MAHABHARATHA Part - 38 ( Konkani Bhashentu ) Shree Krishna Sandhana
ಶ್ರೀ ಕೃಷ್ಣ ಸಂಧಾನ
ಕಾರ್ತಿಕ ಮಹಿನೊ , ಹೇಮಂತ ಋತು , ಶುಕ್ಲ ಪಕ್ಷ ... ಪುನ್ನವೇ ದಿವಸು . ಶೀಯಾ೦ ಕಾಲಾಕ ಆನಿ ವೈಶಾಖ ಕಾಲಾ ಕ ಮಧ್ಯೆ ಸಂಧಿ ವೇಳು . ಶ್ರೀ ಕೃಷ್ಮ ಉಲ್ಲೋಚಾಕ ವಾಕ್ ಚತುರ , ವಾಗ್ಮಿ , ವಾಕ್ ಸರಸ್ವತಿ . ತಗೆಲ್ ಯೆದುರ ರಬ್ಬುನ್ ಉಲ್ಲೋಚೆ ಮ್ಹಳ್ಳಾರಿ ... ಕೊಣಾಚ್ಯಾನಯಿ ತಗೆಲೆ ತೊಂಡ ಬಂದ್ ಕೋರು ಜಾಯ್ನಾ . ಕೃಷ್ಣ ಸಂಧಾನಾ ಉತ್ತರಂ ಅಯಿಕುಚ್ಯಾಕ ... ಮಹಾ ಪಂಡಿತ , ನ್ಯಾಯ ಶಾಸ್ತ್ರ ವಿಶಾರದ , ಸ್ಮೃತಿ ಕಾರ , ಯುದ್ಧ ತಂತ್ರ ನಿಪುಣ , ಯುದ್ಧಾ ಖತಿರಿ ವೊಟ್ಟು ಝಲ್ಲೆಲೆ ರಾಯ , ಹಸ್ತಿನಾವತಿ ಪುರ ಪ್ರಮುಖ , ಭೀಷ್ಮ , ಬಾಹ್ಲಿಕ , ದ್ರೋಣ , ಕುರು ವಂಶ ಪ್ರಮುಖ , ಸುರಲೋಕಾ ದುಕೂನ್ ನಾರದ ಮಹರ್ಷಿ , ತಪಸ್ವಿ ಕಣ್ವ ಮುನಿ , ಪರಶುರಾಮ , ಆನಿ ಕಿತ್ಲೆಕೀ ಮಹಾನ್ ಭಾವ ಕೃಷ್ಣಾಕ ಪೊಳೋಚೆ ಖತಿರಿ ... ತಾಣೆ ಉಲ್ಲೋಚೆ ಉತ್ತರಂ ಅಯಿಕುಚೆ ಖತಿರಿ ...ಹಸ್ತಿನಾವತಿ ರಾಜ ಸಭೆಕ ವಿಶೇಷ ಜಾವ್ನ್ ಅಯಿಲೀ೦ತಿ .
ಕೃಷ್ಣಾ ನ ಸಾತ್ಯಕಿ , ಕೃತವರ್ಮಾಲೆ ವೊಟ್ಟು , ರಾಜ ಸಭೆಕ ಪಾಯು ದವರ್ಲೆ ಸತಾನ್ ... ಸರ್ವ ಸಭೆ೦ತು ಅಶಿಲೆ ಮಹಾನ್ ಭಾವಾ೦ಕ ಅಭಿವಂದನಾ ಕೆಲ್ಲಿ . ಪರಶುರಾಮ , ಬ್ರಹ್ಮ್ಋಷಿ ನಾರದ , ಕಣ್ವ ಲೋಕಾಂಕ ಅಭಿವಂದನಾ ಕೋರ್ನು ಸೌಖ್ಯಅಸ್ಸತಿ ನವೆ .. ? ಮೋಣು ನಿ೦ಮಗಿಲೆ . ಕೃಷ್ಣಾಲೆ ದೊಳೆ ಸನ್ನಿ ... ತೊಂಡಾವೈಲೊ ಆಶೀರ್ವಾದಾ ಹಾಸು ಪೊಳೊನ್ ಕಿತ್ಲೆ ಕೀ ಲೋಕಾನಿ ಧನ್ಯತಾ ಭಾವ , ಸೂಖ ಪಾವ್ಲಿ೦ತಿ . ಕುರು ಮಲಘಡೆ ಉಠಾನ ಯೇವ್ನ್ ಕೃಷ್ಣಾಕ ಹಾತು ಧೋರ್ನ್ ತಗೆಲ್ ಖತಿರಿ ದವರ್ಲೆಲೆ ಉಚಿತ ಆಸನಾ ವೈರಿ ಬೊಸೈಲೊ . ಮಾಯಾ ಹಾಸು .. ನೀಲ ವರ್ಣ ಮೇಘ ಶ್ಯಾಮ , ಚುರುಕು ಚಂದ ದೊಳೆ ಹಾವ ಭಾವ ಪೊಳೊನ್ ... ದೂರ ರಬ್ಬಿಲೆ ಪೂರಾ ಜನ ತಕ್ಕಾ ಭಕ್ತೀನ ವಂದನ ಕೆಲ್ಲಿ . ಧುರ್ಯೋಧನ , ದುಃಶ್ಶಾಸನ , ಕರ್ಣ , ಶಕುನಿ , ರಾಜ ಸಭೆಕ ಯೇವ್ನುತಾ೦ಗ-ತಾಂಗೆಲೆ ಅಸನಾ ವೈರಿ ಯೇವ್ನ್ ಬೋಸ್ಗೆ .