MAHABHARATHA  Part - 34  ( Konkani Bhashentu )

                               VIDURA NEETI     ವಿದುರ ನೀತಿ 

                 ಸಂಜಯು  ಉಪಪ್ಲಾವ್ಯ ದುಕೂನ್ ಧ್ರತರಾಷ್ಟ್ರಾಕ ಭೇಟಿ ಕರ್ತಾ . ದೃತ್ ರಾಷ್ಟ್ರ : " ಯೋ ಸಂಜಯಾ .. ! ಕಸಲೆ  ಜಲ್ಲೇ ... ?ಕಸಲೆ ಸಾಂಗ್ಲೆ ಯುಧಿಷ್ಠಿರಾನ ?

ಸಂಜಯ : " ಮಹಾರಾಜಾ ... ! ಧರ್ಮಜಾನ ಸಂಗ್ಲೆ ... ಧರ್ಮಾ ಪೋಷಿ ಹೊಡ ಅನಿ ಕಸಲೆಯ್ ನಾ ... ಧರ್ಮ ಪಾಲನ ಕೊರ್ಚೆ೦ತು ಪೂರ್ತಿ ಆನಂದ ಮೇಳ್ತಾ . ಹ್ಯೇ ಯಾತ್ರೆ೦ತು ಮಿಗೆಲೆ ಮನಾಂತು ಏಕ ವಿಷಯು ಆಯ್ಲಾ ಮಹಾರಾಜಾ ... ವೇಳು ಕೊರ್ನ್ ಸಂಗಚೆ ಸತ್ಯ .... ಅಸತ್ಯಾ ಪೋಶಿ , ಅನಿಕಯ್ ಹಾನಿಕಾರಕ ಜಾವ್ನ್ ಆಸ್ತಾ .. "

ಧ್ರತರಾಷ್ಟ್ರ: " ಸಂಜಯಾ .. ! ಸತ್ಯಚಿ ಸಾಂಗ ... ಮಕ್ಕಾಯಿ ಸತ್ಯ ಉಲ್ಲೋಚ್ಯಾ  ಕಳ್ತಾ . ತುಗ್ಗೆಲ್ ಕಸಲೆ ಸತ್ಯ ? ಸಾಂಗ "

ಸಂಜಯ : " ರಾಜಾ .. ! ತುಗೆಲಿ ಕರ್ಮ .. ತುಗೆಲಿ ಧರ್ಮಾಚ್ಯೆ ವಾಟ ಕತ್ತರ್ತಾ ಅಸ್ತ ... ತುಗೆಲ್ ಪುತ್ತಾಲೆ ವ್ಯಾಮೋಹಾಂತು .. ತುಗೆಲೆ ಆತ್ಮಾಕ ಘಾಯು ಝಲ್ಲಾ ...ತುಗೆಲೆ ಆತ್ಮ ರಕ್ಷಣಾ ಕರಿ ಮಹಾರಾಜಾ " 

ಧ್ರತರಾಷ್ಟ್ರ : " ಸಂಜಯಾ .. ! ತೂವೈ ಮಿಗೆಲ್ ವೈರಿ ಆರೋಪ ಘಲ್ತಾ  ವೇ .. ? " 

ಸಂಜಯ : " ನಾ .. ರಾಜಾ .. ! ಹಾಂವ ತುಗೆಲ್ ವಯಿರಿ ಆರೋಪ ಘಾಲ್ನಾ .. ಹ್ಯೇ ಯೆಕ  ಮನಾ ಆಯ್ಯಿಲೆ ವಿವರಣಾ ... ಹ್ಯೇ ಜನ್ಮಾಂತು ಮಿಗೆಲೆ ಉತ್ತರ ಆಯಿಕ ನಾ ಝಲ್ಲೇರಿ ಯೆವಚೆ ಜನ್ಮಾಂತು .. ಇತಿಹಾಸಾಂತು ... ಪದೇ ಪದೇ ದೋಷು ತುಗೆಲೊ ಮೋಣು ಅಯಿಕುಕಾ ಪೊಡ್ತಾಲೆ ... ತೂ ಲೋಕಾಲೇ , ಶುಭ ಚಿಂತಕಾಲೆ , ಉತ್ತರ ಆಯಿಕನಾ ... ಇಂದ್ರಪ್ರಸ್ಥ ಪಾಂಡವಾಂಕ ದೀವ್ನ್ ಸೋಡಿ .. ಮಹಾರಾಜಾ .. ! ಹಾಂತುಚಿ ರಾಜ್ಯಾಚೆ ಹಿತ , ಪ್ರಜಾ ಸಂತೋಷು ಅಸ್ಸ . "

ಧ್ರತರಾಷ್ಟ್ರ : " ಕಿತ್ತ್ಯೇ .. ? ಯುಧಿಷ್ಠಿರಾನ .. ಯುದ್ಧಾ ವಿಷಯು ಕಾಣ್ ಭಿವಯಿಲಾ ವೇ ಆಂಮ್ಕಾ .. ? "

ಸಂಜಯ : " ಭೀವೊಚ್ಯೇ ... ! ನಾ..  ನಾ ... ಮಹಾರಾಜಾ ... ಯುಧಿಷ್ಠಿರಾ ಸ್ವಭಾವ ಭೀವೊಚ್ಯೆ ನಯ್ . ತಾಣೆ ಇತ್ಲೆಚಿ ಸಾಂಗ್ಲಾ ... ' ಜ್ಯೇಷ್ಠ ಪಿತಾಲಗ್ಗಿ ಸಾಂಗ .. ಯುದ್ಧ ಅನಿ ಶಾಂತಿ ಕ ..ದೊನ್ನಿಕಯ್ ತಯ್ಯಾರ್ ಆಸ್ಸ ಮೋಣು ' ಏಕತ್ ವೆಳ್ಯೇರಿ ಯುದ್ಧಾಕ ಆದೇಷು ದಿಲ್ಲೇರಿ ಯುದ್ಧ ಝತ್ತಾ ... ನಾತ್ಲೆರಿ ಶಾಂತಿ ಝತ್ತಾ " ದೃತರಾಷ್ಟ್ರಾಕ ಕಸಲೆ ಸಾಂಗ್ಚೆಮೋಣು ಕಳ್ನಿ . ಏಕ ಮಿನುಟ್ ನುತ ರಾಬ್ಲೊ .

ಧ್ರತರಾಷ್ಟ್ರ : " ತೂ ಹ್ಯೇ ದೀರ್ಘ ಪ್ರಯಾಣ ಕೊರ್ನ್ ಆಯಾಸು  ಪಾವ್ನ್ ಆಸ್ತಾಲೊ ... ವಸ ಸಂಜಯಾ ... ವೊಚ್ಚುನ್ ಆರಾಮ ಕರಿ . ಫಲ್ಲೆ  ರಾಜ ಸಭೆ೦ತು  ಅಯಿಕತಾ "

ಸಂಜಯ : " ಆಜ್ಞಾ ಮಹಾರಾಜಾ " ಮೋಣು ಸಂಗುನ್ ಸಂಜಯ ಚಮ್ಕಾಲೊ .

                       ಧ್ರತರಾಷ್ಟ್ರಾಲೆ ಮನ ಚಂಚಲ ಝಲ್ಲಾ ... ಯುದ್ಧ ಕೀ ... ಶಾಂತಿ .. ? ಧರ್ಮ ಶಾಸ್ತ್ರ ವಿಶಾರದ ವಿದುರಾಕ ಅಪ್ಪಯಿ ಕರೈಶಿಲೆ . ಯುದ್ಧ ಚುಕ್ಕನಾ ... ಕೌರವ ನಾಶ ಜಾವ್ಚ್ಯೇ ತಾಯ್ ... ಪಾಂಡವ ವಿಶ್ರಾಮ ಘೇನಾತಿ ಮ್ಹಳ್ಳಲೊ ಅಭಿಪ್ರಾಯು ಧ್ರತರಾಷ್ಟ್ರಾಲೆ ಮನಾಂತು ಅಯಿಲೆ .... 

ಧ್ರತರಾಷ್ಟ್ರ: " ಯೋ ವಿದುರಾ ... ಬಯಿಸ .. ಸಂಜಯ್ ಯುಧಿಷ್ಠಿರಾಲೆ ಸಂದೇಷು ಘೆವ್ನ್ ಅಯಿಲಾ . ಪೂರ್ತಿ ವಿಷಯು ಸಂಗನಿ ... ಝಲ್ಲೆರಿ ..' ಹಾಂವೆ ಆದೇಷು ದಿಲ್ಲೆರಿ ಯುದ್ಧ ಝತ್ತ್ತಾ... ನಾತ್ಲೆರಿ ಶಾಂತಿ ಝತ್ತಾ ' ಮೋಣು ಸಾಂಗ್ತ ಖೈ .. ಫಲ್ಲೆ  ರಾಜ ಸಭೆ೦ತು ಪೂರ್ತಿ ವಿಷಯು ಐಕುಯಾ ಮೋಣು ಸಂಜಯಾಕ ಪೆಟೋನ್ ದಿಲ್ಲೆ . ಮಿಗೆಲೇಚಿ ಚೂಕಿ ಮೋಣು ಸಂಜಯ ಸಾಂಗ್ತಾ ... ಹಾಂವೆ ಧರ್ಮಾರಿ ಚೋಲ್ಕಾ ಮೋಣು ಮಕ್ಕಾ ಬುದ್ಧಿವಾದು ಸಂಗ್ತಾ .. ವಿದುರಾ ! ಪೋಡ್ಚಿ ನೀದ ಮಕ್ಕ ಸೋಣು ಗೆಲ್ಲಿ . ಮನ ಉದ್ವಿಗ್ನ ಝಲ್ಲಾ . ನೀದ ಯೇನಾ ... ಕಸಲೆಯ್ ನೀತಿದಾಯಾಕ್ ವಿಷಯು ಸಾಂಗ " . 

ಸಂಜಯ್ : " ರಾಜಾ .. ! ಸಂಜಯ್ ಅವಶ್ಯ ಜಾವ್ನ್ ತುಗ್ಗೆಲ್ ಹಿತಾಕ ಸಂಗುನ್ ಆಸ್ತಾಲೊ ಮೋಣು ಲೆಕ್ತಾ . ತೂಗೇಲ್ ಸಾರಥಿ ಜಾವ್ನ್ , ತಾಣೆ ತಾಗೆಲ್ ಧರ್ಮ , ಕತವ್ಯ ಕೊರ್ನ್ , ಉಲ್ಲೋನ್ ಆಶಾ ಪೂರೋ . ಬ್ರಾತಾಶ್ರೀ ... ತುಂವೇ ಪಾಂಡವಾ೦ಕ ಪದೇ ಪದೇ ಮಸ್ತ್ ಅನ್ಯಾಯ್ ಕೆಲ್ಲಾ . ಹಸ್ತಿನಾವತಿ ವಿಭಜನ ಕೊರ್ನ್ ತೂಗೇಲೆ ರಾಜ್ಯ ಅ ನಿ ಯುಧಿಷ್ಠಿರಾ ಕ  ಘೋರ ಅನ್ಯಾಯು ಕೆಲ್ಲಾ .. ! ಆಲೋಚನಾ ಕರಿ .. ರಾಯು ಜಾವ್ನ್ ರಾಜ್ಯಾಚೆ  ಸೀಮಾ ಜಾಗ್ರತೆ ಕೋರ್ಕಾ ಅಶಿಲೆ ... ವಿಭಜನ ಕೊರ್ನ್ ರಾಜ್ಯಾಕ ಅನ್ಯಾಯ ಕೆಲ್ಲಾ . ಮಹಾರಾಜಾ .. ! ಯುಧಿಷ್ಠಿರಾನ ... ಹ್ಯೇ ತೂಗೇಲೆ ಸರ್ವ ರಾಜ ನೀತಿ ಸಹನ ಕೆಲ್ಲಾ . ತುಕ್ಕಾ ತುಗ್ಗೆಲ್ ಪುತ್ತಾಕ ರಾಯು ಕೋರ್ಕಾ ಮೋಣು ಮನಾಂತು ಅಶಿಲೆ . ಪುತ್ರ ವ್ಯಾಮೋಹಾ ನಿಮಿತ್ಯ ತೂ೦ವೆ ರಾಜ್ಯ ವಿಭಜನ ಕೆಲ್ಲೆ . ತೂ೦ವೆ ಹಸ್ತಿನಾವತಿ ಹಿತ , ಮನಾ ದೊವೊರ್ನ್ ಹ್ಯೇ ನಿರ್ಣಯ್ ಕರ್ನಿ . ಧುರ್ಯೋಧನಾ ಕ ರಾಯು ಕೊರ್ಚೆ , ತಾಗೆಲ್ ಹಿತ ಮನಾ ದೊವೊರ್ನ್ ಕೆಲ್ಲೆಲೆ . ಹಸ್ತಿನಾವತಿ ತುಕ್ಕಾ ಕೆದನಾಯ್ ಮಾಫಿ ಕರ್ನಾ . "

