಸ . ಕಶೀ ಪುಣಿ ಆಜಿ ಏಕ ದಿವಸಾ ಕ ಸೈ೦ಧವಾಕ ವಂಚಯ್ಲ್ಯಾರಿ ... ಅರ್ಜುನಾಲೆ ಪ್ರತಿಜ್ಞಾ ಭ೦ಗ್ ಝತ್ತಾ ... ಅನಿ ಅರ್ಜುನ್ ಅಗ್ನಿ ಪ್ರವೇಶ ಕೊರ್ನ್ ಆತ್ಮಾಹುತಿ ಕೋರ್ನ್ ಘೆತ್ತಾ . ಅರ್ಜುನಾಲೆ ಪ್ರತಿಜ್ಞಾ ಭಂಗ್ ಕೊರ್ಚೆ ಕೌರವಾ೦ಗೆಲೆ ಲಕ್ಷ್ಯ .. ಆಜಿ . ದ್ರೋಣಾಚಾರ್ಯಾ ನ ಏಕ ಕವಚ ಮಂತ್ರ ಘಾಲ್ನ್ ಧುರ್ಯೋಧನಾ ಕ ದಿಲ್ಲೆ " ಧುರ್ಯೋಧನಾ .. ! ಹ್ಯೇ ಕವಚ ಧಾರಣ ಕೆಲ್ಲೇರಿ ತುಕ್ಕಾ ಮರಣ ಲಗ್ಗಿ ಯೇನಾ ... ಕಾಯೀ ಭೀವ್ನುಕ್ಕಾ . " ಮೋಣು ಧೈರ್ಯ ದಿಲ್ಲೆ . " ಗುರು ದೇವಾ .. ! ಆಜಿ ಹಾಂವ ಅರ್ಜುನಾ ಕ ದಿವಿಶಿ ಮಾರ್ತಾ " ಮೋಣು ಖುಷಿ ಪಾವ್ನ್ ಧುರ್ಯೋಧನಾನ  ಸಂಘಲೆ . 