ಕರ್ಣಾ ನ , ಗುರು ಪರಶುರಾಮಾಕ ಪೊಳೈಲೆ ಸತಾನ್ ಲಗ್ಗಿ ಯೇವ್ನ್ ಚರಣ ಸ್ಪರ್ಶ ಕೊರ್ನ್ ವಂದನ ಕೆಲ್ಲಿ . ಶ್ರೀ ಕೃಷ್ಣಾ ನ ಏಕ ಪೋಟಿ ಕುರು ಸಭಾ ಪೊಳೈಲೆ ... ಗುರು ಮಹರ್ಷಿ ಲೋಕು... ಭೀಷ್ಮ , ದ್ರೋಣ , ಕೃಪಾಚಾರ್ಯ , ಅಶ್ವಥಾಮ , ಶಲ್ಯರಾಜ , ಭಗದತ್ತ , ಸುಶರ್ಮ , ಸೈ೦ಧವ , ಏಕ ಬದೀನ , ಶತ ಕೌರವ ಆನ್ನೇಕ ಬಾದೀನ ... ಆಂಧ್ರ , ಅಂಗ , ವಂಗ , ಕಳಿಂಗ , ಕರ್ನಾಟಕ, ಪಾಂಡ್ಯ , ಚೋಳ , ಸಿಂಧು , ಕೇಕಯಾ , ಬಾರ್ಬರಾ , ಮಾದ್ರ , ಯವನ , ಕಿರಾತ ,ಆಟವಿಕ ರಾಯ ಆನ್ನೇಕ ಬದಿ ... ಸನ್ನ- ಸನ್ನಸಾಮಂತ ರಾಯ , ಸೇನಾಧಿಪತಿ , ಮಂತ್ರಿ ಗಣ ಹೇ ಬದಿನ ಬೊಸ್ಲಿ೦ತಿ . ಸಂಜಯು ಸಹಾಯಕು ಜಾವ್ನ್ ಧ್ರತ ರಾಷ್ಟ್ರಾ ಲಗ್ಗಿ ಬೊಸ್ಲಾ . ಹಸ್ತಿನಾವತಿ೦ತು ಇತ್ಲೆ ಹೊಡಿ ಸಭಾ ಜಾವ್ಚೆ ... ಹ್ಯೇ೦ಚಿ ಸುರ್ವೆ ಪೊಟಿ ಶೀ ದಿಸ್ತಾ ... !! " ಮಹಾರಥಿ ... ಮಹಾ ವೀರ ... ಸುದರ್ಶನ ಚಕ್ರ ಧಾರಿ... ಮಧುಸೂಧನ ಶಾಂತಿ ದೂತ ಜಾವ್ನ್ ... ವಾಸುದೇವ ಕೃಷ್ಣ ... ರಾಜ ಸಭೆಕ ಯೆತ್ತಾ ಅಸ್ಸ" ಪ್ರಹರಿನ ಉಚ್ಚ ಸ್ಥಾಯಿರಿ ಸಾಂಗ್ಲೆ .
ಕೃಷ್ಣ ; " ಶಾಂತಿ ದೂತ ಕೃಷ್ಣಾಲೆ ಪ್ರಣಾಮ ಸ್ವೀಕಾರ ಕೋರ್ಕಾ ಮಹಾರಾಜಾ "
ಧ್ರತರಾಷ್ಟ್ರ : " ಶಾಂತಿ ದೂತ ಜಾವ್ನ್ ಆಯ್ಯಿಲಾವೇ ಕೃಷ್ಣಾ ... ! ಆಮ್ಗೆಲೆ ರಾಜಸಭೆ ಚೆ ಆಸನ ಸ್ವೀಕಾರ್ ಕೊರ್ನ್ ಸಭೇಚೆ ಶೋಭಾ ವಾಡ್ಡೋಕಾ ಕೃಷ್ಣಾ .. ! "
ಧ್ರತರಾಷ್ಟ್ರ : " ಶಾಂತಿ ದೂತ ಜಾವ್ನ್ ಆಯ್ಯಿಲಾವೇ ಕೃಷ್ಣಾ ... ! ಆಮ್ಗೆಲೆ ರಾಜಸಭೆ ಚೆ ಆಸನ ಸ್ವೀಕಾರ್ ಕೊರ್ನ್ ಸಭೇಚೆ ಶೋಭಾ ವಾಡ್ಡೋಕಾ ಕೃಷ್ಣಾ .. ! "
ಕೃಷ್ಣ : " ಪ್ರಣಾಮ ಪಿತಾಮಹಾ ... " ಭೀಷ್ಮಾ ಕ ಪೊಳೊನ್ ವಂದನಾ ಕೆಲ್ಲಿ .
ಧ್ರತರಾಷ್ಟ್ರ : " ಹ್ಯೇ ವಾಸುದೇವಾ ... ! ಮಿಗೆಲೆ ಮಲಘಡೆ ಭಾವಾ ಚೆರ್ಡುವಾಂಗೆಲೆ ತರ್ಪೆನ ಕಸಲೆ ಪ್ರಸ್ತಾವ ಹಳ್ಳಾ ... ? " ಕೃಷ್ಣು ಉಠಾನು ರಬ್ಬಲೋ . ರಾಜ ಸಭಾ ತುರಂತ್ ಮೌನ ಝಲ್ಲೆ ...