ಧ್ರತರಾಷ್ಟ್ರ: " ವಿದುರಾ ... ! ತುಂವಯ್ ಅಷಿ ಉಲ್ಲಯಿತವೇ ... ? "

ವಿದುರ : " ಹಾಂವ ಖಂಡಿತ ಮಾಫಿ ಕರ್ನಾ ಮಹಾರಾಜಾ ... ಮುಕಾರಿ ತುಕ್ಕಾ ...  ತೂ೦ಚ್ಯಿ ಕ್ಷಮ ಕೊರ್ನ್ ಗೆವ್ಚ್ಯಾ ಸಾಧ್ಯ ನಾಶಿ ಕೆಲ್ಲಾ . ಮಿಗೆಲಿ ಅಮ್ಮಾ  , ತುಗೆಲಿ ಮಾತೃ ಶ್ರೀ ಲೆ ದಾಸಿ ಜಾವ್ನ್ ಅಶಿಲಿ ... ಹಾಂವ ಹ್ಯೇ ದಾಸ್ಯ ಬಂಧನಾ೦ತ್ ಪೊಳ್ಳಾ ಮಹಾರಾಜಾ ... ಅತ್ತ , ತೂ ನ್ಯಾಯ ಕರಿ ... ನಾತ್ಲೆರಿ ಅನ್ಯಾಯ ಕರಿ ... ಮಕ್ಕಾ ..  ತುಕ್ಕ ಸೋಡೂ  ಜಾಯ್ನಾ ... " 

ಧ್ರತರಾಷ್ಟ್ರ: " ಉಲ್ಲಯಿ ... ಉಲ್ಲಯಿತಾ ರಾಬ .. ವಿದುರಾ ! ಸಾಂಗ್ತಾ ರಾಬ ... ಆಜಿ ತುಗ್ಗೆಲ್ ಉತ್ತರಂ ಮಕ್ಕಾ ಕೋಡು ಶೀ .. ದಿಸ್ಸನಾ ..! ಅನಿ ಹಾಂವೆ ಕಸಲೆ ಪಾಪ ಕೆಲ್ಲಾ .. ?

ವಿದುರ : " ಕಸ್- ಕಸಲೆ ಮೋಣು ಸಾಂಗೂ .. ? ಲಾಕ್ಷ ಗೃಹ , ದ್ಯೂತ , ದ್ರೌಪದಿ ವಸ್ತ್ರ ಹರಣ , ಹ್ಯೇ  ಪೂರಾ ದುಃಖಾ ವಿಷಯು ಆನಿ ವಿಸೋರುಂಕಯೀ ಜಾಯ್ನಾ. ತುಗ್ಗೆಲ್ ಆತ್ಮಾ೦ತು ... ರಾಜ ಸಭೆ೦ತು ತಿಕ್ಕಾ ಝಲ್ಲೆಲೆ ಅಪಮಾನ .. ತೀಣೆ ನಿಂಮ್ಗಿಲೆಲೆ ನ್ಯಾಯ .. ಪ್ರಶ್ಣೊ ಉಠಾನ್ ಯೇವ್ನ್ ನಿಂಮ್ಗಿನಾ ... ? ಜಲ್ಲೆಲೆ ನಿಮಿತ್ಯ ಭ್ರಾತಶ್ರೀ .. ಪುತ್ರ ವ್ಯಾಮೋಹ ಸೋಣು , ರಾಜ್ಯಾ ಖತೀರಿ ನ್ಯಾಯ ಕರಿ . ಇಂದ್ರಪ್ರಸ್ಥ ವಾಪಸ್ ಕೊರ್ನ್ ... ದ್ರೌಪದಿಲೆ ಮನ ಖುಷಿ ಕರಿ . ತೀಣೆ  ಝಲ್ಲೆಲೆ  ಅಪಮಾನ್ ವಿಸೋರ್ನ್ ಖುಶೇರಿ ಅಸ್ಲೆರಿ .. ತುಗ್ಗೆಲ್ ಪುಣ್ಯ ಮೋಣು ಲೇಕ . ನಾತ್ಲೆರಿ ಹ್ಯೇ ಹಸ್ತಿನಾವತಿ ನಾಶ ಝತ್ತಲೆ ... ! ಹ್ಯೇ  ಕುರು ವಂಶ ಧ್ವ೦ಸ  ಝತ್ತಲೆ . ಮಹಾರಾಜಾ .. ! ತುಗೆಲೆ ಮಹಾತ್ವಾಕಾಂಕ್ಷ  ಸೋಡಿ ... ತ್ಯೆಚಿ ತುಗ್ಗೆಲ್ ಶತ್ರು . ಅನಿ ತುಗೆಲೆ ಶತ್ರು ನಿವಾಸ ಸ್ಥಾನೇರಿ , ಕೆದನಾಯ್ ಎಕ್ಲೆನ ವೊಚ್ಚು ನಜ್ಜ ... ಆನಿ ತುಗ್ಗೆಲ್ ರಾಜ ..  ಸ್ಥಾನಾರಿ ರಬ್ಬುನ್ ಪುತ್ರ ವ್ಯಾಮೋಹ ಕೆದನಾಯ್ ಲೆಕ್ಕು ನಕ್ಕಾ . ಹಸ್ತಿನಾವತಿ ತುಗೆಲೆ ದಾಯಿತ್ವ ಜತ್ತಾ .. ಕರ್ತವ್ಯ ಜತ್ತಾ . 

ಧ್ರತರಾಷ್ಟ್ರ : " ಆನಿ ...  ಧುರ್ಯೋಧನ .. ? " 

ವಿದುರ : " ತ್ಯೋ ತುಕ್ಕಾ ಲಗ್ಗಿಲೋ ಶ್ರಾಪ .. ಅನಿ ರೋಗು .. ಉಡ್ಗಾಸು  ಅಸ್ಸೋ ... ರೋಗು .. ! "

ಧ್ರತರಾಷ್ಟ್ರ : " ವಿದುರಾ .. ! ಆಜಿ ಮಿಗೆಲೆ ಮನಾಂತು ಏಕ್ ನಮುನೆ ಕ್ಷೋಭ ಭರಲಾ  ... ಮನಾ ಸಮಾಧಾನ ಜಾವಚೆ ವಿಷಯು ಉಲ್ಲಯಿ .. " 

ವಿದುರ : " ಮಹಾರಾಜಾ  .. ! ಸಾಮ್ರಾಜ್ಯ ಶಾಸನ ಕೊರ್ಚೆ ಅಧಿಕಾರ ,  ಧುರ್ಯೋಧನ , ದುಃಶ್ಯಾಸನಾ , ಕರ್ಣ , ಶಕುನಿಲೆ ಹತ್ತಾ೦ತು ದಿಲ್ಲಾ ... ಪ್ರತಿ ದಿವಸ ಭಯಂಕರ ಕಷ್ಠ ಜಾವ್ನ್ ದಿಸ್ತಾ . ಹಕ್ಕಾಚಿ ಪರಾವಲಂಬನ ಜೀವನ ಮ್ಹಣತಾತಿ . ಅಶಿ ಅಶಿಲೇಂಕ ಹ್ಯೇ ಸ್ಥಿತಿ ಕೊಣಾಕಯ್  ಚುಕ್ಕಿಲಿ ನಯ್ ಮಹಾರಾಜಾ . ದುಸ್ರೇಂಗೆಲೆ ಆಸ್ತಿ ತಂಗೆಲ್ ಆಸ್ತಿ ಜಾವ್ಕಾ ಮೋಣು ಲೆಕ್ತಾಲೆ .. ಪರ ಸ್ತ್ರೀ ಸಂಗಾಕ ಆಶಿ ಕಡ್ತಾಲೆ .. ಚಾಂಗ ಲೋಕಾಂಕ  ದೂರ ಜಾಲ್ಲೆಲೆ ... ಮನಾ ಶಾಂತಿ ನಾಶಿ ದುಃಖಾರಿ ,  ಭಂಯ್ಯಾ ಜೀವನ ಕರ್ತಾತಿ . ಅಧಿಕಾರ ಕಾಂಕ್ಷ  ಅಶಿಲೆಂಕ , ಕೆದ್ನಾಯ್ ಫಟ್ಟಿ ಉಲ್ಲಯಿತಾಲೆಂಕ , ಆಳ್ಶ್ಯಾಪಣ ಕರ್ತಲೆಂಕ , ಜುಗಾರಿ ಲೋಕಾಂಕ , ಚಂಗ್ಪಣ ಈರ್ಷ್ಯಾ ಕರ್ತಾ ಲೆಂಕ , ಅನುಮಾನ ಕರ್ತಾಚಿ  ಜೀವನ ಕರ್ತಾಲೆಂಕ , ದರಿದ್ರ ಲಗ್ಗಿಲೆ ಮನ್ಶ್ಯ೦ಕ , ಕೆದನಾಯ್ ಮನಾ ಶಾಂತಿ ಅಸ್ಸ ನಾ ....  ಸಂತೃಪ್ತ ಜೀವನ ಕರ್ತಾಲೆಂಕ , ತ್ಯಾಗ ಬುದ್ಧಿ ಆಶಿಲೇ೦ಕ , ಸುಖ ದುಖಾ ಭಾರು ದೇವಾ ಲಗ್ಗಿ ಸೊಡ್ತಾ ಲೇಂಕ , ಚಾಂಗ ದೋಸ್ತ ಅಶಿಲೆಂಕ , ಸುಶೀಲ ಬಾಯ್ಲ್ ,  ಬುದ್ದೋ೦ತ  ಚೆರ್ಡು೦ವ , ಬಂಧು ಮಿತ್ರಾ೦ಕ  ಮಮಕಾರು ದಕ್ಕಾಯಿತಾಲೆಂಕ , ಕಾಲು ವೇಳು ಘಡಿ ಜ್ಞಾನ ಅಶೀಲೇಂಕ , ಮಾತ್ರ ಸುಖಾರೀ ಜೀವನ ಕೊರ್ಚೆ ಭಾಗ್ಯ ಮೆಳ್ತಾ . ತನ್ನಿ ಕಷ್ಟಾಂತು ಸುಖ ಪೊಳೈ ತಲೆ ಲೋಕು ... ಆನಂದಾರಿ ಜೀವನ್ ಕರ್ತಾತಿ .. 

                   ಅಜ್ಞಾನಿ ಜಾವ್ನ್ ಅಶಿಲೋ ಪಂಡಿತ , ವೂಹಾ ಲೋಕಾಂತು ಜೀವನ ಕರ್ತಾಲೊ , ದುಸ್ರೆನಿ ದಿಲ್ಲೆಲೆ ದಾನ - ಧರ್ಮಾರಿ ಜೀವನ ಕರ್ತಾಲೊ , ಮಸ್ತ ಪೊಟ್ಟಾ  ಭೂಖ ವಾಡ್ಡೋನ್ ಘೆತ್ತಿಲೊ , ಜಿಬ್ಬೇ ರುಚಿ , ಪಂಚ ಇಂದ್ರಿಯಾ೦ತು ಅತೀ ರುಚಿ-ಅಭಿರುಚಿ ಸದಾ ಮನಾ ದೊವೋರ್ನ್ ಘೆತ್ತಿಲೊ , ಕೇದಾನಯ್ ಶಬ್ದ ಅಪಾರ್ಥ ಕರ್ತಾಲೊ , ಹಾಂಗೇಲೆ ತಾಂಗೆಲೆ ಘರಾ ಜೇವಣ ... ಧರ್ಮಾ ಖಾವ್ನು ಜೇವ್ನು ನೀದ  ಕಾಡ್ತಾಲೊ , ದುಸರೆ  ಘರಾ ಖಬ್ರೆಂತು ಆಸಕ್ತಿ ಘೆತ್ತಲೋ , ... ಕೆದನಾಯ್ ಉದ್ಧಾರು ಜಾಯ್ನಾಮಹಾರಾಜಾ ! ದೇವು ದೈವಾಂಕ ನಂಮ್ಗನಾ ನಾತ್ತಿಲೊ , ಗುರು ಚರಣಾಂಕ ಪಾಯ್ ಪಣಾ ನಾತ್ತಿಲೊ ಕಿತ್ಲೆಯ್ ಧನಿಕ ಜಾವ್ನ್ ಅಸ್ಲೆರಿಯಿ .. ಅಶಾಂತ ಮನಾ ನಿಮಿತ್ಯ ...  ಬಾಯ್ಲ್ ಚೆರ್ಡುವಾಂಗೆಲೆ ಪ್ರೀತಿ ಮಮಕಾರ ದುಕುನ್ ದೂರ ಝತ್ತಾ . ಸಮಸ್ತ ಕಾರ್ಯ , ಕರ್ತಾ , ಕರ್ಮ , ಕ್ರಿಯಾ ... ಅಪ್ಪಣಾ  ..,  ನಿಮಿತ್ಯ ಮಾತ್ರ ಮೋಣು ಮನಾ  ಲೆಕ್ತಾಲೊ , ದುರಹಂಕಾರಿ ಜಾವ್ನ್ ... ಕಡೆರಿ ಪಿಸ್ಸೋ ಜಾವ್ನ್ ... ಹರಿ ಗುರುಕ ದೂರ ಜಾವ್ನ್ ... ಇಹಲೋಕ ಪರಲೋಕಾ ದುಕೂನ್ ದೂರ ಝತ್ತಾ .

                        ಮಹಾರಾಜಾ .. ! ಫಟ್ಟಿ ಸಾಂಗ್ತಾಲೊ ಗುರು , ಸುಖಾಭಿಲಾಷಿ ಅಶಿಲೋ ಭಾವು , ತಾಗೆಲ್ ಘರ್ಲೆಗಿ ... ತಾಣೆಚಿ ಚೊರ್ಚೆ , ನಾತ್ಲೆರಿ ಬಾಯ್ಲಾನಿ ಚೊರ್ಚೆ , ಚಾಂಗ ಗೂಣ .. ವಿನಯ ನಾತ್ತಿಲೊ ಪೂತು , ಆನು ಅಮ್ಮಾಕ ಮರ್ಯಾದಿ ದೀನಾ ನಾತ್ತಿಲೆ ಧೂವ , ಚೆರ್ಡು೦ವ , ಕಷ್ಟಾ೦ತು ಆಶ್ರಯ ದೀನಾ ನಾತ್ತಿಲೆ ಬಂಧು , ಕಷ್ಟಾ ವೆಳ್ಯೇರಿ ಹಾತು ಧರ್ನಾ ನಾತ್ತಿಲೊ ಮಿತ್ರ೦ , ಉದ್ದಾಕ ನಾತ್ತಿಲೊ ಗಾಂವು , ಸೂಖ ದೀನಾ ನತ್ತಿಲೆ ದುಡ್ಡು ಬದಿಕ , ಆರೋಗ್ಯ ದೀನಾ  ನಾತ್ತಿಲೆ ಜೇವಣ ... ಇತ್ಲೆಕಯ್ ಹೊಂದುನ್ ಜೀವನ್ ಕೊರ್ಚೆ ಬದ್ಲಾಕ ... ಹ್ಯೇ ವಿಷಯಾಂತು ದೂರ ಆಸ್ಸುಚೆ ಚಾಂಗ .

                        ಮಹಾರಾಜಾ .. ! ಹ್ಯೇ ಲೋಕಾಂತ್ ಸುಖಾಚೆ ಸಹ ಮಾರ್ಗ ಅಸ್ಸ . ಪ್ರತೀ ದಿವಸು ದುಡ್ಡ್ವಾ ಸಂಪಾದನಾ ...  ಆರೋಗ್ಯ ವಂತ್ ಜಾವ್ನ್ ಅಸೂಚೆ , ಕೆದ ನಾಯ್ ಪ್ರೀತಿ ಕರ್ತಾಲಿ ಚಂದಿ  ಬಾಯ್ಲ್ಯಾ ....  ಮೃಧು ಮಧುರ ಉಲ್ಲಯಿತಲೆ ಮಿತ್ರ ವೃಂದ ....  ಸಂಗಿಲೆ ಉತ್ತರಂ ಅಯಿಕುಚೆ .. ಪಾಲನಾ ಕೊರ್ಚೆ ಚೆರ್ಡು೦ವ ...  ಧನ ಸಂಪಾದನೆ ಕ ಉಪಯೋಗ ಜಾವಚೆ ವಿದ್ಯಾ ಬುದ್ಧಿ ಶಕ್ತಿ ಆರೋಗ್ಯ ... ಆನಿ ತೊಂಡಾರಿ ಸದಾ ಹಾಸು . ಹ್ಯೇ ಸಹ ವಿಷಯಾಂತು ಏಕ ವಿಷಯು ಅಸ್ಲೆರಿಯೀ ; ಘರಾ ಯಜಮಾನು ಸೂಖ ಪಾವತಾ .ಹ್ಯೇ ಪೂರಾ ವಿಷಯು ಅಶಿಲೋ ...  ಕುಬೇರಾ ಪೊಶಿ ಶ್ರೀಮಂತ ಮೊಣೋನ್ ಘೇತ್ತಾ . 

                       ಮಹಾರಾಜಾ .. ! ಸ್ನೇಹ ಕೊರ್ಚೆ ಝಲ್ಲೆರಿ ... ವೈರತ್ವ ಬಾಂಧುನ್ ಘೆವ್ಕಾ ಝಲ್ಲೆರಿ ... ಆಮ್ಗೆಲೆ ಸಮಾನ ಜಾವ್ನ್ ಅಶಿಲೆ ಜನಾ ಲಗ್ಗಿ ಕೋರ್ಕಾ . ಆಮ್ಗೆಲೆ ಪೊಷಿ ಊಣೆ ದರ್ಜೆ ಲೋಕಾ ಲಗ್ಗಿ ... ನಾತ್ಲೆರಿ ಆಮ್ಗೆಲೆ ಪೋಷಿ ಶ್ರೀಮಂತ .. ಧನವಂತ  , ಬಲವಂತ ಜನಾ ಲಗ್ಗಿ ಬಂಧುತ್ವ .. ಸ್ನೇಹ .. ವೈರತ್ವ ಕೋರು ನಜ್ಜ .   ಬಂಧು , ಆಪ್ತ , ಅಧಿಕಾರಂತ್ ಅಶಿಲೆ ಲೋಕಾಂಕ ದುಡ್ಡು ಊಶಿಣೆ ರೂಪಾರಿ ದಿವ್ವು ನಜ್ಜ . ಸಹಾಯು ಕೋರು ನಜ್ಜ. ನಿಮ್ಗುಚೆ  ತಶಿ ಕಸಲೆಯ್ ವಸ್ತು ದಿವ್ಚ್ಯಾ ನಜ್ಜ . ತಾಜ್ಜೆ ಪ್ರತಿಫಲಾ ಆಶಿ ನಾತ್ಲೆರಿ ಮಾತ್ರ ಕಸಲೆಯ್ ದೀವ್ಯೆತ . ನೀದ , ಆಹಾರ್,ಸಂಭೋಗು .. ಹ್ಯೇ ತೀನಿ ವಿಷಯಾಂತ್ ನಿಯತ್ತಿ,ನೇಮು,ನಿಯಮ ಅಸ್ಸುಕಾ. ಕೆದನಾಯ್ ಅತೀ ರೂಪಾರಿ ಅಸ್ಸು ನಜ್ಜ . ಕೆದ ನಾಯ್ ಊಣೆ ಮೋಣು ಸಂಗ್ಚೆ ತಶಿ ಅಸ್ಸು ನಜ್ಜ. ಹ್ಯೇ  ತೀನಿ ವಿಷಯಾಂತ್ ಖಂಚೆಯ್ ಏಕ ವಿಷಯಾಂತ್ ದಾಸು ಝಲ್ಲಲೊ ಕೆದ ನಾಯ್ ಉದ್ಧಾರು ಜಾಯ್ನಾ.

                                     ರಾಜಾ ... !  ದಾನ ಧರ್ಮ ಅಯೋಗ್ಯ ಲೋಕಾಂಕ ಕೋರು ನಜ್ಜ . ಧುರ್ಭಳೆ೦ಕ ಕೊರ್ಯೆತ ಝಲ್ಲೆರಿ... ಭಿಕ್ಷಾ ಏಕ ವೃತ್ತಿ ಜಾವ್ನು ಪೋಟ್ ಭರ್ತಲೆ ಲೋಕಾಂಕ ದಾನ ಕೆಲ್ಲೇರಿ ಪುಣ್ಯ ಪ್ರಾಪ್ತಿ ಜಾಯ್ನಾ . ಜ್ಯೋತಿಷ್ಯ ಸಾಂಗ್ತಾಲೆ , ವಾಸ್ತು ಶಾಸ್ತ್ರ ಸಾಂಗ್ತಾಲೆ , ಲೋಕಾಂಕ ದಾನ ಕೊರ್ಚೆ ತಶಿ ನಾ . ವೇದ ಪಂಡಿತಾಂಕ , ವೇದ ವಿದ್ಯಾಭ್ಯಾಸ ಕರ್ತಲೆ೦ಕ , ಬ್ರಹ್ಮ್ಮಚಾರಿಕ , ಯಜ್ಞ ಕಾರ್ಯಾಂತು ಜೀವನ ಕರ್ತಲೆಂಕ , ದೈವ ಅರ್ಚನೆಂತ ಜೀವನ್ ಕರ್ತಾಲೆಂಕ ,ದಾನ ಧರ್ಮ ಕೊರ್ಯೆತ .ವಿದ್ಯಾಭ್ಯಾಸ ಕರ್ತಲೆಂಕ ಅನ್ನದಾನ , ವಟ್ಟೇರಿ ವತ್ತ ಲೇಂಕ  ಜಲ ದಾನ , ಧುರ್ಭಳೆ೦ಕ ಭೂ ದಾನ , ಬ್ರಾಹ್ಮ್ಮಣಾ ಕ ಗೋ ದಾನ, ಪುಣ್ಯ ವತೀ೦ಕ ವಸ್ತ್ರ ದಾನ ಕೊರ್ಚೆ ನಿಮಿತ್ಯಸ್ವರ್ಘ ಪ್ರಾಪ್ತಿ ಝತ್ತಾ. ಮಧ್ಯ ಪಾನ ಕರ್ತಲೆಂಕ , ಮಸ್ತ್ ಖತ್ತಲೇ ಲೋಕಾಂಕ ದಾನ ಕೋರ್ಚ್ಯಾ ನಜ್ಜ . ವ್ಯಭಿಚಾರಿ ಜಲ್ಲೇರಿಯಿ , ಅಧರ್ಮಿ ಜಾವ್ನ್ ಅಸ್ಲೆರಿಯೀ , ಮಧ್ಯ ಪಾನಿ ಜಲ್ಲೆರಿಯಿ , ಮ್ಲೇಚ್ಛ್ ಜನಾಲೆ ಸಂಪರ್ಕ ಅಸ್ಲೆರಿಯೀ , ಕರ್ಮಿಷ್ಟು ನಾತ್ಲೆರಿಯೀ , ಸಂಧ್ಯಾ ವಂದನಾ ಕರ್ನಾ ನಾತ್ಲೆರಿಯೀ .. ವೇದ ಧರ್ಮ ವಿಮರ್ಶಾ ಕರ್ತಾಲೊ ಅಸ್ಲೆರಿಯಿ , ಬ್ರಾಹ್ಮ್ಮಣ ಸಂಸ್ಕಾರ ನತ್ತಿ ಲೆಂಕ ( ನಿಡ್ಲಾ  ಕುಂಕುಮ , ಜನ್ನುವೆ , ಕುರ್ಟಾ ಮುಂಜಿ ದಾರು , ಕನ್ನಾ ಭ೦ಗರ , ಕಾಸು ನೆಸ್ಸುನ್ ಖಂದೇರಿ ಶಾಲು ಇತ್ಯಾದಿ ) ಬ್ರಾಹ್ಮ್ಮಣ  ಜಲ್ಲೆರಿಯಿ .. ಕೆದ ನಾಯ್ ದಾನ ದಿವ್ವು  ನಜ್ಜ . ತಾಂಕಾ ಕೆದ ನಾಯ್ ವಂದನ ಕೋರು ತಾಯ್ ನಜ್ಜ .ತಸಲೆಂಕ  ಪಿತೃ ಕಾರ್ಯಾ ಕ ಅಪ್ಪೋಚಾ ನಜ್ಜ .. ಮಹಾರಾಜಾ ..! ಆಯೀಕ , ಅಸಂತೃಪ್ತಿ , ಹಗೆ ಸ್ವಭಾವು ,ಕೋಪು , ಪ್ರತೀ ವಿಷಯಾಂತ್ ಅನುಮಾನ ಕರ್ತಾಲೊ , ಪರಾಶ್ರಯಾ೦ತು ಜೀವನ ಕರ್ತಾಲೊ , ಜಾಳ್ಕೆ ಬುದ್ಧಿಯೇ ಲೋಕು ಹಾಂಕಾ ಕಿತ್ಯಾ ಮ್ಹಳ್ಳೇರಿ ; ಹಾಂಗೆಲೆ ಸಹಜ ಗುಣ ಆಮ್ಗೆಲೆ ದುಃಖಾಕ ಕಾರಣ ಝತ್ತಾತಿ . ಜಾಲ್ಲೆಲೆ ನಿಮಿತ್ಯ ಹ್ಯೇ ದುರ್ಗುಣ .. ಆಮ್ಗೆಲಾಗ್ಗಿ  ಖಂಚೆಯ್ ವಿಧಾನಾರಿ ಯೆನಾಶಿ ಪೊಳೊಕಾ . ಜಾಲ್ಲೆಲೆ ತಿತ್ಲೆ ಹ್ಯೇ ದೇಹ ದಂಡನ ಕರ್ತಾ ಅಸ್ಸುಕಾ . ದೈಹಿಕ ದ೦ಡನ ನಿಮಿತ್ಯ ಅನಾರೋಗ್ಯ ದೂರ ಝತ್ತಾ . ದೇಹ ಶಕ್ತಿ ವೃದ್ಧಿ ಝತ್ತಾ . 