                            ಹ್ಯೇತಾಂತು  ಪಾಂಡವ ಪಕ್ಷಾಂತು ದ್ರಷ್ಟದ್ಯುಮ್ನ ನ ಪ್ರತೀ ಎಕ್ಲೆ ಸೈನಿಕಾಕ ಪ್ರೋತ್ಸಾಹ ಕೆಲ್ಲೊ . " ಅಜಿ ಅಂಮ್ಕಾ ಸ್ರೇಷ್ಠ ದಿವಸು ... ತುಮ್ಮಿ ಕೊಣಯ್ ಭೀವ್ಕಾ ಮೋಣು ನಾ ... ಕೊಣಯ್ ಸ್ಥೈರ್ಯ ಕಾಣ್ ಘೇವ್ನುಕ್ಕಾತಿ . ತುಮ್ಗೆಲೆ ರಕ್ಷಣೆ ಕ ಅಮ್ಮಿ ಆಸ್ಸತಿ . ಆಮ್ಗೆಲ್ ಧ್ಯೇಯ ಎಕ್ಕಚಿ . ವಾಂಚುನ್ ಅಸ್ಲೆರಿ .. ರಾಜ್ಯ ಸುಖ ; ನಾತ್ಲೆರಿ ಸ್ವರ್ಘ ಸುಖ . ತುಮ್ಗೆಲೆ ಧೈರ್ಯ ಸಾಹಸ ಆಮ್ಗೆಲೆ ರಕ್ಷೆ  . ತುಮ್ಗೆಲೆ ಸಾಮರ್ಥ್ಯ ಆಮ್ಗೆಲೆ ಶ್ರೀರಕ್ಷೆ ... " ಮೋಣು ಸಾಂಗ್ತಾಚಿ ಸೈನಿಕಾಂಕ ಉತ್ಸಾಹ ಭರ್ಲೊ . ಹನುಮ ಧ್ವಜ ದಿವ್ಯ ರಥಾರಿ ಉಬ್ಬೊನ್ , ದೇವದತ್ತ ಶಂಖ ಪೂಂಕಾರ ಕೊರ್ನ್ ... ಕೃಷ್ಣಾ ಲೆ ಸಾರಥ್ಯಾರಿ ಅರ್ಜುನ್ ಕುರುಕ್ಷೇತ್ರಾಕ ಆಯಿಲೊ . ದ್ರಷ್ಟದ್ಯುಮ್ನ , ಅರ್ಜುನಾಲೆ ಮಾಕ್ಷೀಚ್ಯಿ ಅಂಗ ರಕ್ಷೆಕ ಸೈನಿಕಾಂಕ ಘೆವ್ನ್ ಅಯಿಲೊ . ಯುದ್ಧ ಆರಂಭ ಝಲ್ಲೆ . ಸೈ೦ಧವಾ ಕ ಸುಚೀ ವ್ಯೂಹಾ ಮಧ್ಯೆ ರಬ್ಬಯಿಲಾ ... ದ್ರೋಣಾಚಾರ್ಯ , .... ತೀನಿ ವ್ಯೂಹಾ ದ್ವಾರಾರಿ ಖುದ್ಧ ಜಾವ್ನ್ ರಾಬ್ಬಲಾ . ವ್ಯೂಹಾ ಲಗ್ಗಿ ವೊಚ್ಚನಾಶಿ .. ಧುರ್ಯೋಧನಾಲೆ ಭಾವು ಧುರ್ಮರ್ಷಣಾ ನ ಅರ್ಜುನಾಕ ಮಧ್ಯೆ ವಾಟ್ಟೇರಿ ರಬ್ಬಯಿಲೆ . ಎಕ್ಕಾ ಬಾಣಾನ ಧುರ್ಮರ್ಷಣಾಲೆ ರುಂಡ ಕತ್ತರ್ಲೆ ಅರ್ಜುನಾ ನ . ಕೃಷ್ಣಾ ನ ರಥು ದ್ರೋಣಾಚಾರ್ಯಾ ಲೆ ಎದ್ರಾಕ ಹಾಣು ರಬ್ಬಾಯಿಲೆ . ರಥಾರಿ ದುಕೂನ್ , ಅರ್ಜುನಾ ನ ಗುರು ದ್ರೋಣಾಚಾರ್ಯಕ  ದೊನ್ನಿ  ಹಾತ್ತಾನ ಭಕ್ತಿ ಪೂರ್ವಕ ವಂದನಾ ಕೆಲ್ಲಿ . " ಗುರು ವರ್ಯಾ ... ! ತುಮ್ಮಿ ಮಿಗೆಲೆ ಪಿತಾ ಸಮಾನ ... ತುಮ್ಗೆಲೆ ,  ಯುದ್ಧ ಕೊರ್ನ್ ವ್ಯೂಹಾ  ಭಿತರಿ ವೋಚ್ಚಾಕ ಮನ ನಾ . ಆಜಿ , ಮಕ್ಕಾ  ತುಮ್ಗೆಲೆ ಆಶೀರ್ವಾದ ಜಾಯಿ . ಅಜಿ ಮಿಗೆಲೆ ಪ್ರತಿಜ್ಞಾ ಸಾಕಾರ ಜಾವ್ಚೆ ತಶಿ ಅಶೀರ್ವಾದು ಕಾರ್ಯಾತಿ . " ಮ್ಹಳ್ಳಲೋ ಅರ್ಜುನು  . " ಅರ್ಜುನಾ .. ! ವ್ಯೂಹ ತ್ರಯಾಕ ಹಾಂವ ಪ್ರಧಾನ ರಕ್ಷಕು .ಮಿಗ್ಗೆಲೆ ವೈರಿ ಜಯ ಪ್ರಾಪ್ತ ಕೆಲ್ಲೆ ನಂತರ ... ತುಕ್ಕಾ ವ್ಯೂಹ ಪ್ರವೇಶು ಕೊರುಂ ಝತ್ತಾ . 'ಮ್ಹಳ್ಳಲೋ ದ್ರೋಣಾಚಾರ್ಯು . " ಗುರುದೇವಾ .. ! ಸರ್ವಾಸ್ತ್ರ ವಿಶಾರದು ... ತುಮ್ಗೆಲೆ ಹತ್ತಾ೦ತು ಧನುರ್ ಬಾಣ ಅಸ್ತಾನಾ .. ತುಮ್ಗೆಲೆ ವೈರಿ ಜಯ ಸಾಧನ  ಕೋರೂ೦ ... ಕೊಣಾಚ್ಯಾನ  ಸಾಧ್ಯ ನಾ ... ದಯಾ ದೊವೊರ್ನ್ ... ಮಕ್ಕಾ ವ್ಯೂಹ  ಪ್ರವೇ ಶ  ಕೊರುಂಕ ವಾಟ  ಸೋಡ್ಕಾ . " ಮ್ಹಳ್ಳಲೋ ಅರ್ಜುನ್ . ಇತ್ಲೆ ಸಂಗ್ಚೆ ಭಿತರಿ ... ಕೃಷ್ಣಾ ನ ರಥು , ವಾಯು ವೇಗಾರಿ ವ್ಯೂಹ ಭಿತರಿ ಪಾವೈಲೋ . ದ್ರೋಣ .. ಕಾಯ್ ಕೋರು ಜಾಯ್ನಾಶಿ ನುತ ರಬ್ಬಲೊ . ಶಕಟ ವ್ಯೂಹ ಛೇಧ ಕೊರ್ನ್ ... ಪದ್ಮ ವ್ಯೂಹಾ ಬಾಗ್ಲಾ ಆಯ್ಯಿಲೆ ಅರ್ಜುನಾಕ , ದುಃಶ್ಯಾಸನಾನ ರಬ್ಬಯಿಲೊ . ಕೃತವರ್ಮ , ದುಃಶ್ಯಾಸನಾ ಕ ಸಹಾಯು ಕೊರುಂಕ ಅಯಿಲೊ . ಅರ್ಜುನಾಲೆ ಬಾಣ ಪಾವ್ಸು ಪೊಳೊನ್ ಧಾವ್ನ್ ಗೆಲ್ಲೆ . ವರುಣಾಲೆ ಪೂತು ಶ್ರತಾಯುಧ ... ಅರ್ಜುನಾಲೆ  ವೊಟ್ಟು ಯುದ್ಧ ಕೊರುಂಕ ಅಯಿಲೊ . ಅರ್ಜುನಾ ನ ದಿವ್ಯಾಸ್ತ್ರ ಬಾಣ ಮಾರ್ನ್ ಶ್ರಾತಾಯುಧಾಲೆ ರಥು ಘೋಡೆ ನಾಶ ಕೆಲ್ಲೆ .  ವರುಣಾಲೆ ಮಂತ್ರ ಜಪ ಕೊರ್ನ್ ದಿವ್ಯ ಶಕ್ತಿ ಅಶಿಲೆ ಗಧಾ  ಘೇವ್ನ್ , ಮಂತ್ರ ಘಾಲ್ನ್ ಅರ್ಜುನಾಲೆ  ರಥಾ ಕ ಮಾರ್ಲೆ . ರಥಾರಿ ಬೊಶಿಲೆ ಕೃಷ್ಣಾ ಕ ಲಗ್ಗನಾಶಿ ರಥಾ ನೊಗಾ ಕ ಲಾಗ್ಲೆ ; ಅನಿ ವಾಪಾಸ್ ವೊಚ್ಚುನ್ ಶ್ರತಾಯುಧಾಲೆ ಮತ್ತೇ ಕ ಲಾಗ್ಲೆ . ಏಕ ನಿಮಿಷ ಭಿತರಿ ಶ್ರತಾಯುಧಾಲೆ  ಪ್ರಾಣ ಪಕ್ಷಿ ಉಬ್ಬುನ್ ಗೆಲ್ಲಿ . ತಗೆಲೆ ಪುತ್ರ ನಿಯತಾಯು , ದೀರ್ಘಾಯು , ಅರ್ಜುನಾಲೆ ಬಾಣಾ ಕ ಆಹುತಿ ಝಲ್ಲೆ . ಅಂಗ ,ವಂಗ , ಆಂಧ್ರ , ಕಳಿಂಗ , ಕರ್ನಾಟಕ , ತುಳು ಸೈನ್ಯ ಅರ್ಜುನಾಲೆ  ಬಾಣಾ ಕ ಹಜಾರ ಹಜಾರ ಲೆಕ್ಕಾನ ಜೀವು ಸೊಳ್ಳೋ . ಅರ್ಜುನಾ ಲೇ ಬಾಣ ಏಕ ಅಷ್ಶಿಲೋ ಧಾಹ ... ಧಾಹ ಅಷ್ಶಿಲೋ ಹಜಾರ ಬಾಣ ಜಾವ್ನ್ ವೃದ್ಧಿ ಜಾವ್ನ್ ಮಕ್ಷಿ - ಮಕ್ಷಿ ಮಂತ್ರ ಶಕ್ತಿ ನ ಉದ್ಭವ ಜಾವ್ನ್ ಕೌರವ ಸೈನ್ಯ ಧ್ವ೦ಮ್ಸ ಝಲ್ಲೆ . ವ್ಯೂಹ ಭಿತರಿ ಸುಲಭೆರಿ ಆಯ್ಯಿಲೆ  ಅರ್ಜುನಾಲೆ  ವೊಟ್ಟುಯುದ್ಧ ಕೊರುಂಕ ಸ್ವತಹಾ ಧುರ್ಯೋಧನ ರಾಬ್ಲೊ . ದ್ರೋಣಾಚಾರ್ಯನ ದಿಲ್ಲೆಲೆ ಮಂತ್ರ ಕವಚಾ ಯೆದ್ರಾಕ , ಅರ್ಜುನಾಲೆ  ಬಾಣ ನಿಷ್ಪ್ರಯೋಜನ ಝಲ್ಲೆ . ಅರ್ಜುನಾಲೆ  ದಿವ್ಯಾಸ್ತ್ರಕ ಧುರ್ಯೋಧನಾಲೆ ರಥು ಪುಡ್ಡಿ ಚೂರು ಝಲ್ಲೆ . ಕುರು ರಾಯು ಅರ್ಜುನಾಲೆ ವೊಟ್ಟು ಯುದ್ಧ ಕೊರ್ಚೆ ಪೊಳೊನ್ ... ಕರ್ಣ , ಕೃಪಾಚಾರ್ಯ , ವೃಷಾಲ , ಶಲ , ಕೃತವರ್ಮಾ,  ಅಶ್ವಥಾಮ , ಶಲ್ಯ ಭೂರಿಶ್ರವಾಹ , ಧುರ್ಯೋಧನಾ ಲೆ ಸಹಾಯಾ ಕ ಅಯಿಲೆ . ಹ್ಯೇ ಆಟ ಜನಾ ಲೇ ವೊತ್ತು ಯುದ್ಧ ಕರ್ತಾಚ್ಯಿ ... ಅರ್ಜುನ್ ಸುಚೀ ವ್ಯೂಹಾ ಲಗ್ಗಿ ಯೇವ್ನ್ ಪಾವ್ಲೋ . ಕೃಷ್ಣಾ ನ ಪಾಂಚಜನ್ಯ ಶಂಖು ಪುಂಖಾರು ಕೆಲ್ಲೊ . ಅರ್ಜುನಾ ಕ ಕೃಷ್ಣಾ ನ ಕೆಲ್ಲೆಲೆ ಪ್ರೋತ್ಸಾಹ ಕಳಿತಾ ಅಯಿಲೆ . ಧರ್ಮಜಾ ನ ಸಾತ್ಯಕಿ ಕ ಅಪ್ಪೋನ್ ಅರ್ಜುನಾಲೆ ಸಹಾಯಾಕ ಪೆಟಯಿಲೆ . ಸಾತ್ಯಕಿ ... ವ್ಯೂಹಾ ಭಾಯಿರಿ ರಬ್ಬಿಲೇ ದ್ರೋಣಾಚಾರ್ಯಕ ನಮನ ಕೊರ್ನ್ .. " ಆಚಾರ್ಯಾ ..! ಮಕ್ಕಾ ವ್ಯೂಹ ಭಿತರಿ ವೋಚ್ಚಾಕ ಅನುಮತಿ  ದೀವ್ಕಾ " ಮೋಣು ಪ್ರಾರ್ಥನ ಕೆಲ್ಲಿ . ಸಾತ್ಯಕಿ ವ್ಯೂಹ ಪ್ರವೇಷ  ಕೊರ್ನ್ ಅರ್ಜುನಾಲೆ  ಪಾವ್ಲೋ . ಭೀಮಸೇನುಯೀ .. ವ್ಯೂಹಾ ಲಗ್ಗಿ ಅಯಿಲೊ .. " ಭೀಮ ಸೇನಾ .. ! ವ್ಯೂಹ ರಕ್ಷಣೆಕ ಹಾಂವ ರಬ್ಬಲಾ .. ಭಿತರಿ ಪ್ರವೇಶು ಕೋರ್ಕಾ ಝಲ್ಲೆರಿ ಮಿಗೆಲೆ ಯುದ್ಧ ಕರಿ ... ನಾ ಝಲ್ಲೆರಿ ಮಕ್ಕಾ ಶರಣು ಝಲ್ಲೋ ಮೋಣು ಸಂಘುನ್ ಭಿತರಿ ವಸ . "ಮ್ಹಳ್ಳಲೊ ದ್ರೋಣು . " ಗುರು ದೇವಾ .. ! ಅಮ್ಮಿ ಜೀವನ್ ಪರ್ಯಂತ ತುಗೆಲೆ  ಶರಣ ಜಾವ್ನ್ ಆಸ್ಸತಿ .. ತೂ ಆಂಮ್ಗೆಲೋ ಗುರು ... ಝಲ್ಲೆರಿ ಯುದ್ಧ ರಂಗಾಂತು ಶರಣ ಜಾವ್ಚ್ಯೆ ಕ್ಷತ್ರಿಯಾ ಕ ಶೋಭ ದೀನಾ ಜೈ ವೀರಾಂಜನೇಯಾ ... " ಮೋಣು  ಸಂಘುನ್ ದೈತ್ಯ ರೂಪ  ಘೆತ್ಲೆ  ... ಆನಿ ದ್ರೋಣಾಚಾರ್ಯಾಲೆ ರಥು ಉಬ್ಬಾರ್ನ್ ನೆಲಾರಿ ಉಡಯಿಲೆ . ದ್ರೋಣಾಚಾರ್ಯಾ ನ ರಥಾರಿ ದುಕೂನ್ ಸಕಲ ಉಡ್ಡುನ್ ಜೀವು ವಾಂಚುನ್ ಘೆತ್ಲೊ . ಭೀಮ ಸೇನಾನ ಸಿ೦ಮ್ಹಾ  ಮ್ಹಣ್ಕೆ ಘರ್ಜನ  ಕೊರ್ನ್ ಸೈನ್ಯಾಕ ಗಧಾ ಪ್ರಹಾರು ಕೊರ್ನ್ ಹಜಾರ ಹಜಾರ ಲೋಕಾಂಕ ದಿವಿಶಿ ಮಾರ್ಲೆ . ವ್ಯೂಹ ಪ್ರವೇಶ ಕೊರ್ನ್ ಧುರ್ಯೋಧನಾ ಲೆ ಎಕ್ವೀಸ ಭಂವ್ದಾಂಕ ಸ್ವಾರ್ಘಾ ಕ ಪೆಟಯಿಲೆ . ಅರ್ಜುನ್ , ಸಾತ್ಯಕಿ , ಭೀಮ ಸೇನಾ ಹನ್ನಿ  ತ್ಯೆಗ ಜನಾನಿ ಕೌರವ ಸೇನಾಕ ಧೂಳಿ ಕೆಲ್ಲೆ . ಸಂಧ್ಯಾ ವೇಳೇಕ ಸ್ವಲ್ಪ ವೇಳು ಅಸ್ಸ . ಸೈ೦ಧವ ... , ಧುರ್ಯೋಧನ , ಕರ್ಣ , ಶಲ್ಯ , ಕೃಪಾಚಾರ್ಯ ಕೃತವರ್ಮಾ, ಅಶ್ವತ್ಥಾಮ , ಹಾಂಗೆಲೆ ರಕ್ಶೇಂತು ಅಸ್ಸ . ಸೂರ್ಯಾಸ್ತಾ ಕ ಪಾಂಚ ಘಳಿ ಬಾಕಿ ಅಸ್ಸ . ಪ್ರತಿಜ್ಞಾ ಪ್ರಕಾರ ಸೂರ್ಯು ಬುಡ್ಚೆ ಭಿತರಿ ಸೈ೦ಧವಾಲೆ ಹತ್ಯಾ ಜಾವ್ಕಾ ... ಮಿಗೆಲಿ ಪ್ರತಿಜ್ಞಾ ಝತ್ತ ಕೀ ಜಾಯ್ನಾ .. !  ಮ್ಹಳ್ಳೆಲಿ ಅನುಮಾನ ಅರ್ಜುನಾ ಕ . " ಕೃಷ್ಣಾ ... ! ಸ್ವಲ್ಪ ವೆಳ್ಯೇ  ಭಿತರಿ ... ಸೈ೦ಧವಾ ಕ ದಿವಿಶಿ ಮಾರೂ ಝತ್ತಲೆ  ವೇ .. ? ಮಿಗೆಲಿ ಪ್ರತಿಜ್ಞಾ ಪರಿ ಪೂರ್ಣ ಝತ್ತಲಿ ವೇ .. ? ತೂವೇ೦ಚಿ ವಾಟ ದಕ್ಕೋಕಾ .. " ಮ್ಹಳ್ಳಲೊ ಅರ್ಜುನ್ . " ಅರ್ಜುನಾ .. ! ಸೂರ್ಯಾ ಕ ಮಿಗೆಲೆ ಸುದರ್ಶನ ಚಕ್ರ ಆಡ ದೊವೊರ್ನ್ ಕಾಳೋಕು ಕರ್ತಾ . ಸೂರ್ಯಾಸ್ತ ಝಲ್ಲೆ ಮೊಣು ಲೆಕ್ಕುನ್ ಯುದ್ಧ ರಬ್ಬಯಿತಾತಿ . ತೂ ... ಆತ್ಮಾಹುತಿ ಕ ತಯಾರ್ ಝಲ್ಲೋ ಮೋಣು ನಾಟಕ ಕರಿ ! ಆತ್ಮಾಹುತಿ ಕ ಸರ್ವಾಂಕ ಅಪ್ಪೋಯಾ . ಸೈ೦ಧವು ಸರ್ವಾ ಲೆ  ವೊಟ್ಟು ಯೆತ್ತಾಲೊ ... ಹಾಂವೆ ಸುದರ್ಶನ ಚಕ್ರ ಕಳ್ಳೆ ಸತಾನ ಸೈ೦ಧವಾ ಕ ದಿವಿಶಿ ಮಾರಿ "ಮೊಣು ಕೃಷ್ಣಾ ನ ಸಂಘಲೆ . ಕೃಷ್ಣಾ ನ ಸುದರ್ಶನ ಚಕ್ರ ಬ್ರಹ್ಮಾ೦ಡ ಕೊರ್ನ್ ಸೂರ್ಯಾ ದಿಕಾನ ಆಡ  ದವರ್ಲೆ . ಕುರುಕ್ಷೇತ್ರ ಭೂ೦ಯಿ ಕಾಳೋಕು ಜಾವ್ನ್ , ಸೂರ್ಯಾಸ್ತ ಝಲ್ಲೆ ಮೋಣು ಯುದ್ಧ ರಬ್ಬಯಿಲೆ .  " ಅರ್ಜುನಾ ಲೇ ಶಪಥ ವ್ಯರ್ಥ ಝಲ್ಲೆ " ಮೋಣು ಕುರು ವೀರಾಂಕ ಸಂತೋಷು ಝಲ್ಲೋ . ಅರ್ಜುನಾ ಲೆ ಆತ್ಮಾಹುತಿಕ ಸಾತ್ಯಕಿ ನ  ಸರ್ವಾಂಕ ಅಪ್ಪಯಿಲೆ . ಏಕ ಬದಿನ ಕೌರವ ... ಆನ್ನೇಕ ಬದಿನ ಪಾಂಡವ ತಾಂಗ ತಂಗೆಲೆ ಆಯುಧ ಸಕಲ ಘಾಲ್ನ್ .. ಆತ್ಮಾಹುತಿ ಕೊರ್ಚೆ ಪೋಳೋ ಚ್ಯಾ ರಬ್ಬಲೆ . ತೊಡೆ ಲೋಕಾ೦ಕ ಸಂತೋಷು .. ತೋಡೆ ಲೋಕಾಂಕ ದುಃಖ ... ಧುರ್ಯೋಧನ , ದುಃಶ್ಶಾಸನ , ದ್ರೋಣ , ಕೃಪಾಚಾರ್ಯ , ಕುರು ವೀರಾಂಗೆಲೆ ವೊಟ್ಟು ಸೈ೦ಧವ ಯೀ ಅಯಿಲೊ . ಕೃಷ್ಣಾ ನ  ದೊಳೆ ಸನ್ನಿರಿ ಸೈ೦ಧವಾನ ರಬ್ಬಿಲೇ ಜಾಗೊ ಅರ್ಜುನಾ ಕ ದಕ್ಕಯಿಲೊ . ಸೂರ್ಯಾಸ್ತ ಜಾವ್ಚ್ಯಾಕ ಅನಿಕಾಯ್ ತೀನಿ ಘಳಿ ಅಸ್ಸ . ಅರ್ಜುನಾ ನ ಸರ್ವಾಂಕ ನಮಸ್ಕಾರ್ ಕೊರ್ನ್ ' ಆಗ್ನೇಯ ' ಅಸ್ತ್ರ ಘೇವ್ನ್ ಅಗ್ನಿ ಕ ಪ್ರತಿಷ್ಠ ಕೆಲ್ಲಿ . " ವೀರ ಅರ್ಜುನ್ ಅಮರ ಜವ್ವೋ " ಮೋಣು  ಸರ್ವ ಪಾಂಡವಾನಿ ಜಯಕಾರು ಕೆಲ್ಲೊ . ಅರ್ಜುನಾ ನ ಗಾಂಡೀವ ಘೇವ್ನ್ ಕೃಷ್ಣಾ ಕ ನಮಸ್ಕಾರು ಕರ್ತಾನಾ ... " ಅರ್ಜುನಾ .. ! ಸೈ೦ಧವಾಲೆ ರುಂಡ ನೆಲಾರಿ ಪೋಡು  ನಜ್ಜ ... ಶಮಂತ ಪಂಚಕಾ ಲಗ್ಗಿ ಸೈ೦ಧವಾಲೆ ಬಪ್ಪುಸು ವೃದ್ಧ ಕ್ಷಟ ತಪಸ್ಯ ಕರ್ತಾ ಅಸ್ಸ . ಪಾಶುಪತಾಸ್ತ್ರ ಸಂಧಿ ಕೊರ್ನ್ , ಸಂಕಲ್ಪ ಕೊರ್ನ್ ಸೈ೦ಧವಾಲೆ ರುಂಡ , ತಗೆಲೆ ಬಪ್ಸುಲೆ ಹತ್ತಾ೦ತು ಪೊಡ್ಚೆ ತಶಿ ಬಾಣ ಪ್ರಯೋಗು ಕರಿ " ಅರ್ಜುನಾನ ಸೊಳ್ಳೆಲೆ ಪಾಶುಪತಾಸ್ತ್ರ ಕ್ಷಣ ಮಾತ್ರ ಆಕಾಶಾ ದಿಕಾನ ಉಬ್ಬಲೆ . ಕೃಷ್ಣಾ ನ ಸೂರ್ಯಾಲೆ ಆಡ ಅಶಿಲೆ  ಸುದರ್ಶನ ಚಕ್ರ ಹಾತ್ತಾಂತು ಘೆತ್ಲೆ . ಸೈ೦ಧವಾಲೆ ಮತ್ತೆ ಕತ್ತೊರ್ನ ತಪಸ್ಯ ಕೊರ್ನ್ ಅಷ್ಶಿಲೆ ..  ಕ್ಷಟ ರಾಯಾಲೆ ಹತ್ತಾ೦ತು ಪೊಳ್ಳೇ . ದೋಳೆ  ಧಾಂಕುನ್ ತಪಸ್ಯಾರಿ ಅಷ್ಶಿಲೊ ಕ್ಷ ಟ ರಾಯು ಭೀವ್ನ್ ... ಪೊಳೈನಾಶಿ ರುಂಡ ಕಾಣು ದೂರ ಉಡಯಿಲೆ . ನಿಮಿಷ ಮಾತ್ರೇನ ತಗೆಲೆ ಮತ್ತೆ ಭೇತ್ತುನ್ ಚೂರು ಝಲ್ಲೆ . ತಾಣೆ ದಿಲ್ಲೆಲೆ ವರ ಪ್ರಕಾರ ... ಕ್ಷಟ ರಾಯಾಲೆ ಮರಣ ಝಲ್ಲೆ . ತಗೆಲೆ ವರ ತಕ್ಕಾಚಿ ಶ್ರಾಪ್ ಝಲ್ಲೋ ಕ್ಷಟ ರಾಯಾಕ .         " ಮಹಾ ಮೋಸು ... ಮಹಾ ಮೋಸು " ಮೋಣು ಕೌರವ ವೀರಾನಿ ಬೋಬ ಘಲ್ಲಿ . ಸೂರ್ಯ ಕಿರಣ ಪೊಳೊನ್ ಧುರ್ಯೋಧನಾನ ಯುದ್ಧ ಘೋಷಣ ಕೆಲ್ಲಿ . ಯುದ್ಧ ವಾಪಾಸ್ ಶುರು ಝಲ್ಲೆ . ಆತ್ಮಾಹುತಿ ಕೊರ್ನ್ ಅರ್ಜುನ್ ಮರ್ತಾಲೊ ಮೋಣು ಲೆಕ್ಕಿಲೆ  ಕೌರವಾಂಕ ... ಸೈ೦ಧವಾಲೆ ಮರಣಾ ನಿಮಿತ್ಯ ಮಸ್ತ್ ದುಃಖ ಝಲ್ಲೆ . ತ್ಯೆ ದಿವಸಾ ಯುದ್ಧಾ೦ತು .. ಘಟೋತ್ಕಚಾಲೆ ಪೂತು ' ಅಂಜನಾಪರ್ವ ' ಸ್ವರ್ಘಾ ಕ ಪಾವಲೋ ಅಶ್ವತ್ಥಾಮಾಲೆ ಬಾಣಾಕ . ಸಾತ್ಯಕಿ ವೊಟ್ಟು ಯುದ್ಧ ಕೊರ್ನ್ ... ಸೋಮದತ್ತಾ ನ ಜೀವು ಸೊಳ್ಳೊ . ಪುತ್ತಾಲೆ  ಮರಣ ವಾರ್ತಾ ಮೆಳ್ಳೆ ಸತಾನ ... ಘಟೋತ್ಕಚಾನ ಆಕಾಶ ದುಕೂನ್ , ಫತ್ರಾ ರಾಶಿ ಕೌರವ ಸೈನ್ಯಾ ವೈರಿ ಘಾಲ್ನ್ ಹಜಾರ ಹಜಾರ ಸೈನ್ಯಾ೦ಕ ನಾಶ ಕೆಲ್ಲೆ . ಸೂರ್ಯು ಬುಡ್ಲೊ ... ಝಲ್ಲೇರಿ , ಯುದ್ಧ ರಬ್ಬನಿ . ಧ್ರತರಾಷ್ಟ್ರ ,  ಗಾಂಧಾರಿ ತಂಗೆಲೆ ಎಕ್ಲಿ ಚೆಲ್ಲಿ ಧುಷ್ಯಲಾಕ ..  ಇತ್ಲೆ ವಗ್ಗಿ ವೈಧವ್ಯ ಯೆತ್ತಾ ಮೋಣು ಕೊಣಾಯ್ ಲೆಕ್ಕನಿ . ಹರ್ದೇರಿ ಮಾರ್ನ್ ಘೆವ್ನ್ ರಳ್ಳಿ೦ತಿ . ಹೇತಾಂತ್ ಪಾಂಡವ ಶಿಬಿರಾಂತ್ ಸೈ೦ಧವಾಲೆ  ಮರಣಾ ನಿಮಿತ್ಯ... ಏಕ್ ಬದಿನ ಸಂತೋಷು ಅನ್ನೇಕ ಬದಿನ ಘಟೋತ್ಕಚಾಲೇ ಪೂತು ಅಂಜನಾಪರ್ವಾ ಲೆ ಮರಣಾ ನಿಮಿತ್ಯ ದುಃಖ . ಯುದ್ಧ ಸಮಾಪ್ತಿ ಘೋಷಣ ಜಾಯ್ನಿ ... ಸುತ್ತು ಕಾಳೋಕು ... ರಾತ್ರಿ ವೆಳ್ಯೇರಿ ಘಟೋತ್ಕಚ ಯುದ್ಧ ರಂಗಾಂತು ಅಯಿಲೊ . ರಾಕ್ಷಸ , ಮಾಯಾವಿ ಲೋಕಾಂಕ ರಾತಿ ಝಲ್ಲೆಲೆ ತಶೀ .. ತಂಗೆಲೆ ಮಾಯಾವಿ ಶಕ್ತಿ ವಾಡ್ತಾ ಖಂಯ್ ... ತಗೆಲೆ ಮಾಯಾವಿ ಶಕ್ತಿ ನ ... ಉಜ್ಜೋ ಫತ್ರಾ ರಾಶಿ-ರಾಶಿ ಕೌರವ ಸೈನ್ಯಾ  ವೈರಿ ಪೊಡಚೆ ತಶಿ ಕೆಲ್ಲೆ . ಘಟೋತ್ಕಚಾ ಲೆ ಗಧಾ ಪ್ರಹಾರಾಕ ಹಜಾರ ಹಜಾರ ಸೈನ್ಯ ನಾಶ ಝಲ್ಲೆಂತಿ . ಬ್ರಹದಾಕಾರಾರಿ ವಡ್ಡಿಲೋ ಘಟೋತ್ಕಚನ ತಾಗೆಲ್ ಮನಾ ಆಯ್ಯಿಲೆ ಲೋಕಾಂಕ ದಿವಿಶಿ ಮಾರ್ಲೆ ... ಶತ್ರು ಸೈನ್ಯ ಧೂಳಿ ಶೇ ಉಬ್ಬಯಿಲೆ . ಕೌರವ ಸೈನ್ಯ  ನಿರ್ನಾಮ ಝಲ್ಲೆ . ಕೌರವ ಸೈನ್ಯಾ೦ತು ಕರ್ಣಾನ ಮಾತ್ರ ಘಟೋತ್ಕಚಾ ಲೆ ಎದ್ರಾಕ ಯುದ್ಧ ಕೆಲ್ಲೆ . ಕರ್ಣಾಲೆ ಮಂತ್ರ ಶಕ್ತಿ ಬಾಣ ....  ಘಟೋತ್ಕಚಾಲೆ  ಹರ್ದೆ  ಪಿಸೂಳ್ನ ಘಲ್ಲೆ . 