ಕೃಷ್ಣ : " ಹ್ಯೇ ಮಹಾರಾಜಾ .. ! ಹಾಂವ ಹೇ ನಿವೇದನ ಕರ್ತಾ ... ಹಾಂವ ಕೊಣಾಲೆಯ್ ತರ್ಪೆನ ಯೇನಿ ... ಹಾಂವ ಸ್ವಯಂ ಹಾಂಗಾ ಅಯಿಲಾ . ಮಿಗ್ಗೆಲೆ ಪ್ರಸ್ತಾವ ತುಮ್ಗೆಲೆ ಯೆದ್ರಾಕ ದವರ್ತಾ ... ಹಾಂವ ಯೇಕ ವಿಷಯಾನ್ ತುಂಕಾ ವಿಶ್ವಾಸ್ ದಿತ್ತಾ ... ಹಾಂವ ಹ್ಯೇ ಶಾಂತಿ ಸಭೆ೦ತ್ .. ಕಸಲೆ ಪ್ರಸ್ತಾವ್ ಸ್ವೀಕಾರ ಕೆಲ್ಲಾ ಕೀ ... ತ್ಯೆ ಪಾಂಡವ ಸ್ವೀಕಾರ್ ಕರ್ತಾತಿ . ತುಮ್ಮಿ ಮಹಾಜನಾನಿ ... ತುಮ್ಕಾ ಶಾಂತಿ ವಿಷಯಾನ ಹಾಂವೆ ಕಸಲೆಯ್ ಸಂಘುಕಾ ಮೋಣು ನಾ ... ಅತ್ತ ಶಾಂತಿ ಅವಶ್ಯ ಜಾವ್ನ್ ಜಾವ್ಕಾ . ಹ್ಯೇ ಯುದ್ಧಾ೦ತು ಕೊಣಾಲೇ ಯ್ ... ಜಯ - ಪರಾಜಯ ಜಾವ್ಚ್ಯಾ ಪೂರೂ .. ಝಲ್ಲೇರಿ ... ಲಕ್ಷೋಪ ಲಕ್ಷ ಸೈನ್ಯ ಅನಾವಶ್ಯಕ ಜಾವ್ನ್ ಮರ್ತಾತಿ ದೊನ್ನಿ ತರ್ಪೆನ . ಹ್ಯೇ ಸಭೆ೦ತು ಮಹಾಜ್ಞಾನಿ ಭೀಷ್ಮ , ದ್ರೋಣ , ಕೃಪಾಚಾರ್ಯ ತಸಲೆ ಮಲಘಡೆ ... ವೀರ ಸೇನಾನಿ , ಅಂಗ ವಂಗ ಸರ್ವ ರಾಯ ಹಂಗಾ ವೊಟ್ಟು ಝಲ್ಲೆಂತಿ . ತಷಿ ಜಾವ್ನ್ ... ಹ್ಯೇ ರಾಜ ಸಭೆ೦ತು ಅಶಿಲೆ ಮಲಘಡೆ೦ಗೆಲೆ ದಾಯಿತ್ವ ಝತ್ತಾ ಕೀ ... ಮುಕಾರಿ ಜಾವ್ಚೆಯುದ್ಧಾ೦ತು ಜಾವಚೆ ಕಷ್ಟ ನಾಷ್ಟಾಕ ತುಮ್ಮಿ ಕಾರಣ ಝತ್ತಾತಿ . ಹ್ಯೇ ನರೇಶ್ .. ! ತೂ ಭರತ ವಂಶಾಚ್ಯೊ ಮಲಘಡೋ ... ಕುರು ವಂಶಾ ಚ್ಯೊ ಪ್ರತೀಕು .. ಮರ್ಯಾದಾ ತಿಲಕು ... ಮಹಾ ನ್ಯಾಯ ನಿಪುಣು .. ತೂ೦ವೆ ಯುದ್ಧ ರಬ್ಬೊನ್ ಶಾಂತಿ ಹಾಡುಂಕ ಸಾಧ್ಯ ಅಸ್ಸ . ಕುರು ವಂಶಾಂತು ಶಾಂತಿ ಹಾಣಿ ನಾತ್ಲೆರಿ ... ಇತಿಹಾಸ ಫಲ್ಲೆ ತುಕ್ಕಾ ದೋಷಿ ಜಾವ್ನ್ ರಬ್ಬಾಯಿತಲೆ ... ಇತಿಹಾಸ , ಶಕುನಿ ಕ ನಿಂಮ್ಗೀನಾ .. ತೂ೦ವೆ ಕಸಲೇಕ ಕಪಟ ಮಾಯಾ ದಾಳ ಘಾಲ್ನ್ ದ್ಯೂತ ಖೆಳ್ಳ್ ಲೆ .. ? ಮೋಣು . ಇತಿಹಾಸ ಧುರ್ಯೋಧನಾ ಕ ನಿಂಮ್ಗಿನಾ .. ತೂ ಕಸಲೇಕ ದ್ಯೂತಾಂತ್ , ದ್ರೌಪದಿಕ ಪಣ್ ಜಾವ್ನ್ ನಿಂಮ್ಗಿಲೇ ... ? ಇತಿಹಾಸ ದುಃಶ್ಯಾಸನಾ ಕ ನಿಂಮ್ಗೀನಾ ... ತೂ೦ವೆ ದ್ರೌಪದಿ ಕ ಭರ್ಲೆಲೆ ಸಭೇ೦ತು ನಗ್ನ ಕೊರುಂಕ ಪ್ರಯತ್ನ ಕಿತ್ಯಾ ಕೆಲ್ಲೆ .. ? ಇತ್ಲೆ ಸಕ್ಕಡ ಘಠನಾ ಜಾಲ್ಲೆಲೆ ತುಗ್ಗೆಲ್ ಯೆದ್ರಾಕ ... ತುಗ್ಗೆಲ್ ರಾಜ ಸಭೇ೦ತು ಮಹಾರಾಜಾ ... ! ತೂ೦ವೆ ಮಲಘಡೊ ಜಾವ್ನ್ ... ಇತ್ಲೆ ಸಕ್ಕಡ ಘಠನಾ ಜತ್ತನಾ ... ತುಗ್ಗೆಲ್ ಚೆರ್ಡುವಾಂಕ ಬುದ್ಧಿ ಸಂಘನಿ ... ಸುರ್ವೆಕ ತಾಂಗೆಲೆ ದಾಸ್ಯ ವಿಮುಕ್ತಿ ಕೊರ್ನ್ ... ತ೦ಗೆಲೆ ರಾಜ್ಯ ತಾಂಕಾ ವಾಪಾಸ್ ದಿಲ್ಲೆ ಮ್ಹಣ್ಕೆ ಕೊರ್ನ್ ... ದೊನ್ನಿ ಪಂಕ್ತಾ ದ್ಯೂತ ಖೆಳು೦ಕ ಅಪ್ಪೋನ್ , ಬಾರ ವರ್ಷ೦ ವನವಾಸಾಕ , ಎಕ ವರುಷ ಅಜ್ಞಾತ ವಾಸಾಕ ಕಾರಣ ಝಲ್ಲೊಲೋ ತೂ೦ಚಿ ನಯಿ ವೇ ? ... ತೂಗೇಲೆ ಪುತ್ರ ವ್ಯಾಮೋಹಾ ನಿಮಿತ್ಯ ... ಉಲ್ಲಯಿನಾಶಿ ... ಧುರ್ಯೋಧನಾನ ಸಂಘಿಲ್ ತಶಿ .. ನುತ ಬಯಿಸುನ್ ಅಯಿಕಲೋ . ಧ್ರತರಾಷ್ಟ್ರ ಮಾಮಾ ... ! ತೆದ್ನಾಚೆ ದ್ಯೂತ ನಿಯಮಾ ಪ್ರಕಾರ .... ಬಾರ ವರ್ಷ೦ ಅರಣ್ಯ ವಾಸ , ಏಕ ವರುಷ ಅಜ್ಞಾತ ವಾಸ ಪೂರ್ತಿ ಕೊರ್ನ್ ... ಪಾಂಡವ ಅತ್ತ ವಾಪಾಸ್ ಅಯಿಲೀ೦ತಿ . ಧರ್ಮಾ ಕ ಸ೦ಮ್ಮ ಜಾವ್ನ್ , ನ್ಯಾಯಾಕ ಸ೦ಮ್ಮ ಜಾವ್ನ್ ... ತಾಂಗೆಲೆ ರಾಜ್ಯ , ತೂ೦ವೆ ತಂಕಾ ವಾಪಾಸ್ ಕೋರ್ಕಾ ... ಹ್ಯೇ ತುಗೆಲೆ ದಾಯಿತ್ವ ಝತ್ತಾ ... " ಕೃಷ್ಣಾಲೆ ಉತ್ತರ೦ ಬಾಣಾ ಮ್ಹಣ್ಕೆ ಹರ್ದೇಕ ಲಾಗ್ಲೆ ಧ್ರತರಾಷ್ಟ್ರಾ ಕ ... ಮನಾ೦ತ್ ಪುತ್ತಾಲೆ ಹಠಾ .. ಆಶಾ ಉಡ್ಗಾಸ್ ಅಯಿಲೊ ...
ಧ್ರತರಾಷ್ಟ್ರ : " ಹೇ ... ವಾಸುದೇವಾ ... ! ಜನ್ಮತಹಾ ಹಾಂವ ಕುರ್ಡೊ ... ಅತ್ತ ಹಾಂವ ನಾವಾಕ ತಕೀತ ರಾಯು ... ಹ್ಯೇ ಮಂತಾರ್ಪಣಾರಿ ಕುರು , ಪಾಂಡವ ಐಕ್ಯಮತಾರಿ .. ಏಕ ಜಾವ್ನ್ ಅಸ್ಲೆರಿ ಪೂರೋ ... ಹಜ್ಜೆ ಪೊಷಿ ಹೊಡ ಮಕ್ಕಾ ಕಸಲೆ ಜಾವ್ಕಾ ... ? ಝಲ್ಲೇರಿ ... ವಾಸುದೇವಾ .. ! ಅತ್ತ ಮಿಗೆಲೆ ಚೆರ್ಡು೦ವ .. ಹಾಂವೆ ಸಂಘಿಲೆ ಆಯಿಕನಾತಿ ... ಹಾಂವೆ ಕಸಲೆ ಕೊರ್ಚೆ .. ? "
