MAHABHARATH Part - 32 Shalya raayu - Yuddha tayyaari

MAHABHARATHA    Part - 32      ( Konkani Bhaashentu )

        SHALYA  RAAYU        YUDHDHAA TAYYARI

        ಶಲ್ಯ ರಾಯು - ಯುದ್ಧ ತಯ್ಯಾರಿ 

                           ಮಾದ್ರ ದೇಶಾಚ್ಯೊ ರಾಯು ಶಲ್ಯ . ಹ್ಯೋ ನಕುಲ ಸಹದೇವಾಂಕ ಮಾಮು ಲೆಕ್ತಾ . ತಾಂಗೆಲೆ ಆವ್ಸು  ಮಾದ್ರಿ ದೇವಿ ,  ಶಲ್ಯ ರಾಯಲಿ  ಭಯಿಣಿ . ಹ್ಯೇ ಕಾರಣಾ ನಿಮಿತ್ಯ ಶಲ್ಯ ರಾಯು ಪಾಂಡವಾಂಕ ಸಹಾಯು ಕೊರ್ಚ್ಯಾಕ ಉಪಪ್ಲಾವ್ಯ ನಗರಾಕ ಸೈನ್ಯ ಸಮೇತ ಜಾವ್ನ್ ಪ್ರಯಾಣ ಕೊರ್ಚೆ ತಯ್ಯಾರಿರಿ ಅಸ್ತ . ಗೂಢಚರಾ ಲೆ ನಿಮಿತ್ಯ ಧುರ್ಯೋಧನಾ ಕ ಹ್ಯೋ ವಿಷಯು ಕಳ್ತಾ . ಶಲ್ಯ ಅಶ್ವ ವಿದ್ಯೆಂತು , ಸಾರತ್ಯಾ೦ತು , ದ್ವಂಧ್ವ ಬಾಣ ವಿದ್ಯೆಂತು ಪ್ರವೀಣ . ದಿವಸಾನ್  ದಿವಸ ಪಾಂಡವ ಪಕ್ಷಾ ಮೆಳ್ಚೆ ಲೋಕು ವೃದ್ಧಿ ಝತಾ ಅಸ್ಸ . ಹ್ಯೇ ವೆಳ್ಯೇರಿ ಶಕುನಿ ಮಾಮಾ ನ ಏಕ ಉಪಾಯು ಸಂಘಲೇ .... " ಧುರ್ಯೋಧನಾ .. ! ಶಲ್ಯ ರಾಯು ಯುದ್ಧಾ೦ತು ನಿಪುಣ  ಅಸ್ಸ . ಹಾಂತು ಕಾಯೀ ಸಂಷಯು ನಾ . ಝಲ್ಲೆರಿ ತಾಕ್ಕಾ ಸುರಾ ಪಾನ ಮ್ಹಳ್ಳೆರಿ .. ಭಾರಿ ಖುಷಿ ಮೋಣು ಅಯಿಕಲಾ . ತಕ್ಕ ವಾಟ್ಟೇರಿ ಮಧ್ಯೆಂತು ಮೆಳ್ನ್ ... ಆದರ್ ಕೊರ್ನ್ ಆಮ್ಗೆಲೆ ಶಿಬಿರಾಕ ಹಾಣು ಖಂಟ ಪೂರ್ತಿ ಪಿವ್ವೊಕಾ ... ಅನಿ ತಾಗೆಲೆ ಮನ ಆಮ್ಗೆಲ್ ದಿಕಾನ ಘು೦ವ್ಡಾಕಾ . ಪಿಲ್ಲೆಲೆಂಕ ... ಅಮಲ ಆಯ್ಯಿಲೆ ತೆದ್ನಾ ಅಂಗಾರಿ ಅಶಿಲೆ ಅಂವಗಾಲೆ ತಾಯಿ ಕಾಣು ದಿತ್ತಾತಿ . ಹ್ಯೇ  ವಿಷಯಾಂತು ತುಕ್ಕಾ ಸಂದೇಹು ನಕ್ಕಾ " .