                     ಮಹಾರಾಜಾ .. ! ನಂಯ್ಚೆ ಮೂಲ , ಮಹಾತ್ಮಾಲೇ ಜನ್ಮ ಮೂಲ , ಋಷಿ ಮೂಲ , ಗುರು ಮೂಲ ವಿಮರ್ಶಾ ಕೊರು ನಜ್ಜ . ಪವಿತ್ರ ಕಮಲಾ ಫುಲ್ಲಂ ಚಿಕ್ಲಾ ಉತ್ಕಾಂತ್ ಜನ್ಮಾ  ಯೆತ್ತಾ ; ಝಲ್ಲೆರಿಯೀ ಚಿಕ್ಲಾ ಗೂಣ ನತ್ತಿಲೆ , ಫುಲ್ಲಾ  ದೆಂಟು ಮೊಗ್ಗು ಫುಲ್ಲಾಕ ಉಬಾರ್ನ್ ಧೋರ್ನ್ , ಸೂರ್ಯ ಕಿರಣಾ ಕ  ರಕ್ಕುನ್  ಬಯಿಸುನ್ , ವಿಶೇಷ ಕಂಪು ಜಗತ್ಯಾಕ ದೀವ್ನ್ , ದೇವಾಲೆ ಚರಣಾಂತ್ ಪಾವ್ನ್ ಧನ್ಯ ಝತ್ತಾ . ತಶೀ೦ಚಿ ಮನುಷ್ಯಾಕ ಜನ್ಮಾ ಮೂಲ ಪೂಜ್ಯತೆ ಪೊಷಿ ; ವಡ್ಡುನ್ ಘೆತ್ತಿಲೆ ಗುಣ ಪೂಜ್ಯತಾ ಮುಖ್ಯ . ಅಧರ್ಮಿ ಲೋಕು ಜೀವನಾಂತು ಭಿತ್ತಾತಿ . ಮಧ್ಯಮ ವರ್ತಿ ಲೋಕು ಮರಣಾ ಕ ಭಿತ್ತಾತಿ . ಉತ್ತಮ ಸ್ರೇಷ್ಠ ಲೋಕು ಅವಮಾನಾ ಕ ಭಿತ್ತಾತಿ . ಕೊಣಯ್ ಜಾವ್ವೋ ; ಉತ್ತರಾಂತು ಕಾಠಿಣ್ಯ ಅಸ್ಸುನಜ್ಜ . ಉಲ್ಲಯಿತನಾ ಮೊವಾಳ ನ್ಯಾಯ ವಿನಯ ಭಕ್ತಿ ನ , ಮೃಧು ಭಾವೇರಿ ಉಲ್ಲಯಿಲ್ಯಾರಿ .. ಸರ್ವ ಜನ ಮಿತ್ರ , ಸಖ್ಯ , ಬಂಧು ಬಳಗ  ಝತ್ತಾತಿ . ಸುತ್ತು ಮುತ್ತು ಪ್ರಶಾಂತ .. ಓಂಕಾರ ವಾತಾವರಣಾಂತು ಅಸ್ತಾತಿ . ಸುಖ ಶಾಂತಿ ತೃಪ್ತಿ ತಾಂಗೆಲೆ ವಾಡ್ತಾ . ಕೊರ್ಚೆ ಕಾಮ ಸುಗಮ ಝತ್ತಾ . ಆನಂದ ಝತ್ತಾ . ಮನುಷ್ಯಾಕ ಉಲ್ಲೋಚೆ ಉತ್ತರಂಚಿ ಏಕ ಆಭೂಷಣ ಜತ್ತಾ . ದೇವಾನಾ ದಿಲ್ಲೆಲೆ ದೈಹಿಕ ಆರೋಗ್ಯಾ೦ತು ಮಾನಸಿಕ ವಿಚಾರ ವಿಮರ್ಶಾ ಅತೀ ಮುಖ್ಯ . ದೈವೀಕ ವಿಚಾರು .. ಫುಲ್ಲಾ೦ತುಲೆ ಸುಗಂಧ ಆಸ್ಲೆವ್ಹರಿ ... ಚಾಂಗ ಉತ್ತರಂ , ವಿನಯ ಭರ್ಲೆಲೆ ಉತ್ತರಂ , ಪ್ರೀತಿ ಭರ್ಲೆಲೆ ಉತ್ತರಂ ಮನುಷ್ಯಾಕ ಹೊಡ ಆಭೂಷಣ . ಪ್ರೀತಿನ ಕೆಲ್ಲೆಲೆ ಉತ್ತರಂ .. ಕಿತ್ಲೆಂಯ್ ಹೋಡ  ಶತ್ರು ಕ ಮಿತ್ರ ಭಾವನೆಕ ಹಾಡ್ತಾ . ಭಾವನಾತ್ಮಕ ವಿಚಾರು ಐಕತಾನಾ .. ಹೋ .. ! ಜೀವನ ಮಿಗೆಲೆ ಇತ್ಲೆಚಿ ವೇ ಮೋಣು ದಿಸ್ತಾ . ರಾಜಾ .. ! ಜನ್ ಮಾ ಕ ಆಯ್ಯಿಲೆ ಮನುಷ್ಯಾಕ ಶ್ರೀಮಂತ ಅಸ್ಸೋ .. ನಾ .. ಧುರ್ಭಳೋ ಅಸ್ಸೋ ... ಕಷ್ಟ ಏಕ ನಾ ಯೇಕ ದಿವಸು ಯೆತ್ತಾಚಿ .  ಕಷ್ಟ ಆಯ್ಯಿಲೆ ತೆದ್ನಾ ಭೀವ್ನ್ .. ಆತ್ಮ ಸ್ಥೈರ್ಯ ಕಾಣ ಘೆವ್ನ್ ದುಃಖ ಕೋರು ನಜ್ಜ . ಮುಕಾರಿ ರಬ್ಬುನ್ ಕಷ್ಟಾಂತು .. ಜಯ ಪಾವಕಾ . ಪರಾಜಯ ಜಾವ್ನ್ ಧಾವ್ನ್ ವೋಚ್ಚಾ ನಜ್ಜ ... ಆತ್ಮ ಹತ್ಯೆಕ ಶರಣ ಜಾವ್ಚ್ಯಾ ನಜ್ಜ .  ಮಹಾರಾಜಾ .. ! ಅತ್ತಿ ಹಾಸ್ಯ ಸಂಭಾಷಣಾ , ಕೊಣಾಲೆಯಿ ವೊಟ್ಟು  ಕೋರು ನಜ್ಜ  . ಪ್ರಕೃತಿಕ ಕೊಣಯ್ ನಾಶ ಕೋರು ನಜ್ಜ . ಪಕ್ಷಿ ಸಂತತಿ ನಿಮಿತ್ಯ , ವನ್ಯ ಜೀವಿ ನಿಮಿತ್ಯ ... ಅರಣ್ಯ ವಾಡ್ತಾ .. ಫಲ ಪುಷ್ಪ ಧಾನ್ಯ ವೃದ್ಧಿ ಜಾವ್ನು ಭೂಮಿ ಸಮೃದ್ಧಿ ಝತ್ತಾ . ಅರಣ್ಯಾ ನಿಮಿತ್ಯ .. ಪ್ರಕೃತಿ ಗುಡ್ಡೋ , ಗದ್ದೋ , ವಾಲಿ೦ , ಝಡ್ಡೋ , ವೃಕ್ಪ೦ ... ಸಮಸ್ತ ಜೀವ ರಾಶಿಕ ಅನ್ನ ದಾತ  .. ಜಾವ್ನ್ ಮೇಘ ರಾಶಿಕ ಕಾರಣ .. ಹ್ಯೇ ಮೇಘ ..  ವರ್ಷ ಧಾರಾಕಾ ಕಾರಣ ಝತ್ತ . ರಮ್ಯ ಪ್ರಕೃತಿ ದೈವೀಕ ಶಕ್ತಿ ವಾಸ ಸ್ಥಾನ ಝತ್ತಾ. 

ಕಾಲ ಚಕ್ರಾಂತ್ .. ಜನನ  ಮರಣ , ನಿರ್ಮಾಣ ,ಪಾಲನಾ , ನಿರ್ಮೂಲ ತ್ಯೆ ದೈವೀಕ ಜಾವ್ನ್ ಪರತ್ ಪರತ್ ಜಾತ್ತಾ ಅಸ್ತಾ . ಹಯೇ ಭೂ ಮಂಡಲಾಂತು ಮಾನವ ಏಕ ಅಣು ಮಾತ್ರ . ಪ್ರಕೃತಿ ಕ ನಾಶ ಕೊರ್ಚೆ ಅಧಿಕಾರ  ಕೋಣಾ ಕಯ್ ನಾ . 