ಕೃಷ್ಣ : " ಹ ಹ ಹ ಹಾ ... ನಾ ಮಾಮಾ ... ಅತ್ತ ಝಲ್ಲೇರಿಯಿ ... ತೂ೦ವೆ ಸಂಘಿಲ್ ಉತ್ತರ೦ ಅಯಿಕತಾತಿ .. ತೂ೦ವೆ ಪ್ರಯತ್ನ ಕೆಲ್ಲೇರಿ ಪಾಂಡವಾಂಗೆಲ್ ರಾಜ್ಯ ತಾಂಕಾ ದೀವ್ಯೇತ .. ತಾಂಕಾ ಸರ್ವಾಂಕ ತುಗ್ಗೆಲ್ ವಯಿರಿ ಆದರ , ಪ್ರೀತಿ . ಭಕ್ತಿ , ಗೌರವ ಅಸ್ಸ . ತುಗೆಲಿ ಆಜ್ಞಾ ನಾಶಿ .. ಪುರ ಪ್ರವೇಶ ಕರ್ನಾತಿ . ಯುದ್ಧಾ ಕ ತನ್ನಿ ಜಾವ್ನ್ ಮುಕಾರ್ಷಿನಾತಿ . ಪಾಂಡವಾಂಕ ಇಂದ್ರಪ್ರಸ್ಥ ವಾಪಾಸ್ ದಿವ್ಚೆ ಲಾಯೇಕ ಮೋಣು ದಿಸ್ತಾ ಮಕ್ಕಾ ಮಾಮಾ ... ! ಸಮಾ .. ಆಲೋಚನಾ ಕರಿ . ಯುದ್ಧ ಜಲ್ಲೇರಿ ... ಸರ್ವ ನಾಶ ... ! ತೂಗೆಲ್ ಚೆರ್ಡು೦ವಾಲೆ ಧುರ್ಭಾಗ್ಯ ... ತಂಗೆಲೆ ಮರಣ ಪೋಳೋಚೆ ಪೊಡ್ತಾಲೆ ... ಕೋಣ್-ಕೊಣಾಲೆ ಶವಾ ವೈರಿ ಪೋಣ್ ರಡ್ತಾಲೊ ... ? "
ಧುರ್ಯೋಧನ : " ಛೇ .. ! ಕೃಷ್ಣಾ .. ! ಪೂರೋ ... ತೂ೦ವೆ ಉಲ್ಲಯಿಲೆ ಹಾಂವ ಅಯಿಕಲೋ ... ತೂಗೆಲೆ ಶಾಂತಿ ಪ್ರಸ್ತಾಪ ವಿಷಯಾ ಪೊಷಿ ... ಚಡ ... ಅಂಮ್ಕಾ ಭಿವಯಿತಾ ಅಸ್ಸ ... ಹೂಂ ...ಧಿಕ್ ! ತುಗೆಲೆ ಉತ್ತರ೦ ಆಯಿಕುನ್ ಭಿತ್ತಲೊ ಹಾಂವ ನಯ್ . ದ್ಯೂತ ನಿಯಮಾ ಪ್ರಕಾರ , ತಂಗೆಲೆ ಅಜ್ಞಾತ ವಾಸ ಭಂಗ ಜಲ್ಲಾ . ತ್ಯೆ ಏಕ ಕಾರಣ ನಿಮಿತ್ಯ ... ನ್ಯಾಯು ಜಾವ್ನ್ .. ತನ್ನಿ ಆನ್ನೇಕ ಪೋಟಿ ವನ ವಾಸ ಅಜ್ಞಾತ ವಾಸ ಕೋರ್ಕಾ .. ! ತುಗೆಲೊ ಬುದ್ಧಿ ವಾದು ಮಕ್ಕಾ ನಕ್ಕಾ ... ಇಂದ್ರಪ್ರಸ್ಥ ವಾಪಾಸ್ ದಿವ್ಚೆ ಮ್ಹಳ್ಳೇರಿ ... ಮಿಗೆಲೆ ಆರ್ಧ ರಾಜ್ಯ ದಿಲ್ಲೆ ಮ್ಹಣ್ಕೆ ... ಇಂದ್ರಪ್ರಸ್ಥ ಹಾಂವ ದೀನಾ ... ಹ್ಯೇ ಖಂಡಿತ ... ಹಾಂವ ಕುರುವಂಶ ಕೇಸರಿ ... ಸಿಂಹು ವೇಟೇ ಕೋರ್ನು ಪೋಟ ಭರ್ತಾ ... ಅಷ್ಶಿ ಭೀಖ ಮಾಗ್ಗುನ್ ಖಾಯ್ನಾ .. ತಶಿ ಪಾಂಡವ ಧೈರ್ಯ ಶಾಲಿ ಜಾವ್ನ್ ಅಸ್ಲೆರಿ .. ಯುದ್ಧ ಕೊರೋ೦ತಿ . ತಂಗೆಲೆ ಪರಾಕ್ರಮ ಹಾಂವಯ್ ಪೋಳಯಿತಾ . ಇಂದ್ರಪ್ರಸ್ಥ ಸೋಣು ಅನಿ ಕಾಯಿ ಪುಣಿ ಅಸ್ಲೆರಿ ಸಾಂಗ . ಹಾಂವ ಅಯಿಕತಾ "
ಕೃಷ್ಣ : ", ಮಹಾರಾಜಾ ... ! ಆಖೇರಿ ವಿಷಯು ಜಾವ್ನ್ , ಧರ್ಮರಾಯಾನ ತಾಂಕಾ ಪಾಂಚ ಪಟ್ಟಣ ... ಕುಶಸ್ಥಳ , ವೃಕಸ್ಥಳ , ಮಾಖಂಡಿ , ವಾರಣಾವೃತ , ಅನಿ ಏಕ ಖಂಚೇಯ್ ಪಟ್ಟಣ ... ಪ೦ಚ ಪಟ್ಟಣ ಪಾಂಡವಾಂಕ ದೀವ್ಕಾ ಮೋಣು ಸಾಂಗ್ಲಾ ... ಹಜ್ಜೆ ನಿಮಿತ್ಯ ಪುಣಿ ಶಾಂತಿ ಆಸ್ತಲೆ ... ಮೋಣು ಆಷೇರಿ ಧರ್ಮಜಾನ