ಧುರ್ಯೋಧನ : " ಮಾಮಾ ...!  ತಶಿ ಝಲ್ಲೆರಿ ಹ್ಯೇ ಕಾಮ ತುವೆಂಚಿ ಕೊರ್ನ್ ದೀವ್ಕಾ " ಮ್ಹಳ್ಳಲೋ ಧುರ್ಯೋಧನ . ಶಲ್ಯಾ ನ ಯೆವಚೆ ವಟ್ಟೇರಿ ... ಪಾಂಚ ಯೋಜನೇ ಮುಕಾರಿ ಯೆಕ ವಿಶ್ರಾಂತಿ ಗುಡಾರ ಘಲ್ಲೆ ( ಏಕ ಯೋಜನಾ ಮ್ಹಳ್ಳೆರಿ ಧಾಹ ಕಿಲೋ ಮೀಟರ್ ) ಅನಿ ಹಾಂಗಾ ಮಾಸ ಮಧ್ಯ, ಸಂಗೀತ ಆಯೋಜನ ಕೊರ್ನ್ ಶಲ್ಯ ರಾಯಾ ಕ ಮನಾ ಸಂತುಷ್ಠಿ ಕೋರ್ಚ್ಯಾಕ ರಬ್ಲೀ೦ತಿ . ಶಲ್ಯ ರಾಯಾಕ ... ಹ್ಯೇ ಜಾಗೆರಿ ಕೋಣೆ ಸತ್ಕಾರು ಕೆಲ್ಲಾ  ಮೋಣು ಕಳ್ನಿ . ಶಕುನಿ ಅನಿ ದುಃಶ್ಶಾಸನ ಎದ್ರಾಕ ಪೋಣಿ೦ತಿ . ತನ್ನಿ ದೊಗ್ಗಾನಿ  ವಿಂಗಡ ವೇಸು ಘಾಲ್ನ್ ... ಸಾಧಾರಣ ಸೈನಿಕಾ ಮ್ಹಣ್ಕೆ ಶಲ್ಯ ರಾಯಾಕ ಜಾವ್ಕಾ ಜಲ್ಲೆಲೆ ಹತ್ತಾ ಹಾಣು ದಿತ್ತಶಿಲೀಂತಿ . ಶಲ್ಯ ರಾಯಾಕ ಮಸ್ತ ಸಂತೋಷು ಝಲ್ಲೆ . ... ಆಶ್ಚರ್ಯ ಝಲ್ಲೆ ... ಇತ್ಲೆ ಹ್ಯೇ  ನಮೂನೇರಿ ... ಕೋಣೆ ಸನ್ಮಾನು ಕೆಲ್ಲೆಲೆ ಮೋಣು ! . ಏಕ ರಾತ್ರಿ ಥಂಯ್ ಕಾಣು ಹೇರದಿವಸು ಪ್ರಯಾಣ ಮುಕಾರ್ಸುಚ್ಯಾ ವತ್ತನಾ ಶಲ್ಯ ರಾಯಾ ನ ನಿಮ್ಗಿಲೆ . " ಕೋಣೆ ಹ್ಯೇ ಸನ್ಮಾನು ಮಕ್ಕಾ ಕೆಲ್ಲೆಲೆ ? " ಪ್ರತಿ ಪೊಟಿ ನಿಮ್ ಗೀತಾನಾ ಕೊಣಯ್  , ... ಕೋಣೆ  ಕೆಲ್ಲೆಲೆ ಮೋಣು ಸಂಘನಾತಿ . ಆಖೇರಿಕ ಎಕ್ಲೆನ ಸಂಘಲೇ ... " ಮಹಾರಾಜಾ ... ! ತುಮ್ಗೆಲೋ ಯೆಕ್ಲೊ ಅಭಿಮಾನಿ ನ , ತುಂಗೆಲೋ ಸೇವೆಕ ನಿಯೋಜಿತ ಕೊರ್ನ್ ಚಮ್ಕಾಲೊ ".      ಧುರ್ಯೋಧನಾ ಲೇ ನಾವ ಕೊಣಾಯ್ ಸಂಘನಿ . ಶಲ್ಯ ಮಹಾರಾಜ ಉಪಪ್ಲಾವ್ಯ ನಗರಿ ಕ ಪಾವ್ಚ್ಯಾ ಝಲ್ಲೆ . ಗಳೋ ಭರಿ ಪೀವ್ನು ಅಶೀಲೋ . ಆನ್ನೇಕ ಪೋಟಿ ಶಲ್ಯ ಮಹಾರಾಜಾ ನ ನಿಮ್ಗಿಲೆ .ಏಕ ಮಂತ್ರಿನ ... " ಮಹಾಪ್ರಭೋ .. ! ಆಮ್ ಕಾ ಸರ್ವಾಂಕ ಇತ್ಲೆ ಸನ್ಮಾನ ಕೆಲ್ಲೆಲೆ ಧುರ್ಯೋಧನ ಸಾರ್ವ ಬ್ಹೌಮಾನ ಮೋಣು ಮಕ್ಕಾ ಅತ್ತ ಕಳ್ಳೆ ... ತಕ್ಕ ತುಗ್ಗೆಲ್ ವೈರಿ ಮಸ್ತ ಅಭಿಮಾನ ಪ್ರೀತಿ ಅಸ್ಸ " ವೇಳು  ಪೊಳೋನ್ ಧುರ್ಯೋಧನ , ಶಕುನಿ ಗುಢಾರಾ ಭಿತರಿ ಆಯಿಲೀ೦ತಿ . " ಜಯ ಹೊ ಮಾದ್ರ ಪಾಲಾ ... ಶಲ್ಯ ಮಾಹಾರಾಜಾ ಜಯ ಹೊ ... ! ಮೋಣು ಜಯಕಾರ ಕರ್ತಾಚಿ ಶಕುನಿ ನ ಶಲ್ಯ ರಾಯಾಲೆ ಗಳೇಕ ಫುಲ್ಲಾ ಮಾಳ  ಘಲ್ಲಿ . ಶಲ್ಯ ರಾಯಾಕ ಮಸ್ತ ಸಂತೋಷು ಝಲ್ಲೋ . " ಶಲ್ಯ ಮಹಾರಾಜ ಸೌಖ್ಯನವೆ ... ? " ಮೋಣು ಧುರ್ಯೋಧನಾನ ನಿಮ್ ಗೀತನಾ ... " ತೂ  ಸೌಖ್ಯ ನವೇ ಕೌರವೇಂದ್ರಾ .. ?" ಮೋಣು ಶಲ್ಯ ರಾಯಾನ ನಿಮಗಿಲೆ . ತನ್ನಿ ದೋಗ ಜನಾನಿ ಉಲ್ಲಯಿತಾ ಆಸ್ತಾನಾ ... ಶಕುನಿ ... ಸೂರೋ ಬೋರ್ನ್ ಬೋರ್ನ್ ದಿತ್ತಾಶಿಲೋ . ಧುರ್ಯೋಧನಾನ ಪಿಲ್ಲೇ  ಮ್ಹಣ್ಕೆ ನಾಟಕ ಕೆಲ್ಲೆ .