ಉಮಾಪತಿ 

        

MAHABHARATH Part - 55 ( Konkani Bhashentu ) ARJUNA SHAPATHA

MAHABHARH   Part - 55    ( Konkani Bhaashentu )

   ARJUNA SHAPATHA - ಅರ್ಜುನ ಶಪಥ 

                                  ಕುರುಕ್ಷೇತ್ರ ದಕ್ಷಿಣ ದಿಶೆಂತು , ತ್ರಿಗರ್ತ ರಾಯ , ಸುಶರ್ಮ ಅನಿ ತಗೆಲೆ ಭಂವ್ಡಾಂಗೆಲೆ ವೊಟ್ಟು ಯುದ್ಧ ಕೊರ್ನ್ ತಂಗೆಲೆ ಸರ್ವ ನಾಶ ಕೊರ್ನ್ ಸಂಜೆ ಶಿಬಿರಾಕ ವಾಪಾಸ್ ಯೆತ್ತಾಲೊ  ಅರ್ಜುನಾ ಕ , ದಾವೋ ದೊಳೊ ಉಡ್ಡು೦ಕ ಆರಂಭು ಝಲ್ಲೋ .... ಧಾಹ್ ಬಾರಾ ಅಪಶಕುನ ದಿಸ್ಚ್ಯಾ ಶುರು ಝಲ್ಲೆ . ಮನಾಂತು ಕಸಲ್ಕಿ ಏಕ ಹೋಡ ವಾಯಿಟ್  ಖಬ್ಬರ ಅಯಿಕುಚಾ ಕ ಅಸ್ಸ ಮ್ಹಳ್ಳೆಲೆ ಸೂಚನಾ ಮೆಳ್ಚ್ಯಾ ಶುರು ಝಲ್ಲೆ . " ಕೇಶವಾ ...! ಕಸಲ್ಕಿ ... ಖತಿರಿ ಮಿಗ್ಗೆಲೆ ಮನಾಂತು ಅಶಾಂತಿ ರಿಗ್ಲೆ ... ಕಸಲ್ಕಿ ವಾಯ್ಟ್ ಖಬ್ಬರ ಅಯಿಕುಚಾಕ  ಅಸ್ಸ ಮೋಣು ದಿಸ್ತಾ . ದ್ರೋಣಾಚಾರ್ಯನ ಧರ್ಮಜಾಕ ಬಂಧಿ ಕೆಲ್ಲಿ ಕೀ ಮೋಣು ದಿಸ್ತಾ ... ಕೃಷ್ಣಾ ... !  ಸಂಧ್ಯಾ ವೇಳು  ಜಲ್ಲೇರಿಯಿ ಆಮ್ಗೆಲೆ ಶಿಬಿರಾಂತು ದಿವ್ವೋ

 ಲಯ್ಯಿಲೆ ಮ್ಹಣ್ಕೆ ದಿಸ್ಸ ನಾ .. ! ಕೋಣಾಕಯಿ ಕಸಲೆಯ್ ಪುಣಿ ಝಲ್ಲೆ ಕೀ ... ! ಕೃಷ್ಣಾ ರಥು ಥೊಡೆ ಶೀಘ್ರ ಜಾವ್ನ್ ಚಲಾಯಿಶಿ " ಮೋಣು ಸಾಂಗ್ಲೆ  . 