ನಿಂಮ್ಗಿಲಾ "
ಧುರ್ಯೋಧನ : " ಆ ಹಾ ಹಾ ಹಾ ಕೃಷ್ಣಾ .. ! ಕಸಲೆ ಪಾಂಚ ಪಟ್ಟಣ ... ಹಾಂವ ಸೂವ್ವೆ ಮೋನೆ ತಿತ್ಲೊ ಜಾಗೊ ದೀನಾ ... ವಸ .. ಹಾಂವೆ ಸಂಘಿಲೇ ತಶೀಚಿ ಸಾಂಗ "
ಕೃಷ್ಣ : " ಸುಯೋಧನಾ .. ! ತುಕ್ಕಾ ಕಸಲ್ಕಿ ಬುದ್ಧಿ ವಾಯಿಟ ಝಲ್ಲೆ ... ತುಗೆಲಿ ಮಾತಾ ... ಗಾಂಧಾರಿ ಕ ತುಗ್ಗೆಲ್ ಮೃತ ದೇಹಾರಿ ಪೋಣ್ ರೋಡ್ಚೆ ಯೋಗು ಹಾಡೊನುಕ್ಕಾ ... ಶಾಂತ ರೀತ್ಯೇರಿ ಆಲೋಚನಾ ಕರಿ ... "
ಧುರ್ಯೋಧನ : " ಧಿಕ್ .. ! ತೂ ಶಾಂತಿ ದೂತ ಜಾವ್ನ್ ಅಯಿಲಾ ಕೃಷ್ಣಾ ... ನಾತ್ಲೆರಿ ... "
ಭೀಷ್ಮ : " ಧುರ್ಯೋಧನಾ ... ! ತೂ ಕಸಲೆ ಉಲ್ಲಯಿತಾ ಅಸ್ಸ ಮ್ಹಳ್ಳೆಲೆ .. ಅಂಗಾರಿ ಪ್ರಜ್ಞ ಅಸ್ಸೋ ..! "
ಕೃಷ್ಣ : " ಉಲ್ಲೋ೦ವೋ ಪಿತಾಮಹಾ ... ! ತಕ್ಕ ಕಸಲೆ ಉಲ್ಲೋಕಾ ಮೋಣು ದಿಸ್ತಾ ಕೀ ... ತ್ಯೆ ಉಲ್ಲೋ೦ವೋ ... ನಾತ್ಲೆರಿ ... ನಾತ್ಲೆರಿ ಕಸಲೆ ಕರ್ತಾಶಿಲೋ ಧುರ್ಯೋಧನಾ .. ? "
ಧುರ್ಯೋಧನ : " ಶಾಂತಿ ದೂತ ಜಾವ್ನ್ ಆಯ್ಯಿಲಾ ತೂ ... ನಾತ್ಲೆರಿ ... ಅಷ್ಶಿ ಉಲ್ಲಯಿಲೆ ಮೋಣು ... ತುಗ್ಗೆಲ್ ಜೀಬ ತಂಡುನ್ ಕತ್ತೊರ್ನ್ ಉಡಯಿತಶೀಲೋ ... ತುಕ್ಕಾ ಬಂಧಿ ಕೊರ್ನ್ ಕಾರಗೃಹಾ ಕ ಘಲ್ತಾಶಿಲೋ ... ಜಾಗ್ರತ ಕೊರ್ನ್ ಉಲ್ಲಯಿ . ತೂ ಮಿಗ್ಗೆಲೆ ಗುರುದೇವ ಬಲರಾಮಾಲೆ ಭಾವು ಮೋಣು ಸೊಡ್ತಾ ... "
ಕೃಷ್ಣ : " ಮಕ್ಕಾ ಬಂಧಿ ಕರ್ತಾ ... ? ತೀನಿ ಲೋಕಾ ದೇವಾ ಗಣ ವೊಟ್ಟು ಜಾವ್ನ್ ಅಯಿಲೇರಿಯಿ ... ಮಕ್ಕ ಧೋರುಂಕ ಜಾಯ್ನಾ . ಹೇ ಅಹಂಕಾರಿ ಸುಯೋಧನಾ ... ಸಾಧ್ಯ ಅಸ್ಲೆರಿ ಮಕ್ಕಾ ಬಂಧಿ ಕೊರುಂಕ ಪ್ರಯತ್ನ ಕರಿ "