                        ಮಹಾರಾಜಾ .. ! ಸನ್ನ ಚೆರ್ಡು೦ವಾ ವೊಟ್ಟು , ಬಾಯ್ಲ್ ಮನಶ್ಯಾ೦ ವೊಟ್ಟು , ಮಂಥಾರೆ ಜನಾ ವೊಟ್ಟು ... ಹಾಸ್ಯ ನಿ೦ದನ ಕೋರು ನಜ್ಜ . ಶ್ರೀಮಂತಿಕೆರಿ ಅಸ್ಸೋತಿ ... ಧುರ್ಭಳೆ ಪಣೆ೦ತ್ ಅಸ್ಸೋತಿ ... ಜೀವನ ಸಂತೋಷಾರಿ ಧೈರ್ಯಾರಿ  ಕಾಡ್ಕಾ. ಮಾನವ ಕುಲ ಅಭಿವೃದ್ಧಿ ಕ ಕಾರಣ ಝತ್ತಲಿ .. ಎಕ್ಲಿ ಘರಾ ಆಯ್ಯಿಲಿ ಬಾಯ್ಲ್ ಮನಿಶಿ . ನಂಮ್ ಗುನ್ ಆಯ್ಯಿಲಿ ತಸಲೆ ಬಾಯ್ಲ್ ಮನಷೇಕ ಮಾರ್ಚೆ , ಚಾರಿ ಲೋಕಾ ಮಧ್ಯೆ ಅವಮಾನ ಕೊರ್ಚೆ , ಅವಹೇಳನಾ ಕೊರ್ಚೆ , ಸ್ತ್ರೀ ಮಾನಾ ವಿಷಯು ಉಲ್ಲೋಚಾ ನಜ್ಜ . ಬಾಯ್ಲ್ಯಾ ಜಾವ್ನ್ , ಆವ್ಸು ಜಾವ್ನ್ , ಸೂನ ಜಾವ್ನ್ , ವ್ಹನ್ನಿ ಜಾವ್ನ್ , ಜಾವ ಜಾವ್ನ್ , ಬಹಿಣಿ ಜಾವ್ನ್ ... ಪ್ರೀತಿ ದಕ್ಕೋಚೆ ಸ್ತ್ರೀ ಕ ಗೌರವ ದಕ್ಕೋಕಾ . ತೀಚಿ ಗೃಹ ಲಕ್ಷ್ಮಿ , ಭಾಗ್ಯ ಲಕ್ಷ್ಮಿ ,ಅನ್ನದಾತಾ ಅನ್ನಪೂರ್ಣಿ ! ಖಂಚೆ ಘರಾಂತು ಘರಾ ಯಜಮಾನಿ ; ಹಸನ್ಮುಖಿ  ಜಾವ್ನ್ , ಸಂತೋಷಾರಿ ಸಕ್ಕಡಾಲೆ ವೊಟ್ಟು ಮೆಳ್ನ್ ಖೇಳ್ನ್ ಆನಂದ ಉಲ್ಲಾಸಾರಿ ಅಸ್ಸಕೀ ... ತ್ಯೆ ಘರಾ ಪ್ರತೀ ಸದಸ್ಯ ಕಾರ್ಯೋನ್ಮುಖಿ ಕ್ರಿಯಾಶೀಲ ಬುದ್ಧಿಮಾನ್ ಮೇಧಾವಿ ಜಾವ್ನ್ ಅಸ್ತಾತಿ . ನವ ವಿವಾಹಿತ ... ಸನ್ಯಾಸಿ ಮ್ಹಣ್ಕೆ ಅಸ್ಸು ನಜ್ಜ . ಬಾಯ್ಲೆಕ ಸೋಣು  ಕೆದನಾಯ್ ಪ್ರವಾಸಾರಿ ವೊಚ್ಚು ನಜ್ಜ . ಸಂಸಾರ ಸುಖ ಕಷ್ಠ ... ಘಟ್ಟು ಜಾವ್ನ್ ಅಸ್ಸುಕಾ . ಸಂಸಾರಾ ಸಂಪಾದನಾ  ಖರ್ಚು ದುಡ್ಡು ಬದಿಕ ಕೊಣಾಲೆ ದೋಳೆ೦ತ್  ಪೋಡ್ಚೆ ತಶಿ ಅಸ್ಸು ನಜ್ಜ . ಕೊಣಾಲೆಯ್ ದೃಷ್ಟಿಕ ಜಾಳಾಕ ಆಸ್ಪದ ದಿವ್ವು ನಜ್ಜ . ಸೂರ್ಯೋದಯ ಜಾವ್ಚೆ ಪೊಷಿ ಫೂಡೆ ನಿದ್ದಾ ದುಕೂನ್ ಉಠಾನ್ ... ಘರಾ ಕಾಮ ಆರಂಭ ಕೋರ್ಕಾ . ತೆದನಾ ಅಷ್ಟಲಕ್ಷ್ಮಿ ಅತ್ಯಂತ ಪ್ರಸನ್ನ ಜಾವ್ನ್ ಘರಾ ವಾಸ ಕರ್ತಾತಿ . ರಸ್ತೆರಿ ಚಂಮ್ಕತಾನಾ ಗುರ್ಭಿಣಿಯಾಂಕ ವಯೋ ವೃದ್ಧ ಜನಾ೦ಕ , ಅಂಗ ವಿಕಲಾಂಕ ವಾಟ  ದೀವ್ಕಾ . ಕಸಲೆಯ್ ವಾಯ್ಟ್ ಪರಿಸ್ಥಿತಿರಿ ಚೋರೂ ನಜ್ಜ . ಫಟ್ಟಿ ಉಲ್ಲೋಚ್ಯಾ ನಜ್ಜ . ದುಸ್ರೆಲಿ ಸಮಸ್ಯಾ ವಿಷಯಾಂತ್ ವಿಮರ್ಶಾ ಕೋರು ನಜ್ಜ . ಮಹಾರಾಜ ! ಹಾಂವ ಇತ್ಲೆ ನೀತಿ ತುಕ್ಕ ಕಸಲೆ ಸಾಂಗ್ತಾ ಮ್ಹಳ್ಳೇರಿ .... ಜಾವಚಾ ವೊಚ್ಛೆ ಮಹಾಭಾರತ ಯುದ್ಧಾ೦ತು ಸರ್ವ ನಾಶ ಜಾವಚಾ ವತ್ತಾ ... ಕುರು ವಂಶ ನಿರ್ನಾಮ ಝತ್ತಾ ... ತಜ್ಜೆ ವೊಟ್ಟು ಲಕ್ಷಾಂತರ ಅಮಾಯಕ ಲೋಕು ಧ್ವ೦ಸ ಝತ್ತಾ . ಹ್ಯೇ ಮಹಾಯುದ್ಧ ಚುಕ್ಕೋಕಾ ಜಲ್ಲೇರಿ ... ಪಾಂಡವಾಂಕ ತಂಗೆಲಿ ರಾಜ್ಯ  ಭೂಮಿ , ರಾಜ ಕೊತ್ತಲ , ರಾಜ ಮರ್ಯಾದಿ ದೀವ್ನ್ ವಾಪಾಸ್ ಅಪ್ಪೋನ್ ಹಾಡೊನ್ ಘೆವ್ಕಾ . " ಇತ್ಲೆ ವೇಳು ರಾಜ ನೀತಿ , ಧರ್ಮ ನೀತಿ , ಸಾಂಗ್ತಾಚಿ ಅರ್ಧ ರಾತ್ರಿ ಝಲ್ಲಿ  . ದೃತರಾಷ್ಟ್ರ ... ಅಯಿಕತಾಚಿ ... ಕುರ್ವು೦ನ್ ತ೦ಯ್ಚಿ ನಿದ್ದೋನ್  ಪೊಳ್ಳೊ . 

ಉಮಾಪತಿ

                                                                   

MAHABHARATH Part - 33 Sanjaya Sandhaana ( konkani Bhashentu )

MAHABHARATHA    Part - 33   ( Konkni Bhashentu )

             SANJAYA SANDHANA     ಸಂಜಯ ಸಂಧಾನ 

              ಶ್ರೀ ಕೃಷ್ಣಾಲೆ ಸೂಚನೆ ಪ್ರಕಾರ , ಧರ್ಮಜಾಲೆ ಉತ್ತರಾ ಪ್ರಕಾರ ... ದ್ರುಪದ ಮಹಾರಾಜಾನ ತಗೆಲೆ ಪುರೋಹಿತ ಕಶ್ಯಪ ಮ್ಹಳ್ಳೆಲೆ ಬ್ರಾಹ್ಮಣಾಕ , ಧರ್ಮಜಾಲೆ ದೂತ ಜಾವ್ನ್ ಹಸ್ತಿನಾವತಿಕ ಪೆಟಯಿಲೆ .ದೃತರಾಷ್ಟ್ರಾನ ದ್ರುಪದ ಪುರೋಹಿತಾನ ಸಂಘಿಲ್ ಐಕೂನ್ .. " ಪಾಂಡವಾಂಗೆಲೆ ಲಗ್ಗಿ ಆಮ್ಗೆಲೆ ರಾಯ ಭಾರಿಕ ಪೆಟಯಿತಾತಿ " ಮೋಣು ಸಂಘುನ್ ದೀವ್ನ್ ಪೆಟಯಿಲೆ . ಹೇರ ದಿವಸು ವ್ಯಾಸ ಮಹರ್ಷಿಲೆ ಶಿಷ್ಯ ಸಂಜಯಾಕ ಅಪ್ಪೋನ್ " ಸಂಜಯಾ .. ! ತೂ ಉಲ್ಲೋಚಾ  ಗೊತ್ತಶಿಲೋ ಮನುಷು ... ಪಾಂಡವಾಂಕ ಸಾನಸ್ತಾನ ದುಕುನ್ ಪೊಳೊನ್ ಗೊತ್ತಶಿಲೋ ... ನಯ , ವಿನಯ ವಿಶಾರದು ... ಉಪಪ್ಲಾವ್ಯ ನಗರಾಕ ವೊಚ್ಚುನ್ , ಪಾಂಡವಾಂಕ ಮೇಳ್ನು .. ಕಶೀ ಪುಣಿ ಹ್ಯೇ ಯುಧ್ಧ ಜಾವ್ಚೆ ರಾಬ್ಬೊಕಾ ... ! ಕೊಣಾಲೆಯ್ ಮನ ದುಕ್ಕಯ್ಯನಾಶಿ , ಪಾಂಡವಾಂಕ ಶಾಂತ ಕೋರ್ಕಾ . ಜಾವ್ಚೆ ಮಹಾ ಯುದ್ಧ ರಬ್ಬೊಕಾ ... ತಾನ್ನಿ ಖಂಯ್ ಅಸ್ಸತಿಕೀ ... ಥಂಯ್ ಚಿ  ಸುಖಾರೀ ಅಸ್ಸೋತಿ ... ಮಿಗ್ಗೆಲೆ ಆಶೀರ್ವಾದು ಅಸ್ಸ ಮೋಣು  ಸಾಂಗ  " ಮ್ಹಳ್ಳಲೋ .

ಸಂಜಯ : " ಜಾಯ್ತ ಮಹಾಪ್ರಭು .. ! ಫಲ್ಲೆ ಬ್ರ೦ಮ್ಮ ಮುಹೂರ್ತಾ ಕ .. ಹಾಂವ ಹಂಗ ದುಕುನು ಭಾರ್ ಸರ್ತಾ " ಮ್ಹಳ್ಳಲೋ ಸಂಜಯು . ಹೇರದಿವಸು ಉಪಪ್ಲಾವ್ಯ ನಗರಾ ಪಾವ್ನ್ .. ಜೇವಣ ವಿಶ್ರಾಮ ಕೊರ್ನ್ , ಪಾಂಡವಾಂಗೆಲ್ ಎದ್ರಾ ಕ ಯೇವ್ನ್ , ಸಭೆ೦ತು ಅಶಿಲೆ ಸರ್ವ ಲೋಕಾಂಕ ವಂದನ ಕೊರ್ನ್ ... " ವಾಸುದೇವಾ ... !ದ್ರುಪದ ಮಹಾರಾಜಾ .. ! ವಿರಾಟ ಪ್ರಭು ದೇವಾ .. ! ತುಮ್ಕಾ ಸರ್ವಾಂಕ ಮಿಗೆಲೆ ಹೃತ್ಪೂರ್ವಕ ಸಂಜಯಾ ಲೆ ನಮಸ್ಕಾರು ... ಮಿಗೆಲೆ ಆತ್ಮೀಯ ಪಾಂಡವ ರಾಜ ಕುಮಾರಾಂಕ , ಸಾತ್ಯಕಿ ಅನಿ ಹ್ಯೇ ಸಭೆ೦ತು ಉಪಸ್ತಿಥ ಸರ್ವ ರಾಯಾಂಕ ಅಭಿವಂದನಾ .. ಪ್ರಣಾಮ . ಹಾಂವ ಕೌರವ ಚಕ್ರವರ್ತಿಲೆ ದೂತ ಜಾವ್ನ್ ಅಯಿಲಾ . ಧರ್ಮ ಜಾ .. ತುಂಮ್ಗೆಲೋ ಮಾಂತು ಧ್ರತರಾಷ್ಟ್ರಾನ ತುಮ್ಗೆಲೆ ಕ್ಷೇಮ ಸಮಾಚಾರ ನಿಮಗುನ್ ತುಮ್ಕಾ ಸರ್ವಾಂಕ ಶುಭಾಶಯ ಸಂಗುಕಾ ಮೋಣು  ಸಂಗ್ಲಾ . " ಮ್ಹಳ್ಳಲೋ ಸಂಜಯು . 

ಧರ್ಮಜ : " ಸಂಜಯಾ .. ! ಅಮ್ಮಿ ಸರ್ವ ಮಲಘಡೆಲೆ ಆಶೀರ್ವಾದ ನಿಮಿತ್ಯ ಸೌಖ್ಯ ಜಾವ್ನ್ ಆಸ್ಸತಿ . ಆಮ್ಗೆಲೆ ಪಿತಾಮಹ ಭೀಷ್ಮ , ಗುರುದೇವ ದ್ರೋಣ , ಕೃಪಾಚಾರ್ಯ , ಗುರು ಪುತ್ರ ಅಶ್ವತ್ಥಾಮ , ಆಮ್ಗೆಲೆ ಪಿತ  ಸಮಾನ ಧ್ರತರಾಷ್ಟ್ರ ರಾಯು , ವಿದುರ ಅನಿ ಸರ್ವ ಸೌಖ್ಯ ಆಸ್ಸತಿ ನವೇ ,,, ?ಮೋಣು ಧರ್ಮಜಾನ ನಿ೦ಮಗಿಲೆ . 