 " ಅರ್ಜುನಾ ... ! ಅಮ್ಮಿ ಕಿತ್ಲೆಯ್ ಬುದ್ದೋ೦ತ  ಝಲ್ಲೆರಿಯ್ ... ಅಂಮ್ಕಾ  ಕಸಲೆಯ್ ಶಕ್ತಿ ಆಸ್ಲೆರಿಯ್ ... ಸದಾ ಆಮ್ಗೆಲೆ ವಿಧಿ ... ಅಂಮ್ಕಾ ಅನುಕೂಲ ಜಾವ್ನ್ ಅಸ್ಸ ನಾ . ಗೊಡ್ಶೆ ಖಾವೈತಲೊ ದೇವು .. ಏಕ್ ಏಕ್ ಪೋಟಿ ಕೋಡು ಖಾವೈತಾ . ಯುದ್ಧ ರಂಗ ಶಿಬಿರಾಂತು , ಪನ್ನಾರಿ ಶೀತ ಜೆವ್ತಾಲೆ  ಕ್ಷತ್ರಿಯಾಂಕ ... ಪನ್ನಾರಿ ಪೊಳ್ಳೆಲೆ , ಶಿತ್ತಾ ವೊಟ್ಟು ಮತ್ತೆ ಕೇಸು ಪೊಳೋನ್ ಭಿಲ್ಲೇರಿ ಕಸಲೆ ಕೊರ್ಚೆ ... ? ತೂ ಅನಾವಶ್ಯಕ ಜಾವ್ನ್ ಚಿಂತಕೋರ್ನುಕ್ಕಾ  " ಮ್ಹಳ್ಳಲೋ ಕೃಷ್ಣ .

                             ಕೃಷ್ಣಾರ್ಜುನ ಶಿಬಿರಾಕ ಯೇವ್ನ್ ಪಾವಲೀ೦ತಿ . ಮನಾ ಕಾಳಾಜಿ ವೊಟ್ಟು , ಧರ್ಮಜಾಲೆ  ಶಿಬಿರಾಕ ಅಯಿಲೊ . ಧರ್ಮಜಾ ಏಕ ಮುಲ್ಲೆ೦ತು ಮೌನ ಜಾವ್ನ್ ಬೊಶಿಲೆ ಪೊಳೊನ್ ... ಲಗ್ಗಿ ಯೇವ್ನ್ ಬೊಸ್ಲೊ  " ಅಣ್ಣಾ ... ! ತುಕ್ಕಾ ಕಸಲ್ಕಿ ಜೀವಾ ಅಪಾಯ ಆಯಿಲೆ  ಮೋಣು  ಲೆಕ್ಕುನ್  ಭೀಲ್ಲೋ . ತುಕ್ಕಾ ಪೊಳೊನ್ ಮನ ಹಗುರ ಝಲ್ಲೆ " ಮ್ಹಳ್ಳಲೋ ಅರ್ಜುನ . ತೆದೊಳ್ ಭಿತರಿ ... ಸುಭದ್ರಾ ದೇವಿ ಅರ್ಜುನಾ ಲಗ್ಗಿ ಧಾವ್ನ್ ಯೇವ್ನ್ " ಸ್ವಾಮೀ ... ! ಅಮ್ಗೆಲೊ ಅಭಿಮನ್ಯು ಕುಮಾರ ಖಂಯ್ಯ್ .. ? ಅಮ್ಗೆಲೊ ನಂದಾ ದಿವ್ವೋ ಖಂಯ್ಯ್ .. ? ಅಮ್ಗೆಲೊ ಪ್ರೀತೀಚೊ ಚಂದ್ರು ಖಂಯ್ಯ್ .. ? ಖಂಯಿ ಪೆಟಯಿಲಾ ತಾಕ್ಕಾ .. ? " ಮೋಣು ಸಂಘುನ್ ಅರ್ಜುನಾಕ ಧೋರ್ನ್ ... ಎಕ್ಲೊಚ್ಯ್ ಪುತ್ತಾ  ಖಾತ್ತಿರಿ ಗಳ - ಗಳನಿ ರಳ್ಳಿ . " ಅಭಿಮನ್ಯುಕ ಕಸಲೆ ಝಲ್ಲೆ ಅಣ್ಣಾ .. ? " ... " ಅರ್ಜುನಾ .. ! ಅಮ್ಗೆಲೊ ಅಭಿಮನ್ಯು ... ಪದ್ಮ ವ್ಯೂಹಾಂತು ಸಿರ್ಕಲೋ ...  ತೂಂವೆ ತ್ರಿಗರ್ತ ರಾಯಾಲೆ ವೊಟ್ಟು ಯುದ್ಧ ಕೊರುಂಕ , ಕುರುಕ್ಷೇತ್ರಾ ದುಕೂನ್ ದೂರ ಗೆಲ್ಲೆಲೆ ತೆದ್ನಾ ... ದ್ರೋಣಾಚಾರ್ಯಾ ನ ಅಭೇದ್ಯ ಪದ್ಮ ವ್ಯೂಹ ರಚನ ಕೆಲ್ಲೆ . ಅಂಮ್ಕಾ ಕೊಣಾಕಯ್ ಪದ್ಮ ವ್ಯೂಹ ಭೇಧ ಕೊರುಂಕ ಜಾಯ್ನಾ ನಾತ್ತಿಲೆ ನಿಮಿತ್ಯ ... ಅಭಿಮನ್ಯುಲೇ ಸಹಾಯು ನಿಂಮ್ ಗಿಲೆ ... ವೀರಾ ವೇಷ ಜಾವ್ನ್ ಅಭಿಮನ್ಯು ಪದ್ಮ ವ್ಯೂಹ ಛೇದನ ಕೊರ್ನ್ ಭಿತರಿ ರಿಗ್ಲೊ ... ಮಾಕ್ಷೀಚಿ ಛೇದನ ಜಾಲ್ಲೆಲೆ ಜಾಗೊ ವೊಟ್ಟು  ಕೊರ್ನ್ , ಅಂಮ್ಕಾ ಕೊಣಾಕಯ್ ಭಿತರಿ ವೊಚ್ಚಾ  ಜಾಯ್ನಾಶಿ ಕೆಲ್ಲೆ . ವ್ಯೂಹಾ ಭಿತರಿ ಅಭಿಮನ್ಯು ಎಕ್ಲೊಚಿ  ಝಲ್ಲೋ ... " 

ಘಟೋತ್ಕಚ :" ಅಭಿಮನ್ಯು ಭಿತರಿ ವೊಚ್ಚುನ್ ... ಕೌರವ ... ಹಜಾರ ಹಜಾರ ಸೈನ್ಯಾಕ  ದಿವಿಶಿ ಮಾರ್ಲೆ ... ದುಃಶ್ಯಾಸನಾಲೆ  ಕೂರ್ಟು ಮೊಳ್ಳೆ . ಅಶ್ವಥಾಮಾಕ ಹೆಕಡೆ  ತೇಕಡೆ ನಾಂಚಯಿಲೆ . ಕರ್ಣಾಕ ಆಂಗ ಭರಿ ಘಾಯ್ ಜಾವ್ನ್ ಉದ್ರಿಕ್ತ ಝಲ್ಲೋ ... ಲಕ್ಷ್ಮಣ ಕುಮಾರಾ ಕ ಸ್ವರ್ಘಾ ಕ  ಪೆಟಯಿಲೊ . ಶಲ್ಯಾನ ಶರಣ ಜಾವ್ಚೆ ತಶಿ ಕೆಲ್ಲೆ . ದ್ರೋಣಾಕ ಪುರ್ ಪುರೊ ಕೆಲ್ಲೆ . ಅಭಿಮನ್ಯು ನ ಎಕ್ಲೆನಚಿ ... ಧಾಹ  ಹಜಾರ ಲೋಕಾಂಕ ದಿವಿಶಿ ಮಾರ್ನ್ , ಮೃತ ಸೈನಿಕಾಲೆ ರಾಶಿ ಘಲ್ಲಿ . ಧುರ್ಯೋಧನ , ದ್ರೋಣ , ಕರ್ಣ ... ಭೀವ್ನ್ ಮೂರ್ತಿ ಶೇ ಸ್ಥಬ್ಧ ಜಾವ್ನ್ ರಾಬಲೆ " 

" ಮಗಿರಿ ಕಸಲೆ ಝಲ್ಲೆ ಘಟೋತ್ಕಚಾ ... ! "ನಿಂಮ್ಗಿಲೆ ಅರ್ಜುನಾ ನ 

ಘಟೋತ್ಕಚ : ದ್ರೋಣ , ಕರ್ಣ , ಶಲ್ಯ , ಧುರ್ಯೋಧನ , ದುಃಶ್ಶಾಸನ , ಕೃಪಾಚಾರ್ಯ , ಶಕುನಿ , ಅಶ್ವಥಾಮ ... ಕುರು ವೀರ ವೊಟ್ಟು  ಜಾವ್ನ್ ... ಅಭಿಮನ್ಯು ವೈರಿ ಅಧರ್ಮ ಯುದ್ಧ ಶುರು ಕೆಲ್ಲೆ . ದ್ರೋಣಾಚಾರ್ಯಾ ನ ಅಭಿಮನ್ಯುಲೆ ಘೋಡೆ , ಸಾರಥಿಕ ದಿವಿಶಿ ಮಾರ್ಲೆ ... ಕರ್ಣಾನ, ಅಭಿಮನ್ಯುಲೆ ಧನುಷ್ಯ ಕುಡ್ಕೆ ಕೆಲ್ಲೆ .... ನಿಶ್ಯಸ್ತ್ರ ಅಭಿಮನ್ಯು ವೈರಿ ... ಸರ್ವಾನಿ  ಬಾಣ ಪ್ರಯೋಗ ಕೊರ್ನ್ , ರಕ್ತ ಪ್ರವಾಹಾಂತು ಝಾರ್- ಝರಿತ ಕೆಲ್ಲೆ . ಝಲ್ಲೆರಿಯಿ ... ಅಭಿಮನ್ಯು ಹತ್ತಾ೦ತು ಖಡ್ಘ ಗುರಾಣಿ ಘೇವ್ನ್ ಯುದ್ಧ ಕೆಲ್ಲೆ . ದ್ರೋಣಾಚಾರ್ಯನ , ಅಭಿಮನ್ಯುಲೆ ಉಜ್ವೊ ಹಾತು ಕತ್ತೊರನ್ ಘಲ್ಲೆ ... ಯೆಕ್ಕಾ ಹತ್ತಾನಿ ಗಧ  ಧೋರ್ನ್ ದ್ಧುಶ್ಯಾಸನಾಲೆ ಪುತ್ತಾ  ವೊಟ್ಟು ಯುದ್ಧ ಕೆಲ್ಲೆ . ದ್ರೋಣಾಚಾರ್ಯಾ ನ ಹತ್ತಾ ಅಶಿಲೆ ಗಧಾ ಸಕಲ ಪೊಡ್ಚೆ ತಶಿ ಬಾಣ ಮಾರ್ನ್ ಆನ್ನೇಕ ಹಾತ್ ಕತ್ತೊರನ್ ಘಲ್ಲೆ . ಅಭಿಮನ್ಯು ನ ರಥಾ  ಚಕ್ರ ...ಮೊಂಡು ಹಾತ್ತಾನಿ ಉಬ್ಬಾರ್ನ್ , ಸುತ್ತು ರಬ್ಬಿಲೆ  ಸೈನಿಕಾಂಕ ದಿವಿಶಿ ಮಾರ್ಲೆ . ದುಃಶ್ಯಾಸನಾಲೆ ಪುತ್ತಾನ ... ದೊನ್ನಿ  ಹಾತ್ತಾನ ಗಧಾ ಧೋರ್ನ್ , ಅಭಿಮನ್ಯು ಲೆ ಮತ್ತೇರಿ ಪ್ರಾಣಾಂತಿಕ ಪ್ರಹಾರು ಕೆಲ್ಲೆ . ಅಭಿಮನ್ಯು  ಮತ್ತೆ ಘು೦ವ್ನ್ ಸಕಲ ಪೊಳ್ಳೋ . ನಿಶಸ್ತ್ರ ಅಭಿಮನ್ಯು ಕ ಸುತ್ತು ರಬ್ಬುನ್ .. ಏಕ್ - ಎಕ್ಲೆನಚಿ ಖಡ್ಘ ಘೇವ್ನ್ ಪೊಟ್ಟಾರಿ  ಹರ್ದೇರಿ ಮಾರ್ನ್ ರಕ್ತಾ ವೊಕ್ಕುಳಿ ಖೇಳ್ಳಿ೦ತಿ . ಹಾಂವ ಮಾಯಾವಿ ಶಕ್ತಿ ಘೇವ್ನ್ , ಆಕಾಶಾರಿ ಉಬ್ಬುನ್ ... ಅಭಿಮನ್ಯು ಕ ಸಹಾಯು ಕೋರ್ಕಾಮೋಣು ಲಗ್ಗಿ ವೊಚ್ಛೆ ಫೂಡೆ ... ಇತಲೆ ಸಕ್ಕಡ  ಝಲ್ಲೆ . ಮಕ್ಕಾ ಅಭಿಮನ್ಯುಕ ಸಹಾಯು ಕೋರು೦ ಜಾಯ್ನಿ ... ಅಭಿಮನ್ಯು ಏಕ ಪೊಟಿ ಪುಣಿ  ' ಅಮ್ಮಾ ' ಮ್ಹಣಿ  ... ' ಅಯ್ಯೋ ' ಮ್ಹಣಿ ... ' ದೇವಾ ' ಮ್ಹಣಿ . ಇತ್ಲೆ ಮಾರಣಾಂತಿಕ ಘಾಯು ಝಲ್ಲೆರಿಯೀ .. ಯುದ್ಧ ರಂಗಾಂತು ಮ್ಹಾವ ದ್ರೌಪದಿಕ ಉಡ್ಘಾಸು ಕಾಣು .. ತಿಕ್ಕಾ ಅವಮಾನ ಕೆಲ್ಲೆಲೆ ಲೋಕಾಂಕ ಸೋಣಾ ಮೋಣು ... ಆವೇಷು ಯೇವ್ನು ಯುದ್ಧ ಕರ್ತಾಶಿಲೋ . ದುಃಶ್ಶಾಸನ , ಧುರ್ಯೋಧನಾಕ ದಿವಿಶಿ ಮಾರ್ಚೆ ಸಂಧರ್ಭ ಅಯ್ಲ್ಯಾರಿಯ್ ... ಭೀಮ ಸೇನಾಲೆ ಪ್ರತಿಜ್ಞಾ ಉಡ್ಘಾಸ್ ಯೇವ್ನ್ ... ತಂಕಾ ಜೀವಂತಿ ಸೊಡ್ತಾಶಿಲೋ . ಮಿಗೆಲೆ ದೋ ಳೆ ಎದ್ರಾಕ ... ಅಭಿಮನ್ಯುಲೆ ಚಿತ್ರ ಹಿಂಸಾ ಝಲ್ಲಿ ... ತಗೆಲೆ ಪ್ರಾಣ ಪಕ್ಷಿ ಮಿಗೆಲೆ ಎದ್ರಾಕ ಸ್ವಾರ್ಘಾ ಕ ಪಾವ್ಲಿ . " ಮೋಣು ದೊಳೆ ಉದ್ದಾಕ  ಕಾಣು  ಜಲ್ಲೆಲಿ ಘಟನಾ ಅರ್ಜುನಾ ಕ ಸಾಂಗ್ಲೆ . 