ಕೋಪು ಆವೇಷು ಆಯ್ಯಿಲೆ ಧುರ್ಯೋಧನಾ ನ " ಖಂಯ್ ಆಸ್ಸತಿ ಸೈನಿಕ ... ? ಯೇವ್ನ್ ಹ್ಯೇ ಕಪಟಿ ಗೊಲ್ಲಾ ಕ ಬಂಧಿ ಕರ್ಯಾತಿ " ಆಜ್ಞಾ ದಿಲ್ಲಿ . ಸೈನಿಕ ಯೇವ್ನ್ ಕೃಷ್ಣಾಲೆ ಸುತ್ತು ರಾಬಲೆಂತಿ . ಕೃಷ್ಣು ಹಾಸ್ಲೊ .... ಆ ಹ .. ಹ .. ಹಾ .. ಹಾ .. ಮಕ್ಕ ಬಂಧಿ ಕರ್ತಾ .. ? ಸಭೆ೦ತು ಬೊಶಿಲೆ ಸರ್ವಾಂಕ ... ಓಂ ಕಾರು ... ಓ೦ .. ಅಯಿಕುಪಳ್ಳೊ ... ಓಂ ಕಾರು ಝೇಂಕಾರು ಜಲ್ಲೊ ... ಕೃಷ್ಣು ... ಯೆಕ್ಲೊ ಅಶಿಲೋ ಹಜಾರ ಕೃಷ್ಣ .. ಸಭೇ೦ತು ಪ್ರತ್ಯಕ್ಷ ಜಲ್ಲೆಂತಿ ... ಸೂರ್ಯಾಲೆ ತೇಜ ಪುಂಜ ಸಭೆ೦ತು ಜಗ - ಮಗ್ಲೆ . ಸುದರ್ಶನ ಚಕ್ರ ಧಾರಿ ಕೃಷ್ಣು .. ವಿರಾಟ ರೂಪಾರಿ , ತಾಗೇ ಲ್ ನಿಜ ರೂಪ ದಕ್ಕಯಿಲೆ , ಸಭೆ೦ತ್ ಅಶಿಲೆ ಬಾಕಿ ಲೋಕು , ಸೂರ್ಯ ತೇಜ ಕಿರಣಾ ಯೆದುರ .. ಕೃಷ್ಣಾ ಲೆ ತೋಂಡ ದಿಸ್ಸನಿ . ತ್ಯೆ ವೆಳ್ಯೇರಿ ಕೃಷ್ಣಾ ಕ ಪೋಳಯಿಲೆ ಭೀಷ್ಮ ಪಿತಾಮಹ , ವಿದುರ , ದ್ರೋಣಾ , ಕೃಪಾಚಾರ್ಯ ನ ಮಾತ್ರ . ಭೀಷ್ಮಾ ಲೇ ಮನಾ೦ತು ವಿಷ್ಣು ಸಹಸ್ರ ನಾಮ .. ವಿಷ್ಣು ಜಯಕಾರ ಉತ್ಪನ್ನ ಝಲ್ಲೆ .. ಹ್ಯೇ ಕೃಷ್ಣಾ ....
ಇತೀದಂ ಕೀರ್ತನೀಯಸ್ಯ ಕೇಶವಸ್ಯ ಮಹಾತ್ಮನಃ
ನಾಮ್ನಾ೦ ಸಹಸ್ರ೦ ದಿವ್ಯಾ ನಾಮ ಶೆಷೇಣ ಪ್ರಕೀರ್ತಿತಂ
ಯ ಇದಂ ಶ್ರಣುಯಾನಿತ್ಯಂ ಯಶ್ಚಾಪಿ ಪರಿ ಕೀರ್ತ ಯೇತ್ ,
ನಾಶುಭಂ ಪ್ರಾಪ್ನುಯಾತ್ ಕಿಂಚಿತ್ ಸೋಮುತ್ರೇಹ ಚ ಮಾನವಾ
ವೇದಾಂತಗೋ ಬಾಹ್ಮಣ: ಸ್ಯಾತ್ ಕ್ಷತ್ರಿಯೋ ವಿಜಯೀ ಭವೇತ್
ವೈಶ್ಯೋ ಧನ ಸಮೃದ್ಧ: ಸ್ಯಾಚೂದ್ರ: ಸುಖಮ ವಾಪ್ನ್ನು ಯಾತ್
ಕೃಷ್ಣಾಲೆ .. ! ವಿರಾಟ ರೂಪ .. ! ಹಜಾರ ಸಂಖ್ಯಾರಿ ಕೃಷ್ಣಾ ಕ ಪೋಳೋನ್ ... ಸೈನಿಕ ಭೀ೦ವ್ನ್ ಧಾ೦ವ್ನ್ ಗೆಲ್ಲೆ . ಕೃಷ್ಣಾ ಕ ಅಪ್ಪೊಡಚೆ ಸೋಡಿ , ಪೋಳೋ ಚ್ಯಾ ತಾಯ್ ಜಾಯ್ನಿ . ಕೃಷ್ಣಾ ನ ಸ್ವಲ್ಪ ಸಮಾಧಾನ ಘೆತ್ಲಿ .. ತಂಢ ಜಾವ್ನ್ ... " ಧುರ್ಯೋಧನಾ .. ! ಹ್ಯೇ ತುಗೆಲೇ ಆಖೇರಿ ನಿರ್ಧಾರ ವೇ ? "
ಧುರ್ಯೋಧನ : " ವಯ್ .. ! ಮಿಗೆಲೆ ಆಖೇರಿ ನಿರ್ಧಾರ .. ಮಕ್ಕಾ ಜಯ ಝಲ್ಲೇರಿ ... ಹಾಂವ ಮಿಗೆಲೆ ಬಾಕೀ ಭಂವ್ಡಾಲ್ ವೊಟ್ಟು ಭರತ ಚಕ್ರವರ್ತಿ ಜಾವ್ನ್ ಸೂಖ ಬೊಗ್ತಾ . ಯುದ್ಧಾಂತ್ ಪರಾಭವ ಝಲ್ಲೇರಿ ... ವೀರ ಸ್ವರ್ಘ ಸುಖ ಅನುಭವ ಕರ್ತಾ "
ಕೃಷ್ಣ : " ತಶೀ೦ಚ್ಯಿ ಜವ್ವೋ ಧುರ್ಯೋಧನಾ ... ! ಅನಿ ಆಮ್ಗೆಲಿ ಭೇಟಿ ಯುದ್ಧ ರಂಗಾ೦ತು .. "
ಕೃಷ್ಣಾ ನ ಯುದ್ಧ ಮುಹೂರ್ತ ನಿಶ್ಚಯ ಕೆಲ್ಲೊ ಹಿರಣ್ವತಿ ನ೦ಯಿಚೆ ಬದಿನ ... ಶಮ೦ತ ಪಂಚಕ ಲಗ್ಗಿ ... ಕುರುಕ್ಷೇತ್ರ ಭೂಯಿ೦ಚೇರಿ ಕುರು - ಪಾಂಡವ ಮಧ್ಯೆ ಯುದ್ಧ . ಶರತ್ ಕಾಲಾ ನಂತರ , ಯೆವ್ಚೆ ಹೇಮಂತ ಋತು ಕಾಲ .. ಯುದ್ಧಾ ಕ ಅನುಕೂಲ ಕಾಲು ... ಪೂರ್ವ ದಿಶೆ೦ತ್ ಕುರು ಸೈನ್ಯ , ಪಶ್ಚಿಮ ದಿಶೆ೦ತ್ ಪಾಂಡವ ಸೈನ್ಯ ಶಿಬಿರ ನಿರ್ಮಾಣ ಜಾವ್ಕಾ . ದೊನ್ನಿ ಬದೀಚೆ ಸೈನ್ಯ ಕುರುಕ್ಷೇತ್ರಾಕ ಯೆವ್ಕಾ .. ಯೆವ್ಚೆ ಅಮಾವಾಸ್ಯೆ ದಿವಸು ಯುದ್ಧ ಕೊರುಂಕ ಲಾಯೆಕ್ ದಿವಸು .
ಕೃಷ್ಣ : " ಮಲಘಡೇ ಕುರು , ಗುರು , ಮುನಿ ಬಾಂಧವ ಅಯಿಕಯಾ ... ಹಾಂವೆ ಕಿತ್ಲೆ ಪ್ರಯತ್ನ ಕೆಲ್ಲೆರಿಯಿ ...ಶಾಂತಿ ಸಂಧಾನ ಫಲ ಜಾಯ್ನಿ ... ದ್ವಾಪರ ಯುಗ ಸಂಪನ್ನ ಜಾವಚೆ ಸೂಚನ ದಿಸ್ತಾ ... ನವ್ವೋ ಚಿಗುರು ಯೆವ್ಕಾ ಜಲ್ಲೇರಿ .. ಪೊರ್ನೊ ಪಿಕ್ಕಿಲೇ ಪಲ್ಲೋ ಝಡ್ಚೆ .. ಸೃಷ್ಠಿ ಧರ್ಮ ."
ಭೀಷ್ಮ : "ಲೋಕಪಾಲಕಾ ವಾಸುದೇವಾ .. ! ಮಿಗೆಲೆ ಆಯುಷ್ಯ ಕಾಲ ಸಮಾಪ್ತ ಝಲ್ಲಾ ಮಿಗೆಲೆ ದೊಳೆ ಯೆದ್ರಾಕ ... ಹಾಂವೆ ಹೊಡ್ದ೦ ಕೆಲ್ಲೆಲೆ ಚೆರ್ಡು೦ವ ಮೋರ್ನ್ ಪೋಡ್ಚೆ .. ಮಕ್ಕಾ ಪೊಳೋಚ್ಯಾ ಜಾಯ್ನಾ . ಕುರುಕ್ಷೇತ್ರ ಯುದ್ಧ ಭೂಮಿ೦ತ್ ... ಹಾಂವೆ ವೀರಗತಿ ಪಾವಕಾ ಮೋಣು ಮಿಗೆಲಿ ಇಚ್ಚಾ . ಆಜ್ಞಾ ದೀ ಮುಕುಂದಾ . ಹೇ ಮಂಥಾರೆ ವೈರಿ ಕರುಣ ದಕ್ಕಯಿ ದೀನ ಬಾಂಧವಾ .. ! " ಮೋಣು ಸಂಘುನ್ ಕೃಷ್ಣಾ ಕ ಫೊಟೊನ್ ಧರ್ಲೆ . ಕೃಷ್ಣಾ ನ ' ಜಾಯ್ತ ' ಮ್ಹಳ್ಳೆಲೆ ಅನುಮೋದನಾ ತಗೆಲೆ ತೊಂಡಾರಿ ದಕ್ಕಯಿಲೆ . ಕೃಷ್ಣಾ ನ ಸಾತ್ಯಕಿ ಅಪ್ಪೋನ್ ಕನ್ನಾ೦ತು " ಕರ್ಣಾ ಕ ಗಂಗಾ ನ೦ಯಿಚೆ ತಟಾರಿ ಅಪ್ಪೋನ್ ಹಾಡಿ . ಹಾಂವ ಥ೦ಯಿ , ತುಂಗೆಲೆ ಖತೀರಿ ರಕ್ಕುನ್ ರಾಬತಾ . ಮಕ್ಕಾ ತಗೆಲೇಗಿ .. ಪ್ರತ್ಯೇಕ ಜಾವ್ನ್ ಉಲ್ಲೋಚ್ಯಾ ಅಸ್ಸ ಮೋಣು ಸಾಂಗ " ಮ್ಹಳ್ಳಲೋ ಕೃಷ್ಣು .
ಉಮಾಪತಿ
No comments:
Post a Comment