ಸಂಜಯ : " ಸರ್ವ ಸೌಖ್ಯ ಆಸ್ಸತಿ ಧರ್ಮಜಾ " ಕೃಷ್ಣ : " ಸಂಜಯಾ .. !ಕೌರವ ಪಕ್ಷಾ  ದುಕುನ್ ದೃತರಾಷ್ಟ್ರ ದೂತ ಜಾವ್ನ್ ಅಮ್ಕಾ ಸಂಗುಕಾ ಜಲ್ಲೆಲೆ ಕಸಲೆಯ್ ವಿಷಯು ಅಸ್ಸ ವೇ .. ? " 

ಸಂಜಯ : " ಪರಿಣಿತ ಜ್ಞಾನಿ , ಧರ್ಮ ಶೀಲ , ನ್ಯಾಯವಂತ , ಪ್ರಜಾ ಪ್ರಿಯ ತುಮ್ಗೆಲೆ ಯೆದ್ರಾಕ ಉಲ್ಲೋಚ್ಯಾಕ ಲಜ್ಜಿ ಕರತಾ . ಮಿಗೆಲೆ ನಿರೂಪಣೆ೦ತ ಚೂಕಿ ಅಸ್ಲೆರಿ ... ಕ್ಷಮಾಪಣ ಕೋರ್ಕಾ .. " 

ಕೃಷ್ಣ : " ಸಂಜಯಾ .. ! ಪ್ರಾಯೆಂತ್ ಮಲಘಡೊ ... ವಿಶೇಷ ಜಾವ್ನ್ ತೂ ವ್ಯಾಸ ಭಗವಂತಾಲೆ ಶಿಷ್ಯ .. ತೂ೦ವೆ ಉಲ್ಲಯಿತನಾ ಚೂಕಿ  ಜಾವ್ಚ್ಯಾ ಸಾಧ್ಯವೇ .. ? ತುಕ್ಕ ಧ್ರತರಾಷ್ಟ್ರಾನ ಸಂಗುನ್ ದೀವ್ನ್ ಪೆಟಯಿಲೆ ಸಂದೇಷು , ನಿರ್ಭಯ ಜಾವ್ನ್ , ನಿಸ್ಸಂಕೋಚ ಜಾವ್ನ್ ಸಾಂಗ " 

ಧರ್ಮಜ : " ಸಂಜಯಾ .. !ಪಿತಾಮಹ ದೃತರಾಷ್ಟ್ರ , ಮಾತಾ ಗಾಂಧಾರಿ ಕಶಿ ಆಸ್ಸತಿ ... ? ದೊಗ್ಗಾ೦ಕಯಿ ಪೊಳೈ ನಾಶಿ ಕಿತ್ಲೆ ವರುಷ ಝಲ್ಲಿ೦ತಿ .. ! ತಂಗೆಲೆ  ಚರಣ ಸ್ಪರ್ಶ ಕೊರ್ನ್ ತಾಂಗೆಲೆ ಪ್ರೀತಿ ಮೆಳ್ತಾಲೆ ಮೋಣು  ಆಶಿ ಪಾವತಾ " 

ಸಂಜಯ : " ತನ್ನಿ ಸರ್ವ ಸೌಖ್ಯ ಆಸ್ಸತಿ ... ಕಿತ್ಯೆ ತುಗೆಲಿ ಅಮ್ಮಕುಂತಿ ದೇವಿ  ಕಶಿ ಅಸ್ಸ ಮೋಣು ನಿಮಗಿನಾವೇ ಧರ್ಮಜಾ .. ? "

ಧರ್ಮಜ : " ಮಿಗೆಲಿ ಅಮ್ಮ ಕುಂತಿ ದೇವಿ ವಿದುರ ದೇವಾಲೆ ಘಾರ್ಲೆಗಿ ಸೌಖ್ಯ ಆಸ್ತಾಲಿ .. ಕುರು ವಂಶಾಂತು ಯೆಕ ಪೋಟಿ ಚೂಕಿ ಝಲ್ಲೆ ...  ತಶಿ ಮೋಣು  ದೊನ್ನಿ  ಪೊಟಿ ಚೂಕೀ ಝತ್ತಲಿ ವೇ .. ?" 

ಸಂಜಯ : " ಧರ್ಮಜಾ .. ! ಹಸ್ತಿನಾವತಿ೦ತು ಸರ್ವ ಲೋಕು ಸೌಖ್ಯ ಆಸ್ಸತಿ . ಝಲ್ಲೆರಿ ... ಹಸ್ತಿನಾವತಿ ಮಾತ್ರ ಸಂತಾಪಾರಿ ಆಸ್ಸ . ಇತ್ಲೆ ಚಂದ , ಬಲಿಷ್ಠ , ವೀರ ಶೂರ ಕುರು ಕುಟುಂಬ ದೋನಿ ಭಾಗ ಜಲ್ಲೆಂತಿ ಮೂ ...  ಮೋಣು ...  ಹ್ಯೇ  ವಿಷ ಬಿಯ್ಯಾಳ ಮುಂಗರೋ ಯೇವ್ನ್ ವೃಕ್ಷ ಝಲ್ಲಾ ಮೂ ಮೋಣು " 

ಧರ್ಮಜ : " ಸಂಜಯಾ .. ! ಹ್ಯೇ ವಿಷ ಬಿಯ್ಯಾಳ ಅಮ್ಮಿ ವೊಯ್ಯಿಲೆ ನಯ್ .. " 

ಸಂಜಯ : " ಹ್ಯೇ ವಿಷ ಬಿಯ್ಯಾ ಳ ಕೊಣಾಯ್ ವೊಯ್ಯಿಲಿ ನಯ್ ಧರ್ಮಜಾ ... ಝಲ್ಲೇರಿ ... ವೃಕ್ಷ ಜಾವ್ನ್ ಎದ್ರಾಕ ರಾಬ್ಲಾ .. ಹ್ಯೇ ಮಾತ್ರ ಸತ್ಯ "

ಭೀಮ : " ಸಂಜಯಾ ... ! ಖಂಚೆ ವೃಕ್ಷಾ ವಿಷಯು ಉಲ್ಲಯಿತಾ ... ? ತ್ಯೆ ವಿಷ ವೃಕ್ಷ ಹು೦ಮ್ಟಾನ್  ಉಡಯಿತಾ ಸಂಜಯಾ .. ! "

ಕೃಷ್ಣ : " ಹ್ಯೇ ಶಾಂತಿ ಪ್ರಸ್ತಾವ ಕೊರ್ಚೆ ನಮುನೊ  ನಯ್ ಭೀಮಾ ... ! ಏಕಾತ್ ವೆಳ್ಯೇರಿ  ಯುದ್ಧ ಜಾವ್ಕಾ ಮೋಣು ಅಸ್ಲೆರಿ .. ಶಾಂತಿ ದೂತಾ ಕ ಕಸಾಲೆ ಪೆಟಯಿಲೆ ... ? " 

ಧರ್ಮಜ : " ಶಾಂತ ಜಾ ಭೀಮಾ ... ಕೃಷ್ಣಾ ನ ಸಾಂಗ್ಚೆ ಆಯಿಕ ... ಸಂಜಯಾ .. ! ತೂ ಆಮ್ಗೆಲೆ ಖತೀರಿ ಕಸಲೆ ಸಂದೇಷು ಘೆವ್ನ್ ಅಯಿಲಾ ... ? "

ಅರ್ಜುನ : " ಸಂದೇಷು ಅಯಿಕುಚೆ ಫೂಡೇ ... ಕೊಣಾಲೆ ಸಂದೇಷು ಹಳ್ಳಾ ಮೋಣು ನಿ೦ಮಗಿ . ಅಣ್ಣಾ .. ! , ಧುರ್ಯೋಧನಾಲೆ  ಕೀ .. ದುಃಶಾಸನಾಲೆ  ಕೀ ... ಶತ  ಕೌರವ ಅನ್ನಾಲೆ ಕೀ , ಹಸ್ತಿನಾವತಿ ರಾಯಾಲೆ ಕೀ , ಆಮ್ಗೆಲೆ ಜೇಷ್ಠ ಪಿತಾ ಮಹಾಲೆ ಕೀ ... ಕೊಣಾಲೆ ಮೋಣು  ನಿ೦ಮಗಿ ಅಣ್ಣಾ ... ! " 

ಸಂಜಯ : " ಹ್ಯೇ ತಿನ್ನೀಯಿ ಜನ ಏಕ್ಲೊಚಿ ... ಅರ್ಜುನಾ ..! " 

ಕೃಷ್ಣ : " ಎಕ್ಲೊಚಿ ..  ಕಶಿ ಜಾವ್ಚ್ಯಾ ಸಾಧ್ಯ ಅಸ್ಸ ... ಸಂಜಯಾ .. ? ಏಕತ್ ವೇಳ್ಯಾ ಏಕ್ಲೊಚಿ ಜಾವ್ನ್ ಅಶಿಲೆ ಝಲ್ಲೆರಿ ,,, ದ್ಯುತಾಂತ್ , ಗಾಂಧಾರ್ ನರೇಶ್ ಶಕುನಿಕ , ಕಪಟ ಕೊರುಂಕ ಕಸಲೆ ಸೊಳ್ಳೆ  .. ? ಹಸ್ತಿನಾವತಿ ವಿಭಾಜನ ಕೆಲ್ಲೆಲೋ ರಾಯು ಕೋಣ ತೋ ? ಭರ್ಲೆಲೆ ಸಭೆ೦ತು ದ್ರೌಪದಿಲೆ ಮಾನ ಭಂಗ ಕರ್ತಾನಾ ಚಕ್ಕರ್ ಶಬ್ಧ್  ಉಲ್ಲಯಿನಾಶಿ ಬೊಶಿಲೋ ರಾಯು ಕೋಣ ತೋ  .. ? ತೋ ಧುರ್ಯೋಧನಾಲೆ ಆನು , ಬಪ್ಪುಸು ... ಆಜಿ ಹಸ್ತಿನಾವತಿ ಸಿಂಹಾಸನಾ ವೈರಿ ಕೊಣಯ್ ರಾಯು ನಾತಿ ... ಅತ್ತ ಆಸ್ಸುಚೆ .. ಧುರ್ಯೋಧನ , ದುಃಶ್ಶಾಸನಾಂಗೆಲೆ ಶತ  ಕೌರವಾ೦ಗೆಲೆ  ಬಪ್ಪುಸು . ದ್ರಥರಾಷ್ಟ್ರ , ಪುತ್ರ ವ್ಯಾಮೋಹಿ . ಪಾರ್ಥಾನ ಸಂಗಚೆ ಸಮ್ಮ ... ಜಾಲ್ಲೆಲೆ ನಿಮಿತ್ಯ ... ಸಂಜಯಾ ... ತೂ ಕೊಣಾಲೆ ದೂತ ಜಾವ್ನ್ ಅಯಿಲಾ .. ? " 

ಸಂಜಯ : " ಹ್ಯೇ ವಾಸುದೇವಾ .. ! ಆಜಿ ಹಾಂವ ... ತ್ಯೇಗ್ಗಾಲೆಯಿ ದೂತ ಜಾವ್ನ್ ಅಯಿಲಾ ... ಕೃಷ್ಣಾ .. ! ವೃದ್ಧಾಪ್ಯಾ ಪವ್ವಿಲೆ ಮಿಗ್ಗೆಲೆ ದೊಳೆಂತು , ಮುಕಾವೈಲೆ ಭವಿಷ್ಯ ಪೊಳಯಿತನಾ ಮಸ್ತ ಭಂಯ್ಯ್ ಕರ್ತಾ  .. ! "

ಕೃಷ್ಣ : " ತಶಿ ಝಲ್ಲೇರಿ ಸಂಜಯಾ .. ! ತುಗ್ಗೆಲ್ ದೊಳೆಂತ್ ಕಸಲೆ ದಿಸ್ತಾ ಮೋಣು ಸುರ್ವೆಕ ಸಾಂಗ " 

ಸಂಜಯ : " ಹ್ಯೇ ಮಧುಸೂಧನಾ .. ! ಮಿಗ್ಗೆಲೆ ದೊಳೆಂತು ಏಕ ಮಹಾ ಯುದ್ಧ ದಿಸ್ತಾ .... ! ಏಕ ಬದಿನ .. ಯುಧಿಷ್ಠಿರಾಲೆ ಧ್ವಜಾ ಮುಳಾಂತ್ ಲಕ್ಷೋಪ ಲಕ್ಷ ಸೈನ್ಯ ... ಆನ್ನೇಕ ಬದಿ ... ಕುರು ಸೈನ್ಯ .. ಭೀಷ್ಮ , ದ್ರೋಣ , ಕೃಪಾಚಾರ್ಯ , ಅಶ್ವಥಾಮ , ಧುರ್ಯೋಧನ , ದುಃಶ್ಶಾಸನ , ಅಂಗ ರಾಜ ಕರ್ಣ .... ಹಾಂತು ಕೊಣಯ್ ಪರಾಜಯ್ ಜಾವ್ಚೆ ದಿಸ್ಸನಾ ...  ಇಚ್ಚಾ ಮರಣಿ ಭೀಷ್ಮ ಹತ್ತಾ೦ತು  ಸುಕ್ಕಿಲೇ ರಕ್ಕುಡ ಘೆವ್ನ್ ... ಯುದ್ಧ ರಂಗಾಂತು ಎಕ್ಲೊಚಿ  ಝತ್ತ ಕೀ ... ? " 