                          ಅಭಿಮನ್ಯು ನ ... ಆಖೇರಿ ಕ್ಷಣಾರಿ ತಾಯ್ ... ಮಕ್ಕಾ ಜಲ್ಲೆಲೆ ಅವಮಾನಾ ಖತಿರಿ , ಕೌರವ ಸೇನಾ ವೊಟ್ಟು ಯುದ್ಧ ಕೊರ್ನ್ .. ಚಿತ್ರ ಹಿಂಸ ಪಾವ್ನ್ ಬಲಿದಾನಾರಿ ಹುತಾತ್ಮ ಝಲ್ಲೋ ಮೋಣು ದ್ರೌಪದಿಕ ಕೊಳ್ನ್ ... " ಅಯ್ಯೋ ... ಅಭಿಮನ್ಯು ಕುಮಾರಾ ... ! ತುಕ್ಕ ಮಿಗೆಲೆ ವೈರಿ ಇತ್ಲೆ ಅಭಿಮಾನ ಅಶಿಲವೇ ಚೆರ್ಡಾ ... ! ಮಿಗೆಲೆ ಅನ್ನಾ ... ಪುತ್ತಾ ... ವ್ಹರ್ಡಿಕೆ ವಸ್ತ್ರ ಛಿಧ್ರ ಜಾಯ್ನಿ ... ಕುಂಕುಮ ಕೆಸರಾ ಬಣ್ಣ ಮಾಯಾ ಜಾಯ್ನಿ .. ತೆದೊಳ್ ಭಿತರಿ ಶಂಬರಿ ವರ್ಷ ಆಯುಷ್ಯ ಪೂರ್ತಿ ಜಲ್ಲೆವೇ ಬಾಳಾ .. ! " ಮೋಣು  ಸಂಘುನ್ ಧಾರಾಂಧಾರಿ ರೋಣು  ಹರ್ದೇರಿ  ಮಾರ್ನ್ ಘೇವ್ನ್ ಸಮೃತಿ ಚುಕ್ಕುನ್ ಪೊಳ್ಳಿ .  " ಅಣ್ಣಾ ಧರ್ಮಜಾ .. ! ಇತ್ಲೆ ಜನ ಪಾಂಡವ ಯೋಧ ಸೈನ್ಯ ಅಸ್ಸುನುಯ್ ... ಅಭಿಮನ್ಯು ಕ ರಕ್ಷಣಾ ದಿವ್ವು  ಜಾಯ್ನಿ ವೇ  ಅಣ್ಣಾ .. ? " ಮೋಣು ಅರ್ಜುನಾನ ನಿಮ್ಗಿಲೆ . " ಅರ್ಜುನಾ .. ! ಇತ್ಲೇಕ  ಕಾರಣ ... ದುಃಶ್ಶಲಾ ಲೆ ಬಾಮ್ಮಣು ಸೈ೦ಧವಾ ನಿಮಿತ್ಯ ..ಅನಿ ತಾಕ್ಕಾ ಮೆಳ್ಳೆಲೆ ವರಾ ನಿಮಿತ್ಯ .. ತಾಣೆ ..  ಕೋಣಾಕಯಿ ಪದ್ಮ ವ್ಯೂಹಾ ಭಿತರಿ ಪ್ರವೇಶ ಕೋರು ಸೋಣಿ . ವ್ಯೂಹ ಛೇಧನ ಜಲ್ಲೆಲೆ ಜಾಗೇರಿ ರಬ್ಬಿಲೇ ನಿಮಿತ್ಯ .. ಕೋಣಾಕಯಿ ಭಿತರಿ ವೋಚ್ಚಾ ಜಾಯ್ನಿ . ಆಖೇರಿ ಆಕಾಶ ಮಾರ್ಗ ಜಾವ್ನ್ ಘಟೋತ್ಕಚಾಕ ತಾಂಯ್ ಸಹಾಯು ಕೋರು೦ ಜಾಯ್ನಿ " ಮೋಣು  ಕೃಷ್ಣಾ ನ ಸಂಘಲೇ . " ಅರ್ಜುನಾ .. ! ಅಭಿಮನ್ಯುಲೆ ಮರಣಾ ಕ ಹಾಂವ ಕಾರಣ ... ಹಾವೆಂಚ್ಯಿ ತಾಕ್ಕಾ .. ಪದ್ಮ ವ್ಯೂಹ ಭಿತರಿ ವೋಚ್ಚಾಕ ಸಂಘಿಲೆ . ಮಕ್ಕಾ  ದಿವಿಶಿ ಮಾರಿ ಅರ್ಜುನಾ ... ಅಭಿಮನ್ಯು ವೊಟ್ಟು  ಹಾಂವ ಸ್ವರ್ಘಾಕ ವತ್ತಾ  . " ಮೋಣು ಧರ್ಮಜಾ ನ ದುಃಖಿತ ಜಾವ್ನ್ ಸಂಘಲೇ . " ತೂ೦ವೆ ಕಸಲೆಕ ಮೋರ್ಕಾ ಅಣ್ಣಾ ... ? ತ್ಯೆ ದುರಾತ್ಮ ಸೈ೦ಧವ ಮಿಗೆಲೆ ಹತ್ತಾನ ಅರಣ್ಯ ವಾಸಾ ವೆಳ್ಯೇರಿ .. ಪಾಂಚಾಲಿಕ ಅವಮಾನ ಕೆಲ್ಲೆಲೆ ತೆದ್ನಾಚಿ ಮೋರ್ಕಾ ಅಶಿಲೆ . ತುಗ್ಗೆಲ್ ದಯೆ ನಿಮಿತ್ಯ ಚುಕ್ಕುನ್ ಗೆಲ್ಲೊ .. " ಮ್ಹಳ್ಳಲೋ ಭೀಮು 

                        ಅರ್ಜುನಾ ಕ ದುಃಖ ತಡ್ಸೂನ್ ಘೆವ್ಚ್ಯಾ ಜಾಯ್ನಿ . ಆಯ್ಯಿಲ್ ದುಃಖ ..ಮಹಾ ಕೋಪಾರಿ ಪರಿವರ್ತನ ಝಲ್ಲೆ . ದೋಳೆ ತಾಂಬ್ಡೆ ಝಲ್ಲೆ ... ತೊಂಡ ತಾಂಬ್ಡೆ ಝಲ್ಲೆ .. " ಸಮಸ್ತ ಲೋಕು ಅಯಿಕಾಯಾತಿ .. ಫಲ್ಲೆ  ಸೂರ್ಯಾಸ್ತ ಜಾವಚೆ ಭಿತರಿ ... ಸಿಂಧು ದೇಶ ಸೈ೦ಧವ ಮಿಗ್ಗೆಲೆ ಹತ್ತಾ೦ತು ಮರ್ತಾ . ಏಕಾತ್ ವೆಳಾ ತ್ಯೋ  ...  ಮಿಗೆಲೆ ಹತ್ತಾನಿ ಮರ್ನಾ ನಾತ್ಲೆರಿ ... ಹಾಂವ ಆತ್ಮಾಹುತಿ ಕೊರ್ನ್ ಘೇತ್ತಾ .. ಹ್ಯೇ ಮಿಗೆಲೆ ಪ್ರತಿಜ್ಞಾ . " ಮೋಣು ಅರ್ಜುನಾ ನ ಆವೇಶಾರಿ ಸಂಘಲೇ . ಸರ್ವಾನಿ ' ಹುರ್ರೇ ' ಮೋಣು  ಪ್ರೋತ್ಸಾಹನ  ಕೆಲ್ಲೆ .ಕೃಷ್ಣಾನ ಸರ್ವಾಂಕ ಸಮಾಧಾನ ಕೆಲ್ಲೆ . ಪಿತೃ ಶೋಕ ಆಪ್ಪಣಿತ್ಯಾಕ ಥಂಡ ಝತ್ತಾ .. ಪುತ್ರ ಶೋಕ ಅಪ್ಪಣಿತ್ಯಾಕ ವೃದ್ಧಿ ಝತ್ತ .ಕಸಲೆಮ್ಹಳ್ಳೆರಿ .. ರುಕ್ಕಾ ಫಲ ಅನಿ ತಜ್ಜ್ಯೋ ಪತ್ರೆ ಅಪ್ಪಣಿತ್ಯಾಕ ನಿಷ್ಕ್ರಿಯ ಜಾವ್ನ್ ರುಕ್ಕಾರಿ ದುಕೂನ್ ವಿಂಗಡ ಜಾವ್ನ್ ನೆಲಾರಿ ಪೊಡ್ತಾ ... ಹ್ಯೇ ಸೃಷ್ಟಿ ನಿಯಮ . ಹಜ್ಜೆ ಖತಿರಿ ರೋಡ್ಚೆ .. ಏಕ ನಮುನೆ ಅವಿವೇಕ ಪಣ .ಝಲ್ಲೇರಿ ... ಪಾಚ್ವೋ ಚಿಗುರು ... ನವ್ವೆ ಪತ್ರೆ ... ಮಿಡಿ ಫಲ .. ನೆಲಾರಿ ಪೋಡ್ಚೆ ಅಪ್ರಾಕ್ರತಿಕ ... ವಿರುದ್ಧ ನವೇ ? 