 " ಕೌರವೇಂದ್ರಾ ... ! ತುಕ್ಕಾ ಯೆಕ ವರದಾನ ಕೋರ್ಕಾ ಮೋಣು ಲೆಕ್ಲಾ . ತುಕ್ಕಾ ಕಸಲೆ ಜಾವ್ಕಾ ಮೋಣು  ಸಾಂಘ .... " ಮ್ಹಳ್ಳಲೊ ಶಲ್ಯ ರಾಯು    

ಧುರ್ಯೋಧನ : " ಸೋಡಿ .. ಮಾಮಾ ... ಮಕ್ಕ ಕಸಲೆಯೀ ನಕ್ಕಾ ... ತುಗ್ಗೆಲ್ ವಿಶ್ವಾಸು ಪ್ರೀತಿ ಅಸ್ಲೆರಿ ಪೂರೊ ... "  

ಶಕುನಿ :   " ಕಸಲೆ ಧುರ್ಯೋಧನಾ .. ? ಶಲ್ಯ ಮಾಮಾನ ವರ ದಿತ್ತಾ ಮ್ಹಣತಾನಾ ... ನಕ್ಕ ಮೋಣು  ಸಂಘುನ್ ... ಮಾಮ್ಮಾಲೆ ಮನ ದುಕ್ಕಯಿತ ವೇ ... ? ತಶಿ ಕೊರ್ಚೆ ಸಮ್ಮ ನಯ್ ಬಾಳಾ ... ! ತಾಣೆ  ನಿಮಗೀ ಮೋಣು  ಸಂಘತಾನಾ ...  ತಶಿ ಕೋರು ನಜ್ಜ ... ಶಲ್ಯ ಮಾಮಾ ದೂರ್ಚ್ಯೊ ಮನುಷು  ವೇ .. ಇತ್ಲೆ ಲಗ್ಗಿ ಸಂಬಂಧು ಅಸ್ಸುನ್ ತೂ೦ವೆ ನಿಮಗುಕಾಚಿ.. ಚ್ಯಿ " 

ಧುರ್ಯೋಧನ : " ಹಾಂವೆ ನಿಂಗಿಲೆ ನಂತರ ಜಾಯ್ನಾ ಮ್ಹಳ್ಳೇರಿ ... ಮಕ್ಕ ಮಸ್ತ ಮನ ದುಕ್ತಾ ... "

ಶಲ್ಯ ರಾಯು : " ಫಟ್ಟಿ ಉಲ್ಲೋಚೆ , ಸಂಘಿಲ್ ಉತ್ತರಾಕ  ಚುಕ್ಕೋನ್ ಘೇವ್ಚೆ ... ಆಮ್ಗೆಲೆ ವಂಶಾಂತು ನಾ ... ಅಮ್ಮಿ ಮಾದ್ರ ದೇಶಾಚೆ ... ದಿಲ್ಲೆ ಉತ್ತರಾ ಕ ನಂಗೂನ್ ಜೀವನ ಕರ್ತಾಲೆ " 

ಧುರ್ಯೋಧನ : " ತಶಿ ಝಲ್ಲೇರಿ ... ತೂ ಮಿಗೆಲೆ ಪಕ್ಷಾಂತು  ಯೇವ್ನು ಮಕ್ಕಾ ಯುದ್ಧಾ೦ತು ಸಹಾಯು ಕರಿ ಶಲ್ಯ ಮಾಮಾ "

ಶಲ್ಯ ರಾಯು : " ತಿತ್ಲೆಂಚಿ ನವೆ .. ಜಾಯ್ತ ... "

ಸಹಕುನಿ : " ಪೊಳೆ .. ! ಕಿತ್ಲೆ ಖುಷಿ ಝಲ್ಲಿ ಪೋಳೆ  ಶಲ್ಯ ಮಾಮಾ ಕ ... ! ತ್ಯೋ ಕೆದನಾಯ್ ತುಕ್ಕಾ ಜಾಯ್ನಾ ಮ್ಹಣ್ತಾ ಕೀ .. ? " 

ಮತ್ತೇರಿ ಯೆರ್ವಲೆಲೆ ಅಮಲ .. ಪಯ್ಯ ಗಾಂಟಿಕ ಆಯಿಲಾ ಮ್ಹಣ್ಕೆ ಝಲ್ಲೆ ... ಶಲ್ಯ ರಾಯಾ ಕ . " ಧುರ್ಯೋಧನಾ .. ! ತೂ ಮಿಗ್ಗೆಲೆ ಯೇಕ ಅಕ್ಷೋಹಿಣಿ ಸೈನ್ಯ ಘೇವ್ನು ಹಸ್ತಿನಾವತಿಕ ವಸ . ಹಾಂವ ಮಿಗೆಲೆ ಭಯಿಣಿ  ಚೆರ್ಡುವಾಂಕ ಪೊಳೋನ್ ಯೆತ್ತಾ " ಮ್ಹಳ್ಳಲೋ ಶಲ್ಯ ರಾಯು . 