ಕೃಷ್ಣ : " ಸಂಜಯಾ .. ! ದೋನಿ  ಸೈನ್ಯ ಯುದ್ಧಾಕ ದೆಂವ್ಲೇರಿ ... ತಾಂತು ಎಕ್ಲೇಕ ಜಯ ಜಾವ್ಕಾ ... ಅನ್ನೇಕ್ಲೆಕ ಪರಾಜಯ ಜಾವ್ಕಾ ಹ್ಯೇ ಯುದ್ಧ ನೀತಿ " 

ಸಂಜಯ : " ಹ್ಯೇ  ಕೃಷ್ಣಾ ... ! ಹಾಂವೆ ..  ಕಸಲೆ ಕೊರ್ಚೆ ? ಹ್ಯೇ ಯುದ್ಧಾ೦ತು ಇತ್ಲೆ ನಾಶ ಝತ್ತಾ .... ವೇಳು , ಕಾಲು , ಯುಗಾನ , ಸಮಯಾನ ಯೆದೊಳ್  ತಾ೦ಯ್  ಪೊಳೈ ನಾ ನಾತ್ತಿಲೆ ತಿತ್ಲೆ .. ನಾಶ ಝತ್ತಾ . ಕೊಣಾ ಪರಾಜಯ ಝಲ್ಲೆರಿಯೀ .. ಮಕ್ಕಾ  ಅತೀ  ದುಃಖ ಜತ್ತಾ . ಹಾಂಕಾ ಸರ್ವಾಂಕ ಬಾಲ್ಯ ದುಕುನ್ ... ಮಿಗೆಲೆ ಹಾತ್ತಾನ ಖಾವೊನ್ ... ಪಿವೋನ್ ಲಾಲನ ಕೆಲ್ಲೆಲೆ ಮಿಗೆಲೆ ಹೃದಯ ಭೆತ್ತುನ್ ವತ್ತಲೆ ... ಮಧುಸೂಧನಾ ಮಕ್ಕಾ ಹಾಂಗೆಲೆ ಮೃತ ಶರೀರ ಪೋಳೋಚೆ ಭಾಗ್ಯ ನಕ್ಕಾ ಝಲ್ಲಾ  ಕೃಷ್ಣಾ .. ! " ಸಂಜಯಾಲೆ ದೋಳೆ  ಬ್ಹೊರ್ನ್ ಅಯಿಲೆ .. ತಾಳೊ ಗದ್ಗದಿತ ಝಲ್ಲೆ . 

ಧರ್ಮಜ : " ಸಂಜಯಾ .. ! ಯುದ್ಧಾ ವಿಷಯು ಕೋಣ ಉಲ್ಲಯಿತಾತಿ ಹಂಗಾ .. ? ಅಮ್ಮಿ ಯುದ್ಧ ಜಾಯ್ನಾಶಿ ಸಂಧಿ ಕ ಪ್ರಯತ್ನ ಕರ್ತಾತಿ ... ಶಾಂತಿ ಜಾವ್ಕಾ ಮೋಣು ಲೆಕ್ತಾತಿ . ಜ್ಯೇಷ್ಠ ಪಿತಾಶ್ರೀ ... ಅಂಮ್ಕಾ ಇಂದ್ರಪ್ರಸ್ತ ವಾಪಾಸ್ ದೀವ್ಕಾ ... ತೆದನಾ  ಮಾತ್ರ ಹ್ಯೇ ಯುದ್ಧ ರಬ್ಬೊಚ್ಯಾ  ಸಾಧ್ಯ ಅಸ್ಸ . " 

ಸಂಜಯ : " ಧರ್ಮಜಾ .. ! ತೂ ಸಹನಶೀಲ , ಶಾಂತಿ ಸ್ವರೂಪ ಮೋಣು ...  ತೀನಿ ಲೋಕ ತುಗೆಲಿ ಸ್ತುತಿ ಕರ್ತಾ . ತುಜ್ಜೆ ತಸಲೆ ದಯಾ ಶೀಲ , ಬಂಧು ಮಿತ್ರ , ಪುತ್ರ ಪೌತ್ರ ಕುಲ ಬಾಂಧವಾಲೆ ವಿನಾಶಾ ಕ ಅಂಗೀಕಾರ ದಿವ್ಚೆ ಸಮ್ಮ ವೇ .. ? ಕರುಣಾ ನಿಧಿಯೇ .. ಕುರು ವಂಶಾ ಕುಡಿ ಜಾವ್ನ್ ಅಶಿಲೆ ಧುರ್ಯೋಧನ ಅನಿ ತುಮ್ಮಿ ಬಾಬ್ಬ್ಬಂವಡ ಮೋಣು  ವಿಸೋರು ನಜ್ಜ . ಹಯೇ ದಾಯಾದಿ ಕ್ಲೇಶಾ ನಿಮಿತ್ಯ .. ಕುಟುಂಬೇಕ ಅಪಖ್ಯಾತಿ ಜಾವ್ಚೆ ಸತ್ಯ .  ಪಿತಾಮಹ  ಭೀಷ್ಮ, ಗುರು ದ್ರೋಣಾಚಾರ್ಯ , ಭಾಂವ್ಡ ಗಾಂಧಾರಿಲೆ ಪುತ್ತಾ೦ಕ ಯುದ್ಧಾ೦ತು  ಮಾರ್ನ್ , ಹ್ಯೇ  ಘೋರ ಯುದ್ಧಾ೦ತು , ಅಮಾಯಕ ಸೈನ್ಯಾಕ , ಯುದ್ಧ ರಾಕ್ಷಸಿ ಕ ಬಲಿ ದೀವ್ನ್ ಜತ್ತರಿ ತುಕ್ಕಾ ಪ್ರಜಾ ಪರಿ ಪಾಲನಾ ಕ ಕಸಲೆ ವರ್ತಾ .. ? ಹ್ಯೇ ರಕ್ತ ಸಿಂಹಾಸನಾ ವೈರಿ ಬೋಸ್ಲೆರಿ ತುಕ್ಕಾ ಕಸಲೆ ಮನಾ ಶಾಂತಿ ಯೆತ್ತಲಿ .. ? ಅಣ್ಣಾ ಕ ಭಾವು ನಾಶಿ ... ಆವ್ಸೂಕ ಪೂತು ನಾಶಿ ... ಬಾಯ್ಲೇಕ ಬಮ್ಮಣು  ನಾಶಿ ... ಚೆರ್ಡುವಾಂಕ ಬಪ್ಪುಸು ನಾಶಿ .... ಭಾವ್ಡಾ೦ಕ ಮಲಘಡೊ  ಭಾವು ನಾಶಿ ... ಕೋಣಾ೦ಕಯಿ -  ಕೊಣಯ್ ನಾಶಿ ಕೊರ್ನ್ , ಘರ್ ಘರಾಂತು ಶೋಕಾಚೊ ದಿವ್ವೋ ಲಾವ್ನ್ ...  ಪ್ರಲಾಪನ ಕೊರ್ಚೆ ಸಾಮ್ರಾಜ್ಯಾಕ ಪಾಲನ ಕೊರ್ಚೆ ಆಶಿ ಕಸಲೇಕ .. ? ಹ್ಯೇ ಭೂಯಿ ಪಾಲನಾ ಖತಿರಿ , ಹಜ್ಜೆ ಫೂಡೆ ಕಿತ್ಲೆಕೀ ರಾಯ , ರಾಜ ವಂಶ ಭೋಗ ಕೊರ್ನ್ ಗೆಲ್ಲೆಂತಿ .  ಕೊಣಯ್ ಹಂಗ ದುಕುನ್ ಏಕ ... ಕನಿಷ್ಟ ಏಕ ...  ಗರಿಕೆ ಪಾಕ್ಳಿ ತಾಯ್ ವ್ಹರ್ನಿ . ಧರ್ಮಜಾ ... ತು ಧರ್ಮ ಪ್ರತಿನಿಧಿ .. ಶಾಂತಿ , ದಯಾ , ಸಹನಾ , ತುಗ್ಗೆಲ್ ಉಸಿರು ಕೊರ್ನ್ ಘೆತ್ತಿಲೊ ಮಹಾ ಪುರುಷು . ಕರುಣಾ ನಿಧಿಯೆ ..! ಏಕ ಪೋಟಿ ಆಲೋಚನ ಕರಿ ... ಸಮಾಧಾನಿ ಝಾ . ತುಮ್ಮಿ ಅಶಿಲೆ ಕಡೇನಂಚಿ ಸುಖಾರಿ ರಬ್ಬಯಾ ...  ಮೋಣು ಧ್ರತರಾಷ್ಟ್ರ ರಾಯಾನ ತುಗೆಲೆಗಿ ಬಿನ್ನಹ ಕೆಲ್ಲಾ " ಮೋಣು ಸಾಂಗ್ಲೆ ಸಂಜಯಾನ . ಧರ್ಮಜ ಮನಾಂತು ಚಿ ಉದಾಸಿ ಝಲ್ಲೋ .. ಮೌನ ಝಲ್ಲೋ 

ಕೃಷ್ಣ : " ಸಂಜಯಾ .. ! ಹ್ಯೇ  ಧರ್ಮ ವಿಚಾರ ಧ್ರತ ರಾಷ್ಟ್ರಾ ನ ಕಸಲೇಕ ತಗೆಲೆ ಪುತ್ತಾಕ .. ಧುರ್ಯೋಧನಾಕ ಸಂಗನಿ .. ? ಹ್ಯೇ  ಬುದ್ಧಿ ವಾದು ಇತ್ಲೆ ದಿವಸ ವಿಸರ್ಲೊಲೊ ವೇ .. ? ಸಂಜಯಾ .. ! ಹ್ಯೇ ಮಹಾ ಯುದ್ಧಾ ಕ .. ಧ್ರತ ರಾಷ್ಟ್ರ ಜವಾಬ್ದಾರಿ ಝತ್ತಾ ... ಯುದ್ಧ ಕಾರಕ ಝತ್ತಲೋ . ದುಷ್ಟ ಧುರ್ಯೋಧನಾಕ ಬಂಧಿ ಕೊರ್ನ್ ಕಾರಾಗ್ರಹಾಂತ್ ಘಾಲೂ ಸಾಂಗ . ಅಪ್ಣೆಲೆ ಪುತ್ತಾ೦ಕ ಏಕ ನೀತಿ ... ಭಾವಾಲೆ ಪುತ್ತಾ೦ಕ ಆನ್ನೇಕ ನೀತಿ ವೇ .. ? ಧರ್ಮ , ಶಾಂತಿ , ಸಹನಾ ,ಸತ್ಯ ಅಹಿಂಸಾ , ನೀತಿ , ನ್ಯಾಯ .. ಯೆಕ್ಲೊ ಧರ್ಮಜಾ ಲೆ ನಿಮಿತ್ಯ ...  ಪಾಂಡವಾಂಗೆಲ್ ನಿಮಿತ್ಯ ಮಾತ್ರ ಉದ್ಧಾರ ಜಾವಚೆ ನಯ್ ಮೋಣು ಸಾಂಗ " ಕೃಷ್ಣಾ ನ ಆವೇಶಾರಿ ಸಾಂಗ್ಲೆ 

ಸಂಜಯ : " ಶಾಂತಿ .. ವಾಸುದೇವಾ ! ಶಾಂತ ಝಾ .. ತುಕ್ಕಾ ಆವೇಷು ಆಯಿಲ್ಯಾರಿ ಮಕ್ಕ ಯೆಕು ಶಬ್ದ ತೊಂಡಾ ದುಕೂನ್ ಯೇನಾ .. ಶಾಂತ ಝಾ " 