                           ಕೃಷ್ಣು ಸುಭದ್ರೆಕ ಸಮಾಧಾನ ಕೊರುಂಕ ಗೆಲ್ಲೊ . ಕೃಷ್ಣಾ ಕ ಪೋಳಯಿಲ್ ಸತಾನ ಸುಭಧ್ರಾ ಧಾಂವ್ನ್ ಆಯಿಲಿ ... ಅಣ್ಣಾಕ ಫೊಟೊನ್ ಧೋರ್ನ್ ಹಾರ್ದೇರಿ  ಮತ್ತೆ ದೊವೊರ್ನ್ ತಿಗೆಲೆ ಮನಸ್ಪೂರ್ತಿ ರಳ್ಳಿ . ಅಣ್ಣಾ .. ! ತೂ .. ನಾರಾಯಣ ಅವತಾರು ಮೊಣು ಸರ್ವ ಸಾಧು ಸಂತ , ಜನ ಸಾಮಾನ್ಯ ಲೋಕು ತುಕ್ಕಾ ಪಾ೦ಯ್ಯ್ ಪೊಡ್ತಾತಿ . ತುಗೆಲೆ ದರ್ಶನಾ ಖತಿರಿ , ಉಪವಾಸು ನೇಮು ಕೊರ್ನ್ , ತೂ೦ಚಿ ರಾಕ್ತಲೊ ಮೋಣು ಆಶಿ ಕಾಡ್ತಾತಿ .. ಪೂಜಾ ಕರ್ತಾತಿ . ಝಲ್ಲೆರಿಯ್ ... ತೂ೦ವೆ ಹಾತು ಧೋರ್ನ್ , ಹೊಡು ಕೋರ್ನ್ , ಶಿಖೋನ್ , ಶಿಷ್ಯ ಕೊರ್ನ್ , ಮಹಾ ಧನುರ್ ಧಾರಿ ಕೊರ್ನ್ .....  ಅತ್ತ ಕಸಲೇ ಕ ಅಣ್ಣಾ ... ! ಹ್ಯೇ  ನಮುನೆ ಶಿಕ್ಷಾ ತಕ್ಕಾ .. ? ಜಗದೋದ್ಧಾರ ಜಾವ್ನ್ ಜಗತ್ಯ ರಕ್ಷ ಕರ್ತಾಲೆಕ .. ಮಿಗೇಲ್ ಪುತ್ತಾ  ವಿಷಯಾನ ಮಾತ್ರ  ಕಸಲೆಕ ದಯಾ ಜಾಯ್ನಿ ಅಣ್ಣಾ ... ? " ಮೋಣು  ಸಂಘುನ್ ಧರಾಂಧರಿ ರಳ್ಳಿ . " ಸುಭಧ್ರಾ .. !ಅಭಿಮನ್ಯು ಚಂದ್ರಾ ಲೆ ಅಂಮ್ಶು ಜಾವ್ನ್ ಜನ್ಮಾ ಅಯ್ಯಿಲೊ . ಫುಳ್ಳೆ ಜನ್ಮಾಂತು .. ಸೋಮಾದೇವಾಲೆ ಪೂತು . ತಗೆಲೆ ನಾ೦ವ ವೊರ್ಕಾ  ಮೊಣು , ತಾಗೆಲ್ ಅಭೀಷ್ಟಾ ಪ್ರಕಾರ ತ್ಯೋ ಅತ್ತ ಸ್ವರ್ಘಾ ಗೆಲ್ಲಾ . ಹೇ ಭುಯಿಂಚೇರಿ ಜನ್ಮಾ ಆಯ್ಯಿಲೆ ಕಾರ್ಯ ಝಲ್ಲೆ ಅಮ್ಮಾ .. !" ಮ್ಹಳ್ಳಲೊ ಕೃಷ್ಣು . " ಮಕ್ಕಾ ತಿತ್ಲೆ ಬುದ್ದೊಂತ್ಕಾಯ್ ನಾ ಅಣ್ಣಾ .. ಮಿಗೆಲೆ ಪುತ್ತಾ  ಖಾತ್ತಿರಿ ಜೀವು ದಿತ್ತಾ  . ಮಿಗ್ಗೆಲೆ ಆಯುಷ್ಯ ತಕ್ಕಾ , ಧಾರಾ ದಿತ್ತಾ ...ಕಶೀ ಪುಣಿ ವಂಚಯಿ ಅಣ್ಣಾ ... ಪೊಳೆ ...  ಹೇ ಮಿಗ್ಗೆಲೆ ಸುನ್ನೇ ಕ ಪೊಳೆ .. ಉತ್ತರಾ ಕ ಪೊಳೆ ... ವ್ಹರ್ಡಿಕಾ ಜಾವ್ನ್ ಏಕ ವರುಷ ಪೂರ್ತಿ ಜಾಯ್ನಿ ... ಹಳದಿ ಕುಂಕುಮ ಬಣ್ಣಾ ವಸ್ತ್ರ .. ಅನಿಕಾಯ್ ಬಣ್ಣ ಸೋಣು  ವಚ್ಚನಿ ... ದಾಂಪತ್ಯ ಮಿಲನಾ ಆಶೆ ಮೆಟ್ಟಂ ಪೂರ್ತಿ ಚಣಿ೦ತಿ ... ಜೀವನಾ ಸುಂದರ ಘಡಿ .. ಪ್ರೀತಿಚೆ ಮಿಲನಾ ಘಡಿ ಅನುಭವಾ ಯೇನಿ .. ತೆದೊಳ್ ಭಿತರಿ ವೈಧವ್ಯ  .. ಕಸಲೇಕ .. ? ಯಿತಲೆ ಸನ್ ಪಣಾರಿ .. ಹಳದಿ ಕುಂಕುಮಾ ದುಕುನ್ ದೂರ ಜಾವ್ಕಾವೆ ... ? ಹೇ ಅಭಾಗ್ಯ ಚೆಲ್ಲಿಯೇಕ ಹಾಂವೆ ಕಸಲೆ ಮೋಣು ಸಾಂತ್ವನ ಕೋರ್ಕಾ .. ? ಕಸಲೆ ಹಿತ ವಚನ ಸಂಘುನ್ ಸಮಾಧಾನ ಕೋರ್ಕಾ .. ? ಹಿಗೆಲೆ  ಮನಾಕ  ಕಷ್ಶಿ ಶಾಂತಿ ಹಡೋಕಾ .. ? ಹೃದಯಾಂತು ಅಶಿಲೆ ದುಃಖ ಅಗ್ನಿಕ ಕಷ್ಶಿ ಶಮನ ಕೋರ್ಕಾ .. ?"ಮ್ಹಳ್ಳಲಿ ಸುಭಧ್ರಾ . ಕೃಷ್ಣಾ ಕ ಕಸಲೆ ಸಂಗ್ಚೆ ಮೋಣು ಕಳ್ನಿ . ಮೌನ ಮೂರ್ತಿ ಝಲ್ಲೋ . ಧಾರಾಂಧಾರಿ ಪೊಡ್ಚೆ ದೊಳೆ ಉದ್ದಾಕ ಪುಶಿಲೆ . ಅತ್ತ ಉತ್ತರ ಕುಮಾರಿ ಗರ್ಭವತಿ ಜಾವ್ನ್ ಅಶಿಲಿ ದ್ರೌಪದಿನ ಯೇವ್ನ್ ಭಿತರಿ ಅಪ್ಪೋನ್ ವೆಲ್ಲಿ . ಕೃಷ್ಣಾ ನ ಸುಭದ್ರೇಕ ಫೊಟೊನ್ ಧೋರ್ನ  ಸಾಂತ್ವನ ಕೆಲ್ಲಿ . ಪ್ರೀತೀನಾ ಮತ್ತೆ ಪರ್ಸುನ್ ಸಮಾಧಾನ ಕೆಲ್ಲಿ " ಅಮ್ಮಾ ಸುಭಧ್ರಾ .. ! ಕಸಲೆ ಹೇ ಚೆರ್ಡುಪಣ .. ! ತೂ ಅಪ್ರಮಿತ ಧನುರ್ ಧಾರಿ ಅರ್ಜುನಾ ಲೆ ಬಾಯ್ಲ್ .. ಕ್ಷತ್ರಿಯ ರಾಣಿ ತೂ .. ಮರಣಾ ಕ ಕ್ಷತ್ರಿಯ ಸ್ತ್ರೀ ಕೆದನಾಯ್ ಭೀನಾತಿ . ದುಃಖ ಕರ್ನಾತಿ .. ಯೆಚ್ಚನ ತಾಯ್ ಕಾಣಾತಿ .. ಸುಭಧ್ರಾ .. ! ತುಗ್ಗೆಲ್ ಪೂತು ವೀರ ಮರಣ ಪಾವ್ಲಾ .. ತೂ ಅತ್ತ ವೀರ ಮಾತೆ .. ! ಇತ್ಲೆ ಸಾನ್ ಪ್ರಾಯೇರಿ  ಹಜಾರ ಹಜಾರ ಸೈನ್ಯಾ೦ಕ  ದಿವಿಶಿ ಮಾರ್ನ್ ಅಮರ ಝಲ್ಲಾ . ತುಗ್ಗೆಲ್ ಪುತ್ತಾಲೆ  ಮರಣಾಕ ಕಾರಣ ಜಲ್ಲೊಲೊ ಸೈ೦ಧವಾ ಕ ಫಲ್ಲೆ  ಸೂರ್ಯಾಸ್ತ ಜಾವ್ಚೆ ಭಿತರಿ ದಿವಿಶಿ ಮಾರ್ತಾ ಮೊಣು ಅರ್ಜುನಾ ನ ಪ್ರತಿಜ್ಞಾ ಕೆಲ್ಲಾ . ತೂ ಅಷ್ಶಿದುಃಖಿತ ಜಾವ್ನ್ ಬೊಸ್ಲೆರಿ , ಉತ್ತರ ಕುಮಾರಿ ಕ ಕೋಣ ಸಾಂತ್ವನ ಕರ್ತಾ .. ? ಸಮಾಧಾನ ಕರಿ ಮೋಣು  ಸಂಘುನ್ ಕೃಷ್ಣ ತಗೆಲೆ ಶಿಬಿರಾ ಕ ಚ೦ಮ್ಕಲೊ . 

                       ಅರ್ಜುನಾಲೆ ಶಪಥಾ ಸುದ್ದಿ ... ಕೌರವಾಂಕ ಮೆಳ್ಳಿ .  ಸೈ೦ಧವು ಏಕ ಪೊಟಿ ಭಿಲ್ಲೋ . ದ್ರೋಣ , ಧುರ್ಯೋಧನಾ ನ ಸೈ೦ಧವಾಕ ಧೈರ್ಯ ಭರ್ಲೆ . ಸೈ೦ಧವಾಲೆ ಬಪ್ಪುಸು ವೃದ್ಧಾಕ್ಷತ ನ ಯೇವ್ನ್ ಸೈ೦ಧವಾಕ ಧೈರ್ಯ ದಿಲ್ಲೆ  " ಪುತಾ ..  ಜಯದೃಥಾ .. ! ಯುದ್ಧ ಮ್ಹಳ್ಳೆಲೆ ಕ್ಷತ್ರಿಯಾಂಕ ಸಹಜ ಜಾವ್ನು ಏಕ ವೃತ್ತಿ . ಯುದ್ಧಾಂತು ಮೊರ್ಚೆ ಸಹಜ ಪ್ರವರ್ತಿ . ಅರ್ಜುನಾಲೆ ಶಪಥ ವಿಷಯಾನ ಚಿಂತಾ ಕೋರ್ನುಕ್ಕಾ . ತೂ ಬ್ರಹ್ಮ್ಮ ದೇವಾಲೆ ವರಾ ನಿಮಿತ್ಯ ಆಮ್ಗೆಲೆ ಪೊಟ್ಟಾ ಜನ್ಮಾ  ಅಯಿಲಾ . ತುಗ್ಗೆಲ್ ಮತ್ತೆ ಕೋಣ ಭುಯಿಂಚೇರಿ ಘಾಲ್ತಾಕೀ ... ತಾಂಗೆಲೆ ಮತ್ತೆ ಕ್ಷಿಧ್ರ ಜಾವ್ನ್ ವತ್ತಲೆ ..ಮೋಣು  ಬ್ರಹ್ಮ್ಮ ದೇವಾಲೆ ವರ ಮಕ್ಕಾ ಅಸ್ಸ ... ಹೇ ವಿಷಯು ರಹಸ್ಯ ಜಾವ್ನು ಅಸ್ಸೋ . ಹಾಂವ ಆಜಿ ರಾತ್ರೀಚಿ ಶ್ಯಮಂತ ವನಾ  ಕ ವೊಚ್ಚುನ್ ... ತುಗ್ಗೆಲ್ ದೀರ್ಘ ಆಯು ಖತೀರಿ ತಪಸ್ಯ ಕರ್ತಾ ...  ಕಾ೦ಯಿ ಯೆಚ್ಚನ ಕಾಣುಕ್ಕಾ ಜಯದೃಥಾ ... ! " ಮೋಣು ಸಂಘುನ್ ತ್ಯೆಚಿ ರಾತ್ರಿ ಚಮ್ಕಲೊ . ಹ್ಯೇ ವಿಷಯು ಕೃಷ್ಣಾ ಲೇ ಕನ್ನಾ೦ತು ಪೊಳ್ಳೇ ಗೂಢಚರಾ ನಿಮಿತ್ಯ . 