ಧುರ್ಯೋಧನ : " ಕೃತಾರ್ಥ ಝಲ್ಲೋ ಶಲ್ಯ ಮಾಮಾ ... ! ಮಕ್ಕಾ ಮಸ್ತ ಸಂತೊಷ ಝಲ್ಲೋ " ಮ್ಹಳ್ಳಲೋ ಧುರ್ಯೋಧನ . ಹಕ್ಕಾಚಿ ಮೊಣಚೆ ... ಕೊಣಾಲೆ ಪ್ರಾಪ್ತ ಕೊಣಾಕ ಮೋಣು .. ! ಪಾಂಡವಾಂಕ ಸಹಾಯು ಕೋರ್ಕಾ ಮೋಣು ಆಯ್ಯಿಲೊ ... ಯೇ ಕ ಅಕ್ಷೋಹಿಣಿ ಸೈನ್ಯ ಆಯ್ಯಿಲೆ ತಶೀಚ್ಯಿ ಕೌರವ ದಿಕಾನ ಗೆಲ್ಲೆ . ಸುರಾ ಪಾನ ಅಮಲಾರಿ ಮಾದ್ರ ಸೈನ್ಯ ಕೌರವ ಸೈನ್ಯ ವೊಟ್ಟು  ಲೀನ ಝಲ್ಲೆ . ಶಕುನಿಲೆ  ಕುತಂತ್ರಾಕ  ಫಲ ಮೆಳ್ಳೆ . 