ಅರ್ಜುನ : " ಸಂಜಯಾ ... ! ಆಮ್ಗೆಲೆ ಸನ್ಪಣಾ ದುಕೂನ್ ತೂ ಅಂಮ್ಕಾ ಪೋಳಯಿಲೊ ... ಅಮ್ಗೆಲೊ ವಿಷಯು ಪೂರ್ತಿ ಗೊತ್ತಶಿಲೋ ... ಹಸ್ತಿನಾವತಿ ರಾಯು ಆಂಮ್ಗೆಲೋ ಪಿತಾಶ್ರೀ ಪಾಂಡುರಾಯು ... ಪಾಂಡುರಾಯಾಲೆ ನಂತರ ತಗೆಲೆ ಮಲಘಡೊ ಪೂತು ಯುಧಿಷ್ಠಿರಾಕ ರಾಜ್ಯ ಮೇಳ್ಕಾ ಅಶಿಲೆ ... ವಯೋ ದೃಷ್ಟಿರಿ ಪೊಳೈ ಲ್ಯಾರಿ .. ಧುರ್ಯೋಧನಾ ಪೊಷಿ .. ಧರ್ಮರಾಯು ಹೋಡು ನವೇ .. ? ಹ್ಯೇ ಕಾರಣಾ ನಿಮಿತ್ಯ ಧರ್ಮರಾಯಾನ ಹಸ್ತಿನಾವತಿಕ ಚಕ್ರವರ್ತಿ ಜಾವ್ಕಾ . ಸನ್ಪಣಾ ದುಕೂನ್ ಧುರ್ಯೋಧನಾ ನ ಆಮ್ಗೆಲೆ ವಯಿರಿ ವೈರತ್ವ , ವೈಷಮ್ಯ ಬಾಂಧುನ್ ಘೆತ್ಲಾ . ವಿಷ ಪ್ರಾಶನ ಕರಯಿಲಾ .. ಲಾಕ್ಷಾ ಗ್ರಹಾಂತು ಜೊಳೋನ್ ಭಸ್ಮ ಕೊರುಂಕ ಪ್ರಯತ್ನ ಕೆಲ್ಲಾ ... ಮಾಯಾ ದ್ಯುತ ಖೇಳ್ ನು ಆಮ್ಗೆಲೆ ರಾಜ್ಯ ಅಪಹರಣ ಕೆಲ್ಲಾ ... ಪಾಂಡವ ಪಟ್ಟಾ ರಾಣಿ  ದ್ರೌಪದಿಕ ಭರ್ಲೆಲೆ ಸಭೆ೦ತು ಮತ್ತೇ ಕೇಷ್ಟ ಧೋರ್ನ್ ಮಾನ ಅಪಹರಣ ಕೆಲ್ಲಾ . ಹ್ಯೇ ಧರ್ಮು ಕೀ .. ? ನ್ಯಾಯ ಕೀ .. ? ಮಲಘಡೆ ಲೋಕು ಕಸಲೇಕ ನುತ ಬೊಶಿಲೀಂತಿ .. ? ಅಂಮ್ಕಾ ಬಾರ ವರುಷ ವನವಾಸ ಅನಿ ಏಕ ವರುಷ ಅಜ್ಞಾತ ವಾಸ ಕೊರುಂಕ ಷರ್ತ ಘಾಲ್ಲೆಮೂ .. ಹಯೇ ಕಸಲೆ ನ್ಯಾಯ .. ? ಧರ್ಮರಾಯಾಲೆ ಧರ್ಮ ನೀತಿ .. ಶಾಂತ ಸ್ವಭಾವ .. ಆಜಿ ತಾಂಯ್ ರಕ್ಷಣ ಕೆಲ್ಲಾ ... ನಾತ್ಲೆರಿ ಯೆದೊಳ್ ಭಿತರಿ ಧುರ್ಯೋಧನ್ , ದುಃಶ್ಶಾಸನ ..  ಮತ್ತಿಂತು ಮೆಳ್ನ ವತ್ತಾ  ಅಶಿಲೀಂತಿ .. " 

ಸಂಜಯ : " ಮಹಾ ವೀರ ಅರ್ಜುನಾ .. ! ಶಾಂತ ಝಾ .. ತುಕ್ಕಾ ನಮನ ಕರತಾ ... ಶಾಂತ ಝಾ " 

ಭೀಮ : " ಸಂಜಯಾ .. ! ತ್ಯೆ ಕುರುಡೋ ಕುಮತಿ ಕ ಸಾಂಗ ... ಯುದ್ಧ ಝಲ್ಲೇರಿ .. ತ್ಯೇ ಕುರುಡಾಲೆ ಶತ ಪುತ್ರ೦ ಭೀಮ ಸೇನಾಲೆ  ಗದಾ  ಪ್ರಹಾರಾಕ  ಮರ್ತಾತಿ ಮೋಣು ಸಾಂಗ ... ತಕ್ಕಾ ಪಿಂಡ ಸೊಡುಂಕ ಎಕ್ಲೇ೦ಕಯಿ ದವರ್ನಾ ಹ್ಯೋ ಭೀಮಸೇನ  ಮೋಣು ಸಾಂಗ ... ದುಃಶ್ಯಾಸನಾಲೆ  ಹರ್ದೆ ರಗತಾ ಖತೀರಿ , ಧುರ್ಯೋಧನಾ ಝ೦ಗೀ ಖತೀರಿ ... ಭೀಮ ಸೇನಾ ರಕ್ಕುನ್  ಅಸ್ಸ ಮೋಣು ಸಾಂಗ .ದುರ್ ಮದಾಂಧ , ನೀಚ , ನಿಕೃಷ್ಠ ಕೌರವ ಶತವ , ಮಿಗೆಲೆ ವಾಂಟೆ ಆಯ್ಯಿಲೆ ... ಗದೆ ಕ ನೈವೇದ್ಯ ಝತ್ತಲೇ ಮೋಣು .. ತ್ಯೆ ಕುರ್ಡೊ ರಾಯಾಕ ಸಾಂಗ . "ಆವೇಶಾರಿ ಸಾಂಗ್ಲೆ ಭೀಮ ಸೇನಾನ . ಭೀಮಸೇನಾಲೇ ಉತ್ತ್ರಾ೦ಕ ಸಂಜಯ ಭಿಲ್ಲೋ .

ಸಂಜಯ : " ಧರ್ಮರಾಯಾ ... ! ಅನಿ ಹಾಂವ ಕಸಲೆಯ್ ಸಂಗನಾ .. ಪ್ರಶಾಂತ ಚಿತ್ತ ಜಾವ್ನ್ ಆಲೋಚನಾ ಕರಿ .. ಪ್ರಜಾ ಕ್ಷೇಮ ಕಸಲೆ ಮೋಣು ಚಿಂತನ ಕರಿ ... ದೋನಿ ಮಹಾ ಕುಲ ಪರ್ವತ ' ಡೀ ' ಮಾರ್ಲೆರಿ ... ಅಮಾಯಕ ಜಾವ್ನ್ ಅಶಿಲೆ ಪಶು , ಪ್ರಾಣಿ , ಪಕ್ಷಿ ಹೀಂಡು ಸಂಹಾರ ಜಾತ್ತಾಚಿ . ಚೂಕಿ ಕೆಲ್ಲೆಲೆ ಕೋಣಕಿ ... ಶಿಕ್ಷ ಅನುಭವ ಕರ್ತಾಲೊ ಕೋಣಕೀ ... ಸಂಪದಾ ಆಶೆ ಖತೀರಿ ಬಾಯ್ಲ್ ಚೆರ್ಡು೦ವಾ೦ಕ ಸೋಣು .. ಯುದ್ಧಾ ಕ ತಯ್ಯಾರ್ ಝಲ್ಲೆಲೆ ಲಕ್ಷೋಪ ಲಕ್ಷ ಸೈನಿಕಾ೦ ವೈರಿ ಕರುಣ ದವರಿ . ಆಮ್ಗೆಲೆ ಸರ್ವ ಲೋಕಾಲೆ ಜೀವನಾ  ವಯಿರಿ ಸುಖ ಶಾಂತಿ ಸಮೃದ್ಧಿ ಹಾಡಿ " ಮ್ಹಳ್ಳಲೋ ಸಂಜಯ . 

ಧರ್ಮಜ : " ಸಂಜಯಾ .. !ಧ್ರತರಾಷ್ಟ್ರಾಲೆ ಮಲಘಡೊ ಪೂತು ಧುರ್ಯೋಧನು ಪಾಪಿ .. ! ಮೂರ್ಖ ..  ! ಧೂರ್ಥ  ಮನುಷ್ಯ ...  ! ಝಲ್ಲೇರಿಯಿ ... ಅಮ್ಮಿ ಸರ್ವಾನಿ ತಗೆಲೆ ಕ್ಷೇಮ ಸಮಾಚಾರ್ ನಿಂಮ್ಗಿಲಾ ಮೋಣು ಸಾಂಗ . ಭೀಷ್ಮ , ದ್ರೋಣ , ಕೃಪಾ , ಬಾಹ್ಲಿಕ , ಸೋಮದತ್ತ , ಭೂರಿಶ್ರವ , ಹಾಂಕಾ ಚರಣ ವಂದನಾ ಮೋಣು ಸಾಂಗ . ಬುದ್ಧಿ ಮಾನ ವಿದುರ ದೇವಾಕ ಅಮ್ಗೆಲೆ ಸರ್ವಾಲ್ ನಮನ ಸಾಂಗ ಸಂಜಯಾ , ಹಾಂವ ಆಖೇರ್ ಏಕ ಉತ್ತರ ಸಾಂಗ್ತಾ ಸಂಜಯಾ ... ನ್ಯಾಯ ಜಾವ್ನ್ ಅಂಮ್ ಕಾ ... ಆಮ್ಗೆಲೆ ರಾಜ್ಯ ಇಂದ್ರಪ್ರಸ್ಥ ವಾಪಾಸ್ ದೀವ್ಕಾ ... ಹಕ್ಕಾ , ಧುರ್ಯೋಧನಾನ ಸಮ್ಮತಿ ದೀನಿ ಝಲ್ಲೇರಿ ... ಅಮ್ಮಿ ಪಾಂಚ ಜನ ಪಾಂಡವಾಂಕ ಕನಿಷ್ಠ ಪಾಂಚ ಪಟ್ಟಣ ದಿಲ್ಲೆರಿ ಜತ್ತಾ . ತ್ಯೆ ಪಟ್ಟಣ ... ಕುಶಸ್ಥಳ , ವೃಕಸ್ಥಳ , ಮಾಕಂಡಿ , ವಾರಣಾವೃತ , ಆನಿಯೇಕ ತಾಂಕಾ ಖುಷಿ ಅಶಿಲೆ ಪಟ್ಟಣ ದಿವ್ವೊಂತಿ . ಹಜ್ಜೆ ನಿಮಿತ್ಯ ಯುದ್ಧ ರಾಬ್ಬೊಯೆತ ಮೋಣು ಆಮ್ಗೆಲೆ ಜ್ಯೇಷ್ಠ ಪಿತಾಕ ಸಾಂಗ . ಹಾಕಾಯ್ ...  ಸಹಮತಿ ದೀನಿ ಝಲ್ಲೇರಿ ... ಯುದ್ಧ ಖಂಡಿತ ಝತ್ತಾ ಮೋಣು ಸಂಗುಕಾ . ಸಂಜಯಾ ... ! ಮಕ್ಕ  ಮಿಗೆಲೆ ಜ್ಯೇಷ್ಠ ಪಿತಾಶ್ರೀ ಆದರಣೀಯ , ಪೂಜ್ಯ .. ಆಂಮ್ಗೆಲೆ  ಕುಟುಂಬೆ ಚ್ಯೊ ಮಲಘಡೊ ... ತ್ಯೋ ಕಶಿ ಸಾಂಗ್ತಾ ಕೀ ತಶಿ .. ಯುದ್ಧಾಕ ಆಜ್ಞಾ ದಿಲ್ಲೇರಿ ಯುದ್ಧ ಕರ್ತಾ .. ಶಾಂತಿ ಜಾವ್ಕಾ ಝಲ್ಲೇರಿ ಹಾಂವ ಕೆದನಾಯ್ ತಯ್ಯಾರ್ ಅಸ್ಸ . ಹೀ ಮಿಗೆಲಿ ಆಶಾ ಅನಿ ಮನೋ ಇಚ್ಚಾ ... ಅನಿ ಭೀಷ್ಮ , ದ್ರೋಣ , ಕೃಪಾಚಾರ್ಯ , ಕರ್ಣಾ ಕ ದಕ್ಕೋನ್ ಭೀವೊಚೆ ನಕ್ಕಾ .  ವಾಸುದೇವು ಹಸ್ತಿನಾವತಿಕ ಆಮ್ಗೆಲೆ ತರ್ಪೆನ  ರಾಯ ಭಾರಿ ಜಾವ್ನ್ ಯೆತ್ತಾ  ಮೋಣು ಸಾಂಗ . ಸಂಜಯಾ .... ಅನಿ ತೂ ಹಸ್ತಿನಾವತಿಕ ವೊಚ್ಚುಯೇತ " ಮ್ಹಳ್ಳಲೊ ಧರ್ಮರಾಯು . ಸರ್ವಾಂಕ ನಮನ ಕೊರ್ನ್ ರಥು  ಚಳ್ಳೋ ಸಂಜಯು . 

ಉಮಾಪತಿ