ಉಮಾಪತಿ             

MAHABHARATH Part - 54 ( Konkani Bhaashentu ) Abhimanyule maraNa

MAHABHARATH   Part - 54  ( Konkani Bhashentu )

              Abhimanyule MaraNa      

              ಅಭಿಮನ್ಯುಲೆ ಮರಣ 

                         ಅಭಿಮನ್ಯು ಕ ವೀಸ ವರುಷ ... ಯುದ್ಧ ತಂತ್ರ ಶಿಕ್ಲ್ ಝಲ್ಲೇರಿಯಿ , ಅನುಭವು ನಾತ್ತಿಲೆ ಕುಮಾರು ... ಕುರು ಕ್ಷೇತ್ರ ರಣ ರಂಗಾಕ ಯೇವ್ನ್ , ಮಹಾ ಅನುಭವ ಅಷ್ಶಿಲೆ ಅತಿರಥ , ಮಹಾರಥ ಯೋಧಾಂಗೆಲೆ ವೊಟ್ಟು ಯುದ್ಧ ಕೊರ್ಚ್ಯೇ ಸಾಧಾರಣ ವಿಷಯು ನಯ್ . ಸಾನು ಪ್ರಾಯೆಚೊ . ಮಹಾವೀರ ಅರ್ಜುನಾಲೆ ಪೂತು ಮೋಣು ಲೆಕ್ಕುನ್ ... ಸಡಿಲ ಸೊಳ್ಳೇಲೆ ಚಡ ಝಲ್ಲೆ ... ! ದ್ರೋಣಾಚಾರ್ಯನ ಯೆದೊಳ್ ತಾಯ್ , ಅರ್ಜುನಾಲೆ ವೈರಿ ಅಷ್ಶಿಲೆ  ಅಭಿಮಾನ ನಿಮಿತ್ಯ ಕ್ರೋಧಿತ ಜಾವ್ನು ಅಭಿಮನ್ಯು ಕ ಪೊಳಯಿನಿ . ಅಭಿಮನ್ಯುಲೆ  ಕರ ಚಾಲಕ್ ಪೊಳೊನ್ ಖುಷಿ ಪಾವ್ತಾಲೊ ... ಮನಾಂತು ಶಹಬ್ಬಾಶ್ ! ಮ್ಹಣತಾಲೊ . ಅತ್ತ ... ಇತ್ಲೆ ಸಾನು ಕುಮಾರು ಚಿದ್ರೂಪ ಜಾವ್ನ್ ಹೂನ ತುಪ್ಪಾ ಮ್ಹಣ್ಕೆ ಝಲ್ಲಾ .. ! ಹ್ಯೋ ಸಾನು ಚೆಲ್ಲೋ ನಯ್ ... ಪ್ರಳಯ ರುದ್ರಾ ಮ್ಹಣ್ಕೆ ಸೈನ್ಯ ನಾಶ ಕರ್ತಾ ಅಸ್ಸ .. ಹಕ್ಕಾ ಆಶೀ ಸೋಡು ಜತ್ತಾ ಕೀ ? ... " ಆಚಾರ್ಯ ದೇವಾ ! ಹಕ್ಕಾ ವಗ್ಗಿ  ದಿವಿಶಿ ಮಾರ್ನಾ ನಾತ್ಲೆರಿ ... ಕುರು ಸೈನ್ಯಾಕ ರಕ್ಷಾ ಕೊರ್ಚೆ ಅಂಮ್ಕಾ ಕಷ್ಟ ಝತ್ತಲೆ .. ! "ಮ್ಹಳ್ಳಲೋ ಕರ್ಣ . " ಕರ್ಣಾ .. ! ಪೋಳೆ  ಇತ್ಲೆ ಸಾನು ಕುಮಾರ ... ತಗೆಲೆ ಪರಾಕ್ರಮ .. ಷೋವ್ ರ್ಯ ತೂವೆ೦ಚಿ ಪೋಳಯಿಲಾ ಮೂ .. ! ಅರ್ಜುನಾ ಪೋಷಿ ಚುರುಕು ಅಸ್ಸ . ಹಕ್ಕಾ ಎಕ್ಲೇಚನ ದಿವಿಶಿ ಮಾರುಂಕ ಜಾಯ್ನಾ . ಅಮ್ಮಿ ದ್ಹಾಹ್ , ಬಾರಾ ಲೋಕಾನಿ ವೊಟ್ಟು  ಜಾವ್ನ್ ದಿವಿಶಿ ಮಾರ್ಕಾ " ಮ್ಹಳ್ಳಲೊ ದ್ರೋಣ . ಕುರು ವೀರ ವೊಟ್ಟು ಜಾವ್ನ್ ಅಯಿಲೆ .. ದ್ರೋಣ , ಕರ್ಣ , ಶಲ್ಯ , , ಅಶ್ವಥ್ಥಾಮ , ದುಃಶ್ಶಾಸನ , ಕೃತವರ್ಮ , ಶಕುನಿ , ಸರ್ವ ವೊಟ್ಟು ಝಲ್ಲೆ . ಅಶಿ ದ್ಹಾಹ್ ಜನಾನಿ ಎಕ್ಲೋ ಸಾನ್ ಪ್ರಾಯೆಚೊ ಕುಮಾರಾಲೆ ವೊಟ್ಟು ಯುದ್ಧ ಕೊರ್ಚ್ಯೇ ಹ್ಯೇ ಯುದ್ಧ  ಅಧರ್ಮ ಮೋಣು .. ಯುದ್ಧಾಕ ಸಹಮತಿ ದೀನಿ .  " ತುಗೆಲೆ ವಿಚಾರು ಅಕ್ಷರಃ ಸತ್ಯ .. ಕರ್ಣಾ .. ! ಝಲ್ಲೇರಿ ಹ್ಯೋ ..ಬಾಲ ನಾಗರ ಸರ್ಪಾ ಮ್ಹಣ್ಕೆ ಯುಧ್ಧ ಕರ್ತಾ ಅಸ್ಸ .. ಇಂದ್ರಾನ .. ಅರ್ಜುನಾಕ " ವಜ್ರ ಕವಚ ಧಾರಣ " ಮ್ಹಳ್ಳೆಲೆ ಗುಪ್ತ ಮಂತ್ರ ಶಿಖಯಿಲಾ . ತ್ಯೇ ಮಂತ್ರ .. ಅರ್ಜುನಾನ .. ಅಭಿಮನ್ಯುಕ ಶಿಖಯಿಲಾ . ತಜ್ಜಿ ನಿಮಿತ್ಯ ಹ್ಯೇ ಕುಮಾರಾ ಲಗ್ಗಿ ಎಕ್ಲೆ -ಎಕ್ಲೇನ ಚಿ ಯುದ್ಧ ಕೊರ್ನ್ ದಿವಿಶಿ ಮಾರುಂಕ ಜಾಯ್ನಾ . ಹ್ಯೋ ಅಮ್ಗೆಲೆ ವಾಂಟೇಕ .. ಗೀಳೂ ಜಾಯ್ನಾ ನಾತ್ತಿಲೆ ಹೂನ ಶೀತ ಶೀ ಝಲ್ಲಾ . ಅಧರ್ಮ ' ವೊಕ್ಕೂಟ ಯುದ್ಧ ' ನಿಮಿತ್ಯ ಮಾತ್ರ ಹಕ್ಕಾ ದಿವಿಶಿ ಮಾರುಂಕ ಝತ್ತಾ . ಧರ್ಮ ಯುದ್ಧಾ ನಿಮಿತ್ಯ ಜಾಯ್ನಾ ಮೋಣು ದ್ರೋಣಾಚಾರ್ಯನ ಸಂಘುನ್ ... ಇಷ್ಟ ನಾತ್ತಿಲೆ ಕರ್ಣಾಕ ಪ್ರೇರೇಪಣ ಕೆಲ್ಲಾ . ದ್ರೋಣಾಲೆ ಯೋಚನಾ ಧುರ್ಯೋಧನ , ದುಃಶ್ಶಾಸನ , ಶಕುನಿ , ಕರ್ಣಾ ಕ ಆನಂದ ಝಲ್ಲೆ . ಶಕುನಿ ನ ದೊಳೆ ನ ಸನ್ನಿ ಕೆಲ್ಲಿ .. ಎಕ್ಕ ವೇಳೇರಿ ಆಕ್ರಮಣ ಕೋರ್ಕಾ ಮೋಣು . " ದ್ರೋಣ ಗುರು ಮಹಾ .. ! , ಅರ್ಜುನಾಲೆ  ಪೂತು ಮೋಣು .. ಖಂಚೇಯ್ ಅಭಿಮಾನ ದಕ್ಕೋನುಕ್ಕಾ .. ಕಿತ್ಲೆ ವಗ್ಗಿ ಹಕ್ಕಾ ಸಂಹಾರು ಕೊರು೦ ಸಾಧ್ಯ ಅಸ್ಸ ಕೀ ; ತಿತ್ಲೆ ವಗ್ಗಿ ದಿವಿಶಿ ಮಾರ್ಲೆರಿ ಅಮ್ಗೆಲೆ ಸೈನ್ಯ ಹಗೆಲ್ ಹತ್ತಾ  ದುಕೂನ್ ವ೦ತಲೆ " ಮ್ಹಳ್ಳಲೊ ಧುರ್ಯೋಧನು .