                        ಶಲ್ಯ ರಾಯು ,ಪಾಂಡವಾನಿ  ಅಶಿಲೆ  ಉಪಪ್ಲಾವ್ಯ ನಗರಾ ಕ ಯೇವ್ನ್ ಪಾವಲೋ . ನಕುಲ , ಸಹದೇವ ಶಲ್ಯ ಮಾಮಾಕ ಧಾವ್ನ್ ಯೇವ್ನ್ ಫೊಟೊನ್ ಧರ್ಲೆ . ಸೌಹಾರ್ದ ಸ್ವಾಗತ ಕೆಲ್ಲೆ . " ಧರ್ಮಜಾ .. ! ಹಾಂವೆ ಹೊಡಿ ಚೂಕಿ ಕೆಲ್ಲಿ .. ತುಂಕಾ ಸಹಾಯು ಕೋರ್ಕಾ ಮೋಣು ಲೆಕ್ಕುನ್ ಯೆತ್ತಾನಾ ... ಯೆವಚೆ ವಾಟ್ಟೇರಿ ಮಿಗ್ಗೆಲೆ ಮನ ಘು೦ವಲೆ ... ಮಿಗೆಲೆ ಮಾದ್ರ ಸೈನ್ಯ ಧುರ್ಯೋಧನಾಕ ದಾನ ಕೆಲ್ಲೆ ... ಸುರಾ ಪಾನ ಕೋರು ನಜ್ಜ ಅಶಿಲೆ ... ಕೌರವಾಲೆ ಆತಿಥ್ಯ ಸ್ವೀಕಾರ ಕೋರು ನಜ್ಜ ಅಶಿಲೆ ... ಹ್ಯೇ  ವೆಳ್ಯೇರಿ   ತುಮ್ ಕಾ ಏಕ ಉತ್ತರ ದಿತ್ತಾ  .. ಹಾಂವ ಧುರ್ಯೋಧನಾಲೆ ಪಕ್ಷಾಂತ್ ಅಸ್ಲೆರಿಯಿ ... ವೇಳು ಮೆಳ್ಳೆಲೆ ತೆದ್ನಾ ಹಾಂವ ತುಮ್ ಕಾ ಸಹಾಯು ಕರ್ತಾ . ತುಮ್ಗೆಲೆ ರಕ್ಷಣಾ ಕೋರ್ಚ್ಯಾಕ ಮಕ್ಷಿ ಮುಕಾರಿ ಪೋಳಯಿನಾ " ಮೋಣು ಶಲ್ಯ ರಾಯಾನ ಉತ್ತರ ದಿಲ್ಲೆ . ಆನಿ ರಥಾರಿ ಚೋ ಣು ಹಸ್ತಿನಾವತಿ ದಿಕಾನ ಪ್ರಯಾಣ ಕೆಲ್ಲೆ . ಮದುರ ನಗರಿ ದುಕೂನ್ ಸಾತ್ವತೀಲೆ ಪೂತು ಸಾತ್ಯಕಿ , ಏಕ ಅಕ್ಷೋಹಿಣಿ ಸೈನ್ಯ ವೊಟ್ಟು  ಕೊರ್ನ್ ಪಾಂಡವಾಂಗೆಲೆ ಪಕ್ಷಾಕ ಮೆಳ್ಳೊ . ಚೇಡಿ ರಾಯು ದೃಷ್ಟಕೇತು ... ಏಕ ಅಕ್ಷೋಹಿಣಿ ಸೈನ್ಯ ಘೇವ್ನ್ ಪಾಂಡವ ಪಕ್ಷಾ ಕ ಯೇವ್ನ್ ಮೆಳ್ಳೊ . ಮಗಧ ರಾಜ್ಯಾ ದುಕುನ್ ಜರಾಸಂಧಾಲೆ ಪೂತು ಸಹದೇವ ಏಕ ಅಕ್ಷೋಹಿಣಿ ಸೈನ್ಯ ಘೇವ್ನ್ ಪಾಂಡವ ಪಕ್ಷಾ  ಕ ಯೇವ್ನ್ ಮೆಳ್ಳೊ . ಕೇಕಯ ರಾಜ್ಯ , ಪಾಂಚಾಲ ರಾಜ್ಯ , ಪಾಂಡ್ಯ ರಾಜ್ಯ , ಅನೇಕ ಸನ್ನ ಸನ್ನ ರಾಜ್ಯ ಪಾಂಡವ ಪಕ್ಷಾಕ ಯೇವ್ನ್ ಮೆಳ್ಳಿ೦ತಿ . ಪಾಂಡವ ಪಕ್ಷಾಂತು ಅತ್ತ ಸಾಥ್ ಅಕ್ಷೋಹಿಣಿ ಸೈನ್ಯ ಅಸ್ಸ . ಏಕ ಅಕ್ಷೋಹಿಣಿ ಸೈನ್ಯ ಮ್ಹಳ್ಳೇರಿ ..21870 ರಥ   , 109350 ಸೈನಿಕ  , 65610 ಅಶ್ವ ಬಲ , 21870 ಹಸ್ತಿಯೋ  ...  ಏಕ  ರಥ  , ಏಕ  ಹಸ್ತಿ  , ತೀನಿ  ಅಶ್ವ , ಪಾಂಚ ಸೈನಿಕ  ಅಸ್ಲೇರಿ ತಕ್ಕಾ  ' ಪಟ್ಟಿ ' ಮ್ಹಣತಾತಿ ... ತಸಲೆ ತೀನಿ ಪಟ್ಟಿ ವೊಟ್ಟು  ಝಲ್ಲೇರಿ .. ' ಸೇನಾಮುಖ ' ತೀನಿ ಸೇನಾ ಮುಖ ವೊಟ್ಟು ಝಲ್ಲೇರಿ ...' ಗುಲ್ಮಾ ' ಮ್ಹಣತಾತಿ . ಅಸಲೆ ತೀನಿ ಗುಲ್ಮಾ ವೊಟ್ಟು  ಝಲ್ಲೇರಿ .. ' ಏಕ ಗಣ ' ಝತ್ತಾ . ತೀನಿ ಗಣ ಏಕ ' ವಾಹಿನಿ ' ಝತ್ತಾ . ಅಸಲೆ ತೀನಿ ವಾಹಿನಿ ಏಕ 'ಚಾಮು ' ಝತ್ತಾ . ಅಸಲೆ ತೀನಿ ಚಾಮು ಏಕ ' ಅನೀಕಿನಿ ' ಝತ್ತ . ಅಸಲೆ ಆನೀಕಿನಿ ಧಾಹ ವೊಟ್ಟು ಝಲ್ಲೆರಿ ... ಏಕ ' ಅಕ್ಷೋಹಿಣಿ 'ಮ್ಹಣತಾತಿ . ಅತ್ತ ಕುರು ಪಾಂಡವಾಂಗೆಲೆ ವೊಟ್ಟು 18 ಅಕ್ಷೋಹಿಣಿ ಸೈನ್ಯ ಯುದ್ಧಾಕ ವೊಟ್ಟು ಝಲ್ಲೆಂತಿ . ಸಗಳೆ ಜಂಬೂ ದ್ವೀಪಾಂತ್ ಅಶಿಲೆ ರಾಯ ... ಪಾಂಡವ , ಕೌರವಾಂಕ ಯುದ್ಧಾ ಸಹಾಯು ಕೋರ್ಚ್ಯಾಕ ಸಿದ್ಧ ಝಲ್ಲೆಂತಿ .