                           ದ್ರೋಣಾ ಚಾರ್ಯಾ ನ ಅಭಿಮನ್ಯುಲೆ ರಥಾ ಕ ಬಂಧಿಲೆ ಘೋಡೆಂಕ ಬಾಣ ಮಾರ್ನ್ , ಘೊಡೆ ಹೀ೦ಕಾರು  ಕೊರ್ನ್ ,ಮುಕಾವಾಯಿಲೊ ಪಾಯು ಉಬ್ಬಾರ್ನ್ , ಸಕಲ ಪೋಡ್ಚ್ಯೆ ತಶಿ ಕೆಲ್ಲೆ . ಕೃಪಾಚಾರ್ಯಾಲೆ ಬಾಣ ರಥ ಸಾರಥಿಕ ದಿವಿಶಿ ಮಾರ್ಲೆ . ಕರ್ಣಾ ನ , ಅಭಿಮನ್ಯುಲೆ ಧನುಷ್ಯ ಕತ್ತರ್ಲೆ . ಹ್ಯೆಂಚಿ ವೆಳ್ಯೇರಿ , ಅಶ್ವಥ್ಥಾ ಮ , ಕೃತವರ್ಮ , ಶಲ್ಯ ,  ಶಕುನಿ , ಧುರ್ಯೋಧನ , ದುಃಶ್ಶಾಸನ , ಹನ್ನಿ  ವೊಟ್ಟು ಮೇಳ್ನ್ ಅಭಿಮನ್ಯು ವೈರಿ ಬಾಣಾಚೆ ವೃಷ್ಠಿ ಧಾರ ಕೆಲ್ಲಿ . ಸಾರಥಿ , ಘೋಡೆ , ರಥ , ಧನುಷ್ಯ ಕಾಣ್ ಘೆತ್ತಿಲೆ ಅಭಿಮನ್ಯು ನ ಹತ್ತಾ೦ತು ಖಡ್ಘ ಗುರಾಣಿ ಧೋರ್ನ್ , ಕೋಪು ಆಯ್ಯಿಲೊ ಕಾಲ ರುದ್ರಾ ಮ್ಹಣ್ಕೆ ವೈರಿ ಉಡ್ಲೊ . ಸಹ ಸಾಥ ಕುರು ವೀರ ಸುತ್ತು ರಬ್ಬುನ್ ಯುದ್ಧ ಕರ್ತಾ ಆಸ್ಸತಿ .ಅಭಿಮನ್ಯು ಕ ಸರ್ವಾನಿ ವೊಟ್ಟು ಜಾವ್ನ್ , ಘಾಯ ಕೋರ್ನು ನೆಲಾರಿ ಪೊಡ್ಚ್ಯೆ ತಶಿ ಕೆಲ್ಲೆ . ದ್ರೋಣಾಚಾರ್ಯನ ಹತ್ತಾಕ  ಬಾಣ ಮಾರ್ನ್ ಖಡ್ಘ ನಲಾರಿ ಪೋಡ್ಚ್ಯೇ ತಶಿ ಕೆಲ್ಲೆ . ಹತ್ತಾ  ಅಷ್ಶಿಲೆ ಗುರಾಣಿ ಘೇವ್ನ್ , ಎದ್ರಾ ಯೆವಚೆ ಬಾಣ , ಸುತ್ತು ತಗೆಲೆ ದಿಕಾನ ಜಾವಚೆ ಖಡ್ಘ ಪ್ರಹಾರು , ಚುಕ್ಕೋನ್ ಘೆವ್ಚ್ಯಾಕ ಪ್ರಯತ್ನ ಕರ್ತಾಚಿ ... ಆನ್ನೇಕ ಆಯುಧ ಖತಿರಿ  ಪೋಳಯಿತಾ ಅಷ್ಶಿಲೋ . ತೆದೊಳು ಭಿತರಿ ಕರ್ಣಾ ಲೆ ಬಾಣ ಯೇವ್ನ್ ಹತ್ತಾ ಅಷ್ಶಿಲೆ ಗುರಾಣಿ ಸಕಲ ಪೊಡಯಿಲೆ . ಅಧರ್ಮ ಯುದ್ಧಾ೦ತು ಅತ್ತ ಅಭಿಮನ್ಯು ನಿಶಸ್ತ್ರ ಝಲ್ಲೋ . .. ನಿರಾಯುಧ ಝಲ್ಲೋ . ತಯೀ೦ಚಿ ಮೋಣು ಪೊಳ್ಳೇಲೆ ರಥಾ ಚಕ್ರ ಘೇವ್ನ್ , ಆನ್ನೇಕ ಹತ್ತಾ೦ತು ಮೆಳ್ಳೆಲೆ ಗಧಾ ಘೇವ್ನ್ , ಅಶ್ವಥಾಮಾಲೆ ರಥಾ ಘೋಡೆ ವೈರಿ ಪಾಯು ದೊವೋರ್ನ್, ರಥಾರಿ ಚೋಣು ಅಶ್ವಥಾಮಕ ಮಾರುಂಕ ಲಗ್ಗಿ ಗೆಲ್ಲೊ . ತ್ಯೆ೦ಚಿ ವೆಳ್ಯೇರಿ ತಾಯೀ೦ಚಿ ಲಗ್ಗಿ ಅಶಿಲೋ ದ್ರೋಣಾಚಾರ್ಯನ ಅಭಿಮನ್ಯುಲೆ ಉಜ್ವೋ ಹಾತು ಕತ್ತೋರ್ನ್ ಘಲ್ಲೊ . ಅಶ್ವಥಾಮ ಭೀವ್ನ್ ರಥರಿ ದುಕೂನ್ ಉಡ್ಡುನ್ ಧಾವ್ನ್ ಗೆಲ್ಲೊ . ಉಜ್ವೋ ಹಾತು ನಾಶಿ , ಅಭಿಮನ್ಯು ರಥಾರಿ ದುಕೂನ್ ಸಕಲ ಪೊಳ್ಳೋ . ಸುತ್ತು ರಬ್ಬಿಲೇ ಕುರು ವೀರ ಖಡ್ಘ , ಭರ್ಚಿ , ಈಟಿ ನ ಮಾರ್ನ್ ಅಭಿಮನ್ಯು ಲೆ ಆಂಗ್ ಭರಿ ರಕ್ತ-ರಂಧ್ರ ಕೆಲ್ಲೆ . ಅಭಿಮನ್ಯು ನ " ಅಮ್ಮಾ " "ಅಪ್ಪಾ...  " " ಅಯ್ಯೋ "... ಮೋಣು ಉದ್ಗಾರ ಕಾಣಿ . ದಾಂತ ಚಬ್ಬುನ್ ನೆಲಾರಿ ಪೊಳ್ಳೆಲೆ ಏಕ ಗಧಾ ಧಾವೆ ಹತ್ತಾನಿ ಘೆವ್ನ್ ರಾಬ್ಲೊ . ಏಕ ಹತ್ತನಿ ಗಾಢ ಧೋರ್ನ್ , ದುಃಶ್ಯಾಸನಾ ವೈರಿ ಪೊಳ್ಳೋ . ಮಕ್ಷಿ ದುಕುನ್ ... ಶಕುನಿ ನ ಖಡ್ಘ ಪ್ರಹಾರು ಫಟೀ ವೈರಿ ಕೆಲ್ಲೆ ... ಅಭಿಮನ್ಯು ಅತ್ತ ನಿಶ್ಶಕ್ತಿ  ಜಾವ್ನ್ .. ಮತ್ತೆ ಘು೦ವ್ನ್ ಪೋಡ್ಚೆ ಭಿತರಿ ... ದ್ಧುಶ್ಯಾಸನಾನ ಅಭಿಮನ್ಯುಲೆ ಕಪಾಳ ಛಿದ್ರ- ಛಿದ್ರ ಜಾವ್ಚೆ ತಶಿ ಮತ್ತೇರಿ ಗಧಾ ಪ್ರಹಾರು ಕೆಲ್ಲೆ . ಅಭಿಮನ್ಯು ಕ ದೊಳೇಕಾಳೋಕು ಅಯಿಲೊ . ಕುರು ವೀರ ಇತ್ಲೆ ಲೋಕು ಅಭಿಮನ್ಯು ನ ಸಕಲ ಫೋಣ್  ಜೀವು ಸೊಡ್ಚೆ ತಾಯಿ ಖಡ್ಘ ಪ್ರಹಾರು ಕೆಲ್ಲೆ . ರಕ್ತ ಮಯ .. ಹಜಾರ ಹಜಾರ ಮಾರಣಾ೦ತಿಕ ಪ್ರಹಾರ ಘೇವ್ನ್ ... ಅಭಿಮನ್ಯು ನ ಸುತ್ತು ರಬ್ಬಿಲೇ ಕುರು ಸಂಬಂಧಿ ಲೋಕಾಂಕ ಪೋಳಯಿಲೆ . ತಾಗೆಲ್ ದೃಷ್ಟೀ೦ತ್ ವೀರ ಕ್ರೋಧ ಅನಿಕಯ್ ದಿಸ್ತಾಶಿಲೆ ... ದೊಳೆ ಧಾಂಕುನ್ ಸಕಲ ಪೊಳ್ಳೋ . ಸುತ್ತು ರಬ್ಬಿಲೆ  ಸೈನ್ಯ ಗಹ ಗಹ ನಿ ಹಾಸ್ಲೆ  ..  ಕರ್ಣ , ದ್ರೋಣ , ಅಶ್ವಥಾಮ ನ ಅಭಿಮನ್ಯು ಲೆ ವೀರ ಯುದ್ಧಾಕ ಮನಾಂತುಚಿ ಶ್ಲಾಘನ ಕೆಲ್ಲೆ . ಭಾರಥ ಯುವ ವೀರ ಸಿಂಹಾಲೆ ಪ್ರಾಣು ಅನಂತಾ೦ತು  ಲೀನ ಝಲ್ಲೆ . ಚಾರಿ ದಿಶೆಂತು ಅಭಿಮನ್ಯುಲೆ ಯುದ್ಧಾ ಕ ಉಠಾಯ್ಲೆ ಲೆ ತೂಫಾನ್ ಶಾಂತ ಝಲ್ಲೆ . ಸೂರ್ಯ ಭಗವಾನ್,  ಅಭಿಮನ್ಯುಲೇ ಮರಣ ಪೊಳೊನ್.. ದುಃಖ ಜಾವ್ನ್ ಅಸ್ತಮ ಝಲ್ಲೋ ಕೀ ಮೋಣು ದಿಸ್ಲೆ. ತ್ಯೇ ದಿವಸಾ ಯುದ್ಧ ರಾಬಲೆ . ಪಾಂಡವ ಯುವ ಕಿಶೋರು .. ಅಭಿಮನ್ಯು ಚಿರ ನಿದ್ದೆಕ ಗೆಲ್ಲೊ . ಅಭಿಮನ್ಯುಲೆ ಮರಣ ವಾರ್ತಾ ಪಾಂಡವಾಂಕ ಮೆಳ್ಳೆ . ಧರ್ಮಜಾಕ ಮಸ್ತ ದುಃಖ ಜಾಲ್ಲೆ . ನೆಲಾರಿ ಫೋಣು ಅಭಿಮನ್ಯು ಲೆ  ಮರಣಾಕ ಹಾಂವ ಕಾರಣ್ ಝಲ್ಲೋ ಮೂ ...  ಪಶ್ಚಾತ್ತಾಪಾರಿ ರಳ್ಳೊ . ದುಃಖ ಕಸಲೆ ಮೋಣು ಗೊತ್ತು ನಾತ್ತಿಲೆ ಭೀಮ ಸೇನಾ ಕ ಅಂತ ಕತ್ತರ್ಲೆಲೆ ಅನುಭವ ಝಲ್ಲೆ . ದೊಳೆಂತು ಉದ್ದಾಕ  ಯೇವ್ನ್ ಮನ ಭರಿ ರಳ್ಳೋ . ಉತ್ತರಾ - ಅಭಿಮನ್ಯುಲೆ , ವ್ಹರ್ಡಿಕಾ ಜಾವ್ನ್ ಏಕ ವರುಷ ತಾಯ್ ಪೂರ್ತಿ ಜಾಯ್ನಿ . ವಿರಾಟ ರಾಯು ಅನಿ ಸುದೇಶ್ಣಾ ದೇವಿ ಧೂವೆಲೆ ವೈಧವ್ಯ ಲೆಕ್ಕುನ್ ರೋಣು-  ರೋಣು ಮೂರ್ಚಿತ ಝಲ್ಲಿಂತಿ .  ಉತ್ತರ ಕುಮಾರಿ ... ಅಭಿಮನ್ಯುಲೆ  ಉಡ್ಘಾಸು ಕಡ್ತಾಚಿ ದುಃಖಾರಿ ...ಹೃದಯ ಅನಿ ಮನ ನ೦ಯ್ ಜಾವ್ನ್ ಹೊಳ್ಚೆ ತಶಿ ರಳ್ಳಿ . ತಿಕ್ಕಾ ಸಮಾಧಾನ ಕರ್ತಲಿ ಎಕ್ಲಿ೦ಯ್ ನಾ ಝಲ್ಲಿಂತಿ . ಸುಭದ್ರೆ ತಿಗೆಲೆ ಎಕ್ಲೊಚ್ಯ್ ಪೂತು ಅಭಿಮನ್ಯು ಕ " ಪುತಾ ಅಭಿಮನ್ಯು .... !ಏಕ ಪೋಟಿ ಉಟ್ಟಾ ರೇ ಬಾಳಾ ... ಮಿಗ್ಗೆಲೆ ಅನ್ನಾ ... ಏಕ ಪೋಟಿ ತುಗ್ಗೆಲ್ ತೊಂಡ ದಕ್ಕಯಿರೆ ರತ್ನಾ... ! ದ್ರೋಣಾ  ತೂ ಎಕ್ಲೊ ಬ್ರಾಹ್ಮಣ ವೇ .. ? ಅಧರ್ಮಿ ...ಧಾಹ್ ಪಂದ್ರಾ ಲೋಕಾನಿ ವೊಟ್ಟು ಜಾವ್ನು ... ಮಿಗ್ಗೆಲೆ ಪುತ್ತಾಲೆ ದಾರುಣ ಹತ್ಯಾ ಕೆಲ್ಲೆ ನವೇ .. ? ದಯಾ ಧಾಕ್ಷಿಣ್ಯ ನಾಶಿ ... ಹ್ಯೇ  ನಮೂನೆರಿ ಹತ್ಯಾ ಕೊರ್ಚೆ ವೇ .. ? ತೂ ಕಸಲೆ ನಮುನೆ ಬ್ರಾಹ್ಮಣು ತೂ ! " ಹರ್ದೇರಿ  ಮಾರ್ನ್ ಘೆವ್ನ್ ರೊಡ್ಚ್ಯೇ , ಕೊಣಾಕಯ್ ಪೊಳೋಚ್ಯಾ ಜಾಯ್ನಿ. ದ್ರೌಪದಿಕ ಕಷ್ಶಿ ಸಮಾಧಾನ ಕೋರ್ಚ್ಯೇ ಮೋಣು ಕಳ್ನಿ . " ಭೀಮ ಸೇನಾ ... ಅಭಿಮನ್ಯುಲೆ ಮರಣಾಕ ಹಾಂವಚಿ ಕಾರಣ .. ತುಗ್ಗೆಲ್ ಗಧಾ  ಘೆವ್ನ್ ಮಿಗ್ಗೆಲೆ ಮತ್ತೆ ಚೂರುಜಾವ್ಚೆ ತಶಿ  ಮಾರಿ ... ಮಕ್ಕಾ ದಿವಿಶಿ ಮಾರಿ ಭೀಮಾ .. !" ಮೋಣು  ಸಂಘುನ್ ಧರ್ಮಜಾನ  ಭೀಮಾಕ ಫೊಟೊನ್ ಧೋರ್ನ ರಳ್ಳೋ . " ಅಣ್ಣಾ .. ! ಧರ್ಮಜಾ .. ಆಮ್ಗೆಲೆ ಜೀವನಾಂತು ಕಿತ್ಲೆಕೀ ನಮೂನೆ ಕಷ್ಟ ಆಯ್ಯಿಲೆ ತೆದ್ನಾ ವಿಧಿ ವಿಧಿ ವಿಧಿ ಮೋಣು  ಸಂಘುನ್ ಅಂಮ್ಕಾ ಸಮಾಧಾನ  ಕರ್ತಶಿಲೋ ತೂ ... ಅತ್ತ ತೂಚಿ ಅಶಿ ಸಂಗ್ಲೇರಿ ಕಷ್ಶಿ ... ? ಕೌರವ ಶತ್ರು ಲೋಕಾಂಕ ಆಶ್ಚರ್ಯ ಜಾವ್ಚೆ ತಶಿ ಯುದ್ಧ ಕೋರ್ನ್ ... ಅಭಿಮನ್ಯು ವೀರ ಸ್ವರ್ಘಾ ಕ ಪಾವ್ಲಾ . ಅಮ್ಮಿ ಅಶ್ಶಿ ದುಃಖ ಕೆಲ್ಲೆಲೆ ನಿಮಿತ್ಯ ಅಭಿಮನ್ಯುಲೆ ಆತ್ಮಾಕ ಶಾಂತಿ  ಮೇಳ್ನಾಶಿ ವತ್ತಲೆ ... ಸಮಾಧಾನ ಕರಿ " ಮ್ಹಳ್ಳಲೊ ಭೀಮು . 

ಉಮಾಪತಿ