                               ಕೌರವ ಪಕ್ಷಾಕ ಸಗಳೇ ಭರಥ ಖಂಡಾಚ್ಯೆ ಸರ್ವ ಕ್ಷತ್ರಿಯ ಲೋಕು ಯೇವ್ನ್ ಮೆಳ್ಳೆಂತಿ . ಪ್ರಗವೋತಿಷ ರಾಜ್ಯಾ ದುಕೂನ್ ಭಗದತ್ತ , ಮಾದ್ರ ದೇಶಾ ದುಕೂನ್ ಶಲ್ಯ , ಬಾಹ್ಲಿಕ ದೇಶಾ ದುಕುನ್ ಭೂರಿಶ್ರವ , ಕಾಂಬೋಜ ದುಕುನ್ ಸುದಕ್ಷಿಣಾ , ಸಿಂಧು ದೇಶಾ ದುಕೂನ್ ಜಯಧೃತ , ಮಹೀಷ್ಮತಿ ದೇಶಾ ದುಕೂನ್ ನೀಲ ರಾಯು , ಆವಂತೀ ದುಕೂನ್ ವಿಂಧ - ಅನುವಿಂಧ ರಾಯ ... , ಕೃತ ವರ್ಮ , ಮಧುರಾ ನಗರಿ ದುಕೂನ್ ನಾರಾಯಣಿ ಸೈನ್ಯ , ಕುರುಜಾಂಗಲ ಪ್ರಾಂತ್ಯ , ಮರುದೇಶ ಪ್ರಾಂತ್ಯ , ರೌಹಿ ಕಾರಣ್ಯ , ಅಹಿಚ್ಚತ್ರ , ಕಾಲಕೂಟ , ಗಂಗಾ ಕುಲ ಪ್ರಾಂತ್ಯ , ವಾರಣಾ ವೃತ , ವಟಸ್ಥಾನ ಪ್ರಾಂತ್ಯ , ... ಅಶಿ ಏಕ ಕೀ ..  ದೋನಿ  ಕೀ .. ಶಂಬರಿ ಹಜಾರ ... ! ರಾಜ್ಯಾಚೆ ರಾಯ ಕೌರವ ಪಕ್ಷಾ ಕ ಯೇವ್ನು ಮೆಳ್ಳಿ೦ತಿ . 

                       ಇತ್ಲೆ ಹೋಡ ಸೈನ್ಯಾಕ ಸಹಾಯು ಕೋರ್ಚ್ಯಾಕ ... ಜೇವಣ  ತಯ್ಯಾರಿ ಕರ್ತಾಲೆ , ಹಜಾರ್ ಹಜಾರ ಲೆಕ್ಕಾನ್ ರಾಜ ವೈದ್ಯ ... ಲಕ್ಷಾಂತರ ಕಾರ್ಯ ಕರ್ತ ... ರಥ ಆದಿ ದುರಸ್ತಿ ಕರ್ತಾಲೆ ಬಡಗಿ ಲೋಕು ... ನಂಯ್ ಚೆ ಉದ್ದಾಕ ಹಾಣು  ದಿತ್ತಲೆ ಕೃಷಿಕ ಲೋಕ ... ಆಯುಧ ಸ೦ಮ್ಮ ಕರ್ತಾಲೆ ಕ೦ಮ್ಮಾರ ... ಗುಡಾರ ಘಾಲ್ನ್ ಕಡ್ತಾಲೆ , ಚಿಲ್ಲರೆ ಕಾಮ ಕೊರ್ನ್ ದಿತ್ತಲೇ ಕೂಲಿ ಲೋಕು ... ಅಬ್ಬಬ್ಬಾ ಹೀ ಯುದ್ಧ ತಯ್ಯಾರಿ ... ವರ್ಣನಾ ಕೋರು ಜಾಯ್ನಾ ನಾತ್ತಿಲೆ ಮಹಾಭಾರತಾ ಯುದ್ಧ ತಯ್ಯಾರಿ ಝಲ್ಲೆ 

ಉಮಾಪತಿ